مهندس كهرباء ناجح فى مصر و عرض عمل بالسعودية

[Automatic]

السلام عليكم ورحمة الله وبركاته

انا قعدت ادور كتير على حد اسأله وبصراحه لاقيت المنتدى ده وفكرته عجبتنى قوى

علشان مش اطول عليكم انا مهندس كهرباء دفعة 2006 وعندى 24 سنة وشغال فى شركة كبيرة جدا فى مصر ومرتبى 2000 جنيه صافى بعد الضرائب والتأمينات وراضى ومبسوط والحمد لله

وجالى عقد عمل فى السعودية فى شركة كبيرة جدا ومحترمة فى الرياض بس ليها فرعين تانين واحد فى جدة وواحد فى الخميس

بس هما قالولى انت معانا فى الرياض بنسبة كبيرة جدا بس طبعا هيتكتب فى العقد انى موافق اشتغل فى اى مكان فى المملكة

المهم العرض اللى مبعوتلى كالاتى:

مرتب اساسى : 4000 ريال

اوفر تايم ثابت (يعنى هتاخده هتاخده على كلامهم):500 ريال

بدل سكن: 600 ريال او سيتم توفيره بواسطة الشركة(يعنى لو السكن بتاعهم مش عاجبنى هاخد البدل ده واتصرف انا)

بدل مواصلات: 350 ريال او سيتم توفيره بواسطة الشركة(برضو نفس الكلام لو مش عاجبنى مواصلاتهم اخد البدل ده )

واجازة شهر كل سنة بتزاكر الطيران ومدفعوة الاجر

والتأمين هيبقى حسب سياسة الشركة.

انا اعزب وحتى مش خاطب او مرتبط بس انا فى حيرة كبيرة جدا انتوا عارفين الغربة صعبة.

فياريت لو تفيدونى افادكم الله وانصحونى لوجه الله وقولولى ايه رأيكم فى العرض ده.

انا معرفش العيشة فى السعودية عاملة ازاى ولا الاسعار ايه نظامها.

وياترى العرض ده كويس اساسا ولا وحش.

ياريت ياجماعه متبخلوش عليا بالنصيحة ربنا يكرمك

وجزاكم الله خيرا ومتشكر ليكم كلكم واسف على الاطالة والازعاج

لو ممكن أسأل, بتشتغل أيه بالظبط؟ كهرباء ألكترونيات ولا محولات ولا .؟

[mtmohee]

لو ممكن أسأل, بتشتغل أيه بالظبط؟ كهرباء ألكترونيات ولا محولات ولا .؟

مهندس مشتريات

[justtrying]

توكل على الله يا اخي العزيز

العرض إلى حد كبير مقبول كبداية وبلاش تورط نفسك وتخطب او ترتبط .. خليك في حالك .. وشوف مصلحتك ومستقبلك وانت مرتاح البال ..

تم تعديل 5 يوليو 2008 بواسطة justtrying

[moma]

لو تقدر تاخد إجازة بدون مرتب من الشركة اللي بتشتغل فيها في مصر لمدة سنة إتوكل علي الله وممكن توفر في السنة دي علي أقل تقدير من 40000 جنية إلي 50000 جنية ممكن يساعدك علي تكاليف الزواج وكمان تقدر تحكم علي الأمور بالسعودية وتقدر تفاضل بينها وبين شغلك في مصر

بس لو ما تقدرش تأخد إجازة بصراحة الأمر محير والفرصة اللي معاك في مصر صعب إنك تلاقيها تاني إلا إذا كنت محظوظ

كمان خليني أوضحلك بعض الأمور

أنا حسب علمي أغلب المهندسين بيشتغلوا شغل تاني غير شغلهم الرئيسي يعني ممكن تقوم برسم وتصميم شبكة كهربا لمشروع خارج العمل لمكتب هندسي أو شركة أخري خارج أوقات الدوام طبعا انا مقدرش أقولك ده حرام ولا حلال بس ده اللي بيحصل لدرجة إنك ممكن تتحصل علي عمولات من كده أكثر من راتبك لو كنت شغلك مميز

شوف مدي رضا الوالد والوالدة عن سفرك

حط في حسبانك إنك ممكن تعتمر وتحج وده مكلف جدا من مصر وإنت عارف

والنصيحة الأخيرة لو إنت شايف إن فيه إمكانية زيادة مرتبك وإستقرارك في عملك الحالي وإن وضعك ممكن يتحسن يوم بعد يوم أنصحك ( محلك سر )

[iloveegypt]

نصيحة من مهندس كهرباء زيك

اولا الشركة فى مصر لو كل سنة هتزيد 1000 جنيه مثلا

يعنى السنة الجاية 3000 واللى بعديها 4000 متسافرش

لو هتفضل 2000 فترة طويلة يبقى المرتب اللى معروض عليك مقارنة بحداثة سنك يبقى تتوكل على الله وتيجى الراض بس لو ممكن تاخد اجازةحتى لو شهرين علشان تشوف الوضع بنفسك يبقى احسن وقب كل شىء الاستخارة

[ing]

fsl hggi hgvpldfdfبسم الله الرحمن الرحيم

اخي في الله انا مثلك مهندس كهرباء ولو كنت مكانك اولا هاخد خبرة في مصر الاول علشان تعرف ازاي تتعامل مع الناس ازاي علي الاقل وبعدين افكر وادور علي السفر ولاحظ ان كل يوم فيه اعلانات سفر وعروض احسن من كده

انا مثلا مهندس كهرباء باخد 400 جنية في مصر وجاتلي عروض السفر زيك بس انامتمسك بعملي في مصر لانه هيديلي خبرة كويسة تسفرني بره مصر بمرتب كبير ان شاء الله

والقرار الاخير ليك

[nightmare]

نصيحة من مهندس كهرباء زيك

اولا الشركة فى مصر لو كل سنة هتزيد 1000 جنيه مثلا

يعنى السنة الجاية 3000 واللى بعديها 4000 متسافرش

انا مش عارف الناس اللى هنا مصريين والا جايين من كوكب تاني

هوا مين ده يا iloveegypt اللى بيزيد في مصر 1000 جنيه في السنة

[nightmare]

انا مثلا مهندس كهرباء باخد 400 جنية في مصر وجاتلي عروض السفر زيك بس انا متمسك بعملي في مصر لانه هيديلي خبرة كويسة تسفرني بره مصر بمرتب كبير ان شاء الله

مع إحترامي الكامل لكلامك , انا كنت بفكر زيك وللأسف دلوقتي بعد ما سافرت ندمت ندم كبير على السنين اللى ضيعتها في مصر ولو الزمن يرجع بيا للوراء تانى هسافر مباشرة وبدون اى خبرة حتي ولو براتب اقل شوية

عارف ليه

لانها بحسبة بسيطه تساوي بعضها , هتقولى ازاى , نفترض انك لسه متخرج زى المهندس اللى بيسأل وجالك عرض ب 4000 ريال . قلت لأ هاخد خبرة اربع سنين مثلا واسافر ب 6000 ريال

بعد ال 4 سنين دول هتلاقي المهندي المتخرج جديد اللى سافر من 4 سنين مرتبه وصل 5600 ريال او اكثر لان فيه زيادة سنوية وخد خبرة الخليج كمان , انما انتا هتبقي لسه جاي بنفس المرتب بتاعه وهوه ممكن يبقي مديرك كمان نظراً لأقدميته في المكان .

فأنا صراحة بنصح أى واحد خريج جديد يجيله عقد كويس انه يتوكل علي الله علي طول ومع الوقت مرتبه هيزيد وهياخد خبرة في المكان .. بس كل ده عاوز الصبر والإجتهاد.

[midozz]

السلام عليكم

بص يا سيدي

الراتب كويس جدا نظرا لانك خريج 2006

لو الشركه حتوفرلك سكن مؤثث اوك

لو حيدوك بدل سكن المفروض يكون 3 شهور من الراتب

يعني 12000 ريال يعني 1000 ريال شهريا

ولو حيوفرولك الانتقال اوك

لكن لو حيدوك بدل

اقل حاجه 500 ريال

وخللي بالك ان لازم تكون الفيزا مهندس موش مهنه تانيه

وااله الموفق

[iloveegypt]

نصيحة من مهندس كهرباء زيك

اولا الشركة فى مصر لو كل سنة هتزيد 1000 جنيه مثلا

يعنى السنة الجاية 3000 واللى بعديها 4000 متسافرش

انا مش عارف الناس اللى هنا مصريين والا جايين من كوكب تاني

هوا مين ده يا iloveegypt اللى بيزيد في مصر 1000 جنيه في السنة :mellow:

حضرتك انا كنت شغال فى مصر فى شركة وكانن مدير المبيعات مهند س راتبه 25000 ج فى الشهر

وانا مش جاى من كوكب تانى

[nightmare]

نصيحة من مهندس كهرباء زيك

اولا الشركة فى مصر لو كل سنة هتزيد 1000 جنيه مثلا

يعنى السنة الجاية 3000 واللى بعديها 4000 متسافرش

انا مش عارف الناس اللى هنا مصريين والا جايين من كوكب تاني

هوا مين ده يا iloveegypt اللى بيزيد في مصر 1000 جنيه في السنة :sad:

حضرتك انا كنت شغال فى مصر فى شركة وكانن مدير المبيعات مهند س راتبه 25000 ج فى الشهر

وانا مش جاى من كوكب تانى

وكان كل سنة بيزيد 1000 جنيه , واللاهي يا بلاش

يعني بعد 20 سنة مثلا يكون راتبه 25000 (الاساسي) + 20000 (الزيادة) = 45000

طب ممكن تقولي الشركة دي اسمها ايه , علشان انا قررت انزل مصر ونحاول نشوفلنا فيها سكة -_-

[iloveegypt]

الاخ nightmare

لو سمحت انا مش هقبل منك الكلام بالاسلوب ده لانك زودتها شوية

[mtmohee]

السلام عليكم

بص يا سيدي

الراتب كويس جدا نظرا لانك خريج 2006

لو الشركه حتوفرلك سكن مؤثث اوك

لو حيدوك بدل سكن المفروض يكون 3 شهور من الراتب

يعني 12000 ريال يعني 1000 ريال شهريا

ولو حيوفرولك الانتقال اوك

لكن لو حيدوك بدل

اقل حاجه 500 ريال

وخللي بالك ان لازم تكون الفيزا مهندس موش مهنه تانيه

وااله الموفق

جزاك الله خيرا وربنا يوفقك ويوفقنا

[nightmare]

الاخ nightmare

لو سمحت انا مش هقبل منك الكلام بالاسلوب ده لانك زودتها شوية

انا لم اخطئ في حقك بأي شكل من الأشكال , ولكن أعتقد أن كلامك مبالغ فيه كثيراً

وأنت تناقض نفسك أساساً

أولا : لما سألتك هوا فيه حد في مصر بيزيد 1000 جنيه في السنة , رديت قلتلى اه مهندس مبيعات عندنا راتبه 25000 الف , يا حاج iloveegypt فيه فرق كبير بين مرتبه 25000 الف وبين هوا بيزيد كام كل سنة

ثانياً : نسيت توضح انه عنده كام سنة اصلا مهندس المبيعات بتاعكم ده .

ثالثاً : انا لم اخطئ عندما سألتك عن اسم الشركة لكن أعتقد إنك إنتا اللى غلطت وسبتها وسافرت لو هيا بتدي 1000 جنيه زيادة في الراتب كل سنة

تم تعديل 7 يوليو 2008 بواسطة nightmare