كندا التي رأيتها :)

[moheltohamy]

الخطوط البريطانية (British Airways): ودي بئى ركبناها في بداية رحلتنا إلي كندا لأول مرة (من مطار القاهرة لمطار هيثرو في لندن يوم 9 سبتمبر ، وف العودة من لندن للقاهرة يوم 1 أكتوبر).

محترمة مووت ، يكفي إنك بتدخل بنفسك ع الويب سايت بتاعهم ، وتحجز بنفسك الكرسي اللي على مزاجك (بس تحديد الكرسي بيكون قبل ميعاد الطيارة بـــ 24 ساعة ، وتطبع البوردنج پاس من ع الويب سايت بنفسك ، وتحدد كمان الوجبات اللي تحبها)! والأكل بتاعهم والتعامل ، قمة الاحترام!

ويمكن دي الوحيدة – حسب ما شفت – هيه والفرنسية ؛ اللي بيدُّولك غطاء للعين (عشان لو عايز تنام ، والإضاءة حواليك مش مريّحاك ، ساعات بيسموها Sleep Mask أو Eye Shade). بس اللي لاحظته إن ولا إير لاينز بتوزّع إير پلاجز (سدادات الودان عشان الدوشة) ، هوه أنا عموماً الهجص ده ما بيفرِئش معايا ؛ بس برضه باكون عامل حسابي وجايب معايا شويّة م البريمة ... برضه الاستعدادات حلوة

ولاّ واحنا داخلين على لندن بأه ؛ إحساس مختلف ، لأ والمناظر م الطيارة دي جو تاني ! بصراحة ، لندن دي كان ليها إحساس تاني خالص!

عارف يابوحميد ؛ يمكن تئول عليا باتفلسف أو (عامل نفسي) أو (باحسس نفسي) ، بس عارف الإحساس بالعراقة (وسيبك من الـــ 7 تلاف سنة والأرع بتاعنا إياه) ، مدينة جميلة جميلة ، ومنظر مبانيها من فوء تحفة ، المنظر الكلاسيك أبو سأف مُسَلَّس (الفيكتوريان هاوس) ، المدينة كلها كده ، ونظام ونضافة وجمال ، ومنظر السكاي ويل (زي اللي ف السندباد مع الفرق طبعاً – بيسموها London Eye بالمناسبة) ، ونهر التايمز والقصور المنتشرة هناك ، حكاية! ولاّ مطار هيثرو ، بلد تانية لوحده ، بتاخد أتوبيس يوصلك من تيرمينال لتيرمينال ؛ وتعيش مع نفسك بأه على ما توصل ، وتلاقيه ماشي على كوبري ومرة تحت نفق (ولا نفق الشهيد أحمد حمدي اللي احنا طالعين بيه السما!) ، وكل ده جوه المطار.

وطبعاً هتتلخبط انتا شوية من طريقة المشي والسواقة بتاعتهم لغاية ما تدرك (آه ، ماحنا ف انجلترا صحيح!) ، لان السواقة ع الشمال وكرسي السوّاء بتاع الشاطل باص ع اليمين ؛ عكسنا تماماً! الخلاصة ، أنا كنت مبهور من منظرها. ولمحت بالمناسبة عربية من عربيات الشحن شايلة شنط الركاب وراجعة بيها على صالة المطار أو مودياها تتشحن على طيارة تانية ، وماشية وراها عربية شرطة حماية أو حراسة أو تأمين لحاجات الناس (تتوقع بيعملو كده في مطار القاهرة؟).

بس اللذيذ بأه ؛ أللعونا الجزم يابو حميد ، مش بس الاحزمة! بصراحة ما عرفتش امسك لساني ، سألته ممكن اعرف إيه وجه الخطورة ف الجزم عدم اللاماخزة؟ :sad: آللي ممكن يكون فيها متفجرات! ولما شافني متنَّح ؛ آللي فاكر الراجل اللي مسكوه في أمريكا بعد عبوره الأطلنطي كان البيه مخبي بودرة متفجرة في نعل الجزمة! فلما بنخلع الجزمة ، ونحطها ع السير بتعدي على مونيتور حساس للحاجات دي ، أنا برضه أولت هيه أكيد مش تناكة وبيتغابو على خلء الله ، أكيد اتأرَصو أبل كده!

والستات بالذات - ومش عارف إشمعنا بصراحة! - كانو بيفتشوهم ذاتي (مش بيألَّعوهم طبعاً) ؛ ست ظابطة هيه اللي بتفتشهم من فوء لتحت (زي الأمن بتوع كلية الظباط الاحتياط يوم العودة للكلية ، فاكر الأيام دي؟) :rolleyes:

وف الديوتي فري هناك كل حاجة نفسك فيها ، والسوفينيرز هناك لذيذة ، بس هتلاحظ إن كل حاجة هناك غالية ؛ بالنسبالهم الجنيه الاسترليني (بحوالي 11 جنيه مصري) بيتعامل زيه زي الجنيه المصري ، وزي الريال! حتت ميدالية بـــ 6 استرليني (ممكن تلاقيها في كندا بـــ 3 دولار) ، ولاّ ماوس پاد بـــ 10 استرليني! والأجهزة الإلكترونية هناك تحفة ، بس أسعارها مش تحفة بالمرة!

وداخل المطار وانتا مستني ميعاد طيارتك هتلاقي حواليك كباين تليفون بالعملة أو بالكريديت كارد. قلت حلو ؛ نتصل نطمن أهالينا ف مصر إننا وصلنا نص السكة بسلام ؛ وأفوجأ بعدين يا ريس بإن الدقيقة بحوالي 3 أو 4 استرليني! بس آهي تنجز المصلحة.

وانا راجع بأه أول مرة من كندا للندن ، واحنا نازلين على لندن (نازلين بالفعل ، لأن الطيارة بتستقر على ارتفاع 10 كم تقريباً ، وعند الاستعداد للهبوط بتبدأ واحده واحده النزول) ، عرفت همّه ليه سمُّوها مدينة الضباب! طايرين في السحاب من ارتفاع 7كم وحتى 3 كم! والمسافة دي كلها سحاب! ومش محتاج أئوللك إن الطيران خلال السحاب ده قمة المرمطة!

بتلاقي الطيارة عمَّالة تتمخمط بيك زي ما تكون ماشي على مدقّ صحراوي ، ورجرجة وإللت أدب! ;)

ولما نزلنا لندن ، ضباب وشبُّورة يا ريس في عز الضُهر! وفضل الوضع كده بتاع 5 ساعات (مدة الترانزيت) لغايت ما مشينا من المطار واخدين طريقنا لمصر!

والعكس تماماً أشوفة واحنا داخلين القاهرة ، الجو الصحو ، والدنيا الرايقة (عكس ما الناس كانو بيئولولي ؛ إنك هتعرف إنك داخل ع القاهرة مع رؤية السحابة السودة إيّاها)!

حاجة تانية ملاحظها... في معظم المرات اللي بارجع فيها من الدمام أو البحرين على مصر (وبرضه مع الخطوط السعودية والسويسرية والبريطانية – الموضوع مش موضوع خطوط بئى!) ، والطيارة بتلف من جنوب غرب القاهرة (عند الأهرامات) ، بالاحظ غالباً إني باتمرمط وبتطلع عيني والطيارة بتنزل ؛ سواء مع مصر للطيران أو الخطوط السعودية أو طيران الخليج! بتحس إنك راكب مراجيح ، ومراجيح سافلة كمان! وبادوخ وبتبئى حالتي حالة! bv:-

آخرها الشهر اللي فات ، وانا راجع مصر... عاوز اقول لك إن الطيارة ولا كأنها بتواجه إعصار! وبدأت أعرق بشكل جامد ، وزي ما اكون داخل في فازوفيجال أتَّاك! لدرجة إني سألت اللي آعد جنبي : همه فصلو التكييف؟ قاللي : أبداً ، ده فصل عندك انتا بس! مش عارف إيه تفسير الموضوع ده ، بس هوه دايماً مع دخولنا ع القاهرة... انتا فاهم بأه ؛ بلدنا وبترحب بينا ، وبتهشكنا كمان... واحشينها!

معلومة ع الماشي ... لو بصيت لك بصة ع الخريطة دي ؛ هتاخد فكرة عن توزيع استهلاك الكهرباء خلال الليل على مستوى العالم ، ومنها تقدر تستخلص فكرة من مدى انتشار البشر والمناطق الحضارية بالمرَّة! والصورة التانية دي هتحزن عليها بجد ؛ لما تلائي إن الوطن العربي بتاعنا مسنتر نفسه ع المنطئة الصفراء (الصحراء) اللي موجودة في كوكب الأرض! مش ناقصنا غير إنضمام تشاد والنيجر ومالي لجامعة الدول العربية عشان نكون واخدين الصحرا احتكار! bv:-

تم تعديل 12 يوليو 2008 بواسطة moheltohamy

[alaashabana]

سلام الله عليكم

بجد مش عارف ابدا منين ولا اقول اية .. بس بجد حرااام عليكم اللى بتعملوة فينا دة .. انا خلاص بقيت مدمن المنتدى دة لدرجة انى بقيت بسيب الشغل بالساعت علشان اشوف الكلام الجميل والقصص الحلوة بجد والله انا كتير اوى لما بقرا مواضيع المنتدى بحي انى بسافر فى دنيا تانية خالص خصوصا مواضيع الهجرة لكند .. ومش هقولكم قد اية يعتبر دة من اكبر اكبر اكبر احلا حياتى من وانا عندى 16 سنة ..

نا علاء محاسب بالامارات وبجد من كل قلبى اتمنى انى اكون صديق ليكم ولكل الناس الجميلة : تهامى ، ايهاب ، مهاجرة، وناس كتير والله )

انا تقريبا بقيت على المنتدى 10 ساعات متواصل يوميا .. ويارب يارب يارب افضل فية لغاية بعد ما ااسفر كندا واكتب انا كمان تجربتى زيكم ..

انا بجد برفع القبعة وانحنى لكل واحد فيكم وقال معلومة مفيدة ومبشرة للخير . ويعجز لسانى عن الشكر .. لانكم بجد اجمل واحلى ناس فى الدنيا كلها.

كفاية ان الدنيا كلها ضيقة وخانقة لكن اول ما بفتح المنتدى بحس بحياة تانية وتفاؤل عمرى ما كنت بحسة قبل كدة.

جزاكم الله خير ويارب نتقابل كلنا فىكندا ثم فى جنة الله بأذنة تعالى ..

انا كما متابع لكل مواضيع المنتدى خصوصا " الهجرة الى كندا" ويارب يا استاذ ايهاب تفضل معانا علشان بجد انتى مثلى الاعلى فى الحياة ودة فعلا حقيقى .. واتمنى انك تعتبرنى اخوك الصعير بجد وتفضل مثلى الاعلى فى كل حاجة فى طموحك وثقافتك وصفاتك الجميلة بجد ...

تحية طيبة وعطرة لكل من يفيدنا بمعلومة ..

علاء شبانه 23 سنة محاسب بالامارات .. عاشق كندا وثلجها :rolleyes:

[moheltohamy]

أخى العزيز محمد التهامى

الشامى يحييك من خلف أمواج البحر من الاسكندرية.....و أسجل أعجابى و متابعتى

وفقك الله....خالص تحياتى

ملحوظة: وحشتنى يا بوب

:sail:

إيه؟ مين؟

عمنا وأستاذنا والبيونير بتاعنا ، د. الشامي بنفسه هنا ف التوبيك بتاعي؟! قيام يا ولاد ..

يا باشا الموضوع نور ، وحصلتله البركة

النهارده بس 12/7 الموضوع أخد أبروفال

ويا رب تفضل منورنا كده على طول ، وتمنياتي بأجازة سعيدة ، وعاشوراء ممتعة من عند صابر

تم تعديل 12 يوليو 2008 بواسطة moheltohamy

[ايهاب سالم]

انا كما متابع لكل مواضيع المنتدى خصوصا " الهجرة الى كندا" ويارب يا استاذ ايهاب تفضل معانا علشان بجد انتى مثلى الاعلى فى الحياة ودة فعلا حقيقى .. واتمنى انك تعتبرنى اخوك الصعير بجد وتفضل مثلى الاعلى فى كل حاجة فى طموحك وثقافتك وصفاتك الجميلة بجد ...

تحية طيبة وعطرة لكل من يفيدنا بمعلومة ..

علاء شبانه 23 سنة محاسب بالامارات .. عاشق كندا وثلجها

أخجتلني يا علاء

أنا سعيد إننا أفدناك واسعدناك و يا رب تنول كل احلامك و تيجي كندا و تحقق كل أهدافك

[moheltohamy]

ملحوظة: وحشتنى يا بوب

لا اوحش الله منك يا رمضان

قصدي يا دوك mfb:

انا كما متابع لكل مواضيع المنتدى خصوصا " الهجرة الى كندا" ويارب يا استاذ ايهاب تفضل معانا علشان بجد انتى مثلى الاعلى فى الحياة ودة فعلا حقيقى .. واتمنى انك تعتبرنى اخوك الصعير بجد وتفضل مثلى الاعلى فى كل حاجة فى طموحك وثقافتك وصفاتك الجميلة بجد ...

تحية طيبة وعطرة لكل من يفيدنا بمعلومة ..

علاء شبانه 23 سنة محاسب بالامارات .. عاشق كندا وثلجها

أخجتلني يا علاء

أنا سعيد إننا أفدناك واسعدناك و يا رب تنول كل احلامك و تيجي كندا و تحقق كل أهدافك

طب ما الم هدومي واروح أنا بقى واسيبكو تدردشوا شوية مع بعتشيكو!!!

زعيم أوانطة انا بقى ولا إيه؟!

طيب يا عم إيهاب ، خش صبّح ولا حتى قول مسا التماسي ، أو سلامو عليكو!

الحتة دي بتاعتي لمؤاخذة ومتسجلة بإسمي

[moheltohamy]

الخطوط الفرنسية (Air France) ودي على فكرة اتحدت مع الخطوط الملكية الهولندية (KLM).

ودي أخدتها وانا رايح كندا تاني مرة من مطار القاهرة إلى مطار شارل دي جول في پاريس (فبراير 2008). كان الإقلاع من المطار القديم (حسب خطوط الطيران) الساعة 2 صباحاً ، و وصلت فرنسا الساعة 6 صباحاً (5 ساعات – لاحظ فرق التوقيت).

واحب ائول لك إن ده كان أسوأ وقت ممكن توصل المطار فيه - بغض النظر إنك بتوصل بالليل ، وما بتشوفش البلد من فوء ، ودي كان نفسي أشوفها بصراحة ؛ باريس مدينة الفن والجمال (رغم إن هند بتئول عليها عرّة!) - معظم المحلات ف الديوتي فري زوون كانت قافلة! والمطار فاضييييي ، وأُدّامك 5 ساعات ترانزيت على ميعاد طيارة إير كندا.

أنام شوية ، أئوم ألف ع المحلات اللي فاتحة شوية ، أروح الحمام ، أي هجص أضيع بيه الوأت والسلام! حاجة عذااااب!

بس اللي أئدر ائولهولك إن الفرنساوي فرنساوي يا ريس ... mfb: برضه الشياكة والناس الديليكاه (الرئيئة يا عديم الفرانسيه)!

وكانت أول مرة ألاحظ ستات كُبار (يعني مضيفات فوء الـــ 45 سنة!) جوه الطيارة ، بعكس الصورة اللي كانت مزروعة ف دماغنا ؛ المضيفة دي لازم تكون بنت تغيه چون (صغيرة و وِروِر) ، وسمباتيك وطِعمة وحليوة وزي لهطة الجيشطه!

بس بصراحة همه غاية ف الشياكة والرُقي والحنّية. واللذيذ إنهم بيتكلمو فرنساوي مع الركاب ؛ زي ما يكون المفروض إن الركاب اللي تتجرأ وتركب الخطوط الفرنسية لازم تدرس فرنساوي! ساعات كنت باخبط معاهم بالفرنساوي ؛ واكون آعد محضر الجملة في دماغي هائولها ازاي بالنحوي آلا فرانسيه!

وساعات تانية كنت بارفع الفانلة الحمالات البيضا اللي انا لابسها (علامة الاستسلام قصدي)... وأكلمهم إنجليزي واخلص!

واللي لفت نظري برضه الفطار بتاعهم ، جميل جداً جداً. أول مرة ألائي فطار بالطعامة دي! البيض الأومليت والعيش والزبدة والجبنة ، وسوسيس على ما أذكر ، وفروت سالاد. بس البيض حلو حلاوة يابو حميد! فرنسا يا عم الحاج

نؤطة سلبية يا سيدي مع الأسف لازم أئولها...

الشنط لما وصلت بيها البيت في تورونتو ، كانت معظمها متبهدلة! متبهدلة بجد ، لدرجة إني رميت الشنطتين ف الزبالة فيما بعد! تخيل إني لقيت شنطة منهم مفتوحة من الضهر بتاع 30 سم من الكورنر ، لدرجة إني شكّيت إن حاجات تكون اتسرئت منها!

وجيت أبُص ع البارفانات اللي كنت شاريها لهند (كنت جايبلها 4 بارفانات م اللي ألبك يحبهم – من مصر مش من فرنسا بس كانو في حدود الـــ 300 دولار – من مزايا بتاع سيتي ستارز مدينة نصر ، ومن السوق الحرة لمطار القاهرة) ، ألائيهم 2 بس!

أومت متصل bv:- بمطار پيرسون الدولي في تورونتو (على فكرة ، مطار تورونتو هوه المطار العبيط اللي في جزيرة تورونتو ؛ جزيرة صغيرة كده جنوب تورونتو في بحيرة أونتاريو ، وتبعد عن تورونتو ... هي هي هي ... 120 متر!).

المهم ، الراجل بتاع المطار أخد مني المواصفات ع التليفون ، وعمل تقرير بالموقف ، وطلب مني أروح المطار ومعايا تذاكر السفر ، والإيصالات اللي اشتريت بيها البارفانات لو كانت معايا.

أحمد الديب آللي : غالباً التعويض اللي هيدُّوهولك 100 دولار بس!

المهم ، بعد شوية وانا باكمل فرز الشنط ، لئيت البارفانات وكل حاجة موجودة! أنا بس اللي اتسرعت لما لقيت الشنطة اللي كنت حاطط البارفانات فيها ما فيهاش غير اتنين بس.

بس م الواضح إن الشنط اتبهدلت واتمرمَطِت ف الترانزيت في فرنسا. الموقف ده عقّدني من الإير فرانس بصراحة!

تم تعديل 13 يوليو 2008 بواسطة moheltohamy

[ايهاب سالم]

ملحوظة: وحشتنى يا بوب

لا اوحش الله منك يا رمضان

قصدي يا دوك ;)

انا كما متابع لكل مواضيع المنتدى خصوصا " الهجرة الى كندا" ويارب يا استاذ ايهاب تفضل معانا علشان بجد انتى مثلى الاعلى فى الحياة ودة فعلا حقيقى .. واتمنى انك تعتبرنى اخوك الصعير بجد وتفضل مثلى الاعلى فى كل حاجة فى طموحك وثقافتك وصفاتك الجميلة بجد ...

تحية طيبة وعطرة لكل من يفيدنا بمعلومة ..

علاء شبانه 23 سنة محاسب بالامارات .. عاشق كندا وثلجها :waf:

أخجتلني يا علاء

أنا سعيد إننا أفدناك واسعدناك و يا رب تنول كل احلامك و تيجي كندا و تحقق كل أهدافك

:closedeyes:

طب ما الم هدومي واروح أنا بقى واسيبكو تدردشوا شوية مع بعتشيكو!!!

زعيم أوانطة انا بقى ولا إيه؟! wst::

طيب يا عم إيهاب ، خش صبّح ولا حتى قول مسا التماسي ، أو سلامو عليكو!

الحتة دي بتاعتي لمؤاخذة ومتسجلة بإسمي :sad:

:D

إحنا بتوعك يا زعيم

أنا متابع يا باشا و مش باحب أرمي التماسي عشان أسيبك تكتب براحتك و منخرجكش عن الموضوع

بس حبيت بس أرد ع الناس الحلوه اللي جابت سيرتي

أخر مره يا دوك

و صباح الفل و مسا التماسي يا ورد قاعد ع الكراسي

[Nonna]

ماشاء الله

موضوع احييك عليه يا دكتور :closedeyes:

و أسلوب يستحق انه يتابع فعلا

عجبني جدا منطق خال حضرتك :sad:

استمر يا فندم

منتظرة البقية :D

[احمد عبده]

وحياة ربنا دمك زي العسل

انتوا كنتوا بتطلعوا ايه من البريمة عسل نحل

بس لو كل ده في الطيارة يبقي علي ماتوصل كندا .. يا نهار ازرق شيلنا الباطنة والحمد لله

اخوك الصغير في 5 طب اسكندرية

[moheltohamy]

اخويا تهامى رغم كونى زعيم من زعماء اللاهجرة :happy:

بس موضوعك جامد طحن ولذيذ جد

يا خوفى يا بدران اغير رأى واهاجر كندا :sad:

طبعا بضحك لا هجرة للابد

بس موضوع شيق جدا وكمل :happy:

يا باشا ، طول مانتا ف الحوار اللي انتا عارفه ، وانتا فرعوني ولا عفريت أزرق ، مش هتطلع بره مصر ولا بره جدران المنتدى!

ويسعدني وجودك معانا ، وأحب أقول لك حاجة...

مفيش حاجة اسمها هجرة للأبد ، باب التوبة مفتوح دائماً يا ريس :lol:

ومعاك الجرين لايت ترجع مصر في أي وقت. كل الموضوع إنك ماسك العصاية م النص ، حالياً كندا هيه الأفضل (عالم أول ، واحنا عالم تالت ، مش محتاجة نقاش). ولو جه الوقت وحسيت إنك مش عاوز تكمل ، أو حسيت ببوادر الخطر على أولادك أو نفسك حتى ، حد هيقول لك ما ترجعش؟!

[hosiny]

الله يكرمك يا تهامي بيه

فكرتنا باسلوبك الجميل ده باسلوب د شامي ايام ماكان بيحكي

وكنا بصراحة مفتقدين الاسلوب القصصي ده لحد مانتا بدأت

تسجبل اعجاب و متابعة بردو

[moheltohamy]

و الله يادوك لو موضوعك أقنع الراجل ده بالذات ييجى و يبقى كسبنا مسلم حريص كل الحرص على دينه ونزيد واحد بألف لأعزمك على أكله جمبرى ماركه قطار الشرق السريع عند الواد مندرين بدل المضروب اللى حيجيب للعمال تسمم ده . :sad:

بنسجل بس المتابعه و نبعت أحلى تحيه ليك و ليه..... :happy: :happy: :sad:

إيه؟ جمبري من عند الواد مندرين؟!

بص بقى يا iloveegypt :

تذاكر الطيارة على حسابي...

وأنا اللي هاعمللك Sponsorship ، وهاجيلك لغاية عندك مصر ، وهنجيب شهادة شهود (بجوز جنيهات) ؛ إني أنا وانتا common-law partners ، وبقالنا سنة عايشين مع بعض.

ما تقلقش ؛ عادي في كندا ، مش عيب خالص! wst::

وتيجي يا ريس ، وتقضيلك كام يوم فسح وأحلى مزاج ، وكله على حسابي!

ولو تحب تخليك لما تاخد الجنسية ، براحتك.

إنتا بس تدخل البلد يا سيدي ، وبعد كده مش هاطلب منك حاجة تانية!

بكده أبقى أنا نولت سندوتش الجمبري بتاع الواد مندرين. وكله يهون في سبيله!

سؤال يفرض نفسه...

مين هوه ... سندوتش الجمبري؟! :lol:

تم تعديل 14 يوليو 2008 بواسطة moheltohamy

[moheltohamy]

ماشاء الله

موضوع احييك عليه يا دكتور :lol:

و أسلوب يستحق انه يتابع فعلا

عجبني جدا منطق خال حضرتك :sad:

استمر يا فندم

منتظرة البقية wst::

د. نونّا...

شرفتينا بوجودك ، ويا رب ما تزهقيش مننا في نص السكة!

وتستمر الحبكة الدرامية شغالة :happy:

وآهي تسالي في وسط الملل بتاع النسا والولادة والجراحة!

وعلى ذكر منطق خالو علاء ... فده ليه شوية أفكار دمها خفيف شوية...

هيه صحيح أفكار ساءطة وفاشلة ، بس ظريفة :happy:

البيه مش مقتنع ... ليه أشتري عربية؟

وليه أشيل الهم ، ويطلع عيني على ما اطلع رخصة ، وضريبة وفحص ، ومشاوير للميكانيكي ، والعربية اتحكّت ولا اتخبطت ، ولا عطلت ، ولا كاوتشة ضربت ف الطريق ، وسايق وأعصابي مشدودة ، ولا عارف أبص يمين ولا شمال!

مانا باركب الميكروباص ، وبادفع له ربع جنيه ، وقاعد حاطط رجل على رجل ، واقرا الجرنال ف السكة ، أمتع عيني بالمناظر اللي حواليّا ، ولو كاوتشة ضربت ف السكة ، أنزل وأتّنّك ع السوّاء "بسرعة يا اسطى ، ورانا مصالح!"

أبقى غبي - دا هوه اللي بيقول - لما أضيع فلوس كمان في شراء عربية!

وجهة نظر برضو ، مش كده ولا إيه؟ :sad:

تم تعديل 14 يوليو 2008 بواسطة moheltohamy

[samehelassad]

كدة برضة يادكتور متعرفش مين سندوتش الجنبري لالالالا مكنتش اطلاقا اتخيل انك متعرفش مين سندوتش الجنبري بقى تعرف الواد مندرين طول الوقت دة ومسئلتوش.

عموما عاوز اقوللك انا مش بدحك وانا بقرا مداخلاتك انا بكركر من الدحك وماتقوليش يعني اية دحك؟

[moheltohamy]

وحياة ربنا دمك زي العسل

انتوا كنتوا بتطلعوا ايه من البريمة عسل نحل

بس لو كل ده في الطيارة يبقي علي ماتوصل كندا .. يا نهار ازرق شيلنا الباطنة والحمد لله

اخوك الصغير في 5 طب اسكندرية

الله يكرمك د. أحمد ...

بقول لك إيه بأه ... هالاقيها منك انتا ولا من د. نونّا؟

واحد هيشيّلني ذنب الباطنة ، والتانية تشيّلني ذنب النسا والجراحة!

إحنا نكتب ع التوبيك بتاعي أحسن (24+) ، عشان أضمن إنكم ما تدخلوش هنا غير ف الامتياز :happy:

بالمناسبة صحيح يا باشا... لو فعلاً بتفكر تقدم ع الهجرة لكندا...

أولاً ، فكر في امتحان الــ MCCEE وانتا في سنة ساتة. وفر في الوقت ، وباسمع عنه إنه امتحان مش صعب. وفي نفس الوقت ، جو المذاكرة مش غريب عليك حالياً. كل ما تبعد عن سنين المذاكرة ، هتلاقي المذاكرة دي تقيلة على قلبك بشكل ما تتخيلوش!

ثانياً ، وانتا في سنة الامتياز فيه ورقة ممكن تعملها بضم سنة الامتياز لسنوات الخبرة ، من المستشفى اللي بتشتغل فيها ، وقبل التكليف.

دي هتفيدك فعلاً في حساب نقاط الهجرة.

ونتمنى نراك هنا من وقت للتاني.

[moheltohamy]

الله يكرمك يا تهامي بيه

فكرتنا باسلوبك الجميل ده باسلوب د شامي ايام ماكان بيحكي

وكنا بصراحة مفتقدين الاسلوب القصصي ده لحد مانتا بدأت

تسجبل اعجاب و متابعة بردو

نورتنا يا أ. حسيني

والله احنا بنحاول نيجي حاجة جمب أستاذنا... وعلى الله نعجب :happy:

[moheltohamy]

الطيران السويسري (Swiss International Airlines) ، ودي اللي أخدتها تاني مرة في عودتي من زيوريخ للقاهرة (9 مارس).

ودي كانت مرحلة ترانزيتية ما بين الجو اللي تحت الصفر في تورونتو ، والجو الحار جاف صيفاً ف القاهرة (درجة الحرارة تسعة وعشرين على ما أذكر)! وكانت الحرارة في زيوريخ 11 درجة مئوية.

المناظر من الجو للمنطقة واحنا داخلين على زيوريخ رهيبة. الجبال كلها أخضر × أخضر (زي كندا ف الصيف – ما تنساش إني سايب كندا أبيض × أبيض ، والشجر ما عليهوش ورأ خالص) ، والقرى اللي ف حضن الجبال وبيوتها المثلثة الكلاسيك دي ، والأنهار اللي ماشية بينهم ، والمناطق الزراعية... مناظر تشرح القلب ، وتحس إنك ضارب أمبولين فاليام :happy:

والترانزيت بتاعنا في مطار زيوريخ كان أكتر من ساعة ونُص ، لكن طيَّارة إير كندا إتأخرت ساعة على ما طلعت من تورونتو (من 7:15 م – 8:30 م) ، فبئى الترانزيت نُص ساعة!

ولك أن تتخيل بأه ... سيرك عشان ألحأ طيارة سويس إير ، اللي المفروض معادها كمان ربع ساعة (على ما وصلت لبوابة الترانزيت جوه المطار) ، والائي يحمد يخويا طوابير! جيت أحاول استأزن من الست السيكيوريتي بتاعة الجوازات هناك (وسّعو يا جدعان ؛ طيارتي هتتحرك بعد رُبع ساعة) ، وهيه تئوللي ما تئلئش ، همه لسَّه ما ندهوش عليها! وبعد ما دخلنا من الجوازات ، وعلى بوابة الممر اللي بيدخَّل ع الطيارة ، الست اللي هناك باسألها الطيارة هتطلع إمتى ؛ تئوللي لما تكملو! :happy:

أولت : الله يرحمك يا جَلف إير!!!

الطيارة كانت عادية (أصدي عادية مقارنةً بالخطوط الكندية والبريطانية طبعاً). وكنت طبعاً حاجز الوجبة بتاعتي والكرسي اللي جمب الشباك من ع النت.

تم تعديل 14 يوليو 2008 بواسطة moheltohamy

[لولا]

والله يا توهامى يا خويا الواحد مش عارف

يشكرك ازاى على المواضيع الحلوه دى :sad:

اثريت المنتدى بجد :happy:

ايه بس الجمال ده فى السرد يا استاذ..

الواحد من بعدك خلاص مش حيعرف يكتب

حاجه فى المنتدى وتعجب حد :lol:

انا قلت افوت اسلم عليك طالما انت مختفى من بقيه المواضيع :happy:

واهنيك ع الأسلوب الجميل دوت :sad:

[moheltohamy]

والله يا توهامى يا خويا الواحد مش عارف

يشكرك ازاى على المواضيع الحلوه دى :lol:

اثريت المنتدى بجد :happy:

ايه بس الجمال ده فى السرد يا استاذ..

الواحد من بعدك خلاص مش حيعرف يكتب

حاجه فى المنتدى وتعجب حد :sad:

انا قلت افوت اسلم عليك طالما انت مختفى من بقيه المواضيع :happy:

واهنيك ع الأسلوب الجميل دوت wst::

شكراً يا لولا ، ولو إني عارف اللي في نيّتك!

ويا رب نسمع كلام حلو دايماً زي الكلام دوّت :sad:

[Nonna]

ماشاء الله

موضوع احييك عليه يا دكتور bv:-

و أسلوب يستحق انه يتابع فعلا

عجبني جدا منطق خال حضرتك bv:-

استمر يا فندم

منتظرة البقية :)

د. نونّا...

شرفتينا بوجودك ، ويا رب ما تزهقيش مننا في نص السكة!

وتستمر الحبكة الدرامية شغالة :)

وآهي تسالي في وسط الملل بتاع النسا والولادة والجراحة!

وعلى ذكر منطق خالو علاء ... فده ليه شوية أفكار دمها خفيف شوية...

هيه صحيح أفكار ساءطة وفاشلة ، بس ظريفة :happy:

البيه_ده اللي هوه خال حضرتك ؟!! :blink: _مش مقتنع ... ليه أشتري عربية؟

وليه أشيل الهم ، ويطلع عيني على ما اطلع رخصة ، وضريبة وفحص ، ومشاوير للميكانيكي ، والعربية اتحكّت ولا اتخبطت ، ولا عطلت ، ولا كاوتشة ضربت ف الطريق ، وسايق وأعصابي مشدودة ، ولا عارف أبص يمين ولا شمال!

مانا باركب الميكروباص ، وبادفع له ربع جنيه ، وقاعد حاطط رجل على رجل ، واقرا الجرنال ف السكة ، أمتع عيني بالمناظر اللي حواليّا ، ولو كاوتشة ضربت ف السكة ، أنزل وأتّنّك ع السوّاء "بسرعة يا اسطى ، ورانا مصالح!"

أبقى غبي - دا هوه اللي بيقول - لما أضيع فلوس كمان في شراء عربية!

وجهة نظر برضو ، مش كده ولا إيه؟ wst::

هي وجهة نظر طبعا

وبصراحة ما فكرتش فيها خالص قبل كدة

وفيها جانب كبيييييير من الصحة و

بعد النظر

شكله كدةكان عارف ان البنزين هيغلى!!

:blush2: :blush2: ثانيا ذنب ايه بس يادكتور اللي هاشيلهولك

ان شاءالله خير

لاتقلق

حاجةاخيرة بقى

حضرتك خلال كل السفريات ده

ما لقطتش كدة اي صورة

لمنظر الاشجار الاخضرة في أخضرة ده مثلا؟!!

لو في صورة و ينفع يعني

_لو مافيهاش سقالة يعني :blush2: _

حضرتك تضيفها للرد أعتقد هيبقى الموضوع أفضل

_لو ما ينفعش بلاااش طبعا ده مجرد اقتراح _