التنفس بمحاورات المصريين

[ابو محمود]

الموضوع ممكن يكون حاد شوية ولا واخد زاوية يعنى ذات بوز اوندبة علشان اكون اكثر ايضاحآ

قطع عندى فى خط النت ونزلت الى الدور الى تحت فى العمارة وعند احد الجيران (المكاتب ) فتحت محاورات المصريين

وظهر الشريط الخاص بالمواضيع النشطة وكان يجلس بجوارى شاب كنت احدثة عن ان المحاورات دى بتتكلم عن مشاكل المصريين واوجاعهم وكم نحن اخوة ونتحاور فى كل المواضيع بدون تجريح وبأداب الحديث وعلى كل لون ودين .. وبعد عدة دقائق وجدت الشاب بيقولى يا أستاذ دة كل الناس اللى كاتبة هنا معظمهم بل غالبيتهم ممن يعيشون اويقيمون فى بلاد غير مصر أمال المصريين اللى هنا فين وبجد انا لقيت نفسى مش عارف ارد علية ماهو مثلى اليوم كل الموجود من مواضيع كتابها من خارج القطر المصرى ولوكانو مصريين ؟

واتسائل هل المصريين المقيمين داخل مصر اين هم ولا طب لية ما بيكتبوش معانا او يحاورونا الا قليل منهم وهل نحن نحتاج الى ريكلام اعلانات لنا كمحاورات او ما شابة وكيف نجتذب الزوار الى نشطاء بيننا حتى نكسب أراء جديدة وافكار مختلفة عن ما يدور داخل المحاورات وحدوث شيخوخة او الأصح اعادة لنفس الأفكار والمقترحات والهموم وطرق علاجها الغريب ان المحاورات سعات بيحصلها بطىء مواضيعى يعنى تلاقى المواضيع ما بتتحركش لمدة الا لما حد يزقها بعد مدة هل المصريين فى الداخل لا يريدون الدخول لاسباب خاصة بهم وكيف انهم اصبحو اقل انتاجآ ممن هم مصريين ايضآ خارج القطر وهل السبب ان المصريين بتوع الداخل اقل حديثآ ممن هم خارج القطر سؤال محبتش اخبية لانى بحب المصريين ومحاورتهم ايآ كانو خارج القطر او داخلة واتمنى ان نكون اكثر من عددنا هنا لاننا نتنفس من خلال المحاورات فياريت كل المصريين يتنفسو زينا داخل وخارج القطر

[somayasaleh]

كلام جميل....كلام معقول....ما أقدرش أقول حاجه عنه :) :) mfb:

[ابتسامة رضا]

السلام علينا وعلي عباد الله الصالحين

أعتقد والله أعلم ان المصريين المغتربين يجدون الونس في المحاورات وما يذكرهم بالوطن والائتناس بالاخوة المماثلين لهم في الاغتراب

أما المصريين المقيمين بمصر فان متنفسهم في الكلام مع بعضهم في العمل و النادي والشارع والاتوبيس والقهوة

ممكن ننشرلينك المحاورات بين أصدقائنا ومعارفنا وكمان اخواتنا المغتربين ينشروه بين أقاربهم المقيمين

[justtrying]

والله يا اخ محمود مصطفى بالنسبة لي شخصيا المنتدى عبارة عن مكان لتفريغ الأفكار والكبت السياسي الموجود بداخلي لأني احب السياسة وأكيد احوال بلدي مصر

لكن سواء شارك في الحوار ناس من داخل مصر أو من خارجها وسواء تحدثنا أم لم نتحدث .. فلن يغير من الواقع شيئا إطلاقاً فمقصد المشاركة هنا هو تبادل الأفكار تبادل الخبرات إخراج الشحنة السياسية والكبت السياسي والفكري الموجود لدينا ليس إلا.

والسلام ختام

[الباشمهندس ياسر]

الموضوع ده بقى عايز حكاية مش مقاله علشان نعرف نرد عليه

ان شاء الله افوق كده بس و اقعد ارد عليه

[~Heba~]

دعونا نكون واقعيين قليلا

المصرى المغترب يهتم بالشأن المصرى اكثر من غيره لان نزعه الوطنية تظهر فى اوضح صورها لما الانسان يحتك باشخاص من غير بلده

هذا غير ان صورة مصر فى اذهانهم مرتبطة اكثر بظروف البلد التى جعلتهم يغادرونها لذا مشاركاتهم كلها تعبر عن آمال لتحسن الاوضاع و حلم العودة<<<تقولشى لاجئين يا اخواتى wst::

هذا غير ان بعدهم عن مصدر الترهيب لكل ذى رأى مخالف<<<الا و هو ....مش حقول :sad:

بعدهم هذا يعيطهم جراة اكثر لطرح الاراء بينما المصريين داخل مصر ممكن ينتابهم خوف خاصة ان المنتدى له سابقة الحجب بسبب الاراء السياسية

و كفاية كده....عشان انا خوافة wst::

تم تعديل 22 أغسطس 2008 بواسطة ~Heba~

[عادل أبوزيد]

فعلا أين المصريين المقيمين فى مصر .... هل كل الكتابات فعلا من خارج مصر عندما تنظر لمحاورات المصريين من السطح سيأتيك هذا الإنطباع

ما سبق كان إستهلالا لابد منه

لابد أن هناك تفسير لهذا الإنطباع الإحصائيات تقول أن أكثر من 60% من زوار و متصفحى محاورات المصريين من مصر و حوالى 10% من السعودية و هذه الإحصائيات من ثلاث مصادر مختلفة ، فالمنطقى مع هذه الإحصائيات أن أغلب المشاركات من مصر و ليس من خارجها.

لكن إذا نظرت على الصفحة الرئيسية لمحاورات المصريين ستلاحظ أن أحدث الموضوعات فى أغلبها عن مسائل العمل فى السعودية أو مسائل الهجرة إلى كندا.

المسألة تبدو فى صورة لغز يحتاج لمزيد من التحليل.

[Simba]

فيه حاجة كمان حلوة ممكن تساعد اكتر علي انتشار المحاورات وما تقتصرش علي المغتربين بس

كلنا عندنا اكونت علي الفيس بوك وفيه كود في اخر كل موضوع لنقله علي الفيس بوك وكده ممكن كل اللي في قائمة اصدقائك يشوفوا الموضوع اللي شاركته ولو حد مهتم اكيد هيتفاعل

[Howayda Ismail]

فيه حاجة كمان حلوة ممكن تساعد اكتر علي انتشار المحاورات وما تقتصرش علي المغتربين بس

كلنا عندنا اكونت علي الفيس بوك وفيه كود في اخر كل موضوع لنقله علي الفيس بوك وكده ممكن كل اللي في قائمة اصدقائك يشوفوا الموضوع اللي شاركته ولو حد مهتم اكيد هيتفاعل

عندك حق انا بداية معرفتى بمحاورات المصريين عن طريق الفيس بوك فى رباعيات صلاح جاهين وفى الاول

كان حب استطلاع لكن ماوجدته من زخم المشاركات والمعلومات وكافة الاراء فى كافة المجالات جعلنى

اشارك بالتعلم من وجهات نظر مختلفة لاناس على قدر عال من الثقافة والاحترام لم اجده فى اى منتدى اخر

وشكر خاص لادارة المنتدى على المجهود المستمر لتطويره.

[لماضة مصرية جدا]

السلام عليكم و رحمة الله و بركاته

التنفس بالمحاورات

عجبني العنوان اوي استاذي الفاضل

عنوان فعلا بيخلي الواحد يسحب شهيق طويل يحرق بيه كل الطاقة السلبية اللي بيشوفها في يومه

و يطلع زفير و يسيب نفسه في حالة استرخاء

الاساتذة الافاضل تساءلوا ليه المشاركات من بره مصر اكتر من جواها

يمكن احساس الغربة اللي بيخلينا ندور علي كلمة معلش و لما بنسمعها في الشارع بندور ع طول و نسلم ع الملامح المصرية اوي

يمكن احساس الذنب ان احنا فضلنا الخروج و الاغتراب و الابتعاد.....و محدش عارف يا تري نهاية الدايرة دي ايه...حتي لو كان القرار في وقته لا بديل عنه

يمكن هي فقط مساحة انسانية جدا للتنفس

لما كنت بستعد للرجوع لمصر سالتني احد الصديقات القريبات جدا لي و قالتلي هتكتبي في المحاورات

رديت عليها و قولتلها لا....المحاورات بتفكرني بحالة الغربة

و لما رجعت مصر اكتشفت اني رجعت انا و الشنطة و المحاورات

رجعت و دورت علي المساحة الخاصة جدا اللي بتكتب فيها افكارك....مشاعرك....تأملاتك.....

بتختزل حياتك في حروف تقراها بعد حين و ترجع تبص علي نفسك و تعيد قراءتك مرة و التانية

تتشارك مع ناس بتحبهم و تحترمهم مساحات انسانية خاصة جدا قد لا تقترب بهذا القدر مع اشخاص بشحم و لحم في العالم اللاافتراضي

بتصنع مساحة علي مدد الشاشة تحط فيها احباطك.....

تشارك بيها بسعادتك....

بتفكر فيها بصوت عالي يوم ما الحيرة تهاجمك و تاخد راحة بالك

امبارح كنت بستغرب اوي من باب الموضوعات الشخصية.....مع اني كتبت فيه من قبل و كنت بسال نفسي طب هو ينفع ان الناس تتشارك ألامها و احلامهاالشخصية جدا في مكان مفتوح جدا

و كانت الاجابة اللي محيرتنيش كتير

لما حد بيعمل كده اكيد بيوصل لاحساس عالي جدا بالبيئة الأمنة

....البيئة الآمنة اللي يقدر يفضفض فيها بحرية من غير ما يتوقع ان اللي هيقرا كلامه لا هيمصمص شفايفه و لا هينتقده....و حتي لو حصل لان احنا مش ملايكة.....هيلقي شخص تاني و قد يكون عضو جديد يدافع عنه

فيه ناس هتقولي احنا بنخش باسماء وهمية او صور رمزية افتراضية.....لكني اشعر ان لكل منا اصبح ليه شخصية اعتبارية حتي و ان لم نكن قدر رآنا راي العين.....فقد تلمسنا ملامحه في ثنايا أفكاره التي حملتها مفرداته

احلم ان نستيقظ يوما ما

نهم بدخول المحاورات

لكن بشكل مختلف

باسمائنا الحقيقية

بملامحنا الحقيقية

لا يعتريني القلق.....لا اخشي شيئا

لان هناك مساحة اشعر انها جدا آمنة

مش قلقانة ع انتشار البيئة الأمنة

مش قلقانة علي ضغطة زرار ع الفيس بوك او تويتر عشان ننشر مساحتنا الخاصة

المساحة الدافية بتعرف بالدفا اللي جواها انها تبعت رسايل نور لكل قاريء حتي لو كان عابر سبيل...حتي لو كان في يوم كان معسكر في باب واحد و فجأة لقي نفسه متكعبل في ابواب تانية كتير

مش قلقانة اعرف ان اللي بيشارك مصري.....جوه مصر....براها و لا واقف علي حدود دولتين مش عارف يا تري هو ينتمي لفين....انتمائنا انساني بالمقام الاول

طالما قادرين علي زرع فكرة و الايمان بيها و التواصل مع غيرنا....هنقع....هنقوم....هنتكبعل....و هنقف تاني...هنتعلم....هنخطيء...هنصيب

لاننا ببساطة نصنع مساحات انسانية

المحاورات ليست محاورات مصريين مغتربين

هي محاورات بني آدمين

دي وجهة نظر

مسااااكم حوار انساني يطرق علي القلب الذي ما عاد يسكن وطنا و يتأرجح بين عالمين

تحياتي