كندا التي رأيتها :)

[moheltohamy]

نسيت اقوللكو ع البلان بتاع الزيارة اللي جايّة لكندا...

كنت ناوي أخلّيها في ديسمبر ويناير (كانت تبقى فرصة واشوف د. الشامي) ، لكن اتلخبطت عشان مشوار الحج طبعاً ، وبعده 3 أسابيع أجازة ؛ يعني آخري كان هيبقى أسبوعين في كندا... شكراً!

أولت خلاص نطلع بأه يوم 1 فبراير من مصر (كده كده الشركة بتجيبلي تذكرة الطيران لمصر) ، وأرجع قبل ميعاد سفري من مصر... طبعاً عدّلت ميعاد السفر 2 فبراير (عشان اخواننا اياهم ومفاجآتهم في المطار ما تتضمنش ، ومنها ألحق أطلّع تصريح السفر من شئون الظباط) ، والعودة هتكون يوم الحد 22 فبراير (يكون يوم أجازة وديبو ييجي يوصّلني فيه للمطار). وكانت التكلفة 980 دولار (ماهي خطوط الطيران الأمريكية وقصّة فيزا الترانزيت دي كمان... مش ناءصة وجع قلب هيّه!)

وبعد المشوار بتاع المرة اللي فاتت في جوازات المطار ، وعشان نخلص من مشوار تصريح السفر ، أولت ما تبُصّلك بصّة يابو سعد على التذكرة من الدمّام وناخد فكرة ، مش هتخسّر... وكانت المفاجأة الآتية:

بقى يا عالم من الدمّام لتورونتو أرخص من القاهرة لتورونتو؟! وما تسألش ازّاي! إحنا لينا أكل ولاّ بحلقة؟ ناخدها من سُكات وسكمم بُكمم :wub:

يبقى كده وفرتلي بتاع ميتين دولار ، وقضّيت 5 تيّام زيادة في كندا ، واشتريت دماغي من احتمال غلاسة اصحابنا ايّاهم...

وآدي تفاصيل الرحلة اللي حجزتها:

كده بأه لوووز أوي... وجبت معايا شنط السفر بتاعت كندا ، وسبتهم في أمانات الفندق بتاعنا ف الخُبر. ومن برّه برّه يا ريّس واشتري دماغك...

لأ واللذيذ إني كده وفرت ع الشركة بتاعتي تمن التذكرة لمصر ذهاب وعودة ؛ وبُناءً عليه ، ومن مُنطَلَق إن الحدّاية - أنا - مش بترمّي كتاكيت ؛ فلسّه حالاً مكلّم الـ Rig Manager (المشرف العام ع البريمة - راجل نيوزيلندي سُكّرة وبيعزّني مووووت) ، وآللي أبعتلُه ميل بالتفاصيل وهوّه هيحاول يساعدني ؛ يا هيتكفلوا بكامل تمن التذكرة ، يا هيدفعولي تمن التذكرة ذهاب وعودة لمصر (بتاع 500 دولار) أقل واجب. ولما أولتلُه (آت ليست آم نوت جوينج تو جِت زيرو ) ، قعد يدحك دحك wst::

شفت يا عم حسيني... فاكر لما كنت بتستغرب من الرقم بتاع تذكرة المرة اللي فاتت؟! الـ 843 دولار ، وبتئوللي مش لائيهم خالص؟!

دا اللذيذ بأه إن فيه تذكرة من مصر طلعت أرخص من كده كمان ، بس يغور السفر من مصر (السفر من هنا أشتري بيه دماغي ، وموفر 500 دولار كمان)...

وإكسبيديا ما بتكدبش :flr1: ... أي خدمة :blush2:

[kaplan]

ابقى جرب الموقع ده يادكتور

http://www.vayama.com/jsp/home/home.jsp

ساعات كتير بيجيب اسعار ارخص من الاكسبيديا

[SoSo R]

نسيت اقوللكو ع البلان بتاع الزيارة اللي جايّة لكندا...

كنت ناوي أخلّيها في ديسمبر ويناير (كانت تبقى فرصة واشوف د. الشامي) ، لكن اتلخبطت عشان مشوار الحج طبعاً ، وبعده 3 أسابيع أجازة ؛ يعني آخري كان هيبقى أسبوعين في كندا... شكراً!

أولت خلاص نطلع بأه يوم 1 فبراير من مصر (كده كده الشركة بتجيبلي تذكرة الطيران لمصر) ، وأرجع قبل ميعاد سفري من مصر... طبعاً عدّلت ميعاد السفر 2 فبراير (عشان اخواننا اياهم ومفاجآتهم في المطار ما تتضمنش ، ومنها ألحق أطلّع تصريح السفر من شئون الظباط) ، والعودة هتكون يوم الحد 22 فبراير (يكون يوم أجازة وديبو ييجي يوصّلني فيه للمطار). وكانت التكلفة 980 دولار (ماهي خطوط الطيران الأمريكية وقصّة فيزا الترانزيت دي كمان... مش ناءصة وجع قلب هيّه!)

وبعد المشوار بتاع المرة اللي فاتت في جوازات المطار ، وعشان نخلص من مشوار تصريح السفر ، أولت ما تبُصّلك بصّة يابو سعد على التذكرة من الدمّام وناخد فكرة ، مش هتخسّر... وكانت المفاجأة الآتية:

بقى يا عالم من الدمّام لتورونتو أرخص من القاهرة لتورونتو؟! وما تسألش ازّاي! إحنا لينا أكل ولاّ بحلقة؟ ناخدها من سُكات وسكمم بُكمم

يبقى كده وفرتلي بتاع ميتين دولار ، وقضّيت 5 تيّام زيادة في كندا ، واشتريت دماغي من احتمال غلاسة اصحابنا ايّاهم...

وآدي تفاصيل الرحلة اللي حجزتها:

كده بأه لوووز أوي... وجبت معايا شنط السفر بتاعت كندا ، وسبتهم في أمانات الفندق بتاعنا ف الخُبر. ومن برّه برّه يا ريّس واشتري دماغك...

لأ واللذيذ إني كده وفرت ع الشركة بتاعتي تمن التذكرة لمصر ذهاب وعودة ؛ وبُناءً عليه ، ومن مُنطَلَق إن الحدّاية - أنا - مش بترمّي كتاكيت ؛ فلسّه حالاً مكلّم الـ Rig Manager (المشرف العام ع البريمة - راجل نيوزيلندي سُكّرة وبيعزّني مووووت) ، وآللي أبعتلُه ميل بالتفاصيل وهوّه هيحاول يساعدني ؛ يا هيتكفلوا بكامل تمن التذكرة ، يا هيدفعولي تمن التذكرة ذهاب وعودة لمصر (بتاع 500 دولار) أقل واجب. ولما أولتلُه (آت ليست آم نوت جوينج تو جِت زيرو ) ، قعد يدحك دحك :lol:

شفت يا عم حسيني... فاكر لما كنت بتستغرب من الرقم بتاع تذكرة المرة اللي فاتت؟! الـ 843 دولار ، وبتئوللي مش لائيهم خالص؟!

دا اللذيذ بأه إن فيه تذكرة من مصر طلعت أرخص من كده كمان ، بس يغور السفر من مصر (السفر من هنا أشتري بيه دماغي ، وموفر 500 دولار كمان)...

وإكسبيديا ما بتكدبش :) ... أي خدمة :hearts:

أهو كدة الشغل ........واضح إنك إبتديت تدخل فى الموود و تتألق :wub: إدينى أكتر و إحنا وراك يا زعيم

[moheltohamy]

وانا أقول المنتدى نور لية

الف حمدلى على سلامتك يادكتور تهامى

:lol: :) :wub: :flr1:

ماشاء اللة كل الهاند اوفر بتاعت حضرتك مغامرات

مستنيين باقى المغامرات

ربنا يخلّيكي يا إيناس...

بافرح لما بالاقيكي مشرفاني هنا... تعرفي حاجة...

إسمك - إيناس أحمد - هوّه نفس إسم خالتي (أصغر خالة ليّا وأقرب واحدة لينا ف السن) ، وباحبّها جداً ، وباحب أكلها جداً جداً :wub:

وربّنا يعينني واقدر أكمّل الحواديت... :hearts:

[moheltohamy]

ابقى جرب الموقع ده يادكتور

http://www.vayama.com/jsp/home/home.jsp

ساعات كتير بيجيب اسعار ارخص من الاكسبيديا

أشكرك يا دكترة ع السايت ده ، وإن كان مش أرخص ولا حاجة من إكسبيديا!

وف نفس الوأت لا يعترف بأي كريديت كارد صادر من مصر ، يعني هاضطر أستعمل الفيزا بتاعت TD CanadaTrust ، وانا الصراحة ما احبّش اللي يتتنّك عليّا :wub:

عموماً ... أشكرك مرّة تانية :hearts:

تم تعديل 4 يناير 2009 بواسطة moheltohamy

[moheltohamy]

طالما د. الشامي هنا... يبقى هاستنى يقوللنا دفع كام في السفرية اللي فاتت دي؟

والتفاصيل ممكن يحكيهالنا في التوبيك بعدين لمّا يوصل...

أولت إيه يا عمّنا؟ :hearts:

[Torontotruk]

يا جماعة كلام عمو الحاج تهامي علي عيني وعلي راسي لكن انا ماشفتش اى حاجة من اللي بيقولها في تورونتو ...مش عارف هو بيكلم عن كندا اللي انا عايش فيها ولا بلد تانية مش موجودة علي الخريطة اصلاا...بخصوص الطوابير اللي بيكلم عليها هي فعلاا موجودة لكن ممكن تبقي واقف تلاقي راجل او بنت جت وقفت اودامك فجأة ...ممكن تلاقي راجل ضربك كتف غير قانوني وانت خارج او داخل الصابواى من غير حتي ما يبصلك ...علاوة علي الروائح الكريهة المنبعثة من الركاب ...طبعا شئ متوقع من بلد كلها مهاجرين...عادات و ثقافات مختلفة..

[moheltohamy]

يا جماعة كلام عمو الحاج تهامي علي عيني وعلي راسي لكن انا ماشفتش اى حاجة من اللي بيقولها في تورونتو ...مش عارف هو بيكلم عن كندا اللي انا عايش فيها ولا بلد تانية مش موجودة علي الخريطة اصلاا...بخصوص الطوابير اللي بيكلم عليها هي فعلاا موجودة لكن ممكن تبقي واقف تلاقي راجل او بنت جت وقفت اودامك فجأة ...ممكن تلاقي راجل ضربك كتف غير قانوني وانت خارج او داخل الصابواى من غير حتي ما يبصلك ...علاوة علي الروائح الكريهة المنبعثة من الركاب ...طبعا شئ متوقع من بلد كلها مهاجرين...عادات و ثقافات مختلفة..

لا لا لا... لا وألف لا...

تغلط في كندا لأ...

يا عم الحاج الكيبيكاوي العميل... بأي صفة بتتكلّم عن بلدنا الحبيبة تورونتو ، ومقاطعتنا الجميلة أونتاريو؟! :wub:

اللي حصل معايا إني لا شمّيت ريحة ولا اتخبطت كتف قانوني ولا غير قانوني! وعُمر ما في حد تجرّأ وجه وئف أدّامي في الطابور (كنت كلتُه)...

دي هند لما راحت فرنسا ، وحصل معاها في مطار شارل دي جول إن واحد لطخ جه وئف أدّامها ؛ دخلت فيه شمال ومسحت بكرامته الأرض ، وقعدت تتحسّر على الاحترام والأدب والرقي في تورونتو!

طيب أحكيلك موقف لسّه هند حاكياهولي من ساعتين ع التليفون... الهانم كانت نازلة أدّام البيت من عربيّت مديرتها الرومانية ف الشغل اللي بتوصّلها رايح جاي...

الهانم - ف الطراوة - بتفتح الباب من غير ما تبص مين جاي وراها ، وفجأة كانت واحدة ست سايئة العجلة بتاعتها كانت هتلبس في الباب ، وربنا ستر (Near Miss في عرف الأمن الصناعي).

الست دخلت فيها شمال وحوار طويل هند ما لقطتش منه غير كلمة ---F ، وبعدها آلتلها إنتي عاوزة إيه دلوأتي؟ والتانية تئوللها تعتذريلي ، وهند تئوللها (مانتي لسّه عايشة آهوه ما موتتيش!) ، والتانية تئوللها بس انتي الغلطانة والمفروض تعتذري ، وهند ترد بكل برود (Go to Hell) ، وسابتها ومشيت وعدّت الشارع!

لكن يبقى هذا موقف فردي ، وهوّه الاستثناء للقاعدة... القاعدة اللي شفتها أنا و د. الشامي وإيهاب سالم ود. هشام وآينشتاين...

دعواتي لك بأن تراها كما رأيتها ، أو تعيش في بلد غيرها... تراها كما تتمنى! :hearts:

تم تعديل 4 يناير 2009 بواسطة moheltohamy

[moheltohamy]

حمدللة على السلامة مسيو تهامى نورت بكلماتك الجميلة

الله يسلّمك يا جيسيكا...

ويسعدني تجمّع الشمل تاني مع كل حبايبنا بتوع زمان (أيام ما كنت مواطن شريف )

[precanadian]

غيابك يا دكتور محمد بيبين حب الاعضاء ليك . الاعضاء الي بيحبوا يسمعوك ووجودك بيلم الاعضاء والناس بتسجل علشان تشوف مداخلاتك . في ناس كتير عايزه تسمعك انت والدكتور الشامي والدكتور هشام والدكتور قناوي والمهندس ياسر والمهندس ايهاب. لكن في ناس تانيه مش عارف عيزه تكسر قلمك. كندا التي رأيتها هي وجه نظرك من اراد سماعها اهلا وسهلا ومن لم يرد ذلك فليهتم بامره ويبحث عن شئ يشغله. يبدو ان الفراغ مدمر عند بعض الناس . اختلفنا معك او اتفقنا كثير يحبون اسوبك في الكتابه ولا ادري لماذا يحاول البعض كسر ذلك القلم. هل هو اختلاف ام مرض نفسي.

[qenawy]

اخي الفاضل بريكاناديان

الاختلاف في الراي لا يفسد للود قضية

واكيد احترام الراي الاخر يعني قبولك بالراي المضاد لك وليس الراي الذي يعجبني ويعجبك

فصدقني ان شاء الله ما فيش حاجة مقصودة خالص وانا متاكد

وحلو الكارت ملعوب

FREE HUGS FOR ALL

[moheltohamy]

أنا والله ساعات باستغرب م اللي بيتكتب يا دكتور!

بس ما زلت شايف إن كل واحد برضه حر في رأيه ، وإن كان أسلوب التعليق ساعات بيكون حاد وهجومي في بعض الأحيان

ممكن نعتبره عمل أدبي ، أو قعدة على مصطبة في ليلة صيف ، بندردش مع بعض شوية... بنهيّس شويّتين... مش محتاجة الحمقة اللي ساعات باشوفها دي كلها! :wub:

ربنا يهدّي النفوس :hearts:

[ناوية ع الهجرة]

أنا عرفت الاستاذ تورنتو زعلان ليه؟ هو مش معترض على فكرة الهجرة لكندا والدليل أنه الفترة اللي فاتت كان بيساعد الناس وفتح توبيك مخصوص للمحامين وبصراحة مش بيبخل على أي حد بمعلومة هو عرفها

لكن هو مش عايز حد يقول أن كندا حلوة وأن الناس هناك محترمين والحياة جميلة ......

هجرة اوكي لكن كندا حلوة لا والف لأ phn:

بس المشكلة يا استاذ تورنتو أن الناس هنا بتفكر في الهجرة وكل واحد عندهاسبابه الشخصية( اللي هو مقتنع بيها) فشئ طبيعي أني لما أكون رايحة مكان جديد عايزة اسمع كلام مشجع

يعني مثلا لما اقولك أن انا النهاردة خارجة ضروري علشان اشتري طلبات للبيت

وبعدين سمعت النشرة الجوية من اكتر من قناة وعرفت أن الجو صحو وبديع وبعدين سمعت على قناة ان الجو ممطر ورعد وبرق وعواصف

اكيد هضايق لأني كده كده هخرج ولا أيه؟؟؟؟؟؟؟؟؟؟؟؟ :) :harp:

[ahmedmustafamarey]

حمد الله عالسلامة يا دكتور تهامي

والله كنت واحشنا طول الفترة دي

انا عضو قديم في القهوة من حوالي 30 صفحة كده بس مش بشارك قد كده عشان الدراسة

ومستنيين الهاند الاوفرز الجديدة على احر من الفاير :)

[ssmaly]

الدكتور كبير القهوة دى

انت السبب فى الادمان اللى انا فيه

انا كنت مستقيم و ماشى جنب الحيط لغاية مما فتحت التوبك بتاعك (وسوسة شيطان) ودى كانت اول شمة وخدت اول خط ومن بعدها ادمت المحاوارات وقرات التويك كله

وكنت بفتحت المحاوارات علشان اشم شمة من التويك بتاعك

و سيادتك روحت وسافرت و بطلت كتاية

كانت حالتى صعبة و اعراض الادمان كلها من هرش وزغللة عين

عاوز شمة فكرت ابيع الابتوب علشان اشترى اى جرعة

دورت فى المحاوارت احاول اشم اى شمة مافيش فايدة كل الناس بتتخانق ومش طايقة بعض

واحد مع حماس واحد ضد جماس

واحد مع السياسة المصرية واحد ضدها

الألذ من كدة كل واحد عاوز يفرض رأيه بالعافية ويجعل الأخر يخر صريعا و يستسلم راكعا مقرا بانه كان على باطل ويطلب السماح منه

الألذ اكتر هنا اجد خلال سيمفونية الموسيقار التهامى وهو يعزف و الاصوات التى تحيه وتقول الله الاقى صوت يقول كندا وحشة

الدكتور يقول قصة الصوت يقول لامحصلش

بيفكرنى بمشهد محمد صبحى لما كان ماسك الراجل الصغنن و شايله شيل والتانى بيقوله متقدرش

بالنسة لكل بلد هناك اماكن تقال عليها قاع المدينة فيها المخدرات والدعارة والمقامرات ومقامرون ومدمون وصيع

ولكن باقى البلد هى اللى ممكن نعيش فيها او نزورها يعنى مش لازم نروح قاع الدينة وبعد كدة نقول البد دى وحشة

يعنى مش لازم نيجى عند القرد ونشمه

شوف انا بدات بشم ايه وصلت لشم ايه يا دكتور

تحية لك ياعمدة بدرجة دكتور bv:-

تم تعديل 7 يناير 2009 بواسطة ssmaly

[hcanada]

حمد الله ع السلامه يادكتور تهامى

وحشتنا كتير

على فكره انا كنت بعت لك استفسار عن موضوع مهم جدا بس كان ع المنتدى التانى

لو ممكن تجاوبنى عليه يباى شكرااا

كمان كنت عايز اسالك هوه انت نازل مصر قريب؟؟؟

تم تعديل 7 يناير 2009 بواسطة hcanada

[somayasaleh]

د. بريكانيديان... تعيش وتنوّرني يا أمير (يعني راجل محترم وكويّس مش حاجة تانية!) wst::

جيمي...

هوّه إنتا نوّرتني طبعاً ، بس أنا أحب أتعرّف بيك أولاً وأبو كحة صاحبك ده يمكن يحتاج علاج... بيتهيّألي إنتو حصل معاكو تشابه أسماء... مش انا! :lol:

كابلان...

شكراً على ترحيبك ، وان جيت للحق أنا أدّامي 3 هاند أوفرز أشتغل فيهم ؛ بتاع كندا ، وبتاع جنوب أفريقيا وبتاع الحج... مش عارف هالائي وأت ليهم ولاّ لأ!

إنتا مقدّم في الـ USMLE ولا إيه حكاية كابلان دي؟!

باشمهندسة سمية...

كل غيبة وانتي طيبة ، بآلي زمان ما شفتكيش! منتظر أخبار عنك وعن الفايل بتاعك... فيه أي جديد؟!

أم ريهام...

وانتي طيبة وبخير دايماً انتي والأسرة كلها ، وتمنياتي بعام أجمل وأسعد عليكي انتي كمان يا رب ، ويسمع من بؤك ربنا

فرعون...

هوّه إسم يخض شويّة ، بس الله يسلّمك ، ونوّرتنا في التوبيك :Laie:

باشمهندس ياسر...

الله يسلّمك يا ريّس ، وتمنياتي لك بتطورات سعيدة وعاطفية :h!!!h:

كوت كوت...

شوك شوك شوك شوك راً يا كوت كوت كوت كوت

دكتورنا المحبوب ابو دم خفيف

يسعد الله صباحك(اذا كان صباح)او مساءك (اذا كان مساء

انا متابعة التوبك بتاع حضرتك علي طول...... بس لما غبت علينا انا كمان انشغلت

شكرا علي السوال والاهتمام

وصلنا ايميل السفارة وطلبين الاوراق في خلال شهر وربنا يسهل

اكمل يا دوك ومتاعنا بحكاوي القهاوي

[moheltohamy]

أنا موجود آهوه وباثبت حضور ، وما زلت شغال في الهاند أوفر ؛ بس الريتم بتاعي بطيئ الصراحة...

ننزّل حتة كده خلّصتها ، وبعدين نرد ع الناس اللي ف الخناءة :h!!!h:

[moheltohamy]

هتلاحظ برضه في كندا ثقافة القراءة ... الله يمسيها بالخير ماما سوزان... طلعت عينيها عشان تعوّد العيال على القراءة ، ولا الهوا! هتلاقي ناس ماسكين في إيديهم كتب في كل مكان ؛ في الصابواي ، والأتوبيس (سواء الناس آعدة أو واءفة أو ع المحطة مستنيين الأتوبيس او الصابواي يوصل) ، وممكن الجناين والمطاعم ، وآخرها – على ما سمعت من هند – الناس بقوا بيمشوا ف الشارع وماسكين في إيديهم كتب بيقروا منها وهُما ماشيين! خلاص؟ هيّه حبكت يا حفيظة؟! :Laie:

وطبعاً لو دخلت أي مكتبة (Bookstore يعني) ، هتلاقي فيها ناس زي الرز ، وكذا دور (زي اللي ف المول اللي أدّام البيت مثلاً) ، وفيها كراسي وترابيزات عشان تؤعُد تتصفّح الكتاب اللي بتفكّر تشتريه ؛ إن شللا حتى تؤعُد تئراه كلّه ؛ محدّش هيئوللك إنتا بتعمل إيه!

وثقافة تانية غريبة الصراحة... ثقافة مش عاوز اقعد! تلائي الصابواي فاضي وأماكن بالعبيط ، وناس وائفين ف الطُرأة! ناس كبار وشباب وعواجيز ، وعاااادي جداً ؛ سايبين الكراسي فاضية و وائفين! أنا يابو حميد ياخويا ائول يمكن نازلين المحطّة اللي جايّة ؛ والائي اللي جايّة واللي بعدها واللي بعد بعدها يعدّوا ، ودول ولا في دماغهم الكرسي من أساسه ، وعاااادي برضه! يمكن بيتعاملوا بمبدأ (أنا مش تَعبان ؛ أقعد ليه؟!)

نقارن ده مثلاً بآخر مرة كنت في مصر ؛ وراكب المترو من محطة كلّية الزراعة... كنّا آعدين 4 ع الكنبة بتاعت المترو (أنا وراجل تاني وست ومعاها ابنها الصغيّر آعد جمبها)... بعد محطة ولاّ 2 ألائي واحد أدّي مرتين جاي وداخل عليّا ، والمفروض أوسّعلُه عشان يتلقّح يؤعُد! لما لئيت البيه ما عندوش دم وهيؤعُد يعني هيؤعُد ؛ أومت وسبتلُه مكاني!

موقف تاني في نفس المشوار... 4 آعدين على كنبة المترو (اللي المفروض أصلاً إنها بتشيل 4 بس) 3 رجّالة و بنت ع الطرف. واحد شحطٌ كبيرٌ وائف أدّام الكنبة دي ، آم واحد م اللي آعدين داخل ع البائيين زانئهم عشان البيه اللي وائف يؤعُد خامس ؛ ساعتها البنت سابتلهم الكنبة كلّها يشبعوا بيها وآمت وئفت ؛ رأفةً بحالها من الزنقة والوضع الزبالة اللي عمله البيه الحنيّن!

ما اعرفش إيه الحنّية السافلة اللي عندنا دي! ساعات باحس إنها مبالغة مالهاش أي داعي ، وساعات تانية باحس إنها إللت أدب! :ok:

كلّمتك من شويّة عن ثقافة إزازة الميّه اللي شايلينها معانا ف الشنطة ؛ واللي شفتها لأوّل مرة مع كارولين في مصر! لاحظت برضه مع كارولين حاجة تانية... الهالم شايلالي كيس بلاستيك صغيّر عشان لو هترمي حاجة ومفيش جمبها باسكيت زبالة ترميها ف الكيس لغايت ما تعدّي على باسكيت! مش محتاج ائول إن باسكيتات الزبالة في كندا هتلائيها كل 100 – 500 متر (حسب المكان)! وللأمانة... لمّا كنّا بنتفسّح في مصر القديمة ؛ جبنا لب أسمر نأزأز فيه هناك واحنا ماشيين ، والهانم دي لايصة بقشر اللب! إيه اللي انتي بتعمليه ده يا هانم؟ يعني من نضافة المنظر اللي حواليكي أوي خايفة توسّخيه؟ اللب ده يتأزأز ، وتتفتفي طول مانتي ماشية كيداهوه

لكن الصراحة يابو حميد أنا نفسي – ف المعتاد – باتكسف أرمي حاجة ع الأرض ف الشارع... :h!!!h: آه والله ، مش باعملهم عليك خالص! يعني مثلاً وانا خارج من ميت غمر بالعربية في طريقي لمدينة نصر (أيام ما كنا ساكنين هناك قبل مشوار كندا ده) ، كنت دايماً آجي جمب باسكيت الزبالة الكبير اللي قبل ما أخرج من ميت غمر (عند المصنع كده) وأءف جمبه وافتح الإزاز وارمي كيس السندوتشات أو الورق السيلوفان بتاع الشوكولاتات وكان البيبسي الفاضية جوّه السندوء ده. طبعاً مش محتاج ائوللك ع الكلاكسات اللي شغّالة ورايا عشان جيت وئفت جمب السندوء (اللي محطوط في وسط الشارع) ، وعطّلت البهوات اللي ورايا كلّهم! طبعاً لو كنت حدفته م الإزاز وانا ماشي عُمري ما كنت هاسمع كلاكس واحد ، ولا كان فيه حد هيعترض! نظام... دي زبالة يا جاهل! (وش الإعلان بتاع يونس شلبي الله يرحمه بتاع زمان. فاكره؟)

ومرّة وانا في بنزينة أثناء ما العربية بتموّن نزلت مسحت إزاز العربية بكام منديل كلينكس ، وبعد كده أبُص حواليّا... مفيش أي باسكيت أرمي فيها المناديل دي! أسأل الواد بتاع البنزينة اللي هناك (أرمي دول فين؟ مش شايف أي باسكيت زبالة هنا!) ، والواد ياخويا يبُصّلي نظرة غريبة ، ويئوللي ماترمي يا بيه في أي حتة!

ومرّة ألائي واحد غبي كان ماشي بعربيتة أدّامي في شارع جامعة الدول والائيه يحدف بيبسي كان في نُص الشارع (آه والله في وسط الشارع)!

ولو ترجع بالذاكرة لبدايات إنشاء المترو في مصر ، والعسكري اللي موجود في كل طرقة ؛ يعني مستحيل تكون في مكان في ممرات المترو ومفيش عسكري شايفك! وطبعاً كانت الغرامة 10 جنيه فوريّة! وبخلاف كده ، أنا ما كانش بيهون عليّا أرمي ورئت السيلوفان بتاعت البومبوني ع الأرض مثلاً ، إحساسي إني هاكون أول واحد يبهدل الدنيا!

تعالى شوف الوضع دلوأتي... وانا وائف مرة على رصيف المترو ، والائي حيوان بيرمي زبالة ، وفين؟ على شريط المترو نفسه! (شريط المترو بالمناسبة في طريقه ليكون مقلب زبالة!) ، والممتع إن مفيش حد من الموجودين استنكر الوضع ؛ ولا حتى بينُه وبين نفسه! أنا اللي فضلت أبص للمهزّأ ده بكل كراهية!

وعلى ذكر موضوع رمي الزبالة في أي مكان منخفض ، والحاجات اللي بتتئلب مألب زبالة... الموضوع ده بيفكّرني بالنيل وميّتُه. هاكلّمك عنّه بعد شويّه.

موقف تاني لواحد مُهزّأ في الصابواي في تورونتو... البيه ، بعد ما خلص الساندويتش وكوباية الكولا ، حطهم في الكيس الورق بتاع ماكدونالدز ، وحط الكيس جمب الكرسي اللي قاعد عليه ف الصابواي (المترو)! ومع إن الراجل دوكهوة كان نظام الشعر الأصفر والعينين الزُرء! بس الحركات الأرعة دي أنا احنا عارفينها ، وياما عملناها أبلُه ، وفضلت مستنّيه! ونزل معايا نفس المحطة ، وحت أولتله (Sir, you forgot your bag) ، آللي (What bag?) أولتله (McDonald's bag)! بص للكيس ، وبصّلي وطنش ومشي! وكان نفسي أشده من قفاه ، وع البوليس! وطول مانا ماشي ف الصابواي تحت عمّال أبُص حواليّا على أمل أعتر في أوفيسَر بوليس كنت هاهبش ف الراجل الواطي ده ، و (يا عسكري)! ماهي الأشكال الوسخة دي هيه اللي مبوظالنا بلدنا! جتكو البلاوي مليتو البلد!

وعلى ذكر باسكيت الزبالة... البتاع ده مش جردل متعلّق ع العامود ، أو سندوء كبير زي ما بنشوف في بلدنا الغالية... ده بوكس معدني محترم فيه 3 فتحات ؛ واحدة للورق (مجلاّت وجرايد وكده) والتانية للأزايز (إزاز وبلاستيك وكانز) والتالتة للـــ لِتَر فقط (الـــ Litter اللي هوّه الفرش اللي بتحُطُّه للقطط عشان يعمل الحمام بتاعه فيه ؛ زي ما كُنّا بنعمل مع نوسي wst:: )

وآدي صورة سندوء الزبالة في تورونتو:

حاجة تانية لاحظتها ودايئتني موووت... في عربيّات الصابواي الصبح ؛ تدخل تلائي كومة جرايد من أبو بلاش دي ؛ من أمثال Now و 24 و Metro ، تاخدلك نسخة وتروح تؤعد على كرسي وتئرا. اللذيذ إن فيه كتير بيئوموا وينزلوا محطتهم ويسيبوها ع الكرسي ، الهوا يطيّرها أو تؤع ع الأرض بأه ؛ مالناش دعوة! المنظر بجد يزعّل! وف مرّة تانية لئيت الست اللي وظيفتها تنضّف عربيّات المترو داخلة تلم في الجرايد دي! والله زعلت عليها :lol:

[pharaon]

تسجيل متابعة

وكمان تسجيل اعجاب :h!!!h: