عايز اتجوز....... عايزه عريس

[الباشمهندس ياسر]

وبصراحة شكلي داخل على دور اكتئاب

لأني زهقت

م الاخر

و من غير كتر حوارات

انت تطلع علي اكبر مساجد الجمعية الشرعية او انصار السنة او الجمعيات الدينية عموما

و تقابل واحد م المشايخ هناك و تقوله

انا فلان الفلاني و بروح اصلي ف الجامع الفلاني و يشهد بكده الشيخ فلان و الشيخ فلان

و بشتغل كذا و ظروفي كذا

و هيجوزوك و بناتهم زي القمر

و محدش هيحكي معاك ف ولا حاجة ولا كام مليون مهر و لا كام الف شبكة و لا الحوارات دي اصلا

يادوب مكان يلمكم و يطمنوا انك طيب و سمعتك كويسه و خلاص

و وليمة ف الجامع و نكتب الكتاب و نعلي الحواب و حبايب علي كده

فكر ف الموضوع

[myusername]

ايوة اللى شغالين فى الخليج مشافوش دنيا... و مشافوش حاجة - الا اللى راح اوروبا او امريكا.

كفاية الذل اللى المصريين شايفينه فى الخليج... مفيش مقارنة بين اللى شغال فى اوروبا و اللى شغال فى الخليج!!!

يا عم انا لسه راجع من اسبانيا و فرنسا... و كاره مصر(تعبير مجازى, لكن مصر هى امى) و العيشة و اللى عايشينها... و بندم انى مقعدتش فى اوروبا.

مهما كانت الحياة فى الخليج... الحياة فى اوروبا حاجة تانية خالص, كفاية بس انك تشوف ناس بتضحك فى وشك طول الوقت

[justme]

ياعم طيب ما انا رحت اوروبا ياسيدي اللي انت شايفها قدوة دي

رحت ياسيدي السويد والنمسا

يعني مش فترة طويلة

بس شفتهم كويس وعندي فكرة عنهم

ده غير ان باشتغل من سنتين مع جماعة استراليين واشتغلت مع المان

ولفيت الخليج ماعدا الكويت

ورحت الأردن واعرف ناس هنا زي واحسن كمان وعمرهم مفكروا في الهجرة

واللي بتحكي عنه ده مجرد الصورة العامة

وبعدين الذل اللي بتحكي عنه ده ممكن في حالات معينة

لكن مش الكل وفيه اخو افاضل يقدروا يحكوا عن تجربتهم

بالعكس انا هنا الناس بتعاملني باحترام جدا وكمان في دول تانية خليجية بتطلبني بالاسم الحمد لله

موضوع الذل اللي بتحكي عنه يمكن في القطاع الخاص وممكن في دول بعينها

عموما في اوروبا البشاير بدأت بحظر المأذن والرسوم المسيئة يكفي ان انا هنا بخش المسجد مش خايف

وبعدين ممكن تسأل اي حد عايش في اوروبا بينزل ليه ويسيبها ام العيال تكبر

[myusername]

اولا انا مش شايف ان اوروبا قدوة بالمعنى اللى انتا فامهه... لكن ليه مناخدش منهم التقدم؟ ولا احنا فالحين ناخد منهم مهرجان كان و قله الادب؟؟؟

ده كفاية بس نظام الكفيل... ده أكبر نظام استعباد و اكبر ذل فى حد ذاته..

كفاية ان فيه ناس كتير مبتقدرش تخرج الا باذن الكفيل.. بعد ما ينعم عليهم و يديهم الباسبور... و فيه برضه اخوة افاضل كتير هنا اتكلموا عن الموضوع ده.

عموما يا عم.. انتا شفت دنيا, انا غلطان.. بس انا بتكلم عن الواقع, ان الحياة فى اوروبا حاجة و الخليج حاجة تانية

و الشباب بيبقوا راجعين من الخليج كارهين نفسهم و عايزين يمشوا منه فى اقرب وقت.. لولا احوال مصر.

[myusername]

الشباب اللي راجع م الخليج ده اكبر اشتغالة

فعلا و الله

بيشتغلوا الناس ف مصر

و محسسينهم انهم ياما هنا ياما هناك

و الحقيقة ان معظم الشباب غلابة و بيتكلموا ف ارقام تافهم متستاهلش اساسا

و طالع عينيهم و مرتبات ضايعة

ما انا متهيقلى كده برضه

بس تلاقيهم راجعين و فخورين قوى بموضوع الخليج ده.

[justme]

هو انا مش عارف انت زعلان من رأيي على طول ليه

يا عم لا غلطان ولا حاجة

انا يمكن واخد فكرة غلط عن الجواز ماشي بس قولي ليه بقى عندنا نسب عنوسة عاليه

ليه فيه شباب بتعدي 30 سنة من غير جواز

بس احنا كبشر واخدين ان الحسنة تخص والسيئة تعم

لما يكون في دول معينة بعض الناس عندهم تجربة سيئة بنقول البلد كلها خربانة ووحشة مع ان معظم اللي في مصر حتى الدكاترة بيروحوا الخليج بس بعدين يبدأوا يفكروا في الهجرة لكن قبل كده ما اعتقدتش

وبعدين محدش بيغصب حد يشتغل في الخليج ياعم اللي عايز يروح اوروبا وامريكا يروح

وانا سألتك سؤال في اخر المداخلة ليه الناس بتسيب بره وترجع مصر لما اولادهم يكبروا وده في الغالبية

لأن الحرية ممكن تكون في بعض الأحيان مش مناسبة

على سبيل المثال فيث اوروبا دي لو ضربت ابنك (مع تحفظي على اسلوب التربية ده)* ممكن يجيبلك الشرطه

واذا واحد لقى ابنه او بنته مع واحد او واحدة وكان معديين 16 سنة ميقدرش يعملوا حاجة

وبعدين يا عم اللي عايز يهاجر محدش بيمنعه وممكن اشجعه بس عليه تحمل هذا القرار

انا لست مع الخليج او ضده ولكن الحق بيقول ان مش كل صوابعك زي بعضها

يعني اسأل التجارب والخبرات السيئة فين وهما هيقولولك انها في القطاع الخاص تحديدا

ده مش معناه ان الصورة وردية بس برضه مش سوده

وبعدين مين قال اني فخور قوي بموضوع العمل هنا يكفي اني بعيد عن اهلي والوضع مش هايختلف اذا رحت اوروبا او امريكا

وعموما فيه ناس هنا في الخليج بتاحخد ارقام خيالية مش ممكن هياخدوها في اي مكان تاني ومش بتكلم عن 5 و10 الاف في الشهر لأ في ناس بتاخد 15 و كمان 20 الف واعرف كمان ناس بتاخد اكتر من كده

قوللي بقى على وظيفة في مصر تاخد فيه الرقم ده وفي اوروبا من غير رخصة اللي بتدفع فيها مبلغ محترم وكمان الخبرة مش هتعمل حاجة

تم تعديل 14 ديسمبر 2009 بواسطة justme

[myusername]

السلام عليكم,

انا هرد مجازا على موضوع الشغل فى اوروبا - بس مش عايز اخرج عن موضوع الجواز.

الشغل فى اوروبا احسن بكتير.. و طبعا بياخدو فلوس اكتر بمراحل من الخليج - مفيش مقارنة.

و انا مش فاهم حكاية "انتا بتدفع مبلغ محترم".. يعنى ايه؟ لو قصدك عالتأشيرة.. التأشيرة ب480 جنيه بس.. بس اللى يعرف ياخدها.

متوسط الاجور.. لو بتشتغل بشكل غير شرعى, هتاخد فى حدود 1000 يورو فى الشهر.. بتصرف منهم 300 يورو بالكتير ده لو انتا مبزر.

لو شغال بشكل شرعى.. على حسب المهنة.. بس بتتراوح من 23 الف يورو الى 40 الف يورو فى السنة.. على حسب الشغلانة.

تم تعديل 14 ديسمبر 2009 بواسطة myusername

[justme]

انا قصدت مبلغ محترم في رخصة مزاولة المهنة من اول المعدلة والاختبارات

بالنسبة للرقم اللي انت قلته انا اعرف ناس كتير بتاخد اكتر من كده ومتنساش الضرايب

مستني رأيك في باقي الكلام وفي اللي حصل في قصة اخويا ده تسميه ايه

[الباشمهندس ياسر]

اخواني الافاضل

مرحبا بكم دائما و ابدا

لطفا لطفا

هل نحاول ان نحافظ علي عدم تغيير مجري الموضوع

شاكرين لكم حسن تعاونكم

صاحب الموضوع

[otaka]

الاخوه الاعزاء

تعقيب بسيط على الناس اللى بتقارن اوربا بالخليج

للاسف مفيش مقارنه و بقول للاسف لان الخليج عزيزعلي امثالى من العروبيين

و لكن نحن نفتقر للاحترام و اصبح موضوع معاك قرش تساوى قرش هو القيمه السائده فى مجتمعنا

يعنى انا شخصيا لما بروح دوله عربيه و بشوف الناس بتفكر ازاى بيحصلى صدمه

انا عندى هاتف نقال موديل نوكيا ١١٠٠ اعتقد انه ابسط موديل كل زمايلى فى الشغل هنا هيموتوا عليه لان البطاريه بتستمر لمده اربع ايام و انا سعيد بيه بشده

لكن فى مصر بسمع تعلقيات غريبه ايه اللى انت شايله ده طبعا مش من كل الناس يعنى لان معظم اصدقائى مبيفكروش فى المظاهر بس الواحد بيتعرض للموضوع ده و بيكون حزين

يعنى اقوال من نوعيه فى واحد فى مركزك يشيل موبايل زى ده

طيب يا و لاد الحلال لما انتوا عارفين مركزى بتبصوا على موبايلى ليه

انا عندى سياره موديل ١٩٧٠ فى عيلتنا من يوم ما طلعت على وش الدنيا تحفه معماريه و انا مش بحب السيارات الجديده الناس بقى معقوله فى حد يركب عربيه اكبر منه فى السن طبعا بمنتهى الادب بقول طالما بتادى الغرض منها خلاص انا مش مهتم

بس الواضح ان انا النوع بتاعى انتهى و الثقافه الاستهلاكيه طغت

العرب بيشتروا قيمتهم بالتملك لان للاسف واضح انه مفيش اى شئ اخر ممكن نبقى فخورين بيه

[justme]

بجد يا اخ اوتاكا انت جيت على الجرح

يعني مثلا في موضوع زي الجواز تلاقي يقولك لازم الشقة تكون كذا احنا مش اي حد والناس هتقول علينا ايه زي موضوع العربية

وبالمناسبة هنا

الناس الاجانب اللي اعرفهم معظمهم شايل موبايل من ابو 50 ريال ليه

لأن هما ناس عمليين الو ايوه اقفل

مش عايز كاميرا ولا نت ولا دياولوه

بس اعمل انت كده هتلاقي التريقة محصلتش

عموما متحطش في بالك

المهم انك تكون مرتاح

[Princesse]

ايوة اللى شغالين فى الخليج مشافوش دنيا... و مشافوش حاجة - الا اللى راح اوروبا او امريكا.

كفاية الذل اللى المصريين شايفينه فى الخليج... مفيش مقارنة بين اللى شغال فى اوروبا و اللى شغال فى الخليج!!!

يا عم انا لسه راجع من اسبانيا و فرنسا... و كاره مصر(تعبير مجازى, لكن مصر هى امى) و العيشة و اللى عايشينها... و بندم انى مقعدتش فى اوروبا.

مهما كانت الحياة فى الخليج... الحياة فى اوروبا حاجة تانية خالص, كفاية بس انك تشوف ناس بتضحك فى وشك طول الوقت

استاذي العزيز

حضرتك رحت البلادي دي في زيارة سياحة و مكنش عندك الفرصة انك تعاشر اهل البلد دول لمدة طويلة و علشان كدة حضرتك راجع منبهر بكل شئ شوفته. و الانبهار دا اول حاجة بتحصل لينا لما نزور اوروبا بس لما بنقعد و نعيش فيها نظرتها بتتغير و بنعرف اننا كنا عايشين في وهم كبير.

استاذي انا كنت اكتر واحدة مبهورة بفرنسا، نظرا لطبيعة دراستي، كنت فرنسا دي بالنسبة لى الجنة، هي الحرية و المساواه و العلم و التسامحز انا عمري ما سافرت فرنسا بس اتعاملت مع فرنسيين كتيييييير في شغل و صدقني دا اكتر شعب عنصري ممكن تجده على سطح الكرة الارضية (اكيد في قلة كويسين ) بس الاغلب عنصريين،

انا لو عرضوا عليا اعيش في فرنسا هرفض بشدة لانهم هيعاملوني كمواطنة درجة عاشرة علشان مسلمة و علشان عربية . الضحكة الي في وشك ديدا بس لانك زائر اما لو هتعيش ما بينهم و هتأكل من لقمة عيشهم الوجه التاني بيظهر على طول

انا هنا بكلم فرنسا (بالخصوص)

[Princesse]

انا في المداخلة ضربت عدة امثلة وعلشان مكررهاش ارجعي حضرتك واحسبي الحسبة لأي شقة تمليك شايفة سعرها رخيص هتلاقي حتى الوظائف المحترمة ممكن متعرفش تجيب شقة

وبعدين الحسبة على اساس يتشاركوا

يعني لازم ضعف الوقت لو لوحده

ده غير ان انتي ممكن تكوني متفهمة فده شيء جيد لكن في حالات الاهل مبيوفقوش من غير شقة تمليك يعني لازم تكون عنده مش هيقدر يقول انا والبنت نشترك

كمان فيه حاجة كل اللي حضرتك ذكرتيه نظريا حلو بس كل ده في القاهرة ومش كل الناس بتوافق عليه

انا ضربت مثال واحد بس في الزقازيق اللي هي مش اسكندرية ولا القاهرة

المشاريع اللي بتتكلمي عليها موجودة لكن للاسف مش الكل يقدر ياخد فيها ياما لشروطها او لقلتها وانها محتاجة واسطة

وقليل اللي بتظبط معاه

يعني الغلبان ميقدرش يجيب شضشقة تمليك بسهولة

دي نقطة

النقطة التانية

الشخص المناسب

طبعا مش كل الناس زي بعضها

الواحد ليبحث عن الشخص المناسب لابد له من السعي

وكمان التوفيق بيبقى من عند ربنا

يعني انا سعيت باللي قدرت عليه لكني في المرات الماضيةكانت المشكلة في الغالب مع اهل البنت والطمع

ومش معايا بس لأ مع اخويا كمان

انا ندمت اني محاولتش ارتبط قبل ما اسافر

بس انا سافرت 22 سنة تقريبا ومكنتش وقتها مستعد الا اما اقدر افتح بيت علشان الحكاوي دي كلها مع العلم ان ابويا كان مديني شقتين في البيت مش شقة

بس انا شم من النوع اللي يعتمد على حد الا اذا كنت مضر

وقصدي هنا في الجوانب دي لأن في رأيي استنفاذ كل الفرص واجب

وبعدين ربنا يسرها معايا وقلت دور بقى جه الوقت

وكانت الصدمة

وانا اعرف على الاقل عدة اشخاص في محيطي عندهم تجارب شخصية وكمان معايا هنا في الغربة

انا فكرت ارجع مصر علشان اشيل لقب مغترب يمكن النظرة تتغير

صدقيني شعور صعب الاحساس بالوحدة واقصد هنا ان الواحد حاسس انه وحده في هذه الدنيا

لكن الاصعب ان الواحد يخش مواضيع بحسن نية ويطلع بيتضحك عليه لأنه يقدر ماديا

بمعنى تاني فرصة عريس لقطة يبقى نطلب بقى

والمشكلة اني عمري ما بقعد احسبها ماديا لكن اللي حواليا بعد فشل التجربة بيقولوا انت غلطان انك عملتلهم اللي عايزينه واتسرعت

هل الذنب هنا اني لم اعير المادة اهتماما فاصبحت واجب انتزاعها

بمعنى تاني

علشان انت بره تبقى ثري عربي

يبقى عايزين شبكة بعشرين او 30 الف

ومؤخر خمسين الف على الأقل

وشقة 5 غرف

وفرح محترم

المهم في الأخر بلاقي نفسي في صفقة

طب لو مش الناس دي مش مادية مش يقولوا مثلا في حدود المعقول

ده الحسبة اللي فوق دي تعدي ال 100000

طب ليه

عموما احكيلكوا على قصة انا اتعرضتلها

في ذات مرة برضه من بتوع الجواز دول رحنا نشوف بنت وكنت ساعتها مع صديقة لوالدتي

المهم هي كانت لا تعرف البنت ولكن صديقة لها اتصلت بالبنت وقالت نتعرف في احد النوادي

المهم اتأخرت عن الميعاد بساعتين

قولت عادي

المهم جت وقعدت شوية وقامت وبعدين لقيتها وافقفة تتكلم مع شوية شباب

المهم

الست اللي معايا قالت لأ انا زي والدتك

فبعد ما مشينا اتصلت الوسيطة بصديقة الوالدة لتخبرها الرد

فقيل لي انها قالت للست الوسيطة بالحرف الواحد

لو معجبنيش هحب واحد عليه

طيب لما البنت بيكون رأيها كده بتوافق ليه

اكيد في اسباب اخرى

اتركها لكم للتفسير

اه بالمناسبة انا لسه عندي قصتين كمان

وواحدة فيهم لصديق اردني تعرض لموقف الطمع ده برضه

هحكيها بعدين

واكيد فيه بنات محترمة ومش هانكر الكلام ده

بس والنبي حد يقولي اعمل ايه بس مش على طريقة الصدفة لأني بقالي 5 سنين ومشفتش صدف ولا حاجة

وبصراحة شكلي داخل على دور اكتئاب

لأني زهقت

استاذي justme

كلام الي طالع من القلب بيلمس القلب. و علشان كدة انا كمان هكلم من القلب

يمكن الموضوع شخصي جداا، بس احنا هنا كلنا اخوات ومحدش فينا يعرف حد و علشان كدة هكلم بصراحة

احمد ربنا انك ولد، لان الولد في مجتمعنا هو الي في يده القرار ، انت الي تحدد تجوز امتى ، او تستنى لامتي، مفيش عداد بيعد عليك، حتى لو سنك 60 سنة ممكن تجوز و يكون عندك اولاد. البنت موقفها اصعب، القرار مش يأيدها و لا هتقدر تسعي زيك ، و بعد سن ال 30 الكل بيزهد فيها.

يمكن كان غلطتي في الجامعة اني كنت من البيت لمدرج الكلية و من المدرج للبيت، الدراسة كان مستحوزة على كل تفكيري،

اصحابي البنات الي كانوا بيصاحبوا ايام الكلية و كلهم اتجوزوا دلوقتي و عندهم اولاد. ساعات بسال نفسي مين الي كان صح همة ولا انا؟

بعد الجامعة اشتغلت بس برضه كنت لما اروح الشغل كل الي كنت بفكر فيه هو الشغل، انا جاية اشتغل مش ادور على عريس، الحمدلله كنت موفقة جدا في شغلى و مرتبي زاد ، زمايلي الولاد في الشغل بقوا اخواتي، كتير منهم يجي و يشكي مشاكله العاطفية و الاسرية و ساعات كتير بكون حمامة السلام بينهم و بين خطيباتهم

كل ما السنين بتمر المجال بيكون ضيق

و كل ما الواحدة بتترقي في الشغل و المرتب يزيد كل ما الفرص بتقل لان في رجالة كتير ميحبوش يجوزوا واحدة اعلى منهم في المرتب او المنصب

ساعات كتير بقول لنفسي انا لو كنت بروح الشغل و اعمل زي البنات التانية الي بتشتغل علشان الجواز مش يمكن كان الوضع اتغير؟

مرة حصل لي موقف غريب بسبب جواز الصالونات دا، الوسيطة بعد ما عرفت السي في بتاعي ، اسمي و تعليمي ، وشغلي ,اهلي و شقتنا فين و ساكنين فين و ابويا و امي و اخويا بيشتغلوا فين ، و الشقة ايجار ولا تمليك ، رجعت لي الوسيطة برد العريس الي حتى لسة مشفنيش : العريس قال انك كتير عليه :lol: :blink:

عرفتوا ليه بقي الست امينة فرصها احسن ؟

ناس كتير تيجي تسالني هو انتي ليه مش مرتبطة لحد دلوقتي؟ اصل انتي مش ناقصك حاجة، همة الرجالة اتعموا؟

لأ اكيد انتي الي طالعة فيها ؟ هو لسة مفيش حاجة؟

الكلام دا يمكن تحسوا انه مدح بس هو بيقطع قلبي، ببقي عاوزة اقول ارحموني يرحمك الله دا مش ذنبي

بقيت اكره اروح الافراح او اظهر في المناسبات العامة علشان اهرب من الكلام دا

ساعات كتير بفكر لو فضلت كدة، بعد عمر طويل و بابا و ماما سابوني لوحدي و اخويا اتجوز انا هبقي لوحدي؟ انا بخاف انام لوحدي.

انا كنت معترضة على جواز الصالونات بس اضطريت اقبل بيه و شفت فيه مهازل و غرائب و طرائف ، و كمان معارف اسرتي مش كتير و كمان علشان ظروف شغلي ماما مش بتجرني معاها في كل مناسبة...و موضوع الخاطبة دا انا رفضاه لانها بتاخد فلوس و بيزنس و ان لا كرامتي و لا ثقافتي يسمحوا بذلك

انا فتحت قلبي علشان متحامل على البنات

حبيت اكون صوت الطرف لاخر

الطرف الاخر الي بيتألم في صمت و يمنعه الحياء من الكلام

سامحوني انا اتكلمت كتير

[justme]

انا اسف طبعا اذا كنت ظهرت في صورة تحامل على البنات ولكن ارجو منك قراءة مداخلاتي عن التجارب التي مررت بيها

وعلى فكرة تجربتك متفرقش كتير عن تجربتي هو الفرق اني بدور وانتي منتظر اللي بيدور

انا ايضا كنت ضحية النجاح اوعلى الاقل هذا ظني

وكنت نظام من الجامعة للبيت وكده

وكمان للاسف كنت جد في شغلي يعني مباتعملش مع اي بنت بمقياس بدور على عروسة علشان كده الحمد لله ربنا بعتلي حاجة مكنتش احلم بيها

مش عايز اقولك ان الشغل جاء لغاية عندي لا رحت ولا كنت بقرأ جرائد اساسا ولا الف على المكاتب

ولذلك قلت هذه فرصة يجب الاستفادة منها وقررت ان اتفرغ لفترة لبناء مستقبلي والحمد لله وصلت لسمعة طيبة كان نتيجتها زيادة في حجم العمل ولأن عملي به جوانب انسانية لم استطع الرفض واستمرت دوامة العمل في طريقها

المهم وقفت لأجد ان سنوات مرت من عمري ولم اجد من يشاركني النجاح او الفشل او السعادة والحزن

لأن الانسان لكي تكتمل فرحته بنجاحه لأبد ان يجد من يفرحون معه او يفرحهم بما صنع او من يشارك همومه وشجونه ولذلك

بدأت البحث بصورة بسيطة لن انكر اني كان لي احلام عن الفتاة التي ارتبط بها

لكنها بدأت تتكسر على صخور الواقع

فانا لا نكر اني ابحث عن الصورة التقليدية للفتاة الجميلة وانما عقل وروح احس معه بالألفة قد لا تكون في نفس المستوى الفكري بمعنى اعلى او اقل لكنها قريبة

ولكنني فشلت وكانت النتيجة ان بسبب خلاف بسيط فوجئت بأن الناس تؤدبني بالماديات

قد اكون اخطأت في اختياري ولكن العقاب لم يكن بالنسبة لي خسارة مادية ولكنه كان صدمة في ادراكي للواقع

ان العالم تحكمه المادة قبل كل شيء

قررت تجاهل التجربة والبحث عن بداية جديدة

وعدت إلى خانة الأمل وبدأ سقف الأحلام يقل وينهار فوق رأسي

فعلي ان اكون واقعيا اكثر

سأكتفي ببعض احلامي

وصدمة احرى

ثم ثالثة

ووصلت إلى القاع او حافة الهاوية

فالمنطق يقول ان عيوبي قليلة بحسب ادراكي

وتعجب من حولي فانا لست دميما ولن اقول وسيما

وليس عندي مايمنع بل لدي ما يتخطى المقاييس العادية على الاقل بالمقاييس الواقعية

لست مغرورا في كلامي

ولكن هذا قاله من حولي

فانا الأن وحيدا يعتصرني الألم

هل سأعيش وحدي

فليس للنجاح معنى اذن

عموما

لا اعترض على قدري ولكن كلي امل

وقد قررت الا اتنازل عن حلمي

فالأمل في الله اكبر من اي الم

[president]

ممكن أقول رأى بس ماحدش يزعل . وهتكلم من وجهة النظر الرجاليه بحكم جنسى واصحابى .

عادة مافيش أى بنى ادم فينا بيحب الفشل فشل في حياته فشل في عمله فما بالك لو واحد حس بفشل فيه هو كشخص وكيان .

الطبيعى مننا صعب يقبل حاجه زى كده . عشان كده لما بيحصل رفض لأى حد عادة بيحمل الشخص الأخر اسباب الرفض

وعادة يحطها تحت اطار الطمع ومره مفيش شخصيه ومره تافهه ومبررات كتير .

طيب تعالى ناخد مثال . انت شاب طموح ومستقبلك باهر ووسيم وفيك كل المميزات اللى تتمناها أى بنت .

وروحت زى الطاووس- ايوه زى الطاووس- اتقدمت لواحده يتمناه اى حد . واتسألت سؤال عندك شقه اه عندى شقه تمليك

وفى مكان راقى البنت ردت عليك بس انا عايزه فيلا مش شقه . خلاص الموضوع انتهى .

اولا انت كراجل دورت على واحده فيها المواصفات اللى انت عايزها حقك تماما . هيا كمان من حقها تختار شريك حياتها بمزاجها

يعيشها في شقه يعيشها في فيلا هيا حره . فين الطمع في ده ؟ مشكلة الراجل في موقف زى ده انه صعب يقبل حاجه زى دى

ويقول لنفسه دا انا في بنات كتير بيتمننونى ودى ترفضنى دا هيا اللى كذا وكذا وطبعا يحط اللوم على الطرف الأخر .

وناسى او تناسى ان البنات اللى اتمنوه هما أقل منه بس اللى عايزه هيا أعلى منه مش شرط أعلى منه ماديا . مثلا

واحده ربنا وهبها بجمال رائع ومن مستوى بسيط وعليها خطاب كتير تفتكر تختار مين أكيد هتختار افضلهم . يعنى زى مانت كويس في

اللى أحسن منك . مش عايز اكون قاسى على حد بس حق الرفض والقبول حق مكفول لأى حد ومش من حق الطرف المرفوض انه يتهم

الطرف الأخر عشان اترفض . طب مانت ممكن تشوف بنت وتقول مش عاجبانى حقك . ادى برده البنت حقها سواء مستواها عالى او

مستواها منخفض حقها انها تختار تسكن في قصر مش فيلا وانت كمان من حق ترفض او تقبل من غير تجنى عليها .لا هتفرق معاك ولا

هتفرق معاها لأن كل واحد مسئول عن حياته . جرب ياسيدى تتقدم لواحده أقل منك بمراحل أكيد هيقوللك يلا نكتب الكتاب بكره عشان انت

بقيت بالنسبه اقصى طموح .

هقولك حكايه واقعيه حصلت لأحد الأصدقاء. صديقى من عائله تشرف مستوى رائع وسيم جدا اتقدم لبنت من عائله عاديه وجمالها عادى

بس كانت عجباه .

طبعا المنطق بيقول انها هتموت من الفرح رفضته طب ليه ؟ كان هيتجنن ازاى يترفض وبعد شغل مخابرات عرف ان سبب الرفض

خلى بالك من سبب الرفض ( انه مش جسمه رياضى وقصير شويه ) . طبعا كان اول اتهام ليها ايه التفاهه دى وكلام من نوعية الحمد لله

ان الموضوع مكملش ايه الهبل في التفكير ده وشوفت بتبص على ايه . المهم بعد فورة الغليان وهدى شويه سألته ايه رايك في فلانه

كعروسه . قالى مش هتنفع سألته طب ليه ؟ قالى ان مواصفات البنت اللى عايزها كذا وكذا ومش هينفع اتنازل عن اى شرط . فقلتله وطب

وزعلت ليه من البنت اللى مالقتش فيك كل المواصفات اللى عايزها رفضتك.!!!

خلينا نفكر شويه من غير انفعال كتير من الشباب شايف نفسه لقطه ومحصلش - وخاصه لو معاه قرشين – فاكر ان المفروض ان البنات

تجرى وراه ماهو اكيد الكويس في الأحسن منه وزى مانت بتدور على الكويس في كل حاجه هيا كمان من حقها تدور على الكويس في كل

حاجه .

في الأول والأخر البنت من حقها تختار ويحترم رأيها تماما وهيا المسئوله عن اختيارتها .

هاقول قصه واقعيه تانيه ودى عن أختى . اتقدملها شاب محترم وممتاز بس كان مستواه اقل شويه واحنا ياسيدى والدى عنده قاعده وهيا انه

من حقه يتدخل في حياتنا الا في التعليم والجواز والشغل ولما كل واحد يتجوز هوا مسئول عن نفسه وبيته . عشان كده برغم انه كان

الشخص اللى متقدم أقل مننا . بس عرض الأمر على أختى ووافقت برغم انها رفضت الأحسن منه . هوا كان زميلها في الكليه يمكن

عشان كده وافقت مش مشكله وافقت ليه بس هيا اختارت ومرتاحه لأختيارها . والحمد لله مبسوطين وربنا يباركلهم .

عشان مطولش عليكم . زى مانت بتعجبك واحده من كل النواحى وبدور على الأحسن اكيد البنات برده بدور على المستوى والماده والوظيفه

ودا من حقها .

زى مافى واحدمن الأخوه الأفاضل كان بيتكلم وعشان منضحكش على بعض . التقارب في المستوى شئ مهم جدا

والشاذ عن الموضوع ده مش هوا الطبيعى مقبول ان الراجل يكون اعلى من البنت . بس البنت أعلى من الراجل مش في كل الحالات ده

يبقى الطبيعى .

تحياتى وربنا يوفق الجميع

[doha]

ردود كتير اوي قريتها خاصه من اخوانا الي قربوا يكتبوا خانة المهنة في البطاقه .. خاطب ..

بصراحه متزعلوش مني ياجماعه.. قصص كتير باظت ومكانش المفروض تبوظ .. وقصص تانيه شايفين ان اهل العروسه غلطانين مع ان للاسف الغلط عليكم انتم ياحلوين ..

مش هفتح في مواضيع عشان مقلبش عليكم المواجع اولا وعشان العايط في الفايت نقصان عقل . ثانيا ..

ولي عوده اكيد بس لما اروق كده اكتب لكم ردين تلاته فولسكابيين من الي معوداكم عليهم ..

=========

ملاحظة : برنسيس .. انتي الي صح وسيبك من كل صاحباتك الي تجوزوا بطرق ملتويه .. مش مهم انها تجوزت او جابت اولاد المهم هي سعيده ولا لاه والاهم هي راضيه ضميرها ولا لاه ..

موقفك صح واثبتي عليه ومطلبك عزيز وهو الزوج الصالح المتقي الي فيه كل الصفات الحلوة .. البنات كتير تفتكري هيختارك انتي ليه بالذات من دونهم الا لو كنتي عملتي شيء تستحقي عليه المكافأة .. صبرك ده ووقوفك على مبدأ انك متعمليش زي التانيين وتحاولي ( تصطادي ) عريس هو الي هيجيب لك باذن الله العريس المناسب وهو الي هيكون سبب في توفيق كبير مع زوج يستحقك .. وبكره هتفتكري كلامي ..

[justme]

انا على فكرة يظهر اني كنت فاهم غلط

البنات عمرها ما بتغلط ولا أهلها

وكمان الخطاب

يبقى مفيش مشاكل

على فكرة المجتمع المصري اصبح نسيجه مهترئ من ناحية القيم وبالذات الاجتماعية

واللي مش مقتنع يرد على الكام سؤال دول

لماذا ارتفعت نسبة العنوسة بين الشباب القادرين وكذلك البنات

لماذا ارتفعت نسب الطلاق بشكل واضح

لماذا انتشرت جرائم الاغتصاب

طيب عايزيكم تشوفوا القصدة دي والله حقيقية

اتنين زملاء في كلية من كليات القمة زي ما بيقولو بعد حب وخطوبة كادت ان تصبح زواجا

سابوا بعض ليه

لأن البنت عايرت الولد انها سابقاه في ترتيبه على الدفعة

مع العلم الاتنين معيدين في الكلية

نكمل الاسئلة

لماذا قال رسول الله النساء يكفرن العشير

يا معشر النساء تصدقن وأكثرن الاستغفار فإني رأيتكن أكثر أهل النار فقالت امرأة منهن جزلة ومالنا يا رسول الله أكثر أهل النار قال تكثرن اللعن وتكفرن العشير وما رأيت من ناقصات عقل ودين أغلب لذي لب منكن قالت يا رسول الله وما نقصان عقلنا وديننا، قال أما نقصان العقل فشهادة امرأتين تعدل شهادة رجل فهذا نقصان العقل وتمكث الليالي ما تصلي وتفطر في رمضان فهذا نقصان الدين.

البخاري (298، 1393)، مسلم (80) من حديث أبي سعيد الخدري. وهو من حديث ابن عمر عند مسلم (79)، وابن ماجه (4003)، وأحمد (2 /66). ومن حديث أبي هريرة عند الترمذي (2613).

طيب هل ده معناه ان النساء هما اللي غلط

لأ طبعا ده مش قصدي ولكن لا ألقي باللوم على طرف دون أخر

عموما

موضع كثرة الخطوبات دي

ليها شقين

الأول هوه انا غاوي بهدلة وخساير نفسية ووقتيه ومادية يعني انا عاجبني ان عمري يعدي كده وجزء من اصحابي خلفوا بدل الطفل اتنين

اكيد ده مش منطق

طيب كنت هلاقي بنت ومش عجباني واروح اكلف نفسي خطوبة وشبكة

طب وليه ايه اللي هاستفيدوا

ان مش من النوع اللي يستغل اي بنت حتى اذا كانت هي راضية بده

والدليل اني بدرو على خطوبة وجواز مش على علاقة ممكن تتطور او لأ

وكمان

فيه سؤال لمن قال اني الولد بيرفض مبدأ انه حد يرفضه

كلام لرسول واضح

اذا جائكم من ترضون دينه فزوجوه

الرسول مقالش فيلا ولا قصر وانما قال دينه ودي مش معناها بيصلي وبس

واذا معملناش فهو حذرنا من فتنة

ما يحدث في مجتمعنا الأن جزء منها

واخير لأني دائما اطيل عليكم

بس ده لأن الموضع اخطر من ان يترك بهذه الطريقة

انا في الأخر هقولكم حاجة واحدة

انا مأنكرتش خطئي لكني مصر على خطأ الأخرين ليس كلهم وانما جزء منهم

وعلى فكرة

انا قلت اني بحكي تجربتي اللي عيشتها وبعيشها يمكن حد يلاقي فيها حاجة تنفع

وكمان انا بحترم آرائكم

فالرجل اصبح دائما مظلوما لأنه رجل

ومن لم يعش التجربة فهو مستحيل مهما تفهم الأمر يدرك كل الجوانب

وانا مع الرأي ان مازال هناك شرفاء

وشباب يبحثون عن الستر

تحياتي لكل المشاركين

[president]

طيب كنت هلاقي بنت ومش عجباني واروح اكلف نفسي خطوبة وشبكة

طب وليه ايه اللي هاستفيدوا

ان مش من النوع اللي يستغل اي بنت حتى اذا كانت هي راضية بده

والدليل اني بدرو على خطوبة وجواز مش على علاقة ممكن تتطور او لأ

وكمان

فيه سؤال لمن قال اني الولد بيرفض مبدأ انه حد يرفضه

كلام لرسول واضح

اذا جائكم من ترضون دينه فزوجوه

الرسول مقالش فيلا ولا قصر وانما قال دينه ودي مش معناها بيصلي وبس

واذا معملناش فهو حذرنا من فتنة

ما يحدث في مجتمعنا الأن جزء منها

حاجه غريبه يعنى انت كاتب انها لازم تعجبك . ومشترط على البنت انها تبص على دينك بس والا ففتنه كبيره .

طيب ماحديث رسول الله بيقول برده :[ تخطب المرأة لأربع – لحسبها-- ونسبها – وجمالها – ودينها – فاظفر بذات الدين تربت يداك ].

روح دور على بنت لدينها بس وماتبصش لشكلها ولا تعليمها ولا عيلتها . تقدر تعمل ده ؟. اذا كنت انت بنفسك حاطط معيار انها تعجبك

ايه معيار الأعجاب ده ؟؟ توافق تجوز واحده متدينه وتعرف ربنا بس أميه وشكلها مش مقبول ؟

الست دى برده بنى ادم من حقه يختار زيك بالضبط .

تفتكر البنات لما بترفض حد بترفضه ليه غاويه تقعد جنب ابوها ؟ اللى بتتجوز بقى وهيا مش مقتنعه بالجوازه واسمها جوازه والسلام

هيا اللى بتتطلق بعد كده.

بالنسبه لموضوع ناقصات عقل ودين . هما فعلا ناقصات عقل طب مانخدهم على قد عقلهم .

يعنى قصة المعيدين اللى سابوا بعض كان الراجل خدها على قد عقلها الناقص قالها والله برافو عليكى انك سبقتينى وضحك عليها بكلمتين .

كلمة عقل ناقص ترديدها عمال على بطال بيخلى معناه سئ ومستفز . يعنى انت ممكن تتخيل ان والدتك عقلها ناقص .؟

ياسيدى الفاضل انا اب لبنت وهربى بنتى على ان لها رايها واختيارتها وعقلها مش هاربيها على انها ناقصة عقل .

تحياتى ليك وربنا يوفقك .

[طبيبة مصرية]

الاخت برنسيس

كلامك اثر فيا جدا وفكرنى بفترة انا شخصيا مريت بيها من قبلك من حوالى عشرسنوات..........

انا وصاحبتى الانتيم كنا زيك كده جد فى الكلية وجد فى سنة الامتياز وجد فى الشغل .........

ده طبعا ان بعض العرسان لما كان بيسمع كلمة دكتورة بيجيله ارتيكاريا ويقول مش لاعب tot:: ودى هتبقى طالعة فيها وكلام من ده كتير.........

بس صدقينى الايام اثبتت لى ان انا وصاحبتى اللى كنا صح وان ربنا عادل اكتر مما نتخيل.......

واحب ابشرك ان سواء انا او صاحبتى ربنا وفقنا فى زواجنا جدا وارتبطنا بمن هم احسن بكتير من كل صاحبتنا اللى سبقونا وانا هنا لا اقيس الامور بمعيار مادى ولكن باتكلم من كل الجوانب........

انا شخصيا الانسان اللى ارتبطت به كان العريس رقم 12 وهو رقم مش كبير بالنسبة للى باسمعه دلوقتى.........

المهم الحمد لله هو كان احسنهم وافضلهم من كافة الامور علما بان ال12 دول فى منهم انا رفضته وفى منهم هو رفضنى........

يعنى صدقينى ربنا هيوفقك وهيرزقك بالعريس اللى يتمناه عقلك وقلبك مع بعض tot:: ......

بس نصيحة ليكى حاولى تفكرى جديا فى موضوع الحجاب لانى كنت زيك كده وكنت مقتنعة انه فرض بس كنت مش عايزة البسه الا وانا مقتنعة تمام الاقتناع وقادرة فعلا على اتخاذ القرار والعزم فيه.........

وكنت بستنكر اوى البنات اللى فى الكلية اللى شهر يلبسوه وشهر يقلعوه او يلبسوه فى شهر رمضان بس!!!!!!!!

بس اغلبية الشباب الان عايزنها محجبة قبل اى شرط تانى لان ده من وجهة نظرهم بيبقى مؤشر عندهم عن حاجات كتير فى شخصية البنت............ وانا مريت بالموقف ده مع اخويا وهو بيدور على بنت الحلال وكان بيرفض اصلا انه يشوف بنت مش محجبة مهما كانت مميزاتها ومهما احاول اتناقش معاه ان ده مش اساس واننا بنشوف فى الشارع محجبات مهزلة وان المهم الجوهر وليس المظهر وعقل البنت وطريقة تفكيرها ولكن لا حياة لمن تنادى وكانت ابسط ردوده للدرجة دى العناد فى شخصيتها وعناد مع مين مع ربنا!!!!!!!!! ويبدو ان قطعة الايشارب الصغيرة دى ليها مفعول السحر معاهم...........

ملحوظة صغيرة

الانسان اللى ارتبطت به ماكنش من ضمن شروطه خاااااااااااااالص الحجاب وحتى كان لا يفضله يعنى كان يفضل الغير محجبة!!!!!!!!

بس انا كنت وقتها خلاص اتحجبت وحجابى ده كان له قصة انا بعتبرها طريفة لما بفتكر اللى حصل ............

المهم رغم كده بانصحك بالحجاب لان يا عزيزتى الزمن غير الزمن والشباب دلوقتى تفكيره اتغير ويمكن اللى بيشوفوه على الفضائيات والنت معقدهم ومخوفهم وعلشان كده بيشترطوا الحجاب قبل اى شىء.............

علشان كده يا اختى الصغيرة اسمحيلى اقولك كده لا تضيعى فرصك ولا تقللى منها فهذا الموضوع اصبح امر واقع ولن تستطيعى تغييره فى عقول اغلب الشباب .........

[justme]

طيب موضوع مش عاجباني هعلق عليه لأني مش عارف انا الهجوم على كلامي وتفسيره اصبح واضح

مش عارف لأني حكيت اكتر من تجربة ممكن بس خليني اديك اكتر من مثال

واحد تروح مثلا تلاقيها بتكلمك وهي حاطة رجل على رجل في وش اهلها وبتتعامل معاك من طرف مناخيرها وانا اكره في حياتي المتكبرين

واحد ولا اقصد ان اعيب في الناس لكن لما تجد فتاة تلبس ملابس فاضحة وعلشان اديك فكرة كويس يعني حاجة كده شبه بتوع شارع الهرم

لما واحدة بعد السلام عليكم تلاقي الناس بتتكلم معاك تقولك اسئلة من نوع هو انت بتاخد كام هوه الريال بكام النهاردة وبقالك كام سنة وحاجات اكتر من كده كأنك بتعمل انترفيو لواحد عايز يشتغل

لما تلاقي واحدة بتقلك انا شرطي ما اسافرش بره اساسا طيب هتجوز وهي في مصر ونعيش حياتنا على الفيس بوك مثلا

اه ومنكرش موضوع الشكل ده لأن في حاجة اسمها قبول

وللعلم انا اترفضت مرة لأني كنت طويل بالنسبة للبنت يعني كان في فرق 40 سم تقريبا مع العلم ان اختها متزوجة لشخص يقارب طولي تقريبا وهي نفس طول اختها

لما اترفض علشان انا بشتغل بره من قبل اساسا من ناس ما اعرفهاش ولا يعرفوني مجرد عرفوا انه بيشتغل بره بس

لما اترفض علشان انا مدرس اه انا مدرس مش بالمعنى التقليد ومش هقعد اقول انا بشتغل ايه علشان اقول انا احسن من المدرس لأن المدرس مهنة مش شايفها فيها مشكلة بس لأ البنت عايزة مهندس او ظابط او دكتور لدرجة ان اترفضت عدة مرات علشان موضوع مدرس ده فاهلي اقترحوا عليا اني في الأول اقول مهندس شبكات لأن ده جزء منش غلي وطبعا انا رفضت لأني باعتز بشغلي جدا

لما البنت ترفضك علشان مؤهلك يعني يقولوا ازاي دكتورة تتجوزغير دكتور وبرضه من غير ما يعرفوني اساسا علشان محدش يقولي معجبتش البنت

لما واحدة بتتكلم معاها واهلها يقولك قبل كل حاجة هاتلي شقة في القاهرة ولو مقفولة بس علشان اضمن للبنت ان عندها مكان قريب مع العلم اني اقرب لرمسيس منه بفرق ساعة تقريبا

انا اعرف عائلة عندهم بنت اتفسخت خطوبتها لأن العريس رفض يعمل الفرح في القاهرة على ما اذكر مع انهم الاتنين من سكان احد المراكز مش حتى مدينة قرب الاسماعيلية

يا اعزائي اكرر ليس كل الناس سيئين وليسوا ملائكة

بس شوفوا هقلكم على حاجة

انا وجهت مجموعة اسئلة في مداخلتي السابقة الارقام تتحدث فيها يا ريت اللي يقرأ كلامي يقولي رده عليها كلها ولا ينتقي منها حاجة ولا اتنين

في الاخر كل واحد حر في رفضه او قبوله ليا لكن طالما لديهم هذه الحرية فلماذا تعرتضوا علي فيها

موضوع عقل ناقص ويكفرن العشير ده كلام النبي

يعني مش كلامي

بس علشان ما اخدوش بره معناه هقول حاجة واحدة

البنت يكون لها رأيها على عيني وراسي بالعكس انا مع البنت اللي تكون تستطيع اتخاذ قرار بس ما مدى صحة هذا التفكير ده سؤال بطرحه على الطرفين

وبكرر لماذا ارتفعت نسب العنوسة

لماذا ارتفعت جرائم الاغتصاب والتحرش

ببساطة لقلة الزواج

متقليش اللي بيغتصب واحد غالبيتهم متزوجين بس هما بيعملوا كده لخلل عقلي مثلا

لما البنت تمشي في الشارع مش محجبة لييه علشان الاولاد يبصوا عليها ومحدش يقولي والنبي اصل دي براحتها

لو ان اي شخص اخوه او اخته قال انا مش هصلي لأني مش مقتنع

او بلاش دي قال انا مش هطلع زكاة ايه النظرة

لكن البنت تقول مش مقتنعة بالحجاب وده امر اجباري مش اختياري فالحالات دي قريبة من

وللعلم انا لم اشترط الحجاب علشان محدش يقول ده متشدد بس انا مش مستعد اخد واحدة الناس شايفة كل جسمها ونقول كل واحد براحته

طيب خدوا ديه الجماعة اللي بيشتغلوا في دول الخليج في اماكن عامه ممكن يفكر يلبس فانلة حمالات وكمان شورت ويروح الشغل اكيد نظرة الناس ليه هتبقى حاجة تانية

مع انه لم يكشف عورته

طب اشمعنى البنت تعمل كده ومحدش يكلمني على انها حرية شخصية لأن في ضوابط تحكم المجتمع

وبالمناسبة قبل 100 سنة نقاشنا ده مش هيكون موجود اساسا يعني مكناش هنحتاج نتكلم وكمان مكنش فيه المشاكل اللي المجتمع عايم فيها