لو سبب الهجرة مش البحث عن المال ؟

[zaky haitham]

لو الهجرة مش عشان الفلوس بس لو عشان حياة افضل و نظام احسن و تعليم احسن و مستقبل للاولاد احسن و حرية اكتر . هل دي حاجات تخلي الواحد يهاجر حتي لو الظروف المادية كويسة ؟ ولا تعود في بلدك احسن ؟؟

اية رأيكم ؟؟

[dongol]

يا أخ ذكي صدقني مفيش زي تراب مصر في الدنيا كلها حتي لو كنت بتاخد فلوس اكثر و عايش عيشة احسن بره فصدقني كل ده سراب و الواحد مش بيحس بيه الا لما بيخرج بره مصر

تجربتي بتقول ان الواحد ممكن يشتغل بره مصر فترة علشان يكون نفسه و بعد كده يرجع يقعد وسط اهله

[الأهلاوي الأصيل]

أنا ليا وجهة نظر في الموضوع ده

إنت عايز الفلوس في حياتك ليه؟

لو فكرت في إجابة السؤال ده ستجدها لن تخرج عن الإجابات التالية:

1- عشان لو لا قدر الله مرضت ألاقي فلوس أتعالج بيها علاج كويس.

2- عشان لو تقاعدت أو عجزت لا قدر الله ألاقي فلوس اتسند عليها.

3- عشان أعلم أولادي تعليم كويس

طيب لو جت الدولة التي بتحمل جنسيتها - أي دولة الكلام عام هنا - قالتلك أنا باضمن لك التلات حاجات دول ...لو مرضت هتتعالج أحسن علاج وببلاش ، وتعليم أولادك على أعلى مستوى تعليم ببلاش برضه ، ولو قعدت من شغلك لأي سبب باديك معاش يكفلك حياة كريمة

هتبتدي في الحالة دي نظرتك لأهمية الفلوس تقل - طبعاً الإنسان بيحب الفلوس بطبعه - لكن رغبتك في اكتناز المال تضعف وتفكر في إنك محتاج حاجات تانية ممكن تكون أهم من الفلوس، إني أعيش في بلد بتحترم آدمتي كإنسان وحقوقي فيها محفوظة ، إني أعيش بكرامة وبحرية من غير ما يجي ظابط أو أمين شرطة ملوش لازمة يقل أدبه علي دون أملك القدرة على الرد عليه، إني أضمن إني ما اتخدش في قسم الشرطة أو المعتقل لأتفه سبب واتعرض للتعذيب، إني آكل أنا وأولادي أكل نظيف من غير مبيدات مسرطنة ، إني أتنفس هوا نقي بدون رصاص وعوادم سيارات ، إني لما أخرج بعربيتي ما ارجعش مهدود من الرحمة والضوضاء ولا كأني كنت بالعب مباراة في كرة القدم

حاجات كتير مهمة في حياة الإنسان زي الفلوس أو أكتر منها خيار الهجرة بيوفرهالك ، وفي نفس الوقت برضه ما زالت فرصتك قائمة في جمع المال - بطريقة مشروعة طبعاً - وانت مهاجر إذا عملت على رفع مستواك المهني وزيادة مهاراتك وصقلها بالدورات والشهادات.

تم تعديل 29 يوليو 2008 بواسطة الأهلاوي الأصيل

[capitshino]

تجربتي بتقول ان الواحد ممكن يشتغل بره مصر فترة علشان يكون نفسه و بعد كده يرجع يقعد وسط اهله

وممكن برده تقعد وسط المساجين والمعتقليين

[HDarwish]

وممكن برده تقعد وسط المساجين والمعتقليين

يعني هوه كل اللي في مصر وسط المساجين والمعتقلين ؟؟!!

بلاش نخلي لغتنا سوداوية بالطريقة دي

الناس في مصر عايشين ميه ميه .. وانزل اجازة وشوف

أه بيقولوا الحياة غالية والعيشة نار .. بس تعالى اتفرج .. تلاقي الناس بتشتري بمبالغ مهولة وبرضه بيلبسوا أحسن لبس وعايشين زي الفل .. وما شاء الله بتلاقي في وجوههم الضحكة المصرية بتاعة زمان .. واحنا بس ياللي في الغربة تلاقي التكشيرة مرسومة على وش والواحد مننا وخلاص نسينا ازاي نضحك من قلبنا .. وعمالين ندفع بس ثمن الغربة والبعد عن الأهل وخصوصا لما يكون زوجتك وعيالك مش معاك .. بتبقى الحياة (مش آدمية بالمرة)

وربنا يرجعنا لبلدنا بصحتنا .. بدل اللي الواحد عمال يسمع عنه من البلاوي اللي الناس بتنصاب بها بعد غربة عشرة خمستشر سنة

أما عن تجربتي الشخصية فكان هدفي مش البحث عن المال ولكن كان كل تفكيري وتخطيطي إني أسافر أكمل دراستي في جامعة محترمة آخذ شهادة محترمة علشان ارجع في مصر في مكانة محترمة

لكن نعمل إيه في المطبات؟

[capitshino]

وممكن برده تقعد وسط المساجين والمعتقليين

الناس في مصر عايشين ميه ميه .. وانزل اجازة وشوف

أه بيقولوا الحياة غالية والعيشة نار .. بس تعالى اتفرج .. تلاقي الناس بتشتري بمبالغ مهولة وبرضه بيلبسوا أحسن لبس وعايشين زي الفل

النظرة مش سوداوية .. النظرة شبه واقعية ودائئما باقول ان رائ المحاورين هنا بيختلف حسب ظروف كل واحد عموما اللى اعرفه ان لى اصحاب كتير شالو من دماغهم فكرة الزواج .. اعتقد برده ان حضرتك ممكن تعرف ناس كتير كده.

والناس قاعدة على القهاوى من الفضى والبطالة

اما موضوع الناس اللى بتضحك فهى بتضحك علشان ما تموتش

[dongol]

انا عندي سؤال بس للاخ كابتشينو هي يعني معلش انت في الحتة اللي انت قاعد فيها اول ما بتنزل من المطار الناس بتحدف عليك رزم الفلوس ولا بتتمرمط علشان تجيب الفلوس دي ويا ريت تجاوب بصراحة

معلش انا مهندس و شغال في الامارات و عارف ان الفلوس في اي مكان احسن من مصر و كمان عارف ان الاحوال السياسيه في مصر مش كويسة لكن انا ببص للموضوع من منطلق الراحة النفسيه و راحة البال

[HDarwish]

عزيزي كابتشينو

في البداية يعلم الله كم أكن لك الكثير من الاحترام والحبلأسلوبك المرح من خلال مداخلاتك .. ولا أود أن تتطور الأمور أو يحدث مشادات كما ألاحظها بين الكثير من الأعضاء .. ولكننا بوجه عام نختلف في رأي ما أو أنني أعيش في ظروف غير ظروفك والصورة أمامي غير الصورة أمامك والعكس طبعا.

لى اصحاب كتير شالو من دماغهم فكرة الزواج .. اعتقد برده ان حضرتك ممكن تعرف ناس كتير كده.

حقول لحضرتك على حاجة بالنسبة ليا أنا فالصورة قدامي فيها من كل لون أعرف ناس اتجوزوا وعايشين تمام التمام وهما لسه يادوب ما كملوش 26 سنة ودول قريبين مني جدا واعرف تفاصيل التفاصيل عندهم والنوعية دي هما اللي شالوا فكرة السفر من دماغهم خالص من البداية وقالوا كلمة يا اما انجح في بلدي يا ما انجحش وما شاء الله عليهم اللي عمل صيدلية واللي فتح شركة تسويق منتجات واللي عمل مشروع زراعي وعلشان ما نقولشي الناس دي اصلا من البداية ما يلزمهاش سفر أقول لحضرتك لأ دي أكثر ناس تحتاج السفر بس عندهم عزيمة وحاول شوية من هنا على شوية من هناك لحد ما ربك بيدبرها والمركب بتمشي

اللون التاني وهو الناس المتأففين دايما واللي على طول التشاؤم راكبهم دول اصحابي برضه واعرف تفاصيلهم كويس جدا ودول كانوا من النوع المتكاسل اللي رامي كل الحمل على بابا وماما .. بسأل واحد فيهم قريب يابني بتشتغل ايه يقولك كول سيللير يعني إيه ياعم يقولك يعني بياع بالتليفون .. البيه قاعدلي في البيت وبيتصل على العملاء ويبيعلهم بالتليفون .. أه ما هو الجو حار بره إيه اللي يخليني أخرج وابهدل نفسي .. والأدهي يقوللي انه عايز يسافر .. معليشي ده حتى لو سافر مش حيعرف يعيش ولا يعمل حاجة ...

أنا نفسي وبعد ما اتخرجت كنت اقوم من النوم الساعة واحده ونصف الظهر وبالليل سهرة مع الاصحاب وفي الآخر أقول مافيش مستقبل والعيشة صعبة .. طب بالله عليك ازاي .. (بس على فكرة دي كانت فترة قصيرة واتعلمت منها كثير .. الحمد لله) بالمقارنة لما سافرت بقيت شغال من سبعة الصبح لاربعه العصر وبعد كده من الساعة خمسة للساعة 12

الكلام في الموضوع ده كثير قوي

بس كل اللي عايز اوصله في الآخر .. إن اللي عايز ينجح سواء في مصر أو في الغربة لازم يتعب ويجتهد علشان يحقق النجاح ده وبكرر كلامي زي ما فيه نجاح في الغربة فيه برضه نجاح في مصر بس الفرق إن نجاح الغربة في رأيي هو نجاح الفاشل في مصر ومحدش يزعل مني دي وجهة نظري بمعنى إن اللي معرفشي يحقق النجاح في بلده يعني (فاشل) بيدور على النجاح ده بره بلده

الناس اللي قاعده على القهاوي دي حبا في القعده على القهوة صدقني مش قلة حيلة

أسف على الإطالة

[HDarwish]

أخ دونجول

أي حد .. أي حد .. منهم أنا كمان بيبقى فاكر أنه حينزل من المطار حيجيب شوال ويقعد يعبي فلوس من اللي بتترمى عليه وبدون تعب وبينصدم لما بيشوف الواقع وإن العملية مش سهلة زي ما كان فاكر

وردا على عنوان التوبيك

لو سبب الهجرة مش البحث عن المال؟

المفروض يبقى طبعا الحياة حياة كريمة

طيب يبقى الحال إيه لما الاثنين ما يتحققوش يعني لا قدر يعمل مال ولا حيا حياة كريمة

[أحمد سيف]

كل واحد مننا عنده تعريف مختلف للحياة الجيدة، ولذلك لا يمكن إصدار أحكام نهائية بموضوع السفر للخارج

أنا عن نفسي شايف البحرين أحلى مكان في الدنيا من حيث العيشة، هدوء وراحة ونظافة وخدمات جيدة وناس محترمة وأسعار معقولة

في ناس جت البحرين ما استحملتش تقعد فيها سنة واحدة، وكانت مشكلتهم هي مع الهدوء :aslam:

في واحد قالي إنه مش بيعرف ينام بالليل إلا على أصوات كلاكسات العربيات، وبالتالي هدوء البحرين مش مخليه يعرف ينام

واحد معرفه جه البحرين في الثمانينات لقى الناس بتشرب شاي ليبتون، ماعجبهوش وخلى واحد نازل من مصر يجيبله شاي تموين، وفضل كدا كام شهر، المهم مؤنته من شاي التموين خلصت واضطر يشرب شاي ليبتون، شويه شويه اتعود عليه وفي الآخر بقا ياخذ منه معاه مصر وهوا نازل في الأجازات (طبعا قبل ما ينتشر في مصر)

الأخ إيهاب سالم مره حكى قصته مع السواق المصري في قطر اللي عنده أحلى حاجه في الحياة هي طبق الفول الصبح على العربية و السهر على القهوة مع اصحابه، علشان كدا كان شايف العيشة في مصر أحلى من قطر وفي قطر أحلى من كندا

علشان كدا أنا شايف إن مناقشات من النوعية دي لا تؤدي الى نتيجه، نمط الحياة ده مسألة ذوق شخصي وزي ما في ناس بتحب تعيش في الأرياف أو في المدن الكبيرة أو قرب السواحل فيه ناس عاجباها العيشة في مصر أو الخليج أو كندا، وكل واحد ينام على الجنب اللي يريحه

[HDarwish]

يسلم لسانك يا أنسيف .. لخصت الكلام اللي انا عايز اقوله

[zaky haitham]

انا متفق معاك تماما يا استاز انسيف

[capitshino]

علشان كدا أنا شايف إن مناقشات من النوعية دي لا تؤدي الى نتيجه، نمط الحياة ده مسألة ذوق شخصي وزي ما في ناس بتحب تعيش في الأرياف أو في المدن الكبيرة أو قرب السواحل فيه ناس عاجباها العيشة في مصر أو الخليج أو كندا، وكل واحد ينام على الجنب اللي يريحه

والله عداك العيب وده اللى انا قصده من الاول. ان موضوع زى ده بيختلف من واحد الاخر

بس لى تعليق

بالنسبة لموضوع اللى ماينجحش فى بلده يبقى مش هينجح خالص ..... تقصد احمد زويل ولا مين بالظبط

بالنسبة لموضوع اللى عاوز ينجح هينجح ....انا احتج وبشدة.

الناس اللى بتقول كده بيبقى ربنا وفقها وكله تمام

انما الغالبية ايه؟؟

اللى فتح صيدلية .... انت عارف اقل صيدلية ولو فى حئ شعبى بتتكلف كام.. ولو انا معايا حق صيدليه اسافر ليه

مافيش شك وماحدش يقدر ينكران فى ناس نجحو فى مصر كتير بس للاسف انا شايف اصحابى

اللى وصل 35 سنة ومش عارف يتجوز واللى بيجى عليه نص الشهر يبقى مفلس

واللى بيشتغل 14 ساعة فى اليوم

كان الله فى العون ......... كان اللى فى العون

[capitshino]

عزيزي كابتشينو

في البداية يعلم الله كم أكن لك الكثير من الاحترام والحبلأسلوبك المرح من خلال مداخلاتك .. ولا أود أن تتطور الأمور أو يحدث مشادات كما ألاحظها بين الكثير من الأعضاء

quote

-----------------------

شكرا اخى وان شاء الله مافيش مشادات طالما الاحترام موجود بيننا.

الاختلاف فى الرائ لا يفسد للود قضية

[HDarwish]

أخي كابتشينو

أنا وإنت اتقابلنا عند نقطة واحدة وهي رد الأخ أنسيف .. يبقى الحمد لله إحنا متفقين س = ص & ص=ع إذن س = ع

بالنسبة لموضوع اللى ماينجحش فى بلده يبقى مش هينجح خالص

أنا ماقصدتش المعنى اللي وصلك كده نهائي وما قولتش إن اللي ما ينجحش في بلده يبقى مش هينجح خالص لكن الناس اللي عندها عزيمة وإصرار على النجاح بتنجح وبتحاول تكيف الظروف اللي حوليها لصالحها وفي الآخر بينجح .. وكان كلامي مقصوده إن المتخاذل أو اللي بيعلق أعذاره على أتفه الأسباب ده صعب قوي يحقق النجاح اللي هوه عايزه

بالنسبة لموضوع اللى عاوز ينجح هينجح ....انا احتج وبشدة

ليه بس الاحتجاج بشده على الجملة دي هو اللي عاوز ينجح وعنده العزيمة والإصرار على كده مش هينجح .. يعني حضرتك على الجملة دي وبشده معنى كده لو عكسنا الجملة حتبقى مؤيدها والعكس حاجه من الاتنين يا إما اللي مش عاوز ينجح هينجح أو إن اللي عاوز ينجح هينجح كده تبقى الجملة صح؟

أو إن حضرتك تقصد إن اللي عاوز ينجح في بيئة غير مؤهلة للنجاح مش هينجح .. وفي الحالة دي كمان أنا مش معاك لإن اللي عايز ينجح زي ما قلت هيحاول يكيف الظروف اللي حوليه لصالحه هوه ومش هيحاول إنه يجعل من اللي حوليه عذر مجرد عذر لعدم نجاحه.

وحضرتك ضربت مثال قريب قوي صاحبنا ده اللي فتح صيدلية لا هوه حالته المادية ولا عائلته من البداية كانت حالتهم المادية مظبطة علشان نقول دول ساعدوه لأ كانوا ناس عاديين جدا لكن صاحبنا ده من ساعة ما اتخرج ولمده أربع سنين كان بيعافر صبح وليل .. صبح في مستودع أدوية وبالليل في صيدلية وقدر يحوش مبلغ مش كبير قوي واستلف من هنا شويه ومن هنا شويه والحمد لله قدر يفتح الصيدلية وربنا كارمه آخر كرم وأنا نازل على العيد الكبير أحضر فرحه كمان يا عم

أنا برفع إيدي ويا إيدك وبدعي يارب يكون في عون كل الشباب والمسلمين جميعا

[capitshino]

اللهم امين

[الباشمهندس ياسر]

حقول لحضرتك على حاجة بالنسبة ليا أنا فالصورة قدامي فيها من كل لون أعرف ناس اتجوزوا وعايشين تمام التمام وهما لسه يادوب ما كملوش 26 سنة ودول قريبين مني جدا واعرف تفاصيل التفاصيل عندهم والنوعية دي هما اللي شالوا فكرة السفر من دماغهم خالص من البداية وقالوا كلمة يا اما انجح في بلدي يا ما انجحش وما شاء الله عليهم اللي عمل صيدلية واللي فتح شركة تسويق منتجات واللي عمل مشروع زراعي

</div>

فكرتنى بالنكته بتاعة الريس لما سألوه عن البطالة فقال الشباب هما اللى مبيشتغلوش انا ليا ابن واحد صاحبى حوش من مصروفه 200 الف جنيه وعمل بيهم مشروع

لكن ده مينمعش ان اللى عايز يتحرك :scooter: و يستنفذ الاخد بالاسباب اكيد هيوصل باذن الله

[HDarwish]

على فكره ...

أنا كلامي مقصوده

تطويع الظروف الغير ملائمة لصالح الفرد وعدم التعذر بها

العزيمة والإصرار على النجاح

الواقعية وعدم التشتيت في أحلام ورديه

الواحد لو قدامه طريقين بيفضل فترة يحتار ياخد اي طريق واي طريق فيهم احسن لكن لو مفيش غير هوه طريق واحد مهما كان الطريق ده ومهما كانت الصعوبات اللي عارف انه هيواجهها .. هيمشي فيه ويعدي

يارب تكونوا فهمتوني

[HDarwish]

وبعدين لو كانت الهجره للبحث عن المال .. يبقى الكلام ده أكيد غلط

لإن أساسا الهجرة بتكلف كثير جدا ده غير حساب البنك اللي لازم يكون عنده حساب بنكي لا يقل عن عشرة آلاف دولار

هل المبلغ ده لا يكفي لبدء مشروع يكفل للإنسان حياة كريمة؟

[iloveegypt]

اتفق مع الرأى كل واحد حسبطبيعته

انا عن نفسى لو هاخد مليار جنيه ماهجرش ابدا

انا الان فى السعودية هكمل مبلغ معين ان شاء الله وطيران على مصر حيث الراحة النفسية والدينية والاجتماعية