إلغاء توكيلات إبنى بيتك حتى للزوجة .. عاوزين حل يا ناس

[msayed]

ملحوظة قبل القراءة: الأسلوب الساخر مش للتهكم على أحد والله العظيم لكن لكسر حدة الموضوع وخاصة أن أكثر من فى المنتدى ممكن مايكونوش مهتمين بالموضوع فمايكونش تقيل على قلبهم لكن أحترم كل من أدلى برأى ولو مش على هواى فى هذا الموضوع.

نبدأ بقى؟

حبايبى المغتربين الأعزاء

مشكلة واقعين إحنا المغتربين الغلابة إللى قدموا فى مشروع إبنى بيتك فى مصر لو تسمعوا عنه ومستنيين إستلام الأرض.

المشكلة أن السيد وزير الإسكان خذ قرار بالرغم من عدم علمى بمدى دستوريته أم لا إلا أننى معجب به جداً وهو منع التعامل بأى توكيلات وذلك لأن الأرض الدولة داعماها وسعرها فى متناول محدودى الدخل زى حالاتى والسيد الوزير حريص على وصول الدعم إلى مستحقيقه. طب طالما أنا مبسوط أوى كده فين المشكلة.. أقفل وأروح يعنى؟ لأ فيه مشكلة والله.

المشكلة إن أى واحد بره مصر هايبقى مستحيل يحصل على الأرض دى لأنه مطلوب يتابعها بنفسه وها يتابعها إزاى وهو مربوط فى الساقية إللى إنتم عارفينها كويس هنا.

طبعاً حاولنا محاولات على قدن وإقترحنا إقتراح كده بسيط لكنه فعال

إيه يعنى إللى يمنع إن القرار يتعدل ويستثنى قرايب الدرجة الأولى (الأب - الأم - الزوجة - الأخ) ويمكنا من عمل توكيل إدارة للأرض يعنى القريب من دلهم يستلم الأرض ويجرى كل التراخيص ويتفق مع المقاولين ويبنى ويصرف فلوس الدعم من الوزارة وعندك أقف. يمنع بتاتا من البيع أو التنازل أو التأجير أو أى شيء يخلى حد تانى ينتفع من الأرض. ويا سيدى إللى يلعب بديله ويحب يبيع إقطعوا ديله وعلقوه على باب الوزارة عبرة هى دى صعبة، يعنى ممكن تسحبوا الأرض فى حالة زى دى. لكن نتاخذ كده عاطل فى باطل زى بتوع الأتوبيس.

طبعاً فى محاولاتنا البسيطة للحل سمعنا كلام يسم البدن، فواحد قال إيه إنتم بقى مش محدودى الدخل ولا حاجة إنتم تتنازلوا عن الأرض. يعنى من كام شهر كنا محدودى الدخل ودلوقت بقدرة قادر بقينا من الأثرياء مع إننا بنجمع الريال على الريال علشان نجمع تكاليف البناء. أنا قلت الكلام ده قبل كده لكن كنت حاسس إن ماحدش مصدقنى وفاكرين إنى خايف من الحسد لكن طبعاً بين حبايبى إللى بيغرفوا من الخليج غرف أنا أكيد بأتكلم وأنا متطمن لأغنكم عارفين البير وغطاه. ده الأولانى

واحد تانى: قال بسيطة إنتم تنزلوا شهر تخلصوا كل حاجة وتفرشو البيت وترجعوا لشغلكم ويادار مادخلك شر وطبعاً ماقالش لنا لو الحاجة ماخلصتش فى شهر نعمل إيه وماقالش لنا إنه ضامن برقبته إن الإجراءات والتصاريح والتراخيص والحفر والأساس والعمدان والسقف والحيطان وكل ده هاياخد شهر.

طبعاً ردينا على الإثنين وأتعشم أن الكلام ده مايتكررش تانى.

المهم إن كل واحد يدور على حل إن إحنا إللى نرضى بضياع حقنا القانونى ونوزن فى حتة تانية.

الموقف دلوقتى إننا بدأنا نكلم حبايبنا الإعلاميين إللى دايمأ يعرضوا مشاكل الغلابة وعشمنا إن صوتنا يصل للسيد رئيس الجمهورية فهو من أطلق المشروع وأظن أنه سيكون له رأى وهاينصفنا.

أنا طلبى منكم أى واحد عنده فكرة تساعدنى يقولها لنا

وأى واحد يعرف حد واقع فى المشكلة دى يعرفه علينا علشان نسرع بحل المشكلة إن شاء الله.

قبل ما أخلص كلامى أشهد أن وزارة الإسكان كانت فى غاية المرونة مع مطالبنا اللى تولت متابعتها جمعية إبنى بيتك المحترمة والمرة تلو المرة كانت تفاجأنا بتحقيق مطالب لنا مما كان يسعدنا ونتعشم أن تتم سعادتنا بأن تتناول هذا الموضوع بنفس المرونة وماتحطناش مع المتلاعبين فى قفص واحد.

لغاية هنا أنا خلصت كلامى ومحتاج أسمع منكم .... كلكم

[capitshino]

المشكلة انهم فعلا بيبصول للمغترببين انهم جايين يحملو فلوس ويرجعو مصر واعتقد ان الغاء التوكيلات لهذا السبب . انهم بيعتبروهم مش محتاجين للارض

ابعت ل 90 دقيقة او العاشرة مساء وهما ممكن يساعدو فى الحل.

[msayed]

أخى العزيز كابتشينو - أشكرك على الإهتمام بالموضوع

المتضررين من المشكلة مش بس المسافرين للعمل لكن أى حد ممكن تمنعه ظروفه عن متابعة إجراءات الإستلام والتراخيص والبناء إللى ها تاخذ سنة، يعنى المسافر للدراسة أو اللى بيشتغل فى مصر ولايحصل على أجازة كافية أو الزوجة التى حصلت على الأرض ولكن يشق عليها أيضاً متابعة الإجراءات وتريد أن يحمل عنها زوجها عناء هذا العمل.

شكراً على إقتراحك وأنا فعلاً راسلت ناس كتير وإن شاء الله نوصل لحقنا.

[msayed]

-