لو رجعت مصر تقدر تبطل كل شيء مستورد اتعودت عليه؟

[لولا]

سؤال محيرنى جدا كل ما افكر انى فى يوم ححعيش فى مصر..

هل ياترى حنبطل نستعمل كل شيء من منتجات مستورده

كنا بنستعملها فى الغربه؟

طبعا اناقصدى كل شيء شكولاتات .. شامبوهات..كريمات للبشره..

وطبعا أهم حاجة الهدوم اللى بتبقى بسعر خيالى فى التخفيضات

مع انها ماركات عالميه معروفة.

طب كلنا عارفين ان الحاجات دى سعرها فى مصر نااااااااااااار :lol:

يعنى مثلا كريم نيفيا للأيدين خلص منى فى الصيف نزلت السوبر

ماركت اجيبه لاقيته فى حدود 40 جنيه رغم انه هنا ب10 ريال :sad:

والشامبوهات اللى بنستعملها نفس الحاجة.

وطبعا للبنات اكيد لاحظتوا الفرق الرهيب فى اسعار كريمات بشره الوش

شيء مش معقول ..حتى لما شفت الأسعار كده قلت لنفسي مين

ياترى فى مصر يقدر يشترى كريمات بأسعار دى؟ اما البرفانات..

حكايه لوحدها :rolleyes: والظاهر اننا مفرض نبطلها نهائى

لما نعيش فى مصر . انا كل اجازة بنزل ببقى متحمله كميه برفانات

كبيره كل موصى على نوع.. وانا طبعا مقدرش اكسف حد :D

واخوات جوزى كمان من ساعة معرفوا أسعار لبس الأطفال فى محل

شبرا والهرم ومحدش فيهم بيرحمنى من الطلبات.. وطبعا برضة ببقى

عايزة اجبلهم كل حاجة لأن اللبس فى مصر للبيبيهات نار ومش

حلو زى اللى بجيبه.

عايزة اعرف فى حد من البنات هنا فكر فى الحاجة دى زى؟ :wub:

[se_ Elsyed]

يا لولا

هو الموضوع للبنات بس ولا ممكن أي واحد مش بنت يدخل يتكلم ؟

وبعدين مين كلابيظو اللي في الأفتار بتاعك ده ؟

[لولا]

يا لولا

هو الموضوع للبنات بس ولا ممكن أي واحد مش بنت يدخل يتكلم ؟

وبعدين مين كلابيظو اللي في الأفتار بتاعك ده ؟

ياخبر يأستاذ..انت تنور الموضوع واى حد كمان :rolleyes:

انا بس عارفة ان البنات بتهتم بالمواضيع دى أكتر..

لكن حيكون الموضوع أشمل لو عرفنا الرجاله كمان متقدرش

تستغنى عن ايه لما تعيش فى مصر :D

أما كلابيظو دى ياسيدى هى البنت اللى بحلم ربنا يديهالى

وبنتظر اليوم ده بفارغ الصبر :lol:

[se_ Elsyed]

أما كلابيظو دى ياسيدى هى البنت اللى بحلم ربنا يديهالى

وبنتظر اليوم ده بفارغ الصبر :rolleyes:

بس دي هاتكلفك أكل كتير قوي يا لولا .... يالله ربنا يرزقك الذرية الصالحة إن شالله لو كانت مسلوعة ..

--------------------

والله يا لولا يا أختي إحنا ننزل بس مصر وبعدين ربنا يحلها ..

في مصر بالنسبة للسلع الإستهلاكية أنا لا أفتقد أي حاجه بصراحة لإن كله موجود هناك والهيبرات ما خليتش ... حتى لو إنتي كبساوية وبتحبي رز الكبسة فهو هناك بالهبولي برضوا ...

وبفلوسك تجيبي إبن القرد من غير ما أمه تعرف ...

بس المشكلة إن القرش في مصر عزيز ..

يعني هنا بادخل كارفور أشتري أي كلام فاضي وأخرج بأزق في ا عربية إرتفاعها تلات أدوار وأدفع لي 500 ريال وأنا زي الباشا

أما في مصر لو دخلت نفس كارفور ودفعت 500 ج ... فالواحد ممكن يخرج يرمي نفسه تحت نفس العربية دي إحتقاراً لنفسه الأمارة بالسوء...

وصدقيني هي مسألة تعود ... يعني لو إنتي هنا متعودة على كريم نيفيا للبشرة الحساسة من أبو 10 ريال ... فلما تستقري في مصر هاتتعودي عل كريم الخنفري وهايبقى على قلبك زي العسل ... يعني البديل موجود ... بس ممكن بدل ما كنتي بتحفي في نيفيا ابو 10 ريال . هاتلاقي نفسك تلقائياً بتاخدي هبابة ولحسه صغيرة من كريم الخنفري عشان ما يخلصش .... وهكذا .

وبالنسبة للبرفانات ... ربنا يخلي لنا الشبراويشي الأفتر شيف ... ماله ؟ عشرة على عشرة وما بيعملش تسلخات في البشرة بالرغم من إنه بيحرق الوش وكإنك حطيتي مية نار على وشك ... بس عادي ..

[لولا]

كلامك كله صح من ناحيه ان الواحد هنا بيصرف وهو مغمض وفاتح بقه كمان من الضحك

لما طقم سنانه حيقع :D

لكن فى مصر معرفش ليه بتجيلى لرتيكاريا غريبه عجيبه لما ادفع 300 جنيه بس فى

السوبرماركت :wub:

وببقى ماشيه ورا جوزى متخفيه هو يحط وانا ارجع :wub:

ولما يهب فيه اقوله يعنى محبكتش تاكل البسكوتات والشكولاتات

اللى كنت بتاكلها هناك ابقى كلها لما نرجع ياسيدى. الاقيه منتقم منى

وراح جايب كام علبه سجاير مستوره من اللى متعود عليهم بشي وشويات :sad:

المهم افهم من كلامك ياسيدى اننا بعد ما الواحد مننا بقى بينزل الأجازة باشا

يبقى ينزل على طول ويعيش على الأطلال كده زى أحمد مظهر فى الفيلم

مع مريم فخر الدين ما كان عايش على الأطلال :rolleyes:

تصدق ياسي السيد الناس كلها فى مصر لما ننزل فى الأجازة بتبقى

حاسدانا على المستوى اللى احنا عايشين فيه ..وانا بنيقى نفسنا نعيش زيهم

فى حضن النيل وسط نسمه هوا حلوة.. لكن عارف ايه أصعب حاجة على البنى ادم

.. اصعب حاجة انك ترجع بلدك وتعيش ااقل من نص المستوى اللى كنت عايش فيه

والصعوبه فى كده انك خلاص اتعودت عليه :lol:

سهل قوى تتقبل مستوى معين طالما انت معشتش فى مستوى اعلى منه بمراحل

كتير قوى.. صعب قوى بعد ماكنت بتصيف فى شرم.. ترجع العصافره تانى wst::

وصعب أكتر وأكتر هو نظره الناس ليك لما ترجع وتشوفك اتغيرت فى شكلك.. ولبسك..

وريحتك :wub: ..

انت عارف الموضوع الحقيقى مفرض يكون تعيش فى مصر على قدك.. ولا تعيش فى الغربه

وتنزل اجازة تعيش فيها باشا؟ :sad:

[se_ Elsyed]

إستني هادور على الوش اللي الواحد بيضرب فيه راسه في الحيط لحد ما دماغة تتفلق

أهي لقيتها :lol: :lol:

إنتي عايزه تجنيني إنتي كمان يا لولا هانم ؟

يا ست لولا صدقي ... لي زمايل عايشين في مصر وعمرهم ما سافروا الزقازيق حتى ومع ذلك بيروحوا أركاديا مول وبياكلوا حتى الجاتوة الواحدة بخمسين جنيه في محلات الحلويات اللي هناك ... وانا كراجل مغترب الخمسيناية دي ممكن أقعد أهرس حلويات بيها طول الشهر هناك والباقي أجيبه معايا الرياض اكله ...

يا لولو باشا .. اومال مين اللي ساكن في الساحل لاشمالي والمُدن الجديدة ومدينة نصر ومصر الجديدة إلخ ؟ ... ومين راكب كمية العربيات الفيخمة اللي في مصر دي ؟

إيه ............ كلهم مغتربين وعايشين في المنفوحة هذا الحي الراقي مثلنا ؟

ولا الناس دي بييجوا مصر شهر في السنة ويمشوا تاني ويسيبوا البلد فاضية ؟

صدقيني يا ليلى ( وش الراجل الأرستقراطي ده )

إحنا اللي غلابه يا ماما بالنسبة للي في مصر دول

أنا حضرتك إتغربت وإتمرمطت ... والغُربة وأكلت مني راقات ولسه ما عنديش عربية ملكي في مصر وبانزل أجازة أرمي الهلب على إخواتي ....

وإخواتي عايشين وعملوا الخير ده من مصر

وزمايلي برضوا والله ... فيهم اللي بيقرفوا مني كمغترب وكإن المغترب ده مش مستحمي بقى له 5 سنين .. وبيرفضوا يتركوا البلد ..

أيوه في ناس تعبانة ...

لكن في ناس تانية كتير هما اللي راكبين العربيات دي وساكنين في العماير الفارهة والفلل الفيخمة وبيصرفوا ببذخ ....

صعب قوى بعد ماكنت بتصيف فى شرم

يا ست الكل ده في الصيف مثلاً في كمية شركات سياحة بتنظم رحلات لشرم وللغردقة .. صدقيني بربع الثمن اللي بيطلع به الواحد بشكل فردي هناك ...وإسألي مجرب ... بس هي المنظرة والفنجرة بس اللي بتخلينا مش شايفين الجانب البراق في الموضوع ..

وبعدين مالها العصافرة ؟ إنتي مش عارفه إن أكثر من ربع المحاورات وأبو احمدات وجدعان وممكن يزعلوا من كلامك ده ( أنا جاي أهدي النفوس ومش قصدي أقوم الناس ضدك wst:: wst::

[محمد عبدالعزيز]

يا لولا هانم عيشى زى ماكنتى عايشة قبل ماتسافرى

أو ماترجعيش خالص أحسن عشان تحافظى على مستواكى

بسيطة خالص يعنى

[salemhegazy]

هاهاه و الله يا اخت لولا اضحكتينا ( ادخلتى السرور علينا يعنى ) صحيح كل منا له همومه اللى على قده ناس همها اتلاقى شقة مناسبة تعيش فيها بعد سنواتت الغربة و ناس عايزة تحوش علشان تتجوز و واحد عايز يعمل مشروع يعيش منه ووو ووو

و ناس شايلة هم الشيكولاته و الكريمات و الشامبوهات !!!!!!!!!

بس تعرفى اول مرة اشوف هذة الحالة الشرائية الزوج يعبى العربية و الزوجة تشيل منها

فى العادة العكس هو اللى بيحصل احيك بشدة بشدة على هذا التصرف

[لولا]

يا جماعة بالراحة عليا :lol:

المسأله مش انى بقيت فجأة لولا هانم الدرملى ومش طايقة الواد زغلول.

لكن انا للأسف الشديد قضيت حياتى كلها فى الغربه من اولى ابتدائي..

وبعدين اتجوزت وكان جوزى عايش نفس ظروفى برضة واتغربنا تانى من اول يوم جواز

.. والحمد الله احنا الإتنين بنشتغل فى شركات كويسة.

الرجوع لمصر حلم .. بيحلمه اى حد عاش حياته كلها بره البلد وكان بيشوفها مره

او مرتين فى السنه بالكتير.

فى ناس كتير زى ما انت بتقول عايشه كويس قوى فى مصر والناس دى طبعا

لا يمكن تكون كلها متغربه اكيد انا فاهمه كده.. لكن الناس دى بنت نفسها

هناك من بدايه الطريق وخدت مكانتها فى شغلها خلاص.

الحكم على الأمور بيختلف من شخص للتانى وحسب الظروف أكيد

يمكن تكون ظروفى كلها قليل قوى اللى عاشوها ..انك تكون ابن عيله متغربه

كانت ديما بتحاول تعيشك فى احسن مستوى وبعدين تتجوز وتعيش فى الغربه

وتكمل نفس اسلوب الحياه.. والإنسان اللى فتح عينه على الدنيا وهو عايش

كده ميبقاش انسان بيتمنظر ولا بيتفشخر. ولا خلاص شايف نفسه.

ولا المسأله بقت شعارات معاديه لحب مصر وانى بعت بلدى عشان

كم هدمه وقزازه برفان الموضوع كام واحد يحب يرجع مصر وهو عارف انه

مش حيقدر يعيش نص المستوى اللى عاشه بره مصر.

هل تفكيرى فى النقطة دى يخلينى انسانه من كوكب تاتى..كوكب لولا هانم :lol:

ليه لازم حلم الرجوع لمصر للناس للى زى حيث ان غربتى بعد الجواز سنتين تكون مرهونه

بالكلام اللى بيقول ارجع واغمسها بدقة.. طب ليه ميكنش من حقى ان مصر توفرلى شغل

فى شركة محترمه انا وجوزى واننا ناخد رواتب كويسه تعيشنا كويس.

انا قريت كتير مواضيع هنا عنوانها لما ترجع مصر حتعمل ايه؟

واكتر حاجة لقيت الكل بيفكر فى مشاريع شخصيه يشغل فيها فلوسه وتعب السنين

والغربه..بس اللى معندوش يعمل مشاريع ومستنى يرجع يلاقى وظيفة محترمه

براتب عالى ومش لاقى يعمل ايه.

انا الحمد الله عايشه كويس قوى وفى الغربه.. حلمى اعيش كويس قوى وفى بلدى ..كتير

[لولا]

هاهاه و الله يا اخت لولا اضحكتينا ( ادخلتى السرور علينا يعنى ) صحيح كل منا له همومه اللى على قده ناس همها اتلاقى شقة مناسبة تعيش فيها بعد سنواتت الغربة و ناس عايزة تحوش علشان تتجوز و واحد عايز يعمل مشروع يعيش منه ووو ووو

و ناس شايلة هم الشيكولاته و الكريمات و الشامبوهات !!!!!!!!!

بس تعرفى اول مرة اشوف هذة الحالة الشرائية الزوج يعبى العربية و الزوجة تشيل منها

فى العادة العكس هو اللى بيحصل احيك بشدة بشدة على هذا التصرف

طيب انا يمكن صغيره ومشفتش من الحياه اللى شفتوه..وقصدك انى متعبتش فى حاجة

عشان كده اهتماماتى نقطتكم :lol:

انا يا جماعة بتكلم على مستوى حياه ككل والحاجات اللى انتوا شايفنها تافهه داخله فيها

على فكره انا كبنت يهمنى الشامبو والكريم.

انتوا طيب يارجاله لما ترجعوا مصر حتبطلوا السجاير المستورده اللى بتشربوها..

وحتستغنوا عن كريم الحلاقة وتدوها رغوه صابون. وحترشوا على بدلكم قزازة

كلونيا الشبراويشي وانت خارجين :lol:

انا عن نفسي لما انزل اعيش فى مصر مقدرش اشترى كل الحاجات اللى اتربيت

عليها لأنها حتبقى غاليه هناك والدخل حيكون محدود..كنت بفكر معاكم بصوت عالى

تقدروا تستغنوا عن كل اللى اتعودوا عليه فى الغربه لما ترجعوا.

[se_ Elsyed]

طب ليه ميكنش من حقى ان مصر توفرلى شغل

فى شركة محترمه انا وجوزى واننا ناخد رواتب كويسه تعيشنا كويس.

عايزة الحق ولا إبن خالته ؟

مش مطلوب من مصر أو من جزر الكناري حتى إنها توفر شغل للواحد ولمراته بمرتبات كويسة وتجيب لهم لولي بوب كمان ..

ولكن كفاءة الواحد وخبرته هي اللي بتخليه يحصل على تلك الفُرص في أي مكان ... ( مدام لولا ... واحد بيتصل بي من مصر حضرتك وبيدور على شغلانة مبرمج أوراكل دي بي إيه ... مش هو بصراحة ولكن واحد صديقة ... عارفه حضرتك إنه بياخد دلوقت ومن مصادر موثوق بها .. بياخد 10 آلاف ج شهرياً .... وعايز يسافر السعودية واخدالي بالك ... فسألته وقولت له : إسأل صحبك وقول له مش عايز واحد شغال في السعودية بقى له فترة يشتغل له مساعد ويشيلة الشنطة بألفين ج بس ؟ )

وبعدين يا مدام لولا ... لو إنتي بتشتغلي طول عمرك وزوجك كمان في الغربة ... هل لسه بتفكري بعد ده كله في وظيفة تاني لما ترجعي مصر ... يا قلبك الجامد ؟

ما ينفعش يا ستو الواحد بقى يعيش موظف طول عمره ومدير غلس ييجي يتنطط عليه ...

لكن فكروا في مشروع ويا سلام لو تديروه إنتو الإتنين ...

المفروض الواحد ييجي عليه فترة يجني ثمار تعبه طوال عمره مش يفضل طول عمره في شقى الوظيفة ...

وبعدين يا ستي لما تنزلي مصر نهائي إبقى خدي معاكي قد كرتونة شيكولاته .. على طورناطة كريم نيفيا .. على تلات أو أربع كراتين شامبو هيد أند شولدرز بتاع القشرة ..

وأهي الحاجات دي تكفيكي ردحاً من الزمن ... ولما تخلص إبقى خلي صحباتك اللي في السعودية يبعتوا لك تاني .. وبفلوسك برضو ا مش عايزين جمايل من حد آه ...

[muslim4ever]

( مدام لولا ... واحد بيتصل بي من مصر حضرتك وبيدور على شغلانة مبرمج أوراكل دي بي إيه ... مش هو بصراحة ولكن واحد صديقة ... عارفه حضرتك إنه بياخد دلوقت ومن مصادر موثوق بها .. بياخد 10 آلاف ج شهرياً .... وعايز يسافر السعودية واخدالي بالك ... فسألته وقولت له : إسأل صحبك وقول له مش عايز واحد شغال في السعودية بقى له فترة يشتغل له مساعد ويشيلة الشنطة بألفين ج بس ؟ )

متلموش ياس س لان مرتبات Oracle DBA ,Oracle Consultant تخطت ال 10000$

[لولا]

وبعدين يا مدام لولا ... لو إنتي بتشتغلي طول عمرك وزوجك كمان في الغربة ... هل لسه بتفكري بعد ده كله في وظيفة تاني لما ترجعي مصر ... يا قلبك الجامد ؟

ما ينفعش يا ستو الواحد بقى يعيش موظف طول عمره ومدير غلس ييجي يتنطط عليه ...

لكن فكروا في مشروع ويا سلام لو تديروه إنتو الإتنين ...

متشكره قوى يأستاذ سيد على ردودك..

بس انا بشتغل انا وجوزى فى السعوديه من سنتين بس

من ساعة ما تخرجنا واشتغلنا هنا على طول. لكن احنا

اتربينا حياتنا كلها مع اهالينا المتغربين فى الخليج..

وبالتالى انا وجوزى معندناش فلوس نعمل اى مشاريع

كبيره او حتى متوسطة تكون مضمونه.

الحاجة التانيه انا بختلف معاك فى موضوع ان مش مفروض

اليلد توفر الوظايف المحترمه للشعب بسقف رواتب محترم

يعيشهم فى مستوى على الأقل متوسط . مش كل الناس

زى قريبك ربنا فاتح عليه وشغال فى مصر بعشرة تلاف جنيه

انا عندى قريب هنا دكتور بياخد راتب فى حدود 15 الف ريال

وهو فى التلاتين تفتكر لو رجع يشتغل فى اى مستشفى فى مصر

حياخد كام؟ وتفتكر كل الناس اللى بتشتغل بره البلد وملقتش وظايف

محترمه فى بلدها برواتب محترمه اتغربت عشان مش موهوبه!!

على فكره انا جوزى دارس هندسه كمبيوتر ومتخصص فى البرمجة..

وانا دارسة اداره اعمال انجليش.. يعنى تفتكر العيب فينا عشان مش

لاقيين رواتب محترمه فى مصر؟

انا مش عايزة من مصر توفرلى كلب لولو وبوبى :lol:

انا عايزة اعيش فى مصر حياه محترمه مرتاحة وبمجهودى طبعا..

وخلى الكلام واقعى اكتر من كده..انا ليا قرايب ياما هناك.. كل واحد فيهم

شاطر ومتعلم احسن تعليم.. بس تفتكر شغالين بكم ؟

تم تعديل 1 يوليو 2008 بواسطة لولا

[se_ Elsyed]

خلاص .. دعينا نتفق إن لكل مقام مقال .. أو على رأي فيلم التجربة الدنماركية ... لكل مرحلة مفرداتها وأيدولوجيتها وبنيتها الأساسية

فخلينا هنا نعيش عيشة هنا ..

وهناك نعيش عيشة هناك ...

صدقيني - تاني غير بتاعت زكي رستم اللي فوق - يا لولا إن أكثر ما يتعب المغتربين نفسياً هو إنهم عندما يستقرون في مصر يظلوا مُعلقين بجو الغربة... فبيبقى عامل زي اللي بيرقص على السلالم .. لا هو متغرب ولا هو قادر يتكيف ويتأقلم مع واقعة اللي هو خارج منه أساساً . فممكن يجي له إكتئاب أو إنحباس حراري ويفضل تعبان نفسياً ..

وبعدين إنتي كنتي فاتحة الموضوع عشان الشوكولاته وكريم نيفيا ... ليه تقلبي علينا المواجع ؟

خدي يا ستي إدي كبشة شوكولاته

( لولا ... لم تجيبي البنت المكلبظة دي بإذن الله .. إوعي تجيبي في السبوع شيكولاته باتشي من محلهم اللي في شارع تلاتين العُليا ... قال إيه خير اللهم أجعله خير ... رايح أشتري كام كيلو شوكولاته عشان سبوع عبد الرحمن إبني ... يقوم الواد بتاع المحل يفول في وشي ويقولي : الكيلو بـ 350 ريال يا فندم .. فقلت له : ثكلتك امك ... وسيبته ومشيت قبل ما أتهور وأضربه بالسيف البتار )

وأدي علبة كريم نيفيا بالصبار عشان تساقط الجلد ... هدية مني

[nizza la bella]

يا جماعة انت بتتكلمو على شكولاتة و كريم نيفيا . الناس بتاكل لحمة حمير وكلاب ,ما بالك بلكريمات والشكولاتات

[capitshino]

زى ما كنا عايشين فى مصر وجينا هنا واتاقلمنا على الوضع الجديد . هيجى وقت وهنرجع مصر ونتاقلم على الوضع الجديد برده -- اكيد هنتعب شوية لسهولة الحياة هنا. بس كتير قبلنا نزلو واتقلمو يمكن فى زمن مختلف بس نزولنا مصر وتاقلمنا امر واقع ومافيش خيار تانى..

تحياتى

[nizza la bella]

مصر زمان مش مصر دلواتى فى فرق كبييييير يا capitshino

[لولا]

يا جماعة انت بتتكلمو على شكولاتة و كريم نيفيا . الناس بتاكل لحمة حمير وكلاب ,ما بالك بلكريمات والشكولاتات

طب ما حتى الشكولاته والكريم اتضربت فى مصر..

نسيت اللى حصل فى شكولاته كادبورى اللى غرقت السوق

وفى الأخر طلعت فيها سالمونيللا وغير صالحة للإستهلاك الأدمى

ولسه امبارح جايبين فى الأخبار عن شحنه مواد تجميل بمليار

ونصف دخلت الأسواق المصريه وبتباع وهى غير صالحة تماما

للإستهلاك الأدمى.

يعنى محلوله من كل نحيه :unsure:

تم تعديل 2 يوليو 2008 بواسطة Salwa
تعديل كلمة .

[لولا]

زى ما كنا عايشين فى مصر وجينا هنا واتاقلمنا على الوضع الجديد . هيجى وقت وهنرجع مصر ونتاقلم على الوضع الجديد برده -- اكيد هنتعب شوية لسهولة الحياة هنا. بس كتير قبلنا نزلو واتقلمو يمكن فى زمن مختلف بس نزولنا مصر وتاقلمنا امر واقع ومافيش خيار تانى..

تحياتى

انت كده يا كبتشينو جبت من الأخر..

الواحد مصيره فى يوم يأقلم نفسه على الموجود

هو ده الواقع المر.

وبرضه خلينا نفكر ان لكل حلم نهايه :unsure:

بس مش عايزين برضه نصحى على كابوس.. عايزين نصحى على واقع :sad:

وطالما الموضوع كده عن اذنكم بقى الحق اروح اعمل شويه شوبنج قبل ما يجى

يوم تبقى كلمه شوبنج فى خانه الفعل الماضى الممنوع من الإعراب :sad:

[لولا]

مصر زمان مش مصر دلواتى فى فرق كبييييير يا capitshino

فى ناس كتير فى الغربه مش قادره تحكم على الفرق

ده بشكل عقلانى.. العاطفة بتغلب فى الأخر.. وده طبعا

لأن الواحد بيحب بلده مهما اتغيرت.

لكن التغيير ده مشكلته انه مش راحم اى حاجة..

يعنى اللحمه اتضربت وبقت لحمه حمير وكلاب..

والفاكهة بقت مش مضمونه من الكيماوى وياما ناس

اتسممت من البطيخ والخوخ قبل كده..

والشكولاته بقت بتتباع فى الإشارات برخص التراب

وهى مستورده وفى الأخر طلعت مسببه للسرطان..

واللبن حتى الصيف اللى فات حماتى بتشتكيلى منه

وانهم اكتشفوا لبن غير صالح للإستعمال..

والعصير اللى بنشربه العيال اللى زى جهينه من شركات تانيه

طلع السنه اللى فاتت انهم اكتشفوا منه عبوات غير صالحة

للإستخدام.

والمكياج ياسيدى زى ما قلت دخلت منه لمصر شحنه بمليار

ونص غير صالحه للإستخدام اصلا.. واتوزعت فى السوق..

وبيحاولوا يسحبوها لسه امبارح بس سامعة الخبر :unsure:

وحاجات كتير كتير تانيه.. اعد ايه ولا ايه :sad:

بس فى الأخر مصيرنا ننزل مصر وتأقلم نفسنا على الوضع الجديد.

او بمعنى اصح الوضع الشديد

انا اهلى لما اتغربوا فى التمانينات سابوا البلد وهى فيها خير

والفساد مكنش متفشي فيها كده.. واى حد رجع فى التسعينات

رجع وقدر برضه يأقلم نفسه ويعيش فى خير البلد.. كان الواحد

من دول عمره ما يفكر الف مره قبل ما يشترى بطيخة ولا علبه عصير

لولاده ياترى ممكن تكون بايظه :sad:

لكن تانى ارجع واقول زى ما قال كابتشينو بيه.. مفيش حل غير

التأقلم على الوضع wst::

واهى الأعمار يإيد ربنا اولا واخيرا..ورغم كل وسائل تسميم الشعب

الشعب لسه عايش وبيزيد كمان :sad: