كندا التي رأيتها :)

[znaty]

بقي انا برده اللي مغلبك ؟؟؟ :blink:

سريعا كدة علشان مانخشش في دائرة مغلقة ونتعب في قلب بعض

1- الراجل ما قالش كده يا مفتري و ما حدش قال إنه بيكره مصر ...مين قالها ...كنا مصريين ده قدر محتوم و مش حيتغير و اعتزازنا بمصريتنا ضرورة علشان نعرف نعيش ...بس هو النقد عدم وطنية ...بلاش ديه الهجرة خيانة للوطن ....لو قلت آه حاحترمك جدا يا Z بس تبقى الحكاية خلصت خلاص

اعتزازنا بمصريتنا لو ضرورة زي ما انت بتقول يبقي ماينفعش نقول ( بلد بنحس بالفخر لما بنيجي منها ..وبلد بنحس .... الى اخره ) ومتهيالي معظم المداخلات في الموضوع دة ماتحسسش بالفخر اطلاقا

وبعدين يا هيتش ..فكرني الله يخليك ..امتي انا قلت او حتى لمحت ان الهجرة خيانة للوطن او ان النقد عدم وطنية ؟؟؟؟؟؟؟؟ فين بالله عليك؟؟

في الهجرة قلت مليار مرة انها في الظروف الحالية حاجة ضرورية بدليل ان انا كمان مهاجر

وقلت ان حتى فكرة الحياة في كندا طول عمرك برده صح بس بشرط ماتقطعش روابطك ببلدك وخللي ولادك مرتبطين ببلدهم علشان تفضل هناك طول العمر مصري ومحتفظ بهويتك

وبعدين هو انت بتوقعني في تو والا ايه ؟؟ الراجل لو كان بيكره مصر ماكانش رد اخر رد ليه بالشكل دة ..انا بس بالفت انتباهه ايه اللي ممكن يحصل من الكلام دة ..

فيه فرق بين النقد للبحث عن حلول وبين تقليب مشاعر الناس على بلدهم وهيا موش ناقصة خلق شعور بعدم الانتماء اكتر من كدة ..ممكن تهامي اصلا مايكونش دة قصده اطلاقا ..بس دة اللي ممكن يتفهم من كلامة

2- علي فكرة الايتين اللي في دعائك موجهين لبني اسرائيل مرة أيام سيدنا موسي و كانوا زهقوا من المن و السلوي و نفسهم في بقوليات و قثاء و عدس و بصل و فوم

و التانية ايام سيدنا يوسف

الحديث بقي ما بيعترفش بيه شيوخ الخليج كلهم و لا إيه يا حاج

سبت اللي مقصود من الدعاء وقعدت تشرحلي اسباب النزول وصحة الحديث

ياخي ادعي بس ومالكش دعوة ؟؟؟

كدة جدل من غير فايدة يا صاحبي..وبعدين هو ابن العثمييينيين اللي قال كدة ؟

متفق معاك ..المنتدي منبر من منابر الاعلام و كل كلمة محسوبة عليك و حتتحاسب عليها .....نقول الحق بقي و لا نقلب زي التيلفزيون المصري و الجرايد القومية و ننزل مديح و تبجيل .....فيه كلمة اتقالت مش حقيقية ...فيه نقد اتقال فيه تجني ....حد كدب و لا الف قصة علشان ينقد و لا يشتكي ....يعني نعمل إيه طيب

مكسوف علشان تهامي قال علي الفلاح اللي بيقضي حاجته في الترعة ....لو شفت منظر الناس اللي بيموتوا كل يوم من نزيف دوالي المريء بسبب البلهارسيا و إنت مش عارف تعملهم حاجة ما كنتش قلت حاجة

يا سيدي حد قال احنا جرنان الاهرام wst::

انا باقولك فيه فرق بين الدعوة للاصلاحوالحزن على حال البلد .. وبين الدعوه للخلعان والتبرؤ من مصر والمصريين ..والكلام واضح يا هيتش موش عاوز لعب بالالفاظ

نقطة البهارسيا دي انا كنت باهزر موش اكتر بس الواضح انها اتفهمت غلط

غريب أمرك يا Z لسه قايلين الكلمة مسئولية و أمانة و حنتحاسب عليها ...بقي صورتنا قدام العرب هي اللي فارقة .....احنا مالنا و مالهم في الزمن ده كل حاجة معروفة و ما فيش حاجة بتستخبي خلاص ...ما يقولوا اللي هما عايزين يقولوه انهي الاهم صورتنا قدام الناس و لا صورتنا قدام نفسينا

احنا في عصر اضمحلال يا Z مش حينفع معاه شعارات و خطب ....لا تحاول تصلح لا تسيب الدنيا و تمشي انما تغطية الجروح المتقيحة المسرطنة مش حيفيد حد

متفق معاك نسبيا ..بس انا كان قصدي ..هو انت عمرك شفت حد منهم بيشتم في بلده رغم كل شيئ؟ للمرة التانية ...النقد لمحاولة الاصلاح حاجة ..والنقد للتبرؤ منها حاجة تانية

الكلام بتاع دفء الشرق و برودة الغرب ده كلام هجص في هجص لا الشرق كله دفء و مودة و لا الغرب برود و جفاء ...فيه ده و فيه ده ...هنا و هنا

اسمحلي بأه ..دة رايك الشخصي ..ماهوش قران يعني

وانا سمعت من ناس كتير عكس الكلام دة ..ولسة حتى ماكبروش في السن والله

جايز انت صحتك مساعداك ..دة موضوع تاني

كلام جميل ...قولتلي بقي فاروق الباز فين دلوقتي ...طب و لما حاول يعمل حاجة في مصر إيه اللي حصل

سيبت معني الكلام وبسالني عن الباز علشان اقولك طفش من البلد

طب تقدر تقوللي فين مجدي يعقوب الوقتي ؟؟

استاذك دة صح ؟؟

كان في مصر بلده ..بيعلم صغار الاطباء في حملة للنهوض بمستوي علاج امراض القلب في مصر

وعامل مؤسسة مجدي يعقوب اشهر من نار على علم طبعا

وكل كام شهر يرجع مصر يعمل عشرات العمليات المجانية لولاد بلده

مصري بجد

والباز بالمناسبة عمره مانساش بلدة وهو هناك ..رجع ميت مره علشان يعمل فيها مشروعات بس لا حياة لمن تاندي طبعا

بس هو برده مابطلش ينادي

ويهاتي

هايفضل لغاية ما يموت

علشان مصري بجد

برضه كلام جميل ما أقدرش أعلق عليه انما سؤال ...كون الناس علي دين حاكمهم ديه غلطة مين

يالا أرجع صلي ركعتين تاني و ما تنساش الدعا

موش غلطة حد ..اه ..احنا كدة للاسف حانعمل ايه يعني ؟؟

برده بحبهم ..احسن مايكون طبعهم مثلا الخيانة زي س من شعوب المنطقة من غير ما اذكر حد لحد يزعل مني

ادعيلك ..يا خرابيييي عالدعا اللي هادعيهولك يا هيتش ..خد من قلبي وصر :P

احسنلك تطلب اللجوء السياسي لمسجد

باهزر يا هيتش ..مهما اختلفنا احنا برده اصحاب

والاختلاف في البتنجان لا يفسد لاي طبخة قضية يعني

ولينا لقاء في كندا قريب هايبقي مذبحة non:: الدم هايبقي للركب ..اصلي هاطلب ستيك لbloody :lol:

[znaty]

باشمهندس زناتى

هل انت صدمت فى كندا ولا الواقع اللى شوفته بعد زيارتك لها كان مفاجىء بالنسبه لك ولا انت كنت عارف ولكن عيوبها كانت لا تعنيك لأنها لن تؤثر على هدفك .

كلنا بنحب مصر وفى نفس الوقت نسعى الى تحسين الاوضاع وتحقيق الطموح والاهداف

لكن عندى إحساس ان انطباعاتك بعد الاندنج انطابعات شخص مصدوم او ما رأءة لا يرقى الى مستوى طموحاته

ما جعلنى اقول لك ذلك لأن اى شخص كان يرى حماس زناتى فى الايلتس وقبل اللاندنج سيندهش من انطباعاته بعدها

عفوا اذا كنت مخطأ او تدخلت فى خصوصياتك

حبيبي معلش اتاخرت عليك

كان عندي حساب رز قديم بس باخلصة مع دكتور هيتش :blink:

لا اطلاقا ..كندا ممكن تبقي مكان نجاح كبير وممكن تبقي مكان فشل كبير ..كله وامكانياته الشخصية وطبعا نصيبه

علشان التوفيق ضروري في المرحلة دي

بس النجاح عمره ماكان مضمون في مكان طبعا

وكندا محتاجة كثير من المجهود في الاول

الانتقال من الراحة والدلع للجد والشقا تاني مرة واحدة برده موش سهل يا صاحبي

دي دراسة وكاجوال وورك ولغة وانترفيوهات شغل ومالكش حد تتسند عليه هناك غير ربك طبعا ..الا اذا وقعت في ولاد بلد مستقرين هناك وعندهم شهامة ولاد البلد صح

جايز انا اتاخدت شوية من البلد في الكام يوم دول ..بس الخوف واجب..دي هجرة موش هزار

ماتقلقش

كل واحد قصة لواحده wst::

[znaty]

يا رب نشوفك كده فى كندا ... وابنك على حجرك وانت بتعلمه .... قول يا ولد ....... مصر هى امى ..... وهو يقول لك ... لا كندا

اعوذ بالله ..دة انا اموت ولا ييجي عليا اليوم دة يا اخي

دي دعوه تدعيها لاخوك؟ظ

ربنا ما يوريها لحد

[حسام يوسف]

تسجيل متابعة للحوار بين الرأيين

دكتور هشام ودكتور تهامى من جهة

وباشمهندس زناتى من جهة اخرى

[Princesse]

الف حمدلله على سلامتك يا دكتور تهامي

كان لي تعليق : مصر هتفضل طول عمرها محروسة ، يكفي ان فيها خير اجناد الارض و انها مذكورة في القرآن

العيب فينا احنا و سلوكيتنا الغلط مش في البلد

مصر زمان لما كانت الناس عندها ضمير كانت احسن البلاد

و اوعى تنسى ا دكتور تهامي انك لسة معاك البسبور المصري

يعني انت مصري رسميا سواء شئت ام ابيت

مرة تانية : نورت المحروسة wst::

الله يسلمك يا برنسيس...

أنا ما جيتش ناحية أجناد الأرض خالص دلوقتي! وحتى لو خير أجناد الأرض من غير تسليح كويّس ، هيحارب بإيه؟ بالكوع؟ non::

ثانياً... هيه مصر إيه يا برنسيس غير بأهلها؟! لو أهلها وحشين تبقى إيه قيمة مصر؟

اللي بيخنقني وخنق الدكتور هشام هوّه الفلاح البسيط اللي طيبة الدنيا فيه (زي ما ناس بتقول) ، اللي مُصِر يحرق قش الرز ، ويتحايل على القانون إنه يحرقه في عز الليل ، وطظ في التلوث ، هيه البيئة دي من بقية أهلنا؟

اللي بيسممني هوه العامل البسيط وصاحب المصنع اللي بيصرّف الكيماويات السامة في نهر النيل ، ومش فارقة معاه إن دي المياه اللي بنشربها ، وإن السموم دي مش رايحة بعيد... آخرها كلاوينا!

blink:

ساعات باحس إن اللي هنا دول crème de la crème. ولاّ يمكن يكون كل المصريين كده؟ :lol:

أنا مصري صحيح يا برنسيس... بس بجد تعبت من الحياة في مجتمع كله مصريين!

ساعات الفلاّح بيخفف تركيز الزرع عشان يعرف يستفيد بخيرات التربة ، وينمو صح.

يمكن ده حالنا... تركيزنا في حتة واحدة هيقضي عليها وعلينا؟! :blink:

استاذ تهامي

حضرتك عنيف جدا في ردك و قاسي جداا على بلدنا مصر....

دكتور تهامي مع احترامي الشديد لوالد و والدة حضرتك بس مين الي صرف عليك لحد ما بقيت دكتور قد الدنيا ...مش المدارس و الجامعات ببلاش عندنا برضه...عارفة ان حضرتك هتقول ان تعليمنا غير معترف بيه في العالم كله و ان الشهادات بتعتنا مجرد حبر على ورق...ولكن...مش بشهادة بكلريوس طب المنصورة حضرتك قدرت تسافر الي السعودية و منها توفرت لك الاسباب المادية للهجرة؟

سيدي انا كنت مدارس لغات طول عمري، هي بس مرحلة الجامعة الي الدولة صرفت علي فيها، ومع ذلك حاسة ان البلد دي ليها دين عليا انا مش عارفة اوفيه ازاي.

البلد دي هي الي علميتك يا دكتور، و الفلاح الي بيعمل pipi في الترعة هو الي اكلنا من زرعه طول عمرنا، و اتربينا عليه كلنا

الفلاح دا هو الي بنى حضارة مصر، هو اكيد مش عنده وعى و جاهل بخطر الي بيعمله، بس احنا كمتعلمين لازم يكون لينا دور نشرح للانسان البيسط دا الغلط و الصح.

انا معاك ان المصريين بقت فيهم عيوب كتيرة ، لكن نفس المصري الي بيرتكب مخالفات المرور و الي بيرمي الزبالة في الشوارع هو نفس المصري الي لما يسافر برة بيحافظ على القوانين و بيحافظ على النظافة

يا تري ليه؟ ليه بنكره بلدنا اوي كدة؟ بنوسخها و ندمرها و تروح نعمر و ننظف بلاد تانية؟

العيب فينا، احنا كارهين نفسنا و مش راضين عنها علشان كدة بنطلع كل عقدنا على البلد..

اذكر مرة موقف مع صديق للعائلة كان يسوق سيارته و كنت معه ، هذا الصديق مهاجر ، و في وسط الطريق القي هذا الصديق بعلبة بيبسي كانز في وسط الطريق السريع، ساعتها سالته : لو حضرتك كنت في كندا او امريكا كنت هتعمل كدة؟ الاجابة طبعا كانت لا طبعا، اصل البلد كدة كدة وسخة جت على العلبة بتاعتي؟

هذا الصديق في نظري زيه زي الفلاح الي بيعمل pipi في الترعة مع الفارق ان هذا الصديق متعلم تعليم عالي فكلاهما يضر البلد (الفلاح يسبب بلهريسيا و التاني يسبب تلوث بيئي و بصري)

سيدي العزيز، المصري طول عمره مخلص، امين ، شجاع، جدع، غيور على دينه و بلده، المصري طول عمره متسامح المشكلة ان فيه عوامل خاريجية و داخليه عاوزة تهد البلد دي.

النظام السياسي هو اساس الفساد، الظلم و المحسوبية، و الغش و الديكتاتورية هم الي افسدوا اخلاق المصريين.

النظام الحالي عاوزنا جهلة، عاوز العقول الي بتفكر تهاجر علشان يقدر يتحكم فينا.

اسمعوا الاغاني الشعبية كلها بتدور على المخدرات و كلمات وحشة، لمصلحة من اننا نبقي مغيبين عن الوعي.

دكتور تهامي، المصريين ميتزعلش منهم ، يتزعل عليهم.

والله العظيم اعرف اصدقاء اجانب كتير تركوا اوروبا و جاءوا يعشون في مصر، مرة سالت واحدة بيلجيكية انتي ليه سيبتي بلجيكا و جاية تعيشي هنا؟ الست نظرت لي بدهشة wst:: و قالت/ انتي مش عارفة قيمة بلدك، هنا في شمس، في جيران يسالوا عنك، فيه مودة...الست دي ليها ابن في بلجيكا بس هو له حياته و مش بيسال عنها...

بدل ما نشتم في البلد لازم يكون لينا دور اننا نغيرها، كل واحد يبدأ بنفسه

لازم نبطل سلبية و الخنوع و المشي جنب الحيط و ثقافة يلا نفسي.

دكتور تهامي، المصريين ميتزعلش منهم لكن يتزعل عليهم.

حضرتك و غيرك اخترت الهجرة علشان المستقبل هناك احسن و معاك حق، بس شئ بسيط اطلبه منك، مش لازم تكره الناس الي مش قادرة تهاجر في عيشتها، و تفضل تنقد و تقلب الدنيا ضلمة، و احب اكد لك ان والله العظيم اننا كمصريين عايشين في البلد عارفين عيوب بلدنا كويس و عارفين وجهة نظر حضرتك و بعض اخوة الافاضل الي شايفين ان العيشة في المهجر بمبي على رأي الست سعاد حسني

اسفة اني طولت، بس موضوع مصر دا بيسبب ليا ارتكريا استحمل بقي.. انت الي جبته لنفسك، وشكرا يا دكتور على سعة صدرك :P

تم تعديل 4 يناير 2010 بواسطة Princesse

[znaty]

سخنها يا دكتور حسام سخنها :blink:

تعليق صغير كاتم على نفسي من زمان بس يا اختي برنسيس

اكذوبة ان شهادتنا غير معترف بيها في العالم دي

ميييييييييين اللي قالكم كدة بس ؟؟

علشان بيطلبوا معادلة علشان تشتغل وتاخد رخصة مزاولة مهنة ؟؟

بقي يعترفوا بيها وانا باقدم للهجرة وبعدين اروح هناك يقولي اعمل معادلة ؟؟دة منطق؟؟

عموما لو ماكنتش معترف بيها زي مابتقولوا ماكنوش اصلا خلوك تعمل معادلة..كان قالك ادرس من جديد

لكن انا عملت تقييم لشهادتي من canadian council of professional engineers

وجاتلي الشهادة انك حاصل على ما يعادل بكاوريوس علوم قسم هندسة مدنية والبرنامج يشبه مثيله في كندا

ولما باقدم على المعادلة بقوللي عندك مادتين تدرسهم ..هو دة ماسموش اعتراف ؟؟لا اعتراف بس عايز يكمل حاجات احنا موش مهتمين بيها في مصر علشان موش شغالة

زي مثلا خواص البناء بالخشب عندنا وزي تاثير الكحول على الجنين في الطب

لو كان موش معترف بيها اصلا ماكنش قالك اعمل معادلة ..كان قالك ادرس تاني

اسئلوا م ياسر اللي مقدمين من نيجيريا بيعملوا معاهم ايه ؟؟ رفض مطلق او تدرس من جديد

لو ماكانوش معترفين بشهادتنا ماكانش المعيدين عندنا بامتحان ايلتس وشوية كلام فاضي بياخدوا دكتوراه من هناك لا وايه كمان ..جامعه ويست اونتاريو كل استاف الدكاترة مصريين خريجين عين شمس

كان قاله لا ..ازاي اديك دكتوراه وانا موش معترف بالبكالوريوس اساسا

انا عندي بامتحن في مادتين او تلاتة

غيري من الفلبين والا غيره بيلبسوه من 10 الى 16 مادة

يبقي معترف والا موش معترف يا عالم ؟؟؟

[znaty]

دكتور حسام اقسم بالله باهزر ماتفهمنيش غلط

انا باكتبها وانا باضحك والله wst::

انا فاهم انك مستمتع بالحوار ووجهات النظر لا اكثر والله

خد الوردة دي بقة :blink:

[MaYousof]

اللي بيخنقني وخنق الدكتور هشام هوّه الفلاح البسيط اللي طيبة الدنيا فيه (زي ما ناس بتقول) ، اللي مُصِر يحرق قش الرز ، ويتحايل على القانون إنه يحرقه في عز الليل ، وطظ في التلوث ، هيه البيئة دي من بقية أهلنا؟

اللي بيسممني هوه العامل البسيط وصاحب المصنع اللي بيصرّف الكيماويات السامة في نهر النيل ، ومش فارقة معاه إن دي المياه اللي بنشربها ، وإن السموم دي مش رايحة بعيد... آخرها كلاوينا!

اللي بيرمي مخلفاته والحيوانات الميتة في النيل همّه البسطاء في القرى ، ولا يفرق معاهم نتيجة عمايلهم دي!

اللي بيلوث النيل والترع بالبلهارسيا هوّه برضه الفلاح البسيط ، اللي بس لو عمل دوران 180 درجة ، وعمل بيبيه ع الأرض يبقى ماتت السركاريا في كام ساعة!

اللي بيخنقني بدخان سيجارته هوّه المواطن البسيط اللي ما عندوش دم ، ولازم أطلب منه يطفيها بمذلة ومسكنة عشان يتعطف عليّا ويطفيها!

اللي بيغلّس عليّا في كمين مرور (زي اللي في طريق شرم مثلاً) هوّه حتت أمين شرطة لا عنده علم ولا عقل ولا ذوق ، لكن بوظيفته بقى له سلطة عليّا!

اللي بيعطل مصالحي الحكومية أو في المرور مثلاً هوّه مواطن مصري بسيط ، ممكن يكون ساكن جمبي مثلاً ، ولازم أشوفه بقرشين عشان آخد حقي!

اللي بيعاكس بنت ماشية في الشارع مواطن مصري بسيط مش شايف إن البنت اللي في الشارع دي أخته ولا من جنسه أصلاً ، وإلا كان ع الأقل كف أذاه عنها.

لما واحد راكب عجلة ويخبط بنت وهيه ماشية من ضهرها ، ويجري ، ومحدّش من الشارع يتحرك من مكانه! لدرجة إني أنا اتجننت وجريت وراه بالعربية ولبسته في الرصيف ، ونزلت فيه تلطيش! والناس ماشية.... عااااادي جداً! wst::

لما أتسرق والحرامي بيجري قدامي وأقول للناس اللي في الشارع حرامي يا جدعان ، والحرامي ماشي في وسطهم ، ودول عمالين يتفرجوا علينا! تقوليلي مصريين؟!

لما أشوف كليب ع اليوتيوب لمخبر زي البغل ماسك بنت من شعرها ونازل فيها ضرب لدرجة إن قلبي وجعني أوي من المنظر ، وتقرئي تعليقات إن أكيد دي شـ***** ، وتستاهل اللي يجرالها ده! هيه بقت كده؟!

لما ألاقي مصالحي وقفت بعد عذاب 3 أسابيع بسبب غباء الموظفين! وخلاص لبست في شجرة! والدنيا قفلت ومالهاش حل خلاص... تقوليلي المصريين؟

لما يكون الأساس في أي عمل أو أي حاجة إن الحاجة هتتعمل غلط ، ولازم تحتاطي عشان ما تبوظش الدنيا منك ، ولازم تقفي فوق دماغهم عشان الشغل يمشي صح... تقوليلي مصريين؟

لما يكون المتوقع إن همبكة والفهلوة هي الطبيعي في كل حياتنا ، حتى فيما يتعلّق بأرواح الناس... تقوليلي مصريين؟

لما يكون الفساد بقى هوه الديفولت يا برنسيس ، ولم يعد استثناء... هتقوليلي مصر برضه؟

مين هوّه المصري بالتحديد يا برنسيس؟ حدديهولي يمكن أكون غلطان! non::

هل هوّه أنا وانتي و د.هشام والشامي وباقي زمايلنا في المنتدى؟ في دي ما اعتقدش!

ساعات باحس إن اللي هنا دول crème de la crème. ولاّ يمكن يكون كل المصريين كده؟ :P

أنا مصري صحيح يا برنسيس... بس بجد تعبت من الحياة في مجتمع كله مصريين!

ساعات الفلاّح بيخفف تركيز الزرع عشان يعرف يستفيد بخيرات التربة ، وينمو صح.

يمكن ده حالنا... تركيزنا في حتة واحدة هيقضي عليها وعلينا؟! :blink:

تهامي باشا,

متفق معاك تماما في المداخلة دي

أنا من رأي إن مشكلة مصر الحقيقية إن معظم الـ crème de la crème مش عارفين إيه مشكلة مصر الحقيقية

كتير منهم متخيل إن حسني مبارك واللي على يمينه واللي على شماله والحبة اللي تحت منهم هم دول مشكلة مصر

كتير متخيل إن لو البرادعي مثلا مسك مصر وجاب صف ملايكة حواليه مصر دي اذ فجأةً هينصلح حالها وتبقى جنة ربنا على الأرض

إن ساعتها الفلاح البسيط, عشان البرادعي مسك البلد, ضميره هينقح عليه وهيبطل يحرق قش رز

والعامل وصاحب المصنع, عشان البرادعي مسك البلد, ضميرهم هينقح عليهم ومايصرفوش الكيماويات في النيل

والمواطن البسيط اللي معندوش دم, عشان البرادعي مسك البلد, هيحس على دمه ويبطل يدخن في وش أهلي عشان إحساسه المرهف اللي اكتسبه فجأة بعد ما الريس الجديد مسك خلاه يستشف لوحده إن عندي جيوب أنفيه مزمن جالي من أيام العصر البائد بتاع الريس المخلوع

وأمين الشرطة اللي لا عنده علم ولا عقل ولا ذوق, عشان البرادعي مسك البلد, ضميره هينقح عليه ويتخلص من ثقافة متأصلة في أغلب المجتمع بتشجع كل اللي يتمكن إنه يتحكم من صغيرنا لكبيرنا, بس ايده تطول

والموظف البسيط اللي بيشتغل في أي مصلحة ولازم تشوفه بقرشين عشان مصلحتك تمشي, عشان البرادعي مسك البلد, ضميره هينقح عليه ويتخلص من ثقافة تانية متأصلة في أغلبنا لا ترى ضررا في إن الغاية تبرر الوسيلة ولا تأخذ على يد من يشجعها

وان فجأة عشان البرادعي مسك وعمل حواليه صف ملايكة, شباب مصر هتملأهم النخوة وهيبطلوا يعاكسوا البنات, والموظفين هيبطلوا يغيبوا ويبطلوا ثقافة "على قد فلوسهم", ولما البرادعي يمسك هنبطل فهلوة وحداقة وتظبيط, وفجأة عشان البرادعي مسك الناس هتبطل تزمرلي لما أكون واقف في اشارة حمراء عشان باحترم نفسي قبل ما أكون باحترم الإشارة. طب ماهو من غير البرادعي مايمسك الناس من يومين بالضبط ماحدش زمرلي لما كنت واقف في الإشارة الحمرا بتاعت روكسي الساعة 2 بالليل وكانوا كلهم واقفين معايا, مش خشا وإنما خوف, مع إن ماكانش فيه ولا أمين ولا عسكري, كلها حسبة كام كاميرا ربت فيهم الرعب. طب ماهو لو البرادعي مسك ماهو هيضطر يعمل حاجات كتير ضد ثقافة المجتمع والمجتمع هيثور عليه. وساعتها محدش هتاكل معاه النوبل بتاعت البرادعي وهيخلعوه هو كمان. المجتمع من مصلحته قصيرة النظر إن الناس اللي ماسكة تفضل ماسكة. في واقع الأمر, الناس اللي ماسكة دي هي مراية المجتع, هي إفراز المجتمع. أنا بشوف إن الرؤية بإن الفساد في مصر مشكلته الحكومة عبارة عن تسطيح واختزال شنيع لحقيقة المشكلة

المشكلة إن الـ crème de la crème تلات تربعهم دكاترة بس شايفين الصداع على إنه مرض

لو أي حد سأل أي دكتور لسه متخرج حتى "هو الصداع مرض؟" شوفوا هيرد يقول إيه

أهي الحكومة بقى عاملة زي الصداع

ولو البرادعي مسك مش هيحتاج صف ملايكة معاه, الراجل هيحتاج صف سحرة على مشعوذين يعقدوا سحر ويرموه للناس في النيل يخلصهم من أمراض النفوس اللي جابت لنا صداع. أصل مفيش مرض من غير أعراض, ولا أنا غلطان يادكاترة؟ :lol:

[MaYousof]

بجد يا دكتور تهامى كلامك دة خلانى اكتب فى موضوعك يمكن من زمانة اوى وانا متابع المنتجى وخصوصا موضوعك بس لما لاقيت الكلام عن مصر قولت كفاية بقى ولازم اتكلم

من فنرة تقريبا فتحت موضوع يبقى انت اكيد فى مصر وحطيت صور عن اللى موجوج فى مصر وناس كتير هاجمتنى وقالت كلام مش كويس فى حقى وقالوا انى علشان طلعت برة مصر بقيت مش طايقها

انا فعلا عاوز اقول حاجة فى قلبى اوى من زمان وانا اسف اللى يزعل يزعل .. لو بايدى كنت استغنيت عن الجنسية دى بجد .. علشان كدة كلنا هنا بنحاول نشوف بلد تانية نلاقى فيها الراحة والامان والاحترام اللى مش موجود فى بلدنا ..

فعلا الناس بتتكلم عن مصر ويقولوا الحكومة هى اللى غلطانة بس لاسف يا جماعه زىما تهامى قال العيب مش بس فى الحطومة العيب من اصغر موظف لاكبر موظف فيها

للاسف فعلا الواحد مننا لما بنزل اجازة مصر بيبقى مش طايق يكمل فيها باقى الاجازة .. وان كان عليا نفسى اجيب كل واحد صاحبى وكل واحد اعرفة بلد تانية بعيد عن مصر ..

للاسف فعلا والله كل البلاد هتتغير الا احنا لاننا خلاص بقينا بلد من اعفن البلاد فى العالم من حيث النظام والنظافة والمرور والروتين والهبكة وكل الكلمات اللى تخطر فى بال سيادتكم ..

الناس اللى بتتكلم عن مصر وهى بتقول ان مصر بلد الامان ومصر هى امى ومصر هتفضل محروسة وانا اراهن بكل ما املك انه لو راح فى يوم علشان يطلع ورقة من الحكومة ولما يلف السبع دوخات علشان موظف ملهوش اى لزمة غير انة مكسل يشتغل ساعته هيقول طظ ومليون طظ فى مصر وفى اللى عاوز يحبها ..

يا استاذة احنا فى مصر متبهدلين متهدلين متبهدلين وللاسف بنزعل علشان دة بيحصلنا جوة بلدنا لوما بنخرج برة بلدنا ونروح اى بلد تانية بنلاقى الاحترام فى كل شى والمساواة فى كل حاجة ... ساعتها بنعرف قيمة مصر اللى اصلا ملهاش اى قيمة بالنسبالى واكيد بالنسبة لناس كتير .

نفسى بجد اللى بيحب مصر اوى اوى كدة وبيموت عليها وبيغير عليها يجى يقولى حاجة واحدة بس نفتخر بيها ونقول دى بلدنا .. يمكن كلنا لما فريق الكرة بيلعب مع بلد تانية بتبقى متحمسين يمكن علشان بتلاقى حاجة نقول اهى مصر شايفها دى بلدى ,, يمكن دى الخاجة الوحيدة اللى بتفكرنا بمصر واننا كويسين وباينين فى وسط العالم بس تعال عيش فيها وقولى رايك فيها اية وتعال شوف نفسك وانت دايخ علشان تطلع حتة ورقة ولا ليها اى قيمة علشان مجرد روتين مقرف البلد حطيتة لمجرد عاوزة شوية فلوس زياجدة ولا موظف ابن ستين فى سبعين عاوز يدوخك علشان حاسس انه قاعد فاضى مش اكتر ...

هتقولو عن مصر اية ولا اية .. هتتكلموا فى التعليم ومبادئ التعليم والمدارس والكليات.. ولا هتتكلموا فى التأمين الطبى والحياة الطبيه اللى بلا فخر عار بجد على بلد كبيرة زىمصر . ولا هتتكلموا عن الروتين اللى كل حاجة بتمشى بالواسطة والفلوس . ولا هتتكلموا عن المرور والعربياتاللى تلاقى عيل صغير سايق ميكروباص واول ما يشوف الشرطة يجرى وميهموش لو كانت واحدة كبيرة بتركب ولا عيل صغير بيركب..

هنتكلم عن الزبالة والدخان اللى فى كل شارع ولا عن الطرق اللى متكسرة علشان الحكومة هتركب الغاز وبعد ما يركبوة يسيبوا الشوارع زى ماهى متكسرة ملعون ابوها ما اتعملت تانى ..

هنتلكم عن الموظفين فى المطارات اللى لما بيشوفوا مصرى جاى من اى بلد تانية بيعاملوة كانة عسكرى تحت ايدة لمجرد فاكر ان كل واحد جاى من برة بيبقى متنك عليهم ..ولما بشوف اى اجنية بيعملها تعظيم سلام ..

هنتكلم عن الحمامات اللى فى طريق شرم الشيخ اللى بتدخلها بفلوس وللاسف كتير من القراء كتبوة فى بريد الاهرام عن المهازل دى ومحدش اتحرك ولا اى تغير حصل

..

هنتكلم عن المواصلات فى مصر والاتوبيسات اللى متنفعش للاستخدام الادامى ..

انا بقولها وقدام كل الناس واجرى على الله .. لو بايدى كنت اشتغنيت عن الجنسية المصرية وبستعر منها كمان .. ياريت كفاية لغاية كدة احسن الواحد فية كتير من اللى شافة فى مصر ...

عارف يا أخ علاء, أنا مصر عندي مش هي أمي ولا عمتي ولا ستي, أنا مصر عندي هي إبني, أدعي عليه, وأكره اللي يقول آمين. بجد والله مصر عندي هي إبني بالضبط, بس إبن فلتان وأخلاقه تعبانة عشان كده ماعنديش مانع إني ادعي عليه ساعات, وأكره اللي يقول آمين عشان أنا طول عمري لحد ماموت زيي زي أي بني آدم خلقه ربنا بيفضل عنده أمل إن ابنه الفلتان حالُه ينصلح. واقولك كمان إني عارف إن مصير حالُه ينصلح, يمكن بعد ما أنا أتكل بس هينصلح هينصلح, عشان كده عمري ماهأفقد الأمل في ابني حبيبي اللي بحبه من غير مايكون فيه حاجة حلوة, بحبه ياخي عشان أبني! بحبه بجد وهو فلتان كده, بيكسفني في كل حته بس بحبه! الله! وهادعي عليه, وهاكره اللي يقول آمين. بحب مصر من غير مايبقى فيها حاجة عدلة, مش لازم تكون أحسن بلد, مش لازم تكون أحسن من 75 بلد تانية في العالم حتى لو كان ده معناه المباشر إنها أوحش من 125 بلد تانيين, ياخي أنا حبي للواد الفلتان ده مالهوش دعوة بحاجة حلوة ولا وحشة فيها, انشالله الـ 200 بلد اللي فالدنيا كلهم بما فيهم زائير وزامبيا وزيمبابوي يكونوا أحسن منها بحبها. من غير مايكون فيها بورسعيد بحبها, ياخي استظراف شعبها على قلبي زي العسل. هي مصر تبقى مصر من غير ما الفلاح يحرق القش ولا الناس تكسر الاشارة الحمرة مادام مفيش كاميرا انشالله يطسوا عيل ويجيبوله شلل اطفال.

عارف ليه بحب ابني؟ عشان هو ده الوحيد اللي هاحس إنه ابني اللي من لحمي ودمي. وعن تجربة في بلاد عرب وغير عرب, ترجع لمصر, بعبلها وقرفها واستظراف ناسها, بس تحس إن هم دول اللي إنت بجد حتة منهم, خلاص لزقت زي ما الابن مهما اتبرّيت منه هتفضل عينيه شبه عينيك ومناخيره هي مناخيرك وشعره حتة من شعرك. ولا سعودية ولا امارات ولا كندا هتعرف تتلفت فيها حواليك وتحس إنك منهم وعليهم, هتحس دايما إن فيه حاجة مش مضبوطة, إنك البطة السودة, بلاش السودة, خليها البلدي, ولو إنت ماحستش, هم هيشوفوك كده, بطة بلدي وسط البط الأبيض. لسانك مهما تعوجه هايواك واك بلدي, سعودية امارات كندا, اللسان بلدي. بقول لحضرتك لزقت خلاص وماتعرفش تتبرى منها, وانا عن نفسي مش عايز اتبرى منها, مش عشان حلوة وعجبه, لا, عشان أنا لو اتبرّيت منها كإني بتبرى من نفسي, شحمي ولحمي. قوم أعمل إيه؟ أبدأ بنفسي و "طوبى لمن شغله عيبه عن عيوب الناس". انصلح حال ابني فحياتي, يبقى أنا كنت سبب لاني كنت من اللي اصلحوا انفسهم, ماكانش فحياتي مش هازعل لاني عارف إن هييجي اليوم اللي هيكون فيه العدد الكافي اللي همه إنه يصلح نفسه أكبر من همه إنه يصلح غيره, ساعتها هتبدأ الصحوة وابني حاله هينصلح.

أنا أحب إني ابص شوية على نص الكوباية المليان وما أفضلش معلق عيني على النص الفاضي. اللي بيحترمني بره مصر مش بيحترمني عشان أنا بقيت واحد منهم, بيحترمني عشان ده جزء من ثقافته, مش معنى كده إنه شايفني واحد منهم. واللي مش بيحترمني في مصر مش بيحترمني وهو عارف إني واحد منهم. صحيح مش عادل, بس هو ده اللي أنا عارف إني منه وهو مني. إبن طالح, عاق, عاصي, الوجه القبيح بتاعي, بس ابني أنا مش ابن الجيران. ابن يعر آه, بس أنا مقدرش اتبرى منه, عشان أنا اللي اتهببت على عيني وجبته. بحبه.

[MaYousof]

روح ماحدش ماسكك ولا هاتفرق معاها ..روح بره وخد جنسيه تانية وشوف مين اللي هايحترمك وانت مالكش اصل ولا جلد ..زي الحرباية مالهاش لون معروف

عارفين ؟؟اللي بيمدح كندا موش علشان هيا حلوة او بنظرة محايدة ..فقط ..علشان يذم في مصر واهلها بيفكرني بايه؟؟

باللي بيقول ..اللي يجوز امي ..ااقوله يا عمي

مثل قذر ...خلاص اللي هايعوضك عن مشاكل بلدك يبقي عمك ؟؟

هو لازم بلدك تبقي احلى بلد في الدنيا علشان تحبها ؟؟

اللي عمري ما شفت سوري مثلا بيشتم في بلده على الاقل قدام الناس برغم ان فيها فساد ماوردش على حد..وبطالة وغلا ووبا وفساد ذمم وكمان ارضهم محتلة و لسه عندهم شيوعية اللي خلصت من الدنيا كلها

اللي ما شفت سوداني بيشتم في بلده مع انهم عندهم بلاوي الدنيا وحرب اهلية ومرض ووفقر وجهل وغيره

الا ما شفت صيني بيشتم بلده مع انها قمة الدكتاتوريات وسياسة العبيد وهضم الحريات في العالم

مالكم يا مصريين ؟؟نشتم بلدنا وفي منتدي اسمه حوارات المصريين وعليه العلم اللي مات علشانه كتير وكتير ؟؟

شكلنا ايه قدام الناس يا اخي ؟؟

بص يا تو ..نناقش العيوب علشان ندور على حلول حاجة ..ونقود مظاهرات تكره الناس في بلدهم حاجة تانية

بالله عليكم يا اخوانا كفاية بقي .زرفقا ببلدنا واهلنا

ياما مرت علينا ايام اسوا من كدة والدنيا اتغيرت بعد كدة

انت عارف ان في 67 و 73 و 56 لم تسجل اي قسم من اقسام الشرطة حادثة واحدة ..حتي ياربي خناقة والا حادث مرور؟؟

في حين يوم ما بغداد وقعت ..كل البنوك اتسرقت واثارها بره لغاية النهاردة وهرب منها ملايين العراقيين

واحد صاحبي بيحيكيلي عن فلسطينيين معاهم جنسيات كندي وامريكي وغيره

اصحاب مناصب ورواتب

لما بيقولهم انا نازل اجازة ..بيقولوا ايه ؟؟ يا بختك ..عندك وطن

معني الوطن اكبر بكتير من نضافة ونظام يا صاحبي ..وبكرة تندم عليه

بس ساعتها لما تكبر ..اوعي تشتكي من برودة وجفاء الغربة

مانت اللي ضيعتك وطنك واهلك بايديك

لسة د فاروق الباز كان بيحكي

حفيدته بتتعلم في امريكا عندها 10 سنين

اول يوم في الدراسة المدرسة اتكلمت عن الحضارة المصرية

وقالت

التاريخ بيعيد نفسه

وممكن اوي مصر ترجع تاني زي زمان

راحت الطفلة سالت جدها

ممكن يا جدو التاريخ يعيد نفسه

قالها الباز

لازم موش ممكن

مصر تمرض اه ..تعيا وتذبل اه ..تموت لااا

احنا للاسف على دين الحاكم ..ودة فيه العبر ..يتغير ..هانتغير ..وفرجة قريب

بالله عليكم يا اخوانا كفاية اوي كدة سب في مصر

والا اسفا ..واعتزلكم وما تعبدون

بتسالني لسه عندك امل ؟؟

اه لسة عندي امل

عارف ليه ؟

علشان اشد ساعات الليل اظلاما ..قبل الفجر مباشرة

انا كدة قلت اللي عندي

أنا متفق معاك تماما يا باشمهندس في كل الكلام اللي حضرتك قلته ماعدا السطر ده

احنا للاسف على دين الحاكم ..ودة فيه العبر ..يتغير ..هانتغير ..وفرجة قريب

خليني أكون أكثر دقة, أنا معاك حتى في الجزء الأول من السطر, بس مختلف معاك في دي

يتغير ..هانتغير

عشان بالنسبة لي, أنا مؤمن بالحديث القدسي

"انا ملك الملوك ومالك الملك, إن اطاعني عبادي حولت إليهم قلوب ملوكهم بالرأفة والرحمة, وإن عصاني عبادي حولت عليهم قلوب ملوكهم بالقسوة والنقمة. فلا تشغلوا انفسكم بالدعاء على الملوك, واشغلوا انفسكم بدعاء ملك الملوك يكفيكم ملوككم"

وحتى لو فيه خلاف على صحته فأنا أقله مقتنع فكريا إن التغيير مش من فوق. فوق ده مراية تحت.

[د هشام ابراهيم]

بقي انا برده اللي مغلبك ؟؟؟ wst::

سريعا كدة علشان مانخشش في دائرة مغلقة ونتعب في قلب بعض

- اعتزازنا بمصريتنا لو ضرورة زي ما انت بتقول يبقي ماينفعش نقول ( بلد بنحس بالفخر لما بنيجي منها ..وبلد بنحس .... الى اخره ) ومتهيالي معظم المداخلات في الموضوع دة ماتحسسش بالفخر اطلاقا وبعدين يا هيتش ..فكرني الله يخليك ..امتي انا قلت او حتى لمحت ان الهجرة خيانة للوطن او ان النقد عدم وطنية ؟؟؟؟؟؟؟؟ فين بالله عليك؟؟

في الهجرة قلت مليار مرة انها في الظروف الحالية حاجة ضرورية بدليل ان انا كمان مهاجر

وقلت ان حتى فكرة الحياة في كندا طول عمرك برده صح بس بشرط ماتقطعش روابطك ببلدك وخللي ولادك مرتبطين ببلدهم علشان تفضل هناك طول العمر مصري ومحتفظ بهويتك

وبعدين هو انت بتوقعني في تو والا ايه ؟؟ الراجل لو كان بيكره مصر ماكانش رد اخر رد ليه بالشكل دة ..انا بس بالفت انتباهه ايه اللي ممكن يحصل من الكلام دة ..

فيه فرق بين النقد للبحث عن حلول وبين تقليب مشاعر الناس على بلدهم وهيا موش ناقصة خلق شعور بعدم الانتماء اكتر من كدة ..ممكن تهامي اصلا مايكونش دة قصده اطلاقا ..بس دة اللي ممكن يتفهم من كلامة

- سبت اللي مقصود من الدعاء وقعدت تشرحلي اسباب النزول وصحة الحديث

ياخي ادعي بس ومالكش دعوة ؟؟؟

كدة جدل من غير فايدة يا صاحبي..وبعدين هو ابن العثمييينيين اللي قال كدة ؟

- يا سيدي حد قال احنا جرنان الاهرام :P

انا باقولك فيه فرق بين الدعوة للاصلاحوالحزن على حال البلد .. وبين الدعوه للخلعان والتبرؤ من مصر والمصريين ..والكلام واضح يا هيتش موش عاوز لعب بالالفاظ

نقطة البهارسيا دي انا كنت باهزر موش اكتر بس الواضح انها اتفهمت غلط

متفق معاك نسبيا ..بس انا كان قصدي ..هو انت عمرك شفت حد منهم بيشتم في بلده رغم كل شيئ؟ للمرة التانية ...النقد لمحاولة الاصلاح حاجة ..والنقد للتبرؤ منها حاجة تانية

- اسمحلي بأه ..دة رايك الشخصي ..ماهوش قران يعني

وانا سمعت من ناس كتير عكس الكلام دة ..ولسة حتى ماكبروش في السن والله

جايز انت صحتك مساعداك ..دة موضوع تاني

- سيبت معني الكلام وبسالني عن الباز علشان اقولك طفش من البلد

طب تقدر تقوللي فين مجدي يعقوب الوقتي ؟؟

استاذك دة صح ؟؟

كان في مصر بلده ..بيعلم صغار الاطباء في حملة للنهوض بمستوي علاج امراض القلب في مصر

وعامل مؤسسة مجدي يعقوب اشهر من نار على علم طبعا

وكل كام شهر يرجع مصر يعمل عشرات العمليات المجانية لولاد بلده

مصري بجد

والباز بالمناسبة عمره مانساش بلدة وهو هناك ..رجع ميت مره علشان يعمل فيها مشروعات بس لا حياة لمن تاندي طبعا

بس هو برده مابطلش ينادي

ويهاتي

هايفضل لغاية ما يموت

علشان مصري بجد

- موش غلطة حد ..اه ..احنا كدة للاسف حانعمل ايه يعني ؟؟

برده بحبهم ..احسن مايكون طبعهم مثلا الخيانة زي س من شعوب المنطقة من غير ما اذكر حد لحد يزعل مني

ادعيلك ..يا خرابيييي عالدعا اللي هادعيهولك يا هيتش ..خد من قلبي وصر non::

احسنلك تطلب اللجوء السياسي لمسجد

باهزر يا هيتش ..مهما اختلفنا احنا برده اصحاب

والاختلاف في البتنجان لا يفسد لاي طبخة قضية يعني

ولينا لقاء في كندا قريب هايبقي مذبحة :lol: الدم هايبقي للركب ..اصلي هاطلب ستيك bloody wst::

الله يسامحك يا Z ...بقي أنا باوقع بينك و بين تومي ...طب ليه ...و بعدين هو أنا اللي دخلت و فين ما يوجعك ...علي العموم مافيش مشكلة هاتها علي و أنا عارف إن كابتن تي عمره ما حيزعل مني

- نرجع لموال مصر و كندا اللي ما بيخلصش ...يعني سعادتك مقتنع بالهجرة لأن ظروف مصر وحشة بس مش عايزنا ننقد مصر و عايز علي طول يبقى لينا روابط بالوطن الأم ...موافق طبعا كلام ما عليهوش غبار بس مش مقتنع بحكاية ما ننقدش ديه ...المشكلة إن اللي مش عايزين حد ينقد مصر طريقة لعبهم هي يالا انقد كندا و الغرب و خلاص و هو ده المشكلة في رأيي ...أي مقارنة في الوقت الحالي ما بين مصر و كندا مش في صالح مصر ....مش عايز حد ينقد مصر صعبة بس ممكن أفهمها بس ليه يكون الرد ذم و اشتم في كندا اللي أنت نفسك مختارها تهاجر ليها ...صراحة مش فاهم البارادوكس ده

- دعائك بالايات اللي موجهة أصلا لبني اسرائيل هو اللي غير مفهوم يا عم الحاج .....و مين قالك اني ما بادعيش لمصر و مين قالك اني ما باساعدش البلد بحاجات كتير مش هنا مكانها .....مشكلتنا كمصريين كلام كلام و شعارات بس ما فيش فعل ...... بالنسبة لاراء الشيوخ السلفيين في مصر فمعروفة يا Z من أول الشباب الحلو اللي عندك لغاية مرشد الأخوان و تصريحه الشهير طظ في مصر

- حاشا لله كلامي مش قران طبعا ...بس برضه كلام اللي بتسمعلهم مش قران ....أنا ما باتكلمش من خلال تجربتي الشخصية و علاقاتي الأجتماعية و بس ...أنا دكتور يا باشمهندس ...شغال في كندا بقالي ٤ سنين و نص ...شفت حالات أنسانية بالالاف ...و في لحظات الضعف البشري ...شفت الدفء في المشاعر و شفت البرود في المشاعر ....زي ما شفت في مصر برضه ....حتقول إيه في ديه بقي ..... الفرق الاساسي إن مصر كلام كلام و ما فيش فعل .....كندا و الغرب العكس تماما انما حكاية إن الشرق كله مشاعر أنسانية و دفء أسري و الغرب العكس باعيدهالك تاني ..هجص في هجص

- ما هو ما ينفعش تستشهد بالباز و مجدي يعقوب و تقولي سبت المعني و مسكت في مش عارف إيه ....الاتنين أصلا طفشوا من البلد لما كان حالها أحسن من دلوقتي بمراحل ...مجدي يعقوب لا أستاذي و لا حاجة ده يا عيني سدوها في وشه من و هو لسه في النيابة و اتقاله إنت ما تنفعش جراح ...الرجل طفش من البلد كلها و رجعلهم خبير أجنبي ...بيعمل عمليات في أبو الريش و في مستشفيات أستثمارية كمان ....نتايج عملياته في مصر لا تقارن بنتايجها بره .....الحقيقة السبب عوامل كتيرة منها ما هو راجع له و منها ما هو ما لوش علاقة بيه و الباز و زويل شرحه بيحرتوا في البحر ...قصدك نكمل حرت معاهم ...من غير ما تقول بيحصل يمكن مش علي مستوي عطاء الناس ديه بس علي قد ما ربنا يكرم ...

- عايزني ألجأ لمسجد ...يا ريت يا z ...فيه جامع في دانفورث عيني عليه في الرايحة و الجاية و نفسي أخشه بس ربنا ما يسرش لسه ..يا رب بس الامام ما يبقاش من عرعر

- لا يا عم مش عايز آكل معاك خلاص .....كفاية علي تهامي أهو غاوي ستيك زي حالاتي ....أبقي آكل معاك في الكاستن علشان تظبط الجرسونات هناك و توصيهم ما هي حتي ديه محتاجة كوسة :blink:

[MaYousof]

حتة أوف توبيك شوية بس عايز أقولها

مصر فيها خير طول ما فيها بورسعيد :blink:

أنا مرة من اربعتاشر سنة رحت بورسعيد ولفيت يمين وشمال, بلد جميلة قوي

بعدين ركبت ميكروباص مش فاكر تقريبا من بورفؤاد حاجة كده وكنت قاعد جنب السواق

المهم فجأة الراجل في عز الظهر وفي نص الشارع وماحدش على يميننا ولاحدش على شمالنا لقيته وقف

الطريق كان فاضي وماحدش فيه غيرنا أو يمكن عربية ولا حاجة في المقابل ليك

قلت ياد يمكن عايز يحمل رابع في الكرسي الوراني

مفيش شبح حتى معدي عشان نركبه رابع ورا

قلت ياد يمكن مستني حد هياخد منه حاجة

ماحدش ظهر

أنا كنت لسة كتكوت وصغنن فخفت لايكون فيه حاجة غلط واروح أنا فأبو فشنك

رحت مميل على السواق وقلتله

هو فيه حاجة يابو الكباتن؟ احنا واقفين ليه؟ خير؟ ها؟ خير؟

تفتكروا جاوبني قاللي إيه؟

فكروا كده؟

الراجل عسل

جاوبني بلهجة بورسعيدية خالصة وهو بيشاور بره الشباك

"الإشارة حمرا يابن عمي" :P

والله ماكنت مصدق نفسي من الفرحة wst::

أصل ممكن ناس هنا تكون معتبراني تافه إن موضوع الاشارة الحمرا ده بيضايقني

طبيعي

اختلاف ثقافات

أنا اتربيت وانا طفل ومراهق وسقت أول مرة فحياتي بره مصر

لما رجعت مصر, القاهرة تحديدا, جاتلي صدمة ثقافية معرفتش افوق منها لحد ماروحت بورسعيد

ولقيت إن منغير بارادعي ولا كاميرات في ناس فمصر ممكن يكون عندها اخلاق ومش لازم يكونوا حتى متعلمين

احنا فينا حاجات مش صح بس عمرنا ماهنعرف نشوفها طول ما احنا مش عايزين نطلع برة الصندوق

فالحين بس نقول مش احنا السبب في بلاوينا والزمن هو اللي غادر بينا

حتة بقى مداهنة على رياء عشان اثبت مصريتي

بورسعيد بورسعيد

أحلى ناس من بورسعيد

طب من غير مداهنة ولا رياء, بورسعيد استمرت لعقود أنضف مدينة في مصر

أنا مش هزايد على شعب بورسعيد

ولا شعب مصر

كلنا بنحب مصر

بس عاملين زي الدبة الحيرانه اللي مش عارفة تهش الدبانة من على وش صاحبها

ربنا يستر على مصر

[د هشام ابراهيم]

حضرتك و غيرك اخترت الهجرة علشان المستقبل هناك احسن و معاك حق، بس شئ بسيط اطلبه منك، مش لازم تكره الناس الي مش قادرة تهاجر في عيشتها، و تفضل تنقد و تقلب الدنيا ضلمة، و احب اكد لك ان والله العظيم اننا كمصريين عايشين في البلد عارفين عيوب بلدنا كويس و عارفين وجهة نظر حضرتك و بعض اخوة الافاضل الي شايفين ان العيشة في المهجر بمبي على رأي الست سعاد حسني

أنا مصر عندي مش هي أمي ولا عمتي ولا ستي, أنا مصر عندي هي إبني, أدعي عليه, وأكره اللي يقول آمين

وجهات نظر احترمها تماما ....

النقد المستمر بيضايق الناس اللي قررت لسبب أو لاخر المكوث في مصر ......تعظيم سلام و ما أقدرش أقول كلمة ....أهلي نفسهم كده ... شايفين إن مفيش مشاكل في مصر و قرروا يستمروا فيها ......موقف متوافق فيه الفعل مع القول

(مين اللي قال إن كندا بمبي بس يا يور هاينس .....فين ديه دليني عليها :blink:)

و حكاية مصر زي ابني ادعي عليه و أكره اللي يقول آمين ...تصوير بليغ و حقيقي .....حد بس من الأخوة العرب يجيب سيرة مصر بأي سوء ...... مدافع رشاشة في الرد ....الله يرحمك يا جاهين واكرهها وألعن أبوها بعشق زي الداء

[ELSHAMY]

بسم الله

استعنا على الشقى بالله.....نحاول تهدى النفوس

كان لى الفخر أن التقى أطراف الحوار ذو الشد و الجذب و أشهد أن كلهم ناس محترمين و غيورين على بلدهم ونفسهم أن يروها فى أعلى مكانة...

لكن....

دعونا نتفق على بديهية يمكن تكون غابت فى الحوار...و هى أن من اتخذ قرار الهجرة (أيا كانت مبرراته) فلا شك ان عنده من الأسباب التى يستطيع أن يملأ بها هذا المنتدى و لن يكل فى أن يبرهن عليها.... و بالتالى فبديهيا أن يجمل ما قد أختاره و يقبح ما تركه...و العكس صحيح....

و الأمر هنا أراه أبسط من ذلك ...

فإنى أكاد ألمح فى كل المداخلات خيط يربطنا جميعا.....و هو اجمالا حب دفين لمصر....انبهار و اعجاب بكندا و نظامها ....و غيرة شديدة من عدم قدرتنا كمصريين أن نحذو حذو كثير من الأمم ( ومنهم كندا على سبيل المثال) و أن نعود لسابق عهدنا التليد....

و أنا بصفتى عشت التجربتين...و رأيت غيرهم عشرات التجارب فى 30 مدينة زرتهم منتشرين فى 15 دولة حول العالم فأستطيع ببساطة أن احتوى و أفهم كلمات الجميع ....

لا شك أن جزء كبير مما و صل اليه حالنا هو منوط بالنظام الذى يحكم...الذى يرى فى وضعنا الحالى و تلك اللامبالاة التى نجح فى إرسائها - يرى فى ذلك - أحسن الطرق التى يسيطر بها علينا...و على الطرف الأخر فلا نعفى أنفسنا من تقصيرنا و تقاعسنا فى الأصلاح.... و يستطيع منكم من أراد أن يعود الى موضوع قديم كنت فتحته و عنوانه "محاولات للأصلاح" أرى الأن أن الوقت جد مناسب لفتحه مرة أخرى و أثراءه بأرائكم السديدة....

فى النهاية...لا جدوى من أن ينتصر فريق على فريق...الكل محق الى حد...و لكن يجب علينا جميعا أن نتقى الله فى اخواننا و أخواتنا متابعى هذا المنتدى....فأنا من واقع ما رأيته أرى أن الكثيرين قد يتأثرون سلبا أو ايجابا بهذا الرأى أو ذاك....مع احترامى للجميع....

و كلمة الى أحبائى متابعى هذا الموضوع...أرجوكم ليست الهجرة نهاية الألام و بداية الأحلام....قد تكون وبالا على البعض...و فتحا مبينا على أخرين....

و على الطرف الأخر...من قال أن البقاء فى مصر هو كارثة الكوارث....فهناك أمثلة عديدة لشرفاء ناجحين يتقون الله...و الله كان فى عونهم...

فأربأ بكم جميعا أن نخرج عن سياق سرد وجهات النظر و إفادة الجميع بكل ما نستطيع...

و الله من وراء القصد و هو يهدى السبيل.

[أحمد سيف]

بس قسما بربي ..لو كلت في كندا المن والسلوي ..ماتسوي عندي اكله حلوة مع اهلي في مصر ..اذواق بقة تقول ايه ؟

متابع النقاش من بعيد ومش عاوز أتدخل لإني عارف إنه مش هيؤدي لنتيجه في الآخر ... كل واحد وله ظروفه وقناعاته وعارف مصلحته فين.

لكن لفت نظري لفظتي المنّ والسلوى اللي الباشمهندس زناتي استخدمهم ... لإنك يا هندسه لو تفتكر في السياق اللي ذكروا فيه في القرآن يمكن كنت تفضل عدم استخدامهم لإثبات وجهة نظرك.

وَإِذْ قُلْتُمْ يَا مُوسَى لَنْ نَصْبِرَ عَلَى طَعَامٍ وَاحِدٍ فَادْعُ لَنَا رَبَّكَ يُخْرِجْ لَنَا مِمَّا تُنْبِتُ الأَرْضُ مِنْ بَقْلِهَا وَقِثَّائِهَا وَفُومِهَا وَعَدَسِهَا وَبَصَلِهَا قَالَ أَتَسْتَبْدِلُونَ الَّذِي هُوَ أَدْنَى بِالَّذِي هُوَ خَيْرٌ اهْبِطُوا مِصْرًا فَإِنَّ لَكُمْ مَا سَأَلْتُمْ وَضُرِبَتْ عَلَيْهِمُ الذِّلَّةُ وَالْمَسْكَنَةُ وَبَاءُوا بِغَضَبٍ مِنَ اللَّهِ ذَلِكَ بِأَنَّهُمْ كَانُوا يَكْفُرُونَ بِآيَاتِ اللَّهِ وَيَقْتُلُونَ النَّبِيِّينَ بِغَيْرِ الْحَقِّ ذَلِكَ بِمَا عَصَوْا وَكَانُوا يَعْتَدُونَ (61)

الآية طبعا نزلت في بني إسرائيل لما خرجوا من مصر هروبا من الكفر والظلم والاستعباد ثم أرادوا العودة اليها لإن أكلها حلو !! الظاهر الأكل الحلو اللي بتحكي عنه يا هندسه هوا اللي مخلّي المصريين من قديم الأزل صابرين على العيشه المرّه والظلم والفساد ومش عايزين يسيبوها أو يغيروا أوضاعها.

أنا مندهش من مساحة الاهتمام اللي المصريين عموما بيدوه لموضوع الأكل ... عمري ما شفت جنسيه بتسافر بشنط مليانه أكل غير المصريين ... يا أخوانا كله محصّل بعضه والله ... وأكلنا الحلو ده (ولو إني شايف إنه مش أطعم أكل في الدنيا ولا حاجه بس احنا اتعودنا عليه) سبب كثير من مشاكلنا ... شوفوا الوقت والمجهود اللي بتبذله الست المصرية في الطبيخ ... معظم مشاكلنا الصحية سببها إما كمية الدهون والنشويات اللي في أكلنا أو التلوث الموجود فيه ... وطبعا نسبة كبيرة من دخولنا بتروح على المطاعم الغريبة اللي اخوانا جابوا سيرتها وأنا عمري طبعا ما سمعت عنها.

الخلاصة الأكل الحلو عمره ما هيبقى هوا السبب في رجوعي مصر ولا المفروض يدخل في حسبتي أساسا ... لو رجعت مصر بإرادتي في يوم الأيام فده هيكون لما أشوف تغيير في سلوكيات الناس وأحس بأمل في المستقبل. غير كده خلينا عايشين على الأكل الناشف لكن بكرامه واحترام.

[SoSo R]

أنا معجبة جدا بسير الحوار...يمكن أول مرة أشوف فى المنتدى مناظرة بالرقى ده...

ونقاش بإحترام من غير ما الموضوع يقلب بضرب و كدة...وأرجو أن يستمر أختلاف الآراء بإحترام كما هو..

ليا بس تعليق على دفء المشاعر وأحترام الناس لبعض...وإن الشرق دافى والغرب بارد او العكس...

اللى بيخلى الشرق الدافى إيه؟!!

أهلنا قرايبنا...لكن الناس .الجيران..اللى ماشيين فى الشارع...حد بيحسسك بالدفء؟!!

أنا أول أجازة نزلتها مصر ماكنتش مصدقة نفسى...بعد 4 سنين متواصلين...

وكلى شوق ...كنت مشتاقة حتى للأماكن والزحمة والمطاعم النص كم بتاعة الفول والطعمية...

بس نفسى إتسدت من ساعة مانزلت المطار...والضابط اللى بيبص ع الجوازات وأمورنا مامشيتش بسرعة إلا لوجود واسطة طلعتنا...دة غير معاملة الجمارك الزبالة ...حتى مع وجود الواسطة...

قلت مش مهم...المهم وصلت مصر...

هنقول الزحمة والمرور والرعب وأنت طول السكة بتقول يارب أوصل وجهتى وأنا لسه عايش...ماشى قديمة وأحنا بس اللى نسينا ..وكنا مرميين فى الشارع بنسوق ونغرز مع سواقين الميكروباصات...أسوء ناس بيسوقوا على وجه الأرض...

نطنش دى كمان...

طيب ...الخدمات ..البنية التحتية...المياه والنور يقطعوا مع بعض وأنت ساكن فى حتة راقية فى مصر الجديدة...ومعايا أطفال وفى شهر 7

حاجة باظت فى البيت...تلاقى صنايعى عايز يسرقك وينصب عليك ...فى حاجة تصليحها ب20 جنيه عشان عرف بس إنك من الخليج فى أجازة...

نطنش دى كمان..ولا نبتدى نتضايق...

نيجى بقى نحاول نتمتع بالحاجات اللى الواحد واحشاه...تتمشى فى الشوارع...روكسى ...وسط البلد...حتت ليها ذكريات جميلة قوى عندى...باعشق تراب الشوارع دى وحيطانها ومحلاتها...كل حتة بذكرى وتاريخ وموقف...

للأسف ......

مش أمان تمشى فى الشارع...

ياواحد قليل أدب هيخبط فيك...يحاول يحتك...

حد يشد الشنطة من دراعك...

محل زحمة...واحدة بموس عايزة تعمل فتحة فى الشنطة تنتش المحفظة...

يعنى عشان الأمان...نقعد فى البيت ..بين 4 حيطان...

مافيش إنك تأمن على نفسك ومراتك وولادك فى الشارع...

نزلت الشارع ...يبقى إستحمل بقى...

فى المقابل هنا...

أى حد فى الشارع معدى جنبك بيبتسم فى وشك ويقولك صباح الخير..أو أزيك...الجو حلو النهاردة...

حد أبتسم فى وشك فى مصر ...إلا لو كان بيعاكس...

إحنا من كتر خوفنا من الناس...فى البداية ماكناش فاهمين السلوكيات دى...وأفتكرنا ناس بتعاكس...الحقيقة مش عايزين منك حاجة...أكتر من أنك تبتسم فى وشهم الصبح...

مرة كنت فى محل ستابلز باختار أوفر سيديهات...ولقيت واحد...بيقولى بكام دول...وفتح حوار ولأ دول غاليين وروحى محل مش عارفة إيه هيكونوا أرخص...

الأول لما فكرت بعقليتى واللى متعودة عليه...قلقت منه...وكنت هنادى على جوزى من آخر المحل...

بس الحقيقة الراجل ماتعاداش حدود الأدب مش أكتر من إنه عايز يساعد وبس.

شكرا لسعة صدركم وآسفة على الأطالة

[dcfarouk]

والله انا حاسس ان مرارتي هتتفقع مش عارف ازاي في ناس بتتكلم عن الصور الورديه في مصر

ممكن اشوف الصوره ديه من القشره بس كمنظور سائح ولكن اني اعيش فيها واقول الصوره حلوه لا والف لا واقولها بصوت عالي وانا بتكلم من مكان واحد علي درجه احتكاك عاليه جدا بالناس انا طبيب في مستشفي عام وفي نفس الوقت نائب اداري للمستشفي والله العظيم حجات تشيب سواء من المرضي ولا في الحوادث ولا من الاطباء حاله من التسيب وعدم المبالاه من كل الفئات السابقه والله كانه مرض فيروسي بينتشر

والكلام الجاي ده مش معناه اني بكره مصر لان معتقدش حد هنا بيكرها وزي ما قلنا احنا زعلانين عليها

مصر احسن دوله عربيه بلا منازع من حيث الناس والحياه وكل حاجه

كمان انا مش زعلان من السعوديه مثلا لانها متهمنيش وانا بحب مصر مش السعوديه

دكتور تهامي مع احترامي الشديد لوالد و والدة حضرتك بس مين الي صرف عليك لحد ما بقيت دكتور قد الدنيا ...مش المدارس و الجامعات ببلاش عندنا برضه...عارفة ان حضرتك هتقول ان تعليمنا غير معترف بيه في العالم كله و ان الشهادات بتعتنا مجرد حبر على ورق...ولكن...مش بشهادة بكلريوس طب المنصورة حضرتك قدرت تسافر الي السعودية و منها توفرت

والله حضرتك اعتقد انه لو كان من موزنبيق برضو كان والده ووالدته صرفت عليه

وموضوع ان الشهاده معترف بيها ده كلام غير صحيح ومش في كل الشهادات وبعدين شوف حضرتك بتقارن مصر بمين ب نيجريا لا حول ولا قوه الا بالله شوف وصلنا لايه

قارن حضرتك التعليم في السعوديه والبعثات اللي بيبعتوها لامريكا واوربا وكندا وانهم ازاي اتقدموا في الطب

ازاي مصر اللي هي اقدم واكبر حضاره في العالم شوف ولادها بيقرنوها بنيجريا والله المقارنه مش غلطه من اللي كتب الكلام بتاع المقارنه في التوبك ولكن من حال وواقع هو عايشه حقيقي

حضرتك شهاده المصري في امريكا زي شهاده بتاع ماليزيا زي بتاعه المانيا ديه سياسه دول واقتصاد

بس اللي لازم كل الناس تعرفه وبجد عن احتكاك شخصي مع اكبر باحثه في مصر وهي في جامعه اسكندريه (ده مش كلامي ولكن ده كلام الجمعيه الاوروبيه اللي اديتها احسن طبيبه وباحثه روماتولجي علي مستوي العالم في عام 2009 في شهر 6 وانا شفت فيديو في رويترز بيتكلم عنها)وهي علي فكره اكتشفت علاج جديد لمرض systemic sclerosis

واختها اكتشفت جين له علاقه بالدهون قالت ليه بالحرف الواحد انا لما كنت في جامعه ماكمستر لقيتهم مش بيجيبوا اي ابحاث من مصر خالص في اخر ثلاين سنه فسالتهم ليه قالوا في الجامعه ان الاحث المصري مش credible

لانهم بيفركوا الارقام والحالات وكل كلامهم ممكن يبوظ ابحاث معموله صح في حتت تانيه وطبعا مش هكلمك علي الحفاوه والجوائز الفظيعه اللي اخدتها المفتش كورمبو

اللي اكتشف الحقد وعدم المبالاه من كل الوسط العلمي في مصر

معلومه مهمه لازم اضيفها هنا في مكانها ان حسن حسن شحاته اخد ملايين بعد مارجع وخسر من الجزائر وبيتكرم في دبي واخد مليون ونص درهم علي مجهوده الغير عادي في تحسين اوضاع الشعب المصري

واحد بياخد 120 الف في الشهر ورجع خسران وبيكرموه انا عاوز اصرخ

عمار يا مصر

http://www.thedoctorschannel.com/video/1026.html

رويترز فيديو تتحدث عن الطبيبه المصريه

علي فكره جزء كبير من تعليمها بره مصر في جامعه ماكمستر في كندا ومرجعتش مصر الا عشان تراعي والدها ووالدتها ده من لسانها شخصيا

وبجد اول ما قابلتها مكنتش متخيل ان في مصري بالحب ده للعلم وبالاخلاق والتواضع ده بس عرفت السبب انهم من ام مش مصريه ومعظم تربيتهم في كندا

بجد محدش هيصدقني الا لما يعامل معاهم بجد اخلاق وتواضع فوق الوصف

تخيل لما يقال ان اطباء مصر اللي همه صفوه الصفوه و اامن فئه في الشعب علي ارواح الناس انهم معندهمش مصداقيه

هو ده اللي وصله المصري

سيدي انا كنت مدارس لغات طول عمري، هي بس مرحلة الجامعة الي الدولة صرفت علي فيها، ومع ذلك حاسة ان البلد دي ليها دين عليا انا مش عارفة اوفيه ازاي.

والله واي واحد في المنتدي كمان شايل ده فوق دماغه بس مش معني كده اني اعيش في الحال اللي البلد وصله عزاب يومي في كل نواحي الحياه

البلد دي هي الي علميتك يا دكتور، و الفلاح الي بيعمل pipi في الترعة هو الي اكلنا من زرعه طول عمرنا، و اتربينا عليه كلنا

الفلاح دا هو الي بنى حضارة مصر، هو اكيد مش عنده وعى و جاهل بخطر الي بيعمله، بس احنا كمتعلمين لازم يكون لينا دور نشرح للانسان البيسط دا الغلط و الصح.

موضوع التعليم تاني بقول لو كنا في تنزنيا كنا اتعلمنا برضو

وموضوع الفلاح اللي اكلنا من زرعه طول عمرنا واتربينا عليه حضرتك نسيت تقول انه اخد مرتبه تالت ومتلت بعد ما رش الارض كيماوي تمام

والللي لازم اقوله ان من ضمن اسباب فقر مصر هي الفلاح المصري عارف ليه

لانه تفكيره مادي وده مش عيب لانه من حقه يربي عياله بس مش هسقفله لما اكل من اكله وادفعله اجره

اقولك بقي ليه هو سبب فقر مصر

لما نعرف ان الفلاح المصري بيزرع الارض لب وفول سوداني بمساحات ضخمه وده حسب كلام ابراهيم عيسي ومحاصيل تانيه ملهاش لازمه واحنا عمالين نستورد قمح ومنتجات اساسيه زراعيه

برغم نصح الحكومه لهم بزراعه المحاصيل المهمه

بس في الاخر هو بيزرع اللي يكسبه كويس ملوش دعوه يعني موضوع اكل عيش وخلاص

وبالنسبه لموضوع الحضاره

مش الفلاح ده هو اللي بناها مستحيل ولا احنا احفاد بناه الاهرام مصر شعبها حصله ميوتيشن في جيناته واعتقد من بعد نظر بناه الاهرام انك لما تروح تشوف التماثيل الفرعونيه في اسوان تلافي انك واقف عند صوبع التمثال وديه رساله باعتها الفراعنه لينا يدل عن موقعنا منهم

ونسيت اقول ان الجين الوحيد اللي ورثناه من الفراعنه هو جين الفرعنه والكبر وده هتشوفه اوي في اقسام الشرطه وعالم البشوات اللي جوه

اذكر مرة موقف مع صديق للعائلة كان يسوق سيارته و كنت معه ، هذا الصديق مهاجر ، و في وسط الطريق القي هذا الصديق بعلبة بيبسي كانز في وسط الطريق السريع، ساعتها سالته : لو حضرتك كنت في كندا او امريكا كنت هتعمل كدة؟ الاجابة طبعا كانت لا طبعا، اصل البلد كدة كدة وسخة جت على العلبة بتاعتي؟

بجد اكيد ده مش بيقول الحقيقه لان ده طبع وهيرمي برضو وهو بره لو محدش عامل عليه رقابه

والله انا عن نفسي مبرميش حاجه في الارض حتي لو الارض كلها زباله وانا جوه مصر لان ديه تربيه قبل تكون خوف من القوانين

العزيز، المصري طول عمره مخلص، امين ، شجاع، جدع، غيور على دينه و بلده، المصري طول عمره متسامح المشكلة ان فيه عوامل خاريجية و داخليه عاوزة تهد البلد دي.

اعتقد ان المشاركه ديه بتاعه دكتور تهامي هترد علي الكلام ده

اللي بيغلّس عليّا في كمين مرور (زي اللي في طريق شرم مثلاً) هوّه حتت أمين شرطة لا عنده علم ولا عقل ولا ذوق ، لكن بوظيفته بقى له سلطة عليّا!

اللي بيعطل مصالحي الحكومية أو في المرور مثلاً هوّه مواطن مصري بسيط ، ممكن يكون ساكن جمبي مثلاً ، ولازم أشوفه بقرشين عشان آخد حقي!

اللي بيعاكس بنت ماشية في الشارع مواطن مصري بسيط مش شايف إن البنت اللي في الشارع دي أخته ولا من جنسه أصلاً ، وإلا كان ع الأقل كف أذاه عنها.

لما واحد راكب عجلة ويخبط بنت وهيه ماشية من ضهرها ، ويجري ، ومحدّش من الشارع يتحرك من مكانه! لدرجة إني أنا اتجننت وجريت وراه بالعربية ولبسته في الرصيف ، ونزلت فيه تلطيش! والناس ماشية.... عااااادي جداً!

لما أتسرق والحرامي بيجري قدامي وأقول للناس اللي في الشارع حرامي يا جدعان ، والحرامي ماشي في وسطهم ، ودول عمالين يتفرجوا علينا! تقوليلي مصريين؟!

لما أشوف كليب ع اليوتيوب لمخبر زي البغل ماسك بنت من شعرها ونازل فيها ضرب لدرجة إن قلبي وجعني أوي من المنظر ، وتقرئي تعليقات إن أكيد دي شـ***** ، وتستاهل اللي يجرالها ده! هيه بقت كده؟!

طبعا امين وشجاع

وطبعا ديه مش حاله فرديه

تعالي شوف الناس بتعمل ايه في بعض من تجاربي الخاصه

من ضمنها في حادث جه فيه شاب 28 سنه بندور في جيوبه علي المحفظه والموبايل ملقتهومش سالت المسعف قالي اصل الناس اللي كانت واقفه سرقته

والولد كان في غيبوبه ونزيف في المخ وكان محتاج نقل دم والفصيله نادره المهم طبعا مش عارفين نوصل لحد من اهله نبلغه يجي يجيب دم او حد يتبرعله المهم القصه انتهت بوفاه الولد ومحدش عرف يوصل لاهله

فين الجدعنه والشهامه اللي بنغني بيها كلنا ومش عرفين هي فين

ومش هحكي علي باقي الحجات اللي بشوفها كل يوم بحكم عملي والله حجات تشيب ومش هحكي علي اخلاقيات بعض الاطباء في مصر عشان ما اخضش الناس

وياريت اي حد لسه مش مصدقني يشوف حلقه ابراهيم عيسي مع نجيب سويرس بجد فيها اجابات كتير عن حجات زكرت هنا كتير

http://www.youtube.com/watch?v=Wd8JxoDCf0w...feature=related

كلنا بنحب مصر وبنكره الي يشتمها بس لو احنا شتمناها بيكون من كتر حبنا فيها لاننا عاوزينها تكون مكان احسن

وكما قال احمد مطر

وكل ذنبي اني امنت بالشعر ولم اامن بالشعير في زمن الحمير

وربنا يخلي الحكومه الالكترونيه وامير المخبرين

تم تعديل 5 يناير 2010 بواسطة dcfarouk

[أحمد سيف]

اللي بيخنقني بدخان سيجارته هوّه المواطن البسيط اللي ما عندوش دم ، ولازم أطلب منه يطفيها بمذلة ومسكنة عشان يتعطف عليّا ويطفيها!

اللي بيغلّس عليّا في كمين مرور (زي اللي في طريق شرم مثلاً) هوّه حتت أمين شرطة لا عنده علم ولا عقل ولا ذوق ، لكن بوظيفته بقى له سلطة عليّا!

اللي بيعطل مصالحي الحكومية أو في المرور مثلاً هوّه مواطن مصري بسيط ، ممكن يكون ساكن جمبي مثلاً ، ولازم أشوفه بقرشين عشان آخد حقي!

اللي بيعاكس بنت ماشية في الشارع مواطن مصري بسيط مش شايف إن البنت اللي في الشارع دي أخته ولا من جنسه أصلاً ، وإلا كان ع الأقل كف أذاه عنها.

عارف يا دكتور تهامي ... أنا من زمان بقول إن أهم مشكلات مصر هي وجود ما يسمى المواطن المصري البسيط ... وأول خطوات الإصلاح هي القضاء على هذا الكائن العبيط الجاهل المنافق الخانع الأناني المهمل قليل الذوق.

بتكلم جد والله ... لا نريد مواطن مصري بسيط من نوعية (سيد حباره) ... الشخصية التي أبدع في وصفها الدكتور أحمد خالد توفيق ... نريد مواطن مصري حرّ ومسؤول لا يهتف للحكومة في العلن ليلعنها في السرّ ولا يتمسح في حبّ الوطن والشعب ليدوس عليه في أول فرصه ... نريد مواطن لا ينظر لمصر كأمه يمتص خيرها ثم يهجرها ويتعلق في ذيل الحكومة كأنها هي التي أنجبته ... نريد من يؤمن ويتصرف أن مصر ملكه وملك أبناءه وأحفاده والحكومة موظفين لديه.

نريد جيلا جديدا من المصريين يستطيع إحداث تغيير في البلد وإعادتها الى المسار الصحيح ... هذا الجيل للأسف من الصعب تكوينه داخل مصر في ظل الأوضاع الحالية ... لذلك أنا أرى أن أفضل ما يمكن للمصري أن يفعله حاليا هو أن يربي أبناءه خارج مصر بعيدا عن المناخ الفاسد وعمليات غسيل المخ التي يتعرض لها المصريون ليل نهار آملا أن يستطيعوا يوما العودة وإحداث التغيير المنشود إذا تغيرت الظروف.

[myusername]

بالنسبة لموضوع الامن و الامان, لانى ملاحظ ان اللى راجعين من كندا... بيحسوا قوى بالموضوع ده.

طيب انا عايش فى مصر طول عمرى... و عمرى ما حسيت بانعدام الامن او الامان... بالعكس انا بمشى فى الشارع فى اى وقت و فى اى منطقة (نضيفة, شعبية, عشوائية, مهلبية)... و مفيش اى حاجة بتحصل معايه.. ربما يكون لانى شاب (مش بنت), ربما يكون لانى اتولدت و عشت فترة طويلة فى منطقة شعبية... فأصبحت الامور عندى عادى... أو ربما ان تعريف الامن و الامان عندى مختلف عن اللى عندكم! يعنى ممكن تكون نظرتكم اكثر شمولية.

بالنسبة للشرطة و المضايقات و المطار و الجمارك... على الرغم من ان تجربتى قليلة, لكن مفيش اى حاجة من دى بتحصل معايه... بس فيه موقف حصل قدامى... و انا راجع من باريس, قام امين شرطة ولا ظابط من بتوع الجمارك وقف راجل معاه شنطتين... و قاله استنى عندك يا استاذ رايح فين... و التانى قاله انتا بتكلمنى كده ليه... و انتو عارفين بقيت الموقف حصل فيه ايه.

بس عشان الامانة العلمية... صديقة امريكية فاضلة جت زارتنى فى القاهرة الصيف ده.. و نبهتنى لموضوع انعدام الامن و الامان... و فى الحقيقة هى مطاقتش تقعد فى القاهرة اكتر من يوم واحد و قالت لى انها عايزة ترجع امريكا!!!!!, و اضطريت انى اخدها الغردقة عشان تحس بجمال مصر...

اللى عايز اقوله... ان اللى جى من برة بتحصله صدمة ثقافية, زى بالظبط اللى بتحصلنا لما بنروح اوروبا او كندا لاول مرة.. (انا ماكنتش مصدق موضوع الصدمة الثقافية و الحضارية, بس صدقتها لما رحت اوروبا و رجعت... و فى الحقيقة هى بتحصل للواحد لما بيرجع البلد تانى)

[znaty]

بقي انا برده اللي مغلبك ؟؟؟

سريعا كدة علشان مانخشش في دائرة مغلقة ونتعب في قلب بعض

- اعتزازنا بمصريتنا لو ضرورة زي ما انت بتقول يبقي ماينفعش نقول ( بلد بنحس بالفخر لما بنيجي منها ..وبلد بنحس .... الى اخره ) ومتهيالي معظم المداخلات في الموضوع دة ماتحسسش بالفخر اطلاقا وبعدين يا هيتش ..فكرني الله يخليك ..امتي انا قلت او حتى لمحت ان الهجرة خيانة للوطن او ان النقد عدم وطنية ؟؟؟؟؟؟؟؟ فين بالله عليك؟؟

في الهجرة قلت مليار مرة انها في الظروف الحالية حاجة ضرورية بدليل ان انا كمان مهاجر

وقلت ان حتى فكرة الحياة في كندا طول عمرك برده صح بس بشرط ماتقطعش روابطك ببلدك وخللي ولادك مرتبطين ببلدهم علشان تفضل هناك طول العمر مصري ومحتفظ بهويتك

وبعدين هو انت بتوقعني في تو والا ايه ؟؟ الراجل لو كان بيكره مصر ماكانش رد اخر رد ليه بالشكل دة ..انا بس بالفت انتباهه ايه اللي ممكن يحصل من الكلام دة ..

فيه فرق بين النقد للبحث عن حلول وبين تقليب مشاعر الناس على بلدهم وهيا موش ناقصة خلق شعور بعدم الانتماء اكتر من كدة ..ممكن تهامي اصلا مايكونش دة قصده اطلاقا ..بس دة اللي ممكن يتفهم من كلامة

- سبت اللي مقصود من الدعاء وقعدت تشرحلي اسباب النزول وصحة الحديث

ياخي ادعي بس ومالكش دعوة ؟؟؟

كدة جدل من غير فايدة يا صاحبي..وبعدين هو ابن العثمييينيين اللي قال كدة ؟

- يا سيدي حد قال احنا جرنان الاهرام

انا باقولك فيه فرق بين الدعوة للاصلاحوالحزن على حال البلد .. وبين الدعوه للخلعان والتبرؤ من مصر والمصريين ..والكلام واضح يا هيتش موش عاوز لعب بالالفاظ

نقطة البهارسيا دي انا كنت باهزر موش اكتر بس الواضح انها اتفهمت غلط

متفق معاك نسبيا ..بس انا كان قصدي ..هو انت عمرك شفت حد منهم بيشتم في بلده رغم كل شيئ؟ للمرة التانية ...النقد لمحاولة الاصلاح حاجة ..والنقد للتبرؤ منها حاجة تانية

- اسمحلي بأه ..دة رايك الشخصي ..ماهوش قران يعني

وانا سمعت من ناس كتير عكس الكلام دة ..ولسة حتى ماكبروش في السن والله

جايز انت صحتك مساعداك ..دة موضوع تاني

- سيبت معني الكلام وبسالني عن الباز علشان اقولك طفش من البلد

طب تقدر تقوللي فين مجدي يعقوب الوقتي ؟؟

استاذك دة صح ؟؟

كان في مصر بلده ..بيعلم صغار الاطباء في حملة للنهوض بمستوي علاج امراض القلب في مصر

وعامل مؤسسة مجدي يعقوب اشهر من نار على علم طبعا

وكل كام شهر يرجع مصر يعمل عشرات العمليات المجانية لولاد بلده

مصري بجد

والباز بالمناسبة عمره مانساش بلدة وهو هناك ..رجع ميت مره علشان يعمل فيها مشروعات بس لا حياة لمن تاندي طبعا

بس هو برده مابطلش ينادي

ويهاتي

هايفضل لغاية ما يموت

علشان مصري بجد

- موش غلطة حد ..اه ..احنا كدة للاسف حانعمل ايه يعني ؟؟

برده بحبهم ..احسن مايكون طبعهم مثلا الخيانة زي س من شعوب المنطقة من غير ما اذكر حد لحد يزعل مني

ادعيلك ..يا خرابيييي عالدعا اللي هادعيهولك يا هيتش ..خد من قلبي وصر

احسنلك تطلب اللجوء السياسي لمسجد

باهزر يا هيتش ..مهما اختلفنا احنا برده اصحاب

والاختلاف في البتنجان لا يفسد لاي طبخة قضية يعني

ولينا لقاء في كندا قريب هايبقي مذبحة الدم هايبقي للركب ..اصلي هاطلب ستيك bloody :)

الله يسامحك يا Z ...بقي أنا باوقع بينك و بين تومي ...طب ليه ...و بعدين هو أنا اللي دخلت و فين ما يوجعك ...علي العموم مافيش مشكلة هاتها علي و أنا عارف إن كابتن تي عمره ما حيزعل مني

- نرجع لموال مصر و كندا اللي ما بيخلصش ...يعني سعادتك مقتنع بالهجرة لأن ظروف مصر وحشة بس مش عايزنا ننقد مصر و عايز علي طول يبقى لينا روابط بالوطن الأم ...موافق طبعا كلام ما عليهوش غبار بس مش مقتنع بحكاية ما ننقدش ديه ...المشكلة إن اللي مش عايزين حد ينقد مصر طريقة لعبهم هي يالا انقد كندا و الغرب و خلاص و هو ده المشكلة في رأيي ...أي مقارنة في الوقت الحالي ما بين مصر و كندا مش في صالح مصر ....مش عايز حد ينقد مصر صعبة بس ممكن أفهمها بس ليه يكون الرد ذم و اشتم في كندا اللي أنت نفسك مختارها تهاجر ليها ...صراحة مش فاهم البارادوكس ده

- دعائك بالايات اللي موجهة أصلا لبني اسرائيل هو اللي غير مفهوم يا عم الحاج .....و مين قالك اني ما بادعيش لمصر و مين قالك اني ما باساعدش البلد بحاجات كتير مش هنا مكانها .....مشكلتنا كمصريين كلام كلام و شعارات بس ما فيش فعل ...... بالنسبة لاراء الشيوخ السلفيين في مصر فمعروفة يا Z من أول الشباب الحلو اللي عندك لغاية مرشد الأخوان و تصريحه الشهير طظ في مصر

- حاشا لله كلامي مش قران طبعا ...بس برضه كلام اللي بتسمعلهم مش قران ....أنا ما باتكلمش من خلال تجربتي الشخصية و علاقاتي الأجتماعية و بس ...أنا دكتور يا باشمهندس ...شغال في كندا بقالي ٤ سنين و نص ...شفت حالات أنسانية بالالاف ...و في لحظات الضعف البشري ...شفت الدفء في المشاعر و شفت البرود في المشاعر ....زي ما شفت في مصر برضه ....حتقول إيه في ديه بقي ..... الفرق الاساسي إن مصر كلام كلام و ما فيش فعل .....كندا و الغرب العكس تماما انما حكاية إن الشرق كله مشاعر أنسانية و دفء أسري و الغرب العكس باعيدهالك تاني ..هجص في هجص

- ما هو ما ينفعش تستشهد بالباز و مجدي يعقوب و تقولي سبت المعني و مسكت في مش عارف إيه ....الاتنين أصلا طفشوا من البلد لما كان حالها أحسن من دلوقتي بمراحل ...مجدي يعقوب لا أستاذي و لا حاجة ده يا عيني سدوها في وشه من و هو لسه في النيابة و اتقاله إنت ما تنفعش جراح ...الرجل طفش من البلد كلها و رجعلهم خبير أجنبي ...بيعمل عمليات في أبو الريش و في مستشفيات أستثمارية كمان ....نتايج عملياته في مصر لا تقارن بنتايجها بره .....الحقيقة السبب عوامل كتيرة منها ما هو راجع له و منها ما هو ما لوش علاقة بيه و الباز و زويل شرحه بيحرتوا في البحر ...قصدك نكمل حرت معاهم ...من غير ما تقول بيحصل يمكن مش علي مستوي عطاء الناس ديه بس علي قد ما ربنا يكرم ...

- عايزني ألجأ لمسجد ...يا ريت يا z ...فيه جامع في دانفورث عيني عليه في الرايحة و الجاية و نفسي أخشه بس ربنا ما يسرش لسه ..يا رب بس الامام ما يبقاش من عرعر

- لا يا عم مش عايز آكل معاك خلاص .....كفاية علي تهامي أهو غاوي ستيك زي حالاتي ....أبقي آكل معاك في الكاستن علشان تظبط الجرسونات هناك و توصيهم ما هي حتي ديه محتاجة كوسة

انا متهيالي انت تسيب التوبيك دة يا تهامي ..وتشوفلك توبيك ايجار جديد

بص يا د هشام

انا خايف لنوصل لمرحلة الرد لمجرد الرد وخلاص من غير مانحاول نفهم بعض

عموما انا موش عاوز ازيد واعيد مليون مرة في كلام انا وضحته مليون مرة بس برده كله عاوز يفهم بمزاجة..

يا سيدي ربنا ما يجيب زعل ..من حقي يكون ليا راي مختلف زي ما هو حقك ..حتى تبقي شلة طعمها وحش لو كلها راي واحد ..الاختلاف مطلوب وشيئ محمود يعني

2- قلت قبل كدة يا د هشام فيه خيط رفيع جدا من النقد بغرض الاصلاح ..والنقد بغرض التنفير من البلد

ومتهيالي سيل المداخلات انت شايفها دي كله تنفير من البلد وشب ولعن موش حزن والا هو محاولة اصلاح ..دة السجود على اقدام كندا وكسر مليون قلة ورا مصر والمصريين واللي بييجي منها

متهيالي موش عاوزة دليل يعني ونهاتي في قلوبنا ماهي واضحة زي الشمس من كلام الشباب اللي كاتبين ..مع اني قلت مليون مرة معترفين بكل المشكل والعيوب وممكن نكتب اكتر منها ..ماحدش شاف الصورة هباب وردية في مصر ..لكن حذرنا انك تحاول تغير جلدك وتكره بلدك وخلاص..لسة فيه امل ومصر هاترجع تاني بينا ..موش بتحرضنا على كرهها والنفور منها

وبعدين موش شايفها عجيبة شوية انك تشترط ان ماحدش يذم في كندا علشان ماتذمش في مصر ؟؟

موش عارف بصراحة يا دكتور مين اولي بالدفاع عنه ؟؟ مصر والا كندا

عموما

مين هنا ذم في كندا والعياذ بالله ؟؟ انا ؟؟اعوذ بالله من الذنب دة ؟؟ ماحصلش ؟؟ انا ذكرت مخاوف انت بنفسك ايدتها قبل كدة ؟؟ايه الجديد يعني ؟معلش فكرني شتمتها امتي علشان اتوب

3- انا عديت النقطة دي وانت موش عاوز تعديها

اوكي

ايه اللي انت مستغربة من نداء ربنا لبني اسرائيل ؟ طب مانت بتصوم عاشورا علشان نجاة سيدنا موسي

مافيش مشكلة نعيد صياغة الدعاء علشان تفهمه

يارب انت اللي قلت لبني اسرائيل اهبطوا مصرا فان لكم ما سالتم علشان كانت بلد الخير والامان يارب زمان رجعها لنا تاني يارب زي ماكانت ..حلو كدة ؟

يارب انت اللي وعدت من دخل مصر بالامان ..وهيا الوقتي موش امان ..يارب رجعها تاني

كدة واضحة ؟

وبعدين موش مصر دي اللي كانت بتاكل العالم ايام المجاعة ايام سيدنا يوسف والا انا باحلم ؟؟

يعني انت بتقول انك بتساعد بلدك هنا بحاجات دة مش وقت ذكرها ..اوكي ولو اني كنت باتكلم كلام عام موش عنك او عن تهامي شخصيا وتهامي فاهمني كويس

دة كلام جميل ..كمل جميلك بقة و قول فيها اي كلمة حلوة

لاحظ انكم انتم اللي بداتم ..ماحدش شتم كندا حبيبتك.. الناس كلها ملمومة حواليكم متشوقة للحلم الجميل كندا ..بدل ماتحكوا عن كندا ..بتذموا في مصر ..وتقول انتوا اللي فتحتم مقارنة؟؟

كلمة قلناها انا وتهامي في التليفون امبارح

لو مصر امك اللي ماتعرفش تغيرها و بعيوبها ومميزاتها هاتفضل امك

وكندا هيا مراتك اللي اخترتها بعقلك علشان مميزاتها

ينفع تقارن بينهم ؟؟ينفع تحب مراتك اكتر من امك ؟؟

مصر زي جلدك .زوكندا زي بدلة حلوة انت لابسها

ممكن تغيرها في اي يوم لو اتوسخت

لكن جلدك لو غيرته هاتبقي مسخ

نقطة الدفا والعفا ..موش محتاجة تعليق اكتر من كدة ..شايفها هجص ..انت حر ..بكرة الناس تسافر وتعرف وتشوف بنفسها..وكله يعرف فين الهجص ..موش هانقعد نضحك على بعض

اذا كنت بتقوللي اني باخللي الحياة وردي في مصر ..مع اني ماقلتش كدة .ماعرفش فهمتوها منين دي ..انا قلت لازم نفضل في ترابط مع بلدنا وان ان شاء الله بكرة هايبقي احسن بس نصبر ..عموما ..انا بصراحة شايف انكم اللي مخلينها وردي زيادة عن اللازم ..

يعني ايه ماستشهدش بالباز ولا بيعقوب ..صحيح طفشوا من مصر مانكرتش ..بس مافيش حاجة تخليهم يرجعولها من فترة لفترةويحاولوا يساعدوا اهلها الا حبهم ليها ..مين اللي هايجبرهم يعني ؟حتى المثل الحلو فينا بتشكك فيها وتقوللي نقد ؟؟يا اخي شوية رحمة

اما النقطة الاخيرة بتاعة نتغدي مع بعض ...بدون تعليق

اخيرا ..انت سيبت كلام كتير قلته انا في ردي عليك وطنشتة ..نفس نظرية العين اللي بتشوف السلبيات بس وخلاص وتطليع القطط الفاطسة ..التي لا تنتمي بقريب او ببعيد للنقد بهدف الاصلاح قد ماهيا بتقرب بالتنفير

وادي النتيجة ..البهوات اللي ماصدقوا يطلعوا لبلدهم السكاكسن وقعدوا يشتموا في الزحمة ..بدل مايبقي الموضوع كندا التي رايتها ..بقي مصر التي شتمتها

خلاص ..انا من النهاردة ..سكتم بكتم