تعيش حياتك وتوفر ااقل ولا تحرم نفسك وتوفر اكتر

[لولا]

تعيش حياتك وتوفر ااقل.. ولا تحرم نفسك وتوفر أكتر ؟

سؤال أكيد كلنا سألناه لنفسنا فى يوم من الأيام سواء للمغتربين او

حتى اللى عايشين فى مصر ميسورين الحال.

وسواء كان إختيارك إجابته فى الجزء الأول من السؤال او التانى فأكيد

لكل واحد مننا سبب ولكل واحد مننا ظروف تحكمه.

بس يمكن نكون محتاجين نفضفض لبعض عشان نعرف هل ممكن

تختار تعيش بطريقة من الطرقتين وبعدين بعد العمر ما يعدى تكتشف

انك كنت غلطان :sad: ياترى ممكن الحاجة دى تحصل ؟ wst::

انا عن نفسي حكون اول وحده اجاوب على السؤال ده.

انا وحده من الاف المصريين الى فتحوا عينهم على الدنيا لقوا نفسهم

فى بلد غريبه.. عالم جوه عالم فى البيت لهجة..وفى المدرسه

والشارع لهجه تانيه :blink: .. فى البيت طبيخ وعند الجيران طبيخ تانى :blink:

وفين وفين لما فهمت معنى اننا فى غربه.. معنى اننا من مصر..بس مصر بعيده قوى

أهلى من اول يوم اتغربوا فيه إختاروا الإختيار الأول وهو انهم يوفرا بس فى نفس الوقت

يعيشونا مرفهين وكانت النتيجة ان سنين الغربه طالت لما راح عمرهم كله فى الغربه :unsure:

وبعدين انا كبرت.. ودخلت الجامعة واتخطبت واتجوزت وبعد شهر العسل على طول سافرت تانى

للغربه مع جوزى واشتغلنا هناك.

وبدأت اسأل نفسي ياترى نعيش كويس ونلبس ونخرج ونتفسح ونوفر ااقل ولا نشد على نفسنا

ونوفر أكتر عشان مكملش حياتى كلها غربه فى غربه :unsure:

وفى وسط الحيره اللى كنت فيها جالى خبر من مصر غير موازيين حياتى كلها00

أعز صحباتى من اولى اعدادى لثانوى وبنت الجيران اللى كنا عايشين معاهم فى العماره

لما كنت مع اهلى فى الغربه ماتت :sad:

ماتت وهى لسه ورده مغمضه.. ماتت قبل ماتستعمل كل الحاجات الكهربائية والسجاد

والصينى والتحف اللى أهلها كانوا بيجهزوهالها طول السنين اللى عيشوها فيها فى غربه

وكانوا حرمنها حتى تشترى هدوم وتلبس زى بقيه صاحبتها عشان يقدروا يفرولها أكتر

وأكتر. ماتت وسابت كل حاجة :sad:

صاحبتى دى كانت ظروفها زى ظروفى تقريبا.. بس باباها كان مشاء الله شغال فى شركة

كبيره وراتبه كان كبير قوى.

وبعد سماع الخبر ده عشت فتره شهر مش قادره اركز فى حاجة.. ولا قادره انسى كل ذكريات

طفولتنا مع بعض.. ولا نظرات عينيها المكسوفه اللى كانت بتبان لما اخبط عليها فى العيد

عشان اعيد عليها وتبقى لابسه لبس مش حلو ورخيص... كانت ديما تشاركنى احلامها

وتقوللى انها لما تنزل مصر حتلبس وتتفسح وتعمل كل حاجة اتحرمت منها.

ومره زرتها فى بيتها فى مصر ..دخلتنى اوضه كبيره مليانه كراتين كتير قوى..وقالتلى

كل الحاجات دى بتاعتى ماما وبابا اشتروهالى عشان لما اتجوز :sad:

وبس.

قررت اعيش واعيش واعيش .. واكيد حوفر.. بس التوفير عندى مبقاش أهم من انى أعيش :wub:

ياترى انا صح ولا غلط ؟

[مهيب]

موضوع أنا شايفه غاية فى الأهمية .. أيضا أسلوب الطرح يستحق التحية و الاعجاب .

بصى يا ستى .. بصراحة - و برغم انى مش مطبق ده فى حياتى - شايف ان الأفضل الوسطية .. بمعنى لا افراط و لا تفريط .. أنا عارف ان ده ممكن يبان كلام وخلاص .. كلام واد عم حديت يعنى .. لكن اللى أنا اقصده هو ان كلا طرفى المقص لا يصلح ..

بمعنى آخر .. فى حاجات كتير بتتصرف فيها الفلوس من باب الرفاهية الا انها لا تسبب سعادة و لا انبساط .. وبعدين متنسيش ان الانسان الطبيعى لما بيبقى عايش و مش حاطط التوفير فى دماغه خالص ده بجيبله نوع من القلق و دايما كل ما بعمل حاجة فيها متعة أو رفاهية و بالتالى صرف فلوس كتير بيخليه برضه مش مرتاح قوى بسبب الخوف من التبذير .

أنا رأيى ان الواحد فى ظل الزمن و الظروف دى الأفضل انه يفكر فى التوفير و الخطط المستقبلية بس على المدى القريب مش البعيد قوى ... يعنى تخطيط مرحلى .. بدل ما يقعد يبنى فى دنيا يخصصلها حياته و بعدين فى النهاية مايلاقيش أو ميتحققش اللى هو عاوزه .

لكن انعدام التخطيط أو التوفير مش شايفة كويس .. يعنى ممكن توفرى بس ما يبقاش التوفير فى حد ذاته هدف .. لكنه وسيلة لتحقيق أشياء على مدى قريب.

مهيب

[محمد عبدالعزيز]

قال أحد الصحابة : أتيت النبي صلى الله عليه وسلم وهو يقرأ ( ألهاكم التكاثر ) التكاثر 1

قال : يقول ابن آدم مالي مالي قال وهل لك يابن آدم من مالك إلا ما أكلت فأفنيت أو لبست فأبليت أو تصدقت فأبقيت ) (رواه مسلم)

[se_ Elsyed]

لولا ..... إنتي جيتي لنا منين ؟ :unsure:

موضوع حلو زي موضوعك اللي فات بتاع الشامبو والكريم ... حقيقي ..

اتفق تماماً مع رأي أخويا مهيب ... الوسطية حلوه ..

يعني لا أعيش في الغربة عشان أكل وأشرب ... بس ... زي كتير من المغتربين هنا وأخص بالذكر السودانيين واللبنانيين والفلسطينيين بالتأكيد .. ودول ممكن تيجي بعد 20 سنة غربه تلاقيه لا معاه أبيض ولا اسود لإنه ببساطة بيعتبر إن دي بلده وعمره ما هايسافر نهائي فاللي بيكسبه منها بيصرفه فيها ...

ولا في نفس الوقت .. وبكل صراحة .. أبقى معفن زي ناس كتير هنا حرمت نفسها من كل حاجة سنين طويلة .. من اللقمة الحلوه والمسكن الحلو واللبس الحلو ....

بحِجة

أصل أنا لما أنزل بلد بقي .. هافتري وهاعيش بالطول والعرض وأصرف اللي حوشته ده ومش هاحرم نفسي من حاجه ...

طب عيني في عينك كده يالا ؟

طبعاً ما بيحصلش .. لإن طوال هذه المدة اللي تعفن فيها .. خلاص العفانة بتبقى تجري في دمه ... واتحدى حد يقولي إنه فضل 20 سنة مقرطم على نفسة ويحط السحتوت فوق السحتوت وبعدين الفلوس ما تبقاش أغلى عنده من حياته نفسها بعد كده ويتحول إلى شيلوك عابد المال واللي بينتشي من منظرها وهي متكومة كده قدامه ...

هذه حقيقة لا ننكرها .. إن في ناس كده ...

أبويا الله يرحمه كان رجل وسطي وعلمنا الوسطية .... فالمهم بابا سافر مرتين للسعودية في الثمانينات ... وحكى لي عن واحد ريفي كان معاه في الشغل - الراجل ده أنا شوفته بعد كده وكان عندنا في زيارة للقاهرة ووصلته لحد المحطة ولقيته مش عايز يقطع تذكرة فبأعزم عليه وأنا كنت عيل في إعدادي إني إدفع له ثمن التذكرة بالشباك وسابني أدفع وتقل ودانه - الراجل ده قعد شهور طويلة بالغربة يحوش الفلوس حوالين وسطه ورابط الحركات دي كلها بحزام ... لدرجة في يوم جاي بيخلع الحزام عشان يعد الغلة لقى في ديدان ما بين الحزام وما بين جسمه ... والله العظيم هذا حصل ....

ما هو البخيل ممكن يفتكر إنه لو أخد حمام يبقى فاتورة المياه هاتيجي عاليه عليه .. بالرغم من إنه قاعد في سكن الشركة ..

وطبعاً متوقعين إن أكله كان " يغديني جبنه وزيتون ويعشيني بطاطا " ... ولو إن الزيتون ممكن يبقى غالي وبعدين ده ترفيه جنب الجبنة .. فمشيها جبنه وعيش بس وبلاها بطاطا عشان سكويز الكوست بتاعت العيشة :wub: ومش مهم نحلي .

وبعدين الواحد لما يفكر في الموضوع ده يلاقي إن الراجل لو دخل أخد حمام يبقى هايضطر يخلع الحزام .. وممكن ييجي لص بغداد يسرقة وتضيع تحويشة العمر ... فخليك يا معلم من غير حُما لحد ما تكمل المليون ...

وشوفت ولد عايش في كمبوند مع اخويا الكبير سنة 98 ... شوفته بعيني ... كنت بأزور اخويا في جده والشركة مسكناهم في كمبوند ... فبيعرفني على الولد ده ... لقيت شكله مش طبيعي وعينه صفرا ووشه شاحب ... فبأقوله الولا ده ماله كده ؟ فقالي لي إنه من الأرياف وبيحوش المليم على المليم عشان يشتري طين ... وموصي السوبر ماركت اللي جنب السكن يخلوا له الحاجات الإكسبيرد على جنب وخصوصاً الخضار والفاكهة وبياخدها منهم برخص التراب .. وياكلها عشان يوفر ويعملهم يا معلم ... أقسم بالله بعدها ما فيش بشهور قليلة بأتصل باخويا فقال لي : تعيش إنت يا حاج الولا إياه مات إمبارح ... وجاله امراض الدنيا من البلاوي اللي كان بيأكلها عشان يوفر ومالحقش يشتري طين لكن إندفن فيه ....

وفي نفس الوقت رأينا هنا نماذج بتبعزق يمين وشمال وأحلى عيشه وأحلى فخفخة ...وإنتو عارفين إن إحنا في غربة يعني لا معاش ولا تأمينات ولا دياولو وزي ما بيقولوا الواحد عايش بصحته ... ويوم ما يجي له شوية أنفلونزا بيرقد في البيت وما يلاقيش له مصدر دخل لو شركته أستغنت عنه لمرض أو لا قدر الله توفى والاعمار بيد الله وترك وراءه عائلة وأولاد بدون مصدر رزق ..

بالصدفة الموضوع ده كان مثار مناقشة بيني وبين صديقي هاندي كرافت أول أمس ...

وهو رأيه إن : أيوه أعيش يمين وشمال واصرف واستثمر في تعليم أولادي ولا يعلم الغيب إلا الله ولو جرى لي حاجه ... فربنا كبير والأعمار بيد الله .

وأنا رأيي إني أستثمر في أولادي برضوا وأعيش لكن في المعقول ... وأحاول على قدر المستطاع إني اترك لهم شيء ولا أتركهم للحاجة إذا نفذ قدر الله وتوفيت ... خصوصاً إن كثير من الزوجات بتبقى ما تشتغلش او كانت شغالة قبل الزواج وقعدت تربي الاولاد ... فلا قدر الله لما يحصل حاجه .. مش معقول تنزل تشتغل تاني بعد العمر ده ولو اشتغلت زز هاتشتغل بكام يعني ؟

وحكيت له عن إن اخويا إتصل بي الإسبوع الماضي ليسود الدنيا في وشي وينقل لي خبر وفاة جار عزيز لنا في البيت اللي قدام بيت والدي على طول وكان الله يرحمه مهندس ميكانيكي سيارات ومشارك واحد على ورشة كبيرة هو بالمجهود والراجل التاني براس المال ... واثناء ما بيصلح سيارة نقل ثقيل العربية إتحركت ورجعت عليه موتته ...فبما إن مجهوده أنقطع .. يبقى الموضوع بح على كده ...

وأنا شوفت حياتهم بنفسي لإنهم جيراننا الحيط في الحيط ... الراجل عايش عيشه ممتازة وكل سنة يغير ديكورات الشقة وعياله مربيهم كويس لكن اكبرهم مازال في المرحلة الإعدادية .... وفجأة حدثت الفاجعة وأصبحت زوجته بدون اي مصدر دخل ولا معاش وهي ست بيت ... فبدأت تكلم أخويا يشوف لها أي عمل أو مشروع صغير تبدأ به حياتها عشان تصرف على ولادها وبدا أهل الخير يتدخلوا الان عشان نشارك جميعاً ونفتح لها محل صغير للملابس او ما شابه وربنا يكرم ...

ففعلاً وقع علي الخبر ده زي الدُش البارد اللي بيفوق الواحد من حاجات كتيرة .. وبيلفت إنتباهي لأشياء ممكن تكون غايبة عني ...

والله يسامحك يا لولا ياللي نازله تخريط بصل على قلوبنا لحد ما كلاويه دمعت ...

[Salwa]

اهلا بك يالولا ..

وفعلا موضوعك جميل قوى قوى ...........يمكن هو ده اهم سؤال ممكن يتسأل فيه اى مغترب .

ويمكن تجربتى تنفع...ويمكن بس تفيد اى مغترب برة البلاد العربية ...والله اعلم.

ايضا عجبتنى طريقة سردك للحكاية والاسباب التى جعلتك تسألى هذا السؤال ؟؟

وعلى فكرة ...سوف اذكر لك ما حدث معى ...

.ثم

تغيير طريقة التفكير مرة اخرى منذ سنة ونصف نتيجة حادثة مماثلة لصديقتك ..(( وفاة ابن اختى عن عمر 28 سنة ))...اقتنعت ان كل شئ زائل ...فعلا ..

و...

لنستكمل الحديث ...

عند بداية السفر ....تركت شقتى كاملة من كل شئ ..

لم يكن السفر لاى دافع مادى ...لكن ؟؟ فى هذه الفترة كان اليأس من التغيير قد بدأ يتسرب لاكثرية الشباب ...والخلاصة ..قرر زوجى السفر فجأة وكنت حامل فى ابنتى .

هل تصدقين ؟؟؟

انى فى خلال ثلاثين سنة ..........اقصد اثنين وتلاتين سنة .....غربة .

عمرى ما نزلت مصر .....بكرتونة ؟؟ ...او شنط كثيرة ؟؟ ...............هل تصدقين ؟؟

وان نزلت بأكثر من حقيبة سفر ...فدى بتكون هدايا ....ولا احضر لبيتى اى شئ ...

والمضحك....انك لو وجدتى عندى شئ مستورد ....تجدى انى اشتريته من مصر ...!! وبالغالى ..

بالنسبة للمعيشة فى بلد الغربة ...

لو كانت السنين طويلة ...فالأمر يختلف تماما عمن يريد السفر فقط سنتين او تلاتة او اربعة على الاكثر ...

اتفهم ان يدخر كثيرا من يقرر السفر لسنين قليلة ..

لكن ؟؟

نلاحظ انك تشكل شخصيات الاولاد من لحظة الميلاد ....فالطفل لو كنت تعامله على ان كل شئ ممنوع ولا يجب ان نصرف فيما لايعود بأى طائل ...الاشتراك فى نادى ممنوع...وممارسة السباحة ممنوع ...اى نشاط ممنوع...مكتبات ممنوع...كتب ممنوع...كمبيوتر ممنوع ( روح سايبر ) ...كله ممنوع...

الملابس الحديثة ممنوع ( اشترى بس فى الاوكازيون ) ...

الاكل الطبيعى ( فى نهاية الاسبوع بس ) ...!!!

ممنوع حتى تشترى باكو بسكويت من برة ...حرام تاكل جيلاتى ...حرام تاكل شيبسى ..مصاريف فارغة ....

اذن...

لاتحاسب الا نفسك ...ابنك حايطلع محروم ...(( عينه مش مليانة ))...وايضا حايطلع حاقد (( حايبص لغيره ويقول اشمعنى انا ؟؟ ))..

هل هذا طفل سوى ؟؟

عشت مع اولادى من اول يوم ...عيشة عادية طبيعية وكأنى عايشة فى بلدى ..

الادخار ؟؟

كان يحدث بطريقة غير تقليدية ....بمعنى ...ان اشترى زوجى شقة كمصيف...خارج البلد.

...و مخزن...

وانا ؟؟

كنت اعيش ومازلت حياتى بدون اى تقتير ...لم ابخل على اولادى ابدااا...لا فى الدراسة ولا غيره بمعنى ..دخلوا افضل مدارس على مستوى البلد ..افضل فى كل شئ ...ليس تعليما فقط ..لكن ؟؟..حتى النشاط كان داخل حدود المدرسة ..وبمبلغ يزيد عن المصروفات الشهرية ...بكثير.

الحمدلله ...تفوقوا ..دراسيا ورياضيا ..

لما كبر الاولاد ...فى سن المراهقة ...تعبت حتى اوضح لهم ان مش لازم يكون اللبس دائما بماركة معينة ..

ممكن تلبس شيك جدا ومش لازم بماركة ...!!!

اتفقنا على احضار (( حاجتين تلاتة )) ماركة معروفة والباقى تقليدى ...للاستعمال اليومى ..

وهكذا ...فى كل شئ .

الوصول للافضل بطريقة مقنعة ....بدون اى اجحاف .

لااندم ...

مقدرش اقول انى حوشت كتير من الغربة ...

محصلش ...

فى الحقيقة ...كسبنا كتير من الغربة ....وضاع كتير ..(( موضوع العمل فى التجارة يوم حلو ويوم مر ...والثقة الزايدة دايما تسبب خسائر ...))...

لو فكرنا ...

كل دى ايام محسوبة من حياتنا ...

لازم نعيشها صح..

حقيقى ...اليوم اللى بيعدى مش بيرجع تانى ...

لازم نعيش كل يوم ...وكأنه آخر يوم فى حياتنا ...لو قدرنا نفرح ...نفرح...نضحك ..

نلبس وناكل ونشرب ونتفسح ...لو قدرنا ...ليه لأ ؟؟

لو كسبت خمسة ...؟؟ .....كل يوم شيل واحد...وعيش بأربعة ..

متقدرش تشيل اتنين وتعيش بتلاتة ...ما ينفعش .

لا اندم.....ارددها مرة اخرى .

انهاردة ظهرت نتيجة الليسانس التانى ...لابنى .

اخد ليسانس الصحافة ...مع مرتبة الشرف .

فقط ...ثلاثة على مستوى الكلية ممكن ياخدوا مرتبة شرف ...سنويا .

ثلاث شهور التكليف كان يعمل فى اشهر جريدة هنا ...

طيب انا عاوزة ايه اكتر من كدة ؟؟

تجربة ناجحة والا لأ ؟؟

مش كل حاجة الفلوس ..

الغربة مش فلوس وبس ...

كل دى ايام من عمرنا .....كل ده عمرنا احنا ومش حاتعوضه فلوس الدنيا كلها ..

ربنا يوفق الجميع ..

[فالحة هانم]

السلام عليكم أخت لولا wst::

موضوعك عاجبني جدا وصدمني جدا. . . وخلاني اتنح شويتين وافكر :blink:

اولا عاجبني لأن بالفعل ده واقع كتير من الناس بتفكر فيه وأنا منهم بالطبع وكان جوة في تلابيب مخي . . وصدمني لأنه حطني أدام نفسي وخلاني أفكر أعمل ايه واتصرف ازاي بعد كده ؟ ؟ :unsure:

الحمد لله والشكر لله على كل شئ . . . بس انا ظروفي ان اللي جاي على أد اللي رايح والحمد لله الواحد بياكل لقمة حلوة ويلبس الحمد لله كويس ( العباية طبعا ) :unsure: وكمان للبنت واحتياجاتها . . والفلوس اللي يمكن اتوفرت شوية . . سبحان الله جوزي جاب بيهم أربع حيطان يسترونا ( ولسة مفرشتهاش ) واتصرفت على علاج وحاجات صحية كده . والحمد لله على كل شئ

كتير اقعد مع نفسي وافكر ان الواحد لازم يربط الحزام ويحاول يوفر . . بس مش ممكن لا على حساب صحتي ولا جوزي ولا بنتي . . وجوزي مأيدني في كده

بس آجي افكر الواحد يعمل ايه ؟؟؟ :sad:

بالآقي ان سبحان الله ربنا بيعطي الرزق على أد المطلوب يعني لما آجي افكر في مدارس لبنتي بعد كده وانها بـ 12000ريال في السنة الواحدة . . بأقول ان شاء الله ربنا حيرزقنا لما ييجي وقتها .

وفيه واحدة صحبتي كانت بتحكي لي عن دكتور قعد لمدة سنة واحدة بس في الغربة بس كان خلالها ما بياكلش غير زبادي فقط وبعدين انهى عقده.. ونزل على كده . . .بس معرفش ايه اخباره دلوقت . . هل يا ترى لحق يستمتع بالفلوس ولا لأ :blink:

وواحد تاني كان عايش على صلصة الطماطم :sad: ... آه والله زي ما بأقولك كده

بس هي دي الظروف عندي وإن شاء الله ربنا يوسع رزقنا يارب

:wub:

[Alshiekh]

أولا خالص عزائى فى صديقتك رحمها الله

ثانيا انا والله مشفق عليك وعلى نفسى وعلى كل الناس المغتربين ، فالغربة فى نظرى كالدين ، هم بالليل ومذلة بالنهار. لكن ماباليد حيلة فى ظل ظروف اقتصادية قاسية داخل مصر.

المهم طالما اننا مضطرون ان نعيش فى الغربة ، فبقدر الامكان يجب ان نحاول ان نعيش حياتنا بصورة طبيعية كأننا من اهل البلدان التى نحن مغتربون بها ، فليس فينا من يضمن انه سيعيش للغد.

وفى نفس الوقت يجب ان نعمل حساب الغد ، وللخروج من هذا المأزق ، فالوسطية هى الحل. " أعمل لدنياك كأنك تعيش ابدا واعمل لآخرتك كأنك تموت غدا "

يقول الله سبحانه وتعالى :

{ وَآتِ ذَا الْقُرْبَى حَقَّهُ وَالْمِسْكِينَ وَابْنَ السَّبِيلِ وَلَا تُبَذِّرْ تَبْذِيرًا } { إِنَّ الْمُبَذِّرِينَ كَانُوا إِخْوَانَ الشَّيَاطِينِ وَكَانَ الشَّيْطَانُ لِرَبِّهِ كَفُورًا }

ويقول أيضا:

{ وَلَا تَجْعَلْ يَدَكَ مَغْلُولَةً إِلَى عُنُقِكَ وَلَا تَبْسُطْهَا كُلَّ الْبَسْطِ فَتَقْعُدَ مَلُومًا مَحْسُورًا }

[فالحة هانم]

سيدتي الفاضلة / Salwa :unsure:

احييك على خلاصة الغربة اللي حضرتك كتبتيها . . ونقطة التحول اللي حصلت لك في حياتك اكيد لازم تخلي الواحد يغير تفكيره . . زي ما حضرتك غيرتيه

تغيير طريقة التفكير مرة اخرى منذ سنة ونصف نتيجة حادثة مماثلة لصديقتك ..(( وفاة ابن اختى عن عمر 28 سنة ))...اقتنعت ان كل شئ زائل ...فعلا ..

انهاردة ظهرت نتيجة الليسانس التانى ...لابنى .

اخد ليسانس الصحافة ...مع مرتبة الشرف .

فقط ...ثلاثة على مستوى الكلية ممكن ياخدوا مرتبة شرف ...سنويا .

ألف ألف مبروك لإبنك على التخرج وربنا يديكي الصحة وتفرحي بيهم وبجوازهم كلهم يارب

وبالفعل مفيش حاجة أجمل من كده وانت بتشوفي ثمار زرعك بعد الغربة الطووووويلة :wub:

[لولا]

أستاذ مهيب ..

مشاركتك فى الموضوع تشرفنى بجد. وميرسي على وصفك الإيجابى

لأسلوبى.. بس انا اجى ايه هنا ياعم وسط هذا الكم من التميز فى

الأسلوب والسرد الذى يملكه جميع أعضاء المنتدى هنا..والذين يتحفونى

يوميا بما يملكونه من باع طويل فى كافة أساليب الكتابه بدايه من الكتابات

الجاده او الأدبيه أو الساخره.. او حتى مجرد حواراتهم البسيطه التى تفيض

بالحب والمشاعر والرقى المطلق. بدايه أسجل إعجابى المطلق اللامحدود

بجميع الأعضاء ولا أرجوا أكثر من أن يكون لى مكان وسطكم.

اما فيما يختص بتعليقك على الموضوع.. فقد أعجبتنى مقولتك اننا قد نستطيع

أن نعيش من غير توفير..لكن هل يعنى ذلك اننا لن نشعر بالقلق؟!!

سؤال كانت إجابته فى سياق حديث حضرتك عن الوسطيه.. لأن الوسيطه

هى فعلا أساس كل شيء.

وهل كان الإسلام فى تعاليمه لنا الا دين وسطيه.

[لولا]

قال أحد الصحابة : أتيت النبي صلى الله عليه وسلم وهو يقرأ ( ألهاكم التكاثر ) التكاثر 1

قال : يقول ابن آدم مالي مالي قال وهل لك يابن آدم من مالك إلا ما أكلت فأفنيت أو لبست فأبليت أو تصدقت فأبقيت ) (رواه مسلم)

الأستاذ محمد عبد العزيز جزاك الله كل خير..

الدين الإسلامى هو الدين الوحيد الذى كانت تنظيماته وتشريعاته بكل جوانبها

منظومه كامله متكامله لحياه المسلم. ولكن هناك الكثيرون الذين ينشغلون

بجمع المال بكل الطرق..

وكل واحد لاهى نفسه بهدف..الوسطيه كما وضحها الأستاذ مهيب هى الحل

الوسطيه بين الرفاهيه والتوفير.. وحتما الدنيا والأخره.

شكرا على مشاركتك فى الموضوع.

[جويرية]

انا شايفة يا اختي لولا ان الواحد اللي معاه اطفال لازم يعمل حسابه و يأمن ليهم مستقبلهم

عشان اللي مش بيساعدوه اهله بيتبهدل

و الزمن ده كفاية اوي الواحد يخلف طفلين عشان يقدر يربيهم تربية كويسة

مع احترامي للناس للأخوة اللي بيقولوه مش مهم عدد الأطفال

الزمن دلوقتي اتغير

و الولد مسئول من ابوه يعلمه و يدورله علي وظيفة و يجيبلله شقة و يجوزوه كمان

بشوف ناس بيبقي عندها اطفال و مصاريفهم بتبقي قليلة فبيسرفوا طبعا

و بعد سنين يلاقوا الولاد كبروا ومصاريف التعليم زادت و الولد اللي خطب و عايز ابوه يشتريلله شقة و البنت اللي عايزة فلوس للجهاز

فالمفروض الطفل من اول ما يتولد الأب يحوشلله

[لولا]

والله يسامحك يا لولا ياللي نازله تخريط بصل على قلوبنا لحد ما كلاويه دمعت ...

******************

أستاذ اس اس.. انت بالذات مبعرفش بمجرد مبشوف ردودك ببقى عامله كده

أكتر حاجة ديما بتعجبنى فى مشاركاتك انك ماشاء الله على طول بيبقى

عندك حكايات ياما من الواقع بتعبر عن موضوع المشاركة.. وبيبقى ردك

واضح عياناً بياناً من حكاويك عن تجارب حقيقيه اتعاشت من ناس تانيه.

بس عارف لو كل الناس كانت شايفة الموضوع كده وانه لازم يكون فى حل وسط

مكنتش وحده زى صاحبتى ماتت وهى محرومه من كل حاجة رغم ان اهلها مقتدرين

.. وكل ده ليه عشان كل حاجة حلوه متحوشه ليها بعدين لما تبقى تتجوز.

يعنى ماتت مكسورة الخاطر.. وعاشت طول عمرها وسطنا احنا صاحباتها ااقل

وحده فى اللبس والخروج والفسح.. عشان كل ده كان متشال لمصر.. وعريس مصر.

الله يرحمها يارب ويعوضها فى الجنه اّمين.

وبعدين ياسيدى انا والله مقصدى اخرط البصل على قلوبكم .. لأنه كله الا التاثير

على كلاوى الأعضاء الأفاضل

وبعدين لاحظ قدى ايه انا كنت حريصة على مشاعر الأعضاء ومحبتش انزل الموضوع

فى قسم المواضيع الجاده ونزلته فى قسم المواضيع الخفيفه..

وصدقنى يا أستاذ - خلى بالك بس من كلمه صدقنى - انا مش قصدى حاجة

وحشه.. ومش تابعة لأى تنظيم ارهابى يهدف للتنكيد على المصريين فى الخارج

[لولا]

اهلا بك يالولا ..

وفعلا موضوعك جميل قوى قوى ...........يمكن هو ده اهم سؤال ممكن يتسأل فيه اى مغترب .

ويمكن تجربتى تنفع...ويمكن بس تفيد اى مغترب برة البلاد العربية ...والله اعلم.

ايضا عجبتنى طريقة سردك للحكاية والاسباب التى جعلتك تسألى هذا السؤال ؟؟

وعلى فكرة ...سوف اذكر لك ما حدث معى ...

.ثم

تغيير طريقة التفكير مرة اخرى منذ سنة ونصف نتيجة حادثة مماثلة لصديقتك ..(( وفاة ابن اختى عن عمر 28 سنة ))...اقتنعت ان كل شئ زائل ...فعلا ..

و...

لنستكمل الحديث ...

عند بداية السفر ....تركت شقتى كاملة من كل شئ ..

لم يكن السفر لاى دافع مادى ...لكن ؟؟ فى هذه الفترة كان اليأس من التغيير قد بدأ يتسرب لاكثرية الشباب ...والخلاصة ..قرر زوجى السفر فجأة وكنت حامل فى ابنتى .

هل تصدقين ؟؟؟

انى فى خلال ثلاثين سنة ..........اقصد اثنين وتلاتين سنة .....غربة .

عمرى ما نزلت مصر .....بكرتونة ؟؟ ...او شنط كثيرة ؟؟ ...............هل تصدقين ؟؟

وان نزلت بأكثر من حقيبة سفر ...فدى بتكون هدايا ....ولا احضر لبيتى اى شئ ...

والمضحك....انك لو وجدتى عندى شئ مستورد ....تجدى انى اشتريته من مصر ...!! وبالغالى ..

بالنسبة للمعيشة فى بلد الغربة ...

لو كانت السنين طويلة ...فالأمر يختلف تماما عمن يريد السفر فقط سنتين او تلاتة او اربعة على الاكثر ...

اتفهم ان يدخر كثيرا من يقرر السفر لسنين قليلة ..

لكن ؟؟

نلاحظ انك تشكل شخصيات الاولاد من لحظة الميلاد ....فالطفل لو كنت تعامله على ان كل شئ ممنوع ولا يجب ان نصرف فيما لايعود بأى طائل ...الاشتراك فى نادى ممنوع...وممارسة السباحة ممنوع ...اى نشاط ممنوع...مكتبات ممنوع...كتب ممنوع...كمبيوتر ممنوع ( روح سايبر ) ...كله ممنوع...

الملابس الحديثة ممنوع ( اشترى بس فى الاوكازيون ) ...

الاكل الطبيعى ( فى نهاية الاسبوع بس ) ...!!!

ممنوع حتى تشترى باكو بسكويت من برة ...حرام تاكل جيلاتى ...حرام تاكل شيبسى ..مصاريف فارغة ....

اذن...

لاتحاسب الا نفسك ...ابنك حايطلع محروم ...(( عينه مش مليانة ))...وايضا حايطلع حاقد (( حايبص لغيره ويقول اشمعنى انا ؟؟ ))..

هل هذا طفل سوى ؟؟

عشت مع اولادى من اول يوم ...عيشة عادية طبيعية وكأنى عايشة فى بلدى ..

الادخار ؟؟

كان يحدث بطريقة غير تقليدية ....بمعنى ...ان اشترى زوجى شقة كمصيف...خارج البلد.

...و مخزن...

وانا ؟؟

كنت اعيش ومازلت حياتى بدون اى تقتير ...لم ابخل على اولادى ابدااا...لا فى الدراسة ولا غيره بمعنى ..دخلوا افضل مدارس على مستوى البلد ..افضل فى كل شئ ...ليس تعليما فقط ..لكن ؟؟..حتى النشاط كان داخل حدود المدرسة ..وبمبلغ يزيد عن المصروفات الشهرية ...بكثير.

الحمدلله ...تفوقوا ..دراسيا ورياضيا ..

لما كبر الاولاد ...فى سن المراهقة ...تعبت حتى اوضح لهم ان مش لازم يكون اللبس دائما بماركة معينة ..

ممكن تلبس شيك جدا ومش لازم بماركة ...!!!

اتفقنا على احضار (( حاجتين تلاتة )) ماركة معروفة والباقى تقليدى ...للاستعمال اليومى ..

وهكذا ...فى كل شئ .

الوصول للافضل بطريقة مقنعة ....بدون اى اجحاف .

لااندم ...

مقدرش اقول انى حوشت كتير من الغربة ...

محصلش ...

فى الحقيقة ...كسبنا كتير من الغربة ....وضاع كتير ..(( موضوع العمل فى التجارة يوم حلو ويوم مر ...والثقة الزايدة دايما تسبب خسائر ...))...

لو فكرنا ...

كل دى ايام محسوبة من حياتنا ...

لازم نعيشها صح..

حقيقى ...اليوم اللى بيعدى مش بيرجع تانى ...

لازم نعيش كل يوم ...وكأنه آخر يوم فى حياتنا ...لو قدرنا نفرح ...نفرح...نضحك ..

نلبس وناكل ونشرب ونتفسح ...لو قدرنا ...ليه لأ ؟؟

لو كسبت خمسة ...؟؟ .....كل يوم شيل واحد...وعيش بأربعة ..

متقدرش تشيل اتنين وتعيش بتلاتة ...ما ينفعش .

لا اندم.....ارددها مرة اخرى .

انهاردة ظهرت نتيجة الليسانس التانى ...لابنى .

اخد ليسانس الصحافة ...مع مرتبة الشرف .

فقط ...ثلاثة على مستوى الكلية ممكن ياخدوا مرتبة شرف ...سنويا .

ثلاث شهور التكليف كان يعمل فى اشهر جريدة هنا ...

طيب انا عاوزة ايه اكتر من كدة ؟؟

تجربة ناجحة والا لأ ؟؟

مش كل حاجة الفلوس ..

الغربة مش فلوس وبس ...

كل دى ايام من عمرنا .....كل ده عمرنا احنا ومش حاتعوضه فلوس الدنيا كلها ..

ربنا يوفق الجميع ..

معرفتش أقتبس حاجة وحده بس من كلامك وأسيب الباقى ..لأنى مقدرتش

أحس انى فى سطر فى كلامك أهم من التانى.. حسيت ان كل سطر فى

الرد متسلسل مع اللى قبله زى عقد لولوى غالى قوى

ياه يامدام سلوى .. انت انسانه جميله جميله جميله.. فى شبه كبير قوى

بينك وبين ماما اللى ربتنا بنفس الطريقة دى.

طريقة سردك لتجربه تربيه اولادك وافادة الجميع بيها شيء لانملك امامه

سوى أن نرفع القبعة لك تقديرا وإعجابا واسع المدى

واضح قدى ايه انت انسانه راقيه فى تفكيرك واسلوب معاملتك لأولادك

وأكتر حاجة زادت اعجابى بطريقة تفكيرك هو الوصف اللى قلت فيه

- تشكيل شخصية الأولاد بيبدأ من لحظة الميلاد-

طبيعى فى الحالة دى أمام هذا الرقى فى التفكير والعمق فى الفهم

لمعنى تنشئه إنسان ناجح ان تكون هذه هى نتائج وحصاد ما بدأت

أنت بزراعته منذ سنوات طويله.

تجربه ومبادى وعقليه اكرر تسجيل إعجابى المطلق بها.

وشكرى اللامحدود لطرحها هنا وافادتنا بها.

[حلواني]

الاخت الفاضله لولا

طبعا موضوعك حساس جدا للمغتربين اكتر من غيرهم لان دائما ما تكون هنك مقارنات بين المغتربيين حتي من اقرب الناس

يعني لما تنزل مصر في اجازه وتلاقي اللي بيعرض عليك المشاركه في مشروع او حتي بيطلب فلوس سلف وتقوله مفيش

تفتكري هيصدقك ولو صدقق مش هايسمعك حكاوي عن فلان اللي اشتري فيلا او عمل عمارتيين او اشتري طين

وانت يافرحتي رايح جاي زي المكوك علي الفاضي

طيب تفهمه ازاي وتقنع نفسك انت ازاي ان دا كان اختياري من الاول

انا اخترت من الاول اني اعيش كويس بقدر مااستطيع واذا فاض حاجه تتحوش

وبعد السفر اتجوزت واخذت زوجتي معايا وخلفنا العيال 3 وبقالنا 13 سنه مع بعض وبننزل مصر كل سنه شهرين اجازات المدرسين

والحمد لله عايشين واللي جاي علي قد اللي رايح وبنحمد ربنا علي الصحه والستر بدون اسراف ولا تبذير لكن هو دخلي يدوب كدا

والزوجه لا تعمل لان فرص عملها قليله جدا

وانا اخترت من الاول اني ما احرمش نفسي ولا احرم اولادي من الحياه المستقره وتوفير مطالب الحياه بفدر المستطاع

اما النماذج التي تحرم نفسها واولادها من حق الحياه علشان تحوش فلوس مش ها تلاقيهم هنا في المنتدي لانهم

معنهمش وقت يضيعوه علي النت والكلام دا لانه بيتكلف

تم تعديل 2 يوليو 2008 بواسطة حلواني

[لولا]

الغاليه جدا فالحة هانم. معليش لو ضحكت كده من اولها متزعليش منى

اصلى انا بحبك قوى قوى من ساعة موضوعك بتاع التخلص من ورق الجرايد

فى جده طالما مفيش بتاع روبابكيا

موضوعك ساعتها دخلنى فى حاله من الفرفشه تصل لحد الهطل

المهم انشاء الله تكونى خليتى المشكله اياها بتاعت الجرايد خلاص.

اما بخصوص الموضوع المطروح هنا.. انا مش قصدى اصدمك ولا الخبطلك

دماغك وكل الظروف اللى انت بتحكيها عايشينها ناس ياما

فى الغربه خصوصا طبعا لما الدخل يكون محدود نوعا ما.. وحجم التوفير

بسيط . بس الحمد الله انك انت وجوزك متفقين انكم تحققوا هدفكم من

الغربه بإتباع حل وسط لايكون فيه تعدى سافر على رغباتكم وحياتكم

كبشر.. زى صاحبنا بتاع الزيادى والصلصه

بس انا عايزة ااقولك حاجة متشليش هم مدرسة البنت ابدا من دلوقت

.. انت متفائله وبتقولى اكيد ربنا حيرزقكم اللى يقدركم تدخلوها مدرسه

كويسه.. وانا بقولك خلى التفاءل ده يقين تااااااااااااااااااااااااااااااااااام ان

بكره احلى واحسن وان رزفكم حيزيد أكتر.

ربنا يوفقك وتربى بنتك.. واخواتها انشاء الله احسن تربيه من غير متحرموهم

من حاجة. وده طبعا شيئ مضمون لأنك أكيد اسم على مسمى

انا سألت السؤال دا هنا وكنت عارفة ان كل واحد فينا عنده ظروف مختلفة

تماما عن التانى واولويات مختلفة.. وحتى فترة غربه معينه كل واحد بيخططها

لنفسه .. انا زيك متغربه فى جده بقالى سنتين خلصت جامعة وجيت.. بس

انا بشتغل هنا وعشان كده كنت حاسة ان قرار كم اوفر من راتبى هو قرارى

انا لوحدى اللى بنيته بناء على صدمتى فى وفاه اعز صحباتى.

[لولا]

أستاذ حلوانى..

أهلا أهلا بيك فى الموضوع

انت فكرتنى بحاجة مهمه قوى.. فعلا ناس كتير قوى لما بننزل

مصر واحنا كده اخر قيافة.. وشياكة وريحتنا فايحة - برفانات مش

كولونيا شبراويشى يا أستاذ أس أس- (معليش دى اس اس

حيفهمها) بيفتكرونا نايمين على كنز فى البنك.. وتلاقى

عروض المشاركة فى المشاريع نازله ترف علينا..-على اساس

اننا عملنا المليون بعد سنتين غربه طالما انا وجوزى بنشتغل-

وفعلا محدش ابد ابد ابدا مصدق اننا لسه مش عاملين حتى

مبلغ يعمل مشروع عدل.

بس بصراحة انا مبفكرش فى الناس بتفكر فينا ازاى.. وبنطنش

ونتفسح ونصيف فى احسن مكان.. وبندام على الرقيه الشرعيه

[vipwithyou]

رأى خطيبتى اننا نعيش احسن عيشة ولو بكل دخلنا فى الغربة

على كلامها عيشة هنا زى عيشة هناك

لكن ..

أنا أختلف معاها تماما ً فى هذا الرأى فأنا أريد أن أعيش عيشة كريمة ومعاها اوفر مش اصرف كل اللى معايا وخلاص

علشان انا مش متغرب علشان آكل وأشرب واعيش كويس فى الغربة وبس

تم تعديل 2 يوليو 2008 بواسطة vipwithyou

[لولا]

أستاذ محمد..

تشرفت بمرورك ومشاركتك..

وكلمتك الوسطيه هى الحل للخروج من المأزق هى فعلا

الحل الذى نراه كلنا هنا الحمد الله.

والظاهر ان المنتدى اثبت خلوه من اى فكر متطرف والحمد الله

[لولا]

رأى خطيبتى اننا نعيش احسن عيشة ولو بكل دخلنا فى الغربة

على كلامها عيشة هنا زى عيشة هناك

لكن ..

أنا أختلف معاها تماما ً فى هذا الرأى فأنا أريد أن أعيش عيشة كريمة ومعاها اوفر مش اصرف كل اللى معايا وخلاص

علشان انا مش متغرب علشان آكل وأشرب واعيش كويس فى الغربة وبس

طبعا أكيد زى ما قال الكل الوسطيه هى الحل.

وزى ما قال مهيب احنا ممكن منوفرش ..لكن لو كنا ناس طبيعيين

هل ممكن نعمل كده من غير منحس بالقلق؟!

الإجابه واضحة. ربنا يسعدكم .

احنا كلنا هنا عايزين نعيش مفيش كلام.. لكن برضة لازم نوفر..

نوفر كام .. اكيد كل واحد وظروفه.

[vipwithyou]

من ناحية التوفير

رأيي ان العاذب لو صرف 700 ريال فى الرياض هيعيش كويس مع توفر كافة اساسيات المعيشة اولا

والمتزوج حديثا ًَ ممكن 1200 ريال يكفوه

واللى معاه طفل يضيف 500 ريال

دا غير اذا استجد عليه مصاريف مدارس

ومصاريف نسرية غير ثابته شهريا ً طارئة مثلا او ما شابة

المفروض بقى نوفر الباقى ماعدا بعض المجاملات كالهدايا والفسح الاستثنائية

مش عارف ينفع كدة ولا لا

يعنى سي السيد مثلا المفروض يصرف 3000 ريال ولو زود عن كدة يبقى مسرف

صح يا ريس