كندا التي رأيتها :)

[qenawy]

ما ردّيشت عليا هناك على فكرة wink.gif

احم احم

خلي الطابق مستور يا دكترة اخوك غلبان ما يغركش المنظر

بس نعمل ايه ظروف وضغوط ولكن والله وبجد وبدون ادني مجاملة

انت انسان مشرف لمصر جدا ودايما يارب تكون بخير

[hosiny]

شكرا يا دكتره علي المعلومات الحلوة بس انا مكنتش بسأل عشان مكسل بس لان زي مانتا قلت فيه استثناءات للوزن غير اللي بيبقي مكتوب في السيت زي مثلا مصر للطيران و احيانا السعودية علي شوية استعباط مننا ممكن تعدي ب 50 ولا 55 كيلو للراس

ياتري الاستعباط ممكن يجيب نتيجه بردو مع خطوط الطيران دي؟؟؟

[moheltohamy]

o إيسكوت... مش أخوك راح عمل فضيحة تانية في بلاد العم بيفر (القندس ؛ وده الحيوان القومي هناك ، حاجة كده زي السنجاب بس أده بتاع 10 مرات مثلاً)! المهم ...

جيت في يوم وانا لوحدي العصرية كده ، كان يوم سبت. طبعاً كنت هوم ألون ، وهند كان عندها شغل! المهم الشيطان :ninja: لعب ف دماغي ؛ وأولت أسخَّنلي حتت سدر فرخة (هيه حتة يتيمة كانت بائية ف الحلة من الغدا بتاع اليوم اللي أبلُه!) ، المهم أولت أديها دئيئتين على أعلى حرارة ع البوتاجاز (البوتاجازات هناك كلها كهربا بالمناسبة) تسخن في شوية الشوربة اللي بائيين معاها وأنأنأ فيهم على ما هند ترجع البيت :FN: .

إذ بي أُفوجأ إن الواد أحمد الديب بيتصل بيا يئوللي إنه هوه وفوزي (رفيق السكن) عند الأفغاني (مطعم أفغاني ، والأكل بتاعهم رائع وفوق الوصف ؛ مشويات كباب وكفتة وفراخ وكده يعني) ، وبيسألني لو أحب يجيبلي وجبة معاهم. وهيه دي محتاجة سؤال؟ طبعاً يابني هات! وكام دئيئة وألائيه بيئوللي إحنا داخلين ع البيت (طبعاً من بيتي لبيته 3-4 دئايئ) ، أولتله وانا جاهز ، كنت لابس أصلاً ، يا دوب حطيت رجلي ف الجزمة ، و زييييووو على برة! دا الأفغاني يا عم الحاج!

وأعدنا أنا واحمد وفوزي وابنه ندوس ف الأكل والمزاج والمخمخة i*: ، وبعد كده ، ما تيللا يابو حميد نسوق شوية (كنت باحب أسوء عربية احمد وهوه آعد جمبي ، آهو منها أجرب السواءة هناك ، وأحمد معايا لو فيه أي تعليئات على سِواءتي ، تريننج يعني). وبعد صلات المغرب في جامع هناك ، ألائي أحمد جايله تليفون!

وبعد تليفون أحمد اللي خلص في جملتين تلاتة ألائيه جاي يسوء هوه ، وآللي ده واحد من تورونتو بوليس ، بيتصل بيه من تليفون البيت عندي (البيه عمل ريدايال ومن بختي كنت متصل باحمد أبل ما انزل م البيت رغم إني غالباً باكلم احمد من موبايلي مباشرتن ؛ فري لوكال كولز بأه مانتا فاهم :fool: )

المهم بيئول له (أنا من تورونتو بوليس ، وباكلمك من ثري برود واي آفينيو ، تعرف صاحب الرقم ده؟) فآل له (أيوه ، هوه ف الواقع جمبي حالياً) ، آل له هاته وتعالو حالاً ، أنا معايا 3 عربيات مطافي وإنذار حريئ في شئّت صاحبك! أحمد يسألني (إنتا سايب حاجة ع النار؟) ، (لأ يحمد خالص!) ، واجيب في دماغي يمين شمال ، آاااااااااه حتت السيييييدر!!! وطول السكة عمال أتخيل ف الخساير والبلاوي السودة اللي هادفعها تعويض عن الأضرار اللي هتحصل ف المبني من تحت راس حتت السدر!

طبعاً أحمد ساء سواءة ولا الشباب الروش اللي عمال ياخد غُرز وسط العربيات ، وإشارة صفرا استعبط وعدّاها زي الطلأة ؛ ماهي مش ناءصة انتظار أصلها! المهم وصلنا في 5-10 دئايئ! وركنا العربية تحت عمارة احمد وكملنا بائي المسافة جري! وطالعين السلالم طبعاً وبننهج على آخرنا...

ولا شفت عربيات مطافي تحت البيت ولا حاجة ، ما كانش فيه غير عربية تورونتو بوليس ، والأوفيسر وائف أُدام باب الشأة عمال بيتكلم مع سيلفيا السوبر انتندنت. طبعاً أولت هاي ، وعلى جوه البيت أشوف نتيجت عمايلي السوده! ما حصلش حاجة يا ريس ، طبعاً الحلة تفحمت ، وحتت السدر اتبخرت تماماً ، بقت فحمة ، كيان هلامي اسود! ولئيت بتوع المطافي طفو البوتاجاز ، والحلّة شالوها وحطوها ف الحوض وفتحو عليها الميَّه ، وفاتحين شبابيك البيت كله.

روحت جري على أوضة النوم كان فيه حوالي عشر تلاف دولار أمريكي على كندي ، هند كانت مكسّلة توديهم البنك... ما لئيتهومش! ألبي وئع ف رجليّا ، واتصلت بهند ع الموبايل أتاري الهانم حطتهم ف البنك اليوم اللي أبلُه وما آلتليش!

بعد ما اتطمنت إن محتويات الشأّه تمام ، رحت ع الأوفيسر ، وأولتله (كام سنة ف السجن؟) ، آللي (أبداً ، همه 9 شهور) أولتله (مش عندكو أكل كويّس ف السجن؟) آللي (آه ، وفيه آيس كريم كمان) أولتله (عَظَمَه ، يللا بينا!). المهم ، الراجل طلب مني تحقيق شخصية (May I have a piece of ID?) ، طلّعتلُه الپي آر كارد ، خد بياناته ، وخلصنا على كده. سألتُه ، إيه موقفي؟ يعني فيه حاجة هتتسجل ضدي؟ أو هتتحط ع الريكورد بتاعي أو هتأثر على سمعتي (Does it have anything to do with my credit?)؟ آللي أبداً ، مفيش حاجة خالص. ذيس ثنجس هاپن! وإن أنا راجل بادفع ضرايبي (دا هوه اللي بيئول) ، وإن دي من حئوئي على الدولة ، أو تئدر تئول من التزامات الدولة تجاهي!

بس الراجل اعتزرلي على إنهم اضطرو يكسروا باب الشأّة عشان يدخلو ، وإن دي هاتحمل أنا تكاليف إصلاحها! ولما أولتله ، ماكانش ممكن بتوع المطافي يخبطو على سيلفيا وياخدو منها المفتاح؟ آللي في حالة زي دي ؛ مفيش وأت ندوّر على مفتاح ؛ ممكن يكون حد بيتخنق جوه م الدخان وكل ثانية ليها إيمتها. كلام منطقي برضه! المهم بعد ما أخد بياناتي سلمني التأرير اللي كان بتوع المطافي سايبينه ، وكاتبين فيه كل حاجة اتعملت ف المشوار ده من طأطأ لسلامو عليكو!

المهم ، سيلفيا آلتلي إن فيه النجار جاي يتصرف في باب الشئة اللي كسروه بتوع المطافي (همه كسرو حلق الباب بس بكل حرفنة الصراحة ، يعني يا دوب هيه حتت خشبة متر تتمسمر في إطار الباب وخلص المشوار على كده). المهم بعد شوية لئيت 2 نجارين جايين يظبطولي الباب أي حاجة بس المهم الباب يتئفل ، لغايت يوم الاتنين (ما تنساش إن الحكاية كلها حصلت يوم السبت الأجازة).

المهم ، جولي يوم لتنين ، وحتت الخشباية المتر ومسمروها تمام ، وتاني يوم جه جوز سيلفيا بالبوية دهنهالي ورجعت زي الأول وميت فل واربعة وعشرين. بعد كام يوم لئيت شركة ترانس جلوب باعتالي فاتورة بتكاليف الإصلاحات بتاعت الباب (382 دولار!) متر خشب هجص بـــ 382 دولار؟! mfb: كان نجار في مصر يعملها وياخُدلُه جوز جناهات ، ويبوس إيدُه وش وضهر ، وما تخللي يا بيه ، احنا ما عملناش حاجة!

هاهاهاهاها ، الموقف ده فكرني بعم السيد ، بواب العمارة بتاعتنا ف ميت غمر ، كانت ماما تبعته السوء يشتريلها الخضار والحاجات دي ، ولما يرجع يحاسبها ، كانت تسيبلُه الكسور (بتاع رُبع جنيه ولا حاجة) ، وما تخللي يا حاجّة ، وخيرك سابئ ، وأيــَّاتوها خِدمه. وطول ما هو نازل ع السلم فاضحنا تشكرات ، زي ما تكون سايبالُه مفاتيح العربية بتاعتنا كادوه! wst::

طبعاً الـــ 2 نجارين جايينلي من ميساساجا (زي من الهرم لمدينة نصر) ، وساترداي نايت يا ريس ، يعني ليلة الدلع والمياصة اللي بيستنوها م الأسبوع للأسبوع ، وسابو كل العز ده وجولي ، ودي حسابها كتير! طب وانا مالي ، ما حبكتش تجيبو ناس من آخر الدنيا ، وجايبين 2 ليه؟ ده حتت صبي كان ممكن ينجز المشوار ده كله! لكن هتئول إيه ، ده بدل ماتئول متشكرين يا شركة إنكم رتبتولي كل حاجة؟!

نسيت أئوللك إن سبب المأساة دي كلها – بخلاف حتت السدر طبعاً - إن واحد من الجيران - الله يحرؤه - شم ريحة الدخان ، واتصل بـــ 911 تعالو الحئو الشئة اللي جمبي فيها حريئ! البيه ما كلفش خاطرة يتمشى لغايت سيلفيا يخبط عليها تيجي تبص ع الشئّة وتتصرف هيه! دا الغريب إن السموك ألارم سيستم كان فيه مشكلة على ما يبدو ف العمارة ، وما اشتغلش! يعني كان زمان سيلفيا آمت بالواجب وخلصت الشغلانة بأئل الخساير! الله يحرؤه تاني! md2:

تعرف إيه أكتر حاجة حازّة في ألبي في الفيلم ده كلّه؟ سيبك انتا ... طز ف الفلوس ، وطز في حرئت الدم ، وطز ف الحلّة ، وطز حتى ف حتّة السدر...

شويّت الشوربة طالعين من عيني! bnd5::

تم تعديل 23 أغسطس 2008 بواسطة moheltohamy

[ابو الخير]

هههههههههههه

واضح انك نساي زيي

موضوع الباسبورت ده حصل معايا مره في اول سفريه ليا كنت قاعد بلاعب طفل صغير و الباسبور جانبي الطفل الغبي اخده من غير ما اخد بالي و علي اللي حصل بقى كانوا اطول عشر دقايق في حياتي .. اخر مره سافرت نسيت اللاب توب بس اهم حاجه افتكرت جواز السفر بس الحمد لله برضو كنت نسيته في التاكسي و الراجل رجعه علي البيت :ninja:

و بالنسبه للحرايق نص المواعين بتاعة البيت عليها اثار جرايمي

برادين و 3 كنكات و طاسه

الذيذ بقى ان مره البراد سخن جدا و وقع لوحده من علي البوتاجاز و نزل علي الموكت عمل حريقه بس ربنا سلمها

[hosiny]

بسم الله ما شاء الله.....ايه ده يا دكتور دانتا طلع ليك مواهب جبارة "علمت بيها علي كنده اهو" ....امال لو كنت قعدت فيها اكتر من كده كنت عملت ايه؟؟؟؟ بعد اذنك متروحش تاني لحد مانروح كندا و نشوفها الاول و بعد كده لو عايز تتيجي تعالي "اهو اسمنا بس نشوفها قبل ما تكمل عليها"

علي العموم النوع ده من الشخصيات اللي الرامات بتاعته ضعيفة بتلاقي ربنا معوضه في حته تانيه و هتلاقي كلامي صح "هتلاقي ان ذاكرتك العامه قويه و مبتنساش الاسمي بسرعة زي الناس التانيه و ذكاء عالي نسبيا و ثقة بالنفس و علاقات اجتماعية جيدة وسط الزملاء مع حب الزملاء" ده اللي انا لاحظتوا من خلال تحليلي لكام شخصية زي حالاتكو

[somayasaleh]

تسجيل اعجاب وتقدير باسلوب ظريف ومفيد

خالي بالك يا دوك.... مش كل مرة تسلم الجرة

بس اهم حاجة انت نسيت تحكيها........

ايه رد فعل هند علي اللي حصل؟؟؟؟

[precanadian]

ازيك يا دكتور تهامي انا اول مره ادخل اماكن عامه ومنتديات انا مش عارف اعمل ايه الوقتي واوعا تقولي اوم روح لاني مسادات عملت ريجستراشن [

[moheltohamy]

نسيت اقول لكم حاجة صحيح...

العمارة فضلت لمدة 3 تيّام ، والشقة لمدة أسبوع... كل ما نيجي ندخل ؛ شامّين ريحة الدخّان! :wub:

و الله فكرتني بنفسي يا دكتور تهامي لاني سافرت كتير قبل كده منهم مرات بالهاند باج بس .. و سايب هدوم ليا في مصر باستخدمها في قعدتي هناك

و مره راجع بشنطه كبيره مفيهاش غير بدلتين اشتريتهم من مصر مع انني جاي بيها هاتقطع من كتر الأمانات اللي زمايلنا المصريين باعتينها معايا .. دا حتى واحد منهم باعت لابنه اللي في ثانوي جزمه اديداس .. آه و الله

طيب عارف انني بحضر شنطتي قبل ما اطلع المطار بساعتين .. لانه فعلا المهم محفظتك و جواز السفر .. و الباقي موجود في كل حته يعني اللي هاتاخده مش فارق و اللي هاتنساه برضه مش فارق .. تلفون صغير و انا نسيت كذا خلوه عندكم لحد ما اجي المره الجايه او اتصرفو فيه

أسوأ موقف اتعرضتله .. لما نزلت اتجوز و كنت نازل قبل الزواج بيومين (كنت كاتب كتابي قبلها بتلات شهور) .. انا مش متعود على لبس اي حاجه في ايدي سواء ساعات او دبله .. و موضوع الدبله في الامارات مش حساس زي مصر .. المهم اتفاجئ بعد نزول الطياره في مصر و استعدادي للخروج ان ايدي فاضيه و انني نسيت الدبله في الامارات .. طبعا اشتريت واحده تانيه و مراتي قفشت الموضوع و كانت حكاية .. بعد الزواج بيومين رحنا نقضي "اسبوع" العسل في اسكندريه .. نسيت الدبله في القاهره و اشتريت واحده تالته من الاسكندرية

اتشرفت بالحديث معاك يا دكتور محمد و على فكره انا كمان عندي 32 سنة

والله يا باشا انتا دحكتني جداً ، خصوصاً مع تالت دبلة تشتريها!

نصيحة... لما تقلعها حطها في المحفظة زي ما كنت دايماً باعمل!

يا دكتور تهامى

لا اعتقد انى وحدى الذى اتابع الهانداوفر بكل اهتمام

لكن حق زمالتنا داخل المنتدى

ولأنى أقدرك واحترمك وبعزك

ياريت تاخد اجازة لو فية امتحانات قريب

انا عارف كرم اخلاقك

وانك مش هتكسف حد

بس احنا برضة بنحبك ونحبلك الخير

اما لو مفيش امتحانات قريب فكونتينيو يا عم تهامى

تحياتى

والله يا حسام إنتا راجل سكّرة...

وأشكرك على تفكيرك في البلاوي اللي ورايا.

وانا فعلاً المفروض أخلّص ع الأقل 3 كتب قبل 29 سبتمبر ، ميعاد الكورس بتاع جوهانسبيرج.

خلّصت منهم بتاع 10 صفحات !!!!!

والبتاع المنتدى ده واكل دماغي الصراحة ، زي ماهو أكل دماغ لولا وحلّى بعدها كمان!

وكده كده لازم هاخد أجازة ، وافوق شوية للبلاوي اللي مستنياني... بس السؤال... إمتى؟!!! :aslam:

ما ردّيشت عليا هناك على فكرة wink.gif

احم احم

خلي الطابق مستور يا دكترة اخوك غلبان ما يغركش المنظر

بس نعمل ايه ظروف وضغوط ولكن والله وبجد وبدون ادني مجاملة

انت انسان مشرف لمصر جدا ودايما يارب تكون بخير

يا نهار أبيض... مصر كده حتة واحدة يا د. قناوي؟

ونفسي أشوفك منور معانا هنا دايماً ، بدل مانتا دايماً ... ماشي تحت البطانية!

ما قلتليش صحيح... خدت بالك انتا هناك ;) من أحمد مراد (مدير عام المنتديات)؟

ما هوه ده اللي باكتبله الهاند أوفر.

شكرا يا دكتره علي المعلومات الحلوة بس انا مكنتش بسأل عشان مكسل بس لان زي مانتا قلت فيه استثناءات للوزن غير اللي بيبقي مكتوب في السيت زي مثلا مصر للطيران و احيانا السعودية علي شوية استعباط مننا ممكن تعدي ب 50 ولا 55 كيلو للراس

ياتري الاستعباط ممكن يجيب نتيجه بردو مع خطوط الطيران دي؟؟؟

مفيش فايدة... المصري هوه المصري!

يا عم الحاج إنسى بأه نظام الميدل إيست دوت (صباح الخير يا لولا) :aslam:

الناس دي ماشية صح ، تحب تجرب تصيع عليهم ؛ جرّب! بس خللي في جيبك كبشت يورو عشان لو لقيت حد ماسكك من قفاك ؛ تدفع زي الشاطر!

و بالنسبه للحرايق نص المواعين بتاعة البيت عليها اثار جرايمي

برادين و 3 كنكات و طاسه

الذيذ بقى ان مره البراد سخن جدا و وقع لوحده من علي البوتاجاز و نزل علي الموكت عمل حريقه بس ربنا سلمها

نفس الدماغ البايظة بتاعتي... يبقى انتا ما ينفعكش غير الكيتل (Kettle) الكهربا. آخرها لما تنساها ، هتفصل ، وترجع انتا - لما تفتكر إنك كنت بتحضّر شاي - تسخّن الميّه تاني!

علي العموم النوع ده من الشخصيات اللي الرامات بتاعته ضعيفة بتلاقي ربنا معوضه في حته تانيه و هتلاقي كلامي صح "هتلاقي ان ذاكرتك العامه قويه و مبتنساش الاسمي بسرعة زي الناس التانيه و ذكاء عالي نسبيا و ثقة بالنفس و علاقات اجتماعية جيدة وسط الزملاء مع حب الزملاء" ده اللي انا لاحظتوا من خلال تحليلي لكام شخصية زي حالاتكو

آوت منّك المرّادي يا حسيني...

الرامات البايظة بايظة في كل حاجة... وبالذات الأسماء! وياما أخرج أروح مشوار ، وارجع البيت كذا مرة عشان نسيت حاجة! مرة أنسى الموبايل ، ومرة أنسى مفاتيح العربية ، ومرة أنسى النضارة!

وكل مرة أقلع النضارة ، وآجي أدور عليها وانا خارج (مانا ما باحتاجهاش جوّه البيت)... أقلب البيت عليها! وكل ما يحصل الموقف ده ، أقول: ما كانتش النضارة دي ينفع أتصل بيها (عارف التليفون اللاسلكي ، لما الدراع Handset بتاعته تتوه منّك ، وتضغط ع الـ Locator ف القاعدة بتاعته ؛ تقوم الدراع تفضل تصفّر لك لغايت ما تلاقيها؟).

ومرة أقول لو الكتاب يبقى كده برضه ، وساعات ريموت الريسيفر أتمنى إني أتصل بيه برضه!!!

إنسى!

بس اهم حاجة انت نسيت تحكيها........

ايه رد فعل هند علي اللي حصل؟؟؟؟

فعلاً ، دي الدماغ الحريمي...

تعرفي إني كنت هاكتبها ، وبعدين قلت مش فارقة أوي؟!

بصي يا ستي...

طبعاً ، أساسي لازم نسمع الدروس المستفادة ، وشفت نتيجة عمايلك؟ والكام جملة بتوع ماما ، اللي ربنا ما حرمنيش أفضل دايماً أسمع مواعظها ؛ حتى لو من حد غيرها!

وطقم حلل T-Fal فرنساوي جديد (90 دولار من لحمي الحي bv:- ) ، بدل الحلّة اللي باظت! ماهو (دي كانت أحلى حلة عندي ، وهوه ده المقاس اللي باستخدمه وباطبخ فيه كل يوم وانا لوحدي)!

وكمان حلّة بتطبخ الرز (كهربا ، بتحطي الرز والمية ، وتضغطي الزرار ، وتتكلي انتي على الله) ، برضه بتاع 50-60 دولار.

أقدر أنطق؟! :waf:

هاهاهاهاهاهاها ... آهو لسّه باكتب الرد آهوه ، وشوفي بنت مصر بتقول إيه!!!

لأ ويقول لك كنّا رجّالة... و وقفنا وقفة رجّالة...

صباح الفل يا بنت مصر :bro:

ازيك يا دكتور تهامي انا اول مره ادخل اماكن عامه ومنتديات انا مش عارف اعمل ايه الوقتي واوعا تقولي اوم روح لاني مسادات عملت ريجستراشن

يا باشا ، ومين قال لك بس تمشي ، مانتا منوّرنا هنا...

واحنا يعني شايلينك على دماغنا؟!

وأسمح لنفسي أختلس دعوتك لدكتورنا الشامي ، واقول لك ربنا يوعدنا بالحج السنادي ، واعرف أظبّط ظروفي ، وساعتها نشوفك هناك.

إلى أن تشوفنا انتا بعد كده في كندا يا Pre لسه :D

[hamoudi]

الشركة المصرية تعلن خاجتها الى اطباء للعمل على البريمه

تليفون رقم 00000000 هذا مختصر الاعلان الذي رايته الجمعه السابقه فى جرنان الاهرام ولااعرف لماذا تذكرت التهامي كبير اطباء البريمه ولااعرف لماذا تمنيت ان كل طبيب يفكر فى التقديم لابد من قراءه موضوع الهاند اوفر بتاع التهامي ولكن سرعان مارجعت عن ( واجبي ناحية الهيئة الاجتماعي)ذلك لانه فى هذه الحاله لن يتواجد اى طبيب ى اى موقع حفر ولا جوار البريمه يبقى العمال الغلابه ذنبهم ايه؟!؟!؟؟!؟!؟!؟!؟!؟!؟!؟؟!؟!؟!

[precanadian]

وأسمح لنفسي أختلس دعوتك لدكتورنا الشامي ، واقول لك ربنا يوعدنا بالحج السنادي ، واعرف أظبّط ظروفي ، وساعتها نشوفك هناك.

إلى أن تشوفنا انتا بعد كده في كندا يا Pre لسه :

اكيد ربنا يوفقك ويكرمك يارب --وشكرا علي استضافتي في التوبك--وربنا يكتب لك الحج هذا العام واكيد لو جيت مكه لازم اشوفك- وعلي فكره احنا ولاد كار واحد white coat

[Digital]

الا صحيح يا دوك انت قلت ان ليك واحد صاحبك مبرمج في كندا، الناس هناك محتاجين التخصص ده يعني فيه نقص و لا الهنود اكلوا كندا هيا كمان؟

انا شغال في تخصص عالي اسمه Oracle Applications Technical Consultant في تاني اكبر شركة عقارات في الشرق الاوسط يا تري تفرق معاهم دي في حاجة؟

و معايا شهادة عالمية اسمها OCP في الاوراكل علي شوية دبلومات برمجة من جامعة المنوفية علي شوية شهادات تويفل من الجامعة الامريكية علي شوية شهادات خبرة من مصر (حتي انا مش معترف بيها) المهم يعني

فيه احتياج للمبرمجين هنا و الدنيا حلوة معاهم و سهل و لا صعب الناس دي تهاجر؟

بنتقل عليك يا باشا و شكرا مقدما

[moheltohamy]

يااااه... ورجعنا بيتنا تاني... الـ Main Pass 1 ، أرض العزة (وش زازو - Lion King) :happy:

أعتذر جداً عن الاختفاء من التوبيك بتاعي ، اتشغلت هناك قبل ما امشي ؛ بشوية مشاكل ف الشغل ، على القليل من المذاكرة

وجيت عديت امبارح ع الأهوة بتاعتي دي... بس ما قدرتش أرد...

قلت ما يصحّش أدخل للولاد بإيدي فاضية

عموماً شوية وننزل لنا حلقة كده ع الماشي ... نرجع نشتغل ف الأهوة بتاعتنا تاني!

هابدأ أكتب لي شوية حالاً...

الشركة المصرية تعلن خاجتها الى اطباء للعمل على البريمه

تليفون رقم 00000000 هذا مختصر الاعلان الذي رايته الجمعه السابقه فى جرنان الاهرام ولااعرف لماذا تذكرت التهامي كبير اطباء البريمه ولااعرف لماذا تمنيت ان كل طبيب يفكر فى التقديم لابد من قراءه موضوع الهاند اوفر بتاع التهامي ولكن سرعان مارجعت عن ( واجبي ناحية الهيئة الاجتماعي)ذلك لانه فى هذه الحاله لن يتواجد اى طبيب ى اى موقع حفر ولا جوار البريمه يبقى العمال الغلابه ذنبهم ايه؟!؟!؟؟!؟!؟!؟!؟!؟!؟!؟؟!؟!؟!

والله يا باشا أنا عمري ما شفت إعلان لأطباء في مجال البترول. دايماً الوظايف اللي بيُعلَن عنها بتكون في مجال الحفر وبس. شركات البترول ، يا بتكون متعاقدة مع مستشفى ، يا بتجيب دكاترة تبعها ، بالعلاقات الشخصية مع السادة المديرين بتوعها.

ولو عندك يا ريس حد عاوز تديلُه دروس تخصصية في طب البراريم (في مقولة أخرى ... البطيخ) ؛ عنينا ليك ، ونديلك الهاند أوفرز اللي بجد بقى... بتاعة البريمة الفعلية!

علي فكره احنا ولاد كار واحد white coat

يا راجل... طلعت طبيب يعني!

إنتا تتحسد على وجودك في مكة بجد.

بس بصراحة حياة 11 شهر شغل دي وشهر واحد أجازة ما اقدرش عليها!

دانا لما باقعدلي كام يوم زيادة (لسوء الأحوال الجوية ، ومفيش طيران مثلاً) ، باذلهم ، وبتبقى قعدتي بجميلة!

ولاّ لما جيت المرّادي بدري أسبوعين (قطعتهم من أجازتي السمينة - اللي كنت هافطس فيها م الحر في مصر) ، كانت بجميلة ، وانا اللي أنقذت الموقف ، وكتّر خيري :lol:

دخلت امسي واسلم واعلن المتابعه وبالمره اقولك

ياريت تحاول تركز بقى وتذاكر وانشاء الله الكل حيقدر

انشغالك ..

والله يا توهامى بجد بحب ادخل ديما موضوعك بس

عشان اغير جو واستمتع بطريقتك فى الكلام.

ربنا يوفقك ..

ويعينك على خدمه القهوه والزباين

والله يا لولا... وجودِك دايماً بيسعدني...

يمكن أنا مُقصّر معاكي شوية ، وبقالي زمان لا عديت عليكي ن ولا حتى طلبت كبايت سحلب من عندكو!

بس البركة في حسام... هوه يمكن مزعّلك شوية ؛ بس برضه ده الكفيل بتاعك ، وأول واحد اشتغلتي عنده ف المنتدى ، وأول واحد اتعلّمتي عنده أصول الصنعة :lol:

اخويا العزيز وصاحب القهوة تهامي باشا:

طبعا انتا عارف اني لسة في اجازتي وزحمة الاجازة ويوم عند ماما ويوم عند حماتي وانتا جاي تقعد معانا ولا على النت وياعم سيبك من الكلام دة وتعالى اقعد معانا وزي ماكون بسرق نفسي عشان ادخل المنتدى.

بس الحقيقة مقدرتش امسك نفسي لما لقيت المنتدي يحتوي على جماعة نسسايين زيي وواحد نفسة كل حاجة ممكن يتصل بيها او ترن عشان يعرف مكانها. المهم اني كمان نفسي يخترعو شنطة زي شنط الستات للرجالة الواحد يقدر يشيل فيها الموبايل والمحفظة والباسبور والكاميرا والنظارة ويمشي مش شايل هم نسي اية وافتكر اية او يذدلل لمراتة والنبي تشيليلي الحاجات دي في الشنطة. المهم اني لما اخيرا وصلت لفكرة جهنمية اكمني نظري ضعيف وعامل نظارة نظر والتانية شمس نظر ومبعرفش امشي منغير الاتنين قررت يبقالهم جراب واحد واشيل دي احط دي عشان مانساش اللاتنين (شفت النصاحة) المهم من اسبوع نازل الصبح قلت اقلع نظارة النظر والبس الشمس وياريس ابص ملاقيش الجراب ولا النظارة وادور في الشقة واقلبها كلها ولا الهوا. اقول ياترى نسيتها فين. ياخونا والنبي دورو معايا على النظارة دانا مبعرفش افتح عنيا في الشمس وببقى ماشى مكرمش عنيا والنظارة جديدة وغالية ياعيني لسة هشتري واحدة تانية واقول للراجل غير العدسات والفيلم الهابط دة. والبشر كلها تدور متلاقيش النظارة. واستعوضت ربنا في النظارة. وبعد كام يوم اسيب العيال مع ماما واخد مراتي نشتري واحدة تانية من عباس العقاد. وانا بتفرج على النظرات الاي كلام اللي في مصر ومراتي بتبصللي وتقوللي متزعلش وانا بقولها المشكلة في الوقت وقرف الراجل ويقولي دي متتقلبش ودي الكيرف بتاعها عالي ويحسسني ان عشان يعملها هيخترع طيارة. الاقي ماما بتكلمني ومبسوطة اكنها لقيت كنز علي بابا وبتقولي انا لقيتلك النظارة ياسامح اسبسط الحمد لله فلوسك حلال يابني. قولتيلها ازاي ياماما داحنا كان ناقص نكسر الحيطان وندور وراها. قال اية السباك وهو بيغير شطافات الحمامات بتاعة البيت يلاقي النظارة في الكيس اللي فية الشطافات الجديدة وكراتينها. قال اية الواد ابني الصغير حط النظارة في الكيس مع الشطافات وطبعا هو مش فاهم اي حاجة ولا مشاكل عندة.

اخيرا اسجل اعجاب ومتابعة ياتهامي باشا زعيم العصابة. واقولك روح زاكر احسنلك ياريس. واحنامعاك وبندعيلك كمان توكل على الله وتصحبك الدعوات.

هوه م الواضح إن موضوع النسيان ده ليه مواقف مع كل واحد فينا ، لدرجة إنو يستاهل يتعمل له موضوع منفصل wst::

وحكاية النضارة دي بالذات أنا متأكد إن ليها مغامرات مع الكل! مأساة بجد!

راجع قطر إمتى صحيح؟

الا صحيح يا دوك انت قلت ان ليك واحد صاحبك مبرمج في كندا، الناس هناك محتاجين التخصص ده يعني فيه نقص و لا الهنود اكلوا كندا هيا كمان؟

انا شغال في تخصص عالي اسمه Oracle Applications Technical Consultant في تاني اكبر شركة عقارات في الشرق الاوسط يا تري تفرق معاهم دي في حاجة؟

و معايا شهادة عالمية اسمها OCP في الاوراكل علي شوية دبلومات برمجة من جامعة المنوفية علي شوية شهادات تويفل من الجامعة الامريكية علي شوية شهادات خبرة من مصر (حتي انا مش معترف بيها) المهم يعني

فيه احتياج للمبرمجين هنا و الدنيا حلوة معاهم و سهل و لا صعب الناس دي تهاجر؟

بنتقل عليك يا باشا و شكرا مقدما

صاحبي ده أساساً تخصص داتا بيز ، وكان طالع من مصر بكورس أوراكل برضه على أمريكا. وشغال حالياً في شركة مالتي ناشيونال ومكتبه ف الداون تاون في تورونتو. وماسك صيانة الداتا بيز بتاعة الشركة.

فالمبرمجين محتاجينهم هناك ، ما تقلقش م الموضوع ده. أما حكاية "صعب الناس دي تهاجر" ؛ فــ ده مالوش علاقة بده. الهجرة بتتحسب بالنقاط ، أما بخصوص الشهادات اللي معاك والكورسات وكده ؛ دي مع نفسك بقى هناك ؛ السفارة مالهاش دعوة بالموضوع ده!

وأحمد لما اشتغل هناك بالمناسبة ؛ محدش سأله على شهادات الخبرة (اللي من أمريكا) ، ولا الشهادات التقنية اللي معاه (MCDBA مثلاً) ولا الطراوة!

تعرف تعمل الموديول ده... اتفضل. ما تعرفش ... مع السلامة!

السلام عليكم و رحمة الله و بركاته .....................

ازيك يا دكتور تهامي و حشني جدا و الله ........ انا مستمتع جدا بكل ما كتبته في الهاند اوفرز .... متشوق لسماع الباقي

ياللا كمل و متعنا زي ما دكتور الشامي و ايهاب سالم و الباشا س س

اعذرني على فترة الغياب اللي كنت مفروض ادخل اسجل اعجابي و متابعتي بس الاجازة بقى .... الواحد مكانش له خلق يفتح pc حتى

بمناسبة الكلام عن النسيان

تعرف اني كنت بدور على الموبايل و انا بكلم فيه .... بعقد ادور في جيوبي و ايه ببدل بايدي عشان ادور بايدي التانية

و في الاخر باسال اللي بكلمه انا مش لاقي الموبايل بتاعي مش فاكر وديته فين ؟

لأ بصراحة يا مديح ... إنتا كده عدّيت :winner:

أنا مرة نزلت لغاية العربية تحت ، وافتكرت إني نسيت مفتاح العربية فوق ، وطلعت تاني أجيبه ... ألاقي ماما بتقوللي "ما المفتاح في جيبك يابني أهوه"!!! :blink:

ياترى انت فين يا(مرزوق)

قصدى يا دكتور تهامى

تحت النظر يا ريس... بس مشاغل انتا فاهم يا مدير!

وتعيش وتفتكر يا معلم حسام ، وما نتحرمش منك أبداً...

ايه يا دكتور رحت فين

هما علشان قالولك ذاكر فانت ماصدقت

ذاكر ماشي بس اظهر برضة

وبعدين في مدمنين هنا علي التوبيك ده وعاملين قلق جامد علشان ميعاد الجرعة اتأخر جامد

يا سيدي عنينا ليك وللرجّالة ... بس زي مانتا عارف ف الكار بتاعنا ده... هيه الشمة الأولانية بس ببلاش ، بعد كده...مزِّج نفسك بفلوسك... إحنا مش مأطوعين لكو ياض منّك لوه!

وبرضه ، المفروض - أصول الكار - نئطع الصنف شوية ، ونشححه م السوء ؛ عشان السعر يعلا لمؤاخذة...

ورانا عيال وامهم يابا الحاج!

تم تعديل 30 أغسطس 2008 بواسطة moheltohamy

[drbeso]

قولولي يا جماعه اعمل ايه ؟؟

تعالو نحسب حبه ارقام كده

انا بكالوريس صيدله حلو؟؟ كده بتاع 20 درجه

+لو هيبقى عندي خبره 4 سنين =21 درجه

+العمر بتاع 24 او 25 =10درجات

=51 درجه

فاضل على 67 بتاع 16 درجه انا مش مجوز

يبقى انا محتاج لو انا عايز اخش على كيبك اجيب

في الانترفيو 16 في الفرنش تفتكرو هل في طريقه احسن لاني لسه هبدا ازاكر فرنساوي من الصفر

سؤال اخر انا سمعت ان كيبك ميزتها الوحيده عن اي حته تانيه انك مش بتمتحن لا في الانجليزي ولا في الفرنساوي حقيقي الكلام ده؟؟؟؟؟

هو انا بقيت لوحدي كده ليه في الموضوع ده ..........؟

[moheltohamy]

أحكيلك عن فيوتشر شوب ، وده يا سيدي حاجة زي كمبيو مي في القاهرة ؛ زي سوبر ماركت كبير لكل مستلزمات الكمبيوتر ، وفيه برضه أجهزة كهربائية والكترونية وديفيديهات أفلام وجيمز وكده برضه. وبينه وبين البيت رُبع دقيقة مشي ؛ يا دوب أعدي الشارع!

رحنا يا سيدي نشتري لهند لاپتوپ منه... أخوك طبعاً عنيه رمت على ماك (ماكنتوش يعني – وش محمد رضا في 30 يوم ف السجن). خصوصاً إنه كان بس يركب عليه سوفتوير ، ويبقى ديوال بووت ، يشغل الويندوز والـ Mac OS. ومن منطلق إني طول عمري الكمبيوتري (تالتة إعدادي سنة 90) باسمع عن آپل ، وإنه أحسن وأكتر استقراراً من الآي بي إم كومپاتيبل (حتى ما زلت أذكر رسم كاريكتيري لواحدة بتعيط وبتقول "لماذا لا يصبح جهازي الـ PC مثل الـ Mac؟!" ، وكان الكلام ده على بداية دخول فكرة الـ Plug 'n' Play عالم الـ PC ، رغم وجودها مع Apple منذ نشأته!)

قلت والله فرصة ، ونجرّب الموضوع ده ، وأكيد الشعبية الرهيبة اللي واخدها نظام الماك في كندا وأمريكا مش من فراغ ولها ما يبررها! لقيت إن لازم تشتري البرنامج بتاع الديوال بوت ده بميتين دولار باين ، وبرضه هيحمّل على السيستم ، وسرعة الجهاز هتبطأ. بالإضافة إني عارف إن كل حاجة في الماك بفلوس. وكملت بهند اللي عملتلي إحباط ، وانا موش عاوظ... وانا مش لسّه هاتعلّم كمبيوتر من أول وجديد ، و.... باااس خلاص ، مش جايبين!

ومعلش يا كريم... أوامر بأه انتا فاهم! كريم ده كان اللي ماسك جناح أپل في فيوتشر شوپ. واد مصري زي العسل بتاع 20 سنة كده. الواد بيتكلّم إنجليزي أحسن من ستيفن هاربر ذات نفسه (رئيس الوزرا الكندي) ، وشكله أساساً أوروبي! والغريب إني لقيته مش مبسوط هناك ، وعنده مصر أحسن ؛ وآل إيه الواحد بيشوف ناس لبسهم مش محترم (ما تبصّلهومش يا سيدي!) ، والآذان واحشه في مصر (كتير على فكرة من اللي بره مصر بيفتقدوا الآذان في الجوامع). المهم أخدت منه البيزنس كارد بتاعه ، وقلتله على اتصال.

وانا في مصر ، في أول فبراير ، وكلها يومين تلاتة واطلع كندا (تاني مرة) ، وباتمشى في سيتي ستارز بالليل ، باشتري شويّت حاجات هاخدها معايا... وإذ فجأتن ... نسمة هوا باردة جايّة من كندا ؛ خلّت شعري الجميل يطير (زي إعلان هولز بتاع زمان) ، وحسّيت إني عبرت حدود الزمان والمكان ، وباتمشّي في فيوتشر شوب اللي أُدّام البيت... وأفوجأ بواحد ماشي أدّامي شكله بيقول إنو كندي! إنتا يا عم ... إيه اللي جابك هنا؟ بصّلي باستغراب (كان مر بتاع 5 شهور) ؛ أولتله مش انتا شغال في تورونتو في فيوتشَر شوپ؟ آللي آاااه ، وانتا اللي سيبتو الأپل واخدتو توشيبا. آه يا سيدي إحنا J وإيه اللي جابك هنا؟ حد يعمل العملة السودة دي برضه؟ قاللي "الوالد توفّى من كام يوم"! آم صو سوري يا كريم! وعرفت إن البيه راجع كندا بعدي بيومين ؛ قولتله خلاص نتقابل هناك. وعدّيت عليه في فيوتشر شوب اللي أدام البيت بعدها آلولي إنه اتنقل في الفرع اللي في داون تاون.

المهم ، نرجع تاني لموضوع شرا اللاپتوپ...

بدأنا نقارن بين التوشيبات والسونيهات والديللات والإتشپيهات (طبعاً الإيسَر كان إكسكلودِد تماماً من البحث عشان هند متعقدة منّه في شغلها في مصر!). نلاقي البنت اللي ماسكة الجناح ده (إسمها Marvi بالمناسبة ، بنت هندية أو باكستانية مسلمة وجوزها اسمه محمد ، عشان كده فرحت أوي لما عرفت إن أسماءنا هند ومحمد :blink: ).

استغربت جداً من حاجة لاحظتها في كندا... لما حد بيسألنا عن أسماءنا ؛ في البنك مثلاً ، سيلفيا واحنا بنملا الأپليكيشن عشان نأجّر الشقة ، ... إلخ. بيسألونا عن أسماءنا ، بنقول لهم موهامِّد آند هند... وات؟! إكسكيوز مي! واللذيذ إن الواتّاية دي مش عليّا انا bv:- دي على هند! الإسم أبو 3 حروف عربي و اربعة انجليزي ده هوه اللي كاسفنا في كل حتة! محمد ده طلع إسم معروف جداً في كندا ، ماهو المسلمين موجودين في كل حتة ، وإسم محمد مش إسم نادر ما بينهم! (افتكرت لما كنا في أولى طب ؛ كنا دايماً نشوف أسماء مؤلفين الكتب جمب إسم كل واحد منهم M.D. ، وهاني – واحد صاحبي انتا ما تعرفوش – يسأل ؛ هيه إيه حكاية الإم دي اللي جمب كل واحد منهم ، وأسامة – واحد صاحبي تاني انتا ما تعرفوش – يقول له : يمكن يا هاني دي إختصار محمد ، وهاني يتنقط "همه كُلُّهم محمدات؟!")... المهم ، اتعوّدنا لما حد يسألنا عن أسماءنا ؛ أنا موهامِّد ، وهيّه هند إتش إي إن دي ، وممكن إتش إي إن دي من غير هند! آهو عشان نوفر الـــ "وات؟" !

وعشان كده لما مارفي سألتنا عن أسماءنا ، وبنقوللها موهامِّد آند هند ولسّه بنسبللهالها... آلتلي آي نو محمد آند هند ؛ لايك سند آند هند ؛ بلاد الهند والسند وبلاد تركب الأفيال يعني! وحكت لنا قصتها هيه وجوزها!

وآلتلنا عندي ليكو فكرة... إيه رأيكم تاخدو لاپتوپ توشيبا ؛ واحد اشتراه امبارح ، ورجّعه في نفس اليوم ، والجهاز زي الفل ومفيهوش ولا كلمة ، وهادّيكو عليه ضمان 3 سنين مجاناً (مش سنة) ، وهاعمل لكم خصم 300 دولار.

طبعاً عنينا فنجلت ، و وداننا طرطقت ، وهند عمّالة تهزّلي في راسها وتزغد فيّا (نظام إلحقها قبل ما تعقل!)... وانا بأه ... بس أصله يا مارفي مستعمل ، وبرضه الواحد عاوز يفرح كده وهوه بيقشّر السيلوفان من عليه... ! واحمد الديب هيتنقط مني (هتدفع ف السيلوفان 300 دولار؟!)...

طبعاً هيه الطبخة كانت مستويّة جاهزة ، والأسلوب المصري المرقّع ده مالهومش فيه! لكن آلتلي ، طيب هاديلكم معاه شنطة هدية (بتاع 50 $)! وانا (شنطة إيه بس ، مش الفكرة... ما هو أصل ...) طيب ومعاكم 14 يوم ، لو ما عجبكوش اللاپتوپ في أي وأت تعالو رجّعوه تاني ، وخدو فلوسكو كاملة ، (With no questions) ، يعني محدش هيسألك عاوز ترجّعه ليه!

ساعتها بأه أولت لنفسي : أكتر من كده يبقى افترا الصراحة! ماشي يا مارفي ، كده عدّاكي العيب وأزَح! (Fair enough)... وكان فيه عرض إنك مع اللاپتوپ من حقك تشتري پرينتر إتش پي (All-in-One) بـ 20 دولار! عشرين دولار ويبقى عندك پرنتر وسكانر وماكينة تصوير ... دي مش جايّة حتى تمن الكارتريدچ الواحد!

النكتة بأه إن سعر الكابل اليو إس بي بتاع الپرينتر كان بـ 30 دولار! طبعاً أحمد آللي إوعى تجيبه من هنا... وبعد يومين لئيته اشتراهولنا بدولار واحد من Wal-Mart تأريباً :blink:

على فكرة... أنا زلّيت مارفي كل ما اسألها على حاجة وتقوللي سعرها ، أقول لها دا إيه الأسعار الزبالة دي... دبي تكسب ، دبي أرخص ، دبي أحسن! والبنت تتكسف ؛ وتقوللي معلش الأسعار هنا كده! مع إن المعاملة في دبي – للأمانة – لا بالرقي ، ولا بالضمانات والدلع ده خالص ، ولا بتاخد حاجة بخصم عشان خدت حاجة تانية. وفصال مع الهنود اللي هناك (اللي – بالمناسبة – يختلفوا شكلاً وموضوعاً عن الهنود في كندا ، ولهذا قعدة مخصوصة!)

وتكملةً للسنكحة ع البنت الغلبانة... طيب أنا عاوز نسخة ويندوز ، والدرايفات بتاعة اللاپتوپ يا مارفي. آلتلي ممكن تعمل باك اپ من ع الهارد بتاعه ، والدرايفات ممكن تجيبها من ع النت. هوه ده اللي المفروض بيحصل بصراحة ، لكن أنا بقى اتصدمت (حركات بأه مانتا فاهم!)... إزاي يعني يا مارفي؟! يعني لو الجهاز دلوقتي حالاً حصل له حاجة قبل ما انزّل الدرايفات من ع النت ، أعمل إيه انا بقى؟! أروح أأجّر من سايبر يعني عشان أنزل درايفاته؟! وطبعاً البنت الغلبانة آلتلي طيب أنا عندي باك اپ للسوفتوير بتاعه ، ودرايفاته منزّلاهم من ع النت (عشان عندها واحد أخو بتاعنا ده) ، بس ما تجيبش سيرة هنا (ممنوع الكلام ده ، وحركات القرصنة بتاعتنا دي) ، وخد تليفوني ، وابقى اتصل بيّا ، وانا هاعمل لك نسخة م الديفيديهات دي ، وبكره هاجيبهالك معايا ، واسلّمهالك بره الفيوتشر شوپ (تقولشي بنتاجر في حشيش؟!)

ميرسي يا مارفي mfb:

وتاني مرّة أجيب اللاپتوپ للدياسطي...

قعدت لفّيت على كام فرع لفيوتشر شوپ. وجبت للدياسطي المواصفات ، وبعتّله اللينكات ع الماسينچر ؛ عجبه توشيبا بـ 850 دولار. يا دياسطي ، فيه أبو ألف دولار ده مالوش حل! لأ أنا عاوز أبو 850! يا دياسطي شاور نفسك ؛ مش كل يوم بتجيب لاپتوپ! يا عم أنا مش عاوز غير ده! أقعد أتحايل عليه... يا دياسطي أنا مستحرم البتاع التاني ده ، فكر يابني كويّس! مفيش فايدة. هند نفسها اتفقعت منّي ؛ عايزك تجيبله حاجة ، خلاص هوه حر ، سيبه هوه اللي يختار. قلتلها لو ده واحد ما يهمنيش أمره يبقى خلاص هوه حر ، بس انا باجيب حاجة لاخويا ، يبقى أكيد هاكون بافكر أجيب له أحسن صفقة ، مش بس اللي هوه عاوزه! تقوللي ما يمكن ظروف المادّيات معاه مش ولا بد ؛ يبقى ما تغلّسش ، انتا عملت اللي عليك ونصحته ، والقرار الأخير هوه اللي خده خلاص. إتكتمت! wst::

تاني يوم شفت جهاز تحفة وبـ 900 دولار! أجيبه ولاّ ما اجيبوش؟ قعدت أتصل بيه من موبايلي لما زهقت ؛ ربع ساعة وجرس والبيه ما بيردّش ، وانا أساساً قايل له إني الساعة كذا بالظبط هاشتريلك اللاپتوپ ، موبايلك لازم يكون متاح ، عشان أتصل بيك لو فيه حاجة ، ومتّفقين على كده! ورايح جاي على فيوتشر شوپ ، وسنو ستورم شغالة ؛ وتلج نازل على دماغي ، وف الآخر بعد ما مرارتي اتفقعت ؛ خلاص... بلاها التفكير ؛ هوه مش عاوز التوشيبا أبو 850؟عنينا يا عم الدياسطي... و جبته!

ولما جه البيه أونلاين بعدها بكام ساعة ؛ بيسالني خير فيه حاجة؟ قلتله خلاص جبتلك اللي انتا عاوزه ، وباعمل داونلود للبرامج الـــ Essentials بتاعت أبو سعد (مانتا عارفها)... بس قلت لازم احرأ دمُّه ع الجهاز التاني! وقلتله ع المواصفات بتاعت التاني (إتش پي ، پروسيسور أسرع ، رامات أكبر ، هارد أكبر ، قارئ بصمة ، الواي فاي N). قاللي إنتا بتهرّج؟ ما جبتوش ليه؟!!! إتفضّل يا عم!

نزلت أرجّعهوله... لو سمحتو مش عاوز ده ، وعاوز أبدله وآخد الإتشپي ده ، رحنا للخبير الفني بتاع الصيانة اللي هناك ، فحصه شوية ، واتأكد إن مفيهوش حاجة بايظة ، وسألني عاوز ترجّعه ليه؟ مش عاجبني الأداء بتاعه. من ناحية إيه؟ السرعة حضرتك ، وأنا جاي هابدّله بالجهاز التاني ده. آللي بس ده أحسن ، والسرعة مش هتفرق ، السرعة المهم فيها الپروسيسور والرامات مش حجم الهارد. أولتله م الآخر أنا مش عاوزه ، وعاوز آخد التاني بداله ، فيها مشكلة؟ آللي أبداً ، بس لو بتدور على رأيي ؛ توشيبا يكسب. قلتله شكراً!

ودفعت الفرق ، وأخدت ضمان ع الجهاز التاني (سنة) ، وبرضه ... الـــ 14 يوم إيّاهم لو حبيت أرجّعة تاني وآخد فلوسي!

الغريب إني بالحركة السافلة دي غرمتهم بتاع 200 دولار أقل واجب مالهومش زمب فيها غير إن الدياسطي بيه بيتدلّع! ماهو الجهاز خلاص هيتباع خارج الكرتونة ؛ ما بقاش جديد خلاص! ولو حبيت أرجّع الجهاز التاني برضه غلاسة ، هارجّعه! النظام كده!

ولما جيت السعودية بعدها ، ولسه مش مستوعب النقلة الحضارية اللي اتنقلتها (من السطوح للأرضي – طبعاً لأن مصر في البدروم) ، واشتريت الـــ iPhone من كارفور الخُبَر ، وبعد شوية لما جرّبته ، وحسيت إني دافع كتير (3 تلاف ريال) ، والبتاع مش وهم أوي ، خصوصاً إن الـــ N95 بتاعي كان لسه جديد برضه ، وإمكاناته يمكن أحسن من الآي فون كمان. ورجعت في خلال ساعة ، ولو سمحتو عاوز أرجّعه ، وده الإيصال. خير؟ فيه حاجة بايظة؟ لأ مفيهوش ، بس مش عاوزه! مفيش حاجة اسمها كده حضرتك. يعني اتدبست فيه يعني ولاّ إيه؟ مفيش مرتجعات للموبايلات ولا الفاكسات ولا التليفونات ، وده مكتوب على ضهر الإيصال! كده لبسته فعلاً! والله يمسّيكي بالخير يا كندا! :wub:

موقف نص كم حصل هناك (برضه نقول اللي لينا واللي علينا)...

كنت اشتريت كذا جزمة من Winners ف الداون تاون (سكوتشيا پلازا) ، وبعد أسبوع استخدام ، واحدة منهم حصل فيها فك خياطة! والتانية مع ساعة لبس واحدة كان الكعب بتاعها ناشف جداً ؛ بقيت ماشي أزُك ف الشارع! رحت بالـــ 2 أرجّعهم! جات مديرة الفرع ؛ وآلتلي اللي فك خياطة ده هيرجع ، لكن التاني ده إنتا اخترت المقاس اللي مش مناسب ليك ، دي غلطتك انتا ، واحنا مش مسئولين عنها. اللي فكت خياطة المصنع هياخدها ، ومش هنتدبّس فيها ، لكن التانية دي مش غلطة المصنع ، وبالتالي ما ينفعش نرجّعهاله. ثانياً إنتا لبستها ومشيت بيها وبالتالي ما ينفعش نعرضها للبيع و واحد تاني يشتريها ، وهيه غلطتك إنك اخترت الجزمة غير المناسبة! طيب وهاعرف ازاي إنها مش مناسبة غير لما اجربها ، دانا مشيت بيها أقل من كيلو! آلتلي كنت البسها واتمشى بيها جوه البيت!

ولما رجعت بخيبتي البيت ، طبعاً هند استلمتني! الخايب اللي الناس بتدحك عليه وتأرطسه! واللي مش عارف حقوقه! وقالتلي دي بتهرّج بسلامتها ، وكان ممكن تخوّفها ، وقول لها عاوز ورقة رسمي بخط إيدك إنك ترفضي ترجّعي الجزمة! وممكن تودّيها في داهية بالورأة دي. القانون هناك واضح ؛ من حقك ترجّع أي حاجة تشتريها – حتى لو استخدمتها – في خلال الـــ 14 يوم التالية للشراء ، وبدون إبداء الأسباب (No Questions) ، بشرط يكون معاك إيصال الشراء. غير كده من حقك تشتكيهم! هاقول إيه بس؟ راجل جاي من مصر ... م العالم التالت ، ومش واخدين على كده! :blink:

[hosiny]

ياسلام عليك يا تهامي

والله فصلتني عن الدنيا بتاعتنا في الكام سطر دول

اخدتنا معاك كندا و رجعنا تاني لما خلصنا قراية

عقبال لما نتقابل هناك في محل الجزم ده و نشوف حكاية الوليه اللي عملالك مشاكل دي....

دانا لو مكانك اروح البش الجزمة لمدة 13 يوم بشراب واحد لحد ما الريحة تطلع و اروح ارجعلها الجزمة باسلوب مدام هند و علي الله بقي تستعبط و ترفض.....عشان تبطل تشتغل الناس النضاف اللي جايين من العالم التالت و مش عارفين حقوقهم

[alaashabana]

حقيقى يا تهامى انت تستاهل اعظم تقدير وتستاهل جائزة احسن كاتب ومخرج فى المنتدى وطبعا جائزة احترام وتقدير للعاملين وراء الكاميرا " مدام هند " على تعليقاتها الجميلة

والله بجد انت فعلا بتعيشنا حالة جميلة جدااا وكأننا عايشين فى كندا ..

روح يا شيخ ربنا يبارك فيك ..

[سافو]

شرف ليه يادكتور إن تكون أول مشاركه ليه فى المنتدى عن طريق موضوعك اللى دخلته عن طريق الصدفه

متابع جيد لموضوعك منذ اكثر من أسبوع أقضى اوقات رهيبه لقراءة كل التعليقات ومايحتويه الموضوع من قصص رائعه انا شخصيا إستفد منها

[moheltohamy]

أعزائي : حسيني ، رامي ، علاء ، محمد عيسى ، شاب مصري... شكراً لمروركم.

ومبدئياً أحب أوضّح نقطة بس عشان يمكن تكونوا فاهمينها غلط...

الهاند أوفر أساساً أنا لسّه ما كمّلتوش ، وباكتبه معاكم في الوقت الحالي ، واللي بيتكتب بانزّله ، مش إني كاتبه ، وبانقّطكم شوية بشوية! أبداً والله!

ونوّرتنا يا أخ سافو ، والشرف ليّا أنا بصراحة... وبرضه أنا جاي باقول التوبيك نضيف ومتلمّع النهاردة... خير اللهم اجعله خير. أتاري انتا شرفتنا :closedeyes:

عزيزي م. ياسر ، ورفيق الكفاح/ Phoenician

الهنود اللي في دبي أزبل بكتير من اللي ف السعودية ، يمكن عشان السعودية مش فاتحاها ع البحري زي الإمارات! هناك بتشوفهم همه والباكستانيين ؛ مرميين ف الشوارع كده ؛ زي العمال اللي بتروح تجيبهم من ع الطبلية يعملولك أي عمل ، وتحاسبهم باليومية!

وفعلاً يابو اليُسر... أسوأ جنسية خلقها ربنا بتنطق انجليزي! باكره نفسي وانا باسمعهم بيتكلموه! ولاّ لما واحد منهم يحب يتذاكى ويكلّمني عربي (اللي اتعلموه ف السعودية)... لا يا عم ، دا الانجليزي أرحم!

تم تعديل 3 سبتمبر 2008 بواسطة moheltohamy

[moheltohamy]

يسعد صباح الجميع وشكرا كتير على هالصور الحلوة و عادة الصور بتكون احلى من الواقع لكن في كندا العكس الواقع احلى بكتير من الصورة لأن البلد بناسها و اهلها و ناس كندا واهلها لطفاء و مهذبين و رايقييييييييييين لأبعد حد و الكلام عن تجربة مش قيل عن قال

قد لاابالغ اذا اخبرتكم ان زوجتي انهارت من البكاء ونحن راجعيين من كندا

والله يا ريس ... الكلمتين دول المفروض يتحطّوا في برواز!

والله وحشتني كندا ... وناس كندا ... وجو كندا ... وأكل كندا!

آاااااه يا بلدنا يا غالية :closedeyes:

[moheltohamy]

نيجي لموضوع غريب شوية وسط الهاند أوفر بتاعنا ده... الشحاتين في كندا...

هتُعجَب جداً بالشحّاتين هناك يا ريس ، وهيفتحوا نفسك للدنيا... أنا كنت بافرح أوي لما باشوفهم ، وبيبقى نفسي أديهم حاجة ، بس هند كانت دايماً صاحبة مبدأ في الموضوع ده ؛ سواء في مصر أو في كندا... لا للشحّاتين! :lol:

الشحاتين هناك يابو حميد بيشحتوا برُقيّ! :closedeyes: تلاقي الواحد منهم ماسك آلة موسيقية ، و واقف على جمب عشان ما يسدّش الطريق ع الناس اللي ماشيين ؛ وشغال عزف :trumpet: ، وأدامه علبة أو حاجة تحط فيها أي حاجة لو عجبك عزفه! يعني م الآخر بيقدم لك نوع من الفنون! واللذيذ إنو بياخد تصريح من الحكومة إنو يتواجد في الحتّة الفلانية في الوقت الفلاني عشان هيقدم فنُّه للناس ، ويكون من حقه ياخد منهم مقابل! وبالتالي مش هتلاقيه مستقر في حتّة واحدة ، ولا هتشوفه في نفس المكان مرتين ؛ أعتقد والله أعلم إن الحكومة أو البلدية بتشترط يغيّر مكانه ؛ عشان ما يبقاش فيه ملل للناس ، والناس تسمع كل يوم جديد (وأحياناً كذا مرّة ف اليوم!)

وفي الغالب بتشوفهم في محطات الصابواي (المترو) تحت الأرض يمزّكولك وانتا رايح أو جاي ؛ ومحطة يانج آند إجلنتون ياما شفت فيها ناس من السادة الشحاتين دول. لدرجة إني مرة عجبني جداً عزف واحد منهم ؛ وكان نفسي أدّيلُه حاجة ع الماشي – يستاهلها بجد – لكن هند كان عندها مبدأ ؛ والمبادي ما بتتجزّأش!

ومرة قعدت أتحايل معاها تتصوّر جمب واحد فيهم وهوّه بيعزف (آهي حاجة فلكلور كندي!) ، بس كالمعتاد ... رفضت بإباء وشمم! يمكن عشان كان المفروض نديله حاجة قبل ما نتصوّر معاه... شكلها كان هيبئى زبالة لو ما ادّينالوش ساعتها... نستحي على دمنا بأه!

ومرة واحد من جنوب شرق آسيا كان ف الشارع – برضه منطئت يانج آند إجلنتون – ده بأه كان معجزة! قاعد على الأرض ، وشغّال بالأطراف الأربعة ، وأدامه مجموعة من الطُبَل ، وصاجات نحاس ، وحكاية ، وتسمع عزفة وإيقاعاته ، ولا كإنه فرقة كاملة! وكانت الناس متجمعة حواليه وفرحانين جداً بيه. استمتعنا بالكلام ده شوية ، وكالمعتاد... بلُّوشي!

ومرة كان ف الصابواي ع المحطة نفسها ف الداون تاون (أعتقد كانت محطّة بلور) ، وراجل عجوز قاعد على كرسي ، وبيعزف على أكورديون. أعتقد كانت حاجة م الكلاسيكيات ؛ زي موتسارت وبيتهوفن وشتراوس والعالم دي! عزف الراجل ده بأه اللي حسيته أوي ، مش عارف عشان كان راجل كبير ، ولاّ عشان الأكورديون رجع بيّا لأيام زمان ؛ أيام المدرسة ؛ خصوصاً إعدادي لما كان أستاذ الموسيقى من وأت للتاني ف الطابور الصبح يخللي العيال بتوع فريق الموسيقى يعزفولنا إنت عمري ، وعزيزة بتاعت عبد الوهاب! وكان نفسي فعلاً أدّيله أي حاجة – وكنت لوحدي – بس بجد اتكسفت أديله حاجة ، واعامله زي الشحّاتين! حسّيت إنه راجل كُبّارة ، وپرينس :oldman: ، وإني هاهينُه لو عملت كده! آه وربنا!

واللذيذ الآلات اللي بتشوفها مع الناس دول ؛ كل ما تتخيل bnd5:: ... من أكورديون لأورج لكمان لجيتار لدرامز للقِرَب بتاعت اسكوتلاند! وف الغالب بتلاقيهم لابسين لبس شيك أو لبس يليق بالموسيقى اللي بيعزفوها! إحساس توريستيك مووووت!

وشفت برضه الشحّاتين الكلاسيك بتوع زمان في مصر ، قبل النيو تريند بتاع اليومين دول (أسلوب الغلاسة والسقالة)! تلاقيه قاعد ف الشارع على جمب ، وحاطط قدّامه علبة صغيرة للي يحب يساعده. بس للأمانه دول مش كُتار أوي! واتنقطت مرّة وانا ماشي مع هند قرب البيت ، وكان فيه سنو ستورم ، والتلج عمّال يرُخ بافترا... إذ بي أفوجأ بواحد متكلفت بالچاكيت والآيس كاب والجلافز cld: وماسك في إيده كُبّايت نسكافيه من تيم هورتونز عمّال يشرب فيها ، ومستني الناس تحن عليه! يا عم ملعون أبو الشحاتة ف الوأت ده ، ما تدخل ف حتة متدارية م الزمهرير والتلج اللي هيدفنك تحته ده! لكن على ما يبدو إن الشحاتة بالنسباله هواية بيحبّها ، مش مفروضه عليه!

ومرّه واحنا في برجر كنج اللي جمب البيت بنتعشى ، نلاقي ع الترابيزة اللي جمبنا اتنين شحّاتين طالبين نفس الوجبة اللي طالبينها بالظبط! يا حلاوة! هيه دي المساواة! يا فرحة أهالينا بينا ... ده آخرنا! الاتنين دول كانوا راجل وست ، مأنتمين على ما يبدو (وش هيثم دبور - مرجان احمد مرجان). المهم ، تشم ريحة مش لطيفة خالص ... بقالهم يمكن أسبوعين ولا شهر ما استحمّوش أقل واجب! مسألة مبدأ برضه! وبعدها بيومين برضه اتأخّرنا ف الغدا ؛ أولنا نئضي في المصلحة ، ونروح على عمك برجر كينج برضه... همه نفس الاتنين اياهم!! :blink:

وهند بتحكيلي إن محدش بيعيش شحّات في كندا غير اللي عاوز يفضل شحّات! ده أسلوب حياه ، وعاجباه حياته كده! البوليس مالوش الحق يجبره يغير الحياة دي... هوه حر! يا ستّي دول شكلهم غلابة ، ومش لاقيين ياكلو؟ بس بس ، دانتا اللي غلبان! وقعدت تحكيلي على موقف... واحدة صاحبتها (تيم ليدر في مجال الدعاية) صُعُب عليها بنت شحّاتة من دول ، وعرضت عليها تدرّبها ، وتشغّلها معاها. البنت راحت معاها أول يوم الشركة عشان تاخد تدريب على نظام الشغل ، وما عجبهاش الموضوع ؛ وسابتهم ، ورجعت للشحاتة والسنكحة تاني! مزاجها كده يا جدع!

ومرّة وانا نازل م البيت الصبح ، مستني واحد يعدي عليّا بعربيته. ألائيلك واحد واقف ع الناصية أُدّام البيت بكل أدب ، وشايل في إيده شويّت جرايد ، فبابُصّله باستغراب ؛ ألائيه بيئوللي إنتا ما شفتش جرايد من دي أبل كده؟ لأ الصراحة يا ريس! آللي دي جرايد بتشتريها ، مساعدة منّك ليّا. بكام الواحد؟ آللي اللي تجيبه! أولتلُه أوكيه ، وخدت نسخة ، وادّيته عملاية 2 دولار! الراجل فرح ، وقعد يشكرني ولا كأني مديله ورأه من أم ميت دولار! وبعدين لقيته بيوضّحلي... أنا مش هوملِس! أنا ساكن في شقتي ، بس كل الموضوع إني بعد ما بادفع الإيجار ما بيتبقّاش اللي يكفّي مصاريفي لآخر الشهر! فـــ عشان كده باطلُب المساعدة! خلاص يا عم الحاج ، هوه احنا يعني هنزلّك بجوز الدولارات اللي إديناهوملك؟!

أزبَل موقف حصل معايا بأه... كنا في الصابواي أنا وهند ؛ ألائي واحد محترم كده ولا البيزنِس مان :big_boss: ، جاي يستأذنني في فلوس عشان يجيب تمن تذكرة المواصلات اللي توصّلُه لبيتهم (آل يعني البيه مش من نفس المدينة). اتكسفت منّه الصراحة ؛ وقلتله أوي أوي مفيش مشاكل (ماحنا في البلد اللي الناس بتساعد بعض فيها وكده) ، واقلّب في محفظتي ؛ ألائي أئل ورأه بتاع 20 ولاّ 50 دولار (عينك!) ، أقول لهند شوفيلي معاكل خمساية كده ؛ وهيه تفكّرني بمبدأها الشهير في الموضوع ده ؛ وانا اقول لها معلش يا ستي ؛ ممكن في يوم نتحط في الموقف الزبالة ده! كتمت في قلبها ، وطلّعتلي الخمساية ، إديتهاله ، وثانك يو!

حطها في جيبو ، وراح ع اللي جمبي مُباشرتن ، ونفس الاسطوانة المشروخة! يابن الإيييييييه... هوّانتا منهم؟! وكمّل في العربية بتاعتنا شوية كمان! ونزلنا نبدّل ناخد الخط التاني ؛ ألائي بسلامته نازل معانا برضه! وعمّال يصفّر ويدندن... البيه شكله عنده ربع ضارب! وانا اللي كنت باقول بزنس مان ، وارحموا عزيز قومِن زَل! (وش مديحة يسري – فيلم ياسمين) وطبعاً... لازم الدروس المستفادة ، وانا أولتلك إن أسلوبك ما بينفعش هنا ، ومارضيتش أقوللك لأ أُدّامه عشان عارفاك هتتقمص! خلاص يا ستي الدرس واتعلّمته! ونحمد ربنا إن الدرس أخدته بـــ 5 دولار بس! آدينا اتعلّمنا! آهو أنا كده اللي جه فيّا جون! :fool: