حوارات لا ننساها

[مهيب]

الحقيقة مش عارف أشرح الموضوع ده ازاى .. هى فكرة كده و طقت فى دماغى بس مش عارف أشرحها .. شفتم خيبة أكتر من كده .. بس هحاول ..

الفكرة ببساطة عن الحوارات اللى مش ممكن ننساها .. يعنى مش أحيانا بيبقى فيه حوار كده من كام جملة بينك و بين أى حد من معارفك أو أصحابك حسيت بعده ان "يا سلام ... ده ايه الحكمة و الأدب ده" .. حسيت ان ليه اسقاط كبير فى حياتك و صعب تنساه .. أو حسيت انه طلع صح قوى و المفروض يتسجل .. هنا مكان لتدوينه من غير ما تقولنا مين أطراف الحوار - علشان الخصوصية يعنى .

خلونى ابدأ بعد اذنكم .. يمكن الرؤيا تتضح :

الحوار الأول:

هو : "اللى يشوفك كده و انت عمال تعد الأيام على الأجازة و النزول لمصر يقول ان انت بتعمل البدع لما بتنزل .. يابنى دى اجازتك اللى فاتت انت عييت فيها مرتين .. و اتسحلت فى الشوارع بتدور على شقة ... و قضيت معظمها فى فروع سكك حديد مصر .. "

... : "يمكن .. بس أحيانا التغيير فى حد ذاته بيكون هدف .. و السفر من والى مصر بقى هو التغيير الوحيد اللى بقدر عليه دلوقتى"

الحوار الثانى:

هى : "مبتردش ليه على التليفونات .. مبتردش ع الميلات اللى بعتها حتى ؟؟ الظاهر ان الرياض أخدتك مننا .. و نسيت (....) بتاع زمان .. أنا فاكرة (بشىء من الصعوبة) ان فى يوم من الأيام كان ليك ابتسامة ... و فاكرة انها كانت حلوة كمان .. ايه اللى حصل؟؟"

... : "مش عارف .. الظاهر اننا بنتولد بمخزون من الفرح و الحزن .. بنقعد نستهلك فيه لحد مانموت .. و أنا بعبطى خلصته كله زمان .. و معادش باقى غير اللامبالاة .. المشكلة ان اللامبالاة عاملة كده زى الطاقة الشمسية .. متوفرة و مش بتخلص .. لكن محتاجة لاختراعات كتير علشان تتحول لكهربا ... أما البترول .. فسهل انك تحرقيه و تطلعى منه اللى انتى عاوزاة .. أنا بقى بغبائى حرقت مخزون الفرح و الحزن كله اللى عندى ..."

الثالث:

هو : "شايف الجمال يابنى .. فين تلاقى بنت زى دى عندنا .. يا أخى فيه بلاد ربنا حباها بالجمال .. تركيا و ايران و الشام .. و فى بلدان ربك غضب على رجالتها بعيد عنك .. الحق اتجوزلك واحدة من دول و ماتغلطش زينا .."

... : "مش عارف .. عمرى ماتخيلت مراتى الا انها تكون مصرية ... مش عارف ليه ؟ يمكن لاحساسى انها الوحيدة اللى ممكن تفهمنى .. مين ممكن تفرح زيى وهى فى مصر غير مصرية ... "

هو : "جتك ستين خيبة فوق خيبتك .. مالمصيبة ان كله بيفتكر نفسه فكيك كده لحد ما يندب على بوزه و يقعد يولول .. أنا شايف فيك شبابى الأبله ... وحياتك انت لييجى اليوم اللى تقول زينا كده ... مراتى متجوزة لوا وهى مش عارفة ..."

وضحت الفكرة؟ ... يالله بقى .. نشوف حوارتكم.

مهيب

[لولا]

-بتسمعى ايه؟

-بسمع منير..تخيلى بس الإحساس بيقول(ده انا ممكن اجريلك دمى..دانا حاسس دمى حيتصفى!)

-يابنتى انت بتصعبى عليا بجد! بتعيشى قوى فى كلام منير بتاعك دا..

فوقى يابتنى دا كلام اغانى.. مفيش حد بيحب حد كدا!!!!!!

- انا مش خياليه ،والحب للدرجه دى عمره ما كان خيال. بكره تشوفى!

[لولا]

-طب بس فهمينى ايه اللى يرضيك؟؟

-معرفتش ترد. بصت للسما وعنيها دمعت!

ياريته يفهم بس ان (اللا شيء) ممكن يرضيها!

تم تعديل 12 أغسطس 2008 بواسطة لولا

[ELSHAMY]

موضوع رائع...

أستطيع أن أقول يا لولا أن الحب بهذا الشكل ليس خيالا...بل هو واقع ملموس...

بس مش كل واحد حيشعر بيه الا اللى اتلسع بناره

[لولا]

-دكتور علاء: بصوا يا ولاد لازم تفهموا حاجه مهمه قوى فى الحياه

انتوا مش حتيجوا تدوسوا على الزرار تلاقوا نفسكم جاهزين للحياه!!

الحياه محتاجه منكم انكم تستعدوا ليها. ابدوا من دلوقت. من اللحظه دى.

[ELSHAMY]

مهيب العزيز

قد يسرح الخيال فى حوارات مماثلة حدثت بالفعل منذ سنين و لكنها محفورة فى الذاكرة...

وقد ينسى المرء حوارات طويلة لم يمضى عليها دقائق....ياترى ليه ؟

السر يكمن فيمن نحاور.... مدى تأثيره....قدرته على الاقناع....قدرتى على تغيير فكرته...و ايضاح موقفى....

فى الحب الجنونى قد لا يفهمك أحد....و لا يجد العقلاء لك مبررا...و قد تجد وسط الطوفان صدرا ترتاح اليه....تبثه زفرات ألمك و مشاعرك المتأججة....غالبا هو قريب منك.....عاش معاناتك أو شىء مماثل لها....عندها ستجد نفسك تفزع اليه دون أن تشعر....و قد تبكى بين يديه....و عندها ستحفر حواراتكم فى ذاكرتك فى مكان لا يصيبه العطب مهما طالت السنين...

صحيح يا لولا قد لا يصدق أحد ان قلنا ان الصمت و الهدوء قد يكونا فى بعض الأوقات أقصى أمانى المحبين...

[لولا]

- الأب فى كتاب مهم عايزك تقريه لما تخلصى امتحانات

-انت بتحجز وقتى من قبل ما اخلص يابابا؟

-دا كتاب قديم عندى وحاسس انك حتتعلمى منه كتير

-طب يا سيدى هاته وحبقى اقراه اول ما اخلص بس هو كتاب ايه؟

-كتاب محمود السعدنى (الولد الشقى فى المنفى)!

-بابا انا احترت بينك وبين ماما انت سياسه وهى ادب!

فى عالم دلوقت اسمه (انترنيت) تسمع عنه حضرتك؟!

- الأب يضحك.. يعنى لازم ياستى تفهمينى انك من عصر الثوره المعلوماتيه..

ما انا كمان ابن الثوره wst::

[مهيب]

هى : "قوللى .. منظر غروب الشمس فى الرياض زى فى مصر كده ... أنا عارفة انك بتحب غروب الشمس قوى"

... : "يعنى ايه غروب ؟؟ يعنى ايه شمس ؟؟ يعنى ايه منظر ؟؟ ... آه .. و يعنى ايه بتحب؟؟؟!!!"

هو : "ياعم وجعت قلبى معاك .. أنا مش فاهم انت عاوز تتجوز ليه يعنى .. مانت زى الفل أهه ... غاوى غم يعنى .. أنا عاوزك تجاوبنى بصراحة انت عاوز تتجوز ليه؟؟ و ماتقليش عشان الاستقرار علشان انت طول عمرك بتقول ان الحياة مفيهاش استقرار... "

... : "أنا عاوز أتجوز علشان يبقى فى كيان أنتمى ليه ... و مستعد أدفع الضريبة من الغم اللى انت بتتكلم عنه فى مقابل الانتماء ده ... "

[مهيب]

الفاضل الشامى كتب :

صحيح يا لولا قد لا يصدق أحد ان قلنا ان الصمت و الهدوء قد يكونا فى بعض الأوقات أقصى أمانى المحبين...

كم لامست عبارتك تلك لب الحقيقة .. ده الشامى طلع مخبى حاجات و محتاجات يا جدعان .

لولا قالت :

- الأب فى كتاب مهم عايزك تقريه لما تخلصى امتحانات

-انت بتحجز وقتى من قبل ما اخلص يابابا؟

-دا كتاب قديم عندى وحاسس انك حتتعلمى منه كتير

-طب يا سيدى هاته وحبقى اقراه اول ما اخلص بس هو كتاب ايه؟

-كتاب محمود السعدنى (الولد الشقى فى المنفى)!

-بابا انا احترت بينك وبين ماما انت سياسه وهى ادب!

فى عالم دلوقت اسمه (انترنيت) تسمع عنه حضرتك؟!

- الأب يضحك.. يعنى لازم ياستى تفهمينى انك من عصر الثوره المعلوماتيه..

ما انا كمان ابن الثوره

لولا .. والدك ده راجل عسل بجد.

مهيب

[لولا]

-اخبار الشتا عندكم فى مصر ايه يا خالتو يا بختكم؟؟

-يا بختنا؟ دا احنا هنا حنتجمد وانتى تقولى يا بختنا!

-امممم . طب خلاص متزعليش عموما احنا هنا فى جده

الجو جميل قوى زى ما انت عارفه!

السما كلها غيوم..ونسمات الهواء العليل مش ممكن اوصفهالك!

وطبعا مفيش حر...احنا حتى منعرفش يعنى ايه حر!!!!!

[لولا]

حوارات شباب طايش فى الجامعه!

-احمد: بصى يالولو هى صحيح صاحبتك ،بس خلاص انا قررت انساها وانسي كل حاجه!

- بسنت :بصى يالولو احمد اصلا مكنش الإنسان المناسب ليا!

انا حكمت عقلى وقررت انساه!

معرفتش اقولهم ايه بعد الكلام اللى قالوه لبعض ..كنت حاسه انى انا اللى انهرت بدالهم!

خليط عجيب من الصدمه،الذهول من الموقف..حب سنتين بقى ولا حاجه فى لحظه!

[ELSHAMY]

أنا فى جدة و "على" ابنى الصغير (4 سنوات) فى الأسكندرية

دار الحوار الأتى:

أنا: ازيك يا علوش

على: بس أنا مش لاقى الساعة بتاعتى

أنا: خلى ماما تشوفهالك فين

على: لأ تعالى انت شوفها فين

أنا: ولا حتى قلت لى وحشتنى يا بابى

على: أصل أنا مش لاقى الساعة

أنا: طب ممكن بوسة صغيرة

على: صوت بوسة...

أنا: صغيرة دى و لا كبيرة ؟

على: صغيرة و كبيرة ايه ؟ باقولك مش لاقى الساعة...

[لولا]

بص يا مهيب..اعتقد كده والله اعلم انى حضرتى عندها الكتير من الحوارات

بس والله خايفه عليك بس من احتلال موضوعك زى ما عملت مع حسام فى مستغرب..

حاكم انا لما بحب موضوع ربنا ما يوريك..بسوده حسب تعبيرك فى مستغرب.

ميرسي يا مهيب على الموضوع بجد حلو قوى وخلانى افتكر حاجات كتير محفوره

فى ذاكرتى.

[ELSHAMY]

حوار دار من سنوات تليفونيا مع أمى الله يرحمها

أنا محاولا جاهدا أن أخفى نبرات صوتى المشحون بمشاكل خنقتنى: ألو يا ماما....ازيك و ازاى صحتك ؟

أمى: مالك يا حبيبى ؟ مال صوتك ؟

أنا و قد عقد لسانى الذهول من قدرتها على قراءة ما بى: أبدا يا ماما بس حبيت أطمن عليكى

أمى: ما تحاولش أنا عارفاك كويس ....أحكيلى ايه فيك...أيه اللى مزعلك

أنا و قد خنقتنى العبرات: انتى عارفة يا ماما أوقات كتير بأكون بس عاوز أسمع صوتك....بيدينى شىء من الاطمئنان ان لسه فيه حد بيحب لى الخير....دون مقابل..

أمى: انت عارف انك روحى و حياتى....أوعى تخلى حاجة تزعلك فى غربتك....

الأن تذكرت المقولة شديدة الصدق: "اذا ماتت الأم نادى منادى فى السماء: أيها الانسان ذهبت التى كنت ترحم من أجلها"

الله يرحمك يا أمى

[shahd]

انا وصديقة عمري

صديقتي : المشكلة دي لازم تتحل ..

وعمالة تفكر ..... وتتكلم ........

انا : يا بنتي مافيش فايدة..

سعد زغلول قال مافيش فااااااااايدة

صديقتي : مين سعد زغلول؟؟؟

أنا : ما تعرفيش مين سعد زغلول ؟؟ ده ايه الجهل ده ؟؟؟؟

صديقتي بغضب شديد وشوية وتحدفني باللي في ايدها

انا بتكلم في ايه وانت في ايه .. يعني انا بكلمك في حل الموضوع وبفكر واخطط وانت تقوليلي سعد زغلول ومافيش فايدة ومش عارفة ا يه !!!!!

أنا : :wub: خلاص خلاص .......

ماهو اصل فعلا مافييييييييييييييش فااااااااااااااااااااايدة

صديقتي: تودي وشها ناحية التلفزيون وتطنشني خاااااااااااااالص :wub:

تم تعديل 12 أغسطس 2008 بواسطة شهد

[shahd]

انا وبابا

ايام الكلية كان بيعدي عليا من الشغل

بابا: دقيقة واحده بس حقف اجيب حاجات للبيت

انا: مستنية في العربية وبابا يتأخر شوية

بابا: يبص في الساعه اتأخرت عليكي ( بابا دقيق جدا في مواعيده)

انا ببستامة : كل دي دقيقة ؟

بابا : يضحك ويقلي: بلاش مغالطة تعالى وبص دي مش دقيقة.. دقيقة ونص

تم تعديل 12 أغسطس 2008 بواسطة شهد

[shahd]

أنا وصحباتي في المدرسة في حصة العربي( ثالث اعدادي)

الأستاذ : مالك يا شهد مكشرة ليه؟

ن: هو انتوا تزعلوا الناس وتنسوا

الأستاذ: انا زعلت شهد

أ: ايوا يا استاذ زعلت شهد وهـــ

الأستاذ: يابنات انا اول ما بطلع من هنا بنسى كل حاجة

شهد ساكته خالص

أ : يا استاذ هيه شهد دايما مكشرة كده

الأستاذ: لالالا شهد دايما مبتسمة ابتسامة خفيفة و(هـــ )بتضحك على طول

الأستاذ : ايه يا شهد انت قلبك اسود

شهد ساكته:

وانتِ يا(هـــ )

هــــ: تشاور بأديها ( نص نص)

الأستاذ: يعني ايه كاروهات

**************************************

حوار اخر بعد فترة طويلة مع نفس الأستاذ

بيشرح في كلمة مسعار

شهد : من اخر كرسي في الفصل وبصوت عالي

مسعار : يعني مسعوووووووووور :wub:

الأستاذ : مين اللي قال مسعور

البنات: شهد يا استاااااااااااااذ

الأستاذ: ياخي ان شالله تنسعري بدريييييييييييييييي

عقلي المستخبي:

استاذي الغالي كنت غلابوية .. قوي وكنت أستاذ وابا فاضلا وحنونا...

شكرا لك ولكل كلمة تعلمتها منك .. لك تقديري واحترامي اينما كنت

اعلم ان كلماتي لن تصلك ولكنك ستظل في ذاكرتي ماحييت

تم تعديل 13 أغسطس 2008 بواسطة شهد

[لولا]

- لسه حاسه انى مقصر نحيتك ؟

- عارف السؤال دا معناه ايه ؟

- معناه انى بحبك، ومش عايز احس انى مقصر نحيتك

-لأ السؤال دا معناه انك حاسس انى فى حدود للى ممكن تدهولى وانى مفروض محسش

انك مفروض تدينى اكتر !

-ليه ديما بتشوفى فى كل حاجه حاجات محدش بيشوفها غيرك؟

-انت رايك كده فيه؟

-انا.. انا..مش عارف!

-اللى بيحب بيدى من غير حدود..مفيش حد معين مفروض نديه و نعمله، عشان بعده نحس اننا مش مقصرين!

الحب هو الشيء الوحيد اللى ملوش حدود!

لما بنحب مهما بندى بنحس ان كل اللى بنديه مش كفايه..الحب بيبدأ بحر يغرق فيه اتنين!

بس بعد كده بيقى اتنين بيغرقوا فى بعض !!

[khedr]

يابني قوم من قدام الزفت ده

هيجيب لك تخلف

( كلمات والدي الخالده الله يرحم الجميع وانا متابع التلفزيون)

ويارتني سمعتى كلامه

مكنتش وصلت للي انا فيه

:wub:

[لولا]

المكان المدرسه

فصل رابعه ابتدائي.ابله الدين.

-يا بنات لا زم تعرفوا ان ربنا بيحبكم،وزى ما هو بيحبكم لازم كمان تحبوه

زى ما هو بيديكم لا زم كمان تدوه عشان كده كلنا لازم نصلى.

فصل سادسه ابتدائي.ابله الرياضيات.

-يا بنات انتوا عارفين فى علامات شهريه للنشاط فى الفصل

انا الشهر دا عايزه اخليها على نشاط خارج نطاق الماده..

كل واحد يحفظ ايه الكرسي وانا حديله علامه النشاط كامله.

* ومن ساعتها وانا حافظه ايه الكرسي زى اسمى ولا يمكن انسي

الأبلتين دول طول عمرى.

تم تعديل 12 أغسطس 2008 بواسطة لولا