كندا التي رأيتها :)

[hgalal]

b]

وفيه تكنولوچيا نازلة مؤخراً في كندا (مش مؤخراً أوي ، بقالها أكتر من سنة) ، وبدأت تنتشر في محلات كتير زي تيم هورتونز وبعض البنزينات ، والمنتظر تعميمها في كل مكان يتعامل بالكريديت ، وهيّا الـــ Contactless payment ، واللي أطلقت عليها ماستر كارد MasterCard PayPass.

في العادي يا إما بتسوايب الكارت من الناحية الممغنطة (المعتاد في مصر)، يا إما بتدخله من ناحية الشريحة اللي ع الكارت (زي كروت ميناتل) ، أو تديه للكاشيير يسوايبه ع الكيبورد بتاعته ، وبعدها يا تمضي يا تدخّل البين كود. إنجازاً للوقت الماستر كارد أصبح فيه شريحة داخلية يمكن قراءتها بجهاز معين عن طريق إنك تمسك الكارت في إيدك وتنقر بطرفه (Tap) ع الجهاز ده ، وشكراً ... لا إمضا ولا بين كود!

حبيبي يا دكتور تهامي اخيراً خلصت الصفحات اللي متأخره عليا والحمد لله لقيت وجبه جميله للشوبنج في الأخر. تسلم ياباشا علي مجهودك الرائع.

وبالمناسبه التكنولوجيا بتاعت الكروت اللي ب ُTap بيها كده على جهاز موجود في بعض الشركات في السعوديه من زمان حواللي ٥ سنوات ولكن بيستخدم في كروت الموظفين، لتسجيل واعيد الدخول والخروج والتأخير

يعني الشركه بتعطي كروت ممغنطه للموظف وممكن يكون عليها اسمه وصورته. يستخدمه وهو داخل وخارج من مقر الشركه. وساعات كمان الكارت هو اللي بيفتح الباب ومن غيره ما يقدرش يخش الشركه.

[moheltohamy]

شكراً ليكم جميعاً... جمعااااااء

أنا معترف إني متأخر عليكم جداً ، بس معلش بقى ، إنتو أكيد مقدرين اللي الواحد فيه.

وعموماً ، هانزل تقسيم سريع تاني ، قبل ما ندخل في تفاصيل البند الأول للشوبنج.

وحمد الله ع السلامة يا حاج H ، وطالما إنتا دخلت معسكر الناس التانيين بتاع الواد زيزو... إبقى خلّيه ينفعك :)

والكارت بتاع الموظفين ده موجود في الشركة بتاعتنا في السعودية من فترة (يمكن سنتين) ،بس عليه بيانات الموظف وصورته ومنصبه ، والكود اللوني لشخصيته كمان.

ونفس الفكرة بالمناسبة هتلاقيها في أي فندق محترم. بمعنى كان زمان بتستلم مفتاح أوضتك من الريسيبشن ، وبعدها بقى فيه كارت بتدخله في القفل الإلكتروني بتاع الأوضة ، ودلوقتي بتنقر بالكارت بتاعك على القفل بتاع الأوضة ، زي فكرة الكروت الكونتاكت لِس بالظبط.

بس أول مرة أشوف الفكرة يتم تطبيقها في الكريديت كارد. بس!

[moheltohamy]

ولو جينا نقسّم الشوپنج لفئات ، زي مثلاً الأكل والبقالة ولوازمهم ، الملابس بمختلف أنواعها (ملابس – أحذية – منتجات جلدية – ملابس رياضية – إلخ) ، الأجهزة الكهربائية والإلكترونية ، اللعب ، الموبيليا وفرش البيت ، الأدوات المكتبية ، الآلات والعدد ، السيّارات...

نبدأ بالأكل (كأي ست بيت مصرية شاطرة وأصيلة)...

لو حبينا نقسم محلاّت الأكل ومستلزماته من حيث ستايل العرض ، فهتلاقي فيه أسواق للخضار زي السوق العادي بتاعنا ، مثال ليهم سوق لورانس في الداون تاون تورونتو ونتكلّم عليه بعد شوية. وأسواق الـــ Farmers' Markets ، ودي تقدر تقول تجمّع للفلاحين اللي بيعرضوا منتجاتهم بنفسهم في سوق كبير مفتوح. وفيه محلاّت متوسطة زي محلات البقالة عندنا وبيسمّوها Convenience Stores ، ومنها سلاسل محلات زي Daisy Mart و Hasty Market ودي تشبه السوبر ماركتس اللي عارفينها عندنا زي مترو والوكالة وأسواق رجب وخير زمان والمحمل. وفيه طبعاً سلاسل محلات ضخمة أو الهايبرماركتس واللي تشبه كارفور وهايبر وَن ، ودول بيشملوا وول مارت ، وده من أكبر الهايبر ماركتس في كندا ، وفيه النسخة الكندية منه الكانيديان سوبر ستور ، وعندك نو فريلز وده متخصص للأكل فقط ، واللي زيه فود بيزيكس ، وعندك سلاسل أقل حجماً وخطورة من الوول مارت زي سلسلة دومينيون (مترو حالياً) ، و سيف واي وده بكل أسف موجود في ألبيرتا بصورة أساسية على كام فرع في ساسكاتشيوان وفرع تايه كده في مدينة في أقصى شمال غرب أونتاريو ، بس سلسلة رائعة الصراحة ، وفيه كمان لوبلوز و پرايس تشوپر. وعندك برضه ملك الجملة... كوسكو! وفيه محلات متخصصة للشوبنج زي المنتجات العربية والإسلامية (هنتكلم عليهم بعد شوية) ، والمحلات الصيني والهندي... إلخ!

لو حبيت أديلك فكرة عن لورانس ماركت ، فده سوق محترم في الداون تاون تورونتو... عامل يا سيدي زي الهنجر بتاع كلية الهندسة وتحته تجمع لمختلف أنواع الخضار والفاكهة واللحوم والطيور والبحريات (أو المحيطيّات لو توخّينا الدقة اللغوية) ومنتجات الألبان وخلافه. البتاع ده يشبه إلى حد كبير السوق التقليدي بتاعنا في مصر. بس مكان مغلق (عشان التلوّث وظروف الطقس برضه) ، وبدل العربيّات الكارّو والفرشة بتاعة بياعين الخضار ع الأرض ؛ كل واحد منهم في السوق ده عنده المحل بتاعه والفاترينة اللي بيعرض فيها الأصناف بتاعته. الأسعار فيه أقل من الهايبر ماركت ، والتنوّع فيه برضه أكتر. بيقولوا إنه من أحسن 25 سوق على مستوى العالم.

وبالنسبة للهايبر ماركتس... أحب أقول لك إن ثقافة الهايبرماركت في كندا مش اختراع خالص ، وكل شارع رئيسي بتلاقي فيه غالباً هايبرماركت أو شوپنج مول محترم ، وكلمة محترم دي معناها إنك بتلاقي كل حاجة تحتاجها. هتلاقي منهم هايبرماركت الحاجات الرخيصة ، وده زي الوول مارت مثلاً ، ودي سلسلة أمريكية منتشرة جداً في كندا ، وأسعارها من الآخر يعني الحاجة هناك تضمن – في أغلب الأحوال – إنها أرخص سعر ممكن تشتريها بيه. وبيبيعوا كل حاجة تتخيّلها ؛ نظام سمك لبن تمر هندي ، أو من الإبرة للصاروخ زي ما بيقولوا. هتشوف حاجات البقالة والأكل المُعلّب (فاكهة وخضروات ولحوم طازة لأ) ، وجناح لمستلزمات المطبخ (حلل واطباق وأجهزة مطبخ... إلخ) ، وجناح للموبيليا (على خفيف) مكاتب وكراسي وترابيزات وفرش للحدائق ، وجناح لفرش البيت (ملايات وألحفة وبطاطين ومخدات ومراتب، وجناح لمستلزمات السيارات (بطاريات وكاوتش واكسسوارات وعدد) ، وجناح للعدد اليدوية (مفكات ومفاتيح وعدد خياطة وألات عناية بالحدائق) ، وجناح محترم للأدوات المدرسية والمكتبية ، وجناح محترم للعب الأطفال ، وجناح أكثر احتراماً للعب الكبار ، وجناح للأجهزة الإلكترونية ، وجناح للاسطوانات (أوديو وأفلام وبرامج) ، وجناح للملابس (بس ده مع الأسف مش هتلاقي فيه ملابس فخمة – نفس الاستايل بتاع كارفور عندنا كده) ، وجناح محترم جداً للأحذية ينفع لوحدة يُعتبر محل أحذية (قد أبو طوق اللي في السكة الجديدة في المنصورة - واللي كنت فاكره زمان أكبر محل أحذية في التاريخ - بتاع 3-4 مرات) ، وجناح محترم لمستحضرات التجميل والعناية بالبشرة ، وجناح للساعات (في الرخيص) ، وكمان – تخيّل – جناح للمجوهرات (متواضع طبعاً)! وهابقى أحكيلك على موقف ليا مع الدهب بتاعهم كمان شوية.

وفيه هايبرماركت بس أسعاره أغلى والتنوّع فيه أقل من الوول مارت ، زي دومينيون أفندي (اللي بقى اسمه مترو) ، واللي نفس الحاجة تجيبها من وول مارت بدولار تلاقيها في دومينيون باتنين وتلاتة! نفس الحاجة بنفس الماركة ونفس العبوة كمان! لكن هتقول إيه بقى... نظامهم كده!

ولو جيت أكلمك عن المحلات العربي والإسلامي فعندك أمثلة كتير جداً... عندك في شرق تورونتو في تقاطع شارع لورانس إيست مع فارماسي تجمّع محترم للمحلات العربي زي حسن وده جزار لبناني وعنده اللحمة زي الفل ، بخلاف باقي الأصناف العربي في السوبر ماركت بتاعه ، وجمبه بخطوتين فيه سوبر ماركت لبناني محترم إسمه أرز Arz ، وهتلاقي فيه كل حاجة وأي حاجة كنت بتحلم بيها من الميدل إيست ، بس ما تشتكيش من السعر! وعندك برضه في نفس المنطقة بس قبل التقاطع (غرباً يعني) هتلاقي برضه جزارة الإتحاد بتاعة ممدوح (مصري بالمناسبة) ، واللحمة عنده كويّسة وزي الفل وهند بتعزها موت ، حتى المحل بتاعه كان اتحرق قريّب وخسر اللحم والسقط (مش بيقولوها كده برضه) ، عشان ما كانش مأمّن ع المحل ضد الحريق! بس حالياً الوضع اتظبط وفتح تاني.

وعندك فيه إقبال حلال فودز وده سوبر ماركت باكستاني محترم في Thorncliffe Park Dr ، ودي 10 دقايق سواقة من البيت باتجاه Eglinton East. بس الصراحة إن الجودة عنده هيه اللي مش محترمة! وعامل جمبه مطعم ، كان الواد ديبو بيقوللي إن المُلاحظ إن طعم الأكل عنده في المطعم بتاعه مش قد كده ، والناس حاسين إن اللحمة اللي ما بتتباعش عنده ، بيلحقها قبل ما تبوظ ، وبيصرّفها ع المطعم! هند بتكرهه عمى أصلاً ، وبتقوللي اللحمة اللي جبتهالها من عنده مرة أول ما استقرينا في تورونتو قعدت في الحلة بتاع 3 ساعات ومش راضية تستوي (كانت بتلّو بالمناسبة) ، ده بخلاف إن ريحتها كانت وحشة على حسب كلام هند!

وهابقى أتكلّم على الأكل الحلال ده كمان شوية...

كوسكو بقى ده حدوتة لوحده... هايبر ماركت كبير جداً ، وليه أكتر من فرع في تورونتو ، وعلى امتداد كندا. سياسة كوسكو أصلاً إنه بيبيع بأرخص الأسعار وبيبيع جملة! يعني كل حاجة هناك حجم عائلي ، ما بيهزروش... إزازة الكاتشب هناك أقل حجم كيلو ، علب الكومبوت 2 كيلو ، كيس الكفتة (Meat balls) اللي جبتها آخر مرة 2.5 كيلو ، كيس العيش هناك 16 رغيف بنظ كبار ، كيس المكسرات أو الكاچو كيلو ، علب الفيتامينات بيتباعوا بالجوز أو علبة كبيرة 250 قرص... إلخ!

بس المفروض تعمل اشتراك وكارنيه عضوية تبعهم بخمسين دولار في السنة ، ولو كنتوا اتنين بيتكلف الواحد 25 دولار بس. أو ممكن تروح مع حد صاحبك معاه الكارنيه ، وتشتري على حسه! والكارنيه لازم تورّيهولهم ع الباب وانتا داخل ، ولازم ياخد الكاشيير بياناته لما تيجي تحاسب على مشترواتك. بس تأكد إن في معظم الأحوال هتلاقي أرخص أسعار لأي حاجة هناك.

[moheltohamy]

زملائي الأعزاء... شكراً wst::

بس اسمحولي أطلب منكم حاجة... أنا مش هدفي مشاركات سلبية ، واللي هتشبه (مشكوووور) وكده

أنا أرحب أكتر إن يكون فيه نقاش على محتوى المشاركات ، ده لو فيه أي حاجة لفتت نظركم فيها. بخلاف كده ، هنبقى زي كتير من المنتديات العربية اللي أغلب مشاركاتها بعد المشاركة الافتتاحية من عينة مشكور وجزاك الله خيراً

وما تخافوش... لو مفيش حاجة في مشاركاتي تستاهل التعليق ، ومحدش كتب كلمة ، مش هيحصل إني أقول لكم (إيه ده؟ 600 واحد قروا المشاركة ومحدش رد بكلمة؟)

ما تقلقوش من النقطة دي خالص :lol:

[myusername]

الديبيت مش هيفيدك في الدفع أونلاين مثلاً ، لكنه مقبول في ما دون ذلك.

انت ابن حلال يا شيخ لسه كنت هاسألك عن الديبت كارد

قول يا ستاموني قوووووول wst::

طيب انا بشترى بالديبيت كارد اون لاين عادى؟

مع العلم انى عاملها فى أمريكا مش فى مصر :lol: قصدى يعنى من الواضح ان كندا زى أمريكا..؟؟

تم تعديل 26 يناير 2010 بواسطة myusername

[emy]

[/colo

ما شاء اللة - فعلا تهامي باشا

ربنا يخليك - و هو ده العرق المصري الأصيل

حضرتك تفتكر ان الشوبنج في كندا كأذواق تماثل أذواق الشوبنج في الخليج كما تعلم؟

يعني فيه : H & M - pull&pear -Pershica اللي هو السعر و الجودة

و ربنا يوفقك و ييسر لك كما تساعد اخوانك التايهين-اقصد المهاجرين

[moheltohamy]

الديبيت مش هيفيدك في الدفع أونلاين مثلاً ، لكنه مقبول في ما دون ذلك.

انت ابن حلال يا شيخ لسه كنت هاسألك عن الديبت كارد

قول يا ستاموني قوووووول :lol:

طيب انا بشترى بالديبيت كارد اون لاين عادى؟ :lol:

مع العلم انى عاملها فى أمريكا مش فى مصر قصدى يعنى من الواضح ان كندا زى أمريكا..؟؟

هوّه سعادتك كنت في فرنسا ، وخرجت منها لفيت على أوروبا كلها ، وطلعت منها على أمريكا؟! وطلّعت كمان ديبيت من غير إقامة ولا جنسية ولا جرين كارد ولا عقد عمل حتى؟! wst::

أما بخصوص تشتري بالديبيت كارد دي... فالصراحة ما شفتهاش! يمكن أنا مش باركّز!

شفتها في أي مكان دي يا هشام؟!

ما شاء اللة - فعلا تهامي باشا

ربنا يخليك - و هو ده العرق المصري الأصيل

حضرتك تفتكر ان الشوبنج في كندا كأذواق تماثل أذواق الشوبنج في الخليج كما تعلم؟

يعني فيه : H & M - pull&pear -Pershica اللي هو السعر و الجودة

و ربنا يوفقك و ييسر لك كما تساعد اخوانك التايهين-اقصد المهاجرين

يا فندم تعتقدي حضرتك إن الشوبنج في الخليج هوّه أقصى قدرات البشر؟!

بيوت الموضة الإيطالية والفرنسية هيفتحوا فروع ليهم في الخليج عشان فيه فلوس ، وكندا هيهربوا منها عشان فقرا مثلاً؟!

H & M ده موجود ومرطرط طبعاً ، بس النوعين التانيين دول ما خدتش بالي منهم الصراحة! شكل بند شوبنج الملابس هيقع مني بالمنظر ده!

محتاج سندة من هشام أو سوسوراني في السؤال ده... حد يلحقني يا جدعان!

[د هشام ابراهيم]

حبيبي يا ميشو... تصدق والله انتا واحشني جداً؟ و وحشتني الفسح وسط تلوج تورونتو

والجزء الأول للشوبنج الخاص بالأكل باقيلي فيه 3 آيتمز واخلص منه ، عشان تعبني الصراحة! بس الـ 3 دول منهم 2 كبار... اللحوم... والأكل الحلال! وانتا فاهم طبعاً... كالمعتاد... هيقلب بخناقة في الآخر

وربنا يقرب الأيام بقى عشان أنا حاسس إن كندا واحشاني أوي! وبكل أسف أخوك نازل على مصر بعد أقل من أسبوع! :lol:

توب علينا يا رب! wst::

الشتا ده لحد دلوقتي ما فيهوش تلج كفاية ....أدفا شتا اشوفه من ٥ سنين و طبقا للكنادوة من سنين طويلة

اعمل حسابك أنا مش حتخانق..... أنا حاتشاكل بس

و الحياة في كندا بمبي ....(مش باقولك مود شرير )

[ehabtaher]

انا دخلت على موقع فارمرز .. مش عارف ايه ده

وعجبنى جدا حكايه جدول الخضروات الفرش اللى موجوده فى مختلف شهور السنه

طيب

والطيور وال الانارب والزغاليل بتاعه الحمام والجبنه الاريش والفطير المشلتت ازاى نشتريهم فى كندا يعنى حنلاقى طيور صاحيه وارانب والا الحاجات دى ماتتباعش صاحيه ولازم تبقى مقتوله او مذبوحه اذا حالفنا الحظ ولو عايز تضحى بخروف فى العيد تشتريه منين صاحى وتذبحه انت بيدك او توديه المسلخ لكى يذبح ومن سيذبحه فى هذه الحاله

اهى شويه اسئله تعمل لها حلقه لوحدها اهه

[myusername]

الديبيت مش هيفيدك في الدفع أونلاين مثلاً ، لكنه مقبول في ما دون ذلك.

انت ابن حلال يا شيخ لسه كنت هاسألك عن الديبت كارد

قول يا ستاموني قوووووول :lol:

طيب انا بشترى بالديبيت كارد اون لاين عادى؟

مع العلم انى عاملها فى أمريكا مش فى مصر قصدى يعنى من الواضح ان كندا زى أمريكا..؟؟

هوّه سعادتك كنت في فرنسا ، وخرجت منها لفيت على أوروبا كلها ، وطلعت منها على أمريكا؟! وطلّعت كمان ديبيت من غير إقامة ولا جنسية ولا جرين كارد ولا عقد عمل حتى؟! :lol:

أما بخصوص تشتري بالديبيت كارد دي... فالصراحة ما شفتهاش! يمكن أنا مش باركّز!

شفتها في أي مكان دي يا هشام؟! wst::

مع ان دى اسرار مالية.. بس هوضح اكتر

انا عمرى ما رحت أمريكا قبل كده... و فى العموم صعب جدا ان الواحد يفتح حساب بنك فى امريكا من غير ما يروح بنفسه.. بس انا شغال فريلانسر مع شركة هناك, وعن طريق شركة تانية متخصصة فى اصدار الديبت كارد.. عملوا لى ديبت كارد عشان اقبض بيها... يعنى بيحطوا لى المرتب بتاعى فى الديبت كارد توماتيكى توماتيكى..

بس انا مش شغال بعقد.. ده شغل فريلانسر.. عشان التوضيح بس..

الديبت كارد دى مش معمولة تبع بنك و لكن تبع شركة متخصصة فى اصدار الديبت كارد.. و النوع ده من الشركات بدأ ينتشر فى الفترة الاخيرة فى أمريكا.. و انا تعاملى بيبقى معاهم.. و طبعا الشركة دى بتتعامل مع بنك فى أمريكا.. لكن انا ماليش تعامل مباشر مع البنك ده..

و طبعا بعتلهم صورة من باسبورى, و قعدوا فترة عقبال ما طلعوها.. لان لازم اى حد يفتح حساب يتأكدوا من شخصيته..

يا رب اكون وضحت الصورة..

بالنسبة لفتح حساب بنكى فى امريكا.. انا كنت كلمت بنك اوف امريكا من سنتين كده, و قالوا لى عادى انى افتح حساب.. بس لازم اروح لهم بنفسى... بس ممكن عادى تفتح حساب من غير جرين كارد ولا اى حاجة من دى..

تم تعديل 26 يناير 2010 بواسطة myusername

[dcfarouk]

انا عندي اسئله كتير

بس مستني حضرتك تخلص عشان ممكن تكون اجابتها ف الموضوع اللي لسه حضرتك بتكتبه

من كلام حضرتك قلت انت البرت فيها ضرايب بتاعه federal بس ومفيش ضرايب للمقاطعه

طيب ليه الاكلفي البرتا اغلي الضعف من تورنتو وده حسب اسعار مدام meyo ياريت لو حد عنده توضيح

[المعلم عتريس]

انا عندي اسئله كتير

بس مستني حضرتك تخلص عشان ممكن تكون اجابتها ف الموضوع اللي لسه حضرتك بتكتبه

من كلام حضرتك قلت انت البرت فيها ضرايب بتاعه federal بس ومفيش ضرايب للمقاطعه

طيب ليه الاكلفي البرتا اغلي الضعف من تورنتو وده حسب اسعار مدام meyo ياريت لو حد عنده توضيح

يمكن عشان كل حاجه تانية غالية برضه خصوصا الايجارات

وكمان البرتا مش زراعية زي اونتاريو بسبب الجو

[ehabtaher]

لما بيبقى فيه ناس منتجه كتير (فلاحين يعنى ) تلاقى الاكل رخيص

لما الفلاحين يبقوا قله والسوبرماركتس هى الثقافه السائده حتلاقى الاكل يبقى غالى

نظريه اقتصاديه سائده فى كل مكان

[ايهاب سالم]

في معظم الأصناف اللي هتشتريها ما تحاولش تقارنها بالقيمة المكافئة ليها بالجنيه عشان ما تتعبش نفسياً. وممكن تتعامل معاها كما لو كان الدولار الكندي يكافئ الجنيه المصري عشان تريّح بالك.

كلام صحيح لكن مش بس عشان تريح بالك

عشان هو ده الصح

إنت عايش في كندا يبقى ليه تحسبها بالجنيه و الريال

و ليه تقول كيلو الطماطم هنا بما يعادل كذا جنيه و في مصر مش عارف بكام

هو أنت عايش هنا زي اللي عايش في مصر

إنت بتقبض بالدولار مش بالجنيه و اللي في نفس مهنتك في مصر مش بيقبض زيك

يبقى المقارنه غير صحيحه

أكلمك الأول عن الضرايب بتاعة المبيعات ، ودي بتدفعها على كل حاجة بتشتريها ، والسخيف بقى إن الأسعار المُعلَنة لا تشمل الضريبة ، يعني السعر اللي تقراه تعمل حسابك إنو لسه فيه ضريبة هتتضاف عليه! طبعاً في مصر وبلادنا العربية مفيش الحركات الساقطة دي خالص... استريت فوروارد! ولما رحت جنوب أفريقيا برضه لقيتهم دوغري فوروارد! إسفوخص على كده يا كندا

في دي مش معاك خالص مالص يا تي

دي إسمها الشفافيه يا عزيزي أيبك

يعني إنت عارف من الأول السلعه بكام و الحكومه واخده ضرايب كام

واللي ميعرفش يحسب ثمن السلعه هيبقى كام مع الضرائب قبل ما يشتري يبقى مش كندي أصيل

إنت أصلا لسه شباب مش زيي و متوعاش على تطبيق ضريبة المبيعات في مصر لما كانت زي كندا متعرفهاش غير لما تيجي تدفع و تلاقي ورا الكاشير يافطه مكتوب عليها يضاف ٢٥ % ضريبة مبيعات

ساعتها الناس كانت بتصرخ و تقول الحكومه بتسرقنا

ساعتها مصلحة الضرائب أصدرت تعليماتها للتجار بإزالة اليافطه و دمج الضريبه في السعر

دلوقتي الناس في مصر بيدفعوا ضرائب مبيعات على كل حاجه و أعلى من كندا و هما مش حاسين

تفتكر ده أفضل

تم تعديل 26 يناير 2010 بواسطة ايهاب سالم

[emy]

أخي -أكيد الأصغر تهامي باشا

مبدئيا اطمانيت لوجود H & M ,علشان بنتي -حكم القوي

لأن مثلا لم نجده في فرنسا و ألمانيا- كان شبيه ليه سلسلة C & A

كمان نفس الفرع مثلا في مصر بتكون بضاعته غير الخليج

كمان بألاحظ ان لبس الأجانب too simple ساده بس بيركز على الكواليتي

طبعا أنا عارفة أن حضرتك من كبار مشجعي كندا-me too

فياريت تطمننا على الملابس

وشكرا

[ايهاب سالم]

الكروت الائتمانية (الكريديت كاردس) زي الماستر كارد والفيزا والداينرز والآميكس (أميريكان إكسبريس) ، ودول المفروض إنهم شغالين في أي مكان محترم ، ودول أساس بناء السمعة الائتمانية في كندا ، يعني لو معاك فلوس كاش ومعاك ديبيت ومعاك كريديت ، يبقى يُستحسَن تشتري بالكريديت ، وتسدد لما ييجي ميعاد الفاتورة ، وبكده إنتا بتبني سمعة كويّسة في البلد.

أستاذ

الكلام ده جواهر يا جماعه

خلاصة الخلاصه

زي ما قال تي

أنا كنت بأشتري كل حاجه بالكريدت كارد و عامل authorized payment أخر الشهر بكامل المبلغ

يعني ماكنتش مستفيد حاجه من كلمة كريدت

بس نتيجة ده إن الكريدت سكوور بتاعي أصبح excellent وده طبعا خلا الحصول على القرض العقاري لشراء البيت سهل .. خصوصا و إحنا single income family

نيجي بقى لشوية استثناءات. الكاش لا يُقبَل في دفع إيجار الشقة زي ما اتكلمنا قبل كده ،

فيه نقطه مهمه هنا

الخدمات الأساسيه كلها لازم تندفع بطريقه فوريه مش كريدت

يعني إيجار الشقه

قسط البيت

فواتير الغاز و الكهرباء و المياه

[ايهاب سالم]

أفتكر موقف... كنت باسحب فلوس من الماكينة بتاعة البنك الأهلي في ميت غمر ، وأكتر من واحد واقفينجمب بعض مش ورا بعض ، لغاية ما جه الدور عليّا ، وألاقي واحد لازق في كتفي ، وعينيه ع الشاشة! ساعتها قلتله... تسمح ترجع ورا؟ والراجل يبرطم (إيه يا عم هوّه احنا هنسرقك؟ هنشوف إيه يعني؟!)

قللي انتا أعمل معاه إيه الأخ ده؟!

متقولش حاجه يا تهامي

الراجل مغلطش ده تصرف مصري أصيل

دلوقتي زناتي يدخل يشغلنا أغنيه وطنيه

مره واحد صاحبي حكالي إنه كان راكب ميكروباص وموبايله في جيبه و جنبه واحد ميعرفوش

موبايل صاحبي رن رنة رسالة SMS

صاحبي مطلعش الموبايل عشان الزنقه

لقى الراجل اللي جنبه بيقوله أيه مش هتقرا الإيز إم إيز اللي جاتلك

دي إسمها الشهامه و الجدعنه و الحميميه المصريه يا تهامي

ناس كده قريبه من بعض و بتحب تساعد

حد ينزل أغنية هشام عباس يا جماعه عشان وحشتنا

[myusername]

أفتكر موقف... كنت باسحب فلوس من الماكينة بتاعة البنك الأهلي في ميت غمر ، وأكتر من واحد واقفينجمب بعض مش ورا بعض ، لغاية ما جه الدور عليّا ، وألاقي واحد لازق في كتفي ، وعينيه ع الشاشة! ساعتها قلتله... تسمح ترجع ورا؟ والراجل يبرطم (إيه يا عم هوّه احنا هنسرقك؟ هنشوف إيه يعني؟!)

قللي انتا أعمل معاه إيه الأخ ده؟!

متقولش حاجه يا تهامي

الراجل مغلطش ده تصرف مصري أصيل

دلوقتي زناتي يدخل يشغلنا أغنيه وطنيه

مره واحد صاحبي حكالي إنه كان راكب ميكروباص وموبايله في جيبه و جنبه واحد ميعرفوش

موبايل صاحبي رن رنة رسالة SMS

صاحبي مطلعش الموبايل عشان الزنقه

لقى الراجل اللي جنبه بيقوله أيه مش هتقرا الإيز إم إيز اللي جاتلك

دي إسمها الشهامه و الجدعنه و الحميميه المصريه يا تهامي

ناس كده قريبه من بعض و بتحب تساعد

حد ينزل أغنية هشام عباس يا جماعه عشان وحشتنا

ده عادى جدا!! ده انا حتى ساعات بلاحظ ناس فى الميكروباز.. انهم بيتعمدوا يتكلموا بصوت عالى و يرفعوا صوتهم عشان روح المشاركة.. و ان الناس تتدخل معاهم فى الكلام wst::

فى اوروبا و الدول المتقدمة الناس ماشية فى حالها.. و ممكن و انتا راكب المترو تبقى فيه حاجات بتحصل جنبك.. و كله قاعد ولا على باله

الناس كمان هناك laid back قوى.. لكن الناس هنا تحس انهم عواجيز مع انهم لسه شباب.. و كل واحد شاغل دماغه بالتانى.. و فى محاولة دائمة للاحباط و التكذيب.. و عدم وجود اى ثقة

[د هشام ابراهيم]

أما بخصوص تشتري بالديبيت كارد دي... فالصراحة ما شفتهاش! يمكن أنا مش باركّز!

شفتها في أي مكان دي يا هشام؟!

.....................

يا فندم تعتقدي حضرتك إن الشوبنج في الخليج هوّه أقصى قدرات البشر؟! :lol:

بيوت الموضة الإيطالية والفرنسية هيفتحوا فروع ليهم في الخليج عشان فيه فلوس ، وكندا هيهربوا منها عشان فقرا مثلاً؟!

H & M ده موجود ومرطرط طبعاً ، بس النوعين التانيين دول ما خدتش بالي منهم الصراحة! شكل بند شوبنج الملابس هيقع مني بالمنظر ده!

محتاج سندة من هشام أو سوسوراني في السؤال ده... حد يلحقني يا جدعان! wst::

العيد بقي عيدين بشاير الشوبنج هلت و أنوار كنج هوبا أشرقت ...مرحي مرحي

الصراحة يا تهامي يا أخويا حكاية الاون لاين شوبنج بالدبيت ديه ما أعرفش عنها حاجة و لا عمري شفتها ..و الله أعلم

بالنسبة للمحلات المشار إليها ف H & M موجود في كندا ...المحلين التانيين دول لا شفتهم في كندا و لا في أوروبا ..... و الله أعلم

(لحسن أكون بافتي يا تهامي يا أخويا و لا حاجة ...ما علينا )

سعادتك أكيد حتجيب سيرة الهدوم بس التنوع موجود من أول السالفاشين آرمي لحد جوتشي و كريستيان ديور .....أكتر مكان باحبه و يجمع ما بين السعر المعقول و الجودة القيمة هو The Bay و بعديه بشوية Sears

الله يمسيك بالخير يا دكتور ناجي

[Kitty]

أما بخصوص تشتري بالديبيت كارد دي... فالصراحة ما شفتهاش! يمكن أنا مش باركّز!

شفتها في أي مكان دي يا هشام؟!

.....................

يا فندم تعتقدي حضرتك إن الشوبنج في الخليج هوّه أقصى قدرات البشر؟! :lol:

بيوت الموضة الإيطالية والفرنسية هيفتحوا فروع ليهم في الخليج عشان فيه فلوس ، وكندا هيهربوا منها عشان فقرا مثلاً؟!

H & M ده موجود ومرطرط طبعاً ، بس النوعين التانيين دول ما خدتش بالي منهم الصراحة! شكل بند شوبنج الملابس هيقع مني بالمنظر ده!

محتاج سندة من هشام أو سوسوراني في السؤال ده... حد يلحقني يا جدعان! wst::

العيد بقي عيدين بشاير الشوبنج هلت و أنوار كنج هوبا أشرقت ...مرحي مرحي

الصراحة يا تهامي يا أخويا حكاية الاون لاين شوبنج بالدبيت ديه ما أعرفش عنها حاجة و لا عمري شفتها ..و الله أعلم

بالنسبة للمحلات المشار إليها ف H & M موجود في كندا ...المحلين التانيين دول لا شفتهم في كندا و لا في أوروبا ..... و الله أعلم

(لحسن أكون بافتي يا تهامي يا أخويا و لا حاجة ...ما علينا )

سعادتك أكيد حتجيب سيرة الهدوم بس التنوع موجود من أول السالفاشين آرمي لحد جوتشي و كريستيان ديور .....أكتر مكان باحبه و يجمع ما بين السعر المعقول و الجودة القيمة هو The Bay و بعديه بشوية Sears

الله يمسيك بالخير يا دكتور ناجي

الدفع بالدبيت كارد موجود في كندا بصراحة مش جربتو علشان بفضل الكرديت كارد علشان الكرديت هستوري بس الموقع دة فيه كل المعلومات

http://www.interaconline.com/learn/learn_overview.html

معلش أنا نسيت العربي و بجد بقى صعب عاليا اعبر و اكتب بالعربي إستحملو اسلوبي الركيك