حوار مع ماما مصر

[ahmadmosa]

الحقيقة انا مش عارف ابتدي الحوار معاكي منين بس بجد الناس فاض بيها واتخنقت والشكاوي كل يوم بتزيد وحالك من سيء لاسوأ , ليه بتعملي كدة فينا واحنا بنحبك؟ ليه بتبيعينا واحنا شاريينك ليه بتقسي علينا واحنا بنقول عليكي ادفى واحن صدر , دة احنا ولادك , شربنا من نيلك واتنفسنا هواكي وجلدنا اسمر من شمسك , دة احنا حتى بسنا ترابك , ضحينا عشانك بارواحنا في اكتوبر وحتى في النكسة , متنا عشان تعيشي عطشنا عشان نرويكي لما حفرنا قناة السويس , قصرنا معاكي في ايه عشان تهجرينا وتطردينا وتسفرينا نشتغل عند الناس ؟ عمرناكي وكل فترة نبني عليكى مدن جديدة ومصانع ومدارس ومساجد وكنايس واسواق وقرى سياحية وكل حاجة ممكن تنورك وتزهرك وتخليكى عروسة وسط الدنيا وكل البلاد الى حواليكي.

ولادنا شرفوكي زويل ونجيب محفوظ كل ابداعاتهم ليكي نسبوها, جدودنا القدام بنوا عليكي الاهرامات وابو الهول الى الدنيا كلها بتيجى من اقصى الارض ومن شرقها لغربها ومن شمالها لجنوبها عشان يشوفوا جمال الاثار دي – دة حتى صنفوها من عجايب الدنيا من كتر مافيها جمال المعمار ودقة التنفيذ وغموضه.

ليه يامصر؟

ليه ياأمي دة احنا ولادك , دة القطة بتخربش لو حد قرب من ولادها وانتى حارمانا من حنانك وحمايتك وسايبانا مطمع لكل طامع. دة جزاءنا يامصر؟ يلي غنينا ليكي ولحنا – يلي نسجنا ليكي وغزلنا – يلي زرعنا ليكي وخضرنا . اخرتها كدة تجوعي شعبك؟ بعد ماخليناكي عروسة دلوقتى بتحرمي شبابنا حتى من الجواز واربع حيطان تسترهم وتحميهم.

معلش انا عارف ان انا طولت قوي في تقديم الحوار وخليته تقريبا هجوم بس اعمل ايه دة مش لسانى دة لسان كل مصري اداكي وملقاش – ضحى عشانك ومقدرتيش تفتكري اكلمك ازاى ؟ انقلك الصورة ازاى ؟ اجاملك؟ لا انا بقولك الحقيقة بكل شفافية وياريت زي ماكنت صريح معاكي حتى وان كنت جاف وقاسي انك تفهمينى وتشرحيلي برضه بكل شفافية وصدق – ليه بتعملي كدة مع ولادك ؟ ليه؟!

• خلصت كلامك يابني ؟ خلصتوا كلامكم ياولادي؟

انا كمان مش عارفة ابتدي منين الحكاية بس هحاول استجمع قواي المنهارة وارد عليكم ومش مهم ابدأ من نقطة معينة انا هتكلم بكل طلاقة وهحاول مرة اكلمكم باسلوب الام البسيطة ومرة باسلوب الام المثقفة عشان كل ولادي يفهموا كلامي والى ييجي على بالي الاول هقوله مش شرط من الاهم للمهم – المهم اتكلم , افضفض

انفجر واطلع كل الى جوايا عشان ارتاح .

يابني . ياكل ولادي انا مش ام وحشة بالعكس انتوا الى ابناء عاقين.

ايوة عاقين وياريت تسمعنى زي مسمعتك .

يابنى انا الى ضحيت عشان انتوا تعيشوا – اتحملت فضلاتكم ومخلفاتكم الى بترموها في نيلي كل يوم وكل ساعة وكل دقيقة ومقلتش احرميهم من المية طالما مش عارفين قيمتها – اديتكم المية ولسة بديهالكم بكل سخاء.

اديتكم الهواء النظيف وانتوا الى لوثتوه باهمالكم وانانيتكم دخان عربيات معدومة وغير صالحة للسير في أي بلد في العالم ورغم كدة حاضناها انا وسايباها انا تمشي في شوارعي وتلف ميادينى – والزبالة الى بتحرقوها في كل شارع وكل حارة وكل نجع وكل كفر متحمله حرارتها ودخانها الخانق ومقلتش لا.

ولدت ليكم ابناء اذكياء وعباقرة وانتوا الى دفنتوهم بانظمة التعليم العقيمة والصروح التعليمية التى لاتصلح حتى حظائر للحيوانات . طلعت ليكم اجيال قادرة على نقل العلم والمعرفة بكل كفاءة واقتدار وانتوا صممتوا على تعيين المدرسين والمعيدين الى ليهم ( معارف ) في (وزارة المعارف ) .

هوة يابني التدريس دة أي حد عارف كلمتين او متخرج من كلية التربية او العلوم او غيرها ممكن يديه من غير ميكون اصلا عنده ملكة التلقين – بس انتوا معاكوا حق مهو التعليم النهاردة مبقاش في المدارس ولا الجامعات , بقة في مراكز او شقق ( سماسرة التعليم ) والمدرسين برضه معاهم حق انا عاذراهم ليه يدرسوا ببلاش ويراعوا ضميرهم لما ممكن يدرسوا بفلوس – هما بس بيروحوا الصبح يمضوا حضور وانصراف وياخدوا مرتبات عشان التزامهم في الدوام – لكن التعليم الى هوة اساس شغلهم مش دة مكانه بالتأكيد.

وبعدين تعالى هنا – خضار ايه وزراعة ايه الى انتا بتتكلم عنها يابني ؟ انتا متعرفش ان كبار المسؤلين عن زراعتنا مش عايزينها زراعية ؟

طب روح كدة شوف احصائيات الاراضي الى اتبورت كم الف فدان عشان ( المية) المية ياناس مبتوصلش لاراضي ولادي الفلاحين الى عايزين يزرعونى قطن وقمح ورز مع انى اديتكم ( النيل ) بس الظاهر انوا بقة لايصلح لري الاراضي الزراعية !– ولادي مبقوش عايزينها خضرا بقوا عايزينها بني او سودا بدخان ( المصانع اليابانية ) الى جاية تقام على ارضي ( الزراعية ) مش الصحراوية !!!!!!

بورتوني يبني وقطعتوا عني ( ميتي ) الى هيا بتاعتي وعايزيني اديكم زرع ؟ دة حتى مية ( المجاري ) بقيتوا ترووني بيها وكمان بالعافية بتلاقوها.

وبتتكلم عن حرب اكتوبر ودم ولادي الشهداء؟ هوة انا الي رحت ( ساومت ) على دمهم ونسيت لعدونا كل قهره وجبروته وعملت معاه ( علاقات طبيعية ) !! علاقات طبيعية ؟ دة انا حتى وصلت لسن اليأس عيب عليكم احترموا شيبتي.

والقناة الى ولادي ماتوا فيها قبل ماتجري المية جواها مش دلوقتى بتعدي ولاد الاعداء عشان يروحوا يضربوا ولاد اختى العراق وولاد افغانستان وغيرهم ؟ ومش عايزني ازعل يبني ؟ بذمتك انتا مش قاسي عليا ياولدي؟

انا ربيتك على كدة ؟ ربيتك على الخيانة والجبن وتغليب السياسة على الاخوة والجيرة؟ قصدك انك مش عايز تزعل ( ماما امريكا ) طب وانا يبنى ( ماما مصر ) مش خايف على زعلي ؟ وبعد دة كله مش عايزني اغضب عليك وازعل منك؟

والناس يبنى الى بتطلع تشتغل برة هية عملت كدة لما لقت معدش شغل عندي لان مفيش مشروعات بتتعمل ودة نتيجة ان الدخل بتاعي ( دخل السياحة وقناة السويس والضرائب ) خسارة يتعمل بيه مشاريع تكبر البلد – لازم يااما يفضل في ( بيت مال الدولة ) او يتصرف على الجيش عشان يعمل عروض عسكرية ويشترى اسلحة ميستخدمهاش في رد العدوان – يستخدمها لاجراء تجارب على ( تأثير الصدأ على الاسلحة القتالية )

انا يبني برضه الحمد لله لسه عندي رجالة جامدين بقوا يدخلوا ( الكليات العسكرية ) عشان يلبسوا البدلة ويدوسوا على نظامي وعلى ولادي الغلابة الى اقل منهم – ولادي بقوا يدخلوا كلية الشرطة مش عشان يحموا ولادي الى مش في كلية الشرطة من السرقة والفوضى والمخالفات ( مع ان دة واجبهم ) وهما ( حراس وخدامين ) لبقية ولادي الي وكلوهم واستأمنوهم على حمايتهم بقوا يدخلوا بس عشان يبرطعوا فيا ويكونوا اول المارقين على نظامي .

وولادي الى بيدخلوا الكليات الحربية مبقوش يدخلوها عشان بقية ولادي وكلوهم واستأمنوهم على ارواحهم واعراضهم من أي عدوان خارجي – بقوا برضه يدخلوها عشان البدلة الحربية الشيك والشقق والمصايف وقاعات الافراح و ( المعاش ) وكدة يعنى انتا فاهمني طبعا .

والمصيبة يابني ان ثلاثة ارباع ولادي دول الى بيدخلوا الكليات دى مش هما اجدر ناس بيها – دول بيدخلوا عشان ولادي الكبار ( بيتوسطولهم ) عشان يدخلوها – يعنى يابنى مش كل مكان ليه الناس الى تنفع فيه؟

ازاى بقة عايزنى اكون ( منضبطة وقوية ) وانتوا مش حاطيين الولاد المناسبين في المكان المناسب ؟

ودى الصورة في جهازين بس من اهم اجهزتي – مابالك بقة بقييييييييييييييييييييية الاجهزة .

لو يبنى حطيتوا صفوة ولادي في اماكنهم الصح هيتغير وضع حاجات كتير في كل المجالات :

الزراعة والري والدفاع والداخلية والتربية والتعليم والصناعة والتجارة و ( الصحة ) ااااااااااه يابنى من الصحة ومن المرافق الطبية الى مفيهاش اى حاجة طبية تصلح لا للانسان ولا للحيوان .

ملايين ومليارات ياولدي اتصرفت وبتتصرف على الى سميتوها ( مدينة الانتاج الاعلامي ) وماشاء الله عليكم ياولاد بنيتوها وبتصرفوا عليها من غير ماحد ( يتبرع ولو بجنيه ) على عكس المستشفى الجميلة الى بتعالج المرض الوحش الى اسمه السرطان دة .

وبعدين مدن ايه وعمران ايه الى بتتكلم عنه يابني دة كبار البلد بيبنوها عشان يكسبوا منها مش عشان يحلوا مشكلة الشباب الى عايز يتستر ويتلم في عشة صغيرة بدل ميروح يقعد على قهوة او يلعب ( بلاي استيشن ) مش اسمه كدة برضه ولا انا غلطت – ولا يروح يتجوز عرفي وييجى احفاد ليا مجهولين النسب ويكونوا ضحايا اباءهم وامهاتهم وفي نفس الوقت يخربوا فيا اكتر منا خربانة ومريضة .

معلش يابني استنى عليا اخد نفسي مش قادرة – جبتولي القلب والضغط والسكر لكن الحمد لله على كل حال اديني عايشة وخلاص.

مش بذمتك معاي حق ازعل منكم واديكم ظهري – دة ربنا يبني بيحرم عباده النعمة لما ميشكروهاش وهو الخالق – عايزني انا المخلوق اقف قدامه واديكم كمان اكتر وتعملوا الى بتعملوه وانا مخلوقة لا حول لي ولا قوة !!!

خلاص ولا اكمل يابني ؟

ااااااااااااااااااه

قلبي غضبان عليكم ليوم الدين ومش هرضى عنكم واصفح واديكم الا لما اليقكم اتغيرتوا وبقيتوا تستاهلوا

دة ربنا قال يابني ( ان الله لايغير مابقوم حتى يغيروا مابأنفسهم )

اديكم زرع ازاى وانتوا ( نشفتوا ريقي ) اديكم امن واستقرار ازاى وانتوا ( ركعتوا لاعدائي ) اديكم صحة ازاى وعلم ازاى يابنى خليك منصف وبلاش تظلمني وبصوا لنفسكم الاول وشوفوا انتوا عملتوا ايه في امكم قبل ماتموت وتعيطوا عليها وتتمنوا لو ترجع للدنيا تاني عشان ترضوها وتكفروا عن عقوقكم معاها وانتا عارف يبني ان الى بيموت مبيرجعش .

[ahmadmosa]

ياه للدرجة دي المقال سيء حتى ان احدا لم يعلق عليه؟ :closedeyes:

[Click]

ياه للدرجة دي المقال سيء حتى ان احدا لم يعلق عليه؟

ليس لأن لم يرد احد ان المقال سيئ..

فقط لي سؤال.. ما هي مصر؟ (اريد تحديد شخصية مصر.. شعب؟.. حكومة؟.. ام ماذا؟)

تم تعديل 29 سبتمبر 2008 بواسطة Click

[moslemah]

السلام عليكم و رحمه الله و بركاته

الحوار حلو جدا و بالرغم من بساطته إلا إنه عميق ف المعنى و المحتوى و بيضم كل اللى عايزين نقوله و حاسين بيه ..بس هو فى مشكله بسيطه انا كنت عايزه اعرفها بما انى لسه شابه و خبرتى بسيييييطه جدا.

1. من اللى بسمعه حولى الكل بيقول المشكله حكومه (طب انا مطلوب منى اعمل ايه بقى) ...

2.و المنطق اللى بفكر فيه بيقول: الناس \الشعب \الجيل الجديد اللى مش منظم افكاره و لا محدد اهدافه و انا منهم برضه هم المشكله ...بس هرد و اقولك لما الشغل كله قدامك يبقى واسطه و المسابقات تتعمل عن الوظايف و تنزل و تسمع عنها بعد ما التعيينات تيجى...طب انا مطلوب منى ايه؟؟!

لما التعليم يبقى كله حشو و ما يتفهمش و النظام التعليمى يكون هدفه (اللى هوه يطلع موظفين حكومه..و الحكومه مش عايزه موظفين) غير اهداف سوق العمل(اللى من وجهه نظرى محتاجه ابتكار و تخطيط و حاجات احنا ما نعرفش عنها حاجه) ..

انا عامه مش بحب اتكلم ف السياسه بس الموضوع و المشاكل اللى حوالينا خلتنى افكر واسأل..هيه البلد دى رايحه على فين؟ هوه مستقبلها ده هيبقى حلو بمين و ازاى؟ الشعب ده هيفضل كده كتيير؟