كندا التي رأيتها :)

[moheltohamy]

الجزء ده من الهاند أوفر مطلوب من زمان ، وطبعاً د. قناوي حاجز أول تذكرة ، و د. الشامي كان برضه منتظر الحدوتة دي من فترة. عموماً باهديها للجميع ، وطبعاً رفقاء المصطبة بتاعتي أول ناس :sad:

يمكن دي أكبر فقرة من الهاند أوفر أنزلها (لكشة واحدة)... 14 صفحة ع الوورد ، أنا نفسي تايه فيها ، ومش عارف أرتبها ازاي. اللي في إيده شغل ، يخلّصه الأول ، وبعدين يبقى يقعد لها...

خدوها بقى زي ما هيه... وليها تكملة عن تفاصيل الكورس نفسه ، معايشات وانطباعات ومواقف وكدهوت ، نبقى نتكلم فيها بعدين...

بس المهم ، إنها هتوضح الحدوتة بتاعت الـ EMR دي من أولها لآخرها...

تمنياتي بقراءة ممتعة... :lol:

[moheltohamy]

المنتدى مش مستحمل يا جدعان!

والله البتاع شكله مش مستحمل الـ 14 صفحة على بعض!

هتستحملوهم إنتو؟! :blink:

بانسخهم ، وبعد ما أنسقهم... يطلع يقوللي (عفواً ، يجب عليك إدخال الموضوع)! :blink:

المنتدى هيّس... :rolleyes:

هاحاول أقسمهم على مرتين تلاتة... رفقاً بسوفتوير المنتدى :blush2:

[moheltohamy]

معلش يا جماعة... أنا قلت أخفي التوبيك ، وأظبّط فيه في الضلمة كده وبمزاج مع نفسي على رواقة :rolleyes:

جه الساتلايت ع البريمة وقع خالص!

يا دوب لسّه راجع من شوية... قلت بقى ننزل الـ 14 صفحة على مرتين...

إتفضلوا بالهنا والشفا

[moheltohamy]

نتكلّم على السكة اللي ناوي أمشي فيها في كندا...

بص يا زعيم... من مُنطَلَق إني مستمتع أيما استمتاع (يعني مستمتع طحن بالعربي) بالشغلانة بتاعتنا دي (كدكتور في مجال البترول) ، وبرغم إنها خارج المجال الكلاسيك للطبيب كما نتخيّله طول عمرنا (مستشفى وعيادة وبالطو أبيض وكدهوت) ، لكن طبيعة العمل دي قمة المزاج ، وقلة في المجهود والضغط العصبي ، وكثرة في الفلوس والعائد المادّي ، واحترام أكتر ؛ يمكن عشان انتا الطبيب الوحيد في وسط مهن متعددة لا تمت للمجال الطبي بأدنى صلة ، ويمكن عشان المؤهل التعليمي ، ويمكن عشان مش المعتاد إن دكتور بجلالة قدره يشتغل في مجال الحفر (المعتاد بيكون مسعف أو ممرّض)!

من هذا المنطلق ، فكّرت أكمّل في كندا في نفس الكارير دي... وأجيبهالك بالتسلسل الزمنى للمواقف ، كما تعرّضت لها.

من حوالي أربع سنين (نوفمبر 2005) كنت في البريمة 92 بتاعتنا في الصحرا الغربية ، باكلّم الواد عبهادي (محمد عبد الهادي – زميل من أيّام الكلّية – وحالياً في إدمونتون في ولاية ألبيرتا) ، وحكالي إنه اشتغل في نفس الپوزيشن في ألبيرتا ، مسعف في برّيمة... ونفس المزاج العنب! كان كلامه:

أنا شغال في منطقة إنتاج بترول ، ومعايا عربية الإسعاف بتاعتي ، مزاج المزاج ، وقاعد مقضيها طول اليوم معايا اللاپتوپ باتفرّج على أفلام ، والديلي ريت هناك 250 دولار. والوورك روتيشن هناك فليكسيبول جداً ، حسب ما تحب انتا. في بدايتي هنا ما كانش ليّا سوشيال لايف ، ولا حتى أعرف حد هناك ، وكنت عاوز أعمل فلوس ، وبالتالي كنت باشتغل 3 أسابيع وآخد أجازة يومين اتنين بس!

طب وإيه المطلوب يا عبهادي عشان تشتغل الشغلانة دي؟ أبداً ، إنتا تقدّم على امتحان معادلة المسعف ، وده امتحان عبيط ممكن حتى تخش عليه بسدرك ، وتعدّي فيه بكل سهولة (Challenge the exam) ، والشغل مرطرط بعدها. إنتا يا دوب خارج ومعاك النتيجة ، وهتلاقي مندوبين شركات البترول بيجروا عليك ، وده يقوللك تعالى أنا هاشغّلك عندي بكذا ، والتاني يجيلك ، ويقوللك أنا هادّيلك أعلى ديلي ريت ، وما تسدّقش اللي يقوللك إنه هيدّيلك أكتر مني... إلخ! يا حلاوة يا عيال! هِوّا فيه كيديه؟!

تاني حاجة بقى لمّا رحت الكورس بتاع چوهانسبيرج (جنوب أفريقيا) تبع الشركة بتاعتنا عشان ناخد الكورس بتاع الـــ Topside Support ، وخصوصاً في يومين العملي اللي رحناهم مركز الإسعاف في پريتوريا. كنت انا باركب عربيّة الپاراميديك عشان نتعلّم ونمارس طبيعة الخدمة الطبّية ما قبل المستشفى (الحاجات اللي ولا عمرنا سمعنا عنها في الكلّية).

عجبتني أوي حياة الپاراميديك ، رغم إني كنت قبل كده شايفها حياة استريسفول وتوتّر وشد عصبي وكده ، لكن لو قارنتها بحياة المواطن العادي في مصر ، هتحس إن الپاراميديك ده قاعد تحت الشمسية على البلاچ في مارينا ، لحظة الغروب ، وبيشرب عصير لمون وفيه 3 قطع تلج ، وكمان كل الموجودين حواليه بنات :rolleyes:

بيبدأ Lee – ده إسمه – يومه الساعة 8 ص ، بيروح مركز الإسعاف ده (شركة خاصة) ، ويخلّص شوية أوراق بسيطة ، ويشيّك على أدواته لو كان فيه حاجة ناقصة بيستكملها ، ويقعد يهرّج شوية مع باقي زمايله وزميلاته ، لغاية ما الراديو أوپيريتور يجيله إتصال إن فيه حادثة أو إصابة أو عيّان في الحتة الفلانية.

ياخد الفولكس الجولف الـــ 2000 سي سي المانيوال بتاعته في الشغل ، وطيران على هناك ، والأنوار والسرينة شغّالين ، و واخد الطريق قص! مش محتاج أوصفلك بأه باقي العربيّات في الشارع بتمشي ازّاي وده واخد السكّة طيران... الكل بياخد جمب ويوسّعوله ، وهوّه واخد أقصي يمين الطريق (السواقة هناك ع الشمال زي انجلترا ، عكسنا تماماً) ، وفي التقاطعات – لو كانت الإشارة حمرا – بيهدّي ويبُص يمين وشمال ؛ يطّمّن إن الطريق وقف له من كل الاتجاهات – وده اللي بيحصل بالفعل – وبعدين ينطلق في طريقه. وماشي غرز وسط العربيّات ، غرز غرز مش هزار ، لدرجة إني ساعات باقول له يا "لي" الحتة اللي فاتت ما كانتش تاخدك ، وهوّه يقوللي مانا عارف ، بس اللي ورايا ده لازم هيهدّي وانا باخد الغرزة دي أدّامه! وساعات يدخل على إشارة يلاقي فيه 3-4 صفوف عربيّات واقفة من قبل ما يوصل أصلاً! عايز اقوللك إني كنت باشوف اللي سايقين العربيّات دي هيموّتوا نفسهم عشان يوسّعوله ، وبيبقوا على وشك يخبطوا في بعض عشان يدّوله سكة يعدّي منها ، واللي قدّام خالص ، بيتحرّك على جمب لدرجة إنه بيدخل جوّه التقاطع عشان يوسّعلُه السكّة ، وبعدين كل اللي في الإشارة بيقفوا من الاتجاهين ، و"لي" أفندي يعدّي! وساعات ياخد حتة صغيّرة كده في المخالف (بس بيأمّن نفسه الأوّل) ، وبرضه الناس بتوسّع له. و ع الهاي واي (مرة كان فيه حادثة في الرَش آوَر) ، وده فاتح السرعة ، وماشي في الحارة اللي بره الطريق دي (اللي ع التراب) ، وبيقوللي إنه مالوش أكتر من 20 كيلو تقريباً سماح ، أكتر من كده ممكن يتّاخد رادار ، ده قانوناً ، بس في الغالب البوليس بيكون متفهّم.

ملحوظة في النص مالهاش دعوة بأي حاجة... ساعات نادرة كنا بنشوف ناس تنحة ماشية قدّامه ، ومعرّضة قفاها ، وسادّة ودانها كمان! والواد "لي" عصبي ، وكلاكسات وسراين وبتاع ، والتاني مصدّر له الطرشة ، ولااااا الهوا! طبعاً النرفوزة لازم تطلع ، ويشتمه ويكمّل جري! الملحوظة الغريبة اللي هنا بقى ، إن كل البهوات التُنحاء من السود ، وما تسألنيش ليه ولا إزّاي ولا اشمعنا!

وبيقوللي إنه ساعات لمّا يحس إنه مقريف كده ونفسه يجري شويّة في يوم أجازته مثلاً ، يروح مدّيها سارينه ، ويفتح ، وإزازة بيبس ويعمل مزاج! وباسأله والناس هيشوفوك بتشرب بيبسي وانتا معاك كول (Call) برضه؟ يرد يقوللي طب ما انا حياتي كده ، وفي معظم الوقت باكون في العربية ، وساعات بتجيني الكول وانا معايا ساندوتش ، وباكل وانا سايق... عادي يعني!

المهم... ده يوصل الـــ Scene أو مسرح الحادثة ، وبمجرّد وصوله بيكون هوّه الـــ Master of the scene ، يعني هوّه اللي بيوجّه أي مسعف أو ممرّض تاني موجود أو هيوصل بعده! والمفروض في نفس وقت استلامه للكول بيستلم الممرض التاني بعربية الإسعاف (فيها اتنين ؛ السوّاق والممرّض) نفس الكول ، ويطلعوا على هناك همّا كمان. بييجي سعادة البيه ، ويدّي توجيهاته للممرّض يعمل إيه ، ولو فيه حاجات جامدة (إندو تريكيال إنتيوبيشن ، آي في كانيولا ، سپاينال إيمّوبيلايزيشن ، ... كده يعني) بيعملها هوّه بنفسه... پاراميديك بقى! وبعدها ياخدوا المصاب على أقرب مستشفى ، وتطلع عربيّة الإسعاف ، و وراها الپاراميديك ، وبدون لا سراين ولا أنوار (لو الحالة مش محتاجة). يدخلوا الحالة على استقبال المستشفى ، و "لي" باشا يدّيهم تقرير شفوي بالحالة ، ويكتب تقريره هوّه ، ويتكل على الله.

المفروض نرجع بعدها على مركز الإسعاف... ييجي الواد "لي" يقوللي ما نفسكش تاكل حاجة؟ طبعاً يا "لي"! ويقوللي هاخدك على أجمل حتة في پريتوريا ، وأكتر حتة شبابية ، وأحلى بنات في البلد هتشوفهم هناك! طب والشغل يا "لي"؟ وده يقوللي (مالهاش لزوم نروح هناك ، هيندهوا عليّا ع الراديو – اللاسلكي – بتاع الجولف ، ولو ما ردّيتش عليهم ، هيتصلوا بيّا ع الموبايل)... إشطة بالهبل!

وفعلاً رحنا ركنّا الجولف هناك في الداون تاون پريتوريا ، والعيال بتوع عربيّة الإسعاف التويوتا (المسعف والسوّاق) حصّلونا على هناك ، ورُوحنا كلّنا نضربلنا سندوتشات شاورمة من محل لبناني هناك (الواد "لي" كان عاوز يعمل معانا واجب وكده) ، وبعد فترة جاتلُه مكالمة (فيه كول)! يللا بينا يا رجّالة...

شغلانة دماغ ، ولايف ستايل دماغ ، والواد "لي" أصلاً دماغ لوحده! أفتكر من كلامه كان مرة بيقوللي إنه إنسان بسيط جداً ، ونفسه يهاجر لكندا عشان مفيهاش عنصرية زي اللي في جنوب أفريقيا ، وأبسط حاجة ممكن تسعده وتفرحه. بيقوللي إنه مش عاوز من دنيته غير عربية حلوة ، وشاشة تليفزيون بلازما كبيرة ، وبكده هيكون إنسان سعيد! أنا سمعت الكلمتين دول ؛ وسخنت وقلت طب وربنا لاشتري اللاپتوپ السوني اللي طوب الأرض هزأني عليه لما نويت – مجرد نويت - أشتريه! ودي حكاية تانية!

وأحب أقوللك برضه إن الشغلانة دي ليها احترامها وأهمّيتها ، والپروفيشناليزم بتاعها... يعني الباراميديك ده بيكون متخرّج من كوليدچ ، مش صايع ولا خرّيج مدرسة تمريض هجص زي ما بنشوف في بلادنا! الواد "لي" ده مثلاً ضارب الرقم القياسي ؛ ميّه حاجة وسبعين إندوتريكيال إنتيوبيشن إن پليس ، ورا بعض ، ومفيش واحدة منهم دخلت إسوفيچيال!

وبرضه أفتكر نفس الكورس لما لقينا المحاضر اللي بيدّينا كورس الـــ Basic Life Support وكمان بتاع الـــ International Trauma Life Support كلّهم پاراميديكس سعادتك! پاراميديكس وپروفيشنال ومتمكّنين من مهنتهم لدرجة إن احنا كنا قاعدين قدّامهم بالصلاتو ع النبي 6 دكاترة في عين العدو ، ولا كإننا 6 بلاليص فاتحين بؤّنا ومتنحين! جتنا نيلة فينا وفي تعليمنا واللي اتعلمناه ، ع اللي عاوزين يتعلّموه!

وبالتالي كنت ناوي وأتمنى أدخل السكة دي ، وأفتخر إني باشتغلها طالما كنت متمكن منها ، وفيه سيستم ماشي عليه! أنا يابني قبل الكورس ده كنا بنعمل Injured Person Drill ع البرّيمة... نظام إلحقوا يا جدعان ؛ دا فيه واحد واقع ومفرفر (حركات كده وكده يعني) ، وباروح مع فريق الإنقاذ نلحق الجدع المصاب كده وكده ده ، وادخل عليه ، وبعدين (فين الحتة اللي بتوجعك يا ابني؟)! وعاملين فيها دكاترة! يا عم بلا خيبة!

الپاراميديكس بيدرسوا سيستم للتعامل مع المصاب ، وأساسيّات طبية زي الفل ، ومنطقية كمان هابقى أحكيلك عليها ، والشهادة لازم تتجدد ؛ يروح ياخد كورس ريفريش كل سنة أو كل سنتين ، عشان يكون على علم بأي جديد يدخل السيستم. بالشكل ده يبقى مضمون إن الناس اللي مسئوليتها حماية الأرواح معلوماتهم ومستواهم العلمى كما يجب أن يكون مش بطيخ!

مش هنتكلم على النظام الطبي بتاعنا في مصر اللي الدكاترة فيه – مش هنقول پاراميديكس – آخر معلوماتهم الطبية هيه من أيام الكلّية ، سواء البكالوريوس أو الماچستير. التهريج عندنا بصراحة مالوش مثيل!

ندخل بقى ع الخطوات العملية اللي بدأتها في كندا كطريق للتحضير للشغل كـــ Paramedic في مجال البترول هناك لو أمكن ، وبعدين نبقى ممكن ندردش عن محتوى الكورسات دي...

هناك في كندا فيه فرق بين الشهادة والرخصة ، بمعنى... في مصر بتدخل كلية الطب بتبقى خلاص عارف إنك هتتخرج هتبقى دكتور وهتلاقي مستشفى مستنياك ، والوزارة حاجزالك مكان فيها ، وبتاخد الترخيص بمزاولة المهنة أوتوماتيك بعد سنة الامتياز. هناك بقى المؤهل التعليمي حاجة ، وإنك تشتغل هناك أو حتى تاخد الترخيص بمزاولة المهنة – أي مهنة – حاجة تانية خالص!

الكورس التعليمي أو الشهادة هناك ليها مراكز ومعاهد بتعلّمها ، أما ترخيص مزاولة المهنة فده ليه مؤسسة وحيدة ليها الصلاحية بإصدار ترخيص مزاولة المهنة ؛ حاجة كده تقدر تقول نقابة الپاراميديكس. الرخصة دي پروفينشيال وليست فيدرال ؛ يعني تتبع كل ولاية (بعكس رخصة الأطباء) ، وبالتالي كونك معاك رخصة مزاولة المهنة في ولاية ألبيرتا لا يعطيك الحق بممارستها في ولاية أونتاريو ، وتفضل محتاج تقدّم على امتحان المعادلة للترخيص الإقليمي في أونتاريو!

المؤسسة دي اللي بتتابع ترخيص الپاراميديكس ؛ واللي نقدر نقول إنها زي النقابة بتاعتهم أو قسم الترخيص في وزارة الصحة بتاعتهم! دي اللي ليها الحق إنها تطلّع تراخيص مزاولة المهنة للپاراميديكس ، والترخيص للمعاهد والكليات والمؤسسات اللي بتدرّس الپاراميديسِن ، والإشراف الدوري على المستوى التعليمي فيهم. المؤسسة دي هيّه Alberta College of Paramedics ، أو – إختصاراً – الكوليدچ.

في حالتنا هنا ، هنركّز على ولاية ألبيرتا ، من منطلق إن مستوى المعيشة فيها أعلى من باقي الولايات ، والدخل هناك أعلى ، والاحتياج للأيدي العاملة هناك أكتر ، والضريبة ع المبيعات أقل ، وهيه أساساً ولاية إنتاج البترول الرئيسية في كندا ، وفيها حقول إنتاج بترول (Athabasca Oil Sand) ، تعتبَر تاني احتياطي لخام البترول على مستوى العالم بعد السعودية. مش موضوعنا حالياً.

ولو اتكلّمنا على نظام الپاراميديسين في كندا – مع التركيز على ولاية ألبيرتا – نقدر نقول إنه بيتدرج على 3 مستويات ، نرتبها تصاعدياً :

- تبدأ بالـــ Emergency Medical Responder ( اختصاراً EMR) ، وبيسمّوه في أونتاريو Primary Care Paramedic ، وده عنده المعلومات الطبية الأساسية اللي يقدر يقدمها لحد مصاب أو في حالة طوارئ ، وليه حوالي 6 أدوية عبيطة اللي مسموح له إنه يدّيهم للحالة اللي معاه (Scope of Practice) ، وطبعاً قياس الضغط ، وتحليل السكر بالجلوكوميتر ، واستخدام الديفايبريلليتور السيمي أوتوماتيك (اللي هوّه بيستناك انتا تضغط ع الزرار عشان يعمل الشوك).

- يليها الـــ Emergency Medical Technician (EMT) ، وبيسمّوه في أونتاريو Advanced Care Paramedic ، ده طبعاً معلوماته ومسئولياته أكتر ، والأدوية اللي تدخل في his scope of practice بتزيد (56 دواء) ، ويبدأ يتعامل مع الـــ IV ، والـــ Endotracheal Intubation ، ويبدأ يستخدم جهاز الديفايبريلليتور المانيوال ، ويعمل مونيتور للـــ ECG.

- يليها الـــ Emergency Medical Technologist – Paramedic (EMT-P) ، وبيسمّوه في أونتاريو Critical Care Paramedic ، وده أعلى مستوى من الـــ Pre-hospital Emergency Service زي ما بيقولوا ، وبتوصل الأدوية بتاعته لـــ 72 دواء ، ومسموح له يعمل أدفانسد تكنيكس زي الـــ Intraosseous infusion ، والمونيتورنج والپيسنج للقلب (حصوله على شهادة الـــ ACLS شرط أساسي للترخيص سعادتك) ، وتركيب أكياس الدم ومشتقاته ، وتركيب القسطرة البولية ، والـــ Pericardiocentesis والـــ Thoracocentesis ... إلخ. طبعاً مش محتاجين نقول إن كل ما زاد المستوى بتاعك من درجة للي فوقها بتزيد فرص الشغل ، وبيزيد المرتب كمان.

طبعاً الاتنين الآخرانيين دول ممكن يشتغلوا في الإسعاف الطائر Air Ambulance ، ودول كده يبقوا عدّوا خلاص ، وبياخدوا مرتبات لوز اللوز ، بس دول بيكونوا پروفيشنال بجد ، وبيكون مطلوب منهم خبرة سابقة ، وشهادات حديثة لكورسات إضافية (زي الـــ ACLS والـــ ITLS وغيرهم) ، وشركات قليلة اللي بتقدم الخدمة دي ؛ أقل بكتير من الإسعاف الأرضي ، بس مرتبات تحفة ، وروتيشن (نبطشيات الشغل) محترم ومريح.

المهم... نرجع للخطوات العملية اللي بدأتها هناك للبحث عن موطئ قدم هناك في مجالنا الدماغ ده ، اللي بدايته الـــ EMR طبعاً... نبدأ الكلام بمرحلة التتخطيط وترتيب الخطوات عشان الكورس نفسه.

البداية كانت لمّا عرفت إني هانزل أجازة 6 أسابيع ، بعد قضاء 6 أسابيع ع البريمة! ساعتها قلت كالمعتاد (مصر كتير عليها أجازة 6 أسابيع)! طيب ما نستفيد بالوقت المرطرط ده في إني أنجز خطوات عملية هناك في الكارير اللي محتاج أظبّطه في كندا.

وكانت البداية العملية بقى هي البحث عن معهد معتمد من الكوليدچ لتدريس كورس الـــ EMR (باختار من بين 21 معهد) ، وأدخل على موقع كل معهد وأشوف طلبات وشروط ومواعيد الكورسات على مدار السنة (الجداول الزمنية دي محددة من قبل كل سنة ما تبدأ مع كل معهد) ، عشان أختار بما يتواءم مع مواعيد أجازتي من البريمة ، وطلبات البهوات ، والتكاليف طبعاً.

المصاريف بتتراوح من تحت الألف لألفين دولار ، وفترة الدراسة للكورس من أسبوعين لتلاتة ، والأماكن ما بين ولايتي ألبيرتا و بريتيش كولومبيا في أقصى الغرب الكندي. منهم مثلاً الـــ Justice Institute of British Columbia ، وده في فانكوفر اللي نفسي أروح أزورها ، لكن البيه بسلامته بيعمل لك كشف لياقة وبياخد مقاسات الطول والوزن ومحيط الوسط وسمك طبقة الدهون تحت الجلد ، وطول صابع رجلك الشمال الصغير! ولازم تجيب شهادة طبية من طبيب كندي إن صحتك بمب ، وإن ركبك حديد ، وزي القرد! وشهادة تانية بمستواك في اللغة الإنجليزية إنك بتعرف تتواصل بيها كويّس (زي مثلاً شهادة بالمستوى العاشر في المدرسة ؛ ثانوي يعني)! وكمان بيعمل لك اختبار حمل أثقال ، واختبار جري ، وقلة أدب الصراحة! كل ده قبل ما يسمحلك تسجل في الكورس الأولاني خالص بتاع الـــ EMR! دانا لمّا اتجوّزت يا عم الحاج محدّش عمل لي ولا اختبار من دول!

الخلاصة ، بعد لف ودوران ومقارنات ، وصلت لأحسن معهد بيدرّس الكورس دوت ، وكمان أعلى نسبة نجاح في امتحان التسجيل بتاع اللايسنس للطلبة بتوعه ، وكان في مدينة كالجاري في جنوب ألبيرتا وأكبر مدنها. المعهد اسمه Alberta Health and Safety Training Institute ، وده بيدّي الكورس في أسبوعين ، وتكلفته 950 دولار ، والكتاب تمنه 30 دولار. قلت ساعتها بااااس... هوّه ده الكلام.

إتصلت بيهم من البريمة ع التليفون (كان قبلها بحوالي شهر) ، وحبّيت أتأكّد من الشروط المطلوبة قبل التسجيل ، ليكون فيها زي المعهد المخفي التاني ، طلع مفيش أي حاجة م الهجص دوت! كل اللي محتاجينه شهادة إني معايا كورس إسعافات أولية ومعاها Level 'C' CPR ، قلتلها إنتي بتتكلمي في إيه ؛ محسوبك معاه شهادة الـــ BLS والـــ ACLS وكمان الـــ ITLS ، وأي خدمة! ألاقي الهانم بتسألني (الكورسات والشهادات دي طالعة من كندا؟)! كندت إيه بس؟ يا ستي الكورسات دي من چوهانسبيرج في جنوب أفريقيا ، بس الشهادات بتطلع من الـــ American Heart Association في أمريكا. ودي تقوللي (آسفة ، لازم تكون واخدها من داخل كندا)! القصة السافلة إياها والعقدة بتاعت كندا ، سواء في الدراسة أو في سنوات الخبرة... لازم الـــ Canadian Experience!

طب والحل؟! الحل بكل بساطة تاخد الكورس ده عندهم في يومين الويك إند (السبت والحد) السابق للأسبوعين بتوع الكورس ، والكورس تكلفته 130 دولار ، ومفيش بعده امتحان! همّه اليومين وخلصت الليلة! إشطة... واللي ييجي في الريش بقشيش!

وحجزت كورس الـــ First Aid إيّاه ، وكورس الـــ EMR ، والكتب والماتيريالز هتتبعتلي ع البيت في تورونتو (البوسطة هتتكلف بتاع 6.15 دولار). وحسبتلي تمن الكورسين والكتب والبوسطة ، ودفعت حوالي 1076.15 دولار كندي (حسبتلي الكورس بتاع الإسعافات الأولية بـــ 90 دولار ، أكازيون يعني). طبعاً إدّيتها بيانات الكريديت كارد بتاعي ع التليفون (الإسم ورقم الكارت وتاريخ انتهاؤه) ، وشكراً.

نيجي للي بعده... محتاج أحجز تذكرة من تورونتو لكالجاري والعودة بما يتناسب مع الكورس ، ومع أجازتي... وطبعاً محتاجين نعمل مقارنات بين أسعار تذاكر الطيران ، والمرّادي كانت المقارنة بين موقع إكسپيديا حبيبي وموقع خطوط الـــ WestJet ، ودي خطوط طيران بتلعب داخل أمريكا الشمالية فقط. وكما توقعت ، كانت سعر التذكرة على الويست چيت أرخص من طيران إير كندا الداخلي على إكسپيديا بـ 200 دولار! يبقى شكراً يا إكسپيديا! وحجزت الكراسي وتمام التمام ، وكلّفتني التذكرة – راوند تريپ – ربعمية وحاجة دولار.

نيجي للّي بعده... محتاجين إقامة في كالجاري... وفي النقطة دي أفادني جداً الباشمهندس أشرف رضوان (الكامباني مان بتاعنا المصري الكندي ، اللي ساكن في كالجاري).

كنت بادوّر في الفنادق ، وطبعاً لقيت إن الفنادق المحترمة الليلة فيها بنتكلم في 150 : 200 دولار! ولقيت موتيل الليلة فيه بحاجة وخمسين دولار! وإذ بي أفوجأ إن تعليقات الناس اللي سكنت فيه زي الزفت... الكل مُجمِع على إن معاملة الإدارة بتاعته من أسوأ ما لا يُمكن أن تتخيّل ؛ زي ما يكونوا ماسكين زلّة ع النزلاء بتوعهم ، أو إنهم مقعّدينهم في تكية اللي جابوهم! وعلى إيه يا عم؟! بلاها!

ويقترح عليّا الباشمهندس أشرف أي فرع من سلسلة فنادق الـــ Best Western ، ودول محترمين جداً بتجربته معاهم ، وسمعتهم زي الفل. ويقترح عليّا اقتراح تاني ؛ طالما فيها 3 أسابيع إقامة في كالجاري... إني أأجّر شقة مفروشة. ونصحني بالـــ Olympic Village ، ودي مكانها في الداون تاون ، يعني قريّبة من كل حاجة ، وطبعاً مستوى الخدمات فيها على أعلى ما يكون ، وغالباً فاضية طالما مفيش أحداث رياضية في البلد.

إتصلت بيهم ، وحددت نوع الوحدة اللي محتاجها ، وأكدت على احتياجاتي (إنترنت – مكواه – باركنج – ... إلخ ). المشكلة إنو ماكانش فيه شقة ون بدروم فاضية ، والبنت ع التليفون قالتلي هتدّيني شقة تو بدروم بنفس سعر الون بدروم ، طيب كويّس! كانت بنت إيرانية ، وقلتلها هاستنى منك كونفيرميشن للحجز ، وبعتلها بيانات الكريديت كارد بالكامل ع الميل الخاص بتاعها ع الياهو (ودي كانت الغلطة الصراحة) ، وفضلت على أعصابي بتاع 5 تيام وكل يوم أعمل تشيك ع البنك أشوف فيه فلوس اتسحبت ، وكل ما أتصل بيها يا ما تردّش ، يا تقوللي باشوف لك شقة ، ولسّه بادوّر! وفي النهاية قالتلي ممكن تروح لناس تانيين إحنا بنتعامل معاهم ، وبنضمنلك جودة الخدمة عندهم؟ قلتلها يا ستي مش فارقة ، بس اخلصي! كنت فعلاً محتاج أأكّد الحجز عشان أطّمّن على الإقامة ، وتبقى mission وخلصنا منها! قامت بعتتني لناس تانين (إيرانيين برضه)... حركة واطية ومن تحت الترابيزة ، وكان ممكن أودّيها في داهية إنها بتبعت الزباين بتوع القرية الأولمبية لشركات تانية.

المهم ، الناس التانيين دول طلعوا شركة Sunbeam Executive Suites ، وبتدير عمارة فيها شقق مفروشة ، وناس محترمين وزي الفل الصراحة ، وبرضه في منطقة الساوث ويست (أحسن منطقة في كالجاري). الشقة غرفة نوم زي الفل ، وحمام نضيف ، وغرفة مخزن ، ومطبخ مجهّز برضه بكل حاجة بما فيها أطقم السفرة والأطباق والحلل والمايكرو ويف والكوفي ميكر كمان! ودايننج تيبُل كبيرة ، وليفنج كبير وتليفون لاسلكي محلي ، وتليفزيون كيبُل وبلكونة كبيرة بعرض الشقة ع الشارع الرئيسي زي الفل ، والعمارة نفسها على شارع رئيسي في كالجاري (12 Ave SW). وخلّيته يجيبلي مكواه والترابيزة بتاعتها ، وقلتله يجيبلي كرسي فوتيه عشان لو حبّيت أستمخ في البلكونة. وبغض النظر إنه ما جابش بحجة إنه بيدوّر ، لكن أنا ما زنيتش الصراحة عشان انا ما كانش عندي وقت أصلاً للمخمخة! وكان فيه باركنج طبعاً ببلاش تحت العمارة (نعمة مش هتحس بقيمتها غير لما تصحى الصبح تلاقي جبل تلج مكان الحتة اللي ركنت عربيتك فيها آخر مرة في الشارع!) ، وليّا روم سيرفيس مرة كل أسبوعين (ييجوا ينضفوا الشقة بالكامل).

ولما وصلت طلبت منه يوصّل لي كابل إنترنت (دخل تاني يوم) ، بس دفعت 50 دولار إضافي للإنترنت... عادي بقى!

اللذيذ إني لاحظت إن الشقة ما فيهاش تكييف ؛ فيها تدفئة بس! ولمّا اعترضت للراجل عند استلام الشقة... الراجل استغرب وقال لي إن ده العادي في ألبيرتا ، ومش هاحتاج تبريد من أساسه ؛ بس ربنا يقدّرني ع السقعة! الجو هناك تلاّجة طبيعي على مدار السنة!

المهم... دفعت 1350 دولار (قيمة إيجار شهر كامل + الخمسين بتوع النت).

قابلت مرة في الأسانسير هناك واحدة مصرية ساكنة في نفس العمارة واخدة شقة أوضتين مش أوضة زيي ، وبتدفع 1400 دولار في الشهر. طبعاً كون الشقة مفروشة ده اللي غلّى عليّا الإيجار شوية. بس كده ولاّ كده ، برضه أرخص من الفنادق ، وخصوصية زي الفل.

الميشن اللي بعدها... محتاج عربية تكون معايا في تحركاتي طول فترة تواجدي في ألبيرتا. منها ممارسة للسواقة في كندا ، ومنها ما أضيّعش وقت كتير في التنقّل بالمواصلات ، وأساساً ما عنديش وقت لسّه أستكشف في المواصلات أساساً! (اكتشفت فيما بعد إن محطة الأتوبيس قدّام العمارة اللي جمبي!). طبعاً دخلت ع النت ونقيت وحجزت العربية من وإلى ، وطبعت الريسيت ، واتكلّفت في 3 أسابيع ويومين اتنين (على رأي شادية) بتاع 1700 دولار. وهنبقى نتكلم على حكاية تأجير العربيّات دي معايا بعدين.

وبكده يبقى التخطيط للمشوار بتاع ألبيرتا خلص تمام ، وصح الصح.

[moheltohamy]

نيجي للخطوة اللي بعد كورس الـــ EMR ، اللي هيّه التسجيل لامتحان الترخيص الإقليمي في ألبيرتا.

بعد ما أخدت شهادة اجتياز كورس الـــ EMR ، و وصلتني ع البيت في تورونتو ، وسحبتهالي هند ع السكانر ، وبعتها ع الإيميل لـــ Alberta College of Paramedics مع استمارة التسجيل لدخول الامتحان ، وبيانات الكريديت كارد ، وبعتولي إيميل تأكيد بعد ما خصموا مبلغ الامتحان (647 دولار) ، وبكده تم تسجيلي في الـــ Provincial Registration Exam بتاع ألبيرتا. واللي بيعقد مرة كل شهرين تقريباً. ودي كانت المرة التانية اللي أروح فيها على ألبيرتا. وكالمعتاد ، لازم تحضير للرحلة دي زي اللي قبلها ، بس المرّادي كان شد الرحال إلى إدمونتون.

كالمعتاد كانت الويست چيت أرخص بميت دولار من إكسبيديا وطيران إير كندا. الغلطة بس إني قارنت الأسعار بالليل قبل ما أنام لقيت ويست چيت بـــ 392 دولار وإيركندا على إكسپيديا بـــ 463 دولار ، لكن كسّلت أحجز ، وقلت لما أصحى تاني يوم يبقى يحلّها حلاّل! نمت وصحيت عشان أحجز ، لقيت الويست چيت سعرها بقى 502 دولار ، وإكسپيديا بقى حوالي 550 دولار! أستاهل! آدي آخرة الدلع! المهم حجزتها ، وخلصنا ميشناية.

اللي بعده...الإقامة! ودي بقى حيرتني شوية... مفيش مرجع لينا في إدمونتون ، فبدأت أقارن الفنادق ، وفي النهاية لقيت إني هاقيم في إدمونتون 11 يوم على بعض. قلت خلاص بقى يا واد يابو سعد دلّع نفسك شوية! ولقيت فنادق زي اللوز وسمعتها إشطة السويت فيها بحوالي 170 دولار في الليلة ، يعني القصّة كلها هتخلص على بتاع 2000 دولار. المهم هند طبعاً دخلت بمناخيرها في الموضوع ، وجابتلي فكرة الـــ Bed and Breakfast ، حاجة كده زي البنسيون ؛ غرفة بحمّامها في بيت كبير ، والمصاريف تشمل الإقامة والإفطار. وكان أحسن واحد فيهم بإجماع الآراء هوه Villa Maria ، (وكلفتني الفترة كلها فيه 900 دولار وشوية ، يعني أقل من نصف تكلفة الفندق) ، واللي فوجئت بيه إنه على أطراف إدمونتون... أطراف بجد مش مبالغة ؛ يعني ع الجوجل إيرث هتشوفه في أقصى الغرب ، وبعده الغيطان! عموماً ، طالما معايا العربية ، مش هتفرق. ده مبدئي في الحياة!

وطبعاً محتاج أأجّر عربية عشان حرية التنقل برضه ، وعشان أهوّنها على نفسي... دول كلهم 11 يوم يا جدعان! المهم ، دخلت قلّبت ، ونقيت عربية حلوة ، وحجزتها بـــ 662 دولار. بعد كده قلت طب ما أعمل إشتراك (Emerald Club Membership) ، مجرد بياناتك ع الإنترنت ، وتعمل أكّاونت ، وبقيت عضو يا معلّم (وليها مميزات نبقى نتكلم فيها بعدين). المهم ، بعدها ألاقي السعر للعضو 568 دولار... إلغي يا عم الحجز النصب دوت ، وعملت حجز جديد بالسعر التظبيط J

وطبعاً لازم قبل ميعاد الكورس في كالجاري ، أو ميعاد الامتحان في إدمونتون بكام يوم أكون متواجد في البلد ، وأستكشفها ، وأستكشف العناوين اللي هيكون فيها الأحداث – طبعاً بالإستعانة بالواد الچي پي إس (التوم توم) اللي ما أعرفش أعيش من غيره – عشان مفيش مجال أجرّب واشوف العنوان هاوصل له صح ولاّ لأ في يوم الامتحان مثلاً!

وبالنسبة للامتحان بتاع الكوليدچ فده ممتد على 3 أيّام...

اليوم الأولاني امتحان النظري... وده بيعملوه في فندق قريب من مقر الكوليدچ في شيروود پارك ، ودي مدينة في الضواحي شرق إدمونتون ، وليست إدمونتون نفسها ، وتخلّي بالك أوي من الحتة دي عشان ما يحصلش معاك زي ما حصل معايا ، لما قعدت أسب وألعن في التوم توم الغبي اللي مش عارف العنوان ، وانا اللي طلعت غلطان لما كتبتله إسم المدينة إدمونتون! الامتحان عبارة عن 100 إم سي كيو على ساعتين ، معظمهم حالات بيحكيلك ملابساتها ، وبيسألك على تصرفاتك هتعمل إيه في الموقف ده. فيه أسئلة علمية تانية ، هتلاقي منها المستفز مثلاً سؤال بيسألك عن الفرق في ضغط الدم بين الميل والفيميل (هل هوه 4-7 مم ، ولاّ 8-10 مم زئبق؟!) ، اللي لغاية دلوقتي مش عارف إجابته الصح إيه! أسئلة تانية عن الجوانب القانونية والتنظيمية لخدمات الإسعاف في ولاية ألبيرتا. أسئلة تالتة هجص ومستفزة ، ومالهاش دعوة بأي حاجة في الطب! زي مثلاً سؤال بيخيرك بين أربع حالات ، وبيسالك مين فيهم اللي غالباً هينتحر...

- الأول واد 14 سنة وأبوه هينفصل عن أمه وهيسيب البيت وبيقول لك إنه ناوي ينتحر بالحبل اللي في الجراچ!

- التاني واحدة عروسة جديدة إكتشفت إن جوزها بيخونها مع كذا واحدة تانيين ، وبتقول لك هاقتله الكلب ده!

- التالت واحدة حاولت تنتحر قبل كده ، وماشية على علاج نفسي ، وجوزها وأسرتها كلهم واقفين جمبها ، ومش سايبينها!

- الرابع واحد عنده 65 سنة مدرّس وطلعوه ع المعاش ، وكان نفسه يكمّل ومكتئب ، وبيقول لك إنه وشلة العواجير صحابه ناويين يتفسحوا ويلفّوا العالم!

بغض النظر إن الواد الفاقد الأولاني هوّه اللي غالباً هيتهبب ويعملها ، دا حتى خلاص حسب حسبته ومحضّر عدة الشغل كمان... بس وانا مالي يا عم الحاج ، ما ينتحر ولا يروح في ستين داهية تاخده وتاخد أبوه ، وبعدها يبقوا يندهولنا نشيل الجثة... دي حتى هتبقى أسهل في نقلها ، ولا هنعمل سپاينال إيموبيلايزيشن ولا هندخل في السكنداري سيرفيي ، ولا أسّيسمنت ولا وجع قلب!

والمفروض الامتحان ده نتيجته بتظهر بعد 4-6 أسابيع ، وبتتبعتلك بالبريد العادي خالص ع البيت! وده الغريب! ولما سألتهم ، مفيش حتى إخطار بالإي ميل؟ ودي تبتسم بخجل ، وتقوللي (No, only Snail mail)! حاجة تكسف!

بس الواقع بقى... وصلتني النتيجة ع البيت بالبريد العادي بعد 18 يوم بالظبط... حاجة تفرح J

المهم... تاني يوم – السبت – بيكون يوم امتحان العملي... بتجيلك حالة يا ميديكال يا تروما ، وبتاخد سيناريو ، وتبدأ تكشف ع الحالة ، وطبعاً بكلام منظم ، وبيسجّلولك الحوار على شريط كاسيت (عشان لو اعترضت على النتيجة بعدين بتيجي لجنة تسمع الحوار بتاعك ، ويعيدوا التصحيح) ، وبعدها بياخدوك يودّوك تنتظر في مدرج محاضرات مشغلين فيه فيلم ديفيدي ع الپروچكتور تسلّي نفسك فيه ، ومعاك كل اللي خلّصوا زيك كده وامتحنوهم خلاص ، على ما يخلّصوا باقي الناس ، وبعدين يبدؤوا يندهوا عليكم واحد واحد ، ويبلّغوك النتيجة.

أنا مثلاً ، جات ندهت عليّا واحدة ، وخدتني وراها على قاعة كبيرة تانية ، وبعد ما دخلنا القاعة ، إتدوّرت وابتسمت وقالتلي (You passed)! يا بنت اللزينا... طب ما تقوليلي من على باب المدرّج الأولاني ، بدل حرب الأعصاب الكام متر دول ما بين القاعتين. وبتمضي على نتيجتك ، ومع السلامة.

في حالة لو – لا قدّر الله – ما نجحتش ، قدامك حل من اتنين ، يا تعيد الامتحان في نفس اليوم على طول ، يا تيجي تاني يوم تعيده ، وتاخد لك حالة تانية ، وتشدّ حيلك بقى!

بعد ظهور النتيجة بتاعتك... هتيجي للخطوة التالتة ، وهي تسجيل عضوية في الكوليدچ ، زي تسجيل عضوية في النقابة كده في مصر. المشكلة إن طلباتهم وأوراقهم كتير... نشرحهم كده واحدة واحدة ، بس مبدئياً ، هتنزل استمارة التقديم ؛ ملف pdf من الموقع بتاعهم ، وتملا الفورمات اللي جوّاه ، ومن الآخر هتحتاج الآتي:

1. إستمارة التقديم.

2. استمارة دفع المصاريف.

3. الشهادة الأصلية لاجتياز الكورس الخاص بالـــ EMR (في خلال سنة من تاريخ الشهادة).

4. صورة من الكارنيه بتاع كورس الـــ First Aid أبو يومين ده (في خلال سنتين من تاريخه).

5. ورقتين فيهم إقرار من شخصين يعرفوك إنك حسن السير والسلوك.

6. شهادة أمنية (Security Clearance) إنك راجل زي الفل ، ومش سوابق!

7. شهادة فحص أمنية تانية (Vulnerable Sector Check) إنك سمعتك زي البيرلنت ، ومحدش كاسر عينك!

8. إقرار إنك ما عملتش عَملة ولا مصيبة من تاريخ صدور شهادتي الأمن إياهم! (في حالة لو الورق وصلهم بعد مرور أكتر من شهر من تاريخ أي من الشهادتين)

إستمارة التقديم دي عبارة عن إستمارة تملاها ، فيها بياناتك وبيانات المعهد اللي إدّالك الكورس ، وسنوات خبرتك في المجال الطبي ، ومرجع لو حبوا يتصلوا بيه (مديرك السابق مثلاً ، إسمه وتليفونه).

إستمارة الدفع دي بتكتب فيها بيانات الكريديت كارد بتاعك اللي هتسدد بيه المصاريف ، وتوقيعك عليها.

ورقتين الشاهدين دي تخلّي أي حد تعرفه في كندا معاه الجنسية أو الإقامة – ويُستثنى من المسموح لهم طبعاً أي حد تربطه بيك صلة قرابه أو إحتمال قرابه ، زي البجيرل فريند مثلاً – يكتب إنه يعرفك من كذا سنة (ويستحسن مش أقل من سنتين) ، وكده ولاّ كده محدّش هيعد وراكم! يكتب مثلاً (We have been friends for 2 years now) ، وخلصت الليلة... بلد بتاعت شهادات صحيح!

ديبو طبعاً أعرفه من تانية ثانوي ، يعني إحنا اصحاب من 18 سنة! و د. هشام إبراهيم كان تاني شخص ؛ وده باع ضميره وكتب إنه يعرفني من سنتين :blush2:

السيكيوريتي كليرانص دي رحت طلعتها من تورونتو بوليس ، رحت ع الفرع الرئيسي في 40 كوليدچ ستريت في الداون تاون ، وقدّمت عليها ، ودفعت بالفيزا مبلغ 26.25 دولار ، وبتوصلني البيت بعد أسبوعين.

ولمّا جيت أطلب منهم الفالنيرابُل سيكتور تشيك آلولي آسفين ، مش هنعملهولك! ليه يا ست الحاجّة؟! ودي تقوللي أصل ألبيرتا كوليدچ أوف پاراميديكس مش عاملة إشتراك معانا! نعمين ياختي؟! وهيشتركوا معاكوا ليه إن شاء الله؟! عشان ياخدوا تخفيض؟! وحتى لو فيه حاجة اسمها كده ؛ إيه اللي هيخلّيهم يعبروا حدود 3 ولايات عشان يشتركوا معاكوا؟! وترد عليا ودماغها ميت جزمة (آسفة ، دول مش مشتركين معانا!)

أتصل وأكلم كارين ريد (مسئولة التسجيل في الكوليدچ) وحكيتلها الحكاية! وتنحت وسألتني نفس السؤال (يعني إيه نشترك مع البوليس؟!) ، وأنا أقول لها (أنا عارف ياختي؟!) ، وخلّيت كارين تكلّمها ع الموبايل وأخدِت منها نمرة المدير عشان تستفسر منه ، وبعدين رجعت أكلمها تاني ، وألاقيها نازلة تريقة على البنت ، والعالم دول اللي عندكوا بيهرّجوا؟! وقعدنا نتتريق ونضحك أنا وهيّه على البوليس بتاع تورونتو! وبعدين تقوللي إنها هتتابع موضوع الاشتراك ده ، وهتبلّغني. وتسألني وتقوللي ما تقدرش تروح الـــ RMCP Police الفرع اللي في تورونتو ، وده تقدر تسمّيه الپوليس الملكي. وانا أقول لها (هوه ده بوليس بجد؟! دانا طول عمرى فاكره بتاع حفلات واستعراضات باللبس الفولكلوري بتاعهم اللي عامل زي الحرس الملكي بتاع قصر ملكة بريطانيا) ، ونقعد نضحك برضه! كانت مكالمة مسخرة الصراحة!

أكتشف فيما بعد – تبعاً لكلام الواد ديبو – إن الـــ RMCP دول زي الـــ FBI في أمريكا كده ، يعني سلطته فوق البوليس العادي الغلبان! آل وانا اللي فاكرهم بتوع استعراضات!

المهم ، كلّمت الآر إم سي پي دول ع التليفون ، وسألتهم لو ممكن يعملولي الموضوع ده ، والراجل يقوللي ليهم فروع في تورونتو وميسيساجا وسكاربرو ، وأطلب منه عنوان فرع تورونتو ، وآخد العنوان والتليفون. ومكانهم في 15 ش تورونتو ، والغريب إن شارع بالإسم ده يطلع شارع مفعوص مالوش لزمة في الداون تاون شرق تقاطع يانج مع كنج (تاني شارع أو حارة لو جاز التعبير... بس حارة بالمقياس الكندي حضرتك)!

ورحتلهم ، ومليت استمارة ، ومحتاجين عدد 2 تحقيق شخصية ، وسحب مني 39.38 دولار ، وقاللي هاستلمها بعد يومين من عندهم ، على ما يبعتوا الطلب لأوتاوا ، ويخلّصوه هناك ويرجعلهم ، وكل ده في خلال يومين. ولو حبّيت ممكن تتبعتلي بالبريد ، بس هتتأخر شوية ، وهادفع مصاريف البريد. قلت خلاص مش فارقة ، بالمترو على هناك مش هاخد وقت! قدّمت عليها يوم الجمعة العصر ، واستلمتها الاتنين الصبح.

اللذيذ وانا باستلمها ، والظابط هناك بيحطهالي في ظرف ، باقول له (يعني طلعت إنسان برئ على كده؟) ، ويرد عليّا (أياً كان اللي عملته ، فاحنا ما عرفناش نمسكه عليك!) ، ونضحك احنا الـــ 2 :rolleyes:

النقطة اللي عرفتها مؤخراً برضه ، إن الـــ Vulnerable Sector Check اللي بيعملوهولي الآر إم سي پي ، بيتعمل لي فيه أوتوماتيك السيكيوريتي كليرانص! يعني همّه اليومين ، ومعايا شهادة واحدة بتجمع النقطتين اللي عايزينهم الكوليدچ! والكلام ده اتأكّدت منه من الست اللي هناك لما شافت الشهادة وقالتلي دي كافية ، ومش محتاجين السيكيوريتي كليرانص! معلش ، محدّش بيتعلّم ببلاش!

والإقرار إيّاه بتكتب إنك من اليوم الفلاني (تاريخ صدور شهادة البوليس) ما عملتش أي مصيبة ، أو...

From …, till present, I have not been convicted of any offence, since my Criminal Record Check, dated … .

وطبعاً كل الأوراق دي أصول... ولو محتاج تسترجع الأصول بتاعتك تاني ؛ يبقى تعمل زي ما عملت... تبعت لهم الأوراق في ظرف ، وتحط جوّه الظرف ده ظرف تاني مدفوع ومتظبّط وعليه عنوانك. وبالتالي هيطّلعوا ع الأصول ويصوّروها ، ويرجّعولك الأصول في الظرف اللي انتا حاطّه جوّه. وطبعاً فيه خدمة التراكنج على Canada Post ، وبالتالي أقدر أتابع الجوابين وصلوا ولاّ ما وصلوش ، وكمان يعمل لي سكان لإمضاء المستلم ؛ بحيث أدخل ع الويب سايت بتاعهم ، وأدخل التراكنج نمبر ، وأشوف التوقيع ، وتاريخ الاستلام كمان... عاشت كندا حرة مستقلة يا جدع

وبما إن الشيئ بالشيئ يُذكَرُ... كانت هند بعتتلي طرد بالبريد الدولي تبع كندا پوست برضه ، على مصر ، ودافعين فيه 85 دولار (كانوا كتابين وزنهم 5 كجم)... والتراكينج على كندا پوست بيقول إنها إتشحنت للـــ Destination country ، قامت راحت للراجل بتاع كندا پوست (قدّام البيت) ، وسألته عن الجواب وصل لفين دلوقتي؟ المفروض إننا عاملينله تراكينج عشان نبقى متابعينه في أي لحظة! الراجل قال لها دلوقتي تقدري تتابعي مع Egypt Post ، وبنفس التراكينج نمبر ع الويب سايت بتاعنا! هند مسكت نفسها م الضحك بالعافية ، خصوصاً والراجل بيسالها بكل براءة (لو ما تعرفيش الويب سايت بتاعهم ممكن أجيبهولك)! الناس دي طيبين أوي ، وغلابة وعلى نيّاتهم الصراحة! ما هو ما يعرفش اللي فيها! دا بخلاف إن الموقع الرئيسي نفسه في معظم الأوقات – ساعتها ع الأقل – ما كانش بيفتح ، لما كنت آجي أجيب صفحة التراكينج (تتبع المواد البريدية) كنت ألاقي الصفحة مش عايزة تفتح ، كما لو أن فيه خطأ برمجي! يا راجل زيح... بلا هم!

نرجع لموضوعنا... بعد ما بيستلموا في الكوليدچ لأوراقك دي كلها ، بيطلّعولك كارنيه عضوية في الكوليدچ ، وكده إنتا – رسمي – بقيت من حقك تمارس المهنة في ولاية ألبيرتا ، وأعتقد في ولاية بريتيش كولومبيا اللي جمبها كمان.

أحب برضه أوضح نقطة... ممكن إنك تقدم للكوليدچ وتطلب دخول الامتحان بدون دراسة (Challenging the exam) ، من مُنطلَق إن مستواك العلمي أعلى من الكورس ومن الامتحان. ساعتها الكوليدچ هتطلب منك الشهادات اللي بتثبت كلامك (البكالوريوس ، الماچستير ، شهادات خبرة ، شهادات كورسات ، ... إلخ) ، ويُستحسن حاجات تثبت إنك اشتغلت في مجال طب الطوارئ. وسيتم تشكيل لجنة لدراسة موقفك ، وإن كنت تستحق دخول الامتحان ، واستثناءك من شرط الكورس الدراسي.

أنا عن نفسي ما أحبذش الفكرة دي... الناس دول ليهم سيستم مختلف عننا ، وفيه حاجات ما نعرفهاش بخصوص القوانين التنظيمية لخدمات الطوارئ الخاصة بالولاية ، وسيستم تحفة للتعامل مع المصاب قبل الوصول للمستشفى. كل الحاجات دي مش من السهل تعرفها بدون حضور الكورس. لكن على أي حال... الواد عبهادي كان أخد الكتب بتاعتهم (ما هو قاعد في ألبيرتا) ، وذاكرها ، ودخل وعدّى الامتحان. لكن ده رأيي ، خصوصاً لو الوقت والمصاريف مانتاش مزنوق فيهم.

فيه برضه شوية كورسات في العبيط ممكن تاخدهم (مش هيخسّروا)... عندك كورس الـــ Transportation of Dangerous Goods (TDG) ، وده بتحتاجه عشان تتعامل مع عربية الإسعاف. بيعتبروا اسطوانات الأكسچين في العربية من المواد الخطرة! وفيه كورس تاني الـــ Workplace Hazardous Materials Information System(WHMIS) وده بيتكلّم عن الأمن الصناعي وحاجات السيفتي في التعامل مع الكيماويات في أماكن العمل. الكورسين دول هتاخدهم بتخفيض 50% مع دراستك كورس الـــ EMR (هيكلفوك على بعض40 دولار) ، وهتستلم كتيبين صغيرين وامتحانين MCQ إجاباتهم في الكتيبين (نظام أوبن بوك يعني) ، تحلّهم مع نفسك ، وتعمل سكان لورقتين الإجابة ، و ع الإيميل للمعهد بتاعنا إياه (في خلال شهر من تاريخ انتهاء كورس الـ EMR) ، وهيبعتولك كارتين باجتيازك الكورسين دول. فيه شركات تانية قبل ما تعيّنك تبع بريمة بترول هتشترط حصولك على كورس الـــ H₂S ، وطبعاً – كالمعتاد – لازم تكون واخده من كندا! الكورس ده برضه بيتاخد من نفس المكان بتاعنا إياه في يوم ودمتم ، وهوه أصلاً بتاع نص ساعة بريزنتيشن فيديو ، وقول ساعة كمان بؤين عن خصائص الغاز وخطورته ، والإجراءات المتبعة في حالة التعرض له ، وربع ساعة كمان للتدريب على ارتداء الماسك وجهاز التنفس... بس كلّه في العبيط. زي اللي أخدناه هنا ع البريمة في السعودية أول ما جيت ، وممكن أدرّسهولهم بنفسي ، بس هتعمل إيه! حكم القوي! لازم الكارت بتاع الكورس! بلد بتاعت شهادات قلنا!

نيجي بقي لآخر حاجة هتحتاجها في الحدّوتة دي... رخصة سواقة عربية الإسعاف... الرخصة المهنية دي ، اللي هيا الـــ F في أونتاريو ، أو الـــ Class 4 في ألبيرتا.

الكلاس فور دي بتسمح لك تسوق الإسعاف والتاكسي والأتوبيس (الميني باص في الواقع) ، علاوة على العربيّات الملاّكي بالطبع (النظام هناك إن المستوى الأعلى بيسوق برضه كل ما قبله). وبالتالي بتفتح فرص شغل كتير ، ده بفرض إنك ما لقيتش شغل كمسعف مثلاً ، هيبقى عندك الأوبشن إنك تسوق تاكسي أو ليموزين ، وممكن أتوبيس مدارس أو الشاتل باص بتاع المطار دوت.

لازم طبعاً يكون معاك رخصة القيادة العادية أو الخاصة بالسيارات الملاكي ، اللي هيا الـــ G في أونتاريو ، أو الـــ Class 5 في ألبيرتا. والمفروض إنك تستبدلها بالرخصة المهنية ، اللي هيا الـــ F في أونتاريو ، أو الـــ Class 4 في ألبيرتا ، بعد نجاحك في امتحان السواقة بتاعها ، اللي بيشمل امتحان نظري ، وامتحان عملي.

بالنسبة للنظري هتحتاج تذاكر كتيب عن قواعد القيادة المهنية والخاصة بمثل هذه العربيات ، وده هتلاقيه موجود على موقع المرور بتاع ألبيرتا كملف pdf تنزله ببلاش ، وتطبعه لو حبيت. وهتحتاج تخلي دكتور يكشف عليك ، ويملا استمارة خاصة بيهم إن ما عندكش مشكلة طبية تمنعك من القيادة المهنية (الشهادة الطبية دي بتتجدد كل 5 سنين حتى سن الـــ 45 ، وكل سنتين حتى سن الـــ 65 ، وسنوياً بعد كده!). الموظف هناك هيعمل لك كشف نظر على جهاز عنده ، وتدخل بعده على إمتحان نظري هيمتحنك في معلومات من الكتيب المهني بالإضافة لمعلومات من الكتيب بتاع الرخصة الخاصة العادية (الـــ Basic License).

بعد كده هيكون عندك الـــ Road Test ، وده هتشتريله تصريح مؤقت للامتحان ، والمفروض تأجر عربية فان (Van) اللي في حجم الإسعاف دي عشان تمتحن بيها ، من شركات تأجير السيارات العادية ، ولو إنهم بيقولوا إنك ممكن تمتحن بعربية خاصة عادية (زي العربيات الملاكي بتاعتنا).

طبعاً فيه شركات بتدّي كورس مكثف نظري وعملي للتدريب على سواقة الإسعاف نفسها (شاملة ترتيب العهدة الطبية اللي في الكابينة بتاعتها) ، وفيه مدربين سواقة بيدربوك على السواقة في مناطق الاختبار العملي ، ومنها تكون أخدت ع المنطقة برضه.

بعد كده ، فيه مطب واحد بس... المفروض – في حالتي – أسلّمهم رخصة أونتاريو ، ويسلّموني رخصة ألبيرتا. المشكلة إني لازم مع الرخصة أقدم لهم ما يثبت إني مقيم في ألبيرتا ؛ زي عقد إيجار شقة ، أو خطاب من البنك على عنواني في ألبيرتا ، أو كارنيه تأمين صحي من ألبيرتا ، ... إلخ! والمفروض أصلاً إني مش هاستقر في ألبيرتا غير لما يجيلي عرض شغل! يعني دخلنا في دوامة البيضة ولاّ الفرخة! والمفروض الرخصة هتوصلني على إقامتي في ألبيرتا بعد 10 تيام ، على ما يستعلموا على بياناتي من أونتاريو! يا دوب يشدّولهم مكتوب ، والجمل يلحق يروح وييجي وعلى ما ينخ (ينزل يقعد ع الأرض) ، وينزلوا الشوال من عليه ، ويفرزوا المكتوب وكده! حاجة هم!

هوه ممكن الواحد يأجر شقة مفروشة شهر كده ينجز فيها الليلة دي (زي ما عملت أيام كورس الـــ EMR) ، وبعدين نبقى نقدم على شغل من بعيد لبعيد ، ولما يجيلنا الشغل يبقى يحلها حلاّل!

بعد ما بيكون معاك كارنيه عضوية الكوليدچ ، ورخصة الكلاس فور ، بيبقى من حقك ساعتها تقدّم على شغل في المجال ده كمسعف تبع شركة خدمات طوارئ طبية (EMS) ؛ سواء على عربية إسعاف عادية لخدمات الطوارئ (حوادث – نقل مرضى – حالات مرضية في البيت - ... إلخ) ، أو تبع مناطق صناعية (زي مناطق إنتاج بترول Oilfield ، أو مناطق تصنيع ، أو منطقة نائية فيها عمال ، وغيره). وفيه شركات EMS متخصصة في تقديم الخدمة الطبية لشركات البترول ، أو للمناطق الصناعية بس.

والجميل بقى إن موقع الكوليدچ نفسه سايبين فيه صفحة للتوظيف (Employment). هتلاقي فيها الشركات داخلة وعاملة إعلانات عن إحتياجاتها من مُختلف مستويات الپاراميديكس ، وتقدر تدخل على موقع كل شركة فيهم ، وتاخد فكرة عن طبيعة الشغل معاهم ، وإيه طلباتهم في الناس اللي محتاجينهم (من شهادات وكورسات تانية). طبعاً مش معنى إن مجرّد ما هتقدّم في شركة هيقبلوك على طول ، أو ده توقعي عشان لسّه الخطوة دي ما عملتهاش ، بس عندك عروض كتير ، والشغل أولاً وأخيراً رزق!

المعتاد في نظام الشغل كمسعف على بريمة بترول إن روتيشن الشغل بتكون 3 أسابيع شغل وأسبوع أجازة ، والديلي ريت بيكون من 250 لـــ 300 دولار (عن كل يوم شغل طبعاً) ، يعني بنتكلم في فوق الـــ 6.000 دولار في الشهر هتوصل 4.500 مثلاً بعد الضرايب! لوز أوي وزي الفل! وعادي جداً لو حبيت تخليها أسبوعين شغل وأسبوع أجازة ، ونبقى بنتكلم في 5.500 قبل الضرايب. ولو حبيت – بالتنسيق مع بديلك – تشتغل أسبوعين وأسبوعين (زي ما كنا بنشتغل في البراريم في مصر) ، بس توقع المرتب هيقل ، وساعتها هنتكلم في حدود الأربع تلاف ، يصفصفولك على 3 تلاف بعد الضرايب ، وبرضه لوز وزي الفل ، وتريّحك من إنك تبص في النتيجة تستنى أول الشهر!

عموماً... نستنى لما ندخل في المعمعة ، وبعدين نبقى نتكلم في المرتبات عن تجربة فعلية.

[moheltohamy]

الله ينور يا دكتره

ايه الحلاوة دي

سيبك بلا ماجستير بلا داكتورااااه

انت طلعتها في دماغي

طيب انا بلبس نظارة وعندي فلات فوت ينفع تشغلوني معاكم

أهم حاجة ما تكونش ملتصق wst::

صباح الفل يا ريّس... مفيش أي حاجة من الهجص ده خالص. أمّال أنا باشجع ليه الكل يروح يشتغلها؟

بس أوصل انتا هناك... وتتعدّل ساعتها.

يااااااااااااااااااااااااااااااه

والله و رجعتنا لزمن القهاوي الجميل :lol:

و المشارب اليوم علي حسابي

pps:

نصّار

يا سيدي ربنا يكرمك... أمّال أناعمّال أرتب في الأفكار الفترة دي كلها ليه؟ دا لسّه كمان الحكاوي عن الكورس نفسه!

إنتو فاضيين ولاّ وراكوا حاجة؟! wst::

السلام عليكم

عاوز أبارك لك بس مرتين ,الاولى على النجاح و الثانية على الخاطرة الجميلة دي,بصراحة انت بتقصر الطريق بسرد تجاربك,و أكيد كثير منا بيستفيدوا منها.جعلها الله في ميزان حسناتك

مع كل الحب و الاحترام و التقدير

ربنا يخليك يا باشا... ويا ريت والله الناس تستفيد منها ، ده شيئ هيسعدني

تحياتي...

اخونا الفاضل التهامى

دايما متميز و عاجبنى قوى التفاصيل الدقيقة لكل حاجة

روح يا شيخ ربنا يسهل لك و يبارك لك :rolleyes:

طيب على الله تفيدك بحاجة... بس ربا يسهّل والوضع عندك يتحل الأول ، وتوصل كندا بالسلامة ، والأوبشنز هتكون كتير، بس انتا تنوّرنا هناك :blink:

[moheltohamy]

ياه انا عملت فولدر جديد واحتفظت بالصفحة دي وهابعتها ايميل لنفسي

دكتور محمد

دماغ كومبيوترية فذة

بس انت متاكد ان الامتحانات سهلة ولا زي تورونتو نوتس؟

تورونتو نوتس إيه بس يا عم الحاج؟! قلبك أبيض!

إنتا عارف إيه الـ 6 أدوية اللي في السكوب أوف براكتيس بتاعك؟!

1. Acetyle Salicylic Acid

2. Oral Glucose

3. Salbutamol

4. Ipratropium Bromide

5. Epinephrine; in the form of Epi Pen

6. Nitroglycerine; SL Spray

ورقم 6 ده كمان ما لَكش دعوة بيه! ده بس من باب العلم بالشئ!

وكمان ، إنتا من حقك بس تدّي أول اتنين ، الباقيين دول في حالة لو الواد عيان مزمن ، ومعاه العلاج بتاعه ، ساعتها تساعده إنه ياخدهم ، وده كمان بعد ما تتصل بالدكتور المشرف على الشركة!

صباح الدماغ يا معلمة pps:

مش قلتلكوا هنتدلّع؟!

منور يا تهامي .......لا الكلام جاب نتيجه اهو و بقيت تقعد معانا علي القهوة ...... بس انا شامم ريحة جواسيس زيناتيين بينقلوا الاخبار........

:D

زناتيين أو حتى مشمشي ، مش هتفرق بقى :P

المهم إن انتا دلوقتي رسمي الكتكوتة بتاعة المنتدى ، يعني أحدث رتبة معانا سعادتك!

يعني انتباه وانتا بتكلّمني يا نمرة

إلاّ انتا أخدت النمبر أصلاً ، ولا لسّه ماشي من غير نِمَر!

معلش يا حسيني بقى... النكتة حكمت ، إنتا أصلك دلوقتي بقيت زبون :lol:

دكتور تهامى

الف الف مبروووووووووك.........وربنا يوفقك فى كل خطواتك يا رب

عايزة اقولك انى لسه مكتشفة التوبيك الروعة ده من يومين ومن كتر جماله والمعلومات اللى مكتوبة بطريقة شيقة جدا ودمها خفيف جدا ما قدرتش اقفله لحد ما خلصته على مدار اليومين مع شوية بريكس فى النص ........بصراحة روعة روعة وجزاك الله خير على انك لا تبخل بمعلوماتك على حد..........

معلش انا وصلت متاخرة شوية تقريبا سنتين لان التوبيك ده..... عفوا القهوة دى مفتوحة من 2007 وانا ولا هنا..........بس كل شىء باوان........

والف الف شكر ليك والف مبروك مرة تانية

أولاً ، حمد الله ع السلامة يا دكتورة ، ويسعدني إن توبيكي يكون في شرف استقبالك في المنتدى :rolleyes:

بس إنك تاخدي 180 صفحة ورا بعض على يومين... دي بطولة! wst::

أنا نفسي - بكل الفضا اللي في البرّيمة - ما استحملهوش wst::

وشكراً لوجودك ، ونتمنى نشوف مشاركاتك معانا عن قريب :blink:

بصراحه رووووووووعه و كنا مفتقدين الجمال ده من زماااان

أنا أول ما لقيت الهانداوفر نزل قومت عملت مج النسكافيه

و قعدت زي الي هيذاكر تمام

ربنا يوفقك يا تهامي يا أخويا

بس ليه سؤال هيه كورسات الإسعافات دي لازم تكون دكتور

و لا مش شرط؟ لأ بجد بسأل لأن أنا سمعت ان في مجالات

كتير ممكن تشتغل فيها في كندا بمجرد انك دخلت الكورس الخاص

بها و تنجح فيه بغض النظر عن شهادتك ايه

ومتابعيييين يا فندم

إنتي زي ما تكوني لقطتي أول سطر في الجزء اللي جاي... بتاع تفاصيل الكورس... هاحط لك هنا أوّل جملة في الجزء اللي جاي ، اللي فيه كل المعلومات ، وكمان الماتيريالز للي يحب يذاكر بقى.

على بس ما أخلّصه ، وأنزلهولكم. وإن شاء الله مايتأخرش.

الغريب في موضوع كورس الـــ EMR ده إني كنت أنا الوحيد – تقريباً – اللي طبيب ، أو أمُت بصِلة للمجال الطبي!

[Spanish Eyes]

الله يفتح عليك ويوفقك يا دكتور تهامي ايوة كدة بتدينا امل في الحياة وان الصورة مش غامقة قوي زي ما الواحد متخيل وخايف من المجهول ،ونماذج المصريين الجدعان اللي بيقفوا جنب بعض (صباح الخير يا دكتور هشام) :rolleyes: .

هل الدايلي رات اللي حضرتك ذكرته لعدد معين من الساعات في اليوم ولا على ذمتهم 24 ساعة ودة خاص بقطاع البترول بس ولا ممكن في اي مكان تاني ؟ويا ترى مدى ملائمة الوظيفة دي للجنس الناعم

[طبيبة مصرية]

دكتور تهامى

مشكور على الترحيب و من غير ما تقول انا ان شاء الله معاكوا فى التوبيك الرائع ده على طول .............

بس انا مش بطلة ولا حاجة ده انت اللى بطل باسلوبك الممتع اللى فعلا يشد الواحد ويخليه متسمر قدام الجهاز لحد ما جالى صداع وخدتلى قرصين بنادول امشى بيهم الحال............

وطبعا انا شخصيا كنت متعطشة جدا انى اعرف اى اخبار عن كندا والحياة فيها يعنى الموضوع فيه مصلحة برضه لان انا وزوجى يا دوب بدانا نفكر فى قصة الهجرة دى وراح زوجى اتشملل وجاب التورنتو نوتس من واحد صاحبه على فلاشة ويا ريته ما جابها بصراحة انا فتحت بارت واحد وجالى صداع وحسيت انى مش معقول هاقدر اذاكر ده كله تانى من اول وجديد .........ومش عارفة هل فى طريق تانى غير المعادلة وبعدها النيابة ان شاء الله اللى هى برضه من خلال ما قريت غالبا هتكون طب اسرة يعنى ممارس عام بس شيك شوية ..............

على فكرة انا معايا ماجيستير وزوجى دكتوراة وحاليا فى الخليج س عارفة ان كندا مش هيفرق معاها الشهادات دى ولازم المعادلة الكندية اللى سكتها برضه طويلة اوى .........ربنا ييسر الحال ويلهمنا للطريق الصحيح

[طبيبة مصرية]

اضم صوتى لصوت اخواتى صفا ومروة

بالنسبة للطبيبة هل فى ليها اى مجال فى الباراميديكال يكون اقصر واسهل شوية من سكة المعادلة والنيابة..................

[znaty]

عزيزي د تي

صراحة

صراحة الصراحة يعني ؟؟

موش عارف اعلق على المعلقة اللي انت كاتبها دي ازاي

روح يا شيخ

ربنا يفتحها في وشك :rolleyes: ماتفهمنيش غلط بس

يا اخوانا اللي بتتفرج وتقرا سكيتي وعدد المشاركات واحد والا اتنين والا اول مشاركة انا في كندا وعاوز اعرف ادخل العيال فين والكلام دة

لو نصحت اخوانك وزمايلك وساعدتهم

رزقك موش هاينقص والا هايروح منك

ولا حد هاياخد فرصتك والا رزقك

لانه بمزاجك او غصب عنك مكتوبلك مكتوبلك

بالعكس

مساعدتك للناس وتسهيل طريقهم هاتوسع رزقك وتسهلك حياتك انت

ان الله في عون العبد مادام العبد في عون اخيه

وكل دقيقة والا كلمة ولا خطوة في مشوار بتقضي بيه مصلحة لاخوك او بتساعده لوجه الله تفضل الملائكة تصلي عليك لغاية ماتقضيها

ربنا يكتر من امثالك انت وم ياسر ود هشام ابراهيم وكل الشباب اللي زي الورد دة

ماتستهونش بالزناتيين علشان دول منحدرين من قبائل اكلي لحوم البشر خد بالك

ستيك بأة والا كباب حلة موش هاتفرق

[moheltohamy]

ربنا يوفقك يا دكتور تهامى ...طيب بعد سيادتك ما حمست كل اطباء المنتدى انهم يسيطروا على كل باريمات كندا..وماشاء الله زى اللى كانوا متلككين وما صدقوا... :D

طيب وطبيبات المنتدى بما انك المشرف ممكن تقولنا نروح فين ؟ ياريت تفيدنا ... wst::

الله يفتح عليك ويوفقك يا دكتور تهامي ايوة كدة بتدينا امل في الحياة وان الصورة مش غامقة قوي زي ما الواحد متخيل وخايف من المجهول ،ونماذج المصريين الجدعان اللي بيقفوا جنب بعض (صباح الخير يا دكتور هشام) :lol: .

هل الدايلي رات اللي حضرتك ذكرته لعدد معين من الساعات في اليوم ولا على ذمتهم 24 ساعة ودة خاص بقطاع البترول بس ولا ممكن في اي مكان تاني ؟ويا ترى مدى ملائمة الوظيفة دي للجنس الناعم :rolleyes:

اضم صوتى لصوت اخواتى صفا ومروة

بالنسبة للطبيبة هل فى ليها اى مجال فى الباراميديكال يكون اقصر واسهل شوية من سكة المعادلة والنيابة..................

هممممم... ده إتحاد طبيبات المتدى بقى ولاّ إيه يا حضرات؟!

عموماً ، أنا أحب أقول حاجة... مفيش حاجة هناك إسمها راجل وست :P

كلمة واحد هارُد بيها على كل اللي قلتوه ليّا

دي صورة للكلاس بتاع الـ EMR في آخر يوم لينا. (و 800×600 عشان هشام أفندي ما يزعلش pps: )

زي ما قلتلكم... مفيش أي حاجة إسمها راجل أو ست هناك wst::

وتفاصيل التفاصيل هتلاقوها في الجزء اللي جاي من الهاند أوفر ، بس يخلص! :blink:

[hosiny]

[زناتيين أو حتى مشمشي ، مش هتفرق بقى :)

المهم إن انتا دلوقتي رسمي الكتكوتة بتاعة المنتدى ، يعني أحدث رتبة معانا سعادتك!

يعني انتباه وانتا بتكلّمني يا نمرة

إلاّ انتا أخدت النمبر أصلاً ، ولا لسّه ماشي من غير نِمَر! :D

معلش يا حسيني بقى... النكتة حكمت ، إنتا أصلك دلوقتي بقيت زبون :D

ليه كده يا عم تهامي بس التخبيط و التصييح ده......انت نسيت اني اقدم منك في الجيش و ممكن تيجي تحت ايدي في يوم من الايام لو ربنا كتب عليك استدعاء.......ساعتها هاتعرف مين اللي نمره

على العموم يا عم اديك فضحتني و اللي حصل حصل.....بس الذيذ كمان اني ماشي من غير نمرة و غالبا كمان ملفي هيرجع عشان نسيت ورقة......مبسوط كده يا عم......مسيرها تفرج....ادينا بنتسلى لحد ما تفرج

[safaalabana]

كلمة واحد هارُد بيها على كل اللي قلتوه ليّا :D

وياله من رد لقد أوجزت فأنجزت ...ده كده كل أطباء مصر ح يجروا على كندا :D

[qenawy]

الاخضر فوق الجميع

والابيض كمان

[moheltohamy]

إفصل يا ابني انتا وهوّه... دانتو فعلاً عيال سوّ ، ولمّتكوا على بعض خطر! :D

والله يا مدام صفاء أنا كانت نيتي بريئة تماماً وانا بانزل لكو الصورة أنا بس حبيت أورّيكو إن نصف الكورس كان بنات

ومنهم مثلاً البت داريل اللي قاعدة في النص دي ، ناوية تشتغل على برّيمة بترول ، وتاني بنت م اليمين (اللي لابسة أبيض على لون جزمتي :) ) ناوية تشتغل في مؤسسة بتقدم خدمة إسعاف للمتزحلقين ع الجليد.

وناس كتير من اللي في الصورة كانوا ناويين يكمّلوا دراسة للمستوى الأعلى (مستوى الـ EMT).

وقلت الصورة أبلغ تعبير هيطمّنكوا... مش أكتر! :D

[moheltohamy]

دكتور تهامى

مشكور على الترحيب و من غير ما تقول انا ان شاء الله معاكوا فى التوبيك الرائع ده على طول .............

بس انا مش بطلة ولا حاجة ده انت اللى بطل باسلوبك الممتع اللى فعلا يشد الواحد ويخليه متسمر قدام الجهاز لحد ما جالى صداع وخدتلى قرصين بنادول امشى بيهم الحال............

وطبعا انا شخصيا كنت متعطشة جدا انى اعرف اى اخبار عن كندا والحياة فيها يعنى الموضوع فيه مصلحة برضه لان انا وزوجى يا دوب بدانا نفكر فى قصة الهجرة دى وراح زوجى اتشملل وجاب التورنتو نوتس من واحد صاحبه على فلاشة ويا ريته ما جابها بصراحة انا فتحت بارت واحد وجالى صداع وحسيت انى مش معقول هاقدر اذاكر ده كله تانى من اول وجديد .........ومش عارفة هل فى طريق تانى غير المعادلة وبعدها النيابة ان شاء الله اللى هى برضه من خلال ما قريت غالبا هتكون طب اسرة يعنى ممارس عام بس شيك شوية ..............

على فكرة انا معايا ماجيستير وزوجى دكتوراة وحاليا فى الخليج س عارفة ان كندا مش هيفرق معاها الشهادات دى ولازم المعادلة الكندية اللى سكتها برضه طويلة اوى .........ربنا ييسر الحال ويلهمنا للطريق الصحيح

بصي يا ستي...

أولاً طالما قلتي إيد مرسي... قصدي كندا ، يبقى انتي جيتي في المنتدى الصح :D

اتفسحي شوية في مواضيع باب الهجرة لكندا ، وهتلاقوا جواهر :)

نيجي بقى لنقطة تورونتو نوتس و وجع القلب...

المفروض تحددوا إنتوا عاوزين إيه من كندا تحديداً... لو الفلوس أو البوزيشن ، يبقى شوفولكوا سكة تانية ، والخليج عموماً أحسن اختيار ليكم.

أما لو كنتوا بتدوروا على أسلوب حياة ، أو حرية ، أو راحة البال... يبقى هتلاقوا نفسكوا في كندا.

بس على الله ما يكونش البرد مشكلة بالنسبالكو :lol:

بالنسبة للمهنة أو البوزيشن ، فده بالنسبالي وسيلة وليست غاية! لو إنتي (بالماجستير) أو زوجك (حامل الدكتوراة) مفيش مشكلة إنه يشتغل مسعف ، أو مندوب دعاية... يبقى هتستمتعوا هناك. أما لو الموضوع ده هيعمل لكو مشكلة نفسية ، يبقى هتتعبوا هناك!

المشكلة هناك مش بس امتحانات المعادلة السافلة ، دا المشكلة إن ممكن جداً بعد النجاح فيها ، ما تجيش نيابة! ساعتها بقى هتتقهروا بجد! :D

مالها بس قعدة البراريم؟! حد يتبطر ع المخمخة والمزاج العنب؟! :sad:

[moheltohamy]

دي صورة للكلاس بتاع الـ EMR في آخر يوم لينا. (و 800×600 عشان هشام أفندي ما يزعلش :wub: )

زي ما قلتلكم... مفيش أي حاجة إسمها راجل أو ست هناك angl::

وتفاصيل التفاصيل هتلاقوها في الجزء اللي جاي من الهاند أوفر ، بس يخلص! :)

اكيد انت يا محمد ابو سويتر أحمر وابو شعر اصفر اللي في الوسط ده اللي واقف جنب الموزه صح؟ :sad: :D

انا متأكد :D

طول عمري أقول عليك نبيه يا زهيري ، وتجيبها قبل ما تطير (وهيّه ع الأرض يعني :D )

يا جدعان... إنتو سبتوا كل الكلام ، ومسكتوا في الصورة؟! :wub:

طب انتا بالذات لو طلعت البلكونة وصورت صورة في الهوا هتصوّر تكعيبة عنب ، على صوباية موز!

هتزعّلوا مننا زميلات الكفاح يا اخواننا كده. نراعي القوارير شوية بقى :lol:

[moheltohamy]

لأ يابو حميد ، فهمتني غلط!

أنا استغربت إن كل المعلومات دي ، وما حدش لفت انتباهه غير الصورة! :D

لكن الباقي ده مش وقتة خالص... لسه هيتكتب يا ريّس ، وفيه أوراق هيتعمل لها سكانينج ، وأبلود ، وترتيب ، وكتابة!

يعني بعد 14 صفحة ، وهتقوللي أنزل بالتقيل؟! :D

يا جدعان عندي امتحان بعد 3 تيّااااام! :)

[روبي]

ايه ده ايه ده يا دكتور محمد

لميت البنات كلهم بالصورة

استنى علي لما اكلم هند :)

رحتي فيها يا مسكين شهد على روحك :D

و على فكرة بالصورة مفيش غير دم عربي واحد

شيل النظارة :D