كندا التي رأيتها :)

[precanadian]

سالخير عليكم بالكندي

من أرض المخمخة والمزاج العنب الكنداوي... في أقصي الغرب الألبرتاوي ، و وسط الغابات الكندية

وأحب أطمنكم جميعاً إن المزاج العنب مستمر ، وهيستمر ، ويستمر ، ويستمر ....

قولوا ان شا الله :blush2:

بافكر أكتب للواد أحمد مراد هاند أوفر بجد من البراريم الكنداوية jmb-)

ولنا عودة إن شاء اللهtth:

يا تو يا شقي

ان شاء الله العنب ومزاجه يستمر علي طول يا باشا

بس شكلك عليت وعدتش بترد علي ال email زي صاحبك

ماش يا كنداوه بس لما اجيلكم

تحياتي

[Rock]

دكتور تهامي اللي مصيتنا في كندا كلها تحياااااااتي

قال اية ياخويا كانت قاعد بقرا في التوبيك بتاعك و كل يوم اصبر نفسي و اقول اهوة هانت خلاص و قربت اقفلة و وسط القراية الاقي ناس بتقول مثلا انهم خلصوا مية و حاجة صفحة و ابص الاقيني في الصفحة الحاجة سبعين دة طبعا بعد ما حضرتك ما ظبطت التوبيك bv:- و انا النهاردة كنت باحتفل بانة فاضلي 20 صفحة بس و الا الاقي حاجة غريبة ...التوبيك نط لفوق فقلت لنفسي اشوف اية اللي حصل و الاقي حضرتك نورت بيتك و مطرحك فقلت لازم اكتب اول مشاركة ليا في التوبيك بتاعك اللي ليا شهر ماخلصتهوش و اقول لحضرتك شرفتنا يا كبير و في انتظار المزيد...

بالمناسبة انا بحاول اكلم حضرتك من فرسخ من الزمان و حضرتك مابتردش علي لا هنا في الخاص بتاعك و لا علي الفيسبوك :unsure:

علي اي حال انا كنت عايز استشير حضرتك في شوية حاجات و صدقني كل مابص لنفسي و النيابة اللي انا مرمي فيها في المستشفي..اقول لنفسي لا اهوة تهامي باشا ملعلط اهوة و مشي الطريق لاخرة و اقول اصبر و كل يوم الحمد للة الدنيا بتحطني علي سكة الفرار و بصراحة انا ضارب الماجستير مية جزمة لدرجة انة رئيس القسم عرض عليا يدفعلي فلوس التقديم :lol: ... تخيل ماهو صراحة حاجة تفلق تخيل عايزين مني 1760 جنية وانا بقبض مش مكمل ال700 جنية

يالا ما علينا ربنا يكرمني و افك

تحياتي مرة تانية و ياريت تشارك عشان حضرتك بتدي باب كنداطعم و ريحة و لون ....

[hazemtara]

سالخير عليكم بالكندي

من أرض المخمخة والمزاج العنب الكنداوي... في أقصي الغرب الألبرتاوي ، و وسط الغابات الكندية

وأحب أطمنكم جميعاً إن المزاج العنب مستمر ، وهيستمر ، ويستمر ، ويستمر ....

قولوا ان شا الله :blush2:

بافكر أكتب للواد أحمد مراد هاند أوفر بجد من البراريم الكنداوية jmb-)

ولنا عودة إن شاء اللهtth:

الله يعافيك يا تُهامى يا أخوى

سؤال صُغنن أد راس النملى معكنن علىًَ عيشتى بخصوص مُدخلاتك الأخيرة

خير اللهم إجعلة خير كل صفحة موجود فيها أى مداخلة ليك الأن أجد لك كلمتين فى الأول صغيرين وبقية الصفحة أبيض يا ورد لمااااااا تنزل لتحت خالص على شوية حجات فى الجنب كدة مش عارف إية بالظبط على شخابيط تحت وفوق والصفحة كلها بيضة زى الفل؟؟؟!!!

يمكن علشان إنت تبع الإدارة وداخل فى زواريقهم فبيدوك حتة كبيرة تكتب فيها ؟؟؟؟!!!!:lol:

ولا الموضوع عيب تقنى وفنىwst::

[ahmedrady]

سؤال يادكتور تهامي يامشرف الجالية المصرية في كندا

المصاريف اللي الواحد ممكن يتحملها اول مايروح كندا لحد مايستقر ويلائي شغل كم ؟؟

مع العلم اني محاسب وشغال حاليا في الكويت يعني مش سهل اني ألائي شغل في كندا بسهولة في الاول

[ramyfathalla]

عزيزى د / تهامى كل سنة و أنت طيب و عيد سعيدعليك

نفسى أدخل المنتدى و ألاقيك عاملنا مفاجأة و رجعت تكتب تانى

بصراحة مفتقدينك قوى ووحشتنا قوى قوى

ربنا يوفقك فى حياتك الجديدة و يا ريت بس لو مداخلة صعنطوطةقوى تقولنا فيها أنا تمام و الحمدلله

[yassergaafar]

حبيبنا الغالى الدكتور محمد التهامى باشا

كل عام و أنت بخير و بصحة و سعادة

أدعو الله أن يحقق لك كل أمانيك و يوفقك

و أدعو الله أن لا يحرمنا من مداخلاتك التى أحببنا كل حرف فيها

[hijaz]

والله اشتقنا لك يا دكتور و اشتقنا ل حكاياتك

هيه كندا صعبه اوي كده ؟؟؟؟

يعني مافيش وقت ابدا ؟؟؟؟؟؟؟؟؟؟؟؟؟ :protest: :protest: :protest:

[suavemente]

بجد يا دكتور تهامى تسلم أيديك على الموضوع الجميل ده :clappingrose: :clappingrose:

عشرة على عشرة

[suavemente]

سالخير عليكم بالكندي

من أرض المخمخة والمزاج العنب الكنداوي... في أقصي الغرب الألبرتاوي ، و وسط الغابات الكندية

وأحب أطمنكم جميعاً إن المزاج العنب مستمر ، وهيستمر ، ويستمر ، ويستمر ....

قولوا ان شا الله :blush2:

بافكر أكتب للواد أحمد مراد هاند أوفر بجد من البراريم الكنداوية jmb-)

ولنا عودة إن شاء اللهtth:

أنا عنيا وجعتنى من كتر القراية لموضوعك من كتر الخلاوة مش قادر أقوم من على الكومبوتر .. ليه مش بتفكر تعمل كتاب لذيذ كدة ؟ أسلوبك حلو و سهل زى أنيس منصور

ربنا يوفقك يا رب

[moheltohamy]

مشاركة كتبتها من زمان ، وقريتها بالصدفة...

واقدر دلوقتي أعلّق عليها

من مُنطلَق إن محدّش عاوز يتكلّم ولا يقول إيه عيوب كندا...

حتى وجدي جاب حتّة صغنّونة مالهاش حل ؛ وبيحس بيها أي واحد خرج برّه بلده (حتى لو ما خرجش ؛ بس أصحابه يكونو اتجوّزوا!)

أجيب أنا المايك بتاعي ، وأشارك معاكو بخاطرة تمر ببالي من وقت للتاني...

إيه هيه السعادة؟! وازاي أضمن إني أكون سعيد في كندا؟!

بمعنى... الواحد هنا ف السعودية شغال على بريمة بحرية ، وحواليه اللون الأزرق من كل جانب ، والجو مُريح للأعصاب بشكل فوق الوصف... ويا سلام على كبّايت بيبسي والواحد أدّام الميّه

المرتب كويّس جداً مقارنةً بالبداية في أي مجال في كندا ؛ خصوصاً في الوقت الحالي مع انهيار الاقتصاد العالمي ، وحالة الترقب والـ Lay off (تسريح العمالة) اللي بدأت في العديد من الشركات! وطبعاً الحياة في مصر رخيصة جداً ، ومفيش مجال الواحد يصرف مرتب شهرين في شهر الأجازة.

مسئوليّات الشغل قليلة جداً هنا ، والحياة وردي ؛ ومسئوليّات الشغل هنا (كما كنت كتبتها في هاند أوفر سابق لأحمد مراد):

العيادة هنا يا ريس بمواعيد مش سايبة... فاكر قارون والورأة اللي مضيت عليها المهندس عاطف؟ هنا بأه ده الرسمي ، يعني مش بجميلة من حد! النظام هنا (وبرضه ع الكوميت) من 6 ص لـــ 6 م. ف الكوميت كانو لازئين ورأة على باب العيادة (مواعيد العمل بالعيادة من 6 ص إلى 6 م ، عدا ذلك حالات الطوارئ فقط بعد إبلاغ التول پوشر!) طبعاً انتا عارف اخوك ، مفيش حاجة هنا اسمها 6 الصبح دي ! أنا مش ف البيت عشان اصحى 6 الصبح! وحياتك انتا ، هيه 9 الصبح وأحياناً 11 على حسب السهرة كانت طويلة ولاَّ نايم بدري! أنا ف البريمة ، يعني أرض المزاج ، حيسُ إني باشتغل ، وطبعاً أساسيات الچوب ريسپونسبيليتيز معروفة (تاكل - تشرب – تنام - تأنتخ) ، لغايت ما يوصّلو الدش ونضم الچوب ريسپونسيبيليتي الخامسة (تتفرج ع الدش براحتك) ، ومضطر أزود عليهم چوب ريسپونسيبيليتي سادسة (وتتشات وتبراوز النت على كيفك)! وطبعاً موجود عندنا ريسپونسيبيليتي سابعة (ترغي ف التليفون الدولي بمزاجك)! مش أولتلك شغل البحر كتير! :lol:

والشركة نفسها هيه الشركة الأولى على مستوى العالم في الحفر البحري عن البترول ، والسيستم بتاعها محترم بشكل فوق الوصف... ولا أنسى طبعاً كورس جوهانسبيرج اللي المفروض بيتعمل كل سنتين!

الناس اللي معايا ف الشغل ؛ وبالأخص المديرين (الأمريكان) شايلينّي على كفوف الراحة... محدّش بيطلب منّي أي حاجة... وعادي جداً إن الدكتور نايم... لدرجت إني لما باحضر الميتنج الصباحي (6 إلا ربع) ، مرة ألاقي مدير البريمة يسأل الناس (سمعت إن المجاري طفحت ف الدور الأول و وصلت لبتاع نص متر) ودول يقولوله لأ خالص ، إحنا لسّه جايين م الحمامات والحالة زي الفل ، وده يقوللهم (أمّال إيه اللي قوّم الدكتور من السرير؟)

ومرة سألهم (فيه حريق ف الدور الأول؟) ، طبعاً لأ وإلاّ كنا سمعنا إنذار الحريق بيجلجل ف البريمة كلها ، وده (بس الدكتور خرج من أوضته وحضر الاجتماع معانا!)... والكل يضحك!

ولمّا الإدارة قررت تنقلني بريمة تانية ؛ تدخّل مدير البريمة ده ، وسألني (إنتا عاوز تمشي؟) أولتله لأ طبعاً ؛ بس ده قرار الإدارة! وده يقوللي (الإدارة دي بتشتغل عندنا ؛ وظيفتهم يعملولنا اللي احنا عاوزينه عشان نشتغل!) ، وكلّم المشرف على البريمة في الأوفيس ، وقال له (إحنا عاوزين الدكتور ده ، ومش هنستغنى عنه)

يعني م الآخر... أكل ومرعى وقلّة صنعة

ومديري السابق في شركتي في مصر (وحبيبي جداً على المستوى الشخصي :lol: ) ، حالياً مسك مدير الإدارة الطبية الإقليمي في شركة إيطالية للحفر عن البترول في قطاع نيجيريا (وبشهادته اللي بيعترفوا بيها... مش زي العالم الرزلة بتاعت كندا!) ، وناوي ياخدني هناك في أول فرصة... بس لسّه واصل هناك ما بقالوش أسبوع ؛ مستني بس الأمور تترستأ!

عارفين يا جماعة لما مجال الإنترناشيونال يكون مفتوح أدّام الواحد؟ ومن شركة لشركة ، ومع كل نقلة بتضيف لرصيدك ، وبتتكلم على أرض صلبة ، وكل الكلام عن شركات يكفي تذكر إسمها ليعطيك تميّز عن غيرك لو بتقدّم لشركة جديدة.

أنا بارغي كتير كده ليه؟! يمكن طبع بأه!

المهم... كل ده هاسيبه ، واروح ارمي نفسي ف المجهول ، وعارف إني هاتزنق مادّياً هناك ، ومش هالاقي الوضع اللي أنا فيه ده في الشغل (ع الأقل في الكام سنة اللي ف الأول)...

وشهادتي ومؤهلي ودراستي ولا ليهم لازمة ، وسنوات خبرتي ولا ليها لازمة... ونبدأ من الصفر تاني!

وطبعاً لو رُحت هناك ؛ القرار ده One way ؛ يعني مش من السهل إني أرجع تاني على شغلتي هنا!

والاقي أحمد الديب بيقوللي خلّيك عندك على أد ما تقدر... وبيحسدني كمان ع الوضع وطبيعة الشغل اللي أنا فيه! :)

ومن الناحية التانية أنا مزنوق بحكايت سنتين من الـ 5 سنين ولاّ تلاتة من الخمسة! الخلاصة إني مُجبَر أتواجد في كندا بصفة دائمة عن قريب!

هل هييجي اليوم اللي أفتكر الوضع اللي أنا فيه حالياً ، واقول (كنت في نعمة وسبتها عشان خاطر عيون الست كندا هانم)؟ هل هييجي اليوم واندم؟ :o

يمكن دي مشكلتي ومشكلة ناس زيي كتير ؛ زي د. الشامي و Phoenician وإيهاب سالم... ما زلنا بنرقص ع الحبل حتى اللحظات الأخيرة ؛ لغايت ما نكون مُجبَرين نستقر هناك! إيهاب خلّص الفترة الاختياريّة دي خلاص ، ومُجبَر يستقر هناك...

مش عارف... دي بعض الخواطر اللي بتيجي على بالي من وأت للتاني... حبّيت أشاركها معاكو.

قولولي يا أهل كندا... إيه رأيكو؟

دلوقتي وبعد قرابة السنة من حرق مراكبي وإلقائي بنفسي في أحضان كندا

أقدر أقول... يا ريتني كنت أخدت الخطوة دي من بدري ، كان زماني ع الأقل باستعد للتقديم للجنسية عن قريب

ولا أي ذرة ندم على الخطوة دي ، بالعكس باتمنى باقي أصحابي وأقاربي يعملوها ، ويوفروا عمرهم وصحتهم المهدورة في مصر والميدل إيست

والفلوس اللي كنت باعملها في السعودية وفاكرها غاية المنى ، ودخل خرافي أعيش بيه ملك في مصر أو حتى في زياراتي لكندا ، أقدر أجيب أكتر منها في كندا ، يمكن بمجهود أقل من السعودية في معظم الأحوال

بس تزيد عليه راحة البال والاستمتاع بالبلد اللي حتى الآن لم ينتهي شهر العسل بيننا

وما تقولش إيه إدتنا كندا :blush2:

:egyflag:

[Alrefaey]

دلوقتي وبعد قرابة السنة من حرق مراكبي وإلقائي بنفسي في أحضان كندا

أقدر أقول... يا ريتني كنت أخدت الخطوة دي من بدري ، كان زماني ع الأقل باستعد للتقديم للجنسية عن قريب

ولا أي ذرة ندم على الخطوة دي ، بالعكس باتمنى باقي أصحابي وأقاربي يعملوها ، ويوفروا عمرهم وصحتهم المهدورة في مصر والميدل إيست

والفلوس اللي كنت باعملها في السعودية وفاكرها غاية المنى ، ودخل خرافي أعيش بيه ملك في مصر أو حتى في زياراتي لكندا ، أقدر أجيب أكتر منها في كندا ، يمكن بمجهود أقل من السعودية في معظم الأحوال

بس تزيد عليه راحة البال والاستمتاع بالبلد اللي حتى الآن لم ينتهي شهر العسل بيننا

وما تقولش إيه إدتنا كندا :blush2:

:egyflag:

:hi: :hi: :hi:

شهادة قوية تبعث بروح التفائل وسرعة اتخاذ القرار

دكتورنا الغالى بفكر اسيب اونتاريو واجى البرتا ,بعيون التهامى هل قرارك كان صائب فى الاستقرار بادمنتون وماهى اهم الفروق

[Rock]

طبعا الواحد مش مصدق نفسه بعد الاطلالة العزيزة دي يا عمنا

شكرا بجد..انت جيت علي الجرح في وقت الضياع اللي احنا عايشينه في انتظار الميديكال و الرهان علي المجهول

بلزززززززززززززززززز حاول تكرر زيارتك لتوبيكك و ربنا معاك

[moheltohamy]

دكتورنا الغالى بفكر اسيب اونتاريو واجى البرتا ,بعيون التهامى هل قرارك كان صائب فى الاستقرار بادمنتون وماهى اهم الفروق

من حيث القرار ، فده كان صائب طبعاً ، لأن مفيش فرصة للشغل في مجال لاإسعاف أو البترول في أونتاريو ، أو للدقة احتمالاتها أقل بكتييييييير!

من حيث نوعية الحياة ، فالناس بتختلف في تقدريها للنقطة دي تحديداً. فيه ناس رأيها إن كالجاري وإدمونتون جو أفضل بكتير من ناحية تربية الأبناء. مثلاً كنت باكلم واحدة بتشتغل في خدمة عملاء ويست جيت ، والدردشة أخدتنا للكلام عن الفروق بين الاتنين. قالتلي إنها كانت عايشة في ميساساجا ، ونقلت كالجاري من فترة قصيرة. عندها بنت عمرها 14 سنة. بتقول لي إن الحياة هنا أقل صخب من حياة تورونتو ، وإن البلد هنا بتنام من ييجي 9م ، وده صحي لتربية الولاد ، وبتقارن حالها بالبنتين الأنتيم بتوع بنتها... واحدة منهم حامل والتانية في مركز تأهيل لمدمني المخدرات!

تقدر تقارن نوعية اللايف ستايل فيي كالجاري أو إدمونتون بالسويس والإسماعيلية ، وتورونتو بالقاهرة ، وفانكوفر بالغردقة أو شرم الشيخ ، ومونتريال وكيبيك سيتي بالاسكندرية ، وولايات الساحل الشرقي بالصعيد.

تورونتو مدينة كبيرة بكل صخب الحياة بتاعة أي Metropolitan City ، والنايت لايف المتنوعة ، والمظهر الأكثر حضارة ، وفي قلب الأحداث ، زي القاهرة بالظبط... طبعاً أزحم ومعدّل جرايم أعلى.

فانكوفر مدينة جميلة ونقية والحياة فيها تطوّل العمر ، بس المصاريف والأسعار فيها أغلى ، وفرص الشغل فيها شبه منعدمة ، لدرجة إنهم بيعتبروها مدينة للتقاعد ، بعد ما تكون عملت لك قرشين ، تروح تستمتع فترة المعاش هناك ، من غير ما تشغل بالك بالشغل!

مونتريال وكيبيك سيتي بقى ليهم لايف ستايل لوحده اللي بياخد من تورونتو كمدينة ميتروبوليتان في حالة مونتريال ، يشبه إلى حد كبير الإسكندرية ، وبيعتبروا نفسهم متفردين وذووا ثقافة منفصلة عن باقي القطر الكندي ، وليهم أكل متفرّد كيبيكاني ، وبيعتزوا أوي بثقافتهم وبلهجتهم ، وأيّووووه يا كيبيك وكده يعني :P

ولايات الساحل الشرقي زي نيو برونزويك وسانت لورانس ونوفاسكوشيا ونيوفاوندلاند ولابرادور تقدر تعتبرهم الصعيد بتاع كندا ، أو يمكن الدمايطة... عندهم الصيد ده مهنة تقليدية ، وناس عشريين بغباء ، و ودودين بصورة مبالَغ فيها ، الطيبة بتاعة زمان ، والعلاقات الأخوية بين الجيران وبعضهم ، وليهم آكسينت مميّزة في الكلام و... دايماً بيطلعوا عليهم نكت :D

كالجاري وإدمونتون زي السويس والإسماعيلية... مدن أقل ازدحام ، وأحدث نسبياً ، وفي قلب منطقة إنتاج البترول في كندا. فرص الشغل المفترض إنها أعلى من غيرهم بطبيعة الحال. هتحس وانتا جاي من تورونتو بنقلة حضارية كبيرة ، وبرحرحة في ردود الفعل عند الناس في إدمونتون ، هتحس إنك بقيت في الفلاحين. هنا طبعاً هترجع تشوف الناموس بكثافة تفرح! :blink: ويا سلام بقى لو طلعت في الشمال زي هاي براري هتحس إنك دخلت الغيطان بالفعل... أما لو اشتغلت في محمية هنود حمر زي حالاتي... هتحس إنك رجعت قرنين لورا :blink::blink::blink:

يمكن الصورة تكون وصلتك نوعاً ما عن اللايف ستايل للحياة في مختلف مناطق كندا كما لمستها.

بالنسبة للشغل ، فزي ما قلتلك احتمالاته في ألبيرتا أكتر ، والشغل من عينة ماكدونالدز أو ويتر في مطاعم الاوبن بوفيه أو كاشيير في الستورز والهايبر ماركتس مرطرط ودايماً باشوف إعلاناته. الشغل البروفيشنال بقى هوّه اللي محتاج خبرة ، ويمكن اللي نفعني حتة إني دكتور ، وEMR مرخص في الولاية. ما تتخيّلش مدير الشركة بتاعتي طاير بيّا قد إيه ، وبيحبني على المستوى الشخصي.

أعتقد إني بكده جاوبت سؤالك بصورة ما smk:

[Alrefaey]

تسلم ياغالى بالرغم انى عارف معظم المعلومات اللى فوق لكن كان عندى فضول اشوفها بعنيك انت تحديدا ,وجهة نظرك ,لأنى بعرف النقلة من مستوى معين الى اخر بتفرق مع ناس وناس تانية ,والتهامى بحكم انه انسان مالتيناشونال ولف ودار اعتقد انى هعرف منه نظرة واقعية بالموضوع .

سؤال ياجميل ولكن الكثير من الاخوة هنا سألونى عليه وانت الوحيد صاحب التجربة فيه ..

كورس المسعف

-شروطه ,مدته ,الديدتايم بتاعه

-اسم الكوليج ,اسم الكورس نفسه

-هل وجدت عمل بعدة مباشرة ,متوسط الساعة كم .

شكرا ياغالى اصل معايا انتين من الاصدقاء اطباء وبيسألوا بشغف عن الموضوع ده

[SoSo R]

مشاركة كتبتها من زمان ، وقريتها بالصدفة...

واقدر دلوقتي أعلّق عليها

دلوقتي وبعد قرابة السنة من حرق مراكبي وإلقائي بنفسي في أحضان كندا

أقدر أقول... يا ريتني كنت أخدت الخطوة دي من بدري ، كان زماني ع الأقل باستعد للتقديم للجنسية عن قريب

ولا أي ذرة ندم على الخطوة دي ، بالعكس باتمنى باقي أصحابي وأقاربي يعملوها ، ويوفروا عمرهم وصحتهم المهدورة في مصر والميدل إيست

والفلوس اللي كنت باعملها في السعودية وفاكرها غاية المنى ، ودخل خرافي أعيش بيه ملك في مصر أو حتى في زياراتي لكندا ، أقدر أجيب أكتر منها في كندا ، يمكن بمجهود أقل من السعودية في معظم الأحوال

بس تزيد عليه راحة البال والاستمتاع بالبلد اللي حتى الآن لم ينتهي شهر العسل بيننا

وما تقولش إيه إدتنا كندا

هو انا ليه حاسة بمبالغة زيادة...يعنى الحياة عمرها ما هى شهر عسل...وبعدين انت بتحكى عن دلوقتى...طيب لحد ما لقيت شغل و استقريت فيه...كان الوضع ايه.. وما تنساش إنه لولا فلوس السعودية...ماكنتش اساسا هتصمد...

حاجة كمان..

موضوع ان الشغل بمجهود أٌل من السعودية دى مشكوووووووووووووووك فيها جدا لأنك أصلا ماكنتش بتعمل حاجة فى السعودية..يبقى انت هنا بتقبض و انت نايم فى البيت ولا إيه:closedeyes:

معلش احنا بنتكلم مع بعض يعنى ما فيش حاجة...

و عظيمة يا كندا يا ارض النعم

إيه عايزين انطباعك بعد ما قدمت الأقرار الضريبى و هل ساعتها كنت اشتغلت ولا لسه؟؟ و قبضت الفلوس اللى هى اكتر من بتاعة السعودية:protest:

[hgalal]

حمد الله على السلامة يا دكتور واحشنا جداً وربنا يوفقك كمان وكمان في كندا. بعت لك ايميلات كثير ولم ترد. لكن الحمد لله اطونت كده عليك.

[moheltohamy]

سؤال ياجميل ولكن الكثير من الاخوة هنا سألونى عليه وانت الوحيد صاحب التجربة فيه ..

كورس المسعف

-شروطه ,مدته ,الديدتايم بتاعه

-اسم الكوليج ,اسم الكورس نفسه

-هل وجدت عمل بعدة مباشرة ,متوسط الساعة كم .

شكرا ياغالى اصل معايا انتين من الاصدقاء اطباء وبيسألوا بشغف عن الموضوع ده

الموضوع ده يا أستاذنا اتكلمت عليه بتفاصيل التفاصيل في حوالي 14 صفحة ع الوورد ، ونزلتهم في التوبيك ده من فترة. ممكن تتصفحة تاني أو تخلي الكثير من الاخوة يتصفحوه شوية ، أو يعملوا سيرش بسيط عليه وهيلاقوا كل ما يخطر ببالهم.

بالنسبة للشغل فده قبل أي حاجة رزق ، والمفروض كلنا نتفق ع الموضوع ده. أنا عن نفسي لقيت شغل بعد ما بعتت الريزيوميهات بساعة ، ودي نفس الشركة اللي أنا معاها حتى الآن. و3 شركات اتصلوا بيّا عشان أروح أشتغل معاهم ، بس المرتب ما فرقش عن مرتبي هنا ، وبالتالي ما احتجتش أغير. لكن نحط في بالنا إن مش كل الناس هترتاح مع اللايف ستايل دي ، ومش دايماً الشغل ده بيكون متاح ، ومش بصورة مستمرة كمان. يعني كمثال... الشغل في مجال البترول متوقف من شهر مارس حتى شهر يوليو وبادئ يفتح تاني اليومين دول.

مش عاوز حد يقول لك إن تهامي شجعنا لغاية ما غرقنا... وبالتالي الشغل ده زيه زي أي مهنة ، ممكن جداً تقعد تستنى فرصة شغل ، وما تلاقيش حد اتصل بيك ، وممكن تشتغل شوية ، ويمشوك ، وممكن ما يرضوش يشغلوك عشان ما عندكش خبرة في مجال البترول... أنا نفعني حاجتين ، يمكن تلاتة... إني دكتور ، وكنت شغال في شركة أمريكية ليها إسمها في السعودية وقبلها في مصر كانت شركة كندية كلهم عارفينها هنا في كندا ، وأخيراً إن صاحب الشركة بيرتاحلي وبيعزّني موت :blush2:

نرجع تاني ونقول,,, دي أرزاااااق :closedeyes:

ومتوسط الساعة 22 دولار ، لكن طبيعة الشغل في البراريم ما تعرفش تحسب لها... إرجع لكلامي السابق عن المسعف ، وانتا تلاقي تفاصيل أكتر.

[Alrefaey]

وأخيراً إن صاحب الشركة بيرتاحلي وبيعزّني موت :blush2:

ومين مايعزكشى يادكتور

شكرا على الاهتمام والرد الوافى

[pharmacawy]

دكتور تهامى رمضان كريم اوى جدا عليك و على كال المسلمين اخوك من الانس إللى عايشة فى الخليج و من حزب المقتنعين بان اليخمة بتاعتة ما تتعوضش

و لحظة الاختيار قربت بين خطة السنتين و خطة ال3 سنين و بعد اذنك يا ريس اية عيوب خطة السنتين و اية مميزات خطة ال3 سنين

هل فى اى احتمالات حركات نص كم عند تجديد البى ار بعد سنتين عالجنط

[starsideus]

د. تهامي كل سنة وانت طيب و رمضان كريم, بجد توبيك اكتر من رائع و موهبة قصصية لا شك فيها, انا عضو في المنتدى من حوالي سنة و نصف تقريبا بس كنت مركز بس على التوبيكس الخاصة بمعلومات الهجرة و الاوراق و التقديم بس من اول رمضان كدة قلت افتح التوبيك و من ساعتها و انا مش عاوز اكتب اي تعليق غير لما اخلص ال140 صفحة اللي في التوبيك, بجد ادمان لدرجة ان مديري ابتدى يخنق عليا من كتر ما باكون فاتح التوبيك بتاع حضرتك وانا في الشغل بالرغم من اني task based مش shift based يعني هو بيديني الtasks بتاعت الاسبوع كلة و انا و شطارتي اخلصها في 5 ايام او في 5 ساعات زي ما انا عايز المهم اني التزم بالdeadline بس مع ذال الادارة المصرية للاسف زي الزفت.

احساس غريب جدا ان الواحد يتعرف على انسان و يقرا قصة حياتة كاملة من على الورق, عشان كدة حاسس اني اعرفك من زمااااااان يالرغم من ان عمري ما قابلتك, دة الى جانب التشابه في الطباع اصل اخوك غاوي برضة اليكترونيكس و مدمن meat steaks و عاشق للسفر جوة مصر و برة مصر دة الى جانب اني مشاركك في عشق كندا بالرغم من اني لسة ما شفتهاش بس اخدت فكرة عنها نوعا ما من خلال زيارتي ل California في شهر ابريل اللي فات بعد الثورة و طبعا من خلال الهاند اوفر الاكتر من رائع الخاص بحضرتك.

الللي زعلني بجد ان بعد الجو الجميل اللي الواحد عاشة في القهوة بتاعت حضرتك في الاسبوعين الللي فاتو دلوقتي حاسس انها بقت فاضية و متربة, بجد ياريت نسمع من حضرتك تاني, و عموما انا باستأذنك اني اكتب شوية مواقف كدة حصلتلي في اثناء سفرياتي تأكيدا على النقط اللي حضرتك اتكلمت فيها و ياريت تقبلني صديق ليك و عل و عسى نتقابل في كندا عن قريب, اخوك مقدم فيدرال من شهر كدة في النظام الجديد و ربن يسهل بس دعواتك لينا.

يمكن في ناس بتستغرب ان اللي كان عايز يسافر قبل الثورة لسة عايز يسافر بعد الثورة بس انا عايز اوضح حاجة, في ديسمبر 2010 انا كنت و صلت لمرحلة من اليأس من البلد لا توصف بالرغم من اني موظف في شركة multinational و مرتبي محترم بالنسبة للمقاييس المصرية لكن فية حاجات كتير مش هاتقدر تشتريها بالفلوس حتى لو معاك مليارات, وقت الثورة انا كنت في ميدان التحرير و اعز اصدقائي اتقتل قدامي, و اعتصمت لحد ما مبارك سقط و كتبت مقالات و شاركت في ندوات و لما رحت امريكا في ابريل شفت الاحترام في عيون الامريكان لية لمجرد انهم يعرفو اني مصري, بس ليلة سفري ابويا سألني ان كنت ناوي ارجع تاني و لية مصر على السفر بعد ما مبارك مشي و البلد هاتبتدي تنضف, طبعا قلتلوا ان امريكا مش هي خطتي بس كندا هتكون ان شاء الله الخطوة الجاية اما بخصوص اصراري على السفر فدة مافيهوش تعارض مع مشاركتي في الثورة, انا زي ملايين من المصريين اللي زهقوا و طهقوا و نزلو الشارع لكن بعد مبارك هل البلد هتكون جنة بين يوم وليلة؟ هل السلبيات اللي انتشرت فينا هتختفي مع شروق شمس اليوم الجديد؟ اكيد لأ, السلبيات دي محتاجة تغيير بشر كبروا و اتعودوا عليها يعني في جيل جديد دلوقتي من الاطفال بيتربى على انو يقول اسف و بعد اذنك و لو سمحت و بيتعلم يكون ايجابي و يشارك في السياسة الجيل دة هيكون هو الامل و دة هيكون نقي بنسبة 70% و الجيل اللي هييجي بعدة هيكون نقي بنسبة 100% يعني بنتكلم في 30 ل 40 سنة ساعتها اكون انا على المعاش ان كان لينا عمر, طيب السؤال التاني انا اقدر اعمل اية لبلدي دلوقتي؟ حاليا مش كتير يعني انا مش احمد زويل او فاروق الباز ولا انا رجل اعمال غني اقدر اصرف على المشاريع الجديدة, لكن من خلال سفري اقدر اغير الوضع دة يا اما احقق طموحاتي الاكاديمية اللي اندفنت في مصر من زمااااااان او احقق نجاحات مادية و في الحالتين هاقدر اساعد البلد افضل مما لو كنت جواها.

حاجة اخيرة: اسوأ حاجة عملها مبارك مش انو سرق البلد او سجن وقتل و عذب ابرياء كتير او حتى انو دمر البنية التحتية و باع ثروات البلد لأعداءنا لا لا لا, الحاجات دي كلها تتعوض بسهولة, لكن اللي ميتعوضش هو الدمار الهائل في العقول و النفوس و الاخلاقيات.