كندا التي رأيتها :)

[moheltohamy]

عايزين رأي اهل الخبرة

و معلش يا دكتور تهامي و متستغربش تاني

لما اطلع ان شاء الله اروح كالجري ولا ادمونتون؟؟؟

الناس اللي عندها معللومات عن المناطق دي يا ريت يفيدونا لان انا سمعت ان ادمونتون هي عاصمة البرتا

لكن كالجري اكبر و هي ثاني اكبر مدينة في كندا و ثاني اكبر مدينه من حيث الخدمات و الاداريات

هل الكلام ده صحيح؟؟؟؟

تاعبنا معاك يا حسيني... دايماً مدخل مواضيع في مواضيع!

لسه مكلم لك واحد صاحبي عايش في إدمونتون بقاله 4 سنين ، وبيحبها جداً. بس الراجل ما عندوش فكرة كبيرة عن كالجاري بصراحة. بس قال لي شوية معلومات...

كالجاري ولا تاني أكبر مدينة ولا بتاع! أكبر مدينة هيه تورونتو. كالجاري زي أوتاوا كده ، مدينة كبيرة وخلاص ، لكن بيسمع إن فيها نسبة كبيرة من العرب.

بص كده لو يفرق معاك الترتيب بين المدن الكندية حسب المساحة والسكان.

تكملةً لكلام الراجل...

كالجاري الحياة فيها أغلي من إدمونتون بشوية صغيرين ، والاتنين أغلي بصفة عامة من معظم كندا! ممكن يبقى معاك نص مليون دولار ، ومش عارف تشتريلك بيت. :wub:

إدمونتون فيها حياة شوية عن كالجاري. وبصفة عامة هتلاقي كالجاري أدفأ من إدمونتون في الشتا ، ولو إنها مش فارقة كتير ... اللي هيصبرك على -30 يصبرك على -40! wst:: (من عندي أنا الحتة دي!)

وعموماً فيه ناس بتفضل كالجاري ، وفيه ناس بتفضل إدمونتون. وقال لي خللي صاحبك ييجي بنفسه ويجرب ، والبلد اللي يرتاح فيها يستقر فيها! مفيش حاجة إسمها حد يقرر له! ما قدرتش أسأله أكتر من كده الصراحة ... الراجل لسه راجع من مصر ؛ والده توفي من أسبوعين!

عموماً ... إنتا كده ولا كده مفيش معاك نص مليون دولار ، ولا هتشتري بيت من أول أسبوع هتدخل فيه كندا!

وعموماً ، السرّيحة بتوعي بيلفّولك ف البلد (ألبرتا عموماً) وربنا يسهل واجيب لك شوية آراء تانية قريباً :P

بس الله يكرمك ، خلينا نركز بقى ف أكل عيشنا ... :lol:

[hosiny]

ش عارف اقولك ايه والله يا دوك

علي طول بتحرجنا بذوقك و سرعة ردودك و اهتمامك حتى من قبل مت تفتح الموضوع بتاعك ده و برده مكنتش بتتأخر عليا في الردود

ربنا يكرمك ان شاء الله

معلش انا استغليت الموضوع بتاعك و سألت سؤالي ده لان موضوع هو حديث الساعة اليومين دول في المنتدى ومعظم الناس بتخشه

فانا قلت يا واد ياحمد خلينا نشوف رأيهم ايه.....بس انت مقصرتش بصراحة

بالنسبة لموضوع ان كالجري ثاني اكبر مدينة انا جبته من علي النت و النص بالضبط اهو

http://images.search.yahoo.com/images/view...l&tt=252467

Calgary in figures

Calgary is the second largest municipality in Canada with a total area of 721 square kilometres (278.54 sq mi)

Calgary has a population of 951,395 (Census 2002).

Calgary has an elevation of 1,048 metres (3,440 feet) above sea level.

Calgary is the largest city of Alberta.

Calgary is the second largest head-office city in Canada

[moheltohamy]

ايه يا عم الجمال و الروعة دي كلها

ازاي انا مدخلتش الموضوع ده قبل كده

تسجيل دخول ومتابعة و اعجاب بدكتورنا الغالي التهامي

من اول الموضوع مقدرتش اسيبة لحد ما خلصته

بصراحة يستاهل يتثبت فورا :blush2:

مش بس علشان المعلومات المفيدة

علشان الاسلوب المتميز و الجذاب

وخاصة اللغة السهلة ( الشيعبيعة ) اللي زي العسل دي

يعني بعد موضوعك و موضوع دكتور الشامي

الواحد يلم نفسه و يبطل كتابة :blink:

ربنا يخليك يا أينشتين باشا ...

بجد فرحت أوي لما شفتك معايا هنا. ويا رب تفضل معانا دايماً ، ولو من وقت للتاني.

خلاص انتا تسلّمت الراية ورافعها لوحدك في بلاد الفرنجة! تحمل مسئوليتها يا ريس wst::

بالمناسبة وقعت يا عم مرة مع واحدة من دول

مش هتكلم عن جمالها و جاذبتها و حلاوتها

انا بس هقولك من رقتها وهي بتكلمني كنت خايف كلامي يكسر فيها حاجة :lol:

وفعلا صدق عمنا الشاعر نزار قباني لما قال

فالصمت في حرم الجمال جمال

ومفيش داعي برضة اقول اني افتركت فيلم اللي بالي بالك في موقف اكيد عارفه smk:

الكلمة دي حسيت بيها قوي الصراحة ... فكرة الكائنات البسكويت اللي نسيناها من زمان :wub:

يا باشا دول عدّو المرحلة دي خلاص ، ومش ناقصهم ولا فولت! دول منوّرين أورّيدي

اللي تفتكره فعلاً بأه موقف محمد هنيدي في همام في أمستردام ، وكلامه عن الصندل ................. :lol:

وتعرف ... واحنا ف الطابور ، أقول لنفسي : آه لو بختنا يطلع مع الصاروخ ده! هيه اللي فيهم بصراحة :wub:

وربنا ما سابش في نفسي حاجة بصراحة :lol:

[moheltohamy]

أكلمك سريعاً كده عن تاني مرة رحت فيها على كندا...

تاني مرة كنت انا هنا ف البريمة ف السعودية ، وكان احمد الديب في مصر أيامها. البيه كان نازل يدوّر على عروسة! أسوأ أسلوب في نظري للإرتباط بشريك العمر! مش موضوعنا حالياً...

كان أحمد نصحني : لما تختار يوم تيجي فيه على كندا ؛ حاول تنقي يوم في آخر الأسبوع (سبت أو حد) ؛ عشان لو حد عاوز ييجي يستقبلك ف المطار ؛ وقته يسمح له إنو يجيلك.حاضر يابو حميد ... تو بي كونسيدارد!

المهم ، كنت مخطط إني هاسافر يوم السبت 9 فبراير على إير فرانس (925 دولار). وباكلم أحمد أطّمّن على أخباره ؛ عرفت إنه مسافر يوم الحد 10 فبراير على أليتاليا (الخطوط الإيطالية) ... ماشي يا ديبو ... نطلع مع بعض ، وبناقص يوم!

لقيت - طبعاً كله ع الإكسبيديا - إن إير فرانس اليوم ده بـــ (845 دولار) ، وكانت تذكرة أليتاليا فوق الألف دولار! شكراً يا احمد ... مش عاوزينك! :blink: وكنت هاتحرك 2 ص وأحمد 4 ص ، وأحمد هيوصل قبلي بـــ 45 دقيقة كمان! الترانزيت بتاعه كان ساعتين بس في ميلانو ، وانا طبعاً 5 ساعات!

معلش برضه ؛ احنا بنتكلم في 3 ساعات فرق بــ 200 دولار ، يعني ألف جنيه عشان 3 ساعات؟! صباح الدماغ يعني! 3 ساعات قاعدهم ف المطار في باريس! ما ياما اتلطعنا في القاعة المتعددة في كلية الظباط الاحتياط في فايد (مش كنا بنسميها القاعة المتعفنة برضه؟) ، وكان أقصى أملنا يسيبونا ننام شوية؟! وما كناش بناخد لا ميتين دولار ؛ ولا حتى جوز جناهات... كنا بناخد بالجزمة! :blush2:

وكان التظبيط إن هند هتيجي مع محمد حامد بالميني فان بتاعته ، وياخدونا (أنا واحمد) من المطار ، واحمد هيستناني في مطار تورونتو لغاية ما اوصل! وده اللي حصل.

وف تاني مرة دي ... كتبت ف الكارت إياه اللي بنستلمه ع الطيارة إن معايا منتجات ألبان. ولما سألني الراجل بتاع الجوازات ف المطار إيه منتجات الألبان اللي معاك؟ أولتله 4 كيلو جبنة رومي (Romano cheese)! ذاتس ات؟ ييس ذاتس اول! وشكراً!

نسيت أقول لك صحيح ، إن محمد حامد كان نِفسه آخد له معايا من مصر – بخلاف الجبنة الرومي – بسطرمة ولب أسمر! طبعاً منتجات اللحوم إنسى! وكمان بسطرمة ... إنسى خالص! دا الكلب ف المطار هيجيبها وهوه نايم! واللب قلت هاقعد أشرح لهم إنو تسالي ، ومش بذور نباتات يا جماعة ، و وجع قلب! إشتريت دماغي بصراحة.

والغريب إني شفت في سوبر ماركت هناك (دومينيون) عندهم اللب بكافة أشكاله يا ريس... وفيه منه كمان متقشر! بدل ما تقعد تعذب نفسك وتقزقز ... همه بيقزقزوهولك ، وما عليك غير إنك تبلع وتهضم وبس! جيت وانا هنا ف السعودية جمب الفندق بتاعنا ف الخُبر ، محل كبير بتاع تسالي (لب ومكسرات وشوكولاتات ، وبلح وعصاير ... اللأس زي ما بنسميه)... غلطت وسألته (مافيش عندك لب متقشر؟) ، الراجل بصلي حتة بصه يا احمد و (نعم؟!) smk: ... رديت في لحظتها (أنا آسف!)

واللذيذ بأه ، واحنا داخلين على كندا ، ولأول مرة في حياتي أشوف التلج الأبيض! إحساس غير طبيعي... قعدت أصور من الطيارة المناظر اللي تحت دي وانا مذهول! أول مرة أشوف الدنيا بيضااااااه ، وأول مرة أشوف الشجر بلبوص ، وما عليهوش ولا ورأة! زي ما يكون محروء! تحس إنك هتقول (أني يحيي هذه الله بعد موتها)! سبحان الله!

وبعد ما عديت من الجوازات ، وانا مستني الشنط بتاعتي... شفت ظابطة شرطة ، برضه الطعامة المعهودة ... ولابسالي تي شيرت نص كم ، وسبور جداً (حاجة تفتح النفس). ومعاها كلب عسول خالص! وعمالة تدلع في الكلب ، ونظام يللا يا حبيبي نلعب مع الشنط دول ، وتاخده تلف بيه ع السيور المتحركة اللي عليها شنط الركاب ، ولو فيه شنط بره السير ساعات تشيله وتقربه منها ، وهوه يشمشم بس من بعيد ، يمكن السينسورز بتوعه يلقطوا حاجة!

و واخدينها جري ولعب وسط الشنط! أخوك عجبته اللعبة... رحتلها ، وقلتلها يا ترى ممكن آخد صورة للبوبي العسول ده ، ولاّ ممنوع؟! الست زي ما تكون فرحت ، و (تحب أخليه يبص للكاميرا؟!) ، وانا طبعاً (هيبقى أطعم لو بص للكاميرا)... ونظام يلا يا حبيبي بص لعمو ... وشكرتني بعد ما صوّرته!!! :wub:

حاجة افتكرتها استغربت منها وضايقتني بصراحة! المطار الوحيد اللي شفته بيعملها ، أو البلد الوحيدة اللي بتعملها ، كندا...

وانتا ف المطار ، بتحتاج تروللي تحط عليه شنطك عشان تطلع بيها بره المطار. في الدنيا كلها (حسب ما شفت وما سمعت) ، دي من ضمن الخدمات المجانية المقدمة في المطار. هناك في تورونتو ، هتلاقي الترولليهات محطوطين في طابوووور طويل ، وعشان تطلّع لك واحد من أول الصف ؛ لازم تحط 2 دولار ف الماكينة عشان تسحب لك تروللي ، أو تستعمل الكريديت كارد! حتة سافلة بصراحة ، ومالهاش لزوم!

ورحت استلمت الشنط ، وطالع ع البوابة اللي بادخُل بعدها شمال على منطقة الجمارك ، وريت الراجل الأوراق اللي معايا (والله مانا فاكر كان إيه اللي المفروض باوريهوله!) ، ألائي الراجل يقوللي (استريت آهيد) ، أعدّيها؟ طبعاً لأ! أسأله (مش المفروض أعدي ع الجمارك الأول؟) ، يرد (استريت آهيد سير) ، أسأل تاني (نو كاستَمز نيديد؟)! يرد (سير ... يو كان جو آوت!) يعني شوية كمان وكان هيقوللي (البيه غبي ولاّ حاجة؟!!) wst::

المرة دي كنت رايح لوحدي ، وهند هانم موصية مامتها على شوية أوراق وهدوم وشوية هجص كده مالهومش لزوم ، المهم طلباتها دي ملت شنطة ونص ، وسايبالي – كتّر خيرها - نص شنطة (بتاع 8 كجم) أحط فيها هدومي وحاجتي والحاجات اللي محتاجها محمد حامد والهدايا اللي واخدهالها كمان ، وكل ده في نص شنطة ، بخلاف الهاند باج طبعاً! مانا كان آخري وزن الشنطة 23 كجم (الأوفر إياه بتاع 32 كجم ده كان انتهى ، ولو دخلت ف الشريحة اللي بعدها – 23 إلى 32 كجم ، هتدفع 50 يورو!). وزن الشنطة الفاضية أصلاً كان حوالي 6 كجم! الحياة قاسية بصراحة! وخصوصاً ع الرجالة! :lol:

طبعاً كنت باسمع أساطير عن التلج ، والعواصف التلجية هناك ، وانا الوافد من بلاد الشمس المشرقة! وعمري ما شفت حتت تلجاية عتبت بره باب الفريزر بتاعنا! فكان لازم أعمل حسابي للعلقة دي!

كان أحمد في آخر زيارة له لمصر من كندا (من حوالي 4 سنين) كنت طلبت منه يشتريلي چاكيت شيك على ذوقه من هناك. البيه اشترالي جاكيت ، أوعى ، متبطن بالألياف الزجاجية ومنقوخ بدرجة مبالغ فيها ؛ لدرجة إنك ممكن تدخل تنام بيه جوه الفريزر!

أنا فوجئت... يا أحمد مانتا عارف مصر ، فين الصقيع اللي هالبس الجاكيت ده فيه؟ دا أساساً آخرها معانا تمطر مرتين ، ودمتم! وفضل الچاكيت الحزين في الدولاب سنة ورا سنة! قلت بااااااااس يا واد يا چاكيت ، جه يومك ، وهتشتغل!

واللذيذ إن الجاكيت ماركته Fahrenheit ، يعني الراجل اللي عمل درجة الحرارة ، راح بنفسه وعمللي الچاكيت اللي هالبسه!

طيب ، المشكله إن الچاكيت بسلامته هياخد له نص شنطة لوحده! فكان الحل إني ألبسه من مصر عشان أوفر في وزن وحجم الشنط! وقد كان.

طبعاً الجاكيت كنت باخلعه وانا جوه الطيارة طبعاً ، بس مضطر ألبسه ، وانا في المطارات (القاهرة ساعتين قبل الإقلاع – شارل دي جول 5 ساعات الترانزيت – پيرسون تورونتو بتاع ساعة) ، وطبعاً الجو مكيف داخل المطارات ، وافطس انا بقى! :lol:

قابلت أحمد جوه المطار ، كان قاعد مستنيني خارج صالات الوصول ، أول ما شفته قلتله شيل يا عم الچاكيت خنقني! وخرجت بره المطار لأفوجأ وإز فجأتن درجة الحرارة -29 !

يا حلاوة يا عيال! داحنا أقصى ما وصل إليه عمك سيد تلاجة مع فريزر اللحوم في البريمة 92 كان -8 ، وكان مقتنع إن المفروض نعمل له تمثال! وانا خارج بره المطار عشان أشوف عربية محمد حامد وصلت ولا لأ ، وجايب آخري من الچاكت والتكييف الدافي بتاع المطار ، وخارج عاوز نسمة هوا!

اللذيذ إني ما نشفتش أوي أول ما خرجت من المطار ، مع إني خارج بقميص خفيف ، وبالعكس خالص ؛ عجبتني لسعة البرد دي.

المهم ، على ما حوّلنا الشنط جوّه عربية محمد حامد ، كان ابتدا الشغل يا ريس! بدأت أحس بوجع ، وبدأ يزيد بجد في أطراف صوابعي ... Pain بجد! لدرجة ... شوية كمان ، وما كنتش هاقدر أحركهم! :wub: وما صدقت ركبت العربية ؛ ومحمد شغل التدفئة ، بدأت أحس بصوابعي تاني! بس سيبك انتا ... كنت مستمتع موووووت!

وهاكلمك عن خبرتي الثلجية بعدين ... كمان شوية!

وبعد كام يوم ؛ لما مرات محمد حامد قطعت لنا الجبنة الرومي شرايح (عندهم الماكينة دي)... كنت ألآن (قلِق بالفصحى) ؛ إن الجبنة الرومي لو اتسابت شوية بره التلاجة – وأحياناً جوه التلاجة – بتلاقيها بتطلّع زيت ، وطعمها ما بيبآش هوه خالص!

رد محمد حامد عليا رد دمه خفيف شوية : "اللي تخاف عليه حطه ف البلكونة ، وسيبه هناك"! ولا أجدع فريزر يا ريس! :lol:

تم تعديل 22 يوليو 2008 بواسطة moheltohamy

[samehelassad]

ابو تهامي اللزيز اية الروعة دي ياريس داحنا ولا اللي متابع مسلسل ليالي الحلمية. والله انت ممكن تعمل موضوعك دة فيلم سينيمائي وهتلاقية كسر الدنيا

بجد ربنا يحميك ويخليك لينا وتحكيلنا على طول.

ياسلام بقى يابوحميد لو تمخمخ لنا في موضوع نحكي فية في رمضان

[hosiny]

ربنا يوعدنا يا ريس

وكمان طلعت زمل في كلية الضباط الاحتياط في فايد

ده الموضوع كبير بقي......القاعة المتعددة و الركنة اللي فيها كأننا بهايم....والله فكرتني بأيام سودة كنت نسيتها

اسلوب اكثر من رائع يا باشا و كل يوم بتشوقنا زيادة

انا عن نفسي بفضل فاتح الايميل اول مارجع من الشغل علشان نشوف جديدك لحد مانام

[moheltohamy]

ابو تهامي اللزيز اية الروعة دي ياريس داحنا ولا اللي متابع مسلسل ليالي الحلمية. والله انت ممكن تعمل موضوعك دة فيلم سينيمائي وهتلاقية كسر الدنيا

بجد ربنا يحميك ويخليك لينا وتحكيلنا على طول.

ياسلام بقى يابوحميد لو تمخمخ لنا في موضوع نحكي فية في رمضان

ربنا يخليك يا سامح باشا... هوه شكله فعلاً ليالي الحلمية!

طب اعمل إيه؟ أنا بدأت في الهاند أوفر ده من سبتمبر اللي فات! ولو ما كنتش بدأت أنزله ما كانش هيخلص!

دانا أصلاً لسه ما خلصتش كتابته ، بس آدينا بنكتب فيه مع بعض!

وعقبال ما تتزنق انتا الزنقة السودة اللي أنا فيها دي ، وانتا في تورونتو ، وعمال تنجز ف الهاند أوفر بتاعك wst::

وربنا يستر ، و ما يكونش هوه ده المسلسل اللي مستمر لغاية شهر رمضان!!! أنا أساساً مش هاكون فاضي في رمضان ، ولا هاكون داخل ع النت أصلاً! ربنا يستر! smk:

ربنا يوعدنا يا ريس

وكمان طلعت زمل في كلية الضباط الاحتياط في فايد

ده الموضوع كبير بقي......القاعة المتعددة و الركنة اللي فيها كأننا بهايم....والله فكرتني بأيام سودة كنت نسيتها

اسلوب اكثر من رائع يا باشا و كل يوم بتشوقنا زيادة

انا عن نفسي بفضل فاتح الايميل اول مارجع من الشغل علشان نشوف جديدك لحد مانام

هاهاهاهاهاها... بس أعتقد إنتا كنت دفعة من الدفعات اللي قبلي. أنا الدفعة 122 ض ح ، وأول دفعة اتطبق عليها نظام إن الدراسة بالكلية 9 شهور! كان أيام اللواء محمود عوض غنيم مدير الكلية ، ومشي وجالنا اللواء وجيه الرفاعي من الفرقة 2 مشاه ميكانيكي!

واحنا الدفعة اللي عملت مظاهرة داخل الكلية ، في سابقة من نوعها في الكليات العسكرية! صحيح اخدنا بالجزمة بعدها ، بس يكفينا شرف المحاولة :blink:

وعلى فكرة ... أحمد مراد اللي باكتب له الهاند أوفر ده ، كان دفعتي ومعايا برضه في الكلية. كنا نفس الكتيبة (التانية) ، بس أنا س4 وهوه س6! وكانت لينا مغامرات وفضايح هناك! ومدرسة أسسناها كان ليها أسس وقواعد! ودروس في إزاي تكون طالب مهزّأ ، وغير منضبط!

هييييييييه ... كان كفاح ، وكان عندنا أهداف ومُثُل عليا نقتدي بيها! :blush2:

دا الأيام دي حدووتة لوحدها! يتكتب فيها هاند أوفرز! وآخرتها السجن الحربي أنا عارف! كنت فيه من 6 سنين ، وبالمنظر ده شكلي هارجعه تاني!

مراتي بتتخانق معايا كل يوم بسبب قاعدتي علي النت دي

حلها بقي يا بيه

قلتلها الدكتور ده بتاعنا و جارنا و معرفة قديمة و بطمن عليه

ربنا يستر و متقوليش يانا يا التهامي في البيت

أصبر انتا بس لبكره ؛ أحط لك الفقرتين اللي عليهم الدور (بتاع نص حلقة) ، وهتنسى مراتك أصلاً ، وتعيش في الأحلام الوردية إنك عايش جوه كندا ، وتبدأ تتعرف علي البلد (تورونتو) من جوه!

وماليش دعوة بقى باللي هيحصل بعد كده :lol:

[hosiny]

انا يا سيدي الدفعة اللي قبلك عاي طول 121 س5 برضو عملنا اضرابات في سريتنا اول ما دخلنا عشان الاكل مكنش عاجبنا قالولنا معلش متزعلوش احنا اسفين بس عايزين نعرف المشكلة فين بالضبط ممكن تطلعولنا اتنين تلاته منكو يتكلموا باسمكو

وطبعا احنا زي العبط كلنا كنا عايزين نطلع انما اكتفينا ب 4 ثوريين مننا كده طبعا دول مشفناش خلقهم الا بعد كام شهر لما خرجوا من السجن و فقدوا دفعة (كبش الفداء).

اخوك بردو من اصحاب المدارس في الكلية .....اتسجنت و طالع بشهادة جيش بدرجة جيد و كنت هتحاكم مرتين في جيشي كل واحدة فيهم من اعدام لمؤبد ....الاولي حصلت حريقة و كنت انا ضابط نابطشي بالغلط في قيادة الفرقة و سيبك من الخسائر المادية اللي تجاوزت المليون مستريح ....المصيبة كانت في حريقة غرفة الوثائق السرية بالكامل وده معناه في الجيش عشان التستر علي سرقة وثائق سرية

وتاني مرة لما جابني عقيد في الفرقة (رئيس عمليات الفرقة) و كنت ساعتها مسئول عن مركز الكمبيوتر بتاع الفرقة بحكم اني بافهم في الكمبيوتر مع اني مهندس مدني اساسا و عشان حظي الحلو لما مسكت المركز كان في عهدة ضايعة (اجهزة كمبيوتر - طابعات دسكات وثائق سرية عليها ختم النسر ............) وبلاوي تانية متلتلة و المفروض عشان الموضوع ده يتسوي الحجات دي تيجي اذا مكنتش مسروقة اساسا و تعدم امام لجنة من الفرقة و قيادة الجيش و موال اسود

اوم ايه بقي يا سيدي جابني الباشا ده بحكم اني ضابط احتياط (كبش فدا برده) وقال اهو احتياط مش مشكلة لما يضيع مستقبله او يتسجن او يتحاكم عشان سرب مواد ووثائق سرية و قالي البيه خد يا حضرة الضابط احمد (شوف الاحترام) و امضي علي الورقة دي !!!!!!!!!!! بتاعة ايه دي يافندم ؟؟؟؟؟؟؟؟؟ قالي هو مش انت استلمت الحجات دي خد امضي بقي .....قلتله ولا شفتها وانت عارف كويس انها يا ضايعة يا مسروقة

طبعا الراجل قدر صراحتي و كان مبسوط قوي مني وقالي يا حضرة الضابط احمد (شوف الاحترام تاني مرة) لو ممضتش مش هتشوف شارع تاني لحد اخر جيشك انسي حاجة اسمها اجازات.....تخيلوا ده كده وانا ضابط....ربنا يعين العساكر بقي

المهم دورتها في دماغي و قلت يا واد ياحمد اجازات و لا محاكمة عسكرية ممكن توصل لمؤبد....قلت انا مبحبش الشوارع خليني قاعد هنا يافندم مش عايز اجازة و اديته التحية و اتكلت علي الله

و ييجي نصر ربنا من السماء والله ملهاش حل تاني قوم ايه تاني يوم الاقي نفسي في بيتنا و لمدة شهر كامل و مش بس كدة ده جه كان ناقص يبوس ايدي .....

عارف ليه؟؟؟؟؟

هاقولك المرة الجاية بقي علشان الشبشب اترفع و ربنا يستر بقي........أأأأأأأأأأأأأأأأأأأأأأأيييييييييييي

[medopharm]

تحيه كبيره للدكتور تهامى على الروح الجميله والاسلوب الشيق

منتظرين منك المزيد

وللأمام داااااااااااااااائما

أخوك الصغنن

medopharm

[محمد عيسى]

حاجة افتكرتها استغربت منها وضايقتني بصراحة! المطار الوحيد اللي شفته بيعملها ، أو البلد الوحيدة اللي بتعملها ، كندا...

وانتا ف المطار ، بتحتاج تروللي تحط عليه شنطك عشان تطلع بيها بره المطار. في الدنيا كلها (حسب ما شفت وما سمعت) ، دي من ضمن الخدمات المجانية المقدمة في المطار. هناك في تورونتو ، هتلاقي الترولليهات محطوطين في طابوووور طويل ، وعشان تطلّع لك واحد من أول الصف ؛ لازم تحط 2 دولار ف الماكينة عشان تسحب لك تروللي ، أو تستعمل الكريديت كارد! حتة سافلة بصراحة ، ومالهاش لزوم!

كانت موجوده في مطار القاهرة زمان التروللي بجنيه و لغوها لما خلو تذكرة العربية بخمسه جنيه بدل اتنين جنيه بحكم ان ده بيصب على ده

طيب و لما تروح المطار الجديد تستقبل صديق و يقولك عايز تدخل جوه في التكييف و الكراسي ادفع اتنين جنيه و لا خليك واقف في الشمس

عالرصيف بره

طيب

جربت قبل كده تستخدم الكافيتيرا في مطار القاهرة؟؟ أعلى أسعار و أسوأ أكل و أسوأ خدمة الأكل كله بايت و مش مغسول كويس و أسعارة خيالية

[moheltohamy]

وبالنسبة لمبدأ حجز البيت اللي هنؤعد فيه في تورونتو ... أحمد كان مباصيلنا حتة موقع زُبَد... Craig's List ... وده يا أستاذنا موقع له شعبية كبيرة جداً سواء في أمريكا أو في كندا ، أو ف العالم كله (مصر موجودة برضه). وفيه عليه لينكات لكل حاجة! وبيع وشرا لكل حاجة تتخيلها!

طبعاً اللي كان يهمنا الـــ Rooms مش الشقق الكاملة. وطبعاً بالاستعانة بجوجل إيرث ؛ تقدر تعرف فين أماكن الشقق والبيوت اللي موجودة ف الإعلان ؛ وتفاضل ما بينها. دانا يا راجل من كتر ما عشت بين الكريجز ليست وجوجل إيرث كنت حفظت أسماء الشوارع والمناطق في تورونتو.

وكان تركيزي في البحث عن القرب من الداون تاون ؛ بالقرب من جامعة تورونتو. ألاقي أحمد بيه يقوللي : قبل ما تحجز البيت وتاخد قرارك ، أوللي قبلها ، وانا أقول لك رأيي. حاضر يابو حميد. وفضلنا كده فترة ، نختار المكان ، ونبعت التفاصيل لاحمد ع الميل ، وهوه يقول رأيه ، أو يوصل بنفسه للمكان ده ، ويعمل لنا استطلاع حربي!

وكنت مرة هاموت أنا وهند على شقة (مش بس أوضة) في فيكتوريان هاوس ، والشهر كله بـــ 700 دولار. وصور الشقة ومكانها مالهاش حل! ألاقي البيه يقوللي سيبك منها! يا احمد المكان كويس ، وقريب من وسط البلد ، وسعره حلو! سيبك منها ، المنطقة مش أد كده ، ومش هترتاح ف البيت وما تتخدعش بالصور! هاقول إيه؟ حاضر يا احمد بيه!

وفضلنا كده ، لغاية ما غيرنا تفكيرنا للجست هاوسز (Guest Houses) ، واخترنا واحد ، وإيه رأيك يا احمد افندي ... راح مشوار وتفحص المكان ، ودخل الشقة واتفرج على نظامها من جوه مع صاحبتها ، ورد علينا ... مش بطال! ياااااه ... أخيراً!

بالمناسبة صحيح... كريجز ليست ده كان اتحكالي عنه حاجة غريبة شويتين ... واحدة دخلت تعمل إعلان عليه ... الهانم عارضه her virginity للبيع ، ومنتظره أعلى سعر! ما تعرفش بأه دا إسمه فضا ، ولا استظراف ، ولا تسالي ، ولاّ بتتكلم جد؟! وهيه كام ساعة ، واتمسح الإعلان! واتحط تحذير ع السايت! :unsure:

وكنا فكرنا برضه في الأماكن أو البيوت اللي بتقدم خدمة المبيت والإفطار. هيه بصراحة كانت فكرة دمها خفيف ؛ بس أسعارها هيه اللي مش خفيفة خالص! ممكن تاخد فكرة عنها برضه... مش هتخسّر! والموقع ده بيديلك معلومات عن الجست هاوسز والبد آند بريكفاست كمان في تورونتو.

والقاعدة عموماً ... كل ما تبعد عن الداون تاون ؛ الأسعار بتقل. وكل ما بتحجز مدة أطول ؛ الريت بيقل. وما تقلقش ... المواصلات العامة هناك رائعة.

تم تعديل 23 يوليو 2008 بواسطة moheltohamy

[hosiny]

اوبجيكشن يا باشا

مش فاهم ROOMs تنفع ازاي و الواحد معاه مراته....وازاي يسيبها في البيت مع ناس غريبة بحمام و مطبخ مشترك حتي لو طلعت اللي معاك في البيت دي واحدة ست

افرض طلعت ليسبيان تسيبها مع مراتك و تنزل انت تخلص مصالح ازاي؟؟؟؟؟

وبعدين ايه الفرق بين الجيست هاوس و الروومز؟؟؟ هل الجيست هاوس يكون منفصل تماما بحمامه و مطبخه؟؟؟؟

وشايف اسعار الجيست هوس اليومية عالية قوي....يعني لو اجرت لشهر مثلا ممكن تبقي بكام؟؟؟؟....قريبة من سعر الروومز ولا ايه؟؟؟

تم تعديل 23 يوليو 2008 بواسطة hosiny

[moheltohamy]

شرفت فريق المنصورة يا د. medopharm

وعقبال ما تبقى مندوب الرابطة في فانكوفر ، ونيجي نشتّي عندك :unsure:

محمد عيسى...

بصراحة أنا مستغرب من موضوع الاتنين جنيه بتوع الدخول دول! مانتا ممكن تركب الشاتل باص ، وتدخل الصالة جوه. المرحلة اللي بعدها في تيرمينال 2 ، هيه بوابات التفتيش اللي بتفصلك عن الكاونترز بتاعة خطوط الطيران!

ومرة رحت استقبل ابن خالتي في يوليو 2002 ، وركنت عربيتي جوه المطار ، ودخلتله جوه... محدش له عندي حاجة!

ومرة رحت أستقبل أحمد الديب ، في يناير 2004 ، في تيرمينال 2. دخلت بالعربية بتاعتي طبعاً. ودفعت رسم دخول ، وركنت العربية جوه ، ودخلت جوه المطار ، ولا حد قاللي تلت التلاتة كام (مع إني عارف )!

وبالنسبة لموضوع الأكل ف الفود كورت في تيرمينال 2... إنتا شايفه غالي عشان بتقارنه بأسعار المطاعم برة المطار. لأ ، قارنه بأسعار المطارات بره مصر! وجبة رز بالمكسرات ، وشاورمة بحاجة واربعين جنيه (مش كارثة) ، سندوتش شيش طاووق بحاجة وعشرين جنيه (مش قصة) ، كباية عصير مانجه بحوالي 18 جنيه (إحمد ربنا ، في كندا مش هتشوف المانجه أصلاً)!

في تيرمينال 1 ، عندك ماكدونالدز ، وده ألذ حاجة ، أسعارة ثابتة! رغم إن فيه أصناف كتير مش موجودة!

أفتكر في مطار هيثرو في لندن ، جبت سندوتش عبيط ما يشبّعش خالص بــ 3 استرليني!

وبصراحة الأكل مش سيئ أوي زي ما بتقول! أكيد مش جودة فنادق الــ 5 نجوم ؛ بس قارنه بمطاعم التيك اواي! يمكن حسيت بالموضوع ده مرة مع العيش بتاع الساندوتشات ؛ بس عاوز أقول لك ... هيه تقريباً بتعتمد على الميعاد اللي انتا رايح فيه ؛ يعني وش الفجر ما تنتظرش أكل لسه طالع م الفرن!

ثواني انتا يا حسيني عشان إنتا حكايتك حكاية ، وقعدتك هتطول ، ومحتاج نعمل لك غسيل مخ!

هيييييييييييه ... إستعنا على الشقا بالله.

[ramiesm]

صباحك زي العسل يا دوك و شكرا للموضوع الجميل ده :unsure:

حمام (قصدي مطار) النزهة في اسكندرية و انت نازل من الطيارة و داخل تجيب تروللي تاخد عليه الشنط تلاقي واحد رزييييل (بلاص مش .. مش لهطة جيشطة ) يقوللك حمد ع السلامة يا بيه ..2 جنيه و ربع لو سمحت ..طب يا عم لازمة الربع ده ايه يقوللك التسعيرة كدة و الربع قبل الاتنين جنيه و يا ويلك بقى لو معاكش فكة لدرجة ان الواحد يقعد يستلف فكة من أي حد علشان يطلع من أم المطار ده بسرعة...

المهم يا دوك احنا مستنيين الناضورجية بتوعك في البرتا كدة يجيبولنا المفيد احسن أنا سمعت أنهم بيعلمو كورسات تبع الحكومة علشان برسوم رمزية (حلوة رمزية دي؟)تأهلك تدخل امتحان المعادلة (بتاع صيدلة ) بس طبعا تكوم معدي التأهيلي فيا ريت لو عندك مخبر في مركز ألبرتا البلد و اللا أمين شرطة اسمالله يشوفلنا الموضوع ده

و يجعله عامر

[moheltohamy]

يا باشا أنا أولاً أتشرف بيك على المستوى الشخصي ، بس أنا كنت بدأت الرد عليك هنا ، فقلت أكمل هنا بقى!

انا يا سيدي الدفعة اللي قبلك عاي طول 121 س5 برضو عملنا اضرابات في سريتنا اول ما دخلنا عشان الاكل مكنش عاجبنا قالولنا معلش متزعلوش احنا اسفين بس عايزين نعرف المشكلة فين بالضبط ممكن تطلعولنا اتنين تلاته منكو يتكلموا باسمكو

وطبعا احنا زي العبط كلنا كنا عايزين نطلع انما اكتفينا ب 4 ثوريين مننا كده طبعا دول مشفناش خلقهم الا بعد كام شهر لما خرجوا من السجن و فقدوا دفعة (كبش الفداء).

اخوك بردو من اصحاب المدارس في الكلية .....اتسجنت و طالع بشهادة جيش بدرجة جيد و كنت هتحاكم مرتين في جيشي كل واحدة فيهم من اعدام لمؤبد ....الاولي حصلت حريقة و كنت انا ضابط نابطشي بالغلط في قيادة الفرقة و سيبك من الخسائر المادية اللي تجاوزت المليون مستريح ....المصيبة كانت في حريقة غرفة الوثائق السرية بالكامل وده معناه في الجيش عشان التستر علي سرقة وثائق سرية

وتاني مرة لما جابني عقيد في الفرقة (رئيس عمليات الفرقة) و كنت ساعتها مسئول عن مركز الكمبيوتر بتاع الفرقة بحكم اني بافهم في الكمبيوتر مع اني مهندس مدني اساسا و عشان حظي الحلو لما مسكت المركز كان في عهدة ضايعة (اجهزة كمبيوتر - طابعات دسكات وثائق سرية عليها ختم النسر ............) وبلاوي تانية متلتلة و المفروض عشان الموضوع ده يتسوي الحجات دي تيجي اذا مكنتش مسروقة اساسا و تعدم امام لجنة من الفرقة و قيادة الجيش و موال اسود

اوم ايه بقي يا سيدي جابني الباشا ده بحكم اني ضابط احتياط (كبش فدا برده) وقال اهو احتياط مش مشكلة لما يضيع مستقبله او يتسجن او يتحاكم عشان سرب مواد ووثائق سرية و قالي البيه خد يا حضرة الضابط احمد (شوف الاحترام) و امضي علي الورقة دي !!!!!!!!!!! بتاعة ايه دي يافندم ؟؟؟؟؟؟؟؟؟ قالي هو مش انت استلمت الحجات دي خد امضي بقي .....قلتله ولا شفتها وانت عارف كويس انها يا ضايعة يا مسروقة

طبعا الراجل قدر صراحتي و كان مبسوط قوي مني وقالي يا حضرة الضابط احمد (شوف الاحترام تاني مرة) لو ممضتش مش هتشوف شارع تاني لحد اخر جيشك انسي حاجة اسمها اجازات.....تخيلوا ده كده وانا ضابط....ربنا يعين العساكر بقي

المهم دورتها في دماغي و قلت يا واد ياحمد اجازات و لا محاكمة عسكرية ممكن توصل لمؤبد....قلت انا مبحبش الشوارع خليني قاعد هنا يافندم مش عايز اجازة و اديته التحية و اتكلت علي الله

و ييجي نصر ربنا من السماء والله ملهاش حل تاني قوم ايه تاني يوم الاقي نفسي في بيتنا و لمدة شهر كامل و مش بس كدة ده جه كان ناقص يبوس ايدي .....

عارف ليه؟؟؟؟؟

هاقولك المرة الجاية بقي علشان الشبشب اترفع و ربنا يستر بقي........أأأأأأأأأأأأأأأأأأأأأأأيييييييييييي

بس انتا كده طلعت معدّي بجد... وصلت للسجن يا باشا؟!

أنا بقى أعمل مهما أعمل ، بس برضه قدوة حسنة ، ومثال المواطن الصالح النموذجي

وأفتكر موقف حصل أيام فترة المستجدين في الكلية... كانو 8 من السرية بتاعتنا ، ومعظمهم من العنبر الأرضي لـ س4 (عنبر الشرف و واجهة السرية لمؤاخذة )... العيال دول ما عجبهومش الأكل الموجود في وجبة الغدا. سابو كلهم الترابيزة وخرجوا وراحو الكافيتيريا اشتروا من هناك تونة وجبنة نستو (ماهو ده كان آخرهم هناك!)

تاني يوم يحمد يخويا ... العيال متحولين مكتب لواء الطلبة على عمك العميد محمد عبد الرؤوف (أبو الغضب) والعقيد محمد حلمي (شارون)! وسجن أسبوع يا ريس!

وكانوا العيال اللي معانا في العنبر يروحوا يزوروهم ، وياخدولهم زيارة بقى وكده! وأنا ولا رحت ناحيتهم أصلاً! أنا ما اعرفش الأشكال أرباب السجون دي يا عم الحاج!

وكنا بنسمع إنهم بيظبطوا مع العيال العساكر اللي ماسكين حراسة السجن ، وبيجيبولهم بيبسي وسجاير وانتا عارف معناها إيه إنك تشرب سجاير في كلية الظباط الاحتياط! كده إنتا فجرت ، وما شفتش جيش!

وبعد أسبوع نشوف العيال... ابيضت وبطرخت ، وبان عليهم العز! لا بيحضروا طوابير ، ولا بيعملوا أي حاجة غير الأكل والنوم والرغي مع بعض وبس! لدرجة كنا بنحسدهم ع النعمة اللي هما فيها ، خصوصاً واحنا في أرض التدريب العملي ، ولاّ ميدان الرماية!

تعرف يابو حميد إني بافكر أعمل توبيك عن ذكرياتنا في الجيش... بس ربنا يستر ، وما تجيش على دماغنا بمحاكمة عسكرية! ودي قضاياها يا معلم لا تسقط بالتقادم!

دا البنت الغلبانة فضفضت بكلمتين ع الفيس بوك ، اتشحنت ع السجن!

بس والله نفسي نحكي شوية عن ذكرياتنا عن أيام الجيش. هانزل بالموضوع ده قريب ، إن شاء الله.

اوبجيكشن يا باشا

مش فاهم ROOMs تنفع ازاي و الواحد معاه مراته....وازاي يسيبها في البيت مع ناس غريبة بحمام و مطبخ مشترك حتي لو طلعت اللي معاك في البيت دي واحدة ست

افرض طلعت ليسبيان تسيبها مع مراتك و تنزل انت تخلص مصالح ازاي؟؟؟؟؟

وبعدين ايه الفرق بين الجيست هاوس و الروومز؟؟؟ هل الجيست هاوس يكون منفصل تماما بحمامه و مطبخه؟؟؟؟

وشايف اسعار الجيست هوس اليومية عالية قوي....يعني لو اجرت لشهر مثلا ممكن تبقي بكام؟؟؟؟....قريبة من سعر الروومز ولا ايه؟؟؟

بص يا حسيني ياخويا...

مبدئياً ، لازم تتقبل شوية تغييرات وموديفيكيشنز في اللايف ستايل بتاعك.

كندا لا هيه مصر ولا السعودية ، ولا الدول اللي فيها كبت دي خالص!

الجست هاوس ده يا سيدي زي البنسيون ، والحلقة اللي جاية فيها تفاصيل الموضوع ده.

الرومز بقى - لو كنت تصفحت الموقع ده شوية وعبرتني - بس شكل الشبشب نجح معاك ، وعقلت - دي بتاخد انتا أوضة في شقة. مثلاً ، طالبة مغتربة مأجرة شقة أوضتين ، وبتدفع لها 1000 دولار ف الشهر ، والميزانية مخرّمة معاها. تنزل إعلان إنها طالبة حد ياخد الأوضة التانية ، والنص بالنص ف المصاريف. وتشيل هيه (صاحبة الشقة) الميّه والكهربا (بيسموها الهايدرو) والنت والتليفون مثلاً.

وفيه منهم اللي بيشترط (بنات فقط) ، وفيه اللي بتدور على واحدة عشرية تكون ليها أخت وصديقة ، يروحو السينما ويتفسحوا مع بعض مثلاً ، وفيه اللي طالبة الخصوصية.

وفيه اللي طالبين رجالة بس (لأغراض دنيئة - وبيقولولك كده بالمفتشر)!

يمكن الجيست هاوس يعتبر أرحم شوية من النقطة دي ، آهو حاجة زي الفندق.

وعلى فكرة ، حط في بالك حاجة. المفروض إن الحجوزات دي كلها فترة مؤقتة (بحد أقصى شهر) على ما ترستق أوضاعك هناك ، وتنقل على شقتك اللي هتستقر فيها. والمفروض برضه ، إن في الفترة دي هتكون انتا ومراتك دايماً بتلفوا مع بعض تنجزوا ف المشاوير دي! أو على الأقل ، ده اللي حصل معايا.

و - اللي ضحكني بجد - إيه مشكلتك مع واحدة ليسبو؟! هاهاهاهاها

دي اللي هتفترس مراتك مثلاً؟! :unsure:

بص يابو حسيني... هناك في كندا ، كل حاجة بالتراضي! مفيش حاجة اسمها معاكسات ، ولا فيه حاجة اسمها حد يقتحم خصوصياتك بعنيه حتى!

يعني ما حدش بيتنح ولا يبص البصات السافلة اللي بتشوفها في مصر مثلاً! ده بيعتبر إنتهاك لخصوصياتك.

ولو انتا في المطبخ بتحضر أكلك ، محدش هيدخل المطبخ أصلاً لغاية ما تخلّص. ولو باب الحمام مقفول ، محدش هيروح ويخبّط عليه أصلاً! ومحدش بيحاول يفتح حوارات معاك أكتر من ابتسامة وصباح الخير صباح النور ، وكل واحد على أوضته! إحنا اللي كنا بنفتّح الحوارات!

ونفترض مثلاً إن مراتك قاعدة ف البيت لوحدها ، ومعاها ف البيت ده ذئب بشري (من بتوع كندا) ، لو قالتله لأ يا ديب ما تاكلنيش ؛ هيقول لها حاضر مش واكلك! بكل بساطة!

ولو اشتكت إنه تحرش بيها ، ولو حتى بكلمة ليها معنيين ، ضيّع نفسه! وهيه مُصدّقة ، ومش محتاجة إثبات! يثبت هوه بقى إنه ما حصلش! قل لي هيثبتها ازاي دي!

خلّي بالك من حاجة ... اللي بيغلط غلطة في كندا بيضيع ، وبتتسجّل على سمعته (الكريديت كولليكشن) ، وكله موجود في الهاند أوفرز ، ما تستعجلش على رزقك.

خلاصة الكلام ، آخر حاجة ممكن تفكر فيها هيه إنك تخاف على مراتك من تعدي حد عليها ، أو حتى إنه يتمحك فيها!

والحلقة اللي جاية فيها تفاصيل أكتر عن الجست هاوس!

الصبر يا حسيني...

[hosiny]

اولا شكرا يا باشا علي ردك و علي انك متعرفش الاشكال رد السجون

يابني السجن ده وسام تحطه علي صدرك امال لو تعرف الاتقل ؟؟؟؟؟؟

اول ماخونا علي السجن لقينا تعبان علي الباب و هرب مننا و ملحقناش نقتله ...راح فين بقي؟؟؟؟دخل في بلاعة السجن يعني هيطلعلنا علي رواقة

وا اول مادخلته كانوا بيدخلولنا اكل كتير قوي و زمايلي في البورش قالولي متكلش الاكل كله لازم تسيب نصه قلت ليه؟؟؟ قلولي هتعرف بالليل....قلت دي باينها هتبقي ليله حمرا ولا ايه؟؟؟؟؟ استغفر الله...ومعبرتهمش انا وزمايلي المستجدين و مسبناش حاجة

المهم جه الليل و طلع السجن ضلمة اللمبة كانت مكسورة و حاولنا ننام لكن كان شبه مستحيل مع الناموس اللي كان محبوس معانا لان مفيش غير الشباك الضغير اللي يدوب يعدي ارنب و بعد جهد و دفن راسنا في البطاطين و لبس الشرابات الميري التقيلة الخضرة دي قدرت انام.....بس مفيش نص ساعة قبل الفجر ....وقوم ايه بقي ياخويا الاقي اللي بيشد الشراب من رجليا الاتنين في نفس الوقت من تحت البطانية ....افتكرت واحد صاحبي بيهزر معايا جيت اشد رجلي جوا البطانية الاقي في حاجة متعلقة فيها ....قوم ايه بقي يا خويا الاقي فارين بحجم الارنب خارجين من البلاعة بتاعة السجن لانها مكنتش شغالة و بدأوا الهجوم علينا انا صحيت زميلي اللي جنبي قلتله فيه فران جنبنا ملقيتش غير واحد بيصوت و عنده شبه صرع بسبب الفيران.....البيه بيموت منهم و الدنيا ضلمة و قام وقف علينا من الخوف .....كل ده غير الصراصير اللي كانت بتعدي علي وشينا واحنا نايمين.....الصراصير الكبيرة اللي مش قادرة تمشي من كتر الاكل مهما هشيتها.....فكرتي بايام الوطنية و حب مصر

علي العموم انا هكملك حكاية العقيد دي الاول و بعد كده نفكر في توبك كلية ضباط الاحتياط ده

المهم يا سيدي بعد ما قفشت مع البيه الركن العقيد ده و مشيت مغموم و قرفان اذ بي افوجأ اني مطلوب لقيادة الفرقة علي وجه السرعة الساعة 11 بالليل بعد ما كنت غيرت و علي وشك انام قوم ايه بقي يا سيدي طلبوني في قيادة الجيش تاني يوم الصبح عشان مسابقة المباريات الحربية ودي حرب بين فرقتين فيرشوال يعني علي الكمبيوتر بس بس طبق الاصل الحرب الحقيقية و غرف عمليات و رتب كبيرة بتيجي عشان الاربيتريشن (التحكيم) و شغلانة طويلة عريضة بيشارك فيها قائد الجيش بنفسه

مدتها قد ايه بقي يا سيدي الليلة دي.............شهر.........شهر كامل بروح بيتنا كل يوم بعد ما كنت محروم من الاجازات و مش بس كده......بصفتي ضابط كمبيوتر الفرقة كنت بعرض علي حبيبك الفخراني قائد الجيش الثاني و محافظ الاسماعيلية حاليا عروض بوربوينت لتحركات وتكتيكات و اونطة مرتين او تلاتة في الاسبوع و طبعا ممنوع كان يخش القاعة دي الا رائد فما فوق بس اخوك كان استثناء عشان محدش تاني بيفهم في شغل الاونطة ده غيري في قيادة الفرقة

بالمناسبة شفت

قوم ايه انا اتعملي الحاق علي قيادة الجيش عشان المباريات الحربية دي فطبعا مفيش حد غيري يعرف يعرض و جربوا من غير و قائد الجيش مسح بيهم البلاط بعد ما عكوا مع انه كله عبط بس انت عارف المستوي الفكري للضباط (سكس اونلي)

المهم طلبني البيه ده و قالي تعالي يا حضرة الضابط احمد محتاجينك (شوف الاحترام بردو) قلتله من عيني يا فندم و خاصة ان المباريات الحربية كانت جنب قاعة العرض فمكنش فيه مشكلة بالنسبالي..........شوف كرم الاخلاق؟؟؟؟

تاني مرة طلبني لعبت الدنيئة قلتله اسف يافندم انا ملحق علي قيادة الفرقة (حركات واطية بقي)

شوف بقي قمة الذل قالي عايز ايه يا احمد قلتله تمضيلي علي الورقة دي (انه استلم العهدة المسروقة) و كان عايز يولع فيا بس مضي زي ال ...............

المهم ربنا وقعني في شر اعمالي و اتعلقت وانا مربي سوالفي و لابس جزمة كلاسيك علي الافرول و تي شيرت و دقني طويلة من مين بقي يا بيه ؟؟؟؟؟؟؟؟؟؟؟؟ من قائد الجيش.......الفخراني بنفسه..............ودي حكاية بكرة

بالمناسبة انا شفت العقيد شارون في قيادة الجيش بعدها بسنة او اتنين و كان عامل زي القطة بعد ماتنقل وراحت هيبته...مبتدومش

تم تعديل 23 يوليو 2008 بواسطة hosiny

[Ebn Sina]

توبيك رائع واسلوب بديع وصياغة فريدة فى سرد الاحداث.........حقيقى شىء رائع يا دكتور تهامى.....لابد اولا ان اسجل اعجابى باسلوبك ومتابعتى لكل ما تكتب

انا صيدلى مصرى شغال فى السعودية ومقدم على هجرة لكندا ...وكل يوم بعد انا اخلص الدوام بتاعى بابقى متلهف انى اتابع اى جديد حضرتك بتكتبه...وباعتبره انه مكافاة نهاية الدوام

وفقك الله وفى انتظار مشاركاتك الرائعة

[ramiesm]

ابن سينا باشا... انت فين في السعودية. أنا صيدلي هنا بردو بقالي 4 سنين ولسة مقدم الورق بتاع الهجرة من يومين.. يا ريت لو في أي أخبار عن المعادلة و الشغل و اللذي منه نكون ع الخط مع بعض :roseop: :D

ده طبعا تحت اشراف الكبير الدوك التهامي clp::

[alaashabana]

ازيكم شا شباب مصر الكندويين

معلشانا عندى شؤال بسيط ويارب حد يقدر يساعدنى ويبقى جزاة الله خيرا

انا دلوقتى لو مقدم على الهجرة بس مش عندى 4 سنين خبرة انا عندى سنتين بس .. هل اول ما افتح الملف هيطلبو منى شهادات الخبرة دى وموثقة ولا ممكن اقولهم انى عندى 4 سنين خبرة ولما يجى ميعاد المقابلة بعد سنتين اكون كملتهم ان شاء الله... علما بأنى قرات انى لازم ابعت مع الابلكيشن اللى هملاه صورة من جواز السفر وشهادة ميلاد شهادات الخبرة وشهادات الكلية .

ثانى سؤال .. انا دلوقتى مش متجوز ونفترض انى خلاص فتحت ملف وعدى سنة او اثنين ولسة معملتش مقابلة ولا اخدت الفيزا نفترض انى فى الفترة دى اتجوزت هل ممكن اضم زوجتى على الملف بتاعى علشان تسافر معايا ولازم هى تفتح ملف لوحدها ولا لما ابقى اسافر اعملها استقدام يكون اسهل ولا اعمل اية بالظبط؟ مع العلم انها ان شاء الله جامعية

وشكرا جدا يا جماعة

[moheltohamy]

ربنا يخليك يا Ebn Sina ، ودايماً يعجبك الموضوع. وابقى سمعنا تعليقاتك وآرائك ف اللي بيتكتب.

ومحتاجين نعمل ليستة بالناس اللي منتظرة دخول كندا دول... دا الليستة طلعت كبيرة يا ريس على كده!

drpharma :

ويجازيك كل خير على مشاركتك... فيه ناس غيرك بتيجي تبص من خرم الباب وتمشي wst::

عزيزي ramiesm :

بجد أنا اللي فطست من الضحك على "(بلاص مش .. مش لهطة جيشطة )"!

معلش ، مش هينفع نقارن بين مصر وكندا... الكواليتي يا فندم!

ومع الأسف ، ما عنديش أي فكرة عن معادلة الصيادلة. معلش!

وبالنسبة يا حسيني لموضوع ألبرتا ؛ كالجاري ولاّ إدمونتون...

السرّيحة بتوعي طلعوا فاشلين ، و لعبوا معايا الدنيئة! وجابولي الجواب شورت أنسر! آدي الكام سطر اللي جابوهوملي عن الموضوع ده...

جميع الآراء (التي شملها الاستطلاع) كانت في صف كالجاري ، عشان :

1. عدد المهاجرين فيها أكتر.

2. فرص العمل أكتر.

3. فيها حيوية وأنشطة أكتر.

وبالنسبة للأسعار ، فــ كالجاري أغلى حاجة بسيطة من إدمونتون ، وأما بالنسبة لمتوسط الدخل ، فالاتنين سواء.

وبرضه - أكّد السرّيحة - إنك لازم تجرب بنفسك... محدش هينفع يختار لك!

ولو جاتلي أخبار تانية هعرّفك.

علاء شبانة :

لو بتقدم على الهجرة ... ما تهرجش مع السفارة. لو كتبت إن معاك 4 سنين خبرة ، باعتبار ما سيكون لما يفتحوا ملفّك بعد سنتين كمان. ولو على بختك انتا - مع القانون الجديد المنتظر صدورة واللي هيقلل الانتظار إلي 12:6 شهر - هتعمل إيه لو قالولك بعد 8 شهور هاتلنا ما يثبت الـ 4 سنين اللي انتا كاتبهم؟! ما تهرجش مع الناس دول.

ده رأيي الشخصي ، أنا أساساً قدمت على النظام القديم ؛ سنة 2004.

دلوقتي مش متجوز ، هتكتب ف الأبليكيشن بتاعتك إنك سينجل. ولو اتجوزت قبل ما يدولك الفيزا ، هتقدم صورة شهادة الجواز بالعربي والانجليزي (من وزارة العدل في لاظوغلي) ، في ظرف عليه رقم الفايل بتاعك ، وتسلمه للسفارة ، كـ update للفايل بتاعك.

أما إنك تروح وتعمل لها استقدام ، فده هياخد وقت (أقل واجب 6 شهور) ، ولازم يتحققوا إن الجواز مش جواز صوري ، ولفة سافلة مالهاش لزوم ؛ إلا إذا اضطريت ليها!