كندا التي رأيتها :)

[moheltohamy]

لمؤاخذة يا صاحب القهوة.....الطلب ده عندى المرة دى...

Demerit points هى نقاط الجزاء للمخالفات المرورية و التى تكتب عليك اذا ارتكبت مخالفة....و من الكبائر هناك الا تقف على بعد 15 متر من اتوبيس المدرسة الى أن ينزل جميع الاولاد....و يطفىء انواره و يبدأ فى التحرك....

تحياتى....

يسلم فومّك يا ريس... طبعاً القهوة قهوتك ، وتنوّرنا بوجودك ؛ بس ما تجيش تقول عاوز نسبة م المشاريب :big_boss:

[moheltohamy]

حبيت اعدى و اقول ميا مسا

يمكن حد يقول اتفضل اشرب شاى ولا حاجة

بلاش كابتشينو ولا نسكافيه

يا سيدي تنوّرنا... وآديك شايف ، الأهوة ليها 2 بيوزّعوا المشاريب!

والشاي موجود والأهوة موجودة ، وانتا عارف... الجالي Galley فيها الحاجات دي 24 ساعة :big_boss:

[moheltohamy]

حبيب قلبي التهامي باشا:

ياجماعة الراجل دة والله مفيش بعد كدة. اخلاق واحترام وجدعنة فعلا مصري اصيل وابن اصول. الف شكر ياريس على المكالمة الطويلة الجميلة دي من اعماق الخليج العربي.(خلاص ياباشا الجهاز اتصلح وكلة بقى فل الفل) وانشاء الله نتقابل كلنا عن قريب في كندا انا وانت ودكتورنا الشامي وزعيم المخابرات القوي جدا القديم بتاعنا ياسر باشا او اكس الهجان باشا ربنا يرجعهولنا ولو حتى يسلم علينا ومايحرمناش من تواجدة معانا.

يا راجل قلبك أبيض...

انتا اللي ليك وَحشة... بقى حتت فايراص مالوش لزمة يذل الواحد كده؟!

تعرف... ساعات باستغرب... همه جدودنا (وأبّهاتنا) كانوا عايشين ازاي من غير كمبيوتر أو نت؟! :big_boss:

ياباشا لا تلاكيك ولا حاجة. خلاص بصمت بالعشرة. بص احنا انشاء الله نروح في شهر خمسة ولا ستة سوا (بس انت ادعي ربنا يكرمكني وييسر لي الامور وتيجي الفيزا اوام). ونستمتع بالصيف. وربنا يكرم ونلاقي شغل والدنيا تحلو ونجيب عربية على الشتا ويبقى فل الليالي.

إحممممم... هوه يؤسفني أزعزع شوية الأحلام الوردية دي...

ما انصحكش إطلاقاً تبدأ تطلّع رخصة أو تتعلم السواقة أو تمارسها في كندا على الشتا...

مبدأ الفرامل ع التلج ده مش سهل ، وهياخد منك وقت كتير على ما تحس بيه ، وبالتالي يُستحسَن إنك تبدأ السواقة في الصيف ، أو أواخر الصيف بحد أقصى.

[moheltohamy]

سوال اخر يا دكتور تهامي

بالنسبه للجاكيت والشوز الخاص ببرد كندا هل اي نوعيه يمشي حالها والا هناك انواع خاصه مش بتيجي الاسواق العربيه وهل هناك شوز خاص يقلل من النزلاق علي الجليد...؟؟؟

تحياتي###

سؤال وجيه يا دكتورنا ، مجاش في بال حد م اللي قروا الهاند أوفر...

بالنسبة للجزمة اللي تتلبس في أوقات التلج... المفروض تكون (مش ناعمة) ، يعني ما تلبسليش جزمة كلاسيك ع البدلة وانتا هتمشي ف التلج مسافات كتير... كده بأه هتتزحلأ هتتزحلاً!

الجزمة المفروض يكون نعلها فيه بروزات كتير ، ويستحسن يكون النعل بتاعها رابر Rubber بقدر الإمكان. بكده يكون ليها Grip كويّس ومُحكَم على الأرض الغرقانة تلج.

وبالنسبة للجاكيت... أي جاكيت بيعزل جسمك عن الجو الخارجي هيكون زي الفل...

وفي الأوقات الشديدة ؛ ممكن واحد زي اللي كان جابهولي أحمد الديب (المبطن بالفايبر جلاس) هيكون أستاااااذ :big_boss:

[moheltohamy]

برضه أنا اللي هاسبقك في المرواح لمصر. بكره إن شاء الله هانطلق على هناك. وراجعين للبهدلة تاني ؛ للنار والعذاب والتراب والزحمة والأرف من تاني!

باسجل استمتاعى الشديد و انا بقرأ ( مسلسل ) اليوميات التهامية فى الحياة الكندية.......... و معجبة جدا ما شاء الله بواقعية حضرتك و المدام.... و اهو ادينى باحاول اجتهد علشان اخلص المسلسل كلة............ بس يا دكتور ربنا يخليك بلاش ال notes اللى شبه اللى فوق دى احسن باحس ان حد رش علية مية ساقعة و انا بتفرج على فيلم لطيف و ليه هدف ........يمكن الواحد مش عاوز يشوف الحاجات الوحشة اللى فى مصر او زعلان عليها ..... خلينا نتفق ان كلنا لما نشوف حاجة جميلة مش عندنا ، ندعى ان ربنا يصلح حالنا و يصلح حال البلد اللى كلنا بنحبها ( مهما بان عكس كدة)

بس pleaseانا مش عايزة افتح عليك مواضيع جانبية تضايقك ...... ده بس خاطر كده على جنب.

تانى باحيى حضرتك على صراحتك (اللى مش موجودة كتير) فى سرد الاحداث......

اللي باستغربله يا newcomer إنك علّقتي على حوار جانبي دار بيني وبين سامح على ما أذكر! :big_boss:

وأعتقد إن من حقي أعلّق على الأجازة زي مانا شايفها! ولاّ هيه الديمقراطية وحرّية التعبير جات عندي و وقفت؟!

ويؤسفني إني أؤكد تاني إني كل مرة بارجع فيها على مصر باكون شايل الهم! وباكون سعيد جداً لو كان بقائي في مصر ترانزيت (همه 24 ساعة لا غير!) زي ما حصل من السعودية لمصر قبل ما أروح على جنوب أفريقيا ، وبرصه ف العودة... 24 ساعة بس في مصر... ضيف خفيف يعني!

وأوضّح لك أكتر...

أنا هنا ف البريمة مش شايل هم أي حاجة ف الدنيا... ماهو أنا الدلّوع اللي ف البريمة ، بانام وقت مانا عاوز واصحى وقت مانا عاوز ، ولا شايل هم أكل ولا شرب ولا غسيل ولا مكوى. بالعربي مقضّيها!

أنزل الأجازة بقى... لو رايح مصر... نرجع لأيام النودلز لما الواحد خلاص نفسه بتقفل! والغسيل والمكواه ، وكل المسئوليات دي على دماغي طبعاً!

وطبعاً بعد أغبى قرار عملته في حياتي (بعت العربية) ، فأصبحت تنقلاتي ما بين ميت غمر والمنصورة ودمياط والقاهرة وأحياناً الإسكندرية قمة المرمطة! ومن منطلق إني ما باعرفش امسك لساني ، ولا باطيق ريحة السجاير ، ولا أسلوب البلطجة... فدايماً فيه خناقات في المواصلات!

البهوات اللي بيشربوا سجاير ، والسواقين اللي مشغلين الكاسيت أو الراديو عالي ، أو أسلوبهم غبي ف السواقة... دايماً باتخانق! واللذيذ بقى تلاقي تضامن فئات الشعب ف الوقت ده ؛ تضامن مع المدخن طبعاً ضد الهمجي اللي بيمنعه من ممارسة حقه الدستوري! ويا سلام بقى لو السواق مشغّل الراديو على التواشيح اللي قبل صلاة الجمعة وكان الصوت عالي والسمّاعات من أردأ الأنواع وبتزن! نفسي تيجي تتفرجي ع المشهد لما باطلب من السواق يوطّي الصوت أو يقفله ، أو ببساطة يفصل السماعات الخلفية ويخلّي الصوت على قده هوه بس أدام...

ركاب العربية بالكامل بيتلفتولي يشوفوا مين الزنديق الفاجر اللي بيطلب يوطّي صوت الدين! وطبعاً السوّاق مقتنع إن العربية دي عزبة أهله يعمل فيها زي ما هوه عاوز ، ولو مش عاجبك انزل!

ولو تلاحظي أنا كنت كاتب الكلمتين دول في 31 يولية يعني في عز الحر والزحمة والأرف في مصر! أحب أفكرك إني هنا ف البريمة أنا نادراً ما باغادر الأوتيل (المبنى السكني Accomodations) ، ولا باشوف حتى الحر ف السعودية ولا الشمس حتى شكلها عامل ازاي! دانا أحياناً ما باشوفش الشمس لمدة أسبوع!

لكن أقف في الشارع نص ساعة في كوبري القبة الساعة 4 العصر عشان تاكسي يحن ويقفلي؟! وطبعاً الأتوبيسات طافحة باللي فيها... هاخدها مشي للمطار؟! وطبعاً الجو قمة في الحر والعرق والتراب والزحمة في كل مكان أروحه!

المفروض أسجل إعجابي وسعادتي بالعودة إلى مصر في الأجازة؟! العكس بكل أسف... أنا دايماً في الأجازة باكون باحلم باليوم اللي هارجع فيه الشغل ؛ حيث المخمخة والدلع والرفاهية ع البريمة.

المفروض أداري وازوّق كلامي ، وأكتم في قلبي ؛ طب ليه وعشان إيه أصلاً؟!!!!!!! :king:

[moheltohamy]

انتا اللي ليك وَحشة... بقى حتت فايراص مالوش لزمة يذل الواحد كده؟!

ليه كده يادوك تزعلني منك..مالهم الفيارص بقى..مش مخلوقات ربنا برضو... :lol: ..وأنا اللي بقول عليك طيب وحنين..طلعت وِحِش وشرير :yahoo:

هاهاهاهاهاهاهاه... هيه جات فيك انتا يا هندسة؟!!! :big_boss:

معلش مش قصدي عليك انتا خالص :king:

بس أصل واحد من جرايبينك راح بهدل اللابتوب بتاع سامح ، وخلاه يا عيني غلبان والسكة مأطوعة بيه!

و واحد تاني من عيلتك الكريمة برضه مبهدل الناس اللي عندي هنا ع البريمة ، لدرجت إني خلاص الأدوية فينيتو من عندي!

الله يخلّيك ، بلغ سلامي لعيلتك نفر نفر ، وقوللهم بس يحنوا ع الناس إن شللا حتى بس لغايت طلبيّت الأدوية الجديدة ما توصل ، وبعدين يعملوا اللي همه عاوزينه

[moheltohamy]

باسجل استمتاعى الشديد و انا بقرأ ( مسلسل ) اليوميات التهامية فى الحياة الكندية.......... و معجبة جدا ما شاء الله بواقعية حضرتك و المدام.... و اهو ادينى باحاول اجتهد علشان اخلص المسلسل كلة............ بس يا دكتور ربنا يخليك بلاش ال notes اللى شبه اللى فوق دى احسن باحس ان حد رش علية مية ساقعة و انا بتفرج على فيلم لطيف و ليه هدف ........يمكن الواحد مش عاوز يشوف الحاجات الوحشة اللى فى مصر او زعلان عليها ..... خلينا نتفق ان كلنا لما نشوف حاجة جميلة مش عندنا ، ندعى ان ربنا يصلح حالنا و يصلح حال البلد اللى كلنا بنحبها ( مهما بان عكس كدة)

بس pleaseانا مش عايزة افتح عليك مواضيع جانبية تضايقك ...... ده بس خاطر كده على جنب.

تانى باحيى حضرتك على صراحتك (اللى مش موجودة كتير) فى سرد الاحداث.....

زبون جديد يا دكتور.....

انت مختفى لية؟؟ ومين اللى ماسك القهوة بدالك..؟؟

للتصحيح زبونة جديدة :lol:

انت فين يا دكتور

انا اجتهدت و خلصت قراية التوبك كلة......... و دعييييييييييت لك ربنا يوفقك على قد ما انا ضحكت و استفدت

مش معقول الربطة دى يعنى؟؟؟؟؟ انا حسيت ان حضرتك و مدام هند و الدكتور الشامى و الفيلدمارشال حرمة وولادة

بقيتوا معرفة قديمة ....... و عايزة اعرف اخباركوا اية ....... و اخبار الصحة و الشغل و الامتحانات ( مبروك على النحاح)

و كدة يعنى...... دانا عايزة اسألك عن ابو حميد؟؟ يا ترى اخباروه ايه....... ربنا يديم المعروف بينكو

بتهيأ لى ان شعورى ده شعور كل المشاركين ..... وخصوصا الناس اللى بره مصر....... و كأننا بنعوض جو العيلة المفتقد

anyway علشان الموضوع مايقلبش المواجع... :king: ...........فين سعادتك و حلقاتك

على راى الاستاذ مديح : متابعيييين

أيوه يا علاء... زبونة جديدة ، ومبهدلانا في قهوتنا... لكن هنقول إيه بس؟ الزبون دائماً على حق!

المهم... فعلاً معاكي حق يا newcomer إن شاء الله (زي زميلنا كده هشام الكندي إن شاء الله :yahoo: ) ، أنا فعلاً باحس إننا زي ما نكون أسرة واحدة ، وباتمنى يا رب نكون برضه رفقاء هناك في كندا زي ماحنا هنا برضه ع المنتدى! حلم الله أعلم واقعي ولاّ لأ!

ود. الشامي أنا بالفعل حاسس إننا معرفة قديمة ، لدرجة - تخيّلي - مع أول مرة أكلمه فيها عبر البحار والمحيطات ؛ كنت حاسس إننا أصحاب من زمان... علاقة أتمنى وأدعو الله أن يديمها على خير دائماً :big_boss:

وبالنسبة لأبو حميد (لو كان كلامك عن د. أحمد مراد ، اللي باكتبله الهاند أوفر) ... فده من الناس اللي باحبهم جداً... الناس اللي وجودهم في حياتك يعتبر إثراءً لها ، وأعتبر نفسي من المحظوظين بالمصادفة اللي كانت سبباً في تعارفنا...

وكان كلامي دايماً عن بعض الشخصيات اللي دخلت حياتي ، وأعتبر نفسي محظوظاً بمعرفتها... الناس دول زي د. أحمد مراد ، ود. الشامي ، ود. محمد الزهار (مديري في الشركة السابقة في مصر - بتاعت الصحرا الغربية) ، وناس تانيين ؛ بس دول اللي ما زلت على اتصال بيهم حالياً... الناس دول كنت باحس إني إنسان كويّس طول ما همه موجودين في حياتي... عارفة كلمة "لا يشقى بهم جليسهم"؟ كنت دايماً حاسس بالكلمة دي في علاقتي بيهم. علاقة جميلة لا فيها مصالح ولا مادّيات ، ويمكن ده أجمل ما فيها.

بس هوه عنده الـ Hepatitis C و Active في بعض الأحيان... أستأذنكو تدعوله ؛ لعل الدعاء يدفع البلاء :swing:

ولو كلامك عن أحمد الديب ؛ فده برضه من الناس النضيفة لسّه في زماننا هذا ؛ واللي ماشي بدماغ غريييبة في كندا! بس عموماً ؛ أنا عمري ما كنت بافكر ولا باخاف في وجود ديبو في الصورة ، ولا عملت حساب أي حاجة قبل ما أطلبها منه! كنت دايماً على طبيعتي معاه ؛ ورب أخٍ لك لم تلده أمك :sofa:

وأشكرك على التهنئة ، وهاحاول أكون آكتيف في الكام يوم الجايين في الهاند أوفر عشان أنا حاسس إني متأخر شويّة ؛ بس أحياناً بيكون خارج إرادتي.

[moheltohamy]

أعزائي...

حبيت بس أورّيكو حتت عين حمرا (أو للدقة... عين بيضا :big_boss: )

مش أولتلكو إني جاني اكتئاب ! :king:

انت فعلا وريتنا العين الحمرا بغيابك الطويل . والاكتئاب جا للمنتدي بغيابك يادكتور. بلاش كده

وبالذات الصورتين التانية والتالتة اللي حسسوني إن البلد خراااااابة مهجورة!

ياراجل القهوه هي الي خرابه طول مصاحبها مش موجود..

تحياتي لك والحمد لله انك بخير

يا دكتور أخجلتني بالكلمتين دول والله :lol:

خلاص يا سيدي... حقكوا عليّا (رغم إني غلبان والظروف ف البريمة هيه اللي معاكسة!)

وهاحاول ألتزم في التواجد... ونزوّد المشاريب...

تم تعديل 21 نوفمبر 2008 بواسطة moheltohamy

[moheltohamy]

قبل ما أختم موضوع التلج في كندا... أحب أنزّل الصور اللي صوّرتها بنفسي مع بداية تجاربي التلجية :big_boss:

نبدأ بأول ما عيني لمحت التلج من الطيّارة... أسيبكو تستمتعوا :king:

--- يُتبع ---

[moheltohamy]

الصورة الجايّة دي مالهاش دعوة بأي حاجة ؛ بس كان الطيّار بيعمل خمساية ف الجو ، وعجبتني وصوّرتها ، وقلت أنزّلهالكو برضه :big_boss:

ودي كان خلااااااص ؛ على وشك يلبس ف السحاب ، بس الحمد لله ربنا ستر :king:

دي بقى بعد ما نزلنا تحت مستوى السحاب والرؤية اتضحت... واخدين بالكو من منظر الشجر عامل ازاي؟ ولا الغابة المحترقة :lol: تخيّلوا بقى دي ف الصيف بيكون شكلها عامل ازاي... بس... تخيّلوا!

[moheltohamy]

وهنا الطيّار بدأ يدوس فرامل لو تلاحظوا :king:

وخلاص داخلين ع المطار...

الراجل خلاص بيشد فرامل اليد آهوه :lol:

وآدي الشمس طالعة ، ولا كأنها هنا أصلاً !!! :yahoo:

وداخلين ع الباركِن ، والمنادي عمّال بيوسّعلُه حتة بين عربيتين ، أصدي طيارتين يحضّن بينهم :sofa:

وطبعاً الإحساس بالفخر... طيران بلدنا القومي... Air Canada :wub:

وآدي أول حاجة من إحساس كندا هتحسوا بيها وتشوفوها قبل ما تشوفوا بني آدم كندي حتى... التهامي هورتونز (مساء الفل يا حسيني... استعد عشان تمسك انتا النايت شفت بالإنابة :swing: )

واخدين بالكو من ممرات المطار اللي مفروشة موكيت؟! gsp_)

وابقى تعالى يابو مديح ، و واحد كابوتشينو كبير من أبو... من أبو... مش عارف من أبو كام الصراحة! أنا كنت دايماً باخد الكوبّاية الميديام أم دولار وتلاتة وخمسين سنت! :big_boss:

تم تعديل 21 نوفمبر 2008 بواسطة moheltohamy

[moheltohamy]

وآخر شويّت صور من داخل الأراضي الكندية... عشان ما تقولوش حارمكو من حاجة! :blush2:

صورتين من شارع لورانس إيست (Lawrence East عشان أم ريهام ما تزعلش) ، ولو تحبي كمان (Lawrence ave E & pharmacy) ، وكنت رايح عشان أترجم شهادة بيانات المرور المصرية من هناك.

ويبدو كده إن لورانس ده دايماً هتلاقي العرب حواليه (يمكن العرب حبّو إسمه من بعد الفيلم بتاع عمر الشريف لورانس العرب :cry1: )

وآدي الحتّة اللي جمب البيت أثناء هبوب عاصفة تلجية... (لاحظوا إتجاه تساقط التلج ، تعرفوا اتجاه الرياح)

ونقلة حضارية رهيبة من الجو السابق ده ، إلى مصر يومين ، وع السعودية عشان أشوف نوع تاني من العواصف الـ ... رملية طبعاً :beee:

خلّتني أترحّم على أيام العواصف التلجية... ع الأقل في التلج بتعرف تاخد نفَسَك ، ولو جوّه أتوبيس (زي بتاع تورونتو - مونتريال) بتشغّل التدفئة وما بتحسّش باللي برة... في العواصف الرملية بأه وانتا جوه الأتوبيس المكيف (من الخُبَر لمطار الهليكوبتر في تناقيب) ؛ مانتاش عارف تتنفّس! :scooter:

أنهي أرحم بذمّتكم؟! :beee:

[moheltohamy]

سوري... كنت هانسى حتت الفيديو...

وزي مانتو شايفين... الناس ماشية وعايشة حياتها عااااادي جداً...

ده يا سادة التلج في المعتاد داخل الأجواء التورونتاوية...

وأي خدمة يا حضرات... الحساب بأه لو سمحتو :blush2:

[qenawy]

الصفحة الاخيرة 11 ميجا يا تهامي

خدت وقت طويل جدا جدا للتحميل

يا صديقي هنا مصر مش كندا

الصفحة عنكم بتقتح لوحدها

انا اجرت 3 قرايبي عشان نفتح الصفحة

تلاتة صعايدة وانا معاهم ويا مسهل

اخيرا حفظتها

وحمدا الله علي السلامة

[moheltohamy]

يعني أروح اولّع في نفسي واخلص؟! :beee:

أحط صور ولاّ ما احطّش؟!

طب مانا ف السعودية يا عم الدكتور خالد ، وف وسط الميّه كمان ، يعني السرعة ساتلايت تعبانة! (بنتكلم في بتاع 128 كيلو :scooter: ، ما جيناش ناحية كندا ذات الـ 7 ميجا!)

وتعرف حاجة تانية... حتت الفيديو دي حاجة وتلاتين ميجا ، وقلت بدل ما أعملها أتاتشمنت وتقعدوا ساعة تنزّلوا فيها ؛ قمت رافعها ع اليوتيوب ، وبالتالي حجمها قل خالص!

عموماً أنا خلاص حطّيت اللي عندي وخلاص! هيه الصفحة دي تخلص ، وهترتاحوا مع الصفحة اللي بعدها!

وحتى لو فتحت نفس الصفحة تاني ؛ مش هتاخد وقت لأن الصور متسيّفة عندك في التيمبوراري إنترنت فايلز!

لو تحبو بلاش صور قولولي! واريّح نفسي واريّحكم ، ونريّح التلات رجّالة الجرايبينك دول ، ونسيبهم قاعدين مريّحين بيشربوا شاي حبر ع الأهوة!

بجد لو متضايقين من الصور ، أو مش عاوزينها ... قولولي :blush2:

تم تعديل 21 نوفمبر 2008 بواسطة moheltohamy

[newcomer]

وبالنسبة لأبو حميد (لو كان كلامك عن د. أحمد مراد ، اللي باكتبله الهاند أوفر) ... فده من الناس اللي باحبهم جداً... الناس اللي وجودهم في حياتك يعتبر إثراءً لها ، وأعتبر نفسي من المحظوظين بالمصادفة اللي كانت سبباً في تعارفنا...

... عارفة كلمة "لا يشقى بهم جليسهم"؟ كنت دايماً حاسس بالكلمة دي في علاقتي بيهم. علاقة جميلة لا فيها مصالح ولا مادّيات ، ويمكن ده أجمل ما فيها.

ولو كلامك عن أحمد الديب ؛ فده برضه من الناس النضيفة لسّه في زماننا هذا ؛ واللي ماشي بدماغ غريييبة في كندا! بس عموماً ؛ أنا عمري ما كنت بافكر ولا باخاف في وجود ديبو في الصورة ، ولا عملت حساب أي حاجة قبل ما أطلبها منه! كنت دايماً على طبيعتي معاه ؛ ورب أخٍ لك لم تلده أمك :blush2:

هو انا كنت اقصد الأستاذ احمد الديب اللى موجود فى كندا

لكن دى حاجة جميلة ان حضرتك عندك كل الاحاسيس الحلوة دى تجاه كم من البشر( اللى يستاهلوها اكيد )

ربنا يديم عليك نعمة الاحساس بالمعروف و نعمة وجود امثال الاصدقاء دول فى حياتك.

[moheltohamy]

معلش بأه يا newcomer...

إنتي جيتي ع الكاللو أو ع الواوا وإتّكّيتي!

والناس القدام معانا شوية - زي إيهاب سالم مثلاً - ياما شافوا من تحت الموضوع ده!

ولو راجعتي حوارات سابقة ؛ هتلاقي خناقات قامت بسبب النؤطة دي بالذات! وناس عاوزة تسحب مننا الجنسية عشان قلنا كندا حلوة ، ومصر وحشة! وياما ناس اتهزّئت ، واتغلط فيها بسبب الموضوع ده برضه!

وتم حذف مواضيع قسم كندا بالكامل من شريط الأخبار!

البلاوي السودة دي كلها عشان قصة كندا ومصر! عرفتي بأه ليه النؤطة دي حسّاسة؟! :blush2:

P.S.: إبقي هاتي حاجاتكو معاكو من مصر قبل ما تيجو كندا :scooter:

العيال عنيّا ليهم ؛ شوكولاتات وبمبوني ولبان وآيس كريم! أكتر من كده يفتح الله :beee:

[moheltohamy]

عرفت بقى ليه ياد.تهامى مش عاوزة اكتب اى تعليقات او ذكريات عن الغربة هنا ؟؟

لان دى قهوة تهامى ...

مكان جميل جدا جدااا....وانا شخصيا لما بكون هنا معاكم ...آخد قهوتى واسمعكم وامشى وانا مبسوطة قوى وقضيت معاكم وقت لطيف قوى ..

لكن ؟؟

حد يقدر يسرق منك الاضواء ؟؟؟

احنا لها ...

متخافش..

علشان كدة ...انا مرضاش اسرق منك اى اضواء ...انت هنا النجم .

و...

اكمل ...

فأنا هنا مستمعة لك ..

كل تحياتى ..

سلوى هانم عندي تاني؟ دانا مُبخَت :rolleyes:

بس والله يا افندم مشاركاتك تزيدني وتزيد التوبيك ثراءً... آه والله :blush2:

وأنا يسعدني فعلاً وجود مشاركات من الزملاء الأعزاء ؛ كنت سعيد جداً لما د. الشامي رد على مُداخلة وسؤال هنا...

وعلى رأي لولا لما قالتلي:

قهوه ايه يا بو قهوه..القهاوى هنا ملك الحكومه

ولا انت عشان حاطط اسمك على الباب سدقت نفسك . :blink:

يعني أي حد يتفضّل يشرفني بمشاركاته... وبالذات سيادتك ؛ أكون من المحظوظين بمشاركتها لنا في توبيكي من خبراتها الغنية في الحياة...

ولاّ إيه؟! :lol:

تم تعديل 24 نوفمبر 2008 بواسطة moheltohamy

[moheltohamy]

وطالما اتكلّمنا عن البرد في كندا نتكلم برضه عن الحر في كندا...

مشكلة الحر في صيف كندا ، وبالتحديد المدن الساحلية زي تورونتو وهاميلتون وغيرهم والمطلّين على بحيرة أونتاريو هيّه الرطوبة. الرطوبة لما بتزيد بتحس إنك مخنوق ، ونؤطت العرق اللي بتطلع ما بتمشيش ، وتحس إنك لزِّيئ (على رأي هند)!

والكلام ده بيفكّرني بأيام دبي... أول ما رحتها في يونيو 2007... يا دوب وانا خارج من مطار دبي الساعة 3 الفجر أنا ورمزي... إحنا بس عبرنا البوابة الخارجية للمطار ، والائي نفسي مش شايف!رمزي رمزي... أنا مش شايف ، وده يتلفّت وراه يلاقي النضّارة بقت بيضااااااه من كتر الرطوبة لما اتكثفت على النضارة البارده من الجو داخل المطار! أنا خرجت برّه المطار ، وقلتله إيه يا رمزي البلد بنت الــ تيييييييت دي؟ يللا نرجع مصر تاني! 3 الفجر ودرجت الحرارة 38 والرطوبة 85% ، ويمكن أكتر!!! أمّال في عز الضُهر هيحصل فينا إيه؟! :blush2:

وفضلت يا ريّس لا باطيق أخرج دبي ، ولا أتفسّح فيها ، وتغور البلد دي باللي فيها باللي عاوز يجيها كرامةً للجو بتاعها! وعمّك رمزي يوميّاً ف الشارع ؛ ومقتنع إن العرق اللي بيطلع منه ده هيخسسه (رمزي ده دماغ الصراحة)! مانتا مجرّد ما تخرج بره البريمة في ميناء الشارقة ما تعملش حاجة ، بس انتا أوؤف شوية ، ولا أجدع ساونا يا معلم هتعمل فيك اللي اتعمل فينا هناك! كلامي عن خروجك تتفسّح بالليل! خروجك الضُهر بأه يا ريّس... الله لا يورّيك!

ومن ساعتها يا عمّنا أسمع كلمة رطوبة من هنا ، وابدأ أهرّش! وطبعاً من منطلق إن مصدر الرطوبة موجود (بحيرة أونتاريو) والحر موجود (في الصيف) يبئى ربك يلطف بعبيده بأه!

واتابع مع الياهو ويذر ومع هند ع التليفون... ألائيها بتشكّرلي في الجو وجماله ، والدنيا دافية وزي الفل. ولما ألائي الرطوبة عالية بتاع 60-70% وائوللها إيه أخبار الوضع؟ تئوللي لو هيّه دي الرطوبة اللي بيشتكوا منها... دي تبقى رطوبة مايصة (زي كل شكاوي الكنديين) ، وما عنديش أي اعتراض تفضل الرطوبة كده طول الصيف! وحصل بس لمدة يومين (يومين من الصيف كله) إن الرطوبة كانت عالية وكنت بتحس إنك بتعرق بجد ، والجو حار! الكلام ده آلهولي وجدي (واحد صاحبي انتا ما تعرفوش) ، وآجي أبص على درجت الحرارة حوالين التلاتين ، وعندنا في مصر بنتكلم ف الاربعين وفي السعودية مش عارف كام واربعين ، واحنا متعايشين ، والجو مش وحش أوي ، والائي البهوات بيشتكولي في كندا!

فعلاً كندا دي بلد المياصة!

طبعاً الملفت للنظر إن في كندا الدنيا بتمطّر تلج في الشتا ، وف الصيف ده موسم المطر! وأحياناً برضه كانت هند بتحكيلي عن المطر اللي شغال بئاله يومين عرض مستمر (ما تعرفش بأه الحنفيه دي ما بتقفلش؟! ) ، والچاكيت بتاع الشتا اللي لابساه في عز الصيف ، والشمسية كمان! نظام غريب شويّة بس عادي بتتعوّد عليه!

وفي الصيف بأه بتلاقي الناس كلها خارجين برّة ، ومشي ورياضة وف الجناين وخصوصاً ف الويك إند (سبت وحد)...

أفتكر عملوا مرة ماراثون واخد شارع يانج من الشمال حتى بدايته جنوباً على البحيرة ؛ وطبعاً من منطلق إن الشارع ده أدّام البيت... هند صوّرتلي المنظر... تحفة يحمد... حكااااية بجد!

تعرف عملوا الماراثون ده ليه يابو حميد؟! هاقوللك بس ما تتنئطش الله يخلّيك...

الأطفال (حتى سن 18 سنة) اللي مخنوئين من بابا وماما ف البيت ، أو عندهم مشكلة نفسية ، ومحتاجين يفضفضوا شوية مع حد ع التليفون... المفروض نعمل لهم خط ساخن (نمرة يتصلوا بيها مجاناً) ، ويلاقوا واحد متخصص يسمع لهم ، ويدّيلهم النصيحة لو يحبّوا! وعشان كده كان الهدف من الماراثون ده جمع مبلغ 300.000 دولار (تلتميت ألف دولار يا ريّس ، دولار ينطح دولار!)

وطبعاً الصيف في كندا هو بداية الجمال واللون الأخضر والألوان في كل مكان. يبدأ الشجر تاني يلبس هدومه ، وتشوف الورود والخُضرة فين ما تروح. وافتكر لما رحنا شلالات نياجرا أول مرة لينا في كندا... على مدار الطريق بالكامل – بتاع ساعتين - الشجر على مرمى البصر وف كل مكان ، مغطّي الجبال وف كل مكان تروحه هتشوف أشجار! مش هتشوف اللون الأصفر اللي شبعنا منه في مصر وفي السعودية (وفي ليبيا في حالتك انتا) ده خالص في كندا! وتلاقي الناس فرحانة بالجو وجمال الطبيعة والدفا! وتشوف الألوان بكافة أشكالها على الناس ، وتشوف مختلف درجات البشرة... بمساحات كتيير شويّة... شويّتين تلاتة! :rolleyes:

وعشان الشيئ بالشيئ يُذكر... أفتكر مرة أيّام ما كانت كارولين في مصر... إتصلت بيا من كندا قبل ما تيجي ، وبتقوللي أجيب لبس إيه معايا في مصر؟ وانا طبعاً "تجيبي لبس حِشِم" ، ودي تئوللي يعني شورت؟! ماهي الدنيا هتكون حر ؛ يبقى طبيعي اللبس المناسب ليها شورت! المهم ، دي عملت حسابها في اللبس ، وخلص الموضوع. نيجي في يوم خارجين نتفسّح ورايحين القلعة ، و لانا (أخت كارولين) خارجة معانا ، والائيها لابسالي بادي هاف استوماك يا ريّس! نعم يَختي؟! إيه اللي انتي مهبباه ده؟ إتفضّلي اطلعي وغيّريه ، مش هتمشي جمبي باللبس ده يا لانا! ودي تبرطم "أوووه محمّاااد!" ، وبتحاول تقنعني إنو عادي وكده ، وتئوللي "محمد ... ده إيه؟ - وبتشاور على دراعها - Skin. وده إيه؟ – بتشاور على الجزء الباين من بطنها – Skin!"... أومت أنا مشاور على سدرها وأولتلها "وده إيه؟ Skin ، وأومت مشاور تحت على منطئت الـــ تييييييت ، وده إيه؟ مش Skin برضه؟!" ودي إتكتمت يا ريّس ، ما نطئتش نص كلمة ؛ وطلعت زي الـــ ... زي الشاطرة غيّرت هدومها ونزلت! :wub:

أفتكر مرة وانا راكب الأتوبيس في سپتمبر أول مرة ليّا ؛ وكان يوم جمعة ، وكنت رايح أصلّي الجمعة في سكاربرو... ألائي ست كانت قاعدة جمبي ؛ ألائيها بتئوللي الجو جميل النهارده ودافي... رائع! وانا كنت منئوط أصلاً من الدفا ده! طبعاً ابتسمتلها (إبتسامة صفرا طبعاً) ، وأولتلها هممم... ييس شور أوف كورس! هائوللها إيه يعني الوليّة دي بس؟!

يا نااااااس... أنا جاي من بلاد الشمس المشرقة ، حيث الدفا وكل الحاجات دي اللي نفسكو فيها ، وما عندناش أكتر منها! بلا هم! الشمس رزلة ، وملطوعالنا طوول السنة ، والشجر البِلِط اللي واقف تِنِح طول السنة ، وأخضر على طول ، ولا فيه ورأة بتتكسف على دمها وتؤع! أنا زهييييئت! أنا جاي بلاد التلج... فين اللون الأبيض؟ وافتكر إني مرة لما أولت لأحمد الديب "فين التلج يا عم الحاج؟ أنا جاي بلد باردة عشان ألائي الدنيا بالدفا والحر ده؟!" ، وأحمد يئوللي "ما تستعجلش على رزأك ، مسيرك تندم في يوم ع الكلمتين دول"!

وتعرف صحيح إن تغيير الفصول دي حاجة جميلة فعلاً؟ ماهي الحاجة طول ما هي أدامك بتفقد رونقها وجمالها وإحساسك بيها! لكن مع التغيير ؛ بتحس دايماً إنك بتشتاق لحاجة ، ودايماً فيه جديد. بتشتاق للخضرة طول مانتا ف الشتا ، وبتشتاق للتلج والبرد وانتا ف الصيف (والأمنية الأخيرة دي على ما يبدو بتاعتي أنا لوحدي بخلاف كل الكنديين)!

وعلى دخول الخريف (سپتمبر وأكتوبر) تبدأ تشوف الشجر بقى مالتي كَلَر... ورق الشجر يبدأ يتلون من الأخضر للأحمر للبرتقالي للأصفر للبني قبل ما يؤع!

وافتكر موقف الواد ديبو كان حكاهولي... أيام ما كان في سان فرانسيسكو قبل ما يروح كندا ، وراجع على مصر بعد 4 سنين متصلين قضاهم هناك في أمريكا... ولاد عمه هناك آلوله: لما ترجع مصر هتلاحظ إن فيه حاجات كتير اتغيّرت ؛ هتلاقي الشوارع بقت ضيقة ، والناس بقوا بيزعقوا على طول ، وبقت ريحتهم وحشة أوي! أي حاجة من دول تلاحظها تخرس خالص وما تنطأش! هيه في الواقع مفيش حاجة اتغيّرت ؛ الشوارع ما زالت كما هي من يوم ما سبتها بحُفَرها ومطبّاتها وزحمتها والجنان في طريقة السواقة ، والناس على طول صوتهم عالي (ده العادي بتاعهم) ، وطبعاً العرق ريحته تقرف في مصر ، وده برضه العادي هناك! إنتا اللي من كتر الفترة اللي قضيتها في أمريكا نسيت البلاوي دي كلها ، واتعوّدت ع النظام ، تلاحظ الاختلاف بس لما ترجع ، لكن طول مانتا عايش فيه ؛ ما يلفتش نظرك!

وانتا في كندا مفيش حاجة اسمها تشم ريحة مش حلوة ؛ سواء راكب صابواي أو أتوبيس أو ستريت كار (الترام)! مفيش كتمة ، مفيش زحمة ، مفيش ريحة خااااالص!بس للأمانة أعترف إني شمّيت ريحة العرق دي مرتين في تورونتو... أول مرة وانا راجع من صلاة الجمعة في سكاربرو وانا راكب الأتوبيس وراجع على إلما جِستهاوس ، وكانت راكبة جمبي واحدة ست عجوزة موت وشكلها ياباني خالص ، وكل شويّت هوا ييجو م الشباك اللي جمبها عليّا واحس إني هاجيب اللي ف بطني! تاني مرة كنت انا وهند بنتغدّى – أو للدقة كنا بنتعشى – في برجر كنج ، وشامم ريحة غريبة ، وائول لهند يا سبحان الله... الريحة الغريبة اللي انا شاممها دي جايّة منين؟! ودي تئوللي بص وراك وانتا تعرف! وأبُص يحمد ياخويا ع الترابيزة اللي ورايا ؛ وإز بي أُفوجأ إن فيه اتنين شحّاتين قاعدين بياكلو نفس الوجبة اللي باكلها أنا وهند! الأخ الشحات اللي جمبي هوه والأخت الفاضلة الشحاتة الجيرل فريند بتاعته طبعاً لابسين لبس كده زي بتوع الهيبز اللي بتسمع عنهم (وأساسي طبعاً العدّة الموسيقية) ، وتحس إنهم بآلهم شهر ما عتبوش حمام! طبعاً لك أن تتخيل الريحة عاملة ازاي! والشعر طبعاً من كتر ما سابوه من غير حُما ؛ بقى مستحيل يمشي فيه برغوت حتى مش هائول مشط!

وتاني يوم برضه رحنا ناكل في برجر كينج نفس الوجبة (أنا كنت باخد ساندوتش تريپل ووپر Triple Whooper ، حتت سندوتش يجيبك أرضاً تسليم أكتاف يا ريّس ، وطبعاً هند ما بتستحملش الدور التالت ، فبتاخد حاجة كده دورين من نظام الضابل ووپر)... المهم إحنا كنا داخلين لسه المحل ، والائيلك يا ريّس دول خارجين منه! يعني ما كانش ليّه نصيب أتمزّج بالريحة الليلادي! بس فعلاً البلد لسّه بخير ، والشِحَاتة بتجيب!

عاوزك تقارن الوضع دوّت مع الريحة الموجودة باستمرار ف المترو بتاعنا أو الأتوبيسات أو في أي مكان زحمة تروحه في بلدنا الغالية!

وأفسّرلك شويّة... من خلال محاوراتي مع كارولين أيام سنه ساتّة طب ، ومعايشتي للكانيديان لايف ستايل ، الناس هناك متعوّدين على دش يومي ع السريع كل يوم الصبح. طب وليه مش قبل النوم يا كوكي؟ مانتا بتعرق وانتا نايم ، فبالتالي يُستحسن تاخده الصبح عشان تكون منتعش في بداية يومك ، ودايماً ريحتك كويّسة! وطبعاً البارفانات والديودورانتس والأنتيپيرسپايرانتس دي من ثقافة الحياة عندهم ، يعني شيئ طبيعي و روتيني... مش اختراع يعني!

واللذيذ في الصيف باه يا ريّس لما تشوف الپوليس أوفيسَر في الشارع ؛ وهوّه لابس شورت وطاقية زي بتاعت المصايف ، وراكب بسكلتّة! تئولشي فولكلور؟! عالم دمااااااغ يابا! :lol:

حاجة ع الماشي لاحظتها من الكانيديان لايف استايل... أيّام وجود كارولين في مصر ؛ كان دايما معاها إزازت ميّه صغيرة في شنطة إيديها (المغارة بتاعت البنات اللي بتلاقيها شايلة كل حاجة تتخيلها ف الدنيا – فاكر توم وچيري لما كان القط توم يقلب باسكت الزبالة عشان يفضّيه ، وتستغرب من الحاجات اللي بتنزل دي كانت جوّاه ازاي!)... المهم ، لما سألتها إيه حكايت إزازة الميّه دي اللي كل فترة تطلّعها وتشرب منها حتت بؤ ودمتم؟! ترد الهانم إن جسمك بيفقد ميّه مع العرق وبزّات في الصيف ، وده شيئ خطير على جسمك ، فعشان كده المفروض إنك بصفة مستمرة تعوّض جسمك عن الميّه اللي بيفقدها دي! هائول إيه بس؟ ماهي الناس دي يابو حميد ما راحتش كلية الظباط الاحتياط في فايد في عز يولية وشافت الحر اللي بجد ، واللطعة ف الشمس ، وأرض التدريب العملي والضاحية وأرض الطابور المقدّسة وطوابير التعليم (التعذيب) الأوّلي ، ولا طبّقت القاعدة رقم 5 بتاعتي أنا والواد عطية (أي فرصة تجيلك تاكل تشرب تنام ؛ أوعى تضيّعها... الله أعلم إيه ممكن يحصل بعد خمس دئايئ!)... يعني م الآخر كنا بنشرب مش عشان عطشانين ولا حاجة ؛ لأ عشان فيه ميّه!

والغريب إني لاحظت أحمد بيه الديب بيعمل نفس الموضوع ، وبعد فترة – في زيارتي التانية لكندا – ألاحظ هند هانم بتعملها هيه كمان! العالم دول يا ريّس بيخافوا على نفسهم ، وثقافة الـــ Healthy Lifestyle شيئ في أساس حياتهم... إحنا بقى من أساسيّات حياتنا ثقافة السمنة البلدي والطبيخ والمسبّك والحلويّات الشرقي... هتيجي تئوللي الجسم بيفقد ميّه؟! يا راجل... أول يا باسط! :blink:

تم تعديل 24 نوفمبر 2008 بواسطة moheltohamy

[precanadian]

، ومعايشتي للكانيديان لايف ستايل ، الناس هناك متعوّدين على دش يومي ع السريع كل يوم الصبح.

الله ينور يادكتور ايه كمان ممكن تقوله لنا عن الكانديان لايف ستيل .