كندا التي رأيتها :)

[moheltohamy]

شكرا جزيلا على الموضوعات القيمه

بعد اذنك لي سؤال

كيفية الحصول علي او البحث عن وظيفة طبيب علي بريمه بحر

و لك جزيل الشكر

معلش... هوّه الموضوع خارج نطاق الهاند أوفر تماماً ، بس عموماً... كل حاجة بتيجي معايا بالصدفة ، ومن غير تخطيط. وطبعاً العلاقات الشخصية والمعارف همّه اللي بيفتحوا الطرق...

أعتقد مشاركة قديمة ليّا ممكن تعبّر عن الواقع...

هممممم ...أنا بقى كنت شغال في مصر أسبوعين شغل وسط الشمس والرمال واللون الأصفر في كل حتة ، والمرتب حلو ، وأسبوعين أجازة ؛ باقضيهم عااااطل رسمي في شقتي في مدينة نصر :lol:

آلولي تيجي السعودية تشتغل وسط المية وسمك القرش واللون الأزرق في كل حتة ، وتشتغل 6 أسابيع وتاخد 3 بس أجازة ، ومرتبك ضعف مصر... مصمصت في شفايفي شوية ، وهرشت هرشتين في دماغي ، و هرشة في دقني ، وأولتلهم طيب ، ماشي الكلام!

واتنسى الموضوع ، ونظام نحن ف الانتظار ، ولسه بس شوية أوراء ، وربنا يسهل.

ف الوأت ده لئيت واحد صاحبي بيكلمني ؛ ما تيجي يابو حميد عندنا شهر كده ، وممكن تستمر معانا ، وتسيبك م اللون الأصفر ، عندنا اللون الأزرق في خليج السويس ، والغردقة ، والنظام أسبوعين وأسبوعين ، والمرتب يعني بتاع مرة ونص المرتب! ماشي يابو رمزي

بعد شويتين ، ألائي بتوع السعودية بيكلموني ، عاوزين باسبورك عشان نجيبلك الفيزا وتجيلنا الأسبوع الجاي! وعندنا ليك مفاجأة...

الشغل 4 أسابيع شغل ، و4 أسابيع أجازة ، والمرتب بقى أربع أضعاف مصر...

يللا بينا ، وبرضه ...

تليفون تاني ، عاوزين إيميلك عشان نبعتلك فيزا الإمارات ، هتقعد شوية هناك قبل ما تتحرك ع السعودية! إتفضلوا ... و طبعاً ...

وانا ف الإمارات ... آلو تالت ولا ما بئيتش فاكر نمرة كام ...

عاوزين الباسبور عشان تاخد فيزا الهجرة لكندا ...

ساعتها بأه ... ما كنتش :lol: خالص!

وبعدين يعني؟ هوه الباسبور ده مش عارفين نتلم عليه؟! استنوا انتو بأه لما أبقى أفضالكو! مش ناءصين احنا خوتة وألبت دماغ!

بعد شهر رحتلهم ، اتفضلو الباسبور ، و كالمعتاد ... wst::

وشهرين كمان ، وعنينا يا ست كندا ، رحنا واتفسحنا ، وقضيناها 3 أسابيع ، وعلى مصر تاني ، ومنها ع السعودية ...

ومن هنا بدأت حياة التشرد اللي بجد!

من السعودية... لمصر... لكندا. وبقيت مقضيها على كده!

بس هل أنا كده ، أتحسب من المتغربين عن مصر؟!

أستغرب لو حد آل آه! (صباح الفل يا لولا) :closedeyes:

والغريب إن مع كل خطوة لأودّام ، مش بس المرتب بيزيد ، لأ ... المسئوليات والمجهود بيقلوا ، والفضا والمزاج والمخمخة والرفاهية بيزيدوا ، والأكل بيحلوّ

وتوتة توتة ، خلصت الحدوتة حلوة ولا ملتوتة؟!

د التهامي كيف حالك المهندس محمد انور و د ايمن انور بيسلمو ا عليك

قابلتوا علي بريمه سينو ثروه 5

تسلم يا باشا...

دانتا جاي من طرف الحبايب... وسلامي لهم يا باشا... ونشوفهم عن قريب

دا الواحد طلع إنو ما يعرفش يلعب في الدِرا هنا... كل شيجن مكشوفن وباين!

[moheltohamy]

كل مسمعك يا دكتور تهامي بتتكلم عن البريمة افتكر يلم عروس النيل

البريمة اتسرقت

وبير الجاز اتردم

إن جيتي للحق... أنا نفسي كل ما بافتكر البريمة في الأفلام مفيش غير فيلم (للرجال فقط) بتاع نادية لطفي وسعاد حسني وحسن يوسف وإيهاب نافع ، لمّا حسن يوسف (بتاع التهيؤات) كان بيقوللها (شيللاه يا ست يا برّيمة...) ، إنها تنتج وتطلّع بترول يعني ، عشان ينزلوا أجازة ، ويشوف الحريم تاني! :closedeyes:

لكن الفعلي بقى... البريمة دي - بالنسبة للدكتور - أرض المزاج والمخمخة

بافكّر أنزّل لكو شوية صور من البريمة على ما يخلص موضوع الشوبنج ... ربنا يسهّل.

[د هشام ابراهيم]

هل هلالك شهر مبارك .....منور بيتك و مطرحك يا رمضان يا أخويا ....قصدي يعني يا تهامي يا أخويا ..... بس ما هو كله برتقال (وش سعيد صالح بالجلابية البيضا و الطاقية في العيال كبرت )

عارف يا مستر هلق (Hulk يعني) ..... مشاركتك الأخيرة ديه بتفكرني بالحوار بتاع إن عيال الزمن ده مش عيال .... يعني ما فهمش البراءة و البساطة بتوع الأطفال .....تحس انهم بيكبروا بسرعه و بيفقدوا خصائص و طباع الطفولة بدري بدري ....ما علينا ...شاكرين مهللين يا أفندم علي المشاركات ديه و يارب تحن علينا و تنزل بالهاند أوفر قبل منحة يوليو :closedeyes:

[ايناس احمد]

انا برضو قلت كدا

طنط ايناس حتطلع حاجه تانيه

بس انسى بقى جيل اليومين دول بقى حاجه تانيه خالص ومبقوش يرضو بأى حاجه زينا

ولا بقى يأثر معاهم ربنا يعينا عليهم

[bent misr]

والله يا تهامي يا أخويا كنا مفتقدينك جدا جدا

انت ضحكتني ضحك مع اني كنت متضايقه حبتين

بس والله غيرت المود بتاعي خالص

روح يا شيخ ربنا يكرمك و يوسعها عليك :lol:

( دعوة ست غلبانه ساعة مغربيه ) :blink:

بس يا سيدي انت عارف اني بعمل مع ابني الصغير

حاجه كده شبه اللي كانت بتتعمل معاك بس بصراحه

أنا هبطل الاسلوب ده بعد ما شوفت تأثير عقدة الطفوله

معلش احنا بنتكلم ( على رأي أخونا ايهاب سالم )

و أدينا مستنظرين الهاندأوفر بتاع الشوبينج يا مسهل

أنا حاسه ان الهجره هاتجيلي و أعمل شوبينج قبل ما تنزلهولنا

بصراحه يا رب و ساعتها أوعدكم أنا اللي أطلع الطالعه دي :blink:

[dentist]

مبروك يا د-تهامي علي الاشراف ,,,معلش ردي جه متاخر لكن معلش ظروفي اليومين دول مش ولا بد....الظاهر كده ان ربنا سبحانه وتعالي بيوريني امارات علي اني اسيب البلد دي ( ان شاء الله ),,,ليه ,,,معاملة عسل في اخر شهرين في الكلية( شعارهم في الكلية = انت طالب ,,اذا انت .....) ,,,ورعاية صحية تهبل ( اختي كانت عاملة زرع كلي وجالها قئ واسهال,,,عادي لكن كليتها بازت بسبب الرعاية)تقول ايه بقي ياسيدي...ياريت بقي تحكيلنا عن النظام في المستشفيات هناك,,المعاملة ازاي ,,كده يعني

[moheltohamy]

أحب اقول لكوا إني سعيد جداً جداً حالياً...

أحكيلكوا الحدّوتة من أولها...

أنا مبدئي في الحياة... يا أجيب أحسن حاجة موجودة أدّامي ، يا ما اجيبش خالص! واصبر ، لغايت ما نلم قرشين واجيب أحسن حاجة. الحاجات الوسط دي مش بتاكل معايا! قلّتها أحسن!

أنا المرّادي رايح على كندا بعد أسبوع تقريباً... وناوي إن شاء الله أأجّر عربية معظم الفترة دي (تقريباً 26 يوم) ، وبالتالي أنا محتاج للواد النافيجيتور. أدّامي حل من 3...

1- يا إما أأجّره زي ما عملت الأجازة اللي فاتت ، وبالتالي مع الفترة دي كلها ؛ سعر إيجاره هيعدّي 220 دولار (سعره أصلاً 250 دولار) ، وأبقى كاورك لو عملتها!

2- يا إمّا أشتريه وآهو يبقى اسمه بتاعي ، ومحدّش استكرضني (مش بتتكتب كده برضه؟) ، وبرضه الجارمن نوفي مش وحش ، وله شعبية جامدة هناك في كندا ، بس ده ضد مبدئي ف الحياة!

3- أمشي على مبادئي ، وما اتخلاّش عنها... واشتري الـ GPS الحلم اللي نفسي فيه من زماااااان!

وطبعاً... الحياة مبادئ ، ولا مونكن أبداً أتخلّى عن مبادئي مهما كانت المغريات

آدي الجهاز الحلم يا سادة...

وده موقعه الرسمي:

الموديل طبعاً هوّه TomTom GO 940 Live ، وتومتوم دي شركة انجليزية ، ومنتجها ده كان موجود في مطار هيثرو وانا رايح كندا المرة اللي فاتت ، وحتى أخدت صورة للموديلات المتاحة ، وقلت أبقى أشتريه وانا راجع على نفس المطار ؛ وأكون عملت تشيك على السعر والمواصفات من ع النت ، اللي لم تكن متاحة في المطار المرة اللي فاتت لو تفتكروا!

وطبعاً مع رجوعي والموقف إياه لما لقيت المندوب السامي البريطاني واقفلي مستنظرني على باب الطيارة ، عشان يهنّيني بسلامة الوصول لأرض المحروسة الانجليزية ، ويرافق الموكب بتاعي حتى طيارة جلف إير! وبالتالي لا كان فيه فرصة أشتري التومتوم من هناك ، ولا حتى إزازة البارفان الأستاذة اللي قلت أشتريها برضه وانا راجع!

وعمّال باضرب نفسي ميت جزمة إني ما اشتريتهومش وانا مسافر أول مرة ، وخير البر عاجله! خصوصاً إني حجزت المرّادي على طيران Air France ، وسعرها أصلاً غالي 944 دولار أمريكي! والبريتيش إير وايز أغلى منها بميتين دولار تانيين! آخر حلاوة يعني! :lol:

وطبعاً الموقع الرسمي لتومتوم بيه مش هيبعت برّه انجلترا ، والأماكن اللي بتبيع التومتوم في كندا بالكامل ما بتتعاملش في الموديل ده... الـ GO Live 940 بالذات مش موجود في كندا بالمرة ، بوتايتن يعني! طب والحل؟! معانا ناس هنا ع البريمة بريطانيين وآيرلنديين بيعدّوا ترانزيت على مطار هيثرو... لكن على بختي النحس محدّش منهم جاي المرّادي قبل ما أنزل بكره!

طب أنزّل برنامج الـ Garmin XT ع الموبايل النوكيا N95 ، وآهي أي حاجة تقضي في المصلحة ، وآديني مدوّخ حسيني معايا ع الكراكات والخرايط والبرامج والحاجات دي كلّها... طبعاً إيش جاب لجاب من حيث الإمكانات والدلع ، والوضوح وكل هذه الأشياء ، لكن مجبر أخاك...

وأثناء تدويري ع النت ، إذ بي أفوجأ ، وأخبط واتكعبل في موقع كده ، ومن غير لا إحم ولا دستور...

موقع انجليزي للشوبنج ع النت ، وعندهم خدمة عملاء لايف زي برامج الشات والماسنجر كده... أدخل أكلّم الجدع... سلامو عليكو (جود أفتر نون يعني بالافرنجي) ، ويدور بيننا حوار...

- أؤمر سعاتك...

- أنا ناوي أشتري التومتوم جو 940 لايف

- ...

- كنت عاوز بس أتأكد إن كنتو بتبعتوا البضاعة لكندا ، ولا انتو ما عندكوش الخدمة دي؟

- ثواني أسأل لك..........

- :lol:

- أيوه يا فندم ممكن ، مفيش مشكلة ، بس تختار في وسيلة الدفع Google Checkout أو BAC

- بس انا عاوز أدفع بالكريديت كارد بتاعي (جوجل إيه بس العبيط ده ، هوّه هياخد عنوان بيتنا؟!)

- أيوه حضرتك... عن طريق الجوجل هتدخل بيانات الكريديت بتاعك ، وتشتري من خلاله

- طيب والمفروض أنتظر الشحنة توصل بعد أد إيه كده؟

- أمريكا بتوصل لها في خلال 2-4 تيّام ، So, it must be the case with Canada (مش عاجبني في الليلة دي غير كلمة must اللي استخدمها الجدع!)

- طيب وعلى كده المفروض يكون ليّا أكاونت على جوجل؟ (سؤال غلس فعلاً مش عارف أنا ليه سألته ، مع العلم إني عندي إيميل ع الجوجل أصلاً) po::

- ........

- إحم... طب والعبوّه اللي هاشتريها من عندكوا فيها إيه؟ وهاستلم ضمان من عندكو على كده؟

- ..........

- عم الحاج... ألووووووووه

- ..........

م الواضح إن الخط قطع عندهم :D

وبيني وبينكو... أنا لو كنت مكانه ، كنت عملت أكتر من كده! إيه الأشكال الغريبة اللي بنقابلها ع النت دي؟! :lol:

عادي بأه... ضمان إيه وبطّيخ إيه؟! إحنا مش بتوع الكلام ده! ربك بيسترها

الغريب فعلاً إن سعر الجهاز الرسمي 400 استرليني ، وع الموقع ده سعره 295 استرليني ، وعليه شنطة سفر ببلاش (للجهاز وملحقاته) سعرها أساساً 30 استرليني (ده عرض شغال حالياً) ، وبالمرة اشتريت شويّت اكسسوارات للجهاز ، عليهم 16 استرليني تمن الشحن ، ومن غير ضرايب! والليلة كلها صفصفت على 330 استرليني ، يعني أقل من تمن الجهاز لوحده من شركته! (بنتكلّم في بتاع 600 دولار كندي)

طبعاً هند حذرتني من الجمارك اللي عليه ، والضريبة... وقلتلها حتى لو أخدوا إيه... لو أخدوا 30% ، برضو أرخص لي! وحتى لو ما كانش أرخص لي... المهم إني لقيت سكة أشتريه بيها :lol:

آدي الموقع التحفة اللي اتكعبلت فيه من غير ميعاد...

المهم... أومت داخل بسدري ع الويبسايت ، وشاري البتاع ، ونقضي ف المصلحة (اللي استغربتله إن جوجل المعفن مش معترف بأي كريديت كارد طالع من مصر! السعودية ممكن ، السنغال ممكن! مصر لأ! po:: )... الكلام ده كان امبارح الساعة 10 ونص مساءً (بتوقيت السعودية). بكده بقى البتاع ده ياخد راحته على ما أوصل يكون وصل بالسلامة.

ألاقي هند النهارده باعتالي تقوللي المحروس وصل :D

وصل النهارده الساعة 10 ونص الصبح بتوقيت كندا (19 ساعة فقط من بدء عملية الشراء) :lol:

19 ساعة بس (منهم ربع ساعة ستاند باي عشان لو رجعت في كلامي كان ممكن ألغي العملية) ، والجهاز اتلفّ ، واتشحن على فيديكس ، ومن انجلترا لكندا ، لتورونتو لباب البيت!

والأجمل من كده ، مفيش أي رسوم إضافية لا وزن ولا جمارك ولا ضرايب مطلوبة!

عاشت كندا حرة مستقلة ... ويحيا فيديكس

[precanadian]

الف مبروك ياابو سعد علي التومتوم po:: :D :lol:

والله اخدني الفضول وانا في المطار وشفته بس احرجت اسال علي سعره لو اعرف كنت جبته لك.

كان بيجنني يا ابوسعد ان الباص كل ميدخل شارع يقول اسم الشارع الي ماشي فيه هل النوع ده برده بيتكلم ويقول اسماء الشوارع؟

[حسام يوسف]

بجد يا عم تهامى

قهوتك وهاند أوفرك مش بس بستمتع بيه

لأ

وبتعلم منه كتير كمان

حقيقي خبراتك الحياتية ما شاء الله

وعمار يا كندا

ويارب كندا

[torontoz]

- أنا ناوي أشتري التومتوم جو 940 لايف

طب ليه النوع ده بالذات 940 جو لايف هو انت نويت تشتغل سواق تراك؟ولا بعزئة فلوس..علي الفاضي..ماكنش ينفع معاك حاجة بتكلم وبس..؟الأوبشن اللي انت حتستخدمه موجود في النوع الرخيص توم توم برده..وبيشتغل بنفس كفاءة 940 ..الله يسهلك ياعم الحاج

[الأهلاوي الأصيل]

طيب يا تورنتو ممكن تقولنا الفرق بين الاتنين عشان نفهم الموضوع برضه

أنا عندي الجارمن منزله على النوكيا الكومينيكاتور وشغال زي الفل...

ياريت حد يفهمنا الفروق بين المواضيع دي كلها

[torontoz]

طيب يا تورنتو ممكن تقولنا الفرق بين الاتنين عشان نفهم الموضوع برضه

أنا عندي الجارمن منزله على النوكيا الكومينيكاتور وشغال زي الفل...

ياريت حد يفهمنا الفروق بين المواضيع دي كلها

هذا النوع معاه برنامج خاص بالعربات الكبيرة...يوضح الطرق التي لا تسطيع المركبة المرور عليها..ليس فقط لحمولتها ولكن ربما يكون في نهاية الطريق كوبري ارتفاعةلا يسمح بمرور العربات الكبيرة اسفله.وهذا النوع منتشر في امريكا..وكندا..هذا هو الفرق الوحيد..

[Alrefaey]

معلهش يا اخوان اخوكم جاهل شوية فى الموضوع ده هو ايه برنامج Garmin XT واذاى انزلة واستخدمة على N95 وهل ينفع فى السعودية

[dodietman]

تحفه حته العربيه ال TOYOTA يا دكتور وخصوصا مع التوم توم والنضاره الشمس بس عايزين لون عربيه تاني روش ياباشا علشان ابو سعد smk: B) pps:

هي صحيح موديل تاني Toyota Tacoma ..... بس برضه T و لون روش طحن mf) :lol:

الله ينور عليك يا دكتورنا المهم ابو سعد يكون ماشي معاه اللون.

التويوتا Toyota Tundra بتفكرني بايام الجيش في 95 لما كنت في قاعده فايد الجويه كان الطيارين كلهم عندهم شبه العربيه دي (العجل الخلفي دبل) بس GMC اخر دلع علشان يتحركوا بيها في القاعده الجويه او ينزلوا بيها فايد او الاسماعيليه .... ايام :blink: :lol: .

ياه انت رفيق سلاح بقه دلوقتى.. .انا برده مجند طبيب فى قاعدة فايد الجويه . ...وموش طايق بصراحه ..عايز اخلص بسرعه ...

ياترى فاكر الايام دى والا موش عايز تفتكرها .. .طمنى عشان انا زهقان الفتره دى من الجيش اوى وحاسس انه موقف مستقبلى :

بس على فكره يا دكتور precandaian الطيارين غيروا لهم العربيات دلوقتى والبركه فى المعونه الامريكيه

تم تعديل 11 أبريل 2009 بواسطة dodietman

[د هشام ابراهيم]

الله ينور عليك يا دكتورنا المهم ابو سعد يكون ماشي معاه اللون.

التويوتا Toyota Tundra بتفكرني بايام الجيش في 95 لما كنت في قاعده فايد الجويه كان الطيارين كلهم عندهم شبه العربيه دي (العجل الخلفي دبل) بس GMC اخر دلع علشان يتحركوا بيها في القاعده الجويه او ينزلوا بيها فايد او الاسماعيليه .... ايام dct:: dct:: .

تخيل حضرتك كده جاوبت علي سؤال ما كنتش أعرفله إجابة .... العربيات الدودج رام و الفورد F150 و ال-GMC سييرا دول بيعملوا إيه في شوارع المحروسة .....بالذات طريق مصر الاسماعيلية ..... فعلا مصر أم الدنيا :blink:

[hgalal]

ضحكتنى والله يادكتور تهامى

بس ايه الرعب اللى عيلتك معيشينك فيه دا

اوعى تقولى ان طنط ايناس الحقيقيه هى كمان كدا

طنط إيناس دي كانت دايماً حبيبة قلبي (هوّه أنا باعزّك من شويّة :lol: )... أصغر الخالات ، وأقربهم لينا - إحنا الأحفاد - في السن ، وياما لعبنا مع بعض ، كوتشينة وصلّح واستغمّاية واستريب بوكر :lol: وتماثيل!

وأكلها ياما استمخّيت منه... كانت أحسن واحدة في خالاتي بتطبخ ، وأكل دلع ، وخصوصاً صينية الروستو ، والجيلي المتعدد الطبقات ده (حتى مش فاكر كان اسمه إيه)... كان الطبقة الأولى جيلي مع بسكوت ماري متكسّر ، وفوقها كاستر بالفانيليا ، وفوقه مهلبية بالكاكاو ، وفوق خالص جيلي عادي ، وعليه كريم شانتيه!

ولاّ أيّام الكشري مكرونة اللي كنا كلنا - الأحفاد - نتجمّع في بيت العيلة عند خالاتي ، ونهيص!

والبسبوسة ، والفيشار ، ... مش عارف هاحكيلك على إيه ولاّ إيه!

خالتنا التانية اللي كنا بنحبّها موت ، ونفرح جداً وأقصى مُنانا إنها تخرج معانا نتفسّح... كانت طنط يسرية!

كان أساسي في الفسحة معاها اللأس... طول الفسحة... عصاير - فيشار - غزل البنات - شوكولاتة كورونا - بسكوت بيمبو - سوداني (Pea-Nut) - عصير قصب... إلخ!

هوّه إيه أقصى أحلام أي طفل في الأزمنة دي (أوائل التمانينات)؟!!!

بس تعرفي صحيح إن خالاتي دول كانوا بيشتغلونا موووت؟! كانوا لمّا يشوفونا - الأحفاد طبعاً - عاملين دوشة ييجي دور اللعبة العبقرية... التماثيل! كلنا نعمل تمثال ، والخسران هوّه اللي يتحرّك أو يتكلّم الأوّل! وتسيبنا ، وكل شويّة تيجي تعدّي علينا عشان تحبُك الفيلم!

لدرجة إنهم لما ماما أو خالتي الكبيرة تقلق (ما همّا مش سامعين لنا صوت) تفتكر إنها ربطتنا الربطة السودة دي ، ونسيتنا! تيجي وبرافوووو ، إنتو كلكوا شاطرين ، كلّكوا كسبتوا!

وطبعاً كانت مشهورة جداً لعبة (سكت الجميع ثم تكلّم الحمار وقال...)

طبعاً أوّل واحد هينطق بعدها معروف هيبقى هوّه إيه! :lol:

مرّة بابا الله يرحمه عملها مع سامح أخويا (كان شقي جداً) ، والمهم طبعاً مفيش كلمة... وناموا (سامح وبابا) ، وتاني يوم الصبح لما صحينا... وبابا بيقول لسامح يللا الفطار... وسامح السوسة طبعاً... هيييييييييييييه ، إنتا اللي اتكلّمت! :lol:

مش هاجي لليومين دول بقى ، واستلمي بقى قنوات الدش بتاعت الأطفال ، والبلاي ستيشن ، والموبايل...

دا المفعوصة بنت (بنت خالتي وتاني فريق الأحفاد - أنا التالت)... البنت دي - نورهان ، بتاع 3 سنين - كانت عندنا في البيت (مامتها سابتها عندنا تلعب شويّة على ما تروح تخلّص مشوار) ، فباعزم عليها بشوكولاتاية (من نوعيّة كوفرتينا بتاعت العلب دي)... أفوجأ بالهانم تاخدها مني ، وتفضل ماسكاها! ما تاكلي يا نورا... البنت تتكسف وتقوللي... أنا باكل شوكولاتة كادبوري بس! :lol:

مش قادر أوصفلك كان شكلي عامل ازاي ساعتها... أنا بقيت في نُص هدومي ، لدرجة إني احتقرت نفسي بعدها! :lol:

من يومها وحياتك... مفيش غير شوكولاتة Lindt اللي باروح لها بيها! :lol:

حبيبي يا دكتور تهامي واللهي فكرتني بأجمل أيام. المهم الغريب ان الالإلعاب دي دي كانت منتشرة في مصر كلها واحنا في السن ده. يا ترى لسسه بيلعبوا نفس الرلعاب دي دلوقتي؟ :blink:

ولا النت اكل دماغ الإطفال خلاص.

إما بأه بالنسبه لشيكولاته كورونا فأنا واللهي بحن ليها على طول ولازم اروح اشتر من فرع كورونا اللي في وسط البلد كل ما انزل مصر. طبعا من الظلم مقارنتها بكادبوري اوlindnt لكن بجد كورونا واحنا صغييريين كانت من افضل الإنواع ولحد دلوقتي انا بحب الشركة دي ( دا كفاية البيمبو والباكجينج بتاعها اللي مرسوم علية الواد ابو خدود ده :lol: ) بجد الشركة دي شوفوا كانت انتاجها من زمان حلو كان حلو ازاي يعني لو كان عندنا ناس بتشتغل للبلد بجد كان المفروض الشركة دي تكون من اكبر صناع الشيكولاته علي الإقل في الميدل ايست. يعني شركة ULKER التركية مش اقدم منها اوي انها توصل دلوقتي وتفتح لها مصانع في السعودية؟؟؟؟؟ :blink:

[precanadian]

ياه انت رفيق سلاح بقه دلوقتى.. .انا برده مجند طبيب فى قاعدة فايد الجويه . ...وموش طايق بصراحه ..عايز اخلص بسرعه ...

ياترى فاكر الايام دى والا موش عايز تفتكرها .. .طمنى عشان انا زهقان الفتره دى من الجيش اوى وحاسس انه موقف مستقبلى :

بس على فكره يا دكتور precandaian الطيارين غيروا لهم العربيات دلوقتى والبركه فى المعونه الامريكيه

طبعا فاكرها يا عزيزي وكلنا بيجي لنا الاحساس ده في الجيش وبكره تخلص التجنيد وتدخل معمعة الحياه يا دكتور. اما بالنسبه للصوره , انا حاسس ان الصوره من داخل قاعده فايد لان الجبل الي في الخلفيه هو الي في احد جوانب القاعده بس اللي محيرني معقوله جابوا للطيارين عربيات لونها احمر

تم تعديل 14 أبريل 2009 بواسطة precanadian

[moheltohamy]

تحيّاتي من أرض المحروسة أم الدنيا!

وطبعاً ما فيش دي إس إل ، والدايال أب مطلّع عيني ، وكان الحل إني أدخل من اللابتوب بتاعي عن طريق البلوتوث للموبايل ، ومنه للإنترنت عن طريق شبكة فودافون!

الحياة قاسية!

طبعاً من نافلة القول إني أقول إن الموقف الزبالة إيّاه اتكرر في المطار المرّادي برضه ، ومن المتوقع يكون في انتظاري كرسالة الترحيب مع كل مرة أطأ فيها أرض المحروسة!

حاجة هم!

وحشتيني يا كندا... وكلّها 3 تيّام يا مصر!

متخيّلين طبعاً اللخمة اللي فيها في الكام يوم دول قبل ما أطلع على كندا... فـ معلش ، أعتذر عن التذبذب في التواجد معاكم حالياً... أروق بس شوية ، وأرُد عليكو...

أعترف بس بحاجة... أنا خنتك يا هشام!

خنتك وأجّرت عربية في مصر ، وباسوق فيها بكل انسجام كمان! كده طبعاً هاخد مخالفات بالعبيط مع بداية وصولي لكندا!

سامحني يا هشام يا خويا

[SoSo R]

تحيّاتي من أرض المحروسة أم الدنيا! :rolleyes:

وطبعاً ما فيش دي إس إل ، والدايال أب مطلّع عيني ، وكان الحل إني أدخل من اللابتوب بتاعي عن طريق البلوتوث للموبايل ، ومنه للإنترنت عن طريق شبكة فودافون!

الحياة قاسية!

طبعاً من نافلة القول إني أقول إن الموقف الزبالة إيّاه اتكرر في المطار المرّادي برضه ، ومن المتوقع يكون في انتظاري كرسالة الترحيب مع كل مرة أطأ فيها أرض المحروسة!

حاجة هم! i*:

وحشتيني يا كندا... وكلّها 3 تيّام يا مصر!

متخيّلين طبعاً اللخمة اللي فيها في الكام يوم دول قبل ما أطلع على كندا... فـ معلش ، أعتذر عن التذبذب في التواجد معاكم حالياً... أروق بس شوية ، وأرُد عليكو...

أعترف بس بحاجة... أنا خنتك يا هشام!

خنتك وأجّرت عربية في مصر ، وباسوق فيها بكل انسجام كمان! كده طبعاً هاخد مخالفات بالعبيط مع بداية وصولي لكندا!

سامحني يا هشام يا خويا

مساء الخير يا دكتورنا و مشرفنا العزيز:

مصر منورة و كندا هتنور قريب

معلهش بقالى مدة ما عديتش من هنا فقلت أعدى أرمى السلام وأمشى

واضح إن فودافون عامل واجب جامد بدليل إن حضرتك منورنا حاليا فى المنتدى

لكن لى أعتراض على موضوع إن الحياة قاسية...

أنت المفروض كنت تطلع مهندس إتصالات مش دكتور...من كتر الألتفافات اللى بتعملها عشان تتحايل على الموضوع...بس الغلابة أمثالنا اللى بيغرقوا فى شبر ميه يعملوا إيه؟؟!!

وعشان ما تقولش الحياة قاسية...كنت المفروض تعيش فى أيام الحمام الزاجل أو أيام التليفون الكوز اللى بحبل

أو زمااااااااااان لما كانوا بيحلقوا للراجل زيرو..يكتبوا على دماغه الرسالة ويسافر...عقبال ما يوصل ...يحلقوا له تانى...عشان يقروا الرسالة

عشان ما ترجعش تانى تقول كلمتك المشهورة...................

حاجة هم :closedeyes:

تحياتى

سوسورانى

[torontoz]

ما تنساش تأكل معاك دكتور هشام من الرنجة اللى أنت جايبهاله مخصوص من النصورة

md2:

ما تخافيش يا دكتورة ...الأمن الرنجي مستتب جدا في كندا ..... الحمد لله ما بين محلات سكاربورو و ميسيسوجا عندنا اكتفاء ذاتي و فائض كمان :blink:

متأكد حدرتك..طب والتسعين مسلم مابين مصري علي باكستاني علي سوري اللي جالهم تسمم العام الماضي في تورونتو ومسيساجا جراء أكلة رنجة..تقول فيهم ايه..اوعي تقولي ماعندكش خبر بيهم..

wst::