كندا التي رأيتها :)

[dcfarouk]

يا جماعة الخير....تنويه هام جدا....بخصوص الصور

الناس اللي لسه ح تقدم.....تاخد بالها جدا جدا جدا من المواصفات المطلوبة للصور

1- خلفية بيضاء

2- الوجه في السنتر

3- مفيش اي ابتسامة

4- الشفايف مغلقة....الاسنان مش باينة

5-الصور بدون اي رتوش.....فيه مصورين بيعملرا خدمة ويحسنوا الصور بالفوتو شوب....ده غلط جدا

6-الابعاد مش فاكراها....بس هي مكتوبة علي السيت

7- التاريخ مكتوب بالانجليزي في ضهر الصور....مش بالعربي

ده اقتباس من رد لمدام سميه ربنا يكرمها وهو مهم جدا

بس انا كنت عاو اضيف حاجه عشان الدقه في موضوع الصوره ومدش يقع في الغلطه بتاعه الصوره ديه

حضراتكوا لو نزلتوا الجايد من موقع الهجره اللي فيه ازاي تملا الابليكيشن وكده هتلاقي في الصفحه appendix b 1

مواصفات الصوره

حضرتك هتاخد الملف بتاع ال pdf بتاع الدليل ده وتروح بيه عل المصوراتي وبعد ما حضرتك تتصور بالمواصفات اللي كتباها مدام سميه

المصوراتي هياخد الصور اللي لسه مصورهالك علي الكمبيوتر ويحاول يظبطها جوه جهاز الكمبيوتر حسب المواصفات اللي في ال الجايد بيطابق بانه يجيب الاتنين فوق بعض الصوره بتاعه حضرتك اللي لسه متصورها ويحطها فوق الرسمه اللي في الملف قدامك علي الشاشه بتاعه الكمبيوتر كل ده عشان انا لما روحت اول مره طبعا المصور عملها بالبلدي كده وبعا طلعت غلط

ياريت اكون افدت

تم تعديل 1 مارس 2010 بواسطة dcfarouk

[adamdec]

ياريت حد يطمنا على د. التهامى. بقاله كتير معداش علينا او يمكن بيجى متخفى :lol:

[ehabtaher]

ياريت حد يطمنا على د. التهامى. بقاله كتير معداش علينا او يمكن بيجى متخفى :ph34r:

فى الغالب امن الدوله مسكه علشان بيحرض الناس على الهجره من مصر

[znaty]

ياريت حد يطمنا على د. التهامى. بقاله كتير معداش علينا او يمكن بيجى متخفى :ph34r:

بخير الحمد لله

لسة راجع البريمة الجمعة اللي فاتت بس اكيد مشغول شوية

[dcfarouk]

السلام عليكم

كان فيه مكان اخر مؤجر أيضا في الداون تاون كنا نصلي فيه و فقدناه نتيجه لضعف التبرعات

انا لما قريت السطر ده بجد حسيت بحزن شديد

السمجد اللي في قلب تورنتو اللي هيه تعتبر عاصمه للمسلمين في كندا

احنا مؤجرين للمسجد كمان مش متملكين له

ومش قادرين ندفع ثمن الايجار بتاعه

لا حول ولا قوه الا بالله

فين المنظمه الاسلاميه بكندا

فين مليونيرات السعوديه اللي بيعملوا افراح بالملايين وبتتصرف علي الفساد في ليله واحده

لا حول ولا قوه الا بالله

جزاك الله خير يا بشمهندس ايهاب علي نشر موقع التبرع

ياريت كل واحد يبعت الموقع لكل الناس علي ايميله لعل وعسي يقع في ايد حد غني في قلبه وفي ماله ويشتري المسجد ده اللي هو في قلب تورنتو

السلام عليكم

[myusername]

السلام عليكم

كان فيه مكان اخر مؤجر أيضا في الداون تاون كنا نصلي فيه و فقدناه نتيجه لضعف التبرعات

انا لما قريت السطر ده بجد حسيت بحزن شديد

السمجد اللي في قلب تورنتو اللي هيه تعتبر عاصمه للمسلمين في كندا

احنا مؤجرين للمسجد كمان مش متملكين له

ومش قادرين ندفع ثمن الايجار بتاعه

لا حول ولا قوه الا بالله

فين المنظمه الاسلاميه بكندا

فين مليونيرات السعوديه اللي بيعملوا افراح بالملايين وبتتصرف علي الفساد في ليله واحده

لا حول ولا قوه الا بالله

جزاك الله خير يا بشمهندس ايهاب علي نشر موقع التبرع

ياريت كل واحد يبعت الموقع لكل الناس علي ايميله لعل وعسي يقع في ايد حد غني في قلبه وفي ماله ويشتري المسجد ده اللي هو في قلب تورنتو

السلام عليكم

مليونيرات السعودية ايه و الخليج ايه بس يا راجل يا طيب.. هما فاضيين لنا؟ brth)

بس بجد.. it's a shame on them.. مش علشان حاجة.. بس لانك لو رحت باريس.. فى شارع الشانزلزيه و امام قوس النصر تحديدا.. هتلاقى فى وشه قصر كبير رهيب مكتوب عليه سفارة قطر بس اكيد طبعا مش واخدينه ايجار جديد شوف بقى عندهم كام قصر من دول...

تم تعديل 3 مارس 2010 بواسطة myusername

[ramyfathalla]

عزيزى د/ تهامى حمد لله على السلامة

بما ان التوبيك و باب كندا رجعوا لنا بالسلامة مش ممكن حضرتك ترجع تكمل موضوع الشوبينج على رواقة و المنتدى هادى و اللهم لا حسد ما فيش أى نوع من الخناقات

و حشنى شخصيا كلامك و أكيد ناس كتير منتظرين رجعوك بالسلامة الى الكتابة بشغف

[جايه لك يا كندا]

دكتور تهامي الفاضل: ماينفعش حضرتك تفضل مختفي، رجاء اظهر وبان بكتاباتك ومداخلاتك المتميزة دائما، مع كل الشكر والتقدير لجهدك الدائم

[moheltohamy]

مساء الخير يا سادة... وشكراً ليك يا رامي ولجاية لك يا كندا :lol:

وعودةً إلى زمن الفن الجميل ، والهاند أوفرات ، وتكملةً لموضوع الشوبنج الخاص بالأكل...

المرة دي هانزلها لله والوطن... هانزّلها ورزقي على الله... هانزلها وأنا مغمض العين والأنف والأذن... والله معي :lol:

نبدأ بالجزء بتاع السي فودز ، ونستكمل تباعاً

[moheltohamy]

كنت مرة في مصر وباغيظ هند إني باكُل رنجة عند ماما في شم النسيم بقى وكده (ما باطيقش سيرة الفسيخ والسردين أصلاً!). المهم الهانم تقوللي إنها بتاكل رنجة برضه في تورونتو! عندكو رنجة زي اللي عندنا دي؟ وتقوللي عندنا رنجة مايصة زي كل حاجة تخص الكنديين! الرنجة مخلية شرايح ، ومدخنة ومستوية ومتكيّسة وجاهزة للأكل ، ومش مطلوب منك غير تحطها نص دقيقة في المايكرو ويف ، وبالهنا والشفا... رنجة محيطاوي مش بحري كمان ، يعني أنضف وأطعم!

نيجي نتكلّم على جناح البحريّات أو المحيطيّات في البلد دي...

هتلاحظ إن الناس دول عندهم أنواع ما بنشوفهاش في بلادنا ، والأحجام عندهم مُبالغ فيها الصراحة.هتشوف أسماك بحجم يخوّف ، منها السمك الكامل (بس مفتوح ومتنضف) ، وفيه منها قطع فيليه مخليّة ومتنضفة وبتقول يا اللي ياكُلني. مش بس أنواع الأسماك اللي بيقسّموا الفيليه تبعاً ليها ، لكن القطعية كمان من أنهي جزء من السمكة (رؤوس ، رقبة ، وسط ، ديل ، أجنحة)! والقطع منها قطع محترمة ، متقطعة كقطع استيك ترانشات بعرض السمكة ، أو كشرايح فيليه بطول جسمها ، وفيه قطع فيليه متوحشة قد... إحم... قد الفوطة كده (مش لاقي أي تشبيه تاني للحجم الصراحة)! وهتشوف أسماك القرش برضه متقطّع استيك ، والبلطي (إسمه تيلاپيا Tilapia عشان ما تتوهش) ، ولحم الحوت ، وأسماك تانية غريبة ما يعلم بيها إلاّ ربنا! الأسماك غالباً جاية من مواني كيبيك أو من ألاسكا أو من المحيط الهادي ، والأخيرة دي تتطمّن وانتا بتاكلها ، يمكن عشان التلوّث فيه المفترض أقل من الأطلنطي وبالتالي في الغالب أسعارها أغلى. وعشان كده بيكتبولك على الأسماك في معظم الوقت مصدرها.

وهتلاحظ إن هناك أسعار مختلفة لأسماك من نفس النوع ، يعني فيه سمك مزارع وسمك طبيعي (راجع الفرق بين بيض الفراخ المزارع وبيض الفراخ الحرة). هتلاقيهم كاتبين بوضوح جمب نوع السمك كلمة Wild واللي معناها إنه سمك بتاع ربنا محدش جه ناحيته ، وطبعاً بيكون سعره أغلى. وسمك التيلاپيا مثلاً المزارع ده بيكون يونيسكيس (يعني ما فيهوش ذكر وأنثى) ، يا دوب من المعمل على المزرعة السمكية ، ويكبر ويبطرخ ، و ع الأكّيلة ، ومحروم تماماً يا عيني من الحياة الطبيعية!

وفيه مطاعم – بالذات الصيني – بيقدموا سمك التيلاپيا (البلطي) ده وهوّه صاحي بيتنطط ع الجريل ، والشيف بينضفه في ثواني ، ويشم ريحة النار ، ويجيلك بيفرفر على الطبق بتاعك! أنا بصفة عامة مش متخيل بصراحة إني أقطّع من لحم سمكة وآكلها ، وهيّه بتطلّع في الروح قدامي ع الطبق ، بس ما تقولليش إنك قبل ما تسوّيها ، لما تسيبها تموت بالراحة وهيه بتتخنق خارج المياه هوه قمة الرحمة! الحياة قاسية بجميع أشكالها يا عم الحاج!

وسمعت عن الماصلز (Mussels أو الجندوفلي أو المحار أو بلح البحر ، مش العضلات سعادتك!) في كالجاري... حكاية! الأحجام محيطاوي يا عم الحاج ، والطعم أوعى! قال واحنا اللي ثقافتنا أم الخلول والبكلويز! زيح يا جدع ، دا العيا مر!

الجمبري هناك أحجام وأنواع وأشكال ، وفيه الكامل وفيه المخلي ، فيه الطازة وفيه المجمّد ، بس بصراحة ما عرفتش أنهو فيهم اللي يُكافئ الجمبري القزّاز السويسي عندنا اللي بيقولوا عليه شِعر ده (ما حصلليش الشرف وأكلته في مصر أصلاً عشان ما نكدبش) ، غالباً هيكون شبه النوع اللي إسمه Black Tiger! الكابوريا هناك أشهرها هوّه الـــ King Crab (المعلّم الكبير بتاع ألاسكا) وده بيتباع أجسام ورجلين كل صنف لوحده ، والرجلين بتاعتها قد العيّل الصغيّر كده ، يعني أكبر من دراع سعادتك (تخيّل نفسك كده في مواجهة مع كابورياية من دول ، وعلى أرض الخصم!)

أنا يا راجل لما شفت الكنج كراب ده وافتكرت الكابوريا بتاعتنا... حسّيت إننا كنا بناكل صراصير في مصر!

الأخطبوط برضه موجود بالشكل اللي كنا بنشوفه زمان في مجلاّت ميكي لو تفتكره ، ونضيف وزي الفل! وعندك الاستاكوزا بقى دي حكاية لوحدها... بخلاف الاستاكوزا اللي هتشوفها مجمدة ومتكيّسة ، أو اللي متنضفة وجاهزة ع السِوا ، فيه أحواض سايبين الاستاكوزا فيها صاحية وبتلعب ، بس مكتفين الكلاّبات بتاعتها بأساتك عريضة (دي سعادتك لو قفلت على صباعك هتقطعه!) ، واللي تعجبك تشاور له عليها ، ويصطادهالك م الحوض بشبكة ويجيبهالك! وكذلك السمك والكابوريا (الصغيرة طبعاً) ، برضه فيه أحواض شفتها في دومينيون والسمك فيها بيبلبط ، واللي تعجبك يصطادهالك برضه.

وعن علاقتي الميمونة بالاستاكوزا... أفتكر إني كنت باسمع عن الاستاكوزا دي بقى من زمان ، بس ما كنتش من سعداء الحظ بمقابلتها في أي سوق أو سوبرماركت ، وأول مرة كنت أشوف الهانم دي كان في الهاني مون في شرم الشيخ ، وكانت الواحدة على ما أذكر بـــ 100 جنيه! قلت دلّع نفسك يابو سعد ، إتس ناو أور نيفر! أو على رأي شيرين أختي (سي فود يا مجدي) وأحكيهالك كمان شوية! لسّه يا دوب داخلين ع المحل وهنقول مع الاستاكوزا بقى ، وألمح حاجة حمرا كده وشكلها مرعب في الفاترينة ، وأسأل الواد الويتر ده يطلع إيه ده؟ ويرد عليّا بكل فخر... دي الاستاكوزا يا فندم! ساعتها قلت لفظ اعتراض اسكندراني ، وشكراً موش عاوظ! تغور يا عم بفوسفورها بسلطاتها ببابا غنوجها ، ولا إني آجي ناحية العاو ده! :lol:

كانت أول مرة آكلها ، وأكسر الحاجز النفسي ده في فندق كورال في الخبر يوم وصولي وقبل طلوعي البريمة تاني يوم الصبح... طلبت الأكل روم سيرفيس ، وطلبت عدد 4 استاكوزا مشوية ، كنت فاكره هيجيب 4 قطع ، البيه جابلي 4 استاكوزات (بخلاف الجمبري واالسمك وباقي الطلبات)! طبعاً الاستاكوزا دي طلعت جامدة بشكل ما كنتش متخيل حصوله بالمنظر ده... مغص ما شفتوش قبل كده!

وكنا بنسمع إشعاعات مغرضة عن إن الاستاكوزا دي لازم أول ما تطلّعها من البحر ترميها في حلة مياه مغلية ، عشان لو سبتها شوية بتسمم لحمها بنفسها (نظام بيدي لا بيدِ عمرو) ، لكن لما رحت قدورة في بحري على شط البحر في اسكندرية والراجل هناك بيوريني الاستاكوزا اللي بيقدمها هناك ، وأقول له مش دي لازم تكون خدت لها غطس مياه مغلية عشان كذا وكذا؟ وده يستغرب من الهلس اللي باقوله ، ويزغزغها من بطنها ، وتقعد تتنطط بالحلقات الصدفية اللي على ضهرها دي ، وصاحية وبتلعب يعني!

الموقف بتاع شيرين بقى... في الخطوبة بتاعتي كنا عاملين حفلة ع الضيق خالص ، وترابيزة كبيرة في شيراتون الجزيرة ، وبتعدي الويتريس تسأل كل واحد عن اختياره. وكان كرسي شيرين مقابل للواد خالد ومجدي اصحابي (الاتنين اللي متجوزين من الشلة في الوقت ده). المهم ، والست الويتريس بتعدي وتسألهم عن نوع الشوربة اللي يحبوها (كان الاختيار ما بين شوربة الطماطم وشوربة السي فود) ، وخالد يبص لمجدي ويقول له بنظرة العليم ببواطن الأمور ، أو زي ما دايماً باقول (خالد الفكيك) ، ويقول له (سي فود يا مجدي)... شيرين بتحكيلي بعدها ع الموقف ، وإنها مسكت نفسها بالعافية عشان ما تتقلبش على ضهرها من الضحك لما سمعت حوارهم ده! ومن بعدها كل ما نشوف شوربة السي فود في المنيو ، نقراها على طول (سي فود يا مجدي).

هتشوف في كندا أسماء أسماك غريبة وتبقى مش عارف دي تطلع إيه. لو غاوي أكلات بحرية يبقى خد وقتك بقى ، وتدوّر على ترجمتها ، أو تشتريها وتاكل وتدوق! من ضمن الأسماء الغريبة اللي شفتها هناك سمكة اسمها ماهي ماهي (Mahi mahi) ، فكرتني بأيام الپاراسيتولوچي في سنة تالتة ، والدودة اللي اسمها هتروفيس هتروفيس (Heterophyes heterophyes) ، وتعليق واحد من زمايلنا (يعني خلاص من كتر الهتروفيسات... ما يسموها هتروفيس واحدة ونخلص!)

وعلى نهج واحد صاحبنا (الله يرحمه ويبشبش الطوبة اللي تحت راسه :lol: )... يا سي فوداتك يا كندا!

[أكسيلانس]

يا فندم و الله منور قهوتك -- ووحشتنا جدا - و نفسنا تعدي علينا في الجبل -

تسجيل متابعه يا فندم - [وسط][/وسط]

[ramyfathalla]

مش مصدق عينى أنا شكلى كده باحلم

من قبل ما أقرأ قلت لازم أضرب تعظيم سلام لحبيب قلبى و حبيب الناس كلها د/ تهامى

ربنا يبارك لك و تفضل منور التوبيك الجميل بتاعك ده على طول ان شاء الله

و حمد الله على السلامة

[dreamy]

منور التوبيك يا دكتور وبانتظار المزيد من حلقاتك الرائعة...

[nadeeeem]

لا اعرف من اين ابدأ

مند اشهر عديدة و انا اتابع هدا الابداع....و هدا التفرد في السرد

مند البداية....الواد ديبو و حواديث المطارات و الهاند اوفر و بريمة الخليج

لكني كنت لا اريد ان اعلق....لسبب بسيط هو اني ليبي و لا داعي لان احشر نفسي في حوارات المصريين

لكن لكوني طبيب...من بتوع المزاج و العنب....

و لكوني تماما في نفس عمر الدكتور التهامي

و اخيرا لاني تأثرت بالموضوع و اصبحت طبيبا في بريمة ليبية ايطالية في البحر المتوسط...يعني جو الكومباني مان والسيفتي و الكاترينج و الهاند اوفر

و قبل هدا و داك لكوني من جماعة الحلم الكندي

لكل هده العوامل....ارتبطت وجدانيا بهدا التوبك و بهدا الموقع

و ليس لي الا طلب واحد...من الدكتور التهامي و الدكتور هشام و الدكتور الشامي....و كل الاسماء الرائعة في هدا الموقع:

الا يحرمونا من هدا الابداع و هده المشاركة الوجدانية

[OReX]

يا هنداوفراتك يا دكتور

الحلقة دى بزات خلت الواحد عايز يعيط مع انى مبفكرش فى كندا خلاص بس من منطق (سي فود يا مجدي) يبقى لازم الواحد يعيد التفكير تانى :(

وبدام فى رنجة يبقى ممكن نلاقى فسيييييييييييييح :lol: ربنا يخليك يا دكتور اتأكدلنا من المعلومة دى لاننا مبنعرفش نشم النسيم من غير ما نشم الفسيخ

دكتور بعد اذنك سؤال على جمب

وحضرتك داخل كندا لوحدك هل بصوا على الداتا اللى على الابتوب او على اى زاكرة خارجية ؟

[جايه لك يا كندا]

أيوه كده bv:- أهو دا الكلام ..... art:)

استمر يا كابتن يا ملك الهاندأوفرااااات ، متابعين على الدوام

حضرتك الوحيد اللي ممكن تجيب رجل الزباين هنا بسرعه البرق phn: kis)-

ربنا يباركلك

:WelEgTks: gra:- clp::

وبمناسبة عودة مشرفنا الفاضل دكتور تهامي للكتابه في التوبيك المميز بتاعه، يشرفني أن أعلن خبر اكسكلوسف هنا في قهوته المحبوبه من الجميع

طلبوا باسبوراتنا يافندم :yahoo: وقريب جدا هانكون

Canadian Permanent Residents :hi:

والفضل لله أولا ثم لكم ولجميع زملائنا الأعزاء رفاق درب الكفاح

دعواتكم يافندم ربنا يكملها على خير بإذن الله

[ramyfathalla]

شفت يا د/ تهامى دخلتك علينا جميلة ازاى ربنا يكرمك و يوفقك فى حياتك يا رب

خبر جميل قوى يا جايه لك يا كندا مبروووووووووك و عقبال اللاندنج ان شاء الله

[arora]

القهوة رجعت عمرت تانى بعودة كبيرنا

يالا ياجماعة نرش ونوزع المشاريب والشرباااااات احتفالا بعودة دكتور تهامى

والفيزا بتاعة جاية لك يا كندا

الف مليون مبروك

متابعين

تم تعديل 24 مارس 2010 بواسطة arora

[moheltohamy]

يا فندم و الله منور قهوتك -- ووحشتنا جدا - و نفسنا تعدي علينا في الجبل -

تسجيل متابعه يا فندم -

تعيش يا أكسيلانس...

والجبل ليه ناسه يا ريّس... بكل أسف مش أنا خالص :lol:

و وجودك يسعدني... وعقبال باقي البهوات!

مش مصدق عينى أنا شكلى كده باحلم

من قبل ما أقرأ قلت لازم أضرب تعظيم سلام لحبيب قلبى و حبيب الناس كلها د/ تهامى

ربنا يبارك لك و تفضل منور التوبيك الجميل بتاعك ده على طول ان شاء الله

و حمد الله على السلامة

يا رامي يا سكّرة... الله يسلّمك ، ويا رب دايماً على اتصال ، وأتمنى مقابلتك في كندا عن قريب ، مع باقي الأحباء في الأسرة المحاوراتية هناك.

منور التوبيك يا دكتور وبانتظار المزيد من حلقاتك الرائعة...

تسلم يا دريمي... ربنا يخلّيك wst::

لا اعرف من اين ابدأ

مند اشهر عديدة و انا اتابع هدا الابداع....و هدا التفرد في السرد

مند البداية....الواد ديبو و حواديث المطارات و الهاند اوفر و بريمة الخليج

لكني كنت لا اريد ان اعلق....لسبب بسيط هو اني ليبي و لا داعي لان احشر نفسي في حوارات المصريين

لكن لكوني طبيب...من بتوع المزاج و العنب....

و لكوني تماما في نفس عمر الدكتور التهامي

و اخيرا لاني تأثرت بالموضوع و اصبحت طبيبا في بريمة ليبية ايطالية في البحر المتوسط...يعني جو الكومباني مان والسيفتي و الكاترينج و الهاند اوفر

و قبل هدا و داك لكوني من جماعة الحلم الكندي

لكل هده العوامل....ارتبطت وجدانيا بهدا التوبك و بهدا الموقع

و ليس لي الا طلب واحد...من الدكتور التهامي و الدكتور هشام و الدكتور الشامي....و كل الاسماء الرائعة في هدا الموقع:

الا يحرمونا من هدا الابداع و هده المشاركة الوجدانية

أولاً... حمد الله ع السلامة يا راجل يا طيب ، وسيبك من قصة ليبي وتونسي دي... بتركزوا في حاجات يا جدعان

وبريمة إيطالية؟ تكونشي سايبم؟ شركة محترمة ، وتستاهل رفع الخوذة :hi:

ولو فعلاً بدأت خطوات الحلم الكندي ، يبقى انتا كده في المكان الصح ، وإن شاء الله تكون دخلت في الطابور اللي ماشي ورا بعضه في الطريق لكندا.

بس لما توصل هناك ، ما تنساش الغلابة اللي هييجوا من بعدك ، ويستنوك تحكيلهم عن العنب والكريز في بلاد بني الأبيض.

وأنا عن نفسي مش واردة فكرة التقاعد... ع الأقل حالياً.

وبالنسبة لباقي الطفشانين... فإيدي على كتفك... ربنا يرجعهم بالسلامة wst::

يا هنداوفراتك يا دكتور

الحلقة دى بزات خلت الواحد عايز يعيط مع انى مبفكرش فى كندا خلاص بس من منطق (سي فود يا مجدي) يبقى لازم الواحد يعيد التفكير تانى :(

وبدام فى رنجة يبقى ممكن نلاقى فسيييييييييييييح ! ربنا يخليك يا دكتور اتأكدلنا من المعلومة دى لاننا مبنعرفش نشم النسيم من غير ما نشم الفسيخ

دكتور بعد اذنك سؤال على جمب

وحضرتك داخل كندا لوحدك هل بصوا على الداتا اللى على الابتوب او على اى زاكرة خارجية ؟

الحركة الساقطة دي يا عم أوريكس ما تفكّرنيش بيها md2:

صحيح ما حصلتش معايا ، بس فيه ناس زمايلنا هنا ع البريمة وقفوهم ولطعوهم نص ساعة في مطار الدمام ، واتكرر الموقف ده 3 مرات ، عشان يتفسّحوا في الهارد ديسكات بتاعتهم!

بالظبط زي ما هيّه البلد الوحيدة اللي فيها طابور العبيد إياه! ربنا يتوب علينا منها يا راجل يا طيب ، ونكسر وراها قلة هيه روخرة! md2:

بقى عاوز كندا بنت الناس الكويّسين تعمل العملة السودة دي؟! يا راجل دول - في المعتاد - ما بيختموش الباسبورات لا عند الدخول ولا عند الخروج من البلد ، من منطلق الحرية الشخصية ، والخصوصية اللي بيحترموها ، وبيعتبروها حق أصيل للمواطن أو المقيم الكندي... تقوللي يقلّبوا في الهاردات؟! بالذمة ده كلام؟!

وبالنسبة للفسيخ ، فده ما أعتقدش إنك ممكن تحلم بيه في بلد محترمة ، زيه زي الكلبة التانية اللي اسمها أنشوجة دي!

كنت باحترمك من دقيقة واحدة يا عم أوريكس :P

أيوه كده أهو دا الكلام .....

استمر يا كابتن يا ملك الهاندأوفرااااات ، متابعين على الدوام

حضرتك الوحيد اللي ممكن تجيب رجل الزباين هنا بسرعه البرق

ربنا يباركلك

وبمناسبة عودة مشرفنا الفاضل دكتور تهامي للكتابه في التوبيك المميز بتاعه، يشرفني أن أعلن خبر اكسكلوسف هنا في قهوته المحبوبه من الجميع

طلبوا باسبوراتنا يافندم :yahoo: وقريب جدا هانكون

Canadian Permanent Residents

والفضل لله أولا ثم لكم ولجميع زملائنا الأعزاء رفاق درب الكفاح

دعواتكم يافندم ربنا يكملها على خير بإذن الله

فعلاً ، آخر الأخبار الجميلة يا فندم... ألفين مبروك ، وإن شاء الله تكونوا السنة دي هناك ، ويتحقق الحلم ، وتلاقوه زي ما تمنيتم.

بس افتكري تطمنينا لما تمسكوا الفيزا ، وتذكرة الطيارة من بعدها.

شفت يا د/ تهامى دخلتك علينا جميلة ازاى ربنا يكرمك و يوفقك فى حياتك يا رب

خبر جميل قوى يا جايه لك يا كندا مبروووووووووك و عقبال اللاندنج ان شاء الله

يا جميل لو أعرف كده كنت جيت قعدت على باب القهوة من شهرين :happy:

القهوة رجعت عمرت تانى بعودة كبيرنا

يالا ياجماعة نرش ونوزع المشاريب والشرباااااات احتفالا بعودة دكتور تهامى

والفيزا بتاعة جاية لك يا كندا

الف مليون مبروك

متابعين

الله يخليكي يا أرورا ، والمشاريب والشربات عندي أنا... ما يصحش يعني!

ندخل في اللي بعده من الهاند أوفر...

[moheltohamy]

ولو جينا لجناح اللحوم بقى...

في السوبر ماركتس وبالأخص لورانس ماركت هتشوف الجناح ده متنوّع بشكل مبالَغ فيه ، وفيه كل ما يخطر لك على بال ، وفيه اللحوم مقسمة حسب مصدر اللحوم أو نوع الحيوان يعني ، وهتشوف لحوم حيوانات غريبة جداً ما تتوقعش إنك تاكلها أو تلاقيها في سوق عادي! هتشوف لحوم البيف (اللحم البقري يعني) ، وفيه طبعاً البتلو الصغيّر لو تحب ، وعندك الضاني ، وفيه الضاني النيوزيلاندي أو كما يسمّوه (الـــ Spring Lamb) واللي بيتغذى على أعشاب المراعي الطبيعية في الربيع هناك ، وحسبما سمعت من أكيلة الضاني (ماليش في الزفلطة أنا سعادتك) إن طعمه مالوش حل ، وزفارته... يوك! وبرضه عندك لحم الماعز الكندي ، وحسبما سمعت إن طعمه رائع م الآخر ، وأحلى وأخف لحم ماعز ممكن تاكله. وده بيتباع متقطع مكعبات على فكرة (Stew cubes) ، وكل مكعب وبخته بقى... لحم أو شغت أو غضروف أو عضم!

وعندك لحم النعام (Ostrich) ولحم الإيمو (Emu) ، حاجة كده شبة النعامة برضه بس على أصغر. وطبعاً هناك لحم الخيل (مش حرام على فكرة ، كانت مكروهة أيام الرسول عشان كانت عتاد حرب ، دلوقتي عتاد الحرب ما ينفعش يتاكل أصلاً J) ، بس لحم الخيل ده في الغالب بيصدروه لفرنسا وألمانيا ، مش للاستهلاك المحلي. وسمعت برضه إنك لما تشوف الخيل مسلوخة ومتعلقة في السلخانة من غير هدوم ، ما بتعرفش تفرقها عن البقرة!

والغريب إنهم ما بيستفيدوش بالرؤوس ولا بييجوا ناحيتها. غيرش بس اللسان ، وده بيصدروه على إيطاليا ، مع الكلاوي والقلب. ومش هتلمح الكلاوي والقلب واللسان دي في أغلب المحلات في كندا ، غير في المحلات العربي بس. يمكن فروق ثقافة ، أو اهتمامات ، أو خلفية تربوية.

وهناك في كندا عموماً هتلاقي أنواع لحوم صعب تلاقيها في مكان تاني... زي البايزون والإلك والكاريبو واللاما.

البايزون (Bison ، وبينطقها الأمريكان بايسون) وده يبقى الثور الأمريكي الضخم اللي جسمه متغطي فرو ده ، والموجود حالياً في الغرب الكندي ، وبعض المناطق المتفرقة من الغرب الأمريكي ، وااللي تقلصت أعداده بدرجة كبيرة بعد ما كان 20 : 30 مليون في أواخر القرن الـــ 19 ، و وصل لألف فقط في بدايات القرن العشرين ، ومع دخوله الحماية الحكومية من كندا وأمريكا وصل تعداده لنصف مليون. فيه معظمه مهجّن مع البقر من زمان ، وبيتم تربيته في المزارع هناك كمصدر للحوم ، بخلاف البايزون الأصلي الحر في المحميات الطبيعية هناك. البايزون المتربّي ده هوه المسموح بدبحه وتقديمه في المطاعم هناك ، أو بيع لحمه على نطاق تجاري. وبيتقدم بأكتر من طريقة وشكل هناك ، وممكن تلاقيهم بيسموه بافالو Buffalo كما لو كان جاموسة عادية ، يمكن لعدم وجود الجاموس في ثقافتهم أصلاً! وفيه مطاعم هناك مش كتير أوي اللي بتقدمه في ألبيرتا ، ومطعم يتيم اللي عرفت إنه بيقدمه في تورونتو ، ونتكلم في تفاصيل النقطة دي بعدين.

الإلك (Elk) ده بقى نوع من أنواع الغزلان ، تلاقي فيه الراس والرقبة والبطن والرجلين أغمق وعلى بني شوية عن باقي الجسم. والقرون موجودة عند الذكور بس (من شروط القوامة يعني وكدهوت). ولحمه فيه طعامة اللحم البقري لكن أخف ، ويا سلام بقى لو أكلته في مطعم على إيدين شيف بيفهم... هتسكر من حلاوته! مش هتلاقي مطاعم كتير بتقدمه ، يمكن عشان مفيش مزارع بتربي الإلك أفندي ده على رواية الويتر بتاع مطعم في كالجاري ، وكان المطعم الوحيد اللي صادفته في ولاية ألبيرتا اللي بيقدم لحم الإلك كما ينبغي أن يكون. وكمان اكتشفت مصادفة مطعم يتيم شيك في الداون تاون تورونتو بيقدم الإلك ستيك ، والشيف هناك مصري كمان (الشيف توفيق شحاتة) والكلام عنه حكاية ، يكفي أقول لك إنه تم ترشيحه من أفضل 10 شيفات على مستوى كندا. وعلى بختي لما نويت أروحه ، قالولي مفيش إلك حالياً! ونتكلم برضه في التفاصيل دي بعدين.

الكاريبو (Caribou) ، وده نوع تاني من أنواع الغزلان بيعيش في الشمال الكندي ، بس أضخم شوية من الإلك ، والقرون أعرض من الإلك ، وموجودة عند الذكر والأنثى (يعني ولا الحوجة للرجالة)! وده اللي تطلع عينك عشان تلاقي مطعم بيقدمه ، وغالباً هيكون من المطاعم اللي في المناطق الجبلية في الروكيز ، بس ما حصلليش الشرف ودقته الصراحة! بس مسيري هاعملها. الغريب إن لحم الكاريبو بيتواجد أحياناً في سوق لورانس ماركت في الداون تاون تورونتو! عمار يا تورونتو! قبل ما أنسى صحيح... صورته هيه الموجودة على ضهر عملة الربع دولار الكندي.

ولحم اللاما (Llama ، بتاعة كده دمها خفيف تتبع عائلة الجمال – بكسر الجيم – بتاعة أمريكا الجنوبية) برضه بيتباع هناك ، وباسمع إنه حلو ، بس ما جرّبتوش ، وغالباً مش هاجربه ، يمكن عشان الخلفية الثقافية اللي عندي تجاه لحوم الجمال ، لما مشيت مرة من شارع في الزقازيق كله محلات جزارة بتبيع لحم الجمال فقط... ريحة تقرف بجد ، زي ريحة لحم الخرفان اللي باقرف منها برضه.

اللاما دي شفتها لايف ، وبألوان مختلفة ، في المزارع في ألبيرتا على الطريق وانا طالع من إدمونتون لچاسپر پارك. ومعلومة سريعة كده ع الماشي... بيقول لك إن اللاما لو ضايقتها أو أزعجتها ، هتعمل زي الجمل ، و... تتف عليك!

وكانت أول مرة أشوف الست لاما هانم دي كان في جنينة الحيوان بتاعة المنصورة أيام الطفولة البريئة! واللذيذ إني أيام تالتة ثانوي والفقدنة في المدرسة ، لما كنا في وسط الحصص نلعب أفلام (بطريقة Hangman) ، واللعبة الشهيرة طبعاً بتاعة ولد بنت نبات حيوان جماد بلد ، بالحروف. كنت دايماً أختار لهم حرف اللام ، عارف إنهم هيلبسوا في حيطة لما يوصلوا لحيوان يبدأ باللام! وطبعاً كانت اللاما هيه المنقذ الروحي بتاعي! والألذ إنهم كانوا دايماً ينسو إسمها! :lol:

في السوبر ماركتس هتلاقي جناح اللحوم متقطّع ومتشفّي على حسب نوع الدبيحة ، والمنطقة اللي منها القطعية دي. طبعاً أحسن جزء وأغلى قطعية هيه الـــ Tenderloin ، واللي بيسموها في المطاعم لما بتتقدم فيليه مينيو (Filet Mignon) ، زي كيس الخضار المشكل اللي لما بيتطبخ بيبقى تورلي. قطع اللحوم هتلاقيها حمرا وزي الفل (زي ما باحبها) ، ولو عاوز الزفلطة ، برضه موجود. طبعاً في بعض المحلات الكبرى والمحلات العربية بتلاقي فيه جناح للجزارة الفريش ، بتحدد عاوز كام كيلو (بالرطل غالباً) ، وإيه الدبيحة (بقر – بتلو – ضاني – إلخ) ، والجزء المقطوعة منه كمان. ولو مش عارف المسمّى هتشوف رسم تخطيطي متعلّق لجسم البقرة والمسميات المختلفة للمناطق اللي فيها ، وممكن كمان تطلب منه يقطعهالك شرايح استيك أو مكعبات كبيرة أو صغيرة ، حسب مزاجك انتا.

هيلفت نظرك هناك إن اللحمة المفرومة بنفس سعر اللحمة نفسها ، وده تحس إنه شئ منطقي ، بعكس الوضع في مصرنا الغالية اللي تلاقي سعر اللحمة المفرومة أقل بكتير من سعر اللحمة الطبيعية ، ويخليك تتساءل إن كانت اللحمة في مصر لما بتتفرم بتمتص أوكسوچين وبتنفش وبيزيد وزنها ، وبالتالي سعرها بيقل!

هتلاحظ برضه على أصناف اللحوم كلمة AAA ، ودي معناها أقل نسبة دهون في اللحوم ، وبالتبعية أعلى نسبة بروتين ، ودي اللي تحاول تشتريها. طبعاً الكلام ده بعد ما بيشفوا اللحمة (بتشديد الفاء) بعد الدبح والسلخ ، وبيلاحظوا قلة الدهون فيها، بيتم تصنيفها ده.

حاجة تانية برضه هتلفت نظرك سواء في اللحوم لما تشتريها ، أو لما تطلبها استيك في المطاعم... هتلاحظ إنهم بيكتبوا Aged 10 days أو Aged 2 weeks. أنا في الأول كنت فاكرها عمر البتلو لما جُم يدبحوه ، بس فيما بعد عرفت الحكاية. فيه عندهم مبدأ إنهم بعد ما يقطعوا الدبيحة لقطع بيدخلوها الفريزر وتتساب متخزنة ومتفرزة من أسبوع لأسبوعين ، لكذا هدف. أولاً نسبة من الدم اللي جوّه اللحمة بيتصفى ، أو زي ما بنسمّيه في مصر (اللحمة بتتشمّع) ، وبكده قوامها بيتماسك ويسهل تقطيعها ويحلوّ طعمها كمان ، وطبعاً بتفقد جزء من وزنها ، وبالتالي سعرها بيزيد. النقطة التانية إنهم – على ما سمعت ، والعهدة على الرواي – اكتشفوا إن فيه نوع من البكتيريا تقريباً بيموت بعد فترة من التخزين في الفريزر ما تقلش عن أسبوع. وبالتالي كل ما تزيد فترة الـــ Aged دي يكون أحسن طبعاً.