كندا التي رأيتها :)

[moheltohamy]

أنا المفروض باكتبلكوا في شويّت ملاحظات ليّا ع البيهيفيار الكندي أو الكانيديان لايف ستايل ؛ زي ما طلب دكتورنا البريكانيديان...

وأنا دايماً بحب أستنّى لمّا أخلّص موضوع موضوع ، وينزل متكامل وجبة دسمة مُشبِعة!

لكن عشان خاطر صافي اللي بتقول إني باتعمّد أتدلّع عليكو واتأخّر دايماً في مشاركاتي... خلاص زي ما تحبّوا ؛ نخلّيها سناكس ، و وجبات خفيفة مناسبة لمرضى السكر bv:-

اتفضّلوا بأه حتّة صغيّرة على ما أخلّص اللي بعدها... أو يفصلوا الساتلاّيت :sad:

هتلاحظ هناك ثقافة الطوابير في كل مكان تروحه! من أول وصولك المطار هناك... وتبدأ تاخد بالك من الثقافة دي ، من أصولها وعاداتها. أولاً ، مفيش حاجة اسمها نلزأ في بعض... المفروض فيه بتاع نص متر بينك وبين اللي أدامك ؛ مش خنقة هيّه! والمفروض الدور بيمشي ع الكبير أبل الصغيّر! واحنا ف البنك مثلاً ؛ واقف ف الصف ، والائي ست عجوزة كركوبة واءفة بالعافية ، وماسكة ف الهاندريل (ترابزين معدن عاملينه عشان تسند عليه لو حبيت ، ومعلّقين عليه ستاندات فيها جرايد ومجلاّت عشان لو زهئت والوأفة طوّلت) ؛ وكذا واحدة غيرها برضه واءفين ف الصف ، ولا واحدة فيهم خطر ببالها تستأذننا عشان مستعجلة أو تعبانة ، أو أي حجّة م الحجج السافلة اللي متعودين نسمعها ف مصر! وهوّه صف واحد للي داخل يتعامل مع صرّافي البنك (Tellers) ؛ الصف واحد واللي عليه الدور يشوف الشبّاك اللي يفضى ويروح له! مش زي البنك الأهلي العرّة في ميت غمر اللي كل واحد يؤف أدّام شبّاك ؛ وانتا ونصيبك يطلع الموظّف ده حِرِك ، أو بدايلُه قاعدة زي ما بيؤولو! والغريب إن التأمينات مش سايبالك أوپشن تتعامل مع أي بنك محترم! هوّه البنك الأهلي المصري فرع ميت غمر! :wub:

وافتكر موقف كوميدي – بالنسبالي أنا طبعاً – مع أول مرة ندخل الـــ TD CanadaTrust Bank في المنطئة بتاعتنا (يانج آند إجلنتون) ، في تاني يوم من وصولنا هناك (ولا كان يخطر ببالنا إننا هنسكن فيها فيما بعد)... المهم ، هند داخلة ف الأول (أصول الإتيكيت بأه مانتا فاهم :) ) ، وداخلة وش على موظّف الريسيپشن تسأله (عاوزين نفتح حساب)، وعادي بأه ؛ مانتا بتشوف الحركات دي في مصر (يعني هنفضل ملطوعين مستنيين البُنيّه على ما تخلّص؟ دا سؤال وهنتّكل على الله)! اللذيذ بأه إن كان فيه واحدة بتتكلم مع موظفة الاستقبال (بصّت لنا بصة استحقار صح!) ، و وراها بمترين (ما يجيش في بالنا – يا مصريين – إنه تبع الصف) كان فيه واحد وائف مستني اللي أودّامُه دي تخلّص ؛ وفوجئ بهند داخلة أدّامه من غير لا إحم ولا دَستور... طبعاً الراجل اتنأط – كأي مواطن شريف – وسمعناه بيئوللها "Excuse me!" البنت اتبلّت في هدومها ، وبالطبع... فرحت فيها موووووت wst::

وكنت حكيتلك عن سكاربرو تاون سنتر اللي رحناه تاني يوم وصولنا كندا عشان نطلّع الـــ Sin Number ، وكان النظام تقف ف الدور لغايت ما تقدّم الأپليكيشن ، وبعدين تؤعُد زي الباشا (تاكل - تشرب - تقرأ مجلّة من الموجودين هناك) لغايت ما يجيلك الموظّف ياخدك من إيدك تدخل معاه مكتبه تكمّلوا الإجراءات سوا!

وكلّمتك برضه عن سيرفيس أونتاريو لمّا رحتها عشان أقدّم على رخصة السواقة ، وكارت الـــ OHIP. وكان النظام هناك تؤف في الصف عشان تكلّم الريسيپشن ؛ ويدّيلك رقم تاخده وترتاح على كرسي لغايت ما رقمك ييجي عليه الدور في الشاشات اللي هناك (زي نظام البنوك المحترمة عندنا في مصر).

حتى في المطاعم من أمثال برجر كِنج وماكدونالدز وخلافهم ؛ برضه طابور واحد ؛ مش زي الوضع عندنا في بلدنا الغالية... الناس دي بتؤمن بالتوسُّع الرأسي وليس التوسُّع الأفقي! إحنا بأه عندنا تلاقي اكاونتر عليه 3-4 أدّام الكاشيير ، وممكن تلائي اللي داخل ف الكلام من الناحية التانية وانتا بتكلّم الكاشيير وبتقول له على وجبتك! (أنا هنا باتكلّم على فروع بيتزا هت وماكدونالدز في سيتي ستار مش في محل تعبان!)

دا حتّى في تيم هورتونز يا راجل... وانا داخله لأوّل مرة (الفرع اللي تحت البيت) ، أولت أخبطلي واحد كاپوتشينو بالفرينش فانيللا اللي يعدل المزاج ويدفّي الواحد ويفوّؤه (3 × 1)... لئيت الراجل اللي ع الكاونتر واخد النسكافيه بتاعه وماشي ، أومت داخل ع الكاونتر (بكل احترام)... ألائي الأخ اللي خارج ده بيشاورلي ع الصف اللي وائف على جمب وسايب مسافة محترمة بينه وبين الكاونترز! آم سوري يا جماعة ، ولفّيت زي الشاطر و وئفت ف آخر الصف ؛ وتأكّدت فعلاً إني قروي ساذج بهرته أضواء المدينة! وبرضه هوّه طابور واحد ؛ والكاشيير اللي يفضي ينده (Next) واللي عليه الدور يتفضل. وطبعاً الحوار بينكو بيبدأ (جود مورنينج سير ، هاو كاناي هلپ يو؟) وبينتهي دايماً بـــ (هاف أنايس داي) smk:

طبعاً الموقف ده بيفكّرني بأوّل يوم رجعت فيه مصر بعد زيارتي الأولى لكندا يوم 2 أكتوبر 2007... وانا في ميت غمر يا ريّس ، نفسي هفّتني أدّيها سندوشتين فول بالزبدة واتنين طعمية من غير طحينة! وبكل أدب وأخلاق وئفت ف الصف أدّام الراجل اللي بيحضّر الشندوشتات وماسك البون في إيدي مستني الـــ 2 اللي أّدّامي ياخدو طلبهم. ألائيلك بتاع كده آخره إعدادي أو سانوي طالعلي Out of nowhere ، و... (لو سمحت يا عم اتنين طعميّة) ، ومادد إيده أدام الـــ 3 شحُطة اللي أدّامه (باعتبار إني أحد الشُحُطة طبعاً)! "إنتا يابني... إنتا شايف نفسك أنضف منّي؟!" والواد يتنّح ويفتح بؤّه شويّة على ما يستوعب الكلمة! وبعدين (إيه يا عم هوّه انا خدت أكلك؟!) ، وانا: "يبئى تتفضّل تؤف ف الصف على ما اللي جُم أبلَك يخلّصوا"!

الواد سكت شويّة (بس طبعاً زي ما هوّه... صف مين ده اللي يؤف فيه؟!) ، وبعدين تئولشي كلِتُه ، وتاني (اتنين طعميّة بس ع السريع وحياتك!)... اتنأطت بأه ساعتها ؛ و... "إنتا يابني انتا ، مفيش فايده فيك؟ مش هتمشي انتا أبل ما امشي أنا ، وانا لسّه أدّامي اتنين... يبئى تتفضّل تـؤَف ف الطابور وتحترم دورك!" ، وده (طابور إيه؟ هوّه احنا ف جمعيّة؟!) wst::

ساعتها بأه الراجل اللي بيحضّر السندوتشات ألائيه بيئوللي (أؤمر يا بيه) ، وانا طبعاً – رجل المبادئ – "خلّص بس اللي أبلي وبعدين نتفاهم"! ماهو شاف واحد بيئول كلام أبيح ، ومبوّظ النظام (ده اللي هوّه أنا طبعاً) ، فكان المفروض يخلص منّي ومن أرفي! أو يمكن الكلام الكبير اللي كنت بائوله ؛ أكيد سعادة البيه ده راجل واصل وبيتكلّم بالثقافة ، يبئى نمشّيه الأول!

طبعاً الموقف ده حصل وانا لسّه جاي طازة من كندا ، ومُحمّل بشحنة إيمانيّات عالية أوي! bv:- وف نفس الموقف يحصل طتش تاني أئولهولك كمان شويّة! B)

[د هشام ابراهيم]

فعلا كان لازم اقرا الموضوع ده من زمان ..... تسلم الأيادي يا دكتور .... موضوع فوق الرائع فكرني بحاجات كتير قوي حصلت كنت نسيتها ...بس بجد إنت ما سبتش حاجة لحد يقولها يا ريس ده أنا لسه في صفحة ٢٠ ...يعني علي بال ما أوصل ال-٦٠ يبقى احذف موضوعي و أجيب درف القهوة

الجميل بقى إن فيه حاجات طلعنا زاي بعض بالظبط فيها : أنا زاي حالاتك أبويا الله يرحمه كان طبيب ....تيم هورتنز يبقى فرنش فانيلا كابتشينو و باحب TD Canada لله في الله

علي فكرة متهيألي بهدلة الشنط مش أير فرانس ....مطار القاهرة

تسجيل اعجاب و انبهار و أستئذنك أرجع أكمل الموضوع bv:-

[moheltohamy]

فعلا كان لازم اقرا الموضوع ده من زمان ..... تسلم الأيادي يا دكتور .... موضوع فوق الرائع فكرني بحاجات كتير قوي حصلت كنت نسيتها ...بس بجد إنت ما سبتش حاجة لحد يقولها يا ريس ده أنا لسه في صفحة ٢٠ ...يعني علي بال ما أوصل ال-٦٠ يبقى احذف موضوعي و أجيب درف القهوة

الجميل بقى إن فيه حاجات طلعنا زاي بعض بالظبط فيها : أنا زاي حالاتك أبويا الله يرحمه كان طبيب ....تيم هورتنز يبقى فرنش فانيلا كابتشينو و باحب TD Canada لله في الله

علي فكرة متهيألي بهدلة الشنط مش أير فرانس ....مطار القاهرة

تسجيل اعجاب و انبهار و أستئذنك أرجع أكمل الموضوع wst::

حبيبي يا د. هشام

تسدّأ إني أنا كان قلبي حاسس إنك عمّال تألّب في الأهوة... وانا ائول لنفسي: الراجل ده بيعمل إيه كل ده ف الأهوة؟ يكونش الجدع ده بيلعب في درج الإيرادات بتاعت الأهوة؟!

بس ما يغلوش عليك يا ريّس... حبيبي وابن حبيبي :wub: (الكلمة دي كان مدرّس الإنجليزي في إعدادي دايماً على لسانه :sad: )

بس على فكرة... حماتي كانت محذراني من الإير فرانس... وآدي صورة الشنطة بعد ما وصلت الشقة...

ومطار القاهرة عامل مشترك أكبر في كل مصيبة أروحلها... إشمعنى ما خابش غير المرة دي؟!

لا يا عم... مصر براءة المرّادي ، نئول اللي لينا واللي علينا bv:-

ومستنّي تعليقاتك يا زعيم ع الهاند أوفر... :)

أنا كمان طلعت زيكم بالضبط

والدي الله يطول في عمره مش طبيب

و بأكره الفرينش فانيلا بتاعتكم دي عمى

و مبحبش تي دي بنك لأني مش باحب اللون الاخضر أصلا

و على فكره بقى تيم هورتونز ده قهوته منتهية الصلاحيه

و لقوا عنده فيران ميته في المطبخ

و إنتوا ناس فكها السفلي متدلي

و انا الوحيد اللي فاهم كندا على حقيقتها

إيهاب... إنتا بجد... مسخرة

[د هشام ابراهيم]

كده خلصت الموضوع :) .... ١٠٠ ١٠٠ يا دوك معلومات قيمة جدا و أسلوب شائق و ممتع ... لا يا عم احنا مش قدك ...الصراحة فعلا كان لازم اقراه قبل ما أفتح موضوعي بس أنا دخلت أقول كلمتين في موضوع كندا وحشة لقيت اسئلة كتير و استفسارات مع انك أصلا مش سايب حاجة .... علشان كده تلاقي القهوة عندي كلها feedback ;)

صحيح ألف مبروك على النجاح الجنوب الأفريقي و عقبال الكندي باذن الرحمن

و ما تزعلش يا سيدي علي حكاية الحج ديه .... مين عارف يمكن ربنا يكتبلنا حج بيته السنة الجاية إن شاء الله ...

علي بال ما تخلصوا العزال بتاع البريمة ده أنا عازمك على

[moheltohamy]

تحياتي من المزدلفة

[ELSHAMY]

تحياتي من المزدلفة

الحاج التهامى "هورتون" سابقا

تقبل الله

لا تنسانا من دعائك...

تم تعديل 9 ديسمبر 2008 بواسطة ELSHAMY

[moheltohamy]

تحيّاتي من داخل مقر أمن الدولة بمطار القاهرة على مدار 4 ساعات... وما زلت منتظر!

************

تهنئ إدارة الموقع العضو الفاضل بالحج وتدعو الله أن يكتب له حجا مبرورا وذنبا مغفورا وتأسف لحذف عبارة مخالفة لهذا الإعلان

تم تعديل 13 ديسمبر 2008 بواسطة أبو محمد
حذف عبارة مخالفة لإعلان مثبت

[moheltohamy]

الحمد لله أنا حالياً ف البيت في ميت غمر ، وهانطلق ع المنصورة حالاً إلي أمن الدولة هناك ، نشوف أوامرالأسياد!

والموضوع ليس له علاقة بي من الأساس! دول بس وحشهم سامح أخويا ، وحبّوا يتآنسوا بأخباره ؛ أوم إيه...

أوم... نحط العيله كلها على قائمة ترقّب الوصول ، وقائمة المنع من السفر عشان ييجو يطمّنونا عليه!

وعاشت مصر حرة مستقلة! rs:

وبخصوص الإعلان عزيزي أبو محمد (اللي معموللي تيلور ميد على مقاسي بالظبط) ، فأنا محتاج أدردش معاكو (أو معاك انتا بالتحديد) شوية بخصوصه ؛ مالم تمنعوا هذا...

وأشكر للجميع السؤال ، وهاطمّنكو بس لمّا أروح أشوف طلبات الأسياد الأول ... شيللاه يا أمن rs:

وأعتقد ما يصحّش ومش من الإتيكيت ومش من حفظ الكرامة من المرمطة إني أتأخّر ع الناس اللّطاف دول! rs:

[د هشام ابراهيم]

حمد الله علي سلامتك يا حاج تهامي و معلهش شوية الفولكلور الأمني ده لصالح الوطن طبعا

[احمد عبده]

حج مبرور وذنب مغفور يا دكتورنا الحاج

وبخصوص امن الدولة هو الكلام ده علشان خطتك لقلب نظام الحكم اللي حكيتلي عليها لما كنا مجتمعين مع باقي اعضاء الجماعة في مقر الجناح العسكري عندكو في البيت

اصبر واوعي تعترف بحاجة لغاية ما الاخ الظواهري النائب بتاعك يخبي ال3 طيارات اللي في بيتكو

ومين ادك يا عم حج وبعدين شحنات ايمانية كهربائية في امن الدولة دا انت كده هتنور بجد

انا اسف يا دكتور محمد علي المداخلة بتاعتي دي انا كنت بهزر والموضوع شكله بجد يبقي الكلام المفروض يبقي جد

انا قلقان لان منعك من السفر ده ممكن يأثر علي شغلك

انا هدعيلك وياريت كلنا ندعي لدكتور محمد وادعي انت برضه لان دعوة المظلوم ليس بينها وبين الله حجاب

وياريت تطمنا عليك

ومتنسوش تدعو لمصر

[moheltohamy]

أطمنكم إني بخير وتمام و زي الفل

و الأهلي حديد وأنا ركبي حديد

هاحكيلكو التفاصيل أول ما ألاقي دخول ع النت

إن شاء الله النهارده

[moheltohamy]

أعزائي وأحبائي...

يسعدني وأشكركم على متابعتكم لأخباري ، وأعتذر عن عدم تمكّني من التواجد على المنتدى بصورة منتظمة...

أولاً ، أنا ما زلت متضحضح من دور البرد إيّاه بتاع الحج اللي داخل على أسبوعين دلوأتي! :sad:

ومش لائي أكسيس ع النت غير من الموبايل!

ومش في المود إني أفكر في النت أصلاً بصراحة!

معلش سامحوني n2&(

مش عارف أبدألكو الحكاية منين...

داخل على ظابط الجوازات ؛ ياخد منّي الباسبور ، وبعد شويّة... انتظرني هنا على جمب ... حاضر!

شويّة ، والائي واحد يئوللي تعالى معايا ع المكتب جوّه ، وشويّة والائيه خارج يئوللي تعالى نجيب شُنَطَك من ع السير. هيّه وصلت للشنط؟ دا الأعدة هتطوّل على كده!

وبعدين نرجع ع المكتب بتاعهم ، ويدّولُه ورأة مكتوبة مسبّقاً ؛ يعني تقرير مستنيني! يا حلاوة!

واتحرّك مع الراجل التاني ده على جوّه ف الدهاليز بتاعتهم جوّه!

الخلاصة... اتلطعت 10 ساعات هناك في أمن الدولة ف المطار ، وبعدها طلبوا مني أروح مقر مباحث أمن الدولة فرع المنصورة عشان محتاجين يتكلّموا معايا شوية!

وعملاً بنصيحة أخونا إيهاب اللي لا أعرفه ولا عمري شفته ولا كلّمته ولا سمعت صوته ولا حتى أعرف إسمه... نختصر وأعرّفكم شويّت ملاححظات طلعت بيهم:

لمّا يقوللك انتظرني بره 5 دقايق ؛ بعد حساب فروق التوقيت ، فده معناه 6 ساعات!

فيه شبكة واي فاي في المطار يا إيهاب! وممكن أدخل من الموبايل ؛ بس مش بتاخد راحتك في الكتابة بالطبع (زي آخر مشاركة كتبتها ف الإنجاز)!

ممنوع استخدام اللابتوب أو الموبايلات أو أي مظاهر التكنولوجيا الحديثة هناك!

ممنوع مغادرة مقرّهم هناك غير لما يسيبوك هُمّه ، حتى لو انتا اللي رحت لهم بنفسك وبكرامتك! تروح لهم بمزاجك ؛ تخرج من هناك بمزاجهم همّه! دخول الحمّام مش زي خروجه!

إنتا بالنسبالهم شغل! حالة بيشتغلوا عليها زي الدكاترة بالظبط! الفرق إن العيّان هوّه اللي بيروح للدكتور عشان يعالجه ؛ لكن ظبّاط أمن الدولة همّه اللي بيوصلولك وبيعالجو المجتمع منك!

من حقهم يحتجزوك عندهم (وبدون تهمة محددة أصلاً ، وبدون دليل!) حتى 10 أيام!

لما باعاتب رائد أمن الدولة على الأساليب البوليسية اللي اتبعوها عشان أروح لهم ؛ آللي إنتا تزعل لو كلبشناك من المطار وحطّيناك في عربية وجبناك على هنا! إحنا بكل أدب سيبناك تخرج براحتك ، وطلبنا منّك تيجي تزورنا!

أخدت منه وعد إنه لما يعوز يستفسر عن أي حاجة بعد كده يبقى يتصل بيا ، وسبتله تليفوناتي في مصر والسعودية وكندا!

نقطتين كانوا فارضين احترامهم ليا في الحوار... إني طبيب... و...

كندا gra:-

نص ساعة باتكلم على كندا والحياة فيها... والائي الظابط هناك يسألني على شروط التقديم للهجرة لكندا ، وإيه المطلوب في شهادات الخبرة ، ويا ترى كل التخصصات مطلوبة؟

والله أنا المفروض أبدأ آخد كومّيشَن من وزارة الهجرة الكندية! n2&(

وما زلت مش متظبّط في دخولي ع النت ؛ وشاحت لابتوب من جوز أختي ، و راكن ف الشارع عشان ألئوط إشارة واي فاي سرقة برضه (بتاعت حد اسمه عمر!) في شارع الهرم... قمة التشرّد!

[ايهاب سالم]

وعملاً بنصيحة أخونا إيهاب اللي لا أعرفه ولا عمري شفته ولا كلّمته ولا سمعت صوته ولا حتى أعرف إسمه

حبيبي

عايزك تنكر كده على طول مهما ضربو فيك

زعيم تنظيمنا .. د / الشامي هيوصل تورونتو بكره إن شاء الله وسط عاصفه ثلجيه عاتيه ... متوقع سقوط 15 سم ثلج

و أنا على إتصال بالرفيق د / هشام إبراهيم

و بنجهز لعمليتك القادمه

فيه شبكة واي فاي في المطار يا إيهاب!

يعني أيه مطار ؟

و هاي فاي كام وات ؟

وما زلت مش متظبّط في دخولي ع النت ؛ وشاحت لابتوب من جوز أختي ، و راكن ف الشارع عشان ألئوط إشارة واي فاي سرقة برضه (بتاعت حد اسمه عمر!) في شارع الهرم... قمة التشرّد!

ماشي يا متشرد

حمد لله على السلامه

و لما ترجع البريمه إبقى إديني ألو

عشان نجهز للعمليه القادمه

تم تعديل 19 ديسمبر 2008 بواسطة ايهاب سالم

[Torontotruk]

يا إخوانا متقلقوش التهامي تلاقيه دلوقتي ممقق عينيه في الفلايرز أون لاين عشان ال Boxing day بكره ومحدش فاضي لحد!!

وعلى رأي المثل إن جالك البوكسينج داي حط ولدك تحت رجليك :happy: :happy:

وانت ياعم تروتنرك سايب الفلايرز وقاعد تكتب في المحاورات...ده كلام ياراجل..اتاريك فعلاً مش طايق كندا زي ما بتقول!

وحياتك بايت اودام فيوتشر شوب من بكرة. :lol: ..هي دي حاجة تفوتني :lol: :lol:

: ..ربنا يجعل كلامنا خفيف عليها... :unsure:

جايلك يا فيوتشر شوب ....جايلك يا وحش. :lol:

طبعا انا مش فاهم انته بتتكلوا على ايه اصلا واضح ان الموضوع له علاقة بكندا

البوكسينج داي بيبقي يوم 26 وبكرة المحلات حتفتح من الساعة 13.00 ظهرا و بيبقي فيه تخفيضات تصل الي 50 او 60 في المية...فيوتشر شوب من اكبر المحلات للاجهزة الكهربائية في كندا وامريكا....عموما البوكسينج داى في كل المحلات علي مستوي امريكا الشمالية ...

[ريناد]

في البداية بقدم كل الشكر لكل المشتركين

وبشكرهم علي مجهودهم

كنت عايزة اسالسؤال ويريت حد يرد عليا

ياريت لو حد يعرف تجربة دكتور بيطري في كندا

لاني دكتور بيطرية ومقبلة علي كندا قريب

[ELSHAMY]

حبيت اطمن كل الحبايب على حبيبنا التهامى

كلمنى النهاردة فى كندا و هو موجود فى السعودية و هو بخير

[moheltohamy]

مصاء الخير صيداطي آنصاطي صاضطي (وش د. حامد جوهر - برنامج عالم البحار بتاع القناة التانية :) )

حمد الله على سلامتي المرّادي بجد... :lol:

كان خروجي من مصر المرّادي زي ما يكون نفس عمييييق آخده بعد ميت مصيبة لابدة ومستخبّيالي ف الدرة!

مكالمات مع أصحاب ليّا و (جرايبيني) يعرّفوني إن اخواننا ايّاهم لما بيستلموا حد ؛ ما بيسيبوهوش ؛ وبيحبّوا يتآنسوا بيه كل شويّة... بيوحشهم!

واللي يقوللي بيتعمل لي بلوك على الجوازات ف المطار ، ومكتب العمل ، ومكتب إصدار جوازات السفر... أي مكان منهم هاروحه هالاقي اللي جاي يمسكني من أفايا... تعالى! :blush2:

وتصريح العمل اللي ما لحقتش أعمله بعد صعود التدرّج القيادي ؛ عفواً نزوله أولاً وصعوده فيما بعد!

والمطار اللي كان زحمة مووووت يوم الخميس الصبح ، وباقي أقل من ساعة ع الطيّارة (خصوصاً مع ذكرياتي السابقة مع إير كندا!)

والجوازات ف المطار اللي اتأخر جوازي عندهم مع الظابطة اللي بتفحصه ع الكمبيوتر! سوابق بأه ... ولكم أن تتخيّلوا الرعب وأوّل مرّة يتأخر بالشكل ده!

وعلى آخر خطوة قبل دخول صالة انتظار الطائرة مع أمين الشرطة اللي على جهاز فحص الشنط ؛ وهوّه بيتذاكى عليّا ، وأفش البلاوي السودة اللي مخبّيها في شنطتي!

كان دخولي الطائرة إحساس أقل ما يوصف بيه إنه... الروح ردّت ف الواحد! وكان رجوعي إلى السعودية بالأمس ، والبريمة اليوم بمثابة العودة Back to Life!

عمركو شفتو حد بيعد الأيام اللي باقياله على الرجوع للشغل؟! fty::

عموماً أعتذر عن الاختفاء الفترة السابقة لسدة النفس اللي الواحد كان فيها ، وكمان حالة النت الزبالة في مصر ف الأجازة دي!

مش عارف ليه النت هيّه كمان حالها بقى ف النازل في مصر! وما اعرفش إشمعنى النت في مصر بالذات الظروف عمّاله تقطّع لها في كابلاتها البحرية؟!

إني واي... آدينا أهوه باك تو لايف ، ونبدأ نفوق تاني للتوبيك والهاند أوفر ، ونعوّض فترة التقصير السابقة اللي انعزلت فيها عن النت ؛ وأرجو تسامحوني عليها. أنا فعلاً كنت محتاج أريلاكس شويّة زي ما قالوها سامح الأسد ولولا.

شكراً لجميع من تكرّم بالسؤال عني ، ومن شارك في التوبيك. وسعدت أيما سعادة ( smk: ) باحساسي بكمّ الألفة وسطكم... آه وربنا :wub:

واستأذنكم التجاوز عن أصول اللياقة في الوقت الحالي ؛ وعدم الرد على المشاركات فرداً فرداً (هيخلص الشفت كله قبل ما ألحق أرد عليهم كلهم)!

ونعود قريباً بحلقة لذيذة إن شاء الله هتعجبكم. :lol:

[moheltohamy]

عينينا يا نيو كَمَر... إنتي تؤمري :blush2:

بس ريّحي نفسك شويّة... شهر ونص وبقالك بتاع ربعميت مشاركة؟ زي ما تكوني مستنّية الفرصة ، وحصلت أول ما لقيتي المنتدى :lol:

تورونتو الشهير بمحمد عمر... إنتا شكلك سوابق قديم زيي!

ما تنزّل لنا توبيك عن "ذكريات مجرم تائب في كندا :lol: "

ما فيناش من زعل طبعاً :)

حسيني وسامح... جاي لكو fty::

[د هشام ابراهيم]

و أنا أقول المنتدى منور كده ليه :lol: ..... ألف حمد الله على السلامة يا دكتورنا الغالي .... خد وقتك يا باشا و في انتظار ابداعات الهاند اوفر اللي علي أصوله بقى :blush2:

[moheltohamy]

الف حمدلله ع السلامة يا حاج تهامي والله المنتدى كان مضلم من غيرك

وخصوصا ان الفترة اللي فاتت انت ود الشامي واستاذ ايهاب سالم ود قناوي مش موجودين

والله الواحد كان حاسس ان المنتدى ما كانش له طعم

مستنين الهاند اوفر

يا ستّي العفّو العفّو :blush2: (وش توفيق الدقن في إبن حميدو)

طيب أنا وانتو عارفين الظروف ، و د. الشامي وطبعاً كندا شاغلاه عن الدنيا واللي فيها ;)

طيب كان فين إيهاب سالم؟ يمكن بدأ مؤتمر الستيتس أبل ميعاده؟! :P

ولاّ لقى إن الناس مختفية ، فقال أنا اللي هاشيل الليلة ، و ف الخلعون؟ wst::

د. قناوي بأه ده اللي محتاج قرصة ودن ، وهاروح اقرصهاله في موضوعه المثبت!

بس كفاية كان معاكو د. هشام ، الراجل موضوعه داخل ع الخمسين صفحة ، وخلاص بقى عامود من أعمدة المنتدى وكان شايل السقف بتاع المنتدى لوحده الفترة اللي فاتت :happy:

عموماً يا ستي آديني رجعت باك تو لايف وللمنتدى اللي باحس إنو بيتي... وعلى رأي ماجدة الصبّاحي أيام الأبيض والأسود (اللي مالوش أهل... المنتدى أهله :lol: ) بتصرّف!

والله عمّال باكتب فيه آهوه...

بافكر أنزّلهولكو وجبات سناكس ، بدل الوجبات الدسمة...

إيه رأيكو؟! wst::