تعرض مسكنى للسرقة و إستعادة المسروقات

[عادل أبوزيد]

أكتب إليكم بعد مرور بعد مرور ثلاث أشهر على الحادث و لعلنى تعمدت التأخر فى الكتابة حتى أتمكن من الكتابة برأس بارد بعد مرور وقت مناسب على الحادث.

ما سبق كان إستهلالا لابد منه

فى شهر فبراير الماضى كنت تقريبا فى حالة "عزل" حيث كنت أقوم بتجميع أغراضى لأنى بصدد الإنتقال إلى مسكن مؤقت لفترة عمل تعديلات فى منزلى ، و لمن لا يعرف مسألة "العزال" عملية شاقة جدا و خاصة فى حالتى فأنا موجود فى بيتى هذا منذ عشرون عاما و البيت كبير مساحة العمارة كلها على شقة واحدة و لك أن تتصور حجم الجهد المطلوب.

و كنت فى حيرة مذا آخذ معى من الأثاث و ماذا أضعه فى مخزن العمارة.

كل هذا و عبئ فك و تركيب الأثاث الثابت مثل الدواليب و المكتبة.

أكتب لكم تلك التفاصيل المملة حتى يمكن تصور الوضع يوم 2 مارس الماضى.

إستيقظت من النوم لصلاة الفجر ترائى لى الخروج من جناح النوم إلى الصالة و دخلت غرفة مكتبى تقريبا الساعة الرابعة و النصف صباحا و فوجئت بأن باب غرفة المكتب المؤدى للخارج مفتوح و ظننت أن أحد أبنائى نسيه مفتوحا ثم فوجئت بإختفاء ال لاب توب من على المكتب و سألت الأولاد .... و تيقنت أنى تعرضت لعملية سطو !!

[عادل أبوزيد]

لم يشغلنى أبدا هاجس تأمين المكان و لم أهتم أبدا بإغلاق ترابيس للأبواب و كنت أعيش دائما فى حالة أمن كامل.

لكم أن تتصوروا حالتى بعد تيقنى من تعرضى للسطو !! أيقظت أبنائى و إتصلت بشرطة النجدة للأمانة إتصلت بالشرطة تقريبا الساعة الخامسة و بعد ثلث ساعة بالضبط كان عندى فى المنزل لفيف من رجال الشرطة ربما كانوا خمس أو ست أفراد و سألونى عن المسروقات و فحصوا باب المكتب ووصلوا لقناعة أن دخول اللص لم يكن من باب المكتب.

و طلبوا منى رؤية جميع الشبابيك و المطلات و ببساطة و يسر توصلوا أن اللص دخل من شباك الحمام الذى تستخدمه الحاجة والدة زوجتى و هى عمرها سبع و ثمانون عاما - تصوروا معى لو كانت تيقظت وقت السطو - و أرانى الضابط آثار قدم السارق على إفريز شباك الحمام.

المسافة بين هذا الحمام و بين غرفة مكتبة مسافة تزيد على العشرين مترا و لابد له من المرور فى المطبخ !!

و لم يختفى من المنزل إلا ال لاب توب الخاصة بى و معها الحقيبة الخاصة بها و كانت تحت المكتب و كذلك جهاز الشحن الخاص بها.

أكاد أسمع قائلا "إحمد ربنا إللى جت على الكومبيوتر" و أتفق معكم فى هذا

و لكن ماذا عن شعورى بالأمن ماذا عن شعورى بضرورة تأمين المسكن بعد ذلك و لأول مرة فى حياتى ؟

ذهبت مع الضابط لعمل محضر فى قسم الشرطة و كان إجراء سهلا.

و بعدها جائنى خبير البصمات لرفع البصمات و أخذ بصمات المقيمين فى المنزل حتى يتم إستبعادها عند البحث و كان ذلك عند الظهر تقريبا و أبلغنى خبير البصمات فى اليوم التالى أن هناك بصمات غريبة و لكنها ليست مسجلة فى سجلات الشرطة.

فى منتصف مايو تقريبا إتصلت بى الشرطة تليفونيا فى الرابعة صباحا و ذهبت للقائهم أمام منزلى الذى تمت به السرقة و سألونى مرة أخرى عن تفاصيل السرقة مما سبب لى قدرا من الضيق.

و بعدها بيومين إتصل بى مفتش المباحث أنهم وجدوا السارق و من الممكن التوصل للجهاز المسروق و حقيقة لم أصدقهم.

و بعد يوم على ما أذكر جائنى ضابط و معه جهاز الكومبيوتر للتعرف عليه ووجدته هو و لكن كل البيانات ممسوحة من عليه و طلبوا منى الذهاب لمحكمة مدينة نصر لإستكمال المحضر حيث تم تسليمى الجهاز.

الحقيقة أنتهز هذه الفرصة و أنحنى إحترما لفريق العمل فى مدينة نصر.

حاولت السؤال عن السارق و ما علاقته بى و ما علاقته بالكومبيوتر فقالوا ماذا يهمك هو ببساطة شغلته حرامى و إختياره لبيتى تم بمحض الصدفة البحته و نوعه من اللصوص الذين يسطون على المنازل لسرقة أى شئ خفيف و ذو قيمة و قام ببيع الجهاز لتاجر مسروقات بمبلغ 700 جنيه.

رغم تحيتى للشرطة إلا أننى فقدت الإحساس بالأمان و أتأكد كل يوم من إغلاق الترابيس قبل النوم و إغلاق النوافذ رغم أن مسكنى الحالى - المؤقت - فى الدور التاسع.

ترى هل جرب أحدكم الإحساس بعدم وجود الأمن ؟

[أسد]

ورثت عن والدي أمر هام ..

هو أنه مهما كنت أشعر بالأمان .. يجب تأمين كل شئ بإحكام ..

باب المنزل .. وكل النوافذ .. وألا أترك شئ للظروف ..

على الرغم من أن منزل العائلة لم يتعرض للسطو مطلقاً ..

ولكن هذا من باب أن الإحتياط واجب .. ومحدش ضامن الظروف ..

منذ سبعة عشر عاماً .. وفي بداية فترة عملي بالسعودية .. كنت أسكن بمفردي في شقة صغيرة ... والحقيقة لم أكن وقتها أهتم كثيراً بعملية التأمين المذكورة .. حيث أن في تلك الفترة كان الشعور بالأمان عالي جداً وفوق الوصف في السعودية ..

إلا أنني تعرضت للسرقة بسبب تلك الحالة من الإسترخاء الشديد ..

فقد كنت نائم دون أن أغلق باب الشقة بالمفتاح .. وكان الباب يفتح من الداخل والخارج بدون الحاجة لمفتاح ..

وبالتالي دخل لص .. وكنت نائم وقتها .. وسرق حقيبة أوراقي .. وكان بها أوراق هامة .. وبعض النقود ...

ومنذ سنوات قليلة .. تم السطو على مقر شركتنا .. وتمت سرقة بعض الأجهزة .. ومن وقتها تم تأمين مقر الشركة مرة أخرى بشكل أكبر ..

ومنذ أن سرق منزلي .. وأنا أهتم بشكل عالي جداً بعملية التأمين .. ودائماً في منزلي أقفال وترابيس إضافية .. وأتأكد باستمار من ذلك ..

شقتي في مصر في الطابق العاشر .. ومع ذلك .. شبابيك الحمامات والمطبخ وضعت عليها حديد خارجي للتأمين .. أما الشبابيك للغرف والبلكونات .. لا شئ عليها لاستحالة أن يدخل منها لص (تقريباً) أما باب الشقة فعليه قفل إضافي كالعادة . وباب حديد إضافي خارج باب الشقة الرئيسي .. لأننا نغيب عن الشقة ثمانية شهور في العام تقريباً ..

أعتقد أنني أفعل ما يجب فعله ..

ولكني مهووس بإجراءات التأمين الإحترازية الأخرى .. فأنا أضع إنذار على سيارتي باستمرار للتأمين الإضافي .. وفي مكتبي أتبع بعض الإجراءات الإضافية تحسباً لذلك .. وفي منزلي في الرياض .. أتأكد يومياً من غلق كافة الأبواب وباب الحديقة والنوافذ ..

[Alshiekh]

ترى هل جرب أحدكم الإحساس بعدم وجود الأمن ؟

نعم ... احساس رهيب انتابنى بعد حادث سطو تعرضت له فى عام 1987.

حيث قام اربعة من اللصوص بسرقة مركز صيانة الألكترونيات الذى كنت أمتلكه فى مدينة الاسكندرية ، وتقريبا تركوه على البلاط ... سرقوا كل شيئ ... اجهزة تسجيب ... اجهزة فيديوا ... تليفزيونات ... جهازى علاج طبيعى وجهاز طبى آخر... كمبيوترز لكن بدون معلومات لانه لم يكن هناك هارد دريف بعد ... جهازى اوسيلوسكوب ( راسم ذبذبات ) ... جهاز مولد ذبذبات ... جهاز قارئ او عداد ذبذبات ... عدد وادوات. حاجة كده فوق الـ 70 او خمسة وسبعين الف جنيه باسعار 1987 ، وليس لدى بوليصة تأمين.

شيئ رهيب ... المسروقات تنقسم لقسمين ... جزء أمتلكه انا ، وقسم ليس مملوك لى بل هى ممتلكات عملاء أحضروها أو احضرناها للصيانة بالمركز.

الجزء المملوك لى هو الاجهزة التى تستخدم فى الصيانة " كمبيوترز لكن بدون معلومات لانه لم يكن هناك هارد دريف بعد ... جهازى اوسيلوسكوب ( راسم ذبذبات ) ... جهاز مولد ذبذبات ... جهاز قارئ او عداد ذبذبات ... عدد وادوات " وهى مايستخدمه الفنيين فى الصيانة ... كيف سيعمل الفنيين ؟

مايخص العملاء ... كيف اتصرف فيه؟ اكثر من اربعون الفا هى قيمة الاجهزة التى تخص العملاء ... خراب بيوت.

السرقة تمت ليلة الأحد ... اى ليلة الاجازة الاسبوعية ... وفوجئت بمكالمة يوم الاحد ظهرا يبلغوننى بضرورة الذهاب لمقر المركز لموضوع متعلق باجراءات صيانة للكهرباء وقد يحتاجوننى لمراجعة التوصيلات الكهربية داخل مركز الصيانة ، وطبعا انتابنى الشك ان هناك شيئ آخر ولكن خاطر السرقة لم يكن ابدا على بالى.

المهم توجهت الى هناك لاجد اثنان من الجنود قد تم تعيينهم لحراسة المكان ..... عندما رأيت الرفوف الخالية وبلاط الارضية ظاهرا والذى كان دائما مغطى بالاجهزة الزائدة عن سعة الرفوف ... لم اجد سوى الارض لأجلس عليها فهى الاقرب من ان اجد لنفسى كرسيا لاجلس عليه.

حضر رئيس المباحث ، عاين ومشى وترك احد ضباطه لعمل محضر معاينة ، وابلغنى بضرورة الذهاب للقسم لعمل المحضر . وتكرم مشكورا بترك احد افراد الحراسة لمدة ساعتين حتى يمكننى تدبير بعض الفنيين لتركيب كوالين واقفال جديدة واصلاح للابواب ، خاصة ان اليوم كان الاحد وكان من الصعب ان نجد احدهم.

فى اليوم التالى حضر آخذ البصمات ، وأخذ البصمات !!!!!!!!!!!!! ذهبنا بعدها ( كل العاملين ) الى قسم الشرطة لأخذ بصماتنا حتى يمكن تحديد البصمات الغريبة ، والتى بالطبع لم تكن مسجلة !!! على الرغم من اللصوص الاربعة كانوا من المسجلين " مساكن ومتاجر " .

قمنا بعمل اتصالات على مستوى عالى ، وتقابلت بمدير الأمن ، ومنه الى مدير المباحث الجنائية ومنه الى رئيس وحدة سرقات المساكن والمتاجر ، وطبعا كلا منهم قام بتدوين محضر بالواقعة فى مفكرته الشخصية ،

فاتنى ان اقول انه بعد ان ذهبت الى مباحث القسم ، والذى اهمل الموضوع بشكل فج ، فقد قام بعمل المحضر ولكنه لم يسجله فى دفتر احواله ، اى انه لن يكون فى جدول اعماله ، أى لن يتم سؤاله عن نتيجة تحرياته فى الحادث نفسه ، وعلمت ان رئيس المباحث يفعل ذلك عن عمد ، فإذا تم القبض بالصدفة على اللصوص ، يقوم بتسجيل الحادث فى دفتر الاحوال ، واثبات نجاحد فى عمل التحريات والتوصل الى الجناة ، ولو لم يصادفه الحظ ويقبض على الجناة ، فلن يعلم احد بالواقعة ، وعندما نبهنى أحد المحامين بهذه اللعبة القذرة ، عدت مرة أخرى لرئيس مباحث القسم وطالبته بإعطائى رقم المحضر لاتخاذ اجراءات تخص التأمين ( لم يكن لدى تأمين ولكننى تذرعت بذلك حتى لاأحرجه وادخل معه فى خصومة شخصية ) فاستدعى احد المخبرين وقال له " حول المحضر بتاع الباشا احوال وادى له رقمه ".

بعد ثلاثة عشر يوما ، حضر الى أثنين من ضباط مباحث المديرية بالملابس المدنية ، وعرفانى بنفسيهما وسألانى إن كنت قد تعرضت لحادث سرقة ، فأجبت بالايجاب ، فسألانى إن كنت قد قمت بعمل محضر بالواقعة ، فضحكت ، ولازالة اللبس قلت لهم ، نعم قمت بعمل محضر فى قسم المنتزة ، ومحضر مع مدير الامن ، ومحضر مع العميد فلان ( رئيس المباحث الجنائية ) ومحضر إخر مع المقدم فلان ( رئيس مباحث سرقة المساكن والمتاجر ) والذى هو رئيسهم ويعملون معا فى نفس المكتب ، فضحكا معى وقال لى احدهم " إحمد ربنا ... انت مالك حلال " ، واضاف الثانى " لقد قبضنا على احد اللصوص وهو من ارشدنا الى عنوانك ، وهو موجود معنا فى السيارة ، ولكننا وضعنا السيارة بعيدا تخوفا من اى تهور قد تقوم به او يقوم به احدا من طرقك ، فطلبت منهم أن أراه حتى ارى ان كنت اعرفه ، أو سبق لى أن رأيته ، فوافقا بشرط الا اتهور ، وعندما رأيته ، وجدت انه شخصا لم يسبق لى ان رأيته فى حياتى ، وقد كان فى حالة من التورم الوجهى والعنقى لايحسد عليها، وسألته " ليه يابنى الاذية ؟ ليه ماتشتغلش وتكسب مال حلال ؟ " لم يجب وادار وجهه .

بدأت اتردد على مكتب الضابطين فى المديرية كلما اتصلوا بى ، لاجدهم قد نجحوا فى استعادة جزء من المسروقات ، وطبعا كان ذلك فى نفس مكتب رئيسهم والذى ابلغنى فى احد الايام بانه متابعا لمايحدث ولكنه لم يرغب فى ان يتدخل ... فشكرته لانه لايزال يتذكر موضوعى.

خلال شهر تم استعادة 99% من المسروقات.

ملاحظتى الأولى ان ضابط المباحث هو انسان ، قد تكون له أخطاء مهنية او شخصية ، ولكننى عندما تخيلت نفسى مكانه ، وتخيلت ان اكون فى مكتبى حتى الحادية عشرة او الثانية عشرة مساءا ، وان يتم استدعائى ليلا ، او ان تلغى اجازتى لظروف العمل ، رفضت تماما ان تكون حياتى بهذا الشكل ، أن أضطر لاستخدام اساليب العنف لاستخراج المعلومات من المتهمين لانه ليس هناك وسيلة اخرى فى التعامل مع هؤلاء المجرمين سوى الايذاء الجسدى او النفسى ، رفضت ان اقبل بان الجأ لتلك الاساليب وبالتالى فانا لا أقبل أن اكون ضابط فى المباحث.

كانت هذه هى قصتى مع حادث سرقة حدث معى.

أما عن الشعور بعدم الامان فأقول ،

وصل الامر بى فى السنة او السنتين الأوليين بعد السرقة أننى كنت استيقظ ليلا ، اتصل بتليفون العمل ، واستخد كود الانسر ماشين الموجود بمكان العمل للاستماع لما يدور هناك واترك الخط مفتوحا بالساعة والساعتين حتى استمع لاى حركة او صوت يحدث فى مكان العمل.

أحيانا كنت أذهب لمكان العمل كى اتأكد أن الامور على مايرام. كنت أضطر لعمل ذلك لانه بدون ذلك فقد كان من المستحيل أن أخلد للنوم مرة أخرى.

بالاضافة للاحلام المزعجة والكوابيس والمتعلقة كلها بالسرقة.

ربنا يحفظكوا جميعا ويبعد عنكم شرور اللصوص.

[Folana]

السلام عليكم ورحمة الله....

موضوع من الموضوعات اللى بتقلب المواجع....:)

هو فعلا الحمد لله انها جت على الكمبيوتر بس...والحمد لله ان الحمام كان خالى ايضا...لان لصوص هذه الايام خُلقهم ضيق ومايحبوش حد يعترض طريقهم...

من 17سنة وهى سنين عُمر ابنتى الكبرى (ربنا يبارك فيها )......كنت عائدة بعد زيارة لعيادة الدكتورة وتحديد موعد انجاب الابنة الاولى فى الصباح الباكر....وبافتح باب الشقة وجدته مغلق من الداخل بسلسلة بتكون مرفقة مع الترباس...والشقة ضلمة جدا...ظننت ان زوجى عايز يخوفنى (كعادته :blink: ) وناديت عليه ولكن مافيش رد..

قفلت الباب تانى بسرعة وطلعت لحماتى ولميت افراد العيلة ونزلنا تانى...دخلنا الشقة وجدت ان شيش حجرة النوم منزوع منه ريشتين ومفتوح...وبسرعة جدا وجدت قسم البوليس كله فى منزلى...- باعتبار اننا لنا قرايب مهمييييين مع الاعتذار للفيلم - وبسرعة اسرع مسكوا الحرامى...وعملوا المحضر فى الشقة ولكن كان ضرورى اذهب للقسم وكان ضرورى اذهب للنيابة فى اليوم التالى....طب ازاى يااجماعة والست الدكتورة منتظرانى :lol:

وبمواجهة مع الحرامى ...بصراحة مش قادرة اوصف شعور الرعب اللى تملكنى وهو ينظر لى نظرات انتقامية ..:wub: ولسان حاله يقول ان ماوريتك mfb:

المهم بعد كده وبمناسبة الحديث عن الشعور بالامن والامان....كنت يوميا أشيل بنتى الوليدة وشنطة مجوهراتى وشنطة الفلوس واطلع لحماتى لحد مازوجى يرجع ...انزل تانى...كنت زى اللاجئين بس العمر مش بعزقة

تانى حاجة...قام زوجى بتجهيز حديد ..مش عارفة اسمه يعنى لكن يشبه الاسياخ ويتم تركيبة على الشيش باقفال...

وعشت على هذا الحال فترة طويلة جدا....

الى ان انتقلت للعيش فى مكان اخر اكثر امانا...او هكذا خيل لى يعنى....الى ان سمعت ان مسكن سفير بجوارى تم السطو عليه....md2:

وكان الحرامى من العاملين فى المكان...

والان اجد ان الذكريات والمخاوف تتجدد مرة اخرى لاستعدادنا للانتقال لسكن جديد يكون قريب من جامعة ابنتى فى الطرف الاخر من العاصمة...

هل سنجد هناك أمن وأمان....لا اعتقد خصوصا انها منطقة جديدة غير آهلة بالسكان...

وساضطر لحمل الاسياخ الحديد والاقفال معى مرة اخرى....

والله انا باخاف من الحرامى اكتر من العفاريت

واللى يخاف من الحرامى يطلع له....

[HDarwish]

طب اللي حصل معاكم ده كله كوم واللي حصل معانا كوم تاني خالص

يعني لما تبقى إتسرقت ومش عارف إنك إتسرقت ويجي الحرامي ويقولك والله أنا سرقتك وإنت تكدبه لحد ما يطلع كلامه صح .. تقول إيه ساعتها.

من حوالي عشر سنين .. والدي عنده محل صيانة إليكترونيات وكانت الأجهزة عندنا كثير جدا لعملاء وزبائن المحل لدرجة إن المحل مش كافي لإحتواء الأجهزة وبالتالي كان ضروري جدا عمل مخزن وكان المخزن عبارة عن شقة من أحد شقق العمارة

المهم فوجئنا في يوم ولقينا استدعاء من قسم الشرطة بيقول لازم نروح طبعا والدي وعمي .. خير يارب .. يارب استر .. وعند سؤالهم عن أي مسروقات تمت سرقتها من عندكم وكان الجواب بالطبع لأ لم تتم سرقتنا ابدا ولا مرة حصل ذلك .. يا عم إتأكد يا عم راجع نفسك ... يا بيه ابدا عمرها ما حصلت .. طيب استنوني وراجعلكم

رجع ومعاه الحرامي وطبعا شكله يعيني ماعدشي فيها ملامح من كثر الضرب اللي خده ... سرقت يا بني الناس دول ولا لأ .. آه هما دول اللي سرقتهم .. إحنا طبعا طيب سرقت إيه إحنا ما فيش عندنا حاجة ناقصة .. الحرامي لأ يابيه أنا متاكد حتى بالأمارة الشقة اللي انت حاطط فيها الأجهزة القديمة في الشقة الفلانية وتدخلها من الباب الفلاني وأوصافها كذا وكذا واللي أنا أخدته من الغرفة الفلانية ومن على الرف الفلاني وكان كام جهاز من اللي هما اصلا جار عليهم الزمن لدرجة إن اصحابهم كانوا سايبينهم بالخمس سنين وقلنا نخليهم في المخزن لعل حد يجي في يوم من الايام ويقول فين الجهاز بتاعي

هم يبكي وهم يضحك .. صح ؟

بس لا أخفي عليكم سرا من بعده واحنا المحل بئا له ثلاث ابواب وجنازير وأقفال وكمان البوابة ما عادتشي بتتساب مفتوحة لازم تكون مقفولة كويس في جميع الاوقات بعد ما كانت بتتساب مفتوحة معظم الوقت لكثرة الداخل واللي خارج

وربنا يسترها الأيام دي الحرامية بئت اكتر من الأول

[فتافيت]

السلام عليكم :closedeyes: اولا تحية لكل الموجودين علي المحاورات وفعلا انا بق حصل لي حادث سرقة ولكن في وسط الشارغ ولحد دلوقتي رغم مرور سنتين علي الحادث الا اني بخاف اروح الشارع دة والحكاية زي ما قال الاستاذ الفاضل رحت وعملت محضر وبرضة ما اخدتش الرقم وقالي لما نقيض عليها نبق ننزل لها المحضر نسيت اقولكم اني اتعرقت علي الحرامية في سجلات الشرطة ودة لاول مرة في حياتييييييييييييييييييييي ادخل القسم لكن ولا في فايدة كان لازم فعلا اخد رقم المحضر بس للاسف انا ما ليش في القانون

ربنا يكفينا شر الحرامية وولاد الحرام علي راي امي والسلام عليكم :closedeyes:

[ابتسامة رضا]

السلام علينا وعلي عباد الله الصالحين

ربما يكون للموضوع ده فايدة غير تأليب المواجع وهي اننا نتعلم من أخطاء بع وكمان من وسائل الامان اللي عملها البعض الاخر

من كام سنة كنت لسة ساكنة في منطقة شارع فيصل وبعد زوجي ما زل لعمله وأولادي راحو مدارسهم كنت أستعد للذهاب لعملي رن جرس التليفون رفعت السماعة محدش رد جه في بالي ان ده حرامي وبيطمن ان البيت فاضي علشان ييجي يسرقنا بقيت أفكر في أي حاجة أعملها علشان أمنعه ( فيلم هوم ألون ) معرفتش وكل اللي قدرت عليه خبيت علبة الدهب بتاعتي في سحارة السرير وأخدت مظروف كا فيه مصروف البيت معايا في شنطتي وقفلت الباب ونزلت لعمليونسيت الموضوع طول النهار

لما رجعت وبرضو ناسية الموضوع دخلت المطبخ وعشت اليوم عادي وبعدكام ساعة بفتح دولاب زوجي علشان أجيب منه فلوس لدفع فاتورة التليفون لقيت الدولاب منكوش استغربت وكانو ولادي محوشين مبالغ صغيرة في برطمانات عسل لقيتها فاضية قلت يمكن زوجي رجع فجأة ودور علي الظرف اللي أنا أخدته ملقهوش وأخد فلوس الولاد

لما زوجي رجع سألته نفي تماما ( اترعبت ) ومجبتش سيرة للولاد لكنه لم يتخذ أي اجراء غير انه غير كالون الباب وقاللي مدام مفيش حاجة كبيرة اتسرقت مفيش داعي نروح القسم لكن فضلت مرعوبة

وبعد كام شهر وأنا في عملي لقيت بنتي اتصلت بي وقالت انها رجعت من المدرسة لقت باب الشقة مكسور والشقة منكوشة وحاجات كتير مش موجودة طلبت منها تنزل وتترك الشقة ورجعت بسرعة واتصلت بزوجي في عمله وقلتله اللي حصل وانه لازم يبلغ البوليس وفعلا راح يبلغ طلبو منه يعمل المحضر باسمي وبلاش هو علشان هو ضابط جيش واستجاب لهم وجم رفعو البصمات وبعد يومين لقينا الضابط بينادي علي زوجي وقاله تعالي اتعرف الي اللص وكمان تعالي بكرة استلم الحاجات بتاعتك نسيت أقول لكم ان علبة الدهب كنت نسيتها في سحارة السرير من المرة الاولانية

وعلشان كدة مسرقهاش لكن سرق فلوس الولاد اللي محوشينها وكانت مبلغ أكبر من الأولاني بكتير وسلسلة دهب كانت علي التسريحة وشوية أجهزة كهربائية و الغريب بقي البومات صور زوجي في أمريكا

الفلوس والسلسلة والصور مرجعتش واللي رجع بعض الاجهزة البسيطة .. لكن حمدنا ربنا ان البنت مرجعتش والحرامي في البيت

وعرفنا انه ولد بتاع 16 أو 18 سنة وبيرن جرس الباب لو حد رد عليه يسأل علي أي حاجة لو محدش رد يفتح الباب بواسطة عتلة حديد معاه ويلم اللي يقدر عليه في أكياس بلاستيك سودا بتاعت الزبالة وأي حد هيشوفه نازل بيها هيفتكره الزبال

وعرفنا ان الحرامي هو اللي عرف البوليس انه سرق من عندنا لأنه اتقبض عليه وهو بيسرق في العمرانيه واعترف بكل السرقات اللي عملها

بعدها عملنا باب حديد للشقة وكان كل همي ان أولادي ينسو اللي حصل

لما عزلنا لمدينة نصر ورغم انها عمارات ضباط وفيه شركة أمن كنت مستبدلة أنبوبتين بوتاجاز ورشيتهم بالموبيد قبل ما أدخلهم الشقة علشان مينقلوليش حشرات وبعد شوية بنفتح علشان ندخلهم لقيا أنبوبة واحدة بس ..... وبس خلصت

ربنا ميحرمش حد من نعمة الاحساس بالامان

[White heart]

حمداً لله لم يسبق وأن تعرضت لمثل هذا النوع من التجارب القاسية والمؤلمة، وأدعو الله أن يقيني وإياكم خطر التعرض لإحداها ,,, ولكن لفت نظري هذا الخبر من على موقع ENN الإخباري، عن اسلوب جديد فى سرقة المنازل فرأيت مشاركتكم اياه حتى تقوموا بالتبيه على من فى محيطكم لتوخي الحذر والحيطة خاصة فى تلك الأيام الصعبة.

طريقة جديدة لسرقة المنازل نرجوا الحذر

يبدو ان اللصوص والبلطجية هذه الايام يبحثون ويطورون من نشاطهم الاجرامي للبحث عن اسهل طرق للسرقة ، وفي هذا الموضوع اضع بين يدي حضراتكم هذه الطريقة الجديدة التي يستخدمها اللصوص هذه الايام

اولا يقوم اللص بالاتصال بأي رقم موبايل ويدعي انه من شركة كهرباء مصر – ثم يتحدث مع الضحية ويخبره انه قد وقعت عليه مخالفة او غرامة نظرا لعطل ما في ” عداد الكهرباء مثلاً او الغاز او ما شابة ” الخاص بالمنزل ويجب عليه ان يقوم بدفع تلك الغرامة والا سوف تقوم الشركة ( الوهمية ) بنزع العداد !!

وبالطبع يخاف صاحب المنزل وعلى الجانب الاخر يعرض عليه اللص ان يأتي الى منزله للتاكد من الامر وبالطبع يوافق صاحب المنزل ، ويأتي هذا اللص ومعه مساعديه يحملون ( كشوفات وهمية ) ويبدئون في التحدث مع صاحب المنزل لمعرفة اكبر قدر ممكن من المعلومات عن المنزل مثل عدد افراد الاسرة – ماهي الاجهزة الكهربائية التي يستعملونها – ماذا يعمل صاحب المنزل ………………… وهكذا .

وعلى الفور ان وجد هؤلاء اللصوص ان هذا الشخص بمفرده بالمنزل او ان كانت سيده او بنت او ما شابه يقومون اللصوص بالاعتداء عليه ويجبرونه على ان يبلغهم بمكان الاموال او الذهب ويقومون بحمل كل ما خف وزنه و زاد سعره وربما يضطرون الى ضرب او تكتيف الضحية حتى يتسنى لهم انجاز مهمتهم دون ان يشعر السكان ….

واما ان وجد هؤلاء اللصوص البلطجية ان المنزل يقطن به عائلة او افراد كثيرون يظل اللصوص في استدراجهم لمعرفه مواعيد نزولهم وخروجهم وعندها يقومون بسرقة المنزل المقصود ..

وجب علينا ان نقوم بنشر هذا التحذير ولزيادة الامان لا تعطي احدا لا تعرفه اي بيانات عنك حتى ولو كانت قصيرة وقليلة ..

نسال الله ان يحفظ مصر وشعبها من كل الحاقدين ومن كل من اراد بنا شر ..

[هالة]

فكرتونى باللذى مضى....مامضاش قوى يعنى لانى السة متعرضة للسرقة من كام شهر بس....حكايتى مع السرقات بدات من زمان...اول مرة اتسرقت فيها كان عندى ست سنوات...واحد سرق الحلق بتاعى..وانا فى الجامعة و ماشية فى شارع القصر العينى فى عز الظهر..واحد على متوسكل شد السلسلة اللى كنت لابساها و اللى كان بابا جايبهالى من السعودية و عملت محضر فى قسم السيدة و ماخدش رقمة و طبعا السلسلة مارجعتش...و من كام شهر كنت فى مؤتمر فى امريكا و رحت المول و اشتريت حبت حاجات للعيال و ابوهم..الحاجات كانت تقيلة علية فوقفت فى الشارع ابدلهم على ايدى..جالى واحد وواحدة..بصو للحاجة اللى معايا..قالولى معاك دولار..قلت لاة...مشيو..ورجو تعانى..طيب معاكى شنطة فاضية..قلت استعبط فيها و اعمل نفسى مابعرفش انجليزى..و بعدين بصيت حولية مالقتش حد ماشى رغم ان احنا كنا الساعة تلاتة الظهر و قدام مول..المهم لاقيت مافيش فايدة..رحت مزعقالهم و ماشية بسرعة فى اتجاة المول..هما راحو ناحيت الباركينج..منتظرنى هناك..المهم دخلت المول..وقعت انتقل من محل لمحل لغاية لما اتاكدت انهم مشيو...على فكرة انا عشت فى امريكا سنوات طويلة..صحيح مش فى نفس الولاية دى..لكن عمرى ماشعرت بعد الامان...و عمرى ماتعرضت لاى حاجة...حتى ايام سبتمبر 11 و انا محجبة ماحصلش حاجة..اللى لاحظتة الايام دى هناك ان مع الازمة الاقتصادية الناس اتغيرت.....مش عارفة بيتى فى مصر عامل الزاى دلوقتى..سيباة بقالى سنة اهوة..على اللة يكون كويس...و انا رغم كل السرقات اللتى تعرضت لها مازال احساسى بالامان عالى..مش عارفة دى زيادة سقة و لا هبل........

[ahmos1]

فكرتونى باللذى مضى....مامضاش قوى يعنى لانى السة متعرضة للسرقة من كام شهر بس....حكايتى مع السرقات بدات من زمان...اول مرة اتسرقت فيها كان عندى ست سنوات...واحد سرق الحلق بتاعى..وانا فى الجامعة و ماشية فى شارع القصر العينى فى عز الظهر..واحد على متوسكل شد السلسلة اللى كنت لابساها و اللى كان بابا جايبهالى من السعودية و عملت محضر فى قسم السيدة و ماخدش رقمة و طبعا السلسلة مارجعتش...و من كام شهر كنت فى مؤتمر فى امريكا و رحت المول و اشتريت حبت حاجات للعيال و ابوهم..الحاجات كانت تقيلة علية فوقفت فى الشارع ابدلهم على ايدى..جالى واحد وواحدة..بصو للحاجة اللى معايا..قالولى معاك دولار..قلت لاة...مشيو..ورجو تعانى..طيب معاكى شنطة فاضية..قلت استعبط فيها و اعمل نفسى مابعرفش انجليزى..و بعدين بصيت حولية مالقتش حد ماشى رغم ان احنا كنا الساعة تلاتة الظهر و قدام مول..المهم لاقيت مافيش فايدة..رحت مزعقالهم و ماشية بسرعة فى اتجاة المول..هما راحو ناحيت الباركينج..منتظرنى هناك..المهم دخلت المول..وقعت انتقل من محل لمحل لغاية لما اتاكدت انهم مشيو...على فكرة انا عشت فى امريكا سنوات طويلة..صحيح مش فى نفس الولاية دى..لكن عمرى ماشعرت بعد الامان...و عمرى ماتعرضت لاى حاجة...حتى ايام سبتمبر 11 و انا محجبة ماحصلش حاجة..اللى لاحظتة الايام دى هناك ان مع الازمة الاقتصادية الناس اتغيرت.....مش عارفة بيتى فى مصر عامل الزاى دلوقتى..سيباة بقالى سنة اهوة..على اللة يكون كويس...و انا رغم كل السرقات اللتى تعرضت لها مازال احساسى بالامان عالى..مش عارفة دى زيادة سقة و لا هبل........

طيب كيف نتفااااااااااااااااادى السرقاااااااااااااات

[هالة]

طيب كيف نتفادى السرقات؟؟؟؟اظن انى اخر واحدة ممكن اجاوب على السؤال دة....انا شخصيا بحس مهما اتخذت من اجرائات احترازية...نصيبك هايجيلك لغاية عندك......مابحبش احط على شبابيك البيت حديد..بحس انة بيحبس الناس اللى جوة...و لو حصل حريقة لاقدر اللة ...مافيش مخرج....بفكر اجيب رازر و كام ماطوة..و البتاع اللى بيرش فلفل..واخليهم فى شنتطى..و ادى شوية منهم لعيالى..و يسلام كمان لو حطيتهم فى العربية...و تحت المخدة...طيب و باعدين؟؟؟؟؟؟؟؟هل الواحد هايعيش حياتة كدة خايف من السرقة و البلطجة...طيب لو قعدنا فى بيوتنا و معانا اسلحة و خلافة هل دة هايحميتا؟؟؟؟هل لو خلينا ولادنا يشيلو اسلحة علشان يحمو نفسهم كدة احنا بنعودهم على استخدام العنف و هل السلاح دة هيحميهم؟؟؟اية الحل؟؟؟مش عارفة..........

[AbuZeyad]

اظن ان تفادي السرقة شبة مستحيل

كل اللى ممكن نعمله اننا ناخد بالاسباب لتقليل احتمال السرقة زي الابواب الحديد وما الى ذلك

كنت من كام يوم مع زوجتي في مول وهي في احد المحلات لقيتها بتناديلي وبتقولي مش لاقية المحفظة

طبعا دورنا كتير وسالنا في المحل دون جدوى طبعا

المشكلة فعلاً كانت في الأوراق المهمة اللى في المحفظة ، اوراق تخص زوجتي والاولاد وتطليعهم تاني موضوع ممل جداً

تاني يوم رجعنا تاني المول وسالنا وملقيناش حاجة

لما تقريبا فقدت الأمل لقيت ادارة المول بتكلمني علشان اروح استلم المحفظة لانهم لاقوها مرميه في الارض

طبعا ماكنش فيها اي فلوس بس الجميل ان الحرامي كان قلبه رحيم وساب الورق زي ما هو.

والحمد لله على كل حال.