كندا التي رأيتها :)

[moheltohamy]

طيب مش هاكسفك يا سامح...

خدوا الحتتين دول مخمخوا فيهم على ما أخلّص لكو غيرهم :blush2:

أنا كنت وعدت د. بريكانيديان نتكلّم شويّة على الكانيديان لايف ستايل كما لفت نظري...

نمخمخ فيهم كده واحدة واحدة...

[moheltohamy]

هتلاحظ هناك ثقافة الطوابير في كل مكان تروحه! من أول وصولك المطار هناك... وتبدأ تاخد بالك من الثقافة دي ، من أصولها وعاداتها. أولاً ، مفيش حاجة اسمها نلزأ في بعض... المفروض فيه بتاع نص متر بينك وبين اللي أدامك ؛ مش خنقة هيّه! والمفروض الدور بيمشي ع الكبير أبل الصغيّر! واحنا ف البنك مثلاً ؛ واقف ف الصف ، والائي ست عجوزة كركوبة واءفة بالعافية ، وماسكة ف الهاندريل (ترابزين معدن عاملينه عشان تسند عليه لو حبيت ، ومعلّقين عليه ستاندات فيها جرايد ومجلاّت عشان لو زهئت والوأفة طوّلت) ؛ وكذا واحدة غيرها برضه واءفين ف الصف ، ولا واحدة فيهم خطر ببالها تستأذننا عشان مستعجلة أو تعبانة ، أو أي حجّة م الحجج السافلة اللي متعودين نسمعها ف مصر! وهوّه صف واحد للي داخل يتعامل مع صرّافي البنك (Tellers) ؛ الصف واحد واللي عليه الدور يشوف الشبّاك اللي يفضى ويروح له! مش زي البنك الأهلي العرّة في ميت غمر اللي كل واحد يؤف أدّام شبّاك ؛ وانتا ونصيبك يطلع الموظّف ده حِرِك ، أو بدايلُه قاعدة زي ما بيؤولو! والغريب إن التأمينات مش سايبالك أوپشن تتعامل مع أي بنك محترم! هوّه البنك الأهلي المصري فرع ميت غمر!

وافتكر موقف كوميدي – بالنسبالي أنا طبعاً – مع أول مرة ندخل الـــ TD CanadaTrust Bank في المنطئة بتاعتنا (يانج آند إجلنتون) ، في تاني يوم من وصولنا هناك (ولا كان يخطر ببالنا إننا هنسكن فيها فيما بعد)... المهم ، هند داخلة ف الأول (أصول الإتيكيت بأه مانتا فاهم ) ، وداخلة وش على موظّفة الريسيپشن تسألها (عاوزين نفتح حساب)، وعادي بأه ؛ مانتا بتشوف الحركات دي في مصر (يعني هنفضل ملطوعين مستنيين البُنيّه على ما تخلّص؟ دا سؤال وهنتّكل على الله)! اللذيذ بأه إن كان فيه واحدة بتتكلم مع موظفة الاستقبال (بصّت لنا بصة استحقار صح!) ، و وراها بمترين (ما يجيش في بالنا – يا مصريين – إنه تبع الصف) كان فيه واحد وائف مستني اللي أودّامُه دي تخلّص ؛ وفوجئ بهند داخلة أدّامه من غير لا إحم ولا دَستور... طبعاً الراجل اتنأط – كأي مواطن شريف – وسمعناه بيئوللها "Excuse meeeee!" :blush2: البنت – هند - اتبلّت في هدومها ، وبالطبع... فرحت فيها موووووت

وكنت حكيتلك عن سكاربرو تاون سنتر اللي رحناه تاني يوم وصولنا كندا عشان نطلّع الـــ Sin Number ، وكان النظام تقف ف الدور لغايت ما تقدّم الأپليكيشن ، وبعدين تؤعُد زي الباشا (تاكل - تشرب - تقرأ مجلّة من الموجودين هناك) لغايت ما يجيلك الموظّف ياخدك من إيدك تدخل معاه مكتبه تكمّلوا الإجراءات سوا!

وكلّمتك برضه عن سيرفيس أونتاريو لمّا رحتها عشان أقدّم على رخصة السواقة ، وكارت الـــ OHIP. وكان النظام هناك تؤف في الصف عشان تكلّم الريسيپشن ؛ ويدّيلك رقم تاخده وترتاح على كرسي لغايت ما رقمك ييجي عليه الدور في الشاشات اللي هناك (زي نظام البنوك المحترمة عندنا في مصر).

حتى في المطاعم من أمثال برجر كِنج وماكدونالدز وخلافهم ؛ برضه طابور واحد ؛ مش زي الوضع عندنا في بلدنا الغالية... الناس دي بتؤمن بالتوسُّع الرأسي وليس التوسُّع الأفقي! إحنا بأه عندنا تلاقي الكاونتر عليه 3-4 أدّام الكاشيير ، وممكن تلائي اللي داخل ف الكلام من الناحية التانية وانتا بتكلّم الكاشيير وبتقول له على وجبتك! (أنا هنا باتكلّم على فروع بيتزا هت وماكدونالدز في سيتي ستار مش في محل تعبان!)

دا حتّى في تيم هورتونز يا راجل... وانا داخله لأوّل مرة (الفرع اللي تحت البيت) ، أولت أخبطلي واحد كاپوتشينو بالفرينش فانيللا م اللي بيعدل المزاج ويدفّي الواحد ويفوّؤه (3 × 1)... لئيت الراجل اللي ع الكاونتر واخد النسكافيه بتاعه وماشي ، أومت داخل ع الكاونتر (بكل احترام)... ألائي الأخ اللي خارج ده بيشاورلي ع الصف اللي وائف على جمب وسايب مسافة محترمة بينه وبين الكاونترز! آم سوري يا جماعة ، ولفّيت زي الشاطر و وئفت ف آخر الصف ؛ وتأكّدت فعلاً إني قروي ساذج بهرته أضواء المدينة! وبرضه هوّه طابور واحد ؛ والكاشيير اللي يفضي ينده (Next) واللي عليه الدور يتفضل. وطبعاً الحوار بينكو بيبدأ (جود مورنينج سير ، هاو كاناي هلپ يو؟) وبينتهي دايماً بـــ (هاف أنايس داي) :happy:

أفتكر موقف حصل معايا في أوّل يوم رجعت فيه مصر بعد زيارتي الأولى لكندا يوم 2 أكتوبر 2007... وانا في ميت غمر يا ريّس ، نفسي هفّتني أدّيها سندوشتين فول بالزبدة واتنين طعمية من غير طحينة! وبكل أدب وأخلاق وئفت ف الصف أدّام الراجل اللي بيحضّر الشندوشتات وماسك البون في إيدي مستني الـــ 2 اللي أّدّامي ياخدو طلبهم. ألائيلك بتاع كده آخره إعدادي أو سانوي طالعلي Out of nowhere ، و... (لو سمحت يا عم اتنين طعميّة) ، ومادد إيده أدام الـــ 3 شحُطة اللي أدّامه (باعتبار إني أحد الشُحُطة طبعاً)! "إنتا يابني... إنتا شايف نفسك أنضف منّي؟!" والواد يتنّح ويفتح بؤّه شويّة على ما يستوعب الكلمة! وبعدين (إيه يا عم هوّه انا خدت أكلك؟!) ، وانا: "يبئى تتفضّل تؤف ف الصف على ما اللي جُم أبلَك يخلّصوا"!

الواد سكت شويّة (بس طبعاً زي ما هوّه... صف مين ده اللي يؤف فيه؟!) ، وبعدين تئولشي كلِتُه ، وتاني (اتنين طعميّة بس ع السريع وحياتك!)... اتنأطت بأه ساعتها ؛ و... "إنتا يابني انتا ، مفيش فايده فيك؟ مش هتمشي انتا أبل ما امشي أنا ، وانا لسّه أدّامي اتنين... يبئى تتفضّل تـترزع ف الطابور وتحترم دورك!" wst:: ، وده (طابور إيه؟ هوّه احنا ف جمعيّة؟!) :lol:

ساعتها بأه الراجل اللي بيحضّر السندوتشات ألائيه بيئوللي (أؤمر يا بيه) ، وانا طبعاً – رجل المبادئ – "خلّص بس اللي أبلي وبعدين نتفاهم"! ماهو شاف واحد بيئول كلام أبيح ، ومبوّظ النظام (ده اللي هوّه أنا طبعاً) ، فكان المفروض يخلص منّي ومن أرفي! أو يمكن الكلام الكبير اللي كنت بائوله ؛ أكيد سعادة البيه ده راجل واصل وبيتكلّم بالثقافة ، يبئى نمشّيه الأول!

طبعاً الموقف ده حصل وانا لسّه جاي طازة من كندا ، ومُحمّل بشحنة إيمانيّات عالية أوي! وف نفس الموقف يحصل طتش تاني أئولهولك كمان شويّة!

[moheltohamy]

يظهر إن الحتة دي اتكررت قبل كده... أعتذر عن هذا الخطأ غير المقصود...

عموماً خدوا الحتة اللي بعدها...

لفَت نظري وانا هناك حاجة ، واتّضح إنها Rule عندهم (كما أكّدهالي ديبو بعدين)... ألائي يحمد ياخويا الناس طالعة من الصابواي ، وداخلين ع السلّم الكهربا ، وكلهم واقفين صف واحد ع اليمين ، وسايبين الناحية الشمال من السلّم فاضية تماماً ، والناس متكربسين تحت على ما ياخدوا دورهم ف السلم! ومع الوأت يا سيدي ألائي إنهم سايبين الناحية الشمال دي للناس اللي مستعجله أوي ؛ وبتاخد السلالم المتحركة جري كمان! وطبعاً الأغلبية هناك (يعني بالفعل أكتر من نصف الناس) عايشين بثقافة "أنا عاوز أطلع السلّم العادي" ؛ وسايبين السلم الكهربا... وناس شباب وعواجيز ، ميلز وفيميلز... صحتنا يا ريّس!

ولمّا رجعت مصر بأه أخدت بالي م الموضوع ده أوي ف المولات وف المترو... الناس عادي تؤف ع السلم الكهربا يمين شمال مش فارقة ، ومش من الطبيعي إنك تاخده بسرعة على فوء... ما كُنّاش عملناه كهربه يا بيه! الطبيعي إنك تلاقيه بلوكد تماماً!

ولسّه في آخر مرة كنت في مصر طالع السلم الكهربا بتاع محطّة كليّة الزراعة ، السلّم فاضي تماماً ، وفيه بنتين جامعيتين واقفين على السلّم وهوّه طالع ، وصلت لغاية عندهم ، وهمّه شايفينّي و إيه؟ ولا ف الدماغ ، أولتلهم (إنتو كده يعني آفلين الطريق؟) و واحدة منهم (ما هو السلم طالع لوحده) ، وانا (ممكن تسيبو طريق للّي مستعجل) ، وهيه ترد (احنا بنستجم ... وانتا مستعجل على إيه؟) ، (يا ستي أؤفي انتي ع اليمين وسيبي الشمال للي مستعجل!) ، (يعني هتركب قبلنا مثلاً؟ طب والمستعجل المفروض تدّي كلاكس ، يعني احنا هنعرف منين إنك مستعجل!)... م الواضح إن مزاجها كان رايق ، وعاملة دماغ عنب... أنا اللي ما كانش فيّا دماغ للكلام الصراحة... كنت عاوز اسمع كام أغنية جداد كنت منزّلهم ع الموبايل :blush2:

أفتكر موقف حصل مع الواد مجدي (واحد صاحبي انتا ما تعرفوش – رائد جيش ، وكان معايا في كتيبة حرس الحدود ، وصاحبي من أيام إعدادي)... المهم... مرة مجدي بيئوللي: تعرف يابو حميد... فيه نوعين من الدماغ ممكن تعملهم ؛ دماغ أغاني ، ودماغ حريم. تفتكر أنهي فيهم أحلى؟ وانا (دماغ الحريم طبعاً يا مجدي) ، وهوّه يرد (لأ طبعاً... دماغ الأغاني يا فالح أحسن ميت مرة!) ليه يا أستاذ مجدي؟ وده يشرحلي...

دماغ الأغاني ممكن تعملها في أي وأت ؛ مجرد ما نفسك تهفّك عليها... دماغ الحريم مش متاحة على طول!

دماغ الأغاني مش هتكلّفك كتير خالص ... دماغ الحريم هتئرفك طلبات وهدايا وغيره كتير!

دماغ الأغاني مستحيل تعمل لك مشاكل فيما بعد ... دماغ الحريم مشاكلها وبلاويها كتييييير!

دماغ الواد مجدي ده :happy:

تم تعديل 3 يناير 2009 بواسطة moheltohamy

[SoSo R]

أنا ليه عندى إحساس إن إتحلألى فى القهوة بتاعتكم :blush2: ينفع كده يا دكتور من أول تعامل لىَ تصدمنى إيه مش عايز تربى زبون........و أنا اللى قلت هتقول تيم هورتونز كلها تحت أمرك :happy: ..................ماشى ما كانش العشم :lol:

[moheltohamy]

أنا ليه عندى إحساس إن إتحلألى فى القهوة بتاعتكم ! ينفع كده يا دكتور من أول تعامل لىَ تصدمنى إيه مش عايز تربى زبون........و أنا اللى قلت هتقول تيم هورتونز كلها تحت أمرك ;) ..................ماشى ما كانش العشم wst::

والله أبداً يا فندم...

أنا كنت مستني أرد عليكي في الآخر... بس اتلخبطت في حكايت الهاند أوفر ، والحتت المكررة وكده...

أنا أساساً لفت نظري إسمك... سوسو راني! لو راني سوسو كان معلش (رانيا سامح مثلاً) wst::

وانا اللي كنت فاكر إسم لولا مشخلع حبتين! wst:: (صباح الفل يا لولا :lol: )

بس انتي بجد مشاركتك دي - أصدي اللي فاتت - حكاية لوحدها ...

مساء الخير عليكم جميعا أو نقدر نقول صباح الخير لأن الساعة 3 صباحا.......أنا عايزة أقول حاجات كتيررر جدا بس أنا ضايعة فى التايبينج العربى محتاجة تقوية لأن أنا على أدى بس سريعا هاقول ان دى أول مشاركة أكتبها فى حياتى

أنا أخدت اللينك بتاعة المنتدى من زميلى فى الشغل و من ساعتها ما بأمش من على المنتدى أول مرة دخلت على توبيك تهامى باشا قعدت 6 ساعات متواصلة ما كنتش عايزة أقوم الا لما أخلص وده طبعا مستحيل

بس وصلت فى وقت قياسى ...لكن فوجئت بالنداءات و الدعوات ان التهامى يرجع بالسلامة و القصة اياها ربنا ما يعيدها فقلت ما بدهاش لازم أسجل فى المنتدى عشان أدى الراجل ده حقه.

ألف حمد الله ع السلامه أنا كنت بادخل كل يوم بس عشان أطمن إذا كنت ظهرت ولا لسه و كنت واخده عهد على نفسى ما أكتبش رد إلا لما تظهر ويكون أول مشاركة لي ف التوبيك بتاعك ......... :blush2:

كفاية كدة عشان أنا عينى طلعت :P

أولاً أنا أسجل شكري لزميلك ف الشغل ;)

ويسعدني ويشرفني إن تكون أولى مشاركاتك معايا في توبيكي ده... وكمان أول مشاركة تكتبيها في حياتك؟!

أول مشاركة في حياتك ، وآيكونز وسمايليز وكده؟ دانتي على كده مولودة محترفة :happy:

وأتمنى أسمع إيه حكايتك... يعني بتحبي تئري حواديت؟ ولاّ بتفكّري تروحي كندا؟ ولاّ إيه الحكاية بالظبط؟!

وألفين مرحبا بيكي على قهوة المش تهامي هورتونز (حركة تموين ;) )

تم تعديل 3 يناير 2009 بواسطة moheltohamy

[moheltohamy]

أولا أنا مشكلتى الأساسية أكتب عربى بسرعة لو ممكن عربى بحروف إنجليزى يبقى مووووووووز

ثانيا أنا طبعا محترفة........ wst:: مش ميديكال فيلد :closedeyes:

ثالثا حكايتى مع الزمان حكاية طويلة

يا افندم حكايتك طويلة ، و وقتنا أطول... :lol:

وبلا ميديكال فيلد بلا هم يا شيخة ، افتكريلنا حاجة حلوة :unsure:

ومعلش اتحمّلي شويّت تعب ، ومسيرك تتعوّدي... أنا نفسي إيدي خدت ع العربي مع كتابات الهاند أوفر ، وخدت ع الانجليزي من الشات أيام الشقاوة :blush2:

أما العربي بحروف انجليزي ؛ هيخسر الإحساس بتاع العربي والألفة مع منظر الحروف العربي.

وما زلنا منتظرين رحلتك مع الأيام wst::

وهانزل لك بحتة كده على ما أوسوم :blush2:

تم تعديل 3 يناير 2009 بواسطة moheltohamy

[moheltohamy]

من ضمن انطباعات البلد اللي حبّيتها لدرجة الزهق... 3 كلمات بتسمعهم يومياً لما زهقت منهم... إكسكيوز مي ، ثانك يو ، آم سوري! واحد بيعدّي وراك ف الأتوبيس أو الصابواي لازم الإكسكيوز مي طول ما هو ماشي!

أي حد عمللك أي حاجة لازم تدّيلُه الثانكيو. مرة كنت باطلّع المفتاح عشان أفتح بوابة العمارة بتاعتنا ، وكانت سيلفيا (السوبرانتندنت) بتكلّم واحدة م الجيران وجمبها الواد ابنها (حتت واد عسّوووووول). الواد لمحني باطلّع المفتاح وجري ع البوّابة يفتحهالي ، و وائف يبُصّلي... مستنّي الثانكيوهاية بتاعته! بيفرحوا بيها أوي على فكرة! طبعاً لازم أفرّحه... الواد مؤدب ويستاهل أشكره! داحنا على كده كنا أطفال سَفَلَه يا راجل! :closedeyes:

موقف تاني... مرة محمد حامد (صاحب ديبو) كان ف البيت وطلب م الواد المفعوص ابنه يجيبلُه كُبّايت ميّه. راح الواد وجابهالُه ، وبعد ما شرب وخلّص لقى الواد زعلان وبيئول له (بابا... انتا ما أولتليش ثانك يو! :blush2: ) ما هُمّه في المدرسة زي ما بيعلّموه آداب التعامل وإنو لازم يئول ثانك يو لمّا حد يدّيله أو يعمل لُه حاجة ؛ بيعرّفوه إن برضه ف المقابل الناس هيئولوهالك لما تعمللهم حاجة كويّسة! ومحمد حامد بيحكيلي الموقف ومستغرب من رد فعل الواد! محتاجين نغيّر دماغنا الشرقية دي في التعامل مع الناس بما فيهم الأطفال. وأطفالنا وزوجاتنا كذلك المفروض تكون الثلاثية الكلامية دي (الـــ 3 كلمات إيّاهم) متداولة ف الديلي لايف بيننا ، وكلمة شكراً دي لازم تتقال مع كل حاجة كويّسة تتعمل ؛ حتى لو كانت من مسئوليّات والتزامات الزوجة مثلاً (Don't take it for granted)

نيجي لكلمت سوري... مثلاً كنت واقف ع السلم الكهربا في الصابواي ع اليمين ؛ وبنت كنداوية بتعدي على شمالي ، وهيّه طالعة جَت تسند على ترابزين السلم لمست – واخد بالك انتا ، لمست – إيدي! مش هائوللك الإيدين اللي تتلف ف حرير ، دي بأه الإيدين الحرير نفسه! والائيها ياخويا بتتلفت تئوللي (آم صو سوري!)... كروان بيغنّي يابو حميد! صو سوري عشان لمست إيديّا... دانا اللي كان المفروض ائوللها ميرسي

نفس الموضوع ده افتكرته وانا في مطعم الفول والطعميّة في ميت غمر (الموقف اللي لسّه حاكيهولك من شويّة). بعد ما ادّيت أخينا البون بعدت خطوتين عن الصف مستني لما يخلّص تحضير السندوتشات ينده عليّا... ألائي واحد كان بيحاسب الكاشيير ، وبيرجع بضهره بسلامته ، وداس على رجلي – داس يعني فعصها سياتّك – وكنت لابس جزمة قطيفة سودا (يعني الهوا كان بيسيب عليها أثر)! البيه بعد العملة السودة دي ألائيه بيتدوّر 180 درجة ويبُص عليا نظرة لا تحمل أي معني ، ويبص أُدّامه تاني ؛ ولا كإنه داس على صرصار أو خُنفسة!

ساعتها بؤي اتفتح وكان الكلام على طرف لساني (إنتا ما اتعلّمتش تئول أنا آسف؟!). بلاها آسف يابو حميد ؛ يئوللي لمؤاخزة يا بيه! صعبة؟! تاني موقف في خمس دئايئ في نفس المكان ؛ مسكت نفسي لما فكّرت شويّة (هوه أنا هاربّي الناس من أوّل وجديد؟!) ، وما سدّأت خدت الساندوتشات ومشيت! وأولت لنفسي الحمد لله إني بكره ماشي ع السعودية ؛ كان هيجرالي حاجة لو كنت طوّلت شويّة في مصر ساعتها بزّات!

موقف تالت عكسي بأه حصل معايا... كنت سايق العربية في الدوران اللي من ش التحرير ف الدقي ، وداخل على شارع السودان ، باتجاه الهرم وفيصل. واحد عمّال بيزنّق بعربيته وكل ما يلائي أي تفتوفة زخنوق فاضية يقوم داخل ببوزه فيها ، طبعاً أنا باتشلّ م الأسلوب ده ، ويا دوب الفرصة سنحتلي أدخل أزنّق عليه (كان الزخنوق بتاعي أنا) أومت داخل طلقة وعدّيته قبل ما يلحؤه! بس المراية بتاعتي خبطت ف المراية بتاعته! المهم ، لئيته جه جمبي بعربيته ، وبيفتح الإزاز وبيئوللي ينفع كده؟ ردّيت عليه وأولتله (إيه اللي حصل يعني؟ المراية اتعوّرت؟ جابت دم؟) و رد عليا (لأ ، بس المفروض تئوللي آسف!) ... أنا سمعت الكلمة دي وبلّمت ، ما نطأتش بنُص كلمة! الراجل خبطني الكلمة دي ومشي! وانا زي ما اكون خدت دُش بارد في عز الشتا! كلمة الراجل جَت ف الجون ، وما اقدرش أجادل فيها. ساعتها افتكرت موقف المطعم ومواقف كندا وحسّيت إني مش متربّي!

[Torontotruk]

من ضمن انطباعات البلد اللي حبّيتها لدرجة الزهق... 3 كلمات بتسمعهم يومياً لما زهقت منهم... إكسكيوز مي ، ثانك يو ، آم سوري! واحد بيعدّي وراك ف الأتوبيس أو الصابواي لازم الإكسكيوز مي طول ما هو ماشي!

أي حد عمللك أي حاجة لازم تدّيلُه الثانكيو. مرة كنت باطلّع المفتاح عشان أفتح بوابة العمارة بتاعتنا ، وكانت سيلفيا (السوبرانتندنت) بتكلّم واحدة م الجيران وجمبها الواد ابنها (حتت واد عسّوووووول). الواد لمحني باطلّع المفتاح وجري ع البوّابة يفتحهالي ، و وائف يبُصّلي... مستنّي الثانكيوهاية بتاعته! بيفرحوا بيها أوي على فكرة! طبعاً لازم أفرّحه... الواد مؤدب ويستاهل أشكره! داحنا على كده كنا أطفال سَفَلَه يا راجل! :closedeyes:

موقف تاني... مرة محمد حامد (صاحب ديبو) كان ف البيت وطلب م الواد المفعوص ابنه يجيبلُه كُبّايت ميّه. راح الواد وجابهالُه ، وبعد ما شرب وخلّص لقى الواد زعلان وبيئول له (بابا... انتا ما أولتليش ثانك يو! :blush2: ) ما هُمّه في المدرسة زي ما بيعلّموه آداب التعامل وإنو لازم يئول ثانك يو لمّا حد يدّيله أو يعمل لُه حاجة ؛ بيعرّفوه إن برضه ف المقابل الناس هيئولوهالك لما تعمللهم حاجة كويّسة! ومحمد حامد بيحكيلي الموقف ومستغرب من رد فعل الواد! محتاجين نغيّر دماغنا الشرقية دي في التعامل مع الناس بما فيهم الأطفال. وأطفالنا وزوجاتنا كذلك المفروض تكون الثلاثية الكلامية دي (الـــ 3 كلمات إيّاهم) متداولة ف الديلي لايف بيننا ، وكلمة شكراً دي لازم تتقال مع كل حاجة كويّسة تتعمل ؛ حتى لو كانت من مسئوليّات والتزامات الزوجة مثلاً (Don't take it for granted)

نيجي لكلمت سوري... مثلاً كنت واقف ع السلم الكهربا في الصابواي ع اليمين ؛ وبنت كنداوية بتعدي على شمالي ، وهيّه طالعة جَت تسند على ترابزين السلم لمست – واخد بالك انتا ، لمست – إيدي! مش هائوللك الإيدين اللي تتلف ف حرير ، دي بأه الإيدين الحرير نفسه! والائيها ياخويا بتتلفت تئوللي (آم صو سوري!)... كروان بيغنّي يابو حميد! صو سوري عشان لمست إيديّا... دانا اللي كان المفروض ائوللها ميرسي

[المطعم ومواقف كندا وحسّيت إني مش متربّي!

يا سلام الناس الكنادوة دول محترمين جدا...بس مش عارف انا ليه ما شفتش حاجات زى دي...مع اني كنت عامل ابوناميت في الصبواى...وعلي فكرة انا بكلم افرنجي كويس...وناس كتير كانت بتخبط فية وعمرهم ما قالوا سوري او باردون...واحيانا كانت ايدي ايلي تتلف في حرير كانت بتضرب في حتت من غير قصد و اللهي وعمر الستات ما تكلموا ...سبحان الله ...

[د هشام ابراهيم]

موقف تالت عكسي بأه حصل معايا... كنت سايق العربية في الدوران اللي من ش التحرير ف الدقي ، وداخل على شارع السودان ، باتجاه الهرم وفيصل. واحد عمّال بيزنّق بعربيته وكل ما يلائي أي تفتوفة زخنوق فاضية يقوم داخل ببوزه فيها ، طبعاً أنا باتشلّ م الأسلوب ده ، ويا دوب الفرصة سنحتلي أدخل أزنّق عليه (كان الزخنوق بتاعي أنا) أومت داخل طلقة وعدّيته قبل ما يلحؤه! بس المراية بتاعتي خبطت ف المراية بتاعته! المهم ، لئيته جه جمبي بعربيته ، وبيفتح الإزاز وبيئوللي ينفع كده؟ ردّيت عليه وأولتله (إيه اللي حصل يعني؟ المراية اتعوّرت؟ جابت دم؟) و رد عليا (لأ ، بس المفروض تئوللي آسف!) ... أنا سمعت الكلمة دي وبلّمت ، ما نطأتش بنُص كلمة! الراجل خبطني الكلمة دي ومشي! وانا زي ما اكون خدت دُش بارد في عز الشتا! كلمة الراجل جَت ف الجون ، وما اقدرش أجادل فيها. ساعتها افتكرت موقف المطعم ومواقف كندا وحسّيت إني مش متربّي!

عودا حميدا يا دكتورنا الغالي

بالنسبة للموقف الاخراني ده كلنا هذا الرجل يا عزيزي ... أبقي أعمل زي العبد لله ...أخر مرة نزلت مصر اجرت عربية بسواق و ريحت دماغي ... ما ينفعش تسوق في مصر و بعدين ترجع تسوق في حتة تانية أبدا .... ردود الأفعال مختلفة تماما

بالنسبة إلي سوري و ثانك يو و اكسكيوز مي ... فملاحظاتك كلها في الصميم يا باشا في الصابواي و المحلات و المولات و المطاعم

[Torontotruk]

من ضمن انطباعات البلد اللي حبّيتها لدرجة الزهق... 3 كلمات بتسمعهم يومياً لما زهقت منهم... إكسكيوز مي ، ثانك يو ، آم سوري! واحد بيعدّي وراك ف الأتوبيس أو الصابواي لازم الإكسكيوز مي طول ما هو ماشي!

أي حد عمللك أي حاجة لازم تدّيلُه الثانكيو. مرة كنت باطلّع المفتاح عشان أفتح بوابة العمارة بتاعتنا ، وكانت سيلفيا (السوبرانتندنت) بتكلّم واحدة م الجيران وجمبها الواد ابنها (حتت واد عسّوووووول). الواد لمحني باطلّع المفتاح وجري ع البوّابة يفتحهالي ، و وائف يبُصّلي... مستنّي الثانكيوهاية بتاعته! بيفرحوا بيها أوي على فكرة! طبعاً لازم أفرّحه... الواد مؤدب ويستاهل أشكره! داحنا على كده كنا أطفال سَفَلَه يا راجل! :

يا عم الحاج ده في عيال بتضرب ابهاتها في تورونتو..واللهي و مصريين...وتسمع الكلام ده في المركز العربي ...عفوا انا نسيت ان التوبيك بعنوان كندا التي رأيتها...

[moheltohamy]

حبيبي د. هشام :blush2:

واحشني جداً انتا والتوبيك بتاعك ، اللي اعتبرته بيتي من صفحته الأولى لو تفتكر.

نفسي أروق شويّة وارجع أمخمخ فيه تاني ؛ خصوصاً وإن فيه كلام كتير اتكتب بعد ما مشيت م البريمة آخر مرة... أدامي بتاع 20 - 30 صفحة أعيش فيهم :closedeyes:

والحمد لله إنك معايا ف اللي شفته في تورونتو... يعني مش باهجّص وباميّس ع الناس آهوه يا عم تورونتو.

اللي باستغربله يا ابو تورونتو يا كيبيكاوي... هوّه انتا ما شفتش عيال مؤدبة خالص في كندا؟ كل اللي صادفتهم كانو شبّيحة وفتوّات وعيال صايعة؟!

وحتى الستات ما كانوش بيتكلّموا مع ضربات إيدك؟! مش عارف ائوللك إيه الصراحة... نصيبك! ولاّ ... يا بختك :blush2:

مش أولتلك أبل كده...

عين الرضا عن كل عيب كليلة *** وعين السخط تبدي المساويا

تم تعديل 4 يناير 2009 بواسطة moheltohamy

[د هشام ابراهيم]

يا عم الحاج ده في عيال بتضرب ابهاتها في تورونتو..واللهي و مصريين...وتسمع الكلام ده في المركز العربي ...عفوا انا نسيت ان التوبيك بعنوان كندا التي رأيتها...

فيه يا باشا ... زاي ما فيه عيال عاصية في مصر و أمريكا و أوروبا و كل حتة الكويس موجود و الوحش موجود في كل حتة و في كل زمان بس الفكرة الاغلبية إيه .... الثقافة الجمعية بتاعة المجتمع كله إيه .... التقاليد الغالبة علي الناس إيه ....

[Torontotruk]

يا عم الحاج ده في عيال بتضرب ابهاتها في تورونتو..واللهي و مصريين...وتسمع الكلام ده في المركز العربي ...عفوا انا نسيت ان التوبيك بعنوان كندا التي رأيتها...

فيه يا باشا ... زاي ما فيه عيال عاصية في مصر و أمريكا و أوروبا و كل حتة الكويس موجود و الوحش موجود في كل حتة و في كل زمان بس الفكرة الاغلبية إيه .... الثقافة الجمعية بتاعة المجتمع كله إيه .... التقاليد الغالبة علي الناس إيه ....

.فيه ايه ياباشا...انا بكتب ايلي سمعته...ومش حالة واحدة ...ما عن الاغلبية في تورونتو...الجيل المصري اللي اتولد في كندا او اللي وصلوا في المرحلة الابتدائية...بيشربوا خمرة في الويك اند...وبيدخنوا الويد ...وليهم علاقات جنسية والكاندوم علي طول في جيوبهم...90 في المية او اكثر منهم كده.ملحوظة انا سمعت ان فيه اولاد كتير ضربوا اباهاتهم مصريين...الباقي انا رايته بعيني...وربنا شاهد علي كلامي.

[د هشام ابراهيم]

حبيبي د. هشام :blush2:

واحشني جداً انتا والتوبيك بتاعك ، اللي اعتبرته بيتي من صفحته الأولى لو تفتكر.

نفسي أروق شويّة وارجع أمخمخ فيه تاني ؛ خصوصاً وإن فيه كلام كتير اتكتب بعد ما مشيت م البريمة آخر مرة... أدامي بتاع 20 - 30 صفحة أعيش فيهم :closedeyes:

والحمد لله إنك معايا ف اللي شفته في تورونتو... يعني مش باهجّص وباميّس ع الناس آهوه يا عم تورونتو.

الله يخلي حضرتك يا باشا ... سعادتك و حكايتك و د الشامي و حكايته و إيهاب باشا و تورنتو باشا بقيتوا كلكم جزء من الحوار اليومي بتاعي ..مع المدام و مع صحابي كمان

يا باشا الموضوع أصلا بتاعك و فاكر طبعا كل مشاركة ليك .... خد وقتك و مستني ردودك إن شاء الله

يا باشا العفو أنا حكاية سوري ديه بقيت تجننني أصلا مش ممكن الأدب اللي الناس فيه ديه .... ما هو علشان كده الأمريكان دايما يتريقوا علي الكنديين علشان مؤدبين زيادة ... شوف أي فيلم أمريكاني أو أي برنامج حوار أمريكاني بيتكلم عن كندا حتلاقي نفس الموضوع برضه

المفاجأة بقى لو طلعت بره تورونتو حتلاقي الموضوع أشد كمان ... يعني أنا كنت فاكر إن الناس في تورنتو ما لهمش حل لقيت الناس في سانت كاترين أكتر من كده كمان .... ازاي ما أعرفش :blush2:

تم تعديل 4 يناير 2009 بواسطة د هشام ابراهيم

[د هشام ابراهيم]

.فيه ايه ياباشا...انا بكتب ايلي سمعته...ومش حالة واحدة ...ما عن الاغلبية في تورونتو...الجيل المصري اللي اتولد في كندا او اللي وصلوا في المرحلة الابتدائية...بيشربوا خمرة في الويك اند...وبيدخنوا الويد ...وليهم علاقات جنسية والكاندوم علي طول في جيوبهم...90 في المية او اكثر منهم كده.ملحوظة انا سمعت ان فيه اولاد كتير ضربوا اباهاتهم مصريين...الباقي انا رايته بعيني...وربنا شاهد علي كلامي.

صادق يا باشا أنا مش باكدبك أكيد فيه عيال ضاعت ... بس أنا اعتراضي على حكاية الأغلبية ديه .... أنا في محيط اللي شفتهم في خلال ال-٣ سنين و نص اللي قعدتهم ما شفتش الحكاوي اللي حضرتك بتقول عليها .... موجودة أكيد موجودة ... أغلبية أشك و الله أعلم

[moheltohamy]

د. بريكانيديان... تعيش وتنوّرني يا أمير (يعني راجل محترم وكويّس مش حاجة تانية!) :lol:

جيمي...

هوّه إنتا نوّرتني طبعاً ، بس أنا أحب أتعرّف بيك أولاً وأبو كحة صاحبك ده يمكن يحتاج علاج... بيتهيّألي إنتو حصل معاكو تشابه أسماء... مش انا! :unsure:

كابلان...

شكراً على ترحيبك ، وان جيت للحق أنا أدّامي 3 هاند أوفرز أشتغل فيهم ؛ بتاع كندا ، وبتاع جنوب أفريقيا وبتاع الحج... مش عارف هالائي وأت ليهم ولاّ لأ!

إنتا مقدّم في الـ USMLE ولا إيه حكاية كابلان دي؟!

باشمهندسة سمية...

كل غيبة وانتي طيبة ، بآلي زمان ما شفتكيش! منتظر أخبار عنك وعن الفايل بتاعك... فيه أي جديد؟!

أم ريهام...

وانتي طيبة وبخير دايماً انتي والأسرة كلها ، وتمنياتي بعام أجمل وأسعد عليكي انتي كمان يا رب ، ويسمع من بؤك ربنا :blush2:

فرعون...

هوّه إسم يخض شويّة ، بس الله يسلّمك ، ونوّرتنا في التوبيك :blush2:

باشمهندس ياسر...

الله يسلّمك يا ريّس ، وتمنياتي لك بتطورات سعيدة وعاطفية :closedeyes:

كوت كوت...

شوك شوك شوك شوك راً يا كوت كوت كوت كوت wst::

تم تعديل 4 يناير 2009 بواسطة moheltohamy

[Torontotruk]

حبيبي د. هشام :lol:

واحشني جداً انتا والتوبيك بتاعك ، اللي اعتبرته بيتي من صفحته الأولى لو تفتكر.

نفسي أروق شويّة وارجع أمخمخ فيه تاني ؛ خصوصاً وإن فيه كلام كتير اتكتب بعد ما مشيت م البريمة آخر مرة... أدامي بتاع 20 - 30 صفحة أعيش فيهم :closedeyes:

والحمد لله إنك معايا ف اللي شفته في تورونتو... يعني مش باهجّص وباميّس ع الناس آهوه يا عم تورونتو.

اللي باستغربله يا ابو تورونتو يا كيبيكاوي... هوّه انتا ما شفتش عيال مؤدبة خالص في كندا؟ كل اللي صادفتهم كانو شبّيحة وفتوّات وعيال صايعة؟!

وحتى الستات ما كانوش بيتكلّموا مع ضربات إيدك؟! مش عارف ائوللك إيه الصراحة... نصيبك! ولاّ ... يا بختك :blush2:

مش أولتلك أبل كده...

عين الرضا عن كل عيب كليلة *** وعين السخط تبدي المساويا

شغلانة اشتغلتها اول ماوصلت ...بمزاجي...مش لاحتياج لاسمح الله...وعلشان ربنا وهبني جسم رياضي...و ذراعين منتهيه بقبضتن اللي ليه نصيب في واحده منهم.. :blush2: :unsure: ....كنت موفق في هذا لعمل....وكان اهم قاعدة في هذا العمل تأليب الزبون...وياما طلعت بلاوى...وكانوا معظمهم مصريين و عرب من 16 الي 25 سنة...واللهي كان بيبقي معاهم مطواوي ...والبنت ايلي كانت بتشتغل معانا كانت بتكره اعياد الميلاد او حفلات العرب و المصريين...ياراجل عمرك سمعت عن تورته فيها ربع كيلو بانجو...ياراجل المحل اشتري مخصوص اجهزة لكشف المعادن علشان خاطر الزنوج والعرب.

[moheltohamy]

شغلانة اشتغلتها اول ماوصلت ...بمزاجي...مش لاحتياج لاسمح الله...وعلشان ربنا وهبني جسم رياضي...و ذراعين منتهيه بقبضتن اللي ليه نصيب في واحده منهم.. :blush2: :unsure: ....كنت موفق في هذا لعمل....وكان اهم قاعدة في هذا العمل تأليب الزبون...وياما طلعت بلاوى...وكانوا معظمهم مصريين و عرب من 16 الي 25 سنة...واللهي كان بيبقي معاهم مطواوي ...والبنت ايلي كانت بتشتغل معانا كانت بتكره اعياد الميلاد او حفلات العرب و المصريين...ياراجل عمرك سمعت عن تورته فيها ربع كيلو بانجو...ياراجل المحل اشتري مخصوص اجهزة لكشف المعادن علشان خاطر الزنوج والعرب.

يا حبيبي أنا ما جبتش سيرة لا المصريين ولا العرب أصلاً...

أنا كان كلامي كلّه عن الكنديين ، وأسلوب حياتهم.

أما بخصوص الزنوج ، فــ دول مرض في أي مصيبة يروحوا فيها...

والمفروض ليهم فقرة كاملة في الهاند أوفر بتاع جوهانسبيرج.

عموماً ، كلامنا عن الأغلبية كما قال د. هشام ، الاستثناء يبقى استثناء ، وبرضه أنا باقول اللي عينيّا شافته ، ممكن غيري يشوفه بشكل مختلف. والحمد لله د. هشام عنده نفس الرؤية...

الخلاصة ، إحنا مش بنتكلّم من فراغ.

أمّا اللي انتا شفتة ويعتبر من عيوب كندا ، وبرضه ما رضيتش تنزّلهولنا في التوبيك اللي فتحته مخصوص عشان العيوب!

أعمل إيه أنا طيب؟!!!! :closedeyes: :blush2:

[moheltohamy]

يا عمّنا فيه أدمغة كتير ؛ دماغ أكل ، ودماغ كورة ، ودماغ سودوكو ، ودماغ ويسكي ، ودماغ بانجو ، ودماغ كابوتشينو :unsure:

بس مجدي كان بيجيب م الآخر ، وبيتكلّم على النوعين اللي بيخلّصوا wst::

أنا عن نفسي ، دماغ الأغاني دي ممكن تعيّشني في دنيا تانية! :lol:

أنا مرة أيّام الخطوبة هند كانت بتكلّمني ع الموبايل ، وانا سايئ العربية ، أولتلها طيب سلام دلوأتي وهاكلّمك كمان شويّة! :blush2:

البنت توقّعت إني داخل على حتة لبش ومش عاوز مشاكل مع المرور. :blush2:

لمّا كلّمتها بعد 5 دئايئ بتسألني كان فيه إيه؟ أولتلها كان فيه أغنية أواخر الشتا بتاعت إليسا على نجوم إف إم (كانت لسّة جديدة ساعتها) :closedeyes:

[kaplan]

الاخ تورنتو

ياريت بعد اذنك تكتب والله مش واللهى عشان ده غلط بعد اذنك

التهامى باشا

والله ياريس انا لسه بحضر لل USMLE المفروض ان شاء الله ابدأ من اخر الشهر ده

ولو ان من ساعه مادخلت المنتدى هنا ودماغى بدأت تاكلنى على كندا بسببك انت ةالشامى باشا وهشام باشا مع حفظ الالقاب