كندا التي رأيتها :)

[ابو الخير]

هههههههههه

جامده الحلقه دي

علي فكره انا اسمع من اخواتي في امريكا و الناس اللي في كندا ان الداون تاون ديما مش مضمون و اهم حاجه النيبرهود اللي حواليك و الاضمن ان الواحد يقعد في المناطق او الضواحي اللي حوالين المدينه

[لولا]

حقول ايه انا بس يا دكتور توهامى بعد كل الكلام الحلو

اللى قالوه حبايبك هنا :blush2:

كل يوم بجد بتتحفنا بكلامك وكميه المعلومات اللى مش معقوله

اللى بتكتبها بأسلوبك اللى ملوش حل دوت..قمه فى الخفه

والبساطه فى توضيح معلومات مهمه موووووت.

على فكره فى ناس كتير زيك عندها معلومات كتييييييير

ممكن تفيد بيها ناس تانيه ، بس الفرق بينك وبينهم انك

واضح قوى انك هدفك الرئيسي تنقل ادق تفاصيل خبرتك فى كندا

للكل ، حتى لو كان دا على حساب وقت حضرتك، والتعب

والمجهود والوقت عشان تكتب كل دا .

ربنا يوفقك ويسعدك انت والمدام.

والف شكر على المجهود الراااااااااااااائع الى بيزود متابعتنا

للموضوع كل يوم ، واكيد برضه بيزود من احترامنا لشخصك الكريم.

وفعلا موضوعك اصبح ساحه للراحه هنا فى المنتدى للتمتع بالهدوء ، والبساطه

وخفه الدم ، واكيد الأخلاق الحلوه ليك وللمشاركين. :wub:

[moheltohamy]

حسيني يا اخويا:

أي خدمة يا هندسة... آدينا شغالين أهوه شمعتُن تحترق من أجل الآخرين! :blush2:

د. أيمن كامل:

يا باشا مالك قالبها كآبة ليه؟ كندا لا هيه مقبرة الخبرات ولا الجنة الموعودة! لا هيه أبيض ، ولا هيه إسود!

كل المشكلة إنك عشان تستمر في خبراتك وتخصصك اللي اتعودت عليه ؛ هتحتاج تدرس تاني. المشكلة إننا قلنا أخيراً خلّصنا من المذاكرة. لكن هناك هتضطر تكمل تاني.

لكن من حيث شغل - أي شغل - موجود يا ريس ، وبكثرة. وأفتكر كلمة قالهالي واحد صاحبي هناك...

محدش في كندا بينام من غير عشا! ومحدش بيقعد عاطل غير اللي عاوز يفضل عاطل. أما الشغل اللي يعيّشك ؛ فموجود ، وأي شغلانة هناك هتديك أساسيات الحياة (سكن أكل مواصلات لبس) وممكن تحوش منه كمان. وبأمر القانون في ولاية أونتاريو ، الحد الأدني للمرتبات ف الولاية 8.75 دولار ف الساعة. يعني ما تقلقش.

وبالنسبة للمهن اللي مش محتاجة فن ، ومتوافرة في أي وقت : عامل تقديم في مطعم من بتوع التيك اواي ، فرد أمن ، مندوب مبيعات ، كاشيير في هايبر ماركت ، خدمة عملاء ع التليفون ... حاجات كده يعني.

ما تشغلش نفسك... بس لما تبقى توصل ، يبقى ساعتها هتتحل! خلاص يعني دخلت كندا ، والمشكلة تشتغل إيه؟! الحياة ما بتتاخدش أفش يا دكتورنا wst::

عزيزي د. أبو الخير:

أنا فهمت شوية الحاجات البسيطة دي عن بنوك كندا ، لكن فيه حاجات تانية باتنح وافتح بقى ولا فاهم منها أي حاجة (زي الــ RRSP ، ونظام الضرايب برضه). يمكن عشان لسه ما اتدعكتش فيهم! ty:)

وبالنسبة للمذاكرة ... فده يا سيدي 16 يوم تدريب في جوهانسبرج (جنوب أفريقيا) ، وهناخد 4 كورسات في بعض:

BLS (Basic Life Support) course

ACLS (Advanced Cardiovascular Life Support) course

ITLS (International Trauma Life Support) course

TST (Topside Support Training) which is the medical policy of my company.

والمشكلة إني مش باطيق الكارديو أصلاً من أيام فسيولوجي سنة أولى! :sad:

ربنا يسترها بقى!

وفعلاً كا ما تبعد عن الداون تاون ، هتلاقي المنطقة أحسن ، وأرقى. وبصفة عامة ، المنطقة الأرقى ؛ هتلاقيها أغلى شوية في أسعارها. وكل واحد وأولوياته... وميزانيته برضه!

وأنا زودت على آخر مداخلة ليا شوية تفاصيل نسيت أكتبها أول مرة (باللون الأحمر).

الباشمهندس ياسر:

أوعى تقوللي إنك روستاباوت! :wub:

ولما انتا ف البترول يا ريس ، ما تزق على هناك يللا ... وألبرتا محتاجة ناس! ولا انتا مكتفي بالميدل إيست؟! ولا انتا فين أصلاً؟!!!!

عارف أحلى إحساس ... لما تبقى قاعد ف الشركة ، وحاسس إنك جوهرة... وزي ما تكون بتمن عليهم بوجودك معاهم ، وبتتلكك لهم ، وانا أصلاً مش فارقة معايا! دانا سايب الدنيا والعيشة في كندا ، وقاعد معاكو! هاهاهاهاها :D

والغريب إنك بتلاقي الدنيا كلها ماسكة فيك. هنقول إيه بس؟! ماهي الدنيا ما بتديش محتاج !

الفاضلة أم ريهام:

هوه فعلاً أحمد كان النافيجيتور بتاعنا هناك برضه. وهوه إنسان خدووم إلي أقصى درجة بصراحة. ومقطوع لنا في أي وقت! واللذيذ إن هند بتستغله أسوأ استغلال وانا مش موجود!

عاوزة أجيب خضار ولحمة وفراخ الشهر يا أحمد ، عاوزة أروح سيرز آوتلِت أشتري هدوم الشتا يا احمد ، مش عارف إيه عاوز يتركب ف البيت يا احمد ، عاوزة طقم مفكات ولا شانيور باين يا احمد (وتضرب عليه كام شهر)!!! :lol: والراجل عمره ما قال لأ الصراحة :wub:

المعلم بتاعنا ؛ حسام:

يا باشا أسعدتني بمرورك ع الخُنّ الصغير بتاعي! هيه فعلاً ألبت نكد وخناقات بقالها كام يوم.

عموماً يشرفني إني خليتك تفك عن نفسك الشوية دول. ويا رب دايماً.

الغالية لولا:

والله بافرح لما أشوفك هنا ، بكلامك اللذيذ دوت po::

وأتمنى تكوني عرفتي تفكي طلاسم الشفرة اللي كاتبين بيها الموضوع (العامية المصرية الفصحى!)

ويا رب تفضلي معانا هنا على قد ما تقدري ، وتسيبك من الحمق ، وحرقة الدم اللي هتجيلك من وراهم!

بجد أسعدتيني

تم تعديل 30 يوليو 2008 بواسطة moheltohamy

[moheltohamy]

نيجي بأه للشقة اللي حجزناها في الميد تاون... حتّت شقة أستازة يابو حميد ، مانتا عارف اخوك ودماغه اللاسعة ، لازم أكون راضي نفسياً عن الشقة وموقعها والمنطقة اللي هيه فيها ، وشكلها ومستوى تشطيبها من جوه!

و الشقة ف الدور التاني (أو الأول علوي) ، و واخدة ناصية وبتبص على يانج ستريت. وتحتنا على طول فرع لـــ تيم هورتونز (Tim Hortons) أشهر كافي شوپ ف كندا (وعلى رأي احمد "مش هتبقى كندي غير لما تدخل تيم هورتونز" ، وعشان كده يوم ما وصلنا كندا ونزلنا الشنط عند إلما ، أحمد خدنا عشان نتعشى ورحنا على تيم هورتونز!) ، نفس شعبية ماكدونالدز كده! يعني ممكن ننزل له السَبَت وننده : "يا عم تيم ، اتنين كاپوتشينو بالفرينش فانيللا وصلّحه!"

والمنطئة تحفة ، هادية جداً وراقية ، وخطوتين بينك وبين كل حاجة تحتاجها ؛ خطوتين شمالاً تلاقي فيوتشر شوپ (حاجة كده زي كمبيو مي في مصر) فيه كل حاجات الكمبيوتر (وهوه اللي اشترينا منه اللاپتوپ لهند) ، وسيديهات وأجهزة إلكترونية وكهربائية وخلافه. خطوتين شرقاً العمارة رقم 66 برود واي اللي أحمد ساكن فيها (بيننا وبينه 4 عمارات). تعدي الشارع ؛ فرع رئيسي من فروع البوسطة ، وهوه مبنى حكومي لخدمات الهجرة والجنسية في نفس الوأت.

خطوتين جنوباً هتلاقي ميدان أو تقاطع (يانج آند إجلنتون) ، فيه بأه فرعين لبنك TD Canada Trust وبنك CIBC ودول أشهر بنكين في كندا ، وهمه اللي فتحنا فيهم حساباتنا ، وكمان بنك RBC وبنك HSBC. وف التقاطع ده (يانج آند إجلنتون) فيه محطة مترو رئيسية تحت الميدان ، ومعاها محطة أتوبيس (برضه تحت الأرض) ، ومنها بتدخل لمول تجاري تحت الأرض ، واخد الأدوار الأرضية ودورين تلاتة تحت الأرض من مجموعة العمارات الموجوده بالميدان ده ، والمسافات اللي بينها ، وفيه بأه كل حاجة تتخيلها ؛ محل إسمه H.M.V. وده بتاع اسطوانات أغاني وأفلام وبس لكن على مساحة محترمة! وجمبه محل لمستلزمات الحيوانات الأليفة ؛ قطط وكلاب وأرانب وفيران وعصافير وسمك وحرباية وحشرات غريبة! وكل أنواع المطاعم (إضافة للي فوء الأرض ف التقاطع) ، وسوبر ماركت قد نُص كارفور كده (دومينيون) ، ومحلات لبس ، وأجهزة كهربائية وإلكترونية، وسينما ، ومحل ضخم متخصص للعب الأطفال ، ومكتبة ضخمة دورين تشتري منها الكتب والمجلات ، وفرع من فروع كارلتون كاردس (كروت التهاني) لو بتاخد بالك من الماركة دي. م الآخر ، مش هتحس إنو ناءصاك حاجة ف المنطقة دي!

وبرضه جمب البيت (3 دقايق مشي) فيه فرع محترم من فروع (Toronto Public Library) ، المكتبة كبيرة موووت ، وفيها جناح للكمبيوتر والإنترنت ، وممكن تستلف منها الكتب وترجّعها بعد شهر باين ، وممكن تجدد الاستعارة تاني. كل المطلوب إنك تعمل كارنيه من عندهم ببلااااااااش :blush2:

والشقة نفسها لزيزة ؛ حندوءة (وَن بد روم أپارتمنت) بس واسعة فعلاً ، وفيها كم غير طبيعي م الكلوزيتس (الدواليب اللي ف الحيطة يعني) ، والأرضيات باركيه (هارد وود فلور) ، والحيطان اللي ما بين الأُوَض عبارة عن خشب مش طوب (ولاحظت إن ده من أساليبهم في الإنشاءات هنا على فكرة) ، وطبعاً أساسي وحدات وأدراج وضلف المطبخ - تلاجة – غسالة أطباق – بوتاجاز كهربا ، والمية السخنة طبعاً بتيجي من سنترال صابلاي (زي بريمة البحر كده) ، والواجهة كلها إزاز ألوميتال شفاف (وده عيبه بأه ، لأن لسه محتاج تجيب ستاير ، غير كده ؛ منك للشارع!). آه طبعاً نظام التدفئة (والتكييف) ماشي دوران ع الأرض تحت الواجهة الإزاز ماسك الشقة كلها ، ممكن مسلاً تشغله نص ساعة وتفصله ؛ تفضل الشقة دافية لتاني يوم (العزل هنا تحفة – سواء للحرارة أو للصوت) ، وبرضه التكييف موجود (پري إنستولد Pre-Installed يعني)! وليك لوكر (مساحة للتخزين) تحت في البيزمنت (البدروم) تسع زي ما تقول كده 4 غسالات فول أوتوماتيك ، ممكن تخزّن فيهم الكراكيب بتاعتك ، وليها فريم حديد بقفل.

واللزيز بأه إن من غير ما تتكلم ، تلائي المانيدچر جاي يعمل تشيك ع الشقة ، وما عجبهوش النجف اللي موجود ، فقرر يغيره ، عشان احنا جينا جُداد ومن حقنا نلاقي النجف جديد ، وغيَّر حاجات ف السباكة والدش والحنفيات! مش محتاج طبعاً إني أئول لك إنو ف نفس اليوم اللي البنت اللي أبلنا سابت الشقة ، جه الپينتر ودهن الشقة كلها ، تاني يوم تروح تلاقي الدنيا مختلفة تماماً ، والسوبر انتندنت ظبَّطت الشقة واتنضفت صح! الدنيا هناك ماشية صح الصح زي ما الكتاب بيئول!

تم تعديل 31 يوليو 2008 بواسطة moheltohamy

[ramiesm]

صباح الفل يا دوك.. و مبروك على الشقة يا باش :blush2: ا و لو سمحتلي كدة اسألك سؤال سخيف والسؤال هو: بسم الله الرحمن الرحيم .. بكم ايجار الشقة دي يا ريس؟ و بالمرة كدة بما ان المدام هناك حاول تشرحلنا كدة تكاليف المعيشة و متوسط اللي الواحد ممكن يصرفه في الشهر ( علما بأن الواحد نزيه برضو و ما بيحبش التقريط) :wub: po::

معلش بنتقل عليك بس مالناش غيرك هناك انت و احمد الديب

[moheltohamy]

حسيني - رامي - ابن سينا :

الحتة اللي جاية فيها إجابات كل الأسئلة دي...

وخلّي بالك يا عم رامي يا نزيه! اللي متعود ع النزاهة والصرف - زي حالاتي كده - هينزّه نفسه برضه هناك! :happy: ويستحمل بقى :lol:

أنا مثلاً في آخر مرة قعدتها هناك (4 أسابيع) ، صرفت 6 آلاف دولار! :blink:

عموماً ، لو عاوز تلم نفسك وتصرف ف المعقول... ألف : ألف ومتين ممكن يبقو لوز أوي wst::

[moheltohamy]

بالنسبة لنظام الشقق يا ريس : العمارة اللي احنا فيها (مبنى من 4 أدوار – Low-Rise Building) تحت إدارة وملك لشركة اسمها ترانس جلوب ، هيه المسئولة عن كل حاجة ، ويمثلها الأپارتمنت مانيدچر ، هوه اللي بيمضيلك ع العقد ، وليها مندوب ف العمارة هوه السوبرانتندنت ، هوه المسئول عن متابعة أحوال العمارة ، وتلقي شكاوي السكان ، ومتابعة تنفيذها ، وتجميع الإيجار وما إلى ذلك.

وف المقابل الشركة طبعاً بتديلُه مرتب وشقة ببلاش في نفس العمارة يسكن فيها ، شاملة كل اليوتيليتيز (متطلبات الإقامة – أنظر البند القادم). والسوبر انتندنت عندنا واحدة م المجر اسمها سيلفيا ، حتّت سكرة. بنت طعمة وحليوة وبتتكلم انجليزي بسرعة غير طبيعية (زي نشوى مصطفى كده)! جوزها مُبرمِج كمبيوتر وعندها ولد وبنت ، ومتعاونة لأقصى درجة وخدومة برضه وفريندلي مووت.

وبالنسبة للعقد هنا يا سيدي ، فانتا بتمضي عقد لمدة سنة ، ويمتد بعد كده شهر بشهر ، ولو سيبته قبل انتهاء السنة ، فانتا مُلزَم تدفع باقي الأقساط! وقبل ما تمشي ؛ لازم تبلَّغ قبلها بشهرين (two months notice) ، وكل سنة بيعاد النظر في الرِنت أو الإيجار الشهري بتاع الشقة (اللي هوه 1.075 دولار). طبعاً الإيجار بيختلف تبعاً لموقع الشقة ، من منطئة لمنطئة ، وعلى حسب حجم الشقة واليوتيليتيز المتضَمَّنة ف العأد! وف المتوسط – كما قالت لنا سيلفيا – الزيادة من 3 – 4 % كل سنة!

وطبعاً ، الزيادة دي مش بعبط ، لآ دي بتكون محسوبة ؛ حسب الارتفاع المعتاد في الأسعار ، وطبعاً الشقة معاك طالما هتدفع الإيجار اللي الشركة طالباه ، وما حصلش منك مشاكل تخليهم يئولوا بجيرانها! وعلى فكرة ؛ ترانس جلوب بعتوا لهند إخطار بالزيادة في الإيجار الشهري بدءأ من السنة الجديدة (أكتوبر 2008) ، وإن الإيجار هيزيد 15 دولار (1.5 %) أنا بصراحة اتنقطت! يعني الإيجار هيبقى 1.090 دولار. طب ما يخلوه 1.100 دولار ونخلص ، ويبقى رقم صحيح! wst::

ملحوظة بس للمقارنة ... شقتي في مدينة نصر كنت بادفع لها 1.750 جنيه ف الشهر ، وبعد ما سِبتها إيجارها بقى 2.300 جنيه! :blink:

وبالمناسبة ، ما بيرضوش ياخدوا الفلوس كاش ؛ لازم بشيك! يقولولك التعامل الكاش فيه قلق ؛ ولما كل شقة هتاخد منها فوق الألف دولار ؛ يبقى كل شهر هتروح السوبر انتندنت للشركة شايلة فوق الـــ 30 ألف دولار؟! مجازفة طبعاً!

نفس الموضوع ده حسينا بيه لما رحنا نسحب الـــ 8 تلاف دولار من CIBC ، والواد قال لنا ده مبلغ كبير. في المبالغ الكبيرة كلمونا قبلها ولو بالتليفون نعدهم ونحضرهم لكم على جمب! ! الواد بتاع البنك عمال يقول لنا خلو بالكو ، وحرّصوا وانتو شايلينه! واحمد الديب برضه عمال يقول لنا خبوا الفلوس! محدش بيمشي بمبلغ زي ده! والغريب إني أنا وهند ما كانش في دماغنا الإحساس ده أساساً ، وعادي ولا كإننا ماسكين في إيدينا خمسة جنيه! يمكن عشان احنا كنا لسّه جايين من مصر ؛ اللي ما بقاش فيها أي شيئ له طعم ولا معنى ولا قيمة! :lol:

وطبعاً – مع ترانس جلوب - لازم تملا أپليكيشن ببياناتك ، ومعاها أي پرووف إنك ليك دخل يكفي إنك تدفع الإيجار (زي ما تيجي تقسط عربية ؛ هيئولولك هات ما يثبت قدرتك على الدفع). وف حالتي أنا رحت عملت داونلود للپاي رول سليپ بتاع الشهر اللي فات (أغسطس) من سانتافي من ع الكارير كونّكت (الويب سايت بتاع سنتافي). وفيه الپوزيشن والمرتب وإيميل وتليفون الپاي رول سنتر بتاعنا في مانيلا (لو حبو يتصلوا يستفسروا!). وطبعاً ، بياخدو شوية وقت يستفسروا عنك من الكريديت بيرو (بالـــ SIN Number) ، يشوفوا لو ليك سوابق في الدفع ، ولا راجل محترم وملتزم. :happy:

تم تعديل 31 يوليو 2008 بواسطة moheltohamy

[ELSHAMY]

التهامى باشا

تسجيل متابعة و اعجاب

الشامى

[moheltohamy]

عمنا ... د. الشامي :lol:

تعرف إن انتا بالذات اللي باكون سعيد جداً لما باشوفه في موضوعي :happy:

باحس إن المدير بنفسه مشرفني بالزيارة في الفصل بتاعي ، وبيمضيلي في كراستي :blink:

وأحب اعترف لك بحاجة أنا كنت باعملها ، وضميري مبهدلني عليها... :blink:

أنا دايماً كنت متابع موضوعك زي الحرامية... كنت أبص دايماً من خرم الباب! واقرأ مقالك الرائع ، وامشي من غير حتى ما اقول سلامو عليكم!

رغم إني كنت معجب جداً بمقالك ، وبشخصيتك ، وبحضورك. بس مش عارف ليه كنت سلبي كده! :sad:

سامحني معلش wst::

[samehelassad]

دكتورنا العزيز تهامي باشا: الف الف شكر على المجهود الجبار اللي بتبذلة كل يوم عشان تفهمنا وتحكيلنا على كندا والهجرة ونعمل اية لما نروح. اهو فعلا التفايصيل الدقيقة دي هي اهم حاجة. ربنا يكرمك ويديك على قد نيتك. والف الف الف شكر مرة تانيه وعقبال كدة يارب مايردو عليا اوام واحصلك على كندا قاديني قاعد مستني الكسف الطبي انشاء الله. بس ساعتها انشاء الله هطللق الخليج بالتلاتة ومعتقدش اني هقدر اعمل لاندنج وارجع. والله اعلم محدش يعرف ربنا كاتبلنا اية.

المهم اسجل اشد اعجاب واقوى متابعة.

انا بقى اليومين دول مش مفرفش الحمد لله ويوم الاحد الجاي انشاء الله هاخد المدام والولاد وبالطيارة على مصر كفاية حر بقى الواحد ساح في قطر.

[hosiny]

سؤال تااني يا دكتور

يعني الواحد لما يروح هناك و لسه مشتغلش ميقدرش يأجر شقة ولا ايه؟؟؟.....هيجيبلهم اثبات دخل منين بقي؟؟؟؟

[مروان كريم]

تهامى باشا متابع وباسجل اعجابى الشديد باسلوبك يا ريس ونتمنى على طول هاند اوفر عبر المحيطات يا باشا :blink:

وانا مع اخويا الحسينى فى اللى قاله ازاى اثبت الدخل مع انى لسه ما اشتغلتش ؟؟؟؟ :happy:

تم تعديل 31 يوليو 2008 بواسطة مروان كريم

[moheltohamy]

هوه أنا قادر على أسئلة حسيني لوحدة عشان يتضامن معاه مروان؟!!!!

حاضر...

بصوا بقى ... المهم تثبت للشركة اللي بتدير العمارة إنك تقدر تدفع الإيجار ، وإنك مش صايع ، وهتغلّبهم على ما ياخدوا منك الإيجار. ما تروحش تأجر بيت بــ 3 تلاف دولار ف الشهر ، وانتا لسه جاي البلد جديد ، وما بتشتغلش!

لو تقدر تجيب لهم آخر مرتب دخل لك من الخليج أو من مصر ، يغطي إيجار الشقة (ويتبقى منه مبلغ لمصاريفك طبعاً) ، يبقى خير وبركة. وممكن تقول لهم إنك راجع الخليج تاني ، على ما مراتك تثبت في شغل في كندا. كده كلام منطقي. بعد كده ، محدش له حاجة عندك. غيرت البلان. أنا حر!

ممكن تقدم لهم شهادة بيان بالمبلغ اللي أودعته في البنك ، يعني مبلغ هيغطي مصاريفك لمدة قادمة كافية تكون لقيت فيها شغل.

ممكن تجيب حد تعرفه هناك ، يكون ضامن ليك (Guarantor) ، وده هيعمل لك صابورت محترم.

المسألة إرتياح نفسي لا غير.

د. أبو الخير... موضوع الصور ده مهم جداً ، وكان المفروض بعد كل شوية ننزل الصور الخاصة بالموضوع اللي اتكلمنا فيه. عموماً ملحوقة. بس مع الأسف ... سيلفيا مالهاش صور معانا خالص. وكمان سابت العمارة ومشيت :blink:

عموماً هانزل لك صورتين تلاتة كده على ما أوسوم ، والباقي بس لما أوصل مصر.

عزيزي سامح...

برضه أنا اللي هاسبقك في المرواح لمصر. بكره إن شاء الله هانطلق على هناك. وراجعين للبهدلة تاني ؛ للنار والعذاب والتراب والزحمة والأرف من تاني!

وكالمعتاد ، مزنووق مووت. عاوز أكمل كتابة هنا ، وف نفس ذات الوأت عاوز أروح أعمل جرد العيادة قبل ما امشي! م الواضح إن مفيش نوم الليلادي! :happy:

[moheltohamy]

اتفضّلوا شوية صور...

البيه اللي في المطار ، وبطل الحلقة اللي من 4 حلقات كده :happy:

صورة للمنطقة اللي قاعد فيها ، مع شوية لاند ماركس للي حوالينا.

وصورة للعمارة اللي ساكن فيها... ما تتخيلوش البهدلة والمحايلة اللي عملتها عشان آخد الإذن بنشرها ، ومحاضرة عن الخصوصية ، و الــ La vie privée !

أعتقد مش محتاج أقول فين الشقة بتاعتي بالظبط :blink:

[moheltohamy]

نيجي بأه لمتطلبات الإقامة يا ريس (أمينيتيز أو يوتيليتيز): عندك المياه ، ودي بتكون إنكلودِد ف الرِنت. عندك الميَّه السُخنة اللي جايّه من سنترال صابلاي ، برضه إنكلودد ف الرِنت. بعد كده عندك الهايدرو (اللي هيه الكهربا يعني) طبعاً على حساب جنابك ، في حدود 35 دولار ف الشهر (تبعاً لكلام هند).

بعد كده عندك الجاز (الغاز يعني) وده بيستخدم ف التدفئة ف الشتا أحياناً (في حالتنا احنا الشقة تدفئتها كهربا). و لو عاوز تليفون ف البيت طبعاً انتا اللي هتقدم عليه ، وهتحاسب على فاتورته طبعاً. وبرضه لو عاوز تشترك في تليفزيون الكيبُل ، مع نفسك ، والأسعار بتبدأ من 33 لـــ 96 دولار ف الشهر حسب الپاكيدچ اللي انتا واخدها.

لو معاك عربية ومحتاج مكان للپاركنج بتاعها بتدفع لها مصاريف شهرية (في حالتنا حوالي 120 دولار ف الشهر أو 5 دولار ف اليوم ؛ يمكن عشان احنا عمارتنا ما فيهاش جراچ خاص بيها ، فبتروح جراچ العمارة اللي جمبنا ، محدش هيتكلم طالما انتا دافع! وف نفس الوقت همه حاطّين يافطة بتقول إنو فيه أماكن للپاركنج).

عاوز تقدم ع النت عندك ف البيت برضه براحتك وانتا اللي بتدفع (41 دولار في حالتنا مع روچرز ، وبيدخل لك كابل نت – مالوش علاقة بالتليفون – بسرعة 7 ميجابِت بالراوتر بتاعه (مش الـــ 2 ميجا بِت اللي ف الشركة – پريسيچن – اللي كنت حاسس إنها أصيَع سرعة على مستوى العالم ؛ لدرجِت إني لما غطيت عمك الزهار أسبوع ، أعدت أعمل داونلود بالعبيط من DVD4Arab زي ما اكون وئِعت على كنز ، وسجلتهم على سيديهات! بقيت عامل زي قاسم أخو علي بابا لما عرف إفتح يا سمسم ، ودخل المغارة ولقاها مليانة دهب وياقوت ومرجان ولولي ، وقعد يقول لنفسه "عبّي عبّي"!). وهند اشترت له راوتر وايرلِس بـــ 22 دولار عشان اللاپتوب وهيه ع السرير مسلاً! إضافة لـــ 4 فتحات للتوصيل بكمبيوتر عادي مثلاً. وعلى فكرة ، هند لسه مجربة الداونلود الوايَرليس ؛ وسرعة الداونلود 834 كيلوبايت ف الثانية ، جوجل إيرث اللي حجمه 12.7 ميجابايت نزل في 18 ثانية! والفيلم من دول اللي من 700-900 ميجا بايت بياخد معاها 15-20 دقيقة!

والداونلود كان مفتوح ، بس تأريباً من شهرين أو تلاتة (مارس أو أبريل اللي فاتو) بئى المسموح لك 64 جيجا بايت داونلود ف الشهر ، والجيجا الزيادة بدولار ونص باين أو باتنين دولار! معلش بأه ، آهو الواحد يلم إيده شوية ف الداونلود ، ويخليه أد المسئولية شوية!

مقارنة كده ع السريع باللي حصل معايا في مصر... اضطريت أدفع 800 جنيه رشاوي لمدير السنترال ؛ عشان أقلب خط التليفون بتاعي من هوائي لأرضي ؛ عشان ينفع يستقبل DSL عليه ، وأخد له الموضوع ده بتاع شهر ولاّ اتنين! وبجميله كمان ، وأحمِد ربنا إني عرفت أظبّط الموضوع ده (طبعاً عمك جمال بهجت اللي كان معانا في 92 هوه اللي اتوسط ف الموضوع ده هوه وأخو مراته اللي بيشتغل في The Way Out!). وعشان كنت مدخل النت بسرعة واحد ميجا بِت كنت باكُع 380 جنيه شهرياً!

الموقف ده بيفكرني بكلام الواد ديبو ... البيه في آخر نزول ليه على مصر ؛ وصّل الدي إس إل ع البيت (بيت جده القديم اللي ما فيهوش حد) ، ومعاه جهاز (نظام الـــ VoIP) ، بس مختلف شوية ... الجهاز بياخد الآر چيه (الچاك بتاع الدي إس إل) من ناحية ، وم الناحية التانية بياخد الچاك العادي بتاع التليفون (ماهو بيبقى عندك اسپليتر بيقسم خط التليفون لخط تليفون وخط نت) ، والمفروض أحمد عنده جهاز زيه في تورونتو. المفروض إن أهله ممكن يتصلو من الجهاز ده (اللي واخد رقم محلي في تورونتو) بأحمد ، وطبعاً المكالمة ببلاش! وأحمد كذلك ممكن يكلمهم بالعكس. الجديد بأه ، إنه ممكن يتصل بأي نمرة داخل مصر ، المكالمة هتتم من تورونتو لميت غمر عبر النت ، والجهاز يحولها عن طريق خط التليفون للنمرة المصرية ، وبقت مكالمة داخل مصر! واتصل بيا مرة ، وكنت حتى عند عمك الزهار في بورسعيد ، وبيقوللي تخيل يا محمد أنا باكلمك من كندا ، والدئيئة بـــ 45 إرش :happy:

عشان كده أحمد طلب سرعة النت تكون 512 كيلو بت (مش 256) ، ومع ذلك اتنأط من البطء ، وكل ما يضغط على لينك مثلاً ع البراوزر ، يؤعُد يحط إيده على خدُّه ، ويستنى! المهم ، بعد ما مرارته اتفقعت ، إتصل بخدمة العملاء ، واشتكى إن كل كليك لازم يعزِّم عليها على ما تفتح ، فكان رد الراجل باستغراب : "هوه انتا عاوز تضغط ع الصفحة تفتح؟"! هيهيهيهيهيهيهي

ولاَّ لما راح سايبر كافيه على شارع البحر (كغيم دو لا كغيم – Crème de la crème - المفروض) ، ونفس البطء برضه ، فـــ نده ع الراجل اللي هناك ، و ورّاه البطء ، الراجل آل له : "أيوه يا بيه ... أصبر ؛ الصفحة بتحمِّل"! :blink:

طبعاًً أحمد وهوه بيوصل التليفون بتاعه ده ، وبيكونفيجَرُه ، فبتصادفه مشاكل ؛ ييجي يتصل بالـــ ISP بتوعه في مصر ، محدش فاهم حاجة ف البطيخ! ولا حد فاهم يعني إيه أصلاً الــ Voice over IP! إضطر يتصل بالشركة اللي مقدماله الخدمة (الـــ VoIP) في كندا لغاية ما ظبّط الموضوع! تخيل انتا بأه!

تم تعديل 31 يوليو 2008 بواسطة moheltohamy

[hosiny]

يا عم قول لصاحبك ما يصيحش....المفروض ان الاجهزة دي ممنوعة اساسا لانها بتضرب الاتصالات الدولية بين الدول و اعتقد ان فيها قضية اساسا لو حد عايز يقرفك

الحلو في الجهاز ده كمان انك ممكن تعمل العكس يعني تكونفج الجهاز اللي في مصر لما تيجي مكالمة عليه يحولها لكندا و دي بردو فله...تحياتي

[الباشمهندس ياسر]

[size=

الباشمهندس ياسر:

أوعى تقوللي إنك روستاباوت! :lol:

ولما انتا ف البترول يا ريس ، ما تزق على هناك يللا ... وألبرتا محتاجة ناس! ولا انتا مكتفي بالميدل إيست؟! ولا انتا فين أصلاً؟!!!!

عارف أحلى إحساس ... لما تبقى قاعد ف الشركة ، وحاسس إنك جوهرة... وزي ما تكون بتمن عليهم بوجودك معاهم ، وبتتلكك لهم ، وانا أصلاً مش فارقة معايا! دانا سايب الدنيا والعيشة في كندا ، وقاعد معاكو! هاهاهاهاها

والغريب إنك بتلاقي الدنيا كلها ماسكة فيك. هنقول إيه بس؟! ماهي الدنيا ما بتديش محتاجb]

السلام عليكم

معلش يا تهامى ع التاخير بس انت عارف الرحلة طويلة اوى من القاهرة الى جوهانسبرج ثم موزمبيق

الحمد لله يا دكتره انا مش رستاباوت ولا حاجه ( ده كلام يا راجل ) mfb:

انا شغال فى سلطنة عمان فى شركة سيرفز عربية بس كبيرة حبتين و دلوقتى فى احد مواقعها فى موزمبيق ( ربنا يستر وميطلعلناش اسد ياكلنا )

بالنسبة للجوهرة بقى فأنا لسه مكملتش 3 سنين خبرة فى التخصص انما كنت بفكر لما العقد يخلص ( هيخلص ابريل 2009) اطلع على بحر الشمال

انما مفيش مانع نروح البرتا دى و ان شاء الله ادور وراها

و متشكرين على ردك يا غالى و يمكن يحصل نصيب ونتقابل هناك

[samehelassad]

واحشتنا يادوك. وحمدللة على السلامة احنا مستنين كلامك الجميل. وانا محصلك بكرة انشاء الله. بس انا عشان معنديش كندا فمبسوط اني نازل مصر عشان اشوف اهلي وحبايبي. ومش مشكلة التراب والزحمة. ماهي قطر يااماتراب يارطوبة. ومتعرفش تتوضى ولا تت----- من حرارة الماية الظهر.

[bentbatota]

السلام عليكم ورحمة الله انا بشكرك جدااااااااااااااااااااااا يا دكتور تهامى على موضوعك الهايل اوى وبلهجتى الصعيدى قوى واعترف امام الجميع انى من الزوارللموقع واى موقع للهجره لكندا او استراليا او نيوزيلندا عربى اوانجليزى لكن بسبب حضرتك واسلوبك فى الكتابة خلتنى اول مره ابقى عضوه فى منتدى والحاجه التانيه ان كلكم مع بعض

سواء اللى فى كندا اوبيحلم يروح كندا بتساعدوا بعض فى الله ان شاء الله يجعلوا فى ميزان حسناتكو ارجوكوم اعذرونى لانى اول مره ادخل فى منتدى يعنى لسه kg1 وباسجل تحياتى لك ولمدام هند ولجميع المشاركين فى الحوار الجميل ده وغيره من الموضوعات وكمان لصديقك الاستاذ احمد

[moheltohamy]

الفكرة الصايعة بقى...

ودي عرفتها قبل ما اسافر كندا من أساسه! كان واحد صاحب مصطفى ابن خالتي (نقيب ف المظلات) ، ومتجوز واحدة مصرية كندية ؛ عايشة في كالجاري (ولاية ألبيرتا). البنت مستقرة هناك (وبترجع مصر من وقت للتاني) ، وهوه بطبيعة الحال مرزوع في مصر عشان ظروف الجيش ، لغاية ما يقدم على استقالة للدواعي الطبية (تمزق في الرباط الصليبي في ركبة ، وكسر في القصبة الناحية التانية)! وقعدنا معاه قبل ما نسافر كندا بكام يوم ؛ وقعدنا ندردش معاه عن الحياة هناك. من ضمن كلامه ؛ حكالنا عن أحسن وأرخص وسيلة بيكلم بيها مراته هناك.

ده يا سيدي يبقى الماچيك چاك ، وده حاجة كده بحجم الفلاش ديسك (أكبر منه حاجة بسيطة ، بس أصغر من البتاعة بتاعت موبينيل اللي اشتريتها انتا مؤخراً) ، وبيتوصل بالكمبيوتر USB ، وطبعاً يكون الكمبيوتر واصل نت (يستحسن DSL) ، وفيه فتحة توصل فيها الچاك العادي بتاع التليفون (وعدة تليفون عادية خالص). وترفع السماعة يا ريس ، وتطلب أي رقم في كندا أو أمريكا ببلااااااش. البتاع ده اشتريته بـــ 45 دولار ، شامل اشتراك أول سنة ، وبعد كده كل سنة بـــ 20 دولار. واشتريت منه 3 ؛ واحد لماما عشان تبقى تكلمني هناك ، والتاني ليا ف السعودية عشان أبقى أكلم هند (مع إن التليفون الدولي موجود بصراحة ، ومن ابو بلاش bngn:: ) ممكن استخدمه وانا في مصر بأه ، والتالت لهند في كندا عشان المكالمات اللونج ديستانس! وشحنته على فيليپ (الـــ STC بتاعنا ع البريمة) الأمريكاني وساكن في لويزيانا (ماهو السايت ده ما بيبعتش غير لأمريكا فقط مع الأسف bsh:) ) ، وفيليپ جابهم لي معاه ع البريمة ف السعودية. تخيل... دلوقتي بقوا بيبعتوا لكندا كمان؟! لسه مكتشف الموضوع ده حالاً (5 أغسطس 2008 ، 9:30 م)! :angry:

ولو ما ليكش سكة في أمريكا ممكن تعمل الحركة المجرمة اللي هند كانت عملتها أيام الخطوبة... الهانم اكتشفت حركة مجرمة مع أرامكس ، بتدفع حوالي 30 دولار (مرة واحدة ف العمر) ، وبيعملولك عنوان عليهم في أمريكا (نيو يورك تقريباً) ، وعليه عنوان إضافي على فرعهم في إنجلترا (لندن على ما أعتقد). ولو حبيت تشتري حاجة من ع النت – م المواقع الكتيييييير اللي مش بتبيع غير لأمريكا مثلاً.

هتكتب العنوان بتاعك ع العنوان بتاعهم ، وهمه هينقلوهولك من فرعهم في أمريكا لفرعهم في مصر ، وطبعاً بتحاسبهم على تكلفة الشحن من هناك لباب بيتك.

طبعاً الهانم عملت الكلام ده عشان مزاجها قال لها تشتري اطقم السرير من ع النت ، أسعار أقل ، وجودة أعلى ، واللي اشتريناه بـــ 80 ولاّ 120 دولار شفناه في كاربت سيتي بـــ 1700 جنيه ، وكان الاختيار محدود ، وذوقه بلدي بصراحة! وكانت المشكلة إن أمازون حاجته غاليه بس بيشحن لمصر ، ودومستيكيشن حاجته رخيصة لكن الشحن لأمريكا بس. ومن هنا كان لازم نتصرف

تم تعديل 5 أغسطس 2008 بواسطة moheltohamy