قانون المرور و حقيبة الإسعاف - كلام فاضى وفوضي وسوء تخطيط

[osaimi]

لمن يملك سيارة بمصر ، هل أنت مقتنع بشراء حقيبة إسعاف ووضعها فى السيارة ؟ وإذا كنت غير مقتنع فماذا سوف تعمل ، هل تشتريها وخلاص خوفا من الغرامه ؟

أنا شخصيا لن أشتريها تعبيرا عن رفضي لهذا التهريج حتي لو دفعت الغرامه

تم تعديل 13 أغسطس 2008 بواسطة Mohammad
تصحيح حرف فى العنوان

[أحمد سيف]

يا عزيزي أنا أتفق معك تماما أن مشكلة المرور في مصر ليست في طفاية الحريق أو حقيبة الإسعاف أو مثل هذا التهريج.

المشكلة الحقيقية هي في البشر القائمة على تنظيم المرور ، ناس كل ثقافتها صفا وانتباه، علشان كدا المرور (زي أي حاجة ثانية) بايظ في البلد.

ومش بس غباء وجهل وانعدام كفاءة ولكن أيضا فساد وتكبر.

إن شاء الله أفتح موضوع قريبا لمناقشة مشكلة المرور في مصر وأساليب علاجها. لعل وعسى حد من متخذي القرار يدخل الى الموقع ويقرأ الآراء المستنيرة لأعضاء المنتدى الأفاضل.

[osaimi]

المشكلة ان معظم برامج القنوات الفضائية استضافوا أكثر من لواء من لواءات الشرطة ومساعدى وزير الداخلية ولم يستطيع اي واحد منهم إقناعنا بضرورة الشنطة وكأنهم من داخلهم مش مقتنعين بالموضوع وتقريبا دي فكرة لأي حد من الوزرا او غيرة ومحدش قادر يقول كلمة حق

دا حتي المثلث كانوا مستضيفين مدير مرور الجيزة ومساعد وزير الداخلية وسألته المذيعة أن الناس بيسألوا عن حجم المثلث رد بسرعة وقالها 60ْ فى 60 !!!!!!!!!!!!

وبعد شوية جت مكالمات من ناس كتير انهم مش لاقيين المقاس ده فى السوق ، طبعا أكيد مش هيلاقوه هو فيه مثلث مرور فى الدنيا مقاسه 60 فى 60 يتحط فى العربية ، تخلف تخلف

عشان كده بقول انه تهريج وفوضى ومحدش قادر يكون جرىء ويقول كلمة حق ، اعتقد ان الحل هيكون مننا احنا بس ، لازم الشعب وخصوصا المتعلمين منهم يكون لهم رأى ورد فعل

تم تعديل 11 أغسطس 2008 بواسطة osaimi

[الباشمهندس ياسر]

السلام عليكم

من غير زعل انا رافض كلامكم تماما ليه

لانه ضد الصح وضد السيفتى

انا بحكم شغلى بتعامل مع السيفتى على مستوياته العالمية

و عايز اقولكم ان المثلث و شنطة الاسعافات الاوليه من الامور التى يتم التاكد منها قبل ركوب السيارة

و الكلام ده من اكتر من خمس سنين

يعنى احنا تاخرنا اوى اوى

فياريت منقولش على كل حاجه غلط فى حين انها صح

و مش معنى ان اللواءات معرفوش يجابوا ان الموضوع غلط

انما العيب فى ثقافة اللواءات

و السلام عليكم

[kokomen]

قانون جديد .... ممتاز فرحنا به .... لكن هل يعالج السلبيات ... نعم فقد غلظ العقوبة

في معظم مواده .... سيأتي بموارد للدولة ........ أكيد .... ولكن هل المطلوب تغليظ العقوبة

أم منع المخالفات أم تحصيل الغرامات ..... لنكن منصفين فبعض مواد القانون مفيدة ونحن معها

ولكن البعض الآخر غير منطقي ويجب تعديله ليتناسب مع ما يعانيه المواطن المصري في الشارع

فكيف نمنع مخالفات الوقوف في الممنوع مثلا وقائد السيارة لا يجد مكان يقف فيه ولا مواقف للسيارات

ثم تطبق عليه الغرامة وهو مضطر لدفعها .... وقد حصلت معي وناقشت المسؤول فهز رأسه ولم يجاوب

ثم شنطة الإسعاف الغريبة العجيبة ... تدخلت وزارة الصحة لتثبت تواجدها وتفرض سيطرتها على ماذا

لا نعرف ...؟؟؟ ثم قالوا أن مواصفات حقيبة الإسعاف كذا وكذا ... ويجب أن تكون معدنية وليست

بلاستيكية ... طبعا بعد أن أشترها بعض الناس خوفا من العقوبة وقبل تزايد سعرها بجنون ....!!!!

ثم ذكروا أن محتويات الحقيبة يجب أن تكون كذا وكذا ... متجاهلين أن الأغلبية لن تستطيع استعمالها

ولا هم مهيئون لذلك ... فمن يدري عن مبادئ الإسعافات الأولية .. ومن أخذ دورة فيها ...!!!!!

أليس من الأولى أن تجمع هذه المبالغ التي سوف تدفع من كل سيارة لشراء الحقيبة والمقدرة ب 40 أو

50 جنيها لتصبح ملايين الجنيهات ليشترى بها عربات إسعاف حديثة ومجهزة لتسعف المصابين

على الطرقات أو شراء دراجات سريعة للإسعاف أو طائرات هليوكوبتر للإسعاف الطائر السريع

بدلا من إهدار هذه الملايين من الجنيهات في حقيبة لا فائدة منها مرجوة .......؟؟؟؟؟

بل تزيد من تربح فئة معين من بيع هذه الحقائب المسماه بالإسعافية والتي ستصبح ديكورا في السيارة

أخيرا قليل من الفكر .... لوضع الأمور في نصابها الصحيح

تم تعديل 11 أغسطس 2008 بواسطة kokomen

[rar]

يا باشمهندس ياسر...

يجوز تكون طفاية الحريق و حقيبة الاسعاف من الأساسيات في السيارات التجارية كالنقل و الأجرة و ما شابه (الله أعلم)...

لكني عشت في كندا و عشت في أمريكا و قدت سياره في كلا البلدين... و لم يكن مطلوب مني وقت الترخيص أي من هذا الكلام... نعم وجودهم لا يضر... و لكني لا أري المرور بمصر أكثر انضباطا من الخارج للدرجة التي نطلب احتياطات أمن في سياراتنا أكثر من أي دولة متقدمة...

مع العلم اني اشتريت سيارة جديدة منذ عامين... و لم تكن هذه الأشياء موجودة بالسيارة... مما يعني ان الطلب عليها غير موجود...

ما أظنه (ان بعض الظن اثم) ان واحد من الاخوة الكبار... سيطر علي توكيل شنط الاسعاف... و الحكومة بتجامله!!

[Ghost]

شنطه الاسعاف سبوبه حلوه قوي لناس لحد الان ما تعرفوش

و المثلث العاكس ...كلام فاضي

و يزيد من الفوضى ان الناس عارفه انها جبايه و الضباط مش عارفين ايه نصوص القانون

و زي ما قال العضو المحترم ان كندا الناس بتسوق السيارات و ما فيها مثلث و لا طفايه و لا اسعاف

انا بقترح انهم يزودوا على الطلبات و احد تمرجي و اتنين ممرضات في كل سياره

و تبقى حلوه قوي لو فيه كفن معطر في شنطه العربيه و تكون الغرامه عليه عاليه جدا

[Ghost]

يا ريت صاحب الموضوع يغير الاستفتاء على ان يكون هكذا

هل انت مقتنغ بفكره شنطه الاسعاف و انها ضروره في السيار ه ؟

ما الناس كلها هتشتري الشنطه غصب عن عين الي ....,, هو في حد يبقول لا في البلد ديه و يكون على حاله

[Alshiekh]

هو الحقيقة وبما ان الحكومة تريد المحافظة على امن وامان الشعب المصرى ، فانا ارى ان شنطة الاسعاف والطفاية ليسا بكافيين ، لانهم فى الحقيقة ستنتهى صلاحيتهم بعد وقت قصير بتأثير الحرارة العالية.

لذا فأنا اقترح على الحكومة ان تلزم كل من يقود سيارة ان يتصل مسبقا بادارة الاسعاف وادارة الحريق كى يرسلوا سيارة اسعاف وسيارة اطفاء تسيران خلفه حتى يصل بأمان الى غايته.

ويكون شعار وزارة الداخلية فى المرحلة القادمة هو " سيارة اسعاف وسيارة اطفاء لكل مواطن ".

نتكلم جد بقى

الباش مهندس ياسر بيتكلم عن السيفتى ، وانا اؤيدك فى موضوع السيفتى ده ، لكن تفتكر مدة الصلاحية للمواد الطبية المطلوبة للاسعافات الاولية عند تخزينها فى سيارة تصل درجة حرارتها صيفا لاكثر من 50 مئوية ، كم ستكون مدة صلاحية المواد؟ وهل مطلوب تجديد الصلاحية كل شهر؟ ام شراء شنطة جديدة كل شهر؟ ومن سيكون لديه الصلاحية لكى يحكم بصلاحية شنظة الاسعاف؟ هل هو ضابط الشرطة؟ ام انه يجب ان يكون معه فريق طبى يقول بصلاحية المواد الطبية من عدمه؟

هنا فى امريكا ، كل المطلوب من السيارة حتى يصرح بتسييرها ، هو الاضواء والاشارات ، والكلاكس ، والفرامل ، بعض الولايات تقيس العادم وبعض الولايات لاتفعل ذلك ، مافيش عربية ماتترخصش علشان البوية ، او علشان فيها خبطات فى الصاج ، مافيش عربية ماتترخصش علشان الحاجة دى اللى اسمها طفاية ، او الاختراع الجديد اللى اسمه شنطة الاسعاف. لكن اللى موجود عندهم هى سيارات الاسعاف ، وسيارات الاطفاء ، وسيارات البوليس ، والتى تصل للمكان فى دقائق معدودة ، لانهم موفرين الناس دى لخدمة الشعب ، مش لعربيات الامن المركزى ، وهم دول السيفتى الحقيقى.

[الباشمهندس ياسر]

يا باشمهندس ياسر...

يجوز تكون طفاية الحريق و حقيبة الاسعاف من الأساسيات في السيارات التجارية كالنقل و الأجرة و ما شابه (الله أعلم)...

لكني عشت في كندا و عشت في أمريكا و قدت سياره في كلا البلدين... و لم يكن مطلوب مني وقت الترخيص أي من هذا الكلام... نعم وجودهم لا يضر... و لكني لا أري المرور بمصر أكثر انضباطا من الخارج للدرجة التي نطلب احتياطات أمن في سياراتنا أكثر من أي دولة متقدمة...

مع العلم اني اشتريت سيارة جديدة منذ عامين... و لم تكن هذه الأشياء موجودة بالسيارة... مما يعني ان الطلب عليها غير موجود...

ما أظنه (ان بعض الظن اثم) ان واحد من الاخوة الكبار... سيطر علي توكيل شنط الاسعاف... و الحكومة بتجامله!!

السلام عليكم

انا مكنتش بتكلم عن نقل ولا اجرة

انا بكلمك عن سيارات ملاكى

بس الفكرة اننا بنشتغل فى البترول

يمكن هو ده السبب

اما عن موضوع رجال الاعمال و المجاملات فمش بعيد والله

[الباشمهندس ياسر]

الباش مهندس ياسر بيتكلم عن السيفتى ، وانا اؤيدك فى موضوع السيفتى ده ، لكن تفتكر مدة الصلاحية للمواد الطبية المطلوبة للاسعافات الاولية عند تخزينها فى سيارة تصل درجة حرارتها صيفا لاكثر من 50 مئوية ، كم ستكون مدة صلاحية المواد؟ وهل مطلوب تجديد الصلاحية كل شهر؟ ام شراء شنطة جديدة كل شهر؟ ومن سيكون لديه الصلاحية لكى يحكم بصلاحية شنظة الاسعاف؟ هل هو ضابط الشرطة؟ ام انه يجب ان يكون معه فريق طبى يقول بصلاحية المواد الطبية من عدمه؟

يا اخى الفاضل

القصة كلها تعتمد على الشخص نفسه

يعنى المحتويات بتاعت الشنطة فيها حاجة باظت اتوكل على الله و غيرها

علشان نفسك و اولادك مش علشان الحكومة

[osaimi]

فيه أخ مصرى جميل إقترح ان بدال الفلوس اللي الناس هتدفعها سبوبه دي ، يلموها مننا أو يضيفوها علي تمن الترخيص ويشتروا بيهم طيارات هليوكبتر للإسعاف زى البلاد المحترمه ، لكن مين يسمع