ســـــــلامات يا منتدى

[linux]

ســـــــلامات يا منتدى

كنت بصدد وضع هذه المداخلة على منتدى مصريات لما لقيت الصحبة الطيبه عزلت هناك اليومين الى فاتوا ...

بما أننا رجعنا بيتنا ... أكتبها هنا أحسن:

------------------------------------------------

بصراحة ... الواحد متاخد حبتين!

أصل المكان جديد و أنا مش تعود لسه ...

فى منتدى المصرين كنت واخد ع المكان ... يعنى أول مافتح بالمفتاح الأقى فى الصالة الأستاذ freefreer واخد ركن و بيقرأ جرنان وجنبه قاعدين شوية حبايبنا عمالين يتناقشوا و يشربوا سجاير و سحلب و موغات زى المصرى و كروسفيلد و الصاوى و بنت بحرى و رجب2 و أسامة الكبريتى.

أقوم مضحرج عليهم السلام و شاكر عزومتهم على كباية حمص شام و داخل عدل ع المطبخ ... و ما أدراك ما المطبخ ...

دخان و حلل و حاجات عمالة تتسبك على البوتاجاز ...

وعالم ياما ... منهم ست أمينة و سي السيد

أقوم ناتشلى صباعين ورق عنب على صباع كفتة و اتقهفر سريعا قبل ماحد يشوفنى ... أقوم مقابل مين ياولاد و يابنات؟!

أخويا براود مسلم! لسه مصلى العصر و شايل سجادة الصلاة و رايح يقعد مع الصاوى و دكتور الفا و M.H.M و حمزاوى و يناقشوا قضية الغسلات الأوتوماتيك و حق أختراع الأخ براود.

معدى لقيت لمة حوالين صورتين على الحيطة معلقهم الأخ moody00x و عمال يقنع فى الخلق ان الصور بداخلها صور تانية ثلاثية الأبعاد ... و اللى ماسك منظار مكبر فى أيده و اللى عمالة تقول دى مؤامرة و اللى متشقلب على دماغه بيبحلق فى الصور و أسمع فى الخلفية الصوت جاى م التلفيزيون بيقول "العلبة دى فيها فيل" ... حاجة غريبة !!

يادوبك ها خش على الصالون أقوم دايس على، يجعل كلامنا خفيف عليهم، جطه!! جطه سودا سواد الليل و حشيش عمال يجرى وراها و عايز آل أيه يسمعها القصة المبكية: هيثم وتامر ووليد!

و أبو يوسف وراه عمال يقوله ابعد عن العتبة بتاعت الحمام أحسن الست اللى لابسة أسود لسه عماله تعيط على التلاتة الجن اللى الشيخ و مساعدة محمد المهندس حرقوهم!

جنب الطرئة تلاقى كرسين جنب أباجورة ... قاعد عليهم الشعنونة و كليو ... الشعنونة بتمخمخ فى الأمضاء الجديد و كليو عماله تستفسر منها على حكاية الراجل اللى بعد ما أعلنوا وفاته فى المستشفى لاقوه قاعد يأكل جزر!

أرمى التماسى وارجع الصالة و "بدون ذكر أسامى منعا للأحراج" (واخدين بالكم يالى ف بالى؟!) آعدى على ناس "بتشمشم" فى خلق الله! واحده منهم قالت لى "الأخ لبنانى؟" رديت و قلت "لأ ... ليه؟" ترد على وتقول لى "أصل ريحتك حلوة و الشباب المصرى ما بيستحماش!

أبلع الأهانة و اقرر انى "أفxى دماغى" على رأى اللواء أركان حرب مفتتش أول مرور بنها العوجة "حشيش".

فى طريقى للصالون شايف نوره خافت و كمية دخان رهيبة طالعه منه ... زى ما يكونوا بيحضروا عفاريت سفلية! و أسمع صوت عميق رزين بيقول "الموضوع ده أحنا ناقشناه قبل كده سنة 1956 و آدى الوصلة" ... طبعا ده صوت الطفشـــــان ... قاعد يتناقش مع أبو حلاوة و الأفوكاتو و عادل أبو زيد و محمود أبو زيد و هشام عبد الوهاب و وسام

يادوبك أسمع الموضوع و انسحب خلسه الى البلكونة الاقيها عمرانة و الحمد لله ... كل واحد واخد له كرسى و ساند ضهرة على الحيطه و عمالين يئزءزو لب و ترمس و بيرموا القشر على الناس فى الشارع و على غسيل الجيران ... أسلم على Lancelot و ابن مصر و Facts researcher و Amir.

خمسة و ألاقيهم بينادوا على العشاء ... أجرى بسرعة علشان الناس دى مابترحمش فى موضوع الأكل بالذات ... و أنا متأكد أنى نسيت أسلم على ناس تانية فى "البيت" ... معلهش ... أعذرونى.

وحشتونى ... وحشتونى ... وحشتونى !!!

[بنت شعنونة]

اااااااااه والله يا لونكس

بجد بجد كل اللي قلللللته صصصصصصحححححححح

:roll: :roll: :lol: :lol: :lol: :D

الحمدلله

وربنا يحميييييكم كلكم يارب

ويزيد محبتكم في قلوب بعض :)

على السيرة بس

اخونا الباحث والده كان تعبان حسب ما اذكر دا الل كتبه في المنتدى التاني

ماحدش يعرف ايه اخباره دلوقتي ياترى؟؟ :roll: :roll:

يارب يكونوا بخير..

[الطفشان]

يخرب شيطانك يا لينوكس

دا انت طلعت كاتب فكاهي تمام

و لا حشيش!

قصة واقعية جميلة

على شاكلة قصة الاوتوبيس القديمة بدون المعاني التي بين السطور

بس انت اخذت كفتة؟

و الكباريتي في موضوع تاني بيقول "لحمة"

امال انا نايبي على طول فلافل ليه؟ :?

[freefreer]

هاهاهاهاهاه .. ايه مش ممكن يا ليونكس .. حقيقى دى مداخلة مفاجأة :D .. ايه حكاية المواهب المحفية اللى بتظهر فجأه دى :shock:

لأ بقى دانت تاخد اخوك حشيش بقى .. و تاخدولكم ركن .. و تعملوا "تقاسيم فكاهية" .. :lol: :lol: :lol:

روووعة .. رووووعة ..

و انت وحشتنا اكثر .. و الموضوع دة انا حاسس انه قرب كثيييييييير بينا و بين بعض .. ربنا يديم المحبة ..

النهاردة ما فيش مشاركات جادة .. انتم سامعيين .. كله النهاردو ضحك و لعب .. و حب لزوجاتنا .. هاهاهاهاهاهاها

[الطفشان]

هاهاهاهاهاه .. ايه مش ممكن يا ليونكس .. حقيقى دى مداخلة مفاجأة  :D .. ايه حكاية المواهب المحفية اللى بتظهر فجأه دى  :shock: 

لأ بقى دانت تاخد اخوك حشيش بقى .. و تاخدولكم ركن .. و تعملوا "تقاسيم فكاهية" ..  :lol:  :lol:  :lol:

و انا اؤيد هذا الاقتراح

[amir]

يعنى كان لازم المنتدى يعطل علشان تظهر المواهب الحلوه دى ؟؟

حقيقى المنتدى عامر برواده واصحابه و مشرفيه

تحيه حـب صادقه للجميع

:lol: :lol: :lol:

[Lancelot]

جميلة أوي يا لينيكس و الله .... ما شاء الله علي المواهب ...

لكن يا راجل تأكلني لب و سوداني .... طب ناولني صباع كفته من المطبخ و إنت جاي ... و لا صباعيين ورق عنب (إمممممممممممم) ... جعت و الله ....

[ابو يوسف]

بص بقى يا عم لينيكس .... ما دام غلطت فى الاسياد (يجعل كلامنا خفيف عليهم :? :? :? ).... يبقى ماليش دعوة .. بس ما تجيش بعد كدة تقولى الحقنى بالشيخ محمد :oops: :oops: :oops:

[linux]

بس انت اخذت كفتة؟

و الكباريتي في موضوع تاني بيقول "لحمة"

امال انا نايبي على طول فلافل ليه؟  :?

مش ممكن! آمال أيه موضوع العدس بتاع المنتدى التانى؟

كنت فاكر انهم ادوك صحن عدس و فحل بصل!

معلهش ... خيرها فى غيرها ...

أتمنى يكون على الأقل جاتلك حته من "الطورطة" ال55 دور اللى freefreer بيوزعها فى قسم شئون المحاورات

فيك من يكتم السر؟ أنا سامع أنهم بيفرقوا شربات و براغيت الست على ناصية قسم المغتربين المصريين ...

[Spider]

وحشتـــــونى وحشتونى وحشتونى

وحشتوا عيونى

وفكرتونى باللى كان

[الطفشان]

براغيت الست

و دي تطلع ايه بقى؟

[Lancelot]

و دي تطلع ايه بقى؟

مش معقول مش عارف ... :shock: :shock: :shock: :shock:

ده أنا اللي عمرها ما عدت عليا و عارفها .....

الناس الكبار في عيلتنا بيقولوا إن براغيت الست ديه عبارة عن زي ما تقول كده ملبس أو بنبوني صغير ... ليه سموها كده مش عارف ... و الله أعلم .....

[linux]

براغيت الست

و دي تطلع ايه بقى؟

براغيت الست دى عبارة عن ملبس حجمة صغير جدا ... فى حجم البراغيت (!!) و بتكون الوان كتيرة مختلفة زى البمبى و المووف و الأصفر الخ. على ما أظن هى مادة سكرية مغلفة لبذرة ينسون بداخلها.

أول مرة أسمع عليها كان من واحد صاحبى و كنا ماشين فى وسط البلد (القاهــــرة) و لما أفتكرته بيميس على راح واخدنى على محل لاباس و بعدين جروبى ... وفعلا لقيتهم بيبعوها.

[nora]

بجدددددددد أنا هطير من الفرح وعلى الرغم اني اديلي 17 ساعة بشتغل الا اني قلت لازم اقول ليكم انكم وحشتووووووونيييييييي كلكم اويييييي

[linux]

.

لكن يا راجل تأكلني لب و سوداني .... طب ناولني صباع كفته من المطبخ و إنت جاي ... و لا صباعيين ورق عنب (إمممممممممممم) ... جعت و الله ....

ياراجل أحمد ربنا ... انا خايف عليك !!

أكل اللحوم مش كويس على الكلسترول :lol: :lol:

[Lancelot]

أكل اللحوم مش كويس على الكلسترول

قال كليسترول قال .... يا عم كيلسترول إيه بس .... :twisted: :twisted: :twisted:

ده أنا عندي نقص حاد في الكليسترول ده ....

و الدكتور قاللي لازم تأكل لحمة كتير .... ناولني بس إنت و مالكش دعوة .... :lol: :lol:

[crossfield]

بقى دى آخرتها يا عم لينكس تسيبنى كده من غير أكل لحد دلوقتى :twisted: :twisted:

الأستاذ هشام عزمنى هناك فى مصراويات على شوربة عدس و أنا عملت فيها فلحوسة و قلتله آل ايه مباكلش برة البيت نبقى ناكلها فى منتدانا و ادينى قاعدة أهو من امبارح بالليل و لااااا الهوااا :mad: :mad:

الحق نفسك و ارميلى صباعين كفتة على ال pm بسرررررررررعة :twisted: :twisted: :twisted:

:lol: :lol: :lol: :lol:

حمد الله على سلامتنا .

[DARWEEN]

طيب والله يا لينوكس أن ده كان نفس أحساسي أول المنتدى مافتح معايا النهارده ...

حسيت أني راجع من السفر وبافتح البيت وعمال أجري بين الغرف وأطمأن على كل حاجه .. أنا قعدت النهارده أجري بين المداخلات وأقرأ كل اللي أنكتب لايكون فايتني حاجه ...

عارفين أنا كنت بأدور على كل واحد وأطمأن أن عمل مداخله ولا لأ زي ماالواحد بيطمن على أهله بعد سفر طويل ...

على فكره ... أنا أكتشفت أني فعلا فعلا بأحبكم كلكمممممممم

[linux]

لأ بقى دانت تاخد اخوك حشيش بقى .. و تاخدولكم ركن .. و تعملوا "تقاسيم فكاهية" ..  :D  :D  :D 

مع كامل أحترامى للجميع ...

الأخ القدير حشيش و العبد الفقير مختلفين فى الأهتمامات ... مش معنى كده انى أرفض التعاون مع أستاذى الأديب حشيش! بالعكس، أتمنى من كل قلبى أنه يأخدنى تحت جناحه لأنهل من علمه الغزير فى الأدب العربى و اللبنانى خاصة!

الأخ حشيش كاتب روائى من الوزن الثقيل، بدليل كمية الجوائز اللتى نالها عن القصة الروائية الطويله "تامر و هيثم و وليد" كما أنه من أشهر من كتبوا الشعر العربى من المعاصرين (دول غير معاصرين القصب ... بلاش مخوكوا يروح لبعيد).

أما انا، و أعوذ بالله من كلمة انا، فحبى الأول هو كتابة المعلقات.

صحيح أنى لسه بأكتب معلقتى الأوله، التى بدأتها من نحو (ده غير الأعراب ... بلاش مخوكوا يروح لبعيد) اربع سنوات.

واحد يسألنى طب ياكابتن لطيف ... أقصد يا أسطى لينكس ... وليه تاخد منك كل السنين دى؟ ...

أقوم رادد عليه واقول: شوف ياهندزه ... انا المعلقات بتاعتى بتتعلق على حبال الغسيل ... يبقى لابد لما تتنشر (ده غير نشر النجار ... دى شغله لامؤاخذه و دى شغله ... بلاش مخوكوا يروح لبعيد) تكون جاهزه ... مكوية و متلمعه و أخر السطه ...

و من طول المعلقه انا بكتبها على الفانلات الداخلية عشان تتنشر صح.

طيب أجيب فانلات تكفى منين؟

عموما قريب أن شاء الله ها أنشر أول عشر بيوت و فيلل من المعلقة وأتمنى أن النقد ما يكونش قاسي عشان انا، و أعوذ بالله من كلمة انا، فنان ... و الفنان دايما مرهف الأحاسيس و الوجدان و محتاج التشجيع (ده غير التشجيع بتاع الأستاد أبو طوب ... بلاش مخوكوا يروح لبعيد).

_______________________________

لينكس عبده لينكس و ولده حوكشة

مكوجى رجل و باليل مطرب شعبى