كندا التي رأيتها :)

[moheltohamy]

نتكلم بقى على حدوتة الأكل الحلال...

هتلاقي في معظم السوبرماركتس الكبيرة زي دومينيون ونوفريلز وكانيديان سوبرستور (وبالأخص في المناطق اللي فيها عرب ومسلمين كتير) جناح كامل للأكل الحلال. وطبعاً عندك السوبرماركتس العربي والباكستاني والأفغاني هتلاقي عندهم اللحوم الحلال تاكل وانتا مطّمن...

كنت دايماً بادخل السوبر ماركتس – زي دومينيون اللي قدّام البيت – أدوّر على منتجات اللحوم والفراخ الحلال ، واللي أقدر أقوله إن في المحلات الكبيرة زي الكانيديان سوبرستور بيكون ليهم جناح مخصص للحوم والفراخ الحلال ، وده بيشرف عليه جزار مسلم تبعهم لو كانت اللحوم من إنتاجهم (في كالجاري الجزار ده ألماني مسلم) ، وبيتأكد إن عملية الدبح تمت وفق شروط الشريعة ، وتم غسل كافة معدات المجزر قبل بدء الدبح ، لتلافي أي بواقي سابقة من دبح خنازير. كل الليلة دي طبعاً عشان المصداقية وسمعة المكان. بالإضافة طبعاً للماركات الحلال المعروفة ، زي Maple Leaf مثلاً.

وهتلاقي برضه جناح للأكل الكوشر بتاع اليهود (Kosher) ، ودول زينا برضه لازم الدبح ، وذكر اسم الله عند الدبح ، وكمان بيكون في حضور أحد الحاخامات اللي بيصلّي عليها عشان البركة وكده يعني. وبالتالي – عشان صلاة أخينا ده – بتلاقي سعر اللحوم الكوشر ضعف أسعار اللحوم الحلال ، اللي هيّه أغلى أصلاً من اللحوم العادية! دول حتى لو ما لاقوش لحوم كوشر بيشتروا اللحوم الحلال بتاعتنا ، عشان هيه أقرب اللحوم لمواصفاتهم.

هتكتسب نوع جديد من الثقافات في كندا... ثقافة إنك تتعوّد تقرا المكونات لأي حاجة بتشتريها. وهتترحّم على مصر والشرق الأوسط اللي بتضرب إيدك في تلاجة اللحوم أو الفراخ ، تنتش لك كيس اللحمة المفرومة أو البرجر ، وترميه في العربية! هناك لازم تقرا كويّس المكونات بالكامل عشان فيه احتياطات كتير ، ومشتقات الخنزير والكحوليات متنطورة في مختلف أصناف الأكل! عيشة مرة!

أحكيلك على طريقة الدبح في المجازر هناك. سمعت أقاويل كتير الصراحة... فيه اللي يقول لك إن الفراخ هناك بتتدبح ، وده الإجراء الطبيعي معاهم ، وفيه اللي يقول لك بيكهربوهم قبل ما يدبحوهم ، بس انتا بالفعل ما بتشوفش الراس موجودة. يعني الأوقع إنها بتتدبح. وآخر كلام سمعته بالمناسبة من أكتر من مصدر إن الفراخ على مستوى كندا بالكامل بتتدبح ، لدرجة إن فيه أحد الشيوخ في مونتريال قال للناس كلوا أي نوعية فراخ تشوفوها ، ومش شرط تتقيّدوا بالأنواع الحلال ، لأن الدبح هوّه الطريقة الوحيدة اللي بيستعملوها مع الفراخ.

وبالنسبة للمواشي ، فبرضه سمعت أكتر من تفسير... الباشمهندس أشرف اللي معايا في البريمة وكان مقيم في كالجاري بيقوللي إنه حضر بنفسه دبح في مجزر هناك وشاف اللي بيحصل. وقاللي إن البقر بيمر في ممر طويل وضلمة ، وآخره فتحة فيها نور ، بتجري عليها البقرة ، وتخرّج راسها من الفتحة دي ، تقوم حاجة قافلة عليها ، و واحد واقف ماسك بندقية ينتشها طلقة مباشرة في دماغها ، قبل ما تتسحب على سير أوتوماتيك لواحد ماسك سكينة كهربائية طويلة بيغرسها في قلب البقرة ، وبيكمّل شق جسمها لنصّين ، ويتم نقلها على مراحل السلخ والتقطيع.

سمعت برضه واحد زميلنا أمريكي قاللي إن البقره بعد ما بتطلّع راسها من الفتحة دي بينزل عليها شاكوش بضربة قوية على دماغها تكسرها في أقل من ثانية ، تنهي معاناة البقرة فوراً ، وده طبعاً بهدف الرحمة بالحيوان وتقليل عذابه. بعدها مباشرةً بتدخل على قسم فيه ناس ماسكين مناشير كهربائية ضخمة بتفتح بطن البقرة ، وتزيل المصارين وكل الأحشاء بالبلاوي اللي فيها فوراً عشان ما تتسرّبش للحومها ، قبل ما تنتقل للقسم اللي بعده اللي بيسلخها ويزيل الجلد تماماً ، وبيتم قطع الراس ، وبيرموها (مالهاش استخدامات عندهم). فيه برضه آراء قليلة بتقول إنهم بيعتمدوا طريقة الدبح مع الأبقار في كندا ، بس دي مش عارف لها أصل أو مصدر واضح!

فيه مجزر إسلامي في جنوب كالجاري صاحبه واحد لبناني. المجزر اللي بالشكل ده عاوز له استثمار أقل واجب مليون دولار. المجزر ده ما بيستقبلش خنازير من الأساس ، وبيتعامل كما تنص الشريعة. بس بصفة عامة ، من حقك تشتري أي حيوان صاحي ، وتروح بنفسك أو بالاتفاق مع جزار تعرفه يدبحهولك في المجزر (تحت إشراف الطبيب البيطري طبعاً) ، وبالطريقة اللي ينص عليها دينك ، سواء كان في مجزر إسلامي أو غيره.

الواد ديبو في النقطة دي بيقول لي: كل واحد ماشي بدماغه ومقتنع ومرتاح للي بيعمله... فيه اللي بياكل أي حاجة إن شاللا حتى الخنزير ، وفيه اللي بياكل كل حاجة بس بيتجنب الخنزير ، وفيه اللي لازم تكون البقرة مدبوحة عشان ياكلها. وحتى الحلال فيه مستويات كمان ، وكل واحد بيبص للحلال بدماغه برضه! فيه ناس تشترط إن البقرة تندبح بس ، وفيه اللي يشترط يتسمّى عليها من جزار مسلم ، وفيه اللي بيشترط إن الدبح يكون بقطع الرقبة من الناحيتين (يعني يجيب الشريانين الكومون كاروتيد ، والوريدين الإكسترنال چاجيولار) ، وفيه اللي يشترط قطع الرقبة من الناحيتين ، بس ما يفصلش الفقرات العنقية أو يقطع الحبل الشوكي اللي فيهم ؛ آل يعني عشان الإشارات المخية تفضل شغالة لعضلات الجسم عشان تفضل تفرفر ، وبكده العضلات تعصر الدم ، وتفضي جسمها منه تماماً، وفيه ناس تقول لك الحلال مش بس ساعة الدبح ، دي لازم البقرة تكون طالعة من بيت عارف ربنا ، ومتربية حلال وعلفها حلال وكده! وفيه اللي ما ياكلش السمك ولا أي حاجة في مطاعم غير إسلامية عشان يمكن الجريل كان مطبوخ عليها من شوية لحمة خنزير ، ويمكن فيه فتفوتة بورك أو نقطة زيت بوركيّة لسّه لازقة فيها ، أو في الماسِك اللي بيقلّب بيه الاستيك ع الجريل! مش قلت لك كل واحد وليه دماغه؟!

نيجي للمطاعم الحلال...

هتلاقي الاختيار بينحصر في الأغلب بين المطاعم اللبنانية من عائلة Pita وأخواتها (شاورما وكبيبة شامي وكفتة وكده) ، والفلسطينية (زي چيروزاليم الأستاذ ، حلال صحيح غالباً ، بس القعدة هناك هيّه اللي مش حلال أوي إن جيت للحق!) ، ومطاعم الأفغان والباكستانيين والإيرانيين والأتراك ، وفيه مطاعم صيني وهندي حلال (أفتكر إن فيه مطعم صيني حلال في شيبارد إيست مع آلان رود Chinese Halal Beef Lamb House ، حتى حاطط صورة الكعبة ع الباب).

هتشوف برضه عربيات هوت دوج كتيرة في الشارع كاتبة من ضمن أنواع الهوت دوج والسوسيس اللي بيقدموها (هَلال بيف ، وهَلال تشيكين). وفيه سلاسل مطاعم معروفة إنها حلال ، زي باباي (Popeyes) ، وده عبارة عن سلسلة مطاعم زي كنتاكي فرايد تشيكن كده بس حلال ، وفروعة منتشرة في تورونتو كلها. وممكن نبقى نتكلم على الليلة دي في جزء المطاعم اللي هييجي دوره بعدين.

وطبعاً غني عن القول إن مطاعم ولاد عمّنا (اليهود سعادتك) ، أكلهم حلال وميت فل ، والشيطان ما بيعتبش عتبة مطاعمهم ، معظم مبادئهم في الحياة زينا على فكرة ، والدبح عندهم زي عندنا برضه زي ما قلتلك قبل كده ، وصلاة الحاخام بصفة عامة مش هتسمم لك الأكل ولا هتكهربه لمؤاخذة! يعني لو حبيت تدخل مطعم يهودي ، تدخل برجلك اليمين ، ولا يهمك أي حاجة.

دول يا راجل منشفينها على نفسهم أكتر مننا بمراحل ؛ فيه احتياطات عنيفة تجاه الزواحف والحشرات والكائنات البحرية اللي مالهاش زعانف وخياشيم ، والدم كمان فيه عندهم قوَلان لو كان خارج من اللحمة أو من السمك ، والدهون ، ولحم منطقة الفخذ ، والحيوانات المريضة! وعيشتهم مُرّة رسمي! يعني احنا كده منحلّين من وجهة نظرهم!

إيسكوت... مش عرفت لك سر الطاقية المنمنمة المستفزة اللي غاويين يلبسوها كلهم دي؟ كنت مرة في الصابواي ، وشفت واحد منهم قاعد جمب الباب ولابسها ، قعدت أتسحّب واتدحلب لغاية ما وقفت جمبه (وش واحد نازل المحطة الجاية) ، وقعدت أضرب عين من تحت لتحت ، وإز بي أفوجأ إن الأفندي مثبتها في شعره بتوكة! عارف تُوَك الشعر بتاعة البنات الياي الصفيح المبططة دي المقوّسة ، البيه مثبتها من الناحيتين في شعره بتوكتين من النوع ده! وانا اللي كنت فاكرها ماسكة بقوة شفط معيّنة! ما علينا!

طبعاً الواد ديبو ما لوش من ليلة المطاعم في كندا ، غير طقم المطاعم الحلال. وبالتالي بطنه حمضت من كتر أكل الشاورما ، خصوصاً والاختيار ضيق شوية في اللانش بريك (من 12 – 1 الضهر) ، مفيش غير مطعم Madina اللبناني في الفود كورت تحت الشغل (أكبر مول في العالم تحت الأرض ، واللي في الداون تاون تورونتو ، تحت مباني الفاينانشيال ديستريكت). ولما باخده وأروح مطعم من المطاعم الوحشين التانيين بيطلب سي فود ، حتى كان فيه مطعم برازيلي فاجر جمب البيت في تورونتو ، اتحرمت من عشواية محترمة فيه عشان البيه ما لقاش عندهم سي فود ، واضطرينا نتمشى لمطعم لبناني تاني على يانج استريت ما بين إجلنتون ودافيس فيل (مطعم اسمه تبوله) ، وغالي طحن ، كان المطعم البرازيلي برقبته الصراحة!

دا حتى كان المعتاد مع البيه كل ما أتصل بيه واقول له هناكل فين النهارده ، يقوللي إيه رأيك نديها طلعة ع الأفغاني ، لما خلاص أعلنت حركة التمرّد والعصيان... يادي النيلة ع الأفغاني وسنينه يا احمد ، هوّه الجدع ده مقرر علينا في المنهج؟ آه أكله طِعِم وزي الفل ما قلناش حاجة ، بس الرحمة حلوة برضه يا عم الحاج!

نتكلّم على مواقفي الشخصية مع المنتجات الحلال...

أفتكر مرة كنت في نوفريلز اللي قدام بيت إلما جستهاوس ، ودايخ على جناح الحلال ومش لاقيه ، ولفتت نظري واحدة ملامحها مصرية ولابسة حجاب ، قمت رايح لها وسألتها إنتي مسلمة. صح؟ ابتسمت وقالتلي أيوه ، قلتلها طيب أنا في عرضك تلحقيني بمكان الأكل الحلال ، وجت معايا لغاية الجناح بتاع الأكل الحلال ، وسابتني أتفرّج بقى...

كنت عاوز فراخ ولحوم حلال... الفراخ لقيت كل الموجود وراك ، وأنا وهند ما بناكُلش غير الصدور بس. بلاها فراخ يا سيدي خالص ، مش هاكل غصب عنى وراك. أروح على جناح اللحوم ، ومناظرها لا تسر عدو ولا حبيب ، ومليانة دهون وجلد وقرف ، عكس اللحوم العادية اللي من غير ختم الحلال على الكيس ، وحمرا وزي اللوز! بلاها لحوم يا سيدي ، وإن شاللا ما أكلنا بروتينات من أصله! وانا ماشي من المنطقة دي إز بي أفوجأ إن فيه علب لبن حلال! وكمان عشان تكمل بقى ألاقي فيه برضه البيض الحلال!

هنا بقى كنت جبت آخري... أنا أرفض أن يتم استعباطي تحت إسم الدين. حسيت إن البهوات يمكن مش فاهمين حتى إيه معنى البادچ اللي بيطبعوه ع العبوات ، بس الرسمة دي بتجيب طائفة كاملة من الزباين ، يبقى ليه ما نلعبش ع الوتر ده؟

أحاول أجيب تفسير منطقي للهلس والاستعباط الرسمي ده ، مفيش غير إن الراجل اللي بيحلب البقرة بيلبس جوانتي عشان ما يلمسش سدرها عشان عيب ، أو يمكن بيعيّنوا عاملات عشان يعني كشف العورة وكدهوت! وأكيد الديك كاتب كتابه شرعي يعني ع الفرخة قدام الكل ، وبالتالي البيض هيطلع بيض ابن حلال ، ولو جاب كتكوت يطلع معلوم النسب ، ومعروف أصله وفصله!

الغريب إن الواد ديبو لما اتكلّمت معاه في الليلة دي قعد يبرّرهالي... أو يحاول يبررهالي.

اللبن الحلال... ديبو أفندي شايف إنه هيكون حلال عشان مش هيكون فيه أي مكوّن من مكونات الخنزير على سبيل المثال! يعني هيكون متضاف عليه كريمة خنزير يعني يا ديبو؟ وسألت زميلة كندية في الموضوع ده ، قالتلي إن مفيش لبن أو أي نوع من منتجات ألبان الخنازير... مفيش حاجة اسمها كده أصلاً! اللبن بقري طبيعي وبيتبستر ، وما بيتضافش عليه أي حاجة.

طب والبيض الحلال يا احمد بيه... يقوللي إن ده معناه إن الأعلاف اللي بتتربي عليها الفراخ كلها من أصل نباتي ، ومفيهاش أي منتج حيواني سواء دم أو لحوم. ما هو لو فيها بروتين حيواني لرفع القيمة الغذائية للعلف فده معناه إن الفراخ بقت في عرف الشرع من الكواسر زي النسر والصقر ، ودي من ضمن المحرم أكلها (كل ذي مخلب و ناب). حيييلو أوي الكلام ده يابو حميد ، مش هاقول فيه نص كلمة ، رغم تحفظي على مبدأ الفرخة المتحولة دي بمجرد ما تأكّلها سندوتش لحمة مفرومة... فعلاً النسر مش هاكله ، بس مفيش حاجة تمنعني إني آكل بيضة النسر! والغريب إن العلف أبو سمك ودم مجفف ده موجود وزي الفل في مزارع الدواجن في مصر ، ومفيش آاااي مشكلة!

وأفتكر مرة كنت عند حسن اللبناني في لورانس إيست في سكاربرو ، كنت باجيب لحوم وفراخ حلال وكده ، ولمحت علبة برجر حلال... قلت يا واد اخزي الشيطان ، وليه تاكل حرام طالما فيه الحلال... مش مشكلة إن سعر العلبة حوالي 7 دولار ، والمعتاد إنها بتكون حوالي 3 دولار من غير البادچ إياه... فلوس إيه بس اللي هنتكلم فيها... باقول لكو حلال يا جدعان! رحت البيت ، وحمّرت لي كام برجراية ع الغدا في يوم أنا وهند... وكان أسوأ برجر آكله في حياتي! ولا كإنه برجر كلاب ميّتة! والنتيجة... الزبالة أولى بيه ، وكملنا الغدا مكرونة أورديحي!

توووبة... إنسى إني أفكّر أشتري من عينة الحلال دي تاني! ولو كانت باقي الماركات حرام ، يبقى ماله الحرام؟ زي الفل ، ولا نص كلمة!

إيسكوت... مش أخوك شرب مُنكَر؟

كنت مع الواد ديبو في نوفريلز ، وإذ بي ألمح إزازة شمبانيا. إلحق يا ديبو... همه بقوا بيبيعوا الواينز كده عادي في السوبر ماركتس؟! وأفوجأ إن الواد ديبو واخد له واحدة! طبعاً مش ديبو اللي يعملها ، أكيد بيتذاكى عليا ، أو فيه إنّ في الموضوع! والأفندي يقوللي دي Champanade ومكتوب عليها Zero Alcohol ، يعني م الآخر... عصير فاكهة! ولما شربتها لقيت طعمها... يع! يعني ناخد ذنب ، وما نتكيّفش ، ونعذب نفسنا بطعم مر كمان؟! الله يكون في عون اللي بيسكروا بصراحة!

لما حكيت لزميلة كندية ع الليلة دي قعدت تدحك عليا، وقالتلي إن الشامبانيد دي بيجيبوها للأطفال لما يكون بابا وماما نفسهم يحتفلوا بمناسبة مثلاً ، وعاوزين يشربوا شامبانيا في البيت ، فبيخلّوا الأولاد يشربوا نسخة الشامبانيا المعدّلة بتاعة الأطفال (تحت 18 سنة سعادتك!) ، عشان يحسوا بالمشاركة وكده يعني.

بالمناسبة صحيح... هناك لما تقرا كلمة White Wine Vinegar أو Red Wine Vinegar ما تتخضش ؛ ده معناه خل العنب الأبيض ، وخل العنب الأحمر... الدار أمان يعني!

نيجي بقى لتفسيرات اخواننا اياهم... واحد صاحبي دكتور بيطري كان بيقوللي إن الدبح ده أحسن طريقة عشان تتخلّص من الدم ، ويا سلام بقى مع انتفاضة البقرة بعد الدبح. انقباض العضلات ده بيدفع الدم على الأوردة ، وبالتالي بيتصفى خالص! طيب وإيه مشكلة الدم أصلاً يا عم الحاج؟ ماهو مهما سبت البقرة تصفي دمها ، لما تيجي تقطع اللحوم ، وتسيبها في الحوض هتلاقيها بتنزل دم برضه ، وطول مانتا سايبها هتجيب دم ، في البداية الدم بينزل من الأوعية الدموية داخل الأنسجة ، وبعد شوية بينزل دم كنتيجة لتحلل الأنسجة العضلية دي نفسها ، وتحرر الميوجلوبين منها! وهيه المشكلة في الهيموجلوبين بتاع الدم مثلاً ولاّ في الميوجلوبين بتاع العضلات؟!

ويحاول يقنعني إن الدم ده مليان بلاوي سودة ، زي ما أكون سمكري مثلاً ، وما اعرفش إن الدم ده زي الفل ، ولو كان بينقل نتائج الأيض الخلوي من الأنسجة ، فنفس المنتجات الجانبية دي (اللاكتيك أسيد واليوريا وغيرهم) موجودة داخل أنسجة العضلات (اللحمة) وبنفس التركيز.

ولاّ حكاية الأضحية اللي بتدعي للي بيدبحها... أمّال ليه بتفلفص ، وتترعب من الجزار وهوّه داخل عليها؟ لدرجة إن فيه خرفان يوم العيد بتنتحر من فوق أسطح البيوت لما بتشوف الجزار داخل عليها! ولاّ الأرنب اللي لمح أخوه وهوّه بيتدبح عندنا في البيت ، لما الست بتاعة الفراخ كانت بتدبحهم لنا في الحمام ، وجاتله حالة هيستيرية لما شاف السكينة! كنت في ابتدائي صحيح بس ما أنساش الموقف ده.

الكلام ده بيحصل مع الحيوانات مع إنهم ما بيكونوش شافوا دبح قبل كده ، ولا عارفين يعني إيه سكينة ، أو ده اللي احنا فاكرينه! مشكلتنا كبني البشر إننا فاكرين نفسنا الوحيدين اللي بنفهم في الكون ، وإن الحيوانات دي أغبيا ومش فاهمين أي حاجة! في الواقع ، إحنا بني البشر اللي أغبيا!

وعندك الجماعة بتوع الرفق بالحيوان ، دول معارضين تماماً لفكرة الذبح ، عشان مش شرط إن الحيوان يفقد الوعي تماماً في لحظة الدبح ، وبالتالي بيعاني لفترة! طب تخيّل نفسك مكان الحيوان ده ، وانتا داخل عليك كام جزار على كام واحد بيساعدوه ، وناس ملمومين حواليك ، ويربطوا رجليك ، ويقلبوك ع الأرض ، وينقضوا عليك ، ومانتاش عارف تفلفص... تعتقد هتشوف الجاموسة اللي في الموقف ده مبتسمة وسعيدة وبتدعيلك: روح إلهي ربنا يعمر بيتك يا راجل ، زي ما هتدبحني وتسيّح دمّي دلوقتي؟

بص يا ابني... من الآخر كده... الحياة قاسية و unfair أصلاً ، والموت هوّه الموت بطريقة أو بأخرى ، والكل بيتجنبه ، وبيهرب منه ، وكل ما تستطيعه هو تقليل الألم وتقصير زمن المعاناه!

والجزار المسلم اللي بينسى يسمّي قبل الدبح ، ونرجع نقول إسم الله على فم كل مسلم. طيب ماشي. واللحوم المستوردة من البرازيل والأرچنتين واستراليا ، واللي مطبوع عليها حلال... هل انتا فعلاً مقتنع إن كام ألف حيوان بيتدبحوا كل يوم في المجازر وفي دول غير إسلامية أصلاً ، وتقوللي كلهم بيتدبحوا بطريقة إسلامية تماماً؟ طب وهل اللي بيتدبح في مصر أصلاً تضمن إنه مدبوح بطريقة إسلامية؟ إديني عقلك يعني يا عم أحمد! أنا عندي تأكّلني لحمة نضيفة ومضمونة ومش مغشوشة ، ومش مدبوحة بإيد جزار مسلم ، عن إنك تأكلني لحم حيوان اتدبح عشان مريض بدل ما يخسروه ، أو لحم حمير مثلاً (وده مش حرام بالمناسبة) ، وتقوللي إن اللي دابحه جزار مسلم!

وأذكر إني قريت في كتاب الكبائر (للإمام شمس الدين الذهبي) إن كلب الصيد حلال أكل الحيوان اللي اصطاده ، رغم إنه بيخنقه لغاية ما يموت! طب ويا ترى الكلب هوّه اللي بيسمّي على فريسته برضه وهوّه بيخنقها؟! وأقرا برضه إنك لو نشنت على غزاله بسهم الصيد وماتت ، يبقى حلال تاكلها لو كان السهم انغرس فيها ، أما لو السهم لف في الهوا ، وخبطها بالجنب وماتت يبقى كده ما ينفعش وتصبح في حكم النطيحة تقريباً... دماغي لفت ، ومخي رافض الفكرة. فين القاعدة يا جماعة عشان نمشي عليها؟

المشكلة إن مخي بدأ يفكّر ، وبيرفض يقتنع بحاجات كتير! أنا مش هاناقش الآراء الفقهية طبعاً ، ولا أنا أهل للنقطة دي ، بس اللي صعب يدخل دماغي ، ببساطة مش هاعمله ، وهاتحمّل نتيجة عدم عمله لو كان واجب عليّا عمله. أنا مش هاتحمّل ذنب حد ، ولا هاتحاسب مكان حد، وكل واحد شايل ليلته. كل الموضوع بس إني قلت رأيي واللي أنا مقتنع بيه.

ولما جات السيرة بعد كده وافتكرت (أُحِلَّ لكم طعامُ أهل الكتاب)... همه دول مش أهل كتاب برضه؟ مش المفروض ديانة الغالبية في البلد دي هيه المسيحية؟ يبقى هاسمّي ع الأكل وآكل وانا مرتاح البال. لكن دماغ أحمد بقى إنو طالما فيه جزار مسلم في البلد اللي انتا فيها ، يبقى مالكش عذر عشان تكسّل تروح تشتري منه!

وطبعاً فيه ناس لازم تخنق نفسها ، زي واحد صاحبي يقوللي إن دول مش أهل الكتاب الأصليين ، وردّيت عليه إن دول همّه نفس أهل الكتاب الموجودين من أيام الرسول ، ومفيش حاجة اتغيّرت في ديانتهم ، وكان الرسول بياكل معاهم عادي خالص! واحد تاني يقوللي جبت منين إن أهل البلد معظمهم مسيحيين ، قلتله الإحصاءات الرسمية بتقول كده. يقوللي إحصاءات كاذبة ، هوّه انتا من ساعة ما جيت البلد فيه أي استمارة مضيت عليها بتسألك عن ديانتك؟ وجهة نظر برضه ، بس هيكون الغالبية إيه إن شاء الله؟ هندوس؟!

وكده ولاّ كده أنا مقتنع بإني هاسمّي على أي لحوم هاكلها وخلاص ، وضميري مرتاح تماماً وزي الفل! وبالتالي تلاقي الـــ (بسم الله أوّله وآخره) شغالة على طول معايا وأكتر من مرة في وسط الأكل ، لدرجة إني أفتكر مرة كنا في مطعم أنا واحمد ، وبيقوللي المطعم ده حلال على فكرة ، قلتله يا سلام يا واد يا ديبو... آهو كده الواحد يقدر ياكل وهوّه مطّمّن ، ومش مهم نسمّي بقى

نتكلّم شوية على البوحبوح اللي بنكرهه بصورة وراثية ، وبنخاف من كل ما يتعلّق بيه... الخنزير.

مبدئياً كده ، فيه شوية كلمات تحترس جداً لما تسمعهم... پورك Pork – هام Ham – بيكون Bacon – پيميل Peameal – سوسيس Sausage – لارد Lard – وفي آراء أخرى الچيلاتين Gelatin كمان.

البورك ده بصورة عامة هوه لحمة الخنزير الفريش ، والهام هيه اللحمة المحفوظة. وفيه ناس بتقول إن الهام ده عبارة عن لحمة الفخذ بتاعة الخنزير. والبيكون بيتاخد شرايح لحمة رقيقة زي اللانشون من منطقة دهون البطن ، واللي فيها نسبة عالية من الدهون ، وبالتالي بيكون طعمها حلو ، وغالباً بتتحمّر. بناكلها هنا الصبح ع الفطار في البريمة ، بس دي بقى بيف بيكون Beef Bacon ، وطعمها تحفة الصراحة. وبرضه كنت أكلت البايزون بيكون في كالجاري ، بس ده ما كانش متحمّر ، وطعمه... أممم ، مش وهم أوي! وهتلاحظه برضه على عربيات الهوت دوج ، وسط الدريسنجز والصوصات ، حاجات مبشورة لونها بني فاتح ، دي بيكون مفروم سعادتك ، عشان ما تاكلهاش وتقول محدّش قاللي.

البيبروني بيتزا (Pipperoni Pizza)... بيديك الإسم ده إيحاء بإنها عليها فلفل أخضر وكدهوت (Pepper)... لكن طلعت خودعة... الواقع إنك هتلاقي عليها شرايح لحم مستديرة منقطة أبيض زي ما تكون ترانشات لانشون صغيرة شوية... دي بورك سعادتك.

البيميل ده عبارة عن عرق زي عرق الفلتو كده بس لحمة خنزير ، متبّل ومن بره تشوف عليه طبقة من الذرة المطحونة. وساعات بيسمّوه كورن ميل ، برضه تخلّي بالك من الكلمة دي.

الچيلاتين بصورة عامة بيحضروه من غضاريف الخنازير ، ودي القاعدة العامة ، والاستثناء إنه يكون من أصل بقري أو من أصل نباتي. واللارد دي يا سيدي تبقى دهون أو شحوم الخنزير سعادتك ، يعني لما تقراها من ضمن المكونات تبقى عارف أصل الليلة.

والسوسيس بقى العادي بتاعه إنه لحمة خنزير ، والمعلومة دي أول واحد قالهالنا كان راجل إيراني واقف على عربية هوت دوج في الداون تاون تورونتو ، قال لنا إن 80% من السوسيس يبقى خنزير ، إلاّ إذا كان موضّح إنه بيف سوسيدچ ، بخلاف الهوت دوج اللي غالباً بقري. عموماً... مفيش مشكلة إنك تسأل دايماً ع السريع على أي حاجة بتاكلها وتتأكد إنها بيف.

مرة كنت في البيت ألاقي الواد ديبو بيتصل بيا ويقوللي إنتا عندك إنترنت كونيكشن مفتوحة دلوقتي؟ عايزك تشوفلي الرينيت ده إيه موقفه حلال ولاّ حرام؟ أصله لمح الإسم من ضمن مكوّنات نوع من الجبنة أو الدريسنج تقريباً ، والكلمة كان سمع عليها حوار قبل كده من حيث الحرام والحلال!

أدخل أشوف له على جوجل... يطلع إيه الرينيت (Rennet) ده يا أبو حميد؟ عارف إنزيم الرينين Rennin بتاع المعدة اللي في معدة صغار الحيوانات ، اللي بيجبّن اللبن بتاع الأم ، واللي الفلاّحين بيسمّوه المنفحة ، واللي بيستخدموها في تحضير الجبنة البيضا؟ هوه ده بقى الرينيت اللي كان واكل دماغ ديبو! من ضمن مكونات نوع من الجبنة شاف الرينيت ده ، وسألني على موقفة من الحُرمانية... عملت له سيرش ع النت لقيت كلام كتير يسد النفس ، عن إن معظم الرينيت من الخنزير ، والكل بيفِت في الحلل! لغاية ما قريت كلام لواحد دخل دماغي ؛ كان بيقول إن كل طائفة من الحيوانان ليها إنزيم الرينين بتاعها ، واللي بيجبّن (أو علمياً... بيخثّر) اللبن بتاعها ، وما بيعملش حاجة مع لبن غيرها... بمعنى... رينين الأبقار بيخثر لبن الأبقار ، وما لوش تأثير على لبن الماعز أصلاً. رينين الخرفان بيخثر لبن الخرفان ومالوش تأثير على ألبان الجمال مثلاً! وهكذا. وبالتالي ، ومن مُنطلق إن لبن الخنازير لا يُستخدم على نطاق تجاري ، فلا يوجد استخدام لرينيت الخنازير ، ونبطّل نوجع قلبنا بأه!

نتكلّم بقى على شوية فضايح عملناها في كندا...

أفتكر موقف كان حصل مع هند... كانت هند مع الواد ديبو وأحمد حامد وأسرته الصغيرة بيعملوا شوبنج من ديكسي مول في البوكسينج داي. راحوا الفود كورت ، والفريق بالكامل جاب بيتزا مارجريتا (خضروات وهلس يعني) ، وهند جابت بيبروني بيتزا. ديبو والجماعة كلهم يقولولها يا هند دي خنزير ، وهيه تقول لهم لأ ، أنا سألت الراجل (Is it meat?) وقاللي آه. يقنعوا فيها إنو كلمة لحمة دي كلمة عامة تشمل الخنزير والبيف وغيرهم... وهيه دماغها كده (إنتو إيش عرّفكم؟) ، وبتاكل باستمتاع! وديبو بيحكيلي بعدها ، ويقوللي إحنا اللي إيش عرّفنا؟ وهيه اللي ما بقالهاش شهرين على بعض ، وعارفة كل حاجة؟! خلاص يا ديبو ، يعني هيّه مش بتعاند معاكم... لماضة كالمعتاد ، مش أكتر.

كنت في كالجاري باضربلي واحد بايزون ستيك متين ، وقلت للبنت الويتريس الأستاذة تجيبلي سلطة بطاطس ، وكالمعتاد لازم الجملة الإفتتاحية في أي مطعم (I don't drink alcoholics. I don't eat pork or pork products) ، ودي خلاص عُلِم ويُنفذ ، وتقوللي (I'll double check with the chef). وألاقي جمب السلاطة فيه 3 أصناف جارنيش ؛ بصل أخضر مفروم ، وبلو تشيز صوص ، وقطع عيش صغيرة محمّرة. العيش كان طعمه حلو الصراحة ، بس مع تاني وتالت معلقة بدأت ألاحظ إنه بيشد! الفار ابتدا يلعب في عبّي ، وانتا عارف إن عبّي بيفهم ، ولما بيلعب ، بيكون فيه إن. كانت البنت مش باينة قدامي ، فندهت ع الواد البارتندر ، وسألته (Is it Pork?) ، والرد اللذيذ (Of course)! يا ولاد الكااالب! وأول ما شفتها ندهت عليها وقلتلها – وانا شايط طبعاً – (You should have told me that this is pork)! ودي تمسك في دراعي وتعتذرلي وتقوللي: أوه ، آم سوري ، هاو كان آي ميك إت أپ فور يو؟ (يعني بالفلاحي... لمؤاخزة يا أستاذ ، أنا آسفة ، أعوضك عن الغلطة دي إزاي؟) ، وأنا هاشيلها خالص ، وأجيبلك غيرها. قلتلها لا تشيلي ولا حاجة... مش مشكلة ، هاتصرف ، بس كان المفروض تنبهيني عشان أتجنبها! بس كلمة حق يابو حميد... إحم... طعمه كان حلو الصراحة!

ولما كنت في جنوب أفريقيا عشان الكورس الطبي بتاع الشركة ، كنا 3 دكاترة مسلمين من مصر و3 مسيحيين من نيچيريا والفلبين. طبعاً كانت ميا صاحبة الجستهاوس عارفة طلباتنا في الأكل اللي ناكله. في أيام التدريب الخارجي في شركة الإسعاف والمستشفى كنا بنرجع بالليل ، وبالتالي كانت بتعمل لنا أكياس اللانش باسكيت ناخدها معانا. من ضمنها سندوتشين لانشون رومي أو سلامي بقري. أخوك كان جعان في يوم ، وضربتلي قطمة جابت نص السندوتش. فاكر لما كان توم وچيري بيبلعوا ريقهم لما يقعوا في مصيبة؟ أنا بلعتها بالظبط كده... الطعم مريب كده ومش عاطفي بالمرة ، وكالعادة ، عِبّي اشتغل! أفتح السندوتش ، ألاقي شرايح لونها بمبى غامق شويتين (مش فاتح زي لحم الرومي) ، وفيها نقط بيضا! صباح القلق يعني! جيت أشمها من هنا يابو حميد... وكنت هاجيب اللي في بطني!

ولما رجعنا بالليل ، سألتها إنتي بتحطيلنا بورك في اللانش باسكيت يا ميا؟ قالتلي أنا باحطها لزمايلكو المسيحيين. عملت 3 تكياس بورك و3 رومي ، وحتى كنت باربط اللي فيهم البورك من فوق. قلتلها (والمفروض نفهمها لوحدنا يعني إن الاكياس المربوطة دي بورك؟ مش المفروض تقوليلنا على البروتوكول ده؟ ثم إن أنا وراجي جينا الفطار متأخرين ، ودول كانوا الكيسين المتبقيين). حاجة هم!

ومرّة كنت باتغدى مع الواد ديبو في الفود كورت في الداون تاون أثناء اللانش بريك بتاعته. رحت أجيب لنفسي الغدا بتاعي ، ولفت نظري محل اسمه تيرياكي حاجة كده ، وشكله يدّي على آسيوي. رحت أشوف المنيو لقيت عندهم تيرياكي تشيكين. قلت يبقى نجرّب الحاجة اللي على إسم المحل ، أكيد دي فيها الخلاصة. فراخ متحمّرة ، ومتلغوصة تيرياكي صوص. عملت دماغ أستاذة بصراحة يومها. المهم ، لما رجعت باحكي لهند على الفراخ الأستاذة دي ، لقيتها بتأكّد على كلامي ، وبتقوللي إنها حتى اشترت إزازة تيرياكي صوص في التلاجة. قلت طب ما نشوف المكونات كده... ألاقي من ضمنهم Wine... بالمفتشر كدهوه؟ ولا أدبا ولا حيات؟! وفتحت إزازة التيرياكي الأستاذة ، و ع الحوض ، وقلبي بيتقطّع!

ولما باسأل ديبو بعد كده (مش تقوللي يا بني آدم إن التيرياكي تشيكن دي فيها واين؟ دانتا شايفني رايح ع المحل قدام عينك)! قاللي إنتا اللي المفروض تسألني قبل ما تشتري ، أنا مش في دماغي ولا مركّز معاك أصلاً!

بس فيما بعد اكتشفت إن فيه أنواع من التيرياكي صوص ما بيكونش من مكوّناتها الواين. بس بصورة عامة ، إبعد عن أكل التيرياكي في المطاعم. مش هيعملوا الصوص مخصوص علشان حضرتك!

أفتكر موقفين في المطاعم على ذكر نقطة الصوص دي...

مرة كنت في المطعم الوحيد في كالجاري (والوحيد برضه في ألبيرتا على ما أعرف) اللي بيقدّم استيك الإلك. لمّا قلت للويتر إني ما ليش لا في الكحوليّات ولا في البورك ، قاللي آي ويل ضابل تشيك وذ ذا شيف. وبعد شوية جالي الشيف بنفسه وقاللي إن استيك الإلك بيتعمل بالريد واين Red Wine ، وأضاف (But I'll see what I can do). وألاقي الشيف مظبّطلي صوص مخصوص عشان يعجب جنابي ، ويمشي على مزاج حضرتي! و فعلاً... من كتر انبساطي من الإلك والصوص الفاجر اللي عمله الراجل مخصوص علشاني ، سبتلهم تبس بتاع 40 دولار ، وقلت للويتر إنتو محظوظين بوجود الشيف ده معاكم ، وبلّغ شكري للشيف.

مرة تانية أيّام إدمونتون ، رحت على نفس المطعم بتاع كالجاري ، عشان أضرب لي استيك الإلك إيّاه برضه! ألاقي ويتر تاني بيعتذر لي إن الإلك بيتعمل بالريد واين! ساعتها قلتله أنا مش خابطلي مشوار من إدمونتون لكالجاري (بتاع 300 كيلو) عشان تقوللي الكلمتين دول... ماليش دعوة... أنا جيت قبل كده ، وشيف تاني قام بالواجب! خللي الشيف يتصرّف (Please tell the chef to improvise)! زبون يا عم الحاج ومن حقي أتدلّع ، والزبون دايماً على حق!

مرة تانية كنت مع الواد ديبو في مطعم إيطالي شمال البيت في يانج آند إجلنتون ، ولما عجبني نوع من الاستيكات في المنيو ، سألت الويتر عن طريقة تحضيره ، وألاقيه بيقوللي ده بيتعمل بالريد واين! قلتله خلاص سك ع الطلب ده ، وهاخد غيره ، عشان دي حاجات ليها مرجعية دينية عندنا. الواد فهم وقاللي إنتو مسلمين. بس اللي أحب أقولهولكم إن أختي متجوزة لبناني مسلم وما بياكلش أي حاجة فيها كحوليات ، وأنا فاهم كويّس الكونسيبت اللي بتتكلموا عليه ده. بس أحب أقول لكم إن الريد واين بمجرد ما بتلمس الجريل ، الكحول اللي فيها بيتبخر تماماً ، وبيتبقى فيها خلاصة الفاكهة المركزة اللي في الواين ، وبتدّي الطعم والنكهة لقطعة الاستيك ، لكن مش هتلاقي أي أثر للكحول ، وأنا مسئول عن كلامي ده.

خللي بالك إن النظام هناك إن الويتر مالوش أي مصلحة إنه يخدعك ، ومش هيحاول أصلاً إنه يعملها على فكرة... مش من طباعهم خالص. أنا طبعاً كلام الواد منطقي ودخل دماغي ، وقلتله معلش المرة دي أنا مش مرتاح نفسياً ، بس أوعدك إني هافكر كويس أوي في كلامك ده ، ومش بعيد أعمله قريّب جداً gra:-

دي يمكن شوية الأخطاء اللي وقعنا فيها مع بدايات تواجدنا في الغرب ، عشان قلة المعلومات ، بس آديك عرفتها ع الجاهز... بيضة متقشرة... أي خدمة.

نيجي بقى للناس لما بتوصل لمرحلة الهوَس بالحلال! أو لو جازت التسمية ، ممكن نسمّيها الخنزيروفوبيا...

تشوف ناس باعتين على المواقع الدينية بتستفسر عن معاجين الأسنان الحلال ، وتلاقي فيه موقع بيعلن عن بعض أنواع معاجين الأسنان وسوائل المضمضة والغرغرة للفم والأسنان ، وبيؤكد إنها خالية من المنتجات الحيوانية زي منتجات الخنزير ، أو الكحول. طيب وإيه المشكلة إذا كنت هاغسل بيها سناني وأتخلّص منها وأغسل أسناني وأتمضمض بعدها أكتر من مرة؟!

تعرف إني في مصر كنت باجيب محلول للمضمضة بعد غسيل السنان من الصيدلية ، ولفت نظري إنهم كاتبين ع العلبة من برّة خالي من الكحول ، فسألت الصيدلي على الكلمة دي ، مع وجود علب تانية مش مكتوب عليها ، فقاللي إن الشركة دي بتطبع الكلمتين دول عشان يمشوا سوقهم ، بس بصورة عامة... كل سوائل غسيل الفم فيها كحول!

وعشان المسخرة تكمل... أشوف من ضمن لستة الممنوعات... آيس كريم الفانيليا! ليه بقى يا سيدي؟ أصل الفانيليا دي بيتم استخلاصها وحفظها باستخدام الكحول كمادة حافظة ، يبقى ممنوع تناول الآيس كريم الفانيليا عشان نقطة الكحول اللي ممكن تكون دخلت في الآيس كريم!

لما كلّمت الباشمهندس أشرف الكامباني مان بتاع أرامكو السعودية (اللي كان ساكن في كالجاري) ، ودلوقتي سعادتك في سنة رابعة زراعة القاهرة (غاوي تعليم الراجل ده!) ، لقيته بيقوللي إن عادي جداً إنك تلاقي الكحول بيدخل كمادة حافظة في تحضير حاجات كتير ، بس مع إعادة استخدامه ، بيتم إزالة الكحول ده. والمفروض برضه إن الكحول ده مادة متطايرة ، يعني لو سبته مكشوف للهوا شوية ، هيتبخر. صباح الفل يعني!

وما زال فيه ناس شايفة إن استخدام الپارفانات حرام ، عشان بتحتوي على نسبة عالية من الكحول ، والكحول حرام! طيب يا سيدي أنا مش هاشربه ، ده بيترش ع الهدوم ويمكن نسبة منه بتلمس الجلد. ألاقيه يرد عليّا إن النسبة اللي بتيجي ع الجلد دي مش هتوصل نسبة منها للدم ، ولو كانت واحد في المليون؟ قلتله لو على واحد في المليون يبقى ممكن. يرد عليّا: يبقى ما كان كثيره مُسْكِر فقليله حرام! طب ما انا يا سيدي باستخدم الكحول في تطهير جروح العيّانين ، يقوللي ربنا ما يحرّمش حاجة وتلاقي ليها فايدة ، مسيركم بعد سنين هتكتشفوا بلاوي بيسببها الكحول!

واحد صاحبي أيام ما كان في مونتريال كان مقيم مع واحد من الناس الفاناتيك (Fanatic) دول (بتوع الخنزيروفوبيا) ، ولقاه ماسك كيس العيش وبيدوّر في المكونات المكتوبة ع الكيس. بتعمل إيه يا عم الحاج؟ باشوف نوع الزيوت المستخدمة في تصنيع العيش ده!

مرة تانية شافه ماسك صابونة وبيقرا مكوناتها ، ولمّا سأله قال له باتأكد إن الزيوت المصنوعة منها الصابونة دي ما فيهاش منتج للخنزير!

وعندك كمان الدو (Dough) أو العجين للعيش وللبيتزا مثلاً ، واللي بيتضاف عليه مونو وداي جليسرايدز كمحسنات للخبيز. المواد دي ممكن تكون دخلت في سلسلة تصنيعها چيلاتين أو مواد مشتقة من الخنزير! وحتى لو فيها مكون من مكونات الفراخ هتلاقي اللي يقول لك طيب وهيه الفراخ اللي أخدنا منها المكونات دي كانت في الأصل مدبوحة حلال ولاّ لأ؟ وكمان بيقولولك إن ماكدونالك كان زمان بيقلي السمك الفيليه بتاعه في نفس الزيت اللي بيقلي فيه الفراخ اللي مش حلال ، وبالتالي الزيت اللي في القلاّية اتلوّث ، والسمك ما بقاش حلال بالمنظر ده!

كده كتير بصراحة ، والعيشة بقت مُرّة بالمنظر ده إن جيت للحق!

ولو فتحنا في حدوتة الچيلاتين وبيدخل في إيه ، هتلاقيه بيدخل في حاجات كتيرة أوي ، من الحلويات بتاعة الأطفال ، لمساحيق الغسيل للأقمسة الرقيقة من الأصواف والحرير لحمايتها وحماية البشرة من تأثير الكيماويات المستخدمة في مساحيق الغسيل (الـــ Surfactant بالتحديد) ، وأحياناً العملات الورقية لحمايتها من البلل والرطوبة وتأثير الشمس عشان يطيل عمر تداولها ، و ورق الكربون اللي منه فيه ده بتاع الفواتير ، وعيدان الكبريت (أعواد الثقاب بالفصيح) ، ونيجاتيفات أفلام التصوير ، ... إلخ!

وخد عندك بقى يا معلّم... الچيلاتين واللي 99% منه بيتصنع من الخنزير في الغرب ، هوه أساس تصنيع الكبسولات بنوعيها (العادية والرخوة) ، بنوعين الچيلاتين (Soft & Hard Gelatin)! يعني أي كبسولات دوائية هتاخدها سعادتك هتكون مصنوعة من الچيلاتين ، والأقراص كمان بيدخل فيها الچيلاتين كمادة مخفِفة وجامعة (Diluent & Binder) قبل عملية كبس الأقراص. بلاها علاج بقى عشان السادة الفاناتيك يرتاحوا!

فيه صحيح نوع تاني من الچيلاتين بيكون مصنوع من مصادر نباتية ، بس ده بيُصنع بالطلب ، ومش منتشر على نطاق واسع في كندا.

ولك أن تتساءل إن كان الچيلاتين المصنوعة منه الأدوية في مصر من مصدر بقري ، أو هيكون كما أتوقع مستورد من الخارج كمادة خام لمصانعنا اللي كل دورها هو تعبئة وتجميع الأدوية فقط.

طيب وفيه حاجة كمان... جلد الخنزير بيدخل في تصنيع الچواكت الجلد بالإضافة طبعاً للجلود البقري والضاني والماعز. تخيّل لو انتا لابس چاكيت من جلد الخنزير ، وجه واحد صاحبك يسألك على نوعية الجلد ، وقلتله ده جلد خنزير... لك أن تتخيّل نظرة الامتعاض على وشه طبعاً! دا فيه موقع كان بيولول على الچواكت والأحذية اللي مصنوعة من جلد الخنزير ، وكم من مساجدنا ينتشر فيها الـــ Najas على حد تعبيره ، ويا ترى هل ستُقبَل صلاة الناس دي ولاّ لأ! والأحذية اللي من جلود الخنزير ، وحتى الچواكت والأحذية من الجلود التانية ممكن تكون البطانة بتاعتها أو فرش الجزمة من جوّه مصنوع من جلد الخنزير عشان أرخص! والمفروض تسأل البائع عن نوعية الجلد ، وكمان أطلب منه الدليل على كلامه ، وما تصدقوش ببساطة كده!

المشكلة يابو حميد في خلفيتنا الثقافية والدينية إن الخنزير ده كائن قذر بيتغذى على الفضلات والقمامة ، وملئ بمختلف أمراض الدنيا! على حين إن الخنزير في مزارع كندا – كما رأيته على التليفزيون الكندي – نضيف وزي الفل ويبقى هاين عليك تروح تبوسه ، ولون جلده وردي ، وعايش في مزارع وأماكن نضيفة يمكن تلت المصريين مش طايلينها! وبياكل أعلاف نقية ومحترمة ، ولحمته نضيفة وزي الفل ، ولا فيها أمراض ولا يحزنون! صحيح إن الخنزير ناقل لدودة التينيا سوليام (لو أصابه المرض) ، زي ما البقر بينقل التينيا ساچيناتا (لو أصابه المرض). الخنزير عايش في مقالب الزبالة ، زي ما الخرفان والمعيز عايشين برضه على الزبالة في بلدنا! أنا باحاول على فكرة ما أكرهش الخنزير كحيوان مالوش ذنب إنه اتخلق خنزير. ديني بيحرّمه ، فببساطة مش هاكل لحمه. ومش محتاج أجيب مبرر لربنا عشان يحرّمه ، أو عشان أقنع نفسي بتحريمه! حلو وزي الفل وكل حاجة ، بس حرام. بكل بساطة ده كلام ربنا... يا تسمعه وتاخد الثواب ، يا ما تسمعوش وتتحمّل الوزر (Take it or leave it. It's that simple!).

ولو فتحت في الحنتفة في سكة الحلال دي يابو حميد مش هتخلص! أنا عن نفسي قلبت السكة دي ، وباتجنب لحوم الخنزير المعروفة ، والكحوليّات ، وباسمّي ع الأكل... وربنا يرحمنا برحمته.

[ناوية ع الهجرة]

دكتور تهامي بصراحة مش عارفة اقول لك ايه غير جزاك الله خيرا بصراحة موضوع الاكل الحلال ده مهم جدا

وانا حسيت ان فعلا العيشة مرة ومش سهل نشتري حاجة غير لما نتأكد من مكوناتها

بس موضوع الخنزير ده معاك حق فيه لأن الاية بتنص على تحريم لحم الخنزير وده طبعا للاكل اما اي استخدام تاني

اعتقد ما فيش فيه مشكلة

لكن برضه موضوع ان البقر بيضرب بالنار في راسه او بمطرقة يبقى كده حرام اكله لانه مش مدبوح

والايه اللي فيها التحريم بتقول

"حرمت عليكم الميتة والدم ولحم الخنزير وما اهل لغير الله به والمنخنقة والموقوذة والمتردية والنطيحة.........."الى اخر الاية

والموقوذة هي الميت بالضرب والمتردية هي الميتة بالسقوط من علو هذا والله اعلم

بس بصراحة موت من الضحك على موضوع اللبن والبيض الحلال ده بصراحة معاك حق ده استعباط واستغلال gra:- gra:-

ربنا ما يحرمنا من هانداوفراتك ابدا

[ابو رقية]

وبالنسبة للمواشي ، فبرضه سمعت أكتر من تفسير... الباشمهندس أشرف اللي معايا في البريمة وكان مقيم في كالجاري بيقوللي إنه حضر بنفسه دبح في مجزر هناك وشاف اللي بيحصل. وقاللي إن البقر بيمر في ممر طويل وضلمة ، وآخره فتحة فيها نور ، بتجري عليها البقرة ، وتخرّج راسها من الفتحة دي ، تقوم حاجة قافلة عليها ، و واحد واقف ماسك بندقية ينتشها طلقة مباشرة في دماغها ، قبل ما تتسحب على سير أوتوماتيك لواحد ماسك سكينة كهربائية طويلة بيغرسها في قلب البقرة ، وبيكمّل شق جسمها لنصّين ، ويتم نقلها على مراحل السلخ والتقطيع.

سمعت برضه واحد زميلنا أمريكي قاللي إن البقره بعد ما بتطلّع راسها من الفتحة دي بينزل عليها شاكوش بضربة قوية على دماغها تكسرها في أقل من ثانية ، تنهي معاناة البقرة فوراً ، وده طبعاً بهدف الرحمة بالحيوان وتقليل عذابه. بعدها مباشرةً بتدخل على قسم فيه ناس ماسكين مناشير كهربائية ضخمة بتفتح بطن البقرة ، وتزيل المصارين وكل الأحشاء بالبلاوي اللي فيها فوراً عشان ما تتسرّبش للحومها ، قبل ما تنتقل للقسم اللي بعده اللي بيسلخها ويزيل الجلد تماماً ، وبيتم قطع الراس ، وبيرموها (مالهاش استخدامات عندهم). فيه برضه آراء قليلة بتقول إنهم بيعتمدوا طريقة الدبح مع الأبقار في كندا ، بس دي مش عارف لها أصل أو مصدر واضح!

فيلم مرعب ياخوي يادكتور تهامي .. روعة في سرد ألموضوع وربنا يعطيك ألصحة ..

أخونا رامي ما زالت شهيته مفتوحة وألا لا ؟؟

تحياتي

[ramyfathalla]

والله يا أبو رقية يا أخويا شكل اللحوم يهبل عايز يتاكل حاف و حاجة تفتح النفس

طريقة العرض عليها عامل كبير ده الواحد شكله حايتخن لما يروح هناك ده لو ربنا كتبهالنا و رحنا قبل ما نطلع على المعاش

أما بالنسبة لموضوع الحلال و الحرام فأنا رأيى من رأى د/تهامى و م/ ايهاب سالم لو زنقت قوى و أنت مش متأكد من طريقة الذبح و خلافه سمى الله و كل بس من غير ما حد يستبعطنى على رأى د/تهامى

و أخيرا د/ تهامى ما لكش حل و ربنا يجازيك خير على كل المعلومات و الصور الجميلة دى و على وقتك و تعبك

شكرا شكرا شكرا شكرا شكرا

[hosiny]

الله عليك يا تو......بجد ابدعت المره دي يا كبير.....تفوقت على نفسك علي رأي المثقفين....و بهذه المناسبة و بحكم خبرتك....انا قابل عزومتك اول شهر لي في كندا علي حسابك في المطاعم اللي انت تختارها

[Safystar]

السلام عليكو

أستاذ ورئيس قسم يا ابنى

دة انا حاسة انى ماشية فى كندا وفى شوارعها وبأدخل السوبرماركتس وبأشترى كمان

بجد تغطية صحفية واعلامية هايلة

خدها نصيحة من اختك انت تسيبك من الطب خالص وتشتغل مراسل اعلامى لكندا فى قناة اعلامية محترمة

حصل مع هند... كانت هند مع الواد ديبو وأحمد حامد وأسرته الصغيرة بيعملوا شوبنج من ديكسي مول في البوكسينج داي. راحوا الفود كورت ، والفريق بالكامل جاب بيتزا مارجريتا (خضروات وهلس يعني) ، وهند جابت بيبروني بيتزا. ديبو والجماعة كلهم يقولولها يا هند دي خنزير ، وهيه تقول لهم لأ ، أنا سألت الراجل (Is it meat?) وقاللي آه. يقنعوا فيها إنو كلمة لحمة دي كلمة عامة تشمل الخنزير والبيف وغيرهم... وهيه دماغها كده (إنتو إيش عرّفكم؟) ، وبتاكل باستمتاع! وديبو بيحكيلي بعدها ، ويقوللي إحنا اللي إيش عرّفنا؟ وهيه اللي ما بقالهاش شهرين على بعض ، وعارفة كل حاجة؟! خلاص يا ديبو ، يعني هيّه مش بتعاند معاكم... لماضة كالمعتاد ، مش أكتر

بص بأه يا تهامى يا اخويا (وش دكتور هشام) :happy:

هند على حق وهى اللى صح مع احترامى للجميع

الببرونى موجود هنا فى كل انواع البيتزا تقريبا وطبعا فى بيتزا بتكون بس موزريلا وببرونى

انا باشترى الببرونى من السيف واى من مية سنة وبأحطه فى البيتزا اللى بأعملها فى البيت وانت عارف طبعا السعودية متشددة ومدققة اد ايه فى موضوع الحلال دة ولا يمكن هتسمح بحاجة فيها حتى مجرد شبهة والببرونى فى الاخر زيه زى اى لحمة يبقى ايه الحرام اللى فيه ؟! الا لو كانو هم هناك بيتعمدوا يدخلو فيه حاجة تانية اصفرة :rolleyes:

منور دايما وموفق يارب

فى انتظار البمزيد

صافى

[Pathfinder]

انا باشترى الببرونى من السيف واى من مية سنة وبأحطه فى البيتزا اللى بأعملها فى البيت وانت عارف طبعا السعودية متشددة ومدققة اد ايه فى موضوع الحلال دة ولا يمكن هتسمح بحاجة فيها حتى مجرد شبهة والببرونى فى الاخر زيه زى اى لحمة يبقى ايه الحرام اللى فيه ؟! الا لو كانو هم هناك بيتعمدوا يدخلو فيه حاجة تانية اصفرة

لا مش بيحطو حاجه ثانيه اصفره بس الببروني في السعودية مصنوع من اللحمه البقري انما في الدول الغير مسلمة بيبقى مصنوع من لحم الخنزير اللي المفروض انه حرام

الاستاذه ناويه على الهجره بتقول ان المحرم هو لحم الخنزير طب وباقي الاجزاء غير اللحم زي الشحم والجلد والامعاء حلال ولاحرام عشان الواحد يعرف بس وبالدليل لو سمحتو

[moheltohamy]

دكتور تهامي بصراحة مش عارفة اقول لك ايه غير جزاك الله خيرا بصراحة موضوع الاكل الحلال ده مهم جدا

وانا حسيت ان فعلا العيشة مرة ومش سهل نشتري حاجة غير لما نتأكد من مكوناتها

بس موضوع الخنزير ده معاك حق فيه لأن الاية بتنص على تحريم لحم الخنزير وده طبعا للاكل اما اي استخدام تاني

اعتقد ما فيش فيه مشكلة wst::

لكن برضه موضوع ان البقر بيضرب بالنار في راسه او بمطرقة يبقى كده حرام اكله لانه مش مدبوح

والايه اللي فيها التحريم بتقول

"حرمت عليكم الميتة والدم ولحم الخنزير وما اهل لغير الله به والمنخنقة والموقوذة والمتردية والنطيحة.........."الى اخر الاية

والموقوذة هي الميت بالضرب والمتردية هي الميتة بالسقوط من علو هذا والله اعلم

بس بصراحة موت من الضحك على موضوع اللبن والبيض الحلال ده بصراحة معاك حق ده استعباط واستغلال

ربنا ما يحرمنا من هانداوفراتك ابدا

والله يا فندم زي ما قلت ، ده هيكون سلوك مكتسب هتتعودي عليه ، إنك تقلبي كل كيس أو علبة وتقري المكونات قبل ما تشتريه!

عادي يعني.

وبالنسبة لحكاية البقر اللي بيتضرب على راسه ، أنا شايفها أرحم ميت مرة من الدبح... سواء بقى شايفينها حرام أو حلال... أنا قلت اللي عندي... أنا باسمّي وباكُل ، وعسى إن ربنا يتقبّل. بخلاف كده يا فندم ، تقدري تروحي أي سوبر ماركت أو جزار عربي أو باكستاني ، وتشتري لحوم حلال لو تحبي... وكل الاختيارات متاحة للجميع ، وكل واحد يختار اللي يناسبه!

أنا تقدروا تقولوا... فتحت مجالات للتفكير ، ولفتت نظركم لبعض الأخطاء اللي عملتها ، ونقلت لكم بعض الخبرات اللي عرفتها بالهارد واي...

وأتمنى أكون أفدتكم :lol:

[moheltohamy]

فيلم مرعب ياخوي يادكتور تهامي .. روعة في سرد ألموضوع وربنا يعطيك ألصحة ..

أخونا رامي ما زالت شهيته مفتوحة وألا لا ؟؟

تحياتي

مش قلتلكم الحياة قاسية ، وما بترحمش؟ wst::

نحمد ربنا إننا ما اتخلقناش بقر :lol:

[moheltohamy]

والله يا أبو رقية يا أخويا شكل اللحوم يهبل عايز يتاكل حاف و حاجة تفتح النفس

طريقة العرض عليها عامل كبير ده الواحد شكله حايتخن لما يروح هناك ده لو ربنا كتبهالنا و رحنا قبل ما نطلع على المعاش

أما بالنسبة لموضوع الحلال و الحرام فأنا رأيى من رأى د/تهامى و م/ ايهاب سالم لو زنقت قوى و أنت مش متأكد من طريقة الذبح و خلافه سمى الله و كل بس من غير ما حد يستبعطنى على رأى د/تهامى

و أخيرا د/ تهامى ما لكش حل و ربنا يجازيك خير على كل المعلومات و الصور الجميلة دى و على وقتك و تعبك

شكرا شكرا شكرا شكرا شكرا

تسلم يا رامي ، وربنا يجمّعنا على خير

وكده عرفنا مين هييجي معانا المطاعم الحرام الوحشة :lol:

[moheltohamy]

الله عليك يا تو......بجد ابدعت المره دي يا كبير.....تفوقت على نفسك علي رأي المثقفين....و بهذه المناسبة و بحكم خبرتك....انا قابل عزومتك اول شهر لي في كندا علي حسابك في المطاعم اللي انت تختارها

بس احنا مطاعمنا حرام يا أستاذ حسيني

منوّر يا عم حسيني ، وما اتأخرتش زي ما سوسو دايماً بتقول :lol:

[moheltohamy]

السلام عليكو

أستاذ ورئيس قسم يا ابنى

دة انا حاسة انى ماشية فى كندا وفى شوارعها وبأدخل السوبرماركتس وبأشترى كمان

بجد تغطية صحفية واعلامية هايلة

خدها نصيحة من اختك انت تسيبك من الطب خالص وتشتغل مراسل اعلامى لكندا فى قناة اعلامية محترمة

حصل مع هند... كانت هند مع الواد ديبو وأحمد حامد وأسرته الصغيرة بيعملوا شوبنج من ديكسي مول في البوكسينج داي. راحوا الفود كورت ، والفريق بالكامل جاب بيتزا مارجريتا (خضروات وهلس يعني) ، وهند جابت بيبروني بيتزا. ديبو والجماعة كلهم يقولولها يا هند دي خنزير ، وهيه تقول لهم لأ ، أنا سألت الراجل (Is it meat?) وقاللي آه. يقنعوا فيها إنو كلمة لحمة دي كلمة عامة تشمل الخنزير والبيف وغيرهم... وهيه دماغها كده (إنتو إيش عرّفكم؟) ، وبتاكل باستمتاع! وديبو بيحكيلي بعدها ، ويقوللي إحنا اللي إيش عرّفنا؟ وهيه اللي ما بقالهاش شهرين على بعض ، وعارفة كل حاجة؟! خلاص يا ديبو ، يعني هيّه مش بتعاند معاكم... لماضة كالمعتاد ، مش أكتر

بص بأه يا تهامى يا اخويا (وش دكتور هشام) wst::

هند على حق وهى اللى صح مع احترامى للجميع

الببرونى موجود هنا فى كل انواع البيتزا تقريبا وطبعا فى بيتزا بتكون بس موزريلا وببرونى

انا باشترى الببرونى من السيف واى من مية سنة وبأحطه فى البيتزا اللى بأعملها فى البيت وانت عارف طبعا السعودية متشددة ومدققة اد ايه فى موضوع الحلال دة ولا يمكن هتسمح بحاجة فيها حتى مجرد شبهة والببرونى فى الاخر زيه زى اى لحمة يبقى ايه الحرام اللى فيه ؟! الا لو كانو هم هناك بيتعمدوا يدخلو فيه حاجة تانية اصفرة :lol:

منور دايما وموفق يارب

فى انتظار المزيد

صافى

ربنا يخليكي يا فندم... ويا رب عن قريب تمسكي المايك شوية ، أو الربابة اللي مفيش غيري بيشتغل عليها :lol:

بالنسبة لنقطة الببروني... زيه زي السوسيس والبيكون... موجود في بلادنا ، ومصنوع من البيف ، بعكس الغرب ، واللي الأغلب فيه إنه بيكون من الخنزير. يعني ده القاعدة العامة ، وما خلافها يُعتبَر استثناء.

هتتكلفي سؤال بس قبل ما تشتري أو تطلبي (Is it beef or pork)؟ الحياة مش صعبة أوي يعني

[moheltohamy]

الاستاذه ناويه على الهجره بتقول ان المحرم هو لحم الخنزير طب وباقي الاجزاء غير اللحم زي الشحم والجلد والامعاء حلال ولاحرام عشان الواحد يعرف بس وبالدليل لو سمحتو

يا عزيزي نحن لسنا أهلاً للإفتاء... ولا أنا أقدر أفتي!

كل اللي كتبته كان آراء سمعتها ، وتعليقي عليها. وكل واحد ليه عقل يفكّر في الآراء ويعقلها ، وهوّه وحده اللي هيُحاسَب عليها. حتى آراء الفقهاء غير ملزمة لأي حد... وعلى رأي واحد حبيبي مختفي من زمااااااان... لا قدسية لرجال الدين!

أنا باسمع كل الآراء ، وآخد منها ما يتناسب مع قناعاتي الشخصية.

حكاية الدليل بقى ، ممكن تلاقيها في المنتديات الدينية ، وده مش هتلاقي كتير يفيدوك فيه على منتدانا هنا.

زي ما اتفقنا... كلها تجارب شخصية :lol:

[dcfarouk]

السلام عليكم

دكتور تهامي والله انا مشتاق اقابل حضرتك واتعرف بالشخصيه الجميله ديه

انا شاكر لحضرتك لتوضيح نقطه المنفحه

بس انا ناوي باذن الله اعمل موضوع عن الاكل الحلال وبجد ده اكتر موضوع خايف ابتدي فيه وكمان انا عاوزه يكون شامل

وخوفي ان اقع في غلطه اخالف بيها الشرع لاني لست علي علم ديني مما يترتب عليه انا ناس تاخد بكلامي فتكون سيئه جاريه بناء علي رائ خاطئ مني

ولما قريت موضوع حضرتك فعلا اكتشفت ان الموضوع كبير اوي ومتشعب

بس انا كنت عاوز اعقب علي موضوع الدبح ولا المطرقه علي راس البقره وكمان موضوع التسميه واللي ذي ما قلت حضرتك انه ممكن تاكل لحمه مدبوحه بالطريقه الاسلاميه من غير تسميه وانت تسمي عليها كبديل وموضوع الخنزير انه يبدو انه نظيف

بالنسبه للذبح فبت علميا انه اقل وسائل التعذيب للحيوان وذلك من خلال ابحاث اجريت في لندن من خلال قياس اشارات المخ ونشطها بعد الذبح او بعد القتل بالرصاص او المطرقه او اي وسيله اخري حيث وجد ان اشارات المخ تكون خامله في حاله الذبح وهو ما يوضح عدم شعور الحيوان بالالم كما يحدث في الحيوان او الانسان عند شعوره بالالم ولذلك عندما تقوم بذبح الحيوان فانه لا يشعر بالالم وانا كنت عاوز اقول ان الله ومن صفاته الرحمه ولذلك اي شئ امر الله به في باطنه الرحمه والفائده

فاي سنه سنها رسولنا الكريم لو طبقتها الي يوم الدين سوف تكون الافضل من اي بديل لها في اي عصر

مثال علي ذلك السواك من خشب الاراك الذي ثبت علميا انه افضل من الفرشاه للاسنان

ولكن لم تكن سنه القتال بالسيف او العيش في خيام

بالنسبه للحم الخنزير

انا عاوز حضرتك تشوف الفيديو ده من احد علماء الغرب وهو مش مسلم بينصح الناس متكلش لحم خنزير فيديو دقيقتين

http://www.youtube.com/watch?v=KoGhj9jukew

وذلك لان لحم الخنزير يحتوي سموم بطبيعته حتي لو كان ياكل من طبق واحد معانا وذلك لسرعه الجهاز الهضمي عنده وسرعه دوره الغذاء في جسم الخنزير والتفاصيل في الفيديو

اما موضوع الديدان اللي بتظهر من لحم الخنزير مع الكولا فانا مش متاكد منه وياريت لو حد جرب الموضوع ده

http://www.youtube.com/watch?v=6VWhzAktqZw

وايضا بخصوص الذبح وفوائد التسميه علي الذبيحه

الجزء الاول فيه كلام كتير

ندخل علي الجزء الثاني في الصميم

الجزء الثاني

http://www.youtube.com/watch?v=kcyJJeMtp-k

الجزء الثالث

http://www.youtube.com/watch?v=vj6910D4ATs

ارجو من حميع الاخوه تحري الاكل الحلال بقدر المستطاع ولازم تعرف انك هتتعب في الاول شويه وبعدين هتتعود

السلام عليكم

[Pathfinder]

الاستاذه ناويه على الهجره بتقول ان المحرم هو لحم الخنزير طب وباقي الاجزاء غير اللحم زي الشحم والجلد والامعاء حلال ولاحرام عشان الواحد يعرف بس وبالدليل لو سمحتو

يا عزيزي نحن لسنا أهلاً للإفتاء... ولا أنا أقدر أفتي!

كل اللي كتبته كان آراء سمعتها ، وتعليقي عليها. وكل واحد ليه عقل يفكّر في الآراء ويعقلها ، وهوّه وحده اللي هيُحاسَب عليها. حتى آراء الفقهاء غير ملزمة لأي حد... وعلى رأي واحد حبيبي مختفي من زمااااااان... لا قدسية لرجال الدين!

أنا باسمع كل الآراء ، وآخد منها ما يتناسب مع قناعاتي الشخصية.

حكاية الدليل بقى ، ممكن تلاقيها في المنتديات الدينية ، وده مش هتلاقي كتير يفيدوك فيه على منتدانا هنا.

زي ما اتفقنا... كلها تجارب شخصية :happy:

طب ما الاستاذه قالت فتوى ومافيش حد كلمها

بس موضوع الخنزير ده معاك حق فيه لأن الاية بتنص على تحريم لحم الخنزير وده طبعا للاكل اما اي استخدام تاني

اعتقد ما فيش فيه مشكلة

عشان كده انا كنت حابب اعرف جابت الكلام ده منين عشان احنا كمان نستفيد

وانا عارف انك بتقول تجربتك الشخصية بس لما حد يعممها ويجيب ايات قرانيه عشان يثبت صحة الراي يبقى من حقنا نسأله جاب الكلام دا منين

مش كدا ولا ايه

[dcfarouk]

بلنسبه للجزء الخاص بالمنفحه

فكما ذكرت حضرتك يا دكتورنا

ل أشوف له على جوجل... يطلع إيه الرينيت (Rennet) ده يا أبو حميد؟ عارف إنزيم الرينين Rennin بتاع المعدة اللي في معدة صغار الحيوانات ، اللي بيجبّن اللبن بتاع الأم ، واللي الفلاّحين بيسمّوه المنفحة ، واللي بيستخدموها في تحضير الجبنة البيضا؟ هوه ده بقى الرينيت اللي كان واكل دماغ ديبو! من ضمن مكونات نوع من الجبنة شاف الرينيت ده ، وسألني على موقفة من الحُرمانية... عملت له سيرش ع النت لقيت كلام كتير يسد النفس ، عن إن معظم الرينيت من الخنزير ، والكل بيفِت في الحلل! لغاية ما قريت كلام لواحد دخل دماغي ؛ كان بيقول إن كل طائفة من الحيوانان ليها إنزيم الرينين بتاعها ، واللي بيجبّن (أو علمياً... بيخثّر) اللبن بتاعها ، وما بيعملش حاجة مع لبن غيرها... بمعنى... رينين الأبقار بيخثر لبن الأبقار ، وما لوش تأثير على لبن الماعز أصلاً. رينين الخرفان بيخثر لبن الخرفان ومالوش تأثير على ألبان الجمال مثلاً! وهكذا. وبالتالي ، ومن مُنطلق إن لبن الخنازير لا يُستخدم على نطاق تجاري ، فلا يوجد استخدام لرينيت الخنازير ، ونبطّل نوجع قلبنا بأه!

ولكن تبعا للبحث وما ليقته في موقع كليه الزراعه في مصر وكان موضوع طويل عريض عن المنفحه ولقيت الجزء ده

هل يستخدم الببسين المستخلص من معدة أى حيوان غير مجتر كالخنزير فى صناعة الجبن ؟

نعم يمكن أستخدام أنزيم الببسين من أى مصدر يتحصل علية منة قى صناعة الجبن . منتجات دوريتوس و تشيتوس المصنعة بطعم الجبنة يستخدم فيها جبنة أستعمل فى تصنيعها ببسين الخنزير و كذلك فأنهم فى الخارج يضيفون نسبة من ببسين الخنزير للمنفحة الحيوانية لأنة أكثر ثباتا و مقاومة للتحلل .

الموضوع نفسه وفيه معلومات عن المنفحه بصوره عامه

http://www.alexagri.com/forum/showthread.php?t=6941

وبالتالي فان المنفحه من الخنزير احيانا تستخدم ولكن انزيم البيبسين (واللي احيا ناس بتعتبره منفحه اصلا) اللي مستخرج من الخنزير بيضاف للمنفحه الحيوانيه العاديه لانه اكثر ثبات وبالتالي ممكن اكل جبن مكتوب عليه منفحه وطبعا اي جبن لازم يصنع بمنفحه ممكن تكون من خنزير الا لو اتكتب عليها منفحه حلال او منفحه من مصدر بكتيري مثلا او جبن حلال وطبعا ده في المحلات الحلال فقط

المشكله ان الخنزير منتجاته رخيصه جدا كلها وبالتالي اي شركه انتاج بتلاقي فرصه تستخدمه في اي خط انتاج بتستخدمه لانه موفر ليها جدا

بمعني اخر ممكن نخلص الي ان الجبن في الغرب لا تؤكل علي حد تحليلي الشخصي الا لو كانت حلال بتنويه واضح علي المنتج او توضيح خلو المنفحه من الخنزير

يعني تدخل في لسته انتظار منتج حلال وليس مفتوح الشراء منها زي اللحوم

[dcfarouk]

بس موضوع الخنزير ده معاك حق فيه لأن الاية بتنص على تحريم لحم الخنزير وده طبعا للاكل اما اي استخدام تاني

اعتقد ما فيش فيه مشكلة

معلومه خطأ

انا اسف اني اقول كده بس انا مقصدش اهانه

الخنزير حيوان نجس باجماع العلماء ولا يستخدم اي جزء منه باء صوره ولكي ان تعلمي انه جلد الجاموس او اي حيوان غير مذكي بمعني الغير مذبوح او المقتول يجوز عند بعض العلماء الاستفاده منه بعد دبغه لانه بالدباغه يطهر الجلد وبالتالي يجوز شراء جاكت جلد من الخارج الا اذا كان جلد كلب او خنزير

ولكن اي جلد لكلب لو خنزير لا يجوز باي صوره سواء مدبوغ او غير مدبوغ

والمصدر

الموقع ده في الاجابه الشافيه

http://www.fikhguide.com/node/173

وديه الخلاصه

4.جلد الخنزير

حكمه : مذاهب الأئمة الأربعة على أنه لا يطهر بالدباغ لأن نجاسته عينية والله تعالى وصفه بالرجس أي النجس فقال " أو لحم خنزير فإنه رجس " والضمير في "فإنه " يعود للخنزير بكل أجزائه لا للحم فقط.

الاصل اتباع جمهور العلماء

والموضوع بسيط ايه اللي يخلينا نزنق نفسنا في الخنزير في جلود تانيه كتير وانت مممكن تسال وانت بتشتري وهتعرف بسهوله

انا عاوز اقول حاجه بغض النظر عن اي نقاش في الاكل وانهي حرام وانهي حلال

لو انت سافرت لبلاد الغرب عشان تحسن حياتك وتنمي نفسك مفيش مشكله ولكن ان كان الضريبه انك ممكن تتنازل عن الاخره يبقي الحسبه خسرانه

واعتقد لو حد راح هناك واتساهل في الموضوع بتاع الاكل واللبس الحلال والحرام مش عارف انا بصراحه هيقول لربنا ايه يوم الحساب وانت كنت عايش في مصر بتاكل حلال وهاجرت للحرام

بصراحه موقف مش مضمون صح ولا لا

من الاخر انا هتبقي سياستي في الهجره اتقي الشبهات يعني اي حاجه اشك فيها اسيبها مش اي حاجه حرام بس لغايه ما اتاكد منها طيب واحد هيقول انت مجبر علي كده يعني هعيش من غير ومن غير ...... هقولك انت مكنتش مجبر لما سافرت بره لازم تستحمل شويه وتصبر انت مش هتهرب من حرام الفلوس في مصر والرشاوي والمحسوبيه والفساد الي حرام الاكل في كندا

[Safystar]

ربنا يخليكي يا فندم... ويا رب عن قريب تمسكي المايك شوية ، أو الربابة اللي مفيش غيري بيشتغل عليها

بالنسبة لنقطة الببروني... زيه زي السوسيس والبيكون... موجود في بلادنا ، ومصنوع من البيف ، بعكس الغرب ، واللي الأغلب فيه إنه بيكون من الخنزير. يعني ده القاعدة العامة ، وما خلافها يُعتبَر استثناء.

هتتكلفي سؤال بس قبل ما تشتري أو تطلبي (Is it beef or pork)؟ الحياة مش صعبة أوي يعني

بص انا فعلا شكلى مش هلاقى شغلانة هناك غير الربابة

اما مكانك فلا يمكن طبعا مكانك محفوظ و احنا تلامذة بنتعلم منك

ولو على السؤال بسيطة والحياة حلوة دايما ان شاء الله

صافى

[Safystar]

انا باشترى الببرونى من السيف واى من مية سنة وبأحطه فى البيتزا اللى بأعملها فى البيت وانت عارف طبعا السعودية متشددة ومدققة اد ايه فى موضوع الحلال دة ولا يمكن هتسمح بحاجة فيها حتى مجرد شبهة والببرونى فى الاخر زيه زى اى لحمة يبقى ايه الحرام اللى فيه ؟! الا لو كانو هم هناك بيتعمدوا يدخلو فيه حاجة تانية اصفرة

لا مش بيحطو حاجه ثانيه اصفره بس الببروني في السعودية مصنوع من اللحمه البقري انما في الدول الغير مسلمة بيبقى مصنوع من لحم الخنزير اللي المفروض انه حرام

علم يا فندم والف شكر وعموما زى ما تهامى بيقول كلها سؤال وزمان قالو اللى يسأل ما يتهوش

تحياتى

صافى

[Bassam El Sayed]

دكتور تهامي بصراحة مش عارفة اقول لك ايه غير جزاك الله خيرا بصراحة موضوع الاكل الحلال ده مهم جدا

وانا حسيت ان فعلا العيشة مرة ومش سهل نشتري حاجة غير لما نتأكد من مكوناتها

بس موضوع الخنزير ده معاك حق فيه لأن الاية بتنص على تحريم لحم الخنزير وده طبعا للاكل اما اي استخدام تاني

اعتقد ما فيش فيه مشكلة :lol:

لكن برضه موضوع ان البقر بيضرب بالنار في راسه او بمطرقة يبقى كده حرام اكله لانه مش مدبوح

والايه اللي فيها التحريم بتقول

"حرمت عليكم الميتة والدم ولحم الخنزير وما اهل لغير الله به والمنخنقة والموقوذة والمتردية والنطيحة.........."الى اخر الاية

والموقوذة هي الميت بالضرب والمتردية هي الميتة بالسقوط من علو هذا والله اعلم

بس بصراحة موت من الضحك على موضوع اللبن والبيض الحلال ده بصراحة معاك حق ده استعباط واستغلال

ربنا ما يحرمنا من هانداوفراتك ابدا :D

والله يا فندم زي ما قلت ، ده هيكون سلوك مكتسب هتتعودي عليه ، إنك تقلبي كل كيس أو علبة وتقري المكونات قبل ما تشتريه!

عادي يعني.

وبالنسبة لحكاية البقر اللي بيتضرب على راسه ، أنا شايفها أرحم ميت مرة من الدبح... سواء بقى شايفينها حرام أو حلال... أنا قلت اللي عندي... أنا باسمّي وباكُل ، وعسى إن ربنا يتقبّل. بخلاف كده يا فندم ، تقدري تروحي أي سوبر ماركت أو جزار عربي أو باكستاني ، وتشتري لحوم حلال لو تحبي... وكل الاختيارات متاحة للجميع ، وكل واحد يختار اللي يناسبه!

أنا تقدروا تقولوا... فتحت مجالات للتفكير ، ولفتت نظركم لبعض الأخطاء اللي عملتها ، ونقلت لكم بعض الخبرات اللي عرفتها بالهارد واي...

وأتمنى أكون أفدتكم bv:-

دكتور تهامى الاخت بتنصحك وجابت لك الاية واضحة من القران

بسم الله الرحمن الرحيم

حُرِّمَتْ عَلَيْكُمُ الْمَيْتَةُ وَالْدَّمُ وَلَحْمُ الْخِنْزِيرِ وَمَا أُهِلَّ لِغَيْرِ اللّهِ بِهِ وَالْمُنْخَنِقَةُ وَالْمَوْقُوذَةُ وَالْمُتَرَدِّيَةُ وَالنَّطِيحَةُ وَمَا أَكَلَ السَّبُعُ إِلاَّ مَا ذَكَّيْتُمْ وَمَا ذُبِحَ عَلَى النُّصُبِ وَأَن تَسْتَقْسِمُواْ بِالأَزْلاَمِ ذَلِكُمْ فِسْقٌ(3) " سورة المائدة

الموقودة هى أي حرم عليكم الموقوذة أي أكلها حرام وهي البهيمة الّتي ضربت بالعصا أو بشيء ثقيل حتّى ماتت من قوّة الألم فأكلها حرام ولو ذبحها لا يجعلها حلالا وكذلك البهيمة الّتي ضربت بالمطرقة على جبهتها أو رأسها لتدوخ وتقع على الأرض ليسهل عليهم ذبحها فإن وصلت إلى حدّ أنها فقدت الحركة الاختياريّة لأنّها صارت في ءاخر رمق وصارت حركتها كحركة المذبوح فهذه لا تحلّ لأنّها لو تُركت بدون ذبح لماتت أما إذا داخت من الضّرب وبقيت فيها حركة عاديّة اختياريّة فهذه إذا ذُبحت فالذبح يحلّها

لاقيت ردك رد غريب جدا جدا (( أنا شايفها أرحم ميت مرة من الدبح... سواء بقى شايفينها حرام أو حلال... أنا قلت اللي عندي... أنا باسمّي وباكُل ، وعسى إن ربنا يتقبّل)

وربنا هيتقبل ازاى اذا كان محرمها عليك اصلا فى نص صريح من القران يا دكتور اتقى الله وكن خير سفير للاسلام فى كندا . معلش انا عارف ناس كتير هتهاجمنى بسبب كلامى بس ردك استفزنى شوية

وانا من حقى انقدك