اضحك مع مصر للطيران

[زهرة الجبل]

أنا بصراحه تجربتي مع مصر للطيران تجربه ليست جديده

قد يكون الحال إنصلح بعدها ... الله أعلم .. بس من بعدها لم أتجرأ و أسافر على خطوط مصر للطيران مره أخرى

عندما أتحدث عن خدمات سيئه بالمطار ... قد يتقبل البعض ذلك و إن كان على مضد

و عندما نتحدث عن سوء معاملة الطاقم ... هنقول ساعتين زمن و يعدوا و يا دار ما دخلك شر

و جبات بارده و لا تؤكل ... مش مهم خالص ... بناقصها أصلاً

العجب الذي نراه من العمال في المطار سواء كمسافرين أو عائدين للبلد ... و يا حبذا العائدون ... هنقول معلش ..

لكن عندما تعلق الأمر بسلامة الطائره نفسها فنحن إذن بصدد الحديث عن أرواح البشر في داخلها

و دي إسمها مصيبه

كنت مسافره أنا و بنتي و إبني و معي جارتي و أبنائها الثلاثه .. و الرحله كانت من مطار الكويت و متجهه إلى مطار القاهره الدولى

بدءت الرحله طبيعيه و لكن بعد نصف ساعه تقريباً بدءت الطائره في الرجه .. زي المطبات الهوائيه لكن بشكل مفاجئ و غير متدرج متقطع لكنه قوي من البدايه للنهايه

قيل لنا وقتها أنها مجرد مطبات هوائيه عابره سرعان ما ستنتهي ثم سمعنا سيده تجلس في الجانب الأيمن ..(بجوار الشباك) تقول أنها ترى ناراً مشتعله تخرج من أحد جوانب الطائره

ثم سادت حاله غريبه من الهلع بين الركاب و أخذ الجميع يسأل و البعض يحاول الوقوف ليرى ما تتكلم عنه السيده

و لاحظنا عدم إستقرار بين افراد الطاقم .. المضيفات تجري في أروقة الطائره و طُـلِب منا ربط الأحزمه مره أخرى

الجميع في حالة هلع ثم أعلن كابتن الطائره أننا سوف نهبط إضطرارياً بعد خمس دقائق بمطار المملكه العربيه السعوديه لأن الطائره فقدت أحد محركاتها الأربعه

الغريب أن ما حدث كان على العكس تماماً مما يتوجب على طاقم الطائره أن يكونوا عليه

أحد المضيفين الرجال قال لجارتي كإجابه على سؤالها ... هل الطائره بإمكانها الوصول لمطار السعوديه بالمحرك المفقود بسلامه أم هناك مخاطره؟

جاء الرد من الأخ المضيف و الله العظيم كما يلي:

انا عارف ايه الرحله دي؟ دي رحله سودا من أولها أصلاً ,,, أنا مراتي قالتلي الصبح ان قلبها مقبوض و بلاش اطلع الرحله دي .. يا ريتني سمعت كلام مراتي ... و سابنا و مشى!!!!

وقتها بصيت لبنتي و قعدت اعيط في سري... وذاد الطينه بله أن الطيار أعلن أن مطار المملكه رفض إستقبال الطائره لعدم وجود مدرج فارغ يستوعب الهبوط الإضطراري و سوف نضطر للعوده لمطار الكويت مره أخرى.. وهناك سيتم إستبدال الطائره بأخرى و إستئناف الرحله

هنا .. راحت جارتي في حالة إغماء ... و ولادها اتفتحوا في العياط .. و بقيت انا في حاله هيستيريه مش عارفه أعمل ايه

و لا يوجد طبيب في الطاقم ليعالج حالة الإغماء .. قعدنا نقول شوفوا دكتور ... هاتوا دكتور ... جاءت المضيفه تحاول إفاقة الست بمنديل معطر ... بس لا حياه لمن تنادي

بعد قليل جاء رجل شكله محترم .. لابس بالطو أبيض و قعد يضربها على وجهها ... ثم فك حجابها و شويه يمين و شويه شمال ... و بعدين قال شئ كقول من سكت دهراً ثم نطق كفراً

قال ... لا كده هتحتاج دكتور ... أمال هو كان إيه ... محدش عارف

المهم فات من الوقت ساعه تقريباً في الهواء بمحرك معطل إلى أن هبطت الطائره بمطار الكويت

و هناك سيارات الإطفاء هجمت على جسم الطائره من الخارج و أطفأوا ما كان مشتعلاً

المشكله الحقيقيه بدءت عندما عرفنا أن الطائره سيتم إصلاحها بشكل مؤقت حتى تصل لمطار القاهره ... و كأنهم بيقولوا هيبدلوا الكوتش اللي فرقع و يركبوا الإستبن

مفروض يا جماعة الخير ان دي طياره فيها محرك انفجر ... هتصلحوها مؤقت و نطع بيها تاني ازاي ؟؟

قالوا لا طبعاً مفيش حاجه إسمها نصلحها دي ... ده احنا هنستبدل المحرك تماماً ... و بعد شويه جه المضيف الشؤم اللي مراته كان قلبها مقبوض الصبح و قال لنا ... يا جماعه إحتجوا و اعملوا اي حاجه بس متقولوش ان احنا اللي قلنا لكم... المحرك بيتصلح مش هيبدلوده

طبعا إتكلمنا كتير و قلنا كتير ... و لا حياة لمن تنادي

إستمر الحال عشر ساعات و نحن كل منا حبيس مقعده في الطائره حتى يتم البحث عن الثقب اللي في كاوتش العربيه ... قصدي حتى يتم إصلاح المحرك

و طلبنا النزول من الطائره لأن معانا أطفال ... لحين إصلاحها و العوده إليها ... قالوا ممنوع لإن أخدنا ختم خروج من البلد مش مسموح لنا بالخروج من باب الطائره إلا في مطار القاهره

و كان غير مسموح بإستخدام أجهزة الهواتف النقاله علشان نطمن اللي في مصر و لا علشان نطمن اللي في الكويت حتى

زوجي طبعا بيتصل يسأل والدي اللي المفروض بيستقبلني في مطار القاهره ... مفيش خبر

و في مطار القاهره بقى بيسألوا عن الرحله ... الموظف المبجل هناك قال لهم الطياره طلعت من ثلاث ساعات و من وقت طلوعها و الرادار لا يراها و لا نعلم عنها شئ

بعد خمس ساعات من الرميه في الطياره على ارض الكويت سمحوا لنا بإستخدام الهواتف النقاله

إتصلنا بزوجي و زوج جارتي و كل من له أحد أتصل ليطمئنه .. بعد ما كانوا تايهين في الدنيا بره محدش بيقول لهم كلمه مفيده ... شرحنالهم الموقف و هم حاولوا إلغاء السفر و إستعادتنا ... مفيش امل أخدنا تأشيرة خروج و لازم نخرج

خلصوا العشر ساعات بتوع التصليح و بعدهم توكلنا على الله و نطقنا بالشهادتين و ودعت زوجي عالتليفون و الله ودعته كأني لن أسمع صوته مره أخرى

و طول الساعتين و نحن في حالة صمت ... ببص في عين بنتي و بس

و بعد ما وصلنا المطار بالقاهره لقينا صحافه و كاميرات و هيصه و كأنهم بيستقبلوا فريق كره عائد بكأس العالم

و لقيت والدتي شبه مغمى عليها ... و الناس واقفين في المطار كل ما حد يشوف قريبه أو قريبته يصرخ من الفرحه ... و المصورين يصوروا

بصراحه كانت تجربه كفيله بعدم التكرار من وقتها إلى اليوم ... رغم مرور خمس سنوات الآن تقريباً .. من وقتها و أنا أسافر على الخطوط الكويتيه و على المطار الجديد و لا رعب مصر للطيران تاني

[Bassam El Sayed]

قيل لنا وقتها أنها مجرد مطبات هوائيه عابره سرعان ما ستنتهي ثم سمعنا سيده تجلس في الجانب الأيمن ..(بجوار الشباك) تقول أنها ترى ناراً مشتعله تخرج من أحد جوانب الطائره

ثم سادت حاله غريبه من الهلع بين الركاب و أخذ الجميع يسأل و البعض يحاول الوقوف ليرى ما تتكلم عنه السيده

و لاحظنا عدم إستقرار بين افراد الطاقم .. المضيفات تجري في أروقة الطائره و طُـلِب منا ربط الأحزمه مره أخرى

الجميع في حالة هلع ثم أعلن كابتن الطائره أننا سوف نهبط إضطرارياً بعد خمس دقائق بمطار المملكه العربيه السعوديه لأن الطائره فقدت أحد محركاتها الأربعه

يا نهار اسود ومنيل يا نهار اسود . والله يا اخت زهرة انت قوية جدا لو مكانك مع انى رجل كان قلبى وقف يمعنى الكلمة . دة لما الطيارة بتتهز شوية علشان مطبات الهوا الواحد قلبة بيقع فى رجلية .

انا حتى الان غير متمالك لاعصابى من ما حدث لكى. ربنا يسترها

[Bassam El Sayed]

ولكن يااخت زهرة

هذة الاعطال محتملة فى اى وقت وفى اى شركة

اذكر لى صديق هندى فى الكويت كان مسافرا على الخطوط الكويتية واضطروا للهبوط فى با كستان نظرا لان احد محركات الطائرة قد توقف عن العمل .

الفارق بين الموقفين مع ان السبب واحد وهو عطل فى الطائرة وهى فى الجو هو انة فى مصر للطيران تعامل معكم المضيف بعدم احترافية ولم يعطيكم احساس بالامان . اما فى الشركة الكويتية فتعاملوا معهم بلطف وبعد هبوط الطائرة حجزوا للركاب كلهم فى فندق 5 نجوم على حساب الشركة الكويتية لحين الانتهاء من الاصلاح وفى اليوم التالى اكلموا الرحلة للهند

[nash]

خير يا جماعه..وحدوا الله....لا إله إلا الله....محمد رسول الله

دي كلها كام ساعه ونطلع...ياريت أخبار حلوة....الله يكرمكم غيروا السيرة....

زهورة...صباحك جميل وورد وزهور ....

قولتيلي الموتور ماله؟؟ :hi: أصل ماينفعش هنا كلمه محرك....يارب استر

[زهرة الجبل]

خير يا جماعه..وحدوا الله....لا إله إلا الله....محمد رسول الله

دي كلها كام ساعه ونطلع...ياريت أخبار حلوة....الله يكرمكم غيروا السيرة....

زهورة...صباحك جميل وورد وزهور ....

قولتيلي الموتور ماله؟؟ :hi: أصل ماينفعش هنا كلمه محرك....يارب استر

نوشه حبيبة قلبي

معلش و الله حقك عليا

بس الكلام ده من خمس سنين دلوقت ... و أنا على ما أسمع الحال بقى غير الحال

توكلي على الله و إن شاء الله رحله سعيده و توصلوا بألف سلامه يا رب

ربنا يسلم طريقكم إن شاء الله

[زهرة الجبل]

يا نهار اسود ومنيل يا نهار اسود . والله يا اخت زهرة انت قوية جدا لو مكانك مع انى رجل كان قلبى وقف يمعنى الكلمة . دة لما الطيارة بتتهز شوية علشان مطبات الهوا الواحد قلبة بيقع فى رجلية .

انا حتى الان غير متمالك لاعصابى من ما حدث لكى. ربنا يسترها

لا و الله يا أستاذ بسام لا قويه و لا حاجه .. هي بس المظاهر خداعه

كلنا بالفعل وقتها قلبنا وقع ... مش في رجلنا ... ده وقع من الطياره خالص

بس الحمد لله على كل حال

و ربنا يسترها مع الجميع يا رب

ولكن يااخت زهرة

هذة الاعطال محتملة فى اى وقت وفى اى شركة

اذكر لى صديق هندى فى الكويت كان مسافرا على الخطوط الكويتية واضطروا للهبوط فى با كستان نظرا لان احد محركات الطائرة قد توقف عن العمل .

الفارق بين الموقفين مع ان السبب واحد وهو عطل فى الطائرة وهى فى الجو هو انة فى مصر للطيران تعامل معكم المضيف بعدم احترافية ولم يعطيكم احساس بالامان . اما فى الشركة الكويتية فتعاملوا معهم بلطف وبعد هبوط الطائرة حجزوا للركاب كلهم فى فندق 5 نجوم على حساب الشركة الكويتية لحين الانتهاء من الاصلاح وفى اليوم التالى اكلموا الرحلة للهند

قد تكون بالفعل محتمله .. لكن لا يجوز أن تكون متوقعه و في أي وقت .. المتوقع دائماً هو إجراءات دقيقه للفحص قبل الإقلاع

و مع ذلك يظل مثل هذا الظرف محتمل فعلا ... لكن كما أشرت حضرتك ... الفرق كل الفرق في كيفية التعامل مع الظرف

ليس من الطاقم فقط... بل أيضاً كإجراءات عامه يلزم إتخاذها ... يعني كان ذنبنا إيه الرميه دي كلها في الطياره ؟

و لماذا لم يكن من إجراءات الشركه ( مصر للطيران يعني ) أن توفر لنا مكان للإنتظار ريثما ينتهي العمل ؟

و لماذا يتم الإصلاح المؤقت و لا يتم إستبدال الطائره للأمان و للحفاظ على أرواح الناس ؟

و لماذا لم نجد رعايه طبيه حقيقيه إلا بعد تدخل سيارات الإسعاف الكويتيه على أرض المطار بعد العوده لمطار الكويت؟

و لماذا يكون الرد في مطار القاهره على الأهالي عند إستفسارهم بأن الطياره طلعت و الرادار مش لاقيها؟

و لماذا يتم منعنا من الإتصال بالأقارب في الكويت لإخبارهم بالتأخر و لو حتى بالتليفون ؟

ده إحنا كنا و لا المخطوفين و الله ...

و لماذا و لماذا ... و ما أكثر و لماذا التي قد تجدها هنا ..!!!

و ربنا يصلح الأحوال و ييسر سفر الجميع يا رب

تحياتي لحضرتك

أم كريم

تم تعديل 15 يوليو 2008 بواسطة زهرة الجبل

[الحازم حسن]

و طلبنا النزول من الطائره لأن معانا أطفال ... لحين إصلاحها و العوده إليها ... قالوا ممنوع لإن أخدنا ختم خروج من البلد مش مسموح لنا بالخروج من باب الطائره إلا في مطار القاهره

و كان غير مسموح بإستخدام أجهزة الهواتف النقاله علشان نطمن اللي في مصر و لا علشان نطمن اللي في الكويت حتى

يعني إيه !!!!!!!

يعني لو راكب جات له ازمة قلبية أو جلطة في المخ ممنوع ينزل من الطيارة لانه واخد تأشيرة خروج نهائي من البلد ؟!!!!

[Bassam El Sayed]

مش مشكلة ياخد تاشيرة خروج نهائى من البلد وكمان تاشيرة خروج نهائى من الدنيا

فيها اية يعنى ؟

[زهرة الجبل]

و طلبنا النزول من الطائره لأن معانا أطفال ... لحين إصلاحها و العوده إليها ... قالوا ممنوع لإن أخدنا ختم خروج من البلد مش مسموح لنا بالخروج من باب الطائره إلا في مطار القاهره

و كان غير مسموح بإستخدام أجهزة الهواتف النقاله علشان نطمن اللي في مصر و لا علشان نطمن اللي في الكويت حتى

يعني إيه !!!!!!!

يعني لو راكب جات له ازمة قلبية أو جلطة في المخ ممنوع ينزل من الطيارة لانه واخد تأشيرة خروج نهائي من البلد ؟!!!!

و الله فعلاً يا أستاذ حازم ده اللي حصل

يعني جارتي لما أغمى عليها لم يتحرك لأحد ساكن سوى الركاب

و لما حصل رد فعل من الطاقم ... كان منديل معطر مع المضيفه !!!

و لما يعني زعقنا بقى جه الأخ أبو بالطو أبيض اللي قعد يقلب فيها شمال و يمين و يفك حجابها و بهدله .. و في الآخر قال لا هتحتاج دكتور !!!

و الله كنا هنموت من الغيظ اكتر ما كنا هنموت من الرعب

و لم تكن هناك رعايه طبيه إلا بعد العوده للمطار بالكويت و دخلوا للطائره أفراد سيارات الإسعاف الكويتيه و لقوا انها ضغطها عالي جدا أو منخفض جداً مش فاكره بصراحه .. المهم إنهم عملوا اللازم

و إلى الآن لا أعرف سبب الإصرار على عدم خروج أحد من الطائره نهائياً ما عدا افراد الطاقم بالتناوب طبعاً

و كأن الركاب كانوا نزلاء سجن مرحلون إلى سجن آخر و يجب التحفظ عليهم !!!

[/color]

تم تعديل 15 يوليو 2008 بواسطة زهرة الجبل

[الحازم حسن]

و الله فعلاً يا أستاذ حازم ده اللي حصل

يعني جارتي لما أغمى عليها لم يتحرك لأحد ساكن سوى الركاب

و لما حصل رد فعل من الطاقم ... كان منديل معطر مع المضيفه !!!

و لما يعني زعقنا بقى جه الأخ أبو بالطو أبيض اللي قعد يقلب فيها شمال و يمين و يفك حجابها و بهدله .. و في الآخر قال لا هتحتاج دكتور !!!

و الله كنا هنموت من الغيظ اكتر ما كنا هنموت من الرعب

و لم تكن هناك رعايه طبيه إلا بعد العوده للمطار بالكويت و دخلوا للطائره أفراد سيارات الإسعاف الكويتيه و لقوا انها ضغطها عالي جدا أو منخفض جداً مش فاكره بصراحه .. المهم إنهم عملوا اللازم

و إلى الآن لا أعرف سبب الإصرار على عدم خروج أحد من الطائره نهائياً ما عدا افراد الطاقم بالتناوب طبعاً

و كأن الركاب كانوا نزلاء سجن مرحلون إلى سجن آخر و يجب التحفظ عليهم !!!</div>

إنها حقاً تأشيرة خروج :hi:

كان الله في عونك يا اخت زهرة وحمد الله على خروجك سالمة من سجن مصر للطيران

لكن كل ما حصل معاكم كان غير قانوني على فكرة

مفيش قانون في الدنيا يجبرك انك تركبي طيارة وانتي حاسة بالخطر فيها وده كان موقف ممكن تقاضي من خلاله مصر للطيران

في رحلة داخلية في السعودية من أبها إلى الدمام كان مسافر عليها صديق سعودي ابلغ الطاقم الركاب بانهم مضطرين للعودة بسبب وجود خلل في أحد محركات الطائرة ولما رجعت وبعد انتظار ساعتين طلبوا من الركاب العودة للطائرة لكن لما شاف أخينا انها نفس الطائرة رفض يركب وروح بيتهم ... عادي جداً

[مصري أصيل]

اللي نست أم كريم تقوله أن يوم السفر أصلاً لم يكن يوم عادي أبداً . لقد كان اليوم الأول للضربة الجوية علي العراق . و في هذا اليوم لم يكن في تخطيطنا أبداً أن تسافر هي و الأولاد و لكن عند الثانية عشر ضهراً بدأت العراق في ضرب الكويت بالصواريخ . و عندما هبط أول صاروخ علي الكويت نزلت فوراً و حجزت لهم علي طائرة نفس اليوم المسافرة عصراً هرباً من الصواريخ التي سمعنا أنها سوف تكون محملة بأسلحة كيماوية أو بيولوجية . و كنا كالمستجيرين من الرمضاء بالنار . فقد هربنا من قصف العراق للكويت الي طائرة مصر للطيران . و تخيلوا بعد أن أركبتهم الطائرة ذهبت الي المنزل و أخذت حمام ساخن و أكلت ثم رحت في نوم عميق جداً لقد وضعت زوجتي و أولادي في الأمان و ذهبت للنوم و لم يهمني صواريخ و لا يحزنون . و بعد أن صحيت من نومي و منتظر مكالمة من زوجتي تطمني علي وصولها للقاهرة ... لم يتصل أحد . و بعد قليل إتصلت بمصر قالو لم تصل الرحله بعد و عرفت ان في قلق و مش عارفين الرحله خرجت من هنا ام لا .. نسأل هنا مش فاهمين .. بعد عدة ساعات قلق و بحث جاءت المكالمة و لكنها مكالمة داخلية و ليست دوليه ..من أم كريم و قالت لي أنها مازالت في مطار الكويت . و صُعقت عندما روت لي ما حدث و أحتراق محرك الطائرة في الهواء و محاولة الهبوط في السعوديه و عودتهم الي مطار الكويت . و قالت لي أنهم سيستبدلون الطائرة .... و بعدها قالت سيستبدلون المحرك ..... و في أخر مكالمة قالت لي لقد تم أصلاح المحرك و الطائرة الأن تستعد للأقلاع .... فطلبت منها أن تقوم هي و جارتها بعمل إحتجاج و صياح حتي يجبروا قائد الطائرة علي عدم أقلاع الطائرة بهذا المحرك .... و لكن هذه المحاولات بائت بالفشل .

و لكم أن تتخيلوا هذه الساعات القليلة بين أقلاع الطائرة و وصولها كيف مرت علي أنا وجاري . ونحن نعلم أن الطائرة تطير بهذا المحرك و الأدهي أننا في حالة حرب و الصواريخ من الجانبين زي الرز . و لكن قام جاري بالأتصال بشخص يعرفه في مطار الكويت و طمئننا عندما خرجت الطائرة خارج مجال الكويت الجوي فعلي الأقل أصبحت الطائرة في أمان من الصواريخ و يتبقي لنا الطائرة نفسها .

هذا اليوم كان أصعب أيام حياتي و لكن الحمد لله ربنا سلم .

تم تعديل 15 يوليو 2008 بواسطة مصري أصيل

[زهرة الجبل]

في رحلة داخلية في السعودية من أبها إلى الدمام كان مسافر عليها صديق سعودي ابلغ الطاقم الركاب بانهم مضطرين للعودة بسبب وجود خلل في أحد محركات الطائرة ولما رجعت وبعد انتظار ساعتين طلبوا من الركاب العودة للطائرة لكن لما شاف أخينا انها نفس الطائرة رفض يركب وروح بيتهم ... عادي جداً

ممكن يكون قدر يروح بيتهم عادي لأنها كانت رحله داخليه ... يعني لا أخد تأشيرة خروج و لا محتاج تأشيرة دخول

لكن بالنسبه لمشكلة تأشيرة الخروج كانت ممكن جدا تكون محلوله ... بفندق المطار مثلاً

لكن المهم القدره على إتخاذ القرار السليم

أو بشكل أوضح المشكله كانت في قابلية الشركه لتحمل نفقات المشكله

و بعدين صديقك شعر بالخوف لمجرد معرفته بأنها نفس الطائره ... ما بالك بمن ظل داخل الطائره و شايف بعينه عملية التصليح من الفتحات الزجاجيه على الجوانب ( الشبابيك )

و الله كنت شايفه بعيني منظر عمال تحت على الأرض و رافعات بترفع العمال لمستوى إرتفاع المحرك ...

و بالمتابعه أرى بعد قليل أجزاء كبيره مفككه و أجزاء أخرى يتم تركيبها

و الله كأنك كنت راكب عربيه عطلانه و مستني صبي الميكانيكي يطلع من تحتها بعد التصليح !!!

أعرف أنه قد يستغرب الكثيرون من وصفي هذا ....و لا أستكثر إستغرابهم ....

بس و الله فعلا ده اللي حصل يومها و هي دي المناظر التي تتبادر لذهني بشكل مباشر بمجرد ذكر إسم شركة مصر للطيران

وإن كان صديقك رفض السفر بمجرد علمه أنها نفس الطائره .. فما بالك بمثل هذه المناظر و انت مجبر على عدم الخروج و على إكمال الرحله ؟

شئ ... لا وصف له ... الحمد لله على كل حال لكنني أتمنى أن يكون الحال تغير للأفضل بالفعل

[الحازم حسن]

ممكن يكون قدر يروح بيتهم عادي لأنها كانت رحله داخليه ... يعني لا أخد تأشيرة خروج و لا محتاج تأشيرة دخول

لكن بالنسبه لمشكلة تأشيرة الخروج كانت ممكن جدا تكون محلوله ... بفندق المطار مثلاً

لكن المهم القدره على إتخاذ القرار السليم

أو بشكل أوضح المشكله كانت في قابلية الشركه لتحمل نفقات المشكله

و بعدين صديقك شعر بالخوف لمجرد معرفته بأنها نفس الطائره ... ما بالك بمن ظل داخل الطائره و شايف بعينه عملية التصليح من الفتحات الزجاجيه على الجوانب ( الشبابيك )

و الله كنت شايفه بعيني منظر عمال تحت على الأرض و رافعات بترفع العمال لمستوى إرتفاع المحرك ...

و بالمتابعه أرى بعد قليل أجزاء كبيره مفككه و أجزاء أخرى يتم تركيبها

و الله كأنك كنت راكب عربيه عطلانه و مستني صبي الميكانيكي يطلع من تحتها بعد التصليح !!!

أعرف أنه قد يستغرب الكثيرون من وصفي هذا ....و لا أستكثر إستغرابهم ....

بس و الله فعلا ده اللي حصل يومها و هي دي المناظر التي تتبادر لذهني بشكل مباشر بمجرد ذكر إسم شركة مصر للطيران

وإن كان صديقك رفض السفر بمجرد علمه أنها نفس الطائره .. فما بالك بمثل هذه المناظر و انت مجبر على عدم الخروج و على إكمال الرحله ؟

شئ ... لا وصف له ... الحمد لله على كل حال لكنني أتمنى أن يكون الحال تغير للأفضل بالفعل

الله المستعان

عموماً حمد الله على السلامة لحضرتك وللاولاد ولجارتك اللي دمها نشف وربنا يطمن عمنا مصري أصيل عليكم دائماً

شوفي حضرتك زوجك والاولاد أد ايه عندهم بابا جميل .. الراجل بيقول روحت زوجتي واولادي واطمنت عليهم ونمت انا غير مبالي في وسط الصواريخ :rolleyes:

بس أنا أعتقد واسمحي لي بأن موقفكم كركاب كان سلبي بعض الشيء يعني لو قرر كل الركاب انهم مش حيسافروا كانت مصر للطيران وسلطات مطار الكويت كانوا حيعملوا ايه ؟ كانوا حيسفروكوا بالعافية ؟! كنتم اعترضوا بشدة واعتصموا في الطيارة وقرروا النزول وصولا صوتكم لرئيس المطار أكيد مع ركاب طيارة كاملة بموقف واحد الوضع كان حيختلف كتير

ملحوظة : بيقولوا ان مصر للطيران اتغيرت كتير ممكن حضرتك تجربي لنا السنة دي وتقولي لنا هل الوضع اتغير ولا المحرك لسه بينفجر كالعادة ؟؟؟ :blush2:

[سكر]

انا عايز اكون ايجابى شوية

بالرغم من مشاكل الشركة بقول اهى فتحة بيوت ناس لكن والله دائما بحب اركبها لما اكون مسافر من الرياض الى القاهرة

بسافر فى السنة يجى خمس او ست مرات

فى مرة واحدة بس رحت نيويورك وكانت رحلة جميلة بس طويلة طحن

مصر للطيران دبستنى فى اكتر من غرامة منها غرامة ضياع تذكرة من شهر 10 \2007 ولحد دلوقت ما اختش تمن التذكرة بس هخودها قريب

المهم ديما بحاول اقول لنفسى الموضوع مش اكتر من ساعتين من الرياض للقاهرة ونحاول نستحمل شوية عشان غيرنا يعيش

احسن ما الفلوس تبقى لشركة تانية

وبالتالى انا اطالب من جميع الاخوة ذكر نقاط محددة لما هو مطلوب او ترغب فى تحسينة من مصر للطيران وارسال رسالة تهنئة الى وزير الطيران ومدير الشركة

مرفق معها طلبات الاخوة المغتربيين وملاحظاتهم عن الاداء خصوصا اذا كان عملية التغير والتعديل لاتحتاج الكثير من الوقت او الجهد البسيط وانا هبدا بنفسى

لو قسمنا رحلة السفر الى مرحلتين مرحلى داخل الطائرة ومرحلة خارج الطائرة

داخل الطائرة

1- عند النزول لماذا لا يفتح 2باب فى الطائرات الكبيرة لتخفيف الضغط على النزول (الناس بتبقى هتتجنن وعايزة تنزل)

2-تعديل البرامج المقدمة لتزيعوا فلم او مسرحية او برنامج ثقافى محترم ليتقفل احسن (حسب الجهة القدمة منها الطائرة)

3-املى الوحيد انى اشرب كوباية شاي سخنة (الاكل جيد جدا)

خارج الطائرة حدث ولا حرج

1- تصليح حرف T فى يافطة مطار القاهرة الدولى عند الوصول

2-حرق سير الشنط بجاز وسخ وتركيب سير جديد مش ممكن اسافر من الرياض للقاهرة فى 150 دقيقة وانتظر الشنط 50 دقيقة كاملة

3- تغير واستبدل عربات حمل الامتعة ووضع عربات بشكل محترم (شكلها عامل زى مخلفات الحرب او عربات المستشفى الحكومى )

4-استبعاد كل عمال النظافة وغير النظافة من التجول فى الصالات ويكون الخروج لعمال التحميل من مكتب محدد لهم فقط بسعر محدد

5- تغير الاضاءاة وتغير الدهانات ووضع مناظر طبيعة و فى صالات الوصول لان صالة الوصول هو الانطباع الاول عن البلد

6- عمل بوابات الكترونية جديدة عن الخروج من المطار بدل من البوابات الحالية التى يتم حراستها من قبل عساكر لكى تردد كلمة حمدالله على السلامة

ومد الايدى علانية لطلب حلاوة الصول (شحاته بنوع جدي وياريت ميكونش فى امن اصلا او الامن يكون خفى

مش لازم الى يوصل المطار يحس ان نص الشعب شغال فى الشرطة ونص الشرطة شغالة فى المطار كفاية موظف الجوازات )

7- دى بقى اهم واخطر نقطة ووالله لاتحتاج غير تنظيم فقط وهى لحظة خروجك من المطار

نفسة ومنى عينى اشوف تاكسى بالدور اول ما اخرج محدد سعر الركوب داخل العاصمة سعر ثابت زى مطار الرياض بيفطة كبيرة تسد عين الشمس

انا دايما بركب تاكسى وامشى لان بيتى مش بعيد بس والله العظيم بتبهدل اخر بهدلة من التاكسى وامين الشرطة

لازم يعمل شغل وياخد خمسة جنية غير ان سعر الركوب ان وحظك والله مرة ركبت تاكسى العاصمة كانوا هيقطعوا الراجل عشان ممنوع مش عارف اية الى ممنوع

فى مافيا كبيرة برة المطار محتاجه شوية انضباط داخل المطار

8- موقع مصر الطيران اصبح موقع جيد يمكن الحجز والشراء منه مباشرة تذاكر الطيران من والى مصر وجميع دول العالم بس فى ملحوظتين

A- ياريت الموقع يكون فى حجز بس لانه حاليا فى اجبار على الحجز والدفع فى وقت واحد انا عايز احجز فقط وادفع بعدين او معنديش فيزا فادفع فى المكتب

B-سعر التذكرة من على الموقع اكبر بكثير من سعرها فى المكتب بالرغم ان الطبيعى فى كل الخدمات ان الخدمة من على الانترنت تكون هى الارخص

دة بعض الملاحظات الى شايفها لو اتحسنت او وضعت فى الاعتبار هيتغير حاجات كتير فى مصر للطيران وياريت بقى الاخوة يكملوا القائمة وبعدين ادراة المنتدى تكتب

جواب جميل فية تجميع الملاحظات باسلوب حلو ونحاول ناخد رد على الموضع بدل مايكون الموضوع شتيمة وبس ونبقى عملنا الى علينا

على فكرة

الفكرة دة جابت نجاح اكتر من مرة فى منتدى نايل موتورز للسيارت فى مصر وفى حاجات كتير اتحسنت فى خدمات الوكيل نتيجة طلبها

فالناس متبخلش ونحاول نعمل حاجة الموضوع مش كلام وبس

تم تعديل 16 يوليو 2008 بواسطة ataamer

[طه بدر]

بالرغم من مشاكل الشركة بقول اهى فتحة بيوت ناس

لا انا اعترض :rolleyes:

المصيبة يا اخ ataamer اننا دائما ندخل الامور فى بعض

نمسك الحرامى يسرق فى الجامع فبدلا من قطع يده تجد من يبحث له عن تبرير

معلش غلبان

يمكن عنده ظروف

طب نسيبه اخر مرة

وكلام من هذا القبيل

الشركة عندما انشاءت كانت شركة وطنية فى مقابل شركات اجنبية لذلك كان من الواجب دعمها ومساندتها حتى تقف على رجلها

الان وبعد قرن الا شوية الشركة شاخت وضرب العفن فى اجزاء كثيرة منها وتحتاج للبتر وليس للشفقة والرفق

راجع اسعار الشركة فى الحج والعمرة وقارنها بالشركات الخاصة سما وناس فى السعودية التى تقدم ربع الاسعار ومع هذا تمنعك مصر للطيران بقوة القانون من استخدامها للحفاظ على الشركة الوطنية

بينما يجب ان تحافظ انت اولا على اموالك - والا انت اموالك مش برضه تبع الوطنية دى- بدلا من دفع اموال بالاجبار للشركة الوطنية لينفقها السادة اللواءات البهوات الذين احتلوا الشركة وعملوها مئة شركة - بفضل سيادة اللواء شفيق ياراجل - حتى يكون لكل منها رئيس مجلس ادارة له سكرتارية وسيارات وحشم لخدمته وميزانية منفصلة نصرف منها الارباح للاحباب والمحاسيب فى كل مكان وكله من سعر تذكرة سيادتك

سوف اقف مع مصر للطيران عندما تحاول هى ان تعمل باحترام واحتراف لخدمتى كما يجب ان يكون

وفرق التذكرة الذى تنصب مصر الطيران علينا لتاخذه بالاجبار واساليب الاحتكار فمن الافضل لنا جميعا ان تسافر على اى خط طيران ارخص وتبرع بالفرق لمستشفى السرطان او حتى لمنكوبى طوابير العيش

اما حجة انها فتحة بيوت فلماذا نفتح بيوت تريد ان تخرب بيوتنا ؟؟؟؟؟؟؟؟؟؟؟؟؟؟؟؟؟؟؟؟؟ :blush2:

تحياتى اخى ataamer

تم تعديل 16 يوليو 2008 بواسطة طه بدر

[سكر]

الاخ العزيز طه بد

اتفق معك فى جوهر كل كلمة قولتها ولكن اختلف معك فى طريقة التنفيذ

واضح انك زعلان جدا من اسعار مصر للطيران وطبعا دة نقطة كبيرة جدا لكن كلامى وكلام باقى الاعضاء لم يشمل هذة النقطة

وبتحليل اقتصادى بحت يوجد مصطلح فى الاقتصاد يسمى المستهلك الرشيد بمعنى ان

المستهلك دائما رشيد فى تصرفتة ويحاول ان يختار افضل سلعة او خدمة متاحة باقل سعر

ومن هذا التعريف فممكن نقول اذا كان امامك شركة طيران توفر لك الاموال وتقدم لك نفس الخدمة فمن حقق انك تطلق مصر للطيران وتضربها لو عايز

وبالنسبة الى وضعى وتفسيرا للكلام فى الرساله السابقة انا بقارن بين

مصر للطيران والطيران السعودى بحكم عملى فى الرياض

او مصر للطيران والطيران الخاص

الطيران السعودى يقدم ميزة الحجز من على النت دون الدفع وهو دة الى طلبت مصر الطيران بتنفيذة

الطيران السعودى فى الحجز من على النت ممكن يوفر فى حدود 100 او 150 ريال فى نظير الحجز والدفع مقدما بفترة طويلة

فى المواسم لاهتلاقى سفر على الطيران السعودى ولا مصر للطيران

غير كدة مش لاقى اى مميزات وبالتالى

150 ريال اطبق فيها مبدا بلدى اولى لانى مش مقتنع بالخدمات الجبارة الى فى الطيران السعودى وتفوق المصرى

لكن 500 ريال او 300 ريال اطبق مبدا المستهلك الرشيد لانى مش

توفير 500 ريال او 300 ريال ممكن تلاقيهم فى طيران الشركات الخاصة

مع مخاطر الطيران الخاصة انا مش بكلم على عوامل السلامة والامان انا بتكلم على المواعيد

طبعا مصر للطيران ممكن تتاخر عن ميعادها 3 ساعات ودة بهدلة ما بعدها بهدلة لكن تعمل اية لو جاتلك رسالة على الموبيل تقولك

اسف جدا شركةالطيران الخاص (سما& ناس ) تعتذر عن تقديم الرحلة فى الميعاد وهنغير الميعاد ليوم تانى مش ساعة تانية

ودى بتحصل كتير فى الشركات الخاصة

بعد تربيط الاجازة فى الشغل وتربيط العائلة فى مصر تنزل الرسائلة على صدرك ازاى وتلاقى الى وفرتة ضاع فى التاخير

عملية المنع بقوة القانون اعتقد انها مش بالقوة الى حضرتك بتقولها لان سما وناس حاليا فى

الاسكندرية - واسيوط- وشرم الشيخ

يمكن منعين القاهرة بس الاسكندرية من القاهرة فردة كعب بالنسبة للسفر داخل السعودية

بالمناسبة الاسبوع دة بس انا دافع غرامة تعديل الميعاد فى مصر للطيران بالقاهرة 50 دولار وبعدين غيرت تانى فدفعت 20 دولار لظروف مرضية استكمالالمسلسل

الغرامات الى انا مغرم بيه مع مصر للطيران

بس الحمد الله لوكان سما او ناس كان الحجز اتلغى لانى اعتقد والله اعلم مفيش تغير او استرجاع اموال فى الطيران الدولى مش الداخلى

[طه بدر]

عملية المنع بقوة القانون اعتقد انها مش بالقوة الى حضرتك بتقولها لان سما وناس حاليا فى

الاسكندرية - واسيوط- وشرم الشيخ

يمكن منعين القاهرة بس الاسكندرية من القاهرة فردة كعب بالنسبة للسفر داخل السعودية

عزيزى ataamer ما قصدته بموضوع المنع بالقانون ما قراته فى الجرائد عن منع سفر فوج من المعتمرين المصريين على طيران سما وتم الغاء سفرهم لان العقد مع سما وغيرها انها طيران عارض (شارتر) ودوره هو جلب السياح لمصر وليس السفر بالمعتمرين منها. :rolleyes:

والموضوع منشور ولم يتم تكذيبه وانا شخصيا اصدقه لان هذا هو اسلوبنا فى الحياة عموما

نفشل فى المنافسة فنجرى الى اللوائح والقوانين

والسيد المسئول الذى تحدثوا عنه فى هذا الموضوع ينظر الى الحجاج والمعتمرين على انهم - الركاب بتوعى - واخد بالك بتوعى.

وبغض النظر ياسيدى عما يقوله فانا اسال نفسى بساطة هل شركات الطيران الخاصة شركة تجارية اما جمعيات خيرية تزكى علينا علشان كده التذاكر رخيصة ؟؟؟؟؟؟؟؟

يعنى اذا كانت الشركات الخاصة غير المدعوم من الدولة وليس لها اساطيل جرارة تم شرائها من دم قلبنا تسافر من مصر للسعودية بحوالى 500 ريال فى المتوسط - مشيها كده علشان نحسب - فلماذا تكون تذكرة مصر للطيران حوالى 2000 ريال ؟؟؟؟؟؟؟؟؟؟؟؟؟؟؟

سوال اساله لنفسى لان الفرق ليس مائة او مائتين المبلغ تقريبا اربع اضعاف

واذا كان للشركات الخاصة نفس حجم الركاب الذى تحتكره - بقوة القانون علشان بتوعى زى ماقال سيادته- تفتكر سعر التذكرة ها يبقى كام

اما عن تجربتى مع مصر للطيران فانا شخصيا مسافر مثالى احجز مسبقا واحضر فى الميعاد وارضى باى شىء - المهم اوصل- ومع هذا لم يسلم الامر من غرامة 60 دولار لعدم تاكيد حجز عودة نتيجة لراى احد موظفى الشركة فقام الاخر بتوقيع الغرامة التى كانت جديدة وقتها

ساعتها صرخت فى وجه مدير المكتب ولعنت الشركة وادارتها واختراعتها التى لا تنافسها فيها اى شركة اخرى فى العقوبات والغرامات كما لو كنا مساجين وهم ضباط السجن

من وقتها انا شخصيا ابحث عن اى شركة طيران اخرى اولا واجعل مصر للطيران اختيارى الاخير

واطبق كما قلت اسلوب المستهلك الرشيد فاقطع بهدوء شركة اشعر انها تستغل انها مصرية وتسرق اموالى

تم تعديل 16 يوليو 2008 بواسطة طه بدر

[طه بدر]

رجاء اخير ياعزيزى

عندما تذهب المرة القادمة للحجز اسال مكتب السياحة عن اسعار الرحلات الى ماليزيا وبنجلاديش وباكستان وغيرها من البلاد التى تبعد عن الرياض اضعاف بعدها عن القاهرة وشوف هى بكام ؟؟

فانا شخصيا سالت وعرفت انها تساوى سعر واحيانا اقل من تذكرة مصر وعندما سالت عن السبب مع ان تكلفة الطيران المفروض واحدة - ما همة برضة بيركبوا طيارات مش حناطير - عرفت ان السبب هو الاتفاق مع مصر للطيران على هذه الاسعار :rolleyes:

يعنى احتكار وتربيط مع المنافسين وسعر اربع اضعاف من الشركات الاخرى ومع هذا انت ادرى بالمعاملة ومستوى الخدمة

ياعزيرى انا لا استطيع تغير منكر مصر للطيران الا بقلبى لذلك ساكشف راسى وادعى ربنا يهدهم

لا انا قصدى ربنا يهديهم :blush2:

تحياتى

تم تعديل 16 يوليو 2008 بواسطة طه بدر

[زهرة الجبل]

الله المستعان

عموماً حمد الله على السلامة لحضرتك وللاولاد ولجارتك اللي دمها نشف وربنا يطمن عمنا مصري أصيل عليكم دائماً

شوفي حضرتك زوجك والاولاد أد ايه عندهم بابا جميل .. الراجل بيقول روحت زوجتي واولادي واطمنت عليهم ونمت انا غير مبالي في وسط الصواريخ

الله يسلمك يا أستاذ حازم

بس أنا أعتقد واسمحي لي بأن موقفكم كركاب كان سلبي بعض الشيء يعني لو قرر كل الركاب انهم مش حيسافروا كانت مصر للطيران وسلطات مطار الكويت كانوا حيعملوا ايه ؟ كانوا حيسفروكوا بالعافية ؟! كنتم اعترضوا بشدة واعتصموا في الطيارة وقرروا النزول وصولا صوتكم لرئيس المطار أكيد مع ركاب طيارة كاملة بموقف واحد الوضع كان حيختلف كتير

ملحوظة : بيقولوا ان مصر للطيران اتغيرت كتير ممكن حضرتك تجربي لنا السنة دي وتقولي لنا هل الوضع اتغير ولا المحرك لسه بينفجر كالعادة ؟؟؟ :lol:

حضرتك طبعاً عندك حق بس لما تفكر شويه في الموقف هتلاقي الظروف كانت حاكمه بكده

يعني أغلب الناس على الطياره - لو مكنش كلهم - كانوا بنفس ظروفنا .. يعني ماصدقوا لقوا حجز عشان يمشوا من البلد بأولادهم

و بالتالي مكنش إختيار سهل إنهم يرجعوا تاني

عن نفسي كنت أتمنى أرجع خصوصاً إن سفري أنا و جارتي كان إتفاق بين زوجي و جاره على تسفيرنا بدافع الخوف علينا

كنا معارضين لأن قلقنا عليهم هناك كان هيكون أسوء من وجودنا معاهم ( ده من وجهة نظرنا المخالفه طبعاً لوجهة نظرهم )

لكن اغلب من في الطائره لا يريد العوده و كان صعب اننا نتخذ الموقف اللي حضرتك بتقول عليه كأقليه

الجميع حولنا كانوا كمن يستجير من الرمضاء بالنار فعلاً

يعني تقدر حضرتك كده تقول كان ظروف ما يعلم بيها إلا ربنا من جميع النواحي

لكن الحمد لله

أما بخصوص إني أجرب السنه دي السفر على مصر للطيران و أقول لحضرتك... فموعدكش بصراحه

إحنا رجعنا الكويت تاني انا و جارتي بعد خمسه و عشرين يوم فقط من سفرنا لمصر ... كانت الأمور إستقرت قليلاً هناك

لكن رجعنا على الطيران الكويتي ... و لم أسافر من وقتها على مصر للطيران مره أخرى

قد يكون المانع من السفر على مصر للطيران بالنسبه لي أصبح عمليه نفسيه أكثر منه إقتناع بتحسن الأوضاع من عدمه

لكنني أتمنى حقاً أن تكون مصر للطيران أصبحت أفضل و سيسعدني أن أسمع عنها ذلك من الآخرين

تحياتي