لسعة الحب!!!

[حشيش]

أمر هذه الأيام بقصة حب عنيفة (مش مع خطيبتى) جعلتنى فى حالة من عدم التوازن مع نفسى...لا أعرف إن كنت فرحان ولا زعلان...عندى حالة من النشوة صعب أن أصفها لكم مصحوبة برجفة فى الأطراف وإسهال شديد :shock: :shock: :shock:...هل هكذا يكون الهيام؟؟؟...لا أدرى :shock: :shock: :shock:...بدأت أحب سماع الأغانى القديمة مثل (ياغدار سيبنى فى حالى ياغدار) و (حبيبى أنا كنت بحلم بيك..يوم ورا يوم حبيبى ما جانى نوم حبيبى ما جانى نوم حبيبى) :shock: :shock: :shock:...بدأت تظهر بعض البثور فى أسفل ظهرى من شوقى إليها...دمعت عيناى وأنا أقرأ ديوان للأديب (إبن سكر الحمصانى) يقول فيه:

عيناكى

جميلتان

صغيرتان

تقتلانى

تجذبانى

تنكشانى

فى أعماقى

تضحكان

تبكيان

تلطمان

غلبتنى دموعى...لا أستطيع أن أكمل قراءة الديوان...هل من علاج لما أنا فيه؟؟؟ :shock: :shock: :shock:

المعذب

حشيش

[nora]

أخيرا حشيش :shock: :shock: :shock: :shock:

مش ممكن وانا اقول اية الغيبة الطويله دي اتاري( ولا خليها بلي ستيشن احسن علشان نواكب التطور :oops: :oops: :oops: ) كيوبيد هو السبب :oops: :oops: :lol:

عموما اهلا بيك في نار الحب وكلمات الاغاني الرهيبه مش ممكن فعلا اغاني وكلمات مؤثرة وخاصة كلمة

تجذبانى

تنكشانى :shock: :shock:

فى أعماقى

كلمات مؤثرة انا بجد عزراك الله يكون في العون بص نصحتي روح اغسل رجليك و البس شراب علطول هتحس بتحسن شديد :lol: :lol: :lol:

[mizo1957]

العزيز حشيش

حمدلله علي السلامه .

انت بتحب ايه بالضبط ؟

الي انا فهمتو انك بتحب اكله غريبه عملت لك

حساسيه وارتعاش في الاطراف وادت في مراحلها

المتقدمه لبعض الاعراض الجلديه.

اوعي تسمع الكلام و تلبس شراب فالصوف

ممكن يزود الاعراض.

الف سلامه عليك وابقي طمنا

[Salwa]

اهلا..اهلا....أكيد ألقصة الجديدة وصلتكم اخبارها..صح؟

وطبعا لازم تشارك فى هذا العمل الفنى العظيم ...وبالنسبة//للحالة//

اللى استجدت عليك...أسأل نفسك وخليك صريح وواضح مع نفسك

اولا وثانيا وثالثا..ولو مش نزوة لازم تترك خطيبتك حتى لو أدى ذلك الى

بعض المشاكل...الانسحاب بشرف..أفضل من الاستمرار بخديعة.

وهذا ....الطوفان....أو.....هذه الشرارة تحدث مرة واحدة فقط فىالعمر

ولو اسعدك الحظ وكانت بنت ناس...ربنا يوفقك.....اما ان كانت.....؟؟؟؟؟...ابعد بعيد بعيد...بعيدددددددد.

وثلاثة دش بارد فى اليوم....وحاول تنسى.

فكر...وانت لوحدك.

آسفة انى اتدخلت...بس انت اللى عرضت مشكلتك...وانا بقولك رأيى

سلامى.

[yasser6666]

اقولك مبروك عليك اللسعة واعتبر نفسك محظوظ انك حسيتها لان فيه ناس بتعيش عمرها كله نفسها في لسعة من دول ومش بتطولها حتي الممات ...بس تاكد من شعورك تماما احسن تكون نزوة واعطي لنفسك الوقت الكافي للتفكير اهم حاجة قبل اتخاذ اي اجراء من شانه اللطم علي الخدود(انا بهزر) ...ونصيحتي البعد عن الاغاني القديمة العاطفية لانها بتخرجك من الواقع الي عالم خيالي كله الوان

[linux]

أخى العزيز حشيش

حمد الله على السلامة اولا ...

يا أخى كان فيه أشاعات مغرضة أنك مع المارينز بتعدوا دولارات فى بغداد ...

ماعلينا ... ندخل فى لب (وحمص و سودانى) الموضوع ...

ياباشا اللى وصفته ده مش لسعة الحب ...

ده أسمه العلمى آكلان الحب ...

الحالة اللى وصفتها تدل على أن المرض فى مرحلة متقدمة نسبيا ... بس ماوصلش لسه لمرحلة اننا نبعتك للدكتوور جانسون فى سويسرا وتبطل تعمل الرز المفلفل و ان نينة تسمع الخبر م الراديو و فنجان القهوة يتهز ف أيدها ياأحمد ياسامى !!

لأ ... حالتك ممكن يكون لها علاج عندنا هنا فى المصحة ... أقصد المنتدى !!

لعلاج الأكلان و اللسع عليك بلبخة العفريت الأنجلوى

لعلاج حالة عدم التوازن روح لعم منفاخ العجلاتى يديك حصتين ركوب عجل راليى

لعلاج حكاية أنك مش عارف لو فرحان ولا زعلان أسئل واللى يسأل مايتوهش

لعلاج رجفة الأطراف شكلك كده محتاج أكلة كوارع فى مسمط مالوش صاحب

لعلاج الأسهال استعمل محلول الجفاف

لو كل ده مانفعش مافيش قصادنا غير اننا نعملك زار يطلع البلاوى دى

بس نصيحة من أخوك الصغير ... بطل قراءة إبن سكر الحمصانى اللى موديك فى داهية ده ... خليك ف الشعر الجاهلى ... وياحبذا الهجاء يكون أحسن ...

أى خدمة يامعلم

[mnman]

حشششششششششششششششششيشششششششششششششششش

فينك ياراجل.................. في اشاعة انك هربت مع الصحاف... بس الحمد لله الموضوع طلع لسعة......

ومن مبداء اسئل مجرب ولا تسئل طبيب خد الوصفة دي و اوعي تديها لعدوك يعني أةةةةةةة..الي اولة شرط اخرة أيةةةةةةةةةة.. نور... الله ينور عليك....

كل يوم قبل ماتنام..تقف وضهرك في المرياة .... و تعد من واحد لعشرة... وتغمض عنيك و تعد لحد عشرة تاني وتلف و تبص في المراية.... هاةةةةةةةةةةةةةةةةةة... شفت أية.....

حتتخض و يمكن تتفزع متقلقش استمر عشر مرات يوميا لمدة شهر قبل النوم.... و ادعيلي... حيروح اللسعان وتفوق وتعرف ان مراية الحب عامية....

فهمت حاجة.... :cry: :cry: :D :lol: ...لو حصل وفهمت ياريت تفهمني احسن اخوك ملسوع بس في الشغل....

[se_ Elsyed]

حمد لله على السلامه يا معلم حشيش ....

اللى أنت فيه دلوقت يا زعيم دى حالة حساسية :oops: .... لكن انت عارف أن الفنان هو كتلة من المعاناة ومن رحم هذه المعاناة يأتي الأبداع ... فجماهيرك وعشاق فنك فى إنتظار عمل أدبي ملحمي تتفوق فيه على نفسك وعلى روايتك الخالدة الأولانية .... علشان تكيد الاعادي وتثبت أن موهبتك ماكنتش فقاعة صابون - مع الإعتذار لأخونا رابسو ... هو فين صحيح -

[Rabso]

حمد لله على السلامه يا معلم حشيش ....

اللى أنت فيه دلوقت يا زعيم دى حالة حساسية  :lol: .... لكن انت عارف أن الفنان هو كتلة من المعاناة ومن رحم هذه المعاناة يأتي الأبداع ... فجماهيرك وعشاق فنك فى إنتظار عمل أدبي ملحمي تتفوق فيه على نفسك وعلى روايتك الخالدة الأولانية .... علشان تكيد الاعادي وتثبت أن موهبتك ماكنتش فقاعة صابون - مع الإعتذار لأخونا رابسو  ... هو فين صحيح -

موجود يا حبيبي سي السيد و في منتهى السعادة إنك بتسأل عليا :oops: :oops: :oops:

متابع كل المواضيع تقريباً بس مشاركاتي قليلة .. الظاهر العلبة خلصت :roll:

[حشيش]

حمد لله على السلامه يا معلم حشيش ....

الله يسلمك ياهندزة :) :lol: :)...والله ياجماعة ليكم وحشة...اللى أنا فيه مش عارف أوصفه بجد...هى زميلة جديدة لنا فى البنك الذى أعمل به وهى لبنانية...جاء معها المدير ليقدمها لنا ويعرفنا بها...قال لها وهو يقدمنى لها الأستاذ /محمد حشيش فقلت لها (أهلاً وسهلاً)..ردت قائلة (هلا)...هى قالت هلا دى من هنا وأنا سحت...جبت زيت...مش ممكن الجمال ده...الشعر أصفر غامق وبه خصل صفراء فاتحة مثل الذهب...وكله كوم و(هلا) دى كوم...المهم يوم بعد يوم حسيت إننا بنقرب من بعض أكتر...نسيت أن أقول أننى تانى يوم بعد لقائنا الأول وأنا نازل من البيت رايح الشغل لاحظت وأنا سايق السيارة أننى لابس دبلة الخطوبة وبحركة تلقائية عفوية رحت باصص فى المراية ومدى فلاشر وركنت وخلعت الدبلة وحطيتها فى جيبى وقعدت طول مانا سايق فى الطريق إلى البنك أدعك فى صباعى علشان أثر الدبلة ما يبانش...أفكر جدياً فى كلام الأخت العزيزة سلوى والأخ العزيز ياسر أن أتمسك بها لأن الحب لا يأتى فى حياة الإنسان أكتر من خمس عشر مرات ولكن ضميرى يعذبنى جداً تجاه خطيبتى فلم تمر على خطبتنا إلا أشهر معدودة والبنت هادية وطيبة وأهلها ناس على خلق بالإضافة إن والدتى هى التى إختارتها لى ولو ذكرت لها ما أنوى عليه فلا شك عندى أنها سوف تغضب منى غضباً شديداً.....أريد حلآً :shock:

المعذب

حشيش

[mnman]

قطعت قلبي ياحشيش ....اهئ اهئ اهئ دة صوت البكاء...

بص ياسيدي... اتأكد الاول من الاخت هلا :cool: انها مش مرتبطة وانها انسانة محترمة وتنفعك... و اتأكد انك بتحبها... اصلة ممكن يكون أعجاب مثلا او لآنك مش مقتنع بخطيبتك في عقلك الباطن وبتقول اهي جوازة والسلام.... خلي بالك مش كل باكوا شوكولاتة حلو من برة طعمة بيكون حلو سعات بيكون مضروب....

خلي بالك احسن لا تطول بلح الشام ولا حتي عنب مصر...... احسبها واستخير و ربنا معاك...

هلا عليك.... :) :lol: :)

[DARWEEN]

الله يخرب بيت نوبل وسنينة ...

بقى ياراجل يا .... حشيش علشان ماخدتلك حتة جايزة تتبطر على البت الغلبانه ماركة صنع في مصر

وعلشان أيه دا كله ... حتة هلا لاراحت ولا جت

أعقل ياشيشو وأرجع عن طريق الأهوال اللي عاوز تمشية ده ..

لأ لأ كلمة بجد مش هزار ... ياحبيبنا الجواز حاجة تانية يعني الشعر الأصفر والدلع مش ممكن يكونوا أساس بيت ناجح

[Facts researcher]

الأخ العزيز حشيش ،

أولاً الحمد لله إنك لم تنسحب كما قلت في مداخلة سابقة، بجد أنا أزعل جداً ، وياسيدي عديها و ما تخدش في بالك ، كبر الجمجمة :cool:

شوف ياحشيش ، الراجل لو مرتاح مع مراته أو خطيبته ، صدقني لايمكن يبص لأي واحدة حتى لو كانت ملكة جمال (بالمناسبة أنا عايش عازب و في أوروبا كمان ، يعني بشوف أنقح من الي بتشوفه :lol: )

أفتكر إنك قلت قبل كده إن خطيبتك و أهلها كانوا متقلين عليك في بعض الطلبات ، وخصوصاً تصميم خطيبتك على حفلة بالشيء الفلاني (أفتكر 25000 جنيه) في فندق. الراجل دايماً ياحشيش إذا كانت الست طلباتها فيها دلع ماسخ ، ومبالغات مادية ، بيغضب منها و بيقفش على طول.

اسأل نفسك الأسألة التالية :

*هل حاسس إن خطيبتك بتضغط عليك في حاجات مادية فيها طمع؟؟

*هل حاسس إن خطيبتك مش حاسة بيك، ومش مهتمه أوي بأحاسيسك و مشاعرك؟ يعني دائماً مهتمه إنك تتصل بيها و تحب تسمع صوتك و لاّ لأ ؟

*هل حاسس إن أهل البنت بيحبوك جداً و بيخافوا على مصلحتك الى هي المفروض تبقى مصلحة بنتهم ؟

* ازاي خطيبتك بتفكر في مستقبل حياتكم الزوجية ؟ هل بتفكر صح و لاّ مهتمه بس بالفلوس عشان تتعنطز أمام أصدقاءها مثلاً ؟

* اكتب كل العيوب الي أنت شايفها في خطيبتك في ورقة ، ثم اكتب كل الحسنات الي انت شايفها في زميلتك ؛ ثم اسأل نفسك :

هل الحسنات الموجودة في زميلتك تغطي مساوئ خطيبتك ؟

السؤال الأخير يا حشيش بصراحة مهم و عايز منك إنك تبقى محايد .

بس خد باللك من حاجة إن معظم اللبنانيات في الخليج - و أنا عشت فترة هناك - موضوع الفلوس في الجواز عندهم حاجة أساسية ،و مهمة ، وتكاليف من النوع التقيل :)

بس الشهادة لله عشان ما كونش بديلك معلومات خطأ مش كل اللبنانيات ، أعرف مصريين متجوزين لبنانيات وسوريات و سعده جداً جداً، وعلى فكرة في لبنانيات في الخليج كتير جداً يحبوا يتجوزوا من الشباب المصري .

لو انت شايف ان زميلتك مافيهاش عيب انت ماتحبوش ( طبعاً ما فيش حد كامل ، لكن في عيوب ما تقدرش تقبلها ) يبقى هي دي المناسبة ليك و انسحب احسن من الخطوبة الحاليه ؛ ليه ؟؟؟؟؟؟

لأن لو اسمريت بالشكل ده هاتخسر حاجات كتيرة جداً ، لو كملت مع خطيبتك و اتجوزتها و انت عارف انك ما بتحبهاش ،

تبقى مصيبة :shock:

المهم تتأكد إنك فعلاً بتحب زميلتك في الشغل ، و متأكد تماماً إنك لاتستطيع الإستمرار مع خطيبتك

أكررها تاني لأنها جملة مهمة :

المهم تتأكد إنك فعلاً بتحب زميلتك في الشغل ، و متأكد تماماً إنك لاتستطيع الإستمرار مع خطيبتك

والإختيار ليك في الآخر . (وأعد قراءة مداخلتي مرة أخرى خصوصاً الأسئلة اللي لازم تسألها لنفسك ، عشان دي أسئلة ها تساعدك كتير)

أخوك

الباحث عن الحقائق

[بنت شعنونة]

بعيدا عن الدعابة والضحك

ولو كان الموضوع دا جد فعلا

اطلب منك حاجتين اتنين

تخيل نفسك مكان خطيبتك وهيا كاتبا الكلام دا هنا وانك بتقرى انها شافت واحد غيرك وعجبها ومش عارفا تختار مين فيكو

يا ترى حضرتك ها تحس بايه؟؟

الحاجا التانية

ياريت حضرتك تاخد قرارك بسرعة لآن كدا حضرتك بتخون خطيبتك

بما انك اكييييييد لا تقبل انها تعمل زيك كدا دلوقتي وتقلع دبلة الخطوبة عشان "شافت" شب امور :twisted: :twisted: :twisted:

وفيه كلمه عجبتني جدااااا

شوف ياحشيش ، الراجل لو مرتاح مع مراته أو خطيبته ، صدقني لايمكن يبص لأي واحدة حتى لو كانت ملكة جمال (بالمناسبة أنا عايش عازب و في أوروبا كمان ، يعني بشوف أنقح من الي بتشوفه  ) 

ف لو حضرتك قررت انك تختار خطيبتك

لازم تجاوب ع السؤال دا

انت مرتاح معاها او لا

عشان لو كانت الأجابة "ممكن ابقى مرتاح"

يبقى ارحم بنت الناس اللي مالهاش ذنب

وسيبها من دلوقتي احسن

وربنا يعينكوا على نفسكوا

ويعنا عليكووووووووووووا :twisted: :twisted: :twisted: :twisted:

[Salwa]

تعرف يا محمد بيه حشيش..اقسم لك انك بتفكرنى بأخ لى...بس هو

تصرفاته غيرك....عاوزة اقول من غير مانشعر تلاقينا على طول عايشين

بس حوالين اخباره...هو السنتر...اهو انت كدة بالظبط...

كنا حانعمل ايه من غيرك؟

بس أخى حاطط فى دماغه أنه...أتى قبل أوانه؟؟؟؟؟؟؟؟؟ دى مشكلته الأزلية.

وانت برضه نفس الشئ.....عمالة اكلم نفسى..//راجع القصة الجديدة

فى باب الأدب والشعر // انا تخصص اللى بيكلموا نفسهم.

عمالة أقول وبعدين؟ هو حايتصرف ازاى؟...طيب ولو البنت اللبنانية مش

واخدة الموضوع جد؟؟

فكر كتير كتير....ولو ان الحساسية دى أكيد من كتر التفكير لأنها حاجة

غير معتادة...متعودين نفكر شوية وخلاص.

كلمة جد.......عجل بالزواج....خطيبتك تجيلك....أو...

اتركها فورا...قصدى خطيبتك....بس الأول اتأكد من البنت.

ولو ان خسارة......شكل خطيبتك كدة طيبة.

الزواج رحلة عمر.....فكر.

سلامى.

[nora]

مش عرفة الصراحة اقول اية بس انا هتكلم من منطلق الي حسيته

بجد والله انا لما قريت الكلام الي انت كتبته ده قلبي انقبض و حسيت اني عيزة اعيط وعيزة اقولك كلمه وحده لو ليك اخت هل تقبل ان خطبها يسبها لانه عرف وحده لبنانية او اي كان ؟؟؟؟؟

مش بس كده الي دايقني

عارف يا استاذ حشيش انا كتبه كتابس اديلي سنتين المهم عارف خلال الفترة دي مشفتش فيها جوزي غير اجزات يعني ما يتراوح اسبوعين كل سنة

وبدأت احس في الايام الاخيرة بنوع من الجفاء في العلاقة انا بتكلم معاكم كلكم بمنتهى الصراحة اتعذبت كتير في البداية لان حاولت دايما ارضية بكل الصور لاني مؤمنه ان الست لازم هي تتنازل علشان جوزها يرضى عنها واقسم بالله سواء غلطانة او مش غلطانه كنت بعتذر لمجرد ان اخلي المركب تمشي وان ميجيش يوم ونختلف ومع الغربة والبعد ممكن الجفا يزيد ويحصل لاقدر الله فراق ....

خلال السنين دي كنت بحس ان ممكن هو ينجذب لاي وحده لاي سبب كان شعرها اصفر عينها حمر اي حاجة المهم ان الانسان في البعد بيكون اضعف ما يكون و الشطان شاطر ممكن يمثلك ان الانسان الي انت مرتبط بيها دي وحش كاسر او لوح تلج او او المهم يكرهك فيها والسلام .....

صدقوني ايام كتير مكنتش بنام من التفكير ده وكتير كنت اعد اعيط بدون سبب لمجرد اني اكون خيفة انه في يوم يتغير من نحيتي

فهسألك سؤال ؟؟؟

ياترا لو كنت في مكان جوزي كان ممكن تعمل الي هو عمله و انه راضي بيا و بالوضع ده لحد لما شقتنا تجهز ؟؟؟؟

صدقني انت فشلت مع ان كان عندك كل الطرق الي تحافظ بيه على خطيبتك وعلى الارتباط ده والا ليه خطبتها من الاول مدام مش عايزة ؟؟؟؟

مفكرتش مصير البنت دي اية لما تسبها بعد شهور من الخطوبة الناس هتقول عليها اية ؟؟؟

مفكرتش ممكن يكون مصرها اية ؟؟

المجتمع عمرة مبيرحم اتنين المطلقة والي كانت مخطوبة ......

وعمر ما هيقولوا ابدا ان الراجل الي سبها كان وحش ابسط حاجة بيقلوها اكيد كانت مطلعه عنيه و اسلوبها وحش

اعد مع نفسك كده صدقني هتلاقي ان الشعر مش كل شىء ولا كلمة هلا هتكفيك ممكن تكون فيها عيوب الدنيا كلها وانت مش واخد بالك ويمكن تكون كويسة بس برضوا متظلمش البنت الي معاك

ده راي وانا قلت الي يرضي ضميري وربنا يهديك للخير ويبعد عنك الشطان

[Facts researcher]

كتبت نورا :

لان حاولت دايما ارضية بكل الصور لاني مؤمنه ان الست لازم هي تتنازل علشان جوزها

مين قال أن الزوجة لما بتحاول ترضي جوزها يبقى بتتنازل ؟ :roll:

عجيبة جداً دي :?

طب ليه ما نقولش إن جوزك طالما أنه راضي و عايش بعيد عنك و صابر لغايت دلوقت من غير اما تكوني عايشه معاه عشان الشقة ؛ إنه هو الي بيتعذب و هو الي بيتنازل :idea:

ياعيني الراجل عايش زوج مع ايقاف النتفيذ و عايز يحس ان في ست معاه و أدام عينيه و تبتسمله و عيشا معاه في نفس الغرفه.

هو ده شويه إنه ما يحصلش عليه لغاية دلوقت؟؟ :?

اللي عايز أقوله و أوضحه هي الحقيقة الآتيه :

ان الافعال التي يفعلها الطرفين الزوج أو الزوجة ليُرضي كل منهما الآخر لا يجب أن نقول عنها أنها تنازل بأي حال ولكن نقول عنها أنها

دليل تمسك كل طرف بالآخر و ذلك لقناعة كل منهما بالآخر .

أكررها :

و ذلك لقناعة كل منهما بالآخر

خلاص ياأخت نورا ، أخدت بالك :neutral:

فكر ياحشيش في اللي كتبتهولك ، إقرأه جيدااااااااااااااااااااً

[nora]

انا مقصدتش بالمعني الي انت اخدته ده خالص انا مقتنعه ان الحب والتمسك من كل الطرفين هو الي بيخلي حد يتغاضا عن بعض التفاهات الي ممكن توقف المراكب السيرا

صدقني انا مبعتبرش ده ذل ابدا ولا ضعف بس سعات لما الوحده بتعمل كده يفكرها هبله او مدلوقه عليه فالراجل يقلبها :mad: :mad:

صح ولا انا غلطانه في كلامي ده :? :? :?

عموما علشان منخرجش عن الموضوع انا مشتركة معاك في الراي وربنا يهدي الكل للصواب :)

[حشيش]

الأخوة والأخوات الأعزاء

أنا بالفعل فى حالة عدم إتزان مع نفسى منذ أن ألتقيت بها...لم أشعر مطلقاً بهذا الشعور الذى لا أعرف إن كان شعور جميل أو شعور عبارة عن مزيج من الفرح والخوف من المجهول والظلم أن أترك خطيبتى بدون ذنب جنته...ولكن فى النهاية لا أستطيع أن أمنع نفسى من الإستمرار...قرأت مداخلاتكم جميعاً بشغف لأنى مش عارف أعمل إيه أو أتصرف إزاى؟؟... ولكن كلكم تحدثتم عن الحل الذى يرضى ضمائركم ولم يتطرق أحد لما أعانيه أنا...الجميع مهتم بما هو ذنب خطيبتى وأنا لا أختلف معكم في هذا...أنا بتكلم بجد جداً ...بعد ما خلعت الدبلة فكرت فى اليوم التانى إن ما فعلته كان رغبة بداخلى أن أتفادى أى شئ من شأنه تقويض هذه العلاقة التى لم تكن قد بدأت بعد ولكننى إكتشفت إن ده كلام خايب لسببين: أولاً كل زملائى فى العمل عارفين إنى خاطب وزى ما بيقوله (الكدب مالوش رجلين)...ثانياً ماكنتش متأكد هل هى قد لاحظت الدبلة فى اليوم الأول أم لا...لذلك قررت إنى ألبس الدبلة وقد كان...والأن عودة إلى ردودكم:

شوف ياحشيش ، الراجل لو مرتاح مع مراته أو خطيبته ، صدقني لايمكن يبص لأي واحدة حتى لو كانت ملكة جمال

أخى العزيز فاكتس ريسرشر...أولاً أشكرك جداً على ترحيبك بى...

الموضوع ياسيدى أننى لا مرتاح ولا تعبان مع خطيبتى ببساطة لأنى نزلت خطبتها ورجعت البحرين...أتصل بها مرة فى الأسبوع على سبيل تأدية الواجب مش أكتر ولكنى لم أشعر معها بالشعور الذى أتحدث عنه هنا...فمن الظلم أن أقيم خطيبتى لأنها مثل حراس المرمى (لم تختبر)...

مفكرتش مصير البنت دي اية لما تسبها بعد شهور من الخطوبة الناس هتقول عليها اية ؟؟؟ 

مفكرتش ممكن يكون مصرها اية ؟؟ 

المجتمع عمرة مبيرحم اتنين المطلقة والي كانت مخطوبة ......

الأخت العزيزة نورا...عملت بنصيحتك...غسلت رجلى ولبست شراب وبرده مافيش فايدة....نورا نصيحتى أنا ليكى إنك ماتتفرجيش على أفلام عربى كتير...أنا مافيش حاجة تعبانى غير الموضوع بتاع خطيبتى ده...يعنى أنا مش (جبلة) زى منتى فاكرة...أنا خيفة خيفة خيفة :) :lol: :)

كلمة جد.......عجل بالزواج....خطيبتك تجيلك....أو... 

اتركها فورا...قصدى خطيبتك....بس الأول اتأكد من البنت. 

أشعر بأنى ميال لرأى الأخت سلوى فى ضرورة فسخ الخطوبة ولكن مش عارف حقول إيه لوالدتى أو لخطيبتى وأهلها...يتهيئ لى عدم ذكر السبب الحقيقى سيكون أفضل للبنت لأن لو عرفت إنى تركتها من أجل فتاة أخرى فسوف يكون له أثر أسوء من أى سبب تانى لأن ده حيكون فيه جرح لكبريائها كأنثى (سمعت الكلمتين دول قبل كده فى فيلم الخروف والحب :shock: :shock: :shock: ).....

ياريت حضرتك تاخد قرارك بسرعة لآن كدا حضرتك بتخون خطيبتك

مافيش حاجه إسمها بتخون (خطيبتك) ياشانا...فيه حاجة إسمها خيانة زوجية...الخطوبة ما هى إلا فترة لإختبار المشاعر وهذا هو الهدف الحقيقى منها.

ياحبيبنا الجواز حاجة تانية يعني الشعر الأصفر والدلع مش ممكن يكونوا أساس بيت ناجح

تكرم عينك خاييى :D :D :D ...معلوم سيدى :D :D :) ...بس برده يادارون ياخويا الواحد لما يفتح عينه الصبح على قشطة بالصنوبر غير لما يفتح عينه على (جبنة البقرات الثلاثة) :) :) :)

خلي بالك احسن لا تطول بلح الشام ولا حتي عنب مصر......

ياأحلى إسم فى الوجود يامنمن...ياإسم مخلوق للخلود يامنمن :) :) :)...تعبت يامنمن من التفكير خلاص مش قادر...شعارى فى المرحلة المقبلة هو (الحذر..ثم الحذر..ثم الحذر)....إحترس من القط :shock: :shock: :shock:

[Facts researcher]

الأخ العزيز حشيش ،

أولاً : مين قال أني لم أهتم بمشاعرك في الكلام اللي كتبتهولك :!:

أنت قرأت الكلام كله و لا لأ ؟؟

أنا قلتلك ازاي تكتشف هل فعلاً أنت عايز زميلتك و لا لأ .

وبعدين يا حشيش أنا مش معترض على إنك تتجوز زميلتك اللبنانية .

لكن

هل أنت متأكد أن البنت اللبنانية دي مش بتلعب بيك ؟؟

حشيش ،

أنا رأي أنك تسأل عن البنت دي الأول ، وبعد كده تسأل البنت وجهاً لوجه إذا كانت موافقة تتجوزك ، وإيه طلبتها .

فهمتني يا حشيش :neutral: :roll: