ياللى مقدمين هجرة لكندا زيى نتجوز الاول ولا نهاجر وبعد كده نتجوز من هناك !!

[Ebn Sina]

بصراحة يا جماعة عايز اخد رايكم فى موضوع محيرنى ومجننى ومش قادر اوصل فيه لحل

انا مقدم على هجرة لكندا-كيبيك- من سنة ونص وقدامى كمان زيهم على ما تجينى التاشيرة وانا شغال صيدلى فى السعودية عندى 28 سنة-والله وكبرت بدرى يا واد يا بن سينا-.....المهم انا بقال اكتر من سنتين بفكر انى اتجوز ...الصعوبات اللى قدامى حاليا هى انى ماديا مش جاهز تماما-ما بقاليش غير سنة ونص فى السعودية- ومرتبات الصيادلة اللى زىى بقت زى الزفت !!

وبعدين ما نزلتش غير اجازة واحدة لمصر ولفترة بسيطة ما لحقتش ادور فيها على حد مناسب

اهم نقطة فى الموضوع انى متخوف انى اقعد ادور واستقر على واحدة بنت حلال ةتسمع بس كلمة انى مقدم على هجرة تطب ساكتة !! ما اهو بالنسبة للناس فى مصر هجرة يعنى ما انتش راجع بلدك تانى، !!! وده مش صحيح بالمرة.....وبعدين لو لقيت واحدة بنت حلال ووافقت ..طب هل هتتقبل اسلوب الحياة فى كندا هلى سيكون لديها الوعى-واكررالوعى- وليس مستوى التعليم بمتطلبات الحياة الاسرية فى مجتمع غربى من رعاية الزوج وتربية الابناء تربية سليمة .......بصراحة انك اشك انى ممكن الاقى النوعية دى !

طب نروح للاحتمال التانى انى اوصل كيبيك بالسلامة وعدين افكر فى موضوع الجواز...طب فى هنا ميزة ان اللى هتتجوزها هتكون عايشة فى كندا ومتوائمة مع المجتمع اللى هى فيه ......بس المشكلة برضه انى اعتقد انك عشان تدور على واحدة مسلمة والافضل ان تكون من اصول عربية فى بلد كبير مثل كندا صعب......ولو الواحد اتجوز واحدة كندية غير مسلمة هيبقى الموضوع اصعب لان اولادك هيتربوا بطريقة مختلفة تماما عن التربية الاسلامية المحافظة اللى احنا نحب انهم يتربوا عليها !!

والله يا جماعة انا دماغى هتتفرتك م التفكير فى الموضوع ده ويا ريت اى حد عنده راى فى الموضوع ده ينصحنى

[حسام يوسف]

بص يا زميل:

اولا الصراحة مافيش احسن منها

انا اصلا م المنصورة

ومقيم بأسوان

لما اتقدمت لاهل زوجتى

وبرضة هما من المنصورة

سمعوا كلمة اسوان

اتشدوا

وقالولى

يعنى مش سنة ولا اتنن وراجع؟

قلت لا

مش هرجع

انا بحب اسوان

ومش بس كدة احتمال اهاجر كمان

لقيتهم وافقوا

الصدق احسن حاجة

وبعدين اللى يحبك يعيش معاك فى اى حتة

نيجى للنقطة التانية

اتجوز وبعدين اهاجر

ولا اهاجر وبعدين اتجوز

it all depends

يعنى لو شايف واحدة مناسبة وكويسة

ترضى بظروفك

وتعيش معاك ع المرة قبل الحلوة

حتى لو الظروف مش مناسبة

بسبب فلوس او هجرة

دوس

كمل

اتكل ع الله

ربنا بيرزق

خصوصا

الانتحارى اللى هيتجوز

لكن لو كل الظروف مناسبة من فلوس وغيرة

ومفيش حد مناسب

لأ

استنى

نيجى للنقطة الاخيرة

جوازك يزكى فرص نحاح هجرتك لكندا

ويعلى اسكورك

اى خدمة

ودة رأيى الشخصى يا زمل

واتمنالك كل خير

تم تعديل 16 يوليو 2008 بواسطة حسام يوسف

[أحمد سيف]

أنا رأيي تروح كندا وتتجوز مصرية أو عربية من هناك. على الأقل هاتكون عارفة الدنيا هناك ماشية ازاي و هاتساعدك على التأقلم مع الغربة ... أما إذا اتجوزت من مصر وخذتها معاك هناك فهاتزود عليك الحمل معنويا وماديا لإنها من ثاني شهر هاتقولك عاوزه أرجع مصر أشوف أهلي غير المصاريف الإضافية اللي هاتتكلفها في الهجرة وبعد الوصول في وقت هاتكون محتاج فيه تصرف فلوسك بحساب. الميزة الثانية إنك هاتروح خفيف من غير ما تشيل هم زوجه أو أطفال وهاتقدر تتحرك وتتنطط من شغل لشغل وتذاكر براحتك ولما تستقر أوضاعك تماما ابقى فكر براحتك ونقي واختار، والمصريين والعرب المحترمين كثير في كندا ومش هاتغلب في العثور على زوجه صالحة.

بغض النظر عن موضوع هجرتك لكندا فإنا ما أنصحكش إطلاقا تلجأ للزواج السريع خلال الأجازة السنوية، غالبا الجوازات من النوع ده بتسبب مشاكل كثير لإن كل واحد بيكون ما خذش فرصة كافية يتعرف على الطرف الآخر وأهدافه وطموحاته وطريقة تفكيره وطباعه، وكثير منها بينتهي نهاية غير سعيدة.

نصيحة أخيره من مجرب .... إذا ماكنتش جاهز ماديا 1000% فالأحسن تؤجل موضوع الجواز، لإنه هايستنزف كل مدخراتك وتبتدي مره ثانية من الصفر :rolleyes:

[Ebn Sina]

اولا اشكر حسام على رده....رايك وجيه بالطبع ولكن لا يمكن تعميمه وانا من الصعب نظرا لضيق وقتى وظروف سفرى ان احسن الاختيار للزوجة التى اتمناها......مشكلة الجواز يا د.حسام ان الغلطة بفورة......يعنى لو اسات الاختيار قد تظل تندم طيلة حياتك.....الموضوع صعب وشائك !

الاخ العزيز ansaif ....ردك ايضا له وجهاته ولكن ما يقلقنى اننى لا اعرف ما هى طبيعة الفرص للارتباط بزوجة مسلمة متمسكة بتقاليد ديننا الاسلامى الحنيف فى كندا ......وهل هناك هيئات او جمعيات اسلامية تساعد فى هذا الامر؟

واتمنى من كل من له تجربة تقترب من هذا الموضوع ان يفيدنى بها ......

واشكركم جميعا

[gadolly]

Ebn Sina

Sorry for not having arabic key board

I am here in Quebec since 2 years , I know many friends that come here beofre being engaged and it was very very hard to get a bride, you will not find the time or money to go frequently to Egypt, as well as the vacation will be very short to find a good girl

Better to be engaged before coming here, and you have to know in Quebec it is very rare to find a moslem girl that is good to be married, Egyptian families are not too much here in Quebec, most arabians are from marocain countries

By the way, your file number is very near to mine, incha ALLAH we will get the interview with each other

[~Heba~]

http://www.egyptiantalks.org/invb/index.ph...c=58485&hl=

[حشيش]

أنا ليا ملاحظة قد لا تكون فى صميم الموضوع بس بصراحة مزنوق فيها ولازم أقولها :angrycop: ... هوه الحب والجواز دلوقتى بقوا ليه بالنسبة لنا شيئين منفصلين ؟! :gather: ... يعنى كلامنا عن الجواز بقى خالى تقريباً من أى عاطفة !!! ... نظام أنا نازل مصر أجازة قصيرة أتجوز وأخلع ! ... ليه الجواز بقى عبارة عن نقطة تضاف للإسكور ؟! ... أتجوز قبل ما اسافر واكسب نقطة ولا اتجوز بعد ما أسافر وأخسر نقطة ؟! ... فين راح الشوق من قلبه والرقة والحنية ؟! :big_boss:

[النجم الثاقب]

أنا كمان عندى مداخله مزنوق فيها .. معلش يا دكتور

أنا داخل أسلم على كاتب الكصة الكصيرة العالمى حشيش لأن كتاباته وحشتنى جدا ... حمدا ً لله على سلامتك يا إكسلانس

بالتوفيق يا دكتور ... معلش أنا مش مقدم على هجرة فا مش هقدر أفيدك .

تم تعديل 16 يوليو 2008 بواسطة النجم الثاقب

[somayasaleh]

انا من راي تتوكل علي الله وتتجوز قبل الهجرة

ولسه قدامك سنة ونصف يعني ممكن تدور علي كيفك

وكنا اقترحنا هنا في المحاورات ان نحاول نساعد الشباب الجاد المغترب فب ايجاد بنت الحلال

مش عارفة الاقتراح ده مصيره ايه؟؟

وربنا يوفقك ان شاء الله

[Ebn Sina]

أنا ليا ملاحظة قد لا تكون فى صميم الموضوع بس بصراحة مزنوق فيها ولازم أقولها ... هوه الحب والجواز دلوقتى بقوا ليه بالنسبة لنا شيئين منفصلين ؟! :o ... يعنى كلامنا عن الجواز بقى خالى تقريباً من أى عاطفة !!! ... نظام أنا نازل مصر أجازة قصيرة أتجوز وأخلع ! ... ليه الجواز بقى عبارة عن نقطة تضاف للإسكور ؟! ... أتجوز قبل ما اسافر واكسب نقطة ولا اتجوز بعد ما أسافر وأخسر نقطة ؟! ... فين راح الشوق من قلبه والرقة والحنية ؟! :lol:

اولا اشكرك يا اخ حشيش على ردك

وان كنت احسب انك لم تتفهم قصدى تماما لاننى حين طرجت فكرة ان يتزوج الشخص الذى ينوى الهجرة قبل سفره او بعد استقراره فى كندا .....لم اقل ان موضوع الاختيار سيكون بعيدا عن العاطفة او الحب الذى يكون بمثابة الوقود المحرك لعملية الارتباط نفسها

ثانيا انت ظلمتنى عندما المحت الى انه من الممكن ان يكون رغبتى فى الزواج قبل الهجرة لزيادة عدد النقاط فى ملفى وهذا غير صحيح بالمرة لاننى لو اردت ان اتزوج فى اجازتى الماضية فى مصر لفعلتها......ولو انك قرات جيدا مداخلتى السابقة لادركت اننى اميل الى الزواج بعد الاستقرار فى كندا لاننى لا اريد انى ابهدل زوجتى اذا ارتبطت معى فى خلال السنوات الاولى والصعبة على اى مهاجر

يا سيدى الفاضل لو تدرك حجم الضغوط التى مورست وتمارس على -بدون مبالغة يوميا-من اهلى للارتباط لادركت اننى مثقل بالهموم وضغوط لا تحتمل ولكننى مثابر حتى لا اتعجل فى الاختيار ...او ارتبط بواحدة ليس لديها الوعى الكافى ولا النضج الكافى لكى تخوض تجربة كهذى معى

بالمناسبة انا مش باعاتبك ولا حاجة انا بس باوضح الصورة اكتر عشان محدش يروح مخه لبعيد

واتمنى مزيدا من التواص من كل الاخوة الاعضاء

[capitshino]

يعنى الواحد مالوش نفس يتزنق فى كلمتين

الموضوع ده فكرنى بهشام الكندى الله يرحمه -- قصدى ان شاء الله

هو فين يا جدعان . حد يعرف اراضيه؟؟؟؟؟؟؟؟

[Ebn Sina]

يعنى الواحد مالوش نفس يتزنق فى كلمتين

الموضوع ده فكرنى بهشام الكندى الله يرحمه -- قصدى ان شاء الله

هو فين يا جدعان . حد يعرف اراضيه؟؟؟؟؟؟؟؟

اهل بيك ي عم كابتشينو

يا سيدى اللى عايز يقول اى حاجة يقولها ومزنوق يفك زنقته هنا

بس ارجو ان احنا ما نخلطش الامور....التوبيك ده مختلف تماما عن موضوع الاخ هشام الكندى....الاخ هشام طرح الموضوع-مع كامل احترامى- بشئ من الاستخفاف واوضح رغبته من البداية فى زيادة رصيده من نقاط ملفه وترك للطرف الاخر فرصة سنتين للرد الى اخره !!!!

يا عزيزى انا رجل جاد تماما فيما اقول......وفتحت هذا التوبيك لانى اريد من الاخوة الاعضاء ان يفكروا معى من خلال تجاربهم الشخصية او من تجارب اخرين سمعوا عنها .... الزواج ليس موضوعا هينا ....وليس موضوع هامشيا فى حياة اى شخص ...فما بالك اذا كان هذا الشخص مقدم على خطوة جريئة كالهجرة ونقلة نوعية فى حياته !

اتمنى من الجميع ان تكون مشاركاتهم بالراى جادة وفعالة .......

وخالص تحياتى للجميع

[أحمد سيف]

أنا وضحت رأيي في مداخلة سابقة ولكن عاوز أزيد نقطة واحدة هنا

أنا ليا صاحبي راح يحضر دكتوراه في كندا واتجوز من هناك مصرية معاها الجنسية الكندية وعايشة طول حياتها في كندا ومرتاح جدا في حياته وطبعا مش عاوز ينزل مصر بعد ماخلص الدراسة.

أنا شفت ناس كثير معاها جنسيات كندية و أمريكية وأوروبية بينزلوا مصر بس علشان يجوزوا بناتهم بشخص مناسب، وده يثبت إنك ممكن تلاقي عروسه مناسبة في كندا لو دورت شوية وبنيت علاقات اجتماعية مع المجتمع العربي في المكان اللي إنتا هاتستقر فيه.

الزواج من الجنسيات العربية ممكن أيضا لا سيما السوريات واللبنانيات والفلسطينيات والتونسيات والمغربيات، وإن كنت شخصيا أرشح (عن تجربة) الشاميات عموما والسوريات خصوصا لإن السورية ست بيت ممتازه ومطيعة لزوجها (إبن عمها) وكثير منهم لسا عايشين على طريقة باب الحارة

[~Heba~]

انا من رأيى تتجوز قبل ما تهاجر لانى اخشى ان تقع فى فخ التسويف و العمر يجرى بك

هو حضرتك مشفتش الرابط :lol:

[yassir]

دكتورنا العزيز ابن سينا,

ليا رأى بسيط عسى انه يفيدك فى موضوعك , اولا أنا من رأى الأخت الفاضله سميه و العزيزه هبه , ثانيا حضرتك لما توصل كيبك انشاء الله و لاحتفكر فى جواز و لاغيره , كل اللى حيشغلك الاقى شغل, المعادله , أعمل ايه فى السكن البعيد ده لازم انقل جنب الكليه , لازم اشترى عربيه , لازم اعمل كيت و كيت و تلاقى نفسك سنه عدت و انت بتعدل أحوالك .

طيب أحوالك اتصلحت و اشتغلت و تمام التمام يلا بينا نشوف عروسه من هنا , تاخد بعضك و على الجوامع اللى بتعمل اجتماعات و لقاءات خاصه بالموضوع ده , تلاقى ان ده بيحصل فى الويك اند , يعنى كل اسبوع ممكن تقابل حد جديد بس فى الحقيقه انت مش فاضى كل ويك اند و كمان مش كل الجوامع قريبه ليك و هى كمان بتشتغل و مش فاضيه تروح كل event فتلاقى ان اللى بتشوفهم مش كتير .

طيب تقوم تلجأ لخدمه زى المسلم فريند فيندر و تتكلم فى التليفون و تقابلهن , مره هى مش تتكلم عربى و مره مش واثقه فى حكايه البليند ديت ده و مره تلاقيها فى مقاطعه تانيه و مره مش عارف تسأل عليها علشان طبعا فى الشغل و لاحد حيديلك معلومات عنها و لا حد من الجيران ياخد باله منها اساسا و ان خد باله حيقولك ايه يعنى .

طيب حد من المعارف ياولاد الحلال , و انت حتكون عرفتلك كام عيله بس دانت لسه جى و كمان عازب يعنى علشان تعرف عيله عندهم واحده فى سن الجواز حتعرفهم منيين حتكون صاحب أبوها كبير عليك , أختها صعب شويه, أخوها ...ياسلام يعنى ليها أخ و بيشتغل معاك و مسلمه و عربيه دى تفصيل أكيد ...... :lol:

متزنقش نفسك اللى حتشوفهم هنا فى سنه حتشوفهم فى مصر فى اسبوع , وفى النهايه مش حتاخد اللانصيبك , متحطش شروط أدعى بس و قول ربنا يجمعنى و شتيتى و ربنا حيدلك .اللى فى مصر و عندها التعليم و القدره على تربيه أطفال فى المهجر تربيه اسلاميه صحيحه أكتر من اللى ممكن تتوقعه بس شويه مجهود و نيه و ربنا أكيد حيوفقك ,مش انا اللى بقول هو اللى بيقول و بالقسم كمان بمساعده الناكح يريد العفاف.بالتوفيق

[capitshino]

يعنى الواحد مالوش نفس يتزنق فى كلمتين

الموضوع ده فكرنى بهشام الكندى الله يرحمه -- قصدى ان شاء الله

هو فين يا جدعان . حد يعرف اراضيه؟؟؟؟؟؟؟؟

اهل بيك ي عم كابتشينو

يا سيدى اللى عايز يقول اى حاجة يقولها ومزنوق يفك زنقته هنا :closedeyes:

بس ارجو ان احنا ما نخلطش الامور....التوبيك ده مختلف تماما عن موضوع الاخ هشام الكندى....الاخ هشام طرح الموضوع-مع كامل احترامى- بشئ من الاستخفاف واوضح رغبته من البداية فى زيادة رصيده من نقاط ملفه وترك للطرف الاخر فرصة سنتين للرد الى اخره !!!!

يا عزيزى انا رجل جاد تماما فيما اقول......وفتحت هذا التوبيك لانى اريد من الاخوة الاعضاء ان يفكروا معى من خلال تجاربهم الشخصية او من تجارب اخرين سمعوا عنها .... الزواج ليس موضوعا هينا ....وليس موضوع هامشيا فى حياة اى شخص ...فما بالك اذا كان هذا الشخص مقدم على خطوة جريئة كالهجرة ونقلة نوعية فى حياته !

اتمنى من الجميع ان تكون مشاركاتهم بالراى جادة وفعالة .......

وخالص تحياتى للجميع

انا اسف يا عم الريس

بس حقبقى انا ما قولتش ان الموضوع زى موضوع هشام الكندى.. انا قلت ان فكرن فقط

مجد تفكير...................................

[alaashabana]

والله الراجل دة صعب علية...

طيب ما تيجوا يا جماعة ندور له على عروسة علشان ياسفر كندا يمكن لما نحتاجة هناك يبقى يساعدنا.. او نفتح هنا موضوع نسمية الزواج والهجرة .. وكل يتعرف على الكل اهو يكون منه هجرة ومنه جواز ويا بخت من وفق راسين فى الجواز ..

محدش عندة عروسة لية .؟؟؟؟

[هشام الكندي ان شاء الله]

السلام عليكم

اولا احب احيي اخي الحبيب و الغالي كابتشينو علي سؤاله عليا في المرحله الحرجه اللي بمر بيها حاليا.

ثانيا, نتكلم في مشكله شباب كتير جدا من خلال تجربه الاستاذ ابن سينا:

اولا يا جماعه فالجواز دا مش حاجه بتتحسب بالورقه و القلم, يعني مش هينفع اقول انا انزل مصر و اجيب معايا مبلغ اد كذا و اقعد شهر و هلاقي واحده اتجوزها. ممكن تقعد سنين في مصر و متلاقيش واحده تعجبك و ممكن تنزل يوم واحد و تقابلها بالصدفه.

بالنسبه للناس اللي بتعارض الجواز من بره, فانا اختلف و بشده لان المسلمه اللي في دوله اجنبيه زي كندا بتعاني الامرين علشان تلاقي واحد مسلم يتجوزها و دا عن تجربه انا بشوفها بعينيا. و الله الواحد لو راح كندا عازب ما هتجوز الا واحده مسلمه من كندا, مش هرجع مصر اتجوز جواز صالونات.

اهم حاجه تكون مسلمه, كل شئ بعد كدا يهون. مفيش حاجه اسمها تسال عليها الجيران و المعارف لان حضرتك مش في السيده زينب و لا في القللي علشان تسال عليها الحاج سيد كرشه. عايز تعرف اخلاقها شوف لبسها و طريقه حياتها, اسالها مباشره عن علاقتها الجنسيه قبل الجواز, هل هيا عذراء و لا لاء؟

علي فكرة الناس دي مش بتكدب و لا بيمثلوا زيينا في مصر, و لو واحده كويسه هيبان عليها في طريقه كلامها, انا عن نفسي اتمني اتجوز قبل ما اسافر بس علشان مش باين لها جواز فبحضر نفسي اني ادور هناك.

علي فكرة اللي عايز يدور هناك هيدور, روح المساجد و ادخل علي النت و المواقع اللي بفلوس, كلم كل معارفك المسلمين هناك, قول لمعارفك اللي مش مسلمين لو عرفوا واحده مسلمه, اعمل اعلان في الجرايد المتخصصه في الزواج و هتلاقي بنات بتكلمك. يا جماعه اللي عايز يعمل حاجه هيعملها, بس احنا اللي بنكسل و بنحبط نفسينا.

مش لازم تكون مصريه كنديه, مش لازم تكون من اصل مصري اصلا. ربنا خلقنا ليه باجناس و الوان و لغات مختلفه؟ ماهو علشان نتقارب من بعض. اهم حاجه شخصيه الانسانه اللي هتتجوزها مش جنسيتها.

انا بضم صوتي لصوت الاخ اللي طالب بفتح موضوع اسمه الزواج و الهجرة ( علي وزن التكفير و الهجرة برضه) و كل واحد و واحده يكتب فيه مواصفاته و مواصفات الطرف الاخر بكل صراحه و وضوح و ان شاء الله هنلاقي شباب و بنات ولاد حلال كتيييييييييييييير.

يا رب نعمل خطوة جاده بدل ماحنا بنتكلم كتير, يا رب نشعل شمعه بدل ماحنا بنلعن الظلام الدامس دا.

اخوكم

هشام الكندي ان شاء الله

[صعيدي من مونتريال]

هشام الكندي ان شاء الله

وبتعمل تنظيمات كمان *الزواج والهجرة* ????!!!!!

-------------------------------------------------

تتجوز من كندية لا انصحك

سواء كانت مصرية او غير مصرية مسلمة او غير مسلمة

اولا انت من ثقافة مختلفة عن ثقافتها

ثانيا مش هتلاقي

ولو لقيت هتفجر لك دماغك بالكلام عن المساواة وحقوق المرأة والهجص ده

طبعا انت ادرى بطباعك وظروفك

لكن انا شخصيا افضل الزواج من عائلتي

وعلى رأي المثل

أهلك لاتهلك والغريب جته داهية

نصيحتي انك تضبط موضوع الهجرة الاول وبعدين تتجوز

لان اللي بيتجوز في مصر بيصرف كل اللي حيلته

والاهم انك ماتبهدلش زوجتك من الاول

بالتوفيق

[Dr Ayman Kamel]

بصراحة يا جماعة عايز اخد رايكم فى موضوع محيرنى ومجننى ومش قادر اوصل فيه لحل

انا مقدم على هجرة لكندا-كيبيك- من سنة ونص وقدامى كمان زيهم على ما تجينى التاشيرة وانا شغال صيدلى فى السعودية عندى 28 سنة-والله وكبرت بدرى يا واد يا بن سينا-.....المهم انا بقال اكتر من سنتين بفكر انى اتجوز ...الصعوبات اللى قدامى حاليا هى انى ماديا مش جاهز تماما-ما بقاليش غير سنة ونص فى السعودية- ومرتبات الصيادلة اللى زىى بقت زى الزفت !!

وبعدين ما نزلتش غير اجازة واحدة لمصر ولفترة بسيطة ما لحقتش ادور فيها على حد مناسب

اهم نقطة فى الموضوع انى متخوف انى اقعد ادور واستقر على واحدة بنت حلال ةتسمع بس كلمة انى مقدم على هجرة تطب ساكتة !! ما اهو بالنسبة للناس فى مصر هجرة يعنى ما انتش راجع بلدك تانى، !!! وده مش صحيح بالمرة.....وبعدين لو لقيت واحدة بنت حلال ووافقت ..طب هل هتتقبل اسلوب الحياة فى كندا هلى سيكون لديها الوعى-واكررالوعى- وليس مستوى التعليم بمتطلبات الحياة الاسرية فى مجتمع غربى من رعاية الزوج وتربية الابناء تربية سليمة .......بصراحة انك اشك انى ممكن الاقى النوعية دى !

طب نروح للاحتمال التانى انى اوصل كيبيك بالسلامة وعدين افكر فى موضوع الجواز...طب فى هنا ميزة ان اللى هتتجوزها هتكون عايشة فى كندا ومتوائمة مع المجتمع اللى هى فيه ......بس المشكلة برضه انى اعتقد انك عشان تدور على واحدة مسلمة والافضل ان تكون من اصول عربية فى بلد كبير مثل كندا صعب......ولو الواحد اتجوز واحدة كندية غير مسلمة هيبقى الموضوع اصعب لان اولادك هيتربوا بطريقة مختلفة تماما عن التربية الاسلامية المحافظة اللى احنا نحب انهم يتربوا عليها !!

والله يا جماعة انا دماغى هتتفرتك م التفكير فى الموضوع ده ويا ريت اى حد عنده راى فى الموضوع ده ينصحنى

الاخ العزيز ابن سينا

تاخد نصيحتى بس ماتضحكش

اتكل على الله وسافر كندا ولاتتجوز من هنا ولامن هناك ولما تتجوز وتعملها وتدخل فى يوم محاورات المصرين فى كندا هتقول كان لى واحد نصحنى وماعملتش بنصيحته الله يرحمة ان كان ميت والله يصبرة ان كان عايش :)