كندا التي رأيتها :)

[moheltohamy]

احم احم ..انا جيت يا دكتره هنا امبارح وسلمت ومحدش رد عليا..

اكمنى كنت عايزه اثبت حسن النية بعد التلغراف بتاعك واقولك

ان القلب ابيض خاااااااااااااااااااااااااااااااااالص.

كلام جد بقى عشان اللى فات دا كان هزار..

حقيقى يا دكتور النهارة كالعادة دخلت اتابع موضوعك الشيق ووجدت بوست من اروع البوستات

اللى بجد مكنش ينفع امشي من غير تعليق عليه لأن المادة نفسها اللى فى البوست مهمة

ولأن الروابط اللى حضرتك منزلها بجد بتعكس قدى ايه انت بتتعب فى الموضوع دوت عشان تفيد بيه الكل لأقصى درجة ممكنه.

انا بشكرك حقيقى على اللينكات دى ، كل مرة يا تهامى والله ببقى نفسي اشكرك على اللينكات و بعمل سيف للينكات اللى بتنزلها من حلاوتها واهميتها .

عجبنى قوى نظام بيع الجرايد عندهم تفتح البوكس تاخد الجرنال بتاعك وتمشي ، طبعا الحاجة دى لو عندنا احنا المسلمين كان البوكس اتنهب من اول دقيقة !! شوف بس التربيه والثقة المتبادله ..بجد حاجه حلوة اوى. واخلاق عاليه .. وانا لسه امبارح كنت بتكلم فى موضوع ماذا لو لم عن موضوع القرايه دوت وبقارن بين الشعوب العربيه والأجانب فى القرايه ، يعنى القرايه بتبقى حتى فى المترو والباصات عشان الواحد يستغل وقته ويستفيد ويطلع على اخبار العالم . وحكاية ان فى جرايد ببلاش دى حقيقى هايلة

يا ريتها بس كانت عندنا ، بس احنا حننهب كفايه الوسيط اللى كلها اعلانات !! فى ثقافة اكتر من كدا!!

ميرسى يا تهامى على البوست ومستغربة انو مفيش تفاعل معاه ..متهيألى الناس مستنيه بوست

بنات كندا عشان تتفاعل mil:

وعليكم السلام يا لولا...

مرورك دوت دايماً له احترامه :blink: ، ومعلش أنا اتشغلت شوية. وأرجو سوء التفاهم اللي حصل ده ما يكونش زعلك مننا تاني! مش عارف ليه انتي لطّشت معاكي مرتين في التوبيك بتاعي! إمسحيها فيا أنا معلش! :aslam:

وفعلاً يا لولا... ثقافة القراءة دي تنقصنا (وأنا من المتخلفين في موضوع القراءة ده الصراحة وأعترف بكده)!

مش عارف ليه؟ أكيد ده أسلوب تربية وحياه!

عموماً هاتكلم عن الموضوع دوت أدام شوية...

تحياتي :waf:

تم تعديل 9 سبتمبر 2008 بواسطة moheltohamy

[moheltohamy]

ياه الله عليك يا استاذ تهامي من كثرة كلامك عن كندا و خاصة نظافتها و اخلاق الناس و خاصة في تورونتو..بدعوا الله انا احصل علي الفيزا بسرعة واصبح في صفوف المجاهدين في كندا..

يا باشا لا تكلك (وش مذيعات التليفزيون بتوعنا :blink: )

أحلى حاجة في كندا ، إنك بمجرد تقديم أوراقك ، بتكون عارف إنتا مقبول ولاّ لأ. جمعت النقاط المطلوبة ؛ يبقى رايح كندا إن شاء الله. وهتجاهد في تورونتو :aslam:

It's a matter of time, no more!

[moheltohamy]

طبعا موضوع جميل يا دكترة و الناس عبرت و بزياده عما يجول بخاطرها لو الموضوع ده في مصر

عجبني قوي تصرف الاخت لولا و فعلا هي انسانة جديرة بالاحترام حيث تراجعت عن كلامها لما وجدت فيه الاساءة و لم تصر كما يفعل بعض الزملاء....مقاوحة و خلاص علشان ماطلعش غلطان.....تحية مرة اخري

وبعدين يا عم عمر ربنا هيفكها ان شاء الله و نتقابل هناك بس انت شد حيلك

تقابلو إزاي بس يا سي حسيني؟

الراجل بيحب تورونتو :blink: ... إطلع إنتا منها يا ألبيرتاوي يا عميل! :waf:

تسجيل اعجاب و متابعه للرائع الدكتور تهامي

ربنا يعينك و يوفقك في دراستك و حياتك كلها ان شاء الله

ربنا يخليك يابو عيسى. وشكراً على مرورك ، وإمضاء الحضور اللي مضيته :aslam:

[mohamed omar]

حتي الأن مش شايف في كندا اي عيوب و يمكن الأخوة ايلي عايشين هناك زى الأستاذ ياسر,و ايهاب سالم,يقدروا يوضحوا لينا الجوانب السلبيه في العزيزة كندا..يارب يكون لينا نصيب و نعيش فيها مستورين و بكامل الصحة و العافية..بس فيه ناس ملقوش في الورد عيب قالوا ياأحمر الخدين. :blink: :aslam:

[moheltohamy]

وانا كمان يا شاب مصري ؛ ناقحة عليا الوطنية دلوقتي ، آه والله :unsure:

وعامل مزاج عنب على أغنية داليدا... حلوة يا بلدي. :happy:

ورفعتهالكو هنا للي يحب يمزّج نفسه :rolleyes:

[moheltohamy]

أنقل لكم تحيات د. الشامي من وراء البحار والمحيطات وبحر الظلمات ؛ من لندن أونتاريو wst::

وأحب أطمنكم إن الراجل سعيد جداً ، ومرتاح ع الموكيت آخر راحة ؛ وحاطط إيده على خده في انتظار العفش يوصل (معلش يا د. الشامي النكتة حكمت bsh:) )

وطبعاً موجود مع المدام ؛ يبقى مش فاضي للمنتدى خالص ، وطز فينا. ولما يرجع لنا بالسلامة جدة يوم 17 سبتمبر ويفضى ، ويبقى مفيش قدامه غيرنا ؛ هنقول له موش عاوظين (وش هند :happy: )

شوية جد بأه...

د. الشامي بيشكر كل الزملاء في المنتدى ؛ وربنا سهّل الأمور معاه جداً ، وكان حاسس فعلاً بتسهيل ربنا معاه في حاجات كتير هناك ؛ حس بدعوات الناس اللي هنا بجد (ده كلامه بالمناسبة)

وأنا - من منطلق إني صاحب القهوة دي - باسجل اعتزازي بشخص د. الشامي ، وإحساسي بالألفة كأني أعرفه من سنين ، وفرحتي بمكالمته لأول مرة ؛ ولا كأني باكلم الجيرل فريند بتاعتي

وأمنيتي أن نتلاقى في كندا في زيارته وزيارتي القادمة هناك (ديسمبر أو يناير القادمين)... ربنا يسهل :unsure:

داليدا و د. الشامي؟؟!! ده كتير بجد :rolleyes:

[precanadian]

انا اسف بشدة ياجماعة على التاخير الشديد بتاعي بس الحقيقة اني الاسبوع اللي فات كلة كنت راقد في السرير كات عندي تسمم والحمد لله حت سليمة. وبقيت زي الفل ودي اول دخلة ليا على النت بعد العيا اللي كنت فية.

الاخ الفاضل samehelassad

قال الإمام البخاري: (باب دعاء العائد للمريض) وذكر حديث عائشة رضي الله عنها: أن رسول الله صلي الله عليه وسلم، كان إذا أتي مريضًا أو أتي به إليه، قال عليه الصلاة والسلام:

(أذهب البأس، رب الناس، اشف وأنت الشافي، لا شفاء إلا شفاؤك، شفاء لا يغادر سقمًا). (البخاري مع الفتح : حديث 5675).

وقد عاد النبي صلي الله عليه وسلم سعد بن أبي وقاص، ودعا له فقال: " اللهم اشف سعدًا، وأتمم له هجرته ". (المصدر السابق 5659).

ما رواه ابن عباس عن النبي -صلى الله عليه وسلم- أنه قال : " من عاد مريضًا، لم يحضر أجله، فقال عنده سبع مرات: أسأل الله العظيم رب العرش العظيم أن يشفيك، إلا عافاه الله من ذلك المرض " (رواه أبو داود في الجنائز( 6 310) والترمذي في الطب (2083) وقال : حسن غريب . وحسنه الحافظ كما في شرح الأذكار لابن علان 4/ 61، 62، والحاكم وصححه على شرط البخاري ووافقه الذهبي 1/ 342

اخوك precanadian

[moheltohamy]

بصراحة يا دكتور اى حد يكون نفسيته تعبانة او متضايق .. ما عليه غير انه يدخل التوبيك بتاع حضرتك تنقلب حالته 180 درجة

تحياتى .. و كل سنة و حضرتك و الاخوة جميعا طيبين .. رمضان كريم

الله أكرم يا ماما نونا...

ويا رب تروحي كندا عن قريب ، وتشوفيها زي ما شفتها ... بلد جميلة وتستاهل تتعبي لغاية ما توصليلها.

بالتوفيق يا رب... وشكراً لكلامك :rolleyes:

[moheltohamy]

ايه يا دكتور تهامى كله ده من تاثير داليدا ودكتور الشامى (عندك حق)فين الحلقه بتاعت امبارح

طب خدوا الأغنية دي ، واعملوا دماغ زيي...

وآهي برضه دروس تعليمية لتقوية اللغة الفرنسية

والحلقة اللي جاية دي مخمخوا فيها براحتكوا بقى :rolleyes:

[moheltohamy]

بالتوفيق في الدراسة يا دكتور محمد

ان شاء الله

ومستنيينك يا زعيم :happy:

ازيك يادكتور محمد

شد حيلك في الامتحان وخلي بالك من نفسك.

شكراً يا شاب مصري... شكراً يا precanadian

ويا رب الكورس ده يعدّي على خير... أنا مش متفائل خالص الصراحة

إدعولي :rolleyes:

[moheltohamy]

يااااااااااااااااااااه

اخيرا ظهر الدكتور

طيب نجيبك ازاي يا عم.....تليفون و مش بيرن و قاعدلي تحت في البدرون في البريمة....و المنتدي و مش بتيجي تتطمن علي الرجالة اللي قاعده علي قهوتك و سايب الصبيان بينزلوا مشاريب و مش بياخدوا فلوسها.....ايه يا عم....هو انت وارث القهوة دي و مش تعبان فيها ولا ايه......ولا تكون بتطفش الزباين و عايز تقفلها......وتقلبها احدي فروع "التهامي هورتنز"....علشان تغلي المشاريب و الحركات بتاعت السوق دي ؟؟؟؟

علي العموم....يارجااااااااااااااااااااااااااااااااااااااااااااااااالة.....يا رجااااااااااااااااااااااااااااااااااااااااااااااااااااالة

*************************اعلان هااااااااااااااااااااااااااااام **************************

*********************************************************************

تم تغيير نشاط قهوة التهامي "سابقا" الي "التهامي هورتنز" مع العلم ان الاسعار هتفضل زي ماهيا لمدة شهر

وبعدين هيطبق علي المشروبات ضريبة المبيعات و ضريبة الملاهي الليلية و الذي منه

ومعني كده ان الاسعار هتزيد ييجي " 70% " يعني كله عشان خاطر مصر و الصناعة الوطنية....وتحيا مصر

*****************************************************************************

*****************************************************************************

مبسوط كده يا عم؟؟؟؟؟؟؟؟؟؟؟

إيسكوت يا حسيني...

مش عرفتلك حتة إجرام مووووت لسّه طازة :happy:

مش الكنديين بيستعبطوا الأمريكان ؛ زي ما الأمريكان بيستعبطونا كده؟ أحكيلك...

كنت باكلم الكرين أوبيريتور الأمريكي (فرانك) ؛ وانا باحضّر لنفسي مج كابوتشينو بالفرينش فانيللا ، من بتاع تيم هورتونز (جايب معايا علبة من اللي تحت البيت ودافع فيها دم ألبي - بتاع 20 دولار ولاّ حاجة ، وكان معاها مج كبير بتاع تيم هورتونز برضه ، وعليه مشروب كابوتشينو سخن مجاناً angl:: )...

المهم... إتفتح الكلام عن تيم هورتونز ؛ قاللي إنه مش بيحبه ولا بيشتري منه! قلتله ؛ هوه ليه فروع عندكم في أمريكا؟ قاللي آه طبعاً. بس غالي مووت! كوبّايت النيسكافيه بحوالي 5 دولار ، وهيه أصلاً في كافيهاتهم (زي ستار بَكس) بـ 10 سنت! ضحكت ضوحك :rolleyes: وقولتله الكنديين بيستعبطوكو! دا الكابوتشينو بالفرينش فانيللا آخره 1.53 دولار! لكن عشان همه عارفين إنكم كروديات ؛ فبيأرطسوكو ، وطبعاً إنتو بتدخلو هناك وما تسدّأوا ... كافيه كندي يا ولاد

عموماً يا ريس... أنزّل لكم الحلقة عشان بقالنا زمن بنكتب فيها... :lol:

[moheltohamy]

تعرف يا حسيني...

المصريين دول من أسوأ الجنسيات اللي ممكن تتعامل معاها بجد في الشغل ، والأنقح ... في الأكل!

واحد بيشتكي من أكل الشيفات الهنود اللي هنا ، وأنا لو عملتلكو الرز هتحلفوا بيه ، ولاّ المكرونة ، و ... و... و... قلتله ماشي يا عم عمر... واتكلّمت في الموضوع ده مع الأو آي إم (مدير البريمة) والبارج ماستر ( المدير الإداري) ، وقلتلهم ع المشوار ده. الناس عجبهم الموضوع ، وطلّعوا قرار للكامبوس (مشرف شركة التغذية) إن أي حد يعرف يعمل أكلة معينة ، بس يكون في حضور الدكتور ، ياخد كل السماحيات ، ويدوّقنا أكله. ولو الأكل عجب الناس ؛ يمشي بعد كده ، والشيفات يتعلّموا منه الطريقة ، ويعملوهالنا بعد كده!

يللا يا عم عمر... جبتلك الموافقات ، ورّينا همّتك. ألائي البيه (هوه أنا فاضي؟ مانا باكون نايم. ممكن أجيلك في وقت الشغل بتاعي ، بس تجيبلي موافقة الأو آي إم)!! البيه بيستعبط! وآهو يقضّيله ساعتين ولاّ حاجة إندوور ، ويبقى كله من وأت الشغل ، ويريّح نفسه من البهدلة برّه في الحر! قلتله طبعاً مش هينفع يا عم عمر!

آللي وانا مش معقول هاصحى م النوم أو أضيّع من وأت راحتي عشان أطبخ لكم! مش انتا اللي مش عاجبك الأكل يا عم عمر؟! سبحان الله!

وتكمل تاني النهارده... من أول رمضان ، والبهوات بتوع التغذية مش في دماغهم الخشاف ولا قمر الدين. إتفقت مع الكامبوس يطلبها في الصابلاي اللي جاي ، وقعدت أورّيله صور الآيتمز بتاعت الخشاف بالسيرش على جوجل. و فعلاً وصل الصابلاي امبارح. وجه البلح (بس مش مجفف!) والمشمشية ، والتين وقمر الدين ، وبس!

قلت عادي بأه الجود بالموجود... ودخلت النهارده الضُهر المطبخ مع الكامبوس ، وقلتله يعملهم ازاي ، ويقطّعهم والنظام والحركات... وعملوا كمية تكفي الـ 40 مسلم الموجودين ع البريمة ، وكل ده ، وانا مستقل الكمّية!

وع الفطار... مفيش غيري يا محترم اللي جه ناحيتها! :happy: angl::

وآجي اقول لهم... محدّش هيشجّع الخشاف يا جماعة؟ دانا عاملهولكو مخصوص! ييجي البهوات... وتسمع تريقة... هوه ده خشاف يا دكتور؟ ده زي ما يكون بسيسة! مش عاجبكو يا عم عمر ، تعالى وعرّفهم إزاي يعملوه! أنا ما أعرّفهومش يا دكتور ، همه المفروض يكونوا جايين من فنادق ، وعندهم خبرة! والله يا عم عمر ده اللي موجود ، روح اطلب من شركتنا تتعاقد مع شركة تغذية تانية بأه!

هوه مش الخشاف بتاع ماما طبعاً ، لكن بداية كويّسة ، وآهي حاجة من ريحة رمضان!

لكن هتقول إيه بأه... محدّش بيبرطم ع الأكل غير المصريين! حاجة هم! :rolleyes:

نخش ع التأمين الطبي في كندا...

[moheltohamy]

نتكلّم شوية على النظام الصحي في كندا...

هنا يا سيدي ؛ من يوم وصولك كندا ، بيكون من حقك تطلب من الحكومة كارت التأمين الصحي Health Insurance ، بس بتستلمه بعد 3 شهور. وفي خلال الـــ 3 شهور دول تظبّط نفسك مع شركة تأمين طبي خاصّة عشان لو لا قدّر الله تعبت أو جرالك حاجة ما تبيعش اللي وراك واللي أدّامك! طبعاً إحنا جايين من مصر ، والحاجات دي آخر حاجة بنفكّر فيها!

بس ان جيت للحق... يمكن اللي كان مطمّنّي إن كان معايا كارت الـــ BUPA (الشركة البريطانية اللي متأمن علينا طبي تبعها في ترانس أوشن)! وده شغال من أي مكان على مستوى العالم ، وبيشيل أي حاجة تعملها ؛ كشف طبي ، أسنان ، عمليات جراحية ، أدوية وخلافه. كل المطلوب منك تجيب فاتورة ، وتملا الفورمة بتاعتهم إنتا والدكتور أو المستشفى ، والفلوس هتجيلك على حسابك في البنك من غير لا لف ولا دوران ، ولا حتى يسألوا وراك :rolleyes:

ومبدئياً ؛ مانتاش محتاج أي كلكعة في أول تلات شهور ليك في كندا. إنتا بس تظبّط نفسك بالأدوية التمام وانتا طالع من مصر. وطبعاً ربك بيسترها ؛ وما تحتاجش لدكتور هناك مبدئياً.

وطبعاً كنت مقسّمهم سيستيماتيك زي ما كنت باعمل في طلبيات البريمة 92 كل 3 شهور (مضادات حيوية – أدوية برد وصداع وحساسية – GIT من إسهال وإمساك ومغص وانتفاخ وحموضة وGERD – كحة – مسكنات وماصل ريلاكسانتس – الكدمات والإديما – قطرات العين والأنف والأذن – باند إيد ومطهرات جروح ودريسِنج). وطبعاً كنت باجيب أحسن حاجة من كل كاتيجوري ؛ مثلاً :

Antibiotics: Ciprobay 750 mg tabs, Augmentin 1 GM tabs, Septrin DS tabs, Zithromax caps

Misc.: Panadol ActiFast tabs, Advil Cold & Sinus, Excedrin tabs, Flu-Rest tabs, Rhinopro caps, Labello Lip moisturizer, Locacorten-Vioform cream,

GIT: Conaz tabs, Flagyl tabs, streptoquin tabs, Imodium caps, Abilaxine tabs, Viscéralgin tabs, Disflatyl tabs, Primpéran tabs, Mucogel syp, Motilium tabs

Toplexil syp

NSAIDs: Indocid 75 caps, Feldene 20 mg tabs, Catafast sach, Celebrex 200 mg caps, Flexofan caps

Bruises & Edema: Ambezim tabs, Hemoclar oint

Drops: Otrivin Nasal Spray, FML-Neo eyedrops, Otal ear drops, Naphcon-A eyedrops, Salivex-L paint

Dressings: Band Aid, Hydrogen peroxide, Nebacetin powder spray, even some cotton

وطبعاً الأدوية في مصر رخيصة ؛ مثلاً السيپروباي 750 اللي شايفينة خراب بيوت في مصر ، والعلبة بـــ 64 جنيه ، موجودة في السعودية بـــ 165 ريال حضرتك! كندا بأه أغلى م السعودية كمان ؛ مثلاً الآدفيل في كندا بحوالي 10 دولار ، وفي السعودية بـــ 6.60 ريال حضرتك!

والنكتة بقى... ألمح علب الآدفيل اللي عندي ف العيادة هنا في السعودية (Manufactured by Wyeth Canada, Montreal, Canada)... أي خدمة يا ريس!

يعني البهوات بيصنّعوه في كندا ، ويبيعوه هناك بما يعادل 55 جنيه ، وبعدين يشحنوه ع السعودية ، ومصاريف نقل وشحن وتأمين ، ويبيعوه بما يعادل 9 جنيه! ومن هنا أبو سعد لعب لعبته... طب والله يا كندا لاعملها معاكي ، وأستعبطك وألبّسك المقلب ده... وقد كان :happy:

وبالمرة لاحظت الـ Otosporin ear drops اللي كنا شاريينه من الإمارات قبل ما نيجي بالبرّيمة ع السعودية هوّه كمان (Manufactured by: Glaxo Wellcome Inc. Mississauga, Ontario, Canada)! آخر حلاوة!

وبغض النظر عن سعر الأدوية... النظام في كندا تروح تكشف عند دكتور ، يدّيلك الروشتة مكتوب فيها الدواء اللي هتحتاجه ، وكام علبة كمان حسب الكورس العلاجي بتاع سعادتك! تروح الصيدلية ؛ تدّيهم الروشتّة ؛ يدولك الدوا ؛ تحاسب عليه ، وسلامو عليكم ، عليكم السلام! مفيش نظام الأتّة المحلولة اللي احنا عايشين فيها هنا ؛ سواء في مصر أو الإمارات أو السعودية (حسبما رحت وشفت). تدخل ع الصيدلي ، أو البنت اللي بدبلون ؛ سلامو عليكو ؛ أنا عاوز كذا وكذا وكذا... حاجة كده زي "سلامو عليكو يا حاجّة ، والنبي توزنيلي 2 كيلو موز على تلاتة تفاح واتوصّي ونقّيهم كويّس ، واللي انتي عاوزاه هادّيهولك!"

وهيّه مصلحة بصراحة ربّنا... رحت وبضّعت وشحنت الأصناف سابقة الذكر ، وبكمّيات يا ريّس ؛ كنت بارمي الپامفليت اللي جوّه ، والعلبة أم شريط كنت أحشُر فيها 3! وبكده قلّت الكمية اللي ف الشنطة (إلى حدٍ ما طبعاً) ؛ عشان الجمارك هناك ما يقولوش واخدهم يتاجر فيهم! وطبعاً زي مانتا عارف... العملية مشيت لوووووز ؛ ولا حد قاللي تلت التلاتة كام!

ومن منطلق اللي حصل في أول مرة والمسائل مشيت زي الفُل ؛ تاني مرة عملت نفس الفيلم ، وشحنت برضه كمية أدوية عظَمَه! ومش باقي غير نفتح لنا صيدلية هناك!

النظام الدوائي هناك يا ريس زي مانتا سمعت عن نظام ترانس أوشن كده ؛ الأدوية تنقسم لقسمين Prescription and non-prescription medications . أو زي ما بيسمّوها OTC, Over The Counter ؛ ودي بتكون الحاجات البسيطة اللي مش محتاجة استشارة طبية عشان تشتريها (طبعاً من منطلق إن الأدوية سموم لا تتناولها غير بموازنة الأضرار مع الفائدة المنتظَرة منها).

وبتلاقي الأصناف الـــ OTC دي موجودة في الهايبر ماركتس اللي هناك زي Wal-Mart أو Shoppers Drug Mart مثلاً (والتاني ده له فرع جمب البيت بالمناسبة) ؛ وتشمل أدوية الصداع والبرد والحساسية والحموضة والقرحة وغيارات الجروح ، ومراهم المسكنات (زي الفولتارين چيل كده) ومراهم التينيا والقشرة ، والفيتامينات والمكملات الغذائية والجلوكوزامين ... الحاجات اللي زي كده يعني.

باقي الأدوية بأه تُعتبر Prescription medications ، يعني لا تُصرَف إلا بروشتة طبية! مش باستيلية هيه حضرتك!

مش عارف يابو حميد صحيح... لاحظت حاجة غريبة حصلتلي في كندا في زيارتي التانية (فبراير / مارس)... كان دايماً بتطلعلي حبوب في وشي (حبوب Abscesses ، مش حب شباب... خلاص الشباب راح!). والحبوب دي موجودة على طول ، الحباية من دول تخف تلاقي واحدة تانية ظهرت في مكان تاني ؛ سواء الخد أو في دقني أو الأنف أو فوق الحواجب... وأحيانا كنت تلاقي حبّايتين موجودين بيسلّموا لبعض! لدرجة إن هند كانت مسمّياني "أبو حبّاية"! :lol: أنا عمري ما حصل معايا كده! والغريب إن كل الحركات دي راحت مع رجوعي مصر! تفتكر سببها البرد الغريب اللي كان هناك؟! بصراحة حاجة غريبة بجد!

نسيت اقول لك كارت التأمين الطبي الحكومي الخاص بولاية أونتاريو (الـــ OHIP) بيغطي إيه بالظبط... ده يا سيدي بيشمل أي فحص أو كشف طبي ؛ سواء في عيادة خاصة أو مستشفى عام أو خاص أو مركز طبي ، والأشعات والتحاليل اللي محتاجها الدكتور المعالج بتاعك أيّاً كان هتتعمل فين ، والعمليات الجراحية لو – لا قدّر الله – احتجتلها ؛ برضه أياً كان هتعملها فين! والكلام ده يشمل كل التخصصات الطبية باستثناء الأسنان ، وعمليات التجميل (اللي عايزة تتدلّع يبقى من جيبها لمؤاخذة!) ، وتكاليف العلاج (الأدوية يعني)... دول بتحاسب سيادتك عليهم.

طبعاً الكلام اللي فات دوت هوه تأمين الحكومة الكندية على مواطنينها الصِيّع ... العواطلية ... السناكيح اللي ما بيشتغلوش. لكن أي شغل هتشتغله يا ريّس هيأمّن عليك ، وهيغطي الحاجات اللي ناقصة دي. طبعاً الأسنان مغطاه (تبع شغلك) بالكامل ، والعلاج شغلك بيتحمل 80% من تكلفته ، وبتدفع انتا 20% بس من سعر الأدوية (أياً كانت إيه هيه الأدوية) ، وبالنسبة للتجميل (ما قلنا... اللي عايزة تتدلّع يبقى من جيبها لمؤاخذة!). نسيت اقول لك إن من ضمن التأمين الطبي تبع شغلك برضه ؛ ليك تأريباً 3 زيارات للتدليك والمساچ (من حقك تمايص نفسك برضه بعد تعب الشغل ؛ عشان تعمل ريفريشمنت لنفسك)... فعلاً ، كندا دي بلد مايصة! :wub:

خد دي... هند راحت تدلّع نفسها وتلمّع سنانها... الـــ Hygienist بتاعت السنان ، اللي شغالة في عيادة دكتور السنان اللي هند بدأت تتعامل معاها (هناك لازم يكون ليك دكتورك) ؛ آلتلها هنحتاج نعمل لك أشعة عشان نطّمّن على أسنانك! وهند تقول لها أنا جاية ألمّع سناني مش أكتر ، والأشعة دي أنا عملتها في مصر من 3 سنين! ودي تقول لها لأ دا لازم عشان الفايل بتاعك يكون شامل ؛ وما تكونش فيه حاجة مستخبيّة ، وكمان 3 سنين دي فترة كبيرة ؛ المفروض تعمليها كل سنة عشان نكون دايماً مطّمّنين! وقعدت ساعة تلمع لها في نص أسنانها! وميعاد تاني ساعة ونص عشان النص الباقي! نص سنانها يا ريس إتلمّع بـ 121 دولار ، والنص التاني بـــ 190 دولار ، وبالإجمالي كله على بعضه هيوصل لحوالي 400 دولار! هوه كله طبعاً على حساب الشغل (هيه هتحاسب عليه ، وتقدّم الفواتير ، والشغل هيرجّع لها الفلوس مع مرتبها) ؛ يبقى عمر هند ما هتقول لأ ؛ خصوصاً إنها بتعز الدلع ده موت! كل ده ولسّه ما قابلتش دكتور السنان نفسه ؛ هتقابله ف الآخر خالص بعد ما تخلّص كل الشغل ده!

اللذيذ بأه إني قبل ما اطلع البريمة الهيتش ده كنت لسّه ملمّع سناني عند دكتور كويس في المنصورة ؛ لمعلي سناني كلها ، وفي نص ساعة بالكتير ؛ عشان كنت بارغي مع الراجل... ودفعت... إحم... 25 جنيه! :wub:

أكلمك بأه النظام بيمشي إزاي من البداية...

البداية مع سيرفيس أونتاريو ، وده المكان الحكومي اللي بتطلّع منه رخصة القيادة المبدئية (G1) ، وكارت التأمين الصحي ، وبتجدد فيه الـــ PR Card لو احتجت تجدده لو ضاع منك مثلاً! بتروح تقدّم على كارت التأمين الصحي هناك ؛ وبيحتاجو منك تحقيق شخصية يكون فيه العنوان (زي رخصة القيادة مثلاً) ؛ ولو مكانش فيه (زي حالتي ما كنتش لسه طلّعت الرخصة) ؛ فبيطلبوا منك أي إثبات لمحل الإقامة (زي عقد إيجار البيت ، أو جواب مراسلات من البنك). المهم فشل الموضوع ده في الزيارة الأولى عشان كنا ساكنين عند إيمي في الجستهاوس.

تاني زيارة رحت وأدام الراجل وريته الـــ PR Card ، فطبعاً باين فيه إني موجود من كندا من سبتمبر ؛ وسألني ما عملتوش ليه من ساعتها؟ قلتله كان فيه أمور عائلية استلزمت سفري مصر تاني ، ولسّه راجع كندا تاني لسّه الشهر ده فبراير! قاللي أولاً معاكش إثبات محل إقامة (مكانش فيه جواب حديث بإسمي من البنك ؛ كنا عاملين الحساب Paperless account من أيام إيمي ؛ يعني من غير جوابات أو مراسلات ؛ اللي عاوزين تبعتوه ابعتوه ع الأكاونت بتاع البنك ع النت ؛ ومش عاوزين خَوْتة) ، جه الوأت بأه اللي كنت محتاج فيه للخوْتة. وثانياً لا ينطبق عليك شرط الإقامة (5 شهور من آخر 6 شهور) داخل ولاية أونتاريو! وطاشت تاني المرة دي! :lol:

بعدها بأسبوع رحت تاني للراجل الريسيپشانيست ف المكان ده ؛ ومعايا جواب معتمد من البنك (طلبته مخصوص - ودفعت تمنه ، بتاع 10 دولار - عشان ما كنتش هالحق جواب البنك الورقي) مذكور فيه العميل الفلاني المقيم بالعنوان الفلاني له رصيد كذا في البنك. ده كان إثبات العنوان. وشرحتله الفيلم وبكل صراحة ؛ قاللي المفروض مش من حقك تطلع الكارت ده خالص دلوقتي ، لكن خد لك رقم ، وأدخل على أي موظف من الموجودين ؛ وممكن جداً ما ياخدش باله ، وحاول ما تتكلمش خالص غير إنك جاوب على أد اللي يسألهولك ؛ وممكن جداً ما ياخدش باله. وبالفعل دخلت على واحدة سمرا بس طيّبة جداً بصراحة. وقلتلها إني جيت وخلاص هاستقر في البلد ، وكده يعني. والست كانت سپور أوي الصراحة ؛ ولا شغلت دماغها بأي تفاصيل ، وامضيلي هنا ، وخلاص ؛ هنبعتلك الكارت ع البيت بعد 3 شهور. شكراًً!

سألتني سؤال غريب جداً يا احمد... قالتلي تحب تتبرع بأعضائك بعد الوفاة؟! أنا سمعت السؤال ؛ واتلبّشت! :blink: وبقيت مش عارف أرد الصراحة. قلتلها بصراحة السؤال ده عمره ما خطر ببالي ، قالتلي عموماً ممكن تفكر وتقرر بعدين. قلتلها يا ريت! عمرك فكرت جدّياً في إجابة السؤال ده؟! angl::

المهم... بعد ما بيوصلك الكارت بالبريد ع البيت بعدها بـــ 3 شهور ... لازم تفتح لك فايل مع فاميلي دكتور ، وده هيبقى الدكتور بتاعك. أي حاجة تحصل لك بعد كده تروح عليه ؛ تحجز ميعاد بالتليفون ؛ هتظبّط مع السكرتيرة بتاعته الميعاد حسب ظروفك والمناسب ليك إيه ، وتروح على ميعادك على طول (مفيش حاجة اسمها تتلطع وسط الكشوفات تستنى الدخول بالدور)! طبعاً لو حصلتلك أي ظروف ، لازم تتصل بالتليفون تلغي الحجز ، وإلاّ هتدفع 50 دولار تخلف عن ميعاد الإستشارة بتاعتك! ولماّ تساءلت هادفع إزاي؟ يعني هاروح مخصوص عشان أدفع؟ مش رايحلُه أصلاً! كانت الإجابة... إنتا نسيت الكريديت بيرو؟! إنسى أسلوب البلطجة ده هنا خالص! الحل بسيط... بكل تحضر وأدب واحترام ؛ كلّف نفسك مكالمة تليفون (محلّية ببلاش) واعتذر عن الميعاد. شفت الحياة سهلة ازاي؟! wst::

بعد كده ، بتروح للدكتور في معادك ، تدّي للسكرتيرة كارت الميديكير بتاعك ، هتاخد رقمه في الأپليكيشن ، وتمضيلها. وتنتظر دقيقتين. بعد كده تدخل للكشف بتاعك ، هيكشف عليك... إحتاج يوصف لك أدوية هيدّيلك الروشتة ، اللي – بيها – تنزل الصيدلية تشتري الدوا (الحاجة الوحيدة اللي بتحاسب عليها)... إحتاج يطلب لك تحاليل أو أشعة ؛ هيدّيلك الجواب اللي تروح بيه لمعمل التحاليل أو الأشعة ... إحتاج يحوّلك على أخصّائي معيّن ؛ هيبلّغك إنو هيحوّلك على فلان الفلاني تتابع معاه حالتك ، وهيبعتله هوه التحاليل والأشعة وبياناتك الطبية بالفاكس ، وانتا بس تروّح بيتكو. بعد كده هتلاقي سكرتيرة الأخصائي بتكلمك على تليفونك عشان تتفق معاك ع الميعاد اللي يناسبك تروح لهم فيه!

والحياة ماشية باللزازة دي وزي الفل... وكلُّه برقم الكارت بتاعك ؛ وإمضاء سعادتك الموقّر!

وتعرف إنك المفروض كل فترة تروح تعمل تشيك اپ علشان تطّمّن على نفسك؟ ولو ما عملتهاش (ما استخدمتش الكارت الطبي بتاعك) ؛ تُسأل على كده؟! لدرجة إنك لما بتروح تقدّم على الجنسية ، وبيلاقوك ما استخدمتش كارت التأمين الطبي بتاعك ؛ بيشكوا إنك ما كنتش مقيم في البلد! ما يعرفوش إن احنا أساساً مش فارقة معانا الموضوع ده ؛ وطول ماحنا واقفين على رجلينا ؛ نبقى زي الفل ، والصحة بمب والحمد لله!

بنسمع دايماً صحيح عن العجز الرهيب في الأطبّاء هناك في كندا. يمكن احنا ما اتحطّيناش في ظروف تفرض علينا الاحتياج ليهم في عمليات أو مستشفيات مثلاً ، لكن هيا فعلاً م الواضح إنو فيه نقص جامد هناك. أحكيلك موقف حكاهولي أحمد الديب...

فوزي زميله ف الشقة (الروم ميت بتاعه ، شريكه في السكن يعني) ، كان بيحاول يركّب التكييف الشباك بنفسه (توفيراً للنفقات) ، المهم البتاع اتزحلق وربنا ستر إنه تفاداه ، بس اتجرح جرح غائر مش فاكر في رقبته ولا كتفه! المهم ، إتصل بديبو ، ورجع أحمد ع البيت وأخده على صني بروك هوسبيتال (أقرب مستشفى للبيت ، وهيه مجمع طبي بجد ، وَهْم ، أنا بقيت فاتح بقى وانا ماشي جواها... هاحكيلك بعدين)! المهم ، دخلو ع الطوارئ ، وفضلو مستنيين ساعتين (والكلام لديبو) على ما جالهم دكتور!

والغريب إنهم – كحكومة – بيتغابوا ع الدكاترة اللي جايين من بره ، حتى لو عملو المعادلة الكندية... ليه؟ ما تعرفش! بس هيه عموماً الدنيا والإعلام قالب ع الموضوع ده. ويقول لك فيه قائمة انتظار للعمليات في كندا بتختلف من مكان للتاني.

دول حتى عاملين موقع حكومي بيتابع قائمة الانتظار دي ؛ بحيث تقدر تتابع وتشوف أنهي مستشفى الضغط عليها قليل ؛ تروح تحجز ميعاد عشان تعمل العملية بتاعتك فيها. وبالتالي يتوزّع الضغط ع المستشفيات المختلفة. وطبعاً كل ما بعدت عن المدن الكبرى (زي تورونتو مثلاً) ؛ الضغط بيخف ، وفترة الانتظار بتقل برضه.

ييجو يقارنو قائمة الانتظار بتاعت الغسيل الكلوي مثلاً في مستشفى الكلى والمسالك البولية – جامعة المنصورة (مستشفى غنيم) اللي قائمة انتظار الغسيل الكلوي 6 شهور (والعيان أصلاً بيحتاج يعمل غسيل مرتين تلاتة كل أسبوع!)

واللذيذ لما تلاقي الناس اللي بيتّريقوا في مصر على فترة الانتظار في مستشفيات كندا! آه هوه الوضع هناك يخنؤ ؛ بس ده بالنسبة لدول العالم الأول ، مش مقارنةً بينا احنا! لكن لما احنا بنسمعهم بيشتكوا بنفكّر إن الحال متدهور والناس بتشتكي ، دا الدنيا بايظة هناك بقى على كده! داحنا في مصر ما بنشتكيش ؛ يبقى يمكن بأه الوضع هناك أسوأ من مصر!

كنت باتكلم مع چاك (البارچ ماستر بتاعنا ع البريمة) عن نظام التأمين الصحي في أمريكا... وإن النظام اللي هناك ده لا يغطي كل الناس ، ولا كل التخصصات ، ولا يتحمل كل المصاريف! ساعتها قلتله لا يا عم ؛ نظامنا احنا في كندا يكسب! آللي ما هيه هيّاها ؛ إنتو ضرايب المبيعات عندكو 13% وعندنا احنا 8.5 – 9% بالكتير! إنتو الحكومة بتسحب منكو ضرايب كتير عشان تغطي ميزانية التأمين الصحي بتاع كل الناس ده.

بس بيني وبينك... أنا موافق إن الدولة تزوّد عليّا الضرايب شوية ، وتغلّي أسعار الحاجات شوية (بزيادة ضريبة المبيعات) ؛ في مقابل إن النظام الصحي والتكافل الاجتماعي يغطّي كل الناس في البلد. كده هيه بتحمينا من المشاكل ، و وجود مشردين وعاجزين وعاطلين محتاجين فلوس وعلاج وغيره ؛ يعني م الآخر Potential criminals ! يبقى م الآخر... أنا سعيد بالنظام في كندا. ويا رب يفضل النظام ماشي بالشكل ده دايماً.

[mohamed omar]

اسمحلي اعزم كل القهوه علي حسابي بمناسبه التجديدات يا دكتور

اشمعني تيم هارتونس...ماينفعشي نيو كاب..

طبعاً ما ينفعش يا محمد عمر بيك...

الراجل كندي مخلص ، وجاي يمسّي ع الرجالة اللي ع الأهوة بالمشروب القومي الكندي!

فين الوطنية؟! حاسس إنك هتطلع عميل ألبيرتاوي ، أو مصيبة سودة لتطلع أحد الخونة الكيبيكاويين! :lol:

تعيش يا دكتورنا يا بريكانيديان ، ودايماً صاحب واجب :rolleyes:

انا لسة في مصر يا دكتور ..بس عندي اصدقاء في كنداكتي :happy: رو عارف قصة تيم هارتونس من ساعةما كان مشارك عماش يسراءيل في مطعم 5مترفي 5متر في ميدان ليستر angl:: سكوير بلندن لحد ما عمل عملته و طفش علي كندا ... تحياتي.

[حسام يوسف]

بجد يا د.تهامى

أنا استمتعت جدا بالحلقة دى من الهاند اوفر بتاعك

ربنايكرمك على قد ما بتساعد الناس

فعلا التامين الصحى كان أهم النقط اللى فى دماغى وكنت عايز أعرفها

وانت كدة جبت اخر الموضوع

الف شكر

تحية كبيرة من أسوان

اه

معلهش نسيت حتة كنت عايز أقولهالك

الناس هنا فى مصر مش مقتنعة ان الدوا فى مصر من أرخص ما يمكن

همة معذورين

الدخل هوة اللى مسخرة

يعنى عارف السيبروباى اللى بعض الناس بتستغلاة

وهوة انتى بيوتك قوى من مجموعة الفلوروكينولون

السيبروباى 750 دة عاملاة شركة مصرية تخيل بكام؟

25 جنية؟

تخيل

تيجى نعملنا طلبية دوا محروق على كندا؟

تم تعديل 14 سبتمبر 2008 بواسطة حسام يوسف

[mohamed omar]

و اللهي يا جماعة انا لي صديق في تورونتو..منتظر من اربعة شهور علشان يعمل عملية من ابسط العمليات الجراحية..ممكن اي دكتور مبتدئ يعملها..و معاه كارت الأوهيب..و كنسلوا ليه ميعادين مع المتخصص بالتليفون برده...

[bent misr]

ايه يا د/ التهامي الحلاوه دي انت أظن حكيت كل حاجه عن التأمين الصحي بالتفصيل

بس ماتجيبش سيرة التأمين في مصر الحبيبه وحيات أبوك لأني منغمسه في الموضوع

ده و بشوف كل حاجه بعيني... الفكره عندنا في مصر ان كله ماشي بالواسطه حتى المرض

و العلاج ,,, والي عاوز يسعف نفسه يدفع من جيبه بقه ده لو كان أصلا عنده جيب

وأنا من رأيي ان المريض ينتظر الدكتور أحسن ما يتفق معاه ولي يعملوه العمليه واحد تاني

خالص كان معدي أمام غرفة العمليات ( ربنا يستر علينا جميعا )

أسجل اعجابي ومتابعتي

[hosiny]

موضوع شديد فعلا يا دكتور و حل و فسر و جاوب عن تساؤلات كثيرة حول هذا الموضوع وانا منهم

بس فعلا انا سمعت من واحد صاحبي ان فعلا ممكن تتلطع كام شهر لو حالتك مش مهمة بالنسبة لهم.....لحد مات يحنو عليك

...............ها يا دكتور ايه اخبار الـ "HARVEST" بعد اول يوم في الافتتاح......انا عملتلك دعاية تمام .....عايز نسبة بقي

Keep in touch

[محمد عيسى]

تعرف يا حسيني...

المصريين دول من أسوأ الجنسيات اللي ممكن تتعامل معاها بجد في الشغل ،!

...

يا راجل يا طيب !!!

باينك ما اتعاملتش مع الفلسطينيين أو السودانيين

عموما بشكرك بشدة على الوقت اللي اقتطعته و خدمت بيه الناس و ربنا يجعله في ميزان حسناتك

ممكن نبذه بالمناسبة عن الـ GERD

لو كان وقتك يسمح لأنني بعاني منه عالآخر من سنتين

[alaashabana]

تهامى ممكن طلب

عاوزك تحكيلنا على الحياة اليومية فى كندا.. يعنى الحياة ازاى والناس ازاى.. بتمشى فى الشارع بتاقبل جنسيات اية واية اغلب الجنسيات اللى بتقابلهم .. الجو فى ايام الثلج ممكن تلاقى ناس بتجرى ولا قاعدين يفطروا ولا كل واحد فى سيارتة .. بجد عاوزك تحكى علشان اعيش ولو لحظة واتخيل الحياة فى كندا ..

اة على فكرة انا محاسب بس كنت بجرب الحركات دى وقولت اجربها فيك الاول.. wst::

متتأخرش.. وطول فى الحلقة شوية احنا فى رمضان ..