كندا التي رأيتها :)

[moheltohamy]

تحية تقدير للدكتور محمد التهامي للمعلومات القيمة والاسلوب الرائع في الطرح....وفقك الله وبانتظار الجديد ومغامرات الرجل الاخضر في جبال الروكيز...

شكراً جزيلاً زميلنا dreamy ... وهنرجع تاني للهاند أوفر عن قريب ، ويا رب يستمر التواصل دايماً.

حمدا لله علي السلامه يا مستر تي

المرتب بتاع الشهرين انت خدتهم سلف قبل متسافر يا باشا وبعزقتهم في كندا ... افتكر كويس يا باشا

:o

تحياتي

تسلم يا د. بريكانيديان...

هيه الإدارة خلاص جابت جاز مني خلاص ، وبيفكّروا يبدلوني بمروحة! :o

حمدللة على السلامة يا مستر محيى نورت المنتدى..........منتظرين حكياتك الجميلة مع كندا n2&(

وخيات الربّونا... أنا إسمي محمد مش مُحيي خالص يا جيسيكا!

بس عموماً إنتي مآنسانا بوجودك ، بس لو تكمّلي جميلك وتتوبي عن الطريق اللي انتي ماشية فيه ده ، زي ما تاب آينشتاين! :rolleyes:

[moheltohamy]

ما شاااااااااااء الله وألف ألف مبروك يا دكتور تهامي

وعقبال الفاينال ان شاء الله

فعلا احساس النجو حلو قوي .....ربنا يديمه عليك يا رب

عايزينك تريح الغدة الكظرية شوية وتخليها على جنب هيا والادرينالين بتاعها ده :blush2:

وشكرا لحضرتك يا دكتور هشام انتا ودكتور بريكانديان على الكليبات الحلوة دي

والله على اخر الكليب يا دكتور هشام وبعد ما د زويل اتسلم الجايزة بتاعته

حسيت ان دكتور تهامي حيظهر وهو بستلم الشهادة هو كمان n2&(

مبروك مرة تانية .....وعقبال ما نشوفك يا تهامي يا ابن عمي مع وزير الصحة الكندي يارب

ساعاتها ان شاء الله نعمل فعلا كليب جماعي لحضرتك ودكتور هشام ودكتور الشامي ودكتور قناوي و دكتور بريكانديان ودكتور....... كفاية كدة الا الكليب طلع طوييييل قوي

حمدا لله على سلامتك يا دكتور محمد :o

والله فرحت لما عرفت ان العنب ظهر عندكم خلاص ......اصله لسه ما ظهرش عندنا

على فكرة انا كان ليا مشاركة كده من ايام شم النسيم .....حضرتك ما ردتش عليا فيها

وانا واخده على خاطري من ساعتها......وكنت بقول معلش دا من تأثير الادرينالين برضو :unsure:

لكن طالما الموضوع ظهر فيه العنب .....فلا سكوت بعد اليوم ......الردود المتأخرة اهم اهم

إيه ده؟ دا الواحد فعلاً بقى بيفوّت ، وبتسقط منه حاجات ف النص!

معلش يا ولاء بقى... حكم السن يا بنتي!

وأنا نفسي بجد نتقابل كلنا شلة محاورات المصريين في كندا ، عيلة كبيرة ، وناخد صورة كبيرة لينا مع بعض!

أما حكاية أتصوّر مع وزير الصحة الكندي دي صعبة حبتين! هوّه أنا هشام عشان أتصوّر معاه؟!

يا ست هانم دانا غلبان جداً ، ممكن أتصوّر مع السوّاق بتاعه... دي ممكن آه! (بفرض إنه مش بيروح الوزارة راكب عَجَلة!) :rolleyes:

موضوع الأدرينالين بقى ده...

كنا بنقرا زمان إن الإنسان لم يتخلّص من تراث عصر الكهوف ، ومن الخوف اللي بيؤدي لتدفق كميات رهيبة من الأدرينالين في الدم مع رؤيته لنمر داخل عليه الكهف مثلاً! دي كانت مناسبة للموقف ، لاحتياجه لتصرّف فوري وسريع ينقذ حياته!

لكن في العصر الحديث إستمر الأدرينالين في التدفق مع أي موقف Stressful يتعرّض له ، وبالتالي الضغط والسكر بيرتفعوا بالمشاكل المترتبة عليهم ، كرد فعل لضغط عصبي تافه لا يُقارَن بموقف النمر إيّاه!

واحنا طبعاً كخرّيجي كليّة الطب ، ومتربيين على الامتحانات اللي كل شهر ، أو امتحان مفاجئ في مدرّج المحاضرات! ورعب لجان الشفوي... بقت كل ما تيجي سيرة الامتحان - أي امتحان - تلاقي الضغط العصبي والاستريس بدون أي داعي!

قبل امتحان الـ EMR الشفوي الفاينال ، واحدة معانا في الكورس بتقيسلي الضغط (بتتدرّب على قياسه بالمرة) ، اكتشفت إنه 160/110! واتأكّدت بعدها من قياسها! ولقيته زي ما قالت!

على إيه يا غدة تطلّعي كل الأدرينالين ده... الموضوع مش مستاهل! :blush2:

لكن... تعملي إيه بقى... تراثنا من عصر الكهوف!

تحيّاتي لكِ ، وعذراً على نسياني لمداخلتك القديمة! :o

[moheltohamy]

حمد الله بالسلامة يا اخضر باشا....نورت المنتدي تاني يا بيه

مستنيين حكاوي القهاوي

منوّر بوجودك يا عم حسيني... وحكاوي القهاوي كتير ، بس فين النفس ، قصدي فين الوقت والبال! n2&(

حمدلى على السلامه يادكتور تهامى ويارب تكون الرحله كانت سعيده ومليانه صور فى انتظار الهاند اوفر

من حيث مليانة ، فهيّه مليانة بافترا! بنتكلّم في 18 جيجا بايت صور وفيديو!

ما تقلقيش يا طنط :o

الف مبروك ي دكتور تهامى

ومتستقلش بالشهادة او تتكسف منها لانها الخطوة الاولى للشهادة الكبيرة ان شاء الله

وعقبال تصريح العمل كطبيب قد الدنيا فى كندا

بجد فرحت من قلبى ومن نجاح الى نجاح ان شاء الله

:o

يسمع من بقك ربنا يا مدام دعاء... أنا فعلاً بدأت أبص لها كده ، بس ربنا يسهّلها ، ونوصل لأوفر الشغل هناك ، وتبقى دي البداية العملية هناك...

ربنا يوعدنا.

[moheltohamy]

واحد مايو ...واحد مايو

اتنين مايو .....اتنين مايو

تلاتة مايو ....تلاتة مايو

أربعة مايو ...أربعة مايو

أكمل الأغنية المملة و إلا تحن علينا بهاند أوفر بعد ما بقينا في يونيو يا كابتن تومي

لا يا عم ، وعلى إيه؟ الطيب أحسن! كلّه إلاّ الأغنيّة المملة!

بس مش معقول يعني نسيب الـ WHMIS ونقعد نكتب في الهاند أوفر!

عموماً ، أنا خلّصت امتحان الـ WHMIS ، وكتبت شويّة كده على ما أوسوم... آهو تنأنؤوا فيها على ما أخلّص الشابتر بتاع الشوبينج!

دكتور هشام معاه حق

فين الهاند اوفر يا دكتور تهامي؟؟

حمد الله ع السلامة يا برينسيس

الهاند أوفر آهوه يا ستي

[moheltohamy]

نيجي للمرة الرابعة في السفر لكندا ، ودي كانت 4 أسابيع من 19 أبريل لـ 18 مايو 2009. طبعاً ابتدى التحضير للسفريّة دي من بدري وانا في البريمة في السعودية ، وطبعاً كلّه ع التليفون والإنترنت

الأجازة دي أنا كنت نازلها مصر أصلاً ، وما كانش في دماغي السفر لكندا من أساسه! جه البهوات بتوع الإتش آر (شئون العاملين) عاوزينني أنزل أجازة 6 أسابيع مصر بعد ما قعدت ع البريمة 6 أسابيع عشان مواعيد الكرو بتاعي يتظبط. 6 أسابيع في مصر... كتير أوي الصراحة! يبقى يللا بينا على كندا. وطالما طالعين كندا ، يبقى ننجزلنا أي مصلحة هناك بالمرة...

المرّادي كانت إكسبيديا حرّاقة شويّتين ، مش عارف ليه! مع إن المنطق بيقول إن أسعار البترول نزلت ، و وقود الطائرات نزل هوّه كمان ، وأسعار التذاكر بتاعت الشركة نزلت بتاع 30% على مختلف خطوط الطيران...

أقل سعر للتذكرة كان عامل 920 دولار أمريكي على إير فرانس! ولأول مرة الطيّارتين رايح جاي (من القاهرة لپاريس ومن پاريس لتورونتو ، وبالعكس) تبع إير فرانس ، وبدون أي تواجُد لإير كندا. نفس الرحلة لقيتها على الموقع المصري بتاع إير فرانس ، وكان بنفس السعر بالجنيه (الموقع المصري) ، بفرض إن سعر الدولار ع الماستر كارد هيحسبهولي بنك HSBC بـــ 5.70 جنيه ، وما كنتش أتوقع البنك يحسبلي الدولار اللي هوّه بـــ 5.62 جنيه بأغلى من سعره بواقع 8 قروش للدولار! وبالتالي تبقى إكسپيديا أرخص لي. اللي فوجئت بيه بعد كده إن البنك حاسبلي الدولار بـــ 5.75 جنيه (مكاسب لوز من فرق العُملة بس)! كان نفسي أطلع على لندن أشتري شويّت حاجات من هناك ، لكن التذكرة المرّادي كانت أغلى بميتين دولار... بلاها لندن!

لما حجزت السفر أخدت بالي إن الطيّارة اللي من باريس لتورونتو رايح جاي من النوع بوينج 747 ، ودي بتشيل بتاع 400 راكب ، وفيها دورين للركّاب! قلت يا حلاوة... هنشوف الفخامة بقى!

لما ركبت الطيّارة في باريس اكتشفت الحقيقة المرة... حسّيت إني في علبة سلمون! 3 كراسي جنب كل شبّاك ع الناحيتين ، و5 كراسي في النص! وعلى حظي النحس الطيّارة دي بزّات دوناً عن كل الطيّارات اللي باحجزها من على إكسپيديا يقوللي مش عارفين نحجزلك الكرسي اللي انتا عاوزه ، إبقى احجزه لما توصل المطار من ع الكاونتر ، وبالتالي لبست آيِل (الكرسي اللي جمب الطرقة) ، يعني بقيت ملطشة للي رايح وجاي في الطرقة ، خصوصاً إن فيه ناس غاوية حمّامات (ما اعرفش ليه يا جدع! أنا أساساً ما باجيش ناحية الحمّامات بتاعت الطيّارات دي خالص ، ولو يعني خلاص هاموت ؛ باصبر لما أوصل للمطار الترانزيت ده ، وحمّامات المطار أكبر وأوسع وأريَح)! والطيّارة كانت زحمة بشكل غير طبيعي ، والمجموعة اللي حواليّا كانت كبيرة جداً (غالباً عيلة أو جيران عارفين بعض) من الأشقاء الكنادوة راجعين من فرنسا (كانوا بيتفسّحوا على ما يبدو)!

في الرحلة دي برضه قلت أغيّر بقى شوية ، وطلبت من طنط الحاجة إكسپيديا إن وجبتي تكون كوشر (Kosher) ، ودي وجبة ولاد عمّنا... اليهود! كان الواد ديبو دايماً يقوللي آهو أكل اليهود حلال... تخيّل؟! لإنهم بيسمّوا على الحيوان قبل ما يدبحوه ، وما بيجوش ناحية الخنزير. قلت طيب ما تجرّب يابو سعد ، وبالمرّة ترحم نفسك من الحركات الصايعة بتاعت إير كندا!

بصورة عامة ، الكوشر أحسن من الـــ Muslim Meal ، يمكن عشان ليها معايير جودة بيلتزموا بيها ، والصينية بتجيلك متغلّفة سيلوفان متبرشم عشان ضمان إن الوجبة ما يتلعبش فيها! واستيكر بمكونات الوجبة (زي في المسلم ميل) ، وكمان كارت ضمان داخل التغليفة السيلوفان ؛ بإن الوجبة دي تضمنها مجموعة المش عارف مين في أوروبا ، وإنها مطابقة لمعايير المش عارف إيه برضه! قلت سبحان الله... إشمعنا احنا مالناش منظّمة تمسك الموضوع ده ، وتفرض معايير للخدمات المقدمة للمسلمين؟!

وانا في الطيّارة الأولى اللي من القاهرة لپاريس ... ألاقي اللي قدامي راجع بالكرسي خالص عليّا! قمت راجع بالكرسي أنا كمان! أفوجأ بسلامته البيه اللي قاعد ورايا (مصري) بيقوللي: "لو سمحت الكرسي زانقني"... ومن مُنطلَق إنها مش ناقصة قلة أدب أصلاً... قمت مدّيهوملُه (لو ما كانش من حقي أرجّع الكرسي لورا ؛ ما كانوش عملولي الزرار ده عشان أرجّعه)! الواد خد الكلمتين ؛ وما نطقش بعدها! أنا أساساً باتخنق من اللي ييجي قدّامي ويرجّع الكرسي عليّا ، بخلاف الزنقة ؛ مستحيل تعرف تشتغل ع اللاپتوب والكرسي اللي قدّامك مايل لورا! لكن برضه هوّه من حقّه يرجّع الكرسي زي ما هوّه عاوز! ما يجيش الأفندي بقى – عشان مصريين – يستخف دمه ، ويقوللي إني زانقه! عمرها ما حصلت قبل كده من أي حد تاني ، غير مرة واحدة ؛ كانت ست مصرية قاعدة ورايا ، ومع توزيع الوجبة ما كانتش عارفة تتعامل ، فعدلت الكرسي لغايت ما أكلت والصواني اتلمّت ، ورجّعته تاني!

المهم... وانا باحجز الرحلة دي كنت باحاول أظبّطها مع الواد ديبو كان هيرجع معايا في نفس اليوم على تورونتو من سان فرانسيسكو ؛ كان بيحضر فرح ابن عمته ، كان بسلامته الـــ Best Man... مش قصدي طبعاً إنه كان أكتر واد أمّور في الفرح ... لا لا لا أبسوليوتلي خالص! البست مان ده اللي هوّه بيكون الدراع اليمين للعريس ، اللي بيشيل عنه كل الاستعدادات والتحضيرات للفرح ، واللي بتشوفه في الأفلام الأمريكية في الكنيسة بيناول العريس الدبلة.

المهم ديبو كان متفق مع فوزي صاحبه (الروم ميت بتاعه سابقاً) ييجي بعربيته يستقبله في المطار ، والمفروض طيّارة ديبو هتوصل مطار پيرسون الساعة 11:30 م. حاولت أشوف لها تظبيطة ؛ بس طبعاً كانت الپرايوريتي للسعر الأقل! طيّارتي هتوصل الساعة واحدة الضُهر ، ومش معقول هاتلطع في المطار 10 ساعات عشان ألاقي توصيلة للداون تاون! مش فارقة بقى! أعيش مع نفسي ؛ ومش هاغلَب... إحنا ناس دخلت جيش يا عم الحاج!

ملحوظة ع السريع... الحمد لله إني ما ظبّطتش نفسي مع ديبو ؛ طيارة ديبو اتأخرت قبل ما توصل مطار شيكاجو (الترانزيت) ، وطيّارته التانية طلعت وما استنّتهومش ، وباتوا في المطار ، و وصل تاني يوم 9 ص! فرشولهم ع الأرض وناموا! ولمّا باسأله مش المفروض طالما التأخير في السفر أكتر من 6 ساعات ، وبسبب الإير لاينز ؛ يبقى تبعاً لقوانين الطيران المدني الدولية المفروض يحجزولكوا فندق في المطار أو قريب منه تباتوا فيه؟ قاللي ده لو غلطتهم ، لكن في حالة سوء الأحوال الجوّية والعواصف ، فدي بيعتبروها مشيئة الله مش بسبب إهمالهم ، وبالتالي لا يُحاسَبوا عليها!

المهم... وانا باحجز الرحلة على إكسپيديا ألاقيهم بيسألوني (ما نفسكش يابو سعد نحجزلك أتوبيس مُفتخر كده ياخدك من المطار لوسط البلد ، والراوند تريب بتاعته يا دوبك - عشان خاطرك انتا بس - بـــ 25 دولار؟)... يا سلام؟ نفسي أوي! وأومت حاجزلي تذكرة بالمرّة... مش قلتلك دخلنا جيش؟!

فيما بعد بقى عرفت إن ممكن جداً من المطار ومن غير لا تظبيط ولا بطّيخ ، تاخد أتوبيس الـــ TTC من المطار لمحطة كيپلنج ، وتدخل منه لمحطة الصابواي وتاخد الصابواي شرقاً لمحطة بلور ، وتبدّل شمالاً لمحطة إجلنتون ، فركة كعب للبيت ، وكل الليلة دي بتذكرة واحدة من أم 2.75 دولار!

معلش آدينا بنتعلّم... إحنا ما دخلناش جيش أوي! إحنا كده ولاّ كده كنا ظبّاط احتياط!

وانا راجع بقى على مصر ، بضعت شوية من المطار ، والبهوات بتوع سوق المنطقة الحرة لازم يشيّكوا على تذكرتك ، وبعد ما دفعت ومستني أستلم ، الهانم تقوللي اتفضل! فين حاجتي حضرتك؟ هتستلمها على باب الطيارة! يعني صباح المياصة!

طلبت معايا أجيب ستيك في مطار پيرسون (ما باحترمش أنا أوي أكل الطيّارات) ، وبالفعل دخلت مطعم محترم هناك في تيرمينال 3 ، وطلبت الستيك ويل ضن (Well done يعني متحمر صح ... على أبوه) ، قاللي فيها نص ساعة ، وكان باقي على طلوع الطيّارة أصلاً أقل من نص ساعة! قلت ننجز بقى ، سدر فراخ محمّرة.

وانا قاعد بانقنق فيه ألاقي واحدة بتسأل اللي ع الترابيزة اللي ورايا (رايح فرنسا؟) ، قمت ملتفت لها وقلتلها (أنا رايح فرنسا) ، قالتلي (إنتا محمد؟!)... حلاوة يا عيال! العادي بتاعي في المطارات! ودي تقوللي داحنا دايخين عليك ، وندهنا عليك أكتر من مرة! معلش بقى ، بجد ما سمعتش. وانا ماشي وراها ، أسمعهم بيندهوا عليّا ، وشويّة ولقيت واحد بينده عليّا بالعربي! الناس لمّا غلبوا معايا قالوا يمكن ما بيفهمش انجليزي ، ومن الإسم فهموا أنا منين ، وجابولي واحد يكلّمني بالعربي ، يمكن أحن وأعبّرهم ، وبعتوا البنت بتاعت الكاونتر تلف تدوّر ع الراكب التايه (اللي هوّه أنا!).

قلتلها إني ليّا حاجات لسّه المفروض استلمها من الديوتي فري (غلطان وبجح!) ، خدت مني الإيصال ، وقالتلي هنتصرّف احنا ونجيبهالك.

والاقي مضيف كبّارة واقف مستنيني على باب الطيّارة (كانت نفس الطيّارة أم دورين ، بس المرّادي كانت فاضية) ، وياخدني على الكرسي بتاعي اللي انا حاجزه جمب الشباك ، نلاقي واحد قاعد عليه ، والمضيف يقوللي تعالى هاشوفلك كرسي تاني ، وانا اقول له أنا عاوز الكرسي بتاعي ؛ وهوّه يقوللي يعني مش ممكن أي مكان تاني في الطيّارة (ناقص يقوللي هيّه حبكت يا حفيظة؟) ، وانا أقول له أنا عاوز اقعد جمب الشبّاك. والراجل يجيبلي مكان تاني جمب الشباك ، ويقوللي هنا بقى انتا لوحدك والكرسيين اللي جمبك فاضيين ، ممكن تفرد رجليك عليهم. إشطة جداً. وبعد شويّة ألاقيه جايبلي الكيس اللي كنت اشتريته م الديوتي فري لغايت الكرسي بتاعي!

واحنا في الطيّارة وزعوا علينا كروت نكتب فيها بياناتنا وتليفوناتنا ، ولو فيه أي من أعراض الانفلونزا ، عشان لو حبّوا يوصلولنا كمجرّد إجراء احتياطي (Tracking يعني). وبس على كده ، لا أكتر ولا أقل!

وفي مطار شارل دي جول في باريس ، وترانزيت حوالي 6 ساعات (حاجة تقرف!) ، شحنت الموبايل واللاپتوپ وفوّلتهم! ولقيتهم حاطّين كمبيوترات للي عاوز يدخل ع النت (أعتقد بكروت) ، وجمبها كذا ستاند للي عاوز يلعب بلاي ستيشن ببلاش! عمار يا فرنسا!

واحنا بنستعد عشان ندخل ع الكاونتر والممر الموصّل لباب الطيارة ؛ ألمح واحد أسمراني جاي من بعيد ومعاه مضيفة جايّة توصّله لغايت الكاونتر عشان يعمل تشيك إن ويدخل ع الطيّارة! يطلع مين الأفندي ده بسلامته؟! وبعد كده ألاقيه داخل على كاونتر مخصوص مفتوح له وجمبه اتنين تانيين... وهمّه بيخلّصوا وداخلين أدّامي ع الممر ؛ الأشكال دي أنا شفتها قبل كده... فين يابو سعد؟ يا خبر ابيض... دول خالد يوسف المخرج السينمائي ، ومحمود حميدة ، والتالت الاسمراني ده أكتشف فيما بعد ع التليفزيون إنه المنتج بتاع الفيلم الجديد دكان شحاتة (أول فيلم للأخت الفاضلة هيفاء وهبي)! واحنا على باب الطيّارة كان محمود حميدة واقف أدامي على طول ، والمضيفة على باب الطيارة بتسأله Vous parlez le français? ، والبيه يرد عليها A little bit! صباح الطراوة! دي أسهل كلمة في اللغة... un peu!

مش محتاج اقول إني كنت هاموت وآخد صورة معاهم (أتصوّر جمبه والنبي يابا!) ، بس كرامتي نقحت عليّا ، وقلت هياخدو قلم في نفسهم ، وهيعملولي بقى مهمّين فيها ، ونظام شوف المعجبين الخنقة! لأ وعلى إيه... بلاها خالص!

واحنا داخلين من بوابة الوصول في مطار القاهرة ، زحمة غير طبيعية ، واكتشف إن مصر ناصحة وبتفهم بزيادة! البهوات جايبين دكتور دفعة 2005 (من المنصورة بالمناسبة) ومعاه 4 ممرضات وبيخلّوك تملأ كارت فيه بياناتك! نفسي أفهم ؛ الكارت ده ليه ما بيسلّموهوش للإير لاينز عشان نوفّر الوقت والزحمة وقلة الأدب؟! ما علينا!

بعد كده طابور تاني... جهازين كمبيوتر متوصّلين بكاميرات تقف أمام الكاميرا ثابت 3 ثواني ، وبعدين تمشي! دي يا سيدي كاميرات حرارية عشان الحكومة الفكيكة تنقرك من وسط الجماهير دي لو كنت سُخن ومُندس بين المسافرين ، وداخل تلوّث بلدنا الطاهرة الشريفة بانفلونزا الخنازير! عظيمة يا مصر! الحمد لله إن حكومتنا صاحية لأمثالي كويّس ، وبكده بس الشعب يقدر ينام وهوّه مطمّن! اللذيذ إني لو كنت شايل شنطة تقيلة أو واكل أكلة دسمة قريّب قبل وصول الطيّارة ، وارتفعت درجة حرارتي... هالاقي اللي ماسكني من قفايا... وتعالى يا حرامي!

الممتع بقى في الموضوع ده إن بعد 3 تيّام ، وانا في التاكسي اللي واخدني ع المطار عشان أرجع ع البرّيمة ، ألاقيلك ماما بتكلّمني ، وبتقوللي فيه واحد بيخبّط ع الباب ؛ مندوب من وزارة الصحة ولاّ مش بعيد مخبر ، بيقوللها محمد سعد موجود؟ إحنا عاوزينه عشان مشتبهين في إصابته بالعدوى ، عشان جاي من بلد موبوءة! طبعاً ماما قالتله إني سافرت السعودية خلاص! بس خدت بالك انتا... كندا طلعت بلد موبوءة في نظر الحكومة المصرية! إسفوخص ع الأمم المتحدة ومنظمة الصحة العالمية اللي نايمين على ودانهم ، ولا داريين ، ومصر – الله يسترها – اللي فهمت الفولة ، وعرفت البلد الموبوءة تطلع مين!

الأكتر إمتاعاً إن لما أنا شخص مشبوه وحامل للمرض البطّال... سايبينني أمرح بين جموع الشعب المصري ، وأنشر سمومي بينهم 3 تيّام كاملين ، على ما أدركوا مكمن الخطر يطلع فين! مش باقوللك... مع الحكومة المصرية... تقدر تغمّض عنيك... للأبد!

حجزت برضه الطيران من تورونتو لكالجاري (ولاية ألبيرتا) والعودة على خطوط West Jet ، ودي خطوط داخلية بتلعب في أمريكا الشمالية بس ، ما بتطلعش برّاها. الرحلة كلفتني حوالي 460 دولار كندي (كانت على إكسپيديا وطيران إير كندا بأكتر من 600 دولار أمريكي... يبقى بلاها إير كندا!). بتدخل ع الموقع بتاعهم وتختار اليوم والساعة (أكتر من رحلة في اليوم) ، والكرسي اللي عاوز تحجزه. سعر التذكرة بيختلف من يوم لآخر ، ومن ساعة لأخرى في نفس اليوم ، ومن كرسي لكرسي آخر داخل نفس الطيّارة (الكراسي الأمامية أغلى)! عدّلت تذكرة العودة وانا هناك ، وأخّرتها يومين ؛ تبعاً لنصيحة هشام لمّا قاللي إني لازم أتفسّح في بانف ، وأزور جبال الروكي! تكلفة تغيير التذكرة 50 دولار ، بس الكرسي كان أرخص 40 دولار ، فدفعت 10 دولار زيادة فقط!

وانا رايح بقى كنت قاعد في آخر الطيّارة على الكرسي قبل الأخير (ع الشكمان يعني ، زي ما دايماً باقول لموظفي الكاونتر)! بس وانا رايح كانت أوّل مرة أحس بمعنى الكلمة دي بالحرف! بمجرّد دوران المحرك وبدء تحرّك الطائرة ، وريحة الدخان ملأت المكان اللي قاعد فيه (فوق الشكمان بقى!) ، واللذيذ إن المضيفة تقوللي ده عادي عشان احنا لسّه ع الأرض ، بس لما نتحرّك ، كل الريحة دي هتروح! تحس إنك راكب ميكروباظ ، والمكنة بتدخن ، والسوّاق بيقول للركاب معلش افتحوا الشبّاك ، ولما نطلع ع الطريق الريحة هتروح! جميل جداً الموضوع ده... بداية تدعو للتفاؤل!

واحنا في الطريق ؛ مش هاقوللك فوجئت... ديبو كان مفطّمني ع الليلة... لو طلبت مخدة أو سماعات أو سندوتش... 6 دولار لأي حاجة منهم حضرتك! شكراً ... موش عاوظين!

جيت في نص السكة ، والصنف بدأ يشتغل... مانتا عارف أخوك مدمن بيبسي! قلت ما بدّهاش يابو سعد ، ياخدوا اللي ياخدوه ويدّوني شمّة ، قصدي شفطة بيبسي! وهمّه معدّيين بالمشروبات (تحب حضرتك تشرب حاجة؟) ، بيبسي بليز! وباطلّع الـــ 2 دولار تمن البيبسي ؛ ألاقيها تقوللي (إتس فري)! إشمعنى ، وجايين على نفسكوا كده ليه؟! ما توفروها بالمرة! حاجة هم!

نسيت أقول لك إني وانا في المطار في تورونتو قبل ركوب طيارة ويست چيت ، في المحلاّت هناك وانا باقلّب في البضاعة ، ألمح أغلفة للپاسپورت ، والبنت اللي هناك جاية تسألني لو أحب عندها ألوان تانية جوّه ، سألتها ما عندكيش أحجام تانية؟ البنت تبتسم زي ما تكون فهمت النكتة ، وتقوللي آه عندنا! ومن مُنطلق إني إيچيپشيان مان... قمت مطلّع لها الپاسپورت المتين ، اللي مالوش مثيل! البنت تنّحت شويّة ، وبعدين قالتلي لأ مفيش الحجم ده! إبتسمتلها ابتسامة المنتصر ، وخرجت ظافراً! إحساس التميّز يابو حميد بين دول العالم كلّه... محدّش غيرنا بيشيل فردة شبشب في جيبه ، وكمان مكتوب بخط الإيد!

وانا داخل ع المطار في تورونتو برضه ع الكاونترز عشان أستلم تذكرتي ، ولسّه هاطلّع للراجل التذكرة اللي طابعها من الويبسايت بتاع ويست چيت ، والراجل يسألني ع الفاميلي نيم (التهامي يا عم الحاج) ، يقوللي محمد؟... بالظبط يا سيدي... اتفضّل تذكرتك! كيداهوه ، ولا حتى يبُص ع البطاقة يتأكّد إني أنا محمد! الحياة سپوغتيف يا معلّم!

وانا راجع من كالجاري في المطار ، إتدبّست في وزن زيادة ، بس دفعت 50 دولار بس (الرحلات الداخلية) ، وكالمُعتاد... البنت تعتذرلي أكتر من مرة إنها مضطرة تغرّمنى الـــ 50 دولار دول ، ولو ممكن أنقل حاجة من الشنطة للهاند باج وأوفّر فلوسي! الغريب إنها زوّدت الضريبة ع الـــ 50 دولار ؛ زي ما اكون باشتري بضاعة من وول مارت! (عكس الموقف بتاع إير كندا إللي دفعت فيه 100 دولار بالظبط)

وهاحكيلك عن كالجاري بعدين...

[Princesse]

والله يا دكتور تهامي حاجة تفرح ان في مصر في وعى ضد انفلونزا الجنازير..مكنتش مصدقة انهم فعلا بيتتبعوا الحالات القادمة من البلاد الموبوءة

وكويس انهم اخدوا بالهم بعد 3 ايام..واحدة واحدة حكومتنا لسة بتتعلم

شكرا ليك يا دكتور على الهاند اوفر الجميل دا..واتمنى ليك ديما النجاح و التوفيق في امتحانك القادم

[Shehab]

"و أخيراً زست"....اهو هو ده الكلام ....حمد لله ع السلامة يا كبير و نورت قهوتك اللى كانت مضلمة تانى... :lol:

اكيد انت سمعتنمى و انا بقول للدكتور هشام فى قهوته قد ايه انت مهتم و بتراعى زباينك!!!

هاند اوفر متين كالعادة يا باشا....بس برده مستنين الصور

حلاوة إيه بس يا عم شهاب... قلبك أبيض!

دي أقل من شهادة الممرّض! يعني حاجة أتكسف أقولها!

عموماً ، بس انا أظبّط شغل هناك ، والحلاوة هتنزل عليكو ترفّ :blink:

ياباشا ماتقلش كده....و بعدين يا دكترة الحلاوة بتاعتنا هى نجاحك....و يا سيدى خلي الحلاوة علينا المرة ديه

كان نفسى اقلك ليك عندى حلاوة كبيرة لما تنزل مصر بمناسبة نجاحك...بس للامانة تراجعت لان من الواضح انك بقيت تتبسط كتير فى مصر

و بما انك بقيت -لا مؤاخذة فى الكلمة- شخص مشتبه فيه و سوءت سمعة كندا بعد ما كنت مصيتها

و انت عارف برده ع رأى الفاضلة شرين -ده طبعا بما انك اعتبرت هيفا اخت فاضلة-"غالية بلدنا علينا و كده و بتاع"

فمضطر اخلى موضوع الحلاوة فى اى حتة بره مصر....و اهو بالمرة تاخد ربع الرومى و تمن الكباب بتوع الدكتور هشام معاك!!

تحياتى يا باشا و حقيقى طمنتنى ع ان بالحكومة واعية و مصحصحة و واخدة بالها من صحتنا !!! :blink:

تم تعديل 2 يونيو 2009 بواسطة Shehab

[د هشام ابراهيم]

باسبورنا باسبور فرعوني مالوش نظير وعلى رأي محمد صبحي .... إحنا الفراعنه .... بتوع المسلاااااااااااات

لازم باسبورنا يكون فيه حاجه من حضارتنا

أنا باسبوري إنتهى من شهرين و مش مجدده تاني خلاص

أنا جددته من القنصلية في مونتريال بالبريد بس بعتولي المارد الأخضر برضه .....الجواز الجديد لازم من مصر

المارد الأخضر ده ما فيش مرة استخدمته في مطار في بلاد بره اللي بتاكل طحينة إلا و المتفحص مسكه من اليمين و بعدين الشمال و قلبه رأسيا و أفقيا لحد ما يعرف يفتحه و بعدين يلاقيه مكتوب بخط اليد فيبصلي بصة طويلة و بعدين أصعب عليه جدا فيبتسم و يعديني

[emano]

باسبورنا باسبور فرعوني مالوش نظير وعلى رأي محمد صبحي .... إحنا الفراعنه .... بتوع المسلاااااااااااات

لازم باسبورنا يكون فيه حاجه من حضارتنا

أنا باسبوري إنتهى من شهرين و مش مجدده تاني خلاص

أنا جددته من القنصلية في مونتريال بالبريد بس بعتولي المارد الأخضر برضه .....الجواز الجديد لازم من مصر

المارد الأخضر ده ما فيش مرة استخدمته في مطار في بلاد بره اللي بتاكل طحينة إلا و المتفحص مسكه من اليمين و بعدين الشمال و قلبه رأسيا و أفقيا لحد ما يعرف يفتحه و بعدين يلاقيه مكتوب بخط اليد فيبصلي بصة طويلة و بعدين أصعب عليه جدا فيبتسم و يعديني

والله يادكتور لسه بيطلعوا الاخضر الكبير انا جدتت جواز السفر وطلع الاخضر الكبير برضو

ولكن مع غلطه فى اسم والدى ناقص حرف

وغلطه فى تاريخ ميلاد بنتى بدل 2001خلوها 2000يعنى اقبل متجوز شفت الجمال

ولما رحت علشان اشتكى الضابط زعقلى وقلى حتتصلح خلاص تعالى بعد يومين

حاجه منتهى الاهمال

كل صفحه فى الجواز انظر صفحه كذا

عمار يامصر

[precanadian]

تحياتي لك يا مستر تي . علي الرغم انك عجزت والشعر الابيض بان لاكن ماشاء الله اسلوبك في الكتابه لسه شباب وحيويه وقدره غير عاديه علي التحليق بخيالنا الي واقعك الي عشته وكاننا بنمر بتلك اللحظات معاك good characterization

في الرحلة دي برضه قلت أغيّر بقى شوية ، وطلبت من طنط الحاجة إكسپيديا إن وجبتي تكون كوشر (Kosher) ، ودي وجبة ولاد عمّنا... اليهود! كان الواد ديبو دايماً يقوللي آهو أكل اليهود حلال... تخيّل؟! لإنهم بيسمّوا على الحيوان قبل ما يدبحوه ، وما بيجوش ناحية الخنزير. قلت طيب ما تجرّب يابو سعد ، وبالمرّة ترحم نفسك من الحركات الصايعة بتاعت إير كندا!

بصورة عامة ، الكوشر أحسن من الـــ Muslim Meal ، يمكن عشان ليها معايير جودة بيلتزموا بيها ، والصينية بتجيلك متغلّفة سيلوفان متبرشم عشان ضمان إن الوجبة ما يتلعبش فيها! واستيكر بمكونات الوجبة (زي في المسلم ميل) ، وكمان كارت ضمان داخل التغليفة السيلوفان ؛ بإن الوجبة دي تضمنها مجموعة المش عارف مين في أوروبا ، وإنها مطابقة لمعايير المش عارف إيه برضه! قلت سبحان الله... إشمعنا احنا مالناش منظّمة تمسك الموضوع ده ، وتفرض معايير للخدمات المقدمة للمسلمين؟!

لي ملحوظه صغيره بالنسبه لاكل الطياره وال muslim meal .جربتها علي lufthansa وللاسف مفهومهم انها كبسه سعودي يعني جابوا شويه ارز وقطع لحمه ضاني والسلام والطعم سيئ.

اما بالنسبه للكوشر الحقيقي مجربتوش فبل كده لكن انا اختلف مع ديبو وحضرتك في موضوع التسميه

فاكل المسلمين يتشابه معهم في طريقه الذبح قطع الراس كاملا وتصفيه الدم . فبالتالي الاكل مهواش ميته الي هي محرمه عند المسلمين وعند اليهود.... اكل غير الكوشر وغير المسلمين مشكلته في طريقه قتل الحيوان قد يتحول الي ميته اذا استخدم الصعق او الرمي لالرصاص او او غيره لازم السكينه تجيب الcarotid artries bilaterally >

الحاجه التانيه ان الكوشر يحرم الخنزير والحصان (زي المسلمين ) بالاضافه للارنب ( مش زي المسلمين)ولتفاصيل اخري اسمحلي بالاقتباس ده للي مهتم بالموضوع wst::

إضغط هنا لزيارة موقعي

إضغط هنا لزيارة موقعي

لو تحب نفتج توبيك جديد في الموضوع ده لاحسن الموضوع قلب شفخانه ممكن بس اي حد غيري يشيله :lol: :lol: :lol:

تم تعديل 6 يونيو 2009 بواسطة precanadian

[moheltohamy]

My greetings from Ontario

coming soon.......

SoSoRaNy

حمد الله ع السلامة يا رفيقة الكفاح... أونتاريو نوّرت :aslam:

بس إيه حكاية أونتاريو؟! أوعي تكوني تنازلتي عن قلبها النابض (تورونتو)

في انتظار حكاويكي الشيقة... زي ما انتي دايماً كده غاوية صاسبينس...

سلامات من أمام السفارة الكندية ، وفي إيدي الباسبور ... ودلوقتي تحياتي من أونتاريو!

غاوية حركات انتي

عموماً ، احنا متشوّقين ، وفي انتظارك تطمّنينا على مغامرات سوسوراني في مجاهل أونتاريو

[moheltohamy]

شوية صور ذات صلة...

البلاي ستيشن في مطار شارل دي جول

الزحمة الفظيعة في رحلة الذهاب على الطيارة أم دورين! أول مرة أشوف زحمة على كاونتر الدخول للطيارة بالمنظر ده! أو بالأسلوب ده (طبعاً كلمة أسلوب تعني خارج مصر!)

الطيّارة المتوحّشة... واخدين بالكوا من الجناح وهوّه فارد عضلاته؟!

ولما لم عضلاته! برضه لسّه متوحش!

الأتوبيس اللي أخدته من مطار بيرسون في تورونتو للداون تاون... فيه واي فاي بالمناسبة (مش بس القطر الجو ترين بتاع هشام اللي راح بيه أوتاوا :aslam: )

الأتوبيس طلع من المطار للداون تاون ومعاه 3 ركّاب! وطبعاً سألت الراجل السواق وانا نازل (إنتو بتكسبوا بالمنظر ده يا عم الحاج؟! ) ، والراجل يضحك ويقوللي (فيه أوقات الزحمة بتكون ع الآخر ، وأوقات تانية بتكون فاضية زي مانتا شايف ، ودي بتشيل دي!)

لجنة الاستقبال في مطار القاهرة!

ودي صورة من بعيد بالزوم ، ما طلعتش واضحة أوي معلش ، لكن هتدّيكوا فكرة عن الكاميرات الحرارية دي!

[moheltohamy]

دكتور تهامى

حمد لله على السلامة .. مستنيين حكاياتك و اطباعاتك و الأهم تعليقاتك على كل حاجة

على فكرة أنا باستنى تعليقاتك على كل موقف أكتر من انتظارى لسماع المواقف نفسها

عنينا يا افندم...

وهوّه أنا عندي غير تعليقاتي؟!

وهوّه مودّينا في داهية غير تعليقاتي ، ولساني اللي ما بيعرفش يسكت ده؟!

ألف حمد الله على السلامه يا دكتور ...

أنا متابع موضوع حضرتك الرائع في صمت :blink:

وبالتوفيق ان شاء الله ..

ربنا يخليك يا أبو حميد... ويا رب دايماً متابع.

الف حمدلله على سلامتك يا تهامي ياخويا

والله المنتدى مخضر قصدي منور

بوجودك و ياريت ماتتأخرش علينا بأخبار رحلتك

الأخيره لكندا الحبيبه

أهلاً دكتورة...

الرحلة الأخيرة هتكون في معظمها إنطباعات عن ألبيرتا ، والسكة العملي اللي بدأتها هناك.

ربنا يسهّلها...

dr moheltohamy متاسفة جدا على قراءة الاسم غلط بس علطول بقراها محيى التهامى وعلطول افتكر فلم فول الصين العظيم والبنت الصينية وهى بتقول لهنيدى يا موهيى(محيى).........بس هاخد وقت بقى لغاية متأقلم مع الاسم الجديد وامرى لله

يلا حصل خير ان شاء الله

وفكرة انى اتوب صدقنى مازلنا فى حيرة والاختيار صعب..........ادعيلنا نقدر نقرر بس الاول ربنا يسهل ويكمل الموضوع على خير

يا ستي خلاص هانت... وعن قريب تعمليها وتبعتيلنا التحيّات من هناك زي سوسوراني كده :aslam:

انا قلت اجى اسجل حضور ورجع تانى اكمل قرائه الى فات

حمدل على سلامتك يادكتور

وربنا يكون فى عونك ويقويك على المذاكره

ايمانو

الله يسلّمك يا إيمان... ويا رب تطمّنينا عليكم انتو كمان ، والعيلة تكبر في كندا عن قريب (عيلة المحاورات طبعاً)

[moheltohamy]

السلام عليكم

أحب اسجل اعجاب وانبهار بالتوبيك بتاعك يا دوك

وأنا على فكرة كنت تابعت أول كام حلقة من زمان بس اعزرني كنت في فترة خطوبة ..... (ياريت اللي جرى ما كان wst:: )

وربنا ما يحرمنا من معلوماتك.... على فكرة بلديات ياباشا :wub: .... المنصورة

يا مرحب بالتلافازيون يا مرحب wst::

وخطوبة يا باشا تبقى لسّه في فترة الأحلام الوردية ، والمزاج العنب... طوّل فيها على قد ما تقدر... باقي الزملا أعتقد ممكن يأكّدولك على كلامي ده (لو كانوا قاعدين على راحتهم طبعاً ;) )

نصيحة تانية...خلّي الأهل خارج أي حوار في أي حاجة في الدنيا... آخرك معاهم ابتسامة صفرا ، و (الحمد لله) ما بتزعّلش حد! wst::

ياجماعة الراجل أكيد مشغول او في شوية أمور هيه ألي معطلاه

بس المهم يكون التأخير .. سببه خير ان شاء الله

ونحن في الأنتظار.. وبالتوفيق

bv:-

[moheltohamy]

عذرا دكتور تهامى لو كنت خرجت عن الموضوع

ألف مبرووووووووك يا زميلتنا العزيزة سوسورانى

ادعيلنا نحصلك

ما ينفعش أدعيلك أنا؟! وانا برضه راجل كنداوي من قبل سوسوراني بزمان!

ولا هيّه الدعوات الحريمي عليها سكر؟! wst::

إلاّ صحيح يا حسام... هيّه المدام فين؟! wst:: ;)

(معلش احنا بنتكلم مع بعض مفيش أي حاجة)

[moheltohamy]

أستفسار يادكتور تهامي

ايه رأي حضرتك في الطياره أم دورين " بيتهيألي أنها الأيرباص A380 وده من منظر الجناح ألي حضرتك مصوره " ؟؟ هل إجابيتها أكثر من سلبيتها ولا العكس وده طبعا من واقع تجربة حضرتك الفعليه ؟؟

http://www.emirates.com/ae/arabic/flying/o...rates_a380.aspx

واحد شغال في مكتب طيران قل لي لو طلعت عليها حتعاني بسب حجمها وأستيعابها لعدد ركاب كبير جدا

وشكرا يا دكتور ........

يا حاج محمد مانا قلتلك اللي ركبتها كانت البوينج 747 (من أم 250 مليون دولار دي ، وعشان يجيبوا تمنها لازم يحمّلوا ركاب أكتر من الكارتة!). ودي كانت خنقة بشكل يضايق ، خصوصاً في رحلة الذهاب من باريس لتورونتو ، مع اكتمال الركاب! لكن كانت أرحم بكتير في رحلة العودة وانا فارد نفسي على الـ 3 كراسي. لكن بصفة عامة... المسافات بين الكراسي كانت أضيق من المعتاد! مش ميزة خالص!

هوّه طبعاً مع ازدياد حجم و وزن الطائرة وعدد 4 توربينات (بعض الطائرات 2 بس) ، بيزداد ثبات واتزان ومعامل الأمان في الطائرة ، ومقاومتها للمطبّات الهوائية ، والمخمطة اللي بتخلّيني أسلّم نمر مع الهبوط بالتحديد! لكن يغور كل ده مع الزنقة السودة اللي مزنوقها على مدى 8 ساعات ونص من باريس لتورونتو! إلاّ ما حد يا جدع نزل في نص السكة! كلّه نزل آخر الخط! :D

وعشان نعمل معاك واجب... آدي صورة ليها عشان ما ابقاش حرمتك من حاجة (مش انا اللي مصوّرها طبعاً) :lol:

[د هشام ابراهيم]

اللي ركبتها كانت البوينج 747 (من أم 250 مليون دولار دي ، وعشان يجيبوا تمنها لازم يحمّلوا ركاب أكتر من الكارتة!). ودي كانت خنقة بشكل يضايق ، خصوصاً في رحلة الذهاب من باريس لتورونتو ، مع اكتمال الركاب! لكن كانت أرحم بكتير في رحلة العودة وانا فارد نفسي على الـ 3 كراسي. لكن بصفة عامة... المسافات بين الكراسي كانت أضيق من المعتاد! مش ميزة خالص!

هوّه طبعاً مع ازدياد حجم و وزن الطائرة وعدد 4 توربينات (بعض الطائرات 2 بس) ، بيزداد ثبات واتزان ومعامل الأمان في الطائرة ، ومقاومتها للمطبّات الهوائية ، والمخمطة اللي بتخلّيني أسلّم نمر مع الهبوط بالتحديد! لكن يغور كل ده مع الزنقة السودة اللي مزنوقها على مدى 8 ساعات ونص من باريس لتورونتو! إلاّ ما حد يا جدع نزل في نص السكة! كلّه نزل آخر الخط! :lol:

احساس شخصي مش عارف حقيقي و لا لأ

دايما باحس إن الاير باص أريح من البوينج مش عارف ليه ....كراسي و ممرات و تجهيز و كده ....طبعا الكلام علي الاكونمي :D

[moheltohamy]

الأتوبيس اللي أخدته من مطار بيرسون في تورونتو للداون تاون... فيه واي فاي بالمناسبة (مش بس القطر الجو ترين بتاع هشام اللي راح بيه أوتاوا )

منور يا كابتن تومي .... ايوه كده بل ريق الزباين بمشاريب بدل الجفاف اللي جالنا علي الفرع الرئيسي للقهاوي

بالمناسبة ملحمة الألياذة خلصت و لا لسه ....قصدي يعني موضوع الشوبنج :lol:

الاوتوبيس كمان واي فاي ..... ياللا إن شا الله ما حد حوش .....

قطر أوتاوا ما كنش جو ترين يا عم الحاج ....Via Rail .....و قطر سانت كاترين برضه Via .....

أخر نقطة لل-Go train برلنجتون .....علي فكرة فيه كلام أنه حيوصل ميلتون عند العصاية بتاعة كابتن هوبا wst::

شيكو حبيبي...

جو ترين ، فيا ريل... ما العن من سيدي إلاّ ستي!

آهي كلّها سكك حديد كندا! مش كده ولا إيه؟

بس آهي كده باضت لإيهاب ف القفص... وينقل من الجو للفيا ، ويبيع الميكروباظ بقى ويريّح نفسه!

ومصلحة لينا احنا كمان ؛ ممكن آخدك ونطلع بالفيا ريل عليه يوم سبت كده ، نطب عليه سقالة كده ندوق اللازانيا اللي واخداه مننا دي!

صباح الفل يا هوبا :D

[د هشام ابراهيم]

شيكو حبيبي...

جو ترين ، فيا ريل... ما العن من سيدي إلاّ ستي!

آهي كلّها سكك حديد كندا! مش كده ولا إيه؟

بس آهي كده باضت لإيهاب ف القفص... وينقل من الجو للفيا ، ويبيع الميكروباظ بقى ويريّح نفسه!

ومصلحة لينا احنا كمان ؛ ممكن آخدك ونطلع بالفيا ريل عليه يوم سبت كده ، نطب عليه سقالة كده ندوق اللازانيا اللي واخداه مننا دي!

صباح الفل يا هوبا :lol:

فيه ديه عندك حق يا زعيم كلها سكة حديد كندا :D

بس الجو باحسه مواصلات عامة أكتر منه سفر و كده .....كمان القطورات مختلفة ....سيبك لو فيها لازانيا يبقى مش مهم نروح ازاي إن شا الله عربية بونتياك حتي

[moheltohamy]

عادي يابو حميد ، ولا يهمّك...

الطيّارة دي (Boeing 747-400) من أكبر الطائرات بصفة عامة ، ومن أغلاهم برضه! فيه طيّارات زي الـ 737 تمنها يا دوبك 55 مليون دولار... كلام فارغ... يعني ممكن تحوّش من مصروفك وتشتريها!

شويّت توضيحات بالمرة... الطيّارة بتشيل 416 راكب ، مش 400! والصف الوسطاني 4 كراسي مش 5!

الأمانة العلمية نقحت عليا! :lol:

وآدي صورة ليها من جوّه... برضه مش انا اللي مصوّرها!

والإتينيراري بتاعها آهوه ع الإكسبيديا بالمرة... وأي خدمة :D

آه صحيح يا هشام... الإلياذة خلصت تقريباً... لسّه الأوديسا

أنا عارف إيه اللي كان دخلني في قصّة الشوبنج دي؟!