كندا التي رأيتها :)

[Spanish Eyes]

استاذ hiema الفيش والتشبية للزوج والزوجة لو رحت هنا حتلاقي كنوزززز

http://www.egyptiantalks.org/invb/?showtopic=65889

[hiema]

استاذ hiema الفيش والتشبية للزوج والزوجة لو رحت هنا حتلاقي كنوزززز

http://www.egyptiantalks.org/invb/?showtopic=65889

شكرا للتوضيح و فعلا ال topic ده مليان كنووووزززززززززززززززززززز

[nabout]

عزيزى د/ تهامى

بجد والله مش عارف اشكرك ازاى على اسلوبك الرائع . فرق معى كتير تجربتك مع كندا وجددت الامل فى يارب اقدر ارد جميلك وعلى فكره حكايتك عندى احلى واجمل من اى شىء مادى ممكن كان يساعد الواحد ربنا يباركلك بجد . انا متابع شره ليك ولل د/ ابراهيم . والحمدلله نويت اقدم على الهجره اه صحيح انا تايه دلوقتى لحين اعرف راسى من رجلى جوه المنتدى الرائع ده بس هوعدك انى قبل ما افكر اسال اى سؤال انى ادور كويس عشان حتت الاسائله المستفزه ال انت ما بتحبهاش . وعموما انا بدور يمكن حد مؤهله زى (بكالوريوس كيميا خاصة(كيميائى يعنى ) استفسر منه ايه ظروف الشغل وبفكر فى امكانية تغيير الكاريير لو حبكت .

بس بصراحه الف شكر على اسلوبك الرائع وكلامك ال من القلب للقلب ربنا يوفقك ويكرمك

[nabout]

اشكرك يا معلم عتريس بجد

اولا نبوت دله لقب العيله واسمى (احمد شحاتة فؤاد نبوت) جامد مش كده ماشى مع المعلم عتريس انا فى ايديك اليمين يا ريس

ثانيا دى حاجه عشان اقدر اعمل الهجره ثالثا انا بقضى فتره الجيش كظابط احتياط وربنا بيسهلها وقربت اخلص

رابعا وده الاهم انا اساسا كرهت علوم لمليون سبب وشغال من فتره كبيره فى شركه من الباطن بتاعت كمبيوتر الجيش الله يسمحه ضيعها منى مع انى بدات اوصل فيها

وخامسا اشكرك بجد على اهتمامك بالموضوع

[nabout]

بصوا انتوا اخواتى وبالذات التهامى يا اخويا انا هاسيب الكيميا وبفكر انى ادرس طيران ولقيت سينيكا بتقدم درجه البكالوريوس فيه وبصرحه هى كانت امنية حياتى بس هنعمل ايه عمرك ما هتاخد ال انت عاوزه فى مصر بس الحمدلله ربنا كرمنى ووقع فى طريقى االدكتور تهامى وقدر باسلوبه انه يفك الهم من على وشى وانى اقدر احقق القديم ال انا لو فضلت قاعد فى مصر هفاضل احلم بيه بس ويمكن انساه اصلا . طبعا العائق المادى قائم وربنا يسهلها من عنده واقدر ادبر فلوس الهجره واعرف طريق الهجره كويس من خبراتكم السابقه والحاليه . وبجد شكرا ليكم انتم عيلة ظريفه متماسكه شايله بعض تخلى الواحد يطمن انه لما يجى عندكم انه هيكون مسنود

[goodfaith]

تسلم ايدك يا باشا ...فعلا وجبة دسمة

ما زلت عند رأيي يا باشا ...عربية بسواق و اشتري دماغك :)

بالنسبة للتدخين في العربية فعلا في طريقه للمنع لو كان فيه أطفال في العربية

ربنا يخلّيك يا حبيبي...

والله أنا بافكّر تفكيراية تانية هابقى أحكيلك عليها بعدين ;)

وأنا فعلاً مستني اليوم اللي يجروا فيه ورا المدخنين ، زي جهاز الرادار كده لما بيجروا ورا اللي بيكسروا السرعة!

أوعى تكون بتدخن!

لا يا باشا الحمد لله لا بادخن و لا باطيق ريحة الدخان بانواعه .... علي فكرة النهارده و أنا سايق علي ال-QEW كل اللوحات الضوئية كانت بتحذر من التدخين في سيارة لو فيها أطفال و كاتبة كده It's the law

واضح انهم نفذوا الأقتراح فعلا

ياللا بقى عايزين مزيد من الهاند أوفرز الدسمة

بناضل بقالي 4 ايام عشان اخلص الموضوع وتقريبا جالي استبوحس :)

وفيه حاجات كتير اوي بابقى عايزة اعلق عليها بس باقول خلاص بقى مش وقته

على فكرة من سنة ونص تقريبا نزل قانون بمنع التدخين في السيارات التي يتواجد بها اطفال اقل من 18 سنة في اونتاريو وكانت نوفا سكوشيا مطبقة القانون ده قبلها بفترة

يعني حتى لو ابنك 16 ولا 17 سنة وبيدخن في الخباثة وانت ابوه وسايق العربية ممنوع حضرتك تدخن وهو موجود جنبك والا فيها غرامة بس مش فاكرة كام الصراحة

[goodfaith]

بلادي وان جارت علي عزيزة وقومي وان بخلو عليا كرام

الحكايه دي بطلت خلاص

معلش يا إيهاب... الحتة دي مش عارف عدت عليّا ازّاي وما اخدتش بالي منها!

أنيس منصور له رأي مختلف فعلاً زي ما بتقول ، ورأيه...

بلادي وإن جارت عليّ فهي ظالمة ، وأهلي وإن ضنو عليّ فهم بخلاء وليسوا كراماً... ولقد قالها الشاعر طرفة بن العبد:

وظلم ذوي القربي أشد مضاضة *** على النفس من وقع الحسام المهنّدِ

لمّا تلاقي الظلم جايلك من بلدك وأهلك ، تبقى وحشة ويبقوا وحشين! عارف... زي ما فيه أمهات قاسيين على أطفالهم وأمهات في قمة الحنية وأم تخنق طفلها عشان يخلو لها الجو مع عشيقها! B)

فعلاً ... مصر قاسية على ولادها... جوّه وبرّه! B)

ولمّا تلاقي أهل بلدك أكتر ناس يتعبوك ويظلموك ويضيّعوا حقوقك... هتقول إيه؟

ممكن نقول معلش ، أصل الحالة الاقتصادية في البلد بقت صعبة وكده!

لكن... لما ألاقي واحد عاوز بالعافية يتخطّاني في الطابور ، ويتنرفز عليّا لما أفكره بإني واقف قبله من مدة ، دي إيه علاقتها بإن (أصل الحكومة ضاغطة ع الناس ، لدرجة إن الناس بقت مش طايقة الهدوم اللي عليها)!

طب ما يوجّه النرفزة والكراهية للحكومة... أنا مالي انا؟!

لما موظف حكومي يضيّع وقتك ، ولا يفرق معاه الخساير اللي هتخسرها بسبب كسله إنه يفتح دفتر يبص فيه ويمضيلك!

لما موظّف زيّك يطلّع عينك عشان (أصل الختم مش واضح) أو (لازم تسافر تطلّع بطاقة الرقم القومي من القاهرة تبع محل سكنك ، مع إنها المفروض من أي مكان ف الجمهورية) أو موظّف تاني يتفنن إنه يدبّسك في سنة زيادة تدفعها لتصريح العمل مع إنها راحت خلاص وما كنتش محتاجها! B)

إيه علاقة كل ده بالحالة الاقتصادية والحكومة والهجص ده كله؟!

دي طباع وأخلاقيّات متوارثة ومكتسبة!

تيجي تقوللي بلادي وعزيزة وكرام؟! B)

يا راااااجل :lol:

تصور انا قريت الكتاب بتاع انيس منصور الي فيه المقالة دي زماااااااااان واقتنعت بيها جدا ولما جت سيرة الموضوع ده هنا وباشمهندس ايهاب قال الموضوع ده بطل خلاص كنت عايزة اكتب عن راي انيس منصور ده بس كتمت في قلبي B)

الظريف انه الحمد لله حضرتك مش مخلي نفسي في حاجة لحد دلوقت بس بجد شايلة هم اني اخلص التوبيك واقف في طوابير الانتظار

ربنا يرجعك بالسلامة

[myusername]

بناضل بقالي 4 ايام عشان اخلص الموضوع وتقريبا جالي استبوحس po::

وفيه حاجات كتير اوي بابقى عايزة اعلق عليها بس باقول خلاص بقى مش وقته

على فكرة من سنة ونص تقريبا نزل قانون بمنع التدخين في السيارات التي يتواجد بها اطفال اقل من 18 سنة في اونتاريو وكانت نوفا سكوشيا مطبقة القانون ده قبلها بفترة

يعني حتى لو ابنك 16 ولا 17 سنة وبيدخن في الخباثة وانت ابوه وسايق العربية ممنوع حضرتك تدخن وهو موجود جنبك gsp_) والا فيها غرامة بس مش فاكرة كام الصراحة

الاخت الفاضلة goodfaith

حضرتك ما شاء الله عندك معلومات قوية جدا...

و على فكرة توقيع حضرتك جميل جدا... و انا بموت فى أبيات الشافعى.. لان فيها الكثير من الحكم.. و وكيع كان معلم الشافعى.

انا بس حبيت اشكر حضرتك.. بس للاسف انتى معندكيش قهوة لا مؤاخذة يا توهامى باشا

اهلا استاذ ماي يوزر نيم لا معلومات قوية ولا حاجة انا بس باحب نشرة الاخبار وبتابعها كل يوم عشان كده باكون عارفة اخبار البلد وانا فاكرة وقت ما كانوا بيتكلموا عن القانون ده في الاخبار وكانوا بيقولوا ان نوفاسكوشيا مطبقاه وفي اونتاريو عايزين يطبقوه وهاتكون تاني بروفنس تطبقه في كندا

وفعلا الابيات لامام الشافعي

الا ايه اخبار البورصة المصرية اليومين دول :blink:

البورصة كانت نازلة من ساعة موضوع ماتش الجزاير, و كانت بتطلع حاجات بسيطة, لكن الاسبوعين اللى فاتوا فضلت تطلع لغاية جلسة يوم الخميس, و السبب الرئيسى أعتقد ان عشان نجيب ساويرس أخد حق نقض الحكم الخاص بشركة موبينيل.. و مشكلتها مع فرانس تيليكوم.. ده غير ان البورصة الامريكية حققت ارقام جديدة الاسبوع اللى فات, و ده أثر طبعا.

الاسبوع ده كله هيرمى و هيطلع يجرى.. هههههههههه ده لو محدش رمى الاسبوع اللى فات... لانها شىء طبيعى انها تنزل و ده اسمه "تصحيح", ده غير ان سهم اوراسكوم نازل فى لندن.. و كمان البورصة الامريكية نزلت جامد.

من على قهوة البورصة.. ماى يوزر نيم :amb:

تم تعديل 24 يناير 2010 بواسطة myusername

[goodfaith]

بناضل بقالي 4 ايام عشان اخلص الموضوع وتقريبا جالي استبوحس :lol:

وفيه حاجات كتير اوي بابقى عايزة اعلق عليها بس باقول خلاص بقى مش وقته

على فكرة من سنة ونص تقريبا نزل قانون بمنع التدخين في السيارات التي يتواجد بها اطفال اقل من 18 سنة في اونتاريو وكانت نوفا سكوشيا مطبقة القانون ده قبلها بفترة

يعني حتى لو ابنك 16 ولا 17 سنة وبيدخن في الخباثة وانت ابوه وسايق العربية ممنوع حضرتك تدخن وهو موجود جنبك :lol: والا فيها غرامة بس مش فاكرة كام الصراحة

الاخت الفاضلة goodfaith

حضرتك ما شاء الله عندك معلومات قوية جدا...

و على فكرة توقيع حضرتك جميل جدا... و انا بموت فى أبيات الشافعى.. لان فيها الكثير من الحكم.. و وكيع كان معلم الشافعى.

انا بس حبيت اشكر حضرتك.. بس للاسف انتى معندكيش قهوة لا مؤاخذة يا توهامى باشا mfb:

اهلا استاذ ماي يوزر نيم لا معلومات قوية ولا حاجة انا بس باحب نشرة الاخبار وبتابعها كل يوم عشان كده باكون عارفة اخبار البلد وانا فاكرة وقت ما كانوا بيتكلموا عن القانون ده في الاخبار وكانوا بيقولوا ان نوفاسكوشيا مطبقاه وفي اونتاريو عايزين يطبقوه وهاتكون تاني بروفنس تطبقه في كندا

وفعلا الابيات لامام الشافعي

الا ايه اخبار البورصة المصرية اليومين دول

البورصة كانت نازلة من ساعة موضوع ماتش الجزاير, و كانت بتطلع حاجات بسيطة, لكن الاسبوعين اللى فاتوا فضلت تطلع لغاية جلسة يوم الخميس, و السبب الرئيسى أعتقد ان عشان نجيب ساويرس أخد حق نقض الحكم الخاص بشركة موبينيل.. و مشكلتها مع فرانس تيليكوم.. ده غير ان البورصة الامريكية حققت ارقام جديدة الاسبوع اللى فات, و ده أثر طبعا.

الاسبوع ده كله هيرمى و هيطلع يجرى.. هههههههههه ده لو محدش رمى الاسبوع اللى فات... لانها شىء طبيعى انها تنزل و ده اسمه "تصحيح", ده غير ان سهم اوراسكوم نازل فى لندن.. و كمان البورصة الامريكية نزلت جامد.

من على قهوة البورصة.. ماى يوزر نيم :lol:

كنت متصورة انها بتتاثر تاثير مباشر بالبورصة الامريكية بس على كلامك يبقى فيه فرق توقيت

الداوجونز صحيح وصل فوق ال 10700 الاسبوع اللي فات بس آخر 3 ايام نزل تحت ال 10100 ;) طبعا الارقام تقريبية

وربنا يستر

هو حضرتك واستاذ س س مفتحتوش توبيك خاص بالبورصة والاسواق في المحاورات؟

[myusername]

اهلا استاذ ماي يوزر نيم لا معلومات قوية ولا حاجة انا بس باحب نشرة الاخبار وبتابعها كل يوم عشان كده باكون عارفة اخبار البلد وانا فاكرة وقت ما كانوا بيتكلموا عن القانون ده في الاخبار وكانوا بيقولوا ان نوفاسكوشيا مطبقاه وفي اونتاريو عايزين يطبقوه وهاتكون تاني بروفنس تطبقه في كندا

وفعلا الابيات لامام الشافعي

الا ايه اخبار البورصة المصرية اليومين دول

البورصة كانت نازلة من ساعة موضوع ماتش الجزاير, و كانت بتطلع حاجات بسيطة, لكن الاسبوعين اللى فاتوا فضلت تطلع لغاية جلسة يوم الخميس, و السبب الرئيسى أعتقد ان عشان نجيب ساويرس أخد حق نقض الحكم الخاص بشركة موبينيل.. و مشكلتها مع فرانس تيليكوم.. ده غير ان البورصة الامريكية حققت ارقام جديدة الاسبوع اللى فات, و ده أثر طبعا.

الاسبوع ده كله هيرمى و هيطلع يجرى.. هههههههههه ده لو محدش رمى الاسبوع اللى فات... لانها شىء طبيعى انها تنزل و ده اسمه "تصحيح", ده غير ان سهم اوراسكوم نازل فى لندن.. و كمان البورصة الامريكية نزلت جامد.

من على قهوة البورصة.. ماى يوزر نيم mfb:

كنت متصورة انها بتتاثر تاثير مباشر بالبورصة الامريكية بس على كلامك يبقى فيه فرق توقيت

الداوجونز صحيح وصل فوق ال 10700 الاسبوع اللي فات بس آخر 3 ايام نزل تحت ال 10100 :lol: طبعا الارقام تقريبية

وربنا يستر

هو حضرتك واستاذ س س مفتحتوش توبيك خاص بالبورصة والاسواق في المحاورات؟

البورصة الامريكية بتؤثر على العالم كله.

البورصة المصرية نزلت النهاردة زى ما توقعت... نزلت حوالى 145 نقطة او شىء من هذا القبيل.

بعض الاسهم نزلت 7%.. و ده طبعا نتيجة جنى الارباح فى المقام الاول... بس انا شخصيا بعت يوم الخميس و خلعت لانى كنت متوقع جدا النزلة دى

البورصة المصرية مشكلتها هى عدم النزاهة و عدم وجود شفافية... و الشفافية تعنى شفافية الاخبار (ان الناس كلها تعرفها فى نفس الوقت) و تأثيرها على الاسعار.

البورصة المصرية تتأثر بشكل مباشر بسوق لندن, لان كل الاسهم الكبيرة موجودة فى لندن.. و شهادات الايداع الدولية فى لندن..

و الاسهم الكبيرة هى اللى ليها ثقل فى المؤشر, و هى اللى بتنزل او تطلع بقية الاسهم.

طبعا احنا برضه بنتأثر بالبورصة الامريكية... بس مش فى كل مرة.. لان الموضوع مرتبط "بالجو العالمى" او الحالة العالمية.. و لكن طبعا حاجة زى الخبر اللى جه على بنك اوف أمريكا.. اكيد أثر علينا بشكل او بآخر.

بالنسبة للتلاعب... للاسف بيحصل طول الوقت, و اللى بيشربها هما صغار المستثمرين.. و هنا اعنى الناس اللى هما حاطين من اول 50 باكو لغاية نص مليون كده..

طبعا موضوع فروق التوقيت ده بيحصل فيه احلى شغل... و خصوصا يوم الحد..

عموما مبيشربش الكلام ده الا الناس اللى هما لسه جداد.. او معندهمش خبرة فى التعامل مع السوق..

لكن الناس اللى مقطوعة زيى.. بتخرج وقت اللزوم :lol:

ده غير طبعا ان الواحد اصلا خلاص حفظ حركة السوق.. لان السوق بيمشى فى حركات او فى خط معين.. و ده محفوظ للى متابع..

بالنسبة للتوبيك.. هو فيه مشكلتين... اولا انى خايف ان مفيش حد يهتم.. و ثانيا لان كل اللى انا اعرفه.. اتعلمته بالبركة.. يعنى بالاحتكاك مع السوق و التعامل فى الاسهم.. لكن معنديش "علم" بالموضوع..

[SoSo R]

مصاء الخير ...من عالم البحار :rolleyes:

أصل الدنيا بقالها 24 ساعة بتمطر متواصل مابين تنديع خفيف لمطر غزير...

هو التهامى إتخطف؟!!!

أصلى شايفة نداءات وعودى يا هاميس وكدة... :rolleyes:

بصوا يا جماعة دأبنا أنا والدكتور المبجل هشام إبراهيم فى حالات إختفاء دكتور تهامى على إصدار إنذار أحمر له :rolleyes:

بس هو من ساعة ما أخضر وهو مابقاش يهمه حد ولا حاجة...غير إن هشام كمان واضح إنه زهق :wub:

يا دكتور تهامى إنت عامل زى منير مراد فى فيلمه ...بايع تذاكر الشو قبل مايكون فيه شو أصلا...

واديك شفت محاولاتى فى الشوبنج فشلت فشل ذريع ولا حد عبرنى :blush2:

فالأمل فيك يا رأفت

وبعدين أنت مش كنت واعدنا بالجزء التانى من تفاصيل المعادلة

هو انت بتحمرق وبعدين تجيبها فى الغلبانة إسكندرانية وتقول الشوبنج عشان جاية كمان 7 شهور

يعنى طابور الدكاترة اللى مهاجر ده حيروحوا يعملوا إيه؟؟

يسيئوا الأرض :blush2:

المعادلة أهم من الشوبنج يا باشمهندس دكتور

أنا هسيبلك قنبلة فى المداخلة دى كمان وأنت وذوقك بأه.... ياتيجى ترد ع الجماهير اللى بتهتف...

يا إما هامتنع عن المشاركة فى موضوع الشوبنج بتاعك وأى مواضيع أخرى :blink:

ملحوظة هذة المداخلة ستنفجر إذا لم يتم الرد عليها فى خلال 12 ساعة

[MZohairy]

الله يرحمك يا دكتور جوهر قعد يقولنا اسماك القش و القاميط (بعد حذف الراء) لغاية ما السمك خلص في مصر

الدكتور تهامي كان لسه معايا امبارح في كونفرانس كول مطوله و بيطمنكم عليه و هو زي الفل

محدثكم من طوكيو

عبد البر البسطاويسي

من أمام محل السميط

[moheltohamy]

معلش يا سادة ، أنا الفترة اللي فاتت كنت مش في المود ، وكمان جات الخناقة بتاعة كيبيك دي سدت نفسي عن المنتدى بكل ما فيه! :ninja:

وحسيت زي ما حس سعد زغلول! :sad:

وكمان الشوبنج اللي غرزت فيه غرزة سودة ، ومش عارف أفلفص منه... بقيت بتاع الجبنة! :blush2:

عموماً ، فيه جزء مبدئي منه جاهز ينزل... ده قبل الدخول في أي فرع من فروع الشوبنج؟ نذيع؟ wst::

[moheltohamy]

وعشان سوسوراني هتحط السيخ المحمي في صرصور ودني ، ومدام نادين بتدبدب وعاوزة الشوبنج ، وهشام هيغنيلي الأغنية بتاعته نسخة فبراير ، ونرمين وسبانيش آيز خدوا الفيزا مخصوص عشان الشوبنج ينزل ، واسكندرانية كنداوية بتشجب وبتدين ، وعاملة مظاهرة ، ومش بعيد ألاقيني أخدت إنذار من الإدارة عشان ممتنع عن الشوبنج... يبقى خدوا الدخلة المبدئية بتاعة الشوبنج ، على ما أكمّل الرتوش البسيطة المتبقية في الجزء التاني بتاع شوبنج الأكل...

نيجي بأه لموضوع الشوپنج...

الشوپنج في كندا متعة في حد ذاته... لمّا يكون نفسك في أي حاجة ، وتلاقيها موجودة ، وسعرها حلو كمان. الصراحة مش كل كل حاجة يعني ، بس أغلب اللي تحلم بيه! واللذيذ التاني إن معظم المواقع الأمريكية للشوپنج عن طريق الإنترنت بتسمح بالتسوّق والشحن لأمريكا وكندا.

قبل ما نتكلم ع الشوبنج ، أحب أوضح نقطة... بالنسبة للأسعار ، هيلفت نظرك إن الأسعار في مصر رخيصة جداً ، مقارنةً بالسعودية والإمارات وكندا... بس أنا لفت نظري حاجة غريبة شوية ما اعرفش إيه مدى دقتها... كل ما قيمة العملة القومية مرتفعة ، كانت الحياة أغلى ، والأسعار أعلى! الحاجات في مصر (أصناف الأكل الرئيسية والأدوية وأغلب المنتجات المحلية) هتلاقيها أرخص بكتير من أي حتة تانية. الإمارات والسعودية وقطر أغلى من مصر صحيح بالنسبة للأصناف اللي فاتت دي ، لكنها برضه أرخص من كندا. وإنجلترا اللي جنيهها الاسترليني داخل في 10 جنيه الأسعار فيها أعلى من كندا ، كما رأيت في مطار هيثرو والشوبنج أونلاين (وباتعجّب من العرب اللي غاويين يعملوا الشوبنج بتاعهم من لندن)! البحرين (اللي الدينار بتاعها يكافئ 3 دولار) هتلاقي الأسعار فيها غبية بهبل ، وأغلى من كندا ومن الكل! الله أعلم بقى الوضع عامل ازاي في الكويت (اللي دينارها بـــ 20 جنيه)! وعندك جنوب أفريقيا اللي الراند فيها أرخص من الجنيه (الجنيه يكافئ 1.6 راند) شفت هناك أحلى شوبنج وأرخص أسعار ممكن تتخيلها في حياتك سعادتك!

بس الكلام ده غالباً على متطلبات الحياة الأساسية من أكل وشرب ، وبعيد عن الأصناف الهاي كواليتي. باستثناء جنوب أفريقيا اللي كل حاجة فيها رخيصة... أروع شوبنج ممكن تقابله أو تتخيله ، من تنوّع الأصناف وجودتها وأسعارها!

هتلاقي وحدة التعامل الشرائية هيّه الدولار الكندي ، واللي المفروض تعادل الوحدة في أي دولة في العالم. يعني كان حصل حوار في الموضوع ده قبل كده ، ولاحظت إن البيبسي كان سعرها في الإمارات بدرهم ، وفي السعودية بريال ، وفي الكويت بـــ 100 فلس ، وفي كندا بدولار ، يبقى المفروض في مصر بجنيه ، مش باتنين جنيه وربع! ده مجرد مثال... هتعرف بعد شوية إن كندا ممكن تكون أرخص من الطقم ده كله (لو اعتبرنا البيبسي كمثال). لكن بصفة عامة ، في معظم الأصناف اللي هتشتريها ما تحاولش تقارنها بالقيمة المكافئة ليها بالجنيه عشان ما تتعبش نفسياً. وممكن تتعامل معاها كما لو كان الدولار الكندي يكافئ الجنيه المصري عشان تريّح بالك.

أكلمك الأول عن الضرايب بتاعة المبيعات ، ودي بتدفعها على كل حاجة بتشتريها ، والسخيف بقى إن الأسعار المُعلَنة لا تشمل الضريبة ، يعني السعر اللي تقراه تعمل حسابك إنو لسه فيه ضريبة هتتضاف عليه! طبعاً في مصر وبلادنا العربية مفيش الحركات الساقطة دي خالص... استريت فوروارد! ولما رحت جنوب أفريقيا برضه لقيتهم دوغري فوروارد! إسفوخص على كده يا كندا!

مع بداية وصولنا كندا كانت ضريبة المبيعات 14% كانوا عبارة عن 6% بتاخدهم الحكومة الفيدرالية الكندية (GST أو Goods and Services Tax) ، و 8% بتاخدهم ولاية أونتاريو (PST أو Provincial Sales Tax). ولما رحت مونتريال لقيت الضريبة هناك 13% أو باين 12.5% وقعدت أحسد في العيال ولاد المحظوظة الكيبكواز الخونة!

بعدها بكام شهر قامت الحكومة مقللة النسبة اللي بتاخدها (الـــ GST أم 6%) وبقت 5%. إشطة!

لما رحت ألبيرتا لقيت إن الضريبة هناك 5% أول عن آخر! النسبة بتاعة الحكومة وشكراً على كده! طب والـــ PST يا جدعان؟! إل نيا پا! وتعليق الباشمهندس أشرف رضوان على الحكاية دي (الكامباني مان اللي جالنا البريمة مؤخراً ، واللي عايش في كالجاري) بيقول إن ألبيرتا ولاية غنية ومش محتاجة تاخد من مواطنيها 8%!ما هو دخلها من البترول مكفي مصاريفها وفايض ، يبقى ليه تزوّد الاعباء على سكانها؟! ناس زوق زوق الصراحة!

مش هاقارن ده طبعاً بالشوبينج اللي عملته في جنوب أفريقيا ، واللي أسعارها أرخص بمراحل من كندا ، وكمان وانا في المطار سلّمتهم الفواتير ، واسترجعت الـــ 12% الضريبة اللي عليها (Tax refund) ، يعني الحاجة هناك برخص التراب رسمي ، ولا تقوللي ألبيرتا ولا بطيخ!

ولو جينا نتكلّم على طرق الدفع في كندا...

طبعاً الكاش شغال في أي مكان ، ومحدّش هيقول للفلوس لأ. دي القاعدة العامة. بعد كده ، فيه طريقة شغالة زي القرد هناك في أغلب الأماكن... الديبيت كارد (Debit). الديبيت ده تقدر تقول إنه عامل زي كروت الـــ ATM اللي بتسحب بيها من ماكينة الصراف الآلي في مصر ، أو الأوقع زي كروت الماستركارد والفيزا إلكترون ، ودي كل اللي بتعمله إنك مجرد ما تسحبها أو تسوايبها (Swipe) في ماكينة الدفع ، بتقوم محوّلة فوراً المبلغ المطلوب من حسابك البنكي لحساب البائع ، ولو حسابك فاضي مش هتتم العملية. ويليها الكروت الائتمانية (الكريديت كاردس) زي الماستر كارد والفيزا والداينرز والآميكس (أميريكان إكسبريس) ، ودول المفروض إنهم شغالين في أي مكان محترم ، ودول أساس بناء السمعة الائتمانية في كندا ، يعني لو معاك فلوس كاش ومعاك ديبيت ومعاك كريديت ، يبقى يُستحسَن تشتري بالكريديت ، وتسدد لما ييجي ميعاد الفاتورة ، وبكده إنتا بتبني سمعة كويّسة في البلد.

نيجي بقى لشوية استثناءات. الكاش لا يُقبَل في دفع إيجار الشقة زي ما اتكلمنا قبل كده ، وطبعاً مش هينفعك لو بتشتري أونلاين ، لكنه الوسيلة الوحيدة مثلاً لو بتشتري سندوتش هوت دوج من ع العربية اللي في الشارع مثلاً. وملحوظة غريبة شوية لاحظتها... ماكدونالدز اللي جمب البيت (مش متأكد لو كل الفروع زيه) ، البيه معلّق تنبيه إنهم رافضين التعامل بالعملات الورقية الكبيرة من فئة الـــ 50 والـــ 100 دولار!

الديبيت مش هيفيدك في الدفع أونلاين مثلاً ، لكنه مقبول في ما دون ذلك. والمشكلة التانية إن فيه حد أقصى للسحب اليومي (كان 500 دولار أول ما عملناه) ، وحد أقصى للسحب الأسبوعي (كان 1500 دولار) ، ولازم تقدّم طلب لرفع الحد الأقصى للتعامل بيه في البنك بتاعك ، وده كمان بيختلف من بنك للتاني. المطب التاني إن كل عملية بتتم على الديبيت بيكون ليها ! طبعاً الديبيت كارد مرتبط بنوع الحساب البنكي اللي طالع عليه (تبعاً للبنك نفسه) ، واللي ليه أكتر من نوع ، وكل نوع بيسمح لك بعدد معين من عمليات السحب أو الشراء عليه في الشهر مجاناً ، وبعد كده بيحط سعر لكل عملية بعد كده. طبعاً كل نوع منهم بيكون ليه مصاريف شهرية بيتنازلوا عنها (Waiving) لو المبلغ في حسابك ما قلّش عن حد معيّن.

مثال... في البنك TD CanadaTrust بتاعي ، فيه الـــ Value Account وده مصاريفه الشهرية حوالي 4 دولار ، يتم التنازل عنهم لو حسابك كان فيه 1000 دولار ، وبيسمح لك بـــ 10 عمليات في الشهر ، وبعد كده سعر العملية 65 سنت. ممكن تدخل على حساب تاني (Infinity) ، وزي ما باين من إسمه ؛ بيسمح لك بعدد غير محدود من العمليات على مدار الشهر ، بس مصاريفه الشهرية حوالي 13 دولار ، يتم التنازل عنهم لو حسابك فيه 3 تلاف دولار. فيه حساب أنقح من كده... Select Service ، وده بيسمح بعدد غير محدود من العمليات ، وبدون مصاريف خالص للسحب من أي ماكينة صراف آلي داخل كندا أو أمريكا ، وأي عدد من الشيكات أو الـــ Certified Cheques ، وبيلغي كامل المصاريف السنوية للكريديت كاردس ذات القيمة والخدمات العالية. بس ده مصاريفه الشهرية حوالي 25 دولار ، يتم التنازل عنها لو حسابك لا يقل عن 5 تلاف دولار!

الكريديت بقى مشكلته إن الأساس بتاعه إن مؤسسة الكريديت (سواء فيزا أو ماستر كارد أو آميكس أو غيرهم) بتخصم نسبة 2% على مبلغ الشراء ، والخصم ده بيكون على البائع ، والمشتري برّه اللعبة دي. يعني البائع في النهاية ما بيطولش كامل التمن اللي بتشتري بيه سعادتك طالما دفعت بالكريديت ، على عكس الديبيت. وبالتالي بعض المحلات الصغيرة ما بيكونش عندها تعامل بالكريديت وتقول لك ديبيت بس ، وفيه منهم اللي يقول لك التعامل بالكريديت للمبالغ اللي فوق الـــ 10 دولار مثلاً كحد أدنى (تبقى العملية جايبة همّها)!

كنت مرة في وول مارت ، داخل مخصوص أشتري نوتة صغيّرة عشان لو حبيت أكتب ملحوظة ع الماشي. النوتة دي كان تمنها 96 سنت ، يعني مش جايبة دولار. وانا باحاسب عليها قمت سائل البنت الكاشيير وانا مكسوف الصراحة لو ينفع أدفع المبلغ الصغير ده بالكريديت (جس نبض مش أكتر) ، ولقيتها بتقوللي اللي يريّحني! ولما سالتها ع النسبة اللي هتتخصم ، قالتلي إن وول مارت ما بيفرقش معاها الحاجات دي قد ما يهمّها في المقام الأول رضا العميل ، وإنه يكون خارج من عندهم مبسوط.

قبل ما أنسى ، موضوع الكاش باك... ممكن جداً وانتا بتحاسب الكاشيير بالديبيت كارد تقول له أنا عاوز كاش باك (وممكن تطلب منه عملات لو كنت حتحتاجها للصابواي مثلاً أو لماكينة العصائر والشيكولاتات أو للمغسلة). هيسألك ع المبلغ اللي محتاجه ، ويزوّده ع المبلغ اللي هيتسحب م الديبيت ، ويديهولك كاش في إيدك. لو جيت تدفع بالكريديت كارد ، وطلبت منه كاش باك ، هيعتذر لك عشان سعادتك دافع بالكريديت. ما تستعبطش سعادتك ، وتاخد 100 دولار مثلاً ، وهمّه يدخل حسابهم 98 والدولارين تاخدهم مؤسسة فيزا! وعشان كده استغربت في السعودية ، لما الصيدلي المصري والواد بتاع محل الشنط رجّعولي فلوس كاش بعد ما حاسبت بالكريديت! أكيد مش فاهمين الليلة ماشية ازاي ، بس جات مصلحة لاخوك!

الملفت للنظر بقى إن فيه بعض المحلات بتقبل التعامل فقط بنوع معيّن من الكريديت كارد(بالإضافة للكاش والديبيت طبعاً)... نو فريلز بيتعامل بالماستر كارد فقط ، وكوسكو بيتعامل بالآميكس. وتيم هورتونز المعفن ده بيقبل الكاش والماستر كارد فقط ، وما بيقبلش ديبيت حتى ، وده نادر الصراحة في كندا!

نيجي نتكلم على طريقة الدفع بالديبيت... سعادتك بتنتظر لما الكاشيير يقول لك إتفضل الماكينة ، هتمسك الماكينة وتنتظر لما يتكتب لك ع الشاشة (Swipe your card) ، وبالفرنساوي (Glissez مش عارف إيه) ، وتسوايب كارت الديبيت بتاعك أو تدخله في الماكينة من تحت (لو كان فيه الشريحة إياها) ، وتختار الحياب بتاعك لو حساب توفير أو جاري (بيكتبهالك SVG أو CHQ) ، ويأكّد عليك المبلغ (تضغط Ok) ، ويسالك بعدها على الرقم الشخصي (PIN code) ، تدخله ، وتصبر لما يكتبلك Approved ، وبعدها تقدر تسحب الكارت بتاعك ، ولا إمضا ولا غيره... إمضا ليه بقى ، ما همّا اتأكدوا من إنك القائم بعملية الشراء طالما عارف البين كود. والغريب إني بالاحظ الناس بتقعد تداري أوي على الزراير وهيّا بتدخل البين بتاعهم ، سواء ع الكاشيير أو على ماكينات الصراف الآلي! كل ده ، وثقافة اللزق في الطوابير مش موجودة عندهم أصلاً ، لا في الطابور ولا في البنك!

أفتكر موقف... كنت باسحب فلوس من الماكينة بتاعة البنك الأهلي في ميت غمر ، وأكتر من واحد واقفينجمب بعض مش ورا بعض ، لغاية ما جه الدور عليّا ، وألاقي واحد لازق في كتفي ، وعينيه ع الشاشة! ساعتها قلتله... تسمح ترجع ورا؟ والراجل يبرطم (إيه يا عم هوّه احنا هنسرقك؟ هنشوف إيه يعني؟!)

قللي انتا أعمل معاه إيه الأخ ده؟!

وفيه تكنولوچيا نازلة مؤخراً في كندا (مش مؤخراً أوي ، بقالها أكتر من سنة) ، وبدأت تنتشر في محلات كتير زي تيم هورتونز وبعض البنزينات ، والمنتظر تعميمها في كل مكان يتعامل بالكريديت ، وهيّا الـــ Contactless payment ، واللي أطلقت عليها ماستر كارد MasterCard PayPass.

في العادي يا إما بتسوايب الكارت من الناحية الممغنطة (المعتاد في مصر)، يا إما بتدخله من ناحية الشريحة اللي ع الكارت (زي كروت ميناتل) ، أو تديه للكاشيير يسوايبه ع الكيبورد بتاعته ، وبعدها يا تمضي يا تدخّل البين كود. إنجازاً للوقت الماستر كارد أصبح فيه شريحة داخلية يمكن قراءتها بجهاز معين عن طريق إنك تمسك الكارت في إيدك وتنقر بطرفه (Tap) ع الجهاز ده ، وشكراً ... لا إمضا ولا بين كود!

الأجدد بقى إنهم نزلوا موبايلات حديثة فيها الخاصية دي (الواد ديبو معاه موبايل منهم)! الموبايل بيتم تحميل بيانات الماستر كارد عليه بصورة آمنة طبعاً ، وبرضه هتيجي ع الجهاز إياه وتنقر عليه بطرف الموبايل. إشي خيال يا ناس!

واللذيذ إن فيزا دخلت في الحوار هيّه كمان بتكنولوچيا الـــ Contactless payment شبيهة لبتاعة الماستر كارد ، وسمّتها Visa payWave (كارت الفيزا الجديد بتاعي من TD فيه التكنولوچيا دي) ، بس دي بتهز الكارت (Wave) قدّام الجهاز بتاعهم... وشكراً. وطبعاً مبدأ التليفون برضه هيشتغل مع الليلة دي ، بس ما شفتوش لسّه!

واحنا في مصر لسّه مش معترفين بالكريديت كارد ، وبتوع فودافون يقولولي لازم يا فندم تيجي تقدّم طلب عشان تستخدم خاصية الدفع بالكريديت ع التليفون!

ناس بتنقر ، وناس بتهز ، واحنا لسّه بنقول خاصية!

نقطة تانية لفتت نظري هناك أحكيلك عليها ع السريع... هناك لما يقول لك السعر 2.99 دولار ، يعني لما تديله 3 دولار هيرجّع لك السنت. ما فيهاش نقاش دي! وهتلاقي ع الكاونتر قدّامه علبة تسيب فيها التبس لو حبيت ، وممكن تلاقي علبة عشان لو حبيت لمساعدة الأطفال أو مرضى السرطان أو غيره. مفيش لا إجبار ولا إحراج. في مصر لو فكرت ولو للحظة تطلب من الكاشيير في محل شلن أو بريزة باقيالك من السعر المعلَن ، هتاخد بصة احتقار مالهاش زي من البيّاع! وطبعاً هيقول إيه الأشكال السناكيح دي بس؟!

وممكن تلاقي سنتات أمريكية في وسط السنتات الكندية ، وبيعاملوهم على إنهم زي بعض بنفس القيمة. مش فارقة كتير أصلها.

[hgalal]

يا صلاة النبي

بقي سعادتك يا تو قائد مظاهرة ما شاء الله ما شاء الله في كره مصر

وهربان من مصر علشان الفلاح بيعمل بيبييه في الترعة ؟؟ :ninja:

ايه يا واد المثاليه العالية دي ؟؟

تكونش نبي وانا موش واخد بالي ؟؟وهربان بدينك من بلاد الكفار ؟

المشكلة انك صاحبي وموش عارف اشوط فيك بس هاقولك الخلاصة علشان ارضي ضميري وبعدين ااقتلك براحتي باه :blush2:

ماقدرش انكر اي حاجة من العيوب اللي انت ذكرتها واللي غيرك ممكن يذكرها وانا كمان ممكن اذكرلك اكتر واكتر لو عايز

ولو عملت كدة ابقي راجل موش واقعي وموش منطقي وباحلم احلام عصافير زي مابتقول

انا في برج عاجي ماناش عارف اللي بيحصل في بلدي والا دافن راسي في التراب زي النعامة

موش دي القضية يا صاحبي

لكن تسمح تقوللي انت عملت ايه يا كابتن مثالي في بلدك علشان تحاول تصلح الامور دي على قدك وحواليك بس غير انك تشتمها وتنتقدها فقط لا غير ؟

عمرك في سجدة بينك وبين ربنا وانت بتصلي تهجد والا حتى جمعه في المسجد ..دمعت ..وقلت من قلبك يااارب ..ارفع الغمة عن بلدي ..وهذب اخلاق اخواني المسلمين ..وارفع بلاء الغلاء والوباء وضياع الذمم والدين ؟؟

ياربي انت اللي قلت ..اهبطوا مصرا فان لكم ما سالتم

يارب ..انت اللي قلت ادخلوا مصر ان شاء الله امنين

يارب ..حبيبك ونبيك اللي قال ..استوصوا باهلها خيرا

يارب ..هاجر ام العرب وجدة نبيك المصطفي مننا ..يارب ازح الغمة عن قرابة رسول الله ..رد اهلي لاخلاقهم ودينهم يارب ..وارفع عنهم الحاكم الظالم

يارب ..اهلي عايشين في ظلم ..اين الرباط الي يوم الدين يا رب ؟

انت يا صديقي في المنتدي دة ..تعتبر على منبر صغير من منابر الاعلام ..اه فعلا ..زي التليفزيون كدة ..اي حد اي حد يقدر يفتحه ويتفرج

تقدر تقف قدام ربنا يوم القيامة وتقوله ايوة انا كنت باكره المصريين في بلدهم بدل ما حاول اني ارجع ثقتهم في بلدهم وافكرهم ان بيهم الغمة هاتزول لو التزموا باخلاق دينهم وربوا عيالهم على كدة ونصحوا جيرانهم وزمايلهم ؟؟

ما عاملتش ليه توبيك زي ماعملوا د الشامي زمان يحاول ...مجرد محاولة ..انه يعالج سلبيات على قده ولو حتى مانجحش ..زيحاجي بيه ربه يوم القيامة ويقول انا حاولت ياربي

بدل تشجع الناس على الفخر بوطنهم مهما كان فيه وفيه ..ومهما ضلمت يبقي اكيد هاتنور ..وهاتنور بيكم ..تسخنهم على بلدهم للدرجة اللي تخلي ناس انا شخصيا استعر من انهم مصريين للاسف ..يخش قدام الناس ويقول انا باستعر ان انا مصري ؟؟ لا والله مصر اللي بتستعر منك يا شيخ ..روح ماحدش ماسكك ولا هاتفرق معاها ..روح بره وخد جنسيه تانية وشوف مين اللي هايحترمك وانت مالكش اصل ولا جلد ..زي الحرباية مالهاش لون معروف

عارفين ؟؟اللي بيمدح كندا موش علشان هيا حلوة او بنظرة محايدة ..فقط ..علشان يذم في مصر واهلها بيفكرني بايه؟؟

باللي بيقول ..اللي يجوز امي ..ااقوله يا عمي

مثل قذر ...خلاص اللي هايعوضك عن مشاكل بلدك يبقي عمك ؟؟

هو لازم بلدك تبقي احلى بلد في الدنيا علشان تحبها ؟؟

اللي عمري ما شفت سوري مثلا بيشتم في بلده على الاقل قدام الناس برغم ان فيها فساد ماوردش على حد..وبطالة وغلا ووبا وفساد ذمم وكمان ارضهم محتلة و لسه عندهم شيوعية اللي خلصت من الدنيا كلها

اللي ما شفت سوداني بيشتم في بلده مع انهم عندهم بلاوي الدنيا وحرب اهلية ومرض ووفقر وجهل وغيره

الا ما شفت صيني بيشتم بلده مع انها قمة الدكتاتوريات وسياسة العبيد وهضم الحريات في العالم

مالكم يا مصريين ؟؟نشتم بلدنا وفي منتدي اسمه حوارات المصريين وعليه العلم اللي مات علشانه كتير وكتير ؟؟

شكلنا ايه قدام الناس يا اخي ؟؟

بص يا تو ..نناقش العيوب علشان ندور على حلول حاجة ..ونقود مظاهرات تكره الناس في بلدهم حاجة تانية

بالله عليكم يا اخوانا كفاية بقي .زرفقا ببلدنا واهلنا

ياما مرت علينا ايام اسوا من كدة والدنيا اتغيرت بعد كدة

انت عارف ان في 67 و 73 و 56 لم تسجل اي قسم من اقسام الشرطة حادثة واحدة ..حتي ياربي خناقة والا حادث مرور؟؟

في حين يوم ما بغداد وقعت ..كل البنوك اتسرقت واثارها بره لغاية النهاردة وهرب منها ملايين العراقيين

واحد صاحبي بيحيكيلي عن فلسطينيين معاهم جنسيات كندي وامريكي وغيره

اصحاب مناصب ورواتب

لما بيقولهم انا نازل اجازة ..بيقولوا ايه ؟؟ يا بختك ..عندك وطن

معني الوطن اكبر بكتير من نضافة ونظام يا صاحبي ..وبكرة تندم عليه

بس ساعتها لما تكبر ..اوعي تشتكي من برودة وجفاء الغربة

مانت اللي ضيعتك وطنك واهلك بايديك

لسة د فاروق الباز كان بيحكي

حفيدته بتتعلم في امريكا عندها 10 سنين

اول يوم في الدراسة المدرسة اتكلمت عن الحضارة المصرية

وقالت

التاريخ بيعيد نفسه

وممكن اوي مصر ترجع تاني زي زمان

راحت الطفلة سالت جدها

ممكن يا جدو التاريخ يعيد نفسه

قالها الباز

لازم موش ممكن

مصر تمرض اه ..تعيا وتذبل اه ..تموت لااا

احنا للاسف على دين الحاكم ..ودة فيه العبر ..يتغير ..هانتغير ..وفرجة قريب

بالله عليكم يا اخوانا كفاية اوي كدة سب في مصر

والا اسفا ..واعتزلكم وما تعبدون

بتسالني لسه عندك امل ؟؟

اه لسة عندي امل

عارف ليه ؟

علشان اشد ساعات الليل اظلاما ..قبل الفجر مباشرة

انا كدة قلت اللي عندي

الصراحه بقى انا مكنتش ناوي اشارك في التعليقات الا لما اخلص الصفحات اللي متأخر فيها نظراً لسفري الي مصر في اجازه سنويه واحداث كتير شخصيه خلتني اتأخر في متابعه القهوه

دكتور تهامي، وانت عارف يا دكتور.

لكن لما وصلت لهنا الصراحه معرفتش استنى.

انا معاك يا استلذ زناتي في كل حاجه بتقولها واوافقك الراي تماماً مع اني لم يشرفني معرفتك قبل ذلك رغم اننا في المنطقه الشرقيه سوا.

وطبعاً دكتور تهامي حبيبي وذي ما قلت يا استاذ زناتي دكتور تهامي صاحبي وحبيبي انا كمان ودي طريقه عرضه لوجه نظر فقط وهو طبعاً اكيد يتمنى الخير لمصر مثلما قال ولكن

سلوكيات بعض الناس ودي بنقابلها كلنا وطبعاً انا لسه جاي من مصر وقابلت حاجات كتير لكن مش ممكن تخليني يوم اقدر اقول اني مش عارف ايه استييييت ابقي مصري ( وكفايه اللي استاذ زناتي قالوله).

[myusername]

أكلمك الأول عن الضرايب بتاعة المبيعات ، ودي بتدفعها على كل حاجة بتشتريها ، والسخيف بقى إن الأسعار المُعلَنة لا تشمل الضريبة ، يعني السعر اللي تقراه تعمل حسابك إنو لسه فيه ضريبة هتتضاف عليه! طبعاً في مصر وبلادنا العربية مفيش الحركات الساقطة دي خالص... استريت فوروارد! ولما رحت جنوب أفريقيا برضه لقيتهم دوغري فوروارد! إسفوخص على كده يا كندا!

نقطة تانية لفتت نظري هناك أحكيلك عليها ع السريع... هناك لما يقول لك السعر 2.99 دولار ، يعني لما تديله 3 دولار هيرجّع لك السنت. ما فيهاش نقاش دي! وهتلاقي ع الكاونتر قدّامه علبة تسيب فيها التبس لو حبيت ، وممكن تلاقي علبة عشان لو حبيت لمساعدة الأطفال أو مرضى السرطان أو غيره. مفيش لا إجبار ولا إحراج. في مصر لو فكرت ولو للحظة تطلب من الكاشيير في محل شلن أو بريزة باقيالك من السعر المعلَن ، هتاخد بصة احتقار مالهاش زي من البيّاع! وطبعاً هيقول إيه الأشكال السناكيح دي بس؟!

موضوع ان السعر غير شامل الضريبة ده غريب جداااااااااااااااااا !!!!! انا متهيق لى ان كندا هى البلد الوحيدة اللى بتعمل كده؟؟

الاسعار فى اوروبا بتشترى بيها زى ما مكتوب بالظبط...

و طبعا فى أمريكا نفس النظام.. حتى واحدة قالت لى انها اشترت جاكت بسعر رخيص جدا لانه كان مكتوب فى الباترينة غلط, و المحل مقدرش يمنعها انها تشتريه بالسعر القليل المكتوب مع انه غلط :blush2: بس الله أعلم من مدى صدق هذه الرواية.

بالنسبة بقى لموضوع السنت ده.. انا ماكنتش اعرف ان فيه سنت فى اوروبا.. و اتفاجئت بصراحة.. يعنى كنت فاكر ان أقل حاجة هى 5 سنت.. طبعا انا بتكلم عن اليورو..

و كنت كل ما اشترى حاجة.. افضل اجمع فى سنتات.. لا و كمان عندهم عملة معدينة ب2 سنت :sad: يعنى هناك تلاقى البيبس الكنز ب28 سنت (مش بواحد يورو على فكرة).. و حاجات من دى كتير بسنتات فردانى كده..

طبعا انتا هنا ممكن البقال يضحك عليك فى ربع جنيه بحاله :ninja:

ده حتى سواقين الميكروباز دلوقتى مبيرضوش ياخدوا البريزة و الشلن.. و بيقولوا مابتتصرفش!!!!!!!!!!!!!

تم تعديل 25 يناير 2010 بواسطة myusername

[MZohairy]

الأسعار في امريكا زي كندا

غير شامله الضرائب

[hgalal]

يا صلاة النبي

متفق معاك ..المنتدي منبر من منابر الاعلام و كل كلمة محسوبة عليك و حتتحاسب عليها .....نقول الحق بقي و لا نقلب زي التيلفزيون المصري و الجرايد القومية و ننزل مديح و تبجيل .....فيه كلمة اتقالت مش حقيقية ...فيه نقد اتقال فيه تجني ....حد كدب و لا الف قصة علشان ينقد و لا يشتكي ....يعني نعمل إيه طيب

مكسوف علشان تهامي قال علي الفلاح اللي بيقضي حاجته في الترعة ....لو شفت منظر الناس اللي بيموتوا كل يوم من نزيف دوالي المريء بسبب البلهارسيا و إنت مش عارف تعملهم حاجة ما كنتش قلت حاجة

الكلام بتاع دفء الشرق و برودة الغرب ده كلام هجص في هجص لا الشرق كله دفء و مودة و لا الغرب برود و جفاء ...فيه ده و فيه ده ...هنا و هنا

لسة د فاروق الباز كان بيحكي

حفيدته بتتعلم في امريكا عندها 10 سنين

اول يوم في الدراسة المدرسة اتكلمت عن الحضارة المصرية

وقالت

التاريخ بيعيد نفسه

وممكن اوي مصر ترجع تاني زي زمان

راحت الطفلة سالت جدها

ممكن يا جدو التاريخ يعيد نفسه

قالها الباز

لازم موش ممكن

كلام جميل ...قولتلي بقي فاروق الباز فين دلوقتي ...طب و لما حاول يعمل حاجة في مصر إيه اللي حصل

مصر تمرض اه ..تعيا وتذبل اه ..تموت لااا

احنا للاسف على دين الحاكم ..ودة فيه العبر ..يتغير ..هانتغير ..وفرجة قريب

بالله عليكم يا اخوانا كفاية اوي كدة سب في مصر

والا اسفا ..واعتزلكم وما تعبدون

بتسالني لسه عندك امل ؟؟

اه لسة عندي امل

عارف ليه ؟

علشان اشد ساعات الليل اظلاما ..قبل الفجر مباشرة

انا كدة قلت اللي عندي

برضه كلام جميل ما أقدرش أعلق عليه انما سؤال ...كون الناس علي دين حاكمهم ديه غلطة مين

يالا أرجع صلي ركعتين تاني و ما تنساش الدعا :sad:

معاك حق في الكلام ده يا دكتور هشام لكني مع استاذ زناتي في دفاعه عن مصر وعن من يقول انه (يستتيييت) انه مصري، ودكتور تهامي حبيبي وصاحبي واسف جداً جداً على تعليقي المتأخر على هذه المشاركه :blush2: :ninja:

[myusername]

الأسعار في امريكا زي كندا

غير شامله الضرائب

شكرا على المعلومة.

اتصلت بصديقة أمريكية منذ قليل, و أكدت لى المعلومة فعلا... و لكن قالت لى مفيش ضرايب عالاكل, و كمان هما بيبقوا متوقعين الضريبة قد ايه.

شكرا جزيلا مرة أخرى عالمعلومة.

تم تعديل 25 يناير 2010 بواسطة myusername

[Spanish Eyes]

النظام والتفاصيل .... بحترم فيك مووووووووت حبك للنظام ابتديت موضوع الشوبينج بداية صح منطقيه حتدفع ازاي ومسيبتش فيه فسفوسة معلومة مقولتهاش بل بالعكس نقطة الدفع دي غيرتلي كونسبت الديبت المنتشر بكثرة هنا واللجوء فقط للكريديت في حاله الزنقة بس اخر الشهر.

في انتظار بقية الشوبينج على ناااااااااااااااااار

تقديري لمجهودك يا فندم