وجهات نظر...

[بنت شعنونة]

ماهوا افضل عمل فني تلفزيوني سواء مسلسل او برنامج او لقاء او اي حاجا رايتها :)

ولمازا؟؟ :)

انا شفت اعمال فنية جيدة جدا صراحا

مثلاذ

حمدي قنديل وبرنامجه كان قوي جدا

لآنه صريح وواقعي وغير متكلف او مزيف بتاتا

يمكن عشان كدا اتلغى؟ :mad: :mad:

[بنت شعنونة]

مسلسل ونيس اثر في الشارع المصري جدا وغير مفاهيم كتير عند ناس كتير

ووقته الناس لاحظت انه كل واحد بيحاول يكون هوا ونيس سواء جوا بيته او براه...

مسلسل اسمه العائلة كان بطولة ليلى علوي وراجل كبير تاني كدا انا اعرفه باسم ابو العلا البشري انما مش عارفا اسمه الحقيقي ايه صراحا يعني :roll: :roll: :) :)

المسلسل دا كان برضه من المسلسلات اللي مثلت شعب مصر بطريقة هدافة خاصة انه طلع في وقت كنا نعان منه من الأرهاب الديني

وبجد المسلسل كان من الأقليات التي يحسد عليها التلفزيون :D

[moody00x]

إسمحى لى أختلف معاكى يا شانا

أولآ الراجل إسمه محمود مرسى...أما وجه الاختلاف ففى المسلسل نفسه

أولآ المؤلف وحيد حامد كاتب إلأرهابى وإلأرهاب والكباب وأوان الورد مسلسل يسرا ..وغيره من أعمال كل هدفها توصيل للناس فكرة إن المسلم المتدين هو مشروع إرهابى.....ونظرآ لانعدام المرجعية الدينية عند الأستاذ فكان طبيعى إنه يقع فى أخطاء كتيرة فدخل فى حاجات هو جاهل بيها أساسآ أفتكر إنه عمل مشكلة أول عرض للمسلسل أول التسعينات لما أنكر عذاب القبر والأزهر قام عليه وإضطر إنه يتراجع عن رأيه فى حلقة تالية

وأذكر فى المسلسل حوار غريب ومقزز جدآ بين ليلى علوى وأبوها لما إعترفت له إنها فقدت عزريتها فبكل هدوء قالها العذرية مش إنك تفقدى شرفك...المهم إنك ماتفقديش نفسك!!!!كلام غريب علينا ولاكأننا فى باريس أو لندن...

عذريتك الحقيقية هى روحك فاللى ضاع منك مش مهم أد ما المهم إنك ماتففديش روحك....يا سلالالالالالالالالالالالام

وطبعآ إظهار كل مايسئ للاسلام والمسلم ...إنه لحية وجلابية قصيرة وعينه على النساء دايمآ...لكن ليلى بالمينى جيب بتدى حكم ومواعظ طول الوقت

بحجة إن الحجاب مش حجاب الرأس لا ده حجاب داخلى للقلب

المهم يعنى ماتخديش الصورة كما هى وتدخليها فى دماغك بصى لها من زوايا أخرى

[بنت شعنونة]

هوا كلامك صحيح يا مودي

بس ما تنساش

انه في اخر المسلسل حسب ما اتزكر يعني

انه للى علوى حبة الدين

وانه جابلك الفرق بين عبد المنعم مدبولي الرجل المعتدل

وبين ابن البواب المتطرف

وبين المحجبة لمجرد ان شغلها امرها بدا

يعني برضه انت ما بصتش على العمل من كل جوانبة

هوا كان بيقول كلمة من وجهات نظر متعددة :roll: :roll:

[Lancelot]

شعنونة .... إنت بتجيبي أفكار المواضيع ديه منين ..... أفكار سهلة و بسيطة و تخطر علي بال أي حد لكن محدش يجيبها إلا شعنونة ...... فعلا ما يجبيها إلا رجالها ... قصدي شعنينها ..... :D :D :D

أولا أتفق معكي علي رئيس التحرير .... أنا بحب الراجل لأنه – زي ما قلتي – صريح و واقعي و غير متكلف أو مزيف علي الإطلاق .... بيقول اللي الناس عايزة تسمع عنه ... بيوجه الناس لحاجة صح .. زي موضوع المقاطعة ... لما بيتكلم في موضوع معقد علي الناس البسيطة بيصر علي إنه يفهم الأمور و إنها تتشرح بطريقة بسيطة أوي علشان الناس تفهم .... البرنامج بتاعه صاحب أعلي نسبة مشاهدة في التليفزيون ... و ناس كتير مش بتنزل من البيت يوم الإتنين علشان تشوفه و أنا منهم .....

بعد كده تيجي قائمة طويلة من البرامج و المسلسلات .... لكن قبل دول يجيي فيلمين تسجيلين عملتهم قناة النيل للأخبار .... واحد عن الصحفيين و المراسليين في فلسطين .... و التاني عن القدس ....

الأول بيهزني من جواي أوي لما أتفرج علي المشاهد بتاعة البنت الاسرائيلية الصغيرة اللي عمالة تضرب الصحفي الأجنبي :mad: :mad: ... و التاني اللي معاها اللي عمال يشد منه الكاميرا ... و المشهد بتاع ضرب النار علي عربية قناة النيل للأخبار .. و الكاميرا مان اللي عمال يصرخ "إسعاف يا الله" ... صرخته بتهزني أوي ... بأكون عايز أعيط فعلا ... مش قادر ... الناس ديه عملت إيه علشان يحصل فيها كده .... طب الفلسطينيين ذنبهم إنهم فلسطينيين لكن المراسليين ..... ربنا يخدك يا إسرائيل .....

التاني بتاع القدس ... ينقل الهدوء و السكينة التي تنعم بهما المدينة المقدسة ... و ينقل الإزعاج و الفزع الذي يسببه الإسرائليين لها .... المشهد الأخير في الفيلم ده .. لإحتفال يهودي جنب حائط البراق ... الإسرائليين شايليين أعلام إسرائيل كبيرة و ماشيين بيها و شايليين الرشاشات كمان .... لكن المشهد ده بيخليني أسأل نفسي إزاي الإتنين المذعيين (شريف عامر و شروق أسعد) ماسكيين نفسهم في الموقف ده ... أنا لو ماكنهم أمسك أقرب واحد و أنزل فيه ضرب لما يبانله صحاب ... الله يكون في عون الفلسطينيين اللي عايشيين العذاب ده كل يوم ........

البرامج ...... رئيس التحرير طبعا زي ما قلت ..... و بأحب "علي ورق" بتاع محمود سعد ... لأنه شكل مختلف من التقديم ... و بعدين عامل الـ Home work بتاعه كويس .... بيجيب حاجات من تحت طاطيق الأرض .....

فيه برنامج علي النايل تي في بالإنجليزي ... إسمه Generation talk ... الراجل اللي بيقدمه إسمه محمد إسلام ... راجل كبير في السن لكن عارف مشاكل الشباب أكتر من الشباب نفسهم .... و بيقدم نماذج من الشباب هايلة جدا ... البرنامج بيحسن الإنجليزي بتاعي أوي ....

المسلسلات .... بحب أوي أوي "أرابيسك" ... مش بس علشان التمثيلية نفسها لكن علشان الهدف وراها .... المشهد بتاع حسن أرابيسيك و هو في السجن في أخر حلقة رائع رائع رائع ..... عموما أنا Big fan بأسامة أنور عكاشة ....... أحسن كاتب مسلسلات في مصر ... إن لم يكن في تاريخ مصر ....

برضه محمد صفاء عامر كويس .... أحب له "حلم الجنوبي" ..... نصر وهدان الجط ....

في مسلسل عجبني جدا جدا جدا جدا ...... المسلسل بتاع جحا اللي جه في رمضان اللي فات .... لكن للأسف لم يلقي النجاح اللي هو ..... المسلسل ده جميل جدا ... لأنه سياسي بالدرجة الأولي لكن للأسف الناس لم تفهمه ....

و طبعا ونيس لا يختلف عليه إتنين ... بس يا ريت الناس تخده جد زي ما بتضحك عليه .....

ده العربي ..... و هو قليل لأني أميل للأجنبي أكتر ....

في حاجات تانية كتير لكن كفايه كده دلوقتي .... نكمل بعدين ....

[Spider]

برافو يا مودى

الله ينور عليك

ومش حنسى فى فلم الأرهابى لما الممثل "حاجة يسرى" كان بيكلم الواد سيد الشغال ويقوله" الناس طلعت القمر وأحنا بنفكر نخش الحمّام برجلنا اليمين ولا الشمال"

قال يعنى الموضوع ده بياخد مننا وقت وبنقعد نفكر فيه نص ساعة مثلا عشان أظبط المسألة دى وهو بقى سبب المشاكل اللى أحنا عايشينها

للأسف الدين مستهدف من عناصر محسوبة علينا

[بنت شعنونة]

محمود سعد راجل تلقائي ممتااااااااز

دا غير انه غير متحيز ف برنامجه وتحس كدا انه بقول اللي نات عاوز تقوله بجد

مش تمثيل زي برنامج ع القهوة :twisted: :twisted:

وهوا فعلا زي ما انت قلت بيحضر كوييييييييس جدا

لدرجة انه في التحضير قرب ينافس سمير صبري :D

اظن ان الراجل دا لو استفدنا منه صح

ممكن نعمل برنامج ليه قيمة فعلالالالالالالا

يا سبااااااااايدر

يعني انتوا سبتوا المسلسل ومسكتوا في المؤلف :D :D

انا لا اناقش فكر المؤلف نفسه

لآنه ممكن يكون راجل ولا له لازمة اصلا

انما سبحان الله

ممكن انسان من غير عقل

يقول كلمة

تخل كللللللللل العاقلين يفكروا فيها :D

[moody00x]

وهو المسلسل إيه غير رؤية المؤلف ياشانا؟؟

أنا شخصيآ مش شايف أى قيمة فى مسلسل العائلة ده .....

[بنت شعنونة]

وهو المسلسل إيه غير رؤية المؤلف ياشانا؟؟ 

أنا شخصيآ مش شايف أى قيمة فى مسلسل العائلة ده

لالالالالا يا مودي

اسمحلي اختلف معاك

ممكن المسلسل كون رؤية الكاتب دا لو كان كاتب محترم

انما كاتب محترف؟؟؟؟؟؟ظ

لا اعتقد

لآنه بيكون ابن سوق

بيكتب عشان يشتغل وبس

يعني الموضوع تجارة مش اكتر

دا اللي انا اقصده :D

اما مسلسل العائلة نفسه

كان فيه حوارات بين محمود مرسي وعبد المنعم مدبولي بجد كانت قوية

خصوصا محمدود مرسي وهوا عامل دور الواعظ وبيوعظ كل واحد شوية في المسلسل

حظك ان مش حافظاااااااه كويس

والا كنت جبتلك جمل منه بجد :twisted: :twisted: :roll: :roll: :D :D

[بنت شعنونة]

فيه برضه على قناة اقرا

برنامج عامله ابن فاروق الفيشاوي

عبارة عن مجموعة من الشباب بيتكلموا ازاي ان حياتهم تمشي عادي لكن من خلال الدين برضه

وبيجيب شباب مختلفين في الفكر

بحيث اان الحوار يكون تلقائي بينهم

الفكرة ممتازة

انما التنفيز ضعيف

خصوصا ان ابن الفبشاوي غير متمكن دينيا

ودا كان بيصيبه بالبلبلة لما ما يعرفش يرد على استفسار من الشباب التانيين :? :?

دا غير ان المحجبات اللي معاهم

ماشاء الله على الحجاب والمكياج

حاجا تفرح :? :?

[crossfield]

مع انى مش باتابع التليفزيون قوى

لكن أفتكرلك يا ستى:

كان بيعجبنى برنامج "نادى السنيما" و خصوصاً انه مقدمته د. درية شرف الدين دايماً تستضيف ناس أساتذة فى النقد الأدبى و السينمائى و آراءهم بتبقى ممتعة و مفيدة .تحسى كتير انك بتتفرجى على نفسك أو ناس تعرفيهم فى حياتك فى موقف معين و تفهمى ايه التحليل النفسى للتصرف ده .عقد يعنى. :D

كمان برنامج "حدث بالفعل " مش فاكرة اسم مقدمته .

أى برنامج يستضيف شخصيات محترمة: في مثلاً برنامج حالياً اسمه ضى الليل تقريباً بينقى ضيوفه فعلاً .

المسلسلات اللى محفورة فى ذاكرتى فعلاً و اتفرج عليها مرة و اتنين و من غير ما أزهق مسلسل أحاديث الصباح و المساء فعلاً الحوار فيه رائع . كمان مسلسلات يحيى الفخرانى كلها بتعجبنى و بتقول حاجة .و باتشلللللللللللللللل من مسلسلات الحاجة منى نور الدين اللى عايشة فى الفضا و عصور الرومانسية اللى تفقع بجد.

[Lancelot]

كان بيعجبنى برنامج "نادى السنيما" و خصوصاً انه مقدمته د. درية شرف الدين دايماً تستضيف ناس أساتذة فى النقد الأدبى و السينمائى و آراءهم بتبقى ممتعة و مفيدة

و ليه "كان" اللي في الأول ديه .... البرنامج جميل جدا و درية شرف الدين بتختار أفلام هايلة بصراحة .... لكن في حدود إمكانيتها .... التليفزيون بيجيب أفلام جديدة كل حين و مين .... أروح دلوقتي علشان البرنامج بدأ ..... :D :D

و باتشلللللللللللللللل من مسلسلات الحاجة منى نور الدين اللى عايشة فى الفضا و عصور الرومانسية اللى تفقع بجد.

فعلا فاقيعة التمثليات بتعتها ......