عايز اتجوز....... عايزه عريس

[Princesse]

الاخت برنسيس

كلامك اثر فيا جدا وفكرنى بفترة انا شخصيا مريت بيها من قبلك من حوالى عشرسنوات..........

انا وصاحبتى الانتيم كنا زيك كده جد فى الكلية وجد فى سنة الامتياز وجد فى الشغل .........

ده طبعا ان بعض العرسان لما كان بيسمع كلمة دكتورة بيجيله ارتيكاريا ويقول مش لاعب tot:: ودى هتبقى طالعة فيها وكلام من ده كتير.........

بس صدقينى الايام اثبتت لى ان انا وصاحبتى اللى كنا صح وان ربنا عادل اكتر مما نتخيل.......

واحب ابشرك ان سواء انا او صاحبتى ربنا وفقنا فى زواجنا جدا وارتبطنا بمن هم احسن بكتير من كل صاحبتنا اللى سبقونا وانا هنا لا اقيس الامور بمعيار مادى ولكن باتكلم من كل الجوانب........

انا شخصيا الانسان اللى ارتبطت به كان العريس رقم 12 وهو رقم مش كبير بالنسبة للى باسمعه دلوقتى.........

المهم الحمد لله هو كان احسنهم وافضلهم من كافة الامور علما بان ال12 دول فى منهم انا رفضته وفى منهم هو رفضنى........

يعنى صدقينى ربنا هيوفقك وهيرزقك بالعريس اللى يتمناه عقلك وقلبك مع بعض tot:: ......

بس نصيحة ليكى حاولى تفكرى جديا فى موضوع الحجاب لانى كنت زيك كده وكنت مقتنعة انه فرض بس كنت مش عايزة البسه الا وانا مقتنعة تمام الاقتناع وقادرة فعلا على اتخاذ القرار والعزم فيه.........

وكنت بستنكر اوى البنات اللى فى الكلية اللى شهر يلبسوه وشهر يقلعوه او يلبسوه فى شهر رمضان بس!!!!!!!!

بس اغلبية الشباب الان عايزنها محجبة قبل اى شرط تانى لان ده من وجهة نظرهم بيبقى مؤشر عندهم عن حاجات كتير فى شخصية البنت............ وانا مريت بالموقف ده مع اخويا وهو بيدور على بنت الحلال وكان بيرفض اصلا انه يشوف بنت مش محجبة مهما كانت مميزاتها ومهما احاول اتناقش معاه ان ده مش اساس واننا بنشوف فى الشارع محجبات مهزلة وان المهم الجوهر وليس المظهر وعقل البنت وطريقة تفكيرها ولكن لا حياة لمن تنادى وكانت ابسط ردوده للدرجة دى العناد فى شخصيتها وعناد مع مين مع ربنا!!!!!!!!! ويبدو ان قطعة الايشارب الصغيرة دى ليها مفعول السحر معاهم...........

ملحوظة صغيرة

الانسان اللى ارتبطت به ماكنش من ضمن شروطه خاااااااااااااالص الحجاب وحتى كان لا يفضله يعنى كان يفضل الغير محجبة!!!!!!!!

بس انا كنت وقتها خلاص اتحجبت وحجابى ده كان له قصة انا بعتبرها طريفة لما بفتكر اللى حصل ............

المهم رغم كده بانصحك بالحجاب لان يا عزيزتى الزمن غير الزمن والشباب دلوقتى تفكيره اتغير ويمكن اللى بيشوفوه على الفضائيات والنت معقدهم ومخوفهم وعلشان كده بيشترطوا الحجاب قبل اى شىء.............

علشان كده يا اختى الصغيرة اسمحيلى اقولك كده لا تضيعى فرصك ولا تقللى منها فهذا الموضوع اصبح امر واقع ولن تستطيعى تغييره فى عقول اغلب الشباب .........

اشكر حضرتك يا دكتورة على ردك ، اول مرة احس ان حد فاهمني، لما بكلم مع ماما في الموضوع دا ديما تقولي :" انتي مش لاقية نكد و بضوري عليه " و يتقلب الموضع بخناقة . علشان كدة بطلت اكلم

اتفق معاكي تماما ان الحجاب بقي له مفعول السحر ، 90% من الاولاد يبحثون عن المحجبات

انا مش عاوزة اتحجب علشان ارضي واحد جاي يتقدم ليا، انا عاوزة ارضي رب العالمين. لو اتحجبت علشان ارضيه، اكيد هو هيكون مبسوط، بس انا بيني و بين نفسي هكون منافقة و بضحك على ربنا.. انا مش بعرف اضحك على ربنا.

سيدتي الحمدلله انا ابنة بارة بوالدي، و بأهلي، و الي بيطلب مني مساعدة بساعده من غير تفكير، كان لي انشطة خيرية مع جمعيات خيرية للمساعدة المعاقين و الايتام

اعرف حق الفقراء في مالي، و اتقي الله في كل ما افعله

كل دا بيضيع في الهواء لاني غير محجبة، ولذلك اري ان الانسان الذي يهتم بالمظهر دون الجوهر انسان سطحي.

كان مرة في واحد اتقدم لي، و كان مصمم اني اتحجب من بكرة، مرة كنا في رمضان و كان هو مصمم ينزل معايا نشتري الايشاربات، و في وسط الكلام سألته انت صليت انهردة؟ الاجابة : لا

طيب وصلت للجزء الكام في القرآن؟ (احنا كا متفقين اننا هنافس بعض مين هيختم القران الاول)

الاجابة : مقرتش قرآن انهردة، بوصي بقي كل الي انتي بتعمليه دا ربنا مش هيتقبله منك لانك مش محجبة.

بصراحة اجابته صدمتني :lol: و لاقيت نفسي برد عليه انت مش ربنا علشان تحاسبني و تحكم اذا كانت صلاتي مقبولة ولا لأ، و بعدين انصح نفسك الاول قبل ما تنصحني.

و دي كانت اخر مكالمة بينا

مرة برضه واحدة صاحبتي كانت وسيط بيني و بين زميل لنا، هو رفضني علشان مش محجبة ، فصاحبتي دي قالت لي : طب ما تتحجبي يا بريسيس انتي كدة كدة لابسك محترم مش ناقصك غير الايشارب؟ زميلنا كان بيدرس علشان يكون داعية اسلامية ، فكانت ايجابتي : طيب ما قبلني كدة و ياخد فيا ثواب.

نفسي فعلا اجد انسان متدين بحق يساعدني على الحجاب، كان لي مرة صديقة مخطوبة و كانت غير محجبة و سألت خطيبها انا احلي بالشعر الطويل و لا القصير؟

كان رده: هتكوني احلى البنات بالحجاب. كلماته الرقيقة دي كان ليها مفعول السحر على صديقتي و هي الان محجبة و في قمة السعادة

شوفي سيدتي الكلام الرقيق له مفعول السحر ازاي، ربنا لما بعث الرسول صلى الله عليه و سلم بعثه لهداية ناس كفار و طلب منه انه إلا يكون فظ غليظ القلب حتى لا تنفض الناس من حوله

تم تعديل 16 ديسمبر 2009 بواسطة Princesse

[لماضة مصرية جدا]

السلام عليكم و رحمة الله و بركاته

حبايبي الحلوين....

ايه ده.... مش هو ده ركن ياختشي العيال الغلابة اللي لسه متجوزوش و يجوا يقعدوا فيه كل يوم يفضفضوا كده

مش عارفة حبايبي الحلوين.... علي الرغم انا دايما حوارتنا و قصصنا و تجاربنا بتسرح بكل واحد فينا بره الموضوع الاصلي.... بس بلاقي دايما ان كلنا متفقين ان كل واحد فينا بيدور علي حد يعرف مفاتيحه من غير ما ياخد بانطباعات مسبقة تحكمها ماديات.... و لا مظهر و لا تقاطيع مسمسة و لا زي سنية كما وصفها عشماوي (مسرحية وجهة نظر)

الحقيقة في موضوع سيادة اللوا اركان حرب العريس عايزها محجبة و لا ايه

انا مش هقف عنده كتير

لان برضه حاسة ان كلنا متفقين ان رغبتنا الحقيقية من الارتباط ان ربنا يدلنا علي بني آدم او بني أدماية ياخد بايدينا و آخد بايده و يعينونا في دينا في الدنيا و الآخرة

بس هي بتحصل قفشات لما تكون المسلمات اللي عندي غير المسلمات اللي عنده..... و دي ببساطة اختلف فيها اصلا العلماء في تفسير الدين يعني مش هيختلف فيها عوكل و نوفل (انا طبعا عوكل و زوجي اللي لسه في علم الغيب اكيد هيبقي نوفل)

انا بس ليا خبرة صغنونة

اتقدم ليا شاب خلوق جدا و نحسبه علي خير و لا نزكي علي الله احدا...... و هو كان ملتحي و عنده تصور معين عن شريكة حياته

و اختكم شفاعة.... الحمد لله محجبة.....لكن الحجاب المحترم العادي (طرحة لطيفة كده.... لا هي اسبانيش و لا حتي منوفي)..... هو فيه حبة دلع بس انا بحب الالوان بشكل عام

المهم كل لقاء كنا نتكلم في الحياة و الناس و السياسة و طبعا قبل نهاية الحوار و النزول بالسلام الجمهوري.......ايه رايك في النقاب

و الحق يتقال.... كان بيشجعني علي القراءة جدا و اني اتوصل للأدلة بنفسي عشان اكون راي باقتناع

الحقيقة يا ولاد.....انا كنت فعلا اقتنعت....(عشان ارضيه..... و ماله مش هيبقي سي عبد الجواد) بس انا طبيعة شغلي و احتكاكي بالناس مش هيخلي الموضوع سهل عليا

واحد بقبي من مدرجات الدرجة التالتة اللي قاعدين علي ايدك الشمال هيسالني و يقولي و بعدين اتجوزتم.... طبعا هرد عليه و اقوله الحمد لله لا بس لاسباب اخري بعيدة تماما عن الحجاب و لا النقاب و لا اي حاجة

م الاخر.......دينا جميل.....و قرآنا اجمل

لو حد بيحب ربنا اوي..... هتلاقيه انسان حلو اوي.... و بيقدر يوصل لكل حاجة حلوة جواكي

بس خلاص

مع تحياتي للخال و العمة و الجد مجاهد بعزبة القرود..... و خالتي حموقة اللي ماتت محروقة.....و شلاطة و شنكل و زعتر بحارة كوم الشقاف

كان معكم

مراسل قطاع الجواز

الساحة الشعبية

[الباشمهندس ياسر]

العضو انا و بس .. عاجبني اسمك اوي بالمناسبة ..

مش انا قلتلك الحل الاخير ... .. مناقشتيش فيه لييييييييييييييه...

العضو ... مولاتي الاميرة ...

ممكن تناقش شويتين ف ردود حضرتك الاخيرة

ه احاول متأخرش ... بس سامحيني لو اتاخرت ..لاني بجهز الدنيا بتاعتي للسفر

[justme]

على فكرة يا باش مهندس ياسر

الحل بتاعك ده انطرح عليا في اخر الصيف اللي فات

هنتكلم بعدين

لأني لازم اخلع دلوقت فحبيت ارمي السلام واقولك

الموضوع ده كبير

[الباشمهندس ياسر]

ممكن أقول رأى بس ماحدش يزعل .

زى مافى واحدمن الأخوه الأفاضل كان بيتكلم وعشان منضحكش على بعض . التقارب في المستوى شئ مهم جدا

والشاذ عن الموضوع ده مش هوا الطبيعى مقبول ان الراجل يكون اعلى من البنت . بس البنت أعلى من الراجل مش في كل الحالات ده

يبقى الطبيعى .

تحياتى وربنا يوفق الجميع

انا لسه قاري المداخلة دي بتأني كده

بصراااااااااااااحة اوي

انت راجل بتفهم و دماغك عالية

تحياتي

[otaka]

انا مش هواه جلد الذات بس اعذرونى الكلام و القصص المذكوره فى الموضوع ده ملهاش الا تفسير واحد انه ده مجتمع منافق مبنى على اكاذيب و مظاهر و بس

يعنى ايه محجبه و مش محجبه و عربيه و مش عربيه و ايه واحد يعاير التانى يقله انا اعلى منك فى الترتيب يعنى انا متخيل انه ده تصرف فردى لكن لو بالشكل اللى انتم بتقولوه ده يبقى ده مجتمع مريض فعلا

المسائل متلعبكه بشكل عجيب جدا مين السبب ورا اللعبكه دى

ده انا فكرت مره افهم موضوع الجهاز و مين بيجيب ايه فسالت و كالعاده مفهمتش حاجه

بجد بجد المجتمعات بتاعتنا محتاجه نهضه و ثوره اجتماعيه شامله احنا بنمشى بضهرنا يعنى

[justme]

انا عايز اعقب على موضوع الحجاب تحدبدا اللي زعلانين من الحجاب

عايز افرق هنا بين حاجتين

المعايير المادية زي الفلوس والعربية والوظيفة وحتى الشكل

والمعاليير الاخلاقية والدينية

ومش بقول ان اللي متتحجبش مش متدينة ولكن قصدي ان ده مظهر من مظاهر التدين

ولكن خلينا نفترض ان في بنت جالها واحد مدخن مش هتكره هي الصفة دي فيه

بلاش لو جالك واحد مش بيصلي بص مؤدب واخلاق مش ممكن ترفضه البنت ولها الحق

والحجاب برضه من الدين وضرورة واللي مش مقتنع يقرأ ويسأل شيخ من الازهر كمان

فخلينا نحط حدود مظبوطة اما الماديات فدي نسبية

[president]

انا عايز اعقب على موضوع الحجاب تحدبدا اللي زعلانين من الحجاب

عايز افرق هنا بين حاجتين

المعايير المادية زي الفلوس والعربية والوظيفة وحتى الشكل

والمعاليير الاخلاقية والدينية

ومش بقول ان اللي متتحجبش مش متدينة ولكن قصدي ان ده مظهر من مظاهر التدين

ولكن خلينا نفترض ان في بنت جالها واحد مدخن مش هتكره هي الصفة دي فيه

بلاش لو جالك واحد مش بيصلي بص مؤدب واخلاق مش ممكن ترفضه البنت ولها الحق

والحجاب برضه من الدين وضرورة واللي مش مقتنع يقرأ ويسأل شيخ من الازهر كمان

فخلينا نحط حدود مظبوطة اما الماديات فدي نسبية

ماكنتش للأسف عايز اخرج بره اطار الموضوع الأساسى ونتناول قضيه فرعيه بس هاحاول اربط بينها وبين الموضوع الأساسى .

انا مش هتكلم عن الحجاب تحديدا بس هاخده كمثل لتوصيل الفكره .

برده عن قصه واقعيه حصلت معايا شخصيا . كان ليا واحده زميلتى فى الشغل وشغاله معايه فى نفس المشروع .

وفى نفس الوقت كانت صاحبة مراتى جدا . المهم فى يوم لقيتها مضايقه وعايزه تعيط .

سألتها خير يابنتى -طبعا بحكم انها قريبه منى ومن مراتى - فحكتلى ان فى واحده لسه متعينه فى الشركه وشافتها .

وسألت زميلتى انت مسلمه ولا مسيحيه زميلتى قالتها مسلمه والحمد لله الأخت التانيه قالتها بقى دا منظر مسلمه هتقف قدام ربنا .

زميلتى خدت الكلمه وبلمت ومعرفتش ترد. بعد ماخلصت وهديت وقعدت افهمها ان دى حاجه بينها وبين ربنا ومحدش ينفع يحاسبها غيره .

المهم سالتها : انت شايفه الحجاب دا فريضه ولا مش فريضه .

قالتى فريضه .

قلتلها طالما كده انتى مستنيه ايه .

قالت : مستنيه خطيبى هوا اللى يقنعنى ويساعدنى على كده

قلتها : وخطيبك ده لو قالك اتحجبى هتتحجبى .

قالت :طبعا طالما هاحبه يبقى كل اللى هيقوله هاعمله.

سكت شويه وبعدين سألتها

سألتها: وبتحب ربنا أكتر ولا خطيبك .

هيا سكتت متوقعتش السؤال ده وبلمت ووشها أحمر

عدت عليها السؤال تانى .

لقيتها بتقول وهيا بتعيط : أكيد ربنا أهم من أى حد فى الدنيا .

قلتها : ولما يكون حبيبك العظيم عايزك تتحجبى تعملى ايه ؟

سبتنى ومشيت .

وخدت اجازه يومين ورجعت محجبه . وأول مادخلت راحت للأخت اللى كانت بتهاجمها .

وقالتها اوعى تفتكرى ان كلامك هوا اللى خلانى اتحجب . انت اسلوبك سئ وسخيف وجاف .

وبكلامك اللى قولتيه كرهتينى فى الحجاب بس الحمد لله ربنا هدانى .

على فكره برده . انا مش داعيه ولا حاجه ومش عارف جبت الكلام دا منين . بس أعتقد لأن من محبى عمرو خالد

فأعتقد انى جبت الكلام ده منه .

طيب خلصت الحكايه . ايه المطلوب ؟

اسلوب النقد المباشر بيجيب نتائج عكسيه . اسلوب النقد المباشر بيولد العند حتى لو كان صاحبه عارف انه غلط .

بس هوا بيعاند عشان حد انتقده باسلوب سئ . تفتكر بقى لو انت اتقدمت لواحده وعجباك بس مثلا كانت بتشتغل

وقولتلها يا الشغل ياانا . هتقولك مع السلامه . انما لو اخدت الأمور بسلاسه واتكلمتوا مع بعض انت نفسك ممكن تقتنع بوجهة نظرها .

واحده تقولك انا عايز اكمل دراستى الأول . لو كليه نظريه خليها تذاكر معاك وتنزل مصر تمتحن .

حتى لو الموضوع فشل يبقى حاولت .

حاول انك تدى نفسك فرصه انك تكلم مع الطرف الأخر متاخدش المواضيع (قفش) .

الفتره اللى انت هتقضوها مع بعض - فترة الخطوبه - اكيد هيحص ميل من الطرفين تخلى الأتنين يتنازلوا لبعض .

اخر نقطه عايز اقولها فى الموضوع ده .

مش كل بنت عايز تعرف رأيها يبقى لازم تروح البيت . اتفق مع اهلها انك تتقابلوا بره طبعا فى وجود اطراف من العائلتين . ولو حصل القبول

تبقى زياره رسميه . انا شايف انها صعبه تدخل بيت عشان لسه هتشوفوا بعض وتتكلموا مع بعض لو الموضوع ماكملش هيبقى صعب للطرفين.

وخاصه للطرف المرفوض.

ربنا يوفقك

تم تعديل 18 ديسمبر 2009 بواسطة president

[justme]

والله يا عم بريزدنت معاك حق

بس يمكن انا اسلوب كان قاسي شوية لكن هقولك ليه

انا لقيت الجماعة هنا واخدين الحجاب بصورة انه مش من الاوامر بتاعت ربنا

مع ان قبل 100 سنة كنت مستحيل انك تحتاج تفتح الموضوع ده ومحدش يقولي ده كويس وتطور

وعايز اقولك ان مفهوم الناس عن الحجاب وحاجات كتير انها مظاهر

وده كلام يزعل اي حد ولكن انا حاولت اني ابين الحقائق لكني لم ازعم مناقشة موضوع الحجاب ده بصورة الدعوة لأن في الغالب انت اللي حصل معاك ده وردودك جت من خلال فضل ربنا عليك من خلال علاقتك والموقف وانت قلت ان البنت كانت جديدة لكن انت تعرف زميلتك من زمان

ومش عايز افكر الكل ان الزعل في الدين مش صح لأن اي واحد بينصح مش هياخد فلوس بس المجتمع بتاعنا بيحب العند والهداية مش بتيجي على ايد اي حد

وقد أمر الله رسوله محمداً صلى الله عليه وسلم أن يبين الحق للناس كافة ولهم الخيار فيما يرغبون فمن أطاع نفع نفسه ومن عصى ضر نفسه كما قال سبحانه : ( قل يا أيها الناس قد جاءكم الحق من ربكم فمن اهتدى فإنما يهتدي لنفسه ومن ضل فإنما يضل عليها وما أنا عليكم بوكيل ) يونس/108 .

عموما انا عايز اقولك حاجة معينة

بعض الاحيان الانسان بيغضب لدينه والغضب ده بيعميه عن الصح وده طبعا غلط

ولكن اننا نسكت عن الموضوع

ونسيبه ينتشر زي ما بحصل حاجاتكتير دلوقتي فده خطأ اكبر

واحنا هنا بنتكلم ومحدش شايف التاني

فالمفروض ينتفي الحرج لان كلماتنا هنا هي صوت لعقولنا وارد الخطأ فيها ووراد الصواب

بس بالنسبة لموضوع تشوفها بره ده فده من اولوياتي لكن في ناس كتير بترفض

ويقولك اللي عايز ييجي البيت

وفي ناس تانية بتقولك لأ مش في البيت

وعلشان بحب اضرب امثلة هقولك على حاجة

انت اذا كنت بتركب تاكسي وانت نازل بتقل الباب

اذا قفلته بالراحة السواق يتتريق ساعات ويقولك يا عم انت مكلتش عالصبح ولا ايه اضربه جامد

واذا عملت كده مع واحد تاني هيقولك بالراحة

طيب يبقى مفيش قاعدة لكل المواقف

ولذلك قبل ما اروح بيت حد باتعمد اشرح وضعي بالكامل من طأطأ لسلاموا عليكم زي مابيقولوا

فقلت يمكن ده غلط خلينا نروح على الاقل لما نشوف بعض يبقى فيه مساحة للنقاش

ولكن زي ما قلت مش كل الناس زي بعض

وعايز اسئل سؤال

كام واحد هنا اتجوز بطريقة الصالونات زي ما بتسموها وهو عنده نفس ظروفي

بس اللي اتعرضوا لنفس الظروف يتكلموا

بس بشرط ميكونش دكتور ولا مهندس ولا ظابط وميكونش عنده علاقات عاطفية خارجية

وياريت يقولي بعدها لقى مشاكل ولا لأ

واخر حاجة

اقولهالكم انا معترف بخطأي في طريقة عرضي ونقاشي فياريت محدش يزعل بس انا بحب اما اتكلم في مشكلة احط العواطف على جنب شوية

يمكن ده اسلوب خطأ ولكن انا يمكن عملي زيادة عن اللزوم

وكنت اتمنى ان اجد من يساعدني في اتخاذ الطريق السليم لأن القراءان بيقول فيما معناه في سورة العصر ان الانسان لفي خسر الا اللذين امنوا وتواصو بالحق وتواصوا بالصبر

وانا بشكركم على ارائكم اللي وضحتلي امور كتير

[الباشمهندس ياسر]

واخر حاجة

اقولهالكم انا معترف بخطأي في طريقة عرضي ونقاشي فياريت محدش يزعل بس انا بحب اما اتكلم في مشكلة احط العواطف على جنب شوية

يمكن ده اسلوب خطأ ولكن انا يمكن عملي زيادة عن اللزوم

وكنت اتمنى ان اجد من يساعدني في اتخاذ الطريق السليم لأن القراءان بيقول فيما معناه في سورة العصر ان الانسان لفي خسر الا اللذين امنوا وتواصو بالحق وتواصوا بالصبر

وانا بشكركم على ارائكم اللي وضحتلي امور كتير

انا عاوزك تصلي علي النبي و تهدي كده

الامور متتاخدش بالطريقادي

كل الموضوع ان تاخير الزواج بيبقي عامل شوية مشاكل نفسية و حالة من اللاتركيز .. بتظهر من وقت للتاني

كلنا كده و بتحصل معانا

ربنا يلهمنا الرشاد جميعا

[otaka]

يا شباب معتقدش فى حد هنا جادل فى موضوع الحجاب كل ما اقول انه من السطحيه ان نحكم على شخص من مظهره

كم واحد من الاخوه هنا كانت والدته محجبه عندما تزوجت ؟؟؟ طيب انتوا ناس كلكم ولاد حلال و ملكمش فى اللف ايام الجامعه كانت الدفعه فعلا صغيره و كنا نعرف مين اللى ماشيه كويسه و مين لاء و قطعا الكويس فيه المحجب و اللى مش محجب فوصلت لقناعه معينه انه الحجاب مكمل للالتزام و ليس هو الالتزام

لن اتحدث عن البنات التانين اللى كانوا مقضينها لانه برضه كان فيهم محجب و مش محجب

زواج الصالونات مشكلته انه زواج يعتمد على المظهر و سؤال البواب و الجيران

طيب الناس دى هتقولك محجبه و بتروح بدرى بس ميعرفوش اذا الاخت بتسهر على الموبايل مع توتو ابن حتتها و لا لاء متعرفش الاخت بتقعد فى كازينو الشجره فى وقت الجامعه و لا لاء

طيب علشان الاخوات هنا بيقولوا انه كل الكلام على اخلاق البنات نفس الشئ ينطبق على الولاد الواد بيصلى و كل يوم بيروح الجامعه و لا الشغل الصبح و ابوه محترم و امه ما شاء الله حلو قوى ممكن كل دى مظاهر جيده و لكن تحت السطح ممكن يكون فى اشياء تانيه

جواز الصالونات عامل زى الاخوه اللى بيخبطوا الباب عليك فى مصر و يقولولك معانا شامبو صينى للسجاد تحب تجربه

و انت و بختك بقى

[otaka]

الجواز فى المحروسه بجد انا مت من الضحك

http://www.youtube.com/watch?v=T4qtoOGrwAU...layer_embedded#

[justme]

بجد الراجل ده معلم وعبقري استطاع ان يلخص الحالة في دقائق وبدقة شديدة ومحدش يقولي بقى لأ

اهوه شفتوا يا جماعة على فكرة اللي قاله مش هزار وكل كلمة وراها معنى كبير

تحياتي لك يا اخ اوتاكا مش قلت لك انت جيت على الجرح

[otaka]

بجد الراجل ده معلم وعبقري استطاع ان يلخص الحالة في دقائق وبدقة شديدة ومحدش يقولي بقى لأ

اهوه شفتوا يا جماعة على فكرة اللي قاله مش هزار وكل كلمة وراها معنى كبير

تحياتي لك يا اخ اوتاكا مش قلت لك انت جيت على الجرح

تسلم يا جست مى باشا كلنا فى الهم سوا :angry:

[MaYousof]

طبعا النصيب غلاب سبحان الله

تصوري لما بأحكي له النهاردة على اللي كتبته في الموضوع

عارفة قال ايه لما فكرته بالبونبوناية الي ادهالي قبل ما يخرج؟؟

قال لي أصلي مابحبش البونبون

و قلت حرام بدل ما أرميها

قلت اما اديهالك

:lol:

هههههه

أضحك الله سنك يا مصرية والله قصة لقائك بزوجك كانت ممتعة

وقصة البونبوناية أكثر امتاعا

بارك الله فيكي وفيه

[MaYousof]

لكن تبوظ جوازة لمجرد كلمه يبقى بجد عقلها صغير

و بعدين اهون الضرر انها تستنى تكمل المقابله فى شياكه و لما يجى وقت الرد يتقاله ما فيش قسمه و خلاص

لكن كمان تشتمه

انثى تشتم :lol: :D ;)

دا نموذج منتشر جدا الان فى مصر للاسف و هى انك تلاقى فتيات كتيير جدا حاصلين على اعلى الشهادات الجامعيه و لكن لو تقيمها على اساس اساسها و هو انوثتها

تلاقى صفر اكبر من صفر المونديال الشهير

ماقولتيش غير الصدق :wub:

[MaYousof]

تفكيرنا دائما فيه شيء من الغرور

ماقولتش إلا الصدق

والله يا justme أنا حزين على حال وصل اليه كثير من المصريين

المستريح اصبح متعالي والتعبان اصبح وصولي

أنا ربي قدر لي إني في فترة من فترات عمري أعيش في بلاد لا يتعالى فيها العالِم على العامل ولا الشرطي على سائق الأوتوبيس ولا الثري على صبي السوبر ماركت

كان الشرطي أو أي officer يعاملك بكل احترام وايمان بانه مش أحسن منك, وانك إنت وهو راس براس وولاد تسعة وبيؤدي واجبه مش كما تمليه عليه مصلحته ولا نزواته وانما يؤديها كما يحب هو أنا يعامل لو كنت أنا مكانه

كنت بأحس إن كل الناس بتحترم سواق الأوتوبيس زايوه زي دكتور الجامعة

وتلاقي كل الناس قبل ماتنزل من الأوتوبيس لازم تقول شكرا للسواق مع إنه كان بيعمل شغله يعني مش واجب إني اشكره

الناس دي علمتني يعني إيه احترم كل مواطن وكل بني آدم شريف بيكسب رزقه بالحلال

ماعندهمش ثقافة اخطف واجري

ودوس على اللي تحتك علشان تعيش

وثقافة إنت عارف أنا أبقى مين!

أنا أحسن منك ومن اللي ..

دول علموني إني اقول شكرا لسواق الأوتوبيس

وعلموني أبكي على حالنا

واعرف إن مشاكلنا فينا مش فحكامنا

ليهم باقول شكرا ياللي علمتني أشكر سواق الأوتوبيس

وللمصريين بقول, ربنا يعينكم على انفسكم

[justme]

هو المشكلة فعلا فينا بس المشكلة الاكبر انك لما تحب تواجه الناس بما حولهم او فيهم يقولك لأ انت المشكلة فيك لكن احنا بخير

طبعا مش معنى الكلام ان المجتمع كله او نصه بايظ وانما الحسنة تخص والسيئة تعم

فعندما نقرأ في التاريخ نجد ان اجدادنا لم يتعرضوالأي من هذا على الاقل بنفس الانتشار ولذلك كانت الحياة بسيطة ويسيرة ومكنش في كل شوية قضية تحرش او اغتصاب او سرقة او غيره بالصورة التي نراها

عندما نعطل قوانين الكون في انفسنا نجد ان نتيجة هذا التعطيل خلل يطال تأثيره الكبير او الصغير

اصبح الاتقان خارج حساباتنا فالكل يبحث عن الربح السريع والسلطة يعني في الاخر برضه المال وعندما يتحقق له ذلك فانه ينسى الاصل الذي جاء منه ويبدأ يقولك مستوايا ومستواك طبعا ليس الجميع وانما هناك من يفكرونبهذه الطريقة

والمثالية او التواضع في مجتمعنا اصبحت عيب وليست ميزة فعندما تدخل احد البيوت ولا تسرف في الحديث عن امكاناتك مثلا بيعتبروك عريس غلبان وهذا حصل واتقالي اكتر من مرة لازم تبهر من امامك وبالذات لو البنت كويسة ومتمسك بيها فلازم تقعد تحكي وتطلع بنفسك القلعة زي مابيقولوا المعيار بقى مدي

عموما لن اتحدث عن نفسي فانا دائما افهم خطأ ولكن المجتمع يعييش صراعا داخليا فكل منا يعرف الصواب والخطأ او على الاقل معظمنا لكنه لا يلتزم ولذلك البحث عن المظهر وليس الجوهر

وللتقريب لو تقدم لمعظم البنات شخص مثلا في ثراء احمد عز بتاع الحديد مثلا مش الممثل في فكركم كام عيلة او بنت هترفض او تفكر في الرفض حتى بس عايز رد موضوعي مش عاطفي

[president]

اصبح الاتقان خارج حساباتنا فالكل يبحث عن الربح السريع والسلطة يعني في الاخر برضه المال وعندما يتحقق له ذلك فانه ينسى الاصل الذي جاء منه ويبدأ يقولك مستوايا ومستواك طبعا ليس الجميع وانما هناك من يفكرونبهذه الطريقة

والمثالية او التواضع في مجتمعنا اصبحت عيب وليست ميزة فعندما تدخل احد البيوت ولا تسرف في الحديث عن امكاناتك مثلا بيعتبروك عريس غلبان وهذا حصل واتقالي اكتر من مرة لازم تبهر من امامك وبالذات لو البنت كويسة ومتمسك بيها فلازم تقعد تحكي وتطلع بنفسك القلعة زي مابيقولوا المعيار بقى مدي

عموما لن اتحدث عن نفسي فانا دائما افهم خطأ ولكن المجتمع يعييش صراعا داخليا فكل منا يعرف الصواب والخطأ او على الاقل معظمنا لكنه لا يلتزم ولذلك البحث عن المظهر وليس الجوهر

وللتقريب لو تقدم لمعظم البنات شخص مثلا في ثراء احمد عز بتاع الحديد مثلا مش الممثل في فكركم كام عيلة او بنت هترفض او تفكر في الرفض حتى بس عايز رد موضوعي مش عاطفي

طالما حضرتك طلبت رد موضوعى . هاقولك رأى . نبعد خالص عن الزواج الناشئ عن قصه حب . احنا بتكلم في جواز الصالونات مظبوط .

جواز الصالونات ياسيدى دا بالظبط عامل زى المناقصات . هيئه او مكان ما عايزه تعمل مشروع بتتقدم اكتر من شركه وكل شركه بتقدم

العرض المالى والعرض الفنى وسابقة الأعمال ويمكن في حاجات تانيه .

طب لو شركه كان العرض المالى بتاعها أحسن العروض وبقيت الحاجات التانيه مفيش ياترى عرض الشركه هيتقبل ؟ اكيد لا .

يبقى اساس قبول العرض انه يكون في توازن بين كل المتطلبات ومينفعش حاجه تطغى على الأخرى . تمام كده .

خد ياسيدى المثل اللى فات وقيسه على الزواج . او افترضنا ان فيه بنت كويسه واكتر من واحدعايز يتقدملها طب ياترى هيا هتختار على اساس ايه ؟

ابدا كل عريس بيبقى عباره عن (package )كامله فيها (السمعه الشخصيه من اخلاق ودين – الحاله الماديه – الناحيه الشكليه – و حاجات

تانيه وظيفته وعمره و هوا مطلق ولا ارمل ولا عيلته نظامها ايه كده يعنى) .

تفتكر انت لو واحد عنده في العرض بتاعه كل حاجه عاليه بس الأخلاق صفر . تفتكر حد ممكن يرضى بيه . لو حد رضى بيه يبقى دا الوضع

الشاذ مش الطبيعى . بس احنا بنتكلم في الطبيعى . يعنى في الطبيعى الناحيه الماديه مش هيا المعيار بس . متفقين ؟

طيب انت المفروض كعريس بتحاول تطلع العرض بتاعك في ازهى صوره بلا مبالغات . وماتفترضش فى اللى قدامك انه بيبص على

المظاهر بس لأنه ميعرفش انت جواك ايه. هوا ليه اللى قدامه . يعنى افترضنا انك عندك شقه بس قلت للعروسه معنديش كانوع من الأختبار

مفترض ليه انها هتتنازل عن شقه عشانك الا اذا كان حاجات تانيه في العرض بتاعك ممكن تعملك دعم . بس لو في عروض تانيه احسن منك اكيد

هترفض عرضك .

انا مكنتش عايز اجيب مثل مادى . لأن اللى مسيطر على تفكيرك ان الجواز بيتم وبيفشل لأسباب ماديه بحته ؟ .

جواز الصالونات ياسيدى –في رأى - هوا صفقه بس مش صفقه ماديه فقط - وحط تحت فقط خطوط زى مانت عايز- هوا صفقه

بتشمل حاجات كتير وبتنجح لما بيوافق عليها الطرفين. وخلى بالك لما الطرفين بيحبوا يمشوا الصفقه ساعات بيغيروا في الشروط .

(دورت على كلمه تانيه غير صفقه –حاسس انها تجاريه شويه – بس ملقتش حاجه تحمل نفس المعنى ) .

عز بقى او غير عز اتقدم لحد بيطبق عليه نفس الكلام ده . في نقطه بس احنا اختلافنا مع عز اختلاف سياسى انا ماسمعش عنه انه اخلاقه وحشه مثلا.

حاجه اخيره

انت لما بتقدم في شغلانه جديده بتعمل ايه ؟ مش بتسوق نفسك عشان تاخد احسن عرض ؟ مش الناس بتاخد كورسات في كتابة السيره الذاتيه ؟

برده جواز الصالونات كده سوق نفسك . بس خلى بالك في الشغل اللى بيسوق نفسه كدب بيبان وبينكشف وبينطرد تانى يوم .

في الجواز بقى الله اعلم .

ربنا يوفقك

[otaka]

حاجه اخيره

انت لما بتقدم في شغلانه جديده بتعمل ايه ؟ مش بتسوق نفسك عشان تاخد احسن عرض ؟ مش الناس بتاخد كورسات في كتابة السيره الذاتيه ؟

برده جواز الصالونات كده سوق نفسك . بس خلى بالك في الشغل اللى بيسوق نفسه كدب بيبان وبينكشف وبينطرد تانى يوم .

في الجواز بقى الله اعلم .

ربنا يوفقك

انا قلت قبل كده انه

جواز الصالونات عامل زى الاخوه اللى بيخبطوا الباب عليك فى مصر و يقولولك معانا شامبو صينى للسجاد تحب تجربه

و انت و بختك بقى