كندا التي رأيتها :)

[أحمد سيف]

بعد ألف مليون مبروك و بتاع أنا عايز أشهد المنتدي كله ......كابتن دكتور تهامي يا أخويا الأخضر طالع رحلة استكشافية لجبال الروكيز الكندية ...... مفروض إنه حيرجع محمل بصور جامدة ...كل المطلوب من سعادته يحن و يحملها لرواد الكافيه ....... لو ما نزلهاش بقي يبقي إذن هي الحرب يا ريتشارد باشا :winner:

هنيالك يا تهامي باشا ... يا فاتح جبال الروكيز الكندية ... تصدق أنا بقالي كثير بحلم برحلة زي دي على الروكي ماونتنير اللي بين كالجاري وفانكوفر ... وإن شاء الله أعملها لما أروح كندا

[bent misr]

الف مليووووووووون مبروووووووك يا تهامي يا اخويا

بجد النجاح حلو و ربنا يديمها عليك نعمه و علينا جميعا

و الله الواحد بقى حاسس انه ليه عائله تانيه هنا في المنتدى

وسلامي لهند و ربنا يكتبلك الاستقرار في كندا على خير :rolleyes:

معلش الصداقه و الاخوه اللي بينا حاجه وصور الرحله السريه دي

حاجه تانيه خالص

فياريت تنزل بالصور لحسن د / هشام هيعلن الحرب :lol:

وربنا يستر عالقهوه والي هيجرالها من ورا الصور دي :lol:

على رأي باش مهندس ايهاب ( معلش احنا بنتكلم ) :lol:

[moheltohamy]

وعادت إلى قواعدها سالمة

إحساس الـ Home Swet Home فعلاً مش باحسه غير في تورونتو. بلا ألبيرتا بلا هجص يا جدعان!

تحياتي من تورونتو ، وإن شاء الله قريباً نعود بالدسِم من الأخبار والحكاوي.

دوموا بخير :closedeyes:

[ايهاب سالم]

أمس

قام السيد الحاج الطبيب التهامي ياخويا بزياره تفقديه لمدينة مسيساجا الزاهره و بالتحديد إلى منطقة بورت كريدت حيث يسكن العبد الفقير إلى الله ... و صاحب سيادته في الزياره السيد / أحمد الديب الشهير ب ديبو

كنت في شرف إستقبالهما أمام الكميونيتي سنتر حيث يتعلم الأولاد فنون الكاراتيه

حضر السيد الحاج الطبيب التهامي يا خويا في سيارته البونتياك ذات المحرك 8 سلندر و شوهد ال جي بي إس الحلم يا ساده ينتصب شامخا على تابلوه السياره ... طبعا زي ماحنا عارفين الجي بي إس الحلم مفيهوش بحث بالبوستال كوود و اللي هي خاصيه في أحقر الجي بي إسات (زي اللي عندي مثلا) .. .... معلش يا هشام ياخويا .... جين إكس نئح عليا :P

المهم ... ما إن شاهد السيد الحاج الطبيب التهامي ياخويا لافته مكتوب عليها port credit حتى صاح بورت كريديه ... طبعا زي ماحنا عارفين ثقافته فرنساوي ;)

خلال الزياره ...أبدى السيد الحاج الطبيب التهامي ياخويا إعجابه بحدائق بورت كريديه :closedeyes: الغناء ثم توجه بعد ذلك لتناول الغداء و بدأ بالستارتر و كان عباره عن ورك بطه بصلصة الألاميزون ثم ضرب مين كورس عباره عن ستيك فري ويل دان من لحم الغزال مفتوح على شكل البترفلاي و حبس ب ديزيرت معرفش إسمه أيه و طبعا فيما بين الأطباق المختلفه شرب بتاع 2 لتر بيبسي .. بينما إكتفي ديبو بطبق قواقع بحريه و حبس ب ديزيرت غريب على شكل شبكة صيد

خلال تلك الأحداث الداميه إكتفى العبد الفقير إلى الله بالفرجه عليهم و إحتساء الكابتشينو مع الحوقله المستمره

أه .. نسيت أضيف أن الحاج الطبيب التهامي ياخويا خلال تواجده في المطعم أبدى إعجابه الشديد ب.............. الأكل smk: و كان كل شويه يفضحنا و يسأل الجرسون ...هو الأكل راح فين ؟ و الجرسون يقوله : شلناه عشان الشمس ضاربه فيه والتهامي يقول طب أروح له و كنا بنهديه أنا و ديبو بالعافيه :unsure:

بعد إنتهاء الزياره غادر السيد الحاج الطيبيب التهامي ياخويا بورت كريديه في سيارته البونتياك ذات ال 8 سلندر حيث تسارع من صفر إلى 100 كيلومتر في 5 ثواني

و اليوم..... ودعت الحاج الطبيب التهامي يا خويا تليفونيا و هو في طريقه للمطار على وعد باللقاء القادم في سبتمبر إن شاء الله

كان معكم

خميس أبو العافيه

مسيسوجا (واخد لي بالك يا هشام)

قطاع الاخبار

كانت هذه مشاركه مليئه بصفات الجين إكس

تم تعديل 18 مايو 2009 بواسطة ايهاب سالم

[ايهاب سالم]

أرسل لي الحاج الطبيب التهامي ياخويا رساله مفادها أنه غادر بسلامة الله مصر متوجها إلى البريمه

ولقد أعرب سيادته عن سعادته البالغه بالأيام القليله التي قضاها في المحروسه و عن حزنه البالغ لمغادرتها

:sad: معلش يا تهامي ..... هيه الأيام الحلوه دايما بتعدي بسرعه

تم تعديل 21 مايو 2009 بواسطة ايهاب سالم

[Lunalola]

DEAR IHAB,

HOW R U WRITTNG TO U FROM CANADA JUST ARRIVED 2 DAYS AGO , I HOPE WE CAN CONTACT WITH U AND DR HISHAM U SEEM TO BE VERY KIND AND GOOD FRIENDS, CAN U SEND ME UR CONTACT SO WE CAN TALK. WHAT I REALY NEED NOW FROM U IS A FAMILY DR. IF U HAVE ONE ACCEPTING PATIENTS BECAUSE MY LITTLE 2 DAUGHTERS IS SICK AND WE ALREADY HAVE OUR OHIP CARDS I WISH U CAN SEND ME A DR DETAILS SOON. OR CAN U ADVICE ME TO GO TO THE NEARST WALK-IN CLINIC??? I APPRECIATE UR SOONEST REPLY

BY THE WAY WE LEGYPTIAN LIVING BESIDE U. WE R IN MISSISSUGA. I TRIED TO SEND U TO UE INBOX BUT IT SEEMDS IT IS FULL

SALAM FOR NOW

[moheltohamy]

ورجعنا للبرّيمة ومخمختها ، وقعدة المزاج العنب

نبدأ ندندن تاني في الهاند أوفر ، ونرد ع الناس اللي متأخرين عليهم ، ونشوف أكل عيشنا...

دا حتى المرتب بتاع الإدارة موقوف بقاله شهرين ما باقبضش

فاصل ، ونواصل

[ايهاب سالم]

DEAR IHAB,

HOW R U WRITTNG TO U FROM CANADA JUST ARRIVED 2 DAYS AGO , I HOPE WE CAN CONTACT WITH U AND DR HISHAM U SEEM TO BE VERY KIND AND GOOD FRIENDS, CAN U SEND ME UR CONTACT SO WE CAN TALK. WHAT I REALY NEED NOW FROM U IS A FAMILY DR. IF U HAVE ONE ACCEPTING PATIENTS BECAUSE MY LITTLE 2 DAUGHTERS IS SICK AND WE ALREADY HAVE OUR OHIP CARDS I WISH U CAN SEND ME A DR DETAILS SOON. OR CAN U ADVICE ME TO GO TO THE NEARST WALK-IN CLINIC??? I APPRECIATE UR SOONEST REPLY

BY THE WAY WE LEGYPTIAN LIVING BESIDE U. WE R IN MISSISSUGA. I TRIED TO SEND U TO UE INBOX BUT IT SEEMDS IT IS FULL

SALAM FOR NOW

عذرا انا قافل خاصية الرسائل الخاصه

ألف سلامه على أولادك

إحنا بنتعامل مع طبيبه مصريه و مرتاحين معاها جدا

و دي بيانات عيادتها و مكانها

Doctor Rasha Gamil Wahba

Address:

Credit Landing Medical Clinic

Credit Landing Shopping Centre

Unit 7

224 Lakeshore Road West

Mississauga

Ontario

L5H 1G6

Phone: (905) 271-6455

Fax: (905) 271-6492

وكمان فيه walk-in clinic كويسه في تقاطع هورونتاريو مع كويينز واي

مش فاكر إسمها أيه لكن هيه واضحه جدا في التقاطع

و هنا قائمه بكل العيادات في مسيساجا .. ممكن تختار الأقرب لسكنكم

http://directory.mississaugadirect.info/He...edical_Clinics/

تم تعديل 23 مايو 2009 بواسطة ايهاب سالم

[MZohairy]

ايهاب

ايه الفرق بين ال Walk in clinic

و ال Family Doctor ؟

و ايه الافضل بالنسبه للمهاجر الجديد؟

[ايهاب سالم]

ايهاب

ايه الفرق بين ال Walk in clinic

و ال Family Doctor ؟

و ايه الافضل بالنسبه للمهاجر الجديد؟

الفاميلي دكتور هو عيادة الطبيب المتعارف عليها عندنا

ال Walk in clinic عباره عن مستوصف صغير به اكثر من طبيب و يوجد به صيدليه وخدمات طبيه متعدده مثل الاشعه .... التحاليلي يا بطه..... تجبيس الكسور البسيطه..... توزيع الواقي الذكري ووسائل منع الحمل مجانا

ال Walk in clinic يعمل ساعات اطول من الفاميلي دكتور

غالبا من 8 صباحا حتى 11 مساءا

تم تعديل 23 مايو 2009 بواسطة ايهاب سالم

[Lunalola]

thank u sooo much Ihab. i will contact her today ISA . i hope she is accepting new patients

[moheltohamy]

مبروك يا دكتور تهامي وعقبال الشهادة الكبيرة

الله يبارك فيك يا أبا حميد... وعقبال شهادتك انتا :D

مبروك يا دكتور تهامى النجاح...ربنا يوفقك دايما...و تجيب لنا كل الشهادات اللى نفسك فيها

لكن الكورس دة قصير قوى كدة ليه؟؟؟

ولا لسة فيه خطوات تانية فى الكورس والواحد مش مستوعب؟!!!

بالتوفيق يا دكتور فى كل خطوات حياتك العملية...

تحياتى

سوسورانى

الله يبارك فيكي يا دكتورة :D

بيقول لك: حاسدين المش عارف مين على ضل السجرة (بالسين ، أصله مثل فلاحي) ، وبيقول لك برضه: حاسدين الاعمى على طول عكّازه!

آهو الأسبوعين الصغيّرين دول طلعت عيني فيهم ، وبقيت باحلم بالبريمة وبالأيّام اللي كنت أصحى فيها بمزاجي ، واللي يعيَى يستحمل لمّا أصحى عشان يجيلي العيادة!

وبالنسبة للخطوات التالية ، وتفاصيل الكورس ده هاحكيهالكو بعدين بالتفصيل الممل...

وشكراً ليكي ع التهنئة ، ويا رب تعدّي المعادلة بتاعتك على خير ، ونيجي نبارك لك ، ونجيب لك الشوكولاتة البيضا wst::

DR ALTOHAMY congratulations YOU PEOPLE are our hope please go ahead we are following you my regarads to madam Hend Iam praying to ALLAH to keep you together for ever always successfull and always happy

شكراً دكتورة صفا... ويا رب يسعدك ويبارك لك في لحظاتك ويملاها بهجة ورضا...

إلاّ هوّه إحنا ما اتقابلناش قبل كده؟ wst::

ملحوظة إشرافية لا بد منها... أستأذنك الكتابة باللغة العربية. إزاي بس في الرياض ومفيش كيبورد عربي؟!

عموماً ، لو كتبتي Arabic Keyboard على جوجل ، هيفتح لك ميت موقع بيقدموا الخدمة دي ممكن تكتبي عليها بالماوس ، وتاخدي الكتابة دي كوبي وبيست. برضه اللغة العربية بتسيب ألفة ، بالإضافة إنها من قواعد المشاركة في المنتدى...

وشكراً ليكي مرة تانية :harp:

الف مبروك يا دكتور.... ربنا يوفقك دايماً :harp: :harp:

و فى هذه المناسبة العظيمة يسعدنى أقولك wst::

فين الحلاوة؟؟ :blink:

حلاوة إيه بس يا عم شهاب... قلبك أبيض!

دي أقل من شهادة الممرّض! يعني حاجة أتكسف أقولها!

عموماً ، بس انا أظبّط شغل هناك ، والحلاوة هتنزل عليكو ترفّ :lol:

[moheltohamy]

الاخ الفاضل دكتور تهامي باشا

اولا الف الف مبروك على النجاح وعقبال ماتستقر في كندا الى الابد ان شاء الله وتلم شمل العائلة زي الدكتور الشامي

تاني حاجة لو فيها بواخة يعني : ممكن حضرتك تقوللي مدام هند بتشتغل فين وازاي لقت الشغل هل كان في صعوبة ولا الموضوع كان ميسر , مش " قر ولا حسد والله دا مجرد استفسار يعني " وهي ازاي قادرة تعيش لوحدها في كندا من غير حضرتك , يعني انا شخصيا جوزي اقترح عليا الاقتراح دا وكان يوم مضلم خالص مقولكش عملت فيه ايه لمجرد الاقتراح " دعابة طبعا " يعني انا كنت قلقانة بصراحة وفضلت وراه لغاية ماغير رايه والحمد لله رايحين كندا يوم 20 مايو ان شاء الله .

وياريت حضرتك تكون موجود عشان نتعرف عليك باذن الله ونكتسب صديق محترم زي حضرتك والدكتور هشام وايهاب باشا طبعا

الف الحمد لله على السلامة وحضرتك منور تورونتو , انا بس حبيت افكرك بسؤالي اللي فوق لعل الاقي الاجابة وتطمئني ان شاء الله

عذراً لتأخري في الرد ، بس هوّه على أي حال ، أنا مشيت من كندا يوم 17 مايو! :D

وتساؤلاتك ردّيت عليها ع الخاص...

أتمنى تتكرّمي علينا بهاند أوفر منك عن الحياة في كندا كما ترينها ، حيث إن المشاركات الحريمي الواقعيّة ع المنتدى مش كتير الصراحة (وأعتقد دي مش أول زيارة ليكي لكندا! مش كده ولاّ إيه؟!) :D

نحن في الانتظار... :lol:

[moheltohamy]

بعد ألف مليون مبروك و بتاع أنا عايز أشهد المنتدي كله ......كابتن دكتور تهامي يا أخويا الأخضر طالع رحلة استكشافية لجبال الروكيز الكندية ...... مفروض إنه حيرجع محمل بصور جامدة ...كل المطلوب من سعادته يحن و يحملها لرواد الكافيه ....... لو ما نزلهاش بقي يبقي إذن هي الحرب يا ريتشارد باشا

هشام... إنتا كنت شغال دبّاسة قبل كده؟! wst::

يا فرحتك يا ديبو فينا

فين يا كابتن التغطية الحية لاحداث تورنتو الساخنة :blink:

امال فين الهتاف بتاع ...معا من أجل المحاورات ...... كله يهون في سبيل المحاورات ........ و نجري ورا المظاهرات و نطلع فوق الكباري و الكلام دهون :wub:

مش باقول لك دبّاسة؟!

حاضر يا معلّم... هاروح أنشرها هناك في الجريدة... بس أبدأ رفع الصور الأول... ممكن بكره الصبح!

هنيالك يا تهامي باشا ... يا فاتح جبال الروكيز الكندية ... تصدق أنا بقالي كثير بحلم برحلة زي دي على الروكي ماونتنير اللي بين كالجاري وفانكوفر ... وإن شاء الله أعملها لما أروح كندا

والله يابو حميد أنا رحتها بالعربية ، وبالأتوبيس... ما عرفتش أنا حكاية القطر ده ، بس مالوش وقت المرّادي خالص! كان نفسي برضه أعدّي على فانكوفر (وبالمرة نتغدى سفلقة عند عمك الزهيري :P - مانا هافضحه في المنتدى لو ما عزمنيش ع الغدا - دا بخلاف إني هاستغل سلطاتي وبابا غنوجي وهاقفل له موضوعه :o )

إن شاء الله هاعملها في أقرب فرصة (إني أروح فانكوفر طبعاً ، مش أقفل له موضوعه :lol: )

الف مليووووووووون مبروووووووك يا تهامي يا اخويا

بجد النجاح حلو و ربنا يديمها عليك نعمه و علينا جميعا

و الله الواحد بقى حاسس انه ليه عائله تانيه هنا في المنتدى

وسلامي لهند و ربنا يكتبلك الاستقرار في كندا على خير :lol:

معلش الصداقه و الاخوه اللي بينا حاجه وصور الرحله السريه دي

حاجه تانيه خالص

فياريت تنزل بالصور لحسن د / هشام هيعلن الحرب

وربنا يستر عالقهوه والي هيجرالها من ورا الصور دي

على رأي باش مهندس ايهاب ( معلش احنا بنتكلم ) wst::

تسلمي يا بنت مصر...

والصور والتفاصيل دي هتنزل طبعاً ، بس اصبروا معايا شوية.

مش الرحلة السرية دي بس... دول الرحلتين السريّتين :)

[moheltohamy]

:wub:

الف مليون مبروك يا دكتور تهامى

بجد فرحت علشانك من قلبى وربنا يوفقك دايما ويثبت اقدامك واقدام كل العرب فى كندا

وماتنساش ان مشوار الالف ميل يبدا بخطوة وانت الحمد لله خطيتها خلاص وعقبال الباقى وتبقى باشدكتور قد الدنيا وتترحم من التنقل بين ال3 قارات وتستقر بقى

الف مبروك مرة تانية

wst::

آمين يا رب... شكراً دعاء :lol:

منتظرين تكملة حواديتك في بلاد الخونة :)

مبروك ياسيدى - الف مبروك - اعقبال اما اشوفك دكتور اد الدنيا :o

والله يا سيد بينك أنا كنت فاكر نفسي بقيت دكتور أد الدنيا بالفعل! لكن م الواضح إن مفيش حاجة بتفضل على حالها في الزمن ده! :lol:

الف مبروك يا د.T بجد فرحت لحضرتك جدا منها الى الأمام يا فندم.

تقبل تحياتي wst::

ربنا يخلّيكي يا مروة ، ويا رب نفرح لك عن قريب بالفيزا... :blink:

[moheltohamy]

هوم سويت هوم ...دكتورتهامى

أنا قلت أشقر على قهوة حضرتك لحسن الزباين هربوا و دكتور هشام مختفى...و دكتور بريكناديان عنده مشاكل فى دى إس إله ربنا يشفيهوله و يبقى عامل زى بتاع روجرز كدة :lol:

ما فضلش غيرى و بنت مصر اللى نحافظ لك على التركة...

لما نشوف الواجب اللى هتعمله معانا فى القهوة :)

ربنا يستر :blink:

كلام فى سرك أنت حسابك تقل...عمال توعدنا بصور ودسامة والواحد عمال ياخد فى أدوية كوليسترول عشان يستحمل دسامة الحكايات اللى هتحكيها و ما فيش أى حاجة حصلت غير إن معدتى تعبت من قلة الدسامة...شد حيلك كدة...عشان تلحق تخلص الهوم ورك :wub:

تحياتى

سوسورانى

ميرسي يا سوسوراني...

ويا رب نسمع منك الحكاوي عن قريب... إنتي عندك أسلوب قصصي تحفة أصلاً ، وأنا متأكد إنك لو بدأتي ؛ هتلمّي الزباين من على كل القهاوي. خصوصاً إنك معاكي شويّت صبيان مخضرمين هيخدّموا على زباينك ، رغم إنهم لسّه ما استلموش جوابات التعيين! :o

نفسي أسمع رأيك لما تيجي وتشوفي سرعة روجرز بنفسك :lol:

وعموماً أنا هاحاول أنزل بكل المتأخر خلال الهيتش ده رغم الـ 3 مشاريع مذاكرة اللي ورايا! وعلى الله تعجبكو.

[moheltohamy]

الف مبروك يا ضاكتور وعقبال الشهاده الكبيرة

انت شكلك نسيتنا خلاص ياعم

من يوم مااخضريت وانت ناسى قهوتك لما الزباين قربت تطفش خلاص

والله أبداً يا دكترة... الموضوع مش كده خالص.

الفكرة كلّها إني بدأت آخد آكشنز ، وفي نفس ذات الوقت يعني ، باكون في كندا توريست... فبالتالي باحاول أستمتع في الكام يوم المتبقيين بأقصى درجة!

بس يا سيدي... دي كل الحكاية!

[د هشام ابراهيم]

هشام... إنتا كنت شغال دبّاسة قبل كده؟! :)

حاضر يا معلّم... هاروح أنشرها هناك في الجريدة... بس أبدأ رفع الصور الأول... ممكن بكره الصبح!

Among other things :o

يا باشا خد وقتك ....بكره الصبح ...بعده .....المهم العدل :lol:

[moheltohamy]

حضر السيد الحاج الطبيب التهامي يا خويا في سيارته البونتياك ذات المحرك 8 سلندر و شوهد ال جي بي إس الحلم يا ساده ينتصب شامخا على تابلوه السياره ... طبعا زي ماحنا عارفين الجي بي إس الحلم مفيهوش بحث بالبوستال كوود و اللي هي خاصيه في أحقر الجي بي إسات (زي اللي عندي مثلا) .. .... معلش يا هشام ياخويا .... جين إكس نئح عليا

الجي بي إس حضرتك فيه حاجات ممتازة جداً ، بس هيه مش شغالة حالياً! :blush2:

كل خدمات اللايف شغالة فقط في أمريكا ، وجالي منهم إعلان ع الميل بيقولولي (Dear Mohammed)! إنتا بتوع الجي بي إس بتاعك عمرهم قالولك كده؟! n2&(

وبعدين بيعرّفوني إن تغطية خدمة الـ Live بدأت تمتد لتغطي إنجلترا وألمانيا وفرنسا وسويسرا وهولندا. وجاري التوسّع في التغطية!

تعرف صحيح إن دايماً ده الحال معايا في حاجات كتيرة جداً...من 6 سنين أشتري ماذر بورد عليها حاجة اسمها SATA ، وأصلاً مفيش في السوق هارد ديسك ساتا! ومن 10 سنين أشتري CD Writer بتنسخ بسرعة 20X والبلانكات اللي في السوق آخرها مش فاكر 12 ولاّ 16!

أجيب موبايل بيشغل الـ 3G والـ Video Calls ، والخدمة أصلاً مش موجودة في مصر!

دايماً يا حبيبي بص لأدام :o

حكاية البوستال كود دي بقى... الله يحرقهم بجاز! حاجة تنرفز!

المهم ... ما إن شاهد السيد الحاج الطبيب التهامي ياخويا لافته مكتوب عليها port credit حتى صاح بورت كريديه ... طبعا زي ماحنا عارفين ثقافته فرنساوي

يا عم الحاج أنا باتعامل مع البنك المصري الأمريكي اللي اشتراه بنك Crédit Agricole الفرنسي ، وبالتالي بقت كلمة Crédit دي بانطقها كريدي بحكم العادة ليس إلاّ!

جين إكسر صحيح!

خلال الزياره ...أبدى السيد الحاج الطبيب التهامي ياخويا إعجابه بحدائق بورت كريديه الغناء

هنا بقى دورك يا عمنا... منتظرين من معاليك الصور للجونينة اللي ورا البيت عندك دي! مانتا بتهرّج! رايحين نصوّر العصايتين وخرطوم الكهربا ، وسايبين الجنينة التوووحفة اللي عندكو!

بس للأمانة يا إيهاب يا خويا... زي ما هتصوّر الجناين ؛ تصوّر برضه اكوام الزبالة ، برضه نقول اللي لينا واللي علينا! :o

ثم توجه بعد ذلك لتناول الغداء و بدأ بالستارتر و كان عباره عن ورك بطه بصلصة الألاميزون ثم ضرب مين كورس عباره عن ستيك فري ويل دان من لحم الغزال مفتوح على شكل البترفلاي و حبس ب ديزيرت معرفش إسمه أيه و طبعا فيما بين الأطباق المختلفه شرب بتاع 2 لتر بيبسي .. بينما إكتفي ديبو بطبق قواقع بحريه و حبس ب ديزيرت غريب على شكل شبكة صيد

خلال تلك الأحداث الداميه إكتفى العبد الفقير إلى الله بالفرجه عليهم و إحتساء الكابتشينو مع الحوقله المستمره

ماحنا كنا بنتحايل عليك عشان تاكل ، وانتا كنت لسّه داببها أصلاً في البيت قبل ما تنزل من طبيخ المدام!

ثانياً دي ما كانتش بطة... دي يا دوبك ... عِسفر (عصفورة يعني)! :blush2:

و2 لتر بيبسي مين يا عم الحاج اللي بتتكلّم عليهم؟! إنتا ما حضرتش المسخرة اللي حضرها هشام وديبو معايا في Red Lobster في الداون تاون! الست الويتريس صعبت عليّا في الآخر من كتر المشورة!

أه .. نسيت أضيف أن الحاج الطبيب التهامي ياخويا خلال تواجده في المطعم أبدى إعجابه الشديد ب.............. الأكل smk: و كان كل شويه يفضحنا و يسأل الجرسون ...هو الأكل راح فين ؟ و الجرسون يقوله : شلناه عشان الشمس ضاربه فيه والتهامي يقول طب أروح له و كنا بنهديه أنا و ديبو بالعافيه

هوّه الأكل يا هوبا كان توووحفة الصراحة! بس يعني لمّا يشيلو بوفيه السلاطات بحجة إن الشمس ضاربة فيه! يبقى ده كلام بذمّتك؟! دي درجة الحرارة كانت بتاع 10 باين ، وكنا متكتكين م البرد!

وانا أصلاً أدّام البلو تشيز ما باقدرش أقاوم! دا من بعد ما شالوها ، وانا نفسي اتسدّت يا راجل! هوّه انا عرفت آكل أصلاً؟! :unsure:

علي فكرة أبو الكباتن تومي الأخضر كده كانت أكلته ضعيفة ....... أكيد كان مشغول أو واكل متأخر

يا سلام عليك يا شيكو... فاهمني انتا :wub:

هوّه في الواقع بعد ما سبنا إيهاب ، رحنا قابلنا نشأت و روبرت أصحاب ديبو... وكل واحد فينا خبط له نص فطيرة بيتزاية ع العشا كده ، برضه الواحد مش المفروض يتقل قبل النوم! :rolleyes:

بعد إنتهاء الزياره غادر السيد الحاج الطيبيب التهامي ياخويا بورت كريديه في سيارته البونتياك ذات ال 8 سلندر حيث تسارع من صفر إلى 100 كيلومتر في 5 ثواني

إيسكوت يا إيهاب... تعرف إن اللفة في اليوم ده في تورونتو شطّبتلي على تانك البنزين؟! العربية دي متوحّشة يا جدع وربنا! :wub:

[moheltohamy]

فينك يا عم الأخضر ...أظهر و بان عليك الامان :blush2:

الرجل الاخضر عدى على مصر 3 أيام قبل التوجه للسعوديه يا إتش

وزمانه في ضيافة الجماعه الحلوين أياهم

:o

لا حول و لا قوة إلا بالله

أنا كنت نسيت الحكاية ديه خالص ......ربنا يستر بقي .....

عمار يا ......... مصر (حتي جين اكسر أهو :blush2: )

أرسل لي الحاج الطبيب التهامي ياخويا رساله مفادها أنه غادر بسلامة الله مصر متوجها إلى البريمه

ولقد أعرب سيادته عن سعادته البالغه بالأيام القليله التي قضاها في المحروسه و عن حزنه البالغ لمغادرتها

n2&( معلش يا تهامي ..... هيه الأيام الحلوه دايما بتعدي بسرعه

والله أنا نفسي اتسدّت مع العودة لمصر المرّادي بشكل ... خلاص جبت آخري ، وكل يوم بتتكسر فيّا حاجة تجاه البلد دي!

طبعاً مفيش حاجة اسمها حريّة الرأي عندنا! وبالتالي ، مش هاقول غير هوّنها يا رب ، وعقبال ما نجيب القلتين والولاّعة زي ما هند عملت!

هاقول إيه بس... قالها شوقي من زمان:

أحرامٌ على بلابلهِ الدّوْحُ *** حلالٌ للطيرِ من كلِّ جنسِ

إحساس الـ Home Sweet Home ده انتهى بالنسبالي من مصر خلاص! ربنا يهوّن الفترة اللي باقية في مصر ، ونرجع نحس بالأمان في بلاد مش بلادنا! :rolleyes:

وعجبي! :o