أجازة سعيدة

[أسد]

المرور .. والقانون الجديد ...

محدش فاهم حاجة ..

وفيه فساد بدون شك ..

سيارتي الجديدة تم ترخيصها بلوحات مرور مكتوب عليها "مؤقتة القاهرة"

وأمس ليلاً .. أثناء عودتي للمنزل ..

كانت الساعة حوالي الواحدة مساء ..

وفي ميدان التحرير ..

أوقفني أمين شرطة ..

طلب الرخص ..

نظر فيهما طويلاً ..

قال لي معلش يا أستاذ أسد .. حنسحب منك الرخصة ..

قلت له ليه ان شاء الله ..؟؟؟

قال لي انت معاك لوحات مؤقتة ودي ماينفعش تمشي بيها باليل !!!

قلت له هم بيعطوا لوحات مؤقتة لأن معندهمش لوحات جديدة ..

أول مرة أسمع حكاية ان ماينفعش أمشي باليل دي ..

قالي هو القانون كده ..

قلت له ده كلام فاضي ..

قلت له .. انت معندكش صلاحية تسحب رخصة ..

لازم ظابط هو اللي يعمل كده ..

والكلام اللي بتقوله ده كلام فاضي ..

وأنا مش حاتحرك من مكاني هنا إلا لما تجيب لي ظابط أتكلم معاه ..

أمين الشرطة ذهل .. وأعطاني الرخص وهو يتلجلج ..

وقال لي اتفضل سعادتك ..

قلت له بحدة ..

ماتعملش كده تاني ..

ومشيت ..

مش مفروض حد يضحك علينا ..

[أسد]

بلد العجايب ..

طابور البنزين ..

كنت أقرأ هذا الكلام قبل نزولي الأجازة ..

وكنت أشاهد أخباره في برامج التليفزيون ..

ولكني لم أكن أصدق هذا الموضوع ..

ولكني رايته بعيني ..

طوابير على بنزين 80 ..

الحقيقة مش كل اللي في الطابور تاكسي .

نصف الطابور سيارات ملاكي ..

[أسد]

كشري ..

عملنا رحلة لمحل كشري أبو طارق ..

في شارع معروف ..

أعرف أبو طارق .. أيام كان يعمل على عربة كشري ..

الآن محل كبير مكيف الهواء .. من عدة طوابق ..

ربنا يزيده ويبارك له ..

محل كشري أبو طارق ..

له مقع على الانترنت

عنوانه

http://www.aboutarek.com/new_site/default3.asp

الكشري هناك رائع ...

المحل نظيف جداً ...

الزحام شديد ...

الدفع مقدماً .. قبل ماتاكل ..

طبق الكشري سعره 7 جنيهات ..

[أسد]

غيرت جاز سفري ..

واستصدرت الجواز الجديد ..

برغم أن جوازي القديم باقي فيه سنة .. وجواز زوجتي باقي فيه سنتين ..

إلا أننا استصدرنا جوازات جديدة .. لي ولزوجتي ولابني ..

الأوراق المطلوبة ..

صورة المؤهل .

صورة بطاقة الرقم القومي ..

مستند التجنيد .. للرجال ..

شهادة الميلاد للأولاد ..

الأصور للمطابقة ..

أصل الجواز القديم .. وصورة منه حتى صفحة 9 ..

عدد 3 صور خلفية بيضاء ..

الرسوم 110 جنيه ..

النماذج مجانية في مكتب الجوازات ..

الاستلام بعد يومين ...

الجواز شكله كويس ..

الحمد لله خلصت من الجواز الكبير الذي كنت أحتار فين أشيله لما باكون مسافر ..

كل الناس بتشيل جوازاتها في جيبها .. وأنا ماكنتش بالاقي مكان أحط فيه الجواز ..

وكنت عندما أقدمه لموظف الجوازات في أي بلد .. أشرح له كيف يحصل على بياناته ..

وأساعده في قراءة الطلاسم المكتوبه بخط عفش ..

الجواز الجديد حسب المواصفات الدولية ..

عقبالكم ..

[أسد]

فيه أزمة عصير قصب في مصر ..

حاجة عجيبة مش كده ..؟؟

تذكرت في عام 1982 كان في مصر أزمة في اللوف ...

نعم اللوف ..

اللي كنا بنستحمى بيه ..

بلد غريبة جداً ..

وبتظهر فيه أزمات عجيبة جداً ...

أزمة في عصير القصب ..

[أسد]

جريدة الأهرام ..

طقس من طقوس حياتي ..

أشتري جريدة الأهرام ليلاً .. قبل الذهاب إلى المنزل ..

لم يعد الأهرام كما كان ...

ولكنه بالنسبة لي أمر جميل ..

أحرص عليه ..

[أسد]

الدنياغاليه قوي في مصر ..

الأسعار عالية جداً ..

أسعار السلع مرتفعة بشكل كبير ..

بعضها أغلى مما هو عليه في السعودية على سبيل المثال ..

لتر الحليب سعره 7 جنيه ..

مش عارف ليه كده ؟؟؟؟

مش مفروض تبقى الأسعار كده ..

معظم التجار فيهم جشع غريب ..

والأستغلال هوالسمة السائدة في مصر ..

وخليها علينا احنا ياباشا ..

هي التيمة المستخدمة لدى هؤلاء ..

[أسد]

على فكرة ..

أنا باحبكم جداً ..

وانتم عايشين معايا طول الوقت ....

الحكاية دي باسطاني جداً ...

ربنا يديم المحبة ..

[النيل حبيبي]

حمدا الله علي سلامتك ياأسد

ان شاء الله أجازة سعيده

سعدنا بمذكراتك

مصر حلوه والواحد بيحس فيها بالحياة

شهر اجازة معناها رمضان في الرياض

بالنسبه لي رمضان في مصر

[HDarwish]

قلت له بحدة ..

ماتعملش كده تاني ..

مش قادر أمسك نفسي من الضحك والله .. بس تعرف دي أحسن حاجه عملتها لو كنت كشيت بس لحظة أو شاف في عينيك القلق هتلاقيه بيقولك يلا يا أستاذ إركن على جنب ما تعطلناش خلينا نشوف شغلنا .. لكن برافو عليك يا أسد

بالنسبة لموضوع مدينة الإنتاج الإعلامي ده والله حاله زي حال أي مشروع في مصر .. إحنا نعمل مشروع زي الفل لكن ما بيبقاش فيه بند للصيانة .. هنا في الخليج أي مشروع بيتعمل لازم يكون فيه عقد مرتبط بيه اسمه عقد الصيانة .. بس والله زعلتني أنا كنتي ناوي أروحها الأجازه الجاية دي بس شكلي هغير رأيي

ومبروك على الجواز الجديد يا باشا وعقبالنا كده يارب واهو نرتاح بئا من دفتر التموين اللي احنا شايلينه ده

وإيه يا أستاذنا كمية الأزمات الكبيرة اللي في مصر دي .. أزمة بنزين .. أزمة رغيف العيش .. والأدهى كمان أزمة عصير القصب لأ لأ كله إلا كده بصراحه ده أنا كنت في مصر أقولك إيه يومين ممكن اثنين ثلاثه لتر والله وبدون مبالغة اصل العصارة جنب البيت على طول رايح جاي عليها اشرب عصير قصب .. إيه اللي حصل بئا ؟

الأهرام دي عندي زيها زي كوباية الشاي وسيجارة الصبح ... كنت حاسس انها بقت زي الإدمان وأخدت فترة لما سافرت علشان اعرف ابطل العادة الهباب دي

على فكرة ..

أنا باحبكم جداً ..

وانتم عايشين معايا طول الوقت ....

الحكاية دي باسطاني جداً ...

ربنا يديم المحبة ..

إحنا والله اللي بنحبك جدا وبنتمنى ترجع بالسلامه وتقضي اجازه سعيدة بدون مطبات

[HDarwish]

نسيت اقولك من الحق

حلو قوي كشري ابو طارق ده ولا الموقع بتاعه ده بصراحه اول مره في حياتي اشوف موقع مخصوص لمطعم كشري

[أسد]

أزمة عصير القصب دي كلام بجد

مش هزار ..

http://www.almasry-alyoum.com/article2.aspx?ArticleID=117564

اختفاء عصير القصب من القاهرة.. وسعر الكوب يصل إلي ١٢٥ قرشاً في المحال الكبري

كتب متولي سالم وإبراهيم معوض وولاء نبيل ١٦/٨/٢٠٠٨اختفي عصير القصب من أغلب محال بيع العصير في القاهرة، بسبب الارتفاع المفاجئ لأسعار قصب السكر، مع بداية الصيف الحالي، مما أجبر بعض أصحاب المحال علي رفع أسعار العصير لتعويض فارق التكلفة، الأمر الذي أدي إلي عزوف المواطنين عن شرائه، وانتهي باختفائه تماماً من معظم المحال، واقتصرت علي بيع غيره من المشروبات تفادياً للخسائر.

في منطقة ضريح «سعد زغلول» وقف خلف طاهر، صاحب محل عصير، يردد عبارة واحدة لجميع الزبائن المترددين علي محله، وهي «مافيش عصير قصب.. مافيش غير تمر وسوبيا وعصير مانجو»، وقال: «لأول مرة تشهد محال عصير القصب اختفاء المشروب منها»، معللاً ذلك بتراجع عدد كبير من أصحاب المحال عن شراء قصب السكر، بعد أن وصل سعر «اللبشة» التي تحتوي علي ٤ أعواد قصب، إلي ٦ جنيهات، بعد أن كانت بجنيه واحد فقط.

وأضاف: «في بداية الأزمة اضطررنا إلي رفع سعر كوب العصير من ٥٠ قرشاً إلي ٧٥ قرشاً، ثم إلي ١٠٠ و١٢٥ قرشاً في بعض المحال، فضلاً عن أن جميع الأعواد المباعة حالياً لدي تجار الجملة لا يتجاوز طولها المتر الواحد، وعبارة عن «زعازيع» غير كاملة النضج، وخالية من السكر الطبيعي الموجود بالقصب، الذي اعتاد المواطنون علي تذوقه، مما أدي إلي نفور المواطنين من رداءة طعمه وارتفاع سعره».

وتابع: «بعض أصحاب المحال حاولوا معالجة رداءة طعم عصير القصب بإضافة السكر إليه، إلا أن ارتفاع تكلفة كيلو السكر الذي وصل إلي ٣ جنيهات، حال دون استمرار هذه التجربة المكلفة، مما اضطرهم في النهاية إلي بيع التمر والسوبيا وعصائر الفواكه والكوكتيل فقط».

وعن سبب ارتفاع أسعار القصب، قال خلف: «أنا في الأصل مزارع، وكنت أتوقع حدوث تلك الأزمة بعد أن تلف محصول القصب أثناء موجة البرد الشديدة التي اجتاحت مصر في موسم الشتاء الماضي، وأدت إلي حرق المحصول الذي قدمه المزارعون للبهائم كعلف، وأن هذه الأزمة قد تستمر حتي شهر أكتوبر، موعد جمع المحصول الجديد».

وقال جمال حداد، صاحب محل عصير: «عصير القصب هو المشروب الرئيسي لأغلب المصريين، وهناك العديد من الزبائن يفضلون تناوله صباحاً أو قبل بدء عملهم، لافتاً إلي أن اختفاء عصير القصب من المحال بسبب ارتفاع تكلفته، آثار استياء الكثير من المواطنين البسطاء، الذين تعودوا علي شرب القصب لرخص ثمنه، خصوصاً أن هذه الأزمة تواكبت مع ارتفاع أنواع عصائر الفواكه أيضاً، بسبب ارتفاع أسعار الفاكهة منذ بداية موسم الصيف الحالي بشكل غير عادي، حيث وصل سعر كيلو الموز إلي ٥ جنيهات، والمانجو إلي ٧ جنيهات، والتفاح ٥ جنيهات، والجوافة ٤ جنيهات، الأمر الذي أدي إلي اختفاء عصائر الكوكتيل من المحال أيضاً».

وأرجع محمد عباس، عامل بمحل عصير، ارتفاع أسعار قصب السكر لزيادة تكلفة زراعته، قائلاً: «تضاعفت تكلفة إنتاجية فدان القصب هذا العام من ٥ آلاف جنيه إلي نحو ٣٠ ألف جنيه، الأمر الذي أدي إلي اختفائه تماماً من الأسواق الرئيسية التي يباع بها كالساحل والمطرية، واضطر أصحاب محال العصائر الكبري إلي شراء أي كميات من المحصول الجديد لإرضاء زبائنهم، الذين اعتادوا علي شرب عصير القصب، لضمان عدم إغلاق محالهم التي يعمل بها ٥ أفراد، معظمهم من أرباب الأسر.

وأضاف أنه يعمل في هذه المهنة منذ ٤٠ عاماً وأنها حالياً مختلفة عن السابق، مؤكداً أنه كان يبيع شوب عصير القصب الكبير بخمسة قروش في أواخر السبعينيات وأوائل الثمانينيات، وأن الربح كان يعود عليه بنسبة تساوي أكثر من عشرة أضعاف قيمة الربح حالياً.

وأشار إلي أن الكثير من أصحاب محال العصائر غيروا نشاطهم لأنشطة تجارية أخري، بعد أن أصبحت المهنة غير مربحة.

أما محمد نوح، أحد زبائن المحل، فقال: «أنا حالياً لا أتذكر شرب عصير القصب إلا في حالة شعوري بالعطش من شدة حرارة الجو، أما قبل ذلك بثلاث سنوات فكنت أفضل شربه لأكثر من مرة يومياً، وذكر أن السعر الحالي مع رداءة المنتج، سيجعله يقوم بشراء زجاجة مياه معدنية بدلاً من عصير القصب، لأن ذلك أفضل وأوفر له - علي حد قوله.

وأكد شعبان عبدالعال، صاحب محل عصائر بمنطقة العتبة، أنه لا يمكن أن يستمر بأي حال من الأحوال في بيع عصير القصب، في ظل ارتفاع التكلفة عن الربح في جميع المشروبات، قائلاً إنه يحاول حالياً تغيير نشاطه بأي نشاط تجاري آخر.

من جانبه، قال الدكتور عبدالوهاب علام، رئيس مجلس المحاصيل السكرية: «ما يحدث حالياً من عمليات اختفاء قصب السكر من محال العصير، هو نوع من الضغط والاحتكار وممارسة بعض مزارعي القصب والموردين الذين يقومون بتوريد إنتاجهم لمحال العصير لرفع أسعار القصب، خصوصاً أن تجارة عصير القصب رائجة طوال العام وتزدهر خلال موسم الصيف، ومقارنتها بارتفع أسعار الفاكهة الأخري وراء موجات الارتفاع التي شهدتها تجارة القصب».

وأرجع الدكتور عبدالرؤوف سعد، الأستاذ بمركز البحوث الزراعية، قلة المعروض أيضاً إلي التزام مزارعي القصب بالتوريد لصالح مصانع السكر في نجع حمادي مع قلة الفائض منه، مما انعكس علي ارتفاع أسعاره، مشيراً إلي أن «لبشة» القصب وصل سعرها إلي ٧ جنيهات، متوقعاً انخفاض أسعاره أكتوبر المقبل مع انخفاض الطلب عليه مع دخول موسم الشتاء.

وقال سعد إن هناك وسائل عديدة لغش عصير القصب يلجأ إليها بعض ضعاف النفوس بسبب ارتفاع أسعاره، منها إضافة المياه إلي العصير أو من خلال وضع الثلج علي المنتج مع العصير، والذي يتحول إلي ماء أو قيام البعض بـ«دقدقة» عيدان القصب ثم يتم نقعها في المياه لزيادة كميات المياه في العصير حتي تمتصها هذه العيدان، مما ينعكس علي طعم العصير ويجعله «ماسخاً».

[أسد]

بعد يومين ان شاء الله ..

رايح شرم الشيخ .

حاقعد ثلاثة أيام هناك بس ..

حابقى أحكيلكم عليها لما أرجع ..

[أسد]

القاهرة ..

بلد غريبة صحيح ..

بلد جميلة حقيقي ..

بلد متعبة الحياة فيها فعلاً ..

في القاهرة ..

ماتعرفش انت مبسوط ولا زعلان ..

ماتعرفش انت مبتهج ولا قرفان ..

ماتفهمش هي عجباك ولا مزهقاك ..

تسير في أحياء القاهرة الثرية ليلاً .

كل المطاعم ممتلئة ..

كل الكافيهات مشغولة ..

الأسعار غالية نار والناس بتصرف ..

في الأحياء المتوسطة ..

الناس سهرانة للصبح ..

المقاهي ممتلئة عن آخرها ..

محدش يقوللي دول عواطلية مش لاقيين شغل .

قعدة القهوة محتاجة مصاريف ..

ماينفعش واحد مش لاقي شغل يقعد على القهوة ..

ده كلام غير صحيح .

مقاهي الانترنت .. مفتوحة طول الليل ..

ولاشباب والمراهقون يملأون المكان ..

يلعبون ألعاباً على النت .. سمعت عن بعض منها .. لم أكن أعرف عنه شيئاَ ..

يدخنون سجائر ولا مانع من البانجو ..

العيال دي معاها فلوس تسهر كل يوم في النت طول الليل . ومعاهم فلوس يشتروا سجائر !!!

أحياء القاهرة الفقيرة ..

الناس سهرانة للصبح برضه ..

في الشوارع ..

في الليل ..

كل سائقي الميكروباصات المدمرة من الأطفال والصبية .. والتوك توك يملأ كل الشوارع بقيادة أطفال أيضاً ..

تعمل في تلك المناطق سيارات تكون مخزنة طول النهار .. ويخرجونها للعمل ليلاً .

هي سيارات محطمة بالفعل .. ولكنها تعمل ليلاً..

لا يوجد بوليس بالطبع في الليل ..

هو فيه بوليس بالنهار علشان يبقى فيه بوليس في الليل ..

مش نخلينا منطقيين ..

أعتقد أن تلك المناطق تسير بالدفع الذاتي ..

وقابلة للانفجار في أي وقت ..

لا شئ يمكنه وقوف هذا الإنفجار ..

يعني هو فيه حد عرف يطفي مجلس الشورى ؟؟؟

مش نخلينا مصحصحين شوية للكلام ..

في القاهرة ..

تسعد وتغضب في نفس اللحظة ..

تشعر بأن الناس مش لاقية تاكل .

وفي نفس اللحظة .. تقول لنفسك ..

هي الناس دي بتجيب الفلوس دي كلها منين ؟؟؟؟

[أسد]

مواعيد الذروة في القاهرة ..

مواعيد الذروة في القاهرة غريبة وعجيبة ..

الصبح بدري ...

موعد ذهاب الناس للعمل ..

الدنيا فاضية ..

والسيارات تجري والطرق سالكة ..

المحلات قافلة ...

تبدأ تفتح بعد الظهر ..

المكاتب والشركات تبدأ تفتح بعد الساعة عشرة الصبح ..

حاجة غريبة .. وتقلل البركة ..

صح ؟؟؟

ساعات الذروة أمال بتكون امتى في القاهرة ..

فيه واحدة الساعة ثلاثة أربعة العصر ..

ودي مش قوي برضه ..

دي بتاعة الناس اللي راجعة من الشغل ..

ثم ...

من الساعة السادسة مساءً تقريباً ..

وحتى مابعد منتصف الليل ..

الشوارع مزدحمة جداً ..

وكلها ساعات ذروة ..

دي مواعيدالناس اللي بتروح من الشغل اللي بيتأخروا فيه شوية ..

والناس اللي خارجة للتسوق ..

وللفسح ..

حاجة غريبة فعلاً ..

الناس صاحية طول الليل ..

ونايمة بالنهار ..

[se_ Elsyed]

بمذكراتك دي يا أبو الأسود هاتشجعني إني اكتب تجربتي الشخصية عن زيارتي للأراضي المصرية ... بعد ما كنت قرفان وماليش نفس .. وكل ما أمسك القلم .. قصدي الكيبورد .. ألاقي نفسي إتسدت وما أكتبش حاجه ..

بالمناسبة .. أنا مش قرفان من مصر ... لإن مصر بالنسبة لي .. هي الأم ... وماحدش يقول لي أمك راقدة عيانه جوه ومصر دي هي مرات ابوك اللي بتعذبك وبتحبسك في أوضة الفيران ؟ ... لأ بجد والله ... فمهما كانت أمي فقيرة أو بتمر بظروف صعبة .... وانا ربنا ميسر لي الحال وواد شايف نفسه .. فمن المستحيل إني أجي اتنطط عليها وأقولها انا قرفان منك ...

ولكني قرفان من مبارك وعياله ... بالمناسبة .. هذا حدث كما أحكيه بالظبط ... في احد المرات سمعت والدتي في غرفتها بتدعي .. فقلت يمكن بتدعي لي إن ربنا يرزقني ببنت الحلال ويجيلي عدلي قادر يا كريم :happy: .. فركزت شويه كده ورميت ودني على أُكرة الباب لقيتها نازله دُعى على مبارك وعياله واللي جابوهم .. آه والله ( يا ترى لما حد يقرا الكلام ده من البُعدا ... يا ترى ممكن يروحوا يقفشوا الست الغلبانة دي ؟ )

وقرفان من المسئولين في مصر ..

وقرفان بيني وبينكم من سلبية الشعب المصري اللي شايف وحاسس إن محفظته بتتسرق ومع ذلك مطنش وعامل نفسه مش واخد باله وولا هو هنا ولا بيقول للحرامي إنت بتعمل إيه ومتعايش مع الحرامية عادي جداً تحت مبدأ " المحفظة مقابل السلام " وأهي ماشية لحد ما تُفرج وربنا يرزقنا بناس مش حراميه يسرقونا ويسرقوا أرضنا وقوتنا ...

لي ملاحظتين بس على رحلتك يا أسد ..

الحريقة ................... بصره يا معلم ... فالكهربا إتحرقت عندي برضوا .. بس المرة دي جت في العداد .. مع إني مركبه 40 أمبير ومقوي كهربة الشقة والبيت الخمس ادوار كله على حسابي الخاص منذ 4 سنوات تقريباً عشان المكيفات .. ولما روحت إشتكيت .. راحوا جايين زي الفريرة غيروه عشان ما حدش يسحب كهربا على قفاهم بلوشي ...

مدينة الإنتاج الإعلامي ....... أي شيء تتدخل فيه الحكومة لازم ينحدر مستواه للأسوأ لإن مافيش عندهم مبدأ الثواب والعقاب ... لكن على مرمى حجر روح شوف دريم بارك والفخامة والحلاوة اللي فيها ... يا راجل ده أنا بأروح هناك كل سنة عشان ادخل الحمامات المحترمة بتاعتهم ومش مهم أستمتع بالألعاب ...

رحلة سعيدة يا مان ... ويالله خلص مذكراتك عشان انزل أنا بتُقلي وأتشجع على الكتابة ... سلم لي على أدهم وبوسهولي من هنا ومن هنا وقول له عُمر منتظرك ...

[أسد]

رحلة شرم الشيخ ...

كانت قصيرة ..

ثلاثة ايام فقط ..

كانت رحلة رائعة .. اتبسطت فيها جداً ..

ابني اتبسط للغاية ...

زوجتي أيضاً اتبسطت ..

لم أذهب لشرم الشيخ منذ فترة طويلة ...

الدنيا هناك اتغيرت أكثر .. ولكن للأفضل ..

حجزت على مصر للطيران ..

التذاكر غالية ..

لأني اشتريتها قبل السفر بيوم واحد ..

نزلت في فندق ماريوت هناك ..

طاقم الضيافة والخدمة بالفندق كان على مستوى راق جداً .. محترمين .. محدش فيهم بيضايقك ..

هذا هو في الغالب هو سلوك العاملين في كل مكان هناك في شرم الشيخ ..

شكلهم فاهمين الصناعة بشكل كويس (أقصد صناعة السياحة) أو انهم بدأوا يفهموها ...

كنت قد قرأت في مووضع ما عن سوء معاملة المصريين في شرم الشيخ ..

هذا الكلام غير صحيح .. ولم ألاحظه أبداً ..

وانا أدعي بأني ذو عين راصدة .. وتفكير مقارن بشكل مستمر .. وأحاول أن أطلع على التفاصيل ..

العاملون في كل الأماكن التي زرتها وتعاملت معهم .. وهي أماكن كثيرة جداً .. كانوا على مستوى راق في التعامل .. ويحاولون تقديم خدمة أفضل لي باعتباري مصري .. ويمنحوني أسعاراً خاصة جداً باعتباري مصري أيضاً ..

ولكن هناك ملاحظات ..

وأنت تسير في الشارع تجد شبان يدعونك لشراء برنامج ترفيهي منهم .. ويعدونك بأسعار رخيصة .. ويحملون أوراقاً متنوعة لبرامج سياحية ورحلات بحرية أو صحراوية ..

هناك يمكن أن تخدع .. وتدفع أكثر مقابل خدمة أقل ..

يمكنك الحصول على كافة البرامج الترفيهية أو السياحية من خلال الفندق .. فسوف يسهلوا لك الحصول على كل شئ بسعر جيد وخدمة مضمونة ..

في شرم الشيخ القانون يطبق بصرامة ..

لا أحد يخالف المرور .. ولا أحد يتشاطر عليك ..

إذا فكرت أن تشكوا فستجد ألف مين يسمعلك .. وستجد حل لمشكلتك على الفور ..

البلد نظيفة وجميلة ومنظمة ..

الأسعار غالية .. ولكن يمكنك الحصول على أي شئ بسعر مناسب إذا ذهبت للمدينة القديمة ...

المواصلات غالية .. إذا ركبت تاكسي ستدفع مبلغ كبير في التوصيلة ..

ولكن يمكنك أن تركب ميكروباص بجنيه وواحد للتوصيلة .. يسير في طريق السلام من أوله لآخره ..

وطريق السلام هو الشارع الرئيسي في شرم الشيخ .. يمر من أول المدينة لآخرها ...

في الميكروباص .. محدش حيقدر يضايقك .. مفيش سواقين يبلطجوا عليك .. أو يضايقوك ..

في شرم الشيخ .. مش في مصر ..

ولكنها مدينة غالية جداً ..

من ضمن المسائل الكويسة جداً ..

قبل أن تدخل إلى أي مقهى أو مطعم ستجد أمامه لائحة الأسعار واضحة بشكل كبير .. فيمكنك الإطلاع على الأسعار علشان لما تدخل ما تدبسش في حاجة بعد كده ..

الحقيقة اتبسطت جداً في الرحلة ...

هناك يمكنك ركوب الغواصة .. وهي عبارة عن سفينة صغيرة .. تنزل للطابق السفلي .. وهو ما يقال عليه الغواصه .. به نوافذ زجاجية تشاهد منها أعماق البحر والشعاب المرجانية والأسماك ..

طبعاً تلك الغواصة لا تسير في أعماق كبيرة .. فهي ليست غواصة بالمعنى المفهوم ..

يمكنك أيضاً الاستمتاع بالقارب ذو القاع الزجاجي .. وتشاهد روعة البحر الأحمر ..

الألعاب المائية .. والبراشوت ..

كلها ممتعة ومسلية ..

[أسد]

رحلة العودة من شرم الشيخ للقاهرة ...

كنت قد حجزت تذاكر الطيران متأخراً جدا ً.. وبالتالي لم أجد موعد مناسب للعودة إلا الساعة الواحدة ليلاً ..

والمغادرة من الفندق سيكون بحد أقصى الساعة الثانية ظهراً ..

والبقاء حتى موعد الطائرة مسألة معقدة جداً ..

قضاء يوم زيادة في الفندق لتغطية هذا الوقت .. مسألة مكلفة جداً ..

الإنتظار سيكون مملاً جداً ..

لذلك قررت أن نعود للقااهرة بالسوبر جيت ..

الرحلة قطع ستة ساعات من شرم الشيخ لألماظه . بما في ذلك الوقفات في الطريق ..

وقف حوالي نصف ساعة للراحة والصلاة في منتصف الطريق ..

الرحلة معقولة .. المزعج فيه أن تكييف الأتوبيس لم يكن على مايرام ..

كل شئ في مصر يقدم ويتهالك بشكل مزعج .. والصيانة آخر همهم ..

عدت بالسوبر جيت واسترديت باقي قيمة التذاكر من مصر للطيران بمنتهى السهولة واليسر ..

تجربة أخرى إيجابية مع مصر للطيران ...

الصالة الرابعة في مطار القاهرة .. مخصصة للطيران الداخلي ...

صالة جديدة .. مستواها عالي جداً ..

صحيح هي صغيرة ولكنها كافية ..

[أسد]

لا زال لدي ما أكتبه لكم عن الاجازة ..

تابعونا ..

واوعى ايدك والريموت كونترول