كندا التي رأيتها :)

[MZohairy]

الغربه ياما بتغير يا بوب

ادعيله معايا بالهدايه

[cutey]

منور يا بييييييييبووووووو

الذ حاجه بقى ان جيراني الاتنين يوميا بيروحوا الجيم و بيشيلوا حديد

طب ما أنا و إنت بنروح الجيم و بنشيل حديد

بس رجاله

رجاله قوي

رجاله بجد مش فوتوشوب

لأ بجد أنا مكنتش أفتكر إن تهامي يدحدر بيه الحال و يتكلم في الحاجات دي

أنا مسدوم و كدهوت يعني

ولسه داخلين في بيرسينج و كلام فارغ

أدي أخرة العيشه في إيدمنتون

الواد كان فله شمعه منوره في تورونتو

العيبه متطلعش منه

ميعرفش تشيرش سترييت من يانج سترييت

رحمتك يا رب

ههههههههههههههههههههه

المشاركة دي هلكتني م الضحك :)

حمد الله عالسلامة يا بشمهندس ايهاب

اخيراااااا طليت عالمحاورات :)

لأ بجد منور

[مصرية و أفتخر]

مصرية وأفتخر... ليه دايماً مشاعر راقية وجميلة لازم ولادنا يخبوها ويتكسفوا منها؟! يعني أنا باستغرب إن الأب والأم يمنعوا إبنهم أو بنتهم إنه يحب أو يتعلّق بحد من الجنس الآخر! أنا ما زلت ما عنديش أبناء ، ويمكن عشان كده باتكلم نظري... أنا من نفس الجيل يا فندم اللي لما يحب بنت ، لازم يستخبى ، ويحترس لا الخبر يوصل لأهله ، وساعتها يبدأ يتحط في مشاكل ما تنتهيش!

ليه ما يكونش الحب ده تحت عنينا وإشرافنا ومباركتنا؟ ليه ما نشجّعش ولادنا يحبوا؟ يمكن أكون باتكلم نظري ، بس حاسس إن المنطق بيقول كده!

طبيعي إن البنت هتنجذب لولد ، والولد هينجذب لبنت... إن ما دخلوش في النقطة الشاذة اللي بنتكلم عليها دي!

كون إننا نربي البنت إن الحب عيب ، والحب ده لما تبقي تتجوزي ، كما لو كان زرار هنضغطه بس بعد الجواز! ليها احتمالين بس في نظري:

- يا إحنا عايزين البنت تطلع غير سوية ، وحياتها كلها حواجز وممنوعات ، ونيجي في ليلة واحدة نطلب منها تنسى كل الممنوعات دي ، لأ ونطلب منها كمان تكون عكس كل اللي اتربت عليه طول عمرها ، والنتيجة... مآسي في العلاقة الزوجية تقريباً ما بتخلاش منها معظم بيوتنا!

- يا إما بطبيعة اللايف ستايل بتاعنا في الميدل إيست ، إحنا عاوزين نضحك على نفسنا ، ونصدق إن البنت زي الفل ، بس ما عندهاش وقت للمشاعر عشان ملخومة بمذاكرتها ، ونصدّق إنها ماشية على التعليمات اللا منطقية اللي بنحاول زرعها جواها! وساعتها نبقى هنود!

تهامى

أولا نورت قهوتك يا معلم :WelEgTks:

ثانياً.......it seems u didn't get my point أو يمكن أنا اللى ما وضحتش كفاية......أنا كنت بأتكلم بنفس وجهة نظرك دى....أنا مش عايزة أدفن راسى فى الرمل و اضحك على نفسى و أقول ان ولادى ملايكة و مش بيبصوا على حد ولا بيحبوا حد....أنا بس بأسأل .....لو الولاد(ولد او بنت مش بتفرق لأنى باربيهم على نفس المبادىء, و أنا شخصيا اتربيت زيى زى اخواتى الولاد) حد منهم عنده 13 ولا 14 سنة و جه يقولى انا باحب .....أخلى الموضوع يمشى فى النور أحسن و أدام عينيا؟؟؟؟ يعنى مثلا موافقة بس تتقابلوا فى النادى...مثلا؟؟؟؟ ولا أفهمهم ان لسه مش وقت ارتباط و كده؟؟؟

اللى بيخلى دماغى تلف ان انا شفت بنات أصحابى فى الجامعة بيعملوا البدع......يعنى احنا كنا شلة كبيرة اولاد و بنات و بنخرج مع بعض و رحلات و فسح و دروس و قاعدين على طول مع بعض.....و أهالينا عارفين كل الجروب......كان معانا بنت صاحبتنا كان باباها صعب اوى اوى اوى اوى......ممنوووووووووووووع تكلم ولد ولا تقول له صباح الخير ولا حتى تبص ناحية ولد......طبعا البنت كانت مزبطة نفسها ادام باباها,و من وراه عايشة حياتها معانا و كانت كمان مصاحبة ولد من بره الكلية......و بالتالى سياسة المنع دى انا مقتنعة تماما انها سياسة فاشلة بكل الصور

لكن فكر معايا فى الموقف ده بشكل واقعى.....ابنك او بنتك عندها 15 سنة و بتقولك انها بتحب......هتخلى الموضوع يمشى ازاى؟؟؟؟؟؟؟؟؟ :unsure:

mshehab......يا ريت تدينى رأيك, لأن الموقف اللى حكيتيه عن ابنك رائع, بس لاحظى ان برضه ابنك ربنا يخليهولك لسه صغير......فكرى كمان 5 او 6 سنين هتتعاملى ازاى؟؟؟؟؟؟

تم تعديل 11 نوفمبر 2011 بواسطة مصرية و أفتخر

[moheltohamy]

مين... هوبا؟!

يا قهلاً يا قهلاً (وش اسماعيل ياسين في أي فيلم من أفلامه)

طب مش اللي يدخل كده يقول سالخير... سانّور... العواف... عمتم صباحاً... سلامو عليكو حتى!

مش يدخل يقول لهم عندكوا لمون!

ناقص تقول لنا طابخين إيه النهارده؟!

ثم إن دي الأصناف اللي موجودة ، مش جايبينها من بيتنا سعادتك!

مش عاجبك طبيخنا قول لنا انتا طبيخكم عامل ازاي! ماهي نفس الأصناف اللي هنا هيّه اللي هناك!

أصبر بس ع التقيل جاي كمان شوية ، بس أنا أخلّص ترتيبه بس!

معلش ع التأخير... أخوك كان ملخوم شويتين... أول مرة امبارح أذيع على موجات الأثير (Empty Medic)!

هاشرح لكم بعدين...

وقبل ما أنقل على الجزء الجاي م الهاند أوفر ، هاجي أعلق على المشاركات اللي هنا... هوبفولي مفيش حوادث النهارده

[cutey]

طب ايه ؟؟ طلع فيه مش هوب فولي فيه حوادث ولا ايه ؟؟؟

لالالا ملناش دعوة دا احنا بنستنى الهاند أوفر م السنة للسنة

نداااااااء عاجل ... على من يجد دكتور توهامي ياخويا يتحفظ عليه .. والله الموفق والمستعان ( وش الراجل اللي ورا عمر سليمان)

[مصرية و أفتخر]

طيب...........ع العموم إحنا فى الانتظار يعنى..... :unsure:

أول ما ماسورة الحوادث اللى اتفتحت فى كندا دى تتقفل .....

[moheltohamy]

صباح الخير

معلش بقى العادي في البترول إن الواحد ما بيعرفش إيه اللي بيحصل في آخر اليوم!

فوجئت بالكونصالتانت بيقوللي إن فيه تأخير في وصول تانكات حامض الـ HCl اللي هيضخوه في البير عشان يبدأ بعدها إنتاج البترول! طبعاً الكل هيروّح ، وبناءً عليه ، روّح انتا كمان يا موهامّد وتعالالى تاني بعد 3 تيّام!

نزلت إدمونتون قعدت فيها يومين ، ونقلت من شقتي لشقة تانية في نفس العمارة (بدون أي مناسبة ، Out of a sudden يعني!)

المهم... نرجع لبعض التعليقات هنا...

ViralMind... موضوع خادشة للحياء دي واسعة زي ما هيّه واسعة برضه في مصر ، ومتسابة للـ Common sense بتاع الناس كلها ، وخصوصاً للظابط!

ما تعملليش زي الواد اللي اتمسك في القاهرة مش عارف في أنهي جنينة وعمال بيتغابى على الأمن ويقول لهم إكتبوا إيه الممنوع في ضهر التذكرة!

وبالنسبة للقانون بتاع المساواة ومن حق الست تمشي توبليس في كندا ، زميلتي في الشغل هنا حكتلي عليه وقالت إنها شافته في مانيتوبا ، بس الحاجات دي من اللي يمكن تشوفها مرة في العمر مثلاً! أنا عن نفسي ما شفتوش لحد دلوقتي

هنتكلم في النقطة دي يا عزيزي في الجزء الجاي من الهاند أوفر.

حسيني... أولاً شكراً ليك على المشاركة بتاعتك دي. أنا كنت باسمع عن مواقف مشابهة للي قلته ، بس اللي شاف مش زي اللي سمع طبعاً.

كنت باسمع بلاوي ع السعودية والخليج واللي بيحصل فيهم ، لدرجة إن كان فيه مقولة إنه عادي جداً في السعودية تبعت بنتك الصغيرة تشتريلك علبة سجاير من تحت البيت ، لكن أوعى تبعت إبنك الصغيّر! الولاد دول اللي تحبسهم في البيت!

مش عارف ليه دايماً النظرة لبتوع الفلبين والشرق الأقصى دول إنهم بتوع الحاجات دي! زي ما مشهور جداً عن بتوع تايلاند إنهم بلاد السياحة الجنسية بكل أنواعها!

هل همه فعلاً عندهم مشكلة؟

الحمد لله يا عم إن المواقف دي ما بنتحطّش فيها هنا في كندا. هنا كل واحد في حاله! بعد مشاركتك يا حسيني ، أقدر أقول عمار يا كندا

كيوتي... النقطة اللي كنت باقول عليها دي ، إن مش المفروض إننا نرسب في نفسية الأطفال الكراهية حتى لو ناحية ناس غلط. عارفة مبدأ التعايش بسلام وانسجام مع الحياة؟

يعني مثلاً هنا بالاحظ الأطفال ما عندهمش مشكلة أو بيتقرفوا من الحشرات أو العناكب أو مع الفيران (زي ما حكى إيهاب سالم مثلاً). واللي لمسته هنا في كندا إن الناس مساحة الكراهية جواهم في أدنى معدلاتها. السلام النفسي ومبدأ تقبّل الآخر ده بيدل على رقي الأمم. قارني ده بالحروب اللي حصلت عشان السماح بكتابة خانة البهائية كدين في بطاقة الرقم القومي في مصر! الناس مشحونة بشكل مبالغ فيه على حاجات هايفة!

من ساعة ما جيت كندا ما شفتش عصبية وانفعال زي اللي كنت باشوفه في مصر عشان حاجات أهيف من بلاوس بتحصل في كندا. أعصاب الناس الهادية وانفعالاتهم الغير مبالَغ فيها دي ، بالنسبالي هدف أكتسبها وأعوّد ولادي عليها.

الحاجة التانية ، لو ولادك عوّدتيهم يقرفوا منهم ، ما تضمنيش ردود أفعالهم في أي مكان ، ولا تضمني إن الإشمئزاز يكون واضح على وجوههم في مكان عام. وقبل ده وده... السلام النفسي بالنسبالي هدف زي ما قلتلك.

د. سوسو...

طيب أنا في الأويل فيلد والاستقرار مش موجود عندي بصورة مستمرة. إنتي بقى... قدمتي على شغل في بريمة انتي كمان؟!

يعني لما أغيب شوية... مش المفروض ألاقي صبياني يراعوا الزباين؟ ولاّ خلاص الناس اللي فتحت قهاوي مِلك خلاص ما تراعيش زباين القهاوي اللي اتعلمت فيها الصنعة؟!

عموماً... ربنا يعينك على مشاغلك.

أروح بقى أكمّل أفكار الجزء الجاي. المشكلة إني بجد كل شوية بافتكر جزء ما اتكلمتش عليه ، وباحب الكلام يغطي كل النواحي والمجالات اللي سمعت عنها في البلد دي.

دعواتكم.

[moheltohamy]

يا معلم تومي أنا ونت ماينفعش نقطع على بعد أبدن هيهيهي ممكن نرغي ماشي نشد ماشي بس بص أنا حستناكو تخلصوا حلقات مسلسل how to be gay for dummies :P عشان العيد فرحة و استنى لما الكلام ينضف شوية وأدخل أنا بقى

حاضر يا سبانيش هانم... هندخل ع اللي بعده عن قريب ، عشان تعرفي بس إن تهامي يغسل أكثر بياضاً

ولو إنه مش بياضاً أوي برضه إن جيتي للحق... بس ابقي شاركينا بتجاربك لو عندك إضافات مهمة ، وما تحرميناش من خبراتك

صباحك تلج أبيض

[dcfarouk]

تحياتي يا دكتور تهامي

انا في سؤال محيرني ومش فاهمه لاني لقيت تضارب في الاقوال بين ما يسرده الموجودين في كندا

ما هي الحريه المتاحه في كندا

لو مشينا بمبدأ انت حر ما لم تضر

ده مبدأ مش محدد ومش واضح لان كلمه تضر هنا مش واضحه ..يعني مثلا واحد وواحد بيعملوا حجات مش ولا بد .. همه حرين تمام بس فرضا انا معايا اولادي او انا نفسي بتضرر من الحجات ديه وممكن تضر ولادي علي اساس ان اللي بيعملوه تبعا للقانون الخاص بهم لمشاهده فوق 18 فهل من حقي الاعتراض وهل من حقي التعبير عن الامتعاض بتعبيرات وجهي ولا ده ممنوع او حتي بالكلام ؟؟

ولا همه نفسهم عارفين انهم مخالفين ومعتمدين علي تجاهل الناس

انا شفت ناس كتير وهي بتحكي انها مثلا بتشوف مناظر مش ولا بد في الشارع والناس عادي خالص

وفي موقف تاني حكيته علي ما اذكر احدي الفضليات ان كان في بنت واحد بيصورها وهي بتتعري فقامت واحد ست كنديه قامت بيهم وهزئتهم ومشيو بعدها منكسرين ... هو ايه الصح

يقولك الكلام في الدين ممنوع طيب تمام .... وانت ماشي في الشارع يوقفك واحد يدعوك لدين اخر او يخبط علي بيتك يكلمك علي دينه ويدعوك ليه .. طب ازاي ؟؟؟؟

الكلام في السياسه ممنوع وانتقاد اسرائيل والحض علي كرهها ممنوع .. طيب امال المظاهرات اللي ضد اسرائيل ديه ايه واللي بتسب علني وبتصور المجازر والجرائم بتاعه المرتزقه الاسرائيلين وهل ده مش تشجيع علي كره الاخر ولو انت شتمت علي النت ممكن تتجاب علي حسب ما سمعت

انا عاوز افهم الخيط اوله واخره فين

وتحياتي

[ViralMind]

دكتور فاروق... حضرتك جبت المعلومات دى منين :blink: ::D

معظم الكلام ده ملهوش اى اساس من الصحة يا افندم.

[alaashabana]

السلام عليكم

حقيقى انا بقيت مستغرب حاسس اننا بقينا فى زمن تانى والله

لسة دكتور تهامى كان بيتكلم عن موضوع الشذوذ وان الحاجات دى منتشرة فى بلاد الفرنجة وببصى انهاردة لاقيت ان الحاجات دى كمان بدات نتنشر فى مصر

للساف انهاردة لاقيت على الفيس بوك وعلى مواقع اخبارية كتير خبر ان مجموعه بنى ادمين عاوزين يعملوا مظاهرة يوم 1 يناير لمثيلى الجنس وانهم بيطالبوا بالحرية وعدم تجريم مثل هذة الافعال

دة الرابط يارب استرها علينا جميعا وعلى المسلمين وارحمنا واغفر لنا انك انت التواب الرحيم \

http://egyptnewstoday.blogspot.com/2011/11/blog-post_17.html

[ViralMind]

ما هو الحاجات دى بتخلى الواحد يفكر كتير قوى..

اذا كان الانحلال فى مصر فى اتجاه صعودى و بيقترب مع الوقت زى ما فى الغرب... يبقى هتفرق فى ايه انك تعيش هنا ولا هناك؟ ولا هتفرق فى ايه تربية العيال؟ ما كله انحلال.

صحيح مفيش وجه مقارنة بين الغرب و مصر رغم البلاوى اللى بتحصل.. بس برضه الاتجاه صعودى بشكل مرعب.

[moheltohamy]

ندخل في الجزء اللي بعده من الهاند أوفر يا جماعه ، يمكن ده يجاوب على بعض الاستفسارات اللي في دماغكم... فيه جزئين تانيين أنزلهم بعد ما أشوف آراءكم في الجزء ده...

حاجة تانية من الحاجات اللي راعبة الناس إنها تعيش في كندا ، أو في الغرب بوجه عام! الجنس!

الناس شايفين الغرب ده عايش حفلة جنس يومية ، وهيصة بقى وأي حد مع أي حد ، واللي ما يشتري يتفرج! ومفيش حاجة هناك اسمها شرف أو غيرة وكدهوت! ويمكن في النقطة دي احنا متأثرين زيادة شويتين بالأفلام الأجنبي اللي ناقلالنا الصورة المبهرجة من الحياة الغربية الأمريكانية ، بالرغم إن الحياة الأمريكية نفسها مش كده! فاكر انتا الأفلام المصرية زمان لما البطل اللي نازح إلى القاهرة من أقاصي الصعيد أو من عمق الأرياف ، وهمه بينصحوه وبيحذروه على محطة القطر (المكان اللي لازم تتقال فيه كل حاجة في آخر لحظة) ، ويقولوله (خللي بالك يا حسنين يا ولدي من حريم ماصر) ، وييجي مصر يلاقي الستات اللي في الشارع كلهم تحية كاريوكا في شباب امرأة!

تعرف إني كنت باسمع من زمان حواديت من ناس اصحابي عن شارع جامعة الدول العربية في المهندسين ؛ لدرجة إني والله العظيم كنت متخيل هاروحه هالاقي إيرما لادوس وصاحباتها واقفين ع النواصي وبيعاكسوا الولاد اللي يمشوا هناك! ولما كبرت واستقرّيت في مدينة نصر ، وبقيت رايح جاي ع الشارع ده ، وبالذات لما هند اشتغلت هناك... ولا الهوا يا عم الحاج!

نسمع عن دبي بلاوي سودا ، والبروستيتيوتس اللي ماليين شوارعها من روسيات لإثيوبيات! ولمّا رحت دبي أول مرة مع بداية شغلي في ترانس أوشن... والاقيلك فيه ملف تقديمي بتديهولنا الإدارة فيه معلومات عن دبي ، ومنها تحذير إن خللوا بالكو ياجماعه... البروستِتيوتس موجودين صحيح ، بس الحكومة الإماراتية لا تسمح بالمسخرة! وأنزل دبي يا عم الحاج زيارتين ، وألف فيها واتفسّح... ولا البطاطس!

أروح جنوب أفريقيا ، وفي أول يوم وقبل بداية الكورس ، بيعملولنا Induction للبلد وللمبنى وللكورس وكدهوت ، وألاقي الراجل بيقول لنا – من ضمن كلامه – إنو خلّو بالكم ؛ 30% من النساء في جنوب أفريقيا ما بين العشرين والخامسة وتلاتين عندهم الإيدز! لكن – على ما شفت – البلد نضيفة وزي الفل... وما فيهاش إيرما لادوس برضه!

نسمع عن شوارع الداون تاون في تورونتو (چارفيس وتشيرش وشيربورن) ، والبروستِتيوشن هناك رسمي ، ومعاهم الـ pimp بتاعهم كمان! وحتى في المحلاّت نوع الجزم الحريمي اللي بتلاقي فيها الكعب الرفيّع العالي اللي عامل زي الإبرة ده بيسمّوه هناك Hooker heel ، يعني الموضوع رسمي بجد يا عم الحاج... وأروح ألف الشوارع دي ، ومتخيّل هاشوف فضايح! إنسى يا عمرو! البلد دي طاهرة وشريفة ، وقمة الأدب والعفاف!

يكونش العيب بقى في الدياجنوزيس؟! وده فعلاً بيفسر كلام الكاتب محمود السعدني لما كان بيتكلم عن أمريكا كما رآها... إنك لو سألت كل واحد راجع من هناك هتسمع ردود مختلفة ، كلها أمريكا! هتلاقي اللي يقول لك دي بلاد نضيفة ومنظمة وكل حاجة ماشية صح ، وهتلاقي اللي يكلمك عن الثقافة والتحضر والاحترام بين أفراد المجتمع ، وهتلاقي اللي يكلمك عن الفلوس ومستوى المعيشة العالي والشوبنج الرخيص جداً ، وهتلاقي اللي يكلمك عن المدنية والحضارة والمتاحف والأماكن السياحية ، وهتلاقي اللي يكلمك عن السكس وحريمها اللي من غير هدوم! وزي ما قالها السعدني... كل واحد بيشوف مرآة نفسه الداخلية فيها ، واللي بيدوّر على حاجة هناك هيلاقيها.

مثال أسهل عشان تتخيله... العرب في نظرتهم لمصر. فيه منهم شايفها قيادة سياسية في المنطقة (وإن كنت أشك في الوقت الحالي) ، وفيه اللي شايفها بلد متحضرة ومتفتحة ومنارة إعلامية وثقافية ، وفيه اللي شايفها بلد سياحية وعريقة وصاحبة حضارة وتاريخ ، وفيه اللي شايفها بلد إسلامية ومنارة إشعاع ديني سواء إسلامي أو مسيحي أو حتى يهودي ، وفيه اللي شايف بناتها بروستِتيوتس وبينزل الأجازة الصيفية على مصر عشان... ينبسط شوية!

اللي رايح وفي دماغه فكرة مسبقة عنها ، ورايح مخصوص عشانها ، هيلاقيها ، ومش هيشوف ولا هيلفت نظره غيرها.

في صيف كندا هتشوف الناس لبسها... إحم... مرحرح شويتين! بس صعب تحس إنه يحض ع الرذيلة! أنا مثلاً – في أغلب الأحوال يعني – بابقى شايفه دلع أو رقة بزيادة ، لكن مش قلة أدب! أو ع الأقل أنا شايفها كده! بس يعني مثلاً لما تنزل مصر ، وتشوف بنت محجبة ، ولابسالك بادي كارينا ، وجيبة صَك أو بنطلون برمودا ، أو نقاب استريتش (وده شفته بعنيا بالمناسبة!)... دي بتكون أكثر إثارة من واحدة كندية بتعمل شوبنج في المول مثلاً وهيه لابسة شورت! نفس الفرق بين جمال نانسي عجرم وهيفاء وهبي J

وعلى رأي اللمبي... الإغراء أدب ، مش هز اكتاف!

حاجة تانية أنا ملاحظها... يلفت نظرك في مصر إن مبدأ الهدوم المجسّمة مش مشكلة كبيرة ، لكن المأساة إن لون جلدالبنت يبان! يعني ممكن تلاقي بنت محجبة لابسة بلوفر نص كم مفتوح الصدر وجيبة ع الركبة ، بس لابسة بادي كارينا بكم طويل ، وشراب استريتش اسود! مش مشكلة بقى إن البلوفر ده أو البلوزة دي مثلاً جاية على شكل حرف X على الصدر عشان تجسم وتلفت النظر للحاجات... بس آهي متغطيّة يا عم الحاج ، عاوز إيه تاني؟! ممكن برضه بلوزة هاف ستوماك على بنطلون چينز استريتش ، وتحتها طبعاً الحل السحري... البادي كارينا!

هنا بقى الستات ما عندهمش مشكلة لون الجلد دي خالص! يعني عادي إن البنت تلبس شورت وفانلة حمالات وجزمة كوتشي ، وبتجري على شط النيل ، قصدي على شط النهر ، أو حتى في شوارع الداون تاون ، والموضوع ده ما بيلفتش نظر حد من الأساس!

يمكن عشان مبدأ إثارة الرجل العربي بيعتمد على رد فعل منعكس (رفلكس يعني) ، يعني الساينابس بتاعته بتكون في الحبل الشوكي ، ما بتوصلش للمخ ، ولا التفكير بيكون ليه دور في الموضوع ده! فاكر مشهد مسرحية ريا وسكينة لما كانت سهير البابلي بتكلم شادية على عبد المنعم مدبولي عشان تدبسه في جوازة ، وبتقول لها إغريه يا ريّا؟ لما شادية رفعت له طرف الجلابية بتاعتها... ما هوّه ده تعريف الإغراء للرجل العربي!

مبدأ الإغراء في الغرب عموماً ، أو أقول كندا على ما لمست ، بيحصل لما الست نفسها تكون في مود الإغراء. يعني لو هيه عايزة حد يعاكسها. أديلك مثال لسه شايفه من كام يوم... كنت داخل سيفواي اللي جمب البيت (سلسلة سوبر ماركت كبيرة هنا في الغرب الكندي) ، وألاقي واحدة كنداوية داخلة قدّامي لابسة بلوفر! أيون ، زي ما عادل إمام قالها في شاهد ما شافش حاجة (كان لابس شراب)! الهانم لابسة بلوفر رقبته واسعة جداً من فوق ، واقع من على كتفها ، والبلوفر طويل لتحت وسطها بشوية ، ولابسة جزمة بوت طويلة فوق الركبة بشبر ، وكعبها عالي ورفيّع جداً ، ومن غير شراب! الغريب إن البنت لابسة نضارة نظر شيك جداً ، وملامحها غاية في البراءة والسذاجة! مش عاوز أقول لك إن كتير جداً من الأشقاء الكنديين كانوا بيتلوحوا يبصوا عليها ، بجد منظرها كان ملفت جداً! ورغم كل ده محدّش اتحرك وراح يحاول يكلمها!

على ذكر طبيعة لبس الكنديات... فوجئت مرة في سيفواي برضه بواحدة لابسة چيبة طويلة ، وفيها فتحة أطول ، من ورا لفوق الركبة! مش عاوز أقول لك إني بقالي ييجي أربع سنين باتردد على مختلف مناطق كندا ، ودي أول مرة ألمح چيبة بفتحة! وبعدها إذ بي أفوجأ إن الست دي مصرية ، أو ميدل إيسترنية الملامح عشان نكون أدق!

لفت نظري يونيفورم المدارس للبنات بتوع ثانوي وإعدادي اللي شفته في تورونتو... بيلبسوا چيبات ميكرو يابو حميد! أطفال بقى وأحباب الله وكدهوت! وبرضه ما بتلاحظش حد بيبحلق ولا حد بيبص بالمرة! مرة والله كان الجو -10 تقريباً في تورونتو ، والبنت مش لابسة شراب ورجليها بمبي من كتر البرد ، والله صعبت عليا م اللي عاملاه في نفسها! يغور الدلع والشقاوة في البرد ده!

بص يا سيدي... الفكرة اللي أنا مقتنع بيها تماماً إن البوظان – من النقطة دي – هتلاقي نسبته أعلى غالباً في المدن الكبرى ، يعني قارن كده طبيعة العلاقات بين الجنسين في بلدكو مثلاً وميت غمر والمنصورة والقاهرة ، بصفة عامة هتلاقي الحرية بتزيد في المدن الكبرى ، الحرية بكافة تفاصيلها ، وسيئاتها كمان!

كنت باتكلم مع واحدة في خدمة عملاء ويست چيت باحاول أؤجل ميعاد تذكرتي لتورونتو. الست كانت عايشة في كالجاري ، وقعدنا ندردش مع بعض شوية... الست أساساً من تورونتو ، ونقلت هنا عشان مفيش فرصة شغل هناك. بتقوللي كالجاري وإدمونتون أنسب لتربية الأطفال ، بنتها عندها 14 سنة. بعد ما استقرت كام سنة في كالجاري ، سمعت عن البنتين الأناتيم لبنتها في تورونتو ؛ واحدة حامل والتانية دخلت مصحة للعلاج من الإدمان! لا يُعلى على ألبيرتا اللي الدنيا بتقفل فيها من الساعة 6م ، عكس الحال في تورونتو العامرة اللي هيصة وصخب وانفلات!

كنت باتكلّم مع فرانك سوّاق الكرين الأمريكي معانا ع البرّيمة في السعودية... وقلتله على الموضوع ده ، فقاللي إن أمريكا مش كلها نيويورك ولاس فيجاس زي ما الناس فاكرة أو زي ما هوليوود بتصوّر للعالم! (كلامه ده منطقي لو جيت مثلاً تشوف نسبة المحجبات المنقرضة في أفلامنا المصرية ، واللي في الواقع بيتعدّوا 80% من المجتمع)

المهم ، فرانك أكّدلي فكرتي عن التحرر في المدن الكبرى زي نيويورك ولاس فيجاس وسان فرانسيسكو وميامي ، على حين المدن الصغرى والولايات اللي في الوسط الأمريكي على سبيل المثال ملتزمة. يعني مثلاً في المدينة الصغيرة (پوپلارفيل) اللي فرانك عايش فيها في ولاية مسيسپي ، بيقوللي ممنوع تماماً شرب الكحوليات ، واللي بيتمسك سكران بيأنأنوه! وطبعاً مفيش أي محلاّت بتبيع خمور ، واللي عاوز يشرب ، ممكن يسافر خارج حدود المركز (County) ، ويشتري الخمور اللي نفسه فيها! وممنوع نهائياً يوم الأحد أي محل يفتح أبوابه ، عشان الناس بيروحوا الكنيسة في اليوم ده! وكذلك العلاقات بين الجنسين ، مرفوضة تماماً في المجتمع المحلّي اللي عايش فيه فرانك ، ولو واحدة اتعرف إنها على علاقة بواد خارج إطار الجواز الكل بيحتقرها ، وبيبصّلها الناس نظرة مش ولا بد!

ولمّا قلتله تخيّل إن فيه ناس بتقول إن الواحد في الغرب بنته لما تكبر هيلاقيها راجعة البيت وفي إيديها واحد صاحبها وساحباه على أوضة النوم ، وأبوها واقف كيس جوافة ، ولو فتح بقه بكلمه تقول له دي حرية شخصية ، وممكن تطلب له البوليس! ساعتها فرانك اتحمق ، وقاللي: After one hundred years, my daughter will never tell me it is not my business! يعني بالعربي كده ما تحصلش أبداً إن المفعوصة تبؤ في أبوها ، وإن الموضوع كله حسب أسلوب التربية ، وإنه مربّيهم على إن الموضوع ده علاقة زوجية وبس!

وقاللي فرانك إن لو البنت على علاقة بواحد ، هيكون من ورا أهلها (زي الحال عندنا) ، وسألني بعدها لو فرضاً حصل واكتشف إن بنته على علاقة بواحد هيعمل إيه؟ هيكتب ع التي شيرت اللي لابسه مثلاً (بنتي ما بقتش فيرچن يا جدعان)؟! خلّينا واقعيين.

سألت برضه كيري زميلتي في الشغل على النقطة دي برضه باعتبارها مرفوضة شكلاً وموضوعاً من أي أب عربي ، قالتلي وعندي برضه ممنوعة ، وبنتي (18 سنة) عارفة إن مفيش حاجة اسمها ولد يدخل أوضتها في بيتي ، ونفس الموضوع بالنسبة للولد بيكون عارف إن ممنوع أي بنت تدخل أوضته لأي سبب! قلتلها بتتكلمي جد؟ قالتلي إنتا عارف إن فيه حاجات لازم تمنعها! قلتلها طيب ما هيّه ممكن تعمل اللي هيّه عايزاه بره البيت ، قالتلي إنتا بتعمل اللي عليك ، وتهوپ فور ذا بيست ، مش هتقدر تعمل تحكم كامل على بنتك!

وكنت سألت چاك البارچ ماستر الأمريكي اللي معانا ع البريمة برضه (في مقام قبطان البريمة) عن معنى كلمة بوي فريند وجيرل فريند ، وهل تعني أتوماتيك كده إن بينهم علاقة جنسية؟ فقاللي لأ طبعاً خالص... دي المكافئ كده بتاع (الجو) على أيّامنا ، أو إنهم مأنتمين بمصطلحات العصر الحديث! وإن بداية الانفتاح على البحري بدأ على استحياء في الخمسينات ، ومع ثورة الشباب أيّام الهيبز في الستينات ، والانقلاب على كل الثوابت والتقاليد والأعراف ، فبدأ مبدأ العذرية للفتاه ينقرض ، ويتضاءل الاهتمام بيه من الأساس ، لدرجة إن محدش أصلاً بيفكر إن كانت مراته فيرچن ولاّ لأ!

وبداية المشاكل غالباً بتكون مع المرحلة الجامعية ، واللي ممكن جداً البنت تروح فيها جامعة خارج بلدها ، وتعيش لوحدها ، وتروح لأهلها كل شهر مرة ، وتعيش مع اللي هيه عاوزاه بقى! وإن المفروض – والكلام ما زال على لسان چاك – البنت تكون حريصة وتحاسب على نفسها ، عشان دايماً المصيبة بتيجي فوق دماغها ، وتفاجأ إنها حامل ، والواد في الخلعون! وساعتها فرصتها في الجواز هتقل جداً! مين اللي هياخد واحدة معاها طفل ، ويربط نفسه بمسئولية من البداية؟!

صحيح... لفت نظري إن موضوع العلاقات بين الجنسين والغير مرتبطة بالزواج موجودة في الدنيا كلها ؛ عندك مثلاً أوروبا فاتحاها ع البحري ، وأمريكا الشمالية برضه ، أمريكا الجنوبية مصيبة رسمي ، أستراليا برضه سپوغتيف ، حتى في وسط وجنوب أفريقيا الموضوع ده عااااضي جداً ، دول الشرق الأقصى برضه صباح الفل! يمكن الاستثناء في الهند وأفغانستان وباكستان وباقي عائلة ستان! وطبعاً لا مجال للمقارنة بمجتمعاتنا الميدل إيسترن اللي قريت عليها تعليق عن هوس شعوبنا بمبدأ عذرية الفتيات إن (إنحصر شرف الأمة العربية بين أفخاذ نسائها)! معلش على استخدام اللفظ ده ، بس كانت مكتوبة كده في المقال! يعني لا يفرق معانا لا فقر ولا مرض ولا جهل ولا قيم ولا أخلاق ولا قلة قيمة على مستوى العالم... كله إلا الحتة دي!

النقطة دي بنجيبها معانا هنا على كندا! قريت عن جريمة قتل فتاة على يد أبوها وأخوها في ميساساجا بضواحي تورونتو! العائلة من أفغانستان قتلوا البنت عشان يغسلوا عارهم ، عشان البنت كانت على علاقة بواد كندي ، وتقريباً بقت حامل! فضيحة بكافة المقاييس! طبعاً الفضيحة هيه جريمتهم ، واللي مستحيل تقدر تجيب لها مبرر قدام المجتمع الكندي!

جريمة تانية أعتقد في ولاية بريتيش كولومبيا... أم باكستانية قتلت بنتها ذات الأربعة عشر ربيعاً عشان مشيها بطّال ، وبتخرج وبتروح وتيجي مع شباب! الست دي خنقت بنتها بإيشارب تقريباً ، وأخدت فيها Life Sentence ، يعني سجن 25 سنة!

طبعاً دي الصورة اللي بتتنقل للكنادوة عن أفعال المسلمين وإسلامهم الدين العنيف اللي ما بيرحمش ، ورد فعله على الحب والجنس هو القتل ولا رحمة ، وبيد مين؟ أقرب الناس للبنت واللي المفروض إنهم الحماية لبنتهم من أي أذى!

أفتكر كنت باكلم تيرا زميلتي أيام الإسعاف عن طريقة تربيتها لبنتها ، وهتعمل إيه لو البنت عيارها فلت؟ طبعاً قالتلي إنها هتفضل السند لبنتها طول العمر ، وهتنصحها وتساعدها طول ما تقدر. قلتلها حتى لو البنت طلعت ليسبيان أو بقت حامل في ثانوي أو مدمنة مخدرات؟ قالتلي يا محمد بنتي دي حتة مني ، ومهما الدنيا إدتها ضهرها مش هتلاقي أحن عليها مني ، لو أنا كمان اتخليت عنها ، مين باقيلها؟ الناس دول ما عندهمش ثقافة نتبرى من عيالنا زي عندنا على ما يبدو!

المهم... سألت مجموعة رجال كنداويين عن إن كان مبدأ العلاقات الجنسية لبنتهم مسموح ولاّ لأ... اتفقوا على إن اللي يحكم الموضوع ده سنها. لو كانت فوق الـــ 18 سنة ، فدي كده بتستقل بحياتها بأي حال ، وهيه حرة تعمل اللي هيه عايزاه بعدها.

أيام الكورس بتاع جنوب أفريقيا كنت مع الواد روكّو (Rocco) في عربية الإسعاف ، وبيكلّمني على الجيرل فريند بتاعته ، وإنهم متفقين ع الجواز بعد ما تخلّص دراستها الجامعية ، وسألته همّه مش عايشين مع بعض؟ فقاللي إنهم متفقين إن علاقتهم تفضل نضيفة ونقية لغاية الجواز ، وإنها فيرچن! ولسّه هاسأله وانتا طبعاً...؟ ضحك وقاللي: No, I'm not a virgin! طبعاً الكلمة كان ليها وقع غريب جداً على ودني... مبدأ عذرية الرجل! يمكن عشان مجتمعاتنا العربية متربية على إننا ما نعترفش غير بالحاجات الفيزيكال المحسوسة ، أمّا الحاجات الروحانية والأخلاقية ، فـــ ... اللي يعرف يثبت بقى!

المهم ، الواد روكّو بيقوللي إنه اتنيل مرة واحدة بس في حياته ؛ كان عنده ساعتها 17 سنة ، وكان الموقف ده مع بنتين 18 سنة و19 سنة! وبيقول إنه اعترف للجيرل فريند بتاعته بالحكاية دي ، وهيه سامحته. بس بيني وبينك... مبدأ العذرية الروحية للراجل زي الست ده ، مبدأ تحفة بجد ، ويستحق الاحترام.

برضه حاجة لاحظتها هنا... مبدأ الفيرچينيتي موجود في المجتمعات المحافظة في كندا. بمعنى... كان واحد صاحبي في إدمونتون بقاله هنا 35 سنة ، بيحكيلي إن فيه قرية أو مدينة صغيرة حوالين إدمونتون معظم أهلها جذورهم مش فاكر منين من أوروبا الشرقية ، الناس دول كلهم ما عندهمش حاجة اسمها علاقات خارج إطار الزواج. نفس المبدأ عند الأسر المتدينة ، أياً كان دينهم ، مسلمين ومسيحيين ويهود. الناس اللي بتروح كل يوم حد الكنيسة ، ودول بتلاقي لبسهم محتشم وطويل وواسع... إلتزام زي ما الكتاب بيقول يعني ، ودول احتكيت بأكتر من واحدة منهم بالمناسبة في شغلي ، وما عندهمش مبدأ البوي فريند ده!

وعلى ذكر المبادئ المختلفة عن طريقة تفكيرنا ، أفتكر حوار كان دار بيني وبين واحد صاحبي... ماينارد جرين الآيرلندي (مندوب شركة التأمين البحري ع البريمة بتاعتنا) ، كان قاللي إنه قبل الجواز كان محافظ على نفسه عشان زوجة المستقبل ، مش يعُك هوّه – بدون استعداد – ويلقط أمراض ، وتتنقل لمراته في المستقبل ، ما لهاش ذنب المسكينة عشان هوّه عينه فارغة ، إنها تتأذى. ده كان قبل الجواز ، من بعد الجواز بقى ، وحتى الوقت الحالي (عنده 62 سنة) عمره ما بص لواحدة غير مراته ، وما زال شايفها أحلى وأجمل ست في الدنيا.

وفيه نقطة لازم ناخد بالنا منها... كندا مش أمريكا ، والاتنين مش أوروبا! د. هشام (واحد صاحبي في تورونتو) كان راح شمال وغرب أوروبا ، وشاف الفضايح ع المفتشر هناك ، ومفيش حد بيتكسف (وأعتقد إنه لو كان راح دول الكتلة الشرقية مثلاً زي التشيك كان شاف نفس الوضع)! وفي إنجلترا ممكن تشوف علاقة جنسية كاملة في الشارع أو في الپارك أو على محطة الأتوبيس أو في مؤخرة الأتوبيس ، والكلام ده قالتهولي واحدة مسلمة بتدرس هناك وشافت بعنيها البلاوي دي ، وعقوبة الفعل الفاضح ده غرامة 200 يورو لو اتمسك ، ومش فارقة مع حد!

كندا بقى القانون بيمنع ممارسة الجنس في أماكن عامة ، ودي تعريفها أي مكان في مقدور العامة من الناس دخوله ، سواء بطبيعة الحال أو بدعوة. ويعاقب مرتكبها بغرامة لا تزيد عن ألفين دولار أو ست شهور سجن أو بكليهما. لكنها غالباً ما بتوصلش لكده ، آخرنا بنتكلّم في تيكيت (غرامة يعني) ، ويمكن تزيد كام كوميونيتي آورز (كام ساعة في الخدمة العامة). يعني واحد صاحبي بيحكيلي إن اتنين صحابه قفشهم البوليس الكندي في عربية كانت راكنة على جمب (فعل فاضح يعني) ، الراجل جه جمبهم وقال لهم لو سمحتو إتفضلو امشو من هنا!

النقطة التانية بقى إن كندا تختلف تماماً عن أمريكا... أمريكا عاوزة الكل ينصهر في البوتقة ، ويبقى أمريكاوي! كندا بقى فرحانة جداً بنقطة اختلاف الثقافات والطباع بين الكنداويين الأشقاء ، وشايفة إنها نموذج فريد من المجتمعات ، وعاوزة كل فئة عِرقية تفضل محتفظة بطباعها ولبسها وتقاليدها وأكلاتها ، وإن في كده اللي بيدّيها الستايل المالتي كالشرال اللي بيميّزها. وبالتالي هتشوف الهنود وأبناءهم لابسين الساري الهندي ، والباكستانيين لابسين اللبس إياه بتاعهم ده ، والسيخ لابسين العمة الغريبة بتاعتهم دي ، وهتشوف برضه الحجاب والنقاب... وغيرهم.

النقاش في كندا على حاجة تانية... الـــ PDA ، أو الـــ Public Display of Affection. طبعاً دي الحاجات اللي بتشوفها في مصر ؛ من أحضان وقبلات ومواقف ساخنة! بس للأمانة أحب أقول لك إن اللي نادراً ما بنشوفه هنا (زي قبلات أو واحدة نايمة براسها على رجل البوي فريند بتاعها ، حاجات كده يعني) ، لا يصل بأي حال من الأحوال للمناظر السخيفة اللي بتشوفها في المنتزه في اسكندرية أو في حديقة الأسماك في الدقي أو الميريلاند في مصر الجديدة ، واللي لا يصلح لها غير أوضة النوم!

الناس اعتراضها إن المناظر العاطفية (الساذجة مقارنة بعواطف مصر) مش المفروض إن الأطفال يتعرّضوا ليها وهمّا بيلعبوا في الپارك أو الجونينة على سبيل المثال. مش حلو عشان نفسية الأطفال!

فيه مصطلح هنا دمه خفيف شوية بيقولوه الناس لما بيشوفوا منظر عاطفي بزيادة ما يصحّش يحصل في الشارع (ما زال الكلام خارج مستوى عواطف مصر تماماً) ، بتلاقي اللي معدّي قدّامهم بيحدف كلمة وهوّه ماشي (Get a room)! يعني شوفولكوا حتة متدارية إتهببوا اعملوا فيها اللي انتو عاوزينه بعيد عننا ، مش عاوزين نشوف ده يا أخي!

طبعاً في مصر مع كل البلاوي اللي بتحصل في أماكن عامة زي اللي قلتلك عليها دي ، لو راحوا شقة حد فيهم ، تلاقي الجيران يا إما بيتصلوا بالبوليس ، يا إما لو مش عاوزين فضايح يعني وكدهوت ، ممكن تلاقي حد بيرزع ع الباب ، ويقول لك البيت ده بيت محترم يا أستاذ ، واحنا مش قراطيس! اللي هيجنني بجد هوّه إيه علاقة الأخ المش قرطاس ده واحترامه وكرامته بشقة جاره أو بعمايله فيها؟!

ولو حبّينا نتكلّم بصراحة أكتر في نقطة الخوف ع الأبناء... هتلاقي إن الخوف ينصب أساساً على البنات ، لكن لو عندك أولاد مش هتلاقي حد يخوّفك من مستقبل أولادك ، وانحرافهم في الغربة! تبقى القصة غير منطقية بالنسبة لي... لمّا يكون ديننا بيقول إن ارتكاب الفاحشة بيبقى الاتنين مذنبين ؛ الولد والبنت ، والاتنين عقوبتهم في الشرع واحدة ، ومحدّش قال نخفف العقوبة ع البنت عشان ناقصة عقل ودين ، ولا بنضاعف عليها العقوبة على أساس إنها اللي شجعت الواد وإدتله الضوء الأخضر! لكن بأسلوب تربيتنا ، الواد يبقى فتك ومقطّع السمكة وديلها ، والبنت تبقى كلبة وجابت لأهلها العار والشنار وخراب الدار ، ونقول ساعتها إن العرب القدماء كان معاهم حق في وأد البنات! المبدأ ده هجص في الهجايص من وجهة نظري... المفروض البنت غلطانة ، والواد غلطان ويستاهل ضرب الجزم كمان!

نقطة تانية مخوفة ناس تانيين... إن لو الأولاد انحرفوا وباظوا وبعدوا عن الدين ، هاشيل أنا ذنبهم ، وذنب الأجيال التالية إلى يوم القيامة! وده برضه من وجهة نظري هجص في الهجايص! لو إبنك عنده 25 سنة مثلاً (يعني بالغ وراشد وعاقل) ، ومش بيصلّي رغم نصايحك ليه ، هتتحاسب انتا على ذنبه؟! أمّال فين المقولة (لاعبوهم لسبع وأدبوهم لسبع وصاحبوهم لسبع ثم اتركوا لهم الحبل على الغارب)؟! إذا كان سيدنا نوح غير مسؤول عن فساد إبنه ، يبقى إزاي تلاقي ناس محمّلة نفسها فوق طاقتها ، ومشيّلة نفسها ذنوب أحفاد الأحفاد؟! حاجة غريبة الناس دول بصراحة!

م الآخر... لازم تربي ابناءك صح (سواء ولد أو بنت) ، وتكون ليهم قدوة ومثل أعلى (على رأي ديبو ، ما ينفعش ولادك يشوفوك ماسك السيجارة في إيد والكاس في التانية ، وعمال توعظ فيهم) ، والمفروض تكون مثال الوالد المتفهم الواعي ، وبعد كده اللي يغلط غلطة يتحمّل نتيجتها!

أو لو تحب تمشي بالنظام المصري... لو بدأت تحس ببوادر انفلات عيار المفاعيص ، مجرد البوادر ، تاخد قرارك وترجع بيهم على مصر (ده بفرض إن مصر هيه البلد الخضرا الشريفة) ، مش تستنى لما عيارهم يفلت ، وتحاول ترجع بيهم ، وهمّه يرفضوا ، أو يستقلوا بحياتهم ويسيبوك! ساعتها هتبقى انتا الغلطان بكل تأكيد ، كنت فين سعادتك لغاية ما باظت الدنيا بالشكل ده؟! وربيتهم ازاي سعادتك عشان ييجي يوم تلاقيهم بيكلموك بأسلوب يهينك ، على رأي فرانك!

وعشان نكون واقعيين... ما ينفعش تربّي ولادك في كندا بنفس الأسلوب اللي كنت هتربيهم بيه في مصر! لازم يكون فيه كم أكبر من التفهّم والتفتح في تربيتك ليهم ، بمعنى... ما ينفعش مثلاً تقول لبنتك إنك لو شفتها بتكلم ولد هتسوّد عيشتها مثلاً! ما ينفعش تجبر ولادك يدخلوا كلية الطب عشان عيادتك ما تروحش ، ونظام (هتلاقي القوى العاملة مستنياك بمجرد ما تتخرج ، بخلاف زمايلك اللي هيتخرّجوا يقعدوا ع القهوة)! ما ينفعش تقول لهم إن مفيش حاجة اسمها خصوصية ، أو الخصوصية دي لما يكون ليك بيتك الخاص وبتصرف على نفسك! ما ينفعش تمنع ابنك أو بنتك يتجوّزوا حد بيحبّوه عشان مستواه الاجتماعي مش متناسب معاك! ما ينفعش تقول لبنتك إن أخوها حر يعمل اللي هوّه عاوزه عشان هوّه ولد مفيش حاجة هتأثر في سمعته ، لكن هيه زي عود الكبريت! ما ينفعش تقنعهم إن العيال اللي بيربوا شعرهم أو حاطّين حلق أو عاملين تاتوو دول عيال فرافير وخواجات!

أنا شايف إنك المفروض ترسّخ فيهم قيمة الأسرة ، ومعنى الانتماء لإنسان تحبه ويحبك ، والوفاء لشريك الحياة ، مش شريك مرحلة عمرية. برضه تربي البنت على إن جسمها ده غالي ، وما يستاهلوش غير إنسان يخلص لها ويكرّس لها عمره كله ، أو ع الأقل دي النية والهدف من الزواج لو كان حبه ليها وإحساسه بغلاوتها بالقدر الكافي.

أنا معاك إن تأثير البيئة المحيطة كبير ، وكبير أوي كمان ، ومحتاج تخلّي عنيك في وسط راسك ، بس بصفة عامة... تربية الأولاد معركة صعبة في أي مكان ، لا هي صعبة أوي في كندا ، ولا هي سهلة أوي في مصر! وزي ما فيه فضايح في كندا ، فيه فضايح في مصر. وأفتكر إن كان فيه صحفي أو كاتب كان اتكلّم عن إن فتيات الليل دول يبقوا مين يا اخواننا؟ ما دول اخواتنا وبناتنا ، ومش المفروض نحط راسنا في الرمل ونرفض الاعتراف بوجود خلل في منظومة التربية في بلدنا! وكان الرد عليه من أحد البهوات أو الشيوخ اللي طلع يشرشح له بمعنى كلمة الشرشحة... إن احنا ما عندناش الكلام ده ، وإن كنت شايف إنهم بناتنا واخواتنا وأمهاتنا ، فيا ريت تتكلم عن نفسك بس ، يمكن يكونوا فعلاً بناتك واخواتك انتا اللي كده! نظام إحنا أشرف م الشرف!

أنا عن نفسي أسلوب تربيتي لأولادي هيكون استشاري وخصوصاً بعد نضوجهم الفكري ، والمفروض إنهم يتعوّدوا الاعتماد على النفس من بدري ، ويتحمّلوا دايماً نتيجة اختياراتهم ، وده أنا شايفه مهم جداً في بناء الشخصية الاستقلالية للفرد. ولا أنا هاتجسس على ولادي ، ولا هاراقبهم ، ولازم يكون فيه نوع من الثقة بيني وبينهم ، وأهم حاجة زي ما قلت إنك تربيهم صح ، وبعدها تسيبهم يعتمدوا على نفسهم.

سؤال جدلي يابو حميد... هتعمل إيه لو بنتك جاتلك في يوم حامل؟ سؤال صادم أنا معاك... بس خلّينا نتخيل حدوثه! هتنتحر؟ هتقتلها وتغسل عارك؟ هتطردها وترميها في الشارع؟ هتكمّل حياتك وراسك في الأرض؟ تعمل لها إجهاض والعملية إياها عشان تلم الموضوع؟ وما تقولليش بعد الشر ، والكلام ده ما يحصلش في بلدنا ، والشر بره وبعيد! الشر لا هو بره ولا بعيد بكل أسف!

يمكن كل الأفكار دي عشان أنا ما عنديش أولاد ، ولو جالي أولاد هيتغيّر تفكيري. بس على أي حال ده رأيي حالياً ، ولا أعتقد إني هاغيّره ، وحتى لو هاغيّره مش هيكون بدرجة كبيرة!

نتكلّم على تدرج الحياة الجنسية في كندا حسبما أسمع من زمايلي في الشغل...

الأطفال بيدرسوا في المدرسة طبيعة العلاقة الجنسية بين الجنسين ، من حيث المبدأ ، وطبعاً بتلاقيهم "يع وإيه القرف ده وكده". محدش بيقول لهم اشتريناكم من عمر أفندي والكلام بتاعنا اللي انتا عارفه ده خالص. من ضمن الحاجات اللي بيدرسوها في المدرسة في الحصص دي ، واللي غالباً في جلسات الچيم (حصص الألعاب يعني) ، إنهم بينبهوهم للأفعال الخادشة أو التحرشات اللي ممكن يتعرضولها من الكبار ، وممكن لو محدش نبههم ليها تترسب عندهم وتعمل لهم مشكلة نفسية بتفضل موجودة جوّاهم لما يكبروا ، وتسبب مشاكل نفسية وكده. برضه بيدربوهم على استخدام الكاندم (Condom) ، وإزاي يفردوه على موزة! طبعاً التدريب ده للولاد والبنات على السواء! طبعاً ده من ثقافتهم هنا عشان تفادي نقل الأمراض والحمل في وقت غير مناسب ، ومشاركة من الرجل في منع الحمل ، مش بس مسؤولية الست لوحدها! الكاندم طبعاً ممكن تشتريه من أي بنزينة أو سوبرماركت أو صيدلية... مفيش أي قيود عليه (لكن مش موجود خالص في المدارس كما سمعت قبل كده)!

بيبدأ الطرفين مرحلة الديتنج أو الأنتمة مع الهاي سكول أو الثانوي ، واللي بتكون مرحلة روايات زهور وعبير عندنا في الميدل إيست. المفروض إن دي مرحلة رومانسية ما بيحصلش فيها تجاوزات. القانون هنا بيقول إن سن القبول أو التراضي للولد أو للبنت مش فاكر 16 أو 18 سنة. قبل السن ده مش من حقه يدّي كونسينت. يعني لو حصلت علاقة جنسية و وصلت الأمور للمحكمة ، ما ينفعش الطرف التاني يقول ده كان برضاها! الرضا ده عند 16 أو 18 سنة. النقطة الغريبة بقى إن الواد المفعوص زميلها لو عمل كده بيتحسب في ذمة القانون ماينور (Minor) يعني قاصر ، وما تاخدش منه حق ولا باطل. برضه فيه قانون تاني بقى مافيهوش هزار... البنت أو الولد تحت سن الـــ 18 ممنوع يكون ليهم علاقة مع حد أكبر منهم بأكتر من سنتين! يعني لو بنت 17 سنة ، آخرها ولد ما يزيدش سنه عن 19 سنة ، لو عندها 18 سنة ممكن ترتبط بحد عنده إن شاللا 60 سنة!

الهدف من القانون ده هو حماية الأطفال (الطفل في عرف القانون تحت الـــ 18 سنة) من تحرش أو إغواء الكبار ، خصوصاً لو في موقع سلطة عليهم ، زي مدرس أو مدرسة أو مدرب في النادي أو زوج الأم مثلاً ، أو غيرهم. وده سر جملة دمها خفيف قالهالي الواد ديبو (15 Gives you 20)! لما سألته ده إستثمار ده ولاّ إيه سعادتك؟ قاللي الحكمة الخالدة... إنك لو عملت علاقة جنسية مع بنت عندها 15 سنة (أقل من سن الكونسنت) ، وأبوها اشتكى أو هيه اشتكت للبوليس ، تلبس يا حلو 20 سنة في السجن! المصيبة إن البنات في السن ده هنا في كندا بيكونوا سواريخ ولا يبان عليهم أصلاً إنهم 15! ما تديهمش أقل من 20 سنة ، بمقاييسنا في مصر! كيري بتقوللي إن فيه دراسة بتقول إن من 100 سنة فيكي يا كندا كانت نسبة البنات اللي بتجيلهم الميناركيه (أول بيريود) عند سن 8 سنين 1% ، دلوقتي النسبة دي بقت 20%! ما تعرفش ده بقى من تغيرات المناخ ولاّ الهورمونات في الأكل ولاّ إيه بالظبط! ممكن بقى تدّعي ساعتها إنك سألتها إن كانت فوق الـــ 16 أو الـــ 18 وهيه اللي كدبت عليك! بس اثبت كلامك بقى يا حلو!

العيال بقى في مرحلة الهاي سكول بيبقوا مش طايقين نفسهم طبعاً ، والولاد طبعاً فاجرين كالمتوقع منهم ، بعكس البنات اللي بيكونوا جبناء شوية. كيري زميلتي بتقوللي إن ستات كتير من صاحباتها في نفس الفئة العمرية (عندها 37 سنة) بينتهزوا الفرصة دي ، وبيغرغروا بالعيال بتوع ثانوي اللي هيموتوا على زميلاتهم البنات اللي ما عندهمش الجرأة للدخول في علاقة جسدية! كيري بتقوللي الموضوع ده شائع إلى حد ما ، وهيّه شايفاه مقزز ، إزاي واحدة ست تقبل تغرغر بطفل زي ده!

الموضوع ده بيفكرني باللي سمعته من واحد صاحبي أيام ما كان في الكلية الحربية في مصر الجديدة ، وزمايله اللي أثناء خروجهم من الكلية بيلاقوا ستات كبار واقفين مستنيينهم بعربياتهم في ميدان الكوربة في مصر الجديدة! طبعاً الستات دول بيعاكسوا طلبة الحربية ، وياخدوهم ع البيت ينبسطوا شوية! وصل من شيوع الموضوع ده إن مدير الكلية الحربية بيحذر في الطابور إنه يشوف أي طالب ماشي يتمختر في الكوربة!

المهم... في المعتاد إن فترة ثانوي بتكون الفترة اللي بتبدأ العلاقات بين الجنسين في التشكّل. فيه اللي فاتحها ع البحري طبعاً ، وفيه اللي ملتزم. طبعاً فيه بنات لاسعة ممكن تتريق على البنت الملتزمة ، بس الموضوع ده عادي وفيه بنات كتير بيحافظوا على الفيرچينيتي ، ومش حاجة شاذة طبعاً... كندا مالتي كالشرال والكل بيحترم الاختلاف وبيتفهمه.

فيه كشوفات طبية دورية في المدرسة بتتعمل للبنات النشطاء جنسياً. بيقولولهم البنات اللي لسه فيرچن ييجوا على جمب ، والبنات اللي سيكشوالي آكتيف ييجوا الناحية التانية ، عشان نعمل لهم كشف طبي نطمئن عليهم. كنت سمعت من كارولين نقلاً عن لانا أختها إن واحدة صاحبتها سورية جت وقفت جمبها في جناح البنات الفيرچن. لانا عارفة منها إنها كانت على علاقة مع صاحبها ، ولما بصت لها باستغراب ، البنت قالتلها اخرسي خالص ، ولا كلمة... الخبر لو وصل لبابا هتبقى مجزرة!

طبعاً بياخدوا بكلام البنات ، والموضوع ده كله عشان لو واحدة منهم لقطت عدوى يلحقوا يعالجوها بدري. محدش بيعمل كشف عذرية زي ما بيتعمل في مدارسنا كما سمعت (مش هاجيب سيرة اللي حصل أيام الثورة مع البنات في التحرير!). سواق في المنصورة بيقوللي إن المدرسة الثانوية الزخرفية اكتشفوا فيها مش فاكر كام حالة حمل ، وطبعاً ممنوع على طالبات الثانوي الزواج ، فبيتم عمل تقرير بالحالة ، وإخطار ولي الأمر. مش فاكر المفروض تترفد ولاّ بيكون إيه الموقف ساعتها! المهم الموضوع كبر ، وعملوا كشف عذرية واكتشفوا إن 20% من الطالبات موضوع العذرية ده في آخر اهتماماتهم! طبعاً بيكون الحل الكلاسيكي لأهاليهم يجوزوهم للمفعوص التاني بتاع الدبلوم اللي نيّل الدنيا! العهدة ع الراوي طبعاً ، بس مفيش دخان من غير نار!

نرجع لموضوعنا... تيجي مرحلة الجامعة للي هيكمّل ، فيه ناس بتكتفي بالثانوي وبيدخلوا سوق العمل. بعد ثانوي بيبدأ العيال يستقلوا بحياتهم ، سواء ولاد أو بنات (طبعاً الأسر الملتزمة لو مفيش شقاق بين الإبن أو البنت وأبوه وأمه ، الأبناء ممكن يستمروا في السكن معاهم ، وبيدفعوا نصيبهم من إيجار البيت). بتكون البداية في جست هاوس ، بياخدوا فيه أوضة مع سكان تانيين لتوفير النفقات ، وبيشتغلوا ويصرفوا على نفسهم. النقطة دي بتديهم استقلالية وحرية بالتالي يعملوا في حياتهم اللي همه عاوزينه.

لو البنت بدأت ترتبط بزميلها أو صاحبها أو غيره ، بيبدؤوا يخرجوا مع بعض ويتعرفوا ببعض أكتر ، ولما بينسجموا فكرياً وعاطفياً وجسدياً بطبيعة الحال ، ممكن يبدؤوا يسكنوا مع بعض ، ويتشاركوا مصاريف والتزامات الحياة ، ويبقوا كده في عرف المجتمع بوي فريند وجيرل فريند. كل ده بدون إلتزام قانوني بينهم (مفيش عقد زواج). بس بصراحة أنا شايفه أقرب للمفهوم الإسلامي للزواج من الزواج العرفي على سبيل المثال ، واللي الكثير من الشيوخ بيحلله بالمناسبة ، إن كان هوّه أو المسخرة التانية المسمّاه زواج المسيار!

تعالى نقارنهم ببعض... علاقة البوي فريند – جيرل فريند بتكون في النور ، وبعلم الأهل للطرفين (يعني تحقق فيها شرطي الإشهار والإعلان والقبول) ، والنسب محفوظ طبعاً ، وفيها نية الإستمرارية بطبيعة الحال ، بس مفيش ورقة ممضية عند الحاكم! طبعاً الركن التاني المهم بتاع لا نكاح بدون ولي دي مالهاش أي محل من الإعراب في كندا ، مفيش المبدأ ده أصلاً لواحدة ناضجة فوق الـــ 18 سنة! هوّه الولي موافق ضمنياً :)

العرفي بتاعنا في مصر بقى... مجرد ورقتين مكتوبين عند محامي أو واحد صاحبهم ، والموضوع بيتم الاحتفاظ بيه في السر ، ولا أي حد بيعرف لا من الأهل ولا من غيرهم ، ولو حصل حمل تشوف مساخر زي اللي حصل مع أحمد الفيشاوي! يعني كل الموضوع في العرفي ده الورقتين! والدين أساساً مافيهوش ورق ، يعني البيع بيتم بمجرد ما أقول لك أنا خلاص بعتلك العربية بتاعتي ، بدون ورق حتى! ده الأصل في الدين! مش هاتكلم على جواز المسيار الشائع في الخليج واللي لا يستحق أصلاً كلمة زواج ، ولا إني أناقش فكرته أصلاً ، مهما قال الشيوخ بجوازه!

بس الغريب هنا إن بعد مرور سنة من إقامتهم في بيت واحد بيصبحوا أتوماتيكياً في عرف القانون Common-law partners ، وبيبقى من حق الست نصف ممتلكات شريكها والعكس طبعاً ، ولو بقى عندها إبن بينسب ليه برضه ، وبيتكفل بنسبة من مصاريفه بأمر القانون ، ويبقى مُجبَر يصرف عليها هيه كمان لو مالهاش مصدر دخل مستقل ، كإنها تكون سابت شغلها عشان تتفرغ لتربية الأبناء... نفس الحقوق الزوجية بالظبط!

واد كنداوي صاحب ديبو اسمه كريس قبل مرور السنة بكام يوم بعت جواب مسجّل للجيرل فريند بتاعته بيبلغها إنه خلاص بيفسخ ارتباطهم. ويا ريت تتفضل تاخد حاجتها من بيته ، وتسكن في مكان تاني. كريس الواطي كده فلت قبل ما تتحسب عليه تكتيفة ، خصوصاً وإنه تقريباً مش بتاع ارتباط وحياة ومسؤوليات وكده! مرة خرج وراح يعمل كامبنج ولما رجع بتعاتبه إنه كان المفروض يقول لها بدل ما هو سايبها تتوغوش عليه! البيه مش عاجبه الخنقة دي! ساعتها ديبو قال له هيه دي الباكيدچ بتاعة الجواز ؛ نوع من المسؤولية والارتباط والمشاركة في قراراتك ، في مقابل إنك تعيش حياة مع إنسانة بتحبك وبتهتم بيك!

سمعت إن الحكومة الكندية مؤخراً قللت فترة السنة دي لـــ 6 شهور ، بعدها تصبح للجيرل فريند بتاعتك نفس حقوق الزوجة ، وكله لحماية الستات الغلابة مهاضيم الجناح يا عيني!

صحيح... لو البنت قالت إن طفلها ده إبنه ، هيّه كديفولت مُصدّقة ومش محتاجة إثباتات! ولو الراجل عاوز يشكك في الحتة دي بيتكفل بدفع مصاريف تحليل الـــ DNA (حوالي 800 دولار) ، وطبعاً بيلبس في حيطة لو التحليل طلع إيجابي والواد إبنه. بس لو طلع مش ابنه ، بيتم رفض النسب ، وتدفع له هيّه تكاليف التحليل.

سمعت زمان في مصر إن راجل كبير متجوز ومخلف تقريباً عمل علاقة مع بروستيتيوت ، وحب يتطمن على نفسه. راح عمل تحليل للسائل المنوي. التحليل طلع كويس ، بس المصيبة إنه أثبت إن عنده Azospermia ، يعني عقيم أصلاً! وكانت صدمة إنه إكتشف إن مراته خانته من أكتر من 20 سنة ، والراجل اللي ملو هدومه ده طلع مش إبنه! طبعاً الأسرة اتفككت بفضيحة والحياة اتدمرت!

سمعت هنا نفس القصة تقريباً ، بس اللي حصل إن الراجل بعد ما عرف إن ده مش إبنه ، واستعوض ربنا في الوفاء والأمل وكدهوت... رفض إنه يتخلى عن إبنه ، واللي بقى بينهم روابط تانية من العشرة والحياة المشتركة ، كما لو كان إبنه بالتبني. فكر مختلف برضه في الحكم على الأشياء.

نرجع تاني لموضوعنا... موضوع البوي فريند – جيرل فريند. المجتمع هنا بيحترم العلاقة دي جداً ، وبتعني ضمنياً إنهم مرتبطين ، والمفروض إنهم ما بيبصوش بره ، أو ده المفترض من المحترم منهم. حتى البنت المرتبطة في عرف باقي الولاد (She's taken) يعني محدش يحاول يتقرب منها خلاص.

كان معايا مهندس بترول ألماني تبع شركة شلمبرچيه ع البريمة في السعودية. قاللي إن نسبة الزيجات في ألمانيا بتتراجع ، ومش شايفين أي داعي ليها أصلاً. يكفي إرتباطكم ببعض وحياتكم مع بعض ، وأسرة متكونة وعايشة في استقرار. مش لازم تحطوا صوابعكم تحت ضرس الحكومة! وبيقول إن أخته عايشة بقالها أكتر من 10 سنين مع البوي فريند بتاعها وعندهم 3 عيال ، ومش في دماغهم حتة الجواز الورقي دي!

كتير هنا في كندا بيتراجعوا عن فكرة الجواز الرسمي عشان لو الارتباط فشل في المستقبل لأي سبب ، خراب بيوت رسمي! مصاريف الطلاق عالية ، ولو حصل اختلاف على الأمور المادية هيطلع عينيهم! إجراءات الطلاق هنا صعبة شويتين. واحد صاحبي (من اللي عايشين نظرية المؤامرة) مقتنع إن البلد دي هدفها تدمير الحياة الأسرية للمهاجرين ، وإنهم يصدق عليهم كلمة (يجعلون به ما يفرق بين المرء وزوجه) ، وبيقوللي تخيل إن أكتر من 20 مؤسسة بتشتغل بس على تطليق الزوجة من زوجها! يقصد طبعاً النيابة والمحكمة والمحامين والمحاسبين والموظف الاجتماعي (Social Worker) وغيرهم!

الطلاق هنا لازم الأول يكون فيه انفصال ، يعني الطرفين مش عايشين تحت نفس السقف ، ولمدة سنة. بعد كده بيقدم الطرف الأول أوراق الطلاق للمحكمة ، بترد المحكمة على الطرف التاني بإنه يبلّغ المحكمة لو فيه عنده اعتراض على الطلاق أو ليه حقوق مادية ما أخدهاش من الطرف الأولاني. هنا بقى دور المحامين اللي بيولعوها وبيماطلوا ويؤخروا إجراءات الطلاق ، والخناق على مين ياخد إيه فين! بعد كده دور مين ياخد حضانة الأولاد ونسبة المصاريف المطلوبة من كل طرف! بعد التسوية المادية أو لو كان الطرفين متفقين على كل حاجة من البداية ومفيش خناقات (بيسمّوه ساعتها Non-contest divorce) ، ولو الطرف التاني ما ردش على جواب المحكمة في خلال شهر ، بعد شهرين كمان وبتقضي المحكمة بطلاق الطرفين من بعض ، وبعد شهر من الحكم بتصدر المحكمة شهادة طلاق يقدر أي من الطرفين يروح يستلم النسختين. هنا بس يحق لأي طرف منهم الزواج مرة تانية.

طبعاً الحقوق المادية هنا بتختلف شكلاً وموضوعاً عن مصر. بيتم حصر ممتلكات كل واحد منهم قبل الزواج ، ومقدار الزيادة أو النقص في ثروة كل طرف ، وبيتقاسموا المكسب والخسارة من يوم الجواز باعتبارهم شركاء في الحياة. طبعاً ممكن قبل الجواز يتفقوا على إن الماديات مالهاش أي علاقة بالزواج أو الانفصال ، وبيمضوا الاتنين Pre-marital agreement أو بيسمّوها Pre-numtual ، وممكن جداً الست تمضي إن في حالة الطلاق مالهاش أي علاقة بفلوس جوزها.

المشكلة بقى إن حتى دي ممكن القاضي لا يعتد بيها ، لو الست نزلت دمعتين وأقنعته إنك خليتها تمضي عليها وانتا ماسك لها مسدس ، أو استغليت إنها يا كبد امها بتحبك وهتموت عليك ، ومضيتها ع الورقة دي ، والست لما بتحب يابو حميد بيجيلها كتاراكت وما بتشوفش قدامها!

واحد معانا هنا بيقوللي الطريقة الوحيدة بقى إنك تكتب وصيتك من قبل ما تيجي الهانم تسكن معاك أو تتجوزها. الوصية دي ما تقدرش تيجي ناحيتها في حالة الطلاق ، وتاريخها لو كان قبل الارتباط بينكم ، فدي دليل لا يقبل الشك إن دي كانت ممتلكاتك قبل معرفتكم ، وبالتالي مش من حقها تبص لهم!

صحيح قبل ما أنسى... طبعاً مفيش حاجة اسمها حد ياخد حاجة من واحدة ست غصب عنها ، مجتمع يؤمن بالحرية بقى ، مانتا فاهم. وبالتالي لو حصل وراجل أجبر مراته على ممارسة العلاقة الجنسية معاه ، من حقها تطلب له البوليس ، وبالسلامة يا معلّم! الظريف في الموضوع بقى إنها مش محتاجة تثبت ، يكفي الدمعتين إياهم ، و... الوَحْش يا سعادة القاضي! هيّه مُصدّقة ، وسعادتك اللي عليك تثبت إنه كان برضاها ، ومش عارف إزاي ممكن تثبت حاجة زي دي الصراحة! الجريمة طبعاً اغتصاب راجل لمراته! الاغتصاب في تعريفهم هو أي صورة من العلاقات الجنسية مع أنثى بغير رضاها! مش عارف إن كان فيه مساواة في الحتة دي ، ولاّ هنا الستات سابقيننا بخطوة؟!

الجريمة دي صحيح لا تسقط بالتقادم! يعني ممكن بعد كام سنة تبعت جواب للبوليس ، وتقول لهم إنه ياما اغتصبها المفتري من 15 سنة. محدش هيسألها وإيه اللي كان مسكتك الزمن ده كله!

باتكلم جد والله مش باهزر! باري الكونصالتانت كان بيحكيلي امبارح على إن زوج مراته السابق (كان ظابط سابق أيام زمان ، وعنده شركة سيكيوريتي حالياً) ياما اغتصبها أيام جوازهم من ييجي 20 سنة ، وكانت ساكتة! بعد ما عمل مصيبة تانية من كام سنة واغتصب واحدة في الشارع ، بعد ما انتحل شخصية ظابط شرطة بهدوم الشغل زمان ، ولمبات البوليس على عربيته! ساعتها باري قال لها المفروض تبلغي عن عمايله السودة اللي عملها معاكي زمان ، بكده مش هيطلع بره السجن ولا يشوف الشارع تاني! وقد كان يا معلّم! بعد ما بعتت الجواب البوليس راح لها ، وأخدوها ع القسم ، وسجلوا أقوالها فيديو ، وانضمت للتهم اللي لبسها الأفندي ، وبالشفا!

البلد دي بلد ستات يا عم الحاج! ربنا يستر ع الولايا... اللي همه إحنا في البلد دي!

حتة تانية على ذكر الجواز... هنا ممنوع قانوناً الجواز بين الـــ Cousins ، يعني ما ينفعش تتجوز بنت خالتك أو خالك أو عمك أو عمتك! بتعتبر هنا حالة زنا محارم! البنت آبي زميلتي من أيام الكورس بتاع الـــ EMR لما قلتلها إن جوز أختي يبقى ابن عمتي! البنت اتصدمت ، وقالتلي إيه اللخبطة بتاعتكم دي ، Your cousin is like your sister, how could you have sex with your sister? ، وأضافت كمان إنه I'm not sure, but may be the 2^nd cousin is still not allowed to marry!

طبعاً السكند كازن ده اللي هوه يبقى مثلاً أبوها وأمي ولاد خالة على سبيل المثال! وإنكم عيلة واحدة ومتربيين مع بعض ، إزاي تفكر تتجوزها أصلاً؟! ما رضيتش أصدمها بقى وأقول لها إن ده شبه الأساس في الصعيد عندنا مثلاً ، البنت لابن عمها ، ما تطلعش بره العيلة!

وليد صاحبي في كالجاري معجب بالقانون ده ، وشايف إنه معمول لحماية النسل في الأساس ، ما هو كل ما تتقارب الزيجات كل ما بيكون عامل مساعد في إظهار العيوب والأمراض الچينية المتنحية في العيلة. الهدف كله الحفاظ على صحة وسلامة النسل.

طبعاً غني عن القول هنا إن مفيش حاجة اسمها تعدد الزوجات ، ولو حصل بيبقى تزوير وزنا ، ومش بعيد رقيق أبيض ، وعودة لعصر الحريم والعبودية للمرأة وكدهوت!

رغم إني سمعت من واحد صاحبي كان عايش في كالجاري إن صاحبه التونسي كان متجوّز اتنين ، وقال لهم إن دي من حريات دينه ، وحتة الدين دي محدش بييجي ناحيتها! ما اعرفش مدى المصداقية في الموضوع ده ، بس اللي أعرفه إنه ممنوع قانوناً.

وما تقولليش إن البلد دي ما فيهاش حاجة اسمها زنا... الزنا هنا تعريفه أي علاقة جنسية بين طرفين لا تجوز بينهم العلاقة. زي مثلاً أب وبنته حتى لو كان برضاها ، أو واحدة متجوزة مع راجل غريب لو زوجها رفع عليها قضية زنا وعرف يثبتها ، وساعتها ممكن تخسر كل حقوقها المادية على زوجها!

اللي أنا فعلاً مستغرب له... إيه الداعي للزواج في البلد دي طالما علاقة البوي فريند – جيرل فريند ليها احترامها من المجتمع ، والقانون مكتفها ، ومنظم طبيعة العلاقة دي ، وهيّه نفس طبيعة الزواج ، بس من غير ورقة في الكنيسة أو في المحكمة؟! كيري بتقول لي الجواز يمكن طقوس دينية من زمان ، بس إذا كان دلوقتي من حقك تغير دينك نفسه ، أو ما يكونلكش دين بالمرة ، يبقى إيه الداعي إنك تربط نفسك بتقليد قديم وبس؟! يمكن عشان الجواز كمبدأ يوحي بالاستمرارية زي ما بيقولوها في الكنيسة (Till death do you part) ، على الرغم من إن ده غير واقعي ، ومعظم الزيجات بتنتهي بالانفصال! يعني تبعاً لوجهة نظر كيري الجواز ده تقليد أولد فاشون ، بيسعى له الناس الملتزمين دينياً كطريقة كلاسيكية للارتباط. يمكن!

[ViralMind]

والله زمان يا توهامى باشا..

احنا عايزين واحدة زى دى كل يوم..

انا لسه طبعا عمال اقرا لان الموضوع طويل و عميق..

بس تعليق سريع على موضوع الcommon law.. هما الستات هناك واخدينها عافية ولا ايه.. هههههه

يعنى اللى اعرفه ان لازم يكون فيه اثباتات قوية ان كان فيه معيشة حقيقية فى خلال فترة السنة, و كمان كنوع من الاثبات.. ان الواحد مثلا drop training or college او يلغى فكرة الانتقال من مكان لاخر فى مقابل انه يفضل مع شريكه.. يعنى التخلى عن شىء مهم..

احنا على كده بقى هنروح نطالب بحقوق الرجالة هناك :protest:

يعنى الستات ليهم حقوق و الشواذ ليهم حقوق و كندا جنة الاطفال توماتيكى... فاضل ايه للرجالة بقى؟

[alaashabana]

دكتور تهامى الله ينور عليك بجد .. انا عنية تعبت من كتر القرأة

بس انا عندى سؤال لو تسمحلى.. انت بتقول ان لو البوي فريند – جيرل فريند مع بعض لمدة اكثر من سنة فا بيبقى من حقها انها تاخد نص ممتلكاته وهكذا

السوال هو ازاى هى هتثبت انهم مع بعض بقالهم اكتر من سنه ومفيش اى ورقة رسمية بينهم تثبت انهم مع بعض غير انهم بس عايشين مع بعض ؟؟ يعنى هل هيتم سؤال الجيران انهم بقالهم مع بعض اكثر من سنة ؟؟ ولا هيبقى موجود فى عقود الايجار وتكون عقود الايجار بأسمهم هما الاتنين بالنالى بيبقى معروف تاريخ مواعدتهم مع بعض ؟ ممكن توضح النقطة دى لانى استغربت شوية

تحياتى لك ولكل المغتربين فى بلدى الحبيبة كندا

[لماضة مصرية جدا]

السلام عليكم و رحمة الله و بركاته

لا يا داااااكتور توهامي...دي مش مداخلة دي نعملها حلقة نقاش يا رياسة

يعني كل سطرين فيهابتتناول فيهم فكرة غير اللي قبلهم

هحاول اعلق علي شوية حاجات مع ان المداخلة كلها بتفكرني بصينية رقاق مخدومة بالسمن البلدي من فرن ماما:)

شوف يا دكتور انا مقتنعة جدا بفكرة "العذرية" و علي الرغم اني من الميدل ايسترن و علشان التحديد بقي انا من الصعيد يا ويلد....مش بس عذرية البنت لا عذرية الراجل كمان

العذرية قد تبدو فكرة من اليوتوبيا و لا حلم مثالي....لا

دي حقيقة و انا مصدقاها

العذرية انك تحتفظ بمشاعرك و احساسك و "بكارة" قلبك مش بس جسدك لشخص واحد و الشخص ده يكون حلال

و طالما الفكرة كدهوت يبقي يستوي فيها الولد و البنت

لان الاتنين بني آدمين

و الحقيقة مبعرفشي استوعب فكرة ان ولد لا ميبقاش فيرجين.....للاسف المجتمع بيربي فيه ان كل ما كان الواد الفت الحت النت اللي مقطع السمكة و مصمص ديلها يبقي كده برافو عليه

و انا شخصيا النوع ده بيصيبني بالترجيع....يع...يع

استاذتي الكندية اللي عندها سبعين ربيعا لما اتكلمنا في الموضوع دوت....(ايون بقي ستات و قعدة الستات مش هتتغير يعني من مصر لكندا) لقيتها بتقولي ان بقي مبدأ العذرية ابتدي ينتشر دلوقتي اكتر في كندا و خصوصا في العائلات المحافظة و قالتلنا انها حاولت مع بنتها تتبناه بس الحقيقة البنت مرمغت راسهم في الطين...(وش هنادي قبل ما ياكلها الوبا)

شخصيا انا عايشة في مصر و نفسي ادرس في كندا و عشت في دبي

المعيار اللي انا بشوفه او اللي انا مصدقاه هو انت تملك قرارك و لازم تكون مسئول عن تصرفاتك و مبحبش الشماعة اللي بنعلقها علي المجتمع اصل مجتمع ده مفتوح و التاني موارب

صدقني اللي عايز يعمل حاجة مش راح يغلب يعني

بالنسبة لتربية البنات و جرايم الشرف

الحقيقة انا ليا موقف شخصي من موضوع الشرف دوت....طب يعني ايه شرف؟؟؟(و طبعا مش اقصد دكتور شرف الراعي الرسمي لحكومة كوكا زيرو)

الشرف في الريف ان البنت لو غلطت بيتاووها...(برضه صوت هنادي....يا لهوي الفيلم دوت فقر بصحيح)

في حين ان الولد لو استولي علي ارض اخته محدش بيقوله حاجة ده بالعكس ممكن يتاويها لو هي طالبت بحقها في الارض من ميراث شرعي

يبقي ايه الشرف

ايه الشرف ان في مجتمعاتنا ممكن جدا تلاقي ست هي اللي فاتحة البيت و البيه بيضربها علشان تنزل تشتغل و يضربها كمان علشان مدتلوش المرتب كاملا

ايه الشرف ان الولد ممكن يدخن و يشرب شيشة و يكون ليه علاقات مع انه خيبة و متقندل....و لما البنت بس تلمح انها عايزة تتجوز عن حب....تتلسع حتة قلم يسور ودنها اليمين...(برضه فيلم مصري مش فاكراه)

هتقولولي يا بنت يا لماضة هو ده مجتمعنا

للاسف برضه تاني و تالت و رابع

انا مش مع مجتمع بيجزيء المباديء و بيخلي للكلمة الواحدة مليون الف معني و بيفصلها علشان تخدم ذكوريته هو

معتقدشي ان جرايم الشرف دي من الدين و الله اعلم

طيب الخلاصة ايه

لو حضرتك بتفكر تربي ولادك او بناتك في المجتمع المصري العربي او حتي في المجتمع الغربي

علمهم ان المباديء لا تتجزأ

علمهم انهم يفكروا

علمهم ان الدين مسابشي اي سؤال الا لما جاوب عليه

حتي الدين مش احيانا بنلاقي نفسنا فيه حاجات مش فاهمينها مثلا...او لسه فيه اسئلة مش متجاوبة

فيه حاجة اسمها الفطرة

ايون

الفطرة السليمة

الصوت الخفي اللي جوه منك

ممكن تكون بتعمل حاجة غلط

بس جوه منك عارف ان ده غلط

و عليك تتحمل قرارك

لو هربي ولادي هربيهم علي ان صوت الفطرة جوه منهم دايما يبقي عالي....او يفضل دايما موجود

و انا عارفة اصلا ان ولادي هيتعبوا معايا...لان فيه حاجات كتير رافضاها في مجتمعي سواء في مصر او ف السياق العربي

التحدي الحقيقي ان ولادك ميبقوش عايشين و كأنهم كائنات ديناصورية منقرضة وسط المجتمع

ازاي يتعايشوا و ازاي يدوبوا و يتفاعلوا من غير ما يفقدوا طعمهم هما و رؤيتهم للحياة هما

طبعا رغيت...(اتعلمت منك...وش حد بيطلع لسانه)

بس كلاكيت عاشر مرة الخبرات اللي حضرتك بتحطها هنا هوت مش بس علشان كنكا...ابسلوتلي...دي علشان كل واحد فينا يرجع يقرا نفسه و افكاره و قناعاته ....يايتبت في حاجات يا يبتدي بقي يعمل ديليت لحاجات تانية كتير

تقبل مروري و كلامي ووجهة نظري في الحياة و رغيي و حاجات كتير فوق بعضيها

خليك قاعد و الله ما انت قايم انا ماشية لوحدي بس حد ينورلي السلم

[لماضة مصرية جدا]

ر

لكن فكر معايا فى الموقف ده بشكل واقعى.....ابنك او بنتك عندها 15 سنة و بتقولك انها بتحب......هتخلى الموضوع يمشى ازاى؟؟؟؟؟؟؟؟؟ :unsure:

mshehab......يا ريت تدينى رأيك, لأن الموقف اللى حكيتيه عن ابنك رائع, بس لاحظى ان برضه ابنك ربنا يخليهولك لسه صغير......فكرى كمان 5 او 6 سنين هتتعاملى ازاى؟؟؟؟؟؟

السلام عليكم و رحمة الله و بركاته

طب انا مش عايشة في كندا

و لا انا اصلننننننعندي ولاد لاني سينجلاوي و افتخر برضه

هتقوليلي ايه اللي جابك حدانا

طب انا هقول بوقين و رزقي علي الله

هو انتو كامهات و ابهات بتخافوا ليه اوي من اللحظة دي

و بتحسسونا انها لحظة فارقة في حياة دودة القز...(طبعن ده احنا يعني المفروض دودة القز)

ليه مش بتتعاملوا مع الموضوع عادي من غير شدة اعصاب و كانه اي خبر عادي

انا شايفة ان اذا كان الولد او البنت جه بنفسه و او انتي دردبتيه في الكلام يعني...(ماما كانت بتعمل معانا كدهوت) يبقي ده شيء كويس

افتكر اني مرة عملتها في الكلية يعني كنت كبيرة و هبلة و بعدين اخويا الكبير اوي يعني فرق بيني و بينه كتير قالي احنا اصحاب و كدهوت و بعين بس لمحت ليه ان فيه شاب في الكلية هو و الله اللي لمحلي لقيته بيديني عريضة طويلة عن ازاي الشاب بيلعب بالبنت لغاية ما يسقيها حاجة اصفرا

ساعتها انا اقتنعن بكلامه و لبست الوش الخشب و منعت اي محاولة قرب من الشبا الماسفو عليه دوت

لكن لما اتخرجت و ابتدت اخرج للحياة الحقيقية و ابتديت ادور علي دماغي انا

انا مش هعمل مع ولادي كده

انا مش هحاول املاهم خوف من تجربة لازم يمروا بيها في حياتهم انا رضيت و لا مرضيتشي

انا مش هلعب دور الناصح الامين....لاني انا شخصيا مبعرفشي انصح نفسي ايه بقي التجلي اللي راح يحصلي يا عبد المتجلي و انا بكلم ولادي

انا هتقبل الموقف زي ما هو...بس هطلب منهم ببساطة ان اذا كان ولد او بنت يحط هدف لنفسه 3 سنين او خمس سنين هدف لحياته

و لو هو ابتدي يحب البنوتاية ديت....يبقي يكون هدفه واضح..مش مجرد انه يجرب مشاعره....لا كمان يعرف بني آدم تاني بيفكر ازاي

و ايه المشكلة لما اتعرف انا كمان ع البنت

و ايه المشكلة اني اتعرف علي عيلتها

و ايه المشكلة انهم يكونوا تحت عيني

بس مش تحت عيني علشان كل شوية اقولهم امسك...حرااااامي الحلة.....لا علشان اكون موجودة يوم ما يقرروا انهم محتاجين تدخلي...اكون باصة عليهم من بعيد

هتقولولي يا بنتي لما تخلفي كلامك هيختلف

يمكن

يجوز

بروبن

بس دي وجهة نظر

دلوقتي

و معتقدشي اني راح اغيرها بمعدل الخمس سنين اللي جاية....علشان انا عشت عليها عمر بحاله من قبل

ميرسي كتير ان حضرتك ادتيني المكرفون

و نقول

الووووووووووو

[ViralMind]

السلام عليكم..

لماضة هانم..

انا مش عارف ايه علاقة العذرية بالموضوع؟

اما لو تقصدى موضوع الcommon-law و الفقرة الاخيرة من كلام تهامى تحديدا..

انا مش قادر اشوف اى مشكلة فيهم.. و قبل ما تتصدمى هقول لك ليه..

هو اصلا احنا يفرق معانا ورقة محكمة ولا بتاع الكنيسة ده فى ايه؟

احنا المسلمين عندنا جواز بغض النظر عن اجرائات البلد اللى احنا عايشين فيها... يعنى ورقة المحكمة ولا اجرائات الكومون لو دى ماتدخلش ذمتنا بربع جنيه.. لاننا فى كل الحالات لازم نتجوز بطريقتنا احنا..

فبالتالى لو اخترنا كومون لو,ولا اخترنا الجواز عن طريق المحكمة.. مش هتفرق لاننا هنتجوز بطريقة المأذون فى كل الحالات..

هذا والله اعلم. :)

[Bustami]

السلام عليكم جميعا

الحمد لله وصلني الميديكال وفي احتمال اعمل لاندينج في 3/2012 فعندي سؤال لكل من هو في كندا

ابني في سنه اولى ابتدائي حاليا , هل لو عملنا لاندينج في 3/2012 المدرسة في كندا ستقبله علما ان الدراسة تنتهي في 28/6 اعتفد

شكرا جميعا

[ViralMind]

و عليكم السلام و رحمة الله و بركاته..

الف مبروك عالمديكال و عقبال الفيزا.

ايون يا باشا هتقبله حتى لو آخر اسبوع فى الدراسة.