سؤال لمغتربى الامارات

[الرويناء]

السلام عليكم

حصل زوجى على فرصه عمل فى شركه كومبيتر محترمه بالامارات لسه مش محدد مكان العمل دبى او ابوظبى احنا حاليا فى السعوديه من سنه مصاريفنا كانت كالاتى طبعا بالريال

الفين مصاريف معيشه(اكل شرب وعلاج)

الفين سكن فى شقه حجره وصاله فى مكان زى كمبوند

الف مدرسه دوليه

عندى ولد خمس سنين وبنت2سنه

ممكن حد يحسب لى اصرف كام فى نفس المستوى او اقرب حاجه فى الامارات سواء دبى او ابوظبى

افيدونى افادكم الله

[زعلان]

باختصالر و تقريبا

من اربعة الى خمسة الاف كمصروف شهري للاسرة

سكن غرفة وصالة في منطقة معقولة ايجار شهري في حدود 8- 9 الاف

مدرسة خاصة للطفل حسب مستوى المدرسة لكن لن تقل عن الف وخمسمية في الشهر وبدون سقف محدد يعني ممكن تلاقي ب الفين و انتي طالعة

العلاج مع التأمين الصحي

[dongol]

بدون الدخول في تفاصيل المبلغ اللي هتحتاجوه في الامارات كل شهر و بعد الزيادة الرهيبه في أسعار الايجارات هنا في دبي و ابوظبي انا متأكد ان عيلة مكونه من اب و ام و طفلين محتاجة علي الاقل حوالي عشر الاف درهم كل شهر علشان يعيشوا في مستوي معقول.

هنا في ابوظبي علشان الواحد يجيب بس شقة غرفة و صالة محتاج علي الاقل حوالي مائة الف درهم سنوي ده غير طبعا فلوس الاكل و المدارس و المواصلات

و لكن نصيحتي اذا كان جوزك هيقبل العرض فاحسن حاجة علشان يوفر انه يجي لوحده علي الاقل اول سنه لحد لما يشوف ظروف الشغل وبعدين يبقي يبجيب بقية العيلة

[tahereyad]

الأخت الرويناء,,, أولا أحب أهنيكي جدا علي عرض العمل فالامارات,, سواء في دبي أو أبو ظبي سواء,,, هما مدينتان جميلتان جدا و هاتستمتعوا جدا جدا هناك,,

طبعا بالنسبه لتكاليف المعيشه, الأخ زعلان حدث فأوجز عن الأسعار و تكاليف المعيشه و السكن و صدق جدا,,, أما بالنسبه للأخ دنجل فحساب العشر آلاف درهم دول ينفعوا لما تسكن في شقه غرفه و صاله فميدان الروله فالشارقه و تعيش 3 ساعات يوميا من حياتك في زحام المواصلات و تاخدلك 6 سالك فاليوم,,, لكن بالنسبه لمستوي الكومبوند اللي الأخت بتتكلم عنه هايكون زي الجاردنز او الجرينز,, أو حتي الانترناشيونال سيتي. فأعتقد ان العشر آلاف درهم مش هايقضوا خالص.

لكن للأمانه أحب أبشر الأخت الرويناء انك و اسرتك هاتتبسطي فالأمارات, و هاتتفسحوا, تروحوا كارفور و تتفسحوا في ابن بطوطه مول, و تتصوروا هناك جنب الفيل الخشب, و هاتتصوروا جنب برج العرب و هاتشوفوا الأوربيين عايشين حياتهم كأنهم فبلادهم فالشوارع و عالشط فالممزر و جميرا.. و ان شاء الله لما ترجعوا مصر مش هايكون عندكم غير الذكريات الحلوه و الفسح اللي اتفسحتوها في أحلي مدن العرب,,, أظن كلامي واضح جدا,,, و عشان أوضح أكتر هاسأل السؤال الآتي:

يعتبر مصدر الدخل الأساسي في دبي؟ 1- البترول

2- المعادن و الذهب

3- رواتب المقيمين بها

[زعلان]

تصدق اننا لحد النهارده ما تصورناش جنب الفيل الخشب بتاع ابن بطوطة يا ترى انت اتصورت !!؟؟

طبعا كل واحد ادرى هو ممكن يقتصد اد ايه ويرتب امور معيشته قد ايه لكن تظل مشكلة السكن في دبي و الامارات هي المشكلة الاكبر و التي تأكل اغلب الراتب يعني لو الشركة بتدي بدل سكن او توفر سكن طبعا ياخد السكن من غير كلام او نقاش لأنه ارخص بكثير من انه يدور على سكن بنفسه

سؤال خبيث ده طبعا احنا بنشتغل في البلد و بنجيب لهم فلوس و نعمرها وعايشين فيها لكن مفيش حقوق مواطنه زي دول اروبا مهما قعدت كان في مقولة سمعت ان الشيخ زايد قالها ان المقيم على ارض الامارات الفلوس الي بياخدها زي الرمل (مش في كثرتها ولكن ) بيشلها في ايديه و كلها كم متر يمشيها جوه الامارات تكون اتسربت من ايده قبل ما يخطي عشر خطوات يعني الناس بتعمر البلد و بتشتغل في استثمارات اجنبيه وشركات دولية بتدخل البلد فلوس لكن ناس كثيرة اغلبية التوفير عنها بسيط جدا قد لا تتجاوز في احسن الظروف 10% من صافي الدخل طبعا في ناس واخده حقها واكثر بكثير ودول الاجانب خاصة و لا يمنع ان بعض العرب و الهنود كمان

[tahereyad]

هاهاها,, لا احنا اتصورنا كلنا جنب الفيل و بكل الزوايا و الابعاد,, لدرجة ان أصحابنا فمصر افتكروا ان الفيل ده بتاعنا,, و اتصورنا كمان جنب برج العرب من ناحية شط الجميرا و التليفريك في حديقة الخور و عين الامارات فالقصباء و المارينا و شط الممزر و الجميرا و طبعا خليت الاجانب في خلفية الصورة,, حضرتك فاهم.. يعني الحمد لله عملت السياحه اللي كان نفسي فيها و خلاص ناوي اشوف مستقبلي و أكل عيشي بأه..

الأخت الرويناء: بما ان حضرتك ساكنه فكومبوند,, كنت عايز أعرف شوية معلومات تفيصيليه عن موضوع الكومبوند ده,, أولا الأمان, الأخلاقيات, الأسعار, و لو حضرتك في جده,, انهي أحسن كمبوند يكون مناسب للعيش لينا, كمصريين, و هل السكن داخل الكمبوند يفرق كتير عن السكن في خارجه في مكان راقي برضه؟؟

[الرويناء]

شكرا لكل الاخو اللى ردوا عليا

الامور وضحت معانا شويه الاقامه ان شاء الله فى دبى وكنت عايزه اسأل

- بالنسبه لاسعار انترناشيونال سيتي والجرينز او اي مكان في نفس المستوي للغرفة وصالة او استوديو

- الطريق من انترناشيونال سيتي الي منتصف شارع الشيخ زايد مثلا ياخد وقت اد اية

- هل نظام سالك حل مشكلة المرور يعني بقي اسهل الوصول لقلب دبي واختصر وقت

- اية الفرق بين السكن في الشارقة والسكن في دبي من حيث الخدمات مثلا مكان للعب الاولاد وجيم او حمام سباحة والموقع وتنصحوني اسكن فين لو في الشارقة

- اسعار الغرفة وصالة في دبي او استوديو في مكان معقول

شكرا واسفه للاطالة

[زعلان]

بالنسبة للانترناشونال سيتي سعر الاستديو تقريبا بيبدأ من55+ وسعر

الغرفة وصالة بيبدأ من 75 بلس

والطريق من الانترناشونال سيتي للشيخ زايد تقريبا ياخد اقل من 10- 15 دقيقة

اما الجرينز فاسعارها اغلى وهي موجودة مقابل الانترنت سيتي و اقرب لجبل علي و اسعارها حوالي 90 الف للغرفة الواحدة

اما الجاردنس او الحدائق فده بتبعد عن الانترنت سيتي خمس دقائق وعن ميناء جبل علي المنطقة الحرة عشر دقائق وجنبها ابن بطوطة مول فاسعار الاستديو 66 الف درهم و الغرفة الواحدة 90 الف درهم

وهي منطقة مثالية للسكن لمن يعمل في الانرنت سيتي او الميديا سيتي او جبل علي او جميرا او الشيخ زايد

السكن في الشارقة ارخص بكثير من دبي حيث قد تصل التكلفة للنصف يعني غرفتين وصالة هناك ممكن تلاقيها ب 75 الف درهم بلس او مينس حسب المنطقة

الشارقة مزدحمة اغلب الوقت وان كان بيحاولوا ينظموا شوارعها حاليا لكن الكثافة السكانية فيها بتاكل التعديلات

فيها خدمات كثير طبعا وجوها عربي اكثر و اسلامي اكثر مفيهاش خمور خالص ولا شيشة حتى فيها حدائق للعائلات ومنتزهات

دبي كذلك فيها خدمات مميزة وحدائق ومنتزهات كثيرة وعلى مستوى عالي جدا

[الرويناء]

شكرا للاخ زعلان على المعلومات المفيده

بالنسبه للسؤال على الكمبوند انا كنت عايشه فى مجموعه ابراج فى الرياض يعنى مش كمبوند بالضبط بس فيه مميزات كتيره كويسه

امن فى كل برج ونظام اطفاء حريق جيد جدا

اماكن للعب الاولاد وجيم رجالى و2حمام سباحه

نادى نسائى يحتوى على كافيه واماكن العاب بلياردو وكده مكان تجميل ومكان ندوات دينيه وحضانه اطفال جيم نسائى والاتنين الاخرنين دول باشتراك شهرى

واغلب السكان مصريين وشوام وقله اجانب وسعوديين

وفيه باص للتسوق للسيدان 3 ايام فى الاسبوع صباحا ومساء

وبالنسبه للكهربا والمياه دول ميلغ ثابت 50 ريال للشقه

الشقق جميعها تكييف مركزى ونصف فرش يعنى اجهزه موكيت وستائر

فيه صيانه للشقق اى مشاكل يبعتولك فنى مختص

الدور الارضى عباره عن مول فيه تقريبا كل الخدمات

طبعا كل ده مش ممكن تلاقيه فى شقه عاديه واهم شئ بالنسبه لى كان الامن واماكن لعب للاولاد وطبعا الباص

والحمد لله كان المكان فيه التزام بعكس اماكن كتيره اسمع انها مختلطه جدا يعنى ممكن حمام السباحه مشترك رجال ونساء

العيوب ان موقعه مكنش فى مكان راقى يعنى

اغلى من الشقق العاديه الشقه 2غرفه و2حمام 36 الف فى السنه طبعا نفس المساحه بره ممكن تكون ب20 او اكتر حسب الموقع والتشطيب

وعموما اسمع ان اسعار السكن فى جده اغلى من الرياض

وشكرا

تم تعديل 6 أغسطس 2008 بواسطة الرويناء