كندا التي رأيتها :)

[ابو الخير]

لا الصراحه اجرام اجرام يعني

الصراحه يا دكتور محمد انت حكايه و الله احنا لازم نطالب المنتدى يعمل لك قسم لوحدك

لا موضوع الماجيك جاك ده رهيب الصراحه اخواتي في امريكا متكلفين اكتر من 100 دولار من بداية السنه في اشتركات تليفونات من علي النت

فكرة ارامكس دي رهيبه برضو .. هو ده ذكاء الانثي الفطري ما بيظهرش غير في امور الشوبنج

ايه يا جماعه هو الموضوع ده مش يستحق التثبيت ولا ايه ؟!

تثبيت يا اداره

[Dr Ayman Kamel]

الفكرة الصايعة بقى...

ودي عرفتها قبل ما اسافر كندا من أساسه! كان واحد صاحب مصطفى ابن خالتي (نقيب ف المظلات) ، ومتجوز واحدة مصرية كندية ؛ عايشة في كالجاري (ولاية ألبيرتا). البنت مستقرة هناك (وبترجع مصر من وقت للتاني) ، وهوه بطبيعة الحال مرزوع في مصر عشان ظروف الجيش ، لغاية ما يقدم على استقالة للدواعي الطبية (تمزق في الرباط الصليبي في ركبة ، وكسر في القصبة الناحية التانية)! وقعدنا معاه قبل ما نسافر كندا بكام يوم ؛ وقعدنا ندردش معاه عن الحياة هناك. من ضمن كلامه ؛ حكالنا عن أحسن وأرخص وسيلة بيكلم بيها مراته هناك.

ده يا سيدي يبقى الماچيك چاك ، وده حاجة كده بحجم الفلاش ديسك (أكبر منه حاجة بسيطة ، بس أصغر من البتاعة بتاعت موبينيل اللي اشتريتها انتا مؤخراً) ، وبيتوصل بالكمبيوتر USB ، وطبعاً يكون الكمبيوتر واصل نت (يستحسن DSL) ، وفيه فتحة توصل فيها الچاك العادي بتاع التليفون (وعدة تليفون عادية خالص). وترفع السماعة يا ريس ، وتطلب أي رقم في كندا أو أمريكا ببلااااااش. البتاع ده اشتريته بـــ 45 دولار ، شامل اشتراك أول سنة ، وبعد كده كل سنة بـــ 19. واشتريت منه 3 ؛ واحد لماما عشان تبقى تكلمني هناك ، والتاني ليا ف السعودية عشان أبقى أكلم هند (مع إن التليفون الدولي موجود بصراحة ، ومن ابو بلاش bngn:: ) ممكن استخدمه وانا في مصر بأه ، والتالت لهند في كندا عشان المكالمات اللونج ديستانس! وشحنته على فيليپ (الـــ STC بتاعنا ع البريمة) الأمريكاني وساكن في لويزيانا (ماهو السايت ده ما بيبعتش غير لأمريكا فقط مع الأسف bsh:) ) ، وفيليپ جابهم لي معاه ع البريمة ف السعودية. تخيل... دلوقتي بقوا بيبعتوا لكندا كمان؟! لسه مكتشف الموضوع ده حالاً (5 أغسطس 2008 ، 9:30 م)! :angry:

ولو ما ليكش سكة في أمريكا ممكن تعمل الحركة المجرمة اللي هند كانت عملتها أيام الخطوبة... الهانم اكتشفت حركة مجرمة مع أرامكس ، بتدفع حوالي 30 دولار (مرة واحدة ف العمر) ، وبيعملولك عنوان عليهم في أمريكا (نيو يورك تقريباً) ، وعليه عنوان إضافي على فرعهم في إنجلترا (لندن على ما أعتقد). ولو حبيت تشتري حاجة من ع النت – م المواقع الكتيييييير اللي مش بتبيع غير لأمريكا مثلاً.

هتكتب العنوان بتاعك ع العنوان بتاعهم ، وهمه هينقلوهولك من فرعهم في أمريكا لفرعهم في مصر ، وطبعاً بتحاسبهم على تكلفة الشحن من هناك لباب بيتك.

طبعاً الهانم عملت الكلام ده عشان مزاجها قال لها تشتري اطقم السرير من ع النت ، أسعار أقل ، وجودة أعلى ، واللي اشتريناه بـــ 80 ولاّ 120 دولار شفناه في كاربت سيتي بـــ 1700 جنيه ، وكان الاختيار محدود ، وذوقه بلدي بصراحة! وكانت المشكلة إن أمازون حاجته غاليه بس بيشحن لمصر ، ودومستيكيشن حاجته رخيصة لكن الشحن لأمريكا بس. ومن هنا كان لازم نتصرف

اخى العزيز د التهامى

اسجل اعجابى بك وبكتاباتك وارجو منك توضيح بعض الامور لى من فضلك

انا منتظر الكشف الطبى وانا مسجل هنا عنوان اسمه زراعيين كيميائيين فى كيبيك ياريت نتشرف بدخولك فيه

اول: انا عرفت ان القطاع الفرنسى ممكن اسجل للغة اول ماصل لمده 6 شهور مع صرف بدل دراسة ممكن تقول لى مامقدارة

هناك اعانه للاطفال مامقدارها بالضبط

واخيرا وليس باخر بارك الله فيك واتم نعمته عليك بالصحة والعافية

[hosiny]

عجبني ردك علي الدكتور في الموضوع التاني ووالله حسيت نفس الاحساس بتاعك بردو اصل انا مش باسأل في حاجة الا لما اكون قتلتها بحثا او مش واضحة بس

انما سيستم المدرس الخصوصي و المعلومة اللي تجيلك لتحت رجليك وانت تاخدها او لا ده انا بكرهه

وروق كده و اشجينا كمان و كمان

[samehelassad]

اية ياعم الكلام الجميل دة. هو انت تهدى تهدى وتطلع لنا بقنبلة.

شوفت ياعم حسيني مش قلتلك الراجل دة غويط. لا تقولي اتصالات ولا هندسة ولاحاجة الراجل طلع مخابرات.

طب سيادتك هو الجهاز دة امريكا وكندا بس ولا اي لونج ديستانس. ول كدة نجيبة ونتكلم بية واجنا في قطر. ولا اية؟

[moheltohamy]

السلام عليكم

معلش يا تهامى ع التاخير بس انت عارف الرحلة طويلة اوى من القاهرة الى جوهانسبرج ثم موزمبيق

الحمد لله يا دكتره انا مش رستاباوت ولا حاجه ( ده كلام يا راجل )

انا شغال فى سلطنة عمان فى شركة سيرفز عربية بس كبيرة حبتين و دلوقتى فى احد مواقعها فى موزمبيق ( ربنا يستر وميطلعلناش اسد ياكلنا )

بالنسبة للجوهرة بقى فأنا لسه مكملتش 3 سنين خبرة فى التخصص انما كنت بفكر لما العقد يخلص ( هيخلص ابريل 2009) اطلع على بحر الشمال

انما مفيش مانع نروح البرتا دى و ان شاء الله ادور وراها

و متشكرين على ردك يا غالى و يمكن يحصل نصيب ونتقابل هناك

سيرفيس؟ هممم... الناس دي مرتباتها لوووز بصراحة wst:: بس اللي أعرفه عنهم إن نظام الشغل شهرين شغل وشهر أجازة ، وممكن لو احتاجوه في أجازته بيندهوله يطلع برضه! ما عدا واحد تبع EMEC ، لسه متجوز من شهر ، وعمل لهم قرد ولازم شهر وشهر ، ونظام هاولّع في نفسي لو ما عملتوليش كده :lol:

وعقبال بحر الشمال يا سيدي وبدلاته الأستاذة ، وربنا يسترها ويصبّرك ع اللي هتشوفه هناك :blink:

بجد روعة دوك تهامى وبالذات موضوع انك تعبى من dvd4arab انا لو مكانك فعلا كنت عملتها من فرط معاناتى من النت هنا

بس القنبلة بأة فى اللى بيقوله انت عايز لما تدوس الصفحة تفتح على طووووول؟؟؟

إنتا محتاج بقى تيجي تشوف سرعة الــ 7 ميجا بت بتاعة كندا ، مش عاوز اقول لك قبل ما بتلمس اللينك الصفحة بتتفتح! لدرجة إني ما كنتش باحب أداونلود أي حاجة من ع النت... بدل ما أنزلها عندي ع الكمبيوتر ، ماهي محطوطة ع النت. وبدل ما أدور عليها ع الهارد ديسك ، الجوجل يجيبهالي أسرع ، وتقريباً سرعة النقل مش فارقة كتير :closedeyes:

والأغاني كنت باعمل لها Play من ع الويب سايت بتاعها ، أنزلها ليه؟! باقول لك أستك منه فيه :lol:

واحشتنا يادوك. وحمدللة على السلامة احنا مستنين كلامك الجميل. وانا محصلك بكرة انشاء الله. بس انا عشان معنديش كندا فمبسوط اني نازل مصر عشان اشوف اهلي وحبايبي. ومش مشكلة التراب والزحمة. ماهي قطر يااماتراب يارطوبة. ومتعرفش تتوضى ولا تت----- من حرارة الماية الظهر.

بيتهيألي نقول حمدا لله على سلامتك يا سامح باشا... أكيد نوّرت المحروسة. وبالنسبة للماجيك جاك ، فيؤسفني إنه لأمريكا وكندا فقط. بتقدر تكلم أمريكا وكندا ببلاش ، وبيديلك نمرة هناك ف البلد اللي انتا اوزها ، والناس اللي هناك يقدروا يتصلو بيك (محلي) عليه ، وتستقبل المكالمة من أي منطقة في العالم. ولو ما رديتش ، هيستقبلها الفويس ميل ، وتعمل تشيك عليها بعدين.

وقطر مين يا عم الحاج بأه؟! دي خلاص ، فاضل لك زلطة وتطلع بره الميدل إيست خالص ، وربنا يتوب عليك م الهم اللي هنا ده! :unsure:

السلام عليكم ورحمة الله انا بشكرك جدااااااااااااااااااااااا يا دكتور تهامى على موضوعك الهايل اوى وبلهجتى الصعيدى قوى واعترف امام الجميع انى من الزوارللموقع واى موقع للهجره لكندا او استراليا او نيوزيلندا عربى اوانجليزى لكن بسبب حضرتك واسلوبك فى الكتابة خلتنى اول مره ابقى عضوه فى منتدى والحاجه التانيه ان كلكم مع بعض

سواء اللى فى كندا اوبيحلم يروح كندا بتساعدوا بعض فى الله ان شاء الله يجعلوا فى ميزان حسناتكو ارجوكوم اعذرونى لانى اول مره ادخل فى منتدى يعنى لسه kg1 وباسجل تحياتى لك ولمدام هند ولجميع المشاركين فى الحوار الجميل ده وغيره من الموضوعات وكمان لصديقك الاستاذ احمد

أخت الرحالة الكبير ، وسليلة عائلات بطوط في التوبيك بتاعي؟! وكمان أول مشاركة ليكي في موضوعي ده؟! بجد أخجلتم تواضعنا :wub:

ما تتخيليش أد إيه شيئ يسعدني لما تكون أول مشاركة ليكي - مش بس في المحاورات - في المنتديات عموماً عندي... دانا ليّا حق أتغر بجد والله :blush2:

عموماً يا ستي ربنا يخليكي ، ومتشكرين على رفع روحنا المعنوية ده!

تسجيل متابعة واعجاب وانبهار

ما شاء الله ولا قوة الا بالله

شكراً يا باشمهندسة سمية ، وعلى الله تفتكرينا بشوية طبيخ من إيديكي لما تنوري كندا ، بدل أكل الشيفات الهنود اللي بوّظ بطننا في البريمة ، والنودلز اللي حمّضت بطننا ف الأجازة! :blink:

ما أكّدتيليش برضه... مش انتي مهندسة برضه؟ ولا انا جبت المعلومة دي منين؟!

عزيزي حسيني...

مشكلتي إني مش باعرف امسك لساني في أحيان كتيرة ، وخصوصاً لو حاسس بجو أُلفة. بس خلاص بقى ، حصل خير!

وبالنسبة للتليفزيون هاتكلم عنه كمان شوية ... بس نكمل كلام الأول عن الاتصالات.

تم تعديل 6 أغسطس 2008 بواسطة moheltohamy

[moheltohamy]

طبعاً جبنا خطين موبايل ليا ولهند (بيسموه Cell Phone أو Wireless ، كلمة موبايل دي ما بنسمعهاش خالص) ؛ دفعنا تأمين 50 دولار لكل خط وبتاخدهم بعد 6 شهور (بس عشان احنا جُداد ع البلد ؛ غير كده المفروض ما بتدفعش ولا مليم ؛ أصدي ولا سنت!) خدنا إيه تاني بأه؟ خدنا موبايلين سوني إريكسون ومعاهم جهاز آي پود پلاير (بيتوصل بالآي پود ميوزيك بلاير ، أو بالكمبيوتر أو التليفزيون مثلاً ، وفيه راديو وساعة ومنبّه ، وتمنه كان 180 دولار ساعتها) وكل ده ببلاش! ولمدة 3 شهور المكالمات المحلية ببلاش! ما احنا ماضيين كونتراكت 3 سنين مع روچرز ؛ يبئى المفروض لينا مميزات! الحاجة الوحيدة اللي مش كويسة هيه إنو مش من حقنا نشغل خدمة الدولي ع الموبايل عشان احنا لسه جداد ف البلد ، ممكن بعد 6 شهور من التعامل المنتظم معاهم ، بعد ما يكون ليك كريديت كويس (تكون بنيت سُمعة كويسة يعني) حسب كلام الراجل ف سورس ستورز اللي اشترينا منه الموبايلات. (بس تسدَّأ إن الدولي اشتغل لوحده بعد 3 شهور؟! والــ 50 دولار التأمين رجعو برضه بعد 3 شهور) وعندك كذا پلان تختار بينهم ، وممكن تغير من پلان للتانية في أي وأت ، وبالتليفون (ودي كانت متاحة برضه للأمانة مع فودافون مصر)!

شوية ملاحظات على نظام الموبايلات هنا... فيه هنا نظامين يا ريس ؛ الأول الـــ Pay as you go وده زي الكارت عندنا ، والتاني الاشتراك الشهري اللي بيجيلك فاتورة شهرية ع البيت ، وهوه ده النظام اللي احنا اشتركنا فيه ، أساسي الفاتورة 35 دولار ، زود عليها 10 دولار عشان أنليميتيد كول ريسيفنج (ماهو اللي بيستقبل مكالمة بيدفع برضه ف المعتاد زيه زي اللي بيتصل) ، و20 دولار للكوميونيكيت فاليو پاك عشان الفويس ميل وألفين وخُمسُميت رسالة قصيرة وألف رسالة مالتيميديا شهرياً ، وإظهار بيانات المتصل (الرقم والإسم ، يعني بيظهرلك ع الشاشة إسمه المسجل في شبكة الاتصالات)، وإنترنت أكسيس مفتوح (فلات ريت يعني – براوزنج وداونلود مفتوح) ، ورسالة بالأرقام اللي كلمتك وانتا مش مُتاح ، و7 دولار عشان الإنترناشيونال لونج ديستانس سيفَر (يخفَّض سعر الدقيقة الدولي مثلاً مصر من 115 سنت لـــ 29 سنت). يعني بتاع 75 دولار أساسي بخلاف مكالماتك. بس عيشة يا عم الحاج! أنا كنت باتفرج ع اليوتيوب ع الموبايل! فُجْر بأه! :unsure:

وأسعار المكالمات : الدقيقة المحلي بـــ 35 سنت (مجاناً من 9م : 8ص والويك إند سبت وحد طول اليوم)، واللونج ديستانس (خارج مدينتك ، في حالتنا تورونتو الكبرى أو الـــ GTA ؛ سواء هاميلتون اللي بينك وبينها 80 كم ، أو الولايات اللي بينك وبينها 5 تلاف كم ، أو حتى أمريكا) بـــ 30 سنت (تخيل!) والدولي زي ما قلتلك ليه الأسعار الريجيولار ، أو الأسعار المخفضة بعد إشتراكنا في باقة تخفيض أسعار الدولي (أُم 7 دولار) ، اللي وصَّلِت الدقيقة لمصر لـــ 29 سنت! ما تستغربش! هوه ده النظام هنا! :blush2:

طبعاً أنا قلتلك إننا خدنا أول 3 شهور عرض الـــ فري لوكال كولز (الأرقام المحلية في تورونتو سواء موبايل أو بيت). عاوز أقول لك إني لقيت واحدة من خدمة عملاء روچرز بتتصل بيا بعد 4 شهور من بداية اشتراكي معاهم تسألني (تحب تاخد 3 شهور كمان فري لوكال كولز؟) أولتلها يا سلام؟ أحب أوي! وقد كان يا معلم!

وفيه هنا أنواع كروت دولي بالعبيط يا ريس ، النوع اللي باستخدمه باشتريه بـــ 2.25 دولار (قيمته 2.5) بيديلك حوالي 40 دئيئة لمصر (الدئيئة وائفة عليك بـــ 5.6 سنت يعني 30 إرش) ، يعني أنا أكلمك من كندا أرخص ما مراتك تكلمك م البيت في مصر!

وبالنسبة للرومنج (خدمة التجوال الدولي) ، دي بتشتغل أوتوماتيك سعاتّك ، ومش لازم تأكتيفيتها كل مرة تيجي تغادر البلاد زي فودافون مصر! أول بس انتا ما تدخل نطاق البلد ؛ بتلائيه شبط لوحده مع أي شبكة يلائيها ، ويبعتلك رسالة ترحيب بوصولك البلد دي ، وبيئول لك الأسعار بتاعة المكالمات وخدمة العملاء بتكون مجاناً… مثلاً أول ما وصل مصر آم ضارب صحوبية مع شبكة أم نبيل مع الأسف! وخط الچوال بتاع السعودية برضه فيه نفس النظام ، وفودافون برضه نفس الحركة بس لازم تشغل الخدمة أبل ما تمشي م البلد!

وانا ف فرنسا ، أولت أبص لي بصّة على سعر التحويل ما بين الدولار الكندي واليورو. هيه النت ع الموبايل كانت سريعة بصراحة ، وكل اللي فتحته كان موقع تحويل العملة وبس على كده (يعني بتاع 200 – 300 كيلو بايت) ، ألائي روچرز الحرامي حاسبهالي ف الفاتورة بـــ 22 دولار وشوية! :closedeyes:

إكتشفت حتة صياعة عاملينها بتوع روچرز ... البهوات الأسعار اللي معلنين عنها دي بخلاف سعر المكالمة العادية! يعني سعر الدقيقة لمصر 29 سنت (+30 سنت) يعني الدقيقة بـــ 59 سنت! والمكالمات اللونج ديستانس أم 30 سنت (زود عليها 30 سنت) تبقى الدقيقة بـــ 60 سنت! والكروت اللي بتشتريها للدولي فيها أرقام لوكال لمعظم المدن الكبيرة ؛ بالإضافة لأرقام مجانية ( اللي بتبدأ بـــ800). لو اتصلت بالرقم المجاني ، بيتخصم من الدقايق اللي بيديهالك الكارت!

يبئى الخلاصة ؛ بقدر الإمكان استخدم تليفون البيت واطلب الأرقام اللوكال (مجاناً) ؛ عشان تستخدم الكروت في عمل المكالمات الدولية.

تم تعديل 6 أغسطس 2008 بواسطة moheltohamy

[لولا]

الفكرة الصايعة بقى...

ودي عرفتها قبل ما اسافر كندا من أساسه! كان واحد صاحب مصطفى ابن خالتي (نقيب ف المظلات) ، ومتجوز واحدة مصرية كندية ؛ عايشة في كالجاري (ولاية ألبيرتا). البنت مستقرة هناك (وبترجع مصر من وقت للتاني) ، وهوه بطبيعة الحال مرزوع في مصر عشان ظروف الجيش ، لغاية ما يقدم على استقالة للدواعي الطبية (تمزق في الرباط الصليبي في ركبة ، وكسر في القصبة الناحية التانية)! وقعدنا معاه قبل ما نسافر كندا بكام يوم ؛ وقعدنا ندردش معاه عن الحياة هناك. من ضمن كلامه ؛ حكالنا عن أحسن وأرخص وسيلة بيكلم بيها مراته هناك.

ده يا سيدي يبقى الماچيك چاك ، وده حاجة كده بحجم الفلاش ديسك (أكبر منه حاجة بسيطة ، بس أصغر من البتاعة بتاعت موبينيل اللي اشتريتها انتا مؤخراً) ، وبيتوصل بالكمبيوتر USB ، وطبعاً يكون الكمبيوتر واصل نت (يستحسن DSL) ، وفيه فتحة توصل فيها الچاك العادي بتاع التليفون (وعدة تليفون عادية خالص). وترفع السماعة يا ريس ، وتطلب أي رقم في كندا أو أمريكا ببلااااااش. البتاع ده اشتريته بـــ 45 دولار ، شامل اشتراك أول سنة ، وبعد كده كل سنة بـــ 20 دولار. واشتريت منه 3 ؛ واحد لماما عشان تبقى تكلمني هناك ، والتاني ليا ف السعودية عشان أبقى أكلم هند (مع إن التليفون الدولي موجود بصراحة ، ومن ابو بلاش :blush2: ) ممكن استخدمه وانا في مصر بأه ، والتالت لهند في كندا عشان المكالمات اللونج ديستانس! وشحنته على فيليپ (الـــ STC بتاعنا ع البريمة) الأمريكاني وساكن في لويزيانا (ماهو السايت ده ما بيبعتش غير لأمريكا فقط مع الأسف :unsure: ) ، وفيليپ جابهم لي معاه ع البريمة ف السعودية. تخيل... دلوقتي بقوا بيبعتوا لكندا كمان؟! لسه مكتشف الموضوع ده حالاً (5 أغسطس 2008 ، 9:30 م)! :closedeyes:

ولو ما ليكش سكة في أمريكا ممكن تعمل الحركة المجرمة اللي هند كانت عملتها أيام الخطوبة... الهانم اكتشفت حركة مجرمة مع أرامكس ، بتدفع حوالي 30 دولار (مرة واحدة ف العمر) ، وبيعملولك عنوان عليهم في أمريكا (نيو يورك تقريباً) ، وعليه عنوان إضافي على فرعهم في إنجلترا (لندن على ما أعتقد). ولو حبيت تشتري حاجة من ع النت – م المواقع الكتيييييير اللي مش بتبيع غير لأمريكا مثلاً.

هتكتب العنوان بتاعك ع العنوان بتاعهم ، وهمه هينقلوهولك من فرعهم في أمريكا لفرعهم في مصر ، وطبعاً بتحاسبهم على تكلفة الشحن من هناك لباب بيتك.

طبعاً الهانم عملت الكلام ده عشان مزاجها قال لها تشتري اطقم السرير من ع النت ، أسعار أقل ، وجودة أعلى ، واللي اشتريناه بـــ 80 ولاّ 120 دولار شفناه في كاربت سيتي بـــ 1700 جنيه ، وكان الاختيار محدود ، وذوقه بلدي بصراحة! وكانت المشكلة إن أمازون حاجته غاليه بس بيشحن لمصر ، ودومستيكيشن حاجته رخيصة لكن الشحن لأمريكا بس. ومن هنا كان لازم نتصرف

والله مانا عارفه اقولك ايه ياتوهامى يا خويا

حرااااااااااااااااااااااااااااااااااااااااااااام عليك اللى بتعمله فينا دوت

ايه يابنى كل الجمال دا...لأ لأ بجد بجد بجد استاذ وابو الأستذه كمان

يابنى دا انت مفروض تاخد رسوم على المعلومات اللى مش طبيعيه دى.

اما موضوع (ارامكس) _ هااااااااااااااااااااايله بجد مرات حضرتك،انا خلاص اعتمدت الفكره

وفى طريقها للتنفيذ.

توهامى باشا، كل يوم متابعتنا للموضوع بتزيد ،لما الواحد خلالالالالالالالالالالالاص

بقى مدمن متابعه :blink:

[Virus]

عزيزي د. تهامي..

يا محاسن الصدف..

أولاً:

ميت غمر... :unsure: با مراحب يا مراحب بلدي وبلد أبويه وأجدادي اللي بعزها جداً مع إني معشتش فيها كتير (احنا عيلة مدمنة غربة)

ثانياً:

سنتافي 92..الشهيرة بكنتاكي 92 قبل ماتقلب بريسيجن...الله الله..فين أيامك يا 92 وأيام الكبدة الاسكندراني والسمك والضاني والكنافة بالقشطة (معلش الطفاسة تحكم)..وفين أيام الكرو اللي كان آخر الكروهات المحترمين..والتمبوشر(التولبوشر) اسماعيل (أظن اسمه كده) اللي كان عامل فيها مدير مراجيح مولد النبي ومدعي الهندسة وهو تقريبا معهد فني وبديله اللي كان راجل محترم وطيب بس مش فاكر اسمه الصراحة

أكيد بتقول مين الجاسوس ده..بص يا سيدي..عارف طبعا الشخصية الرخمة اللتي يطلق عليها (الكومباني مان) وهو لمن لا يعرف ممثل الشركة اللي مأجرة البريمة وله شنة على البريمة لأنه شركته اللي بتدفع..

قلتلي إنك عارفه..أنا الحمد لله مش الشخصية الرخمة دي. :closedeyes: :blush2: في بقى شخصية أرخم اسمها (الوتنس .Witness) وهو واحد بييجي من مكتب مصر يحضر جوب يخلع وعادة بيتوجب معاه لأنه ضيف وعشان الكومباني مان يستعرض...

أهو أنا بقى واحد من دول...وأكيد طبعاً مشفتكش خالص (بفرض إنك كنت على البريمة لما كانت مع عجيبة) لأن سعادتك بتكون قاعد في الكامب وآخرك الميس واحنا قاعدين في السايت وغالباً بنكسل نروح الميس وبنطلب الأكل يا إما رخامة على الكامبوس يا إما عشان طالبين أكل غير اللي ماشي!!

حد يسيب الناس الحلوة دي ويروح السعودية برضو...يلا مش مشكلة طالما كده كده على كندا في الآخر

ثالثاً والأهم:

الحمد لله ربنا اختارني (أنا بعتيرها نعمة كبيرة) ألهمني أقدم على الهجرة لكن لسه قدامي شوية لأني يدوبك مقدم من سنتين بس..لكن معلش بكرة تفرج ونشوفك في كندا إن شاء الله

بس كفاية كده..دي لسه يادوب أول مشاركة في المنتدى..وعلى فكرة أحييك على إنك اللي خليتني ألبس الشورت وأنزل المعب (أشارك يعني) مع إني بقالي شهور بتفرج بس على المنتدى الجميل ده

تم تعديل 6 أغسطس 2008 بواسطة Virus

[hosiny]

الواحد مايستهنش بيك شكلك خط من خطوط كندا ......ايه ده يا عم؟؟؟؟

انت بتجيب المعلومات الحلوة دي منين؟؟

الواحد بالمعلومات دي هيروح يصيع عليهم في كندا و كأنوا كنداوي قديم

بس اسعار المكالمات هناك و الاشتراكات تعتبر غالية مقارنة بالسعودية و مصر (بالنسبة للداخلي قصدي)

ياتري تسمع عن ال pfingo ؟؟؟

http://www.pfingo.com/pf/portal/control/mainflash

ده برنامج استاذ بينزل علي الموبيل و تتكلم منه ببلاش للي منزل البرنامج ده علي الموبيل بتاعه(من موبيل لموبيل) و تعمل كمان منه مكالمات رخيصة جدا لامريكا و كندا (من البرنامج اللي علي الموبيل لاي تليفون ارضي او موبيل) جربه و قولي

تم تعديل 6 أغسطس 2008 بواسطة hosiny

[Balooshy]

الواحد مايستهنش بيك شكلك خط من خطوط كندا ......ايه ده يا عم؟؟؟؟

انت بتجيب المعلومات الحلوة دي منين؟؟

الواحد بالمعلومات دي هيروح يصيع عليهم في كندا و كأنوا كنداوي قديم

بس اسعار المكالمات هناك و الاشتراكات تعتبر غالية مقارنة بالسعودية و مصر (بالنسبة للداخلي قصدي)

ياتري تسمع عن ال pfingo ؟؟؟

http://www.pfingo.com/pf/portal/control/mainflash

ده برنامج استاذ بينزل علي الموبيل و تتكلم منه ببلاش للي منزل البرنامج ده علي الموبيل بتاعه(من موبيل لموبيل) و تعمل كمان منه مكالمات رخيصة جدا لامريكا و كندا (من البرنامج اللي علي الموبيل لاي تليفون ارضي او موبيل) جربه و قولي

البرنامج ده للأسف فيه كل الدول ما عدا مصر

[hosiny]

موجودة يا بيه بس في قارة افريقيا مش الشرق الاوسط

[Balooshy]

موجودة يا بيه بس في قارة افريقيا مش الشرق الاوسط

طيب ممكن تشرح ازاي ؟؟

لأني لما حاولت اعمل sign up كان لازم ادخل كود البلد .. و مالقتش مصر في القايمه اللي بنختار منها .

[moheltohamy]

اخى العزيز د التهامى

اسجل اعجابى بك وبكتاباتك وارجو منك توضيح بعض الامور لى من فضلك

انا منتظر الكشف الطبى وانا مسجل هنا عنوان اسمه زراعيين كيميائيين فى كيبيك ياريت نتشرف بدخولك فيه

اول: انا عرفت ان القطاع الفرنسى ممكن اسجل للغة اول ماصل لمده 6 شهور مع صرف بدل دراسة ممكن تقول لى مامقدارة

هناك اعانه للاطفال مامقدارها بالضبط

واخيرا وليس باخر بارك الله فيك واتم نعمته عليك بالصحة والعافية

د. أيمن كامل...

هوه إخص عليا بصراحة... بس أنا قلت أقرا التوبيك بتاعك الأول ، وكالمعتاد تهت من توبيك لتوبيك!

وبكل أسف أنا لا عندي فكرة عن المجال الكيميائي ولا الزراعي (يمكن د. قناوي يتفوق عليا بمعرفته لتكنيك تنبيت الفول النابت)!

ومن منطلق إني لا فكرت ولا هافكر ف الكيبيك ، ولا باحب الكيبك أصلاً ، فبرضه ما عنديش فكرة عن كورسات الفرنساوي هناك ، ولا بدل الدراسة بالطبع!

ومن منطلق إنو مفيش عندي أطفال - وأحمد ربنا ع النعمة - فلم أهتم بمعرفة موقف الأطفال أو الإعانة المخصصة ليهم! يمكن إيهاب سالم كان اتكلم عليها قبل كده وقال إنها في حدود 250 دولار للطفل. بس يمكن الوضع يكون مختلف شوية في الكيبيك!

أعذرني ، بس مش هاقدر أفيدك... كل أسئلتك خارج مجال اهتمامي تماماً!

أول مرة أحس إني يوزليس أوي كده :unsure:

[أحمدأمين]

بجد موضوع جامد اوي وخلتني بمزاجي او غصب عني اقعد علي الكرسي من 2 لحد دلوقتي اللي هوه 5.40 ااقري موضوعك بجد جامد بجانب انك دكتور تنفع كمان نؤلف

مرسي علي المعلومات الجميله دي ومستنيين الحلقه الجايه وربنا يكون في عون ديبو :unsure:

[Bustami]

صباح الخير يا جماعة ,,,,

انا مقدم على الهجر من شهر 8 2007 في مكتب هجرة في الكويت واستلمت الفايل نمبر في 13/9/2007 ,,, انا عندي ماجستير وزوجتي عندها ماجستير وعندي 10 سنين خبرة وطفلين ,,, فكان مطلوب مني اختبار الايلتس 5 , 5 , 5 , 5 في كل قسم منه واليوم استلمت النتيجة والحمد لله جبت 5 , 6 , 6.5 , 6.5 ,,, الحقيقة ( writing + speaking ) من السهل انك توصل ل 7 لكن القراءة والاستماع صعب توصل 7 ,,,,,,,

على العموم انا عندي سؤال ,,,,,,,, ماهي المبالغ التي يمكن الحصول عليها من الحكومة كمساعدة ومتى ممكن الحصول عليها ولكم سنة

شكرا

[الباشدكتور]

سلامي لكل اهل المنتدي

طالب نصيحتكم وخصوصا د/ التهامي و مهندس ايهاب اللي يعلم الله انهم زي اخواتي الكبار

ياريت يفيدوني بخبرتكم في الموضوع بتاعي

http://www.egyptiantalks.org/invb/index.ph...mp;#entry382185

[moheltohamy]

والتليفون بتاع البيت ركبناه ، وبندفع له 30 دولار شهرياً ، وطبعاً المكالمات المحلية مجاناً (موبايل أو بيت) ، وليك 500 دقيقة مجاناً شهرياً لونج ديستانس (يعني خارج تورونتو الكبرى والولايات الكندية التانية (خارج أونتاريو) وأمريكا). وليك خاصيتين مجانا (إخترنا احنا البريد الصوتي وإظهار رقم وإسم المتصل). ولو هتتكلم لونج ديستانس لتليفون بيت أو موبايل تبع روچرز أو فايدو (شركة إتصالات تانية إندمجت مع روچرز) ، هتبئى المكالمة ببلاش! angl::

ومن تليفون البيت تقدر تتصل دولي ، من غير ما تقدم طلب ، ولا تدفع فلوس تأمين في السنترال (زي ما المصرية للإتصالات وفودافون بيعملوا) ، ولا الهجص ده كله! :lol:

المهم ، الدقيقة لمصر من البيت هتكلفك 1.75 دولار ، أو 29 سنت لو شغلت خدمة All World Plan (إشتراكها بيكلفك دولار واحد ف الشهر). خلّي بالك ، الـــ 29 سنت دول ما بيتضافش عليهم أي حاجة تانية (مش زي صياعة الموبايل)!

[gadolly]

يا عم تهامي لما تستني شوية و ينزل اسمك في دليل التليفونات حتلاقي كل شوية شركات تليفون دولي تكلمك و تديك عروض من غير اي مصاريف عدا المكالمة و من غير اشتراك او عقود. بس بالتليفون بتدخل الخدمة

لو مستعجل فيه شركة اسمها startec حتلاقيها علي النت , دي بتديك الدقيقة 13 سنت لمصر موبايل و ارضي, انا مشترك معاها و الخدمة ممتازة, كمان كم شهر حتلاقي شركة منافسة و تديك اسعار احسن فممكن تغير ماهو مفيش مصاريف و لا اشتراك و لا عقد

اه انا نسيت, شكرا علي سرد الاحداث, حقيقي الواحد بيستمتع, بس خد بالك انا لو حصلي حاجة في امتحان الدكتوراه ذنبي في رقبتكم عشان طول اليوم قاعد اتابع المنتدي و قصصك الشيقة. و ان شاء الله ممكن نتقابل و نتعرف يوم مع انك من الناحية الانجلوفون و انت عارف طبعا يا باشا ان الناحية الفرانكوفون انفين و طالعين فيها اوي و حاسيين اننا احسن ناس في كندا و لنا لغتنا و عاداتنا و حضارتنا

[moheltohamy]

يا باشا وليه أصبر؟ حصلت...

واحدة بتتصل على تليفون البيت ، وبتقوللي أشترك معاهم وأدخل تليفون بيت تبعهم ، وهاستفيد من العروض بتاعتهم (تخفيض على اشتراك السنة الأولى). قلتلها إني بالفعل مشترك (أمال هيه بتكلمني على إيه؟!) ؛ ومعموللي تخفيض! واللذيذ بأه لما سألتها إنتو شركة إيه؟!

قالتلي Rogers !!!!!!!!!!!!!!!!!! angl:: صباح الطراوة!

وكنت قريت إعلانات ع الصابواي بتقول إتصل بنمرة كذا ، واحنا نوصّلك دولي ، ومن غير اشتراك! بس انا اللي ما أخدتش الموضوع بجدية!

ربنا يخلليلنا الكروت :sad:

وبلاش تفكرني بالكيبيكواه الله يخليك! اصبر ... سيرتهم جاية ، بس أدام شوية :lol:

وعجبتني أوي "حاسيين اننا احسن ناس في كندا و لنا لغتنا و عاداتنا و حضارتنا"! خلاص بقت ــنا؟!

يا باشا ؛ كلها شويتين وترجع تحلف بكندا ، وتقول : "كانت لنا أيام!" وتعمل كداهوت :ninja: (زي د. قناوي)

وتبعت تترجانا (أنا ود. الشامي) نجيبلك معانا إزازة فيها شوية تلج من كندا ؛ ومن المقاطعات الأنجلوفون الوحشة اللي بتتبطر عليها دي (دوت على رأي لولا) :sad:

تم تعديل 8 أغسطس 2008 بواسطة moheltohamy

[gadolly]

كل حاجة مقبولة الا التلج ربنا يكرمك

انا السنة اللي فاتت شفت حبة ايام محصلتش, انا المشكلة اني في مدينة كيبك مش في موريال و انت عارف ان الناس في موريال بيشتكوا من سقعة و تلج مدينة كيبك.

التلج وصل السنة دي 4 و نص متر و دة اكتر كمية تلج في تاريخ كيبك كلها ينزل و كانت علي نصيبي, يا عم النهاردة الحرارة 15 و مبطلتش مطر و لابسين جاكتات بتاعة الشتاء تاني, حقولك حاجة غريبة شهر 7 السنة اللي فاتت مرة مطرت تلج و متسألش ازاي, و طبعا مش حكلمك علي الرياح اللي بتوصل 100 كيلو و توقع الشجر و البيوت. تحس هنا انك عايش تحت قصف جوي طول السنة, نفسي اشوف صيف مرة واحدة

بالنسبة للتليفون الدولي دي شركات بتديك الخدمة علي تليفونك, يعني مش بتغير حاجة خالص, هم بس بيغيروا خدمة الدولي بتاعك عليهم من غير اي مصاريف, و الاسعار زي ما قلت لك