كندا التي رأيتها :)

[Leonardo da vinci]

دكتور تهامي

يا شيخ الله يخليك انزل بقي باي حاجه الواحد قاعد مش عارف اعمل اية؟

طيب الاول لما كان الواحد بيزهق كنت اروح علي التوبيك بتاعك و اقراء شويه اسلي الملل بتاع انتظار الكشف الطبي ده قولي الوقتي اعمل ايه ؟؟

الواحد الوقتي بقي عنده الملل مللين والانتظار انتظارين الاول بتاع المديكال و التاني بتاع الحلقه الجديدة بتاعت حضرتك

سلام يا دكتور

[moheltohamy]

مساء الخير :P

بدايةً... منوّرة التوبيك يا لولا ، ويا رب تفضلي منوّرة المنتدى دايماً ;)

وبالنوسبة للقاء الرباعي يا جماعة...

كانت الخطة إني هاطلع من تورونتو 3 ونص العصر ، أوصل ميلتون عند إيهاب 4 ونص ، ومنها على سانت كاثرين 5 ونص على هشام ، وعلى لندن أونتاريو عند الشامي 6 ونص ، نقعد معاه ساعتين لـ 8 ونص ، ونرجع على تورونتو نوصلها 10 ونص! طبعاً كنت حاجز ترابيزة لأربعة في حتة مطعم أو استيك هاوس أستاذ في لندن أونتاريو على إني هاوصل من 6 ونص لـ 7 م.

الواقع المر بقى... ساعة العربية اللي كانت معايا كانت مأخرة ساعة ، وبالتالي اتحركت الساعة 4 ونص العصر ، و وصلنا أنا وإيهاب عند هشام 6 ونص ، والبيه أصر يرحب بينا (بإيهاب في واقع الأمر عشان أنا بقيت قديم :D ) ، واتحرّكنا من عنده الساعة 8 ونص!

طبعاً كده صابونة محترمة... إتصلت بالاستيك هاوس لغيت الحجز ، لأنهم بيقفلوا 9 م أصلاً! واكتشفت إن المسافة المباشرة من تورونتو للندن أونتاريو 200 كم ، ومن سانت كاثرين للندن أونتاريو 200 كم برضه! على الرغم من إن من تورونتو لسانت كاثرين 130 كم! طبعاً ، ما احنا لفينا حوالين البحيرة ، وبنرجع شوية تاني في اتجاه تورونتو قبل ما نلضم على طريق لندن!

المهم ، وصلنا عند الشامي بعد 10 م! طبعاً الشامي تكفل بالسيرش ، وأعتقد بنته الفنانة المدرسية اللي نصحته بالمطعم المذكور في الصورة بعاليه! خصوصاً إنه بيقفل الساعة 11 م!

المهم طلعنا على المطعم فوراً ، والشامي بيسألنا تحبوا تروحوا مطعم إيه؟ طبعاً ما كانش ده أوبشن الاختيار... أي مطعم نلحقه فاتح كنا هنروحه. طبعاً أنا أول ما قالولي ده مطعم إيطالي شبطت :D

طبعاً المطعم كان على وشَك يشطّب ، ومفيش أي نوع من الشوربة ولا المكرونة حتى!

هشام طلب استيك ميديام! (دموي) :D

الشامي اسكندراني سواحيلي... تتوقعوا هيطلب إيه يعني؟ :lol:

أنا وهوبا اتفقنا نهفهف (Sharing يعني) في وجبتين صدور فراخ جريلد ، واستيك نيويورك ستريبلوين ويل ضن على ما أذكر... حبيبي يا هوبا smk:

الشامي جه يقوللي أنا عازم ، قلتله فيه إيه يا عم الحاج؟ هوّه أنا واخدك احتكار؟ أروح اسكندرية تعزم وتقوللي دي بلدي (وطنشني أنا وهشام لما عزمناه في القاهرة) ، ولما اتقابلنا أنا وهوّه وبريكانيديان في جدة قال لي دي بلد شغلي ، وانتو ضيوفي وأنا اللي عازم! جاي لندن وتقول برضه دي بلدي؟ وبعد ما سيّحتلي ع المنتدى؟ إنسى! mfb:

وبعد ما اتصوّرنا ، بيقوللي الصورة دي يا تهامي لينا احنا مش للنشر... قلتله إنسى... دانا لازم أثبت العزومة بعد التسييح اللي عملته حضرتك ، دانا مش بعيد أصوّر الفاتورة ، وأشاور لهم ع الوجبة اللي أكلتها كمان :o

طبعاً فوجئنا كلنا بالويتر وهوّه جاي ، وباطلب منه الشيك ، وأفوجأ إنه جايب لهشام الإيصال بتاع الفيزا عشان يمضي عليه! وأنا وإيهاب نبص لبعض... عملها إمتى السوسة ده وإداله الفيزا واحنا ولا حد فينا حس بيه؟! :lol:

ولما جينا نتصوّر بقى... أخدت الصور من 3 اتجاهات ، وفي كل مرة واحد يقول لي أنا طالع ضخم في الصورة ، لأ الصورة دي مكبّراني... قلت خليها عليك انتا يابو سعد ، وتكبّرني تكبّرني... كده كده الشعر الأبيض تاج على رؤوس الرجال بقى وكدهوت.

وقلت آخد أنا الصدارة... ولا يهمني.

بس يا سادة... دي كل الحكاية.

[moheltohamy]

بالنسبة لمشاركات اللحوم... اكتشفت إني نسيت تماماً أتكلم عن الطيور. عموماً هانزلهم في مشاركتين ، وبالنسبة للحوم هانزلها تاني بعد التعديل ، مع توضيح التعديلات اللي أضفتها فيها باللون الأزرق...

ولو جينا لجناح الطيور واللحوم بقى...

في السوبر ماركتس وبالأخص لورانس ماركت هتشوف الجناح ده متنوّع بشكل مبالَغ فيه ، وفيه كل ما يخطر لك على بال ، وفيه اللحوم مقسمة حسب مصدر اللحوم أو نوع الحيوان يعني ، وهتشوف لحوم حيوانات غريبة جداً ما تتوقعش إنك تاكلها أو تلاقيها في سوق عادي ، أو في بلادنا الكلاسيكية!

نبدأ بالطيور... عندك الفراخ طبعاً والرومي منوّرين هناك... الرومي الكامل تلاقي سعره حوالي 25 دولار أو 3 دولار للرطل ، والفرخة اللي وزنها كيلو وربع بتشوفها في عروض في وول مارت بـــ 10 دولار سواء المتنضفة ومتبلة جاهزة ، أو المشوية كمان ، و واقفة ع الأكل ، أو المدخنة... وحلال كمان! وغني عن الذكر طبعاً إنك ممكن تشتري أي جزء من الفراخ ؛ يعني صدور أو رجلين أو أجنحة أو الفرخة على بعضها. طبعأً الفراخ الصاحية دي مالهاش وجود في السوق! وبصورة عامة... الفراخ سعرها حوالين الـــ 3.5 دولار لرطل الفراخ الكاملة ، و4.5 لرطل الصدور ، و2 دولار لرطل الرجلين ، و3 دولار لرطل الأجنحة. وعندك برضه الفراخ الشامورت (الصغيّرة يعني – المشابهة للبتلو كده) ودي بيسمّوها Cornish Hen ، وتلاقي الرطل منها بـــ 5 دولار.

وطبعاً البط الكندي الرطل منه بـــ 4 دولار ، وسدر البط الرطل منه بـــ 15 دولار! وكذلك الوز برضه منوّر ، والسمّان (Quail) وزغاليل الحمام (Squab) برضه استغربت لوجودهم هناك! العادي إن الغرب بينظر للحمام على إنه رمز سلام ، وحتى تشوفه ماشي مبرطع في البلد ، ولا في دماغه مين ماشي جمبه ، ولا تقوللي حمام الحرم المكي!

وعندك لحم الديوك (Capon) ، ودي عبارة عن ديوك (Roosters) بيتم إخصاءها عشان تربّي لحم ، ويتضاعف وزنها ، تلاقي الرطل منها بـــ 3 دولار. ويمكن عشان الحركة المفترية دي بتشوف الديوك عندهم في الأفلام طالعة م الفرن فتوات وشكلها يخض ، وديوكنا الشرق أوسطية مقارنةً بيهم عبارة عن شوية كتاكيت! لكن في الحياة الواقعية ، تلاقي الديك الغربي المجعلص ده عبارة عن فرخة معدّلة ؛ وديع ومستأنس وزي النسمة! ولو شافه الديك بتاعنا أبو هورمونات هيـــ... إحم... هيقطّعه!

وفيه أكله هناك مجرمة بيسمّوها فوا جرا (Foie Gras أو الكبد المدهنن) ، وده يا سيدي الكبدة بتاعة البط أو الوز ، بعد ما يزغطوه ذرة وبالتالي بيرسب دهون في الكبد لزيادة الطعم. الطبق ده يا سيدي من الأطباق الفاخرة ، وبيتحضر على شكل موس (mousse) أو عجينة وده الأغلب ، أو كقطع كبده. وغالباً بيتم تقديمه في المطاعم على إنه طبق جانبي أو فاتح شهية. عاوز أقول لك إني لما دقته في إدمونتون وانا في انتظار الاستيك ، ما قدرتش أكمّله أصلاً ، وكان هاين عليّا أقوم أروّح ، وكفاية أكل على كده. هوّه طعمه حلو صحيح ، بس دسم بغباء! آه ، نسيت أقول لك إنك ممكن تشتريه من لورانس ماركت بـــ 80 دولار للرطل في بعض الأحيان!

وهتلاحظ اللحمة المفرومة بمختلف أشكالها زي لحمة فراخ ولحمة رومي مفرومة! ممكن تعملها كفتة فراخ Chicken meatballs ، وبرجر فراخ لو تحب. مفروم الرومي بـــ 5 دولار للرطل ، ومفروم البقري أو البتلو أو الضاني أو الفراخ بـــ 3.5 دولار للرطل ، ومفروم الخنزير بـــ 2.5 دولار للرطل.

و عندك كمان لحم النعام (Ostrich) ولحم الإيمو (Emu) ، حاجة كده شبة النعامة برضه بس على أصغر.

لحم النعام ده لما جبته من لورانس ماركت ، ورحنا لواحد صاحبنا أستاذ مطبخ ، وأكلناه عنده... اللحمة اتغسلت ، ونضفها بالدقيق عشان الزفارة ، وحضر لها المارينيه بتاعها (بصل وتوم ولمون وفلفل وملح) وفي الخلاط لما بقت عصير ، وحطّها على وش اللحمة ، ولفها في ورق فويل (Double wrapping) ، وع الفرن يا معلّم في درجة حرارة 450 فهرنهايت لمدة ساعة ونص. وكُل يا معلّم! عارف طعم صدور الحمام البلدي لما يتزغط فول لمدة أسبوعين (عشان يربّي لحم) قبل ما تدبحه؟ أنا عملت دماغ يا ابني من طعمه!

قبل ما ننقل على النقطة اللي بعد كده... فيه معلومة بتقول لك إنهم لاحظوا إن الفرخة بتاكل بالنهار ، وفي الضلمة بتنام وما بتاكلش. فتوصلت العقول الإجرامية إنك ممكن تحط لمبات في وش الفراخ ، وشغالة إضاءة بصفة مستمرة ، وبالتالي تفضل الفرخة تاكل وتربرب ، وتربي لحم! وإيّاكش تولع حالتها النفسية ولاّ تتجنن حتى! معلومة سمعتها قلت أبلغهالك. كنت زمان باستغرب من مزارع الدواجن في مصر على الطريق لما أشوفهم منوّرين اللمبات بالكامل في عز الليل ، ولما سألت ألاقيهم يقولولي عشان تدفي الجو للفراخ بدل ما يجيلهم دور برد يقضي عليهم! لكن آديني عرفت الحقيقة المرة!

معلومة تانية عن مزارع الأبقار الحلوب ، طالما بدأنا في المعلومات... بيقول لك في إنجلترا بدؤوا يستخدموا استراتيچية جديدة لحلب الأبقار... البقرة لما تروح تتحلب بمزاجها بتجيب كمية لبن أكتر من البقرة اللي ليها مواعيد ثابتة للحلب. وبالتالي البقرة من دول بتدخل على ممر الحلب (بكامل إرادتها) عشان حاطين لها صندوق فيه أكل مميز م اللي بتحبه في الممر ده ، وبتقف تاكل قدام سكانر بيقيس مدى امتلاء ضرعها باللبن. لو كان مليان بتدخل عليها المجسات أوتوماتيك وتحلبها ، وبعد ما تخلّص حلب ، بيترفع أوتوماتيك صندوق الأكل (ما خلاص بقى نالوا غرضهم منها)! ولو السكانر دي لقت إن كمية اللبن مش اللي هيه ، بيترفع صندوق الأكل فوراً ، وتخرج البقرة يا عيني من الناحية التانية للممر ، وقفاها بيقمّر عيش!

وطبعاً بيكون فيه شريحة معدنية في ودن البقرة شايلة بياناتها ، بحيث لما تدخل الممر ، الكمبيوتر يعرف إن الست عدلات هيّه اللي واقفة دلوقتي وبتتبرع باللبن! وبتدخل البيانات الخاصة بكمية اللبن وتوقيت الحلب أوتوماتيك على الداتا بيز بتاعة كل بقرة ، ولو فيه انحدار في كمية اللبن بيتم لفت انتباه صاحب المزرعة لحالة الست هانم عشان يكشف عليها.

دا كمان بيقول لك إن كل بقرة بتتآلف مع إسمها ، ولما بتسمع إسمها بترتفع حالتها النفسية! زي بالظبط لما لاحظوا إن الموسيقي بتزود إفراز اللبن عند الأبقار! جتنا نيلة في حظنا الهباب!

[arora]

لا لالالا اكيد ده حلم

د.تهامى فى منتدانا ده حلم كان بعيد المنال

لكن وياللعجب اصبح واقع

لا وايه جايب معاه صورة استيك مشوى تهبل

انا جععععععت جدا خصوصا ده وقت الغدا

الظاهر ان حضرتك هتسينا نمزمز فى المشاركة دى وحتة الستيك دى

وتصبرنا بيها ونقعد عليها 3 شهور كمان

حمدلله على السلامة دكتور تهامى

ويارب تفضل منور المنتدى علطووووووول

تم تعديل 29 أبريل 2010 بواسطة arora

[moheltohamy]

ندخل على اللحم الحيواني...

هتشوف لحوم البيف (اللحم البقري يعني) ، وفيه طبعاً البتلو الصغيّر لو تحب ، وده بيكتبولك عليه بتلو بيرضع (Milk Fed Veal) ، وسعر اللحمه البتلو من 15 لـــ 25 دولار للرطل من قطعيّة التندر لوين (Tenderloin) ، وهنتكلم عليها بعدين. في حين سعر لحوم البيف الكندوز العادية من 3.5 لـــ 17 دولار للرطل. والكبدة البتلو (Fresh Calf liver) هناك سعرها 3 دولار للرطل.

لفت نظري إن مفيش كبدة كندوز في كندا! بعكس بلادنا أم حضارة 7 تلاف سنة اللي فيها كل ما تتمناه! فاكر لما قلت لك في هاند أوفر قديم الحتة دي:

بالنسبة للكبدة المرَّادي جات بتلو وزي الفُل ، حاجة فريش ولونها وردي كده ، آهي دي بأه اللي تاكلها وانتا مطّمّن ومُستَمَخ. فيه واحد صاحبي دكتور بيطري كان آللي على معلومة ؛ إنُّو كل ما الكبدة تبئى صغيرة تبئى أحسن لإن مع العُمر الكبدة بتعمل ديتوكسيكيشن للعلف والهباب اللي الجاموسة بتاكله (وطبعاً كلها هرمونات وبلاوي زرأة) ، فيا حبذا لو كانت كبدة عجل نونو عمره شهرين ولا بتاع ، آخره يرضع من المامي بتاعته ، يعني كبدته هتكون بخيرها ، ولا شافت تلوُّث ولا سمعت عنه! بعكس الكبدة لو لقيتها جاية لك ضخمة كده لدرجة إنك تتساءل حيوان إيه اللي عنده كبدة بالحجم ده ، خصوصاً إن الديناصورات انقرضت خلاص؟ وغالباً بتلائي لونها غامييييييئ ومش مُريحة نفسيّاً!

فيه برضه البفتيك اللي نعرفه بنوعين ؛ بفتيك بتلو (فاينر شنيتزلز Wiener Schnitzels) ، وبفتيك فراخ (Chicken Schnitzels) وسعره 9 دولار للرطل. البفتيك متبل وبالبقسماط وجاهز ع القلي. الإسم والأكلة نفسها تعتبر من ضمن ثقافة العائلات الألمانية والمجرية ، وموجودة في مطاعمهم ، وكالمعتاد... في لورانس ماركت.

وفيه الـــ Black Angus ، وده للأمانة كنت فاكره نوع أو قطعية من الخنزير ، بس فيما بعد عرفت إنه نوع من الأبقار السكوتلاندية تم تهجينها مع نوع تاني من الأبقار الإنجليزية ، لإنتاج السلالة دي عديمة القرون ، ولحمها أكتر ، وتشميعها أكتر (Marbling وهنتكلّم عليها بعد شوية) ، ودهونها أقل ، ومفيش فيها القطعيات الغامقة الناتجة من نزف الشعيرات الدموية. ودي تشبه أوي على فكرة الأبقار العادية اللي نعرفها ، بس من غير قرون. هتلاقي منها القطعيات الأستاذة اللي زي الـــ Striploin والـــ Tenderloin، وبتبدأ من 10 دولار للرطل. دوس وانتا متطمّن يا ريّس.

وعندك الضاني المحلي Fresh Ontario Lamb بيبدأ من 7 دولار للرطل (نفس أسعار لحم الخنزير... آهو الاتنين زفرين!) ، وفيه الضاني النيوزيلاندي أو زي ما بيسمّوه (الـــ Spring Lamb) واللي بيتغذى على أعشاب المراعي الطبيعية في الربيع هناك ، وحسبما سمعت من أكيلة الضاني (ماليش في الزفلطة أنا سعادتك) إن طعمه مالوش حل ، وزفارته... يوك! وبرضه عندك لحم الماعز الكندي (الرطل منه بـــ 4 دولار) ، وحسبما سمعت إن طعمه رائع م الآخر ، وأحلى وأخف لحم ماعز ممكن تاكله. وده بيتباع استيكات أو متقطع مكعبات (Stew cubes) ، وكل مكعب وبخته بقى... لحم أو شغت أو غضروف أو عضم!

والأرانب موجودة برضه ، هتلاقي سعر الرطل 8 دولار. واحد صاحبي في ألبيرتا كان بيحكيلي على الأرانب البرية في الربيع لما كانت تنتشر في الباك يارد عنده في البيت ، الأرنب من دول وزنه يدخل في 7-8 كيلو ، والنطة منه تعدّي 3 متر! ممكن تصطاده بنفسك بقى ، وتعيش يا معلم!

وفيه لحوم متجهزة للتحضير ، على هيئة اسياخ شيش طاووق وشيش كباب وشيش سمك لو جازت التسمية! ودي بيسمّوها سوفلاكي Souvlaki (غالباً أصلها يوناني الكلمة دي) ، ومنها سوفلاكي فراخ أو بيف أو پورك أو لامب ، وأحياناً بيسموها كابوب (كباب بالأفغاني) ؛ تشيكن أو بيف أو فيش كابوب. وفيه لحوم متبلة وجاهزة للشوي ، وسجق متحضر فريش بكافة الأشكال (بقري – ضاني – بتلو – رومي – فراخ) ، وده شكله مش مريح أصلاً. وفيه جناح لحوم بارده ومجففة (Deli) ، بس مش منتشر أوي. وفيه علب دهون بط للي يحب يطبخ بيها ، وعلب صوص الديمي جلاس ، وعلب شوربة فراخ كمان (Chicken stock).

وطبعاً هناك لحم الخيل (مش حرام على فكرة ، كانت مكروهة أيام الرسول عشان كانت عتاد حرب ، دلوقتي عتاد الحرب ما ينفعش يتاكل أصلاً wst:: ) ، بس لحم الخيل ده في الغالب بيصدروه لفرنسا وألمانيا ، مش للاستهلاك المحلي. وسمعت برضه إنك لما تشوف الخيل مسلوخة ومتعلقة في السلخانة من غير هدوم ، ما بتعرفش تفرقها عن البقرة!

والغريب إنهم ما بيستفيدوش بالرؤوس ولا بييجوا ناحيتها. غيرش بس اللسان ، وده بيصدروه على إيطاليا ، مع الكلاوي والقلب. ومش هتلمح الكلاوي والقلب واللسان دي في أغلب المحلات في كندا ، غير في المحلات العربي بس. يمكن فروق ثقافة ، أو اهتمامات ، أو خلفية تربوية. بس للأمانة لمحت اللسان وكمان الخدود (بجد والله) في لورانس ماركت! تخيّل نفسك بتاكل خدود بقري ع الغدا! حاجة تنقط!

الكوارع برضه مش هتشوفها كتير بس موجودة في لورانس ماركت لو ليك في العك ده... والعكاوي (Oxtails) برضه موجودة وسعرها 4.5 دولار للرطل. الفشة (الرئة يعني) والكرشة دي ما وردتش عليّا خالص ، وأحمد ربنا إنها مش موجودة هناك... بلا أرف بقى!

وهناك في كندا عموماً هتلاقي أنواع لحوم صعب تلاقيها في مكان تاني... زي البايزون والإلك والكاريبو والموس والكنغر واللاما وغيرهم...

البايزون (Bison ، وبينطقها الأمريكان بايسون) وده يبقى الثور الأمريكي الضخم اللي جسمه متغطي فرو ده ، والموجود حالياً في الغرب الكندي ، وبعض المناطق المتفرقة من الغرب الأمريكي ، وااللي تقلصت أعداده بدرجة كبيرة بعد ما كان 20 : 30 مليون في أواخر القرن الـــ 19 ، و وصل لألف فقط في بدايات القرن العشرين ، ومع دخوله الحماية الحكومية من كندا وأمريكا وصل تعداده لنصف مليون. فيه معظمه مهجّن مع البقر من زمان ، وبيتم تربيته في المزارع هناك كمصدر للحوم ، بخلاف البايزون الأصلي الحر في المحميات الطبيعية هناك. البايزون المتربّي ده هوه المسموح بدبحه وتقديمه في المطاعم هناك ، أو بيع لحمه على نطاق تجاري. وبيتقدم بأكتر من طريقة وشكل هناك ، وممكن تلاقيهم بيسموه بافالو Buffalo كما لو كان جاموسة عادية ، يمكن لعدم وجود الجاموس في ثقافتهم أصلاً! وفيه مطاعم هناك مش كتير أوي اللي بتقدمه في ألبيرتا ، ومطعم يتيم اللي عرفت إنه بيقدمه في تورونتو ، ونتكلم في تفاصيل النقطة دي بعدين.

اكتشفت برضه إنهم عندهم اللحوم الجاموسي العادية اللي نعرفها ، بس دي بيسمّوها Water Buffalo ، وأول ما شفت الإسم ده سألته ده يطلع إيه ، يمكن يطلع سيد قشطة ولاّ حاجة ، قام فاتح لي كتالوج ومورّيني الصورة... الجاموس البلدي العادي اللي احنا عارفينه ، عشان يفرّقوه عن البايزون. المحل كان فيه كتالوج فيه صور جميع الحيوانات اللي بيقدّموا لحومها عندهم.

الإلك (Elk) ده بقى نوع من أنواع الغزلان ، تلاقي فيه الراس والرقبة والبطن والرجلين أغمق وعلى بني شوية عن باقي الجسم. والقرون موجودة عند الذكور بس (من شروط القوامة يعني وكدهوت). ولحمه فيه طعامة اللحم البقري لكن أخف ، ويا سلام بقى لو أكلته في مطعم على إيدين شيف بيفهم... هتسكر من حلاوته! مش هتلاقي مطاعم كتير بتقدمه ، يمكن عشان مفيش مزارع بتربي الإلك أفندي ده على رواية الويتر بتاع مطعم في كالجاري ، وكان المطعم الوحيد اللي صادفته في ولاية ألبيرتا اللي بيقدم لحم الإلك كما ينبغي أن يكون. وكمان اكتشفت مصادفة مطعم يتيم شيك في الداون تاون تورونتو بيقدم الإلك ستيك ، والشيف هناك مصري كمان (الشيف توفيق شحاتة) والكلام عنه حكاية ، يكفي أقول لك إنه تم ترشيحه من أفضل 10 شيفات على مستوى كندا. وعلى بختي لما نويت أروحه ، قالولي مفيش إلك حالياً! ونتكلم برضه في التفاصيل دي بعدين.

على فكرة... بيطلق الإسم Venison على الغزلان بصورة عامة ، سواء الإلك أو الكاريبو أو الموس. بس تقدر تسأل الراجل اللي هناك عن نوعية الحيوان بالتحديد ، وهوّه يقول لك.

الكاريبو (Caribou) ، وده نوع تاني من أنواع الغزلان بيعيش في الشمال الكندي ، بس أضخم شوية من الإلك ، والقرون أعرض شوية من الإلك ، وتحس إنها متغطية قطيفة ، وموجودة عند الذكر والأنثى (يعني ولا الحوجة للرجالة)! وده اللي تطلع عينك عشان تلاقي مطعم بيقدمه ، وغالباً هيكون من المطاعم اللي في المناطق الجبلية في الروكيز ، بس ما حصلليش الشرف ودقته الصراحة! بس مسيري هاعملها. الغريب إن لحم الكاريبو متواجد في سوق لورانس ماركت في الداون تاون تورونتو! عمار يا تورونتو! قبل ما أنسى صحيح... صورته هيه الموجودة على ضهر عملة الربع دولار الكندي (مش الموس زي ما كتير فاكرين).

الموس (Moose) ، وده يا سيدي أضخم أنواع الغزلان ، وبيعيش برضه في المناطق الشمالية ، وقرونه مفلطحة وكبيرة ، ولو تفتكر كارتون ميكي لما كان فيه نوع من الغزلان هايج وبيطارد ميكي بقرونه الكبيرة لما كان رايح يصطاده... ده كان الموس حضرتك.

آدي صورة الأفندي:

ودي صورة دمها خفيف له:

ثور المسك (Musk Ox) ، وده ثور ضخم جداً ، ومتغطي بشعر طويل ، وبيعيش في المناطق القطبية ، وشكله تنح كده وهَجَمَة ، وتحس إن قرونه عاملة زي البنت الصغيرة اللي مسرحة شعرها ؛ نازلة حوالين وش سعادته!

ولحم اللاما (Llama) ، ودي بتاعة كده دمها خفيف تتبع عائلة الجمال – بكسر الجيم – بتاعة أمريكا الجنوبية. وبرضه بيتباع هناك ، وباسمع إنه حلو ، بس ما جرّبتوش ، وغالباً مش هاجربه ، يمكن عشان الخلفية الثقافية اللي عندي تجاه لحوم الجمال ، لما مشيت مرة من شارع في الزقازيق كله محلات جزارة بتبيع لحم الجمال فقط... ريحة تقرف بجد ، زي ريحة لحم الخرفان اللي باقرف منها برضه.

اللاما دي شفتها لايف ، وبألوان مختلفة ، في المزارع في ألبيرتا على الطريق وانا طالع من إدمونتون لچاسپر پارك. ومعلومة سريعة كده ع الماشي... بيقول لك إن اللاما لو ضايقتها أو أزعجتها ، هتعمل زي الجمل ، و... تتف عليك!

وكانت أول مرة أشوف الست لاما هانم دي كان في جنينة الحيوان بتاعة المنصورة أيام الطفولة البريئة! واللذيذ إني أيام تالتة ثانوي والفقدنة في المدرسة ، لما كنا في وسط الحصص نلعب أفلام (بطريقة Hangman) ، واللعبة الشهيرة طبعاً بتاعة ولد بنت نبات حيوان جماد بلد ، بالحروف. كنت دايماً أختار لهم حرف اللام ، عارف إنهم هيلبسوا في حيطة لما يوصلوا لحيوان يبدأ باللام! وطبعاً كانت اللاما هيه المنقذ الروحي بتاعي! والألذ إنهم كانوا دايماً ينسو إسمها! :D

الكنغر (Kangaroo) ، وده بيسمّوه هناك Australian Camel. ومش محتاج أكلمك عليه طبعاً. لما جبته وقلت لواحد صاحبي إني جبته ، وعازمه عليه ، لقيته بيقوللي وده يتاكل عادي؟ قلتله طبعاً ده حلال مية في المية ، ما هو بياكل نباتات ، مش حيوان مفترس يعني. قال لي طب ما هو الحمار بياكل نباتات... هناكل الحمار يعني؟! وجهة نظر برضه! واللذيذ إني جبته وسبته عنده عشان نبقى ناكله مع بعض ، ومشيت قبل ما أدوقه أصلاً!

لحم الكلاب برضه هتلاقيه لو دوّرت شوية في تورونتو ، وده وجبة أساسية تبع اخواننا الصينيين والكوريين.

فيه مقولة طالعة على الناس التشاينيز بتقول لك (بياكلوا كل حاجة ليها جناحات ما عدا الطيارة ، وكل حاجة ليها رجلين ما عدا الترابيزة)... يعني حمير وكلاب وقطط تلاقي ، ضفادع تلاقي ، صراصير وجراد وحشرات ما يعلم بيها إلا ربنا تلاقي برضه... ما هو بصراحة 1.3 مليار بني آدم هيجيبولهم أكل يكفيهم منين؟! دا الكلاب اللي في شوارع مدينة نصر يا مؤمن اختفت من ساعة ما الصينيين بدؤوا يظهروا فيها!

في السوبر ماركتس هتلاقي جناح اللحوم متقطّع ومتشفّي على حسب نوع الدبيحة ، والمنطقة اللي منها القطعية دي. طبعاً أحسن جزء وأغلى قطعية هيه الـــ Tenderloin ، ودي هيه عرق الفلتو وده لحم أحمر صافي بدون دهون ، وروعة لما بيتشوي أو يتحمّر ع الجريل ، واللي بيسموها في المطاعم لما بتتقدم فيليه مينيو (Filet Mignon) ، زي كيس الخضار المشكل اللي لما بيتطبخ بيبقى تورلي. قطع اللحوم هتلاقيها حمرا وزي الفل (زي ما باحبها) ، ولو عاوز المزفلطة المدهننة ، برضه موجود. طبعاً في بعض المحلات الكبرى والمحلات العربية بتلاقي فيه جناح للجزارة الفريش ، بتحدد عاوز كام كيلو (بالرطل غالباً) ، وإيه الدبيحة (بقر – بتلو – ضاني – خنزير – إلخ) ، والجزء المقطوعة منه كمان. ولو مش عارف المسمّى هتشوف رسم تخطيطي متعلّق لجسم البقرة والمسميات المختلفة للمناطق اللي فيها ، وممكن كمان تطلب منه يقطعهالك شرايح استيك أو مكعبات كبيرة أو صغيرة ، حسب مزاجك انتا.

هيلفت نظرك هناك إن اللحمة المفرومة بنفس سعر اللحمة نفسها ، وده تحس إنه شئ منطقي ، بعكس الوضع في مصرنا الغالية اللي تلاقي سعر اللحمة المفرومة أقل بكتير من سعر اللحمة الطبيعية ، ويخليك تتساءل إن كانت اللحمة في مصر لما بتتفرم بتمتص أوكسوچين وبتنفش وبيزيد وزنها ، وبالتالي سعرها بيقل! بس بصورة عامة ، هتشوف كذا درجة من اللحوم المفرومة ، بتبدأ لحمة البيف المفرومة من 2 دولار لغاية 4 دولار ، وبيكتبولك إن اللحمة دي Lean meat أو Extra lean meat ، وده بيوضح سبب السعر العالي للحمة المفرومة ، والناس دي تاخد كلامهم ثقة ، محدش هيخدعك.

نيجي لتقسيم اللحوم البيف بقى في كندا... هاتكلم معاك على نقطتين...

من حيث نسبة الدهون والجودة (الشكل ، والطراوة ، وكم العصارة ، ونسبة الطعم في اللحوم)... بدايةً لما بييجي الحيوان يدخل السلخانة (slaughterhouse) ، بيكون فيه أطباء بيطريين بيكشفوا ع الحيوان واحد واحد ، وبيختموه بحبر مقبول صحياً على المؤخرة والضهر والكتف إنه تمام وزي الفل ، لو غير كده ، بيتختم بشكل مختلف بما معناه إنه يتم عزله لحين تعليمات أخرى ، يكونوا عملوا تحاليل وكشوفات إضافيه لو كان الدكتور شاكك في حاجة ، أو في أسوأ الأحوال بيتم ختمه بما يدل على إنه غير صالح للاستهلاك الآدمي ، وفي الحالة دي بيتم حقنه بنوع من الحبر الأزرق أو الاسود واللي بينتشر في جسم الحيوان وبيلوم كل أجزاء وعضلات جسمه ، وبكده يتأكد إن لحمة الحيوان ده مش هتدخل خط الإنتاج بالغلط.

بعد الدبح والسلخ بقى ، وتشفية اللحمة ، بيتم التقسيم على 4 تقسيمات أساسية ، تنقسم فرعيا لتعطي إجمالاً 13 مستوى للجودة. عندك A, B, D, E.

أبدأ لك بالأقل جودة ونخلّي الزُبد للآخر... الـــ B ده بيخصص للحوم البتلّو الصغيّرة اللي تحت السنتين ، وغالباً بيُستخدم برضه في اللحمة المفرومة والسوسيس. الـــ D بيخصص للحوم الأبقار الكندوز الكبيرة ، والـــ E ده خاص بالعجول الكبيرة (الذكور) اللي نسبة العضلات أو اللحوم فيها كبيرة عن الدهون.

الـــ A دي للحوم الهاي كواليتي ، واللي بتمثل أكتر من 85% من اللحوم المدبوحة في كندا ، وبتنقسم لـــ A, AA, AAA, Prime ، والـــ A ده أقلهم في الجودة ، والـــ Prime ده أعلى درجات الجودة للحوم الكندية. فئة الـــ A دي تعني إن الحيوان ده صغيّر (مش بتلّو أوي لأن فيه ناس بتقول لك إن البتلو ما فيهوش طعم) ، واللحمة بتاعة الفئة دي بتكون حمراء زاهية ، ودهونها بيضاء تماماً. في الغالب ما بتعرفش تفرّق بسهولة بين الأربع درجات داخل الفئة دي ، واللي كلهم طعمهم ممتاز. التفريق بينهم بيكون عن طريق الخبراء اللي بيصنفوهم تبعاً لدرجة التعريق (Marbling) داخل اللحوم. وكلما زادت درجة الماربلنج بتزداد الجودة ، ويرتفع السعر جداً (ممكن تحت الـــ 20 دولار للـــ AAA لفوق الـــ 100 دولار للـــ Prime!)

أكلمك شوية على قصة الـــ Marbling دي:

الماربلنج ده يا سيدي هو إدخال نسبة من الدهون داخل الأنسجة العضلية (اللحمة يعني) للحيوان ، على شكل عروق رفيعة بيضاء ، وده بيدّيلها شكل الجرانيت أو الرخام (ومن هنا جه الإسم Marble). الدهون دي يا سيدي بتدي قطعة الاستيك منظر حلو ، خصوصاً لما بتتعمل ع الجريل أو تتشوى ، والدهون دي أصلاً ما بتحسّش بيها خالص ولا بتشوفها أصلاً مع تسوية اللحمة ع الجريل أو ع الشواية ، ما هي بتسيح بس بتسيب طعمها الأستاذ في اللحمة ، وهيه اللي بتدي اللحمة طعم ، خصوصاً لما بتتعمل ع الجريل أو تتشوى ، بخلاف اللحمة الحمرا تماماً واللي ما بتحسلهاش بأي طعم كما لو كانت ألياف وبس! أفتكر أيام بريمة 92 في الصحرا الغربية لما طلعت في دماغي أخلّي الشيف حسن يعمل للناس الكفتة ع الفحم من لحمة حمراء تماماً ، آي يعني كده باظبّط الناس بتوعنا. والشيف حشن يقوللي يا دكتور لازم حتة دهن تتفرم مع اللحمة عشان تديها طعم ، حتى شوف في أي محل كبابجي بيفرم اللحمة إزاي! وأنا مُصِر على اللي في دماغي ، وإننا لازم نقدّم للناس كفتة نضيفة مية المية ، وأحسن من اللي بتتباع بره كمان! وخلّيته عملها زي ما قلتله ، وفرم لحمة حمرا فقط... والاقي الكفتة وانا باكلها يا معلّم... حتت كاوتش عاوزة تترمى في الزبالة! ومن بعدها حرّمت أنطق أو أفتي مع الشيفات في الأكل ، واقتنعت تماماً إن الدهون هيه اللي بتدي اللحمة الطعم بتاعها.

نرجع لموضوعنا... البقرة عشان تربي دهون في لحومها بيعلفوها ذرة أو شعير ، ودي بتزوّد نسبة الدهون في اللحمة ، وبتخلّي لونها أبيض بدلاً من لون الدهون المائل للإصفرار. بس فيه مشكلة من الموضوع ده ، إنك لو زوّدت فيها شوية ، ممكن البقرة اللي بتاكل حبوب كتير تجيب لها حامضية (Acidosis) لأن معدتها مصممة لهضم الحشائش وليس الحبوب. وعن سبب إنه مفيش لحم بتلّو بنفس الشكل ده (Marbled) فده سببه إن ترسيب الدهون في جسم العجل الصغيّر بيبدأ تحت الجلد ، وبعد فترة بيتم ترسيبها حول الكلى والحوض والقلب ، وبعد كده حوالين العضلات ، وأخيراً داخل النسيج العضلي ، واللي بيدّيها الشكل الرخامي اللي بنقول عليه.

وآدي صورة لحتة استيكاية أستاذة بالماربلنج كما ينبغي أن يكون:

خللي بالك من حاجة صحيح... الماربلنج ده بيرسب دهون داخل اللحمة ، ودي دهون مليانة أحماض دهنية مشبعة ، وعيش كولستيرول يا معلّم!

النقطة التانية اللي أحب أكلمك عليها ، وهتلفت نظرك سواء في اللحوم لما تشتريها ، أو لما تطلبها استيك في المطاعم... هتلاحظ إنهم بيكتبوا Aged 10 days أو Aged 2 weeks. أنا في الأول كنت فاكرها عمر البتلو لما جُم يدبحوه ، بس فيما بعد عرفت إنها الفترة من لحظة دبح البقرة لغاية تقطيعها وتقديمها للمستهلك. فيه عندهم مبدأ إنهم بعد ما يقطعوا الدبيحة لقطع بيدخلوها ويعلقوها جوّه التلاجة ، وتتساب متخزنة متبرّدة على درجة حرارة 2-3 مئوية من أسبوع لأسبوعين ، لكذا هدف. أولاً نسبة من الدم أو الرطوبة اللي جوّه اللحمة بتتصفى واللي بتشكل نسبة 70% من اللحمة والدهون ، أو زي ما بنسمّيه في مصر (اللحمة بتتشمّع) ، وبكده قوامها بيتماسك ويسهل تقطيعها ويتركّز طعمها كمان ، وطبعاً بتفقد جزء من وزنها (أحياناً 20% من وزنها) ، وبالتبعية سعرها بيزيد (بخلاف تكاليف التخزين والتبريد والنقل والعمالة). وبالتالي كل ما تزيد فترة الـــ Aged دي يكون أحسن طبعاً ، من حيث إن نكهة اللحمة الأستاذة اللي بتشمها لما تطبخها ، بتبدأ مع تعليق اللحوم ع الأقل حداشر يوم. غير كده لما بتطبخها بتحس ليها بطعم معدني شوية! دا الخبراء اللي بيقولوا!

النقطة التانية بالنسبة لطراوة اللحمة... إنتا عارف طبعاً إن بعد دبح البقرة بتزداد صلابة اللحمة مع بداية الـــ Rigor mortis واللي بتستمر من 6-12 ساعة ، ومن بعدها بتبدأ طراوة اللحمة (واللي بيكتبوهالك جمب السعر إن كانت Lean meat أو Extra lean meat) تزيد مع الوقت لغاية 12 يوم ، وبعدها مفيش أي زيادة في طراوة اللحمة بتشوفها. طبعاً العامل الأساسي في زيادة طراوة اللحمة بيكون التحلل الذاتي للحمة نتيجة تأثير الإنزيمات الموجودة فيها ، بالإضافة لتكاثر البكتيريا. وعامةً ، مع الأسبوع التالت بتبدأ تخاف من ظهور وتكاثر بكتيريا الإي كولاي والسالمونيللا واللي ممكن تسمم لك اللحمة.

معلومة تانية كده برضه ع السريع... بيستخدموا مصطلح Game meat للإشارة للحيوانات والطيور اللي بيتم اصطيادها ودبحها وبيعها ، ودي بتشمل على سبيل المثال:

Partridge (طائر أقرب للسمّان ومليان ألوان ، وما اعرفلوش ترجمه!) ، Pheasant (طائر زي الفراخ كده بس بيطير ، وجسمه أكبر وراسه أصغر ، وبرضه ما اعرفلوش ترجمه!) ، Guinea Fowl (وده زي الطاووس كده بس على أصغر) ، السمّان ، الحمام ، البط ، الوز ، الأرانب ، الخنزير البري ، الماعز البري ، الكنغر ، الإيمو ، الغزال ، الإلك ، الكاريبو ، الموس ، البايزون.

المحل اللي أعرف إنه متخصص في اللحوم الغير تقليدية دي اسمه White House Meats ، وده هتلاقيه في منتصف لورانس ماركت ، قرب الآخر (لو داخل من المدخل الرئيسي). أفتكر أسعار بعض اللحوم دي بالدولار للرطل (الأسعار دي مبدئية ، زي ما قلنا حسب القطعية ؛ ممكن الأسعار تزيد من قطعية للتانية):

الإلك 17 ، النعام 22 ، البايزون 25 ، الكاريبو 50 ، الكنغر 17

على فكرة... لما رحت له تاني مرة عشان أجيب قطعة استيك الكانجارو (واللي مشيت قبل ما أدوقها!) ، الراجل قال لنفسه أكيد إني زبون سُقع وبتاع الحاجات دي ، شوية وألاقيه جايبلي قطعة فيليه مينيون ، وبيقوللي دي بقى أحلى قطعة فيليه ممكن تاكلها في حياتك! بكام دي يا عم الحاج؟ بـــ 80 دولار! ليه؟ هيه دي أي نوع من اللحوم يا عم الحاج؟ قاللي بيف عادي! طب وعلى إيه السعر ده إن شاء الله؟ قاللي توزيع الدهون داخل قطعة اللحمة بتدوب ع الجريل ، وتدّي للحمة مذاق مالوش مثيل! هيه بالفعل كانت فيه خطوط رفيعة من الدهون منتشرة بانتظام داخل كامل قطعة اللحمة ، لكن متشكرين يا عم الحاج... ما نستغناش! ما كنتش أعرف ساعتها قصة الماربلنج دي خالص!

[Leonardo da vinci]

والله منور يا دكتور والله منور انا مش مصدق نفسي ... اديني دا انا باستنك من بدري ... اديني بس هيخلصو بسرعه و اقعد بعد كده اعيط ... طيب أأقسمهم النهارده اقرء حته و بكرة حته

[moheltohamy]

ربنا يخلّيكوا يا Arora و Leonardo... هوّه احنا بنتعب عشان مين؟ مش عشان مصر؟ :lol:

تكملةً للكلام... كنت قاعد مع فرانك الـ Crane Operator الأمريكي ، وصاحبي هنا ع البريمة. لما شاف صورة قطعة الفيليه مينيو أم 80 دولار ، قال لي دي قطعة يابانية. قلتله تقصد إنها مستورده ، قال لي دي Definitely Imported. وقال لي إن الـ Kobe Beef دي لحمة نوعية من الأبقار اليابانية (Wagyu Cattle) م اللي بتتربّى ع الغالي ، وأكيد سعرها في السما.

بس بشوية سيرش لقيت إن القطعة دي مستورده من أمريكا ، ودي بتتم تربيتها بنفس مبادئ تربية نفس سلالة الأبقار اليابانية بعد تهجينها مع البلاك أنجص. بيتم إخصاءها عشان تربّي لحوم ، وعلفها بالحبوب برضه عشان ترسّب دهون (الحبوب أمريكية أو انجليزية اللي سعرها أرخص من اليابانية) ، وبيتم تدليكها يومياً عشان تسترخي وتتحسن نوعية اللحوم بتاعتها ، وبيتصرف لها زجاجة بيرة تشربها كل يوم يمكن عشان تتمزك وترحرح كده ولحمها يطرى! gra:-

برضه لفت نظره غلو سعر اللحوم في كندا مقارنةً بأمريكا ؛ يعني رطل البايزون هناك بيتباع بنفس سعر البيف العادي اللي هوّه 4 دولار للرطل! مش بنتكلّم في 12 للبيف ، و25 للبايزون! الناس في أمريكا دول عايشين ببلاش! :lol:

وآدي صورتين للقطعة هانم أم 80 دولار! (لاحظوا الماربلنج)

وصورة للماربلنج في شرايح لحمة Wagyu واللي مليانة دهون بصورة م الآخر... الصورة عجبتني ، قلت أوريهالكم. رخام دده بذمتكم ولاّ لأ؟ smk:

[qenawy]

حمداالله علي السلامة يا زعامة

[mohamedadel]

ألف حمد الله على سلامة ياريس ....

بس ايه الحاجات الجامدة دي ........ ده انتا جيت على الوتر الحساس .... اخوك اصله عاشق للأستيكات بكل انواعها "" المهم ويل دن "" :)

المصيبة مش في كده ... المشكلة اني بهدي اللعب بواحدة crestor 10mg يوميا ... امال لو حبيت استقر هناك ... حعمل إيه؟؟؟؟؟؟ :lol: :blink: :blink:

[medopharm]

موقع ممتاز تشوف من خلاله معالم مدن كندا

ادخل وشوف

http://www.yvettedefrance.com/Photos-du-monde/A1/canada.htm

[اسكندرانيةكنداوية]

أستاذ ورئيس قسم حمد الله على السلامة نورت مكانك يا دوك بعد طول غياب

[precanadian]

حمد لله علي سلامتك يا كنج

عمنا الدكتور الشامي والدكتور هشام مش غريب عليهم المواقف الجميله دي يا تومي.

ربنا يقدرنا علي رد جمايلهم

امضاء

بريكنديان

احد الاندال :cheer:

[SoSo R]

إحم ...إحم...

معلش بتنحنح بس عشان أسلك صوتى أصله مش طالع بعد فترة طويلة من الصمت المطبق

هقول كلمتين و ارجع للصمت تانى

أولا إيه النشاط ده كله؟!! رغم إن كل الأفواه مكممة و طبعا أنت عارف السبب إيه

فيه ناس آثرت السلامة و عدم إضافة رد...

بس أنا هضطر آسفة أرد المرة دى...ملحوظة جانبية مالهاش دعوة بأى حاجة...

مش ملاحظ إن أول مرة تنزل العدد الوهمى ده من حلقات الهاند أوفر...و حسينى ما يظهرش ولا حتى يقول العواف

المهم....

الكلمتين بتوعى...

روح يا شيخ ....ربنا ياخدك

ويوديك مكان أحسن من اللى أنت فيه :rolleyes:

أنا كنت واخدة عهد على نفسى مش هاتكلم ولا هفتح بوئى فى موضوع الشوبنج...بعد ما بديت لأنى حسيت بالضآلة و الجهل

أول ما أبتديت تتكلم عن الألبان و الجبن...قلت يا إما أنا مش عايشة فى البلد....يا إما عندى مشكلة

م الآخر واضح إنك بتستمتع جدا بموضوع الشوبنج وانك تجرب الأصناف وكدة

أنا إستراتيجيتى مختلفة تماما...هيا ورقة مكتوب عليها عايزين فيها إيه و دمتم...وممكن نلقط حاجات إضافية بسيطة وشكرا

ليه بقى؟؟؟؟

قولتلى ليه...

لما يكون معاك طفلتين ...بيشبطوا فى كل حاجة و أى حاجة وانت بتلف...

وعاملين زى الكواير...واحدة تقول و التانية ترد عليها

can we buy....??

ماما عايزين نجرب ده شفت إعلانه فى التلفيزيون....

وهكذا دواليك لحد ما نحاسب و نخرج و أنا عندى صداع

أختك بأه بتبقى عاملة زى الواد ده.... wst::

عبده العبيط..مين ماما؟؟؟

يعنى إيه تلفزيون؟؟؟

ردود من هذا القبيل

ممكن أستجيب فى حالة واحدة بس

لو ماما عايزة تجرب هيا كمان :D

يبقى نجيب الحاجة تحت بند....العيال نفسها فى الحاجة دى ...نحرمهم يعنى -_- ؟؟؟

المهم بعد ما قريت مداخلة اللحوم...كرهت نفسى أكتر

أصلى عمرى ما ركزت فى سعر الرطل و الكيلو و الكلام الفارغ ده

أنا بشوف اللحمة شكلها بيعجبنى...بتنادينى و تقولى إشترنى...

ويكون سعر الطبق معقول فيه حوالى اتنين كيلو...من كوسكو غالبا

البوفتيك بجيبه بتلو ....ميلك فد فيل

و الفراخ تمنها حوالى 8 $ و مش بجيبها كتير عشان بتتاكل فى خلال خمس مرات لما العيال بتعلنى

بجيبها صدور مخلية عشان تتعمل بانيه و مش فاكرة بكام...

بس خلاص نويت أركز فى الأسعار و الأنواع و هنزل بتقلى فى المداخلة الجاية عشان تعبانة جدا و عندى إمتحان يوم الأحد mfb:

و هحكيلك عن التحول الشرائى اللى حصلى بعد هاند أوفراتك...وعندى مداخلة غبية عن الفراخ برضه ...بس بعد الأمتحان

خد بأه الحتة دى إهداء ...سوفونير يعنى :P ....مكافأة لك على مجهود السيرش الجامد ده bv:-

هاند أوفر عبر المحيطات رقم 67 (عشان النكسة)*

منه لله كريستوفر كولومبوس هو السبب فى اللى أنا فيه ده...بقلم محمد التهامى...طبيب فى قطاع البترول سابقا...وعاطل حاليا..

الهاند أوفر موجه للشعب اللى هيهاجر عشان مش هقدر أحكى لأحمد مراد...عشان ما يشمتش فيا..

يومياتى...كندا التى عيشتها :sad:

الأسبوع الأول:

يااااااااااه...الواحد كان ميت و صحى أخيرن...هنخلص من الميدل إيست و أرفه ونروح نستمتع فى بلاد الأبيض...حيث النضافة

كندا واحشانى موووووت

و البلد توحفة...لسه حلوة فى عينيا...زى ما جيتها من تلات سنين فى اللاندنج...

بس برضه عيشة البراريم هتوحشنى...حيث الأنتخة و التفخيد و المزاج العنب....

إييييييييييه ...صحيح صعب الواحد ينول كل اللى الحاجات الحلوة سوا

بس مش هافتقد الشيفات الهنود و أكلهم ...هدلع نفسى أنا بقى...

وداعا لعالم الخناشير...و أهلا بعالم الشقراوات

نزلت أعمل شوية شوبنج للخفايف ...حاجات للفطار و العشا....و قلت أدلع نفسى شوية بقى

ورحت ضبطت نفسى أجبان ماربل و ريكوتا و براميزان...و بلو تشيز طبعا

و جبت بانز و بيجلز...ولقيت أوفر على إزازة مابل سيروب...قلت أجيبه و أشوف ممكن نجربه إزاى...

الأسبوع التانى:

الخفايف بتاعة الأسبوع اللى فات عملت 300 دولار مستريح...مع لبن نيلسون اللى بحبه جبت كل المذاقات...و زبادى فواكه للدايت :happy:

و شوية شيكولاتات بسيطة...مع عصاير ما قدرتش أقاومها لماركة تروبيكانا

فقلت أقلل المشتريات...جبت شوية مخللات و زيتون...وكام علبة فول سيدار يسندوا ع الفطار

الحساب وصل 200 $ ...أهو إنجاز

>>>>>>>>>>>>>>>>>>>>>>>>

الأسبوع التالت:

الفطار فول بس مع بصل أخضر...الجبن خلصت...

وشكلها ما فيش عشا كمان...

حتى السكر خلص...ومش هجيب تانى :blink:

.................................

.........................

.................

..........

.....

...

.

لو عجبك أنت و السادة القراء.....

نقول يتبع...

سلام

[اسكندرانيةكنداوية]

أنا مش مصدقة عيونى د/ سوسو كمان هنا يادى السعادة و الهنا حقيقى وحشتينى ووحشتنى مداخلاتك أوى يارب يقويكى ويوفقك دايما و يسمعنا عنك كل خير

أنا حقيقي متشوقة أعرف حيكمل الإسبوع التالت إزاى وأوعى تقولى حيفكر يرجع الميدل إيست تانى دى حقيقى تبقى نكسة وألا ممكن يقول فى الصيام 7 فوايد منها الصحة و التوفير

يلا كملى بجد عايزة أعرف مصيرنا حيكون أيه بعد أول شهر إحكى يا شهرزاد

فى الإنتظار smk:

[ابو رقية]

إحم ...إحم...

معلش بتنحنح بس عشان أسلك صوتى أصله مش طالع بعد فترة طويلة من الصمت المطبق

هقول كلمتين و ارجع للصمت تانى

أولا إيه النشاط ده كله؟!! رغم إن كل الأفواه مكممة و طبعا أنت عارف السبب إيه

فيه ناس آثرت السلامة و عدم إضافة رد...

بس أنا هضطر آسفة أرد المرة دى...ملحوظة جانبية مالهاش دعوة بأى حاجة...

مش ملاحظ إن أول مرة تنزل العدد الوهمى ده من حلقات الهاند أوفر...و حسينى ما يظهرش ولا حتى يقول العواف

المهم....

الكلمتين بتوعى...

روح يا شيخ ....ربنا ياخدك

ويوديك مكان أحسن من اللى أنت فيه

أنا كنت واخدة عهد على نفسى مش هاتكلم ولا هفتح بوئى فى موضوع الشوبنج...بعد ما بديت لأنى حسيت بالضآلة و الجهل

أول ما أبتديت تتكلم عن الألبان و الجبن...قلت يا إما أنا مش عايشة فى البلد....يا إما عندى مشكلة

م الآخر واضح إنك بتستمتع جدا بموضوع الشوبنج وانك تجرب الأصناف وكدة

أنا إستراتيجيتى مختلفة تماما...هيا ورقة مكتوب عليها عايزين فيها إيه و دمتم...وممكن نلقط حاجات إضافية بسيطة وشكرا

ليه بقى؟؟؟؟

قولتلى ليه...

لما يكون معاك طفلتين ...بيشبطوا فى كل حاجة و أى حاجة وانت بتلف...

وعاملين زى الكواير...واحدة تقول و التانية ترد عليها

can we buy....??

ماما عايزين نجرب ده شفت إعلانه فى التلفيزيون....

وهكذا دواليك لحد ما نحاسب و نخرج و أنا عندى صداع

أختك بأه بتبقى عاملة زى الواد ده.... wst::

عبده العبيط..مين ماما؟؟؟

يعنى إيه تلفزيون؟؟؟

ردود من هذا القبيل

ممكن أستجيب فى حالة واحدة بس

لو ماما عايزة تجرب هيا كمان :D

يبقى نجيب الحاجة تحت بند....العيال نفسها فى الحاجة دى ...نحرمهم يعنى -_- ؟؟؟

المهم بعد ما قريت مداخلة اللحوم...كرهت نفسى أكتر

أصلى عمرى ما ركزت فى سعر الرطل و الكيلو و الكلام الفارغ ده

أنا بشوف اللحمة شكلها بيعجبنى...بتنادينى و تقولى إشترنى...

ويكون سعر الطبق معقول فيه حوالى اتنين كيلو...من كوسكو غالبا

البوفتيك بجيبه بتلو ....ميلك فد فيل

و الفراخ تمنها حوالى 8 $ و مش بجيبها كتير عشان بتتاكل فى خلال خمس مرات لما العيال بتعلنى

بجيبها صدور مخلية عشان تتعمل بانيه و مش فاكرة بكام...

بس خلاص نويت أركز فى الأسعار و الأنواع و هنزل بتقلى فى المداخلة الجاية عشان تعبانة جدا و عندى إمتحان يوم الأحد mfb:

و هحكيلك عن التحول الشرائى اللى حصلى بعد هاند أوفراتك...وعندى مداخلة غبية عن الفراخ برضه ...بس بعد الأمتحان

خد بأه الحتة دى إهداء ...سوفونير يعنى :P ....مكافأة لك على مجهود السيرش الجامد ده bv:-

هاند أوفر عبر المحيطات رقم 67 (عشان النكسة)*

منه لله كريستوفر كولومبوس هو السبب فى اللى أنا فيه ده...بقلم محمد التهامى...طبيب فى قطاع البترول سابقا...وعاطل حاليا..

الهاند أوفر موجه للشعب اللى هيهاجر عشان مش هقدر أحكى لأحمد مراد...عشان ما يشمتش فيا..

يومياتى...كندا التى عيشتها :sad:

الأسبوع الأول:

يااااااااااه...الواحد كان ميت و صحى أخيرن...هنخلص من الميدل إيست و أرفه ونروح نستمتع فى بلاد الأبيض...حيث النضافة

كندا واحشانى موووووت

و البلد توحفة...لسه حلوة فى عينيا...زى ما جيتها من تلات سنين فى اللاندنج...

بس برضه عيشة البراريم هتوحشنى...حيث الأنتخة و التفخيد و المزاج العنب....

إييييييييييه ...صحيح صعب الواحد ينول كل اللى الحاجات الحلوة سوا

بس مش هافتقد الشيفات الهنود و أكلهم ...هدلع نفسى أنا بقى...

وداعا لعالم الخناشير...و أهلا بعالم الشقراوات

نزلت أعمل شوية شوبنج للخفايف ...حاجات للفطار و العشا....و قلت أدلع نفسى شوية بقى

ورحت ضبطت نفسى أجبان ماربل و ريكوتا و براميزان...و بلو تشيز طبعا

و جبت بانز و بيجلز...ولقيت أوفر على إزازة مابل سيروب...قلت أجيبه و أشوف ممكن نجربه إزاى...

الأسبوع التانى:

الخفايف بتاعة الأسبوع اللى فات عملت 300 دولار مستريح...مع لبن نيلسون اللى بحبه جبت كل المذاقات...و زبادى فواكه للدايت smk:

و شوية شيكولاتات بسيطة...مع عصاير ما قدرتش أقاومها لماركة تروبيكانا

فقلت أقلل المشتريات...جبت شوية مخللات و زيتون...وكام علبة فول سيدار يسندوا ع الفطار

الحساب وصل 200 $ ...أهو إنجاز

>>>>>>>>>>>>>>>>>>>>>>>>

الأسبوع التالت:

الفطار فول بس مع بصل أخضر...الجبن خلصت...

وشكلها ما فيش عشا كمان...

حتى السكر خلص...ومش هجيب تانى :blink:

.................................

.........................

.................

..........

.....

...

.

لو عجبك أنت و السادة القراء.....

نقول يتبع...

سلام

مرحبا دكتورة..

ارجو من حضرتك اكمال مداخلتك عن الشوبنك .. وتجربتك بهذا الخصوص..

الواضح ان الواحد سوف يشد الحزام على البطن بعد الوصول ..

اسئل الله ان يوفقك في امتحانك القادم .. ويحفظ لك بناتك انه نعم المولى المجيب ..

اخوك ابو رقية

[ramyfathalla]

مبروك عودتك يا د/ تهامى والله منور المحاورات كلها

مجهود كبير بذلته و صور هايلة و بصراحة ما لكش حل ربنا يباركلك

و على فكرة أنت عملت حاجة تانية حلوة قوى

د/ سوسو دخلت على الرغم من انشغالها و نورتنا

و بأقولها و أدعيلها ربنا يوفقك و تستمرى فى نجاح على طول ان شاء الله

[hazemtara]

والله إنت حسستنى إنى ما شوفتش اللحمة قبل كدة يا تُهامى يا أخويا & روح ربنا يفتحها فى وشك كمان وكمان bv:- .

[hazemtara]

هاند أوفر عبر المحيطات رقم 67 (عشان النكسة)*

منه لله كريستوفر كولومبوس هو السبب فى اللى أنا فيه ده...بقلم محمد التهامى...طبيب فى قطاع البترول سابقا...وعاطل حاليا..

الهاند أوفر موجه للشعب اللى هيهاجر عشان مش هقدر أحكى لأحمد مراد...عشان ما يشمتش فيا..

يومياتى...كندا التى عيشتها wst::

الأسبوع الأول:

يااااااااااه...الواحد كان ميت و صحى أخيرن...هنخلص من الميدل إيست و أرفه ونروح نستمتع فى بلاد الأبيض...حيث النضافة

كندا واحشانى موووووت

و البلد توحفة...لسه حلوة فى عينيا...زى ما جيتها من تلات سنين فى اللاندنج...

بس برضه عيشة البراريم هتوحشنى...حيث الأنتخة و التفخيد و المزاج العنب....

إييييييييييه ...صحيح صعب الواحد ينول كل اللى الحاجات الحلوة سوا

بس مش هافتقد الشيفات الهنود و أكلهم ...هدلع نفسى أنا بقى...

وداعا لعالم الخناشير...و أهلا بعالم الشقراوات

نزلت أعمل شوية شوبنج للخفايف ...حاجات للفطار و العشا....و قلت أدلع نفسى شوية بقى

ورحت ضبطت نفسى أجبان ماربل و ريكوتا و براميزان...و بلو تشيز طبعا

و جبت بانز و بيجلز...ولقيت أوفر على إزازة مابل سيروب...قلت أجيبه و أشوف ممكن نجربه إزاى...

الأسبوع التانى:

الخفايف بتاعة الأسبوع اللى فات عملت 300 دولار مستريح...مع لبن نيلسون اللى بحبه جبت كل المذاقات...و زبادى فواكه للدايت bv:-

و شوية شيكولاتات بسيطة...مع عصاير ما قدرتش أقاومها لماركة تروبيكانا

فقلت أقلل المشتريات...جبت شوية مخللات و زيتون...وكام علبة فول سيدار يسندوا ع الفطار

الحساب وصل 200 $ ...أهو إنجاز

>>>>>>>>>>>>>>>>>>>>>>>>

الأسبوع التالت:

الفطار فول بس مع بصل أخضر...الجبن خلصت...

وشكلها ما فيش عشا كمان...

حتى السكر خلص...ومش هجيب تانى :blink:

.................................

.........................

.................

..........

.....

...

.

لو عجبك أنت و السادة القراء.....

نقول يتبع...

سلام

مُداخلة ممتازة يا سوسورانى & كُلنا آذان صاغية

[dcfarouk]

السلام عليكم

مشاركه جميله يا دكتور تهامي

وشكرا ليكي يا دكتوره سوسوراني

بجد انتوا قربتوا ترجعوا المنتدي زي الاول

[bent misr]

ياااااااااااااااااااااااااااااااااااااااااااااااااااااااااااه

تهامي أخويا و سوسو

أحمدك يا رب

و الله رجعتونا يا ولاد للزمن الجميل

شغل عالي اوي يا تهامي و الصور تجنن خصوصا في

ازمه اللحمه الي مصر بتمر بيها اليومين دول و الله دي بقت حاجه

تكسف و فاضيحنا بقت على كل لسان wst::

و سوسو حبيبتي و حشاني و يارب ربنا يوفقك و تخلصي على خير

و انت لا سلام و لا كلام و انا قلت يا واد طنش خااالص لحد بس

لما تخلصي وتفوقي و بعدين نتحاسب smk:

في انتظار المزيد من الابداعات :lol: