تقدر توصف مصر فى كلمتين؟

[المصـــــــرى]

صح يا باشا بس علشان تمشى مع اسم الفيلم

مش عشان تمشى مع إسم الفيلم، ولكن عشان تمشى مع قواعد اللغة على ما أتذكرها.

[م ب ع ث ر]

معلش يا سيدي هما كلمتين ونصف تشقي ولكن تشفي

[حسام يوسف]

مصر الارض اللى فيهاناس فيهم حاجات حلوة اوى مش موحودة فى اى ناس تانية

ونفس الارض فيها ناس فيهم حاجات وحشة اوى مش موجودة فى اى ناس تانية

سكيزوفرينيا

[midozz]

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

يا مصرى قوم هش الوطاويط...كفاياك تبليط

صعبه الحياه والحل بسيط...حبة تخطيط

........................

فتحت باب إستيرادك

وصرفت فوق ضعف إيرادك

حلى للخواجه إستكرادك

سابك بتقرا فى أورادك

وده أشطك ونزل تشفيط

...................

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

...................

ومهولاتى تحب تزيط

ساعة الفرح زغاريط تنطيط

وفى المياتم هات يا صويت

وفى المظاهرات سخن تشيط

وفى الانتخاب تنسى التصويت

...................

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

.....................

وليه بترشى وتتساهل

وتبيع حقوقك بالساهل

تستاهل النار تستاهل

ياغويط ويحسبك الجاهل

ساهل وساهى وغبى وعبيط

..................

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

.....................

يا مصرى يا اللى الغلا عصرك

والنهب فى عصرك حاصدك

قوم للحياه وأسبق عصرك

ولا حاجه هاترجع مصرك

إلا أن تكون شغال ونشيط

......................

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

يا مصرى قوم...هش الوطاويط...كفاياك تبليط

صعبه الحياه والحل بسيط...حبة تخطيط

[لولا]

احى كل قلم جرئ حر صادق

دخل للموضوع فأثراه بمشاركته .

ولا املك الرد هنا على اى مهاترات

او أقلام تسعى للإستفزاز.

ولا احتاج للقول ان القلم الصادق

لا يسطر الحروف التى تدينه..ثم يعود لاحقا

للتعديل عليها وحذف ما هو غير مقبول ثم ينكر

ماحدث ويتظاهر بمظهر الحملان.

لا أملك سوى ان اتجاهل هذه الأقلام واصحابها

لأنى لا احب الإنسياق الأعمى وراء الأحداث.

[المصـــــــرى]

مصر تتغير، هل المطلوب وصف مصر فرعون أم مصر قطز؟

[justtrying]

بلد كل حاجه فيها ماشية بالمشقلب

[سكر]

بلد محتاجة ولد

[drpharma]

الله يحميها

[Bassam El Sayed]

الله يرحمها

ما بقتش بتاعتنا خلاص

[لولا]

فاكرين اغنيه محمد منير:

راحواا لصبايا و الصبايا جم

أجمل ما فيهم مين غير بنتي

و أجمل ما فيكي يا بنتي ان انتي

في عينيكي نني في حنان الأم

مصر مش احلى وحده..

لكن فى عنيها ننى من حنان الأم مهما قسيت علينا.

[الأهلاوي الأصيل]

لو حبيت أوصف مصر في وضعها الحالي معنديش غير كلمتين

فوضى وفساد

وحزين جداً والله وأنا باقول كده ، بس هي دي الحقيقة

[لولا]

مصر تتغير، هل المطلوب وصف مصر فرعون أم مصر قطز؟

بصراحة المطلوب مش مصر فرعون ولا مصر قطز..

المطلوب اذكر بالتحديد ما نوع السيرااااااااااااااميك المستخدم فى تلك الفتره

واسم مبلط السيراميك .

[shawshank]

بصراحة المطلوب مش مصر فرعون ولا مصر قطز..

المطلوب اذكر بالتحديد ما نوع السيرااااااااااااااميك المستخدم فى تلك الفتره

سيراميك الفراعنة ؟

[مصري جدا]

حبيبتي يا ست الكل يا مصر

محتار بسؤال في كل عصر

ليه اللي يحبك يسكن كوخ

واللي يخونك تديله قصر

وعجبي

أحمد جلبي

[abdooovet]

صنية كنافه محشيه طرشى

زى ما قال اللمبى

لا اتهكم ولكن هذا هو حال مصر

تشبعت بالروتين والغش والسرقه

ولكن مصر هى أأمن مكان فى العالم

واذا كان فى مصر سبعين مليون هتلاقى منهم تلاتين مليون طيبين جدا

وطيبيتهم مش هتكرر فى اى دوله تانى

[لولا]

بصراحة المطلوب مش مصر فرعون ولا مصر قطز..

المطلوب اذكر بالتحديد ما نوع السيرااااااااااااااميك المستخدم فى تلك الفتره

سيراميك الفراعنة ؟

اجابه نا قصه

النتيجه لم ينجح احد

انا قلت اطلعكو من الجو الكئيب الى عمالين توصفوا بيه مصر. :sad: :D

[shawshank]

الفاضلة / لولا

هو الحقيقة الصفة الرئيسية في مصر بالنسبة لي إنها بلدي . فمينفعش أكون منتسب لحتة تانية غير مصر حتى لو عشت في الحتة التانية دي وكان معايا جنسيتها . تخيلي أصحاب البشرة السمراء الأمريكان بقالهم عايشين في أمريكا اد ايه ، ومع ذلك اسمهم لحد دلوقت African Americans . لكن مش ده السبب الرئيسي في إنها بلدي أو إني مصري ، السبب الرئيسي هو حاجتين . أولا : أصلي منين . ففي جميع الأحوال هذا الأصل لا يمكن يتغير مهما عملت في نفسي ثانيا : ثقافتي وعاداتي ... الخ . برضه مش متصور انها ممكن تتغير .

كل اللي فات ده مش معناه إني بكره مصر ، بحبها لكن أحيانًا بلعن أبوها ذي ما صلاح جاهين عمل في موضوعك "باحبها وألعن أبوها بعشق ذي الداء" . وأنا متصور إن حبنا لمصر مش نابع من إن مصر كويسة أو جميلة أو ظريفة أو هايلة ، هو نابع من : عاطفيتنا الزائدة + الأنظمة الحاكمة اللي زرعت فينا هذا الولاء .

دول كانوا "كلمتين وبس" عن مصر بالنسبة لي .

[ايهاب سالم]

أقدر أوصفها بكلمه واحده

مفرمه

[moheltohamy]

وانا كمان يا إيهاب ... كلمة واحدة:

تايهة

:blink: