حوارات لا ننساها

[الباشدكتور]

استاذي ( مش في المدرسة)

كده كده هتعيش حياتك اللي مكتوبالك هتشتغل وتكسب وتاكل وتشرب وتتجوز وتخلف

طب ما تنوي كل ده لله

النية حاجة بسيطة بس بتفرق اوي

[shahd]

طفلة وأختها الكبيرة في محل في السوق

صاحب المحل بيفرج الأخت الكبيرة على الحاجات اللي عنده

الأخت الكبيرة بعد ماقعدت فترة طويلة تتفرج ومافيش حاجة عجبتها

تقول: حلف عـ المحلات التانية وارجعلك تاني

الطفلة: تبصلها وتقلها قدام الراجل: طالما مش راجعه له بتكذبي ليه؟؟؟؟

الأخت الكبيرة: تنتابها حالة ذهول :blink: ngh:

[shahd]

حوار جد وحفيده اللي عنده 8 سنين

الجد: ايه رأيك نشتريك من بابا وماما وتعيش معانا على طول ونوديك المدرسة اللي جمبنا .. اهيه قريبة ومش محتاجة اتوبيس

الحفيد: موافق بس بشرط ما تودونيش المدرسة

الجد: ليه المدرسة كويسة عشان لما تكبر تبقى متعلم وتقدر تشتغل

الحفيد: لا ماهو ولاد عمي كلهم اتجوزوا وماخلصوش دراسة !!!

الجد: طيب ما هو لو خلصت لحاد الثانوية بس مش حتلاقي شغل كويس عكس الجامعه .. اول ما يشوفوا شهادتك يقولوا ياسلااااااااام دا جامعي..

الحفيد: مش مشكلة حعملي شهادة بالكمبيوتر واحطها مع الملف

الجد: يضحك بس ده عندنا يعتبر غش

الحفيد: بس عندنا لأ

تم تعديل 13 أغسطس 2008 بواسطة شهد

[مهيب]

- هو : "امبارح كنت بكسر بندقة للواد عمر ابنى .. تخيل .. ضرسى هو اللى اتكسر ... قعدت مسهم وانا بافكر ... احنا فعلا بنكبر .. بنكبر و بنشيخ ... و هنموت فى يوم من الأيام قبل مانعرف الاجابة على أسئلة كتير من اللى محيرانا .. قبل مانحس بالسعادة اللى قعدنا نشتغل و نتجوز و نخلف أملا فى اننا نحس بيها .. شفت المصيبة؟؟ "

- ... : "يا عم .. المعيشة الكئيبة اللى احنا عايشينها هنا مش محتاجة أفكار من النوع ده .. اسأل بقى الأسئلة الصح ... الأسئلة اللى اجابتها تنشلنا من الغموض اللى احنا فيه ... اسأل النوكيا N80 هينزل امتى .. و مين اللى خرج امبارح فى ستار أكاديمى .. "

- هو : "هاهاها ... بقيت بتسمع أغانى تركى دلوقتى ؟؟.. حلاوتك و انت عمال تهز راسك ولا انت فاهم أى حاجة .. "

- ... : "أكيد بتتكلم عن الليل و الويل و الميل أو الحب و القلب .. أو الشوق و لفوق .. أى كلام يا عبسلام .. يعنى هيخترعوا يعنى! ... المهم الموسيقى .. و المهم ازاى بتنطق الكلام .. و المهم الاحساس و الانفعال ... "

مهيب

[shahd]

الأخت الصغيرة: انا عايزة اقلك على حاجة

الأخت الكبيرة: خير

الأخت الصغيرة: هو ده الشخص اللي انا بفكر فيه .. انتِ تعرفيه (.....)

الأخت الكبيرة : طب ما انا كنت عارفة

الأخت الصغيرة: عرفتي ازاي؟؟؟

الأخت الكبيرة: سمعتك بتقولي اسمه وانت نايمة

الأخت الصغيرة: طيب وطالما عارفة ما قولتيش ليه؟

الأخت الكبيرة: لو قلت لك اني عارفة مش حتصارحيني .. عكس ما تيجي بنفسك وتقوليلي . برغبتك من غير ما اضغط عليكي.

الأخت الصغيرة: فعلا صح

[shahd]

بابا : بتبصي الناحية التانية ليه

انا : عادي

بابا: الإنسان المتشائم هو اللي يبص على جهتين في شارع اتجاه واحد بس ngh:

تم تعديل 13 أغسطس 2008 بواسطة شهد

[السويفي]

الصديق الاول: انا عاوز اقلك سر بس

الثاني:قول ياسيدي

الاول :والدي عاوز يخطبلي ؟

الثاني :يحاول تغير الموضوع

الاول :(يستمر في تكمله ما بدأه )انا ناوي ان شاء الله بعد مااشوف الجيش بتاعي اتقدم ل(.......)

الثاني: يضحك :blink: mc: :lol:

تصدق اني انا اتقدمتلها تالت يوم العيد ومستني الرد منها

الاول : ngh: لا تعليق

[السويفي]

الصديق: انا سمعت انك ناويه تسيبي الشله

الصديقه:انا الصراحه حيرانه بس الشئ الى انا متاكده منه اني مقدرش اسيبكو

الصديق:وقعت قلبي ياشيخه ده انا كنت فاكر الموضوع بجد

الصديقه:لالالالالا ده كان كلام

بس عاوزاك تقولى رايك بصراحه صدقتنا ده صح ولا غلط

الصديق: في لحظه صدق نادرا ما يمر بها الانسان

بصراحه انت عارفه صداقتك ده بالنسبالي ايه واننا وباقي الجروب مترابطين ازاي ولكن الصداقه ده حرام

وانا قررت اني اسيب الجروب

وتنقلب الايه

الصديقه :لالالالالالا بلاش دلوقتي اجلها شويه

وانتهت الصداقه بكل احترام في لحظه صدق نادره

[السويفي]

في ليله 27 رمضان من 7 سنين

الصديق 1: متيجو نروح نصلي التراويح بدال ما احنا قاعدين كده

الصديق 2: الواحد تقلها في الفطار ومش قادر يتحرك

الصديق 3 :ياجماعه عيب عليكو كل الى في البيت راحو ماعادا احنا الاربعه

الصديق 2:ده التراويح بدأت من بدري وقربت تخلص هنروح مش هنلحق حاجه

الصديق 2:على الاقل نروح نلحق دعاء الختمه

ويذهب الاصدقاء بالفعل ويلحقو صلاه الشفع والوتر ويفتح الله للشيخ بالدعاء لمده 45 دقيقه

وتبدأ دموع الصديق الاول بالانهمار وهو لا يدري السبب وبكي طويلا الى ان انتهي الدعاء

وتغيرت حياه شابان وفتاه بشك مباشر واعداد اخرى بشكل غير مباشر للالتزام كليا بسبب هذا الحوار العادي بعد الافطار

[السويفي]

يوما ما في رمضان من 6 سنين

احنا عاوزين نعمل حاجه السنادي في رمضان

ايه رايكم ندور على عيله مسكينه ونديها شنطه رمضان

خلاص احنا ال 10 هنتكفل بيعله 5 افراد نجيبلها شنطه ب 120 جنيه في الاسبوع

طب هنجمعهم ازاي الفلوس ده

كل واحد يدفع في الاسبوع 10 جنيه

وانا واصحابي في الكليه هنتكفل بعيله 3 افراد ب 80 جنيه في الاسبوع

موافقين ..... خلاص اتوكل على الله

وفي رمضان الى فات

نفس الاصحاب كانو بيوزعو شنط على 40 عيله فى رمضان كل اسبوع بتبرعات نقديه وصلت 12 الف جنيه غير التبرعات العينيه

وده كله بسبب حوار

[لولا]

-هو: وجودك فى حياتى ادانى طاقه غريبه.. حاسس انى اكتشفت نفسي من جديد.

-هى:معاك اتعلمت ازاى اضحك من قلبى من غير ما تبقى الضحكه مجرد خطوط وهميه على ملامحى.

-هو:كانوا بيقولولى السعاده الحقيقيه دى حلم..عمرك ماحتلاقيها

-هى: وصدقتهم؟

-هو:العمر عندى اتقسم نصين ،واحد ضاع منى ، والتانى ابتدى ساعه ما لقيتك.!

[لولا]

-هو:اشتريت تذكرتين لحفله منير

-هى:مش معقول !! أكيد بتهزر !! التذاكر كلها خلصت من زمااان

-هو:واحد صاحبى باعهالى..كنسل يروح مع خطيبته.

-هى:اول مره اروح حفله لمنير.

-هو:عشان تفضلى فاكره العمر كله ان اول حفله لمنير رحتيها كانت معايا.

الأوبرا..الدنيا زحمه موت.. شهر يوليو..الجو النهاره لذيذ..

-هى:حاسه انى فى حلم

اول مره ابقى انا ومجانين منير كلهم فى مكان واحد.. صحيح انت مجنون منير

بس انت مجنون عاقل ! دول مجانين ، مجانين !!

[لولا]

- بتحبيه؟؟

- ---------------

-إمتى حصل الكلام دا ؟؟!!

-فى اليوم التامن !

- تامن ايه ؟!!

-اليوم التامن من الأسبوع !

- انا مش قدك ، ولا قد فلسفتك .

- دى مش فلسفه ، انا حبيته فى اليوم التامن من الأسبوع

الأسبوع سبع تيام ،كل يوم فيه زى التانى..تكرار ممل ! روتين !

انا حبيته فى اليوم التامن ، يوم مش من ضمن الأسبوع ،يوم خارج عن النص !!

[shahd]

هي : جيعانة قوي

هو : ايه مش لسه واكله ساندوتش لحمه امبارح

هي: ياسلااااااااام

هي بعد فترة تقريبا شهر: جيعانه

هو: الله ماانت واكله ساندويتش اللحمة من شهر ولسه جييعاااانة

هي: :) ;)

[shahd]

الأبن: ماما انا عايز عجلة

الأم: مافيش فلوس دلوقتي

الأبن: روحي المكان اللي بيروحله جدو في هناك فلوس كثييييييييييير .. خدي منهم

الأم: تضحك .. ده البنك اللي بيستلم جدو منه مرتبه كل شهر ;)

تم تعديل 13 أغسطس 2008 بواسطة شهد

[لولا]

-هو:مش حينفع تفضلى زعلانه منى كده؟

انا عارف انى غلطان..

بس بعد كام يوم حنكمل سنه على جوازنا..

يرضيك نحتفل بيه كده واحنا زعلانين من بعض.

-هى :انا مقدرش أزعل منك انت عارف كده

-هو:انتى مش شايفه شكلك عامل ازاى ؟انتى مبتتكلميش خالص!

-هى :تعبت من الكلام!

-هو :انتى كده حتموتنى!

-هى:عشان تعبت من الكلام!

-هو :عشان عايزانى افهم السكوت ..

-هى:تفتكر السكوت مش ممكن يتفهم..السكوت كلام صدقنى،السكوت كلام

بيتقال فيه كلام،اكبر من كل كلام!

-هو:فلسفه تانى !

-هى:فعلا ..تانى..عارف ليه ؟ عشان هى كانت اولانى! كنت بتحب فلسفتى

زمان. دلوقت بقت ..حتموتك!

-هو:لأ ، متخلطيش الأمور، انت عارفه انتى ايه بالنسبالى

..انتى عارفه احنا اتجوزنا بعد ايه.. بس انتى عارفه ضغط الشغل والحياه.

-هى: عارفه. وعشان كده ، تعبت من الكلام !

[shahd]

البنت: ماما نفسي في حاجات اشتريها.. عايزة وعايزة وووووو……..

الأم: طيب انتِ حتقدري تشتري.. بس في غيرك ما تقدرش .. لما تشوفك حتتأثر وتزعل لأن ما عندهاش اللي عندك …لازم تفكري في غيرك زي ما بتفكري في نفسك.

البنت: ;) :)

[لولا]

الأخ:امبارح دخلت اوضتك..ايه الورق دا كله الى فى كل حته ومكتوب فيه كلام كتير

- كل حته ايه .. دا على المكتب

-الأخ: ماشي على المكتب ..سايباه كده .. اى حد ممكن يشوفه

-وايه المشكله لما اى حد يشوفه؟!

-الأخ :مش حتزعلى يعنى لو حد قلب فى ورقك..وتقولى دى خصوصياتى

-خصوصيات ! يعنى ايه خصوصيات ؟!!

خصوصيات دى جايه من كلمه حاجه تخصنا.. شيء يخصنا..

خصوصيات دى بتبقى احنا صح ؟؟!! احنا على شويه أحلام إحنا

على شويه جنان، إحنا على شويه هرتلة ا!!

أنا مبحسش ان دى حاجه مفروض نخبيها..

دى هى أنا ، .. وانا هى أنا .. ، وأنا عمرى ما إتكسفت من أنا

وأنا كتاب مفتوح قصاد أنا.. وقصاد أى حد ... مش أنا !!!

-الأخ:لولو انت كده بتضرينا انا واوخوك الغلبان!

- نعم ، انا عملتلك ايه؟

-الأخ:انك كتاب مفتوح انت حره ،بس انا مش كل حاجه احب ماما وبابا يشوفوها

ولما حضرتك فاتحاها كده على البحرى معاهم ، واجى انا اخبى حاجه بيقولولى

اشمعنى اختك مبتخبيش!

- طيب ماترد ، دا انت هنا فى بيت ديمقراطى..

[ELSHAMY]

مكالمة تليفونية مع علوش بالأمس: (علوش ابنى الصغير 4 سنوات ساعات أناديه "زغلول" فى اسكندرية حاليا و أنا فى جدة)

أنا: ازيك يا لولى عامل ايه ؟

على: ازيك يا زغلول phn: ... أنت دلوقتى فى سعودية ؟

أنا: أيوه

على: بس بابى.... أنا امتى أجى عندك؟

أنا: بعد يومين

على: يعنى ننام و نصحى.... و بعدين ننام و نصحى.... و بعدين نسافر

أنا: صح كده..... برافو عليك

على: بس بابى أنا مش بأحب أكل الطيارة

أنا: ليه....؟

على: خد كلم مامى.....

[لولا]

مش عايز أحبك..مش عايز..مش داخل سجنك مش جايز!

-هو : برضه بتسمعى منير.. إعترفى انى انا اللى خليتك تحبيه من البدايه.

-هى:وأعترف ليه ؟ هو انا كنت أنكرت أصلا ؟انا عرفه انك خلتنى احب حاجات

كتير جديده . بس لازم انت تعترف انى تفوقت عليك فى حب منير.

-هو:لأ لايمكن انتى فاكره عشان بقيت مشغول بالشغل خلاص

نسيت منير ، منير دا عندى تاريخ .. تاريخى انا. منير بيقول

الكلمه بحسها بتخرج من جوايا انا.

-هى:يااااه زمان مسمعتكش بتتكلم كده.

-هو:طيب افهمى سكوتى ياستى .. ولا انا بس اللى مفروض يفهم سكوتك؟.

-هى:انا بفهم السكوت .. بس حتى السكوت انواع .. فى سكوت مليان حب

فى سكوت مليان قسوه ، فى سكوت مليان فرااااااااااااااغ ملوش معنى

وفى مليون مليون سكوت.. وكل سكوت له لون.. حتى السكوت ممكن يحركنا!

حتى السكوت ممكن يدوبنا ! حتى ....

-هو: على قد ما بتغلبينى بالفلسفه دى .. بس .............