بعد 13 سنة فى السعودية أفكر فى العودة

[moma]

بسم الله الرحمن الرحيم

السلام عليكم ورحمة الله وبركاتة

السادة الكرام رواد المنتدي محتاج النصيحة

انا إنسان مصري أعمل في السعودية من 13 سنة تقريبا وظيفتي رئيس حسابات في شركة كبيرة وأتقاضي راتب حوالي 8000 ريال لم أستفد من غربتي كثيرا لأني كنت مبذر ولم أدرك ذلك إلا عندما تزوجت في عام 2003 خرجت من الزواج لا أملك إلا مبلغ 15000 جنية صحيح أنا صرفت حوالي 120000 جنية لبناء وتأثيث شقتي الكائنة في منزل ملك لي ولأخوتي ... المهم الأن لدي طفلين الكبير عمرة 4 سنوات والصغري 8 شهور ولا أريد أن يتعلم إبني هنا بالسعودية بمعني أنني قررت الرحيل من السعودية نهائيا كحد أقصي عندما يبلغ إبني 6 سنوات ....... ولو سارت الأمور كما أخطط لها بإذن الله سيكون الوضع بعد سنتيين ( عام 2010 ) كالتالي

1- مبلغ مدخر حوالي 350000 جنية

2- سيارة موديل 2008 ( طبعا إحنا حاليا عام 2010 )

فأنا أمام خيارين

الأول هو أن أستمر في السعودية وخاصة أن الراتب يوجد به زيادة سنوية

الثاني هو الإلتزام بما قررت سابقا بالرحيل من السعودية عام 2010

مع العلم إني لدي خبرات في زراعة ( الخضار ) فقط وأيضا عائلتي كانت تمتهن مهنة تجارة المواشي والجزارة وأنا شخصيا أحتاج للقليل من الخبرات لإتقانهم

انا من محافظة الدقهلية وأسكن بقرية ملاصقة لمدينة المنصورة

فهل تؤيدوني في قراري بالرحيل من المملكة أم الإستمرار ؟؟؟

في حالة تأيدكم لقرار الرحيل فما هي تصوراتكم لفرص الإستثمار أمامي في ظل المعطيات الموضحة

مع العلم أن عمري الأن 37 سنة ولي ميراث من الوالد رحمه الله ولكن أعتبر ذلك خارج حساباتي

أرجو منكم ألا تبخلوا علي بالنصيحة

وجزاكم الله خيرا

[osaimi]

فى الوقت الحالي مصر فيها أوضاع كتير مش كويسة لكن مين عارف يمكن ربنا يعدل الحال ، خليك ماشي فى خطتك ولما تيجي سنة 2010 أعد حساباتك مره أخرى بناء علي الوضع فى مصر وساعتها خد القرار الصح - للأسف فى الوقت الحالي في ناس كتير معاها فلوس تعيشها كويس فى مصر لكن مش عاوزين يرجعوا لأسباب كتيره سواء اجتماعية أو دينية أو سياسية أو غيره

لكن فى الآخر ليس لنا مفر من الرجوع لأنها بلدنا ....

[moma]

أشكرك أخي OSAIMI علي مرورك الكريم

ولكن أخي القرار ممكن يكون الأن بالعودة لو أتيحت فرصة أو جو مناسب للإستقرار صحيح إن المبلغ المتاح نقدا للإستثمار لن يتعدي 200000 جنية

ولا مانع لدي إطلاقا في إتخاذ قرار العودة حالا في حالة وجود فرصة إستثمارية

[vipwithyou]

أنا شخصياً أتمنى ان اصل لتلك الدرجة من التقديرات التى استطيع وقتها أخذ قرار بالعودة نهائيا ً لمصر

وهو دون نقاش القرار الأسلم لك ولأولادك

وخصوصا ً فى تلك السن التى ليست بخطيرة الآن وتزداد الخطورة بعد السادسة فعلا

لكن أرى بعض الأشخاص من هم أحسن حالا بكثير جدا ً منك ولا يفكرون فى العودة النهائية وأسبابهم غير مقنعه

فهم زهدوا مصر

لكن أعتقد وضعك يؤهلك عام 2010 للحياة حياة كريمة فى مصر

وأنصحك من الآن بوضع كل ما تدخرة فى شراء الأراضى الزراعية

حتى ميعاد نزولك باذن الله

اخوك

تامر السيد

[HDarwish]

السلام عليكم

والله أنا مش عارف اقولك إيه لإن الموضوع ده محيرني ومحير ناس كثير بالفعل

بس من بين السطور إنت لقيت الحل وهوه لو فيه فرصة استثمارية هتنزل

يبقى المفتاح لاقيناه وهوه الفرصة الاستثمارية

يعني من الوقتي لحد 2010 تكون مركز في الفرصة الاستثمارية

ربنا يوفقك ويوفق الجميع فيما فيه الخير إلينا وإلى المسلمين جميعا

تحياتي

[مهيب]

أنا أؤيد تماما قرار الرجوع ... خاصة مع توفر خبرات فى مجالات من الممكن أن تنشىء مشروعا مربحا .. و خاصة أيضا و انت لست من سكان القاهرة و هذا فى حد ذاته أضحى ميزة كبرى هذه الأيام مع صعوبة المعيشة فى القاهرة أو المدن الكبيرة فى مصر بصفة عامة .

أعتقد أنك لو قارنت وضعك المالى الآن بعد سنوات الغربة بوضع بعض معارفك فى مصر ممن لم يسافروا (و حسبوها حسبة تانية) فستجد أن الفارق ربما ليس كبيرا .. أعتقد أنك ستجد من زملاء دفعتك مثلا .. من يملك شقة و سيارة الآن فى مصر .. و لديه بعض مال هو تحويشة العمر .. ربما يقل الرقم بعض الشيء .. ربما موديل السيارة أقدم .. لكنها ليست بالفروق الجوهرية .

اذا فكر كل فى مسألة الرجوع الى مصر على غرار نظرية (الأحوال فى مصر سيئة) فهذا تفكير أقرب الى الاتباع للاتباع .. فكر فى أوضاعك أنت فى مصر .. أعتقد أنها لن تكون سيئة ان شاء الله بل ربما كانت أفضل .

مهيب

[JAY]

إيه يا موما يا حبيبي بقه بتاخد حوالي 14 ألف جنيه في الشهر ومستقر كمدير في شركة في السعودية و عندك عيلين (والله أعلم ناوي تجيب عليهم 2 والا تلاته تانيين تلحق .. تكاثروا) و عندك عربية بتقول 2008 (يمكن لو نزلت مصر مش حاتعرف تمونها بنزين) وعايز ترفس النعمه اللي في إيدك عشان العيال ما تترباش بعيد عننا ..... هو انت شايف يا حبيبي إن العيال عندنا ماشاء الله ما شاء الله ولا عيال مدارس الفرير أو الفرانسسكان والا التراسانتا...

أنا مش عايز أتخانق معاك .. يس لو كنت أخوك حاجي وأعضك عضه آكل حته من دماغك فيها.. بقه يا راجل يا طيب أهو .. أنا سبت نعيم أمريكا والخليج وقررت أقعد هنا .. وعملت زيك .. معايا عربية واشتريت شقة وأرض... وكان معاية حتة سيغة .. وعينك ماتشوفش النور.. خدوني الحبايب (شلة نصابين ) كل حاجة وبيعوني الأرض ونزلوا بيا هتتك بتتك وقرقشوا عضامي وكلوني لحم ورموني عضم.. وقاعد أدور على شغل وأنا عندي 3 شهادات جامعية ومنها الطب (بدون ممارسة) وعندي 6 لغات وبدور على وظيفة اشا الله حتى لو في سريلانكا

يعني ألطم ويقولوا الراجل تجنن؟؟؟؟؟؟؟؟؟؟ بص خود نصيحتي وماتعارضدش... اللي بتعرفه أحسن من اللي ما بتعرفوش.. ما ترفسش النعمة اللي إنتا بيها ومعلش بقولك أنا بالمثل السعودي (خليك على مجنونك ليجيلك اللي أجن منه) ولما تيجي هنا بتقول زيي (الله على زمان البستك) وأيام اللولو .. يعني فين ايام زمان .. مش جاي تلحق شويتين طعمية والا جردل فول والا حبة كوشري..

أنا بقول لك يا خويا يا حبيبي .. اتنصح اتنصح ما تتنصحش ما تتنصحش (آدي راسك تعرف خلاصك) لو كنت في مكانك ما بتعتعش إلا لو شالوني بونش.. وما تزعلش مني يا خويا كلمة الحق ما بتزعلش.. وإياك تقول للي معاك بنواياك عشان ما يحطولكش صابونة وتيجي بآخر 2008 ويبقى يازيد عمرك ما غزيت..حبيبي ما تزعلش مني أنا أخوك الكبير وبنصحك ونفسي أعضك

[se_ Elsyed]

يا عم jay إيه الكلام السوداوي ده ؟

الراجل في دماغه افكار كويسة وناوي يستثمر في مشاريع بيفهم فيها ومعاه رأس مال ..

فبناءً عل إيه ما هايلاقي ثمن بنزين عربيته ويقعد ياكل فول وكُشري طول العمر ؟

لا حول ولا قوة إلا بالله على نظرة ولاد مصر لها

[قديم]

إيه يا موما يا حبيبي بقه بتاخد حوالي 14 ألف جنيه في الشهر ومستقر كمدير في شركة في السعودية و عندك عيلين (والله أعلم ناوي تجيب عليهم 2 والا تلاته تانيين تلحق .. تكاثروا) و عندك عربية بتقول 2008 (يمكن لو نزلت مصر مش حاتعرف تمونها بنزين) وعايز ترفس النعمه اللي في إيدك عشان العيال ما تترباش بعيد عننا ..... هو انت شايف يا حبيبي إن العيال عندنا ماشاء الله ما شاء الله ولا عيال مدارس الفرير أو الفرانسسكان والا التراسانتا...

أنا مش عايز أتخانق معاك .. يس لو كنت أخوك حاجي وأعضك عضه آكل حته من دماغك فيها.. بقه يا راجل يا طيب أهو .. أنا سبت نعيم أمريكا والخليج وقررت أقعد هنا .. وعملت زيك .. معايا عربية واشتريت شقة وأرض... وكان معاية حتة سيغة .. وعينك ماتشوفش النور.. خدوني الحبايب (شلة نصابين ) كل حاجة وبيعوني الأرض ونزلوا بيا هتتك بتتك وقرقشوا عضامي وكلوني لحم ورموني عضم.. وقاعد أدور على شغل وأنا عندي 3 شهادات جامعية ومنها الطب (بدون ممارسة) وعندي 6 لغات وبدور على وظيفة اشا الله حتى لو في سريلانكا

يعني ألطم ويقولوا الراجل تجنن؟؟؟؟؟؟؟؟؟؟ بص خود نصيحتي وماتعارضدش... اللي بتعرفه أحسن من اللي ما بتعرفوش.. ما ترفسش النعمة اللي إنتا بيها ومعلش بقولك أنا بالمثل السعودي (خليك على مجنونك ليجيلك اللي أجن منه) ولما تيجي هنا بتقول زيي (الله على زمان البستك) وأيام اللولو .. يعني فين ايام زمان .. مش جاي تلحق شويتين طعمية والا جردل فول والا حبة كوشري..

أنا بقول لك يا خويا يا حبيبي .. اتنصح اتنصح ما تتنصحش ما تتنصحش (آدي راسك تعرف خلاصك) لو كنت في مكانك ما بتعتعش إلا لو شالوني بونش.. وما تزعلش مني يا خويا كلمة الحق ما بتزعلش.. وإياك تقول للي معاك بنواياك عشان ما يحطولكش صابونة وتيجي بآخر 2008 ويبقى يازيد عمرك ما غزيت..حبيبي ما تزعلش مني أنا أخوك الكبير وبنصحك ونفسي

متهيألى المفروض صاحب الموضوع يدخل يرد علينا مش يفجر موضوع خطير زى دة ويمشى ويبسيبنا نخبط فى بعض

صح ولا لا

هو فين اساسا ً

اللى عايز النصيحة بيدور الناس ردت عليه ولا لا

صح كدة

سلالالام

تم تعديل 3 يوليو 2008 بواسطة قديم

[capitshino]

روح كندا

[JAY]

يا عم jay إيه الكلام السوداوي ده ؟

الراجل في دماغه افكار كويسة وناوي يستثمر في مشاريع بيفهم فيها ومعاه رأس مال ..

فبناءً عل إيه ما هايلاقي ثمن بنزين عربيته ويقعد ياكل فول وكُشري طول العمر ؟

لا حول ولا قوة إلا بالله على نظرة ولاد مصر لها

مهوه برضك احسبها بالعقل يا سي السيد يا خويا... الراجل بيقول مشاريع ومصانع ومش عارف إيه .. وبيقول لك إنه في 2010 حايكون معاه 350 ألف ملطوش... وانت عارف يا حبيبي إن المبلغ ده في الأيام الغبرة اللي إحنا فيها بيقضيه يشتري منه أوضة وحمام من غير سيراميك ويادوب مطبخ في صفت اللبن والا في أبو أتاته في الدور العاشر من غير أسانسير... حايعمل المشاريع دي منين ... يحطهم مقدم لمحل تجاري متر بمتر ونص في شبرا الخيمة...

ياراجل يا طيب .. لو كان الجنيه قبل سنة يشتري لك عيش تاكل فيه إنت والعيال دلوقت بيشتري لك أربعة أرغفه يعني تمانية لقم بالظبط ما بيشبعوش عيل في الكيجي ون.... في ألفين وعشرة يبقى إن شاء الله الجنيه بيشتريله بونبوناية ... عايزني أهجم عليك يا حبيبي برضه... مش شايف الغلب اللي إحنا بيه... وتقول لي مشاريع؟؟؟؟؟ واللي بيسمعوه بيقولوا ياسلام ((سويرس باشا)) عايز يستقر في مصر... ياراجل صليلي عالنبي.. :unsure:

[JAY]

روح كندا

أنا افتكرت سعادتك بتقول كنكه... :unsure: :blink:

هو يعني عنده عيلين ومن هنا لسنة 2010 يكون عنده خمس عيال وتقول له روح كنكه دي :wub: .. خليه قاعد .. خليه بالنعمه اللي هوه بيها :unsure: كنكة إيه ياعم هو إحنا لاقيين القهوة عشان نروح اللي بتقول عليها دي wst::

تم تعديل 2 يوليو 2008 بواسطة JAY

[Rakan]

وضعك الأن في السعودية تمام ودخلك الشهري محترم ومضمون .. حرام تتنزال عنة مقابل شي الله اعلم كيف يكون

المشكلة عندك الأولاد .. وهذة مشكلة حلها بسيط ... ( مدارس خاصة محترمة ) وان شاء الله يرتاح بالك .

[vipwithyou]

للأسف لازلت أكرر اللى يقدر ينزل مصر وفى وقت مبكر ومينزلش .. مهما عاش ملك فى الغربة هيجي له يوم ويندم على كدة

أرجوك افهم معنى كلامى كويس

معلش اوعى تاخد بالكلام اللى يقول لك تروح تعمل ايه فى مصر وممعكش مبلغ كبير

روح بالمبلغ دة اعمل مستودع ادوية ممتاز واستلف عليهم كمان حتى 150000 وابدأ بنصف مليون

يبقى تحقق الدخل اللى بتعملة هنا وتبقى مرتاح فى بلد

ارجوكى علشان ما تندمش على ولادك بعد كدة

انا بيصعب عليا حد يكون عايز نصيحة ويشتت بكلام غلط

والله العظيم غلط

شكرا

[vipwithyou]

وضعك الأن في السعودية تمام ودخلك الشهري محترم ومضمون .. حرام تتنزال عنة مقابل شي الله اعلم كيف يكون

المشكلة عندك الأولاد .. وهذة مشكلة حلها بسيط ... ( مدارس خاصة محترمة ) وان شاء الله يرتاح بالك .

يا جماعة حرام والله عليكوا الكلام اللى بتقولوه للراجل دة

ارجوا من صاحب المشاركة ..

صلى استخارة

شوف انت هتكون مرتاح فين

هل انت مرتاح بزمتك فى الغربة

بالله عليك جاوب

مش قصدى مرتاح ماديا ً وبتاكل أحسن أكل وبتفسح أولادك أحسن فسح ( مع ان دة مش هنا )

خد رأى زوجتك واذا رفضت النزول تبقى غلطانه

فكر زى ما انت بتفكر صح ان اولادك يتربوا فى مصر

يحبوا مصر

يعيشوا وسط اهلهم فى مصر

الا لو انت هتختار وطن تانى ليك

وأعتقد باذن الله انك هتوصل للقرار السليم

أخويا بقاله فى الغربة 12 سنه برضوا

عندة عربية زيرو موديل السنه

عندة فيلا فى مصر

ومش ناوى ينزل مصر

تفكيرة كدة

وأنا بأقوله غلط

أرجوا التفكير يا جماعه التفكير مرة صح

شكرا

[iloveegypt]

يا راجل كتر خيرك 13 سنة ولسه هتبدأتفكر ف الرجوع

ده انا 4 سنين وبقول انا كدة طولت وبفكر فى الرجوع

بس هقولك بصراحة الموضوع يرجع لحضرتك لانك كلها خمس دقائق وهتلاقى ناس تدخل تعقدك من مصر والعيشة فيها ويحسسوك ان الحياة سوداء بس بصراحة انا اجوزت فى مصر وعشت سنتين وانا متزوج وكنت شغال فى مصر والحياة كانت زى الفل بس لو حضرتك ناوى تعمل مشروع اولا استخير ثم ادرسه كويس وعلى فكرة لو ولاد حضرتك دخلو مدارس فى السعودية يبقى عليه العوض عليهم ماعدا المدارس الانترناشينول وفى الحالة دى هتلاقى مصاريفك زادت حوالى 2000 ريال شهريا + 3000 اكل وشرب يعنى هيبقى هتحوش 3000ريال فقط انت لوربنا كرمك بمشروع محترم هتكسب اكتر منهم

مثال لو اشتريت شقة ب200000 بعد سنة هتبيعها بحوالى 35000 ج مصرى وهو اكتر حوالى 3 اضعاف المبلغ اللى كنت هتحوشه 3000*12*1.5= 54000 ج مصرى ده لو فضل الريال بجنيه ونصف ومنزلش اكتر

تم تعديل 2 يوليو 2008 بواسطة iloveegypt

[ايهاب سالم]

الأولاد في الخليج لازم يدخلوا مدارس خاصه

لو مستريح عندك إوعى ترجع مصر حتى لو معدل إدخارك أصبح صفر

في النهايه إنت كسبان العيشه

[ايهاب سالم]

روح كندا

أنا افتكرت سعادتك بتقول كنكه...

هو يعني عنده عيلين ومن هنا لسنة 2010 يكون عنده خمس عيال وتقول له روح كنكه دي

إنتوا اللي جبتوا سيرة كندا مش أنا

بالعكس لو سنة 2010 أصبح عنده 5 عيال هيعيش ملك في كندا

الحكومه هتدفع له على كل عيل 360 دولار شهري

[naser]

عزيزى الحائر

قرات تساؤلك وافهم انسانيا وجه الحيرة

واسمحلى ان اعطيك من نفسى مثالا

على عام 2010 يكون معك ان شاء الله وتبارك الله 350 الف ج م وسيارة 2008 وشقة جاهزة ببيت ابيك الى جانب ارث تحب ان لا تحسب حسابه (ماعرفسش ليه !!!!1) لك هذا

وسبب العودة هو انك لا تريد لابنائك ان يدرسوا فى مدارس السعودية

بداية انا مواااااافق تماما على رحيلك وعودتك بهذه الظروف ولهذا السبب

لا علم هنا ولا دراسة حتى لو بلينا فى مصر بالدروس الخصوصية والكلام ده الا ان البيئة المدرسية فى مصر هى الاكثر صحة وانت تعلم هل تريد لابنائك ان يصبح لهم عادات وصفات ابناء السعوديين؟

انا لم اسمح لنفسى بان احضر ابنائى للتعليم هنا على الرغم من ان الابن الاصغر فى تانية ثانوى كان مجموعة 87% الا انى لم احضره هنا لياخذ الثانوية العامة بمجموع 100% كما يحدث ونزلت انا اليه فى مصر 6 شهور بلا راتب من هنا -فانا اعمل فى الحكومة هنا بالسعودية- حتى حصل على 90% توتال الثانوية العامة فى تالتة ودخل كلية معقولة

ابنائى الثلاثة فى مدرسة واحدة حكومية تجريبية الاول تخرج منها الى كلية الحاسبات والاتصالات بعد ان حصل على الثانوية بمجموع 97% وكانت درجات الحاسبات اعلا من الهندسة الا انه فضل الحاسبات وهو الان بروجرامر براتب ماشاء الله رائع فى مصر ويدرس الماجستير والثانى من نفس مدرسة طارق بن زياد التجريبية للغات بشبرا وحصل على 90% ويدرس اداب انجليزى وهو فى الليسانس الان والثالثة بنفس المدرسة فى الصف الخامس الابتدائى والحمد لله متفوقة وبدون دروس

انا كنت اعمل هنا من 5 سنوات ولم احضرهم ونازل نهائى بعد شهر ونصف وراتبى 12 الف ريال ياولدى ومعى 250 الف ج بس ياولدى وعندى سيارة 128 فيات موديل 1988 ياولدى وطبعا عندى شقة فى شبرا

ومبسوووووووط وراضى

ومرتبى فى مصر ان شاء الله لا يزيد عن 2000 ج بالجرى والتنطيط

انزل طبعا ولا تسمع هيستيريا الناس ولا اى كلام عن الصعوبة فى مصر وكفاية بعاد

ولا تترك ولادك ابدا فى مصر ويغريك الريال بالعودة

ولا تعلمهم فى مدارس السعودية ابدااااااااااااااااااااااااااااااااااااا

[Diab]

روح كندا

صح كدة