كندا التي رأيتها :)

[zamalkawy]

تعرف إيه أحلى حاجة في كندا بالنسبالي أنا بالذات؟ أهلها يا بو حميد أحلى حاجة فيها

بصراحة الحاجات دي كانت موجودة في مصر يعني اللي مولودين في السبعينات لحقوا البقية الخيرة من السلوكيات دي في الشارع في فترة من الزمن لحد نهاية الثمانينات بعد كدة لما الدنيا ولعت و خربت و بدأت خلاص توصل للي احنا فيه دلوقتي الأخلاق دي ضاعت او السلوك ده لان الناس بقت سوري في اللفظ زي **** مربوطين في ساقية بيلفوا فيها و هما مغطينين عينهم كل المطلوب منك تفكر في حاجة واحدة هتجيب فلوس ازاي

مينفعش تطلب من شعب 80% منه على الاقل عايش ب 200 جنيه في الشهر ان يكون عنده سلوك كويس او يكون فريندلي او حتى خدوم بالرغم ان لسة في ناس كدة

تم تعديل 19 أغسطس 2008 بواسطة zamalkawy

[moheltohamy]

حبيب قلبي وبلدياتي

والله أنا اللي انبسطت جداً بردك خصوصاً اني افتكرنك نفضتلي بس قلت دي مش أخلاق الغمراوية برضو

حظي وحش يا ريس..لأن 2004 دي كانت طلعاتي كلها في براريم البحر اللي كان وشها حلو وعلى 2005 كنت باي باي..وبصراحة أنا من هواة براريم البحر- مع إن مش دايما بنلاقي لبن العصفور زي الصحرا عشان لازم نستنى الطلبية- لكن برضو يا أخي ..كفاية الوقفة بالليل على (Helideck) مع سجارة وكباية شاي والبحر كله بتاعك يا معلم!! وبمناسبة الموف (Rig Move) أنصحك تشوف الموف بتاع بريمة البحر ...حاجة خرافية فعلاً

ماعلينا..المهم أنا تشرفت بمعرفتك (vitually) على الأقل لحد ما نتقابل في كندا ونعمل رابطة الغمراويين في كالجاري..معلش أنا هفترض إنك لما تروح هتكمل في البترول وهتضطر تروح كالجاري عشان البترول كله هناك!!هو كده أنا قررتلك خلاص

اسمحلي بقى أفتن شوية

على فكرة يا جماعة شغلانة طبيب البريمة دي أروق شغلانة في العالم وطول عمري بقر عليهم - مع إن مسئولياتها كتير جداً- وده لسببين..

أولا إنك دكتور وسط عشرات من العمال وبعض المهندسين..طبعاً مش زي ما تكون دكتور في مستشفى زيك زي غيرك

ثانياً: لأنك تقريباً مدير نفسك حتى مدير البريمة بيعملك خاطر برضو لأنك دكتور ولأنك يمكن تنفعه بحباية تساعده لما يرجع بيتهم

مساء الفل يا دكترة..وتحياتي العطرة من الدوحة

مساء الورد والمزاج يا باشمهندس محمد ، وتحياتي من الـ High Island 2 اللي هيه مش برّيمتي أصلاً :happy:

دايماً تلاقيني باتأخّر عليك... ماهو باستنى المزاج يكون عنب عشان اعرف أمخمخ وانا باكلّمك... وطبعاً مفيش أحلى من المخمخة دلوقتي... في الصباح الباكر ، ولسّه منأنألي شوية برينجلز ، وشوكولاتة جالاكسي ، وكان بيبسي ، وعصير مانجه (على خساب صاخب المَخِل طبعاً :lol: )... وباسمع أغنية الواد حمادة هلال - تصوّر... wst::

و م الواضح يا ريس إنك مش متابع أوي... مانا يا باشا جمبك هنا ف السعودية في وسط الخليج (أمال احنا بنقول إيه بس م الصبح؟) ، بريمة ترانس أوشن (الـ Main Pass 1) ، واخدناها من الـ Shipyard ف الشارقة لغاية هنا (أكيد بالـ Tug Boats).

واللذيذ ، إني تلاقيني متبرّم ، ومخنوق من الموف الغبي اللي بيقعدله كام يوم ده (من الإمارات لهنا ، بخلاف كده ، بيكون كام ساعة)! لا عارفين نتفرج على تليفزيون tv_: ، ولا نتكلم ف التليفون phn: ، ولا ندخل ع النت ty:) ؟ دا إيه العيشة الهم دي؟!

الله يرحم المرمطة بتاعة الكرافانات وموفات 92 اللي كنا بنستنى وندعي نخلع منها ويتدبس بديلنا فيها!

وكان التول بوشر بيتنقط لما اقول له ، هوه الموف الجاي هيبقى إمتى ، أو أشتكيله من الموف! يقوللي إنتا بالذات آخر واحد المفروض يتكلم ع الموف ، لانتا بتتعب في حاجة ، ولا بتعيد تركيب البريمة من تاني زي فريق الحفر والميكانيكية والكهربائية واللحامين ، ولا بتتبهدل في تحضير وجبات زيادة لجيش السواقين اللي بييجوا يعزّلوا البريمة!

أقول له أيوة ، بس كفاية إني مش عارف أنام واصحى بمزاجي ، ولا عارف أتفرّج ع الدش بتاعي! wst::

وطبعاً ، النيّة إن شاء الله على ألبيرتا مبدئياً كـ Rig Medic ، إلى أن نشوف الدنيا هتمشي معانا ازاي!

وفعلاً معاك حق... الوقفة آخر النهار أدام البحر دي ممكن تنسى نفسك ، بس مش اليومين دول خالص! ممكن في الشتا ، بعيد عن الحر والرطوبة اللي ممكن يكرّهوني في نفسي! وبرضه مفيش حاجة اسمها أقف ع الهيليديك ، ده من غير ترابزين (Handrail) سعادتك ، ومع واحد عنده أكروفوبيا... نراعي النقطة دي شوية!

وبالنسبة للحباية اللي بالي بالك... هاهاهاهاها... وحياتك انتا من أيام الجيش ، والكل دايماً باصص للدكاترة إنهم دايماً شايلينها في جيبهم!

هيه المجتمعات اليوني سيكس دي تلاقيها دايماً سيكشوالي أوريِنتيد! وفي النهاية ما تاخدش منهم غير الكلام

وعلى ذكر أغنية حمادة هلال... شفت تصويرها؟ اللي كان نازل بدبابة من الكتيبة للبنت بتاعته في عيد ميلادها! فكرني بموقف حصل زمان...

بعد صلاة الجمعة أيام الكلية... خرجت الشلة بتاعتنا ، نتمشى شوية في ميت غمر. قابلنا أحمد رمضان (واحد صاحبنا طيب موووووووت). وكان معانا مجدي (كان ساعتها في الكلية الحربية) ، وعمر (في كلية التجارة).

اللذيذ بأه... طلبت مع مجدي يشتغل الواد الغلبان ده ، وفي وسط الكلام سأل عمر مجدي : "إنتا ما جبتش الدبابة بتاعتك ليه المرّادي وانتا نازل أجازة؟" ، ومجدي يرد عليه : " وليه يا عم؟ هيقوللك نازل بالدبابة بتاعته يتمنظر بيها أدام البنات ، وانتا عارف الناس اللي هنا ، بياخدوا بالمظاهر!".

وأحمد حاول يتذاكى شوية ف الأول : "يا سلام؟ إنتا عندك دبابة؟ إنتو بتضحكوا عليّا" ، ومجدي يرد بكل جديّة : "إنتا ما تعرفش ولاّ إيه؟ هيه مش بتاعتي طبعاً ، إنتا عبيط؟ بس بامضي باستلامها ، وبتبقى عهدتي ، وانا حر أروح بيها زي مانا عاوز ، بس ادفع أنا البنزين على حسابي"!

اللذيذ إن أحمد رمضان اقتنع ، وقعد يتحايل على مجدي يجيبها الأجازة اللي بعدها ، وياخدوا بيها لفّة ونتمشى بيها على شارع البحر. وطبعاً مجدي سايق التقل ع الآخر ، ومش هينفع يااحمد ، وهيقولوا باتمنظر ، وأصل الأسفلت هنا مش كويس ، والجنزير بتاع الدبابة ممكن يبهدله ، وهيعملولي مشاكل! طيب لفّة واحدة؟ طيب نركبها شوية من غير ما تمشي حتى!

هاهاهاهاها ... دماااااغ! :D

عموماً ... أنا يشرفني يا باشا بجد إني أتعرّف بيك بيرسونالي ، مش بس فيرشوالي. وفي انتظار المناسبة اللي نتقابل فيها...

تحياتي لك

تم تعديل 21 أغسطس 2008 بواسطة moheltohamy

[Phoenician]

تسجيل إعجاب و متابعة يا دوك .... يا مانفسي اقدر اكتب تجربتي فتورونتو بس مش حتكون بنفس الطعامة دي.. ايه رايك اديك انا الافكار وانتا عليك السيناريو و الحوار و الاخراج؟ ألف تحية

[Phoenician]

تأكيدا لكلامك يا دوك كنت انا ومراتي عايزين نعدي طريق شيبارد عند تقاطع ليسلي والاشارة قفلت و العربيات وقفت واحدة من العربيات سايقاها بنت زي القمر فقلت لمراتي واحنا بنعدي بصي العربية دي شبه عربيتنا بالظبط وبصي الامورة اللي سيقاها.... لقيت البنت بتبصلنا وراحت فاتحة القزاز وقعدت تعتزر i'm so sorry و حتعيط

انا بصراحة استغربت اتاري الاشارة قفلت وهي مش واخده بالها و بوز العربية بقى فوق ممر المشاة اللي المفروض اننا بنمشي عليه و احنا طبعا مش واخدين فبالنا و كنا حنلف من ورا العربية زي ما بنعمل في بلادنا وهي افتكرت اني ببص عالعربية مستنكرا وقفتها الرعناء

[moheltohamy]

تأكيدا لكلامك يا دوك كنت انا ومراتي عايزين نعدي طريق شيبارد عند تقاطع ليسلي والاشارة قفلت و العربيات وقفت واحدة من العربيات سايقاها بنت زي القمر فقلت لمراتي واحنا بنعدي بصي العربية دي شبه عربيتنا بالظبط وبصي الامورة اللي سيقاها.... لقيت البنت بتبصلنا وراحت فاتحة القزاز وقعدت تعتزر i'm so sorry و حتعيط

انا بصراحة استغربت اتاري الاشارة قفلت وهي مش واخده بالها و بوز العربية بقى فوق ممر المشاة اللي المفروض اننا بنمشي عليه و احنا طبعا مش واخدين فبالنا و كنا حنلف من ورا العربية زي ما بنعمل في بلادنا وهي افتكرت اني ببص عالعربية مستنكرا وقفتها الرعناء

هاهاهاهاهاها

هوه ده الكلام...

أنا مجمع كل مواقف السواقة والعربيات والمرور مع بعض...

دول عاوزين مجلّد لوحدهم!

لكن من وصفك للبنت ... رعناء مين يا راجل؟ دا يوشكَر ممر المشاه اللي خلّى الإزاز يتفتح :closedeyes:

[ramiesm]

تهامي باشا .. ازيك يا كبير والله من زمان وانا مفتقد اللمة الحلوة وكلامك الجامد :wub: بس الشغل الله يحرقه .. يا دوك انت مش بتعدي على راس تنورة و انت في السعودية ؟؟

بجد لو انت بتيجيها أو قريب منها قوللي و نتعرف و والله نعزمك على أكلة سمك اسكندراني أصلي مش هتلاقيها في كندا اللتى في خاطري وفي فمي wst::

[moheltohamy]

تهامي باشا .. ازيك يا كبير والله من زمان وانا مفتقد اللمة الحلوة وكلامك الجامد :D بس الشغل الله يحرقه .. يا دوك انت مش بتعدي على راس تنورة و انت في السعودية ؟؟

بجد لو انت بتيجيها أو قريب منها قوللي و نتعرف و والله نعزمك على أكلة سمك اسكندراني أصلي مش هتلاقيها في كندا اللتى في خاطري وفي فمي :P

والله يا ramiesm مش عارف اقول لك إيه؟

بس هوه أنا مش ف السعودية! أو ما يُعتبرش ف السعودية!

إحنا يا باشا ف وسط الميه!والميّه زيّها زي أي ميّه ؛ بحر احمر ، بحر اخضر... آهو كله بحر!

ما بنحسش إننا ف السعودية غير في يومين الوصول والنزول! :wub:

وفيه بريمة واحدة هيه اللي الكرو بتاعها رايحين جايين على مطار الهليكوبتر في راس تنورة!

باقي الـ 3 براريم بيتعاملوا مع مطار تناقيب (Tanajib). وبالتالي يا باشا ، احنا بنمر مرور الكرام واحنا رايحين بأتوبيس الشركة من الفندق في الخبر إلي مطار تناجيب ، في طريقنا إلى البريمة!

وكان بودّي أكلة السمك الاسكندراني بصراحة ، بس نعمل إيه؟! مجبر أخاكَ! wst::

وشاكر ليك جداً العزومة. وخللي بالك ، عليك أكلة سمك... اتسجلت خلاص ، إن شالله حتى أطولها في كندا التي في خاطري وفي فمي smk:

[Virus]

سعادة مدير عموم صحة براريم الشرق الأوسط + ألبرتا..

منتحرمش من ردود حضرتك العالية قوي دي يافندم..وبالذات الحتة بتاعة الدبابات دي (شككتني إنك كنت ضارب حاجة مع عصير المانجة بس احنا ستر وغطا على بعض :P :P :P )

والله متتخيلش انت برضو بستنى ردوودك إزاي...وعندي تلاتين حوار عايز أرغي معاك فيه ..بس أنا هخلي عندي شوية دم وأركن شوية في حتة ناشفة لأني شايف الجماهير بتبصلي شذراً :P وعايزين يوقفوا عضويتي عشان مش مخليك تركز في الهاند أوفر وضيعت ساعة الصبحية (اللي بالي بالك دي) في حوار الموف والهم ده :D

يلا جدعنة مني هاسيهولكوا أهو..ده احنا كل ده لسه في البراريم ومدخلناش على ميت غمر وأيامها!!!

بس سؤال صغنن..أنت خدت الثانوية العامة من ميت غمر برضو؟ العسكرية؟ لو آه سنة كام بقى؟؟ لتكون كنت قاعد جنبي في الدكة وأنا مش واخد بالي :wub: wst:: smk:

تم تعديل 21 أغسطس 2008 بواسطة Virus

[Bustami]

في سؤال يا جدعان , صاحبي عمل دبلوم عالي بعد البكالوريس لمدة سنه وخد شهادة دبلوم عالي

عمل سنه بعد الدبلوم العالي للماجستير وخد شهادة الماجستير

لو قدم اوراقه وقال انه معاه ماجستير وخدوا شهاده الماجستير حيلاحظوا انه مدة الماجستير سنه واحدة بس

فهل من الضروري تكون دراسه الماجستير سنتين او هم حيفهموا ان الدبلوم العالي هو سنه اولى في الماجتسير

[moheltohamy]

على عُجالة كده أشكر الزملاء على مرورهم...

علاء شبانة - الباشدكتور - زملكاوي - المهاجر - دعاء - حمودي - جادوللي - د. أيمن كامل - حسيني...

وأنا يا باشمهندس محمد كنت دفعة ثانوية عامة 93 ، وأكيد ما كناش دفعة واحدة لأني كنت في تالتة خامس ، كان الفصل كلّه ميمات (محمدات على محمودات :sad: )! فلو كنت دفعتي كنت أكيد هتاخد بالك م الإسم!

وبالنسبة لأخينا البسطامي (ولا تزعل يا ريس) ...

مالهومش دعوة مدة الماجستير أد إيه... الكلام واضح.

معاك ماجستير ، ودرست 17 سنة؟ هتاخد الـ 25 نؤطة.

أنا لا ودّيت شهادة بعدد سنين الدراسة ، ولا غيره! وهمه في السفارة فاهمين كويّس كل شهادة تعني كام سنة دراسة!

تم تعديل 21 أغسطس 2008 بواسطة moheltohamy

[حسام يوسف]

مش عارف لو كان سؤالى هيبقى برة موضوع الهاند اوفر بتاعك يا دكتور تهامى

لكن اكتر حاجة قلقانى من كندا

الواحد ممكن يشتغل اية لحد ما المعادلة تتم

ونوصل لبر الامان؟

لو سؤالى خارج الموضوع

يبقى حقك علية

جو أون فى كلامك الجميل

اللى بيجمع بين الفايدة واللذاذة

[moheltohamy]

نقول تاني يا حسام بيه! ومش عارف ليه حاسس إني ... مستغرب!

والشغل موجود يا ريس... بس فين النفس؟! :blink:

بص يا سامح...

ف البداية هتضطر تقبل أي عمل (زي مندوب دعاية ، كاشيير ، ديليفري ، سواق تاكسي ، حارس أمن ، خدمة عملاء ع التليفون ، ... إلخ) ، إلى أن تكتسب الخبرة الكندية (كانيديان إكبيريانص) ، ودي مهمة عندهم بشكل مبالغ فيه!

ومشوارك هيطول لو كان تخصصك في الحاجات اللي محتاجة معادلة (محامي ، طبيب ، صيدلي ، مهندس). ساعتها ممكن ترجع تاني ، عشان ما تخسرش شغلك المضمون دخله ، مؤقتاً على ما تحضر نفسك لامتحان المعادلة لتخصصك.

أما لو كان ف الحاجات المعترف بيها عالمياً (الاستيراد والتصدير ، البترول ، تكنولوجيا المعلومات ، ... إلخ) ، فمن الممكن إن مشوارك ما يطولش أوي.

ولو فكرت تروح ألبرتا ؛ هناك فيه نقص ف العمالة عن أونتاريو ، وفرص الشغل أكتر.

[se_ Elsyed]

أولاً : لابد ان اعترف صراحة اني اول مرة منذ انضمامي لمنتدى اقرأ موضوع مكون من 20 صفحة مرة واحده لإني ملول وبأزهق بسرعة .... لكن الاسلوب الشيق والتلقائي للدكتور تهامي لجعل القاري يلتهم ما يكتبه حتى لو كان مُجلد

ثانياً : انا اشعر بالفخر واردد ان الدنيا لسه بخير في وجود امثال دكتور شامي وايهاب سالم ودكتور تهامي وكل من لا يبخل على احد معلومة ويبذل مجهود من غير ما حد يطلب منه ويحاول ينصح الاخرين ويحكي خبراته وتجاربه عشان الاخرين يستفيدوا

فتحيا لكل هؤلاء الاخيار والنبلاء ويارب نبقى ربعهم كده في العطاء وفعل الخير

[moheltohamy]

أولاً : لابد ان اعترف صراحة اني اول مرة منذ انضمامي لمنتدى اقرأ موضوع مكون من 20 صفحة مرة واحده لإني ملول وبأزهق بسرعة .... لكن الاسلوب الشيق والتلقائي للدكتور تهامي لجعل القاري يلتهم ما يكتبه حتى لو كان مُجلد

ثانياً : انا اشعر بالفخر واردد ان الدنيا لسه بخير في وجود امثال دكتور شامي وايهاب سالم ودكتور تهامي وكل من لا يبخل على احد معلومة ويبذل مجهود من غير ما حد يطلب منه ويحاول ينصح الاخرين ويحكي خبراته وتجاربه عشان الاخرين يستفيدوا

فتحيا لكل هؤلاء الاخيار والنبلاء ويارب نبقى ربعهم كده في العطاء وفعل الخير

I'm Flattered

والله أنا بجد سعيد بتشريفك الحدوتة بتاعتي (أو الأهوة بتاعتي - على رأي لولا ).

خصوصاً إنك مكتبة اسكندرية متنقلة لوحدك :happy:

وانا اللي من أشد المعجبين بأسلوبك ، وإن كان الممتع في أسلوبنا (أنا وانتا ود. الشامي) إنه زي حكاوي الأهاوي ، وعشان كده بتحس بالألفة وانتا بتقراه أو حتى بتكتبه.

أكرر شكري على زيارتك لتوبيكي ده ، ويا رب دايما أسعد برؤيتك على صفحاته.

تحياتي لك :ninja:

[moheltohamy]

شكراً دكتورتنا الرحالة...

وشكراً على تشجيعك د. قناوي (بس لو تبطّل تستخبى وتبُص من خرم الباب كده :ninja: )

ما ردّيشت عليا هناك على فكرة

ندخل بقة على 3 مواقف حصلولي هناك (عشان حسيني زعلان من تأخيري) ...

[moheltohamy]

أحكيلك شوية مواقف من ضمن فضايح أبو سعد ف الغُربة...

o أول يوم ليّا في كندا (أصيل ف الفضايح) ، لما رحنا على سكاربرو تاون سنتر ، عشان نطلّع السِن نَمبر... بعد ما خلّصنا وخارجين ، جبت شوية عصاير (مانا أصلي باعز السوائل بصراحة) . وطلعنا نشربهم بره ، ورميت الكانز في الباسكيت اللي بره المبنى. وبعدين اخدنا الصابواي ، وعلى يانج آند إجلنتون (ولا كنت اتخيل إني هاسكن ف الحتّة دي بعدين) ، عشان نخلّص شغل البنوك.

واحنا جوه البنك مع البنت بتاعت خدمة العملاء (TD CanadaTrust زي ما حكيتلك) ، وبنطلّع الأوراق والپاسپورات عشان يتفتح بيها الحساب... إز فجأتن... أن أن آاااااان... مش لاقي الپاسپور بتاعي!

واقعد أجيب دماغي يمين شمال... آخر حاجة استخدمته فيها وانا في سكاربرو تاون سنتر عشان السِن نَمبر. وبعدها دخلت الكاميرا على مشهد وانا بره المبني بارمي علبة العصير الفاضية في الباسكيت ، و وقف المشهد وانا باحُط الپاسپور على استاند أسمنت كده جمب الباسكيت عشان أعرف أفتحه كويّس!

وبقيت عاوز أضرب نفسي ميت جزمة! wst:: ما كنت رميتها على جمب ، أو حطيتها جمب أي حيطة وخلصنا! حبكت يعني الاحترام معايا أوي؟! ما بقالنا 30 سنة مهزّئين! أنا اللي أستاهل!

المهم ، اعتذرنا للست بتاعت البنك وخرجنا ، وخدنا الطريق العكسي ، من محطة إجلنتون الصابواي شمالاً لمحطة شيپارد ، وبدّلنا شرقاً لدون ميلز ، وطلعنا ركبنا أتوبيس 190 اللي كمّل بينا شرقاً حتى سكاربرو تاون سنتر. المشوار خد له ساعة ... ساعة محروق فيها دمّي ، وباتخيل العواقب اللي ممكن تجرالي مع ضياع الپاسپور! مفيش رجوع لمصر لغايت ما أطلّع بدل فاقد من القنصلية المصرية في مونتريال (والله أعلم ده هياخدله أد إيه) ، وطبعاً مفيش رجوع السعودية ؛ ع الأقل حالياً على ما الشركة تطلع فيزا تانية ليّا (وهمه كانوا محسسينّي بكم الوسايط والمجاملات عشان يطلعولي فيزت زيارة عمل 6 شهور متعددة السفرات – زيي زي أي خبير واستشاري أجنبي جاي زيارة يعمل عمليات في مستشفى السعودي الألماني مثلاً!).

رحت ع الاستاند الأسمنت ، نضيف و زي الفُل... فتحت الزبالة ، وقعدت أئلّب فيها ، طبعاً فيه تنضيف دوري للزبالة ، مش هيسيبو الحاجات تتكوّم جوه! (الله يخرب بيت النضافة) دخلت جوّه سألت السيكيوريتي أو الريسيپشن ، كان فيه راجل كنداوي كبير وكُبّارة كيداهوه... قلتله إني نسيت الپاسپور بتاعي بره جمب الباسكيت من ساعتين تلاتة ، ما عندكش فكرة أعمل إيه؟ الراجل بيقوللي پاسپور جنسيّته إيه؟ :sad: بيسألني وهوه بيمد إيده على جمب ، وطبعاً عنيّا وراسي داخلين ورا إيده ، وأول ما لمحت حاجة خضرا بتطلع أولتله هوه ده(That's it ، ودي طبعاً بخلاف الذاتس ات بتاعت عمارة كنج ويست wst:: )!

عارف لما تحس إنك خدت نَفَسَك بعد ما كنت خلاص روحك بتطلع؟! وفرحان جداً وأولتله (I love your country) ، والراجل ابتسم أوي ، وآللي (Always Remember This)! :happy: وخرجت من فرحتي سجدت لربنا شكراً أُدّام باب المبنى!

o وانا في مطار شارل دي جول (تاني مرة أروح فيها كندا – فبراير 2008) ، كنت آعد في حتة كده فيها كراسي ، لمحت محل بتاع سوفينيرز والحاجات الهجص اللي بتلائيها ف المنطقة الحرة في كل المطارات (خمور ، شوكولاتات ، سجاير ، سوفينيرز ، ...) ، أولت لما نروح نشتريلنا شويّت شوكولاتات ، من عندهم. ورحت واشتريت وانا لسه باتفسح ف المحل ده ، لئيت واحد أمريكي على ما يبدو جاي يئوللي اتفضل الپاسپور بتاعك! إتضح إني أومت م الحتة اللي كنت آعد فيها دي ، وسبت الپاسپور جمبي ع الكورسي واتلخمت بالهاند باج المتينة اللي شايلها! الراجل يظهر لمحني ماشي على أُدّام ، وهوه آيم يمشي لمح الپاسپور منسي ع الكرسي ، مشي ورايا ، لغاية ما شافني جوه المحل إياه! ضايع أنا!

تخيل لو كان الباسبور ضاع بجد... لا كنت هاعرف أكمّل طريقي لكندا ، ولا هاعرف أرجع مصر ، ولا هاعرف أدخل فرنسا! ويمكن اعمل زي الراجل اللي كنت قريت عنه إن موقفه القانوني مش معروف ، وقاعد مقيم في مطار في فرنسا ، وبقاله الحتّة بتاعته ف المطار ، ولا عارف يطلع أودّام ، ولا يرجع ورا! وبقى إحدى علامات المطار ، وفارش على أرض المطار ، وعامل له كوشوك ، والمسافرين الترانزيت بيروحوا يتصوّروا معاه!

ساعتها ، كنت – بكل بساطة – هاروح له ، وإتّاخِر شوية يا عم الحاج ، خدنا جمبك... وحصيرة الصيف واسعة :ninja:

[hosiny]

ايوه كده يا ارجع لتوبيكك

عايزينك معانا كده علي طول

بمناسبة الهاند باجات و الوزن

الهاند باج بتتوزن مع الشنط زي نظام السعودية و لا ملهمش دعوه بيها؟؟

يعني ممكن الواحد يترسها في الهاند باج ؟؟ ولا كله 25 كيلو؟؟؟

[moheltohamy]

ايوه كده يا ارجع لتوبيكك

عايزينك معانا كده علي طول

بمناسبة الهاند باجات و الوزن

الهاند باج بتتوزن مع الشنط زي نظام السعودية و لا ملهمش دعوه بيها؟؟

يعني ممكن الواحد يترسها في الهاند باج ؟؟ ولا كله 25 كيلو؟؟؟

كله على حسب خطوط الطيران يا ريّس.

والأكتر من كده ، بمزاج اللي ع الكاونتر بتاع الإير لاينز ف المطار.

والخطوط الأوروبية عموماً ليك شنطتين ، لا تزيد الواحدة عن 23 كجم ، والهاند باج على ما أذكر كانت 8 أو 12 كجم. عموماً دايماً اعمل تشيك ع الموقع بتاعهم ، وممكن تعمل كونفيرميشن بالتليفون مع المندوب بتاعهم ف المطار ؛ لأن ده اللي ممكن يتغابى عليك!

أنسخ لك الكلام من البريتيش إير وايز ، مانتو واخدين ع الدروس الخصوصية والهوم ديليفَري (مع إنك اتدعكت قبل كده ف الجيش!):

ده عشان الهاندباج:

وده عشان باقي الشنط:

وحاجة تانية ، خلّي بالك من مقاسات الشنط ، فيه أبعاد مكتوبة على مواقع الإير لاينز بأبعاد الشنط. ما تاخدش بكلام بيّاعين الشنط! معاك مازورتك ، والأبعاد موجودة ع النت ، وعقلك في راسك ، تعرف خلاصك!

وبالنسبة للهاند باج ، فيه عندهم ف المطار موديل للأوفرهيد لوكرز ، وده رعبني تاني مرة ع الإير فرانس لما كنت واخد هاند باج متروسة (زي مانتا ناوي تعمل) ، والواد جه للبنت ع الكاونتر وآل لها مش داخلة غير بالجمب! وراحت البنت تسأل مديرتها ممكن ولا لأ؟! والريّسة - الله يكرمها - آلتلها عادي!

مش عارف لو آلتلي مش عادي كنت هاعمل إيه! :ninja:

وخصوصاً إني عمر ما حد جه عبّرني مرة المطار ؛ لا سفر ولا عودة!

وتعرف إن مشكلتي... أنا أصلاً باحب اسافر بالهاند باج وشكراً! أنا مش رايح صحرا يا عم الحاج! واللي هالفعُه على أفايا ، ما أشتريه من هناك وننجز! بس اعمل إيه... تعليمات! ومنهم لله بأه اللي كانوا السبب!

ونفسي مرة بجد أسافر ؛ وإيدي في جيبي!

معاك فلوسك وكريديت كاردك في محفظتك ، وباسبورك وموبايلك ومطوتك في جيبك!

هتعوز إيه تاني؟!

تم تعديل 22 أغسطس 2008 بواسطة moheltohamy

[محمد عيسى]

و الله فكرتني بنفسي يا دكتور تهامي لاني سافرت كتير قبل كده منهم مرات بالهاند باج بس .. و سايب هدوم ليا في مصر باستخدمها في قعدتي هناك

و مره راجع بشنطه كبيره مفيهاش غير بدلتين اشتريتهم من مصر مع انني جاي بيها هاتقطع من كتر الأمانات اللي زمايلنا المصريين باعتينها معايا .. دا حتى واحد منهم باعت لابنه اللي في ثانوي جزمه اديداس .. آه و الله

طيب عارف انني بحضر شنطتي قبل ما اطلع المطار بساعتين .. لانه فعلا المهم محفظتك و جواز السفر .. و الباقي موجود في كل حته يعني اللي هاتاخده مش فارق و اللي هاتنساه برضه مش فارق .. تلفون صغير و انا نسيت كذا خلوه عندكم لحد ما اجي المره الجايه او اتصرفو فيه

أسوأ موقف اتعرضتله .. لما نزلت اتجوز و كنت نازل قبل الزواج بيومين (كنت كاتب كتابي قبلها بتلات شهور) .. انا مش متعود على لبس اي حاجه في ايدي سواء ساعات او دبله .. و موضوع الدبله في الامارات مش حساس زي مصر .. المهم اتفاجئ بعد نزول الطياره في مصر و استعدادي للخروج ان ايدي فاضيه و انني نسيت الدبله في الامارات .. طبعا اشتريت واحده تانيه و مراتي قفشت الموضوع و كانت حكاية .. بعد الزواج بيومين رحنا نقضي "اسبوع" العسل في اسكندريه .. نسيت الدبله في القاهره و اشتريت واحده تالته من الاسكندرية :ninja: :roseop: :happy:

اتشرفت بالحديث معاك يا دكتور محمد و على فكره انا كمان عندي 32 سنة

تم تعديل 23 أغسطس 2008 بواسطة محمد عيسى

[حسام يوسف]

يا دكتور تهامى

لا اعتقد انى وحدى الذى اتابع الهانداوفر بكل اهتمام

لكن حق زمالتنا داخل المنتدى

ولأنى أقدرك واحترمك وبعزك

ياريت تاخد اجازة لو فية امتحانات قريب

انا عارف كرم اخلاقك

وانك مش هتكسف حد

بس احنا برضة بنحبك ونحبلك الخير

اما لو مفيش امتحانات قريب فكونتينيو يا عم تهامى

تحياتى