كندا التي رأيتها :)

[ابو رقية]

الحمد لله على سلامتك يا دكتور تهامي ..

[اغابي]

اخـــــيرا يا دكتــــــــور

انا اهو - واقفة فى الطابور الطويل ومنتظره دورى علشان اتفرج على صور كنــدا التى حضرتك رايتها

بس معلش يا دكتور تهامى ياريت تطلب من رامى يوسع شويه -الله يخليك - اتاااااخر كدا شوية يا د/ رامى - اقولك ارجع ورا اخر الطابور

لانى مش شايفة كويس - بلاش الزق يا جماعة الله يخليكم نوقف بنظام شوية

فين الصور - يا دكتــــــــــــ :D ـــــــــــــور تهامــــــــــــــــــــــ ــــــــــــــــــى

اغابي

تم تعديل 6 يونيو 2010 بواسطة اغابي

[moheltohamy]

الله يسلمك يا أبو رقية ، وشكراً أغابي... بتفكّريني بإعلانات المسلسل بتاعة زمان ، بتاعة (آلو ، مصر للتأمين؟ المسلسل إمتى؟ حااالاً)

وبرضه المسلسل بتاع الصور نبدأه حالاً يا فندم... بس فودافون الـ 3G مطلّعة عيني ، ومقضيها EDGE... ذل الإبل fr1::

بصراحة مبدع شويه عليك .... مجهود أكثر من رائع ولا يوجد كلمات نعطيك بها حقك ...

بعد اذن سعادتك مرة تانيه ... صورتين من Ottawa ... بمناسبة سلامة أختنا goodfaith ... الف حمد لله على سلامتها ...

ولا هيه Ottawa ملهاش نصيب ولا ايه ....

عموما ادعو لي ان شاء الله مسافر بعد 3 اسابيع لمحاولة .... الأستقراااااار ....

سلامو عليكوا .. و أسف على الإطالة

إطالة إيه بس يا راجل يا طيب ، دانتا كلامك جواهر... ونفسي ترجع تصحصح التوبيك بتاعك ، بعد ما ترجع لأرض الأحلام... والكفاح!

وبالنسبة لأوتاوا ، وصورها... مسيري أحكي عليها ، لما نوصل لذكرياتي مع الأماكن والبلاد والفسح اللي شفتها في كندا.

ميرسي يا دكتور تهامى على المجهود الرائع داه

صحيح حضرتك اذيت نفسيتى بشوية الصور دوول - لكن شكرا برضوه

وقال انا فاكرة ان الماركت اللى فى الكويت بتنوع فى المنتجات وبتدينى مجال ابدع فى مطبخي

اتاريهم بيضحكو علينا بشوية الجبنة والزبده فى الكارفور اللى حفظتهم بالاسم وزهقت كمان منهم

- لانى ما شفتش بصراحة كمية التنوع بالشكل داه فى المنتجات

اخد ريست اعالج نفسيتي - وارجعلكم مرة تانية

اغابي

اللي باستغرب له بجد إن الجبَن اللي في كندا دي إيطالية ، وكندا بتستورد من الدنيا كلها! إيه اللي يمنع الخليج يستوردها برضه؟!

ولاّ في منطقتنا العربية ، الناس راضيين أساساً بجودة أقل ، يبقى ليه ندفع أكتر ، طالما الناس ما عندهمش مشاكل ، وراضيين بالقليل؟!

د/ تهااااامى إنت لسة بتتمشى فى الحياة الواقعية و ألا توهت و ألا أتصدمت و ألا أية اللى حصل تكونش طلعت ملتحى وإنت مش عارف

فى إنتظار حلقات :lol: يا زعيم

تحياتى يا فندم

الحمد لله ما توهتش لسّه... وأنا بصيت في المراية النهارده ما شفتش حد ملتحي!

وبالنسبة للسمك واللحمة ، هانزل بيها أول ما أخلّص رد ع الناس :closedeyes:

السلام عليكم

مجهود جبار من دكتور تهامي

بما ان حضرتك متخصص في الشوبينج كنت عاوز اسال عن الشراء من الانترنت هل هو ارخص ولا الشراء من المحل مباشره

لان مثلا انت لو اشتريت من موقع في امريكا انت مش بتدفع ضرايب لو انت في كندا ولكن انت بتدفع ضرايب لو انت بتشتري من محل

وكمان لو الموقع مثلا يخص شركه في تورنتو ه لو انا اشتريت من البرتا مش هدفع ضرايب غير الفيدرال صح؟ ارجو التوضيح

وكمان سؤال هل هناك منفحه تصنع من الخنزير مما يجعل الجبن المحتوي عليها حرام

وشكرا مره اخري

وعليكم السلام يا دكترة...

بالنسبة للشراء الرخيص ، فسهل جداً تدخل تلف على كذا ويب سايت ، وانتا قاعد في قعدة لطيفة وظريفة وتقارن ، وأفتكر كان وقع في إيدي موقع أستاذ بيقارن سعر الحاجة في أكتر من موقع شوبنج أونلاين ، ويجيب لك أرخصهم.

الموضوع ده مالوش قاعدة ، وممكن تاخد لك زمان بتاخد وتدّي معاه. يعني مثلاً ، مش كل المواقع الأمريكية بتبيع الحاجة بنفس السعر ، ومنهم كتير ما بيشحنش لخارج أمريكا ، ومنهم اللي بيشحن لأي دولة في العالم.

السعر صحيح مش هيُضاف عليه ضريبة ، لكن هيضاف عليه تكاليف شحن ، وهتختار طبعاً نوع ومدة الشحن ، وبناءً عليه وعلى وزن الشحنة ، هيتحدد السعر. ولما الحاجة توصل كندا هتدفع عليها جمرك ، طبعاً شركة الكوريَر هتدفعه ، ويحاسبك عليه لما تيجي تستلمه! ما تفتكرش إنك هتعرف تتذاكى على كندا rs:

فيه مواقع تانية كندية ، هتلاقي فيها الحاجة ، وبتحسب لك الضريبة وتكاليف النقل أرخص ، وأسرع ، ومفيش مجال تدخل عنوانك عشان تشوف لو هيقبلوا يشحنوا لمنطقتك ولاّ لأ ، وكمان المعاملة بالدولار الكندي ، يعني هتتجنب فرق العملة بين الدولارين ، واللي غالباً البنك بيستعبط فيه!

حكاية ألبيرتا وأونتاريو وباقي التفاصيل الغريبة دي ، ولا جات في بالي قبل كده الصراحة! فمش هاعرف أفيدك فيها!

وبالنسبة لحكاية المنفحة... هاقول لك عليها في حكايات الحلال... كمان شوية.

[moheltohamy]

عودةً إلى صور البحريات واللحوم... نبدأ بصور السي فودز...

شوية صور للاستاكوزا الصاحية في الأحواض ، وانتا بس تشاور ع اللي نفسك فيها...

وكمان لو عاوز جندوفلي وقواقع وحاجات كده (ماليش أنا في السي فود أوي إن جيتو للحق)...

وصورة تانية ، بس مش من لورانس ، من دومينيون اللي قدام البيت في يانج آند إجلنتون...

استاكوزا وكابوريا برضه...

ولو نفسك هفّتك ع السمك اللي صاحي وبيلعب برضه... الصاحي موجود والميت برضه موجود...

وآدي الرنجة المخلية في وول مارت في لورانس إيست على ما أذكر!

[Pharm]

صور جميلة والواحد هياكل سى فود لغاية ما ينور بس فيه سؤال واقف فى زورى وعاوز اساله :closedeyes:

الاسعار اللى موجودة دى للواحد يعنى للسمكة ولا للكيلو (يمكن يكونوا بيبعو بالكيلوا زاينا )

[moheltohamy]

باقي صور الأسماك...

الله يكرمكم اللي يعرف الكائن المُسمّى الجمبري القزاز السويسي ممكن يطلع أنهو واحد في دول ، يقوللي...

السمك ده مفتوح ومتنضّف بالمناسبة...

وفيه رنجة بخيرها برضه ، مش مخلية...

[moheltohamy]

صور جميلة والواحد هياكل سى فود لغاية ما ينور بس فيه سؤال واقف فى زورى وعاوز اساله :closedeyes:

الاسعار اللى موجودة دى للواحد يعنى للسمكة ولا للكيلو (يمكن يكونوا بيبعو بالكيلوا زاينا )

غالباً بالرطل يا عزيزي ، ما لم يُكتَب غير ذلك... حتى لو تلاحظ هتلاقيهم كاتبين LB/

[ابو رقية]

الاخ العزيز ابو سعد تهامي باشا المحترم

يعطيك العافية ومشكور اخي على جهودك ..

كان نفسي اسئلك من زمان على اسعار الخضر والفواكه , , الذي لاحظته من خلال الصور انه LB معناها النصف كيلو وبعض الاحيان يكتب الى جانبها سعر الكيلو وهو اكثر بقليل من سعر نصفين للكيلو (رطلين) . سؤالي كيف يحسب السعر اذا كان الوزن اكثر من نصف كيلو بقليل ؟.. وبعض الاسعار عليها حرف او رقم صغير فوقها على اليمين فهل معناها اجزاء الدولار اي اقل من دولار ؟.

تحياتي لك وللعائلة.

اخوك ابو رقية

[Safystar]

سلامة... أنا هنا يا سلامة

وآهو الاتنين بتوع زبيدة ثروت برضه

مشاوير والله يا ولاد ، وقلت حتى ألحق أكتب لكم شوية النهارده ، ونخلص من الواجب القديم قبل ما نتحرك بكرة على اسكندرية!

نشوف الواجبات المتأخرة علينا... :unsure:

سلامة ........ الف حمدالله على السلامة

أعتقد كل شيئ ممكن تلاقيه بجد في كندا ، ولو مش متاح في الهايبر ماركتس العادية ، هتلاقيه في الماركتس العربية ، وأحياناً الهندية والصينية...

ثانياً... البنت قالت لك تورونتو ، تقوم انتا عاوزها تنحرف عن الصراط المستقيم؟

لأ متخافشى انا على الصراط المستقيم اهو وزى ما جوزى بيقولى بعمل من غير ولا كلمة قال تورنتو يبقى تورنتو :unsure:

بس انتي إيش عرّفك اللي موجود في سيف واي؟

ليكي جواسيس في الغرب الكندي والأمريكي؟ ولا يكونش فتح فروع في السعودية؟!

وأشكرك بجد على دعواتك ، ويا رب تتحقق ، ويحقق لك زيها ، وتلاقي أحلامك كلها في كندا يا رب.

السيف واى هى الاسواق المعروفة باسم اسواق التميمى لكن هى اسمها اصلا السيف واى وهتلاقى دة مكتوب على الفروع بالانجلش (SAFE WAY)لكن التميمى دة اسم صاحبها السعودى وطبعا هى فروع من اسواق السيف واى العالمية وفى فرعين فى الخبر واحد كبير على الكورنيش وواحد صغير فى العقربية ودة اللى انا بشترى منه كل حاجة وفيه افضل فواكه وخضروات وفيه طبعا انواع كتير للتوفى والتوم المقشر وفيه كمان البان الصويا بالفانيلا والشوكولا ودى طعمها مش بطال وفيه شيرى لذيذ قوى وفى قسم للاطعمه الاورجانيك وبصراحة انا معرفشى هو فاتح من امتى بس اعتقد من زمان لانى من ساعة ما جيت السعودية من 9سنين وانا بلاقيه اما فى الرياض ففى فرع خرافى ف منتهى الشياكة والجمال

على فكرة انا برضة ليا صولات وجولات فى الشوبنج بس على ادى فى العالم العربى بس (الكويت ودبى وابوظبى )وطبعا الرياض وجدة

واى خدمة يا افندم :blush2:

وان شاء الله ربنا يحققلك احلامك واكتر

واناكمان بأشكرك على دعواتك ويارب يارب كل اللى يسافر كندا يلاقى كل احلامه هناك

صافى ستار

[Safystar]

عودةً إلى صور البحريات واللحوم... نبدأ بصور السي فودز...

شوية صور للاستاكوزا الصاحية في الأحواض ، وانتا بس تشاور ع اللي نفسك فيها...

وكمان لو عاوز جندوفلي وقواقع وحاجات كده (ماليش أنا في السي فود أوي إن جيتو للحق)...

وصورة تانية ، بس مش من لورانس ، من دومينيون اللي قدام البيت في يانج آند إجلنتون...

استاكوزا وكابوريا برضه...

ولو نفسك هفّتك ع السمك اللي صاحي وبيلعب برضه... الصاحي موجود والميت برضه موجود...

وآدي الرنجة المخلية في وول مارت في لورانس إيست على ما أذكر!

يم يم

اممم اجد اسماك قد اينعت وحان وقت اكلها ....واجد بلاد قد تفتحت وحان وقت الاستقرار بها .....ولو انها خطوة اتأخرت لكن يمكن اللحاق بها

صافى

[arora]

يا سلام يا سلام على صينية سمك بالخضار

مع شوربة سى فووود وجمبرى جامبو بانيه حاجة تسند القلب

ربنا يخليك يا دكتور تو وتعبشنا فى الاحلام

[alaafrench m]

شكرا يا مستر تو

شوية سى فود فى الجون

اديها اسماك بزيادة الله يكرمك

وليا سؤال عن منفحة العجل

او موجوده(طبعا حلال) يبقى تمام

هنعمل جبنة ونهيص

يمكن نعمل منها مشروع

وبما انك فى مصر حاليا

ممكن تحضر لقاء توديع استاذ نصار وسيد منير

يوم 18الجارى فى المنصورة

[SoSo R]

و على فكرة أنت عملت حاجة تانية حلوة قوى

د/ سوسو دخلت على الرغم من انشغالها و نورتنا

و بأقولها و أدعيلها ربنا يوفقك و تستمرى فى نجاح على طول ان شاء الله

ربنا يكرمك يا أستاذ رامى...

بجد رافع معنوياتى علطول

أنا كنت مكملة فى المشروع بتاعنا إيه بتاع تحليل الشخصية...فاكر؟؟

فحللت شخصيته من اللى بيكتبه

قام إصطادنى و سرب مذاكراتى

إلحقنى بأه

و حلله من صور سوق الخضار ديه

تفتكر ممكن نستنتج منها إنه إنسان يميل إلى العزلة و قلبه قلب خساية

ولا أنت إيه رأيك؟؟

أولا منورة المحاورات يا د/ سوسو و بجد مفتقدين حضرتك قوى

و ربنا يوفقك فى الامتحانات و يبارك لك فى بناتك

أما موضوع التحليل اللى أنت عارفاه أنا مش ناسى بس مستنى لما تفضى علشان نمضى عقد الشركة :cry1:

المشكلة مش د/ تهامى أنت عارفه أنا ممكن أحلل أى صورة

متمكن ومحلل مخضرم :cry1:

المشكلة ان د/ تهامى مشرف و أنا عندى حساسية من المشرفين :cry1: تحليلهم صعب شوية

المهم أنت منورة و يا ريت ما تقطعيش و تغيبى علينا

ولا يهمك يا أستاذ رامى...حلل براحتك

أنت فى حمايتى :cry1:

وإحنا الأتنين فى حماية ربنا

واللى بييجى ع الولايا ...ما بيكسبش :rolleyes:

[SoSo R]

إحم ...إحم...

معلش بتنحنح بس عشان أسلك صوتى أصله مش طالع بعد فترة طويلة من الصمت المطبق

هقول كلمتين و ارجع للصمت تانى

يا فندم حمد الله على سلامتك... لما معلّمة كبيرة وصاحبة قهوة تنوّرنا هنا ، يبقى يا مراحب يا مراحب ، الشيشة يا ابني هنا

المهم....

الكلمتين بتوعى...

روح يا شيخ ....ربنا ياخدك

ويوديك مكان أحسن من اللى أنت فيه

أنا كنت واخدة عهد على نفسى مش هاتكلم ولا هفتح بوئى فى موضوع الشوبنج...بعد ما بديت لأنى حسيت بالضآلة و الجهل

أول ما أبتديت تتكلم عن الألبان و الجبن...قلت يا إما أنا مش عايشة فى البلد....يا إما عندى مشكلة

م الآخر واضح إنك بتستمتع جدا بموضوع الشوبنج وانك تجرب الأصناف وكدة

أنا إستراتيجيتى مختلفة تماما...هيا ورقة مكتوب عليها عايزين فيها إيه و دمتم...وممكن نلقط حاجات إضافية بسيطة وشكرا

ما هو ده تفسير الكلمة اللي الواد ديبو قالهالي قبل كده...

فيه يا ابني فرق بين الشوبنج والباينج (Shopping & Buying). الباينج ده المفروض بتاع الرجّالة ؛ إنك تكتب لستة الطلبات اللي البيت محتاجها ، تروح الماركت تشتريهم ، وتروّح. الشوبنج ده بتاع الستات ، رايحين الماركت مش عارفين همّه عايزين إيه ، واللي يعجبهم ع الرف يشتروه ، وبالتالي خراب بيوت مستعجل ، وممكن تكتشف بعد ما تخلّص شوبنج إن تلات تربع اللي اشتريته ده ما كنتش محتاجه من الأساس ، وإن معظم اللي كنت خارج تشتريه من الأصل ، ما جبتهوش!

م الواضح إن استراتيجيتك في المشتروات رجالي أو عملي شوية ، وأنا استراتيجيتي على حريمي

ليه بقى؟؟؟؟

قولتلى ليه...

لما يكون معاك طفلتين ...بيشبطوا فى كل حاجة و أى حاجة وانت بتلف...

وعاملين زى الكواير...واحدة تقول و التانية ترد عليها

can we buy....??

ماما عايزين نجرب ده شفت إعلانه فى التلفيزيون....

وهكذا دواليك لحد ما نحاسب و نخرج و أنا عندى صداع

أختك بأه بتبقى عاملة زى الواد ده....

عبده العبيط..مين ماما؟؟؟

يعنى إيه تلفزيون؟؟؟

ردود من هذا القبيل

ممكن أستجيب فى حالة واحدة بس

لو ماما عايزة تجرب هيا كمان

يبقى نجيب الحاجة تحت بند....العيال نفسها فى الحاجة دى ...نحرمهم يعنى ؟؟؟

أنا عن نفسي معترف بالحقيقة المرة... أنا عيّل ، وباشبط أوي على فكرة ، ولما دماغي بتزن على حاجة ، ما بارتاحش غير لما أجيبها! مصيبة بجد!

المهم بعد ما قريت مداخلة اللحوم...كرهت نفسى أكتر

أصلى عمرى ما ركزت فى سعر الرطل و الكيلو و الكلام الفارغ ده

أنا بشوف اللحمة شكلها بيعجبنى...بتنادينى و تقولى إشترنى...

ويكون سعر الطبق معقول فيه حوالى اتنين كيلو...من كوسكو غالبا

البوفتيك بجيبه بتلو ....ميلك فد فيل

و الفراخ تمنها حوالى 8 $ و مش بجيبها كتير عشان بتتاكل فى خلال خمس مرات لما العيال بتعلنى

بجيبها صدور مخلية عشان تتعمل بانيه و مش فاكرة بكام...

بس خلاص نويت أركز فى الأسعار و الأنواع و هنزل بتقلى فى المداخلة الجاية عشان تعبانة جدا و عندى إمتحان يوم الأحد

أنا بقى آخر واحد ممكن يتكلّم عن الأسعار سعادتك

أنا يا بنتي باروح أشتري الحاجة ، والإيصال أمضيه ، وممكن أرمي النسخة بتاعتي في الشنطة ، آل يعني يمكن أرجع لها في وقت من الأوقات. وساعات بتحصل بعد ما أخرج من المكان أقول لنفسي: هوه أنا مضيت على كام؟!

ساعتها بس باطلّع الإيصال ، وأشوف المبلغ اللي مضيت عليه!

بس الأغلب إني بامضي زي الباشا ، والحساب يجمع بقى... فيه أجمل من إنك بتشتري كل اللي نفسك فيه ، وتخرجي من غير ما تدفعي ولا سنت؟! موووتعة!

نهايتي سودة أنا عارف!

و هحكيلك عن التحول الشرائى اللى حصلى بعد هاند أوفراتك...وعندى مداخلة غبية عن الفراخ برضه ...بس بعد الأمتحان

نحن في الانتظار يا فندم... سوسو وفراخها

خد بأه الحتة دى إهداء ...سوفونير يعنى ....مكافأة لك على مجهود السيرش الجامد ده

شكلك انتي اللي هتاخدي السوفونير اللي جاية يا سوسو flx:

وصل السوفونير يا فندم...

وطبعا آخرتك سودة بالطريقة اللى بتتسوق بيها

أومال أنا ألفت لك الهاند أوفر ليه؟!!

ياريت بقى حتة حشيش مع الشيشة

إلا انت إزاى بتجيب سمايلز مش موجودة فى المنتدى؟؟

وماتقوليش عشان مدير وكدة...أنت عملتها قبل كدة و انا عديتها بمزاجى قبل ما ربنا يفتحها عليك...

ومش عارفة هينفع أنزل مداخلة الفراخ دلوقت ولا هابوظ سياق الموضوع...

لأنى شايفة فى أجندة لتسلسل المواضيع اللى جاية

و أخاف حد من القراء أو المعجبين يحدفنى بكرسى أو طوبة :cry1:

تعالي يا بتاعة السوفونير بقى... أولاً ، إحنا قلنا بنكتب لله والوطن.

وبتتريقي على هاند أوفراتي سعادتك اللي وصلوا لـ 67 هاند أوفر بيني وبين أحمد مراد وآخرين؟ مااااشي!

نقول بقى المستخبي ، وأنشر هاند أوفر سوسو آر ، أو عشان الدقة ، مذكراتها الشخصية...

------------------------------------------

أونتاريو ترحب بسوسو آر... أمّال كنت هاقول يعني تورونتو إزاي؟ أجيب وش منين أقول إسم المكان اللي أنا ساكنة فيه ، وكلهم ساكنين في البندر ، وأنا ساكنة في الفلاّحين ، بعد ما كنت من ساكني مدينة نصر ، وعاملة فيها بنت الناس الكويّسين! نخليها أونتاريو أحسن ، والمعنى في بطن الشاعر بقى ، وربنا ستّار

هييييه... عدت سنة... ولسّه سامعة أغنية هاني شاكر! يا ترى إيه اللي عملته في نفسي ده؟

أنا بجد بصمتلك بالعشرة...إيه يا إبنى بتقرا الغيب؟؟؟

أنا فعلا كنت ناوية أكتب مذاكراتى بعد سنة

ومارديتش أرد على المداخلة دى إلا لما أعدى السنة فعلا و النهاردة كملت سنة بالتمام و الكمال...الأنيفيرسيرى بتاع كندا

موضوع إيه اللى عملته فى نفسى برضه كأنك خدتها من على لسانى...قلتها كتير فى ليالى كتير و شيرى كمان سألتنى نفس السؤال

كنت بنت آوت جوينج ، من يومي وأنا منطلقة ، ودوّبت شوارع المحروسة ، وياما

اتشاقيت بعزيزة مع سواقين الميكروباصات!

على فكرة كان اسمها توتى بطة!!

دة بجد مش هزار

دي حتى الكويت ما رحمتهاش ، وكنت مقضياها ولا ليه دعوة بالرادار ولا السرعة ، والبوليس عندهم بيضعف قدام البنات ، وقلبهم بيحن ، وآخرهم (ما تعمليش كده تاني)!

آدى آخرة إن الواحد كان بيحكى فى القهوة بتاعتك مغامراته المرورية..

بقيت باتذل بيها دلوقتى :rolleyes:

يوصل بيا الحال إني مش عارفة أعدي الميت كيلو؟! ما كانش يومك يا سوسو!

عديتها يا فندم ووصلت 140 كم ...يموت الزمار و صوابعه بتلعب

وكمان لسه واخدة تيكيت بسبب الباركنج...أنظر اليوميات فى الرستوران بتاعى بعد ما أكتب الأبديت

وبعد ما كنت رايحة جاية ، والصيدليات بيتخانقوا عليّا ، آجي هنا أرجع تلميذة بالمريلة ، وماسكة الكُتُبات ، ورايحة الدرس الخصوصي ، والواجب ، وطالع عيني في المذاكرة؟! بعد ما شاب شعري وانا باموّس أيام الكلية عشان التقدير! تبقى دي آخرتها؟ هيّه المذاكرة دي ورانا ورانا ، ومش هنرتاح منها بقى؟!

دى طلعت المذاكرة هتستمر طول عمرى

يعنى لو أبتديت التدريب

وكمان بعد عمر طويل لو أخدت اللايسنس...لازم أكمل فى المذاكرة

وحتى المعاكسات اتحرمت منها... كنت في مصر مهرية معاكسات من طوب الأرض ، وأقول مفيش منك يا بنت يا سوسو! برضه المعاكسات دي بتخللي الواحدة مننا منتشية وعاملة دماغ عنب زي بتاعة الوله تهامي!

أروح الكويت ، العملية هديت شوية ، بس من وقت للتاني كنت بالاقي معاكساية ترفع من روحي المعنوية!

معلش يا أستاذنا ...أنا واثقة من نفسى جدا

ومش محتاجة حاجة ترفع معنوياتى...هيا مرتفعة لوحدها

شفت التواضع :cry1:

وبعدين...معقولة سليلة مدينة نصر تقول الوله تهامى!!!

هاقول ياض يا تهامى :cry1:)

آجي هنا ، سوقنا واقف خالص ، وحتى المعاكسة اليتيمة اللي أتعاكسها ، تيجي من سواق نقل ، ويطلع في الآخر شارب وسكران طينة... بعد ما عاكسني لقيته بيعاكس راجل عجوز تاني كان بيعدّي الشارع؟! يعني نرضى بالهم والهم مش راضي بينا؟!

إيش عرفك انت هو اى حاجة...انت كنت موجود يعنى؟!!

كنت قرفانة من الحر والتراب في مصر ، أروح الكويت أشوف الحر اللي على أصله ، وعواصف الطوز الرملية ، وأترحّم على حر مصر وترابها! قلت أروح أخلص من الحر بجميع أشكاله... ألاقي تلج ؟! هوّه أنا مكتوبلي أتبستر يا ربي؟! من 50 لـ -30؟ حد يعمل في نفسه كده برضه؟!

على فكرة بأه

أتبستر دى بجد كلمتى لما باتكلم مع أى حد فى موضوع فروق درجات الحرارة...

جبتها إزاى؟؟؟؟

جوزي يتحايل عليّا في مصر أقعد وأتستت في البيت ، وأقول له أبداً ، المرأة تساوي الرجل ، وكتف الفتى يلامسه كتف الفتاة ، وكل الحركات بتاعة سعاد حسني ومديحة يسري دي! وآجي هنا أقعد ست بيت بين أربع حيطان؟! يا شماتة سي الأستاذ فيكي يا سوسو!

كنت مدمنة قهوة في مصر ، وأروح الكويت أقول لهم في مصر إن عندنا علي كافيه ومحمود كافيه مالهومش زي. آجي هنا وأقول أنا رايحة لبلاد الكافيين ، اللي الناس فيها بياخدوا القهوة IV drip... ألاقي آخرهم نسكافيه المايع ده اللي لا بيعدل الدماغ ولا ليه طعم مع السيجارة ع الصبح؟! وحتى شلة المنتدى باتحايل على كل واحدة جاية تجيبلي معاها كيس قهوة وهادفعلها تمنه ، يقولولي الوزن يا سوسو ما يسمحش!

لأ صافى جابتلى :cry1:

ده غير الناس اللى جاية واعدنى يجيبولى

وخصوصا على كافيه

جوزى بيفكر يجيب توكيله هنا و نخلص

ربنا يستر بس و اسكندرانية ماترجعش فى كلامها و تفرحك فيا

هاقول إيه ولاّ إيه؟ أقوم أذاكرلي كلمتين أحسن... خليني أتحجج في المنتدى بإني عندي برد ، والبنات عاملين دوشة ومصدّعيني أحسن... بدل ما أتفضح!

بجد بأه

ميرسى جدا ع السوفونير...فعلا عجبنى جدا ومت على روحى م الضحك لما قريته

بس أستنيت أكمل سنة فعلا عشان أرد بمزاج...

شكرا يا دكتور

[moheltohamy]

الاخ العزيز ابو سعد تهامي باشا المحترم

يعطيك العافية ومشكور اخي على جهودك ..

كان نفسي اسئلك من زمان على اسعار الخضر والفواكه , , الذي لاحظته من خلال الصور انه LB معناها النصف كيلو وبعض الاحيان يكتب الى جانبها سعر الكيلو وهو اكثر بقليل من سعر نصفين للكيلو (رطلين) . سؤالي كيف يحسب السعر اذا كان الوزن اكثر من نصف كيلو بقليل ؟.. وبعض الاسعار عليها حرف او رقم صغير فوقها على اليمين فهل معناها اجزاء الدولار اي اقل من دولار ؟.

تحياتي لك وللعائلة.

اخوك ابو رقية

بص يا عزيزي... بتلمح على يافطة السعر نوعية الحساب... فيه يُفَط مكتوب عليها Each يعني مثلاً المانجاية بـ 2 دولار. وفيه اللي يكتب لك التلات برتقالات بـ 2 دولار!

وفيه اللي بيتكتب عليها السعر بالرطل وبالكيلو تحته ، وزي ما قلنا قبل كده الرطل = 453 جرام ، أو الكيلو = 2.2 رطل ، يعني لو رطل اللحمة المفرومة بـ 4 دولار ، يبقى الكيلو بـ 8.8 دولار... مش صعبة يعني يا أبو رقية

الخلاصة... إقرا التفاصيل على يافطة السعر... هتلاقيها موضحة لك كل حاجة :rolleyes:

[moheltohamy]

يم يم

اممم اجد اسماك قد اينعت وحان وقت اكلها ....واجد بلاد قد تفتحت وحان وقت الاستقرار بها .....ولو انها خطوة اتأخرت لكن يمكن اللحاق بها wst::

صافى

صافي... إنتي مش بتقولي خريجة فرنساوي برضه؟ ولاّ كان فيه رغبات مدفونة لدخول دار العلوم أو آداب عربي؟ wst::

وعقبال ما توصلي كندا بالسلامة ، وتفيدينا بخبراتك الشوبنجية :rolleyes:

ويا ريت كان ليّا في أكل البحريات ، كنت قدرت أفيدكم أكتر... بس لو حد هنا اسكندراني ، ويفهم في الأسماك يا ريت ردخل يفيدنا...

ولو حد سويسي... يا ريت يعبّرني ويقوللي الجمبري القزاز السويسي يطلع مين في الصورة اللي فوق؟! :blink:

[moheltohamy]

يا سلام يا سلام على صينية سمك بالخضار

مع شوربة سى فووود وجمبرى جامبو بانيه حاجة تسند القلب

ربنا يخليك يا دكتور تو وتعبشنا فى الاحلام

يا فندم تعيشي وتدوقي ، بس أيام الصيام تعدي :blink:

شكرا يا مستر تو

شوية سى فود فى الجون

اديها اسماك بزيادة الله يكرمك

وليا سؤال عن منفحة العجل

او موجوده(طبعا حلال) يبقى تمام

هنعمل جبنة ونهيص

يمكن نعمل منها مشروع

وبما انك فى مصر حاليا

ممكن تحضر لقاء توديع استاذ نصار وسيد منير

يوم 18الجارى فى المنصورة

هنديها أسماك بزيادة ما تقلقش... لسّه الصور كتير.

وبعدها اللحوم...

وبعدها الحلال بقى عشان نخلص!

وربنا يسهلها ، وأقدر ألحقكم في الميتنج بتاعكم ده...

وبالنسبة للمنفحة... تعتقد يا عم علاء إن كندا منتظراني أنا وانتا عشان نجيب لها المنفحة؟ :rolleyes:

[moheltohamy]

وصل السوفونير يا فندم...

وطبعا آخرتك سودة بالطريقة اللى بتتسوق بيها

أومال أنا ألفت لك الهاند أوفر ليه؟!!

ياريت بقى حتة حشيش مع الشيشة

إلا انت إزاى بتجيب سمايلز مش موجودة فى المنتدى؟؟

أنا يا فندم مش باجيب أياتوها حاجة من برّه المنتدى... أنا لويال :D

وماتقوليش عشان مدير وكدة...أنت عملتها قبل كدة و انا عديتها بمزاجى قبل ما ربنا يفتحها عليك...

ومش عارفة هينفع أنزل مداخلة الفراخ دلوقت ولا هابوظ سياق الموضوع...

لأنى شايفة فى أجندة لتسلسل المواضيع اللى جاية

و أخاف حد من القراء أو المعجبين يحدفنى بكرسى أو طوبة wst::

يا باشا إنتي تنزلي بمداخلاتك في أي وقت... الفراخ دي أنا باموت فيها ، وما عنديش مشكلة آكلها كل يوم ، 3 مرات في اليوم :rolleyes:

بجد بأه

ميرسى جدا ع السوفونير...فعلا عجبنى جدا ومت على روحى م الضحك لما قريته

بس أستنيت أكمل سنة فعلا عشان أرد بمزاج...

هابي أنيفيرساري على كندا يا سوسو ، وعقبال كل سنة يا رب ، وانتي منورانا هنا في البيت الفيرشوال wst::

وباقي مداخلتك دي أستأذنك أأجل الرد عليها عشان دي محتاجة لها قعدة... ألحق بس أنزّل باقي الصور قبل ما أمشي! :blink:

[moheltohamy]

باقي صور السمك يا ولاد...

[moheltohamy]

وما زلنا مع صور البحريات أو المحيطيات زي ما كنا بنقول...

حد أخد باله صحيح من رجلين وأجسام الكابوريا الجامبو (الـ King Crab) بتاع ألاسكا؟ :rolleyes: