كندا التي رأيتها :)

[moheltohamy]

ما بلاش سيرة الجيش دي انا جتتي لبشت

كنا بنتكلم عن البنات في كندا .. موز موز موز

كمل بقى استمر

والله يا دكتورنا ، من حيث موز ... همه قفص فاكهة مشكّلة ؛ مش موز بس

لكن معلش ، إسمعلك كلمتين عن الجيش ؛ هينفعوك ... وإن منكم إلا واردها wst::

اسجل متابعة للهاند اوفرالجميل بتاع حضرتك يادكتور تهامى

الف شكر بجد

والله ليك وحشة يا حسام. بجد واحشني. :D

تم تعديل 24 يوليو 2008 بواسطة moheltohamy

[moheltohamy]

نرجع لموضوعنا... البيت اللي كنا حاجزينه يا ريس إسمه Elma Guest house Hostel ، وهتلاقيها هنا وهنا برضه ، يعني بالعربي كده وم الآخر بنسيون ، فيه 4 أُوَض ، إحنا حجزنا أوضة لمدة شهر بـــ 550 دولار كندي.

طبعاً هند ظبطت الحجز والاتفاقات مع إيمي (صاحبة الشقة) بالنت وبالتليفون ، وطبعاً أحمد هوه اللي راح دفع لنا 100 دولار ديپوزيت ، ودفعنا الباقي لما وصلنا.

وإيمي على فكرة (صاحبة الشقة) ممكن تيجي تستقبلك من المطار بعربيتها ، وتكلفة المشوار ده 40 دولار.

بس بالنسبالنا ليه تدفع أكتر ، لما ممكن ما تدفعش خالص؟!

إيمي أول ما وصلنا طلبت تبص بصة ع الباسبورتات بتاعتنا (مش أكتر من البصة!) ، وطلبت باقي الفلوس (كان أحمد راح دفع لها 100 دولار عربون بس ، وكنا حاجزينها شهر كامل بـــ 550 دولار).

الشقة دي يا سيدي موجودة في منطقة اسمها سكاربرو (Scarborough) ودي موجودة في شرق تورونتو ، وعشان توصل منها لمنطقة وسط البلد ، يا دوب هتعدي الشارع ، تاخد أتوبيس 190 أو 85 اللي هيوصلك لمحطة دون ميلز (Don Mills Subway Station) ، وتاخد منها المترو يا ريّس غرباً لمحطة شيپَرد (Sheppard) وتبدل تاخد الخط التاني جنوباً زي مانتا عاوز بأه.

ده أساساً (الخط التاني ، أو خط المترو القديم ، زي المرج – حلوان بتاعنا) ماشي تحت شارع يَانج (Yonge street) ، أطول شارع ف العالم (بيتنطق زي ما بتنطق كلمة young بمعنى شاب)، واللي قاسم تورونتو نُصّين شرق وغرب ، ومعظم المناطق المهمة هتلائيها بتتمحور حواليه. وممكن تتفرج على خريطة مترو تورونتو وتمتع عينيك ، وعلى فكرة ، شقتنا الجديدة تحت حرف الـــ N بتاع تورونتو مُباشَرتَن! wst:: نتكلم عليها كمان شوية.

وبالنسبة للجستهاوس صحيح ، ده يا سيدي شقة من أربع أُوَض ، أنا وهند ف أوضة ، راجل برازيلي ومراته ف التانية ، بنت ألمانية وامها ف التالتة ، الرابعة بأه بنت من أوكرانيا و واد من غانا (ما تسألنيش بيهببو إيه مع بعض ، ممكن يكونو بيقسّمو إيجار الأوضة ، توفير يعني)! يا عم احنا مالنا! طول ما الـــ ... بعيد عن ... ماليش دعوة! wst::

وكنت مش مستريّح بصراحة لموضوع الأكل اللي كله في تلاجة مشتركة دي! لكن سبحان الله... محدش بيلمس حاجة مش بتاعته ؛ وكل واحد حاطط حاجتة في ناحية وعارفها! ومن منطلق إننا شعب مصري – من بلد الخير والعز – كنا محتلّين نص التلاجة على تلات تربع الفريزر!

وبرضه طبعاً ما تقدرش تتفسح بره أوضتك على مزاجك سيادتك! كنت لازم ألبس اليونيفورم كامل قبل ما اعتب باب الأوضة! وهند ماسكاني تريقة... بقى سيادتك مكسوف؟ ما تروح تشوف البت الأوكرانية اللي مقضياها اليوم كله بالشورت!

إييييييسكوت... أحكيلك على فضيحة! مرة كنت أنا وهند قاعدين ف الليفنج الساعة 8 ص ، وبنستعد نخرج ندور على شقة عشان نستقر فيها.

وإذ فجأتن ... أن أن آاااااان ... يتفتح باب أوضت البت الألمانية ، ودي طالعة زي الساروخ ، لابسالي تي شيرت خفيف ، والأنضر وير! وع المطبخ ؛ تعمل مكالمة من التليفون اللاسلكي اللي كان بيتشحن هناك! أخوك طبعاً فتح بقه! و ... هوه فيه كده؟! :)

وبعد ما خلّصِت الهانم مكالمتها ، جاتلنا – بنفس الطقم طبعاً – وبتعتذر إنو معلش إني خرجت كده ؛ أصل راحت عليا نومة ، وكان فيه مكالمة مهمة كنت المفروض اعملها الساعة 6 ص! طيب ياختي! :D

ومن منطلق إن اخوك نيّيف (Naïve) ، وإن بعض الظن إثم ... سوهي عليها ، وصاحية مش مركزة ... البنت معذورة يا ناس! وخرجت مامتها وهيه بتكلمنا ، وبصت للّبس اللي هيه واقفة بيه. قلنا البنت ضاعت خلاص!

اليوم اللي بعده ... قاعد في الليفنج ، كنت باشيّك ع الميل بتاعي ع الكمبيوتر بتاع إيمي ، وهند بتتصفح الجرايد... برضه الباب يتقتح ، وطقم أنأح من امبارح! وجات تستأذنني إنها تستعمل الكمبيوتر ، تشوف الميل بتاعها! قمتلها طبعاً ، ورحت قعدت ع الكنبة!

إيه اللي انا شايفه ده؟!!! :D

لا لا لا! كده بقى حاجة من اتنين... يا البنت دي مش مقتنعة إنها بنت! يا مش مقتنعة أصلاً إن أنا راجل!!!

بس تيجي بأه للحاجات اللي تخنؤ ف الشقة دي ؛ لما تلاقي إنكو بتتخانئو على حمام واحد ، لدرجِت إني عودت الـ ... متجيش غير فترة الضُهرية أو العصرية لما مبيكونش فيه حد ف البيت ، عشان آخد راحتي! دانا أساساً باحب آخد راحتي أوي ف الحمام ، وأحلى مكان نقرا فيه الجرايد ، فما بالك بأه بحمامات كندا؟ مش عشان حلوة ؛ لأ عشان مؤرِفة! العالم دول ما بيعترفوش بحاجة اسمها شطاف! لو عاوز تركّب شطاف ممكن تعمل أوردر بواحد ، هيكلفك 100 دولار وتركيبه هيكلفك 50 دولار!

ماهو مش شطاف وماسورة وخلاص؟ ده بيديه ؛ يعني جهاز بيتركّب يا ريس ، وفيه الميَّه بتطلع بـــ 3 سرعات وزرار يظبط درجة حرارة الميَّه وزرار للتنظيف الذاتي للشطاف نفسه! وممكن تاخدلك فكرة م الويب سايت بتاعه أو بتاع الراجل اللي بيبيعه في تورونتو. mf)

وعلى فكرة ، يُستحسن إنك ما تجيبش سيرة للــ لاند لورد (صاحب الشقة أو العمارة) أو الأپارتمنت مانيدچر إنك هتركّبه ، الناس دي ما بتحبش إنك تلعب ف السباكة ، عشان ممكن يحصل ليكيدچ والميَّه تسأَّط على جارك اللي تحت ، وتبئى مشكلة! يعني م الآخر تخليها ف السكرتة! وطبعاً ، ما كانش ينفع نركّبه عند إيلما ، ده مش بيتنا أساساً ، لما تبقى ليك شئِّتك الخاصة ، تبئى تعمل اللي نفسك فيه. بس لما كنت بابئى عند أحمد في شئِّتُه واحتاج أدخل الحمام ، عارف إحساسك بالمتعة؟ تحس إن الدنيا جميلة ، وإنك سعيد ، ومش ناءصاك حاجة ف الدنيا! نعمة مش حاسّين بإيمتها ف مصر!

على فكرة ، اتكلف 210 دولار (جاب معاه ماسورة ليّ مرنة ، ومحبسين ركِّبهم ؛ احتياطي لو حصلت منه مشكلة تقدر تفصل المياه عنه لوحده ، بدل ما تفصل المياه عن الشقة كلها) ، وهند لسه مركباه من كام يوم (10/1/2008) على الرغم من إننا واصلين كندا 9/9/2007! كسل يا سيدي ، لازم أنا اللي أتصل م البريمة ، وأكلم الواد سامح (مصري صعيدي هوه اللي بيركب البيديه وبيجيبهولك معاه كمان) ، واحرك المواضيع في كندا وانا ف السعودية! phn:

اللذيذ بأه وانتا تسمع الانجليزي بلسان صعيدي بقاله سنيييين عايش في كندا! متعة! صباح الفل يا د. قناوي :lol:

تم تعديل 24 يوليو 2008 بواسطة moheltohamy

[bent misr]

بصراحه يا د/ تهامي أنا لسه متابعه موضوعك من يومين بس بجد

حاجه جميله جدا و جامده جدا جدا , أنا فعلا مستمتعه من الكلام و الاسلوب

وشوقتنا لكندا أكثر ما احنا مشتاقين.

كان لي استفسار حسب ما فهمت ان مدام / هند عايشه في كندا لوحدها

هل ده شئ سهل هناك لأني سوف أطر للعيش في كندا لوحدي مع الاولاد لفتره

اذا ربنا أراد و حصلنا على الفيزا بعد عمر طويل ان شاء الله f((:

ومره أخرى أسجل اعجابي الشديد و في انتظار المزيد

[Bassam El Sayed]

دكتور تهامى

ما تتخيلش انا بحب الحكاوى دى اوى قد اية . بتحسسك انك عايش هناك فعلا وبتديك خبرة فى التعامل ان شاء الله لما اروح هناك .

بس كان لى سؤال بالنسبة لموضوع الحجاب وبصفة خاصة النقاب فى تورنتو هل بيبقى ملفت للنظر وشىء غريب ولا عادى ما فيش مشاكل

[moheltohamy]

بسام السيد:

لو اتكلمنا بصراحة... هوه النقاب بيلفت النظر في أي حتة ف الدنيا ، وبيعوق شوية من الاندماج في المجتمع بسهولة ، وخصوصاً بالنسبة للشغل.

لكن بالنسبة لكندا عموماً ... دي مجتمع متعدد الثقافات (Multicultural) ، وهمه فرحانين بالموضوع ده ، وبالتالي بيحترموا جداً حرية الناس في لبس ما تشاء.

وتلاحظ الموضوع ده أكتر في المناطق اللي زي تورونتو (ويمكن مونتريال برضه) ، اللي فيها أكبر نسبة مهاجرين (Landed Immigrants) ، على عكس باقي المناطق. أنا نفسي شفت واحدة ولاّ اتنين لابسين نقاب كانو خارجين أدامي من مسجد (المؤسسة الإسلامية في تورونتو) في ماركام (Markham). ولا فيه أي مشاكل.

حاجة تانية لاحظتها ، واحدة من أصحاب هند (محجبة ، مصرية أردنية) ، كانت عايشة في تورونتو ، انتقلت لكالجاري ، وسمعت من كام يوم إنها خلعت الحجاب. حست إنه بيضايقها في الشغل هناك!

وبالمناسبة ، أنا بنت خالتي برضه سمعت من كام يوم إنها خلعت النقاب في مصر! هيه دكتورة رمد (عيون يعني) ، وبعد قرار الوزير إنو غير مسموح بعمل لا الطبيبات ولا الممرضات وهمه لابسين النقاب ، اضطرت تخلعه ، وترجع للحجاب العادي!

بنت مصر :

هند قاعدة لوحدها في تورونتو ، ومفيش عندها أي مشكلة خاااااااالص. حتى ابقي اسأليها :closedeyes:

ويا ريت والله تروحو قريب ، وهتونّسوا بعض. :rolleyes:

وهند بقى ليها مجتمعها الصغير هناك ، زمايل الشغل ، وزمايل الشغل السابقين ، وأحمد الديب ومحمد حامد ومراته. وطبعاً الجيرل فريند بتاعتها ، اللي على طول لازم ساعة مكالمات قبل النوم دي (حتى وانا هناك)!

والموضوع ده طبعاً بيعتمد ف المقام الأول على هل إنتي سيدة مستقلة (Independent Woman) ، ولا زي معظم ستّاتنا في مصر ، اللي لو جوزها سابها تمشي أمورها ، يا تلوص ، يا ترمي الموضوع على حد من عيلتها!

هتحسي - زي هند طبعاً - بالوحدة من وقت للتاني. بس لو اشتغلتي هتلاقي اللي يشغلك (وإن كان وجود الأولاد هيلخبط الدنيا شوية). ودايماً حاولي يكون ليكي علاقات (Network). العلاقات دي هيه اللي هتفتح لك باب العمل ، وهتبسط لك التأقلم مع الحياة هناك.

وتحت أمرك في أي استفسار.

تم تعديل 26 يوليو 2008 بواسطة moheltohamy

[friendskhaled]

أخى العزيز : تهامى

أشكركم كثيرا على هذا الموقع الرائع التى يحتوى على الكثير من المعلومات للقادم الجديد الى كندا .

أولا : أود أن أسألكم هل عندك فكرة عن معادلة الشهادة للمحاسبين أين تتم وكيف وهل يمكن عملها من مصر قبل السفر أم لابد من وجودى داخل كندا لإنهائها ؟

ثانيا : هل أجد عندكم خريطة لمدينة مونتريال مثل التى عرضها من قبل (خريطة لمترو أنفاق تورنتو ) حيث انى بحثت ولم اجدها ولإنى مقدم على الهجرة لمونتريال ؟

فى انتظار ردكم ،،،

[moheltohamy]

والله يا حسيني ياخويا ، المشكلة إن حلقة بكره جاهزة!

حلقة النهارده اللي مش جاهزة ، ولسه عمال أكتب فيها!

عارف فوازير رمضان لما الشهر يبدأ ، ولسه ما خلصوش غير 20 حلقة بس؟!

آهو ده اللي عملته!

والمشكلة إن الواحد دماغة متلخبطة في ميت اتجاه!

وفيه توبيكس هنا واكلالي دماغي (بآرائها الغريبة) بقالها كام يوم :rolleyes:

نعتذر اليوم ، وبكره هاعوضكم بحلقة حلوة

وأعتذر تاني للزميل friendskhaled ... ما عنديش أي فكرة لا عن معادلة المحاسبين ، ولا عن مونتريال! يمكن عشان الموضوع مش في بالي! سوري ، معلش :hi:

تم تعديل 26 يوليو 2008 بواسطة moheltohamy

[moheltohamy]

تاني يوم على طول يا ريس بدأ الشغل... رُحنا على سكاربرو تاون سنتر عشان نطلّع السِن نَمبر (SIN). بتُؤف في طابور عشان تقدم ورأك ، وبعد كده بتؤعُد زي الباشا تستنى دورك ، وحواليك مكتبة فيها تشكيلة كتب على مجلات تسلي نفسك الكام دئيئة اللي آعدهم! بعد شوية بيجيلك الموظف اللي هيتعامل معاك ويخلّص معاك الإجراءات. طبعاً كالمُعتاد ؛ لازم أبو سعد تجيله واحدة تنده عليه :rolleyes: ما تتوهمش أوي ، المرَّادي كانت سمراء بجد (بس مش لدرجت النيجرو) ، وعاملالي تاتُّووو ، وحلأ مش عارف فين ، وعاملالي شعرها كيرلي ، وبنطلون چينز استريتش ، وقمة الروشنة (بلد الحرية بأه)! بس بصراحة ؛ البنت لذيذة وفريندلي موت. خدت منى الپاسپور وفحص تحت لمبة بنفسجي (تتأكد إن الفيزا مش مضروبة) ، وملينا أپليكيشن مع بعض ، وبتكتب فيها العنوان اللي تحب يبعتولك الكارت عليه. وادتني ورقة رسمي (ممكن التعامل بيها) فيها السِن نمبر بتاعي على ما يتعمل كارت السن نمبر ، ويتبعتلي بالبوسطة بعد أسبوع. وفعلاً بعد 5 تيام ، وصلنا الكارتين على عنوان احمد الديب.

الرقم ده يا سيدي بيوصل لكل حاجة عنك. بيُطلَب منك وانتا بتعمل أي حاجة رسمية هناك ؛ زي مثلاً وانتا بتقدم على شغل ، وانتا طالب شركة التليفونات (روچرز مثلاً) تدخل لك النت ف البيت ، وانتا بتمضي عقد إيجار الشقة بيطلبوه منك. وبواسطته بيعرفوا كل حاجة عنك (بيسألوا على سُمعتك :unsure: )...

فيه حاجة هناك اسمها الكريديت بيرو Credit Bureau ، ودي مؤسسة حكومية بتحتفظ بفايل عن كل مواطن أومقيم ف البلد آخر سبع سنين. يعني لو عملت مشكلة ؛ هتفضل لازءة ف أفاك السبع سنين الجايين! مثال... لو جيت عملت مشكلة ، ما دفعتش إيجار آخر شهرين مثلاً ، ومشيت ، ورحت ولاية تانية ، ورحت تسكن في شقة هناك. الراجل قبل ما يأجّر لك هياخد رقم السن بتاعك ، ويتصل بالكريديت بيرو ، ويستعلم عنك. هيردوا عليه إنك نصاب وأونطجي ، وزوّغت من المالك القديم من غير ما تدفع آخر شهرين. ساعتها هيرفض إنه يأجّر لك. وكذلك الحال في أي تعامل مالي (سداد كريديت كارد ، دفع فاتورة كهربا أو تليفون أو غيره!)

مش متأكد هل هيه بتسجل عليك لو عملت خناقة في الشارع مثلاً أو تحرشت بواحدة زميلتك في الشغل ، ولا هيه خاصّة بالتعاملات المالية بس!

الخلاصة إن اللي بيغلط غلطة بيشوف الذل بعدها ؛ ما هو لا هيلاقي حد يسكّنه ولا يوصّل له خط تليفون ، ولا كهربا ولا غاز ، ولا هيلاقي شغل محترم! هيتمرمط! وعشان كده ، تلاقي الناس كلها ماشية هناك جمب الحيطة! كل واحد بيخاف على نفسه ؛ ماهي الغلطة بفورة يا ريس!

نسيت أقول لك إننا قابلنا واحنا قاعدين مستنيين دورنا في سكاربرو تاون سنتر ، واحدة مصرية واختها وجوز اختها. البنت دي جاتلها الهجرة ، وكانت رايحة تستلم الفيزا من السفارة الكندية في مصر ، واتقابلت مع هند ، واتعرفوا على بعض في مصر. فوجئنا بيها قاعدة أدامنا! قلت يا سبحان الله ، ويا محاسن الصدف. الدنيا صغيرة

تم تعديل 27 يوليو 2008 بواسطة moheltohamy

[hosiny]

عايز اعرف منك معلومة بردو يا دكتور

ايه اسم المكان اللي بيتعمل فيه ال SIN وكمان ال PR

مش اسم المنطقة انما اسم المركز اللي بيدي الخدمة دي يعني لو رحت ولاية تانية اقول انا عايز اروح فين عشان اعمل الاتنين دوول

[moheltohamy]

السن نامبر كان في التاون سنتر ، وده بيكون مجمّع حكومي بيقدم خدمات الجنسية والإقامة وغيرها.

والبي آر ، كان في المطار حضرتك. مانتا ما بتذاكرش!

ولو جيت تجدده (لو ضاع منك مثلاً ، أو جيت تجدده بعد مرور 5 سنوات بدون حصولك ع الجنسية) فبتبعت جواب إلي سيرفيس أونتاريو ، وهمه بيردو عليك بالأبليكيشن ، تملاها ، وتبعتهالهم بجواب ، ومعاه شيك مقبول الدفع Certified Check ، أو Money Order بمبلغ 50 دولار. وهمه بيبعتولك البي آر الجديد بالبوسطة على بيتك.

Service Ontario دي هيه المكان اللي بتقدم فيه على رخصة القيادة وكارت التأمين الصحي وكذلك تجديد البي آر زي ما قلتلك.

إيه الوضع بالنسبة لألبرتا بقى؟ ما عنديش فكرة! بتجيب أسئلة صعبة دايماً يا حسيني!!!

والله يكرمك كنت قرّبت أخلص الحلقة التانية ، وانتا اللي بتعطلني أهه! كلها دئايئ وننجز!

بعد ما قعدت وقلت أعمل دماغ عشان أعرف أمخمخلك في الحلقة ، و واحد زميلي جابلي كيس فيشار كبير ، ورحت ظبّطت كباية شاي Tetly Earl Grey من بلدنا :rolleyes: ... حاجة عشان أمخمخ واعيش الجو واحلم

آااااااه يا كندا :unsure:

تم تعديل 28 يوليو 2008 بواسطة moheltohamy

[moheltohamy]

بعد مشوار السن نَمبر ، طلعنا على بنك TD CanadaTrust ؛ عشان نفتح لنا حساب هناك. واحنا قاعدين مع الست بتاعة خدمة العملاء ، اكتشفت إن فيه مصيبة حصلت (هاحكيلك عليها بعدين).

وخرجنا من البنك من غير ما نعمل الحساب! عملناه تاني يوم. والحساب اتعمل (حساب مشترك) واحنا قاعدين مع مندوبة خدمة العملاء ، واستلمنا كارتين الصراف الآلي ، واحنا قاعدين. والحساب اشتغل (فيه حساب توفير وحساب شيكات) ، واحنا قاعدين. وطلبنا نعمل 2 كريديت كارد ، دي بقى مش واحنا قاعدين! دي عملناها متأخر شوية ؛ بعد ما الفلوس وصلت من مصر!

ولما رحنا نعملها ، قدمت لنا طلب ، ومن منطلق إننا جداد ع البلد ومالناش كريديت (سمعة) فيها ؛ فكان لازم نشتري شهادتين استثمار (مدتها 3 سنين) ونجمدها ، وبضمان الشهادة طلعنا كارتين فيزا. اتبعتولنا ع البيت بعد 3-4 تيام. :unsure:

سألناهم لو ممكن يسحبولنا الشيك الدولي من CIBC للحساب بتاعنا ، قالو مفيش مشكلة ، بس هياخد بتاع 3-4 تيام علي ما نبعت لهم ويردوا علينا. قلنالهم طيب شكراً مش عاوزين. رحنا عدينا الشارع فرع لبنك CIBC ، عشان نفتح حساب ، ونصرف عليه الشيك بتاعنا اللي صادر من البنك الأهلي المصري. قالولنا روحوا الفرع الرئيسي في داون تاون.

ورحنا ، وطلبنا الشيك يتصرف ، ويتم تحويله على حسابنا في تي دي. الراجل هناك قعد يلت ويعجن معانا ، ويجيلنا يمين شمال يقنع فينا إننا نفتح حساب عندهم. اتكسفنا منه بصراحة ... ماشي يا عم ، نفتح حساب. ومن منطلق إني باحب تي دي أكتر (ما تعرفش منين ، بس ارتياح نفسي وخلاص ، وفيما بعد لقينا إنه بيقدم خدمة أكتر للعملا بتوعه – بيفتح مثلاً من 8 ص حتى 8 م! وناوي يزودها كمان!) ، سِبت هند تفتح حساب لنفسها فيه ، ويتم إيداع قيمة الشيك فيه.

بس فعلاً كان موضوع زبالة... الشيك فيها 15 يوم عمل (يعني 3 أسابيع) على ما نخاطب مصر ، ويردوا علينا! هيه دايماً كده... أي حاجة فيها مصر ، لازم تعد أيام ع الفاضي! مسكت هند طبعاً زلّيتها ؛ لأني قلتلها ناخدهم كاش معانا م الأول ، وهيه عملتلي ناصحة! وممكن الفلوس تتسرق ، وممكن تحصل لنا مشاكل! فيلم هابط! وكل ما نتزنق ف الفلوس أو نتصل باحمد (إلحقنا يا احمد) أقول لها (مش لو كنا أخدنا الفلوس معانا ؛ كان زماننا متدلّعين ، ومش عارفين نعمل بالفلوس إيه؟!)

والنتيجة ، قعدنا نصرف من الألف دولار الكاش اللي معانا (اللي راح تلات ترباعهم في أول يومين لينا ف كندا) ، وبعد كده نقلت على الماستر كارد بتاع HSBC بتاعي في مصر ، وبعد كده اتسنكحنا على أحمد في حوالي تلات تلاف دولار (ألف دولار للاپتوپ ، والشهرين المقدم بتوع الشقة اللي استقرينا فيها بعدين (first & last month))، لغاية الفلوس ما وصلت!

رحنا سحبنا 8 تلاف دولار خبطة واحدة ، وإدينا لأحمد فلوسه ، وظبّطنا أمورنا! يعني تقدر تقول باختصار كده صرفنا في الـــ 3 أسابيع الأولى لينا ف البلد حوالي 10 تلاف دولار!!! :rolleyes:

والكريديت ليك ف البلد دي (بالنسبة للبنوك) ؛ يعتمد بالدرجة الكبرى على كروت الائتمان ، ومدى التزامك بدفع فواتيرك في مواعيدها. ورصيدك الائتماني (سمعتك يعني) بتبنيها بطول مدة التزامك في سداد فواتيرك في موعدها. ويزيد أكتر بامتلاكك لعقار مثلاً.

ومع ازدياد الكريديت بتاعك تقدر تاخد مورجيدچ (Mortgage loan) ، ودي تقدر تقول كده حاجة زي التمويل العقاري. البنك بيديلك مبلغ تسدده على 15-20 سنة مثلاً ، وتقدر تشتري بيه بيت (أو شقة). وممكن بعد سنة ولا اتنين سعر البيت يزيد ، تقوم تبيعه ، وتسدد باقي المبلغ للبنك ، وفرق السعر تضربه في جيبك! وتاخد مورجيدچ تاني (كده من حقك تطلب مبلغ أكبر بكتير من المرة اللي قبلها) ، وبكده تقدر تجيب رأس المال لأي مشروع تحب تعمله... أولاً ، بناء كريديت!

تم تعديل 27 يوليو 2008 بواسطة moheltohamy

[bent misr]

الف شكر ليك يا د/ تهامي و الله طمنتني و طبعا على رأيك أهم

حاجه الصحبه الطيبه و على فكره أنا صيدلانيه و سمعت اني ممكن

أشتغل تكنشن لغاية ماعادل شهادتي بس ربنا يسهل و نروح أصلا gsm::

وسلامي لمدام هند و ربنا يسهل و أشوفها هناك...

أتابع و باعجاب شديد

تم تعديل 28 يوليو 2008 بواسطة bent misr

[samehelassad]

الله ينور عليك يادكتورنا احلى حاجة انك بقيت عامل زي الاب اللي عاوز يعلم ولادة منغير ميقلهم تعالو اعلمكم حاجة ياولاد. والعيال تبقى مبسوطة من باباها ويقولولة يابابا والنبي عاوزينك تحكلنا حكاية.

الله ينورعليك ويزيدك من فضلة بسطة في العلم والمال.

[moheltohamy]

الف شكر ليك يا د/ تهامي و الله طمنتني و طبعا على رأيك أهم

حاجه الصحبه الطيبه و على فكره أنا صيدلانيه و سمعت اني ممكن

أشتغل تكنشن لغاية ماعادل شهادتي بس ربنا يسهل و نروح أصلا :sad:

وسلامي لمدام هند و ربنا يسهل و أشوفها هناك...

أتابع و باعجاب شديد :sad:

آهو الصيادلة دول اللي واكلينها والعة

باسمع إن معادلتهم سهلة (ما عنديش تفاصيل) ، وشغلهم متوفر!

عموماً نتمنى نشوفك هناك ، وعلى الله ما تكونيش ناوية على كيبيك!

إخواننا : حسيني وابن سينا وسامح...

انتو متخيلين إني باذلكم؟ ولا باتأخر عليكو عشان تفضلو تدفعوا اشتراك المنتدى لكام شهر أدام؟!

أنا بجد ما خلصتش كتابة ، ومزنوووق زنقة سودة!

آهو أنا دلوقتي حسيت بــ د. الشامي لما كان بيكتب يوميات نائب في كندا!

أنا ضهري وجعني (من المنتدى ده) ، ومواعيد نومي متلخبطة ، والمفروض عندي مذاكرة عشان كورس هاخده في شهر 9 (3 كورسات في بعض!) و 5 كتب لازم يتذاكروا ، وانا قاعد ع المنتدى وكندا الانتساب بتاعتي! mfb:

هيييييييييييييييييه ... يا معين يا رب.

[ابو الخير]

هيهيهي نيهاهاهاها

بالنسبه لي اللي افهمه عن المعاملات البنكيه هو نفسه اللي افهمه عن السياسات الاقتصاديه للدول الاسكندنافيه يعني صفر بس الصراحه بعد اخر بوست ليك شكلي هبتدي افهم و انا اللي خطبتي بتقول لي الكريديت بتاعي وصل 10 تلاف دولار اومت رأعت بالصوت و الت يا لهوي اعدت نص ساعه تفهمني

سوري يعني حبيت اقلد اسلوبك اللذيذ في الحته دي

يا نهار ازرق خيانه بتذاكر كورسات ايه من ورانا لازم تشرك الجماهير

علي اقل من مهلك في الكتابه اهم حاجه مش تنسى اي حاجه من التفاصيل انا حاسس بيك اخوكم مزنوق برضو

[Dr Ayman Kamel]

الخ moheltohamy موضوعك شيق للغاية وبسجل متابعتي ليك

لا تعتــــــــــــــــــــــــــذر

ولا تصدق إن قيل لَكَ

أن روحي تنسحب مني ..

واني مقبل على نوع من الانهيار ..

وان دموعي سالت على خدودي انهار

واني أموت في كل لحظة ..ألف ..ألف مرة …

وارفض أن أصل بإحساسي ..لحد الانكسار

ارجوكم اجيبونى هل كندا هى مقبرة الخبرات ام هى الجنة الموعودة هل هناك عمل متوفر بالساعة على الاقل

[الباشمهندس ياسر]

السلام عليكم

انا لازم الاول اقدم اعتذااااااار مكتوب

انا ازاى مدخلتش التوبك ده قبل كده انا ازاى مخدتش بااااالى

انا لازم اعافب نفسى gt: gt:

و لازم اعملك حفلة بمناسبة الموضوع الجااااااااامد mfb:: :hi: ونقوم نقف و احنا بنتكام معاك :sad:

بصراحة انا اااااااااااااااسف لانى مكنش غصب عنى

و بصراحة اكتر الله ينور يا دكتور تهامى

و هتخلينى ارجع افكر تانى فى الهجرة

تخيلوا رحت وانا فى اعدادى هندسة مكتب الهجرة

اه والله اعدادى هندسة شوفتوا نفسى اطفش من زمااااااااااااااااااااان

قام المحامى قالى خلص الكلية وابقى تعالى ونسيت :sad:

ربنا يسامحك يا تهامى قومتها فى دماغى

وطبعا انا جبت الموضوع من اوله واستفدت جدا ربنا يكرمك

و بالمناسبة انا برده فى البترول وشهر اه :sad: وشهر لا gt:

و اخيرا جزاك الله خيرا

[moheltohamy]

أعرفك ع السريع كده قصة أحمد الديب...

أحمد الديب ده يا سيدي كان زميل دكة في تانية سانوي. وبعدين دخل كلية التجارة ، وبعد ما خلّص ، حب يدخل في مجال الكمبيوتر. :110:

المهم ، اشترى كمبيوتر ، وبدأ يذاكر في برامج الأوفيس ، وأخد دورة ف الأوراكل. الموضوع ده أخد منه سنة. وقعد يبعت السي في بتاعته للشركات اللي بتنزل إعلانات في أهرام الجمعة ، ويسافر القاهرة أحياناً عشان يقدم لشركات تانية ... وبرضه مفيش فايدة! :scooter:

المهم ، بعد فترة ربنا وفقه ، واشتغل سنة في شركة كمبيوتر بالقرب من جامعة القاهرة. وبعدها ولاد عمه (عايشين في أمريكا من زمن ، وفاتحين شركة من ضمن نشاطاتها التوظيف – كونتراكتور يعني) بعتوله عقد عمل ، وطلع اشتغل مبرمج كمبيوتر في سانتا كلارا (بجوار سان فرانسيسكو – كاليفورنيا) ، وبالقرب من السيليكون فالي (Silicon Valley) ؛ حيث معقل شركات الكمبيوتر الكبرى (إنتل ومايكروسوفت ... إلخ).

وأثناء وجوده هناك – من منطلق إنه ما يضمنش إذا الأمور سارت على ما يرام وهيتجدد له الفيزا بعد انتهاءها ولاّ باي باي - قدم ع الهجرة لكندا أثناء وجوده هناك ، وبعد سنتين جاتله الموافقة على الهجرة. وبمجرد انتهاء عقده في أمريكا (4 سنين) ، طلع من هناك على كندا ، وحالياً بقاله في تورونتو 4 سنين وشوية ، ومعاه الجنسية ، وبقى أحمد بيه الديب ؛ بعد ما كان الواد أحمد الديب!

أفتكر إني كنت بعتّ له جواب أيام سانتا كلارا باسأله على الدنيا ، وانطباعاته الأولى عن البلد ، ومدى إحساسه بالغربة!

أفتكر رده كان إن الغربة دي كان حاسس بيها في مصر ؛ بين أهله وأصحابه ؛ وهوه متخرج وقاعد ف البيت من غير شغل ، وبياخد مصروفه من البيت ، وأخته بتشتغل وبتصرف على نفسها! واصحابه كل واحد مشغول بحاله ، ومحش فاضي لحد! :)

أحمد بيه الديب ده يا سيدي كان التور جايد بتاعنا في بلاد الفرنجة ، وبابا الروحي اللي كل ما تحصللي مصيبة ؛ أروح أعيطلُه ، واقول له إلحقني ، أو – زي أحمد رمزي ما كان بيقول لعبد الحليم حافظ – دبرني يا وزير!

وبصراحة ؛ أحمد عمل معانا أحلى واجب ، وكان شايلنا من ع الأرض شيل... بجد أحمد شال من على اكتافنا حِمل غير طبيعي ، وعمل لينا صاپُّورت جامد ، وكفاية اطمئنانك ، لو حصلتلك مشكلة ؛ هاتصل … تعالى يا احمد الحقني! وعلى مدار الهاند أوفر هتشوف مواقف كتير ، أحمد كان دايماً جمبنا فيها.

ودي أحسن حاجة إنك تروح تلاقي واحد تتسند عليه في الزنقات ؛ عن اللي ما يعرفش حد هناك خالص!

تم تعديل 29 يوليو 2008 بواسطة moheltohamy

[moheltohamy]

نيجي لتدويرنا عن الشقة ...

كنا بنعتمد في البداية على الإعلانات في الجرايد (من أبو بلاش) ، أو شركات السماسرة (خصوصاً إن ف العمارة اللي جمبنا – أيام إيلما جِست هاوس – كان فيه شركة من دول).

لكن بعد كام يوم ؛ لقينا إن أحسن حاجة إنك تروح المنطقة اللي تحب تسكن فيها ، وتدخل على أي العمارة ، وتتصل بالإنتركَم اللي تحت بالسوبر انتندنت (مندوبة الشركة اللي ماسكة إدارة العمارة) ، وتسألها على شقق فاضية.

وبصفة عامة ؛ العمارة اللي فيها شقق فاضية بتلاقيهم حاطّين إعلان أمام المبنى ، برضه تدخل ع السوبر انتندنت وتستفسر منها ؛ وتاخدك تفرجك ع الشقة ، وتعرف منها كل التفاصيل. ولو قررت خلاص إنك عاوز الشقة ؛ بتديلك أپليكيشن تملاها ببياناتك ، وطبعاً السِن نَمبر ، وهمه بعد كام يوم هيردوا عليك ، ولو أوكيه ؛ تروح تمضي عقد الشقة ، وتدفع شهرين من الإيجار (الشهر الأول – مقدماً يعني – والشهر الأخير – بمعنى آخر شهر ليك ف الشقة أبل ما تسيبها مش هتدفعه).

ومفيش طبعاً قصة شهر ولا شهرين التأمين السافلة اللي بنعملها ف مصر! مانتا اللي هتبوّظُه هتصلحه قبل ما تمشي! مفيش حاجة اسمها تخلع وتدبّسُه في الإصلاحات (ما تنساش الكريديت بيرو)!

مقارنة كده ع السريع بمصر... الراجل اللي كنت مأجّر منه الشقة بتاعت مدينة نصر كان واخد شهرين تأمين (3.400 جنيه) ، لما جيت أمشي – كتّر خيره بصراحة – رجّعلي شهر وأخد شهر! عشان أنا بهدلت الشقة وعملت خروم ف الحيطة! شوية المسامير اللي دقّيتهم عشان البراويز والساعات والستاير هيكلفوه 1.700 جنيه! عمار يا مصر!

زي ما قلتلك... البداية كانت ف العمارة اللي جمبنا في سكاربرو. دخلنالهم ؛ وإدونا عنوان شقة في الداون تاون (وسط البلد يعني) ، وكانت في كينج ويست (حتة قريبة جداً م الـــ Harbour-front ؛ قريبة من شاطئ البحيرة يعني). رحنالها ، وقابلنا السوبرانتندنت ؛ ست عجوووووووووزة موووووووت ، وتشوف الدلع اللي مدلعاه لنفسها ، وحاطّالي روچ ومانيكير وباديكير أحمر! الله يرحمك يا تيته! وشفنا الشقة ، كانت مش بطالة ، ومفروشة موكيت ، ولسه مدهونة. وكان إيجارها في حدود الــ 900 دولار. ما كناش عاوزين نعدي الألف دولار في الشهر. المهم أخدنا من الست أپليكيشن ، وقلنالها هنملاها ونجيبهالك.

وعدينا على عمارة تانية ف المنطقة دي برضه (كينج ستريت ويست). واحنا رايحين لها ؛ شفنا ناس فارشين ملاية ولا بطانية ع الأرض ، وبيبيعوا حاجات قديمة من عندهم (عجلة بايظة – أطباق قديمة – أجهزة مستعملة قديمة) ؛ حاجات تحس إنك ممكن تشيلها كلها على بعض بـــ 10 دولار ولا حاجة! قلت حلاوة... البيت باين من عنوانه!

شوية كمان لمحت سوبر ماركت (Hasty Market) وده كنت باسمع عنه من زمان ؛ البت كارولين كانت ماسكة فرعين منه في هاميلتون (هاحكيلك عليها بعدين). قلت لازم أصوره ؛ دا حاجة من ريحة الحبايب. ألاقي قاعد جمبه واحد ما تعرفش شحات ولا هوملِيس (Homeless)! بس الملاحظ إنه كان عنده لطف شوية ؛ وعمال يكلّم نفسه! طبعاً طلّعته من كادر الصورة! ولمحت كذا واحد زيه كده قاعدين ف الشارع في المنطقة! شحاتين وروبابيكيا؟ ربنا يستر ع اللي جاي!

رحنا ع العمارة التانية دي (كنا جبنا عنوانها وتليفونها من جورنال من أبو بلاش دول :phar: ). الناس اللي مقابلينّا ف الشارع شكلهم مش اللي هوه بصراحة! طبعاً كلنا ولاد تسعة ، ما قلتش حاجة! بس فيه ناس تشوفهم تحس إنهم ولاد ناس ، وناس تانية تقلّق من مناظرهم! قلت عادي يابو سعد... ما تاخدش بالمناظر... يعني انتا اللي شكلك ابن باشا؟! :wub:

ندخل العمارة ، نيجي نستدعي الأسانسير ، الزرار ما بيشتغلش! وناس كانوا ف الطرقة آلولنا إنه عطلان ؛ خدوا التاني. واحنا واقفين نستنى التاني على ما ييجي ؛ نلمح ورقة ملزوقة بتحذر من إن تكرار اللعب في الزرار بتاع إنذار الحريق هيؤدي للعقوبات الجنائية وكده! وجمبها ورقة بتطلب من الناس اللي يرمي الزبالة يحطها في داخل صندوق النفايات ؛ مش جمبه ع الأرض! أنا وهند بصينا لبعض ، وبصراحة كنا اتقفلنا من العمارة والمنطئة كلها ، وكنا على شعرة! إيه يا عم مستوى الناس اللي ساكنين هنا دول؟!

واحنا واقفين لسه مستنيين الأسانسير ... بووووووووم! :waf: أبص جمبي ف الطرقة ... الوش الزجاج اللي بيغطي لمبتين نيون ف السقف وقع ع الأرض واتدغدغ ميت حتة! ماهي ناقصة رعب أصلها! ساعتها بأه قلت لهند بالحرف (That's it!)... واخدتها وخرجنا م العمارة ، ومن المنطقة كلها!

رحنا بعد كده على الناحية التانية (الـــ East) ، وافكرك تاني ؛ البلد مقسومة إيست و ويست بـــ يانج ستريت.

شفنا شقة كويسة بصراحة ، وبتلعب برضه ف التسعميات دولار ، والمنطقة هادية وراقية ، ونضيفة ، وفي الداون تاون (خطوتين تتمشاهم تبقى في قلب الأحداث مباشرتن) ، والعمارة حلوة ، والفيو من البلكونة راااائع. تخرج البلكونة تلاقي في وشّك الـــ CN Tower ، منظر غير طبيعي! أنا كنت هاموت ع المنطقة والمكان بصراحة. بس طبعاً البروتوكول بيقول لازم تليفون على ديبو قبل ما نفكر حتى ناخد قرار! :lol:

- حتت شقة يا احمد م الآخر ، وشايف الـــ CN Tower من البلكونة ، وإيجارها رخيص ، والمنطقة تحفة. :phar:

- فين الشقة دي؟

- في شيربورن ستريت ، و إيتون سنتر على آخر الشارع. ألائي البيه يرد عليّا :

- "سيبك م الشارع ده يا محمد"! gra:-

- ليه يا احمد بيه؟

- إسمع الكلام وخلاص ، سيبك م الشارع ده بالذات ، إنتا مسافر تاني وهتسيب هند لوحدها!

- ما تفهّمني يا عم الحاج ، هوه سر؟

- هيه هند جمبك؟

- يا عم هوه انتا هتشتم؟ آديني بعدت عنها. فيه إيه بقى؟

- الشارع ده شارع البروستيتيوتس!

- يا رااااجل! طب وإيه المشكلة؟! هوه أنا هاخاف عليها منهم؟ هيعملولها إيه يعني؟!

- يابني إفهم... ماهي كل واحدة منهم ، وليها الفتوة بتاعها! والناس اللي بيتعاملو مع الأشكال دي بيكونو سكرانين ، وما تضمنش بيعملو إيه؟ ولو هند راجعة متأخر البيت لأي سبب ، مش هتكون حاسّة بالأمان وهيه مروّحة! ومن كام شهر حصلت خناقة ف الشارع ده (Chercher la femme) ، و واحد طلّع مسدس وقتل التاني ف الخناقة :lol: ! إبعد عن اللبش ده كله!

هاقول إيه؟ حاضر يا احمد بيه!

كملنا مشي وفرجة ، وجينا لمنطقة هادية وشجرها بيديها إحساس رومانسي ، وشفنا بيت عجبنا ، وكان عامل إعلان عن وجود شقق فاضية. قلنا قبل ما ندخل نبص ونتعب نفسنا ؛ ناخد الأوكيه الأول... wst::

ألو يا احمد... فيه شقة فاضية في حتة حلوة. إيه رأيك في شارع چارفيس؟ البيه رد : "إنتا يا محمد بتنشّن على راس القرد؟" ، ماله الشارع ده هوه راخر؟! آللي "ده شارع الجايز Gays"!

ساعتها ما قدرتش امسك نفسي من الضحك ، وقلتله : "آهو العالم دول بقى بالذات آخر ناس نقلق منهم ، دانا أسيب هند وسطهم واحط في بطني بطيخة صيفي! دول ملايكة يا راجل"! :lol:

آللي وانتا ليه تقعّدها في منطقة زي دي أصلاً؟! حاضر... تؤمرنا يا احمد بيه!

آخر ما زهقت ، قلت لهند : هوه أحمد كل ما هنقول له حتة هيطلّع لنا فيها القطط الفاطسة! إحنا نروح الحتة اللي هوه ساكن فيها ، ودي أكيد مافيهاش مشاكل بقى! وإلا ما كانش سكن هناك! ودي كانت منطقة يانج آند إجلنتون.

فيما بعد بقى بدأنا نكتشف إن منطقة يانج آند إجلنتون دي من أحلى الأماكن في تورونتو... تعتبر ف الميد تاون (ربع ساعة بالصابواي وتكون ف الداون تاون). بخلاف إن المنطقة نفسها هادية ، وراقية ، وفيها - تقريباً - كل حاجة ممكن تحتاجها. حتى هند لما كانت ف الشغل ويسألوها زمايلها ساكنة فين ، وتقول لهم يانج آند إجلنتون ؛ تسمع الـــ واااااو ... دي حتة تحفة! يا بختك! وهيه نفسها – هند – يوم بعد يوم ؛ ومع اللف في كافة نواحي تورونتو ، بيتأكد لها إننا أحسنّا الاختيار.

وفيه مناطق تفتكرها كويسة ورايقة وراقية ، لكن أرجع أفتكر كلمة عبد الرحمن ؛ الإتش آر بتاعنا ف پريسيچن أول ما دخلت الشركة ، وعرفت إني رايح البريمة 92 (أبعد بريمة عن القاهرة من بين براريم الشركة كلها – 8 ساعات سفر). رد عليّا وقاللي (البريمة بناسها يا دكتور). وما حسيتش بالكلمة دي ولا بمعناها غير لما رحت على البريمة 147 اللي انتا فيها حالياً أيام ما كانت في دمياط الجديدة. كنت انا أول رجل تدب فيها ، من قبل ما العيادة توصل حتى! وهمّه هيتشين فيها وكنت جايب آخري ؛ وباكلم عمك الزهار أترجاه (إعمل فيا جميل ، ورجّعني 92 تاني)!

نفس الموضوع بالنسبة للسكن في أي مكان. فيه عندك مثلاً المنطقة المحيطة بجامعة تورونتو (University of Toronto, U of T) ، اللي هيه في سپاداينا (China Town) أو الحي الصيني. ممكن هناك تشتري حاجات كتير وهدايا ومستلزمات الكمبيوتر ؛ وأسعارها رخيصة جداً. لكن ما يتسكنش فيها. فيها تجارة المخدرات ، والهومليس. والنصيحة دي أحمد اللي قالهالي.

وعندك كمان چين آند فِينش (Jane and Finch West) حتة هادية وكل حاجة... بس أوعى تفكّر فيها! هند اللي قالتلي ع المعلومة دي. كانت رايحة هناك عشان كانت شركتها عاملة بانكويت (وليمة – حفلة غدا) هناك. بتحكيلي عن الأشكال اللي نازلة معاها م الأتوبيس هناك ، والناس اللي ساكنة هناك... تجمع غير طبيعي من السود! حست إنها توريست وهيه هناك! جوّ لبش! بتقوللي فيه سود تحس إنهم ولاد ناس ومحترمين ، وفيه سود تحس بالإجرام على وشُّهم! وعرفِت بعدها إن المنطقة دي من أخطر الأماكن في تورونتو ، وإن البوليس كل فترة بيعمل زي حملة تفتيش هناك ع الأسلحة!

وفيه واحد مصري كندي مع هند ف الشغل حالياً. الراجل ده بيحكيلها إن واحد صاحبه كان سكن في المنطقة بتاعت چارفيس وشيربورن وتشيرش (الـــ 3 شوارع متوازيين ، وموازيين ليانج ستريت شرقاً ف الداون تاون). وكان رايح يعدي عليه ، وتاه شوية ف العنوان. لقى أوفيسَر (بوليس) جاي يسأله انتا رايح فين ، وبتعمل إيه هنا؟! رد عليه ، وقال له : جاي أزور واحد صاحبي ساكن هنا بس تايه ف العنوان. آل له أوكيه سير. مش الطبيعي إن حد يتكلم معاك أصلاً! تلاقي كان فيه مشاكل ساعتها أكيد! صدق أحمد!

تم تعديل 30 يوليو 2008 بواسطة moheltohamy

[hosiny]

ياسلام ايوه كده

مفيش احلي من كده

كنت مستني الحلقة دي و من غير ما تزعل و تقول بنضيعلك وقتك

معلومات تمام و تخلي الواحد ياخد باله من نقط زي دي كان مستحيل يفكر فيها لما ييجي يدور على سكن

الله يكرمك و يوفقك في مذاكرتك ياعم.....دعوة حلوة اهو