عايز اتجوز....... عايزه عريس

[عنبو]

ايه دة؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

لالالالا ايه خليها تعنس دى يعنى انا اول مقرا العنوان ارفع صوباعى كدة واقول ونا ونا عايزة ههههههههههههههههههه وبعدين انصدم بخليها تعنس متفقناش على كدة؟

وربنا ابلغ عنكم الحصيرة وميلوتى وسيد ابو حفيظه :rolleyes: كمان ال خليها تعنس ال هى ناقصه مهى بايرة واعدة ؟ الحال واقف لوحدة يجماعه .

هههههههههههههههههههههههههه

مهو بصى علشان الحال واقف هو ده الى بيخلى الواحد يقول طيب خليها عندك حنطها

بس متخفيش انا اعرف حمله تانيه اسمها واقفة الراجل بميت ست لو جت الست يروح الميت راااااااااجل

[justme]

بص بقى يا عم myusername

انت زعلت كده ليه

انا بس بقول رأيي ودعمته بقصص واقعية والمثالين موجودين حواليا

طب ايه رأيك في واحد معاه دبلوم اتجوز دكتورة

سيبك انت

مش كل الناس بتحسب بالفلوس

يعني ممكن يبقى دكتور ومش لاقي يجيب شقة(ان مش قصدي ازعل حد مني)

ويبقى مش قادر يتجوز

وواحد من الناس اللي بيشتغلوا معلمين معاه فلوس قد وزنه دهب

ولو رحت كده وسألت اصحاب العقارات والمصانع والشركات هتلاقيهم اخرهم بكالوريوس

العبرة مش بالمؤهل رزق ربنا بييجي من غير المؤهل

وعلى فكرة ان اذكر قصة واحد من الصحابة كان من الأغنياء وزوج بنته واحد من الفقراء علشان دينه

القصد

انا عايز اقولك عن قصة معروفة جدا لبتوع الكمبيوتر

طبعا كلنا سمعنا عن بيل جيتس

تعرف انه مخدش بكالوريوس حتى وساب الجامعة قبل ما يخلص

ده مش هوه بس ده كمان بتاع ابل وغيره كتير

بس شوف هوه دلوقت ايه

انا قلت المجتمع ملاه الغرور وتحقيرنا لمن هم اقل في الدرجة العلمية خلى كل الناس عايزة تكون دكاترة ومهندسين

طب مين سباك ولا سمكري ولا طباخ ولا ولا

دول ناس بتكسب بالحلال

وصدقني انا بقولك معظم البنات لو جه واحد راكب حته مرسيدس ن بتوع الافلام وعنده كام مليون في البنك وفيه العبر هتقبله وومكن كمان يكون حرامي ونصاب

وفي الأول والأخر كل واحد حر

المهم روق كده احنا في الأول وفي الأخر بنقول رأيينا

وصدقني كل قصة هنا حكيتها انا شوفتها بعيني

وللعلم انا بخلص ان شاء الله ماجستير ومن عائلة محترمة جدا وفي ناس رفضت اني اشوفها حتى لما عرفوا اني بشتغل بره مصر واني بشتغل في التدريس مع اني مش مدرس بالمعنى التقليدي لأني بأعمل في تقنيات الوصول والتمكين

والحمد لله معنديش تقريبا اي مشكلة

طب مش من حقي اغضب واثور

انا في الأخر بقول مفيش نصيب وبقول الحمد لله

وبعدين يا اخي مش يمكن اللي مؤهله على قده ملقاش حد يوجهه او جاتله ظروف مثلا في اعدادي ولا في ثانوي او حصلت حاجة اضطرته يسيب التعليم

حاول تبص من وجهة نظر الشخص ده

وفي الاخر

ربنا مبيبصش للواحد على شكله او مكانته في قومه ولكن على قلبه وعمله

والمعيار الأساسي الأخلاق يعني مش يكون اخلاقه سيئة وطمعان فيها ونقول لازم يتقبل

تم تعديل 13 ديسمبر 2009 بواسطة justme

[myusername]

من الواضح كده انك مبتقراش كلامى كويس...

و كمان جايب لى مثل من أمريكا.. أرض الفرص - خليك واقعى.

انا قلت يبقى فيه اى نوع من التكافؤ... ميزة قدام ميزة, مش انتا تبقى مضروب من كله و عايز واحدة على سنجة عشرة.

و كمان انا قلت طالما طموح... و فيه بوادر بتقول انه هيحقق حاجه, يبقى مفيش مشكلة.

اقرا كلامى كويس, عشان شكلك كده بتقلب الكلام و مبتركزش فيه.

و طبعا ربنا بيبص للقلوب... بس برضه ربنا عمل قوانين و سنن للحياة فى الدنيا... يعنى مثلا هو عشان انتا طيب وعندك اخلاق يبقى انتا كده تقدر تخترق قوانين الدنيا؟ (يعنى تمشى عالهوا مثلا)

و ده سبب ان فيه دول كافرة.. بس قوية و متقدمة, و فيه دول مسلمة.. بس ضعيفة و متخلفة. لان اللى بيحكم هو "السنن الكونية" اللى ربنا حطها.

تم تعديل 13 ديسمبر 2009 بواسطة myusername

[justme]

انا فاهم قصدك كويس وصححلي ان كنت مخطئ

اولا الأخلاق مفيهاش كلام

انت قصدك الواحد ياخد واحدة على قد حالته دلوقت طالما امكاناتك محدودة ومؤهلك على قدك وعيلتك على قدك متخدش واحدة اعلى منك

يعنى انتا اخلاقك تحت المتوسط, و من عيلة تعبانة, و ساكن فى حته بيئة, و مستواك المادى فى الحضيض, و مستوى تعليمك فى الحضيض... و عايز تتجوز واحدة مؤهلها عالى و شغلها عالى و مستريحة مادية كمان...

سؤال اني افتح مشروع على قدي مش يبقى طموح

اني اتحرك في الوسط اللي انا فيه على قد مقدر مش يبقى طموح

وبعدين انا مبقلبش الكلام

انت في رأيك ان الزواج مبني على كفاءة في ناحية المؤهل والعيلة والناحية المادية

ولأن فعلا فيه ناس كتير بتفكر كده في مصر نسب العنوسة وصلت ارقام مخيفة

طيب المؤهل مبني على اساس ايه يعني اللي طلع دبلوم هل كلهم اغبياء وميستحقوش غير كده اعتقد لأ طبعا

والفلوس والرزق دي مش في ايد أي حد ده رزق من عند ربنا

والعيلة انا مبخترهاش انا بتولد فيها كده

وبعدين يا اخي البنت واهلها من حقهم يرفضوا محدش حكر على رأيهم بس مش مش عارف بحس ان الناس دي بيتبصلها بدونية

طيب خد عندك دي وقولي رأيك

دكتور هيتخرج من الكلية 24 سنة مثلا امتياز وعايز 2 او 3 سنين علشان الماجستير ده اذا كان معاه قرشين يبدأ بيهم واذا اخدوا من أول مرة واذا دخل الجيش ممكن يبقوا 4 و 5 كمان يبقى عنده 27 سنة

وعلشان يشتغل محتاج في الاول يتدرب في مستشفى واذا حب يفتح عيادة ودي لوحدها مشكلة يعني واذا ما اتشهرش هيبقى ممكن يتنه كد في مستوصف مجهول

يعني علشان اكون واقعي عايز 10 سنين بعد التخرج علشان اكون كفء للمعايير المادية ده غير ان الضامن ربنا في موضوع الرزق

الا اذا كان اهلي من الأغنياء وده مش متوفر للكل

و معلش قبل 100 سنة من دلوقت كان معظم البنات مبيتعلموش اصلا او تعليم بسيط

يعني الكلام بتاع الؤهلات العلمية اللي فيه دلوقت هي حاجة ناتجة عن وضع المجتمع الحالي

يعني موضوع التعليم ده مش سنة الحياة من بدء الخليقة ده مش معنى اني ضده

وبعدين لو المؤهل معناه الذكاء والثقافة كنا شفنا اصحاب الشركات والعمارات كلهم دكاتره مثلا

عموما متزعلش انا بس بقول رأي خاص بي ولك الحرية في القبول والرفض

وزي ما قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي

[myusername]

زى الفل

و طبعا الموضوع داخل فيه ابعاد اقتصادية و اجتماعية... يعنى فيه مشاكل المجتمع نفسه هو السبب فيها و بتأثر على الافراد - و طبعا بتأثر فى موضوع الجواز...

زى مستوى الحياة المتدنى اللى مصر عايشة فيه, و البطالة, و تدنى مستوى التعليم... و كل دى حاجات بتأثر على الافراد.

عشان كده بقولك... هاجر من البلد دى, و ريح اولادك من انهم يشوفوا المعاناة اللى انتا عايشها

تم تعديل 13 ديسمبر 2009 بواسطة myusername

[justme]

كده متفقين يا كوتش وعلشان كده انا ربنا كرمني من عنده وبعتني الخليج

بس هجرة طول ما ابويا وامي عايشين ربنا يديهم الصحة فده مستحيل

لكني فكرت في الموضوع بس بصراحة الموضوع عايز تخطيط لأن اللي على المحك كتير وخصوصا اني باعمل في تدريب المعاقين ومسمعتش انها حاجة مطلوبة لكن البرمجة والشبكات مطلوبة لكن خبراتي فيها ليست موثقة للأسف بشكل جيد فوقتها ربنا بسهل

بس بقت مشكلتي في الجواز دلوقت

يأما الناس مش راضية فكرة السفر

يأما ناس طمعانة فيك وبامكانك تتعرف على قصتي من المداخلات اللي فاتت

وعموما مادام الموجود ناتج عن ظروف فهي ليست قاعدة

او قانون كوني لا يمكن تغييره

وربنا يكرم الجميع ويلاقي عدله

تم تعديل 13 ديسمبر 2009 بواسطة justme

[myusername]

شوف الهجرة لكيبيك... ممكن يكونوا محتاجين ناس فى موضوع تدريب المعوقين... لانهم محتاجين ناس فعليا للخدمة الاجتماعية و ما شابه. لازم فرنساوى بس مش مشكلة...

انتا ممكن تقدم على هجرة و تسيبها للزمن.. لانها بتاخد وقت, و كمان لما تجيلك باذن الله... مجرد انك تروح تعلم لاندنج - تثبت انك رحت كندا - و ترجع تانى عالخليج او مصر... و بكده هيبقى فى ايدك كارت اقامة عشان لو حبيت تروح فى اى وقت.

موضوع الهجرة بياخد وقت... كزا سنة, و عشان كده انصحك انك تقدم لو ينفع.. لانك مش عارف ايه اللى هيحصل قدام.

[Princesse]

اولا احب اقول حاجة مهمة جدا

انا متفق مع الرأي اللي بيقول ان البنات بتدور على المادة

ليه

انا كان ليا تجربة بس هقول باختصار

في بنت كانت متخرجة من الجامعة من عائلة متوسطة الحال

المهم قالولي عليها رحت اشوفها

المهم كان الشرط الأساسي عندهم ان العريس يكون عنده شقة تمليك

واللي اتقالي كمان ان ده شرط البنت

يعني مش مستعدين يشوفوا واحد عنده شقة ايجار مثلا مع العلم انهم مئجرين الشقة بتاعتهم

المهم ده غير قصص كتير عديت عليا معنديش وقت احكيها دلوقت

المشكلة في رأيي الشخصي اننا مجتمع اصابه الغرور

واه انا اقصد المجتمع ككل مش فرد او اتنين الا من رحم ربي لأن في ناس لسه بخير

المهم

النبي صلى الله عليه وسلم قال كلمة

اذا جائكم من ترضون دينه فزوجوه

طب اذا امعملناش كده

تكن فتنة

وده يوصلنا لنتيجة حتمية

ان المجتمع بقى مليان فتن

اما يلاقي ان البنت واهلها بيبصوا للفلوس يبقى هيدور على اسرع الطرق لأنه عايز يتجوز قبل ما يموت

والبنت ان مكانش فراحها البلد تحكي عليه او عريسها تتفاخر بيه بتبقى حالة تاني

انا ليا واحدة صديقة لأختي ودي بقى مخلصة بقالها اربع سنين يعني المفروض ناضجة

شرطها

مهندس - دكتور-ظابط

او بلاش

طيب هو ليه بقيت المهن بيتبصلها بدونية

طب اذا اخدناها من ناحية مادبة ممكن مندوب مبيعات مثلا يكسب احسن من دكتور

انا مش مندوب مبيعات بس اللي اعرفه انهم ليهم نسبة من الربح

وعلى فكرة انا عايز اقول حاجة

خروج البنت للعمل للأسف في المجتمع بتاعنا بيفسد جزء كبير من برائتها

لأنها بتتعرض لطلب لقمة العيش اللي للأسف خلى ناس كتير بتدور على الفلوس وبس

حاجة تانية

موضوع الصدفة ده امر مستحيل بالنسبة ليا

ليه

لأني لو حتى شفت بنت فيها كل ما امناه سأخجل اني اتكلم معاها كلام زي ده لأن دي طبيعتي مبعرفش اتكلم خارج الشغل اذا كنت في مكان عمل

ووصعب اتعلم الكلام اللي من النوع ده

ومش من بتوع الحركات القرعة بتاعت المعاكسات وخلافه

واللي اصل ده في ذهني

اني مرة اعجبت ببنت جدا وبصراحة كنت خلاص هافتاحها

وبعدين طلعت متجوزة ومخلفة وجوزها اعرفه

تخيلوا بقى شكلها كان هيبقى ازاي

بتفكرني بفيلم البحث عن فضيحة لما جورج سيدهم راح يخطب واحدة من جوزها

بمعنى تاني مستحيل اخد الخطوة الأولى لوحدي

طبعا للحديث بقية وانا اتأحرت على النوم

:D

استاذ Justme

اختلف معك بشدة في رأيك ان البنات عاوزين المادة ، حضرتك بتكلم من وجهة نظرك كرجل فأسمح لي ان اتكلم عن وجهة نظري كبنت.

صديقات كتير اعرفهم كانت المادة اخر حاجة فكروا فيها، و بدأوا مشاور حياتهم مع من اختاره قلبهن في ظروف صعبة. اعرف صديقة فضلت مخطوبة لمدة 3 سنين وكانت بتحوش هي و خطيبها ثمن الشقة من مرتبهم. اجمل شئ ان يكون بين الاتنين تافهم و حب و تضحية و تقدير للاخر.

قصص كتيرة بشوفها فيها بنات وقفت جنب خطيبها وقفت رجالة.

و دا يدل ان مش كل البنات ماديين زي ما حضرتك بتقول.

اما موضوع الشقة التمليك : فانا لي رأي فيه لو تكرمت حضرتك تسمعه.

انا عن نفسي عاوزة شقة تمليك، لسبب بسيط : هو الاستقرار. شقة ايجار جديد يعني هدفع ايجار في الشهر اكتر من 500 جنيه، و هوضبها و اصرف عليها ، وبعدين يجي صاحب الشقة يا أما يغلي الايجار او يخلص العقد و امشي، طيب فين الاستقرار هنا؟ و لو فيه اطفال و مدارس اروح بيهم فين؟ و لو معيش فلوس كفاية علشان تاجير شقة هعيش انا و زوجي و ولادي و عفشنا فين؟

ثانيا: فين الشاب يا سيدي الي مرتبه هيستحمل يدفع قيمة الايجار الشهري دا؟

نأخذ مثال : لو شاب مرتبه 1000 جنيه مثلا هيقدر ازاي يعيش ب 500 جنيه و يدفع بيهم مصاريف الكهرباء و مصاريف الاكل و المواصلات و مصاريف مدرسة العيال ب 500 جنيه؟ فيها ايه لو مثلا نحوش انا و خطيبي و نشترى شقة في اي مدينة جديدة و نرتاح عمرنا كله، و مش مشكلة نفرش الشقة كلها ، ممكن نبدأ بالحاجات الضرورية و بعدين واحدة واحدة نكمل فرش الشقة؟

الحياة سيدي العزيز بقت صعبة وخطوة الزواج مش سهلة، ولازم الاتنين يكون ايدهم في ايد بعض و يساعدوا بعض و يكون فيه بينهم تفاهم و احترام علشان يتخطوا الصعوبات. مش عيب الواحدة تشتغل و تساعد في البيت و عمر دا ما هيقلل من قيمة الزوج لان الظروف الي بنعيشها هي الي بتفرض علينا دا.

بالنسبة لموضوع شغل البنت: البنت الي بتشتغل بتكون مقدرة زوجها بيتعب قد ايه في الشغل ، وقد ايه هو بيطلع عينه علشان يوفر ليها حياة كريمة، بتحس بيه و مش بتطلب منه حاجات فوق طاقته. وتاني هقول ظروف الحياة صعبة و نادر جداا لما نلاقي شاب يقدر يفتح بيت لوحده، يبقى فيها ايه لو الاتنين يخففوا عن بعض الحمل دا؟

المشكلة ان الولاد دلوقتي بقي لهم طلبات مش عاوزين يتنازلوا عنها: لازم البنت تكون محجبة (طيب لو مش محجب تروح تولع في نفسها) ولا ممكن هو يكون راجل ويحاول يقنعها بالحجاب طالما هي بنت اخلاقها كويسة، ليه عاوزين كل حاجة على الجاهز؟ طيب يا اخي خليها تتحجب و خذ ضعف الثواب.

ليه العريس يجي و من اول مقابلة يتشرط: عاوزك محجبة، سيبي الشغل و خليكي في البيت.

ليه العريس الي بيجي عاوز يقتل كل طموح جوايا؟ ليه عاوز يشدني لتحت و يرفض اننا نتحسن و نطلع سوا فوق؟ ليه مش بيحاول يتقرب مني ويعرفني و يحكم على مظهري ؟ يهمه في ايه انا ساكنة فين هو هيجوزني و لا هيجوز عمرتنا؟ يهمه ايه اذا كانت شقة ابويا تمليك ولا ايجار؟ ولا عنده عربية ولا لأ؟

ايه الي يجبر واحدة تتنازل علشان واحد لسة بتشوفوا لاول مرة و لسة مش تعرفه ليه هتقبل التحكمات دي كلها؟ ليه مفيش واحد يحترمني و يحترم طموحي و عقلي؟ ليه عاوز يهدني ؟ ليه عاوز يكسرني ؟

ايها الرجل انا لست دمية تريد ان تصيغها كما تشاء

انا انسان لي مشاعر و اراء

تقبلني كما انا حتى اتقبلك كما انت

لا تنظر الي شكلي و تنسى عقلي

تحمل عناء البحث

فقد تجد في اعماقي ما تعجز ان تراه في صورتي

مثل البحر يكمن الؤلؤ في اعماقه

تم تعديل 14 ديسمبر 2009 بواسطة Princesse

[myusername]

Princesse

أنا مع رأيك , و احب اضيف نقطة... ان للاسف هو ده سبب ان معظم جوازات الصالونات فاشلة...لان مفيش ود... و مفيش روح التعاون.

و على فكرة فشل جواز الصالونات بيبان بعديها ب10 سنين...لما تلاقى الواحدة بتتكلم عن جوزها كأنها متعرفهوش مثلا - او كانها بتتكلم عن واحد غريب, او لما تلاقى الواحدة رفعت على جوزها قضية خلع من وراه, و هى بتنام معاه بالليل و كأن مفيش حاجة.

طبعا انا بتكلم من أمثلة كتير بشوفها فى مجتمعنا الفاضل من عمره دقيقة.

[عنبو]

Princesse مشاركة بتاريخ اليوم, 08:20 AM

اختلف معك بشدة في رأيك ان البنات عاوزين المادة ، حضرتك بتكلم من وجهة نظرك كرجل فأسمح لي ان اتكلم عن وجهة نظري كبنت.

صديقات كتير اعرفهم كانت المادة اخر حاجة فكروا فيها، و بدأوا مشاور حياتهم مع من اختاره قلبهن في ظروف صعبة. اعرف صديقة فضلت مخطوبة لمدة 3 سنين وكانت بتحوش هي و خطيبها ثمن الشقة من مرتبهم. اجمل شئ ان يكون بين الاتنين تافهم و حب و تضحية و تقدير للاخر.

قصص كتيرة بشوفها فيها بنات وقفت جنب خطيبها وقفت رجالة.

و دا يدل ان مش كل البنات ماديين زي ما حضرتك بتقول.

اما موضوع الشقة التمليك : فانا لي رأي فيه لو تكرمت حضرتك تسمعه.

انا عن نفسي عاوزة شقة تمليك، لسبب بسيط : هو الاستقرار. شقة ايجار جديد يعني هدفع ايجار في الشهر اكتر من 500 جنيه، و هوضبها و اصرف عليها ، وبعدين يجي صاحب الشقة يا أما يغلي الايجار او يخلص العقد و امشي، طيب فين الاستقرار هنا؟ و لو فيه اطفال و مدارس اروح بيهم فين؟ و لو معيش فلوس كفاية علشان تاجير شقة هعيش انا و زوجي و ولادي و عفشنا فين؟

ثانيا: فين الشاب يا سيدي الي مرتبه هيستحمل يدفع قيمة الايجار الشهري دا؟

نأخذ مثال : لو شاب مرتبه 1000 جنيه مثلا هيقدر ازاي يعيش ب 500 جنيه و يدفع بيهم مصاريف الكهرباء و مصاريف الاكل و المواصلات و مصاريف مدرسة العيال ب 500 جنيه؟ فيها ايه لو مثلا نحوش انا و خطيبي و نشترى شقة في اي مدينة جديدة و نرتاح عمرنا كله، و مش مشكلة نفرش الشقة كلها ، ممكن نبدأ بالحاجات الضرورية و بعدين واحدة واحدة نكمل فرش الشقة؟

كلام تمام وميه ميه بس تفتكرى ممكن يقعدوا قد ايه علشان يجمعوا تمن الشقه ؟؟ ويقعدوا قد ايه علشان يفرشوها فرش بدائى علشان يقدروا يسكنوا فيها

الكلام جميل جداً لكن التنفيذ صعب جداً جداً

هو انسب حاجه انهم يتزوجوا الاول وبعدين ربنا لما يكرمهم يبقوا يجيبوا الى هم عاوزينه لما ربنا يفتحها عليهم

اعرف ناس بدأوا حياتهم كانوا يدوب هو مهندس صغير جداً وهى مدرسه ودلوقتى ولله الحمد فى كل مدينه ليهم شقه

المشكلة ان الولاد دلوقتي بقي لهم طلبات مش عاوزين يتنازلوا عنها: لازم البنت تكون محجبة (طيب لو مش محجب تروح تولع في نفسها) ولا ممكن هو يكون راجل ويحاول يقنعها بالحجاب طالما هي بنت اخلاقها كويسة، ليه عاوزين كل حاجة على الجاهز؟ طيب يا اخي خليها تتحجب و خذ ضعف الثواب.

بصى موضوع الحجاب ده بيكون مؤشر لحاجات تانيه كتير بس يعنى واحده بتعند مع ربنا يبقى هتعمل معايا ايه ؟؟ لكن الموضوع مالوش علاقه لا باخلاق ولا حاجه خالص فيه بناااااااات فعلاً مبيكونش عارفين ان الحجاب فرض ودول ليهم عذرهم لكن واحده عارفه ان الحجاب فرض وبتقول انا مش مقتنعه دى حاجه تانيه خالص وطبعاً اصعب شخصيه تتعاملى معها الشخصيه العنيده سواء كان راجل او امرأه

اما بالنسبه للاخلاق فاى واحد قبل لما يتقدم لواحده بيكون جايب عنها تاريخ حياتها كلها لان تقريباً مافيش حاجه بتستخبى

ليه العريس يجي و من اول مقابلة يتشرط: عاوزك محجبة، سيبي الشغل و خليكي في البيت.

ليه العريس الي بيجي عاوز يقتل كل طموح جوايا؟ ليه عاوز يشدني لتحت و يرفض اننا نتحسن و نطلع سوا فوق؟ ليه مش بيحاول يتقرب مني ويعرفني و يحكم على مظهري ؟ يهمه في ايه انا ساكنة فين هو هيجوزني و لا هيجوز عمرتنا؟ يهمه ايه اذا كانت شقة ابويا تمليك ولا ايجار؟ ولا عنده عربية ولا لأ؟

بصى موضوع الشغل ده موضوع نسبى يعنى فيه حالات لازم تبقى متواجده فى البيت وفيه حالات ينفع تشتغل وفيه حالات لازم تشتغل

اما بالنسبه ان الواحد يسأل عن موضوع انتى ساكنه فين ولا والدك عنده عربيه ولا لاء فده يعنى بتفرق من شخص لشخص بس المفروض ان كل واحد يقول للتانى على ظروفه بالظبط علشان يبقى على بينه من الاول اصل الزواج مش اتنين بس هيتجوزا بعض لا ده اقل حاجه اسرتين هيدخلوا فى بعض فلازم كل حاجه تبقى واضحه وظاهره من الاول

ممكن تكون واحده ممتازه بس اهلها ناس وحشين يبقى مينفعش لانهم هيأثروا على حياتى ومافيش حد بعيش لوحده

ايه الي يجبر واحدة تتنازل علشان واحد لسة بتشوفوا لاول مرة و لسة مش تعرفه ليه هتقبل التحكمات دي كلها؟ ليه مفيش واحد يحترمني و يحترم طموحي و عقلي؟ ليه عاوز يهدني ؟ ليه عاوز يكسرني ؟

هو مافيش واحد عاوز يهد واحده ولا يكسرها هو كل واحد بيكون راسم لحياته شكل معين ومن حقه انه يختار الانسانه الى تقدر تتماشى مع فكره فمثلاً واحد مش عاوز مراته تشتغل فتقدم لواحد بتشتغل وبعدين قلها والله انتى كويسه قوى بس انا مش عاوز مراتى تشتغل ده رأيه هو شايفه كده وكمان هى من حقها ترفض ومن حقها تقبل طالما مافيش حد جابر حد على حاجه

تقبلني كما انا حتى اتقبلك كما انت

الزواج مافيهوش حاجه اسمها كده خاااااالص فيه حاجه ان احنا بنحاول نتغير شويه وكل واحد يتنازل شويه علشان الموضوع يمشى لكن مافيش حاجه اسمها انا كده وانتى كده لا فيه حاجات لازم تتغير فينا احنا الاتنين والمفروض يسعى كل فيهم الى ارضاء الاخر

ايها الرجل انا لست دمية تريد ان تصيغها كما تشاء

انا انسان لي مشاعر و اراء

لا تنظر الي شكلي و تنسى عقلي

تحمل عناء البحث

فقد تجد في اعماقي ما تعجز ان تراه في صورتي

مثل البحر يكمن الؤلؤ في اعماقه

كلام جميل كلام معقول

myusername مشاركة بتاريخ اليوم, 08:37 AM

و على فكرة فشل جواز الصالونات بيبان بعديها ب10 سنين...لما تلاقى الواحدة بتتكلم عن جوزها كأنها متعرفهوش مثلا - او كانها بتتكلم عن واحد غريب, او لما تلاقى الواحدة رفعت على جوزها قضية خلع من وراه, و هى بتنام معاه بالليل و كأن مفيش حاجة.

ايه الفرق بين زواج الصالونات وزواج الحبيبه

بص زواج الصالونات بيتقدم واحد جاى يتزوج للاهل بيبتدوا الاهل يسالوا عليه ويعرفوا عنه كل حاجه وبعد كده يقدموا كل حاجه للبنت والنتب تقعد تفكر وتشور وتفكر وتشور وبعدين ايه يقعدوا مع بعض وبعدين تقعد تفكر وتشور وتفكر وتشور وبعدين تقول انا موافقه على خطوبه

والخطوبه هتقعد سنه فى خلال السنه مكالمات على معرفش ايه وخروجات وبعدين خلاص يكونوا اخدوا على بعض يتزوجوا يعنى بتكون واخده واحد هى عارفه عنه كل صغيره وكبيره وبيكون عندها قبول له

نيجى بقى للنوع التانى

واحده فى الكليه او فى اى حاجه خبرتها بالحياه مهما كانت بالنسله لاهلها بتكون صغيره واحد يشوفها يعجب بشكلها فقط لا غير لانه اساساً مبكنش عارف عقلها يفضل ماشى وراها كام يوم علشان يلفت الانتباه وبعدين ايه يفضل يسبل لها وبعدين يحاول يشوف واحده صحبتها علشان تروح تكلمها له او هو يروح يتشجع ويروح يلكمها وهى بقى تبقى مبسوطه انها قدرة تخلى اخونا يحبها وهى طبعاً تحبه وبعدين يكملوا المشوار لحد لحد الزواج زى بقية الزواجات طبعاً بس مش الكل بيكمل بالزواج فيه حاجات بتحصل مش عاوز قولها

يبقى ايهم احسن الاختيار فى الحاله الاولى ولا التانيه

والله العيظم شفت بناااااااااااات ناااااااااااااااس بجد مصاحبين اولاد بيئه بمعنى كلمة بيئه وماشين معاهم باسم الحب ومعرفش ايه مع انه اساساً مافيش تكافا خاااااااااالص بس نقول ايه

اما بالنسبه لفشل الزواج بعد عشر سنوات ده بيكون سببه الزوجين ليه لان فى حاجه اسمها الملل والملل ده لازم يكون له علاج والا هتبقى الحياه مجرد روتين يومى وخلاص

وشكراً

[justme]

بجد الله يكرمك يا دكتور عنبو انت قلت معظم الكلام اللي كنت هقوله

موضوع المادة بس انا عايز اعقب عليه شوية

انا مش عايز اقولكم عندي خبرة قد ايه

اللي انا شفته

انا واخويا كمان علشان متقولوش بياخد تجربة ويعمم

يإما البنت يإما اهلها بيدوروا على الماده

الا اذا كانو على قد حالهم قوي او اخلاقهم عالية قوي ودول موجودين بس قليلين

وهما بيدوروا على المادة كضمان للبنت والمستقبل

ولما حكيت لكم عن مستوى الناس اللي رحتلهم انال كان قصدي ان اهلها بدأوا في وضع اقل بكتير من اللي هي عايزاه

زمان من ييجي 50 سنة او اكتر كان الولد ممكن يتجوز في بيت اهله ولغاية اما ربنا يكرم

انا اعرف قصص كفاح لناس بدأت من القاع وربنا كرمهم

بس بدأوا بشقة ايجار في حتت بعيدة

ومع الوقت ربنا كرمهم بس بعد كام سنة

يستنوا بقى 5 سنين ولا 10 سنين علشان يتجوزوا

مش لازم استنى 5 سنين علشان اتجوز

وعلى فكرة انا عمري مفكرت ان البنت اللي قدامي عايزها تساعدني في حاجة وربنا ميسرها ولله الحمد

ومع ذلك معنديش مشكلة في شغل البنت طالما هي شغلانه محترمة

اما موضوع الحجاب ده ففي رأيي حاجتين

اول حاجة نظرة الأهل والمجتمع اللي احنا فيه ان اللي بتعمل كده متمرده

تاني حاجة الدين بيقول كده

تالت حاجه

ايه الفائدة بالعكس موضوع الحجاب فيه راحة للبنت بس بعض الأحيان بتبقى فرحانة بنفسها او ان اهلها ربوها على كده

معلش عندي شغل ولازم اروح

فتكم بالعافية

[justme]

معلش ان بكمل في مداخلة تانية لأن مكنش في وقت

المهم

اول حاجة

بالنسبة لموضوع شغل البنت

شوفي دلوقت صعب جدا ان واحد يقول لمراته متشتغليش الا اذا كان قدراته المادية عالية

بس هو الولد بيطلب ده ليه

لأن البيت مسئولية اهم من الشغل

يعني نتكلم عن اتنين متجوزين وربنا رزقهم بجتة عيل كده

هيعملوا فيه ايه ساعت الشغل الصبح

لغاية اما يقدروا يودوه الحضانة

يعني محتاج رعاية

وحتى الطفل في المراحل الأولى محتاج توجيه ومتابعة

ويا سلام اذا بقوا طفلين او تلاته

يعني لازم حد يقعد في البيت مع العيال ويربيهم ويتابعهم

ده غير امور تانية من واجبات الزوجة

طب هي عتروح الشغل وترجع الساعة 3 مثلا وعلشان ياكلوا ويريحوا شوية بقت 6 بالليل ولو عندهم طلبات بره البيت او زيارات او خلافه يبقى مفيش وقت لأي حاجة

وياسلام بقى لو دكتورة في مستشفى وعندها ورديات

ولا تكون استاذة في الجامعة ومحاضرات وخلافه

ده غير ان معظم الشغل في القطاع الخاص بيضغط جدا على الوقت وفي الغالب ساعات بيروح معانا البيت

وعلى فكرة سبب معظم المشاكل في التعليم غياب دور الاسرة يعني الاب والأم

طيب

ممكن حد يقولي ليه الراجل ميقعدش هو

سأترك اجابة السؤال ده للأعضاء

طيب بالنسبة لموضوع الشقة اللي جت في 3 سنين

انا في مصر

كنت ممكن اشتغل في الحكومة

بكلم ياجدعان

ب 150 جنيه

حته واحده

يعني الراجل ممكن يديلي مرتبي في ورقة واحدة وارجعله خمسين جنيه كمان

هنقول اني الحمد لله مجالي في شغل خارج الحكومة ومطلوب بصورة ما

يعني ممكن اشتغل ب 1000 في الأول مثلا

طيب محتاج اصرف منهم قد ايه علشان اعيش

حنقول اني هبهدل نفسي في المواصلات على اساس بابي مجبليش عربية

وهاكل على في البيت مع الجماعة ب 200 او 300 مثلا

يعني قول 500 جنيه مصاريف

و كمان مفيش ميزانية للهدوم واللذي منه

المهم

يعني هحوش 500 جنيه

يعني 6000 جنيه في السنة

يعني 18000 في 3 سنين

يعني لو افترضنا انهم بيحوشوا مع بعض

هنقول 40000 جنيه

طيب دليني على شقة ب 50000 جنيه وانا مستعد اشتريها من الصبح

بس بشرط تكون في مكان مقبول

وتكون مثلا اوضتين وصالة

انا على اول الشارع بتاعي

الشقة تمنها عدى المليون

وده في مدينة الزقازيق

منكرش ان المنطقة متميزة

ولكن في المناطق الأقل ب 500000

يعني عشر اضعاف المبلغ اللي فوق

يعني عايز 30 سنة

او اكون حرامي

او اشتغل في 3 او 4 شغلانات

ومعلش فئة بسيطة اللي بتطلع من الجامعة معاها لغة وكمبيوتر دلوقت علشان يشتغلوا في وظائف محترمة

قصة تانية بسرعة

انا ليا واحد صديق ليا وهما الاتنين قعدوا 5 سنين من العمل في الخليج يحوشوا تمن الشقة ولسه مش عارفين يشطبوها

انا اعرف ناس وكلاء نيابة ومئجرين شقق علشان يسكنوا

هوه مرتبه كام

هنقول 2000

شوفي الحسبة برضه مش ماشية

طب اقولكم على الأنكت

انا كان ليا واحد صاحبي راح اشتغل في هيئة الطاقة النووية

مهندس وكان من أوائل الدفعة عارفين بكام

240 جنيه

انا اتعرض علي زميلي في الدراسة شغل في مفاعل انشاص في مجال الأي تي

بكام

500 جنيه

طب اذا مفيش

يبقى الحل ايه

نقبل بالإيجار مؤقتا وده مش عيب

والعيب اما تكون البنت عايزة خطيبها يوفر اللي اهلها مش موفرينه طالما مش في استطاعته

وبعدين هو الشغل بالسهولة دي

انا قعدت سنة كاملة في البيت مش قادر اشتغل بسبب الجيش وده معظم الشباب بيعدوا عليه

ومدخلتش

طب اذا كنت دخلت ده كان معناها سنة على الأقل كمان

يعني كنت هوصل 23 او 24 سنة وانا لسه معملتش حاجة

معلش انا عارف اني بتكلم كتير بس بجد الموضع ده مهم

لأن سبب تأخر الشباب عن الزواج

المادة ثم المادة ثم المادة

وسبب اغتراب الكثيرين منا

برضه الماده

وللعلم

انا الحمد لله مفشلتش في حاجة في حياتي لغاية دلوقتي تقريبا

غير موضوع

الزواج ده

بس ده مش معناه

ان انكر ان ليا اخطائي

انا يمكن مش عايش في مصر غير شهرين او تلاته في السنة

بس عارف الظروف

وبعدين انا اتحدى اي بنت تقبل انها تتجوز بدون فرح وشبكة وخلافه

يعني اقل واجب 10000 جنيه

يمكن واحد في الألف

فنخلينا واقعيين

بصراحة بعد ما بصيت على اللي كتبته

لقيته كتير فاعذروني للإطالة

اه بخصوص الحجاب

المشكلة ان الولاد دلوقتي بقي لهم طلبات مش عاوزين يتنازلوا عنها: لازم البنت تكون محجبة (طيب لو مش محجب تروح تولع في نفسها) ولا ممكن هو يكون راجل ويحاول يقنعها بالحجاب طالما هي بنت اخلاقها كويسة، ليه عاوزين كل حاجة على الجاهز؟ طيب يا اخي خليها تتحجب و خذ ضعف الثواب.

مش هقول اصل ده صعب بس عموما الهداية بيد الله وربنا يهدي بس الواحد لما بيدور على بنت ويكون عنده غيره

مش هيقبل انه يخلي مراته تقعد مع حد غريب بس بيتنازل في الشغل على مضض ده وهي محجبة

فمابالك بواحده غير محجبة

واشباب دلوقتي بنسمع عن قضايا التحرش اللي بدأت تزيد

يعني خطيبتي لو ماشية في الشارع وسمعت واحد علق عليها بكلمة

ماعتقدش اني هعديها

ممع اني من النوع اللي عمره ما اتخانق في حياته وده مش من ضعف ولله الحمد بس لأني عارف ان النتائج ممكن تكون وخيمة علىالطرفين وان القوة ليس بالصرعة وانما من يملك نفسه عند الغضب

بس في دي لأ

يبقى المقابلة الأولى

هوه الواحد بيبقى في بعض الأحيان بيسأل بهدف معرفة رأي الشخص علشان يحكم علفى مدى التوافق

والموضوع زي ما قلنا عبارة عن اتفاق وبعض الاحيان تنازل

طيب خلي حضرتك مكاني

انا عندي اجازة شهرين

نازل ادور على عروسة بطريقة الصالونات

اللي هي الجواز من باب البيت

ومش عارف ليه بقى في ناس بتعتبره متخلف

الفرق بين جواز الصالونات وجواز الحبيبة ان الأول العلاقة بين الاتنين في النور يعني بعلم الأهل

وليها ضوابط

اما التانية في الغالب في السر

وبعدين انا شاب قاعد بره مصر

باجي شهرين

هل ممكن اعتر بالصدفة فيهم على اي حد واكون علاقة سليمة

صعب

ده غير اني مش بتجمعني ظروف مع بنات في الأجازة لأن المكان الطبيعي بيكون الشغل او الدراسة او الحي

لكن واحدة في الشارع عجبتني اعمل معاها ايه

وخلو بالكو الاعجاب هنا هيكون في الغالب بالشكل

ممكن تطلع متجوزة او مخطوبة والموقف هيبقى بايخ اوي

اما موضوع الصالونات فده في الغالب بتخش فيه امور تانية

كمان في اول مقابل مش هتكلم في الاساسيات

زي الحجاب

طب ما يمكن بعدين افتح الموضوع والاقي رفض برضه

وبعدين هنقول لازم يصبر شوية

ماشي

بس ده مناه ان في الأخر هطرح الموضوع فخليها من الأول وعلى بلاطه زي ما بيقولوا

عموما احنا للاسف تأثرنا بالغرب والإعلام وبقى فيه اتجاه نحو النمط الغربي حتى في موضوع الزواج والحرية المطلقة بلا روابط او ضوابط

وعلشان ده انتشر نشوف تاني نسب التحرش والاغتصاب في البلد بقت عاملة ازاي

واخر حاجة

المدخنين طب لو الولد بيدخن مش هتتكلموا في الموضوع ده من الأول

الولد ممكن يترفض علشان بس بيدخن مع العلم اني مبدخنش

اسف مرة أخرى للإطاله

[الباشمهندس ياسر]

معلش ان بكمل في مداخلة تانية لأن مكنش في وقت

المهم

طيب بالنسبة لموضوع الشقة اللي جت في 3 سنين

انا في مصر

كنت ممكن اشتغل في الحكومة

بكلم ياجدعان

ب 150 جنيه

حته واحده

يعني الراجل ممكن يديلي مرتبي في ورقة واحدة وارجعله خمسين جنيه كمان

هنقول اني الحمد لله مجالي في شغل خارج الحكومة ومطلوب بصورة ما

يعني ممكن اشتغل ب 1000 في الأول مثلا

طيب محتاج اصرف منهم قد ايه علشان اعيش

حنقول اني هبهدل نفسي في المواصلات على اساس بابي مجبليش عربية

وهاكل على في البيت مع الجماعة ب 200 او 300 مثلا

يعني قول 500 جنيه مصاريف

و كمان مفيش ميزانية للهدوم واللذي منه

المهم

يعني هحوش 500 جنيه

يعني 6000 جنيه في السنة

يعني 18000 في 3 سنين

يعني لو افترضنا انهم بيحوشوا مع بعض

هنقول 40000 جنيه

طيب دليني على شقة ب 50000 جنيه وانا مستعد اشتريها من الصبح

بس بشرط تكون في مكان مقبول

وتكون مثلا اوضتين وصالة

انا هبيعلك شقة

ادفع الخمسين باكو ... و هقسطلك قسط محصلش

و موقعها كويس جدا جدا

[justme]

ودي بقى شقة طعمية ولا في مساكن الإيواء

انا على فكرة بتكلم جد

يعني تعرف شقة اوضتين وصالة وبخمسين الف وفي حتة كويسة

اه بس خلي بالك بخمسيت الف جنيه مش دولار ولا يورو

عموما يا عم وانا اشتريت بينا نكتب العقد

[Princesse]

استاذ محمد العنبي ، اسفة اذا كنت اخر مرة اخطأت في كتابة اسمك

و لكن سيدي الفاضل مش كل مسلمة غير محجبة دا معناه انها عنيدة او متمردة على المجتمع او انها بتعند مع ربها.

انا عن نفسي مقتنعة تمام ان الحجاب فرض و عاوزة يوم ما اتحجب يكون القرار نابع من داخلي مش علشان حد فرضه علي سواء اهلي او زوجي.

الحجاب هو شئ بيني و بين ربي ، و بدعي ربنا كل يوم انه يوفقني لاتحمل الامانة دي، لان الحجاب مسؤلية صعبة من وجهة نظري

و في بنات كتيرة مش محجبة ولبسها محتشم اكتر من المحجبات و كلنا بنمشي في الشارع و نشوف مهازل.

بس ارجع و اقول ان لسة مشكلة مجتمعنا المظاهر، المحجبة بقت قديسة و الغير محجبة بقت متمردة

نفسي زي ما بتهتموا بالحجاب تهتموا بأنكم تسألوا البنت عن حقوق زوجها و اهله عليها؟ تشوفوا بيت البنت من جوا عامل ازاي؟ ازاي الام و الاب و الاخوات بيتعاملوا مع بعض؟ هل الام بتحترم الاب؟ هل البنت صوتها بيعلى على اهلها؟ هل البنت حنينة؟ هل هي جدعة مع اهلها و مع اصحبها؟ جوانب كتيرة في اسرة البنت لا يكتشفها العريس إلا لما يقرب من الاسرة

الاستاذ justme

في شقق اسعارها معقولة و بالتقسيط في مشاريع اسكان مبارك في 6 اكتوبر و شقق بتاعة اوراسكم و شقق حدائق الاهرام و كمان في شقق في فيصل اسعارها معقولة

مش شرط تكون شقة واسعة ، في شقق صغيرة نظام غرفة و صالة بس تصميم الشقة شيك.

بالنسبة لموضوع الشبكة و الفرح ، في بنات دلوقتي بيتنازلوا عن الشكليات دي طالما ان العريس انسان كويس و شاري البنت

يا جماعة طالما في حب و تفاهم كل شئ بيكون سهل و كل حاجة بيكون ليها حل

بالنسبة لي اصعب شئ هو ان اجد الانسان المناسب

و اذا وجدته فكل شئ بعد كدة سهل ، لا ماديات و لا مسافات و لا بحار و المحيطات هتفرق بينا، يكفيني انه عاوز يكون معايا و شاريني

لو واحد شاريني اكيد انا كمان هشتريه بدنيتي و عمري

[الباشمهندس ياسر]

ودي بقى شقة طعمية ولا في مساكن الإيواء

انا على فكرة بتكلم جد

يعني تعرف شقة اوضتين وصالة وبخمسين الف وفي حتة كويسة

اه بس خلي بالك بخمسيت الف جنيه مش دولار ولا يورو

عموما يا عم وانا اشتريت بينا نكتب العقد

مبدئيا انا فاهم اك بتهزر

بس نصيحة من اخوك الصغير

لما تلاقي الكلام دخل ف الشغل بأي صورة م الصور ... يبقي مفيش لا مكان ولا مساحة للهزار اطلاقا

عموما

هبعتك ع الخاص ..عشان منخرجش عن الموضوع

[myusername]

السلام عليكم,

فيه نقطة بس عايز أضيفها عالسريع...

فيه شباب كتير بيبقبوا جايين من الخليج... او من اوروبا و امريكا(بس بتوع الخليج بيبقوا مشافوش دنيا), و بيبقوا فاكرين ان الناس طمعانة فيهم... و ان مبصوص لهم فى الفلوس اللى معاهم.

و تلاقى الباشا عمال يدخل 50 بيت هو و امه... و لا هامه مشاعر الناس, و لا ان دى بيوت ناس وليها حرمتها.

يا جماعة يا ريت نتخلص بقى من العقدة دى... ان كل الناس طمعانة فينا عشان احنا لسه راجعين من الخليج, و لا الكلام ده.

و متهيقلى يعنى من حق الاسرة انها تطمن على بنتها... و انا مقصدش المغالاة, بس يبقى فيه الحد الادنى من الضمانات المعقولة.

و على فكرة... لما بيبقوا اسرتين عارفين بعض - و عارفين تاريخ بعض - مبيهتموش قوى بالضمانات دى... بس الحكاية انك رايح و هما مش عارفين عنك حاجة.

تم تعديل 14 ديسمبر 2009 بواسطة myusername

[justme]

انا في المداخلة ضربت عدة امثلة وعلشان مكررهاش ارجعي حضرتك واحسبي الحسبة لأي شقة تمليك شايفة سعرها رخيص هتلاقي حتى الوظائف المحترمة ممكن متعرفش تجيب شقة

وبعدين الحسبة على اساس يتشاركوا

يعني لازم ضعف الوقت لو لوحده

ده غير ان انتي ممكن تكوني متفهمة فده شيء جيد لكن في حالات الاهل مبيوفقوش من غير شقة تمليك يعني لازم تكون عنده مش هيقدر يقول انا والبنت نشترك

كمان فيه حاجة كل اللي حضرتك ذكرتيه نظريا حلو بس كل ده في القاهرة ومش كل الناس بتوافق عليه

انا ضربت مثال واحد بس في الزقازيق اللي هي مش اسكندرية ولا القاهرة

المشاريع اللي بتتكلمي عليها موجودة لكن للاسف مش الكل يقدر ياخد فيها ياما لشروطها او لقلتها وانها محتاجة واسطة

وقليل اللي بتظبط معاه

يعني الغلبان ميقدرش يجيب شضشقة تمليك بسهولة

دي نقطة

النقطة التانية

الشخص المناسب

طبعا مش كل الناس زي بعضها

الواحد ليبحث عن الشخص المناسب لابد له من السعي

وكمان التوفيق بيبقى من عند ربنا

يعني انا سعيت باللي قدرت عليه لكني في المرات الماضيةكانت المشكلة في الغالب مع اهل البنت والطمع

ومش معايا بس لأ مع اخويا كمان

انا ندمت اني محاولتش ارتبط قبل ما اسافر

بس انا سافرت 22 سنة تقريبا ومكنتش وقتها مستعد الا اما اقدر افتح بيت علشان الحكاوي دي كلها مع العلم ان ابويا كان مديني شقتين في البيت مش شقة

بس انا شم من النوع اللي يعتمد على حد الا اذا كنت مضر

وقصدي هنا في الجوانب دي لأن في رأيي استنفاذ كل الفرص واجب

وبعدين ربنا يسرها معايا وقلت دور بقى جه الوقت

وكانت الصدمة

وانا اعرف على الاقل عدة اشخاص في محيطي عندهم تجارب شخصية وكمان معايا هنا في الغربة

انا فكرت ارجع مصر علشان اشيل لقب مغترب يمكن النظرة تتغير

صدقيني شعور صعب الاحساس بالوحدة واقصد هنا ان الواحد حاسس انه وحده في هذه الدنيا

لكن الاصعب ان الواحد يخش مواضيع بحسن نية ويطلع بيتضحك عليه لأنه يقدر ماديا

بمعنى تاني فرصة عريس لقطة يبقى نطلب بقى

والمشكلة اني عمري ما بقعد احسبها ماديا لكن اللي حواليا بعد فشل التجربة بيقولوا انت غلطان انك عملتلهم اللي عايزينه واتسرعت

هل الذنب هنا اني لم اعير المادة اهتماما فاصبحت واجب انتزاعها

بمعنى تاني

علشان انت بره تبقى ثري عربي

يبقى عايزين شبكة بعشرين او 30 الف

ومؤخر خمسين الف على الأقل

وشقة 5 غرف

وفرح محترم

المهم في الأخر بلاقي نفسي في صفقة

طب لو مش الناس دي مش مادية مش يقولوا مثلا في حدود المعقول

ده الحسبة اللي فوق دي تعدي ال 100000

طب ليه

عموما احكيلكوا على قصة انا اتعرضتلها

في ذات مرة برضه من بتوع الجواز دول رحنا نشوف بنت وكنت ساعتها مع صديقة لوالدتي

المهم هي كانت لا تعرف البنت ولكن صديقة لها اتصلت بالبنت وقالت نتعرف في احد النوادي

المهم اتأخرت عن الميعاد بساعتين

قولت عادي

المهم جت وقعدت شوية وقامت وبعدين لقيتها وافقفة تتكلم مع شوية شباب

المهم

الست اللي معايا قالت لأ انا زي والدتك

فبعد ما مشينا اتصلت الوسيطة بصديقة الوالدة لتخبرها الرد

فقيل لي انها قالت للست الوسيطة بالحرف الواحد

لو معجبنيش هحب واحد عليه

طيب لما البنت بيكون رأيها كده بتوافق ليه

اكيد في اسباب اخرى

اتركها لكم للتفسير

اه بالمناسبة انا لسه عندي قصتين كمان

وواحدة فيهم لصديق اردني تعرض لموقف الطمع ده برضه

هحكيها بعدين

واكيد فيه بنات محترمة ومش هانكر الكلام ده

بس والنبي حد يقولي اعمل ايه بس مش على طريقة الصدفة لأني بقالي 5 سنين ومشفتش صدف ولا حاجة

وبصراحة شكلي داخل على دور اكتئاب

لأني زهقت

[الباشمهندس ياسر]

ا

فيه شباب كتير بيبقبوا جايين من الخليج... او من اوروبا و امريكا(بس بتوع الخليج بيبقوا مشافوش دنيا), و بيبقوا فاكرين ان الناس طمعانة فيهم... و ان مبصوص لهم فى الفلوس اللى معاهم.

الشباب اللي راجع م الخليج ده اكبر اشتغالة

فعلا و الله

بيشتغلوا الناس ف مصر

و محسسينهم انهم ياما هنا ياما هناك

و الحقيقة ان معظم الشباب غلابة و بيتكلموا ف ارقام تافهم متستاهلش اساسا

و طالع عينيهم و مرتبات ضايعة

[justme]

بص بقى يا عمmyusername

هوه انا معاك ان موضوع الفلوس ده بيبقى فيه ناس فاكراه عقدة

يا عزيزي

مين قالك اننا مشفناش الدنيا

انا بقولك الحمد لله قبل ما اطلع مصر كان عندي الشقة في بيت أهلي يعني مش كنت طالع في الأساس ادور على فلوس علشان اتجوز وانما كنت ابحث عن الأفضل

يعني الحمد لله عيني مليانة ماديا ومش من النوع اللي ببص للي في ايد غيري

وزي ماحكيت قبل كده دي مش تجربتي لوحدي اقراء المداخلة اللي حكيت فيها قصة اخويا وقولي بقى انا بيتهيائلي ولا الناس دي طماعه

موضوع شاف خمسين بيت ده هوه وامه

ماهو لو انت قاعد في مصر وفاضي تدور او عندك حد بيدور بمعنى ان حد من اهلك عنده قدرة البحث وعارف انت بتدور على ايه ممكن من اول مرة

انت ما عيشتش التجربة دي فمتظلمناش وتعمم

من ناحية تانية

انا بخش البيت من بابه لا عمري اتكلمت كلمة مش مظبوطة مع بنت ولا كنت من الناس اللي بيقفوا في الكلية او يقعدوا في الكافيتريا مع بنت مثلا فعندي خبرة او اعرف بنات قبل كده علشان اختار منهم طيب قولي بقى اقف في الشارع ولا اجيبها ازي

حاجة تانية

انا للعلم وربنا عارف اني اتجنب اني اروح للبنت واني بقيت احاول اعرف من بعيد الأول لكن الناس تقولك لأ لازم ييجي وهي كمان تشوفه ومفيهاش حاجة دي قسمة ونصيب

وموضوع مشاعر البنت دي طيب ما في ناس بترفضني علشان مسافر بره ولا انا حجر يا اخي مليش مشاعر برضه

وبعدين ان اذا كنت اعرف البنت قبل ما اروح يبقى عندك حق وده ظلم لكن اما بخش بيت معرفش عنه حاجة يبقى من حقي طالما استئذنت وقالوا لي اتفضل عموما

رأيك ده انات بحترمه بس انا رأيي ان ده نتيجة الاعلام اللي صور الناس اللي معاهم فلوس عن طريق العمل في الخارج بيحسبوها بالفلوس

صدقني مرت عليا لحظات فركت فيها اني مستعد للتخلي عن كل شيء في مقابل اني اجد انسانة ارتبط بيها واحس انها مقتنعة بيا وبس

بس هنقول ايه

ياعم هقولك على تجربة واحد صاحبي ضابط مش شرطة

ده بقى يمكن خطب 15 مرة

وفي كل مرة يطلعلوا حاجة

واحدة واخداه تفرج عليه صاحبتها

والتانية مش عارف عايزة تاخد راحتها ويكون لها صداقات بلا حدود او قيود وشايفة ان ده عادي وهو من النوع اللي دمه حامي وهكذا

والراجل علشان في البحرية مش قاعد في البلد على طول برده

ولاقى فشل وراء فشل لغاية لما ربنا كرمه

واحد صاحبي تاني خطب بنت واتجوزوا وبعد شهر اتطلقوا والموضوع كان فلوس تقريبا وعلى فكرة من النوع الغلبان جدا وميقدرش يتكلم

يا اخي اخويا اهل البنت رفضوه ورجعو الشبكة وقالوا بالنص مجبلهاش موبايل

مش قالوا بيشرب سجاير ولا اخلاقه وحشة ولا سمعتكم مش ولا بد قولي تفسرها بايه

يا اخي هل يمكنك ان تخبرني ما هي المواصفات الجيدة لعريس

العالم اصبح يقيس بالمادة وبالذات في مصر لظروف الحياة وانت قلت من حقهم يطمنوا على بنتهم

بس هو الفلوس اللي هتحميها لو حب يقرفها ولا الاخلاق والشخصية

ايه معنى ان اهل البنت من اولها يشترطوا فرح في الفندق الفلاني مثلا او شقة 4 غرف تمليك هي دي اللي هطمنهم على مستقبلها

عموما الحياة ليست اسود وابيض وانا مش قصدي كل الناس طماعين

وياريت تقولي ازاي الاقي بنت من واتعرف عليها وتعرفني من غير ما اخش البيت