احترم نفسك.. لسه فى رجاله فيك يا مصر!!

[لولا]

بصراحة موضوع شائك جدا للإسف الشديد انه بدأ يزيد جدا فى الفتره الأخيره.

الموضوع اتطرح ضمن حمله جديده فى مصر اسمها(احترم نفسك..لسه فى رجاله فيك يا مصر!)

يا ترى ايه رايكم فى الحمله دى؟؟

وليه فى رايكم زادت نسبة التحرش فى الشارع المصرى ؟؟

يا ريت كل واحد ووحده هنا يشارك برايه عشان نقدر نعرف ايه سبب الموضوع

وايه الحل من وجهه نظركم.

[النيل حبيبي]

بدأ الصيف ومشاكله الفراغ عند الشباب

طبعاً فيه رجاله لكن برضه فيه ضعف الايمان

ماهو اللي بيترحشوا بيهم اخواتنا وبنات أخوالنا وأعمامنا وجيراننا

واللي بيتحرش بيهم اخواننا وأولاد أعمامنا وأخوالنا وجيراننا

لانملك إلا الدعاء

ربنا يهدي الشباب

[لولا]

بدأ الصيف ومشاكله الفراغ عند الشباب

طبعاً فيه رجاله لكن برضه فيه ضعف الايمان

ماهو اللي بيترحشوا بيهم اخواتنا وبنات أخوالنا وأعمامنا وجيراننا

واللي بيتحرش بيهم اخواننا وأولاد أعمامنا وأخوالنا وجيراننا

لانملك إلا الدعاء

ربنا يهدي الشباب

بس الموضوع ياريته موضوع ازمه صيف وفراغ وبيعدى..

الموضوع ده بقى طول السنه.. والغريبه انه حتى مبقاش

ضمن فئه عمريه معينه من الشباب.

دا حتى الرجاله الكبيره بقت بتعاكس وياما سمعنا عن معاكسات

سواقين التكسيات والميكروباصات للبنات والستات.

والمعاكسه برضك للأسف خرجت عن الإطار اللى اتعرفت بيه

فى الخمسينات والستينات فى العصر الرومانسى

اللى المعاكسه فيه كانت بكلمه حلوه.. وورده..وابتسامه

لقله ادب وتجريح وتحرش صريح.

يعنى مثلا الشباب اللى بتتحرش ببنت تخينه شويه

ماشيه فى الشارع بكلمات زى

"يا أتوبيس" أو "هوه الفيل خرج من الجنينة النهارده" أو "هما نسيوكي في الفرن" (في حالة ما إذا كانت سمراء) وهكذا

ده يبقى اسمه ايه ؟؟؟؟؟؟؟

والا الشباب الى ملهاش شغلانه غير المشي ورا البنات فى الشارع وبالعافيه عايز يتعرف عليها!!

والا الشباب اللى متخصصه فى معاكسه المحجبات ومديقاتهم..

بصراحه انا مش عارفة الموضوع ده فراغ.. ولا نقص دينى..ولا مرض نفسي ؟؟

[لولا]

على فكره برضه انا عايزة اوضح ان المعاكسه بكل انواعها واساليبها

مرفوضه سواء كانت بطريقه السبعينات ولا حتى الألفين

لأنها ببساطه اعتداء سافر على الغير وحرياتهم..

بس افتكرت حكايه وحده كنت قرتها مره فى موضوع عن المعاكسات

لما اتسألت تعمل ايه لو اتعاكست؟؟؟.

فبدأت تحكى الموقف دا : كنت مرة مع ماما خارجين وبعدين لفت نظر ماما واحد قد

والدي في السن بيراقبنا في الرايحة والجاية وبدأ في معاكستي واستفزازي فما كان من

ماما إلا أنها خافت جدا وأخدت رقم العربية واتجهت إلى أقرب قسم شرطة وحررت له

محضرا وهنا تم استدعاؤه لكنه طلع راجل مسئول وواصل قوي وطبعا اتقلب المحضر ضدنا

وطلعنا احنا اللي بنعاكسه ودفعنا غرامة مالية بعد أن قرر التنازل ومن ساعتها بتعاكس ولا

بقول كلمة واحدة ياللا خلي الشباب يعيش علشان خاطر مراهقة المسئولين اللي زيه!!! .

[مهيب]

لولا موضوع فعلا غاية فى الأهمية و الخطورة ..

فى رأيى أنه لا عذر و لا مبرر للتحرش .. فهو فعل ذكورى مقبح قبحا كاملا .. و لا عذر فيه سواء كانت البنت ترتدى من الثياب الحشمة أو لا ..

السبب فى انتشار الظارهة بشكل كبير من وجهة نظرى هو قلة أو انعدام الضبط فى الشارع المصرى .. و اختلال المنظومة الأمنية تماما .. لمن تلجأ الفتاة و ما الرادع لشاب رقيع يهوى معاكسة الفتيات و يرى هو و أصحابه أن هذا فعل يدعو للتباهى .. ما الرادع لهم ؟؟ أين رجل الشرطة أو العسكرى أو الدورية أو أيا ما كان المسمى لردع من يحتاج للردع.

سأضرب لك مثلا .. كثير من الناس يعتقد فى أن الشباب معذور و أن البنات (زودوها حبيتين) الى آخر هذا الهراء .. فما قولهم فى شرم الشيخ مثلا .. اعتقد أن السائحات هناك (مزودينها حبتين كتار قوى) لكن لا يجرؤ أى أحد على المعاكسة هناك بسبب شرطة السياحة و ما يعلم أن قد يقع فيه من متاعب .

بالطيع عدم تحول الدين الى سلوك عند الكثيرين له عامل ضخم فى هذا .. لكنه ليس الوحيد .. فهناك ا لكثير من دول أوروبا لا تجديدن فيها هذا الأمر مطلقا .. و ان كان مرجعه سلوكيا .

مهيب

[لولا]

والله يا مهيب يا خويا انا خلاص حتجنن

وكده حيبقى صعب عليا اليومين دول.. طول الليل استغرب :blink:

واصحى الصبح اتجنن

يعنى انعدام النظام والإنضباط طلع ورا اللى بيحصلى انا وكل البنات من بهدله

ومعاكسات

والله مانا عارفه هى مصر منظمه فى ايه بالضبط ومنظبطه(ياريت لو حد عارف يقول)

وكلام جد .. الحقيقه انك دائما تملك وجهة نظر عميقه وصحيحه لرؤيه المشكله ومواطن الضعف

التى ادت اليها فى الأساس.كلامك رائع وتحليل منطقى للموضوع.

وخدلك يا سيدى الحكايه دى:

حوار دار بيني وبين زميلة في مصر عن موقف هي تعرضت له قريب واستفزني لدرجة كبيرة جدا، قالت فيه إنها كانت مروحة من شغلها وماشية على الكورنيش رايحة محطة المترو في التحرير وقابلها أتنين شباب بدأو المعاكسة بالكلام القبيح وقربوا منها لدرجة إنها جريت ولما قابلها أمين شرطة استنجدت بيه فرد عليها بمنتهى السخافة وقال "إحنا ناقصينكم انتو كمان" وسابها ومشي فاضطرت إنها توقف تاكسي رغم إن مش كان معاها الفلوس اللي تكفي بس علشان تخلص من المضايقة!!!

الحاجة التانية خبر قرأته قديم في صحيفة إماراتية بيقول إن الشرطة الإماراتية نجحت في مواجهة ظاهرة المعاكسة وقضت عليها بنسبة 90% (علما بأنها أصلا محدودة) وقارنت بين نجاح شرطة الإمارات وفشل الشرطة بتاعتنا في مواجهة الظاهرة اللي وصفتها بالمستفحلة في مصر.

[لولا]

الإعلام بتاعنا نفسة للأسف بقى بيروج للمعاكسات، وأكيد كلنا عارفين الإعلان السخيف بتاع ميلودي اللي فيه شخص قصير مصورينه وهو بيعاكس كل اللي رايحة وجاية، والإعلان ده للأسف ناس كتيررر معجبة بيه.. غير الألفاظ القبيحة اللي بيتم استخدامها في الأفلام الجديدة في مشاهد المعاكسات!!

يعنى منظومه فساد متكامله !!

تفتكروا الموضوع فيه مؤامره على الشعب من الشعب نفسه على نفسه ولا من الشعب

اللى فووووووووووق ناحيه الشعب اللى تحت ؟؟ :blink:

حد ينورنى

[shawshank]

موضوعات ذات صلة :

معاكسة البنات والسيدات والتحرش بهم

تحرش جماعى بالاناث فى وسط البلد

كيف تتخلص الفتيات من تحرش الشباب ؟؟؟؟

التحرش الجنسى والاغتصاب

[iloveegypt]

بصراحة موضوع المعاكسة فى الاصل التزام دينى وخلقى

بس للامانة برضه بعض الستات التى تمشى بالملابس الغير محتشمة(وليس هذا مبرر طبعل للشباب) تكون محفزة للشباب

بس الامن او الشرطة عليهم جزء من المسئولية بس بصراحة الامن مش فاضى للكلام ده هو مشغول بالقبض على اعضاء كفاية او الاخوان او شباب الفيس بوك وربنا يستر ومايحطوش شباب المحاورات فى دماغهم ساعتها هخلع من المحاورات واروح اعاكس بنات احسن

[ايهاب سالم]

معقول الكلام ده بيحصل في مصر

[ايهاب سالم]

بس للامانة برضه بعض الستات التى تمشى بالملابس الغير محتشمة

[لولا]

معقول الكلام ده بيحصل في مصر

والله يا إيهاب باشا بيحصل فى مصر ما لا عين رات ولا اذن سمعت..

حبقى ارجع احكى كده شويه حاجات بعدين.

[لولا]

وده كلام كان اتكتب فى مقاله عن المعاكسات فى مصر:

المشكلة مش بس في الأمن المشكلة في الشباب نفسه، تلاقي فيه شباب مقتنع تماما إن البنات بتفرح بالمعاكسة.. طيب منين يا أبو الشباب جبت القناعة دي مش فاهم!!.. ولما تسأل أي حد إيه السبب في انتشار المعاكسات تلاقي الإجابة حاضرة وسريعة وهي إن لبس البنات مش محترم وإن الشباب مش قادر يتجوز ويبروح عن نفسه شوية.. بس هل ده مبرر للتصرفات الحقيرة دي.. حتى لو افترضنا ان البنت مش محترمة في لبسها أو سلوكها.. ليه احنا نتعامل معاها بالأسلوب ده.. المفروض يكون الشاب محترم بصرف النظر عن البنت اللي قدامه.. بس فين الاحترام دلوقت.. وبعدين يفسروا ازاي دول معاكسة البنات اللي لبسها محترم؟؟؟؟؟؟؟؟؟؟؟؟؟؟؟

اللى عنده تفسير للسؤال الأخير يفهمنا.

اكمنى اصلا عارفه انه ملوش تفسير وسنين الجامعه الى عشتها فى مصر

الحمد الله اتعاكست فيها بسبب ومن غير سبب .. لما كرهت الخروج اصلا

او المشى فى الشارع لوحدى.

[justtrying]

هوه بصراحة الموضوع زائد عن حده في مصر

لكن اللوم كل اللوم على الرجل ثم الرجل ثم الرجل .. لأنه لو كان هناك رجل يحكم بيته بطريقة إسلامية صحيحة ما كان لأي مرأة أن تشطح وتخرج متبرجة عارية .. فهذا الديوث وجب أن يحكم بيته ويجعل نساء بيته يحتشمن فهذا هو الأولى وهذه هي بداية الإشكالية .. وبتالي لن يتهافت عليها رجال آخرين للتحرش بها إذا ما خرجت في ثياب محتشمة..

الحالة الأولى أما المتحرش فالحرج عليه يقع لا شك في ذلك ولكن المتحرش بها يقع عليها اللوم هي الأخرى وكلاهما مخطئين ولكن الخطأ الأكبر يقع على الديوث الذي سمح لهذه المرأة المتبرجة الشاطحة لتخرج على هيئتها

الحالة الثانية أن يكون المتحرش عليه الحرج فقط ذلك بأن المتحرش بها في كامل هيئتها الإسلامية وحجابها الشرعي وهذا بطبع اللوم فقط على الرجل الذي تجرد عن رجولته وسمع لشخصيته الحيوانية أن تتجرأ على إنسانيته ورجولته ومبادئه ودينه ولا حول ولا قوة إلا بالله

علاج هذا الموضوع .. هو أن يبدأ كل رجل بإصلاح نفسه وأهل بيته فقط لا غير .. فاللوم لا يقع على المرأة ولكن على الرجل والرجل فقط

تم تعديل 9 يوليو 2008 بواسطة justtrying

[لولا]

بصراحة موضوع المعاكسة فى الاصل التزام دينى وخلقى

بس للامانة برضه بعض الستات التى تمشى بالملابس الغير محتشمة(وليس هذا مبرر طبعل للشباب) تكون محفزة للشباب

بس الامن او الشرطة عليهم جزء من المسئولية بس بصراحة الامن مش فاضى للكلام ده هو مشغول بالقبض على اعضاء كفاية او الاخوان او شباب الفيس بوك وربنا يستر ومايحطوش شباب المحاورات فى دماغهم ساعتها هخلع من المحاورات واروح اعاكس بنات احسن

ضيف عندك كمان من مهام الشرطه كمان انها كمان تعاكس البنات!! :blink: وده تعليق واحد من الشباب على مقاله تغلب شرطة الإمارات على المعاكسه:

طيب دى شرطه الامارات

انما شرطه مصر بقى زى ما انت قلت حدث ولا حرج

طب بعيدا كمان عن الاقسام

احنا عندنا السجن قدام الاستاد الرياضى فى شارع من اهم شوارع البلد(عبقريه تصميم للمدينه)

اى واحده تمشى فى جمب السور بتاع السجن ده تسمع لما تكره

من عساكر الحراسه

وهاتروح بعيد ليه

مش فاكر اسراء عبد الفتاح لما خرجت من السجن اول حاجه قالتها ايه

انا محدش لمسنى

عاوز ايه اكتر من كده

وطبعا احنا السبب فى انحطاط مستوى الاخلاق ده

لسبب بسيط اننا دايما بنجيب اللوم على البنت

اصلها لابسه مش عارف ايه

وعامله فى نفسها ايه

ما بنربيش ولادنا انه ها يتعاقب لو قل ادبه على بنات غيره

دا فيه ناس بيتبسطوا لما يعرفوا ان ابنهم الحيله بيعاكس البنات فى الشارع

مع ان زمان ما كانش كده

وكانت الواحده بتبقى لابسه قصير وممكن بنص كم ولا واحد يبص لها

العيب مش فى اللبس اللعيب فى التربيه.