بعد 13 سنة فى السعودية أفكر فى العودة

[iloveegypt]

بس حضرتك اتوكل على الله وفكر فى مشروع كويس ومتخافش من مصر مصر ما بتعضش ولا هى كخة احنا اتربينا فيها واتعلمنا فيها

وسيبك من اللى يقولك الحياة فى مصر مش كريمة

يعنى الحياة فى الخليج هى اللى كريمة ده انت جوازك مش معاك مع الكفيل

ولو الكفيل اكل عليك حق ابقى قابلنى فى القضاء بعد خمس سنين لو حد عبرك

تم تعديل 9 يوليو 2008 بواسطة iloveegypt

[محمد عبدالعزيز]

هو ليه معظم الأخوة المغتربين مش بيفكروا إنهم يرجعوا لأنهم عاوزين يعيشوا مستريحين وعاوزين يعيشوا بعيد عن الدوشة وبعيد عن التوتر وبعيد عن حرق الدم والأخلاق الوحشة اللى فى

حضرتك متخيل ان الغربة دى بمزاجنا او اننا محاولناش نعيش العيشة الكريمة دى فى مصر وفشلنا ولا مبسوطين واحنا عايشين لوحدنا بدون اهل نفرح ونحزن لوحدنا هو دة سهل ومين قالك اننا هنا مش شايفين المر فى الشغل والكفالة وما ادراك ما الكفالة استعباد اسال اى حد فى الخليج عنها ثم ان لما واحد يتغرب 3 او 4 سنين يقدر ينزل عادى ويعيش لكن لما واحد يتغرب 20 سنة دة ينزل يعمل اية لسة هيبدا من الصفر وهو فى بدايات الخمسين ويعمل اسم لمشروعة امتة وهو بعيد عن البلد لايعرف ظروفها ولا اية المشروع اللى ينجح او يفشل فيها وطبعا هيلاقى الف واحد يقنعة بالف مشروع علشان يحقق اى استفادة من وراة دة حتى اصحابة زمنهم نسيوة ثم ان اول اسباب النجاح انك تعرف ظروف البلد اللى هتقيم فيها المشروع وهتنتج اية وتبيع لمين ومين المنافس لك دا احنا بننزل مصر نتوة فى شوارعها وككلامك دة لانك عايش فيها مبعدش عنها ولا جربت غيرها اتعودت يعنى وبعدين مين قالك اننا هنا بنعمل فلوس ونبعت وخلاص اتحداك لو اى حد متغرب عمل حاجة او راجع ثرى دة بالكتير يشترى شقة ويفرشها انا هنا 13 سنة مش عارفة املك ابسط المقومات اللى تجعلنى انزل وابدا مشروع احنا عايشين وبس انا للان مش عارفة اشترى شقة تليق بسنين الغربة والحرمان اللى عشناها سهل اوى تاخد قرار بالنزول لو لوحدك انما عندك اولاد ومدارس لو نزلت لا هلاقى زيها ولامعايا ادخل بالدولار وبعدين كلها ارض ربنا بنسعى فيها وبعدين احنا قربنا من 80 مليون لو قلنا 10 خارج مصر عندك 70 يطورو ويعمرو دا احنا شايلين عبء عن البلد ثم انة ببيقول 350 هما دول يعملو اية دلوقت دى مش فلوس انا طبعا مش قصدى moma دة حال كل المصريين فى الخارج ودخلهم تقريبا

ماتزعليش يامدام كارمن

أنا آسف ماكنتش قاصد أضايقك بالشكل ده

وعلى العموم العبد لله اشتغل فى السعودية 3 سنين, والحمد لله أخدت قرار الرجوع وأنا مطلوب فى الشركة مش مطرود ولا حاجة, وكنت متزوج والمدام حامل كمان فى أول طفل لينا.

شفت تقريباً سنة ونصف من أصعب مايكون, ولكن الحمد لله ربنا كان بيقدرنى ويثبتنى على قرارى كل مرة كنت أفكر أتراجع واستسلم وأعمل زى كل الناس.

والرزق موجود فى مصر زى ماهو موجود فى الخليج وأوروبا وأمريكا وكندا وأى مكان فى العالم, ده وعد ربنا لينا إن رزقنا مضمون فى أى مكان.

الحياة عندى مش فلوس و عيشة مستريحة وأولاد يتعلموا أحسن تعليم وبس لأ, الحياة بالنسبة لى تحدى ومجال لعمل إنجاز يخلد ذكراى بعد مماتى, وأتمنى إن ربنا يقدرنى وأعمل الإنجاز ده.

تمنيانى بالتوفيق للجميع, وآسف مرة أخرى إذا كنت ضايقتك بكلامى, وفى النهاية هى وجهات نظر قد نتفق أو نختلف فيها, ويبقى الخلاف فى وجهات النظر لا يفسد للود قضية.

[أبو أماني]

نصيحتي لك يا أستاذي

أن تبدأ مشروع وانت هنا في السعودية

يعني شغل فلوسك في مصر وأنت قاعد هنا في السعودية

وبكده تضرب عصفورين بحجر واحد

بس اوعه تضربنا أحنا كمان

وافضل شغل في مصر لاصحاب رؤوس الأموال وأسهله واللى مش بيحتاج

مجهود هو الشغل في العقارات اشتريلك شقة في القاهرة في حي كويس

واصبر عليها سنة ولا سنتين

او اشتري لك حتة ارض في بلدك سواء ارض زراعية أو أرض مباني

أو تاجر في الرز خزنه ولما يغلي بيعه

ويا سيد انت لو عرفت طريق العقارات مش هتسيبه مكسب كويس بدون تعب

ولما الفلوس تشتغل كويس وربنا يرزقك ابقى انزل مصر لو عايز

وفي حاجه كمان انت قلت ابنك خريج حاسبات ما تفتح له يا اخي شركة برمجة وتطوير مواقع انترنت

انت تبقى رئيس مجلس ادارتها والمدير المالي

وهو يشغلها هو وكم واحد من اصحابه والشركات دي مكاسبها رائعة

وبجنب شركة البرمجيات دي افتح قسم دعاية واعلان شغله ممتاز وكتير

ولو العملية مشيت اشتريلك مطبعة ب 100000 جنيه تقريبا وان شاء الله تعالى تدعي

لي اهو منه تشغل ابنك في شركتك يكون هو المدير التنفيذي وصدقني ان شاء الله

تعالى مدام ابنك شغال في الموضوع ده وفهم الطريق ده هيكون سهل جدا ان شاء الله نجاح المشروع

انا انصحك بالفكرة دي وارجحها ان تبدأ بها بنسبة 100% وأنت شغال هنا برضه مش تسيب هنا

لحد ما المشروع يشتغل وينجح ان شاء الله تعالى

ومش تنسوني انا مصمم جرافيك خبره ومبرمج بدون خبرة وخريج كلية تجارة

بس محاسب بدون خبرة

دي نصيحتي على السريع

والله يوفقنا ويوفقك

تم تعديل 10 يوليو 2008 بواسطة أبو أماني

[كارمن]

الحياة عندى مش فلوس و عيشة مستريحة وأولاد يتعلموا أحسن تعليم وبس لأ, الحياة بالنسبة لى تحدى ومجال لعمل إنجاز يخلد ذكراى بعد مماتى, وأتمنى إن ربنا يقدرنى وأعمل الإنجاز ده.

انا بس حسيت ان كلامك موجة ليا وبعدين اصل اغلب الناس فى مصر متصورين اننا فى نعيم انا حتى بطلت اشتكى لحد بحس انهم بيقولو لى فى سرهم لما انتى بتقولى كدة احنا نعمل اية فبطلت اتكلم وبعدين انا واللة مش ضد النزول انا مع اى حد يحدد لنفسة 3 او 4 بالكتير وينزل بيكون سهل علية انما واحد قضى نص حياتة يعمل هنا يعمل اية وبعدين انت اكيد لسة سنك صغير لسة عندك روح التحدى والمغامرة وتقدر تبدا وعموما احييك عليها ويارب تحقق مناك انا نفسى الاقى كل الناس مرتاحة وزى ما قلت كلها وخهات نظر خاصة وربما مايناسبنى لا يناسب غيرى ولايهمك وصافى يالبن بس ابقى قولى مجال شغلك فضول حريمى :blink:

[محمد عبدالعزيز]

أنا والله ماوجهت الكلام لحد بعينه.

مجال عملى هو تطوير البرمجيات عموماً, وفى الوقت الحالى أعمل فى تطوير وتصميم مواقع الإنترنت.

تحياتى

[capitshino]

أو تاجر في الرز خزنه ولما يغلي بيعه

اعتقد ان الاساليب دى هى اللى وصلت البلد للى احنا فيه دلوقتى

[كارمن]

ماشية معاك :lol: البرمجة والنت شغالين فى اى بلد وملهومش مواسم ربنا معاك ومعانا :blush2:

[lastknight]

بسم الله الرحمن الرحيم

السلام عليكم ورحمة الله وبركاتة

السادة الكرام رواد المنتدي محتاج النصيحة

انا إنسان مصري أعمل في السعودية من 13 سنة تقريبا وظيفتي رئيس حسابات في شركة كبيرة وأتقاضي راتب حوالي 8000 ريال لم أستفد من غربتي كثيرا لأني كنت مبذر ولم أدرك ذلك إلا عندما تزوجت في عام 2003 خرجت من الزواج لا أملك إلا مبلغ 15000 جنية صحيح أنا صرفت حوالي 120000 جنية لبناء وتأثيث شقتي الكائنة في منزل ملك لي ولأخوتي ... المهم الأن لدي طفلين الكبير عمرة 4 سنوات والصغري 8 شهور ولا أريد أن يتعلم إبني هنا بالسعودية بمعني أنني قررت الرحيل من السعودية نهائيا كحد أقصي عندما يبلغ إبني 6 سنوات ....... ولو سارت الأمور كما أخطط لها بإذن الله سيكون الوضع بعد سنتيين ( عام 2010 ) كالتالي

1- مبلغ مدخر حوالي 350000 جنية

2- سيارة موديل 2008 ( طبعا إحنا حاليا عام 2010 )

فأنا أمام خيارين

الأول هو أن أستمر في السعودية وخاصة أن الراتب يوجد به زيادة سنوية

الثاني هو الإلتزام بما قررت سابقا بالرحيل من السعودية عام 2010

مع العلم إني لدي خبرات في زراعة ( الخضار ) فقط وأيضا عائلتي كانت تمتهن مهنة تجارة المواشي والجزارة وأنا شخصيا أحتاج للقليل من الخبرات لإتقانهم

انا من محافظة الدقهلية وأسكن بقرية ملاصقة لمدينة المنصورة

فهل تؤيدوني في قراري بالرحيل من المملكة أم الإستمرار ؟؟؟

في حالة تأيدكم لقرار الرحيل فما هي تصوراتكم لفرص الإستثمار أمامي في ظل المعطيات الموضحة

مع العلم أن عمري الأن 37 سنة ولي ميراث من الوالد رحمه الله ولكن أعتبر ذلك خارج حساباتي

أرجو منكم ألا تبخلوا علي بالنصيحة

وجزاكم الله خيرا

_____________________________________________

نصيحة أخ ومجرب ؟ .. ما ترجعش .. إوعا تغلط غلطتي .. صدقني في الظروف دي لو عشت في بنجلاديش ولا بوركينا (لامؤاخذة) فاسو .. أرحم من العيشة في مصر

وده رد بعيد عن الإجابات النموذجية اللي ممكن الناس يقولوهالك من عينة ما تقولش إيه ادتنا مصر وقول حندي إيه لمصر أو من نوعية المصريين أهمة .. ولا أغنية ماما شيرين ما شربتش من نيلها ؟ .. طب ما اتسرطنتش منها ؟

إسمع كلام أخوك وخليك بعيد أحسن .. على الأقل يمكن إحتمال تفضل تحب حاجة كان إسمها (مصر) وربنا يكفيك شر العولمة وبلاويها وسواقين المكروباصات .

[nizza la bella]

يا سيدى الفاضل مصر الاقتصاد فية تعبان

شوف حال مصر من فساد وغش ,فكر فى اولادك وفر ليهم حيا نظيفة

تعليم جيد خالي من الغش

[nizza la bella]

روح كندا

أنا افتكرت سعادتك بتقول كنكه...

هو يعني عنده عيلين ومن هنا لسنة 2010 يكون عنده خمس عيال وتقول له روح كنكه دي

إنتوا اللي جبتوا سيرة كندا مش أنا

بالعكس لو سنة 2010 أصبح عنده 5 عيال هيعيش ملك في كندا

الحكومه هتدفع له على كل عيل 360 دولار شهري

على كدة كندا مليانة عرب

ابو بلاش كتر منو

تم تعديل 22 يوليو 2008 بواسطة nizza la bella

[nizza la bella]

مشروع فى مصر يعنى مجذفة

تم تعديل 22 يوليو 2008 بواسطة nizza la bella

[moma]

أشكر كل من تطوع وأبدي النصيحة وجزاكم الله خيرا ..... لكن إخواني لقد زادت حيرتي بعد عرض الموضوع قكل فريق من المؤيدين والمعرضين لفكرة العودة لدية مبرراتة وأسبابة والغرابة أن أغلب المبررات مقنع سواء من الإخوة المؤيدين للعودة أو من المعارضين مما زاد حيرتي وفي النهاية قررت ألا أفكر في الأمر علي الأقل هذة الأيام وخاصة أن المنطقة شكلها كدة داخلة علي مرحلة ساخنة ممكن تتغير الظروف والأحوال وأجد نفسي مرغما علي قرار معين بالعودة أو الإستمرار حسب الظروف .......... أشكركم جميعا ولم أكن اتوقع أن أجد هذا التفاعل والتعرف علي هذة الشخصيات الكريمة التي أعتز بها جدا بغض النظر عن إختلافنا أو إتفاقنا

[mohkhamis]

*********

إسلوب غير لائق وغير مقبول

وإذا كانت البلد مش عجباك أو كما وصفتها أنت بلفظ غير لائق .. إذاً لماذا إنضممت لمنتدى يُسمى " محاورات المصريين " وكما هو واضح لك فلقد أستمدينا إسم المنتدى من إسم بلدنا اللي بنفتخر بها مهما كان بها من مساويء نسعى لإصلاحها وتجميلها ؟!!!!!

نرجو عدم تكرار مثل تلك الألفاظ تجنباً لإتخاذ قرار إداري أشد ضدك

سي السيد

الإدارة

تم تعديل 11 نوفمبر 2008 بواسطة se_ Elsyed

[أبو حميد المسافر]

والله يا أخي نصيحة من القلب

استقر فى المملكة

ولو قررت خلاص تيجي مصر وعايز تعمل مشروع فلن تجد افضل من ثلاثة مشاريع كسبانة كسبانة بإذن الله

1 - مطعم أكل - تيك أواي -

2- محل ملابس ( أطفال / حريمي )

3- الاستثمار العقاري

وربنا يوفقك

[شاب مصري]

المطاعم يا أبوحميد لازم تدفع رشاوي لطوووووووووب الأرض

الضرايب والصحة و و و و الخ

ولازم يكون موقع جامد وزباينه موجودين

الاستثمار في مصر خطير ولازم يكون الواحد حاسب كل حاجة

خصوصا لو هيحط في المشروع شقا عمره

ربنا يستر على الجميع .

تم تعديل 12 نوفمبر 2008 بواسطة شاب مصري